24 Abril 2015
Ikalimang Linggo ng Pasko ng Muling Pagkabuhay (K)
Mga Gawa 14, 21b-27/Salmo 144/Pahayag 21, 1-5a/Juan 13, 31-33a. 34-35
Sa simula ng Ebanghelyo, binanggit na umalis si Hudas mula sa Huling Hapunan. Umalis si Hudas upang ituloy ang kanyang pagkakanulo kay Hesus. Ipagkakanulo ni Hudas si Hesus kapalit ng tatlumpung piraso ng pilak. Masakit para kay Hesus na malaman na ang isa sa mga matalik Niyang kaibigan ang magkakanulo sa Kanya. Masakit para kay Hesus na malaman na binalewala ng isa sa mga matalik Niyang kaibigan ang kanilang pagsasama na tumagal ng tatlong taon. Siguro, nanghinayang si Hesus sapagkat binalewala ni Hudas ang kanilang pagkakaibigan at pagsasama na tumagal ng tatlong taon.
Subalit, ang utos ni Hesus sa Ebanghelyo, "Kung paanong inibig Ko kayo, gayon din naman, mag-ibigan kayo." (13, 34) Tinuturuan ng Panginoong Hesus ang Kanyang mga alagad kung paanong magmahal ng tunay. Ang turo na ito ay hindi lamang para sa mga alagad, kundi para sa lahat ng mga Kristiyano. Dapat tayong magmahal katulad ni Kristo. Paano nagmahal si Kristo? Nagmahal Siya ng wagas at totoo. Sa Panginoon nagmumula ang tunay at wagas na pag-ibig. Sabi nga ni Apostol San Juan sa kanyang unang sulat, "Tayo ay nagmamahal sapagkat Siya ang unang nagmahal." (1 Juan 4, 19)
Ang nakakatawag-pansin ay namutawi ang mga salitang ito mula sa bibig ng Panginoon matapos umalis si Hudas. Maitatanong natin siguro sa ating isipan, "Kahit si Hudas? Kasali ba si Hudas sa mga taong tinutukoy ng Panginoon noong iniutos Niya ang mga alagad na magmahal katulad Niya?" Mukhang mahirap gawin iyon. Pagkatapos talikuran at ipagkanulo ang Panginoon kapalit ng tatlumpung piraso ng pilak, pagmamahal ang igaganti kay Hudas?
Kapag may nagkanulo sa atin, ano ang gagawin natin? Hindi ba, ang gusto natin ay maghiganti? Gusto nating maghiganti laban sa kanila? Gagawin ang lahat, hihintayin ang tamang pagkakataon, upang makaganti man lang? Mayroon din namang nagbabalak na lasunin ang kanilang kaaway. Lalagyan nila ng lason ang kanilang pagkain o inumin. 'Pag kinain na niya yung pagkaing nilason, o inumin ang inuming nilason, mamamatay na siya. At ano ang pakiramdam kapag nangyari iyon? Ano ang pakiramdam kapag nakapaghiganti? Ginhawa. Tuwa. Nakamit ang tagumpay. Nakapaghiganti na rin sa wakas.
Gumanti si Hesus, pero sa ibang paraan. Ang pagganti ni Hesus sa ginawa ni Hudas ay hindi katulad ng pagganti na gagawin ng tao. Hindi dahas ang ginanti ni Hesus kay Hudas. Bagkus, pagmamahal ang ginanti ni Hesus, kahit napakasama ang gagawin ni Hudas laban sa Kanya. Kung si Hudas ay nagpakita ng poot at galit, pagmamahal ang ipinakita ni Hesus. Gaano mang kasakit o kasama ang ginawang pagtatraydor ni Hudas kay Hesus, patuloy na nagpakita ng pagmamahal si Hesus. Hindi hinangad ni Hesus na mapahamak ang Kanyang mga kaaway, lalung-lalo na si Hudas na nagkanulo sa Kanya.
Tinatalikuran din natin ang Panginoon, katulad ni Hudas. Ipinagkakanulo din natin ang Panginoon sa tuwing tayo ay nagkakasala laban sa Kanya. Subalit, titiisin ng Panginoon ang sakit dulot ng ating pagkakasala alang-alang sa atin. Patuloy tayong mamahalin ng Panginoon, kahit paulit-ulit tayong nagkakasala laban sa Kanya. Mas makapangyarihan ang pagmamahal ng Panginoon kaysa kapangyarihan ng kasalanan. Hindi magmamaliw ang pag-ibig ng Panginoon kahit kailan. Mananatili magpakailanman ang pag-ibig ng Panginoon. Ang kasalanan ay mawawala at magmamaliw, pero ang pag-ibig ng Diyos ay hindi magmamaliw. Mananatili ang pag-ibig ng Diyos magpakailanman.
Inuutusan tayo ng Panginoon na magmahal katulad Niya. Magmahal tayo, katulad ni Hesus. Mahirap gawin iyon. Si Hesus ay nagmahal at patuloy na nagmamahal. At ang pagmamahal ni Hesus ay perpekto. Ang pagmamahal ng tao ay napakahina. Marupok ang pagmamahal ng tao. Walang makakapagmahal nang perpekto, maliban sa Panginoon. May mga limitasyon ang ating pagmamahal. Mahirap magmahal katulad ng Panginoong Hesus. Pero, hindi imposible na tularan si Hesus sa Kanyang pagmamahal na wagas at tunay.
May utos ang Panginoon para sa bawat isa sa atin - magmahal katulad Niya. Tumalima tayo sa Panginoon. Sundin natin ang utos ng Panginoong Hesus. Sikapin nating mahalin ang bawat isa, katulad ng pagmamahal na ginawa ng Panginoon para sa atin. Ang tunay na Kristiyano, ang tunay na kapanig ni Kristo, ay nagmamahal katulad Niya. Ang utos ng Panginoon na magmahal tulad Niya ang pinakamahalagang utos sa lahat. Ito ang utos ng maawain at mapagmahal na Panginoon. Kung paano Siyang nagmahal, ganun din dapat tayong magmahal.
17 Abril 2016
Ikaapat na Linggo ng Pasko ng Muling Pagkabuhay (K)
(Linggo ng Mabuting Pastol)
Mga Gawa 13, 14. 43-52/Salmo 99/Pahayag 7, 9. 14b-17/Juan 10, 27-30
Itinalaga ang Ikaapat na Linggo ng Pasko ng Muling Pagkabuhay bilang Linggo ng Mabuting Pastol. Ang Mabuting Pastol ay isa sa mga titulo ng Panginoong Hesukristo na mapapakinggan sa ikasampung kabanata ng Ebanghelyo ni San Juan. Ipinakilala ng Panginoong Hesus ang Kanyang sarili sa Kanyang mga tagapakinig bilang Mabuting Pastol. At bilang Mabuting Pastol, inialay ni Hesus ang Kanyang buhay para sa Kanyang kawan. Katulad ng sinabi ni Hesus, iniaalay ng Mabuting Pastol ang Kanyang buhay alang-alang sa Kanyang mga tupa. Hindi pababayaan ni Hesus na mapahamak kahit isa sa Kanyang mga tupa. Bagkus, gagawin ni Hesus ang lahat upang maligtas ang Kanyang mga tupa.
Kagalakan ang kaloob ng Awa ng Mabuting Pastol na si Hesus sa Kanyang kawan. Hindi pinapabayaan ni Hesus ang Kanyang kawan. Hinding-hindi Niya iiwanang nangungulila ang Kanyang mga tupa. Mahalaga para kay Hesus ang Kanyang mga tupa. Pinahahalagahan ni Hesus ang bawat isa na kabilang sa Kanyang kawan. Inaalagaan at inaaruga ni Hesus ang Kanyang mga tupa. At sa tuwing nawawala ang isa sa Kanyang mga tupa, hahanapin ni Hesus ang kaisa-isang tupang iyon. Gagawin ni Hesus ang lahat. Tatahakin ni Hesus ang bawat landas, mahanap lamang ang kaisa-isang tupang iyon. Gagawin ito ni Hesus dahil sa Kanyang Awa at Pagmamahal para sa Kanyang mga tupa. At ito'y nagbibigay ng kagalakan para kay Hesus at para sa Kanyang mga tupa.
Sa Unang Pagbasa, nagalak ang mga Hentil noong ipinahayag nina Apostol San Pablo at Bernabe na pupunta sila sa mga Hentil upang ipangaral ang Salita ng Diyos. Buong kagalakang tinanggap ng mga Hentil ang Mabuting Balita na ipinapalaganap ng mga apostol katulad nina Pablo at Bernabe. Ang sanhi ng kanilang kagalakan ay si Hesus. Makikilala na ng mga Hentil si Hesus. Maririnig din nila ang Mabuting Balita mula sa Panginoon. Natapos na ang kanilang paghihintay sa loob ng matagal na panahon. Maririnig nila ang Salita ng Diyos. Aakayin na sila pabalik sa Panginoong Hesukristo. Sila'y magiging mga kabilang ng kawan ng Mabuting Pastol, ang Panginoong Hesukristo.
Ang Salmo para sa araw na ito ay awit ng kagalakan. Isinasalarawan ng Salmong ito ang Dakilang Awa at Pagmamahal ng Diyos sa lahat. Kabilang ang lahat sa kawan ng Panginoon. Ito ay isang magandang balita para sa lahat. Ang balitang ito ay nagbibigay ng kagalakan sa lahat. Kabilang ang lahat sa kawan ng Diyos. Ang lahat ay napabilang sa kawan ng Diyos dahil sa Kanyang Awa at Habag sa lahat. Minamahal din Niya ang lahat. Dahil sa Kanyang awa at pagmamahal, tinanggap at ibinilang ng Diyos ang lahat sa Kanyang kawan.
Isinasalarawan ni Apostol San Juan sa Ikalawang Pagbasa kung paanong nilinis ang bawat isa na kabilang sa kawan ng Panginoong Hesus. Isa sa mga titulo ni Hesus ay ang Kordero ng Diyos. Si Hesus ay ang Kordero ng Diyos, ayon sa Banal na Kasulatan. At bilang Kordero ng Diyos, inialay ni Hesus ang Kanyang buhay alang-alang sa sangkatauhan. Sa Kanyang pagkamatay sa krus, dumaloy ang dugo mula sa bawat bahagi ng katawan ni Hesus. At ang dugo ni Kristo ang naglilinis at nagpapadalisay sa bawat isa. Nililinis at dinadalisay ang bawat isa na kabilang sa Kanyang kawan sa dugo ni Kristo. Wala na silang dungis ng kasalanan sapagkat nilinis sila ni Kristo sa pamamagitan ng Kanyang dugo.
Nagagalak ang lahat sa Ikalawang Pagbasa dahil kabilang na sila sa kawan ni Hesukristo. Pagkatapos linisin sa pamamagitan ng Kanyang dugo, nagkaroon sila ng kagalakan. Kaya, walang sawa silang nagpupuri sa Panginoon. Buong kagalakan din silang susunod sa Panginoong Hesukristo, ang Mabuting Pastol. Nananalig sila na sila'y aakayin ni Hesus patungo sa mga bukal ng tubig na nagbibigay-buhay, at papawiin Niya ang kanilang mga kalungkutan. Ang kanilang kalungkutan ay magiging kagalakan sapagkat kabilang na sila sa kawan ni Hesus.
Sa Ebanghelyo, ipinapakilala ni Hesus ang sinumang kabilang sa Kanyang kawan. Ang mga kabilang sa Kanyang kawan ay ang mga nakikinig sa Kanya. Nakikinig at sumusunod kay Hesus ang Kanyang mga tupa. Ang mga tupa ni Hesus ay nakikinig at sumusunod sa Kanyan sapagkat nananalig sila sa Kanya. Malaki ang pananalig ng mga tupa ni Hesus sa Kanya. Naniniwala sila na bilang Mabuting Pastol, gagawin ni Hesus ang lahat para sa kanilang kabutihan. Alam din nila na ang Mabuting Pastol na si Hesus ay nagbibigay ng kagalakang walang hanggan sa kanila. Kay Hesus lamang matatagpuan ang kagalakang walang hanggan.
Marami sa atin ngayon ay naghahanap ng makapagbibigay ng kaligayahan sa atin. Kadalasan, ang kaligayahang hinahanap natin ay pansamantala lamang. Hindi ito magtatagal sa loob ng mahabang panahon. Hindi ito ang tunay na kaligayahan. Hindi nagmumula sa sanlibutan ang kaligayahang walang hanggan. Kahit ano pang paglalakbay ang gagawin natin, hindi natin mahahanap ang tunay na kaligayahan dito sa lupa. Ang kaligayahang hinahanap natin dito sa lupa ay pansamantala lamang. Hindi ito magtatagal sa loob ng mahabang panahon.
Kay Hesus lamang matatagpuan ang tunay na kaligayahan. Ang kagalakang hatid ni Hesus ay panghabang panahon. Kay Hesus nagmumula ang kagalakang walang hanggan. Ipinagkakaloob sa atin ni Hesus ang kaligayahang walang hanggan. Hindi pansamantala lamang ang kaligayahang nagmumula kay Hesus. Iba ang kaligayahang dulot ni Hesus sa kagalakang dulot ng sanlibutan. Ang kaligayahang nagmumula kay Hesus ay magtatagal magpakailanman. Sa Kanya nagmumula at matatagpuan ang tunay na kaligayahan na magtatagal magpakailanman.
Makinig at sumunod tayo kay Hesus, ang Mabuting Pastol. Aakayin tayo ni Hesus patungo sa mga bukal ng tubig na nagbibigay ng buhay magpakailanman. Aakayin din tayo ng Panginoong Hesus at pagpapahingahin sa isang mainam na pastulan. Tayo ay inaalagaan at inaaruga ng Panginoong Hesus sapagkat tayong lahat ay mahalaga sa Kanyang paningin. Kapag tayo ay nawawala, gagawin ng Panginoon ang lahat upang mahanap at bawiin Niya ang mga nawawala. At kapag tayo ay Kanyang nahanap, ibabalik Niya tayo sa Kanyang kawan. Ito'y nakapagbibigay ng matinding kagalakan sa Panginoong Hesukristo, ang Mabuting Pastol.
Tunay na kagalakan ba ang ating hinahanap? Makinig at sumunod tayo kay Hesus, ang Mabuting Pastol. Sa Kanya lamang matatagpuan ang tunay na kaligayahan na magtatagal magpakailanman.
10 Abril 2016
Ikatlong Linggo ng Pasko ng Muling Pagkabuhay (K)
Mga Gawa 5, 27b-32. 40b-41/Salmo 29/Pahayag 5, 11-14/Juan 21, 1-19 (o kaya: 21, 1-14)
Sa panahon ngayon, parami nang parami ang mga taong nagiging torpe pagdating sa pag-ibig. Ayon sa karamihan, lalung-lalo na sa mga kabataan ngayon, ang mga torpe ay ang mga taong hindi masabi ang kanilang damdamin para sa taong mahal nila. Hindi nila kayang aminin ang kanilang damdamin at pagmamahal para sa taong minamahal nila. Sa pakiwari ko, hindi lang sila nahihiya. Natatakot sila at baka tanggihan lamang sila ng taong mahal nila. Subalit, kahit hindi nila kayang aminin ang mga tunay na nararamdaman nila, totoo naman ang kanilang pagmamahal para sa taong mahal nila. Takot man ang mga torpe sa pag-amin ng kanilang mga damdamin, sila pa ang totoong nagmamahal.
Halimbawa, si Tenten ng teleseryeng Dolce Amore sa ABS-CBN. Noong nakaraang buwan, nasaksihan natin ang pagiging torpe ni Tenten. Hindi masabi ni Tenten kay Serena ang mga tunay na nararamdaman niya para kay Serena. Masasabi nating hindi lang nahihiya si Tenten kay Serena, takot na takot siya. Noong sumablay ang lakad nila Tenten at Serena, doon nakaramdam ng matinding takot at kahihiyan si Tenten. Iniiwasan na niya si Serena. Hindi sinasagot ni Tenten ang mga tawag at text ni Serena sa kanya. Hindi na niya kinakausap si Serena. Gumagamit siya ng mga palusot para hindi sumama kay Serena. Nagtaka si Serena sa mga ginagawa ni Tenten, at sa isang bahagi ng teleseryeng iyon, pilit na tinanong ni Serena kay Tenten kung ano ang problema niya at kung bakit niya ginagawa ang mga iyon. At dahil sa pagpupumilit ni Serena, inamin na ni Tenten ang kanyang mga tunay na nararamdaman - mahal niya si Serena. Hindi na kayang itago ni Tenten ang kanyang mga nararamdaman para kay Serena. Inamin na ni Tenten ang totoo. At ang sabi ng karamihan, "Hindi na siya torpe."
Sa Ebanghelyo, tatlong ulit na tinanong ng Panginoong Hesus si San Pedro Apostol kung mahal niya si Hesus. Tatlong ulit na tinanong ni Hesus si Pedro. Tatlong ulit din namang ipinahayag ni Pedro ang kanyang pagmamahal para sa Panginoong Hesus. Sa tatlong ulit na pagtatanong ni Hesus kay Pedro, binibigyan ni Hesus ng panglawang pagkakataon si Pedro upang makapagsimula muli. Tatlong ulit na itinatwa ni Pedro si Hesus noong Siya'y nagpakasakit at namatay sa mga kamay ng mga pinuno ng bayan. Ngayon naman, tatlong ulit tinanong ni Hesus si Pedro kung mahal niya si Hesus. Isa itong pagkakataong ibinigay ni Hesus kay Pedro upang magsimula muli at magkaroon ng bagong buhay mula sa Kanya.
Noong bisperas ng Pasyong Mahal ng Panginoong Hesukristo, nangako si Apostol San Pedro na ipagtatanggol niya ang Panginoon. Nangako si Pedro kay Hesus na sasamahan niya si Hesus, kahit humantong pa ito sa kamatayan. Subalit, alam ni Hesus na hindi iyan gagawin ni Pedro. Sa halip na ipagtanggol ang Panginoon, ipagkakaila ni San Pedro na kilala niya ang Panginoon. Alam ng Panginoon na hindi Siya ipagtatanggol ni Pedro. Sinamahan nga ni Pedro si Hesus, subalit palihim nga lang. Palihim na sumunod si Pedro kay Hesus at sa mga bantay papunta sa bahay ng pinakapunong saserdote upang hindi siya mahuli. Ayaw ni Pedro na mahuli siya ng mga autoridad. Kaya, palihim siyang sumunod patungo sa bahay ng pinakapunong saserdote. At noong nandoon na si Pedro sa bahay ng pinakapunong saserdote, tatlong ulit na itinatwa ni Pedro si Hesus.
Hinanakit at panghihinayang ang naramdaman ni Pedro matapos niyang itatwa ng tatlong ulit si Hesus. Nandoon na si Pedro sa bahay ng pinakapunong saserdote. Nandoon din si Hesus sa lugar na iyon. Maaari sanang ipagtanggol at iligtas ni Pedro si Hesus mula sa Kanyang mga kaaway. Maaari din sanang magpahuli si Pedro sa mga opisyal at mamatay kasama ni Hesus, katulad ng kanyang winika sa senakulo. Subalit, hindi ginawa ni Pedro ang mga iyon dahil sa kanyang takot sa mga sandaling iyon. Sa halip na ipagtanggol at samahan ang Panginoon, tatlong ulit ipinagkaila ni Pedro ang Panginoon. Dahil sa takot na nararamdaman ni Pedro sa mga sandaling iyon, tatlong beses niyang ipinagkaila si Hesus. Kung hindi lang siya nagpadala sa sarili niyang takot, naipagtanggol na sana ni Pedro si Hesus.
Ang mga hinanakit at panghihinayang na nararamdaman ni Pedro pagkatapos ng pangyayaring iyon siguro ang dahilan kaya inunahan siya ni San Juan noong sila'y nagtakbuhan papunta sa libingan. Dinibdib ni Pedro ang nangyari. Kahit muling nabuhay si Hesus, dinibdib pa rin niya ang kanyang ginawa kay Hesus. Hindi mapatawad ni Pedro ang kanyang sarili dahil tatlong ulit niyang ipinagkaila si Hesus. At para kay Pedro, daig pa niya si Hudas Iskariote. Kung ipinagkanulo at ibinenta ni Hudas si Hesus kapalit ng tatlumpung piraso ng pilak, ipinagkaila naman ni Pedro nang tatlong ulit si Hesus. Kaya, sa halip na tumakbo nang may kagalakan papunta sa libingan, taglay ni Pedro sa kanyang kalooban ang mga hinanakit at panghihinayang dahil sa kanyang ginawang pagtatwa kay Kristo.
Noong nagpakita ang Panginoong Muling Nabuhay sa Lawa ng Tiberias, si Pedro ay binigyan ng pagkakataong mahilom ang mga sugat sa kanyang mga puso. Lubusang nasugatan si Pedro dahil sa mga pangyayaring naganap sa mga huling sandali sa buhay ni Kristo. Kabilang na diyan ang kanyang ginawang pagkakaila kay Kristo. Isang napakalaking sugat ang naiwan sa puso ni Pedro. Ang sugat sa puso ni Pedro ay tanda ng kanyang mga hinanakit at panghihinayang. Hinilom ni Kristong Muling Nabuhay ang puso ni Pedro at binuo Niya ito muli. Paano Niya ginawa ito? Tatlong ulit na tinanong ni Kristo si Pedro kung Siya'y mahal niya. Sa pamamagitan ng tatlong ulit na pagtatanong na ito, pinapatatag muli ni Kristo ang kalooban ni Pedro. Hinilom at pinalakas ng Panginoon ang kalooban ni Pedro sa pamamagitan ng pagtatanong kay Pedro nang tatlong beses.
Nalungkot si Pedro dahil sa makaitlong pagtatanong ng Panginoon sa kanya. Naalala niya ang kanyang ginawang pagkakanulo sa Panginoon. Naalala niya ang kanyang ginawang pagkakaila sa Panginoon. Hindi lang isa, kundi tatlong ulit itinatwa ni Pedro ang Panginoon. Subalit, ang makaitlong pagtatanong na ito ang ang nagpatatag sa puso at kalooban ni Pedro. Lumakas ang kanyang kalooban dahil lumalim ang kanyang pagmamahal para sa Panginoon. At taglay ang panibagong katatagan sa kanyang puso't kalooban, ipinahayag ni Pedro ang kanyang pagmamahal para sa Panginoon.
Tayong lahat ay katulad ni Pedro. Mayroon din tayong kahinaan. Hindi lagi tayong malakas, matatag, at mabuti. Nagkakamali din tayo. Nagkakasala tayo. Tayo ay nadadapa o bumabagsak din dahil sa katotohanang ito. Gumagawa tayo ng mga kasalanan laban sa Panginoon at sa kapwa. Ito ay dahil sa ating karupukan bilang tao. At ito'y isang katotohanan sa ating buhay. Hindi tayo perpekto; mayroon tayong mga kahinaan at mga pagkakamali. Huwag nating ipagkaila o takasan ang katotohanang ito. Hinding-hindi nating maipagkakaila o matatakasan ang katotohanang ito sapagkat mabubunyag din ang katotohanang ito. Maniwala o hindi, tayo ay nadadapa o kaya bumabagsak dahil sa ating karupukan bilang tao.
Nalalaman ng Panginoon na may mga karupukan tayo bilang tao. Nalalaman ng Panginoon na tayo ay nadadapa dahil sa ating mga pagkakamali. Subalit, binibigyan Niya tayo ng pagkakataong buuin muli ang ating puso't kalooban. Hindi hahayaan ng Panginoong manatiling wasak ang ating mga puso't kalooban. Nais ng Panginoon na hilumin ang ating puso at kalooban. Paanong hinihilom at pinapatatag ng Panginoon ang ating puso't kalooban? Tinatanong Niya tayo, "Mahal mo ba Ako?" Hindi ito tinatanong ng Panginoon sa atin dahil hindi Niya alam kung mahal natin Siya. Alam ng Panginoon na mahal din natin Siya. Bagkus, pinalalakas Niya ang ating puso't kalooban sa pamamagitan ng tanong na ito. At sa bawat "Oo" na isasagot natin sa tanong na ito, binubuo muli ng Panginoon ang ating puso't kalooban na nawasak dahil sa ating kahinaan bilang tao.
Ang tanong ng Panginoon sa bawat isa, "Mahal mo ba Ako?" Lagi Niya itong tinatanong sa bawat isa sa atin araw-araw. Ano ang ating sagot sa katanungang ito? Ano ang ating isasagot sa tanong ng Panginoon sa atin? Paano tayo tutugon sa tanong na ito na paulit-ulit na tinatanong sa atin ng Panginoon araw-araw?
4 Abril 2016
Dakilang Kapistahan ng Pagpapahayag ng Magandang Balita tungkol sa Panginoon
Isaias 7, 10-14; 8, 10/Salmo 39/Hebreo 10, 4-10/Lucas 1, 26-38
Sa kalendaryo ng Simbahan, ang orihinal na petsya ng Dakilang Kapistahan ng Pagpapahayag ng Magandang Balita tungkol sa Panginoon ay Marso 25. Ito ay sumasagisag sa siyam na buwan ng pagdadala ng Mahal na Birheng Maria sa Panginoong Hesukristo sa kanyang sinapupunan. Kung bibilangin natin ang mga buwan bago ang pagdiriwang ng Pasko sa ika-25 ng Disyembre, exsaktong-exsakto ang bilang. May siyam na buwan mula Marso hanggang Disyembre.
Subalit, sa taong ito, naganap ang isa sa mga bihirang pangyayari. Hindi ipinagdiriwang ang Maringal na Kapistahang ito noong ika-25 ng Marso. Pumatak sa araw ng ika-25 ng Marso ang Biyernes Santo sa taong ito. Mas mataas ang rango ng mga Mahal na Araw at mga araw sa Oktaba ng Pasko ng Muling Pagkabuhay kaysa sa anumang Solemnidad o Kapistahan. Kaya, iniurong ang Solemnidad na ito sa Lunes sa Ikalawang Linggo ng Pasko ng Muling Pagkabuhay. Ngayong taong ito, inilipat sa araw na ito - ang Lunes sa Ikalawang Linggo ng Pasko ng Muling Pagkabuhay, ang Solemnidad ng Anunsasyon.
Ang Magandang Balitang hinahatid ng Arkanghel San Gabriel sa Mahal na Birheng Maria ay tungkol sa Panginoong Hesukristo. Darating ang Panginoong Hesukristo upang maging Mesiyas at Tagapagligtas ng sangkatauhan. Ang pagparito ng Panginoong Hesus sa sanlibutan bilang Mesiyas at Tagapagligtas ay isang Gawa ng Awa mula sa Kanya. Ibinigay at inialay Niya ang Kanyang sarili para sa kaligtasan ng sangkatauhan dahil sa Kanyang Awa sa atin.
Bago pa isinugo ng Diyos ang Arkanghel San Gabriel sa Mahal na Birheng Maria upang ihatid sa kanya ang Mabuting Balitang ito, ipinahayag Niya ito sa pamamagitan ng propeta sa Lumang Tipan. Sa Unang Pagbasa, ipinahayag ni propeta Isaias na may isang dalagang maglilihi at manganganak ng isang lalaki na tatawaging Emmanuel. Ang lalaking ito na ipanganganak ng dalagang ito ay ang Mesiyas at Tagapagligtas. Natupad ang propesiyang ito noong ipinaglihi at iniluwal ni Maria si Hesus sa kanyang sinapupunan.
Kalooban ng Diyos na ialay ni Kristo ang Kanyang buhay alang-alang sa sangkatauhan. Sa Ikalawang Pagbasa, ipinahayag ni Kristo na naparito Siya sa sanlibutan upang tupdin ang kalooban Niya. Niloob ng Diyos na si Kristo ay maghain ng buhay upang ang sangkatauhan ay maligtas. Ninais ng Diyos dahil nalugmok ang tao sa kasalanan. Dahil sa pagkalugmok ng tao sa kasalanan at kasamaan, ninais ng Diyos na sila'y maligtas. Kaya, ipinadala Niya ang Kanyang Bugtong na Anak upang maging hain para sa kaligtasan ng sangkatauhan.
Sa Ebanghelyo, ibinalita ng Arkanghel San Gabriel sa Mahal na Birheng Maria na ipaglilihi at iluluwal niya ang Panginoong Hesukristo. Si Maria ang magiging ina ng Mesiyas at Tagapagligtas na si Hesus. Magkakatawang-tao ang Diyos Anak na si Hesukristo, at isisilang ng Birheng Maria. Pinili ng Diyos si Maria upang maging ina ni Hesus. Sa loob ng siyam na buwan, mananahan at mananatili si Hesus sa loob ng sinapupunan ng Birheng Maria. Dadalhin at tataglayin ni Maria si Hesus sa kanyang sinapupunan sa loob ng siyam na buwan. Pagkatapos ng siyam na buwan, lalabas si Hesus mula sa sinapupunan ni Maria.
Sa loob ng siyam na buwan, dinala at tinaglay ng Mahal na Birheng Maria sa kanyang sinapupunan ang Panginoong Hesukristo, ang Salita ng Diyos na nagkatawang-tao. Ang Salita ng Diyos ay nagbibigay at naghahatid ng Magandang Balita sa lahat. Gayon nga ang ginawa ni Hesus buong buhay Niya, bilang Salita ng Diyos na nagkatawang-tao. Sa kabuuan ng Kanyang Ministeryo, ang Magandang Balita tungkol sa kaligtasang mula sa Diyos ang ipinapalaganap ni Hesus. Magmula noong sinimulan Niya ang Kanyang Ministeryo hanggang sa Kanyang Misteryo Paskwal, ipinangaral at ipinalaganap ni Hesus ang Mabuting Balita tungkol sa Awa ng Diyos at sa kaligtasang dulot nito sa pamamagitan ng Kanyang mga salita at gawa - katulad ng Kanyang mga pangangaral at kababalaghang isinagawa Niya sa Kanyang Ministeryo.
Ang lahat ay nakarinig, subalit hindi tinanggap ng lahat ang mga pangangaral ni Hesus. Nagkaroon Siya ng maraming tagapakinig, tagasubaybay, tagatangkilik, at tagasunod; nagkaroon din ng maraming mga kaaway. Noong si Hesus ay umuwi sa Kanyang bayan sa Nazaret, hindi Siya tinanggap. Pinalayas pa nga si Hesus ng Kanyang mga kababayan sa Nazaret. Ang mga pinuno ng bayan, katulad ng mga Pariseo, mga eskriba, mga matatanda ng bayan, lahat ng bumubuo sa Sanedrin, ay nainggit kay Hesus. Nainggit sila kay Hesus sapagkat parami nang parami ang Kanyang mga tagasunod. Marami ang tumitiwalag sa kanila at sumusunod na kay Hesus. Dahil doon, nagtanim sila ng galit kay Hesus sa kanilang mga puso at binalak na patayin si Hesus upang mawala Siya sa kanilang lipunan.
Nang dumating ang takdang oras ni Hesus, nagkaroon ng pagkakataon ang mga kaaway ni Hesus upang patayin Siya. Hinatulan si Hesus ng kamatayan ng Sanedrin. Pinayagan din naman ni Poncio Pilato ang mga kaaway ni Hesus na gawin sa Kanya ang nais nilang gawin. Bagamat alam ni Pilato na inosente si Hesus at wala Siyang ginawang kasalanan kahit kailan, hindi niya mapanindigan ang katotohanang ito. Ambisyoso si Pilato na maging makapangyarihan, at sa mata ni Pilato, si Hesus ay hadlang sa kanyang mga planong-politikal at kapangyarihan bilang pinuno ng bayan. Kahit hindi makatarungan ang ginawa laban kay Hesus, tinanggap pa rin ni Hesus ang kalooban ng Ama na mamatay sa krus alang-alang sa kasalanan ng sangkatauhan.
Akala ng mga kaaway ni Hesus na tapos na ang Kanyang kwento noong Siya'y ipinako at namatay sa krus. Akala nila naging matagumpay sila sa kanilang plano na patayin si Hesus. Para sa kanila, wala nang salot sa kanilang lipunan. Wala na silang poproblemahin; wala nang gagambala sa kanila. Tuwang-tuwa sila. Akala nila na nagtagumpay na sila. Akala nila na natalo na nila si Hesus. Akala nila, tapos na ang lahat. Wala na si Hesus sa kanilang lipunan sapagkat patay na Siya. Subalit, hindi nila nalalaman na totoo ang sinabi ni Hesus na Siya'y muling bubuhayin sa ikatlong araw. Hindi sila naniwala sa sinabi ni Hesus na Siya'y muling mabubuhay sa ikatlong araw. Akala nilang mananatiling patay si Hesus at mabubulok ang Kanyang Katawan sa libingan.
Totoo nga ang sinabi ni Hesus tungkol sa Kanyang Muling Pagkabuhay. Natupad ang sinabi ni Hesus tungkol sa Kanyang Muling Pagkabuhay. Muling nabuhay sa ikatlong araw si Hesus. Hindi nagtapos ang lahat sa kamatayan. Nagtagumpay Siya sa pamamagitan ng Kanyang Krus at Muling Pagkabuhay. Hindi nagtapos ang kwento at buhay ni Hesus sa kamatayan sa krus at libingan. Hindi nanatiling patay si Hesus. Hindi nabulok ang bangkay ni Hesus sa libingan. Bagkus, muling nabuhay si Hesus sa ikatlong araw. Sa Kanyang Muling Pagkabuhay, tinaglay ni Hesus ang Kanyang buong kaningningan at kaluwalhatian.
Ang Muling Pagkabuhay ni Hesus ay nagdulot ng malaking kaligayahan at kagalakan sa lahat ng tao, lalung-lalo na sa Mahal na Inang Maria. Muling ibinahagi ni Hesus ang Mabuting Balita na nagbibigay ng matinding kagalakan at kaligayahan sa lahat ng tao sa pamamagitan ng Kanyang Muling Pagkabuhay. Siya, na nagmula sa sinapupunan ng Mahal na Birheng Maria, ay ipinako at namatay sa krus, ngunit muling nabuhay sa ikatlong araw.
May maganda at mabuting balitang hatid ang kapanahunan ng Pasko ng Muling Pagkabuhay - muling nabuhay si Hesus. Sa pamamagitan ng Muling Pagkabuhay ni Hesus, nagtagumpay ang Awa ng Diyos laban sa kapangyarihan ng kasamaan, kasalanan, at kamatayan. Ito ang Magandang Balita. Ito ang Mabuting Balita tungkol sa Awa ng Diyos. Kaisa ni Maria, ang Mahal na Ina, tanggapin natin sa ating puso't diwa nang may buong pagtitiwala ang Mabuting Balita tungkol sa Awa ng Diyos. Ang Mabuting Balitang ito ay nagbibigay ng matinding kagalakan at kaligayahan sa sinumang tatanggap nito sa puso at diwa nang may buong pagtitiwala at pananalig sa Awa ng Diyos. Tulad ng ating Mahal na Inang si Maria, tanggapin natin ito nang may buong pagtitiwala at pananalig sa Awa ng Diyos.
3 Abril 2016
Ika-2 Linggo ng Pasko ng Muling Pagkabuhay (K)
(Linggo ng Banal na Awa ng Panginoon)
Mga Gawa 5, 12-16/Salmo 117/Pahayag 1, 9-11a. 12-13. 17-19/Juan 20, 19-31
Napaka-espesyal ng Kapistahan ng Dakilang Awa ng Diyos ngayong taon sapagkat napapaloob ito sa Banal na Taon ng Awa na idineklara ng ating Mahal na Santo Papa na si Papa Francisco. Binibigyang-diin ng taong ito ang kahalagahan ng Awa ng Diyos sa buhay ng Simbahan. Hinihikayat tayo ng Simbahan ngayong Taon ng Awa na lumapit at humingi ng awa mula sa Diyos sa pamamagitan ng pakikilahok sa mga Sakramento ng Simbahan (lalung-lalo na sa mga Sakramento ng Kumpisal at Eukaristiya), pananalangin, at pagkakawanggawa. Nais ipahiwatig ng Simbahan ang mensahe ng taong ito - maawain ang Diyos. Hinihikayat din tayo ng Simbahan na isabuhay ang tema ng Taon ng Awa, "Maging maawain tulad ng Ama." Kung ang Amang Diyos ay maawain, gayon din naman, dapat din tayong maging maawain sa isa't isa. Ibahagi natin ang Awa ng Diyos sa bawat isa.
Ang tema ng mga Pagbasa ngayong Ikalawang Linggo ng Muling Pagkabuhay at Linggo ng Dakilang Awa ng Diyos ay ang pananalig sa Awa ng Diyos. Ang pananalig sa Awa ng Diyos ay napakahalaga sa buhay natin bilang mga Katolikong Kristiyano. Napakahalaga sa ating pananampalataya ang pananalig sa Awa ng Diyos. Hindi tayo mabubuhay ngayon kung hindi dahil sa Awa ng Diyos. Tayo ay nabubuhay ngayon dahil sa Awa ng Diyos.
Kaya nga, noong ang Panginoong Hesukristo ay nagpakita kay Santa Faustina, nagpapinta Siya ng larawan sa kanya na nakatitik, "Hesus, ako ay nananalig sa Iyo." Nais ng Panginoong Hesus na manalig tayo sa kapangyarihan ng Kanyang Banal na Awa. Ito ang dahilan kung bakit Siya bumaba mula sa langit at nagkatawang-tao, namatay sa krus at muling nabuhay. Ito ang dahilan kung bakit pinagdaanan ni Kristo ang Kanyang Misteryo Paskwal. Ang Banal na Awa ng Panginoon ang dahilan kung bakit tayo ay nagkaroon ng kaligtasan.
Sa Unang Pagbasa, parami nang parami ang mga sumasampalataya kay Kristo Hesus. Nakikilala ng mga tao si Kristo sa pamamagitan ng mga pangangaral at mga kababalaghang ginawa ng mga apostol. Nakakapagpangaral at nakakagawa ng mga himala ang mga apostol sa pamamagitan ng kapangyarihan ng Pangalan ni Kristo. Sa pamamagitan ng kanilang mga pangaral at paggawa ng mga milagro, nakikilala ng mga tao ang Panginoong Hesukristo. Ipinakilala ng mga apostol si Kristo sa mga tao sa pamamagitan ng kanilang pagtuturo patungkol sa Kanya at paggawa ng mga himala. Ipinakilala ni Kristo ang Kanyang sarili sa pamamagitan ng mga turo at mga himalang ginawa ng mga apostol sa Pangalan Niya.
Marami ang sumampalataya sa Panginoong Hesus. Naaakit sila sa Kanya dahil sa kapangyarihan ng Kanyang Mabathalang Awa. Ang Awa ng Panginoon ang dahilan kung bakit ninais ng mga tao na sumampalataya sa Kanya. Nananalig at sumasampalataya ang mga tao kay Kristo dahil sa kapangyarihan ng Kanyang Awa. Ang mga pangangaral at mga himalang isinasagawa ng mga alagad sa Pangalan ni Hesukristo ay ang pagpapamalas ng Kanyang Awa sa mga tao. Ipinapakita ng Panginoon ang Kanyang Awa sa pamamagitan ng mga gawang ito ng mga apostoles sapagkat Siya ay maawain. Katulad ng pamagat ng libro ni Papa Francisco, "Awa ang Ngalan ng Diyos."
Ipinakilala ng Panginoong Hesukristo ang Kanyang sarili sa Ikalawang Pagbasa. Si Hesukristo ang Simula at ang Wakas (Alpha at Omega), ang Panginoong namatay ngunit muling nabuhay, at ang mananatiling buhay magpakailanman. Subalit, binigkas Niya ang mga salitang ito bago Niya ipakilala ang Kanyang sarili kay San Juan, "Huwag kang matakot!" Huwag matakot. Hindi lamang Niya sinasabi ang mga salitang ito kay San Juan; ito'y sinasabi Niya sa ating lahat. Kahit taglay Niya ang Kanyang kapangyarihan at kaningningan bilang Hari at Hukom, Siya pa rin ang Panginoon na may awa at habag sa ating lahat.
Ang Dakilang Awa ng Panginoon sa atin ang dahilan kung bakit Siya nagtagumpay laban sa kapangyarihan ng kasamaan, kasalanan, at kamatayan. Kinamit Niya ang tagumpay na ito alang-alang sa atin. Kung hindi dahil sa Awa ng Panginoon sa atin, hindi Niya kakamit ang tagumpay para sa atin. Kung walang awa ang Panginoon sa atin, matagal sana tayong pinabayaang malugmok sa kapangyarihan ng kasamaan, kasalanan, at kamatayan. Hahayaan lamang Niya tayong mamuhay sa kaalipinan magpakailanman. Wala Siyang pakialam sa atin kung wala Siyang awa sa atin. Subalit, pinili ng Panginoon na tumawid mula sa kalangitan patungo sa lupa. Pinili ng Panginoon na maging tao katulad natin, maliban sa kasalanan. Pinili ng Panginoon na tiisin ang maraming hirap at pasakit sa krus ng Kalbaryo at muling mabuhay sa ikatlong araw. Pinili ng Panginoon na labanan ang puwersa ng kasamaan, kasalanan, at kamatayan, at magtagumpay laban sa mga puwersang ito, alang-alang sa atin. Piniling gawin ito ng Panginoon dahil sa Kanyang Awa at Habag sa atin na hindi magmamaliw magpakailanman.
Sa Ebanghelyo, dalawang ulit nagpakita ang Panginoong Muling Nabuhay sa mga alagad. At sa dalawang ulit na pagpapakitang ito, binati Niya ang mga alagad ng kapayapaan. Kapayapaan ang pagbati at handog ng Panginoong Hesukristong Muling Nabuhay sa mga alagad. Kahit iniwanan at pinabayaan ng mga alagad si Hesus na mag-isa sa Halamanan ng Getsemani, awa at kapayapaan pa rin ang ibinigay ng Panginoon sa kanila. Ginantihan ng Panginoong Hesus ang kanilang pagkukulang sa pamamagitan ng paggawa ng mabuti. Ibinahagi ni Hesus ang Kanyang Awa at Kapayapaan sa mga alagad.
Ganun din ang ginawa ni Hesus sa Kanyang ikalawang pagpapakita sa mga alagad, noong kasama na nila si Tomas. Si Santo Tomas Apostol ay hindi kasama ng ibang mga alagad noong unang nagpakita ang Panginoong Hesus na Muling Nabuhay. Noong ibinalita ng ibang mga alagad kay Tomas na si Hesus ay tunay ngang nabuhay na mag-uli, hindi naniwala si Tomas. Bagkus, sinabi niya ang mga katatagang ito, "Hangga't hindi ko nakikita ang mga butas ng mga pako sa Kanyang mga Kamay at Paa, at maisuot ko ang aking daliri sa Kanyang tagiliran, hindi ako maniniwala." (Juan 20, 25)
Pinagbigyan ni Hesus ang kahilingan ni Tomas dahil sa Kanyang Awa. Ninais ni Tomas na makita si Hesus na Muling Nabuhay. Nagpakita Siya muli sa mga alagad at pinakita kay Tomas ang kanyang hinahanap - ang mga sugat sa Kanyang mga Kamay at Paa, at sa Kanyang tagiliran. Hinahanap ni Tomas ang mga sugat ni Kristo - mga tanda ng Kanyang Pasyong Mahal, mga tanda ng Kanyang Awa sa sangkatauhan. Ipinagkaloob ng Panginoong Hesukristo ang kahilingan ni Tomas - makita ang Kanyang mga sugat. Ang mga sugat ay nagpapakilala at nagpapatunay na si Hesukristo nga ang nakikita ng mga alagad. Hindi Siya guni-guni, hindi Siya panaginip, hindi Siya ilusyon - si Hesus iyon.
Dahil sa ginawa ni Hesus, naniwala si Tomas na Siya'y muling nabuhay. Nagtiwala at nanalig din si Tomas sa kapangyarihan ng Awa ng Panginoon. Ang Awa ng Panginoong Hesus ay naging daan patungo sa pananalig ni Tomas. Mula sa kanyang pagdududa, si Tomas ay tumawid patungo sa pagtitiwala at pananalig sa Panginoong Muling Nabuhay. Inakay si Tomas ng kapangyarihan ng Awa ng Panginoong Muling Nabuhay sa daan patungo sa pagtitiwala at pananalig sa Kanya. Ipinakita ng Panginoong Hesukristo ang Kanyang Awa kay Tomas sa pamamagitan ng Kanyang muling pagpapakita sa mga alagad. Sa pamamagitan nito, namulat ang mga mata ni Tomas sa Awa ng Panginoon. Nakita niya ang Awa ng Diyos sa pamamagitan ni Hesus na Muling Nabuhay. Kaya, mula sa pagdududa, siya'y nagpahayag nang may buong pagtitiwala at pananalig, "Panginoon ko at Diyos ko!" (Juan 20, 28)
Ipinakita ng Panginoong Hesukristo ang kapangyarihan ng Kanyang Dakilang Awa sa pamamagitan ng Krus at Muling Pagkabuhay. Sa pamamagitan ng Krus at Muling Pagkabuhay, tayong lahat ay Kanyang tinubos at pinalaya. Tinubos at pinalaya tayo sapagkat may awa ang Panginoon sa atin. Ang Krus at Muling Pagkabuhay ng Panginoon ay mga tanda ng Kanyang Awa para sa atin. Kahit hindi kinailangang ipakita ng Panginoon sa sangkatauhan ang Kanyang Awa, pinili pa rin Niya itong ipinakita sa ating lahat. Bakit? Awa ang Kanyang Pangalan. Siya ang Panginoon na may tunay na Awa at Habag para sa ating lahat.
Katulad ni Tomas, imulat nawa natin ang ating mga mata sa Awa ng Diyos. Manalig din nawa tayo sa Awa ng Diyos. Ang Awa ng Diyos ay ang Kanyang pinakadakilang katangian, sapagkat Awa ang Kanyang Pangalan. Kapag tayo ay nananalig at sumasampalataya sa Awa ng Diyos, tayo ay tunay na nananalig at sumasampalataya sa Diyos. Maawain ang Panginoong Diyos sapagkat Awa ang Kanyang Pangalan. Ang Awa ang pinakadakilang katangian ng Diyos. Hindi magmamaliw ang Awa ng Diyos. Bagkus, mananatili ito magpakailanman.
2 Abril 2016 - Sabado ng Walong Araw na Pagdiriwang ng Pasko ng Muling Pagkabuhay
Mga Gawa 4, 13-21/Salmo 117/Marcos 16, 9-15
Sa Unang Pagbasa, pinahagupit ng mga punong saserdote, mga matatanda ng bayan, at mga eskriba - mga bumubuo ng Sanedrin - ang mga apostol na sina Pedro at Juan. Pagkatapos ipahagupit ang dalawang apostol na ito, binabalaan ng Sanedrin ang dalawang ito na huwag nang magsalita o magturo patungkol kay Hesukristo sa mga pampublikong lugar. Subalit, hindi ito sinunod nina Pedro at Juan. Sabi pa ng dalawang apostol sa Sanedrin, "Kayo na po ang humatol kung alin ang matuwid sa paningin ng Diyos: ang sumunod sa inyo o ang sumunod sa Diyos. Hindi maaaring di namin ipahayag ang aming nakita't narinig." (4, 19-20)
Hindi natakot sina Pedro at Juan sa anumang parusang ipapataw sa kanila ng mga pinuno ng bayan, lalung-lalo na kung ito'y manggagaling sa Sanedrin. Hindi na sila ang mga dating mangingisdang tagasunod ni Kristo na naduwag at iniwanan Siyang mag-isa sa Getsemani. Bagkus, binago sila noong araw ng Pentekostes. Noong araw ng Pentekostes, bumaba ang Espiritu Santo mula sa langit at pumanaog sa mga apostol na nagkatipon sa senakulo. Dahil dito, nagkaroon ng lakas ng loob ang mga alagad. Ang tibay ng kalooban ay isang biyayang ipinagkaloob sa kanila ng Panginoon. Ipinagkaloob ito sa kanila sapagkat kakailanganin nila ito para sa kanilang misyon - magpahayag at magpangaral patungkol sa Panginoong Hesukristo at sa Mabuting Balita sa lahat ng dako.
Dahil sa tibay ng loob na nagmula sa Diyos, hindi na sila natakot sa anumang pag-uusig. Hindi na natakot ang mga apostol na magsalita at magturo tungkol sa Panginoong Hesus saanman sila pumunta. Hindi sila takot sa mga pag-uusig na gagawin laban sa kanila. Buong katapangan nilang haharapin ang pag-uusig, kahit ang kamatayan. Nakahandang mamatay ang mga apostol alang-alang sa Panginoong Hesus at sa Mabuting Balita.
Sa unang bahagi ng Ebanghelyo, dalawang ulit ibinalita sa mga alagad ang Muling Pagkabuhay ni Hesus. Unang nagbalita sa mga alagad si Maria Magdalena. Ang pangalawang nagbalita sa kanila ay dalawang alagad na naglalakad patungo sa bukid. Subalit, hindi pinaniwalaan ng mga alagad ang ibinalita ng dalawang grupong ito sa kanila. Hindi nila pinaniwalaan na si Hesus ay muling nabuhay. Kaya, noong nagpakita si Hesus, pinagsabihan Niya ang mga ito dahil sa kanilang katigasan ng ulo at puso. Dahil sa katigasan ng ulo at puso ng mga alagad, hindi sila naniwala sa balitang muling nabuhay ang Panginoong Hesus.
Sa ikalawa at huling bahagi ng Ebanghelyo, isinugo ni Hesus ang mga alagad. Inihabilin at iniutusan ni Hesus ang mga alagad na ipangaral ang Mabuting Balita sa iba't ibang dako ng daigdig. Aalis na si Hesus sa mundong ito. Babalik si Hesus sa Ama. Subalit, kinakailangang ipagpatuloy ang misyon na Kanyang sinimulan. Kaya, ipinasa ni Hesus sa mga alagad ang Kanyang misyon. Ipagpapatuloy ng mga alagad ang sinimulan ni Hesus. Ipapakilala at ipangangaral ng mga alagad sa buong daigdig si Hesus at ang Mabuting Balita.
Ang Mabuting Balita ng Panginoong Hesukristo ay nagbibigay-kagalakan sa lahat. Sa pamamagitan ng Mabuting Balita, binibigyan tayo ng kagalakan ng Panginoon. Mabuti ang balitang hatid ng Panginoon sa atin. At ano ang balitang iyon? Ang kaligtasan ng sangkatauhan. Iniligtas ang sangkatauhan mula sa kasalanan, kasamaan, at kamatayan dahil sa Awa ng Diyos sa ating lahat. At sa Krus at Muling Pagkabuhay ni Hesukristo, makikita ang larawan ng Awa ng Diyos sa buong sangkatauhan. Isinalarawan ng Panginoong Hesukristo sa pamamagitan ng Kanyang kamatayan sa krus at Muling Pagkabuhay ang Awa ng Diyos sa ating lahat. Ang Awa ng Diyos ang nagdala ng kaligtasan sa atin.
Misyon natin bilang Simbahan ang pagpapahayag ng Mabuting Balita ni Kristo. Hindi lamang po ito para sa Santo Papa, mga Kardinal at Obispo, mga kaparian, mga relihiyoso't relihiyosa, kundi para sa ating lahat na bumubuo ng Simbahang itinalaga ni Kristo. Ipinagkatiwala ng Panginoon sa mga alagad, mga unang Obispo ng Simbahan, ang misyon ng pagpapahayag ng Mabuting Balita sa lahat ng dako. Ipinagpapatuloy ng Simbahan magpahanggang-ngayon ang misyong ito. Hindi lamang ang Santo Papa, mga obispo, mga kaparian, o mga relihiyoso't relihiyosa lamang ang bumubuo sa Simbahan, kundi tayong lahat. Kaya, ang misyon ng Simbahan ay misyon din natin. Makiisa tayo sa misyon ng Simbahan ng pagpapalaganap ng Mabuting Balita ni Kristo.
1 Abril 2016 - Biyernes sa Walong Araw na Pagdiriwang ng Pasko ng Muling Pagkabuhay
Mga Gawa 4, 1-12/Salmo 117/Juan 21, 1-14
Ang Ebanghelyo ngayong Biyernes sa Oktaba ng Pasko ng Muling Pagkabuhay ay tungkol sa pagpapakita ng Panginoong Hesukristo sa mga alagad sa Lawa ng Tiberias. Ayon sa mga dalubhasa sa Bibliya, ito ay isang epilogo ng Ebanghelyo ni San Juan. Natapos na ang Ebanghelyo ni San Juan sa ika-20 kabanata. Ang kabanatang ito ay isang karagdagan sa Ebanghelyo ni San Juan. Dinagdag lamang ni San Juan Ebanghelista ang kwento ng pagpapakita ng Panginoong Muling Nabuhay sa mga alagad sa Lawa ng Tiberias sa Ebanghelyo.
Ito rin ang inspirasyon ng Kanyang Kabunyian Luis Antonio Kardinal Tagle ng Maynila. Ang saliwikain ng Mahal na Kardinal Luis Antonio Tagle ng Maynila sa wikang Latin ay "Dominus est!" "Ang Panginoon iyon!" kung isasalin sa Tagalog. Ang mga katagang ito ay nagmula kay San Juan, ang alagad na pinakamahal ni Hesus. Nakilala niya si Hesus na Muling Nabuhay noong makita niyang marami silang nahuling isda. Naalala ng alagad na ito na si Hesus lang ang dahilan kung bakit nakahuli sila ng isda noong minsan. Naalala ng alagad na ito na alam ni Hesus kung saan sila makakahuli ng isda.
Ang Panginoon iyon. Mga katagang nagpapakilala sa Panginoong Hesukristo. Ang mga katagang ito ay nagsasalarawan kung sino si Hesukristo. Si Hesus ang Panginoon na Muling Nabuhay. Hindi Siya isang multo, hindi Siya isang panaginip. Siya ang Panginoong Muling Nabuhay. Siya'y pinatay ngunit muling nabuhay sa ikatlong araw. Si Hesus ang Panginoon na muling nabuhay at patuloy na nagmamahal sa lahat, kahit paulit-ulit silang nagkakasala laban sa Kanya.
Si Hesus ang Panginoon na humirang sa mga alagad. Si Hesus ang Panginoon na nagturo tungkol sa awa at pagmamahal. Si Hesus ang Panginoon na nag-alay ng Kanyang buhay sa krus alang-alang sa ating lahat. Si Hesus ang Panginoong Muling Nabuhay na nagkamit ng tagumpay at kaligtasan, hindi lamang para sa Kanyang sarili kundi para sa ating lahat. Si Hesus ang Panginoon ng awa at pagmamahal. Si Hesus ang Panginoon na patuloy na nagbibigay ng awa at pagmamahal sa ating lahat. Si Hesus ang Panginoon na handang magbigay ng kapatawaran sa mga makasalanang humihingi ng Kanyang kapatawaran.
Ang Panginoong Hesus, ayon sa hula sa Salmo ngayong araw na ito, ang batong itinakwil na naging saligan. Ang batong itinakwil ay naging batong-panulukan. Kahit si Hesus ay itinakwil ng Kanyang mga kababayan at pinagpatay ng Kanyang mga kaaway, Siya ay itinaas at muling binuhay ng Ama. Binaliktaran ng Ama ang gawain ng tao. Binaliktad ng Ama ang ginawa ng mga kaaway ni Hesus. Muling binuhay si Hesus at itinaas ng Ama. Mula sa kapakumbabaan ni Hesus, Siya'y itinaas at itinampok ng Ama. Katulad ng nasusulat sa ikalawang kabanata ng sulat ni Apostol San Pablo sa mga taga-Filipos, "Binigyan ng Ama si Hesus ng Ngalang tampok sa langit at sansinukob." (Filipos 2, 8-9)
Si Hesus ang Panginoong Muling Nabuhay na nagkamit ng tagumpay alang-alang sa atin. Kinamit Niya ang tagumpay sa pamamagitan ng Kanyang Krus at Muling Pagkabuhay. Siya ang makapangyarihang Haring nagkamit ng tagumpay para sa ating lahat. Subalit, si Hesus ay isa ring maawain at mapagpatawad na Panginoon. Dahil sa Kanyang awa at pagmamahal sa atin, handa Siyang magbigay ng kapatawaran sa ating lahat kung tayo ay maninikluhod at lalapit sa Kanya upang hingin ang Kanyang Awa at Kapatawaran. Sapagkat bukod pa sa pagiging Makapangyarihang Hari, si Hesus ay ang Panginoon ng Awa at Habag.
Sino ang Hari at Panginoon ng Awa? Sino ang Hari at Panginoon na may tunay na awa at pagmamahal sa sangkatauhan? Ang Panginoon iyon! Si Hesus iyon!
