Sabado, Enero 31, 2015

PAGPAPALAYAS NG DEMONYO: PAGPAPAMALAS AT PAGPAPATUNAY NG HABAG AT MALASAKIT

Pebrero 1, 2015 
Ika-4 na Linggo sa Karaniwang Panahon (B) 
Deuteronomio 18, 15-20/Salmo 94/1 Corinto 7, 32-35/Marcos 1, 21-28 



Apat na taong ang nakalipas magmula noong pinalabas ng Jesuit Communications Foundation Inc. (JESCOM) sa ABS-CBN noong Mahal na Araw 2011 ang dokumentaryong, "Liwanag sa Dilim." Sa dokumentaryong ito, itinalakay ang pagpapalayas ng masamang espiritu (exorcism). Tampok sa dokumentaryong ito sina Fr. Jose Francisco (Jocis) Syquia ng Arkidiyosesis ng Maynila, Fr. Jojo Zerrudo ng Diyosesis ng Cubao, at ang Kanyang Kabunyian Luis Antonio G. Kardinal Tagle (na noon panahong yaon ay Obispo siya ng Diyosesis ng Imus). 

Maganda ang sinabi ni Fr. Jojo Zerrudo patungkol sa pagpapalayas ng mga demonyo. Bahagi ng misyon ni Hesus dito sa lupa ang pagpapalayas ng mga demonyo. Sa mga sinoptikong Ebanghelyo (salaysay ng Mabuting Balita ayon kina San Mateo, Marcos at Lucas), may mga bahagi sa buhay ni Hesus kung saang nilalapitan Siya ng mga taong inaalihan ng demonyo. Si Hesus pa nga ay tinukso ng demonyo sa ilang. Hindi naging ligtas si Hesus sa kapangyarihan ng demonyo noong Siya ay namumuhay dito sa lupa. Ilang ulit Niyang nakatagpo ang kapangyarihan ni Satanas.  

Ginagamit ng Panginoong Hesus ang Kanyang kapangyarihan bilang Diyos upang palayasin ang mga demonyo mula sa mga sinasapian nito. Subalit, ayon kay Fr. Jojo Zerrudo, higit pa sa pagpapamalas ng kapangyarihan ang ginagawa ng Panginoong Hesukristo sa tuwing pinapalayas ang mga demonyo mula sa mga taong sinasapian ng demonyo. Ipinapamalas ni Kristo sa bawat pagpalayas sa mga demonyo ang Kanyang awa, pag-ibig at malasakit sa sinasapian at inaalipin ng demonyo. 

Si Hesus ay naawa at nahahabag sa mga sinasapian ng demonyo. Mahal na mahal ni Hesus ang inaalipin ng demonyo. Hindi papayagan ni Hesus na hamakin pa ng demonyo ang inaalihan nito. Nasasaktan si Hesus kapag nakikita Niyang hinahamak at inaalipin ng demonyo ang isang tao. Kaya, ginagamit ni Hesus ang Kanyang kapangyarihan upang palayain ang taong inaalihan ng demonyo mula sa mga tanikala at pag-uusig ng demonyo sa kanya. Sa pamamagitan nito, ipinapadama ni Hesus ang Kanyang habag at malasakit sa inaalihan ng demonyo. 

Noong nakaraang buwan ay nasaksihan nating mga Pilipino ang makasaysayang pagdalaw ng Santo Papa Francisco sa ating bansang Pilipinas. Ang tema ng pagbisita ng Santo Papa sa Pilipinas ay "Habag at Malasakit." Sa loob ng apat na araw ng pananatili ng Mahal na Santo Papa sa ating bansa, ipinadama niya sa ating lahat, lalung-lalo na ang mga nasalanta ng bagyong Yolanda sa Leyte ang awa at malasakit ng Panginoon. Ang bikaryo ni Kristo, ang kumakatawan sa Mabuting Pastol, ay bumisita sa ating bansa upang ipadama sa atin ang habag at malasakit ng Mabuting Pastol - ang Panginoong Hesukristo. 

Isinasalaysay ng Mabuting Balita ngayong Linggong ito ang habag at malasakit ni Hesus sa lahat. Mahal na mahal tayong lahat ni Hesus. Hinding-hindi Niya tayo pababayaang alipinin, hamakin o saktan ng demonyo. Bilang Mabuting Pastol, nakahanda ang Panginoong Hesus na gawin ang lahat upang palayain tayong lahat, mga tupa Niya, mula sa tanikala ng demonyo. Tayong lahat ay pinapalaya ni Kristo mula sa pagkaalipin at paghamak ng demonyo sa ating lahat. 

Sabado, Enero 24, 2015

TAWAG SA PAGBABAGONG-BUHAY

Ikatlong Linggo sa Karaniwang Panahon (B) 
Jonas 3, 1-5. 10/Salmo 24/1 Corinto 7, 29-31/Marcos 1, 14-20 


Kapag hindi pumapatak sa araw ng Linggo ang ika-25 ng Enero, ipinagdiriwang ng Simbahan ang Kapistahan ng Pagbabagong-Buhay ni Apostol San Pablo. Subalit, dahil pumatak sa araw ng Linggo ang ika-25 ng Enero ngayong taon, isinantabi muna ng Simbahan ang Kapistahang iyon upang bigyang-daan ang Ikatlong Linggo sa Karaniwang Panahon. Mapapakinggan din po natin ang tema ng pagbabagong-buhay sa mga Pagbasa natin ngayong araw ng Linggo. 

Si Propeta Jonas ay nangaral sa mga taga-Ninive sa Unang Pagbasa. Siya rin ay nakaranas ng tawag mula sa Panginoong Diyos na ipahayag sa mga taga-Ninive na gugunawin ng Diyos ang kanilang bayan kapag hindi sila nagsisi. Noong una, sinuway ni Jonas ang utos ng Diyos at sumakay ng barkong papuntang Tarsis dahil akala niyang matatakasan niya ang Diyos. Pero, nagbago si Jonas at sumunod sa utos ng Diyos dahil sa kanyang karanasan noong ihagis siya mula sa barko at paglulon sa kanya ng dambuhalang isda. 

Hindi lang si Jonas ang nagkaroon ng pagbabagong-buhay sa Unang Pagbasa. Ang mga taga-Ninive ay nakaranas ng pagbabagong-buhay. Ang tawag ng Diyos sa kanila sa pamamagitan ni propeta Jonas ang nag-udyok sa mga taga-Ninive at magbalik-loob sa Diyos. Tinalikuran ng mga taga-Ninive mula sa makasalanang pamumuhay at nagbalik-loob sa Diyos sa pamamagitan ng pag-aayuno at panalangin. Dahil doon, hindi tinuloy ng Diyos ang planong wasakin ang bayan ng Ninive.

Ang Ebanghelyo ngayong araw ng Linggo ay nagsimula sa pamamagitan ng pagtawag ni Hesus sa lahat ng tao na magsisi at magbalik-loob dahil malapit na ang paghahari ng Diyos. Tinatawag ni Hesus ang lahat upang talikuran ang masama at magbalik-loob sa Diyos. Ganun din ang mensahe ni San Juan Bautista noong nangaral siya sa Ilog Jordan. Ang Diyos Anak na si Hesus ang tumatawag ngayon sa lahat ng tao upang magbagong-buhay at magbalik-loob sa Diyos Ama. Sa simula ng pangangaral ni Hesus, tinatawag Niya ang lahat na magbalik-loob sa Diyos. 

Natunghayan at napakinggan din natin sa Ebanghelyo na tinawag ni Hesus ang mga una Niyang alagad. Ano ang hanap-buhay ng mga unang alagad ng Panginoon? Pangingisda ang hanap-buhay ng mga unang alagad ng Panginoon. Sina San Pedro Apostol, San Andres Apostol, Santiago Apostol, at San Juan Apostol. Kahit hindi sila nag-aral, pinili pa rin sila ni Kristo upang maging mga alagad Niya. Ang mga hindi karapat-dapat ay pinili ni Kristo na maging alagad Niya. 

Ang mga unang alagad ng Panginoong Hesus ay nakaranas ng matinding pagbabago sa kanilang buhay. Tinawag ang apat na mangingisdang ito ng Panginoon na maging mga alagad Niya. Ang pagtawag sa kanila ng Panginoong Hesukristo ay isang pagtawag sa pagbabagong-buhay. Iniwan nila ang dati nilang buhay, ang kanilang hanap-buhay, upang sumunod kay Hesus. Ang buhay nina San Pedro Apostol, San Andres Apostol, Santiago Apostol, at San Juan Apostol ay nagbago dahil kay Hesus. 

Tinatawag tayong lahat ng Panginoon na magbagong-buhay. Ano ang ating tugon sa pagtawag ng Panginoon sa atin? Nawa'y tularan natin ang mga taga-Ninive at ang mga unang alagad ni Kristo. Bagamat hindi sila karapat-dapat, tinawag pa rin sila ng Panginoong Diyos na magbagong-buhay. Iniwan nila ang dati nilang buhay, at sumunod sa kalooban ng Panginoon. Huwag nating salungatin ang tawag sa pagbabagong-buhay.

Linggo, Enero 11, 2015

SINO KA?

Kapistahan ng Pagbibinyag sa Panginoon (B) 
Isaias 42, 1-4. 6-7 (o kaya: Isaias 55, 1-11)/Salmo 28 (o kaya: Isaias 12)/Mga Gawa 10, 34-38 (o kaya: 1 Juan 5, 1-9)/Marcos 1, 7-11 



Madalas na inaakala nating mga Katoliko na nagtatapos ang kapanahunan ng Kapaskuhan sa pagsapit ng Dakilang Kapistahan ng Pagpapakilala ng Panginoon (Epifania). Pero, ang hindi nating maintindihan ay kung bakit sa araw na ito ay nagtatapos ang kapanahunan ng Pasko ng Pagsilang ng Panginoon, ayon sa kalendaryo ng ating Simbahan. Ang dahilan nito ay dahil ang Panginoong Hesus ay nasa sapat na gulang na sa sandaling Siya'y bininyagan ni San Juan Bautista sa Ilog-Jordan. Bakit nga ba nagtatapos ang kapanahunan ng Kapaskuhan ngayon? 

Sa araw na ito, ginugunita natin ang muling pagpapakilala ng Diyos Ama sa Diyos Anak. Ipinakilala ng Amang nasa langit na si Hesus ang Kanyang Bugtong na Anak, ang Ikalawang Persona ng Banal na Santatlo, ang Mesiyas na hinihintay ng bayang Israel. Mahal na mahal at lubos na kinalulugdan ng Diyos Ama ang Diyos Anak. Si Hesus ay muling ipinakilala ng Ama sa buong sangkatauhan sa pamamagitan ng pagbibinyag sa Kanya. 

Bago bininyagan si Hesus ni San Juan Bautista, ipinakilala na Siya ni San Juan Bautista. Sa mga pangangaral ni San Juan Bautista, ipinangaral niya na si Hesus ang Mesiyas na hinhintay ng bayang Israel. Sabi pa nga niya sa Ebanghelyo kahapon, "Dapat Siya (si Hesus) ay maging dakila, at ako nama'y mababa." (Juan 3, 30) Mapapakinggan din natin sa Ebanghelyo ni San Juan na binigyan si San Juan Bautista ng palatandaan kung sino ang Mesiyas - ang pagpapanaogan ng Espiritu Santo (Juan 1, 33). 

Noong itinanong si San Juan Bautista tungkol sa kanyang sarili, sinabi niyang hindi siya ang Mesiyas na hinihintay ng bayang Israel. Alam ni San Juan Bautista kung sino siya at kung sino ang Mesiyas. Ang darating na kasunod niya - si Hesus - ang Mesiyas. Si Hesus ang hinihintay ng bayang Israel. Bagamat si Hesus ay hindi kinilala ng bayang Israel, si Hesus ang Mesiyas na hinintay ng bayang Israel sa loob ng matagal na panahon. 

Alam din ni Hesus kung bakit Siya naparito dito sa lupa. Alam din ni Hesus kung sino Siya. Si Hesus ang Mesiyas, ang lingkod na hinirang ng Diyos at ipinadala sa Kanyang bayan upang sila'y iligtas. Natupad ang propesiya ni propeta Isaias sa Unang Pagbasa sa pamamagitan ni Hesus. Si Hesus ay ang lingkod ng Diyos na nagpakababa. Bagamat si Hesus ay Diyos at hindi na kinailangang binyagan, nagpakadukha Siya at naging kaisa natin. Kalooban din iyon ng Panginoong Diyos. Si Hesus, bilang Anak ng Ama, ay tumalima at sumunod sa kagustuhan ng Ama. 

Tanungin natin ngayon ang ating mga sarili: Sino ba ako? Sino ka? Pagnilayan natin ang katanungang ito. Alam mo ba kung sino ka? Alam mo ba ang lahat tungkol sa inyong sarili? Kung may mga bagay tayong hindi alam tungkol sa ating mga sarili, iisa lamang ang may nakakaalam - ang Diyos. Kilalang-kilala tayo ng Diyos. Alam ng Diyos ang lahat ng mga bagay tungkol sa ating mga sarili. 

Ipinapahiwatig ng Ebanghelyo natin ngayon na kilalang-kilala tayo ng Diyos. Katulad ng pagkakilala ng Ama kay Hesus sa Ilog-Jordan, kilalang-kilala Niya tayo. Bagamat tayong lahat ay mga abang makasalanan, kinikilala pa rin tayo ng Diyos bilang mga anak Niya. Ang awa at malasakit ng Panginoon ang dahilan ng pagtanggap sa ating lahat bilang mga anak Niya, sa kabila ng ating mga pagsuway sa Kanya. 

O Diyos, maraming salamat sa pagkakilala Mo sa amin bilang Iyong mga anak, sa kabila ng marami naming pagsuway sa Iyo. Amen. 

Lunes, Enero 5, 2015

HINDI TUNGKOL SA AKIN

Enero 10, 2015 - Sabado 
Sa Pagdiriwang ng aking Ika-16 na Kaarawan 
Sabado Kasunod ng Pagpapakita ng Panginoon 
1 Juan 5, 14-21/Salmo 149/Juan 3, 22-30 



Kahapon ay ipinagdiriwang natin dito sa Pilipinas, lalung-lalo na sa Quiapo, Maynila, ang Kapistahan ng Traslacion ng Mahal na Poong Hesus Nazareno. Ang prusisyon ng Traslacion ay paggunita sa paglipat ng imahen ng Nuestro Padre Jesus Nazareno mula sa Bagumbayan (ngayon ay Luneta) papunta sa Basilica Minore sa Quiapo. Ito ang pinakamalaking prusisyon sa buong Pilipinas. Maraming mga deboto ng Mahal na Poong Nazareno ang nagtiis ng siksikan at marami pang iba para lang makalapit sa Mahal na Poong Nazareno. 

Kapag ang marami sa atin ay tinatanong kung sino ang Pintakasi ng Simbahan ng Quiapo, madalas nating sinasabi na ang Poong Hesus Nazareno ang Pintakasi ng Simbahan ng Quiapo. Ang Santong Pintakasi ng Simbahan ng Quiapo ay si San Juan Bautista, ang pinsan ng Panginoong Hesus. Ipinagdiriwang ng Simbahan ng Quiapo ang kapistahan nito tuwing ika-24 ng Hunyo, ang araw ng Dakilang Kapistahan ng Pagsilang ni San Juan Bautista. 

Subalit, maihahalintulad natin ang pagpunta ng mga deboto sa Quiapo upang dalawin ang Nuestro Padre Jesus Nazareno sa halip na si San Juan Bautista ang ating Ebanghelyo ngayon. Ang Ebanghelyo ngayon ay tungkol sa pagbalita ng mga alagad ni San Juan Bautista tungkol sa pagdami ng mga taong pumupunta kay Hesus. Noong nagpakita si Hesus, hindi na si San Juan Bautista ang pinupuntahan ng mga tao. Bagkus, si Hesus na ang mas masikat sa dalawa. 

Alalang-alala ang mga alagad ni San Juan Bautista dahil kumukonti na ang mga pumupunta sa kanila. Pero, si San Juan Bautista ay nagalak dahil parami nang parami ang pumupunta kay Kristo. Alam ni San Juan Bautista ang kanyang misyon at papel sa buhay ni Kristo - siya ang tagapaghanda lamang. Hindi siya ang bida. Si Kristo ang bida. Ang papel ni San Juan Bautista ay katulad ng papel ng abay ng lalaking ikakasal sa isang kasalan. 

"Kinakailangang Siya ay maging dakila, at ako nama'y mababa." (He must increase; I must decrease.) Nagagalak si Juan Bautista para kay Hesus. Sa wakas, makikilala na ng mga tao kung sino ang Mesiyas. Inihanda ni Juan Bautista ang daraanan ng Panginoon. Ang mga tao'y inihanda rin ni Juan Bautista para sa pagdating ng Mesiyas. Ngayong dumating na si Hesus, ang Mesiyas, nagagalak na si San Juan Bautista dahil makikita at makikilala ng buong santinakpan ang Tagapagligtas. 

Ipinagdiriwang ko po ngayong araw na ito ang aking kaarawan. 16 anyos na po ako ngayon. Subalit, hindi ko itinatampok ang aking sarili sa mismong araw ng aking kaarawan. Hindi po ako ang bida ngayong araw ng aking kaarawan. Bagkus, ang bida ngayong araw ng aking kaarawan ay walang iba kundi ang Panginoong Hesus. Ang Panginoong Hesus Nazareno ay mas dakila sa akin. Ang sinasabi ko ngayon ay katulad ng sinabi ni Cardinal Tagle noong siya'y itinalaga bilang Arsobispo ng Arkidiyosesis ng Maynila noong Disyembre 12, 2011: "Hindi ito tungkol sa akin. Ang araw na ito ay tungkol sa Panginoon." 

Ang Panginoong Hesukristo ang dahilan kung bakit ako ay nabubuhay ngayon. Ipinagkaloob sa akin ni Hesukristo, ang Mahal na Poong Nazareno, ang biyaya ng buhay, katulad ninyo. Si Hesus Nazareno ang dahilan kung bakit gusto kong maging pari. Mula noong ako'y bata pa, gusto ko nang maging pari. Ang habag at pagdamay ni Hesus Nazareno ang dahilan kaya nais kong maging pari pagkatapos ng aking mga pag-aaral. Handa akong tumugon sa tawag ni Hesus Nazareno sa akin. 

Nagpapasalamat ako sa Panginoong Hesus para sa buhay ko. Nagpapasalamat ako sa Panginoong Hesus para sa aking mga kapamilya at kaibigan, lalung-lalo na ang aking mga ka-Facebook at kapanalig. Nagpapasalamat ako sa Panginoong Hesus para sa mga paring tinitingalaan ko, katulad ng Santo Papa Francisco, Cardinal Chito Tagle, Archbishop Soc Villegas, Bishop Mylo Vergara, Msgr. Clem Ignacio, at marami pang iba. Ako'y nagpapasalamat sa Panginoong Hesus para sa lahat, lalung-lalo na para sa inyong lahat. Pero, hindi ako ang bida ngayong araw na ito. Ang bida ngayong araw ng aking kaarawan ay walang iba kundi si Hesus.

Si Hesus ang ating Panginoon. Siya ang Ikalawang Persona ng Banal na Santatlo. Ako, katulad ninyong lahat, ay mga abang lingkod ng Panginoon. Hindi ako karapat-dapat sa Kanya. Sa tingin ko pa, ako pa ang pinakaaba at pinakamakasalanang tao dito sa mundo. Pero, nananalig ako na tatawagin ako ng Panginoong Hesus pabalik sa Kanya dahil sa Kanyang awa at habag sa lahat ng mga abang makasalanan. 

Ang hiling ko po sa inyo, ngayong araw ng aking kaarawan, ipagdasal po ninyo ako at ang lahat ng mga kaparian. Ipagdasal po ninyo ang Santo Papa, lalung-lalo nang papalapit na ang kanyang apostolikong pagdalaw sa ating bansa. Magbigay-papuri at pasasalamat din tayo sa ating Panginoong Diyos, ang Banal na Santatlo - Ama, Anak at Espiritu Santo. 

O Panginoong Hesus, maraming salamat sa biyaya ng buhay na ipinagkaloob Mo sa aming lahat. Nawa'y makapamuhay kami ng isang buhay na ganap at kasiya-siya, sa tulong ng Iyong awa at grasya sa amin. Amen. 

AWIT NG PAGNINILAY: "Walang Hanggang Pasasalamat" 



Linggo, Enero 4, 2015

HESUS NAZARENO: PANGINOONG MAAWAIN AT MAHABAGIN

Enero 9, 2015 - Biyernes 
Kapistahan ng Traslacion ng Mahal na Poong Hesus Nazareno 
Mga Bilang 21, 4b-9/Salmo 77/Filipos 2, 6-11/Juan 3, 13-17 


(screencap courtesy: www.quiapochurch.com) 

Ang tema po para sa Traslacion ng Nuestro Padre Jesus Nazareno ngayong taon ay, "Espiritu ng Poong Jesus Nazareno: Awa at Habag sa Dukhang Simbahan." Ang tema ngayon ay batay sa tema ng pagbisita ng Santo Papa Francisco sa darating na Enero 15-19, 2015 (Huwebes-Lunes) at sa pagdeklara ng Kapulungan ng mga Katolikong Obispo sa Pilipinas (CBCP) sa taong 2015 bilang Taon ng mga Dukha. Pagninilayan po natin ngayong Kapistahan ng Traslacion ng Mahal na Poong Hesus Nazareno ang pagiging maawain at mahabagin ng Panginoong Hesus Nazareno. 

Buong buhay ni Hesus Nazareno, Siya'y namuhay bilang mahabagin at maawain sa lahat ng tao. Naawa at nahabag si Hesus Nazareno sa mga maysakit, may ketongin, at marami pang iba. Isang araw, pinagaling ni Hesus Nazareno ang isang ketongin dahil sa Kanyang awa at habag sa ketongin. Ang hiling ng ketongin sa Panginoong Hesus Nazareno, "Kung niloloob po Ninyo, pagalingin po Ninyo ako." (Mateo 8, 2; Lucas 5, 12) Dahil sa awa at habag ni Hesus Nazareno sa ketongin, pinagaling Niya ang ketongin at naging malinis siya uli. 

Marami ding pinagaling si Hesus Nazareno dahil sa Kanyang awa at habag. Noong isang araw sa buhay ni Hesus Nazareno dito sa lupa, may isang babaeng matagal nang dinudugo (woman with hemorrhage). Bagamat pumunta ang babaeng ito sa iba't ibang doktor, hindi pa rin siya gumaling. Walang doktor ang makakapagpagaling sa babaeng ito. Kaya't nanalig ang babaeng matagal nang dinudugo na ang Panginoong Hesus Nazareno mismo ang kanyang tanging pag-asa upang gumaling. Nanalig siya na kung mahawakan man lamang niya ang tela ng damit ni Hesus Nazareno ay gagaling siya. Ganun nga ang nangyari. 

Noong maramdaman ng Panginoong Hesukristo na may kapangyarihan na nawala sa Kanya, tinanong Niya kung sino ang humipo sa Kanya, bagamat napakaraming tao ang nagsiksikan. Inamin ng babaeng matagal nang dinudugo na siya ang humipo sa Panginoong Hesus. Ano ang nakita ng babaeng matagal nang dinudugo sa mata ni Hesus noong inamin niya ang katotohanan? Nakita ng babaeng matagal nang dinudugo ang mga maawain at mahabaging mata ni Hesus. Sinabihan din siya ni Hesus na siya'y pinagaling dahil sa kanyang pananalig (Mateo 9, 18-26; Marcos 5, 21-43; Lucas 8, 40-56). 

Habag at awa sa mga abang makasalanan ang dahilan ng pagparito ni Hesus Nazareno dito sa sanlibutan. Naparito si Hesus Nazareno upang maging Tagapagligtas natin, mga abang makasalanan dito sa mundo. Tayong lahat, bago pumarito si Hesus Nazareno sa sanlibutan, ay namuhay bilang mga alipin ng kasamaan at kasalanan. Ang pagparito ni Hesus Nazareno sa sanlibutan ay nagdulot sa atin ng kalayaan upang paglingkuran Siya bilang ating Panginoon at Diyos. 

Pinatunayan ng Panginoong Hesus Nazareno ang Kanyang habag at awa sa atin sa pamamagitan ng pagpasan ng krus. Kung titingnan po natin ang larawan ng Nuestro Padre Jesus Nazareno sa altar mayor ng Basilica Minore sa Quiapo, makikita natin na bumabangon si Hesus Nazareno mula sa Kanyang pagkadapa at hindi Siya sumusuko dahil sa Kanyang pagdapa. Ang pagbangon ng Mahal na Poong Hesus Nazareno mula sa Kanyang pagkadapa na buhat-buhat pa ang krus ang nagpapatunay sa Kanyang awa at habag sa santinakpan. 

Tayong mga Pilipinong Deboto ng Poong Hesus Nazareno ay naaakit sa awa at habag ng Mahal na Poong Nazareno. Kaya tayo mga deboto ng Nuestro Padre Jesus Nazareno dahil sa Kanyang awa at habag sa ating lahat. Ang pagpasan ng Mahal na Poong Hesus Nazareno sa Krus ay ang pagpapadama at pagpapatunay sa habag at awa ng Panginoon sa atin. Kung hindi dahil sa awa at habag ng Mahal na Poong Hesus Nazareno sa atin, hindi Niya papasanin ang mabigat na Krus alang-alang sa ating lahat, mga abang makasalanan. 

Ngayong taong ito ay Taon ng mga Dukha. Kasabay nito, dadalaw ang Santo Papa sa ating bansa sa darating na Huwebes, Enero 15. Ang tema ng apostolikong pagdalaw ni Papa Francisco sa Pilipinas ay, "Habag at Malasakit." Katulad ng Panginoong Hesus Nazareno, ipadama natin sa isa't isa ang awa at malasakit ng Diyos. Ipinadama sa atin ni Hesus Nazareno ang Kanyang habag at pagdamay. Bilang mga deboto ng Poong Hesus Nazareno, ating ipadama sa isa't isa, lalo na sa mga maralita, ang habag at malasakit ng Diyos. 

Bilang pagtatapos sa ating pagninilay, ating pagnilayan sa katahimikan ang mga salita ng Panginoon mula sa ika-25 kabanata ng Mabuting Balita ayon kay San Mateo, 

"Anuman ang kabutihan na ginagawa/hindi ninyo ginagawa sa abang mga kapatid Kong ito, ito ay ginawa/hindi ninyo ginawa sa Akin." (Mateo 25, 40. 45) 

Manalangin tayo:

O Panginoong Hesus Nazareno, tulungan Mo po kaming maging maawain at mahabagin katulad Mo. Amen. 

REFLECTIVE SONG: "Poong Hesus Nazareno Naming Mahal" 



PATUNGO KAY HESUKRISTO

Enero 4, 2015
Dakilang Kapistahan ng Pagpapakita ng Panginoon
Isaias 60, 1-6/Salmo 71/Efeso 3, 2-3a. 5-6/Mateo 2, 1-12 



Ginugunita ng Solemnidad na ipinagdiriwang natin ngayon ang paghahanap ng tatlong pantas (na mas kilala nating mga Pilipino bilang tatlong hari) sa sanggol na Hesus. Hinahanap ng tatlong Pantas ang Banal na Sanggol na si Hesus. Ang tala mula sa silangan ang gumabay sa tatlong pantas sa kinaroroonan ng Sanggol na Hesus. Ang talang maningning mula sa langit ang siyang gumagabay at umaakay sa tatlong Pantas patungo sa Panginoong Hesukristo, ang Banal na Sanggol na isinilang sa sabsaban ng Betlehem. 

Naglakbay ang tatlong Pantas na ito mula sa malalayong lugar upang sambahin si Hesus. Si Hesus ang tunay na hari, ang hari ng mga hari. Alam ng mga Pantas na walang makahihigit pa kay Hesus. Si Hesus ang haring ipinangako susuguin ng Diyos upang iligtas ang sangkatauhan. Si Hesus ang pinakadakilang hari na nabubuhay magpahanggang ngayon at magpakailanman. Walang hari ang makakatapat sa paghahari ni Hesus. 

Si Hesus mismo ang nagpahayag sa aklat ng Pahayag na Siya ang Alpha at Omega - ang simula at ang katapusan. Sa Kanya tayo nagmula at sa Kanya tayo babalik sa wakas ng ating buhay at sa wakas ng panahon. Ang ating buhay dito sa lupa ay isang paglalakbay. Naglalakbay dito sa lupa, tulad ng paglalakbay ng tatlong Pantas. Ang simula at ang hantungan ng ating paglalakbay dito sa lupa ay si Hesus. 

Bagamat hindi mula sa bayang Israel ang mga Pantas na ito, dumalaw pa rin sila upang sambahin si Kristo. Inakay sila ng tala ni Kristo patungo sa bayang Israel. Ang ipinahihiwatig ng pagdalaw ng mga pantas sa Panginoon sa Betlehem na ang misyon ng Panginoon ay hindi lamang para sa kaligtasan ng bayang Israel. Naparito ang Panginoon upang iligtas ang buong sangkatauhan, anuman ang lahi ng isang tao. Hindi na exklusibo ang Diyos para sa isang bayan. 

Matagal nang hinintay ang bayang Israel ang Tagapagligtas. Subalit, hindi nila pinansin ang talang gumagabay patungo kay Hesukristo, ang Tagapagligtas. Hindi nila pinansin ang Banal na Sanggol, ang Panginoong Hesukristo, na isinilang sa sabsaban. Kahit alam ng mga punong saserdote at mga eskriba sa Ebanghelyo ang mga propesiya sa Matandang Tipan patungkol sa Mesiyas, hindi nila pinansin ang tala na aakay sa kanila patungo sa Mesiyas. 

Ang mga Pantas, na kumakatawan sa mga Hentil, ay pumunta sa Israel upang hanapin ang bagong haring isinilang - si Hesus. Bagamat mga Hentil sila, hinanap nila kung nasaan ang kinaroroonan ng Sanggol na Hesus. Nadinig nila ang mga propesiya at pinag-aralan nila ang mga bituin sa langit. Ang talang maningning ay ang talang sinunod nila sapagkat ang talang iyon ang aakay sa kanila patungo sa kinaroroonan ng Mesiyas na isinilang sa sabsaban. 

Nagdulot ng malaking kagalakan sa mga Pantas ang muling pagkakita sa talang gumabay sa kanila patungo sa lugar na kung saan isinilang ang Panginoong Hesus. Mas lalo silang nagalak nang makita nila ang Sanggol na Hesus na kalong-kalong ng Mahal na Birheng Maria. Pagkatapos ng matagal na paglalakbay mula sa silangan, natagpuan nila sa wakas ang bagong haring isinilang - si Hesus. Si Hesus ang nagdulot ng kagalakan sa mga Pantas matapos ang kanilang mahabang paglalakbay. 

Tinahak ng mga Pantas ang landas patungo kay Hesukristo. Sa katapusan ng kanilang matagal at mahabang paglalakbay, natagpuan ang kanilang sadya - si Hesus. Si Hesus ang dahilan ng pagsisimula ng kanilang paglalakbay; si Hesus din ang dahilan ng wakas ng kanilang paglalakbay. Nawa'y sikapin natin sa ating paglalakbay dito sa lupa na hanapin si Hesus. Hindi tayo manghihinayang kapag susundan natin ang tala at landas patungo kay Hesus. Sapagkat sa pagwawakas ng ating paglalakbay patungo kay Hesus, tayo ay magkakaroon ng malaki at matinding kagalakan. 

Panginoong Hesus, gabayan Mo kami sa landas patungo sa Iyo upang maging wagas ang aming kagalakan sa katapusan ng aming paglalakbay. Amen. 

REFLECTIVE SONG: "Munting Sanggol"