MARIA: INA NG MAAWAING DIYOS NA NAGBIBIGAY NG KAPAYAPAAN

1 Enero 2016
Dakilang Kapistahan ni Maria, Ina ng Diyos (ABK) 
Bilang 6, 22-27/Salmo 66/Galacia 4, 4-7/Lucas 2, 16-21 

Sinasalubong natin ang Bagong Taon sa pagdiriwang ng Dakilang Kapistahan ni Maria, ang Ina ng Diyos. Kasabay ng Pista ni Maria, ang Ina ng Diyos, ang unang araw ay idineklara ng ating Simbahan bilang Pandaigdigang Araw ng Kapayapaan. Kapayapaan ang hatid ng Diyos ng Awa sa lahat. Isinugo ng Diyos ang Kanyang Bugtong na Anak na si Hesukristo upang ihatid ang Kanyang Kapayapaan at Awa sa buong sangkatauhan. Noong pumarito si Hesus sa daigdig, Siya'y nagkatawang-tao lalang ng Espiritu Santo at iniluwal ni Maria pagkatapos ng siyam na buwan ng pananahan sa kanyang sinapupunan. 

Isa sa mga dogma o doktrina ng Simbahan patungkol kay Maria ay ang kanyang pagiging Ina ng Diyos. Kapag sinasabi nating si Maria ang Ina ng Diyos, hindi natin sinasabing diyosa si Maria. Si Maria'y tao katulad natin. Hindi rin nating sinasabing si Maria ang Ina ng Diyos Ama o ng Diyos Espiritu Santo. Bagkus, si Maria ang Ina ng Pangalawang Persona ng Banal na Santatlo, ang Diyos Anak na si Hesus. Dahil si Hesus ay Diyos, tinatawag nating Ina ng Diyos si Maria. Ito ay isa sa napakaraming titulo ng Simbahan para kay Maria. 

Binibigyang diin ng mga Pagbasa ngayong Pista ni Maria, Ina ng Diyos, ang pagiging maawain ng Diyos. At dahil sa Awa ng Diyos, kapayapaan ang ibinibigay Niya sa lahat ng mga may takot sa Kanya. Kusang-loob na ipinagkakaloob sa atin ng Panginoong Diyos ang Kanyang Awa at Kapayapaan. Ang pinakadakilang handog ng Awa at Kapayapaan ng Diyos ay ang pagpapadala kay Hesus, ang Prinsipe ng Kapayapaan at Hari ng Awa. 

Natunghayan natin sa Unang Pagbasa na ang utos ng Diyos patungkol sa sasabihin nina Aaron at ng kanyang mga anak sa kanilang pagbebendisyon sa mga tao. Binibigyang diin ng pagbebendisyon na ito ang habag ng Diyos. Pagpapalain ng Diyos ang Kanyang bayan. Ang mga pagpapalang hatid ng Panginoon ay ang Awa at Kapayapaang nagmumula sa Kanya. 

Ipinapahayag ni Apostol San Pablo sa Ikalawang Pagbasa ang pagsilang ng Anak ng Diyos sa isang babae. Ito ang pinakadakilang handog ng Awa at Kapayapaan na nagmula sa Diyos. Ang Diyos Anak na si Hesukristo ay sinugo ng Diyos Ama at isinilang ng Birheng Maria upang tayong lahat ay maging mga anak ng Diyos. Nais ng Diyos na mapabilang tayo sa Kanyang pamilya. Nais ng Diyos na tayo'y maging mga anak Niya. Kaya, isinugo Niya ang Kanyang Bugtong na Anak na si Kristo Hesus upang tayong lahat ay maging mga anak ng Diyos. Hindi na tayo namumuhay bilang mga alipin. Tayong lahat ay naging mga anak ng maawaing Diyos sa pamamagitan ng ating Panginoon at Tagapagligtas na si Hesukristo. 

Sa Ebanghelyo, mapapakinggan natin ang pagdalaw ng mga pastol sa Sanggol na Hesus. Ito ay naganap pagkatapos ng pagbabalita sa kanila ng mga anghel. Nakita ng mga pastol ang lahat ng mga ibinilita sa kanila ng mga anghel - ang Sanggol na Hesus ay nakahiga sa sabsaban. Ang mga unang bisita ng maawaing Diyos na Sanggol na si Hesus ay mga pastol. Dagdag pa ni San Lucas, pinagbulay-bulay ni Maria ang lahat ng mga pangyayari. Hindi maintindihan ni Maria ang mga nangyari. Hindi maintindihan ni Maria kung bakit dinalaw ng mga pastol ang Sanggol na Hesus. Subalit, hindi siya nagreklamo. Hindi nawalan ng tiwala sa Diyos si Maria. Bagkus, katulad ng nasasaad sa Ebanghelyo, pinagnilay-nilayan ni Maria ang lahat ng mga pangyayaring naganap. 

Kulang tayo sa pagninilay, lalung-lalo na sa panahon ngayon. Sa panahon ngayon, kinakailangan nating maghanap ng pagkakataon upang magnilay. Ang gulo-gulo ng ating mga buhay ngayon. Ang daming mga bagay na nagaganap sa mga buhay natin ngayon. Iyan ang kakulangan natin sa panahon ngayon - pagninilay. Hindi tayo nagbibigay o naghahanap ng panahon upang makapagnilay. Ang hirap pa sa panahon ngayon, hindi tayo gumagawa ng paraan upang magkaroon ng oras upang magnilay. Wala tayong panahon para magnilay.

Ano naman ang pagninilayan natin? Ang misteryo ng Awa at Kapayapaan ng Diyos. Isa itong misteryo. Alam natin na ang Diyos ay maawain at ang Diyos ay ang Diyos ng Kapayapaan. Subalit, hindi makakasya sa ating mga isipan ang lalim at ang kalawakan ng misteryong ito. Hindi masusukat ang ating kaalaman patungkol sa misteryong ito. May mga bagay patungkol sa Awa at Kapayapaang mula sa Diyos na hindi nating maunawaan. Kaya, napakahalaga para sa atin na pagnilay-nilayan natin ang Banal na Misteryong ito. 

May mga bagay patungkol sa mga pagpapala at kapayapaang dulot ng Awa ng Diyos na hindi nating maintindihan. Ang Mahal na Birheng Maria, hindi niya maintindihan ang pagdalaw ng mga pastol. Hindi niya naintindihan kung bakit sa sabsaban isinilang ang Diyos na Sanggol. Hindi rin niya maintindihan ang dahilan kung bakit kinailangan pang maging Sanggol ang Anak ng Diyos para sa kaligtasan ng sangkatauhan. Subalit, hindi niya pinagdudahan ang Diyos. Hindi nawalan ng tiwala sa Diyos si Maria. Bagkus, tumalima sa kalooban ng Diyos si Maria. Ang mga bagay na hindi maintindihan ni Maria ay kanyang pinagbulay-bulay sa kanyang puso. Hinding-hindi niya makakalimutan ang mga dakilang gawa ng awa ng Diyos na kanyang nasaksihan at naranasan. 

Sa pagsisimula ng Bagong Taon, inaanyayahan tayong pagnilayan ang hiwaga ng Awa at Kapayapaang hatid ng Diyos kasama si Maria. Kapayapaan ang hatid ng maawaing Diyos sa ating lahat. May hiwaga ang Awa ng Diyos. Hindi natin alam ang lahat-lahat patungkol sa Awa ng Diyos. Kaya, sa katahimikan, pagnilayan natin ang misteryo ng Awa ng Diyos kasama ng Mahal na Ina. Pagnilay-nilayan natin at itanim natin sa ating puso at isipan ang mahiwagang Awa at Kapayapaang nagmumula sa Panginoong Diyos, katulad ni Maria. 

HESUS: LUMAKI SA ISANG PAMILYA NA BINUBUO NG ISANG LALAKI AT BABAE; NAMUHAY BILANG ISANG MASUNURING ANAK

27 Disyembre 2015
Kapistahan ng Banal na Mag-Anak Hesus, Maria, at Jose (K) 
Sirac 3, 3-7. 14-17a (gr. 2-6. 12-14) (o kaya: 1 Samuel 1, 20-22. 24-28)/Salmo 127 (o kaya: Salmo 83)/Colosas 3, 12-21 (o kaya: 1 Juan 3, 1-2. 21-24)/Lucas 2, 41-52

Kasabay ng pagdiriwang natin ng Banal na Taon ng Awa ay ipinagdiriwang natin dito sa Pilipinas ang Taon ng Eukaristiya at ng Pamilya. Sa isang buwan na rin po, bilang pagsalubong sa Bagong Taon, ay isasagawa ang Pandaigdigang Kongreso ng Eukaristiya sa Lungsod ng Cebu. Bilang mga Katoliko, tayo ay naniniwala na matatagpuan natin ang tunay na presensya ng Panginoong Hesukristo sa Banal na Eukaristiya. At dahil dito, masasabi natin na ang Mahal na Birheng Maria ang unang tabernakulo sapagkat dinala niya sa kanyang sinapupunan ang Panginoong Hesukristo. Dinala ni Maria sa kanyang sinapupunan sa loob ng siyam na buwan ang tunay na presensya ni Kristo. At noong dumating ang takdang panahon, iniluwal ni Maria ang Katawan at Dugo ni Hesus. 

Sa huling Linggo ng taong ito, nakatuon ang ating pansin sa Banal na Mag-Anak na sina Hesus, Maria, at Jose. Inilaan ng Simbahan ang huling linggo ng taon (kung hindi pumapatak ang Pasko at Bagong Taon sa araw ng Linggo) sa karangalan ng Banal na Pamilya. Dalawa ang pinapakita ng Diyos sa pamamagitan ng Banal na Pamilya. Una, ipinapakita Niya sa atin kung papaanong bumuo ng isang pamilya at ang kahalagahan ng pamilya. Ang pamilya ay dapat binubuo ng isang lalaki at isang babae. Noong nilikha ng Diyos ang sanlibutan, nilikha Niya ang lalaki at babae upang dumami ang kanilang mga supling sa buong daigdig. At pangalawa, ipinapakita ng Diyos sa pamamagitan ni Hesus ang Kanyang pagiging mapagpakumbaba. Nagpakababa ang Diyos Anak at naging masunurin. Hindi naging masuwayin ang Diyos Anak kahit kailan. 

Una, isang lalaki at isang babae ay pinili ng Diyos upang maging mga magulang ng Kanyang Anak sa Kanyang pagparito sa daigdig. Noong pumarito si Hesus sa sanlibutan, ang Kanyang pamilya ay nabuo ng isang lalaki at isang babaeng magkabiyak. Si San Jose ay tumayo bilang ama-amahan ni Hesus noong Siya'y nabubuhay dito sa mundo habang ang Mahal na Ina ay ang Kanyang ina. Ipinapakita sa atin ng Panginoon kung ano ang larawan ng isang tunay na pamilya - isang pamilyang binubuo ng pagmamahalan ng isang lalaki at isang babae. Binuo ng Diyos ang Banal na Pamilya nina Hesus, Maria, at Jose, upang ipakita sa atin kung ano ang larawan ng isang tunay na pamilya. 

Halos wala nang awa ang lipunan sa bawat pamilya. Pinag-uusapan ngayon ang mga bagay na nakakasira o nakakawasak ng pamilya. May mga batas pa nga sa panahon ngayon na nakakasira sa pamilya. May mga kontrobersyal na batas na pinag-uusapan sa pamahalaan na nakakasira sa pamilya. Balak ng lipunan na sirain ang mga pamilya. Hindi sila naaawa sa mga pamilya na namumuhay na punung-puno ng pagmamahalan. Hindi na binibigyang halaga ang kahalagahan ng pamilya, na kung saan nagmumula ang buhay ng bawat isa sa atin. 

Si Kristo ay lumaki sa isang pamilya na binuo ng isang lalaki at isang babaeng magkabiyak. Ang tumayong ama-amahan Niya sa daigdig ay si San Jose. Ang Mahal na Birheng Maria ay pinili ng Diyos upang dalhin sa kanyang sinapupunan at iluwal pagdating ng takdang panahon. Sina Jose ay Maria ay pinili ng Diyos upang maging mga magulang ni Hesus. Lumaki si Hesus sa pamilya na binuo ng isang lalaki at isang babaeng magkabiyak - sina Maria at Jose. Binuo ang Banal na Mag-Anak nina Hesus, Maria, at Jose sa awa ng Diyos. 

Ikalawa at panghuli, si Hesus ay namuhay nang masunurin. Masunurin si Hesus sa kalooban ng Ama buong buhay Niya. Mula pa sa Kanyang kabataan, masunurin na si Hesus. Hindi Siya naging suwayin, o sumuway sa utos kahit minsan. Kalooban ng Diyos na lumaki si Hesus sa pamilyang binuo ng isang lalaki at isang babaeng magkabiyak. Sinunod ni Hesus ang kalooban ng Ama, lumaki Siyang masunurin sa pangangalaga ng Kanyang ama't inang sina Maria at Jose. 

Natunghayan natin sa Ebanghelyo na mula pa sa pagkabata, masunurin na si Hesus. Labindalawang taon pa lamang si Hesus, alam na Niya kung ano ang kalooban ng Ama. Kaya, ang tanong Niya kay Maria noong hinanap Siya, "Bakit po ninyo Ako hinahanap? Hindi ba ninyo alam na Ako'y dapat na nasa bahay ng Aking Ama?" (2, 49) Alam na ni Hesus kung ano ang kagustuhan ng Kanyang Amang nasa langit, kahit nasa murang edad pa lamang Siya. Sa murang edad pa lamang, alam na ng Batang Hesus na may dahilan kaya Siya naparito. Alam na ni Hesus kahit bata pa Siya na may ipinapagawa sa Kanya ang Amang nasa langit. May tungkulin at misyon si Hesus sa sanlibutang ito, at hindi pang-karaniwan ang tungkulin ibinigay ng Ama kay Hesus sa pagparito Niya sa sanlibutan. 

Dagdag ni San Lucas sa pangwakas na bahagi ng Ebanghelyo, "Naging isang masunuring anak (si Hesus)....Patuloy lumaki si Hesus. Umunlad ang Kanyang karunungan at lalong kinalugdan ng Diyos at ng mga tao." (2, 51-52) Si Hesus ay masunurin sa Kanyang mga magulang at sa Diyos. Sa Kanyang paglaki, hindi sinuway ni Hesus ang Diyos ni ang Kanyang mga magulang. Bagkus, buong pagpapakumbaba Niyang sinunod ang Diyos at ang Kanyang mga magulang. Walang pagkakataon kung kailan naging masuwayin si Hesus sa Diyos at sa Kanyang mga magulang na sina Maria at Jose. 

Lumaki si Hesus sa piling ng isang ama at isang ina sa pamamagitan nina Maria at Jose. At bilang anak nina Jose at Maria, naging masunurin si Hesus sa kanila. Naging masunurin si Hesus sa Diyos at sa Kanyang mga magulang dito sa lupa. Sa pamamagitan ng Banal na Pamilya, ipinapakita sa atin ng Diyos ang kahalagahan ng pagsasama ng isang lalaki at isang babae bilang mag-asawa. Sa pagsasama ng isang lalaki at isang babae bilang magkabiyak, bumubuo ang isang pamilya. Ipinapakita din ng Diyos na Siya, sa pamamagitan ng Kanyang Anak na nagkatawang-tao, ay naging mapagpakumbaba at masunurin, kahit na Siya ang Banal, ang Kataas-taasan at Makapangyarihang Diyos. 

SA PAGSILANG NI HESUS, IPINAMALAS NG DIYOS ANG PINAKADAKILANG GAWA NG AWA

25 Disyembre 2015
Dakilang Kapistahan ng Pasko ng Pagsilang (ABK) 
Pagmimisa sa Araw
Isaias 52, 7-10/Salmo 97/Hebreo 1, 1-6/Juan 1, 1-18 (o kaya: 1, 1-5. 9-14) 

(courtesy: http://manilacathedral.ph/)

"Kahit saa'y namamalas tagumpay ng Nagliligtas." 

Sa pagsilang ni Hesus, ipinamalas ng Diyos ang Kanyang pinakadakilang gawa ng awa. Ang Panginoong Hesus ay isinugo sa sanlibutan upang iligtas ang sangkatauhan. Noong unang dumating ang Bugtong na Anak ng Diyos na si Hesus, Siya'y iniluwal ng Mahal na Birheng Maria sa kanyang sinapupunan. Lumabas si Hesus sa sinapupunan ni Maria bilang isang sanggol. Ang Diyos ay nagkatawang-tao at naging sanggol sa pamamagitan ni Hesus. Sa halip na lusubin nang buong kapangyarihan ang sansinukob, ang Diyos sa pamamagitan ni Hesukristo ay nagkatawang-tao at isinilang ng Mahal na Birhen. 

Ipinapakilala ni San Juan sa kauna-unahang kabanata ng kanyang Ebanghelyo ang Panginoong Hesus bilang Salita ng Diyos. Siya ang Salita ng Diyos na nagkatawang-tao at nakipamuhay kasama natin. Hindi Niya nilusob nang buong kapangyarihan ang sanlibutan. Bagkus, ang Mananakop at Manunubos ng sangkatauhan na si Kristo ay nagpakita sa lahat sa pamamagitan ng pagiging isang sanggol. Tayong lahat ay isinilang dito sa mundo. Upang ipamalas ang Awa at Habag ng Diyos sa sangkatauhan, pinili ni Kristo na magkatawang-tao at isilang bilang isang sanggol katulad nating lahat. Siya'y katulad natin sa lahat ng bagay, maliban na lamang sa kasalanan. 

Nakakalungkot ang isang bahagi noong ipinakilala ni San Juan si Kristo bilang Salita ng Diyos na nagkatawang-tao. Hindi nakilala o tinanggap ang Salita ng Diyos na si Kristo ng Kanyang mga kababayan. Walang kumilala sa Kanya bilang Tagapagligtas at Mesiyas. Kahit na dumating si Kristo pagkatapos ng mahabang panahon ng paghihintay at pananabik, hindi Siya nakilala ng bayang naghintay para sa Kanya. Ang tingin nila kay Kristo, isang simpleng guro, isang simpleng karpintero, at anak nina Jose at Maria. Wala nang iba. Walang hihigit pa sa pagtingin ng mga kababayan ni Kristo sa Kanya. Hinintay nga ng Kanyang bayan ang Kanyang pagdating, pero noong Siya'y dumating, hindi Siya nakilala. 

Bakit tinuloy ng Diyos ang pagsusugo Niya kay Hesus sa sanlibutan, hindi naman Siya makikilala ng Kanyang bayan bilang Manunubos? Hindi naman nila makikilala ang kanilang Manunubos sa katauhan ni Hesus. Hindi naman Siya tinanggap ng Kanyang bayan bilang Tagapagligtas. Alam naman ng Diyos kung ano ang mangyayari. Pero, sa dinami-daming iba pang mga plano na maaring gawin, bakit tinuloy pa rin ng Diyos ang orihinal Niyang plano? Bakit tuloy pa rin ang pagpapadala kay Hesus sa sanlibutan bilang Tagapagligtas? 

Kahit alam ng Diyos na hindi kikilalanin o tatanggapin si Hesus ng Kanyang mga kababayan bilang Mesiyas, pinili Niyang ipadama ang Kanyang awa sa sangkatauhan. Nahabag ang Diyos sa sangkatauhan. Ang sangkatauhan ay nalugmok sa kasalanan. Kinailangan nila ng Tagapagligtas. Sa pagsusugo ng Diyos kay Hesus sa daigdig, ililigtas at babawiin Niya mula sa kapangyarihan ng kasamaan ang Kanyang mga nilikha, lalung-lalo na ang sangkatauhan. Hindi baleng hindi na Siya makilala ng Kanyang bayan, ang mahalaga ay matubos sila sa pamamagitan ng Kanyang Awa. Hindi pusong bato ang Puso ng Diyos. Bagkus, ang Puso ng Diyos ay punung-puno ng Kanyang Dakilang Awa. 

Ang pagsilang ng Manunubos na si Hesukristo ay isang pagpapamalas ng Awa ng Diyos. Sa pagsilang ni Hesus, ipinapahayag ng Diyos ang Kanyang awa at habag sa sangkatauhan. Hindi baleng hindi Siya kikilalanin o tatanggapin ng Kanyang mga kababayan. Ipinapakita ng Diyos na may puwang tayong lahat sa Kanyang puso sa pamamagitan ng pagsilang ni Hesus. Awa at habag ang dahilan kaya ang Diyos Anak na si Hesus ay nagkatawang-tao at naging sanggol katulad natin.

Kung atin pong mapapansin, ipinapakita ng mga imahen o larawan ng Niño Hesus na nakabukas ang Kanyang mga palad. Nakabukas ang mga palad ng Sanggol na Hesus bilang pagpapakita ng Kanyang Awa sa sangkatauhan. Tayo ay inaanyayahan ng Batang Hesus na lumapit sa Kanya, ang Panginoon ng Awa. Isa itong pagsasalarawan ng Awa ng Diyos na ipinakita Niya sa pamamagitan ng Banal na Sanggol na si Hesus. Lumapit tayo sa Niño Hesus at makipagtitigan tayo sa Kanyang mga mata na puno ng awa. Pagmasdan natin ang kahanga-hangang gawa ng awa ng Diyos sa pamamagitan ng Sanggol na Hesus. 

PAGSILANG NI HESUS: PAGSILANG NG LIWANAG AT AWA NG DIYOS SA DAIGDIG

25 Disyembre 2015
Dakilang Kapistahan ng Pasko ng Pagsilang (ABK):
Pagmimisa sa Hatinggabi
Isaias 9, 1-6/Salmo 95/Tito 2, 11-14/Lucas 2, 1-14 

Ipinahayag ni propeta Isaias sa Unang Pagbasa na isinilang ang isang sanggol na lalaki para sa lahat ng sangkatauhan. Sa pagsilang ng sanggol na ito, sumilay ang isang malaking liwanag na pumawi sa lahat ng uri ng kadiliman sa daigdig. Ang pagsilang ng sanggol na ito ay nagdulot ng malaking kaliwanagan. Nagniningning ang lahat sa pagsilang ng sanggol na isinilang para sa buong sangkatauhan. Sa pagsilang ni Hesus, tinaglay Niya ang napakalaking liwanag na ito mula sa kalangitan. Ang napakalaking liwanag na ito ay nagniningning at pumapawi sa lahat ng uri ng kadiliman dulot ng kasamaan at kasalanan. 

Ang Sanggol na Hesus ay ang liwanag na nagniningning noong unang Pasko. Noong Siya'y isilang ni Maria, tinaglay Niya ang isang maningning na liwanag mula sa kalangitan. Siya ang nagbigay ng liwanag na nagniningning noong gabi ng Kanyang pagsilang. Kahit napakadilim noong gabing yaon, ang Sanggol na Hesus ang nagbigay ng isang maningning na liwanag.  Mula sa Kanyang pagsilang, si Hesus ay ang liwanag ng sanlibutan. Siya ang nagbibigay liwanag sa buong sanlibutan na nababalot ng kadiliman. 

Nagsalita si Apostol San Pablo sa Ikalawang Pagbasa patungkol sa pagpapahayag ng kagandahang-loob ng Diyos. Iniligtas ng Diyos ang buong sangkatauhan sa pamamagitan ng Kanyang kagandahang-loob. Ang pagsilang ng Panginoong Hesus ay ang pagpapahayag ng kagandahang-loob ng Diyos. Sa pamamagitan ng pagsilang ni Hesus, sumapit na ang Araw ng Kaligtasan. Sa pagsilang ni Hesus, dumating ang kaligtasang ipinangako ng Diyos sa sangkatauhan. Matutupad na ang pangako ng Diyos. Ang sangkatauha'y ililigtas sa pamamagitan ni Hesus. 

Sa Ebanghelyo, mapapakinggan natin na ang mga pastol ay natakot sa kanilang mga nakita. Una, may isang anghel ng Panginoon na nagpakita sa kanila. Pangalawa, isang maningning na liwanag mula sa kalangitan ang pumaligid sa kanila. Ang liwanag na nagniningning ay nagmula sa kaningningan ng Panginoon sa kalangitan. Kinalabutan ang mga pastol sa mga pangyayaring nagaganap. 

May mabuting balitang hatid ang anghel ng Panginoon na nagpakita sa kanila. Nang makita ng anghel na natatakot ang mga pastol sa mga nangyayari, sinabihan niya ang mga pastol na huwag matakot. Hatid ng anghel ng Panginoon ang isang balitang magbibigay ng matinding kagalakan sa mga pastol. Papawiin ng balitang hatid ng anghel ang lahat ng mga kinatatakutan ng mga pastol. Ang Tagapagligtas na si Kristo ay isinilang na. Isinilang na si Kristo sa isang sabsaban sa Betlehem. Dumating na ang araw na pinakahihintay ng lahat. Dumating na ang Mesiyas. 

Tinupad ng Diyos ang Kanyang pangako sa Kanyang bayan. Sa takdang araw, ipapadala Niya sa daigdig ang Mesiyas upang maging Tagapagligtas ng sangkatauhan. Palalayain ng Mesiyas ang lahat ng mga nababalot ng kadiliman at aakayin tungo sa landas ng kaliwanagan. Aakayin ng Mesiyas ang lahat sa landas ng kaliwanagan pabalik sa Diyos. Sa pagdating ni Hesus, aakayin Niya ang lahat pabalik sa Ama. Tayong lahat na naliligaw ng landas at nababalot ng kadiliman ay inaakay tayo pabalik sa kaliwanagan dulot ng Awa ng Diyos sa pamamagitan ng Mesiyas at Manunubos na si Hesus. 

Ang pagsilang ng Panginoong Hesukristo ay ang pagsilang ng liwanag at awa ng Diyos sa daigdig. Liwanag ang dulot ng Awa ng Diyos. Inaakay tayong lahat ng Awa ng Diyos pabalik sa Maawaing Panginoon. Ang ating gabay pabalik sa Mahal na Panginoon ay ang Kanyang Awa. Ang Awa ng Mahal na Panginoon ay ang liwanag na umaakay sa ating lahat pabalik sa Kanya. Ang liwanag na taglay ni Hesus sa Kanyang kapanganakan ay dulot ng Dakilang Awa ng Diyos. 

Iniluwal ng Mahal na Birheng Maria sa kanyang sinapupunan ang Panginoong Hesus noong unang Pasko. Noong iniluwal ang Mahal na Panginoon mula sa sinapupunan ng Mahal na Ina, sumilay ang liwanag dulot ng Awa ng Diyos. Ang Awa ng Diyos ang nagdulot ng maningning na liwanag sa gabi ng unang Pasko. Sa pamamagitan ng pagsilang ng Mukha ng Maawaing Ama na si Hesukristo, nagningning sa buong kapaligiran ang Awa ng Diyos. Ang Awa ng Diyos ang liwanag na nagniningning at pumapawi sa lahat ng kadiliman. 

Patuloy na nagniningning ang liwanag dulot ng Awa ng Panginoon. Buong kaliwanagang nagniningning ang liwanag ng Awa ng Diyos. Ang Sanggol na Hesus ay ang Mukha ng Banal na Awa. Sa Kanya nagmula ang nagniningning na liwanag. Ang liwanag na ito ay nagniningning at pumapawi sa lahat ng uri ng kadiliman dulot ng kasalanan. Sinakop ang mundo ng liwanag dulot ng Awa ng Diyos sa pamamagitan ng pagsilang ng Sanggol na Hesus. 

ARAW NG KALIGTASAN: ARAW NG DAKILANG AWA AT HABAG NG DIYOS

24 Disyembre 2015
Ikasiyam na Araw ng Simbang Gabi/Misa de Gallo (ABK) 
2 Samuel 7, 1-5. 8b-12. 14a. 16/Salmo 88/Lucas 1, 67-79 

Sa Ebanghelyo ngayon, mapapakinggan natin ang awit ng papuri ni Zacarias sa Diyos. Matapos ng siyam na buwan na pananatili ng sanggol na si San Juan Bautista sa sinapupunan ng kanyang inang si Santa Isabel (Elisabet), nakapagsalita na muli si Zacarias. Tapos na ang sumpa. Hindi na siya pipi o bingi. Bagkus, makakapagsalita at makakarinig na si Zacarias nang malinaw at nang lubusan. Sa kanyang pagsasalita sa unang pagkakataon, pinuri niya ang Diyos. Walang ibang salitang namutawi sa bibig ni Zacarias kundi mga salitang nagbibigay papuri at luwalhati sa Diyos. 

Mapapakinggan natin sa awit ni Zacarias na magbubukang-liwayway na ang araw ng kaligtasan. May ipinapahiwatig si Zacarias sa titik na ito ng kanyang awitin, ang Benedictus (Purihin ang Panginoong Diyos ng Israel). Malapit nang dumating ang Mesiyas sa mundong ito. Isinilang na ang mauuna sa Mesiyas. Isinilang na ang Tagapaghanda ng daraanan ng Panginoon. Sa pamamagitan ng pagsilang ni San Juan Bautista, ang araw ng kaligtasan ay magbubukang-liwayway na. Magbubukang-liwayway na ang araw ng Awa ng Diyos. Darating na ang takdang panahon ng pagliligtas ng Diyos sa Kanyang bayan. 

Ipinahayag ng isa sa mga propeta ng Lumang Tipan na bago dumating ang Mesiyas, darating si Elias. Natupad ang propesiyang ito sa pamamagitan ni San Juan Bautista. Taglay ni San Juan Bautista ang espiritu at kapangyarihan ng propetang si Elias, ayon sa sinabi ng Arkanghel Gabriel kay Zacarias. Ang masusunod sa pagsilang ni San Juan Bautista ay ang pagsilang ng Panginoong Hesukristo, ang Mesiyas at Tagapagligtas na isinugo ng Diyos sa Kanyang bayan.

Sa awit ni Zacarias, ipinahayag niya sa kanyang anak na si Juan Bautista kung ano ang kanyang misyon sa buhay. Ipinahayag ni Zacarias na ang kanyang anak ay pinili ng Diyos para sa isang napakahalagang papel sa plano ng kaligtasang gagawin Niya para sa Kanyang bayan. Siya ang maghahanda ng daraanan ng Panginoon at magtuturo sa lahat tungkol sa pagsisisi at pagbabalik-loob sa Diyos. Ihahanda ni Juan Bautista sa kanyang paglaki ang lahat ng tao para salubungin ang Mesiyas na matagal na nilang hinihintay. 

Ang pagsilang ni San Juan Bautista ay ang pagpapahayag ng Diyos na malapit nang dumating ang araw ng kaligtasan. Nagbubukang-liwayway na. Malapit nang dumating ang araw. Ang araw ay darating sa pamamagitan ng pagsilang ni Hesus. Si Hesus ang liwanag ng Araw ng Kaligtasan. Kay Hesus magmumula ang liwanag ng Araw ng Kaligtasan. Sa Araw ng Kaligtasan, ipapamalas ng Diyos ang Kanyang Dakilang Awa at Habag sa buong sangkatauhan. 

Darating na ang araw na pinakahihintay natin. Ito ang pahayag ng Diyos sa pamamagitan ng pagsilang ni San Juan Bautista. Magbubukang-liwayway na ang araw ng kaligtasan. Ang araw ng kaligtasan ay magaganap sa pagdating ni Hesus. Sa pagdating ni Hesus, tataglayin Niya ang liwanag na papawi sa lahat ng uri ng kadiliman. Papawiin ni Hesus ang lahat ng uri ng kadiliman dulot ng kasalanan. Hindi na magtatagal at darating na ang Araw ng Kaligtasan. Sa pamamagitan ng pagsilang ni San Juan Bautista, ipinapahayag sa atin ng Diyos na malapit nang dumating si Hesus, ang Mesiyas at Manunubos ng sangkatauhan. 

Tataglayin ni Hesus ang liwanag ng Awa at Habag ng Diyos sa Kanyang pagdating. Mauuna sa Kanya si San Juan Bautista upang ipakilala Siya sa lahat ng tao. Ipapahayag ni San Juan Bautista na sumapit na ang araw na hinintay ng lahat sa loob ng matagal na panahon - ang pagdating ng Panginoon para sa kaligtasan ng lahat. Si San Juan Bautista ang magpapahayag sa lahat ng tao na ang Awa at Habag ng Diyos ay dumating na sa sanlibutan sa pamamagitan ng Mesiyas at Tagapagligtas na si Hesus. Ang Mukha ng Awa ng Diyos na si Hesus ay darating upang tayong lahat ay maligtas ng dakilang Awa at Habag ng Diyos. 

PAGSILANG NI SAN JUAN BAUTISTA: PAGPAPAMALAS NG KAGILIWAN NG DIYOS

23 Disyembre 2015
Ikawalong Araw ng Simbang Gabi/Misa de Gallo (ABK) 
Malakias 3, 1-4. 23-24/Salmo 24/Lucas 1, 57-66

Isang propesiya patungkol sa pagdating ng Mesiyas ang ating napakinggan sa Unang Pagbasa. Sa Unang Pagbasa, ipinahayag ni propeta Malakias na magpapakita si propeta Elias bago dumating ang Panginoon. Bago sumapit ang araw kung kailan magpapakita ng Panginoon, darating si propeta Elias. Magpapakita si propeta Elias upang ihanda ang lahat ng tao para sa araw ng Panginoon. Natupad ang propesiyang ito sa pamamagitan ni San Juan Bautista. Si San Juan Bautista ang huling propetang isinugo ng Panginoong Diyos bago dumating ang araw kung kailan nagpakita si Hesukristo. 

Sa Ebanghelyo, napakinggan natin ang salaysay ng pagsilang ni Juan Bautista. Nagdulot ng matinding kagalakan para kina Zacarias at Elisabet (Santa Isabel) ang pagsilang ni San Juan Bautista. Ayon pa nga sa Ebanghelyo, nakigalak ang mga kapitbahay at mga kamag-anak nina Zacarias at Elisabet sa pagsilang ng kanilang anak. Pagkatapos ng mahaba-habang panahon, nagkaroon na sila ng anak. Bagamat baog na si Elisabet, pinagpala siya ng Diyos at pinagkalooban ng anak. Sa kabila ng katandaan nina Zacarias at Elisabet, nagkaroon sila ng anak dahil sa awa at pagpapala ng Diyos sa kanila. 

Pipi si Zacarias noong kapanahunang yaon. Nakakapagsalita siya noong isinilang si San Juan Bautista. Natapos ang sumpa kay Zacarias. Makakapagsalita na siya. Isang himala ang naganap sa pagsasalita ni Zacarias. Nagwakas ang pagiging pipi at bingi ni Zacarias sa pagsilang ni San Juan Bautista. Sa pamamagitan ng pagsilang ni San Juan Bautista, ipinapakita ng Diyos ang kagiliwan sa lahat ng tao, kabilang na sina Zacarias at Elisabet. 

May misyon na iniatang ng Diyos kay San Juan Bautista - ihanda ang daraanan ng Panginoon. Kaya siya tinatawag na "Elias na darating." (Mateo 17, 10-13) Hindi man siya ang literal na Elias, natupad ang propesiyang ito sa pamamagitan ni San Juan Bautista. Katulad ng sinabi ng Arkanghel na si San Gabriel kay Zacarias, tataglayin ni San Juan Bautista ang kapangyarihan at espiritu ni Elias (Lucas 1, 17).  Si San Juan Bautista ang katuparan ng propesiya patungkol sa pagpapakita ni Elias bago magpakita ang Mesiyas. 

Subalit, bakit kinailangan pang magpadala ng sugo ang Diyos? Bakit kinailangang isugo ng Panginoon si San Juan Bautista upang ihanda ang Kanyang daraanan? Bakit hindi na lang Siya magpakita agad? Ano ba ang kahalagahan ng papel ni Juan Bautista? Bakit napakahalaga ang papel ni San Juan Bautista sa plano ng Diyos para sa kaligtasan ng sangkatauhan?

Nasa kahulugan ng pangalan ni Juan Bautista ang dahilan kaya siya isinugo. Ang kahulugan ng pangalang "Juan" ay "Magiliw ang Diyos." Katulad ng pagpapakita ng Kanyang kagiliwan kina Zacarias at Elisabet, ipinapakita din ng Diyos ang Kanyang kagiliwan sa lahat ng tao. Ang pagsugo kay San Juan Bautista ay pagpapakita ng kagiliwan ng Diyos. Sa pagsusugo kay Juan Bautista, binibigyan tayo ng pagkakataon ng Diyos upang ihanda ang ating mga sarili para sa Kanyang pagdating sa ating buhay. Nais ng Diyos na maging handa tayo upang salubungin Siya sa Kanyang pagdating sa ating buhay. 

Ang tanong ng mga kamag-anak at kapitbahay nina Zacarias at Elisabet, "'Magiging ano nga kaya ang batang ito?' Sapagkat maliwanag na sumasakanya ang Panginoon." (Lucas 1, 66) Namangha ang mga kamag-anak at kapitbahay nina Zacarias at Elisabet. Namalas nila ang kagiliwan ng Diyos sa pamamagitan ng sanggol na si San Juan Bautista. Hindi ordinaryong sanggol ang nasa kanilang piling. May mahalagang papel ang sanggol na ito. Hindi man siya ang Mesiyas, may mahalagang papel ang sanggol na ito sa plano ng Diyos. Kaya, katulad ng sinabi ni San Lucas Ebanghelista, "Sumasakanya ang Panginoon." Kinagiliwan ng Diyos si San Juan Bautista, magmula noong siya'y isinilang. 

Sa pagsilang ni San Juan Bautista, nais ipahayag ng Diyos sa atin na Siya'y magiliw. Ipinapamalas ng Diyos ang Kanyang kagiliwan sa lahat ng mga may takot sa Kanya at ang mga kalugud-lugod sa Kanya. Nais ipamalas sa ating lahat ng Panginoon ang Kanyang kagiliwan sa ating lahat, sa kabila ng katotohanang tayo'y mga makasalanan. Tayong lahat ay mga makasalanan, totoo iyon. Iyan ang katotohanan - mga makasalanan tayong lahat. Subalit, kahit mga makasalanan tayo, hindi ito magiging hadlang para sa Diyos upang ipamalas at ipadama sa ating lahat ang Kanyang awa at kagiliwan. 

PURIHIN NANG BUONG KAGALAKAN ANG MAAWAING DIYOS KASAMA SI MARIA

22 Disyembre 2015 
Ikapitong Araw ng Simbang Gabi/Misa de Gallo (ABK) 
1 Samuel 1, 24-28/1 Samuel 2/Lucas 1, 46-56 

Tatlong dekada nang naghintay ang buong Pilipinas para magtagumpay sa Miss Universe. Ang tagumpay ni Pia Alonzo Wurtzbach, kahit medyo nagkaroon ng kontrobersya, ay nagdulot ng malaking tuwa sa ating lahat bilang mga Pilipino. Matagal na tayong naghintay - mga tatlong dekada - upang magtagumpay ang pambato ng Pilipinas sa mga ganung contest, lalung-lalo na kapag international. Kalat pa nga sa social media ang pagkapanalo ng ating pambato sa Miss Universe 2015. Sa pakiwari ko, hindi sapat ang salitang "tuwa" o "saya" upang ilarawan ang naramdaman nating mga Pilipino sa tagumpay ni Binibining Pia Alonzo Wurtzbach sa Miss Universe 2015 - gusto ko sanang gamitin ang salitang "kagalakan." Bakit? Ibang-iba ang saya na nararamdaman natin sa tagumpay na ito. Hindi ordinaryo ang saya na nararamdaman natin ngayon, siguro. 

Ang Ebanghelyo ngayon ay tungkol sa kagalakan. Inilarawan ni San Lucas sa Ebanghelyo ang kagalakan ng Mahal na Birheng Maria. Paanong inilarawan ni San Lucas ang kagalakan ni Maria? Sa pamamagitan ng isang awit - ang "Magnificat" (Ang puso ko'y nagpupuri). Napakinggan natin sa Ebanghelyo ang Awit ni Maria. Umawit nang buong pagpupuri at kagalakan si Maria sa Diyos. Bakit ginawa iyon ni Maria? Sapagkat ipinamalas ng Diyos ang Kanyang awa at habag kay Maria. Isang ordinaryong dalaga, sa katauhan ni Maria, bagamat nagmula sa kababaan, ay binigyan ng isang di-pangkaraniwang misyon sa buhay. Ang misyong ibinigay ng Diyos kay Maria ay ang pagiging ina ni Kristo. 

Inilarawan ng Mahal na Ina sa pamamagitan ng kanyang awit ang habag at ang kabutihang-loob ng Diyos. Inilalarawan din ng Mahal na Ina sa kanyang awit na malapit ang Diyos sa lahat ng mababang-loob at ang mga aba. Ang Diyos ay mahabagin sa lahat ng mga mababang-loob at ang mga aba. Kinalulugdan ng Diyos ang lahat ng mga taong mapagpakumbaba, at ang mga maralita. Ang Panginoong Hesus ang nagsabi, "Ang sinumang nagpapakataas ay ibababa, at ang nagpapakababa ay itataas." (Lucas 18, 14) 

Napakinggan din natin sa Unang Pagbasa na nagpasalamat ang ina ni Samuel na si Ana sa pagsilang ng kanyang anak. Bago pa isilang si Samuel, buong pusong nanalangin si Ana kasama ang saserdoteng si Eli upang pagkalooban siya ng anak. Dininig ng Diyos ang panalangin ni Ana, at dininggin Niya ito. Si Ana'y pinagkalooban ng Diyos ng isang anak sa katauhan ni Samuel. Kaya, buong kagalakan at pagpupuri siyang nagpasalamat sa Diyos para sa biyaya ng kanyang anak na si Samuel. Hindi lamang iyan. Inihandog ni Ana ang kanyang anak na si Samuel sa Panginoong Diyos bilang pasasalamat sa biyayang tinanggap. 

Tugmang-tugma rin ang ating Salmo ngayon. "Diyos kong Tagapagligtas, pinupuri Kitang wagas." Maraming dahilan kung bakit ang Diyos ay dapat purihin. Diniringgin Niya ang mga mababang-loob at ang mga dukha. Malapit Siya sa mga maralita, pisikal man o esprituwal ang pagiging maralita ng sinuman. Kinikilala natin ang Diyos bilang isang mahabagin at maawaing diyos. Ibang-iba ang Panginoong Diyos. Walang makakapantay sa awa at kabutihang-loob ng Panginoon. Siya ang Diyos na magandang-loob, mahabagin, at maawain.

Napakalinaw ng tema at mensahe ng Awit ni Maria - ang Diyos ay maawain at mahabagin. Walang kupas ang awa at habag ng Panginoong Diyos. Napakatatag at napakadakila ang Awa at Habag ng Diyos. Ang Diyos ay ang Diyos ng Awa at Habag. Magmula pa noong nilikha ang daigdig na ito, ipinamalas ng Diyos ang Kanyang Awa at Habag, lalung-lalo na sa mga tao. Ang kasalanan nina Eba't Adan sa Halamanan ng Eden ay hindi naging dahilan upang itigil ng Diyos sa pagpapakita at pagpapadama ng Awa at Habag sa lahat. At ang pinakadakilang gawa ng Diyos upang ipakita at ipadama sa sangkatauhan ang Kanyang Dakilang Awa at Habag ay ang pagpapadala Niya sa Kanyang Bugtong na Anak, ang Panginoong Hesukristo, sa sanlibutan. 

Malapit na malapit na ang Pasko. Kaunti na lang ang hihintayin natin. Ilang araw na lamang at Pasko na. Sa mga huling panahon ng Adbiyento at pagsapit ng Kapaskuhan, samahan natin ang Mahal na Inang si Maria upang purihin nang may buong kagalakan ang Panginoong Diyos. Purihin natin ang Diyos nang may buong kagalakan dahil sa Kanyang Dakilang Awa at Habag sa ating lahat, mga abang makasalanan. Bagamat mga makasalanan tayo, pinili ng Diyos na ipakita at ipadama sa atin ang Kanyang Awa at Habag. Ang pinakadakilang gawa ng Diyos upang ipakita at ipadama ang Kanyang Banal at Dakilang Awa at Habag ay ang pagsusugo Niya sa Mesiyas, ang ating Panginoong Hesukristo. Maraming ginawa ang Diyos upang ipakita at ipadama sa atin ang Kanyang Awa at Habag, ngunit walang makahihigit pa sa pagsusugo Niya sa ating Tagapagligtas na si Hesus. 

MARIA: PINAGPALA DAHIL SA KANYANG PANANALIG SA KALOOBAN NG DIYOS

21 Disyembre 2015 
Ikaanim na Araw ng Simbang Gabi/Misa de Gallo (ABK) 
Awit 2, 8-14 (o kaya: Sofonias 3, 14-18a)/Salmo 32/Lucas 1, 39-45 

Muli na naman nating mapapakinggan ang salaysay ng Pagdalaw ng Mahal na Birheng Maria sa kanyang kamag-anak na si Santa Isabel (Elisabet). Kung atin pong mapapansin at matatandaan, napakinggan natin ang salaysay ng Pagdalaw ng Mahal na Birhen kay Santa Isabel (Elisabet) na kanyang kamag-anak kahapon. Subalit, pagtuunan natin ng pansin ngayon si Maria, sapagkat ayon sa kanyang kamag-anak na si Elisabet, nanalig si Maria sa kalooban ng Diyos para sa Kanya. 

Dala ni Maria ang pagpapalang ipinagkaloob sa kanya ng Diyos. Ang dinadalang sanggol sa kanyang sinapupunan ang pagpapalang ipinagkaloob ng Diyos kay Maria. Pinagpala si Maria sapagkat siya ang hinirang upang maging ina ng Mesiyas na si Hesukristo. Si Maria ay pinili ng Diyos upang bigyan ng buhay si Hesus dito sa sanlibutang ito. Paano nangyari ang lahat ng ito? Sa pamamagitan ng kanyang pananalig sa Diyos. Nanalig at tumalima si Maria sa kalooban ng Diyos para sa kanya. Bagamat hindi niya maunawaan nang lubos, buong pananalig na tumalima si Maria sa kagustuhan ng Diyos. 

Nang marinig ni Santa Isabel (Elisabet) ang bati ng Mahal na Ina, siya'y nagalak sa tinig ng kanyang bati. Ang sanggol na si San Juan Bautista ay gumalaw sa tuwa sa tiyan ni Elisabet. Noong marinig ni Elisabet ang tinig ng Mahal na Birhen, naramdaman niya ang paggalaw ng sanggol na si San Juan Bautista sa kanyang sinapupunan. Ano ang kahalagahan nito? Dumating sa kanilang piling ang pagpapala ng Diyos. Ang pagpapala ng Diyos ay dumating sa kanila sa pamamagitan ni Maria at ng sanggol sa kanyang sinapupunan na si Hesus. 

Ang tugon ni Elisabet sa pagbati ni Maria, "Pinagpala ka sa lahat ng mga babae, at pinagpala rin ang sanggol na dinadala mo sa iyong sinapupunan." (Lucas 1, 42) Ang pananalig ni Maria sa kalooban ng Diyos ang dahilan kaya siya pinagpala ng Diyos. Nanalig siya sa kalooban ng Diyos. Maraming hindi naunawaan si Maria patungkol sa kalooban ng Diyos. Subalit, hindi nagpadala si Maria sa kakulangan ng kanyang pang-unawa. Hindi pinagdudahan ni Maria ang Diyos. Bagkus, buong pananalig niyang tinanggap at sumunod sa kalooban ng Diyos. 

Bago pa ipinaglihi ang Mahal na Birheng Maria sa sinapupunan ni Santa Ana, siya'y iniligtas ng Diyos mula sa dungis ng kasalanang mana. Kaya, isinilang si Maria na hindi dinungisan ng kasalanan kahit kailan. Bilang bata, tinuruan din si Maria patungkol sa Mesiyas. Tinuruan si Maria patungkol sa pangako ng Diyos - ang pagdating ng Mesiyas bilang Tagapagligtas ng bayan ng Diyos. Kabilang siguro si Maria sa mga naghihintay o nananabik para sa pagdating ng Mesiyas, ang pinangakong Tagapagligtas na isusugo ng Diyos. Subalit, hindi niya inaasahan na siya ang pinili ng Diyos upang maging ina ng Mesiyas. 

Noong nagpakita si San Gabriel Arkanghel sa Mahal na Birheng Maria, nagulat ang Mahal na Birhen nang marinig ang bati ng anghel ng Panginoon. Ibinalita ng Arkanghel Gabriel ang kalooban ng Diyos para sa Mahal na Ina. Pinili si Maria upang maging ina ng Mesiyas at Tagapagligtas na si Hesus. Namangha si Maria sapagkat wala siyang inaasahang ganung responsibilidad. Kaya nagtanong siya kung paanong mangyayari iyon, sapagkat dalaga pa siya at nakatakdang ikasal sa isang karpintero na si San Jose. Ipinaliwanag sa kanya ng anghel na ang Espiritu Santo ay bababa sa kanya at liliman ng kapangyarihan ng Kataas-taasang Diyos. 

Kakamangha at napakalalim ng mga sinabi ng Arkanghel Gabriel sa Mahal na Ina. Naintindihan ba niya ang lahat? Naunawaan niya ang lahat? Siguro, may konti siyang kaalaman. Subalit, hindi niya naiintindihan nang lubos ang plano ng Diyos. Napakalalim at napakahirap na sundin ang kalooban ng Diyos. Isang mahirap na desisyon ang kinailangang gawin ng Mahal na Birhen. Maaari sanang sabihin ng Mahal na Ina kay San Gabriel Arkanghel na maghanap na lang ng ibang babae ang Diyos. Subalit, nanalig siya sa kalooban ng Diyos. Kaya, buong pagtalima niyang tinanggap at sinunod ang kalooban ng Diyos. 

Nang tinanggap ni Maria ang pagpapala ng Diyos, tumungo siya sa bahay ng kanyang kamag-anak na si Elisabet. Kahit gaano mang kalayo iyon, pinilit pa rin ni Maria na tumuloy sa bahay ng kanyang kamag-anak. Parehas silang nagdadalantao, subalit bakit pinili ni Maria na tumungo sa bahay ng kanyang kamag-anak? Bakit hindi na lang sila nagkita pagkatapos isilang ang kani-kanilang mga anak? Nais ibahagi ni Maria ang biyayang tinanggap niya mula sa Diyos sa kanyang kamag-anak na si Elisabet. Nais niyang ibahagi ang kagalakan dulot ng pagpapala ng Diyos. Kagalakan ang hatid ni Maria at ng Sanggol na Hesus sa kanyang sinapupunan sa kani-kanilang mga kamag-anak na sina Elisabet at ang sanggol na si Juan Bautista sa kanyang sinapupunan.

Pinagpala ng Diyos ang mga tumatalima sa Kanya ng buong pananalig. Katulad ng Mahal na Birheng Maria, buong pagtitiwala natin sundin ang kalooban ng Diyos. Bagamat mahirap at hindi sukat akalain ang kalooban ng Diyos, sumunod tayo sa kalooban ng Diyos. Kahit hindi lubusan nating maunawaan o maintindihan ang kalooban ng Diyos, sundan pa rin natin ang kalooban ng Diyos. Tularan natin si Maria, ang ating Mahal na Ina, sa pananalig at pagtalima sa kalooban ng Diyos. Tunay tayong makikilala bilang bayan ng Diyos kung tayo ay tumatalima nang buong pananalig sa kalooban ng Diyos. Sapagkat ipinagkakaloob ng Diyos ang Kanyang mga pagpapala sa lahat ng mga nananalig at tumatalima sa Kanya. 

ANG PAGLILIGTAS NG DIYOS

20 Disyembre 2015 
Ikaapat na Linggo ng Adbiyento (K) 
Ikalimang Araw ng Simbang Gabi/Misa de Gallo 
Mikas 5, 1-4a/Salmo 79/Hebreo 10, 5-10/Lucas 1, 39-45 

Ang tema ng mga Pagbasa ngayong Ikaapat na Linggo ng Adbiyento at Ikalimang Araw ng Simbang Gabi o Misa de Gallo ay ang pagliligtas ng Diyos sa Kanyang bayan. Sa Lumang Tipan, ipinahayag ng Diyos na isusugo Niya ang Mesiyas upang iligtas ang Kanyang bayan. Ang magiging Tagapagligtas ng bayang Israel ay ang Mesiyas na isusugo ng Diyos. Natupad ang plano ng Diyos sa Bagong Tipan noong isinilang at nagpakita ang Panginoong Hesukristo sa mundong ito. 

Mapapakinggan natin sa Unang Pagbasa na hinulaan ni propeta Mikas ang pagsilang ng Mesiyas. Siya'y magmumula sa Betlehem, isang bayan sa Juda. Ang Mesiyas ay iluluwal mula sa sinapupunan ng isang babae, isang dalaga. Kung atin pong mapapansin, nilikha ng Diyos ang babae mula sa tadyang ng lalaki sa ikalawang kabanata ng aklat ng Genesis (2, 21-22). Subalit, iba na ang mangyayari. Isang dalaga ang maglilihi at magluluwal sa Mesiyas. Siyam na buwan mananahan ang Mesiyas sa sinapupunan ng babaeng iyon. Natupad ang propesiyang ito patungkol sa pagsilang ng Mesiyas sa Bagong Tipan sa pamamagitan ng Panginoong Hesus at ng Mahal na Birheng Maria. 

Isinalarawan ng manunulat ng Ikalawang Pagbasa mula sa sulat sa mga Hebreo kung paanong dumating si Hesus sa sanlibutan. Dumating si Hesus upang tuparin ang kalooban ng Ama. At ginawa nga ni Hesus ang lahat ng pinapagawa sa Kanya. Nanaog ang Panginoong Hesus sa sanlibutan, at sumunod sa kalooban ng Diyos. Kalooban ng Diyos na maligtas ang sangkatauhan. Naparito si Kristo sa sanlibutan upang iligtas ito, hindi upang ipahamak (Juan 3, 16-17). Inihain ni Kristo ang Kanyang buhay upang iligtas tayong lahat mula sa ating mga kasalanan at palayain mula sa kaalipinan dulat ng kasamaan at kasalanan. Tayo'y pinalaya at iniligtas sa pamamagitan ng pag-aalay ni Kristo ng Kanyang buhay.

Sa Ebanghelyo, narinig natin ang salaysay ng pagdalaw ng Mahal na Ina sa kanyang kamag-anak na si Santa Isabel (Elisabet). Nabalitaan ng Mahal na Birhen na nagdadalantao rin ang kanyang kamag-anak, sa kabila ng kanyang katandaan. Kaisa ni Maria si Elisabet sa kanyang pagdadalantao. Parehas silang nagdadalantao - dinadala ni Maria si Hesus sa kanyang sinapupunan, habang dinadala naman ni Elisabet si San Juan Bautista sa kanyang sinapupunan. 

Kahit hindi pa lumabas sa sinapupunan, nakita ni San Juan Bautista ang katuparan ng pagliligtas ng Diyos. Noong narinig ni Elisabet (Santa Isabel) ang pagbati sa kanya ni Maria, ang sanggol na si San Juan Bautista ay gumalaw sa laki ng tuwa, kahit nasa loob pa siya ng tiyan ni Santa Isabel (Elisabet). Gumalaw ang sanggol na si San Juan Bautista sa loob ng tiyan ng kanyang inang si Elisabet dahil kahit hindi pa siya lumabas, nakilala na Niya kung sino ang pinangakong Tagapagligtas. Nakilala ng sanggol na si San Juan Bautista na hindi pa ipinapanganak ang Tagapagligtas isusugo ng Diyos para sa kaligtasan ng lahat. 

Nangako ang Panginoong Diyos sa Lumang Tipan na magpapadala Siya ng isang dakilang sugo - isang Tagapagligtas, ang Mesiyas. Ipapadala ng Diyos ang Mesiyas sa sanlibutan upang tayo'y iligtas at palayain mula sa kasalanan at kamatayan. Tinupad ng Diyos ang Kanyang pangako at pinadala nga Niya ang Mesiyas sa Kanyang bayan. Si Hesus ang katuparan ng plano at pangako ng Diyos para sa kaligtasan ng Kanyang bayan. Si Hesus ay hinirang ng Ama upang tuparin ang pangako ng kaligtasan para sa Kanyang bayan. Nagplano ang Diyos para sa kaligtasan ng Kanyang bayan. Nangako rin ang Diyos na ililigtas Niya ang Kanyang bayan. Natupad na ang Kanyang plano ng pagliligtas sa Kanyang bayan. Natupad ang Kanyang pangako sa Kanyang bayan na sila'y ililigtas. 

Tunay na dakila ang pagliligtas ng Diyos sa Kanyang bayan. Ang pagliligtas ng Diyos ay natupad sa pamamagitan ng Kanyang Banal at Dakilang Awa at Habag sa Kanyang bayan. Isinugo ng Diyos ang Mesiyas sa katauhan ng Kanyang Bugtong na Anak, ang Panginoong Hesukristo, upang maging Tagapagligtas ng Kanyang bayan. Nagmula ang Mesiyas na si Hesus sa sinapupunan ng isang dalaga, isang babae, ang Mahal na Birheng Maria. Nakilala din Siya bilang Tagapagligtas ng sangkatauhan ng isang kapwa-sanggol na nasa sinapupunan ng kanyang sariling ina - si San Juan Bautista. 

Nakilala ni San Juan Bautista, na nasa tiyan ng kanyang inang si Santa Isabel (Elisabet) ang Panginoong Hesus na nasa tiyan ng Kanyang ina, ang Mahal na Birheng Maria. Nakilala din ni Elisabet (Santa Isabel) ang Bagong Kaban ng Tipan, ang Mahal na Birheng Maria na nagdala sa Panginoong Hesukristo sa kanyang sinapupunan sa loob din ng siyam na taon. Noong narinig ni Elisabet (Santa Isabel) ang pagbati ng kanyang kamag-anak na si Maria, narinig din ng sanggol na si San Juan Bautista na nasa sinapupunan ng kanyang inang si Santa Isabel (Elisabet) ang tinig ng pagliligtas ng Diyos. 

Dumating ang pagliligtas ng Diyos sa pamamagitan ng isang sanggol na lalaki at ng isang dalagang babae. Iniluwal ng Mahal na Birheng Maria, ang dalagang babae, ang Bugtong na Anak ng Diyos na si Hesukristo, ang sanggol na lalaki. Sa pamamagitan nito, tinupad Niya ang Kanyang mga sinabi patungkol sa Kanyang pangako ng kaligtasan na ipinahayag ng mga propeta sa Lumang Tipan. Ipinahayag ng Diyos sa Kanyang bayan na maglilihi at manganganak ng isang sanggol na lalaki ang isang dalaga. Natupad iyon sa pamamagitan ng Sanggol na si Hesus at ng Mahal na Birheng Maria. 

MANALIG SA AWA NG PANGINOON

19 Disyembre 2015 
Ikaapat na Araw ng Simbang Gabi/Misa de Gallo (ABK) 
Mga Hukom 13, 2-7. 24-25a/Salmo 70/Lucas 1, 5-25

Sinimulan ni San Lucas ang kanyang Ebanghelyo sa pamamagitan ng mga pagpapakita ni San Gabriel Arkanghel kina Zacarias at Maria. Mahalaga ang papel ng Arkanghel na si San Gabriel sa plano ng pagliligtas ng Diyos sa sangkatauhan. Siya ang tagapaghatid ng Mabuting Balita ng Panginoon. Hinatid niya ang Mabuting Balita ng Panginoon kina Zacarias at Maria. Ang balitang hatid ng Arkanghel Gabriel kina Zacarias at Maria ay ang kanilang mga papel sa kaligtasang pinlano ng Diyos para sa sangkatauhan. 

Unang nagpakita si San Gabriel Arkanghel kay Zacarias. Ibinalita niya kay Zacarias ang kanyang papel sa plano ng kaligtasan ng Diyos sa sangkatauhan. Sina Zacarias at ang kanyang asawang si Elisabet (Santa Isabel) ay pinili ng Diyos upang maging mga magulang ng Tagapaghanda ng daraanan ng Panginoon. Ang kanilang magiging anak ay si San Juan Bautista. Si San Juan Bautista ang mauuna sa Mesiyas upang ipaghanda ang Kanyang daraanan. 

Ayon sa kaugalian ng mga Hudyo, kapag may isang babaeng na walang anak sa kanyang pagtanda, isa na siyang baog. Walang magtataguyod para sa kanyang kabuhayan kapag ang kanyang asawa ay pumanaw. Walang anak na mag-aalaga sa kanya. Walang siyang mga anak na maghahanap-buhay para sa kanilang pamilya, kahit isa man lang.  Siguro, wala nang mag-aalaga sa kanya, lalung-lalo na kung biyuda siya. Araw-araw siyang nag-iisa, at malungkot. Mag-isa na lamang siya, at kadalasan, nabubuhay siya na puno ng kahirapan. Mahirap ang maging biyuda at balo noong kapanahunang yaon. 

Baog na si Elisabet. Malapit na rin siyang maging biyuda, kung si Zacarias ang unang mamatay sa kanilang dalawa. Sa katandaan siguro nina Zacarias at Elisabet, masasabi nating malapit nang magwawakas ang kanilang buhay dito sa mundo. Araw-araw silang nanalangin sa Diyos na ipagkaloob sila ng anak, subalit, sa mahaba-habang panahon, hindi sila nagkaroon ng anak, kahit isa man lang. Kung mamamatay si Zacarias, wala nang mag-aalaga o magtataguyod para kay Elisabet. Mag-isa na lamang siyang mamumuhay na punung-puno ng kahirapan at kalungkutan kung mauuna sa kanya si Zacarias. 

Kahit na baog si Elisabet, ipinahayag ng Arkanghel Gabriel kay Zacarias na magdadalantao ang kanyang asawa. Matagal nang hinintay ng mag-asawang sina Zacarias at Elisabet ang araw na iyon. Subalit, bakit kung kailan pa sila tumanda? Bakit pa nagdalantao si Elisabet noong sobrang matanda na siya? Bakit hindi siya nagdalantao noong bata-bata pa sila? Bakit ngayong lang pinagbigyan ng Diyos ang kanilang kahilingan? Bakit ang tagal?

Plano ito ng Diyos. Lahat ng ito ay pinlano ng Diyos. Ipinlano Niya ang paraan kung paanong ililigtas Niya ang Kanyang bayan. Siya ang nagplano kung paanong ililigtas Niya ang buong sangkatauhan. Isusugo Niya ang Mesiyas sa katauhan ni Hesus upang maging Tagapagligtas ng sangkatauhan. Subalit, bago pa lumitaw ang Mesiyas, may maghahanda ng Kanyang daraanan. Lilitaw ang Tagapaghanda ng daraanan ng Panginoon. Siya ay walang iba kundi si San Juan Bautista. Bago magpakita si Hesus, magpapakita muna si Juan Bautista. 

Subalit, ang nakakalungkot, pinagdudahan ni Zacarias ang plano ng Diyos. Hindi siya naniwala. Humingi siya ng palatandaan mula sa anghel para maniwala siya. Nagtanong si Zacarias dahil nagduda siya sa awa ng Diyos. Sa halip na manalig at magpasalamat sa Diyos, nagtaka at nagduda si Zacarias. Tinaasan niya siguro ang kanyang kilay sa anghel. Hindi siya makapaniwala sa mga sinasabi sa kanya ng anghel. Kaya, humingi siya ng tanda bago pa siya maniwala sa sinabi ng Arkanghel na si San Gabriel sa kanya. 

Dahil pinagdudahan ni Zacarias ang plano ng maawaing Diyos, sinumpaan siya ng Diyos. Pinarusahan siya ng Diyos dahil sa kakulangan ng pananalig at pagtitiwala sa awa ng Diyos. Mananatiling pipi at bingi si Zacarias hanggang sa araw ng pagsilang ni San Juan Bautista. Ito'y kaparusahan mula sa Diyos. Pinarusahan ng Diyos si Zacarias dahil hindi siya nanalig sa Kanya. Bagamat masakit para sa Diyos na parusahan si Zacarias na matagal nang naghintay upang magkaanak, kinailangan Niyang parusahan si Zacarias dahil sa kakulangan ng pananalig sa Kanyang Banal at Dakilang Awa sa sangkatauhan. 

Araw-araw, ipinapakita at ipinapadama ng Panginoon sa ating lahat ang Kanyang Banal at Dakilang Awa. Huwag nating pagdudahan ang Kanyang Awa sa ating lahat. Ang lahat ng mga mabubuting bagay ang nangyayari dahil sa awa ng Diyos. Hindi ba, bilang mga Pilipino, madalas nating sinasabi kapag ang lahat ay nasa mabuting bagay ang mga salitang katulad ng, "May awa ang Diyos," "Sa awa ng Diyos" ? Huwag nating pagdudahan ang Awa ng Diyos. Bagkus, manalig tayo sa awa ng Panginoon nang buong puso at kaluluwa. 

HESUS: ANAK NI MARIA, ANAK NI JOSE

18 Disyembre 2015
Ikatlong Araw ng Simbang Gabi/Misa de Gallo (ABK) 
Jeremias 23, 5-8/Salmo 71/Mateo 1, 18-24 

Binibigyang diin ng Ebanghelyo ngayong Ikatlong Araw ng Simbang Gabi o Misa de Gallo ang salaysay ng pagtanggap ni San Jose sa Mahal na Birheng Maria at sa Panginoong Hesus. Tinanggap ni Jose sina Maria at Hesus sa kanyang buhay bilang kanyang pamilya. May plano ang Diyos para kay Jose - tumayo bilang ama ni Hesus dito sa sanlibutan. Pinili ng Diyos na lumaki bilang anak ng isang lalaki at isang babae. Pinili ng Diyos na magkaroon ng isang pamilya. 

Walang balak si Maria na mabuntis sa maagang edad. Si Maria'y isang dalaga na namumuhay ng payak sa Nazaret. Namumuhay siya kasama ng kanyang mga magulang na sina Santa Ana at San Joaquin noong kapanahunang yaon. Ayon pa nga sa Ebanghelyo, ikakasal si Maria kay Jose nang siya'y magdalantao. Hindi pinlano ni Maria na magdalantao sa murang edad. Kung kailan hindi pa nagaganap ang kasal, saka pa nabuntis si Maria. Isang mabigat na eskandalo ito sa kapanahunang yaon. Aakusahan si Maria ng pakikiapid sapagkat siya'y natagpuang buntis sa labas ng kasal. 

Si Jose naman ay isang karpintero sa Nazaret. Galing siya sa Betlehem, subalit nakatira siya sa Nazaret noong kapanahunang yaon. Masipag siya sa kanyang hanapbuhay bilang karpintero. Naghahanap-buhay si Jose para sa kanyang kasalukuyang pamilya, at sa kanyang magiging pamilya. Ikakasal na si Jose kay Maria, kaya puspusan na siguro ang kanyang paghahanap-buhay upang maayos ang pagsisimula ng kanilang buhay mag-asawa. 

Noong nabalitaan ni San Jose na nabuntis ang Mahal na Ina sa labas ng kasal, nagkaroon na siya ng pagdududa. Bakit nabuntis si Maria sa labas ng kasal? Malapit na silang ikasal, bakit ngayon pa siya nabuntis? Bakit hindi hinintay ni Maria si Jose? Bakit dinaya o niloko ni Maria si Jose? Bakit nakipagtalik si Maria sa ibang lalaki? Punung-puno ng pagmamahalan ang relasyon nina Jose at Maria. Bakit nagkaganon si Maria? Bakit siya nakipag-relasyon sa ibang lalaki? Bakit siya nakipag-relasyon sa iba, kahit alam niyang ikakasal siya? 

Ang pagiging buntis sa labas ng kasal ay mabigat na eskandalo noong kapanahunang yaon. Ito'y isang palatandaan na nakiapid ang isang babae sa ibang lalaki. Nagtalik sila sa labas ng kasal. Dahil sa bigat ng kasalanang ito noong kapanahunang yaon, mabigat ang kaparusahan nito. Ihahatak ang mga nakiapid patungo sa isang pampublikong lugar, katulad ng isang plaza. Pagkatapos, ibabato ang mga nakiapid hanggang sa sila'y namatay.  

Isang kumplikadong sitwasyon ito para kina Maria at Jose. Ayon pa nga sa Ebanghelyo, matuwid na tao si Jose. Hindi makakagawa ng ganitong bagay si Jose sapagkat siya'y isang matuwid na Hudyo. Masunurin si Jose sa batas ng mga Hudyo. Buong puso niyang sinusunod ang batas ng mga Hudyo. Ayaw niyang suwayin ang batas ng mga Hudyo. Alam din ni Jose na wala siyang kinalaman sa pagbubuntis ni Maria bago siya ikinasal. Isang napakakumplikado, napakagulo, at nakakalitong sitwasyon. Ano nga ba ang nangyari? Ano ba ang totoo? Sino ang nagsasabi ng katotohanan? Ano ba ang talagang nangyari?

Bakit nga ba nangyari ito? Si San Mateo ang nagpaliwanag sa pagpapatuloy ng salaysay. Ang Anghel ng Panginoon ay nagpakita kay Jose sa panaginip. Ipinaliwanag ng anghel ang dahilan ng pagdadalantao ni Maria sa labas ng kasal. Hindi nakiapid si Maria sa ibang lalaki. Hinding-hindi niloko ni Maria si Jose. Walang ibang ka-relasyon si Maria. Bagkus, kalooban ng Diyos ang naganap. Nabuntis si Maria dahil kagustuhan ito ng Diyos. Bakit? Sapagkat hindi pangkaraniwan ang sanggol na dinadala niya sa kanyang sinapupunan. Ang dinadala ni Maria sa kanyang sinapupunan ay ang Anak ng Diyos at ang Mesiyas - si Hesus. Ang pagdadalantao ni Maria ay kalooban ng Diyos, hindi bunga ng pakikipag-relasyon sa ibang lalaki. 

Sinugo ng Diyos si Hesus upang maging Tagapagligtas at Mesiyas ng sanlibutan. Hinirang ng Diyos si Maria upang maging ina ni Hesus. Mananahan si Hesus sa sinapupunan ni Maria sa loob ng siyam na buwan. Sa gayon, makikita natin na si Maria ang Kaban ng Bagong Tipan. Dinala ni Maria sa kanyang tiyan si Hesus, ang Bagong Tipan. Hinirang din ng Diyos si Jose upang maging ama-amahan ni Hesus dito sa mundo. Ang Banal na Pamilya nina Hesus, Maria, at Jose ay binuo ng Diyos para sa Kanyang dakilang plano ng pagliligtas sa sanlibutan. 

Lumaki si Hesus sa isang pamilya katulad natin. Ipinapakita ni Hesus na kahit Siya ang Diyos, kaisa Niya tayo. Naging tao ang Diyos Anak upang ipakita at ipadama sa atin ang Kanyang awa at habag sa sangkatauhan. Bumaba Siya mula sa langit at nanahan sa tiyan ng isang birhen sa loob ng siyam na buwan. Lumaki ang Panginoong Hesus sa isang pamilya na binuo ng isang babae at isang lalaking magkabiyak sa katauhan ng Mahal na Birheng Maria, ang maluwalhating laging birhen, at ni San Jose na tumayo bilang Kanyang ama-amahan sa daigdig. 

HESUS: NAPABILANG SA ANGKAN NG MGA MAKASALANAN DAHIL SA AWA NG DIYOS

17 Disyembre 2015
Ikalawang Araw ng Simbang Gabi/Misa de Gallo (ABK) 
Genesis 49, 2. 8-10/Salmo 71/Mateo 1, 1-17 

(Photo courtesy: http://manilacathedral.ph/)

Ang Ebanghelyo ngayon ay tungkol sa lahi ng Panginoong Hesukristo. Nagmula ang Panginoong Hesus mula sa angkan ng mga kasalanan. Mga makasalanan ang mga ninuno ni Hesus. Katulad nina Jacob, Juda, David, at Solomon. Ninakaw ni Jacob ang karapatan at basbas ng kanyang amang si Isaac na nakalaan para sa kanyang kambal na si Esau. Si Juda at ang kanyang mga kapatid ang nagbenta sa kanilang nakababatang kapatid na si Jose. Pinagpaslang ni Haring David ang asawa ni Batseba na si Urias, at nakiapid. Si Haring Solomon naman ay nag-asawa ng maraming mga babaeng dayuhan, kahit na labag ito sa Panginoong Diyos. Tinalikuran ni Solomon ang Diyos na Siyang nagbigay ng karunungan sa kanya noong siya'y bagong hari pa lamang. 

Bakit nga ba pinayagan ng Diyos na maging kabilang sa lahi ng mga makasalanan ang Panginoong Hesukristo? Hindi ba pwedeng isugo na lang si Hesus nang dire-diretsyo? Hindi ba't maaaring bumaba si Hesus mula sa langit sa Kanyang dakila at maningning na Anyo? Kung gugustuhin ni Hesus, maaari sanang bumaba si Hesus mula sa langit, punung-puno ng kadakilaan at kaluwalhatian. Hindi na mapapabilang si Hesus sa lahi ng mga makasalanan kung gayon ang nangyari. Bakit pinayagan ng Diyos na mapabilang si Hesus sa lahi ng mga makasalanan? 

Una, ipinapakita ng Diyos ang Kanyang awa sa mga makasalanan. Si Hesus ay naging kabilang ng lahi ng mga makasalanan upang ipakita sa lahat ang Kanyang Banal na Awa sa mga makasalanan. Nais Niyang ipadama ang Kanyang Awa sa mga makasalanan. Kahit gaanong kasama ang kasalanan ng bawat tao, hindi iyan mapapantayan ang Awa ng Diyos. Ang Awa ng Panginoon ay higit na dakila kaysa sa dinami-daming mga makasalanan. Walang kasalanan, kahit gaano pa mang kasama, ang mas makapangyarihan at mananaig laban sa Awa ng Diyos. 

Pangalawa, ipinapakita ng Diyos ang Kanyang awa sa mga nagdurusa. Binanggit dito sa talaan ang panahon ng pagkakatapon ng mga Israelita sa Babilonia. Panahon iyon nina Propeta Daniel, Haring Nabucodonosor, atbp. Nagdusa ang mga Israelita noong nagkawatak-watak sila dahil sa pagkakatapon ng mga Israelita sa Babilonia. Nananalangin ang buong bayang Israel sa Babilonia upang palayain sila mula sa kaalipinan sa Babilonia. 

Hindi lamang iyan ang pagkakataon kung kailan nagdusa ang mga Israelita, noong kapanahunan ni Moises. Bagamat hindi ito nabanggit sa talaan ng angkan ni Kristo, makikita natin sa salaysay ng pagpapalaya ng Diyos sa Kanyang bayan mula sa kaalipinan sa Ehipto. Ilang taon nang naranasan ng mga Israelita ang kalupitan ng mga Ehipsiyo. Napakahaba ang panahon ng kanilang paghihirap sa Ehipto. Nanalangin ang buong bayan ng Israel noong kapanahunang yaon na sila'y palayain mula sa kaalipinan sa Ehipto. At nagkatotoo nga. Dahil sa awa ng Diyos, sinugo Niya si Moises upang maging Kanyang tagapagsalita sa Faraon at tagapagpalaya ng mga Israelita. 

Sina Adan at Eba, ang unang mga ninuno ng sangkatauhan, ang unang makasalanan. Perpektong-perpekto sana sila, subalit nagkasala sila laban sa Diyos noong kinain nila ang bunga mula sa puno ng karunungan tungkol sa kabutihan at kasamaan, ang puno sa gitna ng halamanan ng Eden. Pumasok ang kasalanan sa daigdig sa pamamagitan ng kasalanan nina Adan at Eba. Nagpadaig sina Adan at Eba sa tukso, sa halip na sundin ang utos ng Diyos. 

Maawain ang Diyos sa mga taong marupok. Salamat sa Diyos sa Kanyang Dakilang Awa sa ating lahat, mga taong marupok! Kung hindi maawain ang Diyos, matagal tayong namuhay bilang mga alipin ng kasamaan at kasalanan. Kung walang Awa ng Diyos, hindi sana pumarito si Hesus upang tayo'y tubusin at palayain mula sa ating mga kasalanan. Ang plano ng kaligtasan ng Diyos para sa sangkatauhan dahil sa Kanyang Dakilang Awa ay natupad sa pamamagitan ni Kristo Hesus. Naparito si Kristo upang tuparin ang kaligtasang ipinangako ng maawaing Diyos sa Kanyang bayan.

Naging tao si Hesus upang ipakita at ipadama sa buong sansinukob ang Banal at Dakilang Awa ng Diyos. Bagamat perpekto, pinili ni Hesus na mapabilang sa angkan ng mga makasalanan dahil sa Awa ng Diyos. Hindi nagkasala kahit kailan si Hesus, noong Siya'y naparito sa mundo. Pinasan Niya ang ating mga kasalanan at inihandog sa Ama alang-alang sa ating lahat, mga mahihinang makasalanan. 

HESUS: ISINUGO UPANG MAGING MAAWAING TAGAPAGLIGTAS

16 Disyembre 2015 
Unang Araw ng Simbang Gabi/Misa de Gallo (ABK) 
Isaias 56, 1-3a. 6-8/Salmo 66/Juan 5, 33-36 

Sa simula ng Siyam na Araw ng Simbang Gabi o Misa de Gallo, mapapakinggan natin sa Ebanghelyo na nagpapatotoo si Hesus tungkol sa Kanyang sarili. Ipinahayag ng Panginoong Hesus na ginagawa Niya ang ipinapagawa sa Kanya ng Ama. May dahilan ang pagparito ng Panginoong Hesus. Napakahalaga ang kailangang gawin ni Hesus noong Siya'y pumarito sa daigdig. Sinugo ng Ama si Hesus upang tubusin ang Kanyang bayan. Si Hesus ang Mesiyas at ang Manunubos na ipinangako ng Diyos na susuguin sa Kanyang bayan. 

Walang ibang dahilan ang pagparito ni Hesus. Iisa lamang ang Kanyang misyon sa mundo - iligtas ang sangkatauhan mula sa kasalanan. Subalit, hindi Siya nagpakita agad. Nauna si San Juan Bautista sa Panginoong Hesus. Noong lumitaw si San Juan Bautista, inihanda niya ang daraanan ng Panginoon hanggang sa Siya'y lumitaw. Itinuro ni San Juan Bautista sa kanyang mga tagapakinig na ang kanyang kamag-anak na si Hesus ang Mesiyas na hinihintay ng bayang Israel. 

Ang mga ginagawa ni Hesus ay nagpapakilala kung sino Siya. Hindi lamang ang mga salita ni Juan Bautista tungkol sa Kanya ang nagpapatotoo kung sino si Hesus. Ipinapakilala ni Hesus ang Kanyang sarili sa pamamagitan ng Kanyang mga salita at gawa. Ang mga gawain ni Hesus ay ang mga pinapagawa sa Kanya ng Ama. Subalit, hindi Siya nakilala o tinanggap ng Kanyang bayan bilang Mesiyas na hinintay nila sa loob ng mahabang panahon. 

Noong pumarito si Hesus sa sanlibutan, tinaglay Niya ang awa at liwanag ng Diyos. Ang awa at liwanag ng Diyos ay nakita ng sanlibutan sa pamamagitan ni Hesus, subalit hindi Siya nakilala ng sanlibutan bilang Mukha ng maawaing Diyos na nagbibigay-liwanag. Sa mata ng Kanyang mga kababayan, si Hesus ay anak ni Maria, isang dalaga mula sa Nazaret. Siya ang anak ng isang karpintero na ang pangala'y Jose. Ayon sa Kanyang mga kababayan, si Hesus ay isang karpintero, at isang mabuting Guro. Kaunti lang ang nakakakilala sa Kanya bilang Mesiyas. 

Hindi pumarito si Hesus upang kontrolin Siya ng mga tao. Hindi pumarito si Hesus para gawing hari o bigyan ng isang makamundong posisyon sa pulitika. Bagkus, naparito si Hesus upang tuparin ang kaligtasang ipinangako ng Diyos. Nangako ang Diyos na ililigtas Niya ang Kanyang bayan mula sa kaalipinan dulot ng kasamaan at kamatayan, subalit ang paraan ng pagliligtas ng Diyos ay walang katulad. Hindi ito inaasahan ng mga tao. Isang sorpresa mula sa Diyos ang Kanyang plano. May plano ang Diyos upang iligtas ang sangkatauhan, subalit hindi ito sa paraan na inaasahan o inaakala ng karamihan. 

Kahit hindi man nakilala o inaasahan ng mga tao na si Hesus nga ang katuparan ng pangakong binitiwan ng Diyos sa Kanyang bayan, hindi ito nagpaapekto sa Kanya. Hindi nagpaapekto si Hesus sa anumang iisipin ng Kanyang kababayan tungkol sa Kanyang mga gawain. Bagkus, patuloy Niyang sinunod ang kalooban ng Diyos. Tumalima at sumunod Siya sa kagustuhan ng Diyos. Kaya nga pumarito si Hesus - upang tuparin ang kaligtasang ipinangako ng Diyos sa Kanyang bayan. 

Isinugo ng Diyos ang Mesiyas sa katauhan ng Diyos Anak na si Hesus. Subalit, naparito ang Diyos Anak upang maging maawaing Mesiyas at Tagapagligtas. Kalooban ito ng Diyos. Bagamat iba ang inaasahan at inaakala ng mga tao patungkol sa Mesiyas, hindi iyon sinunod ni Hesus. Bagkus, sinunod ni Hesus ang kalooban ng Ama. Bilang Mesiyas at Manunubos, ipinahayag Niya sa lahat, sa pamamagitan ng Kanyang mga wika at gawain, ang Liwanag dulot ng Banal at Dakilang Awa ng Panginoong Diyos. 

KAGALAKAN SA PANGAKO NG MAAWAING PANGINOON

13 Disyembre 2015
Ikatlong Linggo ng Adbiyento (K) 
"Linggo ng Kagalakan" (Linggo ng Gaudete) 
Sofonias 3, 14-18a/Isaias 12/Filipos 4, 4-7/Lucas 3, 10-18 

Kagalakan ang tema ng Ikatlong Linggo ng Adbiyento. Sa halip na lila ang kulay ng damit ng mga pari ngayong Linggo, kulay rosas ang suot ng mga pari sa Misa ngayon. Ang kulay rosas ay kumakatawan sa kagalakan. Ang Pambungad na Antipona ngayong Linggo ay hango sa mga unang linya ng Ikalawang Pagbasa sa Misa ngayong Linggo, "Magalak nang palagian sa Poon nating marangal. Darating ang hinihintay, ating pinananabikan Panginoon nating mahal." (Filipos 4, 4-5) Ganun din ang tugon sa ating Salmo ngayon, "D'yos na kapiling ng bayan ay masayang papurihan." (Isaias 12, 6)

Ano nga ba ang dapat ikagalak? Dapat nga ba tayong magalak dahil malapit na ang Kapaskuhan? Malapit ba tayong makapagpahinga mula sa ating mga pasok? Matatanggap na natin ang ating mga Christmas bonus mula sa mga trabaho natin? Bakit dapat tayong magalak, kahit sa isang linggo pa ang Pasko? 

May isang napakahalagang dahilan kung bakit dapat tayong magalak. Dapat tayong lahat na magalak sapagkat ang Panginoon ay maawain. Nitong mga nakaraang araw, lalung-lalo na noong Dakilang Kapistahan ng Inmaculada Concepcion ay binuksan natin ang Extraordinaryong Hubileyo ng Awa na may temang, "Maawain tulad ng Ama." Ang Awa ng Panginoong Diyos ay banal at dakila. Ang Awa ng Panginoon ang dahilan ng ating kagalakan. Sa Awa ng Panginoon nagmumula ang lahat, lalung-lalo na ang ating kagalakan. 

Ipinahayag ni propeta Sofonias sa Unang Pagbasa na dapat tayong umawit nang buong kagalakan sa Panginoon. Ang Diyos ay dapat awitan nang buong kagalakan. Nangako ang Panginoon na ililigtas Niya ang Kanyang bayang Israel. Nangako ang Panginoon na darating Siya upang iligtas ang Kanyang bayan mula sa mga kaaway. Tinupad nga ng Diyos ang pangakong ito sa pamamagitan ni Hesus. Si Hesus ang tumupad sa pangako ng maawaing Diyos. Si Hesus ang Mesiyas at Tagapagligtas na pinangakong susuguin ng Diyos sa Kanyang bayan. 

Ganito rin ang panawagan ni Apostol San Pablo sa Ikalawang Pagbasa sa kanyang sulat sa mga taga-Filipos. Nananawagan si Apostol San Pablo sa mga taga-Filipos na laging magalak sa Panginoon. Malapit na ang pagdating ng Panginoon. Malapit nang matupad ang pangako ng Panginoon Niya sa atin. Darating muli ang Panginoon. Bukod pa roon, ang kabutihang-loob ng Diyos ang isa sa napakaraming dahilan upang pasalamatan ang Panginoon. Sa Panginoon nagmula ang lahat ng bagay, at dapat natin Siyang pasalamatan nang buong kagalakan. 

Sa Ebanghelyo, natunghayan natin na ipinahayag ni San Juan Bautista sa kanyang mga tagapakinig sa Ilog Jordan ang lahat tungkol sa kanyang sarili. Ipinapakilala ni Juan Bautista ang kanyang sarili sa kanyang mga tagapakinig. Marami na ang nag-aakalang si San Juan Bautista na ang Mesiyas. Kaya, ipinakilala niya ang kanyang sarili at kung bakit siya nagbibinyag. Hindi siya ang Mesiyas, subalit ang Mesiyas ay darating kasunod niya. 

Naghintay sa loob ng mahabang panahon ang bayang Israel para sa pagdating ng kanilang Manunubos, ang Mesiyas. Ipinapahayag ngayon ni San Juan Bautista na malapit nang dumating ang Manunubos. Ang pagbibinyag na ginagawa ni San Juan Bautista ay sa tubig bilang tanda ng pagsisisi at pagbabalik-loob sa Diyos. Pinaghahandaan ni San Juan Bautista ang lahat para sa pagdating ng Mesiyas na Siyang magliligtas sa bayan ng Diyos. Sa pagdating ng Mesiyas, matutupad ang kaligtasang ipinangako ng Diyos sa Kanyang bayan. 

Ang pahayag ni San Juan Bautista tungkol sa pangako ng Panginoong maawain ay dapat ikagalak ng lahat. Matutupad ang pangako ng Panginoon. Tinutupad ng Panginoon ang Kanyang mga pangako sa atin dahil sa Kanyang Dakilang Awa sa atin. Napakadakila ang awa ng Panginoon sa atin. Hinding-hindi Siya nakakalimot sa Kanyang mga pangako sa atin. Lagi Niyang inaalala at tinutupad ang Kanyang mga pangako sa sangkatauhan. 

Tapat ang Panginoon sa Kanyang mga pangako sa atin. Dapat nga natin itong ikagalak. Dapat tayong magalak sa mga pangako ng Panginoon. Walang pagkakataong kung saan nakalimot ang Diyos sa Kanyang mga pangako. Lagi Niya itong tinutupad. Sa pagtupad ng Kanyang pangako sa sangkatauhan, ipinapakita Niya sa buong sanlibutan ang Kanyang Banal at Dakilang Awa. 

MARIA: INA NI HESUS, ANG HABAG NG DIYOS

12 Disyembre 2015
Kapistahan ng Mahal na Birhen ng Guadalupe 
Zacarias 2, 14-17/Judith 13/Lucas 1, 26-38

"Hindi ba't ako'y narito, akong iyong ina?" (Mga salita ng Mahal na Birheng Maria noong nagpakita siya kay San Juan Diego sa Guadalupe) 

Ina rin po natin ang Mahal na Birheng Maria. Si San Juan Apostol ang kumakatawan sa atin, ang sambayanang Kristiyano, noong si Maria ay nasa paanan ng krus ni Hesus. Noong binigkas ni Hesus ang salitang, "Ginang, narito ang iyong anak...Narito ang iyong ina!" (Juan 19, 25-27), ipinapakilala Niya kay Maria ang buong sambayanang Kristiyano at ipinapakilala din tayo ni Hesus sa Kanyang Inang si Maria. Kapatid na rin natin si Hesus. 

Noong unang nagpakita ang Mahal na Ina kay San Juan Diego sa Guadalupe, Mexico, ipinakilala niya ang kanyang sarili bilang ina ng Diyos at ina ng sambayang Kristiyano. Ang tawag pa nga ng Mahal na Birheng Maria kay San Juan Diego, "Mahal kong anak..." Dito ipinapakita ni Maria kung paano niya tayong inaaruga at inaalagaan bilang ating ina. Tayong lahat ay tinuturing anak ni Maria sapagkat tayo'y ipinagkatiwala sa kanya ni Hesus. 

Ang pagninilay ay hango sa tema ng Piyesta ng Pambansang Dambana ng Mahal na Birhen ng Gudalupe sa Guadalupe Nuevo, Lungsod ng Makati. Binibigyang diin ng tema ng Piyesta ng Dambana ng Mahal na Birhen ng Guadalupe na ang Mahal na Birheng Maria Ina ni Hesus at Ina ng Awa. Tinaglay ni Hesus ang Dakilang Awa at Habag ng Diyos noong Siya'y nagkatawang-tao at ipinanganak ni Maria. Kung titingnan natin nang mabuti ang larawan ng Mahal na Ina ng Guadalupe, mayroon siyang bigkis na sinusuot. Ang bigkis, noong kapanahunang yaon, ay isang tanda na ang isang babae'y nagdadalantao. Sa larawang iyon, dinadala ni Maria sa kanyang sinapupunan si Hesus.

Kung titingnan natin nang mabuti, nakatingin ang Mahal na Birheng Maria sa atin. Ang kanyang mata ay puno ng awa. Makikita natin na tinitingnan niya tayo na puno ng awa. Kaya siyang tinatawag na Ina ng Awa, eh. Kapag tayo ay tinitingnan ng Mahal na Ina, punung-puno ng awa ang kanyang pagtingin niya sa atin. Ganun din ang pagtingin ng Panginoong Hesukristo sa atin. Tumitingin sa atin si Hesus na may Banal na Awa. Gayun din si Maria. Maawain ang mga mata ni Maria, katulad ng mga mata ni Hesus. Makikita natin ang awa kapag tumitingin si Hesus at si Maria sa atin. 

Parang nagkaroon lang tayo ng replay o rewind sa Ebanghelyo. Narinig na natin ito nitong nagdaang Martes, ang Dakilang Kapistahan ng Inmaculada Concepcion. Muli nating napakinggan sa Ebanghelyo ngayong Kapistahan ng Nuestra Senora dela Guadalupe ang salaysay ng pagpapakita ng Arkanghel Gabriel sa Mahal na Birhen. Nagpakita si San Gabriel Arkanghel sa Mahal na Ina upang ibalita ang papel ng Diyos para sa kanya. Si Maria'y hinirang ng Diyos na maging ina ni Hesus, ang Mesiyas, ang Diyos na Emmanuel. 

Hinirang ng Diyos ang Mahal na Birheng Maria upang dalhin sa kanyang sinapupunan sa loob ng siyam na buwan ang Panginoong Hesus, ang Panginoon at Hari ng Banal na Awa. Sa sinapupunan ni Maria, nanahan ang awa ng Diyos sa loob ng siyam na buwan. Noong dumating ang takdang panahon, iniluwal ni Maria ang Sanggol na Hesus, ang mukha ng Awa ng Diyos. Ang Dakilang Awa ng Diyos ay naranasan ng daigdig sa pamamagitan ng Panginoong Hesus. 

Bukod pa sa pagiging Anak ng Diyos, si Hesus ay Anak ng Mahal na Birheng Maria. Si Hesus ang Panginoon at Hari ng Banal na Awa. Dahil dito, si Maria ang Ina at Reyna ng Awa. Dinala ni Maria ang Panginoon at Hari ng Banal na Awa na si Hesus sa kanyang sinapupunan at isinilang noong dumating ang takdang oras. Ang Awa ng Diyos ay dumating sa mundo sa pamamagitan ni Hesus at ng pagtalima ni Maria sa kalooban ng Diyos. 

Kapag tinititigan natin nang mabuti ang larawan ng Mahal na Birhen ng Guadalupe, makikita natin na ipinapakita sa atin ng Mahal na Birhen ang kanyang mga maawaing mata. Ibinabaling sa atin ng Mahal na Ina ang kanyang mga matang mawaain. Punung-puno ng awa ang pagtingin sa atin ng Mahal na Ina. Nakadaop din ang mga kamay ni Maria. Ipinapanalangin niya tayo sa kanyang Anak na si Hesus na kaawaan niya tayong lahat, sapagkat si Hesus ang Panginoon at Hari ng Banal na Awa. Ang Awa ng Panginoon ay napakadakila at wagas.