MAPAGMAHAL KAHIT HINDI TINATANGGAP

31 Enero 2016
Ikaapat na Linggo sa Karaniwang Panahon (K) 
Jeremias 1, 4-5. 17-19/Salmo 70/1 Corinto 12, 31-13, 13 (o kaya: 13, 4-13)/Lucas 4, 21-30

Ang mga propeta ng Matandang Tipan, katulad nina Elias at Jeremias, ay nagtuturo ng mga bagay na sasalungat sa pananaw ng kanilang mga tagapakinig. Kahit itinuturo ng mga propeta ang katotohanan at ang mga pahayag ng Diyos para sa Kanyang bayan, hindi nakikinig ang karamihan sa kanila. Maging mga hari at pinuno ng bayan ay hindi nakikinig sa kanila. Bagkus, nakikinig ang taong-bayan sa mga bulaang propeta. Itinuturing ng taong-bayan ang mga bulaang propeta bilang mga "tunay na propeta," mga propetang mapagkakatiwalaan.

Ito ang katotohanang ating napakinggan sa Unang Pagbasa. Ipinahayag ng Diyos kay propeta Jeremias sa Unang Pagbasa ang magiging misyon niya. Hinirang ng Diyos si propeta Jeremias para sa isang importanteng misyon. Si Propeta Jeremias ay hinirang ng Diyos upang maging propeta sa Kanyang bayan. At bilang propetang hinirang at isinugo ng Diyos, ipapahayag ni propeta Jeremias ang mga utos at mensahe ng Diyos para sa Kanyang bayan. 

Subalit, ipinapapaalalahanan ng Diyos si propeta Jeremias na hindi magiging madali ang kanyang misyon. Maraming hindi makikinig kay Jeremias. Ang taong-bayan ay hindi makikinig sa kanya. Pati na ang mga hari, mga saserdote, at iba pang mga pinuno ng bayan, hindi sila makikinig kay Jeremias. Walang makikinig o tatanggap kay Jeremias at sa kanyang mga pahayag. Ituturing na bulaang propeta si Jeremias. Kahit nagmula sa Diyos ang mga ipinapahayag ni propeta Jeremias, hindi makikinig sa kanya ang taong-bayan. 

Nagsalita si Apostol San Pablo tungkol sa pag-ibig sa Ikalawang Pagbasa. Ayon kay San Pablo Apostol, ang pag-ibig ay matiyaga at magandang-loob. Ganyan ang pag-ibig ng Diyos. Kahit na tayong lahat ay mga makasalanan, iniibig pa rin tayo ng Diyos. Hinihintay Niya ang panahon ng ating pagbabalik-loob sa Kanya. Tayo ay hinihintay Niyang magbalik-loob sa Kanya. Sa kabila ng napakaraming mga kasalanang nagawa laban sa Kanya, patuloy na naghihintay ang Diyos para sa araw ng ating pagbabalik-loob sa Kanya.

Dahil sa pag-ibig ng Diyos sa atin, ipinapamalas Niya ang Kanyang Awa sa atin. Bagamat tayong lahat ay mga makasalanang hindi karapat-dapat na makinabang sa Kanyang Awa at Pag-ibig, nais ng Diyos na maramdaman natin ang Kanyang Awa at Pag-ibig. Nais ng Diyos na makinabang tayo sa Kanya. Nais ng Diyos na maranasan natin ang Kanyang Awa at Pag-ibig. Kaya, sa pamamagitan ng Kanyang habag at pag-ibig sa atin, tayong lahat ay tinatawag ng Diyos na magbalik-loob sa Kanya. At sa pamamagitan ng panawagang ito, tayong lahat ay inaanyayahan Niyang makinabang sa Kanyang Dakilang Awa at Pag-ibig.

Sa Ebanghelyo, mapapakinggan natin ang salaysay ng di-pagtanggap kay Hesus sa Nazaret. Kahit si Hesus, hindi tinanggap sa sariling bayan. Naranasan din ni Hesus ang pagtatakwil ng mga kakilala at kababayan. Noong ipinahayag ni Hesus na natupad na ang propesiya ni propeta Isaias, naghati-hati ang mga pananaw at pagtingin ng Kanyang mga kababayan patungkol sa Kanya. Ang tanong ng mga nagkatipon sa sinagogang iyon, "Hindi ba ito ang anak ni Jose?" (Lucas 4, 22) Kilala Siya sa Nazaret bilang anak nina San Jose at ng Mahal na Birheng Maria. Tapos, ipapahayag Niya na Siya ang katuparan ng pahayag ni propeta Isaias? 

Mahirap para sa mga kababayan ni Hesus na tanggapin Siya bilang Mesiyas at Tagapagligtas. Hindi nila kinilala at tinanggap si Hesus bilang Mesiyas. Hindi rin nila kinilala si Hesus na kabilang sa kanilang bayan. Itinakwil ng mga taga-Nazaret si Hesus dahil sa Kanyang pahayag patungkol sa propesiya ni propeta Isaias. Pinalayas si Hesus ng Kanyang mga kababayan sa Nazaret. Hindi Siya kinilala o tinanggap ng Kanyang mga kababayan sa Nazaret bilang isa sa kanila. Walang lugar para kay Hesus sa Nazaret. Kahit doon mismo sa Nazaret lumaki si Hesus, hindi Siya kinilala o tinanggap ng Kanyang mga kababayan. 

Ayon sa Ebanghelyo ni San Juan, si Hesus ang Salita ng Diyos na nagkatawang-tao at nakipamayan sa atin. Subalit, noong dumating si Hesus sa sanlibutan, hindi Siya tinanggap ng Kanyang mga kababayan (1, 11). Nakita natin ito noong si Hesus ay hindi tinanggap ng Kanyang mga kababayan sa Nazaret. Hindi tinanggap si Hesus ng Kanyang mga kababayan. Bagkus, ayon kay San Lucas sa Ebanghelyo ngayon, pinalayas si Hesus, ibig pa nga nilang patayin si Hesus. Pero, umalis si Hesus sa kanilang piling at tumungo sa ibang bayan (4, 30). 

Ano ang nararamdaman ng isang taong itinakwil? Kapighatian, kapaitan, at marami pang ibang hindi maganda. Nakakasakit sa damdamin ang pakiramdam ng pagiging isang taong itinakwil. Ayaw nating itakwil tayo. Ayaw nating tayo ay itatakwil ng mga nakakakilala sa atin. Kapag tayo ay itinatakwil, nawawasak ang ating mga puso. Nasasaktan ang ating mga damdamin. Nagkakaroon din tayo ng sama ng loob. Galit at poot ay ilan din sa mga natatanim sa ating mga puso at kalooban kapag tayo ay itinatakwil. Nais nating maghiganti sa (mga) taong nagtakwil sa atin. Gusto nating patunayan na nagkamali sila. 

Paano namang tumugon si Hesus noong Siya'y itinakwil ng Kanyang mga kababayan sa Nazaret? Siguro, nalungkot din Siya. Nalungkot at nadismaya si Hesus noong Siya'y itinakwil ng Kanyang mga kababayan. Pero, nagtanim ba Siya ng galit at poot sa Kanyang puso? Hindi. Bagkus, minahal pa rin ni Hesus ang Kanyang mga kababayan mula sa Nazaret. Hindi Niya hiniling sa Ama na isumpa ang buong bayan ng Nazaret dahil hindi Siya tinanggap doon. Hindi Niya hiniling sa Ama na parusahan ang Kanyang mga kababayan sa Nazaret dahil hindi nila tinanggap Siya. Kahit na itinakwil at pinalayas si Hesus sa Nazaret, pagmamahal pa rin ang nasa Puso ni Hesus para sa kanila. Kung nanalangin si Hesus sa Ama para sa kanila, hiniling Niya sa Ama na patawarin at kahabagan sila. 

Mahirap magmahal kung ikaw ay hindi tinatanggap. Mahirap, pero hindi imposible. Sa mata ng tao, imposible para sa atin ang patawarin o mahalin ang mga nagkasala sa atin, lalung-lalo na kung ang kasalanang ginawa laban sa atin ay napakabigat. Subalit, sa mata ng Panginoon, walang imposible sa pagpapatawad at pagmamahal. Ginawa ng Panginoon ang imposible sa mga mata ng tao - patuloy Niyang pinapatawad at minamahal ang mga makasalanang paulit-ulit na nagkakasala laban sa Kanya. Gaano mang kabigat ang mga kasalanang ginawa laban sa Kanya, hindi mapapantayan nito ang Kanyang Dakilang Awa. 

Tayong lahat ay patuloy na pinapatawad at minamahal ng Diyos, sa kabila ng ating mga kasalanan laban sa Kanya. Kahit tayong lahat ay mga makasalanan, awa at pagmamahal ang nasa Puso ng Panginoon para sa atin. Handa ang Panginoon na ipakita at ipadama sa atin ang Kanyang Awa at Pag-ibig sa atin upang tayong lahat ay magbalik-loob sa Kanya. Hinding-hindi Niya tayo itatakwil, kahit gaano mang kabigat ang bawat kasalanan natin laban sa Kanya. 

SA PAMAMAGITAN NI HESUS, IPINAHAYAG SA DAIGDIG ANG MABUTING BALITA NG MAAWAING DIYOS

24 Enero 2015 
Ikatlong Linggo sa Karaniwang Panahon (K) 
Nehemias 8, 2-4a. 5-6. 8-10/Salmo 18/1 Corinto 12, 12-30 (o kaya: 12, 12-14. 17)/Lucas 1, 1-4; 4, 14-21 

Sa ating Ebanghelyo, ipinahayag ni Hesus na natupad na ang propesiya ni propeta Isaias patungkol sa sugo ng Panginoon. Ang sugo ng Panginoon na ipinahayag ni propeta Isaias sa Lumang Tipan ay tumatayo at naglalakad sa harapan nila. Kapiling ng mga tao ang Hinirang ng Panginoong Diyos. Si Hesus, ang Salita ng Diyos na nagkatawang-tao, ay namuhay sa piling ng Kanyang mga kababayan bilang katuparan sa propesiya ni propeta Isaias. 

May misyon si Hesus noong Siya'y pumarito sa daigdig. Hindi lamang gumala si Hesus sa bawat sulok ng daigdig. May isang misyon si Hesus na dapat Niyang gawin. Napakahalaga ng tungkuling ibinigay ng Ama kay Hesus sa Kanyang pagparito sa daigdig. Isinilang si Hesus para sa isang napakahalagang tungkulin. Naparito si Hesus para sa kaligtasan ng sangkatauhan. At bilang Tagapagligtas ng sangkatauhan, ipinapahayag ni Hesus ang Mabuting Balitang ito mula sa Diyos sa bawat tao sa pamamagitan ng Kanyang mga salita at gawa. 

Sa pamamagitan ng Kanyang mga pangangaral at kababalaghan, ipinapahayag ni Hesus ang Mabuting Balita ng pagliligtas ng Diyos. Unang sinimulan ni Hesus ang Kanyang misyon ng pagdadala ng Mabuting Balita sa Nazaret. Doon Niya sinimulan ang Kanyang misyon sa isang sinagoga. Ipinakilala ni Hesus ang Kanyang sarili sa pamamagitan ng Kanyang pahayag pagkatapos Niyang basahin ang isang bahagi ng aklat ng propeta Isaias. 

Ang Panginoong Hesus ang tinutukoy ni propeta Isaias sa kanyang pahayag. Si Hesus ang sugong hinirang ng Diyos upang ihatid ang Mabuting Balita ng pagliligtas ng Diyos sa sangkatauhan. Hatid ni Hesus ang isang mabuting balita na magdadala ng kagalakan sa lahat ng tao. Isinasalarawan ng Mabuting Balitang hatid ni Hesus sa sangkatauhan ang misteryo ng Dakilang Awa ng Diyos. 

Ipinangako ng Diyos na magpapadala Siya ng isang sugo sa Kanyang bayan. Ang Diyos ay nagbitiw ng isang pangako para sa kapakanan ng sangkatauhan. Ipapadala Niya ang Mesiyas upang iligtas ang sangkatauhan. Si Hesus ang katuparan ng pangakong ito. Ang pangakong binitiwan ng maawaing Diyos ay tinupad ni Hesus. Kay Hesus, tinupad ng Diyos ang pangakong binitiwan Niya sa sangkatauhan. Sa pamamagitan ng pagparito ni Hesus sa sanlibutan, ipinakita ng Diyos ang Kanyang katapatan sa Kanyang pangako. 

Dumating si Hesus sa daigdig upang ihatid ang Mabuting Balita patungkol sa Banal na Awa ng Diyos sa sangkatauhan sa pamamagitan Niya. Si Hesus ang Mukha ng Maawaing Diyos. Ipinamalas ni Hesus sa daigdig ang Mukha ng Diyos. Ang Mukha ng Diyos ay puspos ng Kanyang Banal at Dakilang Awa, at ito'y nakita natin sa katauhan ni Hesus. Naparito si Hesus upang ipalaganap sa buong daigdig ang Mabuting Balita ng Awa ng Diyos. Ang Awa ng Diyos ay nagbibigay kagalakan sa abang sangkatauhan. Ang ating kagalakan ay nagmumula sa Awa ng Diyos. 

Nagpahayag ang mga propeta patungkol sa pangako ng Diyos. Nagbitiw ng isang pangako sa sangkatauhan ang Diyos. Nangako ang Diyos dahil sa Kanyang Awa. Nais ipaalam ng Diyos sa sangkatauhan na sa kabila ng kanilang pagiging makasalanan, ipapadama pa rin Niya sa kanila ang Kanyang Awa. Hindi nais ng Diyos na magdusa ang sangkatauhan dahil sa kanilang pagiging makasalanan. Magmula noong nagkasala sina Adan at Eba, gumawa ng paraan ang Diyos upang iligtas ang Kanyang bayan. Ang Diyos ay nagsalita tungkol sa Kanyang pangako sa sangkatauhan sa pamamagitan ng mga propeta ng Lumang Tipan. Ang pangako ng Diyos ay nagkatotoo sa Bagong Tipan sa pamamagitan ni Hesus. 

Si Hesus ang Salita ng Diyos na nagkatawang-tao. Tinaglay ni Hesus ang Mabuting Balitang mula sa Diyos. Hinatid ni Hesus ang Mabuting Balitang ito sa sangkatauhan sa pamamagitan ng Kanyang mga salita at gawa. Ang Mabuting Balitang ito ay tungkol sa Dakilang Awa ng Diyos na ipinamalas Niya sa pamamagitan ni Hesus. Sa pamamagitan ni Hesus, ililigtas ng Diyos ang sangkatauhan. Sa pamamagitan ni Hesus, ipinahayag at ipinalaganap sa buong daigdig ang Mabuting Balita patungkol Dakilang Awa ng Diyos. Sa pamamagitan ni Hesus, ipinamalas sa sangkatauhan ang dakilang gawa ng Awa ng Diyos. 

SANGGOL NA HESUS: MUKHA NG MAAWAING DIYOS

17 Enero 2016 
Kapistahan ng Panginoong Hesus, ang Banal na Sanggol (Santo Niño) (K) 
Isaias 9, 1-6/Salmo 97/Efeso 1, 3-6. 15-18/Lucas 2, 41-51 

Ipinapamalas ng Santo Niño ang dakilang awa at habag ng Diyos sa sangkatauhan. Ang Diyos Anak na si Hesukristo, ang Pangalawang Persona ng Banal na Santatlo, ay bumaba mula sa langit at naging sanggol katulad natin. Unang nagpakita ang Panginoong Hesukristo bilang isang sanggol. Siya ang sanggol na iniluwal ng Mahal na Birheng Maria sa sabsaban sa Betlehem. Nagpakababa ang Panginoong Hesus, bumaba Siya mula sa Kanyang kaluwalhatian sa langit, at naging sanggol at tao katulad natin. 

Si Hesus na ating Hari ay walang katulad. Ang mga hari sa mundo, ginagawa ang lahat upang gumawa ng sariling pangalan. Maraming nangangarap maging hari. Subalit, ang tunay na hari natin na si Hesus ay naging sanggol. Maraming nangangarap na umangat sa buhay at makamit ang tagumpay sa buhay. Subalit, si Hesus ay nangarap na maging sanggol at tao katulad natin. Ninais ni Hesus na maging kaisa natin. Ninais ni Hesus na ipamalas at ipadama sa ating lahat ang dakilang awa at habag ng Diyos. Nais ni Hesus na maranasan natin ang dakilang awa at habag ng Diyos, kaya buong pagpapakumbaba Siyang bumaba mula sa langit at lumabas mula sa sinapupunan ni Maria bilang isang sanggol. 

Ang Panginoong Hesus ang sanggol na tinutukoy ni propeta Isaias sa Unang Pagbasa. Ipinahayag ni propeta Isaias sa Unang Pagbasa na isang sanggol ang isinilang para sa atin. Si Hesus ang sanggol na ibinigay ng Diyos para sa ating lahat. Ibinigay ng Diyos si Hesus sa atin para sa ating kaligtasan. Taglay ni Hesus ang isang napakalaking kaliwanagang pumapawi sa lahat ng uri ng kadiliman. Hatid din ni Hesus ang kapayapaan, at dinadala Niya ito sa lahat ng mga namumuhay sa gitna ng mga matitinding kaguluhan. 

Ipinapaliwanag sa atin ni Apostol San Pablo sa Ikalawang Pagbasa kung paano tayo'y itinuring ng Diyos bilang mga anak Niya. Sa pamamagitan ng Panginoong Hesukristo, tayong lahat ay naging mga anak ng Diyos. Dahil kay Hesus, tayong lahat ay tinanggap ng Diyos bilang mga anak Niya. Tayo'y naging mga anak ng Diyos dahil kay Hesus. Isinalarawan ni Hesus ang mukha ng maawaing Diyos. Sa pagturing ng Diyos sa atin bilang Kanyang mga anak, ipinapamalas at ipinapadama Niya sa atin ang Kanyang dakilang awa at habag sa atin. 

Mapapakinggan natin ang salaysay ng paghahanap ng Mahal na Birheng Maria at ni San Jose sa Batang Hesus. Tatlong araw nilang hinanap ang Batang Hesus. Sa ikatlong araw, natagpuan nina Maria at Jose ang Batang si Hesus sa Templo. Alalang-alala sina Maria at Jose, lalung-lalo na si Maria, sa kalagayan ni Hesus. Nag-aalala sila sapagkat tatlong araw Siyang nawala sa kanilang paningin. Si Hesus ay nagpaiwan sa Herusalem nang hindi nalalaman nina Maria at Jose. 

Tatlong araw nawala si Hesus. Sa loob ng tatlong araw na ito, nag-alala ang Mahal na Ina. Nawala si Hesus sa paningin ni Maria sa loob ng tatlong araw. At noong matagpuan na nila ni Jose ang Batang Hesus sa Templo, isang katanungan ang namutawi sa bibig ng Mahal na Ina. "Bakit ganyan ang ginawa mo sa amin? Balisang-balisa kami ng iyong ama sa paghahanap sa iyo?" (Lucas 2, 48)

Si Hesus ay tumugon sa katanungan ng Mahal na Birheng Maria nang ganito, "Bakit po ninyo Ako hinahanap? Hindi ba ninyo alam na Ako'y dapat na nasa bahay ng Aking Ama?" (Lucas 2, 49) Ipinapakita ni Hesus sa pamamagitan ng Kanyang tugon na sa murang edad pa lamang, alam na Niya na mayroon Siyang misyon mula sa Diyos. May bokasyon si Hesus sa Kanyang buhay. Hinirang Siya ng Diyos para sa isang kakaibang tungkulin. Kahit nasa murang edad pa si Hesus sa mga sandaling yaon, alam na Niya na mayroon Siyang pananagutan sa Diyos. May kaalaman na si Hesus patungkol sa magiging misyon Niya. 

Kahit bata pa lamang si Hesus sa mga sandaling iyon, may kaalaman na Siya patungkol sa magiging misyon Niya. Hinirang ng Diyos si Hesus upang maging Tagapagligtas ng sangkatauhan. Ang magiging misyon ni Hesus pagdating ng itinakdang panahon ay ipamalas sa buong daigdig ang awa ng Diyos. Sa pamamagitan ng Kanyang mga pangangaral, paggawa ng mga kababalaghan, at ang Kanyang pagkamatay at Muling Pagkabuhay, ipapamalas at ipapadama ni Hesus sa buong sangkatauhan ang awa ng Diyos. 

Ang dakilang awa ng Diyos ang dahilan kaya pinili Niyang maging isang sanggol katulad natin. Naging sanggol ang Diyos at lumaking katulad natin, maliban lamang sa kasalanan. Hindi naman kinailangang pahirapan ng Diyos ang Kanyang sarili. Maaaring ipamalas na lamang Niya ang Kanyang kapangyarihan para sa kaligtasan ng sangkatauhan. Subalit, pinili ng Diyos na damayan tayo sa ating pagkatao. Nais ng Diyos na ipamalas ang Kanyang maluwalhati at makapangyarihang awa sa ating lahat. 

Sa Sanggol na Hesus, nakita ng lahat ang Mukha ng Maawaing Diyos. Alalahanin natin ang dahilan ng pagiging Sanggol ni Hesus. Alalahanin natin ang dahilan kung bakit naging sanggol si Hesus. Nais ipakita ng Diyos sa pamamagitan ni Hesus ang Kanyang Banal na Awa at Habag sa buong sangkatauhan. Dinamayan tayo ni Hesus sa ating pagkatao noong Siya'y naging tao katulad natin, maliban sa kasalanan. Sa pamamagitan nito, ipinamalas ng Diyos ang Kanyang pagliligtas sa sangkatauhan. Iniligtas tayo ng Diyos sa pamamagitan ng Kanyang Awa at Habag sa sangkatauhan. Sa pamamagitan ng Awa ng Diyos, ipinamalas ng Panginoon ang Kanyang maluwalhating kapangyarihan sa lahat. 

HESUS: ANG BUGTONG NA ANAK NG DIYOS; KINALULUGDAN NG AMA; HINIRANG UPANG MAGING TAGAPAGLIGTAS NG TANAN

Ika-10 ng Enero, 2015
Kapistahan ng Pagbibinyag sa Panginoon (K) 

Isaias 42, 1-4. 6-7 (o kaya: 40, 1-5. 9-11)/Salmo 28 (o kaya: Salmo 103)/Mga Gawa 10, 34-38 (o kaya: Tito 2, 11-14; 3, 4-7)/Lucas 3, 15-16. 21-22 

Nagsalita ang Panginoong Diyos patungkol sa Kanyang lingkod na kinalulugdan sa Unang Pagbasa. Ipinapahayag ng Diyos sa propeta Isaias ang mga kantangian at kilos ng Kanyang lingkod. Mahinahon magsalita ang lingkod na ito at hindi magtataas ng Kanyang tinig. Ipinapahayag din ng Diyos ang magiging misyon at tungkulin ng Kanyang lingkod pagdating Niya. Ang lingkod na ito ay darating upang palayain ang mga bilanggo ng kadiliman at magdala ng liwanag sa lahat. Makikipagtipan ang Diyos sa lahat ng tao sa pamamagitan ng lingkod na ito. 

Ayon pa nga sa alternatibong Unang Pagbasa para sa araw na ito (Isaias 40, 1-5. 9-11), ang Kanyang lingkod ang magbibigay aliw sa Kanyang bayan. Mabuting balita mula sa Diyos ang hatid ng lingkod na ito. Bayad na ang utang ng sangkatauhan sa Panginoong Diyos. Pinatawad na Niya ang kasalanan ng tanan. Ang kaningningan ng Panginoon ay makikita ng lahat ng tao, sapagkat tataglayin ito ng Kanyang lingkod. Ipapalaganap ng lingkod ng Diyos na ito ang kaningningan at awa ng Diyos sa buong daigdig. Ipapamalas ng Diyos ang Kanyang kaningningan at awa sa lahat ng tao sa pamamagitan ng Kanyang lingkod. 

Sino ang lingkod na tinutukoy ng Diyos? Ang Kanyang Bugtong na Anak na si Hesus, ang ating Panginoon at Tagapagligtas. Bago pa dumating si Hesus sa sanlibutan, ipinapakilala na Siya ng Diyos. Ipinapakilala ng Diyos si Hesus sa pamamagitan ng mga propeta ng Lumang Tipan, kabilang na roon si propeta Isaias. Ang mga tao ay matagal nang naghihintay para sa pagdating ng Mesiyas. Nangako ang Diyos na ipadadala Niya ang Mesiyas. Darating Siya sa takdang panahon. Subalit, bago pa dumating ang Mesiyas upang iligtas ang lahat ng tao, kinakailangang makilala muna Siya ng mga tao. Kaya't ipinapakilala ng Diyos ang Mesiyas bago Siya magpakita sa sangkatauhan. 

Mapapakinggan naman sa Ikalawang Pagbasa ang pangangaral ni Apostol San Pedro. Ipinapakilala ni Apostol San Pedro si Kristo sa pamamagitan ng kanyang pangangaral. Nangaral siya kay Cornelio, isang Romanong kapitan. Ang Ikalawang Pagbasa ay bahagi ng sermon ni San Pedro Apostol kay Cornelio at sa kanyang mga kapamilya at kasambahay. Kung sa Lumang Tipan at sa salaysay ng Banal na Ebanghelyo ay nagpapakilala si Hesus sa bayang Israel bilang Mesiyas at Manunubos, ipinapakilala naman siya ng mga apostol sa Mga Gawa ng mga Apostol at sa mga sulat. Ipinapakilala ng mga apostol ang Panginoong Hesus sa lahat ng tao, Hudyo man o Hentil. 

Ayon nga kay Apostol San Pablo sa kanyang sulat kay Tito (ang alternatibong Ikalawang Pagbasa ngayong araw na ito), ang kagandahang-loob at pag-ibig ng Diyos ang dahilan kaya tayo ay naligtas. Tayong lahat ay naligtas sa pamamagitan ng Panginoong Hesukristo. Ang Panginoong Hesukristo ay hinirang at sinugo ng Ama upang tayong lahat ay iligtas mula sa kasalanan. Kaya, tayo ngayon ay namumuhay nang malaya bilang mga anak ng Diyos. Kung hindi dahil kay Hesus, hindi tayo mamumuhay nang malaya bilang mga anak ng Diyos. Tayo'y namumuhay bilang mga anak ng Diyos dahil sa awa ng Diyos. Kay Hesus, nakita at naranasan ng sangkatauhan ang awa at habag ng Diyos na dakila. 

Sa Ebanghelyo, matutunghayan natin ang salaysay ng pagbibinyag ni San Juan Bautista sa Panginoong Hesus. Subalit, bago pa Siya bininyagan, ang mga tao'y nagtataka kung si San Juan Bautista na nga ang Mesiyas. Sa sobrang pananabik ng mga tao, akala nila na si San Juan Bautista ang Mesiyas na hinihintay. Ngunit, kahit nakatutok na sa kanya ang lahat ng mga tao, sinabi ni San Juan Bautista ang totoo - hindi siya ang Mesiyas. Kahit masikat na si San Juan Bautista, hindi siya nagpasikat. Inamin ni San Juan Bautista na hindi siya ang Mesiyas. Hindi siya ang hinihintay ng bayan. Bagkus, ang Mesiyas na hinihintay ay darating kasunod niya. Ayon pa kay San Juan Bautista, higit na dakila ang Mesiyas kaysa sa kanya. 

Kabilang si Hesus sa mga bininyagan ni San Juan Bautista. Noong bininyagan si Hesus ni Juan Bautista, nabuksan ang langit. Bumaba sa Kanya ang Espiritu Santo sa anyong kalapati. At nagsalita ang Ama mula sa kalangitan. Muling ipinapakilala ng Diyos ang Mesiyas. Ito ang Mesiyas. Ito ang Anak ng Diyos na minamahal at kinalulugdan ng Ama. Dumating na ang Mesiyas. Dumating na ang Tagapagligtas. Nagpakita na Siya sa lahat ng tao. Ipinapakilala na Siya ng Ama sa sangkatauhan. Kay Hesus, nakita ng lahat ang Mesiyas at Tagapagligtas. 

Hinirang at isinugo si Hesus upang maging Tagapagligtas ng sangkatauhan. Siya ang Mesiyas na ipinangakong darating. Siya ang katuparan ng pangako ng Diyos sa Kanyang bayan na darating upang iligtas ang Kanyang bayan. Ipinakilala na Siya ng Ama sa Lumang Tipan. Muli na naman Siyang ipinapakilala ng Diyos sa Bagong Tipan noong Siya'y bininyagan ni San Juan Bautista. Sa pamamagitan ng pagpapakilala kay Hesus, ipinapamalas ng Diyos sa sanlibutan ang Kanyang dakilang awa at habag. 

PAGPAPAKILALA NG DIYOS SA DAIGDIG

3 Enero 2016
Dakilang Kapistahan ng Pagpapakita ng Panginoon (ABK) 
Isaias 60, 1-6/Salmo 71/Efeso 3, 2-3a. 5-6/Mateo 2, 1-12 

Isa sa mga pinakamahalagang pangyayari sa buhay ng ating Panginoong Hesukristo ay ang Kanyang pagpapakita (Epifania). Tatlong pantas ang naglakbay mula sa silangan upang sambahin ang Sanggol na Hesus (Hindi natin alam kung ilan talaga sila; subalit ayon sa tradisyon, tatlo ang mga pantas na dumalaw sa Sanggol na Hesus). Malayo ang nilakbayan ng mga pantas, subalit pinagtiyagaan ito ng mga pantas para lamang sa Sanggol na Hesus. Tiniis ng mga pantas na ito ang lahat, ang kanilang panahon, ang layo ng paglalakbay, upang makita at makasamba sa Banal na Sanggol na si Hesus. 

Ayon sa mga dalubhasa ng Banal na Kasulatan, ang mga tagatangkilik ni San Mateo sa kanyang pagsusulat ng Mabuting Balita ay mga Hudyo. Isinulat ni San Mateo ang kanyang Ebanghelyo para sa mga Hudyong may mga katanungan patungkol sa Kristiyanismo. Kahit inuusig ang mga sinaunang Kristiyano noong mga kapanahunang yaon, mayroon ding mga taong interesado sa Kristiyanismo. Gusto nilang makilala ang isang lalaking taga-Nazaret na nagngangalang Hesus. Marami silang mga katanungan tungkol kay Hesus. 

Sa kanyang pagsusulat ng salaysay ng Mabuting Balita, sinasagot ni Apostol San Mateo ang mga katanungan ng kanyang mga kababayan patungkol kay Hesus. Ipinapakilala ni San Mateo sa kanyang mga kababayan ang lahat ng bagay tungkol kay Hesus at ang Kanyang mensahe. Ipinapakilala ni San Mateo sa kanyang mga kababayang may mga katanungan tungkol sa Kristiyanismo na si Hesus ang Mesiyas na ipinangakong ipapadala ng Diyos sa Kanyang bayan. Hindi lamang isang guro at karpintero mula sa Nazaret ang Hesus na ito. Si Hesus ay higit pa doon. Higit pa si Hesus sa isang guro at karpintero. Hindi Siya pangkaraniwan, bagamat mukha Siyang karaniwan. Si Hesus ay kakaiba at walang katulad. 

May ipinapahiwatig si San Mateo sa kanyang pagsasalaysay ng kwento ng pagdalaw ng mga pantas mula sa silangan. Ang mga pantas ay hindi kabilang sa bayan ng Diyos. Bagkus, mga Hentil ang mga pantas na nagmula sa silangan. Sila'y mga dayuhan lamang. Mga banyaga ang mga pantas na ito. Hindi sila kabilang sa bayan ng Israel. Hindi sila kabilang sa bayang hinirang. Subalit, nakilala nila ang isang tunay na hari sa pamamagitan ng Sanggol na Hesus. Nakilala nila ang bagong Haring isinilang. Alam ng mga Pantas na ang Sanggol na ito ang pinangakong Hari at Mananakop ng Kanyang bayan.

Tinupad ng Diyos ang Kanyang pangako. Hindi nakalimutan ng Diyos ang Kanyang pangako sa Kanyang bayan. Ang pagpapadala kay Hesus sa sanlibutan ang katuparan ng Kanyang pangako. Ipinapakilala ngayon ng Diyos ang Kristo at ang Tagapagligtas na si Hesus. Subalit, ayon kay San Pablo sa Ikalawang Pagbasa, hindi lamang ito para sa mga Hudyo lamang. Ang lahat ng mga Hentil ay kabilang na sa bayan ng Diyos. Tayong lahat ay napabilang sa bayan ng Diyos. Si Hesus ang dakilang biyaya ng awa mula sa Diyos. Si Hesus rin ang dahilan kaya tayong lahat ay naging mga kahati sa pangako ng awa at pagpapala ng Diyos. 

Paano tayo napabilang sa pangako ng Diyos? Ayon kay Apostol San Pablo sa Ikalawang Pagbasa, ang awa at kagandahang-loob ng Diyos. Dahil sa awa at kagandahang-loob ng Diyos sa atin, napabilang tayo sa pangako ng Diyos. Nakikinabang tayo sa pangako ng Diyos dahil sa Kanyang awa at kagandahang-loob sa atin. Kung hindi dahil sa awa at kagandahang-loob ng Diyos, hindi tayo makikinabang sa Kanyang pangako. Hindi tayo mapapabilang sa Kanyang bayan. Tayo'y kabilang na sa bayan ng Diyos. Tayo'y kabilang sa mga anak Niya dahil sa Kanyang awa at kagandahang-loob sa atin. 

Nagpakilala ang Diyos sa daigdig sa pamamagitan ng Sanggol na Hesus. Ipinapakilala ng Diyos ang Kanyang sarili bilang Diyos ng Awa. Ang tala na nakita ng mga pantas ay ang tala ng Diyos. Inakay ng Diyos ang mga pantas patungo sa Sanggol na Hesus sa pamamagitan ng tala. Inaakay tayong lahat ng Diyos patungo sa Kanya. Nais ng Diyos na lapitan natin Siya. Ang lahat ay tinatanggap ng Diyos bilang Kanyang mga lingkod at mga anak. Kaya nga, sabi sa Salmo para sa Pista ngayong araw na ito, "Poon, maglilingkod sa 'Yo tanang bansa nitong mundo."  

Ang Diyos ay nagpakilala sa daigdig noong dinalaw ng mga pantas ang Sanggol na Hesus. Sa pamamagitan ng Sanggol na Hesus, nakita ng mga pantas ang mukha ng Diyos at Hari ng Awa at Kapayapaan. Nakita at nakilala ng mga pantas ang Hari ng mga Hari. Sinamba nila ang tunay na Hari na si Hesukristo. Tayong lahat ay inaanyayahang lumapit at sambahin ang ating Panginoong Hesukristo, katulad ng ginawa ng mga pastol at ng mga pantas. Siya ang tunay na Hari at Panginoon. At bilang Hari at Panginoon natin, ipinapalaganap ni Kristo ang biyaya at pagpapala ng Kanyang Awa at Kapayapaan sa ating lahat.