28 Mayo 2017
Dakilang Kapistahan ng Pag-Akyat (A)
Mga Gawa 1, 1-11/Salmo 46/Efeso 1, 17-23/Mateo 28, 16-20
Apatnapung araw matapos ang Kanyang Muling Pagkabuhay, si Hesus ay umakyat sa langit. Ang Kanyang maluwalhating Pag-Akyat sa Langit ang hudyat na tapos na ang Kanyang tungkulin bilang Mesiyas at Tagapagligtas. Tinupad na ng Panginoon ang kalooban ng Ama. Ang Panginoong Hesus ay naghain ng buo Niyang buhay sa krus at muling nabuhay sa ikatlong araw upang iligtas ang sangkatauhan. Tinubos ng Panginoong Hesus ang sangkatauhan sa pamamagitan ng Kanyang kamatayan sa krus at ang Kanyang Muling Pagkabuhay sa ikatlong araw.
Bago umakyat ang Panginoong Hesukristo sa langit, isang mahalagang misyon ang Kanyang ipinagkatiwala sa mga disipulo. Ang misyong ipinagkatiwala ni Hesus sa mga apostol ay matatagpuan sa Unang Pagbasa at sa Ebanghelyo ngayon. Isinugo ni Hesus ang mga alagad sa iba't ibang dako ng daigdig upang maging mga saksi Niya (Mga Gawa 1, 8). Ituturo din ng mga alagad sa lahat ng tao ang lahat ng mga atas ng Panginoong Hesukristo (Mateo 28, 20). Ipapangaral nila sa lahat ng tao sa iba't ibang dako ng sanlibutan ang Mabuting Balita ng Panginoong Hesus.
Ito ang ginawa ng lahat ng mga apostol, katulad ni Apostol San Pablo sa Ikalawang Pagbasa. Si Apostol San Pablo ay nagpatotoo tungkol kay Kristo Hesus na namatay ngunit muling nabuhay; umakyat sa langit at naluluklok sa kanan ng Ama. Katulad ng ginawa ni Apostol San Pablo sa Ikalawang Pagbasa, buong sigla na nangaral ang mga apostol tungkol kay Kristo hanggang sa kanilang pagpanaw sa sanlibutang ito. Ang misyong ito na ibinigay ni Kristo sa mga apostol ay ipinagpapatuloy ng Inang Simbahan magpahanggang ngayon.
Tiyak na maraming mga pagsubok ang hinarap ng mga apostol at ng Simbahan sa pagpapalaganap ng Mabuting Balita ng Panginoong Hesukristo. Subalit, bakit ang Simbahan ay naririto pa rin at nakatayo? Bakit ipinagpapatuloy ng Simbahan ang pagsaksi at pagpapatotoo kay Kristo Hesus? Sapagkat ang Panginoon ay nagbitiw ng isang pangako sa mga alagad bago Siya lumisan sa mundong ito. Siya'y laging makakasama ng mga alagad hanggang sa katapusan ng sanlibutan (28, 20). Ang Panginoong Hesus ay hindi nagpapabaya. Kahit hindi Siya nakikita ng ating mga mata, Siya'y kasama pa rin natin. Laging sinasamahan ng Panginoong Hesus ang Kanyang Simbahan. Tinutulungan ng Panginoong Hesus ang Kanyang Simbahan upang maging matagumpay sa kanyang misyon.
Mayroon tayong Panginoong hindi nagpapabaya - si Kristo Hesus. Tayong lahat ay hindi pinapabayaan ng Panginoong Hesukristo na mamuhay na parang mga ulila. Lagi tayong sinasamahan at ginagabayan ni Hesus sa ating paglalakbay sa buhay, kahit na hindi Siya nakikita ng ating mga mata. Hindi nagpapabaya si Hesus. Ang Panginoong Hesus ay lagi nating kasama, kahit hindi natin Siya nakikita.
21 Mayo 2017
Ikaanim na Linggo ng Pasko ng Muling Pagkabuhay (A)
Mga Gawa 8, 5-8. 14-17/Salmo 65/1 Pedro 3, 15-18/Juan 14, 15-21
Sa Ebanghelyo, si Hesus ay nagsalita sa mga alagad tungkol sa Espiritu Santo. Ang mga alagad ay hindi mamumuhay tulad ng mga ulila sapagkat ang Patnubay - ang Espiritu Santo - ay lagi nilang makakasama. Mananahan sa puso ng mga apostoles ang Espiritu Santo. Makakapiling nila araw-araw ang Banal na Espiritu. Ang Banal na Espiritu ang tutulong sa mga apostol sa kanilang ministeryo pagdating ng araw ng paglisan ni Hesus sa sanlibutan. Ang buhay ng mga disipulo ay maninibago sa tulong ng Patnubay - ang Espiritu Santo.
Sa Kredong Niceno, inilarawan ang Espiritu Santo bilang tagapagbigay ng buhay. Panginoon at nagbibigay-buhay. Ang Espiritu Santo ang Pangalawang Persona ng Banal na Santatlo, ang iisang Diyos na bukal ng buhay. Sa Kanya nagmumula ang ating buhay at hininga. Tayong lahat ay binigyan ng Espiritu Santo ng hininga at buhay. Kung hindi dahil sa Espiritu Santo, wala tayong buhay at hininga ngayon.
Inilarawan ni Apostol San Pedro sa Ikalawang Pagbasa kung ano ang uri ng buhay ang kaloob ng Espiritu Santo. Ang buhay na kaloob ng Banal na Espiritu sa bawat isa ay ang buhay at pusong nakasentro kay Kristo. Ang biyaya ng buhay na kaloob ng Espiritu Santo sa lahat ay puno ng kalinisan at kabutihan. Ang buhay na bigay ng Banal na Espiritu ay nagdudulot ng kadalisayan ng budhi. Puno ng kabutihan, kalinisan, at kadalisayan ang buhay na kaloob ng Espiritu Santo sa bawat isa.
Ang biyaya ng buhay na ito'y ipinagkaloob ng Espiritu Santo sa mga Samaritanong tumanggap sa Salita ng Diyos sa Unang Pagbasa. Nilukuban ng Espiritu Santo ang mga Samaritanong tumanggap sa Mabuting Balita ng Panginoon na ipinangaral ng mga apostoles. Sa pamamagitan ng mga panalangin nina Apostol San Pedro at San Juan para sa kanila noong sila'y pumunta sa bayan ng Samaria, ang Espiritu Santo ay pumanaog sa mga Samaritano. Noong nilukuban ang mga Samaritano ng Banal na Espiritu, tinanggap nila ang bagong buhay na kaloob ng Espiritu. Isang bagong buhay na nakasentro kay Kristo Hesus na Panginoon at Tagapagligtas.
Patuloy tayong sinasamahan at tinutulungan ng Espiritu Santo, ang Patnubay na kaloob ng Panginoong Hesus. Ang Espiritu Santo ay ang Patnubay na nagbibigay-buhay. Ang buhay na kaloob ng Espiritu Santo ay puno ng kalinisan at kabutihan. Ang buhay na kaloob ng Espiritu Santo ay ang buhay na nakasentro kay Kristo. Sa pamamagitan ng bagong buhay na kaloob ng Espiritu Santo, ang atas ni Hesus sa Ebanghelyo ay masusunod at maisasabuhay natin. Ang atas ng Panginoong Hesus sa Ebanghelyo ngayong Linggo, "Kung iniibig ninyo Ako, tutuparin ninyo ang Aking mga utos." (14, 15). Maipapahayag natin ang ating pag-ibig para sa Panginoong Hesus; ang Kanyang mga utos ay ating matutupad sa tulong ng ating Patnubay na nagbibigay-buhay - ang Espiritu Santo.
14 Mayo 2017
Ikalimang Linggo ng Pasko ng Muling Pagkabuhay (A)
Mga Gawa 6, 1-7/Salmo 32/1 Pedro 2, 4-9/Juan 14, 1-12
Ang bukal ng pag-asa ay ang Panginoong Hesus na Muling Nabuhay. Si Hesus ay nagbigay ng bagong pag-asa sa pamamagitan ng Kanyang maluwalhating Muling Pagkabuhay. Ang lahat ng tao'y nagkaroon ng bagong pag-asa sa pamamagitan ni Kristong Muling Nabuhay. Ang pag-asang kaloob ng Panginoong Muling Nabuhay ay tunay. Ang Muling Pagkabuhay ni Hesus ay nagbibigay ng pag-asa sa lahat ng mga nananalig at sumasampalataya sa Kanya nang buong puso't kaluluwa.
Isang napakahalagang biyaya para sa ating lahat ang biyaya ng pag-asa. Ang pag-asa ay nagbibigay ng lakas ng loob sa bawat isa sa panahon ng pagsubok. Ang mga kagipitan ay matitiis natin nang buong katatagan ng loob dahil sa pag-asang bigay ng Panginoong Muling Nabuhay sa ating lahat. Magkakaroon ng kapanatagan ang ating mga kalooban sa mga oras ng kagipitan dahil sa pag-asang kaloob ni Hesus sa ating lahat sa pamamagitan ng krus at Muling Pagkabuhay.
Inilarawan ni Apostol San Pedro sa Ikalawang Pagbasa kung paanong ang Diyos ay nagbigay ng pag-asa sa lahat ng tao sa pamamagitan ng Panginoong Hesus. Bawat isa'y pinili't tinawag ng Diyos upang maging Kanya. Tinawag Niya ang lahat mula sa kadiliman patungo sa kaliwanagan. Ang lahat ng tao'y hindi na namumuhay sa kadiliman kundi sa kaliwanagan. Ginawa ito ng Diyos sa pamamagitan ng batong itinakwil na naging saligan na si Kristo Hesus.
Sa Ebanghelyo, pinalakas ni Hesus ang kalooban ng Kanyang mga apostoles. Ang mga alagad ay pinanghihinaan ng loob sapagkat nalalapit na ang oras ng pag-alis ni Hesus. Inihayag ng Panginoong Hesus sa Kanyang diskurso sa mga apostol na Siya ang Daan, ang Katotohanan, at ang Buhay. Nagbibigay ng pag-asa't lakas ng loob sa bawat isa ang Panginoong Hesus bilang daan, katotohanan, at buhay.
Ang Mabuting Balitang ito ang ipinapalaganap ng mga apostol sa Unang Pagbasa. Lumaganap ang Salita ng Diyos sa iba't ibang dako at dumami ang bilang ng mga nananalig at sumasampalataya kay Kristo Hesus. Marami ang sumampalataya sa daan, katotohanan, at buhay na si Hesus. Sa pamamagitan ng ministeryo ng mga apostoles, napakinggan ng maraming tao mula sa iba't ibang dako ang Mabuting Balita ng Panginoong Muling Nabuhay at sumampalataya sa Kanya.
Hinahamon tayong lahat bilang mga anak ng Muling Pagkabuhay na magpatotoo, sumaksi sa Panginoong Muling Nabuhay. Ipakilala natin si Kristo sa lahat bilang Daan, Katotohanan, at Buhay. Ipakilala si Kristo Hesus bilang tagabigay ng pag-asa. Magpatotoo tungkol sa kahanga-hangang gawa ng Diyos sa pamamagitan ni Kristong Muling Nabuhay.
Si Hesus ang Daan, Katotohanan, at Buhay. Siya ang tagabigay ng pag-asa. Hindi tayo mababalisa sa piling Niya. Hindi pagkabalisa ang idudulot Niya sa bawat isa kundi kapanatagan at katatagan ng loob. Mapapanatag tayo sa Kanyang piling.
7 Mayo 2017
Ikaapat na Linggo ng Pasko ng Muling Pagkabuhay (A)
Linggo ng Mabuting Pastol
Mga Gawa 2, 14a. 36-41/Salmo 22/1 Pedro 2, 20b-25/Juan 10, 1-10
Si Hesus ay ang Mabuting Pastol at ang bukal ng buhay. Siya ang Pinagmumulan ng buhay. Siya ang bukal ng buhay para sa Kanyang mga tupa. Binigyan Niya ng buhay ang lahat ng Kanyang mga tupa. Ang buhay na kaloob ng Mabuting Pastol na si Hesus sa Kanyang mga tupa ay isang buhay na ganap at kasiya-siya (Juan 10, 10). Iyan ang dahilan kung bakit si Hesus ay pumanaog sa sanlibutan - nang magkaroon ng buhay ang mga tupa sa Kanyang kawan sa pamamagitan Niya.
Paanong binigyan ng Panginoong Hesukristo ng isang buhay na ganap at kasiya-siya ang Kanyang mga tupa? Inilarawan ito sa Una at Ikalawang Pagbasa para sa Misa ngayong Linggo. Inihayag ng Unang Santo Papa ng Simbahan na si Apostol San Pedro sa Una at Ikalawang Pagbasa kung paanong ang mga tupa ni Kristo ay nagkaroon ng isang buhay na ganap at kasiya-siya sa pamamagitan Niya.
Inihayag nang malakas ni Apostol San Pedro sa Unang Pagbasa na ang Panginoon at Kristong ipinagkaloob ng Diyos sa lahat ng tao ay walang iba kundi si Hesus na ipinako sa krus. Si Hesus na pinatay sa krus ang ipinangakong Mesiyas na kaloob ng Diyos sa lahat. Muling nagsalita si Apostol San Pedro tungkol sa kamatayan at Muling Pagkabuhay ni Hesus sa Ikalawang Pagbasa. Tayong lahat ay tinipon muli ni Kristo at pinagkalooban ng buhay na ganap at kasiya-siya sa pamamagitan ng Kanyang kamatayan at Muling Pagkabuhay.
Batid ni Hesus kung ano ang mga kailangan ng mga tupa sa Kanyang kawan. Batid ni Hesus ang lahat ng mga pangangailangan ng Kanyang mga tupa. Alam ni Hesus na sanggalang ang kailangan ng Kanyang kawan. Alam ni Hesus na kaginhawahan ang kailangan ng Kanyang kawan. Alam ni Hesus isang buhay na ganap at kasiya-siya ang kailangan ng Kanyang kawan. Dahil diyan, ang Panginoong Hesukristo ay pumanaog sa lupa. Si Hesus ay pumarito sa lupa upang bigyan ng buhay na ganap at kasiya-siya ang Kanyang mga tupa sa pamamagitan ng Kanyang pagkamatay sa krus at Muling Pagkabuhay.
Si Hesus ang Mabuting Pastol. Hindi tayo makukulangan sa Panginoong Hesus na ating Mabuting Pastol. Sapat na ang mga biyayang kaloob Niya sa atin. Ang buhay na ganap at kasiya-siya na Kanyang kaloob ay sapat na. Hindi mapapantayan ang habag at kalinga ni Hesus na Mabuting Pastol. Bilang Mabuting Pastol, si Hesus ay nagbibigay ng buhay na ganap at kasiya-siya sa Kanyang kawan. Tayong lahat ay hindi magdarahop o makukulangan sapagkat si Kristo Hesus ang ating Mabuting Pastol na nagbibigay ng buhay na ganap at kasiya-siya.
Pastol ko'y Panginoong D'yos, hindi ako magdarahop. Aleluya!
