Lunes, Disyembre 29, 2014

ANG BANAL NA EUKARISTIYA: ANG PINAKAMATAAS NA URI NG PAGSAMBA

Katesismo bilang paghahanda para sa Kapistahan ng Traslacion ng Mahal na Poong Hesus Nazareno 


Noong nakaraang taon, habang sinusubaybayan ko ang Banal na Misa para sa Kapistahan ng Nuestro Padre Jesus Nazareno na ginaganap sa Quirino Grandstand sa pangunguna ng Mahal na Kardinal ng Arkidiyosesis ng Maynila, Luis Antonio Cardinal Tagle, napansin ko na bago awitin ang "Kordero ng Diyos" (Agnus Dei) na nagkagulo na ang mga deboto ng Mahal na Poong Hesus Nazareno at hindi nila tinapos ang Misa. Napanood ko ito una sa livestreaming ng TV Maria. Hindi ko na-gets kung ano ang mangyayari pagkatapos sugurin ng mga deboto ng Mahal na Poong Nazareno ang altar sa Quirino Grandstand dahil walang commentary sa Banal na Misa para sa Kapistahan ng Poong Nazareno. 

Kaya, binuksan ko rin ang livestreaming ng ABS-CBN. Inuulat ng Umagang Kay Ganda na hininto ang Misa dahil sa tigas ng ulo ng mga deboto. Paulit-ulit na sinabihan ang mga deboto na bumaba dahil hindi pa tapos ang Misa, pero, hindi pa rin sila bumaba. Dahil diyan, isinakay na lamang ang imahen ng Mahal na Poong Hesus Nazareno sa carroza na isasakay ng imahen pagkatapos ng Misa. 

Sa kauna-unahang pagkakataon, tinigil ang Misa dahil nagkagulo ang mga kapwa kong deboto ng Mahal na Poong Nazareno na nagkatipon sa Quirino Grandstand. Hindi ako makapaniwala sa aking nakita. Ngayon lang nangyari iyon sa Kapistahan ng Mahal na Poong Nazareno at sa iba pang mga mahahalagang araw sa loob ng Simbahan. Ang Banal na Misa ay hininto dahil matigas ang ulo ng mga debotong nagkagulo bago pa natapos ang Misa. 

Siguro, nakalimutan ng marami sa atin kung bakit napakahalaga ang pagdiriwang ng Banal na Misa. Ang pagdiriwang ng Banal na Misa ay ang pinakamataas na uri ng pagsamba sa Diyos. Sa Banal na Misa, nagkakatipon tayong lahat bilang isang sambayanang Kristiyano upang magbigay papuri at pasasalamat sa Panginoong Diyos dahil sa kaligtasang dulot Niya sa ating lahat sa pamamagitan ng paghahain ng Panginoong Hesus Nazareno ng Kanyang sarili sa krus noong unang Biyernes Santo. 

Bisperas ng Kanyang pagpapakasakit, kumuha si Hesus Nazareno ng tinapay at alak. Ibinigay Niya ang tinapay at alak sa Kanyang mga alagad at sinabi sa kanila na ang tinapay ay ang Kanyang katawan at ang alak naman ay ang Kanyang dugo. May bilin pa nga si Hesus Nazareno sa mga alagad bago Siya namatay - tuwing nagsasalu-salo sa Kanyang Katawan at Dugo ay alalahanin Siya. Sa pagdiriwang ng Banal na Misa, inaalala natin ang pag-aalay ng Panginoong Hesus Nazareno ng Kanyang buhay para sa santinakpan. 

Ang Panginoong Hesus Nazareno ay kasama natin sa Banal na Misa sa pamamagitan ng tinapay at alak. Sa Banal na Misa, ang tinapay at alak ay nagiging Katawan at Dugo ni Kristo. Kasama natin si Kristo sa pagdiriwang ng Banal na Eukaristiya. Siya talaga ay kasama natin. Hindi na ordinaryong tinapay at alak ang makikita natin sa altar. Kaya, napakahalaga at napakasagrado ang Misa sapagkat kasama natin si Hesus. 

Isinasalarawan ng imahen ng Panginoong Hesus Nazareno ang Kanyang pagbangon mula sa Kanyang pagkadapa, habang pinapasan Niya ang krus patungong Kalbaryo. Alam nating lahat kung gaanong makasaysayan at mapaghimala ang imahen ng Nuestro Padre Jesus Nazareno. Pero, hindi iyon dahilan upang ihinto ang pagdiriwang ng Banal na Misa. Sapagkat hindi matatagpuan ang tunay na presensya ng Panginoong Hesus Nazareno sa Kanyang imahen. Matagpuan natin ang presensya ng Panginoong Hesus Nazareno sa tinapay at alak sa Banal na Eukaristiya. Ang imahen ay dapat nating parangalan, huwag sambahin. 

Pagdating ng Misa sa araw ng Kapistahan ng Traslacion ng Mahal na Poong Hesus Nazareno sa Luneta, tandaan po natin na ang Banal na Misa ang pinakamataas na uri ng pagsamba. Ayon sa nababalitaan ko, ginawa nang hatinggabi ang Banal na Misa upang hindi na lapastanganin ang tunay na presensya ni Hesus Nazareno sa Banal na Eukaristiya. Nawa ay huwag nating ulitin ang nangyari sa Kapistahan ng Mahal na Poong Nazareno noong nakaraang taon - ang Misa ay hinijack dahil sa pag-uunahan na makalapit sa imahen ng Mahal na Poong Hesus Nazareno. Hintayin po nating matapos ang Banal na Misa. Tanggapin natin ang Katawan at Dugo ng Panginoong Hesus Nazareno sa Banal na Komunyon. 

WALANG HANGGANG BIYAYA NG DIYOS

Enero 1, 2015 
Dakilang Kapistahan ng Mahal na Birheng Maria, Ina ng Diyos 
Bilang 6, 22-27/Salmo 66/Galacia 4, 4-7/Lucas 2, 16-21 


Madalas kapag nagtatapos ang taon, mapapanood natin sa TV, mapapakinggan sa radyo, o mababasa natin sa dyaryo ang feng shui para sa susunod na taon. Ipinapaliwanag ng feng shui kung paano magiging maswerte ang isang tao para sa taon. Bilang tao, ayaw natin kasi malasin. Gusto natin kasi maging maswerte. Kaya, ang mga tao sa panahon ngayon ay nakatutok sa telebisyon, nakikinig sa radyo, o nagbabasa ng mga dyaryo sa katapusan ng taon upang malaman kung paano silang swswertehin sa susunod na taon. 

Pero, bilang mga Katolikong Kristiyano, dapat ba tayong maniwala sa feng shui? Dapat ba tayong maniwala sa swerte o malas? 

Ang tunay na Katolikong Kristiyano, hindi naniniwala sa swerte o malas. Bagkus, bilang mga Katolikong Kristiyano, naniniwala tayong lahat sa biyaya ng Diyos. Mas dakila ang biyaya ng Diyos kaysa sa swerte o malas. Walang masama ang idudulot ng biyaya ng Diyos. Puro kabutihan para sa ating lahat ang idudulot ng mga pagpapala at biyaya ng Diyos para sa atin. 

Binibigyang-diin ng mga Pagbasa para sa Bagong Taong ito ang mga pagpapala at biyaya ng Diyos sa santinakpan. Sa Unang Pagbasa, mapapakinggan natin na ang Diyos ay mahabagin at mapagpala. Tayong lahat ay pinagpapala, kinahahabagan, at pinapatnubayan sa bawat araw ng ating buhay. Sa pamamagitan ng habag at pagpapatnubay sa atin ng Diyos, tayong lahat ay pinagpapala Niya. Napakarami ang mga biyayang idinudulot ng Panginoong Diyos. 

Ipinapahayag ni Apostol San Pablo sa Ikalawang Pagbasa na ang Panginoong Hesus ang pinakadakilang biyayang tinanggap ng sanlibutan. Ang Panginoong Hesus ay nagkatawang-tao at isinilang ng Mahal na Birheng Maria. Sa pamamagitan ng pagsilang ni Hesus, ang sansinukob ay nakatanggap ng isang dakilang biyaya mula sa Diyos. Alam ng Panginoong Diyos na magdudulot ng kabutihan para sa santinakpan ang pagkakatawang-tao at pagsilang ng Panginoong Hesus sa mundo. 

Sa Mabuting Balita, napakinggan natin na dinalaw ng mga Pastol ang pinakadakilang biyaya ng Diyos sa sanlibutan - ang sanggol na Hesus sa sabsaban. Nakita nila ang kanilang Tagapagligtas, ang Kristong Panginoon. Hindi isang pangkaraniwang sanggol ang sanggol na nakita nila sa sabsaban. Bagamat isinilang ang Sanggol na Hesus sa isang napaka-ordinaryong paraan, hindi Siya pangkaraniwan. Dahil magiging dakila ang Kanyang misyon sa sanlibutan. Ang Sanggol na dinalaw ng mga Pastol sa Betlehem ay si Kristo, ang Manunubos ng sangkatauhan. 

Napakinggan po natin sa mga Pagbasa natin na walang hanggan ang biyaya ng Diyos. Patuloy tayong binibiyayaan ng Diyos sa bawat araw ng ating buhay. Ang Diyos ay isang diyos na puno ng mga biyaya at pagpapala. Walang dahilan upang mawalan tayo ng pananalig sa mga biyaya at pagpapala ng Diyos sa atin. Dahil ang mga biyaya ng Diyos ay siksik, liglig at umaapaw. 

Ang Mahal na Birheng Maria ay isang huwaran para sa ating mga Katolikong Kristiyano. Sa simula ng taong 2015, atin pong tularan ang Mahal na Birheng Maria sa pananalig sa mga biyaya at pagpapala ng Diyos. Bagamat mahirap ang pananagutan niya bilang ina ng Panginoong Hesukristo, hindi siya nawalan ng pananalig sa walang hanggang biyaya ng Diyos. Nananalig si Maria na patuloy siyang pagpapalain at papatnubayan ng Panginoon, anuman ang mangyari sa kanya o kay Hesus. 

O Panginoong Diyos, marami pong salamat sa Iyong mga pagpapala at biyayang ipagkaloob po Ninyo sa amin noong nakaraang taon. Patuloy nawa Ninyo kaming pagpalain, kahabagan, at patnubayan sa bagong taong ito at sa mga taong darating. Amen. 


Linggo, Disyembre 28, 2014

BANAL NA PAMILYA: PAMILYANG NANANALIG, MATAPAT, AT MASUNURIN SA UTOS AT KALOOBAN NG DIYOS

Kapistahan ng Banal na Mag-Anak Hesus, Maria at Jose (B) 
Sirac 3, 3-7. 14-17a (o kaya: Genesis 15, 1-6; 21, 1-3)/Salmo 127 (o kaya: Salmo 104)/Colosas 3, 12-21 (o kaya: Hebreo 11, 8. 11-12. 17-19)/Lucas 2, 22-40 (o kaya: 2, 22. 39-40) 


Ang Unang Pagbasa ayon sa aklat ng Genesis ay tungkol sa pangako ng Panginoong Diyos kay Abraham. Nangako ang Diyos sa ama ng pananampalataya na si Abraham na ang magiging lahi ni Abraham ay magiging sindami ng mga bituin sa langit o ng mga buhangin sa dalampasigan. Bagamat nakakamangha para kay Abraham ang pangakong narinig niya mula sa Panginoong Diyos, nananalig pa rin siya na mangyayari iyon. Kaya't nananalig at tumalima si Abraham sa kalooban ng Diyos. Dahil sa pananalig niya sa Diyos, tinupad ng Diyos ang Kanyang pangako kay Abraham na magkakaroon siya ng anak nina Sara sa kabila ng kanilang katandaan. 

Sa Mabuting Balita naman, napakinggan naman natin ang salaysay ng pagdala ng Mahal na Birheng Maria at San Jose sa Sanggol na Hesus sa Templo ng Jerusalem. Isang tradisyon para sa mga Hudyo ang pagdadala ng mag-asawa sa kanilang anak na kasisilang pa lang sa templo apatnapung araw pagkalipas ng kanyang pagsilang. Bilang mga Hudyo, sinunod ni Maria at Jose ang nasasaad sa batas at tradisyon. 

May naganap din noong si Hesus ay dinala nina Maria at Jose sa templo. Ipinahayag ni Simeon sa Mahal na Birhen na ang puso niya'y tatarakan ng isang balaraw dahil sa magiging misyon ng kanyang anak. Ang pahayag ni Simeon ay napakasakit pakinggan para kay Maria. Nais man ni Maria na ilayo sa panganib ang kanyang anak, pero hindi niya magagawa ito. Bakit? Ang pahayag ni Simeon patungkol sa Sanggol na Hesus ang nagpaliwanag kung bakit hindi mailayo ni Maria sa panganib si Hesus. 

Ang pahayag ni Simeon ay nagdulot ng sakit sa puso ng Mahal na Ina. Ito pa nga ang unang hapis sa pitong hapis ng Mahal na Ina. Ang dulot ng pahayag ni Simeon tungkol sa Panginoong Hesus ay sakit, kirot at hapis sa puso ng Birheng Maria. Ito'y napakasakit tanggapin para kay Maria. Sinong ina ang hindi pa namang masasaktan kapag may nagsabi sa kanya na nanganganib na ang buhay ng kanyang anak? Sinong ina ang hindi masasaktan kapag sinabihan siya na delikado ang mangyayari sa kanyang anak?

Ganun din siguro si San Jose. Bagamat sa Mahal na Birheng Maria lamang sinabi ni Simeon ang pahayag na ito, naramdaman din ni San Jose ang kirot at sakit sa puso ng Mahal na Birhen. Responsibilidad din ni San Jose bilang ama ni Hesus dito sa lupa na ipagtanggol si Hesus nang hindi manganib ang Kanyang buhay. Pero, ipinaalam ng Panginoong Diyos sa pamamagitan ni Simeon kina Maria at Jose na magiging mapanganib ang misyon ni Hesus.

Hindi mailalayo nina Maria at Jose si Hesus sa Kanyang misyon. Ang misyon ni Hesus dito sa lupa ay mamatay bilang hain para sa mga kasalanan ng santinakpan. Naparito si Hesus upang ihain ang Kanyang buhay sa ikaliligtas ng sangkatauhan. Si Hesus ang larawan ng Diyos na mapagmahal, maawain at mapagdamay. Ipinapadama at ipinapakita ng Diyos sa pamamagitan ni Hesus ang Kanyang pagmamahal sa pamamagitan ng pag-aalay ng buhay ni Hesus. 

Sa kabila nito, hindi nawalan ng pananalig sa Diyos ang Mahal na Birheng Maria at si San Jose. Patuloy silang nananalig at sumusunod sa kalooban ng Diyos. Bagamat hindi nila maunawaan nang mabuti kung bakit mapanganib ang landas na tatahakan ni Hesus, hindi nila hahadlangan ang misyon ni Hesus. Alam nina Maria at Jose na para sa kabutihan ang magiging misyon ni Hesus. 

May aral tayong makukuha mula sa Banal na Pamilya nina Hesus, Maria at Jose - laging manalig at sumunod sa utos at kalooban ng Diyos. Ang plano ng Diyos ay para sa kabutihan ng lahat. Walang pagkakamali sa mga plano ng Diyos. Katulad ni Sagrada Familia, manalig at sumunod tayo sa kalooban at utos ng Diyos para sa atin. Ang kalooban ng Diyos ay para sa ikabubuti ang lahat. 

Hesus, Maria at Jose, tulungan Mo kaming sumunod sa plano at kalooban ng Diyos, katulad ng Inyong Banal na Pamilya mula sa Nazaret. Amen. 

Miyerkules, Disyembre 24, 2014

HESUS: ANG DAHILAN AT ANG DAKILANG REGALO SA PAGDIRIWANG NG PASKO

Pagmimisa sa Araw sa Dakilang Kapistahan ng Pasko ng Pagsilang (ABK) 
Isaias 52, 7-10/Salmo 97/Hebreo 1, 1-6/Juan 1, 1-18 (o kaya: 1, 1-5. 9-14) 



Tuwing sasapit ang Pasko, nagmamadali ang lahat ng mga tao sa mga mall at mga department store upang gumala at mamili ng mga regalo at mga pagkain. Bumibili sila ng mga regalo para sa kanilang mga kaibigan, mga kapamilya at kamag-anak, mga mahal sa buhay, at marami pang iba. May ilan nga sa mga kabataan, bumibili ng mga regalo para sa kanilang mga crush o mga kasintahan. Ang ilan naman, pumupunta at namimili sa mga mall dahil naka-sale ang maraming bilihin. Marami din ang namamalengke o bumibili sa grocery upang ipaghanda ang Noche Buena. 

Pero, kapag tinatanong ng mga tao kung bakit nagdiriwang sila ng Pasko, ang sagot lamang nila, "Isa po ito kasing tradisyon taun-taon," at marami pang ibang katulad noon na walang kinalaman patungkol sa kapanganakan ni Kristo. Kapag ang mga bata ay tinatanong, "Sino ang hinihintay ninyo ngayong Pasko?", ang sagot naman nila, "Si Santa Claus po." Sa panahon ngayon, ang Pasko ay tungkol na sa pamimili, pagsasama ng mga kapamilya at kamag-anak, at tungkol kay Santa Claus. 

Mukhang nakalimutan nga ng marami sa atin kung bakit ipinagdiriwang natin ang Pasko. Ipinagdiriwang natin ang Pasko dahil kay Hesus, ang Salitang nagkatawang-tao na tinutukoy ni San Juan Ebanghelista sa ating Ebanghelyo ngayong araw ng Pasko. Si Hesus ang tunay na dahilan kung bakit ipinagdiriwang natin ang Pasko. Ang Diyos, sa pamamgitan ng Diyos Anak, ay nagkatawang-tao at nakipamuhay na kasama natin. Tumawid ang Diyos Anak mula sa langit patungo sa sanlibutan upang dumamay sa buong sangkatauhan. 

"Ang Salita ay nagkatawang-tao, at nakipamuhay sa atin." (Juan 1, 14) Kapag mayroong tanong kung bakit ipinagdiriwang natin ang Pasko, ibinigay sa atin ni San Juan Ebanghelista ang sagot sa katanungang iyon. Ang Salita (si Hesus) ay nagkatawang-tao at nagpakadukha para sa buong sangkatauhan. Ito ang regalo o aguinaldo ng Diyos para sa ating lahat. Walang regalo ng bawat tao sa isa't isa ang makahihigit pa sa aguinaldo ng Diyos para sa buong sangkatauhan - si Hesus, ang Mesiyas, ang Tagapagligtas ng sangkatauhan. 

Kapag tinatanong ang ilan sa atin kung bakit tayo bumibili ng mga regalo, ang madalas nating sinasagot, "Para hindi matampo sa akin ang reregaluhan ko. Kaibigan ko kasi siya, at kung wala akong pamaskong aguinaldo para sa kanya, baka magtampo siya sa akin." May ilan naman, kapag itinatanong kung wala silang regalong tatanggapin o hindi nila nakuha ang kanilang gusto ngayong Pasko, ang sasagutin nila, "Magtatampo ako at wala akong patatawarin kahit kailan!" Kapag Pasko, kailangang may regalo? Kailangang makuha mo ang gusto mo kapag Pasko? 

Ang mga dukha, kahit wala silang regalo, nagdiriwang pa rin sila ng Pasko. Kahit wala silang pamaskong aguinaldo, hindi pa rin sila nagtatampo. Ang mga pulubi ay nakakapagdiwang pa rin ng Pasko at masaya rin ang kanilang pagdiriwang. Wala silang inaasahan kundi ang Diyos. Sapat na ang kanilang pamilya at ang Diyos para sa Pasko. Bagamat naghahangad sila ng magandang buhay, sapat para sa kanila ang pamilya at ang Diyos para sa Pasko. Kilala nila kung sino ang tunay na bida ng Pasko - ang Panginoong Hesukristo. 

May regalo para sa atin ang Panginoong Diyos - ang Panginoong Hesus. Hindi pa ba sapat ang Panginoong Hesus ngayong Pasko? Kay Hesus ang araw na ito at sa Kanya rin ang lahat ng araw. Ang Panginoong Hesus nga ang dahilan kung bakit may Pasko. Ginugunita natin tuwing araw ng Pasko ang Pagsilang ni Hesus, ang Manunubos ng sangkatauhan. Walang dahilan na sabihing, "Hindi sapat ang Panginoon." Dahil si Hesus ang dakilang regalo ng Diyos sa sanlibutan. Gaano mang kamahal ang mga bagay dito sa mundo, walang makahihigit sa halaga ni Hesus. Si Hesus ang pinakadakilang regalo na tinanggap ng sanlibutan. 

Ang regalo ay isang pagpapahayag ng isang tao ng kanyang pag-ibig sa kanyang kapwa, lalo na sa kanyang mga minamahal. Nireregalo ng isang tao ang kanyang mga minamahal dahil sa kanyang pag-ibig. Tayo ay nakatanggap ng isang dakilang regalo mula sa langit noong unang Pasko - ang Panginoong Hesus. Ginugunita natin ngayong araw ng Pasko ang pagsilang ng Mesiyas. Si Kristo ang pinakadakilang regalong tinanggap ng sanlibutan. Walang makakapantay kay Kristo. 

Si Kristo Hesus, ang Anak ng Diyos at ang Ikalawang Persona ng Banal na Santatlo, ay nagkatawang-tao at isinilang upang damayan tayo. Ipinaparamdam sa atin ng Panginoon sa pamamagitan ng pagsilang ng Diyos Anak ang Kanyang habag at pagdamay sa sangkatauhan. Atin pong pasalamatan at tanggapin ang regalo ng mahabagin at mapagdamay na Diyos ngayong Pasko. Walang makakapantay o makakatalo sa Panginoong Hesus ngayong Pasko. Sapagkat Siya ang dahilan ng ating pagdiriwang ng Pasko at ang pinakadakilang regalo na tinanggap ng sanlibutan. 

MULI, MALIGAYANG PASKO PO SA INYONG LAHAT!

Panginoong Hesus, marami pong salamat sa pagparito Mo sa sanlibutan upang ipadama sa amin ang awa at habag ng Diyos. Ikaw ang pinadakilang regalo na tinanggap namin noong unang Pasko. Ikaw ang kaisa-isang dahilan ng pagdiriwang ng Pasko. Amen. 

SANGGOL NA HESUS: PAGPAPATUNAY NG HABAG AT MALASAKIT NG DIYOS SA MGA DUKHA

Pagmimisa sa Hatinggabi sa Dakilang Kapistahan ng Pasko ng Pagsilang (ABK)
Isaias 9, 1-6/Salmo 95/Tito 2, 11-14/Lucas 2, 1-14



Ang Panginoong Hesus ay isinilang sa isang sabsaban. Walang matuluyan ang Mahal na Birheng Maria at si San Jose sa mga bahay-panuluyan. Puno na ang mga bahay-panuluyan na nilapitan nina Maria at Jose. Isang sabsaban lamang ang tumanggap sa Panginoon. Kasama ng Panginoon sa Kanyang pagsilang, bukod pa sa Mahal na Ina at si San Jose, ay ang mga hayop sa sabsaban. Napakahirap para kina Maria at Jose na manatili na lamang sa isang sabsaban para sa araw ng pagsilang ni Hesus. 

Bakit pinili ng Diyos na ipanganak ang Mesiyas sa isang sabsaban? Hindi ba dapat mas nararapat ang Mesiyas na ipanganak sa isang desenteng lugar? Bakit sa isang sabsaban ipinanganak ang Anak ng Diyos? Bakit ba pinayagan ng Diyos na ipanganak si Kristo sa isang sabsaban kung saan mabaho at punung-puno ng mga hayop? Anong uri ng Mesiyas ang isisilang na parang dukha? Hindi ba dapat ang Manunubos ng sanlibutan ay isilang sa isang napakagandang lugar? 

Oo, dapat lamang na ipanganak si Hesus sa isang napakagandang lugar. Pero, ang tanong, bakit hindi nangyari iyon? Sapagkat pinili ni Hesus na magpakadukha. Ipinapakita ng Panginoong Hesus sa pamamagitan ng Kanyang pagsilang sa isang sabsaban na ang Diyos ay malapit sa ating lahat, lalo na sa mga maralita. Naparito ang Panginoong Hesukristo upang ipadama sa sangkatauhan, lalung-lalo na sa mga dukha, ang awa at malasakit ng Diyos. 

Sino naman ang mga dukha? Ang mga dukha ay hindi lamang ang mga mahihirap sa lansangan. Ang pangkaraniwang iniisip natin kasi kapag naririnig natin ang salitang, "dukha," ay ang mga taong mahihirap nasa lansangan at nagmamalimos. Tayong lahat ay mga dukha. Bagamat marami tayong pera at ari-arian, hinahangad pa rin natin ang kaisa-isang bagay na hindi mababayaran ng kayamanan dito sa mundo. Hinahangad ng buong sangkatauhan ang awa at pagdamay ng Diyos. 

Hindi binalewala o pinabayaan ng Diyos ang sangkatauhan. Bagkus, dininig ng Diyos ang pagsamo ng sangkatauhan, lalo ng mga aba. Tumawid ang Diyos, sa pamamagitan ni Hesus, mula sa langit patungo sa lupa. Nagkatawang-tao ang Diyos bilang pagpapatunay na Siya'y kaisa ng buong sangkatauhan sa bawat pangyayari. Ang Diyos ay kaisa nating lahat, sa hirap o ginhawa. Pinatunayan Niya ito noong Siya ay tumawid mula sa langit patungo sa lupa. 

Ipinapamalas din ng Diyos sa pamamagitan ng pagsilang ni Hesus sa sabsaban ang Kanyang habag at malasakit sa lahat ng tao, lalung-lalo na sa mga dukha. Ang Diyos ay maawain at mapagdamay sa lahat ng tao. Nag-aaalala Siya para sa buong sangkatauhan. Sa mga mata ng Diyos, ang buong sangkatauhan ay mga aba. Kahit ang pinakamayamang tao dito sa mundo ay dukha rin sa paningin ng Diyos. Gaano mang karami ang pera o ari-arian ng isang tao, tayo ay mga dukha pa rin. May mga bagay na nais nating makuha, pero hindi lahat ng mga bagay na gusto natin ay mababayaran ng pera. Ang Diyos lamang ang makapagkakaloob ng mga bagay na hindi natin mabayaran. 

Nagdulot ng matinding kagalakan sa langit at sa lupa ang pagsilang ng Sanggol na Hesus. Ang sangkatauhan ay nagalak sapagkat nakapiling nila ang Diyos. Ang langit ay nagalak sapagkat tinupad ng Diyos ang Kanyang pangako sa Kanyang bayang dukha. Ibabalik ng Diyos sa pamamagitan ng Panginoong Hesus ang buong sangkatauhan sa Kanyang mga kamay. Sa pamamagitan ni Hesus, ililigtas ng Diyos ang buong sangkatauhan. Ginawa ito ng Diyos dahil sa Kanyang awa at malasakit sa buong sangkatauhan. 

Sa pagpapatuloy natin ng ating pagdiriwang ng Pasko ng Pagsilang ni Kristo, alalahanin po natin ang awa at habag ng Diyos. Ang awa at habag ng Diyos ay ang dahilan ng pagparito Niya sa sanlibutan. Ipinapadama sa atin ng Diyos sa pamamagitan ng pagsilang ni Kristo ang Kanyang pagdamay sa mga dukha. Sa pamamagitan ng pagsilang ni Hesus sa sabsaban, ipinadama sa atin ng Diyos ang Kanyang habag at pagdamay sa buong sangkatauhan. Iyan ang tunay na diwa ng Pasko - habag at pagdamay. 

MALIGAYANG PASKO SA INYONG LAHAT! 

Panginoong Hesus, maraming salamat sa pagpapadama ng Iyong habag at malasakit sa aming mga dukha sa kaluluwa, sa pamamagitan ng Iyong pagkakatawang-tao at pagsilang. Amen. 

Martes, Disyembre 23, 2014

PURIHIN ANG PANGINOONG DIYOS SA PAGTUPAD NG KANYANG PANGAKO

Ika-9 na Araw ng Simbang Gabi/Misa de Gallo (ABK) 
2 Samuel 7, 1-5. 8b-12. 14a. 16/Salmo 88/Lucas 1, 67-79


Nitong mga nakaraang araw ng ating Pagsisiyam bilang Paghahanda sa Pasko ng Pagsilang ng Panginoong Hesukristo, ang pinagninilayan natin ay ang pagpupuri sa Diyos at ang katapatan ng Diyos sa Kanyang mga pangako. Muli na naman nating pinagninilayan ang temang ito, lalung-lalo na ngayong huling araw ng Simbang Gabi o Misa de Gallo. Binibigyang-diin ng Ebanghelyo para sa mga huling tatlong araw ng Simbang Gabi ang pagpupuri at pasasalamat sa Diyos dahil sa pagtupad sa mga pangako Niya sa sangkatauhan. 

Dalawang awitin ang matatagpuan natin sa unang kabanata ng Mabuting Balita ayon kay San Lucas. Ang una ay ang "Magnificat" o ang awit ng Mahal na Birheng Maria (Lucas 1, 46-55). Sa unang awitin na mababasa natin sa Ebanghelyo ayon kay San Lucas, mapapakinggan natin na pinupuri ni Maria ang Diyos dahil sa paglingap Niya sa mga aba. Pinupuri ng Mahal na Ina ang Diyos dahil sa awa at malasakit ng Diyos sa mga aba. Tinutupad ng Diyos ang Kanyang pangako sa Kanyang bayang hinirang dahil sa Kanyang habag at pagdamay sa kanila, lalo na sa mga maralita. 

Ang ikalawang awitin na matatagpuan sa unang kabanata ng Ebanghelyo ni San Lucas ay ang "Benedictus," ang awit ni Zacarias (Lucas 1, 67-79) na narinig natin sa Ebanghelyo natin ngayon. Nagbigay-papuri sa Diyos si Zacarias dahil sa katapatan ng Diyos sa Kanyang pangako. Pagkatapos ng siyam na buwan ng katahimikan, nagbigay-papuri si Zacarias sa Diyos. Masasabi natin na pinagnilayan ni Zacarias sa loob ng siyam na buwan ng kanyang pagkapipi at pagkabingi kung gaano kabuti ang Diyos. At ngayong nakakapagsalita na si Zacarias, nagbigay-papuri siya sa Diyos dahil sa Kanyang kabutihan. 

Hindi naniwala si Zacarias sa kabutihan ng Diyos noong ipahayag sa kanya ng anghel na magkakaroon sila ng anak nila Elisabet. Dahil doon, sinumpaan siya ng Diyos na siya'y magiging pipi at bingi sa loob ng siyam na buwan hanggang sa isilang ang kanilang anak. Sa loob ng siyam na buwan na iyon, pinagnilayan ni Zacarias sa katahimikan ang kabutihan ng Diyos. Doon niya natuklasan na ang Diyos ay isang Diyos ng kabutihan at katapatan. Ang Diyos ay tumutupad sa Kanyang pangako sa Kanyang bayang hinirang. 

Ang kahulugan ng pangalang "Juan" ay "Magiliw ang Diyos," o "Mabait ang Diyos," sa simpleng Tagalog. Ang pagsilang ni San Juan Bautista ang katunayan ng kabaitan ng Panginoong Diyos. Dahil sa kagiliwan ng Diyos, tinutupad Niya ang Kanyang pangako. Ang Diyos ay walang katulad. Kakaiba ang Diyos. Nangyayari ang lahat ng Kanyang mga pangako. Kapag nangangako ang Diyos, nangyayari at natutupad ang Kanyang pangako. Matapat ang Diyos sa Kanyang mga pangako. 

Kaya, nararapat lamang na purihin ang Diyos. Ang Diyos ay dapat purihin ng lahat ng tao. Walang pangako na hindi Niya tinutupad. Matapat ang Diyos sa Kanyang mga pangako. Tinutupad Niya ang Kanyang mga pangako. Walang imposible para sa Diyos. Ang lahat ay mapangyayari ng Diyos, kung ito'y niloloob Niya. Walang makakahadlang sa pagtupad sa kalooban ng Diyos. 

Huling araw na po ng ating Pagsisiyam bilang paghahanda para sa Pasko ng Pagsilang ng Panginoon sa pamamagitan ng Simbang Gabi. Malapit nang matapos ang ating paglalakbay kasama ang Mahal na Ina bago isilang ang Mesiyas. Sa Misa sa Hatinggabi ng Pasko ng Pagsilang, mapapakinggan natin ang mga anghel na umaawit ng Papuri sa Diyos dahil sa katuparan ng Kanyang pangako sa Kanyang bayan. Sa pamamagitan ng pagsilang ng Panginoong Hesus sa sabsaban, isinilang ang kaligtasan ng sanlibutan. 

Samahan natin ang lahat ng mga anghel at banal sa langit sa pagbibigay papuri at luwalhati sa Diyos dahil sa kabutihang ipinamalas Niya sa buong sangkatauhan. Ang katuparan ng Kanyang mga pangako ay nagpapatunay sa kabutihan ng Diyos. Sa pamamagitan ng pagsilang ni San Juan Bautista at ang pagsilang ni Hesukristo (na ating ipagdiriwang mamayang gabi), tinupad ng Panginoong Diyos ang Kanyang pangako sa sangkatauhan. Dapat nating purihin ang Panginoong Diyos dahil sa katapatan at pagtupad sa Kanyang mga pangako sa sangkatauhan. 

Panginoong Diyos, buong puso namin Kayong pinupuri at pinasasalamatan dahil sa katapatan Mo sa Iyong pangako sa amin. Amen. 

Lunes, Disyembre 22, 2014

KAGALAKAN SA KATUPARAN NG PANGAKO NG DIYOS

Ika-8 Araw ng Simbang Gabi/Misa de Gallo (ABK) 
Malakias 3, 1-4. 23-24/Salmo 24/Lucas 1, 57-66 


Kung maaalala natin ang Ebanghelyo noong Biyernes, ang Ebanghelyo ay tungkol sa pagpapahayag ng Arkanghel Gabriel kay Zacarias. Nagpahayag ng isang magandang balita ang Arkanghel Gabriel kay Zacarias na siya'y magkakaroon ng anak nila Elisabet. Ang maipanganganak ni Elisabet ay walang iba kundi si San Juan Bautista, ang tagapaghanda ng daraanan ng Panginoon. Subalit, pinagdudahan ni Zacarias ang mga sinabi ng anghel. Dahil doon, siya'y pinarusahan. Ano ang kanyang parusa? Mananatili siyang pipi at bingi hanggang sa araw ng pagsilang ni San Juan Bautista. 


Ang Ebanghelyo naman natin ngayong ika-8 araw ng Simbang Gabi o Misa de Gallo ay tungkol sa pagsilang ni San Juan Bautista. Ito ang araw na itinakda ng Diyos na makakapagsalita muli si Zacarias. Hindi magtatagal ang parusa ng Diyos kay Zacarias. Magwawakas ang parusa ng Panginoon kay Zacarias sa araw ng pagsilang at pagtutuli ng kanilang anak nila Santa Isabel na walang iba kundi si San Juan Bautista. 

Tinupad ng Diyos ang Kanyang pangako kina Zacarias at Elisabet. Hindi Niya binigo sina Zacarias at Elisabet. Sa pamamagitan ng pagsilang ni San Juan Bautista, ipinapakita ng Diyos na walang bagay na hindi Niya mapangyayari. Walang imposible para sa Diyos. Walang hindi mapangyayari ang Diyos. Mangyayari sa bawat araw ang kalooban ng Diyos. Kung ang tao'y madalas nabibigo dahil sa hindi pagtupad sa plano, hindi nabibigo ang Diyos. Nangyayari ang lahat ng kagustuhan ng Diyos. 

Si San Juan Bautista ang katuparan ng pangako ng Diyos kina Zacarias at Santa Isabel. Sa buhay ni San Juan Bautista sa lupa, may isa siyang napakahalagang papel sa buhay ni Kristo. Ihahanda niya ang lahat ng tao upang salubungin ang Mesiyas. Siya ang maghahanda ng daan para sa Mesiyas na walang iba kundi si Hesus. Kaya nagagalak sina Zacarias, Elisabet at ang kanilang mga kamag-anak dahil ang batang ito ay ang katuparan ng pangako ng Diyos. May isang mahalagang papel na gagampanan ng batang ito sa kanyang buhay. 

Hindi lang kina Zacarias, Elisabet at sa kanilang mga kamag-anak nagdulot ng kagalakan ang kapanganakan ni San Juan Bautista. Nagalak din ang langit sa kapanganakan ni San Juan Bautista. Bakit? Sapagkat malapit na malapit nang isilang ang Mesiyas. Isinilang na ang tagapaghanda ng daraanan ng Mesiyas. Ang pagsilang ni San Juan Bautista ay ang hudyat na malapit nang isilang si Hesus. Malapit nang isilang ang Manunubos ng sangkatauhan. 

Matapat ang Diyos sa mga pangakong binibitiwan Niya. Hinding-hindi Niya tayo bibiguin. Walang imposible para sa Diyos. Ang lahat ng bagay ay mapangyayari ng Diyos, kung ito'y niloloob Niya. Sa tuwing tinutupad ng Diyos ang Kanyang pangako, ito'y nagdudulot ng malaking kagalakan sa lahat. Kung ang tao ay may mga pagkakataon na hindi tinutupad ang kanyang pangako sa kanyang kapwa-tao, tinutupad ng Diyos ang lahat ng Kanyang pangako. 

Dalawang araw na lamang po at ipagdiriwang nating lahat ang Kapaskuhan. Malapit na malapit na ang Pasko ng Pagsilang ng Panginoon. Sa unang Pasko, tinupad ng Diyos ang Kanyang pangako sa sangkatauhan. Nangako ng Diyos na ipapadala Niya ang Mesiyas, ang Manunubos ng sangkatauhan. Matutupad ang pangakong iyon sa pamamagitan ni Hesus. Ang pagsilang ni Hesus ay magdudulot ng malaking kagalakan sa langit at sa lupa dahil tinupad ng Diyos ang Kanyang pangako sa Kanyang bayang hinirang. Walang bibiguin ang Diyos kahit kailan. 

O Diyos, buong galak namin Kayo pinupuri at pinasasalamatan dahil sa pagtupad ng Inyong pangako sa aming lahat. Amen. 

Linggo, Disyembre 21, 2014

KAGALAKAN AT PAGPUPURI SA PANGINOONG DIYOS

Ika-7 Araw ng Simbang Gabi/Misa de Gallo (ABK) 
1 Samuel 1, 24-28/1 Samuel 2/Lucas 1, 46-56



Ang Mabuting Balita ngayon ay tungkol sa isang awit. Ang awiting ito ay ang "Magnificat" - ang awit ng Mahal na Birheng Maria. Buong pusong nagalak at nagpuri ang Mahal na Ina sa ating Panginoon dahil sa kabutihang pinamalas Niya sa pamamagitan ng Mahal na Ina. Isang abang dalaga lamang si Maria, ngunit siya'y naging kalugud-lugod sa paningin ng Diyos. Sa Ebanghelyo kahapon, hinirang si Maria na maging ina ni Hesukristo, buong puso niyang tinanggap at tumalima sa utos ng Diyos. Ipinahayag ni Maria na siya'y alipin ng Panginoong Diyos. 

Sa Ebanghelyo ngayon, pinuri naman ni Maria ang Diyos. Ang abang alipin ay nagpuri nang buong kagalakan sa kanyang panginoon. Pinuri ni Maria ang Diyos dahil sa Kanyang sorpresa, hindi lamang para kay Maria kundi para sa buong sangkatauhan. Nagagalak si Maria dahil sa paglingap ng Diyos sa Kanyang mga alipin. Ang mga aba ay dinakila ng Diyos. Ang Mahal na Birheng Maria ay isang halimbawa ng paglingap at pagdakila ng Diyos sa Kanyang mga alipin. 

Matatagpuan rin sa Ebanghelyo ni San Lucas kung saan sinabi ni Hesus, "Ang sinumang nagpapakataas ay ibababa, at ang nagpapakababa ay itataas." (Lucas 18, 14) Bukod pa kay Hesus, ang isa sa napakagandang halimbawa ng pagpapakababa ay si Maria. Nagpakababa si Maria sa harapan ng Diyos, at ito'y naging kalugud-lugod sa Diyos. Sa pamamagitan ng pagtalima ni Maria sa kalooban ng Diyos, ipinapakita niya ang kanyang kababaang-loob sa harapan ng Diyos. Tumalima si Maria sa kalooban ng Diyos dahil nananalig siya na mas dakila at maganda ang plano ng Diyos. 

Bakit dinakila ng Diyos ang Mahal na Birheng Maria? Dahil dinakila ng Mahal na Birheng Maria ang Diyos sa pamamagitan ng kanyang fiat. Ang pagtalima ni Maria sa kalooban ng Diyos ay ang pamamaraan ni Maria upang purihin at dakilain ang Diyos. Sa pamamagitan ng pagtalima ni Mahal na Birhen sa kalooban ng Diyos, ipinapakita ng Mahal na Birhen na mas maganda at dakila ang plano ng Diyos. Ipinapakita rin ng Mahal na Ina na tapat ang Diyos sa Kanyang mga pangako at wala Siyang bibiguin. 

Kaya naman ngayon, pinupuri ng Mahal na Birheng Maria ang Diyos dahil sa pagtupad ng Diyos sa Kanyang pangako. Nananalig si Maria na mangyayari at matutupad ang plano ng Diyos para sa sangkatauhan. Alam ni Maria na hindi siya bibiguin ng Diyos. Alam ni Maria na ang Diyos ay tapat sa pangakong binitiwan Niya. Hindi nambibigo ang Diyos. Tapat ang Diyos sa mga pangakong binibitiwan Niya. 

Malapit na ang araw ng Kapaskuhan. Ilang araw na lamang po at darating na ang araw na pinaghahandaan natin sa pamamagitan ng apat na Linggo ng Adbiyento at siyam na araw ng Simbang Gabi o Misa de Gallo. Sa pagpapatuloy ng ating Pagsisiyam sa Simbang Gabi bilang paghahanda para sa Pasko ng Pagsilang ni Hesus, samahan natin si Maria na purihin ang Banal na Santatlo - Ama, Anak at Espiritu Santo - dahil hindi nambibigo ang Diyos. Ang Banal na Santatlo, bagamat tatlo, ay iisang Diyos pa rin. Sila ay iisa. Hindi tayo bibiguin ng Banal na Santatlo. 

O Banal na Santatlo, buong puso at kagalakan namin Kayong pinupuri, kasama ng Mahal na Birheng Maria. Amen.

Inang Maria, ipanalangin mo kami. 

Sabado, Disyembre 20, 2014

FIAT NI MARIA: DAAN UPANG IPANGANAK SI HESUS

Ika-4 na Linggo sa Panahon ng Pagdating ng Panginoon (B)
Ika-6 na Araw ng Simbang Gabi/Misa de Gallo 
2 Samuel 7, 1-5. 8b-12. 14a. 16/Salmo 88/Roma 16, 25-27/Lucas 1, 26-38 


Muli nating mapapakinggan ngayong Ika-6 na Araw ng Simbang Gabi o Misa de Gallo ang salaysay ng pagbabalita ng Arkanghel Gabriel sa Mahal na Birheng Maria. Kung ang ating Simbang Gabi ay parang isang palabas sa telebisyon, masasabi nating ni-replay ang ating Ebanghelyo sa Ebanghelyo natin kahapon. Ang dahilan nito ay dahil tumugmak ang araw na ito sa Ika-4 na Linggo ng Adbiyento. At ngayong Taon B sa ating Kalendaryo Panliturhiya, ang Ebanghelyo ngayong Linggong ito ay tungkol sa pagbabalita ng Arkanghel Gabriel sa Mahal na Birheng Maria. 

Napakagandang pagnilayan ngayong kapanahunan ng Adbiyento ang pagtalima ng Mahal na Birheng Maria sa kalooban ng Diyos. Ito ang nagbigay ng pahintulot sa Diyos upang maganap ang Kanyang kalooban. At ano ang kalooban ng Diyos? Isugo si Hesus, ang Mesiyas, upang iligtas ang sangkatauhan mula sa pagkaalipin. 

Ang sangkatauhan ay inalipin ng kasamaan at kasalanan. Pumasok ang kasamaan at kasalanan sa mundo dahil sa pagkakasala ni Eba at Adan. Sinuway nina Eba't Adan ang utos ng Diyos sa Halamanan ng Eden. Ito'y naging daan upang pasukin ng kasamaan at kasalanan ang sanlibutan upang alipinin ang sangkatauhan. Labis nasaktan ang Diyos sa pagkaalipin ng sangkatauhan sa kasalanan. 

Dahil doon, nais ng Diyos na iligtas ang sangkatauhan mula sa pagkaalipin. Hindi kalooban ng Diyos na mamuhay ang tao bilang mga alipin ng kasamaan at kasalanan. Nais nga ng Diyos na maging malaya ang sangkatauhan upang sila'y makapaglingkod sa Kanya. Kaya nagdesisyon ang Diyos na isugo ang Pangalawang Persona ng Banal na Santatlo - ang Kanyang Bugtong na Anak na si Hesukristo, upang maging Tagapagligtas ng sangkatauhan. 

Sa pamamagitan ng pagsugo ng Ama kay Hesus, nais ipadama ng Diyos sa sangkatauhan ang Kanyang dakilang pag-ibig. Ang Diyos ay magkakatawang-tao at mamumuhay bilang tao, katulad natin. Pero, bago makumpleto ang planong iyon, kinailangan ng Diyos na lumabas mula sa sinapupunan ng isang babae. Walang babaeng noong kapanahunang iyon ay naging marapat at kalugud-lugod sa Diyos upang maging Kanyang ina sa lupa. Isang babae lamang ang naging kalugud-lugod sa Diyos upang maging ina ng Mesiyas - si Maria. 

Ang fiat o ang pag-sang-ayon ng Mahal na Ina sa kalooban ng Diyos ay naging daan upang pumasok ang kaligtasan sa sanlibutan. Naging daan ang pagtalima ni Maria sa kalooban ng Diyos upang pumasok ang Panginoong Hesukristo sa sanlibutan. Siyam na buwan na dadalhin ni Maria si Hesus sa kanyang sinapupunan. Palalakihin ni Maria si Hesus hanggang sa pagsapit ng panahon kung kailan sisimulan ni Hesus ang Kanyang pangangaral. 

Malapit na ang Pasko. Ilang araw na lamang at Pasko na. Sa ating paglalakbay sa mga huling araw bago ang Pasko, lalung-lalo na sa Simbang Gabi, samahan natin ang Mahal na Birheng Maria. Ang siyam na araw ng Simbang Gabi ay sumasagisag sa siyam na buwan ng pagdadala ng Mahal na Birheng Maria sa Panginoong Hesus. Napakagandang pagnilayan ngayong mga huling araw bago sumapit ang Pasko ang pagtalima ni Maria sa kalooban ng Diyos. 

Si Maria ay naging daan upang matupad ang plano ng Panginoon para sa kanya at sa buong sangkatauhan. Marapat lamang na parangalan natin si Maria para sa kanyang pagtalima at pag-sang-ayon sa kalooban ng Panginoong Diyos na maging ina ni Hesus sa lupa. Nawa'y tularan natin ang fiat ni Maria. Buong puso at lakas nawa tayong sumang-ayon at tumalima sa kalooban ng Diyos, katulad ni Maria.

Panginoong Hesus, tulungan Mo kaming tumalima at sumang-ayon sa kalooban ng Amang Diyos nang may buong puso at pananalig, katulad ng Iyong Mahal na Ina, ang Mahal na Birheng Maria. Amen. 

Inang Maria, ipanalangin mo kami. 

Lunes, Disyembre 15, 2014

MARIA: NANALIG AT TUMALIMA SA KALOOBAN NG DIYOS

Disyembre 20, 2014 
Ika-5 Araw ng Simbang Gabi/Misa de Gallo (ABK) 
Isaias 7, 10-14/Salmo 23/Lucas 1, 26-38 



May pagkakaiba ang Ebanghelyo natin ngayon sa Ebanghelyo natin kahapon. Sa Ebanghelyo natin kahapon, natunghayan natin ang pagdududa ni Zacarias sa kalooban ng Diyos. Humingi pa nga siya ng tanda sa arkanghel Gabriel kung paano niya matitiyak na totoo ang mga naririnig niya. Dahil doon, si Zacarias ay naging bingi at pipi. Pero sa Ebanghelyo natin ngayon, matutunghayan natin ang pananalig at pagtalima ni Maria sa kalooban ng Diyos. 

Alam ng Mahal na Birheng Maria na isa siyang dalaga. Wala pa siyang alam tungkol sa pagiging ina. Hindi niya maunawaan nang mabuti ang mga sinabi ng anghel sa kanya. Masasabi nating nagulat si Maria nang marinig niya mula sa anghel na siya ay magiging ina. Isang mahirap na responsibilidad ang pagiging ina para sa mga babae. Hindi madali para sa mga babae ang pagiging ina. 

Kung ikukumpara natin ang tanong ni Maria sa Ebanghelyo ngayon sa tanong ni Zacarias sa Ebanghelyo kahapon, makikita natin na hindi nagdududa si Maria. Walang pagdududa sa tanong ni Maria. Bagamat nakakamangha at hindi niya maintindihan ni Maria ang sinabi ng anghel sa kanya, hindi siya nagduda. Si Zacarias ay nagduda dahil nakakamangha at hindi niya maintindihan ang sinabi ng anghel. Humingi pa nga siya ng tanda mula sa anghel kung paanong mangyayaring manganganak si Elisabet. Si Maria ay hindi humingi ng tanda mula sa anghel. 

Ang buhay ng dalagang si Maria ay nagbago dahil sa balitang tinanggap niya mula sa anghel. Masasabi natin na gustong mamuhay ng simple si Maria kasama ni San Jose na kanyang magiging asawa. May mga plano si Maria para sa kanyang sarili. Pero, nagbago ang lahat ng plano ng Mahal na Ina para sa kanyang sarili. Ibinalita ng Arkanghel Gabriel kay Maria na siya ay hinirang ng Diyos upang maging ina ni Hesus, ang Mesiyas na hinihintay ng bayang Israel.

Sa kabila ng pagiging dalaga ng Mahal na Birheng Maria, pinili pa rin niyang tumalima sa kalooban ng Diyos. Ang malalim na pananalig ni Maria sa Diyos ang nag-udyok sa kanya upang sundin ang kalooban ng Diyos. Buong pusong tinanggap at tumalima si Maria sa kalooban ng Diyos. Bagamat may mga pagsubok na darating din sa kanyang buhay bilang ina ni Kristo, nananalig pa rin siya sa kalooban ng Diyos. Tumalima pa rin si Maria sa kalooban ng Panginoong Diyos, kahit may mga bagay na mangyayari na hindi niya maintindihan. 

Sa pamamagitan ng pananalig at pagtalima ni Maria sa kalooban ng Diyos, natupad ang hula ni propeta Isaias sa Unang Pagbasa. Ipinahayag ni propeta Isaias sa Unang Pagbasa na isang dalaga ay maglilihi at manganganak ng isang sanggol na lalaki at tatawagin itong Emmanuel. Ang pahayag na ito'y natupad sa pamamagitan ni Maria. Si Maria ang dalagang tinutukoy ni Propeta Isaias sa kanyang hula tungkol sa kapanganakan ng Mesiyas. Ang sanggol na lalaki na tatawaging Emmanuel ay walang iba kundi ang Panginoong Hesukristo, ang Diyos na lagi nating kasama. 

Isang tunay na huwaran para sa ating mga Kristiyanong Katoliko ang Mahal na Birheng Maria. Kahit mahirap ang ipinapagawa sa kanya ng Diyos, hindi ito naging dahilan para kay Maria upang takasan at suwayin ang kalooban ng Diyos. Bagkus, pinili ni Maria na manalig at tumalima sa kalooban ng Diyos. Kahit hindi niya maintindihan ang mga bagay na darating sa kanya o sa kanyang anak na si Hesus, hindi nawala ang pananalig at pagsunod ni Maria sa kalooban ng Diyos. 

Panginoon, tulungan Mo kaming maging masunurin sa Iyong kalooban, katulad ng Mahal na Ina, ang Mahal na Birheng Maria. Amen. 

Linggo, Disyembre 14, 2014

MAGING MAPAGPASENSYA

Disyembre 19, 2014 
Ika-4 na Araw ng Simbang Gabi/Misa de Gallo (ABK) 
Mga Hukom 13, 2-7. 24-25a/Salmo 70/Lucas 1, 5-25



Tampok sa Ebanghelyo natin ngayong Ika-apat na Araw ng Simbang Gabi o Misa de Gallo si Zacarias, ang ama ni San Juan Bautista. Si Zacarias ay isang saserdote na naglilingkod sa templo. Siya ang asawa ni Santa Isabel, ang kamag-anak ng Mahal na Birheng Maria. Bagamat matagal na silang kasal ni Santa Isabel, wala pa silang anak. Baog pa nga ang tawag ng mga tao sa panahong yaon kay Santa Isabel dahil wala pa siyang anak. Matagal na nilang ipinagdarasal na magkaroon ng anak, pero wala pa rin silang anak. Nawalan ng pag-asa si Zacarias na magkaroon ng anak. 

Noong ibinalita kay Zacarias na manganganak ang kanyang asawang si Santa Isabel, nagulat at nagduda si Zacarias. Hindi siya makapaniwala na sa kabila ng kanyang katandaan ay magkakaroon siya ng anak. Sa mata ng mga tao, masyado na raw matanda sila ni Santa Isabel na magkaroon ng anak. Hindi na raw sila pwedeng magkaroon ng anak. Imposible na para kina Zacarias at Santa Isabel upang magkaroon ng isang anak dahil masyado na silang matanda. 

Isang balitang hindi kapani-paniwala ang narinig ni Zacarias. Walang masabi si Zacarias dahil nakakagulat naman ang balitang iyon. Pagkatapos ng maraming taon, kung kailan tumanda, saka pa siya magkakaanak. Mukhang imposible naman iyon para kay Zacarias. Nagduda si Zacarias sa sinabi ng anghel. Kailangan ni Zacarias ng tanda upang malaman na totoo ang sinasabi sa kanya ng Arkanghel Gabriel. Para kay Zacarias, imposibleng mangyari ang sinasabi sa kanya ng Arkanghel Gabriel. 

Matagal nang ginusto ni Zacarias na magkaroon ng anak ni Elisabet. Nagdasal silang dalawa ni Elisabet nang matagal na panahon upang magkaroon ng anak sila. Pero, habang lumilipas ang panahon, nainip si Zacarias at nawalan na siya ng pag-asa na magkakaroon sila ng anak ni Elisabet. Kinalimutan na niya ang plano na magkaroon ng anak dahil para sa kanila, hindi naman sila pinakikinggan ng Diyos. Akala ni Zacarias na mamamatay sila ni Elisabet na walang anak. 

Dahil sa pagdududa at kawalan ng pag-asa ni Zacarias sa kalooban ng Diyos, pinarusahan siya ng Diyos sa pammagitan ng anghel. Si Zacarias ay sinumpaan ng Diyos. Siya'y magiging pipi hanggang sa pagsilang ni San Juan Bautista, ang magiging anak nila ni Elisabet. Kung nanalig lamang si Zacarias sa kalooban ng Diyos, hindi siya magiging pipi. May parusa si Zacarias na kailangan niyang danasin dahil sa kanyang pagdududa at kakulangan ng pananalig at pag-asa sa Diyos. 

Ano ang matututo natin sa karanasan ni Zacarias? Maging mapagpasensya. Hindi lahat ay minamadali. Hindi lahat ng bagay ay dumarating sa panahon na nais natin. May panahon kung kailan ipagkakaloob ng Diyos ang ating mga kahilingan at pangangailangan. Tutugon ng Diyos ang ating mga panalangin at kahilingan sa Kanya pagdating ng tamang panahon. Kaya, huwag tayong mawalan ng pag-asa at pananalig sa Diyos. Huwag nating pagdudahan ang Diyos. Maging mapagpasensya at manalig lamang tayo sa Diyos. 

Sa panahon ngayon, mahilig tayong magmadali. Halos hindi na tayo maghintay. Masyado tayong mainipin. Nawa'y turuan tayo ng Ebanghelyo ngayon na diringgin ng Diyos ang ating mga panalangin pagdating ng tamang panahon. Kapag hindi dumating ang tugon sa ating mga panalangin sa panahong gusto natin, huwag tayong mabigo. Ang Diyos ay may magandang plano para sa atin. Darating ang tugon ng Diyos sa ating mga panalangin pagdating ng tamang panahong itinakda Niya. Maging mapagpasensya nawa tayo at manalig lamang tayo sa kalooban ng Diyos. 

O Diyos, tulungan Mo kaming maghintay at maging mapagpasensya. Huwag Mo nawang ipahintulot na mawalan kami ng pananalig at pag-asa sa Iyo. Bagkus, lumaki at lumalim pa ang aming pananalig at pag-asa sa Iyo. Amen. 

Sabado, Disyembre 13, 2014

KATAPATAN AT PAGMAMAHALAN

Disyembre 18, 2014
Ika-3 Araw ng Simbang Gabi/Misa de Gallo (ABK) 
Jeremias 23, 5-8/Salmo 71/Mateo 1, 18-24


Ayon sa batas ng mga Hudyo, kapag may dalawang tao'y nahuli na nakikiapid, ang hatol sa kanila ay kamatayan. Babatuhin ang mga nakiapid hanggang sila'y mamatay. Isang halimbawa na makikita natin sa Banal na Bibliya ng pagkakataong iyon ay noong dinala ng mga punong saserdote ang babaeng nahuli sa pakikiapid sa Panginoong Hesukristo (Juan 8, 1-11). Ipinapakita ng talatang iyon kung ano ang ginagawa ng mga Hudyo sa mga taong nakikiapid. Ang pagkakaiba lamang sa talatang iyon, ginawa lamang iyon ng mga punong saserdote upang mahuli nila ang Panginoong Hesus. 

Ang pakikiapid ay isa sa mga pinagbabawal sa Sampung Utos ng Diyos. Isa itong uri ng pagnanakaw. Ninanakaw mo ang asawa ng iyong kapwa. Hindi ka nagiging tapat sa iyong relasyon o sa iyong asawa. Sinasaktan mo ang iyong ka-relasyon o ang asawa mo sa pamamagitan ng pakikiapid. Nililinlang mo sila sa pamamagitan ng pakikiapid. Nangako ka na ang iyong ka-relasyon ang iyong mamahalin. Sa pamamagitan ng pakikiapid, ipinapakita mo na hindi ka kuntento sa iisang ka-relasyon o asawa. Pakikiapid. Isang malaking kasalanan. 

Ito siguro ang iniisip ni San Jose noong mabalitaan na ang Mahal na Birheng Maria ay nabuntis sa labas ng kasal. Isang mabigat na kasalanan ang pakikiapid, lalung-lalo na sa panahon noon. Kapag nakiapid ang isang tao, siya'y babatuhin hanggang sa mamatay. Siguro, nalungkot si San Jose nang mabalitaan niya na buntis ang Mahal na Birheng Maria nang hindi pa siya kinakasal. Akala niya na si Maria'y hindi tapat sa kanya. Masasabi natin na nasaktan si San Jose dahil sa balitang iyon. 

Hindi naging madali para kay Jose at Maria ang sitwasyon na iyon. Si Maria'y nagdadalantao nang hindi pa kasal. Isang napakumplikadong sitwasyon. Ayaw ni Jose na magmukha siyang makasalanan. Ayaw niya ng kaguluhan. Mahirap na nga ang kanyang hanapbuhay bilang karpintero, mahirap pa nga ang sitwasyon na pinasukan niya. Sabi pa nga sa Ebanghelyo, "Isang taong matuwid si Jose, na pakakasalan ni Maria." (Mateo 1, 19) 

Nalaman na lamang ni San Jose na ang mga chismis patungkol sa pagdadalantao ng Mahal na Ina ay hindi totoo noong magpakita sa kanya sa panaginip ang anghel ng Panginoon. Ibinunyag ng anghel na hindi nagkaroon ng ibang relasyon si Maria sa ibang lalaki. Ang tunay na dahilan ng pagdadalantao ni Maria ay dahil naglihi siya sa pamamagitan ng Espiritu Santo. Hindi nakiapid si Maria kahit kaninuman dahil mahal na mahal din niya si Jose. 

Si San Jose ay pinili rin ng Diyos upang magkaroon ng mahalagang papel sa buhay ni Kristo. Pinili ng Diyos si San Jose upang maging ama-amahan ni Kristo dito sa lupa. Alam ng Diyos kung gaano kamahal ni Jose si Maria. Kaya't hinirang ng Diyos si San Jose upang tulungan ang Mahal na Birheng Maria sa pag-aalaga at pagpapalaki sa Panginoong Hesukristo. Mahirap na pananagutan ito para kina Jose at Maria, pero ginawa pa rin nila iyon alang-alang sa kanilang katapatan at pagmamahal sa Diyos at sa isa't isa. 

Mga tunay na halimbawa ng tapat na pagmamahalan sina San Jose at ang Mahal na Birheng Maria. Hindi nakiapid si San Jose o ang Mahal na Birheng Maria. Bagkus, naging tapat sila sa kanilang pagmamahalan. Tunay ang kanilang pagmamahalan. Dahil sa kanilang pagmamahalan, hinirang sila ng Diyos upang maging mga magulang ng Panginoong Hesukristo. Tumalima sila sa kalooban ng Diyos dahil minamahal din nila ang Diyos at matapat sa Kanya. 

O Diyos, tulungan Mo kaming maging busilak at tapat sa pagmamahal namin sa Iyo at sa aming ka-relasyon sa buhay, katulad nina San Jose at ng Mahal na Birheng Maria. Amen. 

Linggo, Disyembre 7, 2014

SORPRESA NG MAHABAGIN AT MAAWAING DIYOS

Disyembre 17, 2014
Ikalawang Araw ng Simbang Gabi/Misa de Gallo (ABK) 
Genesis 49, 2. 8-10/Salmo 71/Mateo 1, 1-17 



Kilala si Santo Papa Francisco ng mga tao ngayon, lalung-lalo na sa media, bilang isang Santo Papa ng mga sorpresa. Sa tuwing umiikot ang Santo Papa sa St. Peter's Square o sa tuwing may motorcade ang Santo Papa, may mga pagkakataon kung kailan pinapatigil niya ang popemobile upang batiin niya ang mga tao. May isang pagkakataon na kung saan binati ni Santo Papa Francisco ang isang taong may kakaibang kundisyon. Ang mukha ng taong iyon ay hindi magandang tingnan at malamang hindi natin iyon lalapitan. Pero, nilapitan siya ng Santo Papa Francisco at ipinadama niya sa taong iyon ang kanyang awa at habag sa kanya. Iilan lamang iyan sa mga sorpresa ng Santo Papa Francisco. 

Ang Diyos ay isang diyos ng mga sorpresa. Napakaraming sorpresa ang Diyos para sa atin. Isang halimbawa lamang ang Mabuting Balita ngayon. Napakinggan natin sa Mabuting Balita ang talaan ng mga ninuno ng Panginoong Hesukristo. Iilan sa mga ninuno ng Panginoong Hesus ay mga makasalanan. Hindi perpekto ang lahi ng Panginoong Hesus. May mga pagkakataon kung kailan nagkasala o naging mahina ang mga ninuno ni Hesus. 

Kung maaari lamang, maaaring magpakita lamang agad si Hesus. Hindi na Niya kinailangang magkatawang-tao upang iligtas ang sangkatauhan. Maaari na lamang dumating agad si Hesus mula sa langit nang hindi ipanganganak. Maaari Siyang dumating sa lupa taglay ang Kanyang kaluwalhatian. Si Hesus ang Diyos na makapangyarihan. Siya ang Ikalawang Persona ng Banal na Trinidad. Kung maaari at niloloob ng Diyos, maaaring bumaba sa lupa si Kristo nang hindi ipinapanganak. Maaaring magpakita si Kristo agad dito sa lupa na taglay ang Kanyang kapangyarihan at kasama ang Kanyang mga anghel. 

Pero, pinili ni Hesus na magpakababa at sorpresahin ang sangkatauhan sa pamamagitan ng pagkakatawang-tao at pamumuhay bilang isang taong katulad natin. Hindi inaasahan ng sinumang tao na ang Diyos ay magkakatawang-tao at mamumuhay bilang isang tao. Alang-alang sa atin, ang Panginoon ay nagpakababa at nagkatawang-tao upang matupad ang Kanyang plano. Ipinapakita ni Hesus sa pamamagitan ng pagiging tao na Siya'y kaisa natin.

Makikita natin sa pamamagitan ng pagkakatawang-tao ni Hesus ang awa, habag at pagmamahal ng Diyos. Ang awa at malasakit ng Diyos sa atin ang nag-udyok sa Kanya upang sorpresahin tayo. Hindi natin ito inaasahan. Hindi natin inaasahan na ang Bugtong na Anak ng Diyos ay magkakatawang-tao at mamumuhay katulad natin. Ginawa at pinayagan ng Diyos na maging tao si Kristo at ipanganak ni Maria dahil sa Kanyang awa at habag sa atin. Nais ipadama ng Diyos sa atin ang Kanyang dakilang awa at habag sa ating mga makasalanan. 

Tunay ngang punung-puno ng mga sorpresa ang Diyos. Patuloy tayong sinosorpresa ng Diyos sa bawat araw. Ipinapadama sa atin ng Panginoong Diyos ang Kanyang awa at habag sa atin sa bawat sorpresa Niya sa atin. Ang pinakadakilang sorpresa ng Diyos sa ating lahat ay si Hesus - ang ating Tagapagligtas. Si Hesus ay sinugo ng Ama upang maging pinakadakilang regalo at sorpresa sa atin ngayong Pasko. 

Amang mapagmahal, salamat sa lahat ng mga sorpresa at regalo Mo sa amin, lalung-lalo na si Hesus, ang aming Tagapagligtas. Salamat sa pagsugo Mo kay Hesus sa amin upang maging Tagapagligtas namin. Amen. 

MGA SALITA AT GAWA: NAGPAPAKILALA SA ISANG TAO

Disyembre 16, 2014
Unang Araw ng Simbang Gabi/Misa de Gallo (ABK) 
Isaias 56, 1-3a. 6-8/Salmo 66/Juan 5, 33-36 



Sa araw na ito ay sinisimulan nating mga Pilipino ang taunang pagsisiyam bilang paghahanda para sa Kapaskuhan na tinatawag nating "Simbang Gabi" o "Misa de Gallo." Ang siyam na araw na ito ay sumasagisag sa siyam na buwan na pagdadala ng Mahal na Birheng Maria sa Panginoong Hesukristo sa kanyang sinapupunan. Sa pamamagitan ng siyam na araw ng Simbang Gabi, tayo ay naglalakbay, naghihintay, at naghahanda nang may kagalakan kasama ni Maria para sa pagsilang ni Hesus. 

Ngayong unang araw ng ating pagsisiyam ay matutunghayan natin ang pagpapatunay kay Hesus at kay San Juan Bautista. Mapapakinggan natin ang sinasabi ng Panginoong Hesus na ang tao'y nakikilala sa pamamagitan ng mga gawa. Kilala ng mga tao sa panahong iyon kung sino si Hesus at sino si San Juan Bautista. Ang mga ginawa ni Hesus at ni San Juan Bautista ang nagpatunay kung sino nga ba sila. 

Ayon sa mga tao, si Hesus ay isang propeta at isang taong gumagawa ng mga himala. May ilan sa mga tao na nagsasabi na Siya nga ang Mesiyas. Para sa ating mga Katolikong Kristiyano, si Hesus ang Mesiyas, ang tunay na Anak ng Diyos. Paano nating nasisiguro na si Hesus nga ang Mesiyas? Ang mga ginawa ni Hesus ang nagpapatunay at nagpapakilala sa Kanyang sarili. Kilala natin si Hesus sa pamamagitan ng Kanyang mga ginawa. Pinagaling Niya ang mga maysakit, nangaral Siya tungkol sa paghahari ng Diyos, nagpakasakit at namatay para sa atin, at muling nabuhay sa ikatlong araw. 

Kilala rin ng mga tao  si San Juan Bautista. Ayon sa mga tao, si San Juan Bautista ay isang propeta. Nangaral siya tungkol sa pagsisisi at pagbabalik-loob sa Diyos. Ito ang lagi niyang ipinangangaral niya habang siya'y nagbibinyag sa ilang. Para sa atin, si San Juan Bautista ang tagapaghanda ng daraanan ng Panginoon. Ang kanyang mensahe at ang kanyang mga ginawa ang nagpapatunay sa kanyang pagkatao. Pinatunayan ni San Juan Bautista ang mga sinabi niya tungkol sa kanyang sarili sa pamamagitan ng kanyang mga ginawa bilang tagapaghanda ng daan ng Panginoon. 

Suriin natin ang ating mga sarili. Paano ba ako nakikilala ng mga kakilala ko? Nakikilala ba ako ng mga taong kakilala ko sa pamamagitan ng aking mga gawa? Hindi lamang sa salita tayo nakikilala. Hindi sapat ang mga salita upang ipakilala ang ating mga sarili. Kailangang patunayan natin sa pamamagitan ng ating mga gawa. Katulad ng isang kasabihan, "Mas malakas ang kilos kaysa sa salita." Hindi dapat tumaliwas ang ating mga gawa sa ating mga salita. Kailangang magkatugma ang ating mga salita at mga gawa. Magkakagunay ang ating mga salita at gawa. 

Malaki ang ugnayan ng mga salita at mga gawa. Tinutulungan ng ating mga gawa ang ating mga salita. Kung taliwas ang ating mga ginagawa sa ating mga sinasabi, mahina tayo. Nililinlang natin ang ating mga sarili at ang ating kapwa. Ang panlilinlang ay isang mabigat na kasalanan. Pinagbabawal ng Diyos ang panlilinlang. Kilala ng Diyos ang bawat isa sa atin. Mas nakikilala ng Diyos ang ating mga sarili kaysa sa atin. Siya ang lumikha sa atin. Tayo ay nilikha Niya na Kanyang kawangis. Nawa'y ipakita natin na tayo'y mga nilikha ng Diyos sa pamamagitan ng ating mga salita at gawa.

Ang Panginoong Hesus at si San Juan Bautista ay nagpakilala sa kanilang mga sarili sa pamamagitan ng kanilang mga salita at gawa. Sikapin nating tularan si Kristo at si San Juan Bautista sa pamamagitan ng pagpapakilala sa ating mga sarili bilang mga Kristiyano sa ating mga salita at gawa. Hindi sapat ang salita lamang. Kailangang may gawang tumutugma sa ating mga salita. Paano nating makikilala ang isang tunay na Kristiyano? Kung magkatugma ang kanyang mga salita at gawa bilang pagpapahayag na siya'y Kristiyano at nananalig sa Panginoon. 

Panginoong Hesus, bigyan Mo kami ng lakas upang ipakilala ang aming sarili sa pamamagitan ng aming mga salita at gawa, katulad ng ginawa Mo at ni San Juan Bautista. Amen. 

Sabado, Disyembre 6, 2014

ANG PAGPAPAKATOTOO NI SAN JUAN BAUTISTA

Disyembre 14, 2014
Ika-3 Linggo sa Panahon ng Pagdating ng Panginoon (B)
Isaias 611, 1-2a. 10-11/Lucas 1/1 Tesalonica 5, 16-24/Juan 1, 6-8. 19-28



Sa Ebanghelyo ngayong Ikatlong Linggo ng Adbiyento ng Taong B, mapapakinggan natin na inaamin ni San Juan Bautista sa mga taong nagtatanong sa kanya kung sino nga ba siya. Ang mga tao, lalung-lalo na ang mga Pariseo at mga punong saserdote ay nagtataka kung sino nga ba si San Juan Bautista. Para sa ilan, si San Juan Bautista na raw ang Mesiyas na matagal nang hinihintay ng bayang Israel. Ang sabi naman ng ilan, isang propeta si Juan Bautista. Pero, ano nga ba ang sagot ni San Juan Bautista sa mga katanungang ito? 

Alam ni Juan Bautista ang kanyang papel sa buhay ng Mesiyas. Sinabi niya ang totoo. Buong pagpapakumbaba niyang inamin hindi siya ang Mesiyas o isang propeta. Bagkus, siya ang tinig na sumisigaw sa ilang. Siya ang tagapaghanda ng daraanan ni Kristo. Pinili niyang aminin ang buong katotohanan nang buong pagpapakadukha. Alam ni Juan Bautista kung sino ang tunay na hinihintay ng bayang Israel - si Hesus, ang Mesiyas, ang Tagapagligtas ng sangkatauhan. 

Maaaring gamitin ni San Juan Bautista ang pagkakataong iyon upang sabihin siya ang Mesiyas. Maaari niyang sabihin siya ang Mesiyas. Mas lalong dadami ang mga taong pupunta at makikinig sa kanya sa Ilog-Jordan upang pakinggan siya. Magiging masikat si San Juan Bautista kapag inamin niya na siya ang Mesiyas. Pero, nililinlang lamang niya ang kanyang sarili at ang mga tao kapag sinabi niyang siya ang Mesiyas. Hindi na niya ginagampanan ang kanyang misyon na nagmula sa Diyos kapag sinabi niya na siya ang Mesiyas. 

Kinakailangan nating maging matatag at mapagpakumbaba upang aminin ang katotohanan. Hindi madali ang pag-amin ng katotohanan. Mas madali nga para sa atin ang magsinungaling dahil mali ito. Mas madaling gumawa ng mali kaysa gumawa ng tama. Ito ang kahinaan ng tao, lalung-lalo na sa panahon ngayon. Pero, sa panahon ngayon, ang palusot na ginagamit natin para sa ating mga pagkakamali ay, "Tao lamang ako, huwag mo akong husgahan!" Hindi porke't tao ka at nagkakamali ka, isa na iyan dahilan upang magkasala nang paulit-ulit. 

Alam ni San Juan Bautista na sa pamamagitan ng pagsisinungaling ay hindi niya maisasagawa ng maayos ang kanyang misyon. Alam ni San Juan Bautista na hindi siya ang Mesiyas na isusugo ng Diyos sa Kanyang bayan. Hindi nagpapasikat si San Juan Bautista. Alam ni San Juan Bautista na hindi siya hinirang at sinugo ng Diyos upang magpasikat. Bagkus, si San Juan Bautista ay hinirang ng Diyos upang ihanda ang daan para kay Hesus, ang Mesiyas na matagal nang hinihintay ng bayang Israel. 

Isang tunay na huwaran ng pagpapakatotoo si San Juan Bautista. Nangaral si San Juan Bautista tungkol sa katotohanan at namuhay ayon sa katotohanan. Hindi niya nilinlang ang kanyang sarili o ang mga taong ipinangangaral niya. Si San Juan Bautista ay naging matapat sa kanyang misyon at sa Diyos. Ang kanyang katapangan upang sabihin ang katotohanan tungkol sa kanyang sarili at sa kanyang misyon ay kahanga-hangang tunay. 

Panginoon, pagkalooban Mo kami ng katapangan upang magpakatotoo at gumawa ng tama, katulad ni San Juan Bautista. Amen.

Sabado, Nobyembre 29, 2014

PAGTUGON SA TAWAG NG MAHABAGIN AT MAAWAING DIYOS

Disyembre 8, 2014 
Dakilang Kapistahan ng Kalinis-linisang Paglilihi sa Mahal na Birheng Maria, Punong Pintakasi ng Republika ng Pilipinas (ABK)
Genesis 3, 9-15. 20/Salmo 97/Efeso 1, 3-6. 11-12/Lucas 1, 26-38


May malaking ugnayan ang Unang Pagbasa at Mabuting Balita ngayong Solemnidad ng Inmaculada Concepcion. Ang salaysay ng kasalanan nina Adan at Eba ay natunghayan at napakinggan natin sa Unang Pagbasa. Kinain nila ang bungang pinagbawal ng Diyos - ang bunga mula sa puno ng karunungan tungkol sa kabutihan at kasamaan. Sa Ebanghelyo naman ay narinig natin ang salaysay ng pagpapahayag ng Arkanghel Gabriel sa Mahal na Birheng Maria patungkol sa pagsilang ng Panginoong Hesukristo. 

Ipinagbawal ng Diyos sina Eba't Adan na kainin ang bunga mula sa puno ng karunungan tungkol sa kabutihan at kasamaan. Pero, bakit nila sinuway ang Diyos? Sapagkat sila'y tinukso ng ahas. Ang ahas ang tumukso sa kanila. Inakit ng ahas sina Eba't Adan upang suwayin ang utos ng Diyos. Dahil sa pang-aakit ng ahas o ng demonyo kina Adan at Eba, kinain ni Eba ang bunga ng karunungan tungkol sa kabutihan at kasamaan, at nakikagat din si Adan. Nalaman nilang sila'y hubad, at nagtago sila mula sa Diyos. 

Nalaman nina Eba't Adan na sila ay nilinlang ng ahas. Noong tinanong sila ng Diyos kung bakit nila ginawa iyon, inamin ni Eba na inakit siya ng ahas na kainin ang bungang iyon. Dahil doon, isinumpa ng Diyos ang ahas. Ipinahayag ng Panginoon na ang lahi ng babae at ng ahas ay magkakalaban at dudurugin ng isa sa lahi ng babae ang ulo ng ahas. Ang pahayag na ito ay natupad kay Hesus at kay Satanas. Bagamat tinuklaw ni Satanas ang sako ni Hesus, dinurog ni Hesus ang ulo ni Satanas sa pamamagitan ng Kanyang pagsunod sa kalooban ng Diyos. 

Ang Ebanghelyo ngayon ay tungkol sa pagpapahayag ng Arkanghel Gabriel sa Mahal na Ina. Ipinahayag ng Arkanghel Gabriel na ang Mahal na Ina ay pinili ng Panginoong Diyos upang maging ina ni Hesukristo - ang Mesiyas na hinihintay ng bayang Israel. Hindi man inaasahan ni Maria na maging ina ng Mesiyas, tumalima pa rin siya sa kalooban ng Diyos. Ang kanyang tugon sa kalooban ng Diyos ay, "Oo, tumatalima ako sa kalooban ng Diyos." Ipinapakita ng tugon ng Mahal na Birheng Maria sa kalooban ng Diyos ang kanyang pagtalima sa kalooban ng Diyos. 

Sa pamamagitan ng pagtalima sa kalooban ng Diyos, ipinapakita ni Maria ang taliwas ng pagsuway - ang pagsunod. Kung sinuway ni Eba ang kalooban ng Diyos, si Maria naman ay sumunod sa kalooban ng Diyos. Kaya, isa sa mga titulo ni Maria ay ang Nova Eva o ang Bagong Eva. Ang kasalanan ni Eba ang naging dahilan ng pagpasok ng kasalanan at kapahamakan sa mundo. Ngunit, ang pagsunod at pagtalima ni Maria sa kalooban ng Diyos ay naging dahilan ng pagpasok kaligtasan sa mundo. 

Ang Diyos ang nagplano kung paano ililigtas ang sanlibutan. Dahil sa kasalanan nina Eba't Adan, ang sanlibutan ay nalugmok sa kasalanan. Naawa ang Diyos sa sangkatauhan. Ang pag-ibig ng Diyos ang nag-udyok sa Kanya upang magplano kung paano iligtas ang sanlibutan. Ang plano ng Diyos ay isugo ang Kanyang Anak upang maging Tagapagligtas ng sangkatauhan. Maaari Niyang isugo agad-agad ang Kanyang Anak sa sanlibutan. Pero, hinayaan Niyang magpakababa ang Kanyang Anak upang ipadama sa sangkatauhan ang Kanyang awa, habag, at pagmamahal sa sangkatauhan. 

Napakalaki ng papel ni Maria sa plano ng Diyos. Kung hindi siya tumugon at tumalima sa kalooban ng Diyos, hindi matutupad ang plano ng Diyos. Siguro, ang sanlibutan ay hindi pa rin nailigtas magpa-hanggang ngayon. Natupad ang plano ng Diyos dahil sa pagtalima ni Maria sa kalooban ng Diyos. Ang awa at habag ng Diyos sa Kanyang mga hinirang at sa buong sangkatauhan ang nag-udyok kay Maria na tumalima sa kalooban ng Diyos. 

Tayong lahat ay mga dukhang pinili ng Diyos upang paglingkuran Siya. Tinatawag tayo ng Diyos upang tuparan ang Kanyang kalooban. Katulad nina Hesus at Maria, nawa'y tumugon at tumalima tayo sa tawag at kalooban ng Diyos. Mas maganda ang plano ng Diyos para sa atin. Buong pagpapakadukha nawa tayong sumunod at tumalima sa tawag at kalooban ng Diyos Ama, katulad ng Panginoong Hesus at ang Mahal na Birheng Maria. 

Linggo, Nobyembre 23, 2014

PAGTAWAG NG MAHABAGIN AT MAAWAING DIYOS SA MGA MAKASALANAN

Disyembre 7, 2014
Ikalawang Linggo sa Panahon ng Pagdating ng Panginoon (B) 
Isaias 40, 1-5. 9-11/Salmo 84/2 Pedro 3, 8-14/Marcos 1, 1-8 



Ang Ebanghelyo ngayong Linggo ay tungkol sa pangangaral ni San Juan Bautista sa ilang. Nangaral si San Juan Bautista sa mga tao sa ilang tungkol sa pagsisisi at bininyagan sila bilang paghahanda para sa pagdating ng Mesiyas. Si San Juan Bautista ang tagapaghanda ng daraanan ng Mesiyas. Inihahanda niya ang lahat ng tao upang maging handa sila sa pagdating ng Mesiyas. Ang papel ni San Juan Bautista sa buhay ni Kristo ay napakahalaga - siya ang tagapaghanda ng daraanan ni Kristo. Inihahanda niya ang mga tao para sa pagdating ni Kristo. 

Tinatawag ni San Juan Bautista ang lahat ng tao na magsisi at magbalik-loob sa Diyos. Hindi nanggaling kay San Juan Bautista mismo ang tawag na ito. Ang tawag na ito ay nagmula sa Diyos. Si San Juan Bautista ang tagapagpahayag lamang ng salita ng Diyos sa mga tao. Ipinapaabot at ipinapahayag ni San Juan Bautista sa mga tao ang salita ng Diyos. Si San Juan Bautista ay ginagamit ng Diyos bilang isang instrumento. Si San Juan Bautista ang huling propetang isinugo ng Diyos bago dumating si Hesus - ang Mesiyas.

Ang panawagan sa ating lahat sa Ebanghelyo ngayong Linggo ay magsisi at magbalik-loob sa Diyos. Bahagi ng ating paghahanda at paghihintay ngayong panahon ng Adbiyento ay ang pagbabalik-loob sa Diyos. Tinatawag tayo ng Diyos na magbalik-loob sa Kanya. Walang sinumang tao dito sa mundo ay hindi nagkasala sa Diyos. Lahat tayo ay nagkasala sa Diyos. Pero, tinatawag tayo muli ng Diyos. Tinatawag tayong mga makasalanan na magsisi at magbalik-loob sa Panginoon. Hinihintay tayo ng Diyos. Nakahanda ang Diyos upang patawarin ang ating mga kasalanan. 

"Pagsisihan ninyo't talikdan ang inyong mga kasalanan." (Marcos 1, 4) Ito ang mensahe mula kay San Juan Bautista sa Ebanghelyo natin ngayong Ikalawang Linggo ng Adbiyento. Si San Juan Bautista ay ang tagapagpahayag ng Salita ng Diyos. Ang panawagan ng pagsisisi ay nagmula sa Panginoong Diyos. Ang Diyos ay maawain at mahabagin sa ating lahat. Ipinapakita Niya sa atin ang pagiging maawain at mahabagin Niya sa atin sa pamamagitan ng panawagang ito. Nais ng Diyos na tayo ay bumalik sa Kanya at magsisi sa mga kasalanang nagawa natin laban sa Kanya. 

Hindi kalooban ng Diyos na mapalayo tayo sa Kanya. Binibigyan tayo ng kalayaan ng Diyos. Subalit, hindi na kasalanan ng Diyos kung tayo ay nagkasala. Ang dapat sisihin sa dami ng ating mga kasalanan ay ang ating sarili. Dahil sa mga pagkakasala natin sa Diyos, napapalayo tayo sa Kanya. Hinahanap at tinatawag tayo ng Diyos na magsisi at magbalik-loob sa Kanya. Kaya lang, marami sa atin, matitigas ang ulo. Masuwayin pa rin. Ayaw makinig sa tawag ng Diyos. 

Ipinapakita ng Diyos ang awa at pag-ibig Niya sa atin sa pamamagitan ng Kanyang panawagan sa atin. Nanawagan ang Diyos na pagsisihan natin ang mga nagawang kasalanan at manumbalik sa Kanya. Katulad ng ating tugon sa Salmong Tugunan ngayong Linggo, "Pag-ibig Mo'y ipakita, iligtas kami sa dusa." Ang panawagan ng Diyos ngayong Linggo ay isang panawagan ng awa at pag-ibig. Tinatawagan tayo ng Diyos na magsisi at magbalik-loob sa Kanya dahil sa Kanyang pag-ibig at awa sa atin. 

Ang pagtawag ng Diyos sa atin ay isang tawag upang iligtas tayo mula sa dusa. Hindi kalooban ng Diyos na magdusa tayo. Ayaw Niyang magdusa tayo dahil sa mga kasalanang ginawa natin laban sa Kanya. Binababalaan tayo ng Diyos na tayo'y magdudusa kapag tayo ay hindi nagsisi at nagbalik-loob sa Kanya. Hindi ninanais ng Diyos na tayo ay magdusa. Nais Niyang iligtas tayong lahat mula sa pagdurusa. Nais Niya tayong iligtas mula sa ating mga kasalanan. Ito ay dahil sa Kanyang awa, habag, at pag-ibig sa atin.

Bilang tugon sa panawagan ng Diyos, nawa'y magsisi at magbalik-loob tayo sa Kanya ngayong panahon ng Adbiyento. Hinhintay ng Diyos ang ating pagbabalik-loob sa Kanya. Ating ipaghanda ang ating sarili para sa Kapaskuhan sa pamamagitan ng pagbabalik-loob sa Diyos sa Sakramento ng Kumpisal. Hinding-hindi tayo itatakwil ng Diyos. Bagkus, tayong mga makasalanan ay tatanggapin Niya muli at bibigyan ng isang panibagong buhay. Dinggin natin ang tawag sa pagsisisi mula sa Panginoong Diyos. Huwag nating salungatin ang pagtawag ng mahabagin at maawaing Diyos sa ating lahat, mga makasalanan. 

Sa pagpapatuloy ng ating paghahanda at paghihintay ngayong panahon ng Adbiyento, nawa'y buong puso tayong magsisi at magbalik-loob sa Diyos. Dinggin nawa natin nang may buong pananabik ang tawag ng Diyos na magsisi at magbalik-loob sa Kanya. Buong pag-asa at pananabik nawa tayong magsisi at magbalik-loob sa Diyos bilang paghahanda at paghihintay para sa Pasko ng Pagsilang ng Manunubos - ang ating Panginoong Hesukristo, ang ating mahabagin at maawaing Panginoon at Tagapagligtas.