Sabado, Hulyo 30, 2016

ANG KAHIHINATNAN NG MGA SAKIM

31 Hulyo 2016
Ika-18 Linggo sa Karaniwang Panahon (K) 
Mangangaral 1, 2; 2, 21-23/Salmo 89/Colosas 3, 1-5. 9-11/Lucas 12, 13-21 



Ang kasakiman ay isa sa mga Pitong Pangunahing Kasalanan. Ang kasakiman ay isang malalim at matinding paghahangad na makamit ang maraming bagay dito sa mundo, katulad ng kayamanan at kapangyarihan. Pagkauhaw ang katulad nito. Uhaw na uhaw ang mga taong sakim para sa mga pita ng laman. Uhaw na uhaw sila para sa kayamanan at kapangyarihan. Hindi basta mapapawi ang pagkauhaw ng mga taong sakim. Hindi sila makuntento sa kung anong meron sila. Muli silang maghahangad ng lalo pang maraming bagay. Halos kinasaskiman nila ang lahat ng bagay dito sa mundo. Gusto nilang mapunta sa kanila ang lahat ng kayamanan at kapangyarihan dito sa mundo. 

Nakakalungkot, laganap ang kasakiman sa ating lipunan ngayon. Ito nga po siguro ang pangunahing sanhi ng katiwalian (kurapsyon). Nagnanakaw dahil uhaw na uhaw sila para sa kapangyarihan at kayamanan. Gagawin ang lahat para mapawi ang kanilang pagkauhaw para sa kapangyarihan at kayamanan. Gagawin nila ang lahat para makuha ang kanilang mga kinasasakiman. Kahit alam nilang mali ang kanilang ginagawa, gagawin pa rin nila dahil sa kanilang kasakiman. Hindi sila nakukunsensya sa kanilang ginagawa. Hindi sila kinikilabutan sa kanilang mga ginagawa. Umaasal sila na parang walang mga kunsensya. 

Ang akala ng mga taong sakim ay makakamtan nila ang tunay na kaligayahan dito sa daigdig. Akala nila na magiging masaya sila kapag napasakanila ang lahat ng kayamanan at kapangyarihan dito sa mundo. Hindi mapapantayan ang kanilang kaligayahan kapag nakamtan nila ang lahat ng kayamanan at kapangyarihan dito sa mundo. Mali ang kanilang akala. Hindi nila nalalaman na hindi matatagpuan ang tunay na kaligayahan sa mga kayamanan at kapangyarihan dito sa mundo. Hindi nila makakamit ang tunay na kaligayahan sa pagkamit sa lahat ng mga kayamanan at kapangyarihan dito sa mundo. 

Binabalaan tayo ng mga Pagbasa ngayon laban sa kasakiman. Sa Unang Pagbasa, ipinahayag ng Mangangaral na ang mga taong sakim ay mabibigo sa kanilang mga gawain. Hindi sila magtatagumpay sa kanilang mga gawain. Hindi sila magiging tunay na masaya. Bagkus, kabiguan at sakit ng kalooban ang masusumpungan nila. Sa Ikalawang Pagbasa, ipinahayag ni Apostol San Pablo na matatagpuan ang tunay na kaligayahan kay Kristo. Kung hindi pinagsumakitan natin si Kristo at ang mga bagay na makalangit, hindi natin mahahanap ang tunay na kaligayahan. Mabibigo lamang tayo kapag hindi natin pagsumakitan si Kristo at ang mga bagay na nasa langit. Sa Ebanghelyo, isinalarawan ni Hesus sa pamamagitan ng isang talinghaga ang kahihinatnan at kahangalan ng mga taong sakim. Iisa lamang ang isinasalarawan ng mga Pagbasa ngayon - ang kahihinatnan ng mga taong sakim. 

Ano ang kahihinatnan ng mga taong sakim? Mabibigo lamang sila. Kabiguan ang makakamtan ng mga taong sakim. Sa kahuli-huliha'y mabibigo lamang ang mga taong sakim. Hindi sila magtatagumpay. Hindi mananaig ang kasakiman. Kung nagtagumpay sila sa kanilang paningin, natalo sila sa paningin ng Diyos. Kung mga panalo ang tingin nila sa kanilang sarili, mga talunan sila sa paningin ng Diyos. Sa kahuli-hulihan, hinding-hindi magtatagumpay ang mga taong sakim. Ang mga taong sakim ay mga talunang hangal sa paningin ng Diyos. 

Magaling magbalatkayo ang kasakiman. Iba-iba ang uri ng kasakiman sa panahon ngayon. Binabalaan tayo na mag-ingat sa lahat ng uri ng kasakiman. Marami ang mga mabibiktima ng kasakiman. Huwag tayo magpaloko sa kasakiman. Huwag tayo magpabiktima o magpaalipin sa kasakiman. Huwag tayong magpa-api sa kasakiman. Maaari silang magmukhang maganda at kaakit-akit sa unang tingin. Subalit, mabibigo tayo sa kahuli-hulihan dahil nahulog tayo sa kanilang bitag. Sa kahuli-huliha'y malalaman natin na hindi maganda ang kasakiman. Matutuklasan natin na niloko tayo ng kasakiman. Huwag sanang mangyari iyon. 

Nakakatakot maging biktima ng kasakiman. Kaya, binabalaan tayo ng Panginoon na mag-ingat sa lahat ng uri ng kasakiman. Huwag nating salungatin ang babala ng Panginoon para sa ating lahat. Hindi maganda ang kahihinatnan ng mga taong sakim. Hindi magtatagumpay ang kasakiman. Hindi tayo aakayin ng kasakiman patungo sa kaligayahan at tagumpay. Bagkus, aakayin tayo ng kasakiman sa landas patungo sa kabiguan at kahangalan. 

Ang Panginoon ang aakay sa atin sa landas patungo sa tunay na kaligayahan at tagumpay. Sa Kanya lamang matatagpuan ang tunay na kaligayahan at tagumpay. Tayong lahat ay tinatawag ng Panginoon na sumunod sa Kanya sa landas patungo sa tunay na kaligayahan at tagumpay. Sumunod tayo sa Kanya upang makamtan natin ang tunay na kaligayahan at tagumpay. Huwag nating salungatin ang tinig ng Panginoon. Tinatawag Niya tayo upang maakay Niya tayo patungo sa tunay na kaligayahan at tagumpay sa Kanyang piling. 

Lunes, Hulyo 25, 2016

BAKIT NAKALIMUTAN NA NATIN KUNG ANO ANG TAMA AT MALI?

Isang pagninilay tungkol sa Ikalimang Utos: Huwag Kang Papatay


(photo courtesy: Huwag Kang Papatay FB page)

Puro mga patayan ang laman ng mga balita ngayon. Walang araw na lumilipas na kung saan wala tayong nababalitaan tungkol sa mga patayan. Tila bahagi na ng ating pang-araw-araw na buhay natin ang pagtanggap ng mga balita patungkol sa mga patayang nagaganap sa paligid natin. Nakakalungkot at nakakatakot ang mga balitang inuulat sa atin ngayon. Karamihan sa mga balitang inuulat sa telebisyon, radyo, dyaryo, at marami pang iba, ay tungkol sa mga patayan. 

Nakakalungkot, karamihan sa mga pinapatay ay mga pinaghihinalaan lamang. Hindi pa napapatunayang mga kriminal sila. Wala pang lumalabas na ebidensya na nagpapatunay na ang mga taong ito ay talagang gumagawa ng krimen. Wala pang lumalabas na kunkretong ebidensya na nagpapatunay na sila'y mga kriminal talaga. Walang sapat na ebidensya na nagpapatunay na totoo nga ang mga bintang laban sa kanila. Mga inosente pa sila sa mga mata ng batas. Mga pinaghihinalaan pa lamang sila. Wala pang lumalabas na ebidensya laban sa kanila. Hangga't hindi pa napapatunayang gumagawa talaga sila ng krimen, sila'y mga inosente pa. 

Nakakalungkot ring isipin na marami sa atin ay natutuwa at nasisiyahan kapag nababalitaan natin ang mga patayan. Paniwala ng marami, mababawasan ang krimen sa ating bansa. Bababa ang bilang ng krimen sa ating bansa. Paniwala ng marami sa atin, dapat lamang sila mamatay. Nararapat silang mamatay. Marapat lamang na pagbayaran nila ang kasamaang ginawa nila. Dapat silang mamatay bilang parusa para sa mga kasamaang ginawa nila. 

Ang mga kriminal ay gumagawa ng masama. Subalit, dapat ba nating labanan ang kasamaang ginagawa nila sa pamamagitan ng paggawa ng kasamaan? Maaari ba nating gamitin ang apoy laban sa apoy? Maaari ba nating gamitin ang karahasan laban sa karahasan? HINDI! Mas lalong lalaki ang apoy, mas lalong lalaganap ang karahasan. Kung apoy ang gagamitin natin laban sa apoy, hindi mamamatay ang apoy. Bagkus, lalaki lamang ito. Hindi rin nating magagamit ang karahasan laban sa karahasan sapagkat lalo pang lalaganap ang karahasan sa kapaligiran. Kung gagamitin natin ang masama bilang panlaban sa mga kriminal na gumagawa ng kasamaan, hindi natin makakamit ang tunay na tagumpay. 

Huwag kang papatay. Ito ang Ikalimang Utos sa Sampung Utos ng Diyos. Inuutusan tayo ng Diyos na pangalagaan at igalang ang buhay ng tao. Hindi tayo ang may-ari ng ating buhay. Ang buhay natin ay galing sa Diyos. Ang buhay ay isang napakalaki at napakahalagang biyaya mula sa Diyos. Tayo'y mga katiwala lamang ng biyayang ito. Wala tayong karapatan upang bawiin ang sarili nating buhay, o ng buhay ng iba. Ang Diyos lamang ang may karapatang bumawi ng buhay. Kaya, kapag may taong namatay o pumanaw, sinasabi nating, "Binawian ng buhay." Sino ang bumawi ng buhay? Ang Diyos. Kaya, ang buhay natin dito sa lupang ibabaw ay hiniram lang natin mula sa Diyos. Ibabalik din natin sa Diyos ang ating buhay sa ating pagpanaw balang araw. 

Subalit, parang nakakalimutan na natin ang utos na ito. Nakalimutan na natin ang mga utos ng Diyos. Ito'y isang nakakalungkot na katotohanan. Nakakalimutan na natin kung ano ang tama at mali. Bakit nakalimutan na natin ang utos ng Diyos? Bakit nakalimutan na natin kung ano ang tama at mali? 

Mali ang pagpatay. Anuman ang dahilan o layunin ng pagpatay, mali pa rin iyon. Hinding-hindi magiging tama ang pagpatay, kahit kailan. Ang mga kriminal ay gumagamit ng iba't ibang paraan upang pumatay ng tao, katulad ng karahasan at pagbebenta ng mga pinagbabawal na droga. Kung balak nating patayin ang mga kriminal bilang parusa para sa kanilang mga ginawa, ano ang pinagkaiba natin sa kanila? WALA. Mga kriminal na rin tayo katulad nila. Mga mamamatay-tao rin tayo, katulad nila. Ang bawat kriminal ay mamamatay-tao, sa iba't ibang paraan. 

Sinabi ng Panginoong Hesukristo, "Kapag sinampal ka sa iyong kanang pisngi, iharap mo ang kabila." (Mateo 5, 39) Tinuturuan tayo ng Panginoong Hesus kung paano gumanti sa mga masasamang tao. Huwag tayo gumawa ng masama bilang pagganti sa mga gumawa ng masama sa atin. Hindi nating maaaring gamitin ang kasamaan laban sa kasamaan. Lalaganap lamang ang kasamaan kung gagantihan natin ng masama ang isa pang masama. Hindi tayo aakayin ng kasamaan tungo sa katarungan at kapayapaan. 

Huwag rin po nating kalimutan, si Kristo ay naging biktima ng di-makatarungang pagpaslang. Hindi makatarungan ang ginawang pagpaslang o pagpatay sa Kanya. Pinatay Siya dahil sa inggit ng Kanyang mga kaaway sa Kanya. Inggit lamang ang nag-udyok sa mga kaaway ni Kristo upang ipasakdal Siya kay Pilato. Hindi naman napatunayan ng mga kaaway ni Kristo ang mga ipinaratang nila laban sa Kanya. Wala silang sapat at kunkretong ebidensya laban kay Hesus. Noong tinanong sila ni Poncio Pilato nang paulit-ulit, "Bakit? Ano ba ang kasalanan Niya?", wala silang naisagot. Bagkus, ang sigaw ng mga tao, "Ipako Siya sa krus!" Hindi nila sinagot ang tanong ni Pilato. Bagkus, ang hiling ng taong-bayan kay Poncio Pilato ay ang kamatayan ni Hesukristo sa krus. 

Ang pagpatay ay hindi tama at hindi makatarungan, kahit kailan, anuman ang layunin nito. Hindi tayo ang nagmamay-ari ng buhay. Mga katiwala lamang tayo ng biyayang ito. Ang tunay na may-ari ng buhay ay ang Panginoon. Siya lamang ang may kapangyarihang bawiin ang ating mga buhay. Isang krimen, kasalanan, sa mata ng Diyos ang pagpatay sa kapwa-tao. Tayo ay nagkakasala sa paningin ng Diyos kapag pumatay tayo ng kapwa sa iba't ibang pamamaraan. Kahit gumawa sila ng masama laban sa atin, hindi pa rin tama ang pumatay ng kapwa. 

ITIGIL ANG MGA DI-MAKATARUNGANG PAGPASLANG! 
HUWAG KANG PAPATAY! 

MAGPAKUMBABA AT MAGLINGKOD KATULAD NI HESUS

25 Hulyo 2016 
Kapistahan ng Apostol Santiago 
2 Corinto 4, 7-15/Salmo 125/Mateo 20, 20-28 



Nitong mga nakaraang linggo, natunghayan natin ang Princess for a Week sa telerseryeng Born For You. Nabunot ni Kevin (Elmo Magalona) ang pangalan ni Sam (Janella Salvador). Noong inanunsyo na ni Kevin ang nanalo bilang kanyang Princess for a Week, nagulat siya sapagkat hindi niya inaasahang sasali si Sam sa contest na ito. Kilala niya si Sam bilang dati niyang road manager (RM). Si Sam ay nag-resign bilang RM dahil hindi niya kinaya si Kevin. Noong nalaman ni Sam na siya ang nanalo sa contest na iyon, bagamat siya'y nagulat rin noong una, siya'y natuwa. Balak kasi niyang turuan ng leksyon si Kevin tungkol sa pagsisilbi sa iba. 

Sa Ebanghelyo, tinanggihan ni Hesus ang kahilingan ng ina nina Apostol Santiago at San Juan. Muli Niyang tinuruan ang mga alagad tungkol sa pagpapakumbaba at paglilingkod. Ito'y matapos magalit ang ibang mga alagad nang marinig nila ang kahilingan ng ina nina Santiago at San Juan Apostol. Sinabi ng Panginoong Hesus, "Ang sinuman sa inyo na ibig maging dakila ay dapat maging lingkod." (20, 26b) 

Noong pumarito ang Panginoong Hesukristo, hindi Niya hinangad na pagsilbihan Siya ng mga tao. Hindi dumating ang Panginoong Hesus sa sanlibutan taglay ang Kanyang pagka-Diyos at pagka-Mesiyas. Bagkus, katulad ng sinabi ni Apostol San Pablo sa kanyang sulat sa mga taga-Filipos, "Hinubad Niya ang Kanyang pagka-Diyos, nagkatawang-tao at namuhay tulad ng isang alipin." (2, 7) Tinanggap at niyakap ni Hesus ang ating pagkatao. Ipinakita Niya na Siya'y kaisa at karamay natin. Ipinakita ni Hesus na Siya ay kapiling at kasama natin, bilang mga lingkod. Sa pamamagitan ng Kanyang pagkakatawang-tao, ipinakita ni Hesus kung paano magpakumbaba at maglingkod. Sabi nga ni Hesus sa wakas ng Ebanghelyo, "Ang Anak ng Tao ay naparito, hindi upang paglingkuran, kundi upang maglingkod at ialay ang Kanyang buhay para sa katubusan ng nakakarami." (20, 28)

Ang bawat Kristiyano ay tinatawag upang maging tagasunod ni Hesus. Ang bawat sumusunod kay Hesus ay dapat tumulad sa Kanya. Tinatawag tayong tularan ang halimbawa ni Hesus. Binigyan tayo ni Hesus ng isang halimbawang dapat tularan - ang magpakumbaba at maglingkod. Hinubad ng Panginoong Hesus ang mga katangian ng pagka-Diyos, nagkatawang-tao at namuhay bilang alipin. Tinanggap at niyakap ni Hesus ang ating pagkatao at mga kahirapan. Tinanggap ni Hesus ang pagiging lingkod sa paningin ng Diyos at ng tao. Si Hesus ay naglingkod at sumunod sa kalooban ng Ama habambuhay hanggang sa Kanyang kamatayan sa krus. Dahil Siya'y naging lingkod at masunurin habang namumuhay sa lupa, ang Panginoong Hesus ay itinaas at itinampok ng Ama. 

Tularan natin si Hesus. Maging mapagpakumbaba tayo katulad Niya. Maglingkod din tayo katulad Niya. Magpakumbaba at maglingkod, katulad ni Hesus. 

Linggo, Hulyo 24, 2016

ANG DIYOS AY ISANG MAAWAING AMA

24 Hulyo 2016 
Ika-17 Linggo sa Karaniwang Panahon (B) 
Genesis 18, 20-32/Salmo 137/Colosas 2, 12-14/Lucas 11, 1-13 



Ang mga Pagbasa ngayon ay tungkol sa pagiging maawain ng Diyos. Bilang ating Ama sa langit, ang Diyos ay maawain at mahabagin sa atin. Pinakikinggan Niya ang ating mga panalangin sa Kanya. Hindi nagbibingi-bingihan ang Diyos. Hindi Niya tinatakpan ang Kanyang tainga. Bagkus, pinakikinggan Niya ang ating mga panalangin at kahilingan sa Kanya. Lagi Siyang handang makinig sa atin. Handa rin Siyang tumugon sa ating mga panalangin. Tumutugon ang Diyos sa ating mga panalangin sa pamamagitan ng pagkakaloob ng mga bagay na nakakabuti sa atin. Ipinagkakaloob Niya sa atin ang ating mga panangailangan. Sabi nga sa Salmo ngayon, "Noong ako ay tumawag, tugon Mo'y aking tinanggap." 

Sa Unang Pagbasa, buong pagsusumamong nanalangin si Abraham sa Diyos para sa mga bayan ng Sodoma at Gomorra. Nanalangin si Abraham para sa kaligtasan ng mga mabubuting tao na nakatira sa dalawang bayang iyon, kabilang na rito ang kanyang kamag-anak na si Lot. Dahil sa paulit-ulit na pananalangin ni Abraham sa Diyos, nangako ang Diyos na hindi Niya lilipulin ang mga bayan ng Sodoma at Gomorra alang-alang sa mga mabubuting taong nakatira roon. Hindi lilipulin ng Diyos ang dalawang lungsod ng Sodoma at Gomorra kung makakahanap Siya ng limampu, apatnapu't lima, apatnapu, tatlumpu, dalawampu, o kahit sampung mabubuting tao na nakatira roon. Handa Niyang isantabi ang Kanyang planong paglipol sa mga bayan ng Sodoma at Gomorra alang-alang sa mga iyon.

Inilahad ni Apostol San Pablo sa Ikalawang Pagbasa ang dahilan kung paanong nagkaroon ng kapatawaran para sa mga kasalanan ng tao. Ipinagkaloob ng Diyos ang Kanyang Bugtong na Anak na si Hesukristo upang ialay ang Kanyang buhay sa krus para sa ikapagpapatawad ng mga kasalanan. Dahil sa Awa at Habag ng Diyos, ipinagkaloob Niya si Kristo Hesus upang magkaroon ng kapatawaran para sa mga kasalanan ng sangkatauhan. Sa pamamagitan ng paghahain ni Hesus sa krus, nagkaroon ng kapatawaran ang mga kasalanan ng sangkatauhan. 

Sa Ebanghelyo, si Hesus ay nagturo tungkol sa panalangin. Sa Kanyang pagtuturo tungkol sa pananalangin sa Diyos, isinalarawan ni Hesus ang pagiging maawaing ama ng Diyos. Ipagkakaloob ng Diyos sa atin ang anumang hilingin natin. Hindi Niya ipagkakait sa atin ang anumang hilingin natin sa Kanya, kung ito ay para sa ating kabutihan. Lumapit tayo sa Diyos upang manalangin at humingi sa Kanya. Hindi Niya sasalungatin o ipagkakait ang sinumang lumapit sa Kanya nang may buong pagtitiwala at kapakumbabaan upang manalangin at humingi sa Kanya. Pakikinggan at pagbibigyan ng Diyos ang ating mga panalangin at kahilingan sa Kanya dahil sa Kanyang Awa at Habag para sa ating lahat. 

Ang Diyos ay isang maawaing ama. Huwag tayong matakot na lumapit sa Diyos upang manalangin at humiling sa Kanya. Hindi Niya sinasalungat ang sinumang lumalapit sa Kanya upang manalangin at humiling sa Kanya. Hindi tinatakpan ng Diyos ang Kanyang tainga sa bawat nananalangin at humihiling sa Kanya. Laging bukas ang tainga ng Diyos. Laging handang makinig ang Diyos sa mga panalangin at kahilingan ng mga taong buong pusong tumatawag sa Kanya. Bilang tugon sa ating mga panalangin, ipinagkakaloob sa atin ng Diyos ang ating mga kahilingan at pangangailangan. Hindi sinasalungat ng Diyos ang ating mga panalangin sa Kanya. Bagkus, pinapakinggan Niya ang ating mga panalangin at ipinagkakaloob sa atin ang ating mga kahilingan at pangangailangan. 

Biyernes, Hulyo 22, 2016

SANTA MARIA MAGDALENA: SUMAKSI SA AWA NG DIYOS DAHIL SA KANYANG NARANASAN

22 Hulyo 2016
Kapistahan ni Santa Maria Magdalena 
Awit ni Solomon 3, 1-4a (o kaya: 2 Corinto 5, 14-17)/Salmo 62/Juan 20, 1-2. 11-18 



Sa Panalangin ni Papa Francisco para sa Hubileyo ng Awa, mapapakinggan natin ang mga katagang ito, "Ang Iyong masintahing pagtingin ang nagpalaya kay Zakeo at Mateo sa pagkagumon sa salapi; sa babaeng nangangalunya at kay Magdalena sa paghahangad ng ligaya sa mga bagay na makalupa lamang." Katulad ng ibang mga santo't santa ng Simbahan, hindi naging maganda ang nakaraan ni Santa Maria Magdalena. Subalit, nagbago ang kanyang buhay noong maranasan niya ang Banal na Awa ng Diyos sa pamamagitan ng Panginoong Hesukristo, ang Mukha ng Awa at Habag ng Ama. 

Unang naranasan ni Santa Maria Magdalena ang nakaliligtas na Awa at Habag ng Diyos noong pinalayas sa kanya ang pitong demonyo (Lucas 8, 2). Pinalayas ni Hesus mula sa kanya ang pitong demonyo. Sinapian si Maria Magdalena ng pitong demonyo. Dahil sa Awa at Habag ni Hesus, pinalayas Niya ang pitong demonyo sumasanib kay Maria Magdalena. At mula sa pagiging isang babaeng sinasapian ng masasamang espiritu, si Santa Maria Magdalena ay naging isang tagasunod ni Hesus at saksi ng Awa ng Diyos. Sa pamamagitan ni Hesus, nasaksihan ni Maria Magdalena kung paano kumilos ang Awa at Habag ng Diyos. 

Isa rin si Santa Maria Magdalena sa mga babaeng nakasaksi sa kamatayan ni Hesus sa krus. Nandoon siya sa Kalbaryo kasama ng Mahal na Birheng Maria at ng alagad na minamahal ni Hesus na si San Juan. Nandoon siya kasama nilang tumatangis sa pagkamatay ng Panginoong Hesus sa krus. Kahit masakit para sa kanila ang pagsaksi sa kamatayan ng Panginoong Hesukristo, sinamahan pa rin nila Siya. Sinamahan pa rin ng Mahal na Birheng Maria, ni San Juan Apostol, ni Santa Maria Magdalena, at ng iba pang mga banal na kababaihan ang Panginoong Hesus hanggang sa Kanyang kamatayan sa krus. 

Naranasan muli ni Santa Maria Magdalena ang Awa at Habag ng Panginoon noong nagpakita sa kanya ang Panginoong Muling Nabuhay. Labis ang pananangis ni Maria Magdalena sa labas ng libingan ni Hesus. Nanangis siya sapagkat nawala ang bangkay ng Panginoon. Hinangad ni Santa Maria Magdalena na makita ang Panginoon. Nagpakita nga si Hesus na muling nabuhay kay Maria Magdalena, subalit hindi Siya nakilala agad ni Maria Magdalena. Inakala ni Maria Magdalena na isang tagapag-alaga ng halamanan ang lalaking kinakausap niya, at hindi si Hesus. Subalit, nang batiin ng Panginoong Hesus si Santa Maria Magdalena, ang kanyang pagtangis ay naging kagalakan. Pinawi ni Hesus na muling nabuhay ang pananangis ni Maria Magdalena. Matapos pawiin ni Hesus ang pagtangis ni Maria Magdalena, isinugo siya ng Panginoon upang ibalita sa mga apostol ang Mabuting Balita tungkol sa Muling Pagkabuhay ni Kristo. Dahil doon, kilala rin si Santa Maria Magdalena sa bansag na "Apostol ng mga Apostol." 

Katulad ni Santa Maria Magdalena, marami tayong mga kahinaan at kasalanan na umaalipin sa atin. Subalit, hindi pa huli ang lahat. Nandiyan ang Diyos upang palayain tayo mula sa mga umaalipin sa atin. Nais ng Diyos na makapamuhay tayo nang malaya. Nais tayong palayain ng Panginoon mula sa mga umaapi at umaalipin sa atin dahil sa Kanyang Awa at Habag para sa atin. At dahil sa Awa at Habag ng Panginoon para sa atin, papatnubayan at aakayin Niya tayo sa landas patungo sa kalayaan. Tinatawag tayong lahat ng Panginoon na sumunod sa Kanya upang makapamuhay tayo nang may kalayaan sa piling Niya. 

Inaanyayahan rin tayong maging mga saksi ng Panginoong Hesus, ang Mukha ng Awa at Habag ng Ama, katulad ni Santa Maria Magdalena. Mayroong mahalagang misyong ibinibigay sa atin ng Panginoon. Inaanyayahan tayong ng Panginoon na ipalaganap sa iba't ibang dako ng daigdig ang Mabuting Balita tungkol sa Awa ng Diyos. Inaanyayahan tayong magpatotoo tungkol sa Awa ng Diyos na ipinamalas sa pamamagitan ng Panginoong Hesukristo. Nais ng Panginoon na makilala Siya bilang isang maawaing Panginoon na nagliligtas at tumutubos sa lahat. Tayo ang magpapatotoo tungkol sa Awa at Habag ng Panginoon na nakaliligtas. 

Katulad ni Santa Maria Magdalena, tayong lahat ay tinatawag at hinihirang ng Panginoon upang maging mga saksi ng Kanyang Awa, sa kabila ng mga kahinaan at pagkakasala natin. Inaanyayahan tayong lahat ng Panginoon na sumunod sa Kanya sa landas patungo sa tunay na kalayaan sa Kanyang piling. Isinusugo din tayo ni Kristo upang magpatotoo at sumaksi sa Kanyang makapangyarihang Awa at Habag na nagligtas at nagpalaya sa ating lahat. Naranasan natin ang Awa at Habag ng Panginoon sa ating buhay, ibahagi natin sa ating kapwa ang Mabuting Balita tungkol sa Awa at Habag ng Panginoon. 

Linggo, Hulyo 17, 2016

PAGTANGGAP SA PANGINOON

17 Hulyo 2016
Ika-16 na Linggo sa Karaniwang Panahon (B) 
Genesis 18, 1-10a/Salmo 14/Colosas 1, 24-28/Lucas 10, 38-42 



Bahagi ng ating kultura bilang Pilipino ay ang ating pagtanggap sa mga bisita. Kilala tayong mga Pilipino sa ating magiliw na pagtanggap sa mga bumibisita sa atin. Tunay nga pong tinatanggap natin ang bawat taong bumibisita sa atin nang may buong kagiliwan. Hindi po ba, kapag nababalitaan nating may bibisita sa atin, naghahanda na po tayo para sa kanilang pagdalaw? Bago dumating ang ating (mga) bisita, nililinis natin ang bahay, naghahanda na po tayo ng pagkain, atbp. Kapag dumating na ang (mga) bisita natin, tayo'y nakikipagkwentuhan sa kanila, nagkakainan, at marami pang iba. Iba talaga tayong mga Pinoy!

Ang mga Pagbasa ngayong Linggo ay tungkol sa iba't ibang uri ng pagtanggap sa Panginoon. Sa Unang Pagbasa, tatlong estranghero ang tinanggap at pinatuloy ni Abraham sa kanyang tolda. Sa Ikalawang Pagbasa, tinanggap ni Apostol San Pablo ang maraming hirap na kalakip ng kanyang misyon bilang apostol ni Kristo sa mga Hentil. Sa pamamagitan ng pagtanggap sa maraming hirap at pagdurusa na kalakip ng kanyang misyon bilang apostol, ipinakita ni San Pablo Apostol ang kanyang buong pusong pagtanggap sa Panginoon. Sa Ebanghelyo, tinanggap ang Panginoong Hesus ng magkakapatid na sina Marta at Maria sa kanilang tahanan. 

Sa Unang Pagbasa, tatlong misteryosong lalaki ang tinanggap at pinatuloy ni Abraham sa kanyang tolda. Bagamat mga estranghero ang tatlong lalaking ito sa mga mata ni Abraham, tinanggap pa rin niya ang mga ito bilang kanyang mga bisita. Inaanyayahan ni Abraham ang tatlong misteryosong ito na tumuloy sa kanyang tolda. Pinaglingkuran ni Abraham ang kanyang tatlong bisita. Naghanda siya ng pagkain para sa kanila, kumuha siya ng tubig na panghugas sa kanilang mga tubig, at marami pang iba. Ginawa ni Abraham ang lahat ng iyon upang makapagpahinga at mapanauli ang lakas ng tatlong manlalakbay na ito. 

Ipinahayag ni Apostol San Pablo sa Ikalawang Pagbasa na siya'y nagagalak, kahit nagtitiis siya ng maraming hirap na kalakip ng kanyang misyon bilang apostol ni Kristo sa mga Hentil. Nagagalak siya sapagkat tinitiis niya ang lahat ng ito alang-alang kay Kristo at sa Simbahan. Kagalakan ang naghahari sa puso at kalooban ni San Pablo Apostol, kahit alam niyang marami pang hirap na naghihintay para sa kanya. Dahil sa kagalakang ito, buong puso niyang tinanggap ang bawat hirap na kalakip ng kanyang misyon bilang apostol. Sa pamamagitan ng pagtanggap sa bawat hirap at pagdurusa na kalakip ng kanyang misyon, tinatanggap ni Apostol San Pablo ang kalooban ng Panginoon para sa kanya. Tinatanggap ni Apostol San Pablo ang Panginoon sa pamamagitan ng pagtanggap sa Kanyang kalooban. 

Sa Ebanghelyo, ang Panginoong Hesukristo ay tinanggap ng magkakapatid na sina Marta at Maria sa kanilang tahanan. Sina Santa Marta at Maria ang mga kapatid ni San Lazaro, ang muling binuhay ni Hesus (Juan 11, 1-45). Katulad ni Abraham sa Unang Pagbasa, pinagsilbihan ni Marta si Hesus. Naghanda siya ng pagkain at inumin, tubig para sa paa ni Hesus, at marami pang iba. Samantalang inaasikaso ni Santa Marta ang handaan, nakikinig naman si Santa Maria kay Hesus. Umupo si Maria sa paanan ni Hesus, at pinakinggan ang Kanyang mga itinuturo. 

Magkaiba ang magkapatid sa paraan ng kanilang pagtanggap sa Panginoon. Ang isa'y nag-asikaso ng handaan, at ang isa nama'y naupo at nakinig sa mga sinasabi at itinuturo ng Panginoon. Bagamat magkaiba ang pamamaraan ng pagtanggap ng magkapatid sa Panginoon, pareho silang tama. Kung tutuusin, parehong tama sila Marta at Maria. Kailangang paglingkuran at pakinggan ang Panginoon. Subalit, may isang pagkakamali si Marta - sinubukan niyang hiwalayin ang paglilingkod at ang pakikinig sa Panginoon. Hindi maaaring paghiwalayin ang dalawang bagay na ito. Magkaugnay ang pakikinig at paglilingkod sa Panginoon. Malaki ang ugnayan ng dalawang ito. Hindi mapuputol ang ugnayan na ito, kahit kailan. 

Ang tinig ng Panginoon ang pumupukaw sa atin na paglingkuran Siya. Ito ang ugnayan ng pakikinig at paglingkod sa Panginoon. Kailangang nating pakinggan at dinggin ang tinig ng Panginoon upang mapukaw ang ating mga puso at kalooban na paglingkuran Siya. Mababagabag ang ating mga puso't kalooban kapag wala tayong nagawa para sa Panginoon. Hindi mapapakali ang mga puso't kalooban natin hangga't mayroon tayong nagawa para sa ating Panginoon. 

Paano nating mapaglilingkuran ang Panginoon? Sa pamamagitan ng paglilingkod sa kapwa. Tandaan natin ang sinabi ni Hesus, "Anuman ang ginawa ninyo sa isa sa mga pinakahamak na kapatid Kong ito, ito'y sa Akin ninyo ginawa." (Mateo 25, 40) Kapag tayo'y naglingkod at nagmalasakit sa kapwa, lalung-lalo sa mga dukha, ginagawa natin iyon para kay Hesus. Ang bawat paglilingkod at pagmamalasakit na ginagawa natin para sa kapwa ay ginagawa natin para sa Panginoong Hesus. 

Sabi nga sa awiting Hesus na aking kapatid

Hesus na aking kapatid, 
sa lupa nami'y bumalik. 
Iyong Mukha'y ibang-iba, 
hindi Kita nakikilala. 

Tulutan Mo aking mata, 
mamulat sa katotohanan.
Ikaw Poon makikilala 
sa taong mapagkumbaba. 

Ang Panginoon ay nasa piling natin. Subalit, hindi lamang Siya matatagpuan sa Simbahan. Matatagpuan natin Siya sa mga lugar sa labas ng Simbahan. Saan nating matatagpuan ang Panginoon? Sa mga lansangan, sa mga kaiskwateran, at marami pang ibang lugar kung saan laganap ang karukhaan. Katulad ng tatlong bisita ni Abraham sa Unang Pagbasa, si Hesus ay nagpapakita sa atin bilang isang estranghero. Ibang-iba ang mukha ni Hesus. Ang Mukha ni Hesus ay hindi katulad ng isinasalarawan natin sa ating isipan. Hindi ipinapakita sa atin ni Hesus ang Kanyang Mukhang puspos ng kadakilaan. Bagkus, ang mukhang ipinakita sa atin ni Hesus ay ang mukhang punung-puno ng karukhaan at pagdurusa. 

Tayong lahat ay tinatawag ng Panginoon na paglingkuran Siya. Nasa atin ang desisyong paglingkuran Siya. Tayo ang magpapasiya kung diringgin natin ang Kanyang pagtawag sa atin. Tayo ang magpapasiya kung paglilingkuran natin ang Panginoon. Subalit, sa ating pagpapasiya, alalahanin natin na tinatanggap natin ang Panginoon kung tayo ay makikinig at maglilingkod sa Kanya. Ipinapakita natin ang ating pagtanggap sa Panginoon sa pamamagitan ng pakikinig at paglilingkod sa Kanya, na nasa piling ng mga kapatid nating maralita. 

Mga tanong sa pagninilay: 
1.) Paano ba ako tumutugon sa tawag ng Panginoon na paglingkuran Siya? 
2.) Paano ko ba isinasalarawan ang Mukha ni Hesus? 
3.) Tatanggapin at paglilingkuran ko pa rin ba ang Panginoong Hesus, kahit na ang Kanyang Mukha ay ibang-iba sa aking pagsasalarawan nito?

Biyernes, Hulyo 15, 2016

LAGING MAGTATAGUMPAY ANG KABUTIHAN LABAN SA KASAMAAN

16 Hulyo 2016
Sabado ng Ika-15 Linggo sa Karaniwang Panahon (II)
Mahal na Birheng Maria ng Bundok del Carmen 
Mikas 2, 1-5/Salmo 9/Mateo 12, 14-21 


Ipinagdiriwang natin sa araw na ito ang Kapistahan ng Mahal na Birheng Maria ng Bundok del Carmen, ang pintakasi ng Ordeng Carmelita.  Ayon sa tradisyon, ang debosyon sa Mahal na Ina ng Bundok del Carmen ay nagsimula noong ika-13 siglo. Nagpakita ang Mahal na Birhen sa isang kasapi ng Ordeng Carmelitana na si San Simon Stock nang minsan siyang nanalangin. Noong nagpakita ang Mahal na Ina kay San Simon Stock, ibinigay niya ang eskapularyo kay San Simon Stock. Ang Mahal na Birheng Maria ay nangako kay San Simon Stock na magkakaroon ng kaligtasan mula sa walang hanggang apoy ng impiyerno ang sinumang sumusuot ng Eskapularyo. Ang Eskapularyo ay magsisilbing sanggalang ng mga sumusuot nito sa mga sandali ng panganib, lalo na sa oras ng kamatayan. 

Mukhang mahirap unawain, pagnilayan, at iugnay ang mga Pagbasa ngayon, sa unang tingin. Ang Unang Pagbasa ay tungkol sa pagpaparusa ng Diyos sa mga masasamang tao. Ang Ebanghelyo naman ay tungkol sa kabutihang ginagawa ni Hesus para sa mga maysakit at may karamdaman. Subalit, sa ating pagninilay at pagsusuri sa mga Pagbasa ngayon, matutuklasan natin na iisa lamang ang tema ng mga Pagbasa ngayon. Iisa lamang ang nais isalarawan at ipahiwatig ang mga Pagbasa sa Misa ngayong araw na ito. 

Sa Unang Pagbasa, ipinahayag ng Panginoong Diyos sa pamamagitan ni propeta Mikas na parurusahan at susumpain Niya ang mga nagbabalak na gumawa ng masama. Hindi sila makikinabang mula sa Panginoon. Parurusahan sila ng Diyos dahil sa kasamaang ginagawa nila. Wala silang mapapakinabangan o mamanahin mula sa Panginoon. Walang tatanggaping pagpapala o biyaya mula sa Panginoon ang mga masasamang taong ito dahil sa kanilang mga masasamang gawain. 

Sa Ebanghelyo, pinagaling ng Panginoong Hesus ang maraming maysakit. Sa pamamagitan nito, ipinapakita ni Hesus ang Kanyang Awa at Habag sa kanila. Nais ni Hesus na palayain ang mga taong ito mula sa mga sakit at karamdaman na umaalipin sa kanila. Bagamat nagbabanta ang mga Pariseo laban kay Hesus, patuloy pa rin Niyang ipinapakita ang Kanyang Awa sa mga nangangailangan nito. Para kay Hesus, ang pagbabanta ng mga Pariseo laban sa Kanya ay hindi sapat na dahilan upang itigil ang paggawa ng mabuti para sa tao. Patuloy Siyang gagawa ng kabutihan upang ipakita sa tao ang Kanyang Awa at Habag. 

Ipinapakita at ipinahihiwatig ng mga Pagbasa ngayon ang tagumpay ng kabutihan laban sa kasamaan. Hinding-hindi mananaig ang kasamaan laban sa kabutihan. Laging magtatagumpay ang kabutihan laban sa kasamaan. Mas makapangyarihan ang kabutihan laban sa kasamaan. Kabutihan ang sandata at panlaban ng Diyos laban sa kasamaan. Nilalabanan ng Diyos ang kasamaan sa pamamagitan ng pagpapakita ng kabutihan. Sa kahuli-huliha'y magtatagumpay ang kabutihan at Awa ng Diyos laban sa kapangyarihan ng kasamaan. 

Ang Eskapularyo ay tanda ng kabutihang ipinakita ng Diyos sa pamamagitan ng Mahal na Ina. Ibinigay ng Mahal na Birheng Maria kay San Simon Stock ang Eskapularyo upang maging sandata ng mga mananampalataya na nagsusuot nito laban sa kasamaan, lalo na sa oras ng kamatayan. Mararamdaman ng bawat tapat na mananampalatayang sumuot nito ang kapangyarihan ng kabutihan at Awa ng Diyos. Sila'y ipagsasanggalang ng Panginoon sa tulong ng mga panalangin ng Mahal na Ina sa oras ng matinding panganib, lalo na sa oras ng kamatayan. 

Subalit, tandaan po natin, ang pagsusuot ng Eskapularyo ay hindi dahilan upang hindi magkumpisal. Hinihikayat pa rin ng Simbahan ang lahat na magsisi at tumalikod sa kasalanan. Kinakailangan pa rin nating ikumpisal ang ating mga kasalanan, kahit isinusuot natin ang Eskapularyo ng Mahal na Birhen ng Bundok del Carmen. Ang tunay na deboto ng Mahal na Birhen ng Bundok del Carmen ay nangungumpisal pa rin, kahit sinusuot na niya ang Eskapularyo ng Mahal na Ina. 

Ipinagkaloob ng Mahal na Birheng Maria ang Eskapularyo kay San Simon Stock upang ipakita sa atin na laging magtatagumpay ang kabutihan laban sa kasamaan. Kailanma'y hindi mananaig ang kasamaan laban sa kabutihan. Laging mananaig ang kabutihan laban sa kasamaan. Sa pamamagitan ng Eskapularyo at ng iba pang mga sakramental, ipinapakita at ipinapadama ng Diyos ang Kanyang Awa at kabutihang-loob sa lahat sa tulong ng mga panalangin ng Mahal na Ina. 

Tanggapin mo, anak kong mahal, itong eskapularyo ng iyong orden. Ito ay isang katangi-tanging tanda ng kaligtasan, isang pananggalang sa sandali ng panganib at isang patotoo ng tanging biyaya at pag-iingat. (Mga salita ng Mahal na Birhen kay San Simon Stock, Talambuhay ng mga Santo Vol. 2: Hulyo-Disyembre)

Sabado, Hulyo 9, 2016

AWANG TINANGGAP, AWANG IBINAHAGI

10 Hulyo 2016 
Ika-15 Linggo sa Karaniwang Panahon (K) 
Deuteronomio 30, 10-14/Salmo 68 (o kaya: Salmo 18)/Colosas 1, 15-20/Lucas 10, 25-37 



Napapanahon ang Ebanghelyo ngayong Linggo sapagkat ang Simbahan ay nasa loob pa rin ng Banal na Taon ng Awa. Apat na buwan na lamang ang natitira para sa pagdiriwang ng Taon ng Awa. Magwawakas ang Hubileyo ng Awa sa Dakilang Kapistahan ni Kristong Hari (20 Nobyembre). Ang tema ng Banal na Taon ng Awa ay "Maawain tulad ng Ama." Hango po ito sa ika-6 na kabanata ng Ebanghelyo ni San Lucas kung saan sinabi ni Hesus, "Maging maawain kayo katulad ng inyong Amang nasa langit." (6, 36) Angkop na angkop ang Ebanghelyo ngayong Linggo sa tema ng Hubileyo ng Awa sapagkat itinuturo sa atin ng Panginoong Hesus kung paanong maging maawain at mahabagin katulad ng Ama. 

Isinalaysay ni Hesus ang talinghaga ng Mabuting Samaritano upang ilarawan ang Awa ng Diyos. Itinuturo sa atin ni Hesus na kung ang Diyos ay nagpakita ng Awa at Habag sa atin, dapat magpakita din tayo ng awa at habag sa ating kapwa. Bilang mga tagasunod ni Kristo, kailangan nating ibahagi ang Awa at Habag ng Diyos sa ating kapwa. Nagpakita ng Awa at Habag ang Diyos sa atin, ipakita naman natin ito sa iba. Dapat nating ibahagi ang Awa ng Diyos sa ating kapwa. Huwag nating ipagkait ang biyaya ng Awa ng Diyos sa ating kapwa, sapagkat hindi ipinagkait ng Diyos sa atin ang biyaya ng Kanyang Awa. 

Mula pa sa pasimula ng panahon, ang Diyos ay nagpakita ng Awa at Habag. Kahit nalugmok sa kasalanan ang sangkatauhan, patuloy na nagpakita ng Awa at Habag ang Diyos. Patuloy Niyang ipinapakita sa tanan ang Kanyang Awa. Gaano mang karami ang kasalanan ng sangkatauhan laban sa Kanya, gaano mang kabigat ang kasalanan ng bawat tao, ang Diyos ay hindi tumitigil sa pagpapamalas ng Awa at Habag sa lahat ng Kanyang mga nilalang. Ang kasalanan ay hindi hadlang para sa Diyos upang ipakita sa sangkatauhan ang Kanyang Awa at Habag. 

Isinalaysay ng mga manunulat ng Una at Ikalawang Pagbasa ang mga kahanga-hangang gawa ng Diyos na nagpapakita ng Kanyang Awa at Habag. Sa Unang Pagbasa, ipinahayag ni Moises na iniukit na ng Diyos ang Kautusan sa puso at isipan ng mga tao. Iniukit ng Diyos ang Kanyang mga batas sa puso at isipan ng mga tao upang masundan nila ang mga ito. Sa Ikalawang Pagbasa, isinalaysay ni Apostol San Pablo ang dahilan ng pagparito ng Panginoong Hesus sa sanlibutan. Si Hesus, ang Mukha ng Awa ng Ama, ay naparito upang ipagkasundo ang Diyos at ang sangkatauhan. Ipinakita ni Hesus ang Awa ng Diyos noong Siya'y ipinako at namatay sa krus. Ang Diyos ay nakipagkasundo sa tao dahil sa Kanyang Awa at Habag na Kanyang ipinakita sa pamamagitan ni Hesus. 

Ang Diyos ay hindi nagdamot noong ipinamalas at ipinadama Niya sa atin ang Kanyang Awa at Habag. Huwag nating ipagkait ang biyaya ng Awa ng Diyos sa kapwa. Kusang-loob na ipinakita at ipinagkaloob ng Diyos ang Kanyang Awa at Habag sa ating lahat. Kusang-loob naman nating ibahagi ang Awa ng Diyos sa kapwa. Kung ang mga manunulat ng Una at Ikalawang Pagbasa ay nagsalaysay tungkol sa mga ginawa ng Diyos upang maipakita Niya sa lahat ang Kanyang Awa at Habag, isinalaysay naman ni Hesus ang talinghaga ng Mabuting Samaritano upang ituro sa atin na dapat nating ipakita at ibahagi sa ating kapwa-tao ang mabiyaya at mapagpalang Awa ng Diyos. 

Isang napakagandang huwaran ng pagbabahagi ng Awa ng Diyos sa kapwa ay ang Mahal na Birheng Maria. Matapos tanggapin ang balita ng Arkanghel San Gabriel sa kanya, dumalaw ang Mahal na Ina sa kanyang kamag-anak na si Santa Isabel (Elisabet). Noong dumalaw si Maria kay Elisabet, ibinahagi niya ang Awa ng Diyos sa kanyang kamag-anak. Ibinahagi ng Mahal na Birhen sa kanyang kamag-anak ang kagalakan na kanyang naranasan noong tinanggap niya ang Awa ng Diyos sa kanyang buhay. Kahit dinadala niya si Hesus sa kanyang sinapupunan, naglakbay si Maria mula sa kanyang bahay sa Nazaret hanggang sa bahay nina Zacarias at Elisabet upang ibahagi ang mapagpala at mabiyayang Awa ng Diyos sa kanyang kamag-anak na nagdadalantao rin noong kapanahunang iyon. 

Hinahamon tayo ng Panginoong Hesukristo na ipakita at ibahagi sa kapwa ang Awa ng Diyos, ang pinagmumulan ng ating kagalakan. Tayo ay pinagpapala at binibiyayaan araw-araw dahil sa Awa ng Diyos. Hindi lamang ito para sa ating sarili; ito'y para sa lahat ng tao. Kaya, kailangan nating ibahagi ang mapagpala at mabiyayang Awa ng Diyos sa ating kapwa. Hindi ipinagdadamot o ipinagkakait ng Diyos ang Kanyang Awa at Habag sa ating lahat. Huwag rin po nating ipagdamot o ipagkait ang Awa at Habag ng Diyos sa ating kapwa-tao. Huwag tayo mandamot, sapagkat hindi nandadamot ang Diyos. Patuloy nawa po tayong maging maawain at mahabagin katulad ng Amang nasa langit, hindi lamang po ngayong Hubileyo ng Awa, kundi sa bawat sandali ng ating buhay. 

Linggo, Hulyo 3, 2016

MGA KALOOB NG MAAWAING PANGINOON

3 Hulyo 2016 
Ika-14 na Linggo sa Karaniwang Panahon (K) 
Isaias 66, 10-14k/Salmo 65/Galacia 6, 14-18/Lucas 10, 1-12. 17-20 



Ang mga Pagbasa ay tungkol sa mabiyayang Awa ng Panginoon. Maraming mga biyaya ang ipinagkakaloob ng Panginoong Diyos dahil sa Kanyang Awa. Kung pagmamasdan natin ang ating daigdig, marami sa mga nakikita natin ay mga kaloob ng maawaing Panginoon. Nilikha ng Diyos ang lahat dito sa daigdig dahil sa Kanyang Awa. Nilikha Niya ang lahat, katulad ng hangin, araw, buwan, tubig, mga puno, mga damuhan, mga bulaklak at marami pang iba. Ang ating daigdig ay isang napakalaking biyaya na kaloob ng Awa ng Diyos. Kahanga-hanga ang mga nilikha ng Panginoong Diyos. Kahanga-hanga ang Awa ng Diyos. 

Ipinagkakaloob din ng Panginoong Diyos ang ating mga pangangailangan. Alam ng Panginoon kung ano ang mga kailangan natin sa ating mga pang-araw-araw na buhay. Halimbawa, pinagkakalooban tayo ng Diyos ng pagkain at inumin para sa ating kalusugan. Nalalaman ng Panginoon kung ano ang mahalaga para sa atin. Nababatid ng Panginoon kung ano ang mga ikabubuti sa atin. At dahil sa Kanyang Banal na Awa, patuloy na ipinagkakaloob sa atin ng Panginoong Diyos ang ating mga pangangailangan sa ating pang-araw-araw na buhay. 

Sa Unang Pagbasa, nagsalita ang Panginoon sa Kanyang bayan sa pamamagitan ni propeta Isaias. Ang sabi ng Panginoong Diyos, kapayapaan at kaunlaran ang ipagkakaloob Niya sa Kanyang bayan. Magiging mapayapa at maunlad muli ang bayan ng Diyos. Sa Kanya magmumula ang tunay na kapayapaan at kaunlaran. Ang pagpapalang ito mula sa Panginoon ay magdudulot ng matinding kagalakan para sa lahat na kabilang sa Kanyang bayan. 

Sinabi ni Apostol San Pablo sa Ikalawang Pagbasa na ang krus ng Panginoong Hesukristo ang kanyang ipinagmamalaki at ipinagmamapuri. Kaligtasan ang ipinagkaloob ng Panginoong Hesus sa pamamagitan ng Kanyang paghahain ng sariling buhay sa krus. Si Hesus ang pinakamahalaga at ang pinakadakilang biyayang kaloob ng Diyos sapagkat si Hesus ang nagkamit ng kaligtasan para sa lahat. Nagkaroon ng kaligtasan ang sangkatauhan sa pamamagitan ni Hesus. Sa pamamagitan ni Hesukristo, ipinakita ng Diyos sa sangkatauhan ang Kanyang Awa at Habag. Dahil sa Kanyang Awa, kaligtasan ang ipinagkaloob ng Diyos sa sangkatauhan. Ipinagkaloob ng Diyos ang biyaya ng kaligtasan sa sangkatauhan sa pamamagitan ni Hesus, ang Mukha ng Awa ng Ama. 

Sa Ebanghelyo, pitumpu't dalawang apostol ang hinirang at isinugo ng Panginoong Hesus sa iba't ibang bayan. Isinugo ng Panginoong Hesus ang pitumpu't dalawang apostoles upang ipalaganap ang Mabuting Balita. Ipapahayag ng mga apostol ang Mabuting Balita tungkol sa Awa ng Diyos. Nasaksihan ang mga Gawa ng Awa ng Diyos sa pamamagitan ni Hesus. Narinig ng mga apostol ang mga turo ni Hesus, at nasaksihan din nila ang Kanyang mga kahanga-hangang gawa. Sila naman ay magsisilbing mga saksi ni Kristo sa iba't ibang bayan sa lupaing iyon. 

Batid ng Panginoon kung ano ang kailangan nating lahat. Nalalaman ng Panginoon ang ating mga pangangailangan sa pang-araw-araw nating buhay. Anuman ang kailangan natin, alam ng Panginoon iyon. Dahil sa Kanyang Awa, ipinagkakaloob Niya sa atin ang ating mga pangangailangan. Kung walang awa ang Panginoon sa atin, hindi tayo mabubuhay ngayon. Kung hindi ipinakita ng Diyos ang Kanyang Awa sa atin sa pamamagitan ng pagkakaloob ng ating mga pangangailangan, wala tayo ngayon. Hindi tayo magkakaroon ng isang mapayapa at maunlad na buhay. Salamat sa Diyos dahil ipinagkakaloob Niya sa atin ang ating mga pang-araw-araw na pangangailangan. Salamat sa Diyos dahil ipinakita Niya sa ating lahat ang Kanyang Awa sa pamamagitan ng pagkakaloob ng ating mga pangangailangan. 

Ang Panginoon ay nagkakaloob ng ating mga pangangailangan araw-araw. Patuloy na ipinagkakaloob sa atin ng Panginoon ang mga kailangan natin. Nalalaman ng Panginoon kung ano ang ating mga mahahalagang pangangailangan. Alam Niya kung ano ang mahalaga para sa atin. Alam Niya kung ano ang nakakabuti para sa atin. Dahil sa Kanyang Awa sa atin, ipinagkakaloob ng Panginoon ang mga ito. Sa pagkakaloob ng ating mga pangangailangan, ipinapakita sa atin ng Panginoon ang Kanyang Awa na hinding-hindi magmamaliw.