Huwebes, Hunyo 29, 2017

PANGINOONG NAGDUDULOT NG KATATAGAN NG LOOB

29 Hunyo 2017 
Dakilang Kapistahan nina Apostol San Pedro at San Pablo 
Mga Gawa 12, 1-11/Salmo 33/2 Timoteo 4, 6-8. 17-18/Mateo 16, 13-19


Isinalaysay sa Ebanghelyo para sa araw na ito kung paanong naging unang Santo Papa ng Simbahan si Apostol San Pedro. Noong nagninilay-nilay si Hesus kasama ang Kanyang mga disipulo sa Cesarea ng Filipos, tinanong Niya sila kung sino Siya sa mata ng ibang tao at kung sino Siya sa mga mata nila. Bilang sagot sa ikalawang tanong, inihayag ni Apostol San Pedro na si Hesus ay ang ipinangakong Mesiyas na ipagkakaloob ng Diyos sa Kanyang bayan. Dahil diyan, ibinigay ni Hesus kay Pedro ang mga susi sa kalangitan, ang sagisag ng kanyang authoridad bilang Santo Papa. 

Subalit, sa kabila ng paghirang sa kanya ng Panginoong Hesus bilang unang Santo Papa ng Simbahang Kanyang itinatag, hindi iyon nangangahulugang ligtas na siya mula sa mga pagsubok sa buhay. Maraming mga pagsubok ang hinarap ni Apostol San Pedro bilang Unang Santo Papa ng Santa Iglesia, at higit sa lahat, bilang isang apostol ni Kristo. Tulad na lamang ng kanyang hinarap at tiniis sa Unang Pagbasa. Hinarap ni Apostol San Pedro ang kalupitan ni Haring Herodes sa bawat kaanib ng Simbahan. Siya'y ipinadakip at ibinilanggo ni Haring Herodes. Binalak ni Herodes na iharap sa mga tao at patayin pagkatapos ng Paskuwa. Subalit, siya'y iniligtas ng Diyos. Sinugo ng Panginoon ang Kanyang anghel upang iligtas si Apostol San Pedro mula sa pag-uusig ni Haring Herodes. 

Naranasan rin ni Apostol San Pablo na masubukan ang kanyang pananampalataya kay Kristo. Pinagdaanan din ni Apostol San Pablo ang mga pinagdaanan ni Apostol San Pedro. Maraming mga pagkakataon sa buhay ni Apostol San Pablo kung saang sinubukan ang kanyang pananalig kay Kristo Hesus. Hinarap niya ang kalupitan at pag-uusig ng mga autoridad dahil sa pagpapalaganap ng Mabuting Balita ni Kristo. Marami ang mga hindi tumanggap sa kanya dahil sa kanyang pananampalataya sa Panginoong Hesukristo hanggang kamatayan. 

Paanong nanatiling tapat ang mga apostol katulad nina Apostol San Pedro at San Pablo sa kanilang pananampalataya sa Panginoong Hesus? Saan sila humugot ng lakas ng loob upang tiisin at pagdaanan ang mga sandaling iyon ng kahirapan? Si Apostol San Pablo na mismo ang sumagot sa Ikalawang Pagbasa. Ang Panginoon ang pumatnubay at gumabay sa kanilang paglalakbay at pagmimisyon. Hindi nag-iisa ang mga apostoles sa paglalakbay at pagmimisyon nila sa iba't ibang dako ng daigdig. Kasama nila ang Panginoon na hindi nagpapabaya, ang Emmanuel. Siya ang nagbibigay sa kanila ng katatagan ng kalooban upang pagdaanan ang lahat ng mga matitinding pagsubok sa buhay. 

Ang Panginoon ang bukal ng katatagan ng loob. Siya ang nagbibigay ng katatagan ng loob sa lahat ng mga nananalig at sumasampalataya sa Kanya. 

Martes, Hunyo 27, 2017

MASINTAHING INA, TULUNGAN MO KAMING SUMUNOD KAY HESUS

27 Hunyo 2017 
Kapistahan ng Mahal na Ina ng Laging Saklolo 
Juan 2, 1-11 (Ang Ebanghelyo ay isa sa mga pagpipilian mula sa Pangkat ng mga Pagdiriwang - Sa Karangalan ng Mahal na Birheng Maria) 




"Gawin ninyo ang anumang sabihin Niya sa inyo." (Juan 2, 5)

Ang mga salitang ito'y namutawi mula sa mga labi ng Mahal na Birheng Maria sa kasalan sa Cana. Sinabihan niya ang mga naglilingkod sa kasalan na sumunod sa mga utos ng Panginoong Hesus. Sa tulong ng mga salitang ito, ang unang milagro ni Hesus ay naganap. Dahil sinabihan ni Maria ang mga naglilingkod sa kasal na sumunod sa anumang iutos sa kanila ni Hesus, ipinamalas ang kapangyarihan at kaluwalhatian ni Hesus bilang Diyos. 

Nananatili pa rin ang saysay ng mga salitang ito ng Mahal na Birheng Maria. Ang mga salitang ito ng Mahal na Birhen ay hindi nawawalan ng halaga sa paglipas ng panahon. Mahalaga pa rin sa ating lahat ang mga salitang ito ng Mahal na Birhen. Ito ang utos ng Mahal na Ina para sa ating lahat na nananalig at sumasampalataya kay Kristo; hindi lamang ito para sa mga naglilingkod sa kasalan sa Cana. Tayong lahat ay inuutsan ng Mahal na Birheng Maria na laging sumunod at tumalima kay Kristo Hesus na ating Panginoon at Tagapagligtas. 

Hindi madali ang ipinapagawa sa atin ng Mahal na Inang si Maria. May mga utos si Hesus na mahirap gawin. Katulad na lamang ng utos ni Hesus na umibig tulad Niya. Hindi madaling umibig tulad ni Hesus. Ang pag-ibig ng Panginoong Hesus ay wagas at totoo. Sinsero at perpekto ang pag-ibig ni Hesus. Ang pag-ibig nating lahat ay hindi perpekto. Mahirap sundin ang mga utos ni Hesus. 

Subalit, gaano mang kahirap gawin ang mga iniuutos ni Hesus, kailangan nating gawin ang mga ito. Kailangan nating sundin ang mga utos at turo ni Kristo Hesus upang makamit natin ang biyaya ng kalangitan. Kung lagi tayong susunod sa mga utos ng Panginoong Hesus, matatahak natin ang landas ng kabanalan. Ang landas ng kabanalan ang ating daan patungo sa pangako ng buhay na walang hanggan sa langit, kapiling ang Panginoong Hesus at ang Mahal na Inang si Maria. 

Paano tayo makakatalima sa Panginoong Hesus? Tumawag tayo sa Mahal na Ina. Tayong lahat ay tutulungan ng Mahal na Inang si Maria na sumunod sa mga utos ng Panginoong Hesus. Tutulungan niya tayo sa ating pagsikap na sundin ang mga aral ni Kristo. Hindi tayo pababayaan ng Mahal na Ina na maghirap tayo sa ating pagsikap na sumunod sa landas ni Kristo. Ang landas ni Kristo'y ang siyang landas ng kabanalan patungo sa buhay na walang hanggan sa kalangitan. 

Linggo, Hunyo 25, 2017

PANG-AAPI SA KAPWA: PAGKAKAILA KAY KRISTO

25 Hunyo 2017 
Ikalabindalawang Linggo sa Karaniwang Panahon (A) 
Jeremias 20, 10-13/Salmo 68/Roma 5, 12-15/Mateo 10, 26-33 



Kasuklam-suklam sa paningin ng Diyos ang pang-aapi ng tao. Hindi ninanais ng Diyos na maapi ang isa man sa Kanyang mga nilikha. Masakit para sa Panginoon na pagmasdan ang bawat tao na umaapi ng kapwa-tao. Nais ng Panginoong Diyos na makapamuhay nang matiwasay ang isa't isa. Nais ng Panginoong Diyos na ang bawat tao ay makipagkasundo sa isa't isa sapagkat isinasalamin nito ang Kanyang Habag at Pag-Ibig na lagi Niyang ibinabahagi sa lahat ng tao. Kinasusuklaman at isinusuka ng Diyos ang pang-aapi. 

Inihayag ni propeta Jeremias sa Unang Pagbasa na ang Panginoong Diyos ay nasa panig ng mga inaapi. Siya ang tumutulong at sumasanggalang sa mga inaapi. Ang Diyos ay kakampi ng mga inaapi. Ang Diyos ang magtatanggol sa kanila. Ang mga umaapi't umuusig ay hindi Niya pinahihintulutang manaig. Bagkus, lalabanan ng Diyos ang mga umaapi't umuusig sa kanila. Tutulungan ng Diyos ang mga inaapi na labanan at magtagumpay laban sa mga umaapi sa kanila.

Sa Ebanghelyo, inihayag ni Hesus na kikilalanin Niya sa harapan ng Amang nasa langit ang sinumang kumilala sa Kanya sa harapan ng mga tao at itatatwa naman ang magtatatwa sa Kanya. Inihayag rin ng Panginoong Hesus sa ika-25 kabanata ng Ebanghelyo ayon kay San Mateo na ginagawa rin sa Kanya ang mga ginagawa sa isa sa mga pinakahamak sa Kanyang mga kapatid. Anumang gawin natin para sa kanila, mabuti man o masama, ginagawa rin natin iyon kay Hesus. Ang bawat mabuting gawa sa kanila ay pagkakilala kay Hesus, at ang bawat masamang gawa sa kanila, tulad ng pang-aapi, ay pagkaila o pagtatwa kay Hesus. 

Ano naman ang ipinagkakait sa mga taong inaapi? Ang karapatang maranasan ang mapagpalang kagandahang-loob ng Diyos, na isinalarawan ni Apostol San Pablo sa Ikalawang Pagbasa. Ang kagandahang-loob ng Diyos na dumating sa sanlibutan sa pamamagitan ng Panginoong Hesukristo. Ang biyaya ng Diyos na ipinalaganap ng Panginoong Hesukristo noong Siya'y pumanaog sa sanlibutan. Ang biyaya ng Dios na nagdulot ng kaligtasan sa lahat sa pamamagitan ni Kristo. 

Hindi ikinalulugod ng Diyos ang pang-aapi. Ang pang-aapi ay pagkakait ng Awa't kagandahang-loob ng Diyos na buong puso Niyang ibinahagi sa sangkatauhan sa pamamagitan ni Kristo. Ang pang-aapi ay pagkakaila sa Awa't kagandahang-loob ng Diyos na nagdulot ng ating kaligtasan. Ang pang-aapi ay taliwas sa ginawa ng Diyos para sa ating lahat sa pamamagitan ni Kristo. Ang pang-aapi ay pagkakaila sa Diyos na puspos ng Awa't Pag-Ibig. Ang pang-aapi ay pagkakaila kay Kristo na nag-alay ng buhay para sa ating kaligtasan. 

Sabado, Hunyo 24, 2017

TULAD NI SAN JUAN BAUTISTA, ISENTRO NATIN ANG ATING BUHAY SA DIYOS

24 Hunyo 2017 
Dakilang Kapistahan ng Pagsilang ni San Juan Bautista
Isaias 49, 1-6/Salmo 138/Mga Gawa 13, 22-26/Lucas 1, 57-66. 80 



Isang espesyal na karakter sa kasaysayan ng pagliligtas ng Diyos sa sangkatauhan si San Juan Bautista. May isang napakahalagang tungkulin ang ibinigay ng Diyos kay San Juan Bautista. Si San Juan Bautista ay hinirang upang ihanda ang bayan ng Diyos para sa pagdating ng Mesiyas. Si San Juan Bautista ang hinirang upang maging tagapagpauna ng Panginoon. Hinirang siya upang ibalita sa sambayanan ng Diyos na nalalapit na ang pagdating ng Mesiyas na kanilang pinanabikan nang buong puso't kaluluwa. Siya ang maghahayag sa bayan ng Diyos na dumating na ang Tagapagligtas ng lahat, ang Panginoong Hesukristo. 

Binibigyang-diin ng mga Pagbasa ngayong Dakilang Kapistahan ng Pagsilang ni San Juan Bautista na ang buhay natin ay dapat nakasentro sa Diyos. Inihayag sa Unang Pagbasa na nakasentro sa Diyos ang buhay ng Kanyang mga lingkod. Ang Diyos ang sentro ng buhay ng Kanyang mga lingkod, hindi ang sarili o kung anu-ano pa. Isinalaysay ni Apostol San Pablo sa Ikalawang Pagbasa ang mga sinabi ni San Juan Bautista noong tinanong siya kung siya ba ang Mesiyas o hindi. Sa halip na samantalahin ang pagkakataon upang magpasikat, inamin ni Juan Bautista na hindi Siya ang Mesiyas. Hinayaan ni San Juan Bautista na manatili ang Diyos sa sentro ng kanyang buhay, hindi ang ambisyon. Hindi niya isinentro ang kanyang buhay sa makamundong katanyagan, kundi sa Panginoon lamang. Sa Ebanghelyo, inihayag na nananahan sa sanggol na si San Juan Bautista ang Diyos. Puspos ng pagpapala at grasya ng Diyos mula noong siya'y isilang. 

Noong dumating ang takdang oras ng pagpapakita ng Panginoong Hesus sa bayan ng Diyos, Siya'y itinuro ni San Juan Bautista. Itinuro ni San Juan Bautista sa mga tao ang Mesiyas na kanilang pinanabikan na si Hesus. Hindi nainggit si San Juan Bautista noong mabalitaan niya na dumarami ang mga sumusunod kay Hesus at hindi sa kanya. Sa halip na mapuno ng inggit, si San Juan Bautista'y napuspos ng tuwa sapagkat alam niyang tinupad niya ang misyong ibinigay sa kanya ng Diyos. Ang misyong ibinigay ng Diyos kay Juan Bautista: ihanda ang daraanan ni Hesus at ipakilala Siya sa sambayanan ng Diyos. 

Ang aral na ibinibigay sa atin ni San Juan Bautista ay napakahalaga para sa ating lahat. Ang ating buhay ay dapat nakasentro lamang sa Diyos. Dapat sa Diyos lang nakasentro ang ating buhay. Sa gayon, magiging maayos ang lahat ng bagay. Lalo nating mararanasan ang awa at pagpapala ng Dios kapag Siya ang nasa sentro ng ating buhay. Tanging ang Diyos lamang ang dapat maging sentro ng ating buhay upang magkaroon ng kaayusan ang lahat ng bagay. 

Lunes, Hunyo 19, 2017

WALANG HANGGANG PAG-IBIG

Ika-23 ng Hunyo 2017 - Dakilang Kapistahan ng Kamahal-mahalang Puso ni Hesus (A) 
Deuteronomio 7, 6-11/Salmo 102/1 Juan 4, 7-16/Mateo 11, 25-30 



Ang Kamahal-mahalang Puso ni Hesus ang sagisag ng dakilang pag-ibig ng Diyos para sa lahat. Inilalarawan ng Kamahal-mahalang Puso ni Hesus kung gaano Niya tayo iniibig. Ang Puso ni Hesus ay puspos ng pag-ibig. Ang Mahal Niyang Puso ay hindi malamig. Hindi malamig ang loob ng Panginoong Hesus. Hindi pusong bato ang Kanyang Kabanal-banalang Puso. Bagkus, ang Mahal na Puso ni Kristo Hesus ay puspos ng Kanyang pag-ibig para sa atin. At ang pag-ibig ng Panginoon para sa ating lahat ay tunay, tapat, at walang wakas. Ito ang ibinuod sa Salmo para sa araw na ito: "Pag-ibig Mo'y walang hanggan sa bayan Mong nagmamahal." 

Ang walang hanggang pag-ibig ng Panginoon para sa atin ang pangunahing tema ng mga Pagbasa ngayong Solemnidad ng Mahal na Puso ni Hesus. Inilalarawan ng mga Pagbasa ang dakilang pag-ibig ng Panginoon na walang katapusan. Magmula noong magsimula ang panahon hanggang sa kasalukuyan, ipinapamalas ng Diyos ang Kanyang walang hanggang pag-ibig na puno ng katapatan at kadakilaan. Ang pag-ibig ng Diyos ay hindi mapapantayan ng sinumang tao. Ang pag-ibig ng Dios ay tunay, tapat, totoo, dakila, at walang maliw. 

Sa Unang Pagbasa, inihayag ni Moises sa bayang Israel na hinirang sila ng Diyos upang maging Kanyang bayan dahil sa Kanyang pag-ibig. Ang pag-ibig ng Mahal na Poon ang dahilan kung bakit pinili at hinirang ang bayang Israel upang maging Kanyang bayan. Inako ng Diyos ang bayang Israel bilang Kanyang bayan sa lahat ng mga bayan sa daigdig. Sa pamamagitan nito, ipinahayag ng Panginoong Diyos ang Kanyang pagmamahal para sa sambayanang Israel. 

Inihayag ni Apostol San Juan sa Ikalawang Pagbasa na dapat tayong umibig tulad ng Panginoong Diyos. Dapat nating ibigin ang bawat isa sapagkat ang Panginoong Diyos ang unang umibig sa atin. Una tayong inibig ng Diyos. Dahil sa pag-ibig ng Panginoon para sa atin, tayong lahat ay Kanyang inako bilang Kanyang mga anak na lagi Niyang kinukupkop at inaaruga. Ginawa Niya ito noong ipinagkaloob Niya ang Kanyang Bugtong na Anak na si Kristo Hesus bilang ating Tagapagligtas. Ang bawat isa'y inako ng Dios bilang mga anak Niya sa pamamagitan ng pag-aalay ng sarili ni Kristo sa krus para sa ating lahat. Kaya naman, dapat nating mahalin ang bawat isa dahil ang Diyos nating Ama ang unang umibig sa atin. 

Sa Ebanghelyo, inihayag ng Panginoong Hesukristo ang Kanyang pag-ibig para sa ating lahat. Ipinapakilala Niya ang Kanyang sarili bilang Diyos na kumakalinga at umaaruga sa lahat ng mga nabibigatan sa kanilang mga pasanin. Ang Panginoong Hesus ay nagdudulot ng kapahingahan at kaginhawahan. Alam Niya na ang bawat isa'y may mga limitasyon. Alam Niya na tayo'y napapagod rin. Kaya, tinatawag ni Hesus ang bawat isa na lumapit sa Kanya upang makasumpong ng kapahingahan at kaginhawahan. Si Hesus ang nagdudulot ng tunay na kapahingahan, kalinga, at kaginhawahan na hindi kayang ibigay ng sanlibutan. 

Ipinapakita ni Hesus ang Kanyang Awa at Pag-Ibig para sa atin. Nais kalingain ni Hesus ang mga napapagod dahil sa bigat ng kanilang mga pasanin. Nais ni Hesus na makaranas tayo ng kapahingahan at kaginhawaan kapag napapagod tayo dahil sa bigat ng ating mga pinapagal. Kaya, tinatawag ng Panginoong Hesus ang bawat isa na lumapit sa Kanya upang makaranas ng tunay na kapahingahan sa Kanyang piling at pasanin ang Kanyang pamatok, ang pamatok na magaan at kayang-kaya nating pasanin sa tulong Niya. 

Walang hanggan ang pag-ibig ng Panginoon. Tayong lahat ay laging kinukupkop at inaaruga ng Diyos. Lahat tayo'y malapit sa Kanyang Sagradong Puso. Tayong lahat ay labis Niyang pinahahalagahan at iniibig bilang mga anak Niya. Ang pag-ibig ng Panginoon ay hinding-hindi mahihigitan ninuman. Ang pag-ibig ng Panginoon ay tunay, tapat, dakila, at walang hanggan. 

Sabado, Hunyo 17, 2017

MAPAGKALOOB ANG PANGINOON

18 Hunyo 2017 
Dakilang Kapistahan ng Kabanal-banalang Katawan at Dugo ng Panginoon (A) 
Deuteronomio 8, 2-3. 14b-16a/Salmo 147/1 Corinto 10, 16-17/Juan 6, 51-58 



"Ang Panginoon ang Nagkakaloob" (Genesis 22, 14). Ito ang pangalan ng bundok kung saang sinubukan ng Diyos si Abraham. Sa bundok na ito'y ipinagkaloob ng Diyos kay Abraham ang isang lalaking tupa bilang kapalit para sa anak niyang si Isaac. Matapos makita ng Panginoong Diyos ang pananampalataya ni Abraham, ipinagkaloob Niya ang isang lalaking tupa kay Abraham bilang kapalit kay Isaac na kanyang anak sa paghahandog. Ipinagkakaloob ng Panginoong Diyos ang mga pangangailangan ng mga buong pusong nananalig at sumasampalataya sa Kanya. 

Angkop na angkop ang tema ng pagiging mapagkaloob ng Panginoong sa Pistang ipinagdiriwang ng Simbahan ngayong araw na ito - ang Dakilang Kapistahan ng Kabanal-banalang Katawan at Dugo ng Panginoon. Ipinagkaloob ng Panginoong Hesus ang Kanyang Katawan at Dugo sa atin upang maging ating espirituwal na pagkain at inumin. Patuloy Niyang ipinagkakaloob sa atin ang Kanyang Katawan at Dugo sa pagdiriwang ng Banal na Eukaristiya. 

Nais bigyang-diin ng pagdiriwang ngayon na mapagbigay ang Panginoon. Batid ng Panginoon ang lahat ng ating mga pangangailangan. Alam Niya kung ano ang mga kailangan natin. Ipinagkakaloob ng Poon sa bawat isa sa atin ang ating mga pangangailangan. Hindi ipinagdadamot sa atin ng Panginoon ang lahat ng ating mga pangangailangan. Ibinibigay Niya sa ating lahat ang lahat ng mga bagay na kailangan natin. Hindi malamig ang loob ng Diyos. Ang Diyos ay nakababatid sa lahat ng ating mga pangangailangan, at ito'y ibinibigay Niya sa ating lahat. 

Ipinaalala ni Moises sa mga Israelita sa Unang Pagbasa ang lahat ng mga ginawa ng Diyos para sa kanila. Pinalaya ng Panginoong Diyos ang bayang Israel mula sa pagkaalipin sa Ehipto. Nagpaulan ng manna mula sa langit. Nagpabukal ng tubig mula sa bato. Ipinakita lamang ng mga gawang ito na batid ng Dios kung ano ang mga kailangan ng Kanyang mga nilalang. Hindi Siya ignorante. Hindi Siya isang Diyos na walang pakialam. Bagkus, ang Diyos ay mapagbigay at mapagmalasakit. Ang Diyos ay mapagkalinga, mapag-aruga. Siya'y puno ng Awa at Malasakit para sa lahat ng Kanyang mga nilikha, lalung-lalo na ang tao. Ipinapamalas Niya ito sa pamamagitan ng pagkakaloob ng ating mga pangangailangan. 

Sa Bagong Tipan, isang bagong pagkain at inuming mula sa langit ang ibinigay ng Diyos sa sangkatauhan. Batid ng Diyos na hindi lamang pisikal ang kagutuman at kauuhawan ng tao. Kaya, ibinigay ng Panginoon ang Kanyang sarili sa lahat ng tao bilang espirituwal na pagkain at inumin. Ipinagkaloob ng Diyos sa lahat ng tao ang Kanyang Bugtong na Anak na si Kristo Hesus. 

Inihayag ni Apostol San Pablo sa Ikalawang Pagbasa mula sa kanyang unang sulat sa mga taga-Corinto na ang Katawan at Dugo ni Kristo ang espirituwal na pagkain at inumin para sa buong sambayanang Kristiyano. Ang Katawan at Dugo ni Kristo ang pagkain at inuming pang-espirituwal ng sambayanang Kristiyano. Ang bawat Kristiyano ay laging nakikinabang sa Katawan at Dugo ng Panginoon. Ito ang lagi nating ginagawa sa tuwing ipinagdiriwang ang Banal na Misa. Tinatanggap natin ang Katawan at Dugo ng Panginoong Hesukristo sa Banal na Eukaristiya. Tayong lahat na mga kaanib ng Simbahan ay nakikinabang lagi sa espirituwal na pagkain at inuming para sa sambayanang Kristiyano, ang Katawan at Dugo ni Kristo. 

Sa Ebanghelyo, ipinakilala ng Panginoong Hesus ang Kanyang sarili bilang tunay na pagkain at inumin. Ibinibigay ni Hesus ang Kanyang Katawan at Dugo bilang pagkain at inuming pang-espirituwal. Alam ni Hesus na hindi mapapawi ng mga pagkain at inumin dito sa mundo ang pinakamalalim na kagutuman at kauhawan ng bawat tao. Kaya, ipinagkaloob ni Hesus ang Kanyang Katawan at Dugo upang maging espirituwal na pagkain at inuming mapagsasaluhan ng mga nananalig at sumasampalataya sa Kanya nang buong puso't kaluluwa. Bilang tunay na pagkain at inumin, buhay na walang hanggan ang kaloob Niya sa sinumang makikinabang sa Kanyang Kabanal-banalang Katawan at Dugo. Ang Panginoong Hesukristo ang tunay na pagkain at inuming nagdudulot ng buhay na walang hanggan. 

Sa Sakramento ng Banal na Eukaristiya, ipinapamalas ng Panginoon ang Kanyang awa at malasakit para sa ating lahat. Ipinapakita ng Panginoon na tayong lahat ay malapit sa Kanyang Puso. Tinutugunan ng Panginoon ang ating mga pagkagutom at pagka-uhaw. Ibinibigay Niya ang Kanyang Kabanal-banalang Katawan at Dugo upang maging espirituwal na pagkain at inuming mapagsasaluhan nating lahat na nananalig at sumasampalataya sa Kanya. Sa Sakramento ng Banal na Eukaristiya, ipinapakita ng Panginoon na Siya'y mapagkaloob. 

Linggo, Hunyo 11, 2017

PURIHIN AT IPAGDANGAL ANG DIYOS NA PUSPOS NG PAG-IBIG

11 Hunyo 2017 
Dakilang Kapistahan ng Tatlong Persona sa Isang Diyos (A) 
Exodo 34, 4b-6. 8-9/Daniel 3/2 Corinto 13, 11-13/Juan 3, 16-18 



Ang Diyos ay isang Diyos na puspos ng pag-ibig. Ito ang inilalarawan ng misteryo ng Banal na Santatlo. Ang Banal na Santatlo ay binuklod ng pag-ibig. Pag-ibig ang sentro ng bukluran o pagkakaisa ng Banal na Santatlo. Naka-ugat sa tunay na pag-ibig ang ugnayan ng Banal na Santatlo. Bagamat magkaiba ang mga bumubuo ng Banal na Santatlo - ang Ama, Anak, at Espiritu Santo, ang tatlong personang ito ay nag-iibigan at nagkakaisa bilang Diyos. Ipinapakita ng Banal na Trinidad sa lahat ang tunay na pag-ibig na nagdudulot ng tunay at ganap na pagkakaisa. 

Nais ibahagi ng Diyos ang Kanyang pag-ibig sa ating lahat. Nais ipakita ng Diyos sa atin kung gaano Niya tayo iniibig. Nais ipadama ng Diyos sa atin ang tunay at wagas Niyang pag-ibig na walang hanggan. Kung paanong iniibig ng Ama, Anak, at Espiritu Santo ang bawat isa, gayon din naman, tayong lahat ay minamahal ng Santisima Trinidad. Ang pag-ibig ng Diyos ay tunay, ganap, at walang hanggan. 

Ipinamalas at ipinadama ng Diyos ang Kanyang pag-ibig mula noong pasimula ng panahon hanggang sa kasalukuyan. Ang Ama ang Tagapaglikha ng lahat. Ang Anak na si Kristo Hesus ay pumanaog sa sansinukob upang iligtas ang sangkatauhan sa pamamagitan ng Kanyang kamatayan sa krus at Muling Pagkabuhay. Ang Espiritu Santo naman ang nagbibigay-buhay. Patuloy Siyang nagbibigay ng bagong buhay at gumagabay sa lahat ng mga nananalig at sumasampalataya sa Kanya bilang isa sa mga bumubuo ng Tatlong Persona sa Isang Diyos. 

Sa Unang Pagbasa, inihayag ng Panginoong Diyos kay Moises sa Bundok ng Sinai na Siya'y puspos ng awa at pag-ibig. Hindi Siya madaling magalit. Lagi handa ang Diyos sa pagbibigay ng awa at kapatawaran sa mga taos-pusong nagtitika. Mabilis Siyang magpatawad. Kahit na hindi nagpapakita ng katapatan sa Kanya ang lahat ng tao, kahit na paulit-ulit Siyang binibigo ng tao, patuloy na nagpapakita ng awa at pag-ibig ang Diyos. Nanatili tapat ang Diyos sa sangkatauhan, kahit paulit-ulit Siyang binibigo ng lahat ng tao. 

Inilarawan sa Ebanghelyo kung gaanong kamahal ng Diyos ang sangkatauhan. Ang mga unang kataga sa Ebanghelyo ay ang pinakamasikat na talata mula sa Banal na Kasulatan. Ang Anak ng Diyos na si Kristo Hesus ay pumarito sa sanlibutan upang iligtas ang sangkatauhan. Ito ang buod ng salaysay ng Mabuting Balita. Isinugo ng Diyos ang Kanyang Bugtong na Anak na si Kristo Hesus upang iligtas at bigyan ng buhay na walang hanggan ang sangkatauhan sa pamamagitan ng Kanyang krus at Muling Pagkabuhay. Sa pamamagitan ni Hesus, inihayag at ipinamalas ng Diyos kung gaano kadakila ang Kanyang pag-ibig para sa lahat. 

Inihayag naman ni Apostol San Pablo sa Ikalawang Pagbasa na ang presensya ng Diyos ay lalo nating mararansan sa pamamagitan ng pagkakaisa. Makakamit ang pagkakaisa sa pamamagitan ng pag-ibig. Si Apostol San Pablo rin ang nagsabi sa kanyang sulat sa mga taga-Colosas na ang buklod ng ganap na pagkakaisa ay ang pag-ibig (3, 14). Kung paanong binuklod ang pagkakaisa ng Banal na Santatlo ng pag-ibig, gayon din naman, magbubuklod ang pagkakaisa natin kapag ang bawat isa'y mag-iibigan katulad ng Banal na Santatlo. Lalong mararanasan ng lahat ang presensya ng Banal na Santatlo kapag ang bawat isa'y magkakaisa.  

Ang Diyos ay puspos ng pag-ibig. Nararapat lamang na purihin at sambahin ang Diyos na puspos ng pag-ibig. Bagamat tayo'y hindi karapat-dapat, ipinamalas at ipinadama sa atin ng Diyos ang Kanyang pag-ibig na walang hanggan. Mapalad tayong lahat sapagkat mayroon tayong Diyos na patuloy na umiibig sa atin nang buong katapatan, kahit paulit-ulit natin Siyang binibigo sa pamamagitan ng mga pagkakasala natin laban sa Kanya. Patuloy tayong minamahal at kinahahabagan ng Diyos, kahit tayong lahat ay mga marurupok na makasalanan. 

Linggo, Hunyo 4, 2017

ESPIRITU SANTO: PATNUBAY, KASAMA

4 Hunyo 2017 
Linggo ng Pentekostes (A) 
Mga Gawa 2, 1-11/Salmo 103/1 Corinto 12, 3b-7. 12-13/Juan 20, 19-23 



Isang napakahalagang araw ang Linggo ng Pentekostes para sa Simbahan. Sa araw na ito, ang mga apostol ay nilukuban ng Espiritu Santo. Pumanaog sa mga apostol ang Espiritu Santo sa anyo ng mga dilang apoy. Ang mga alagad ay nabinyagan sa pamamagitan ng Espiritu Santo. Matapos lukuban ng Espiritu Santo, lumabas ang mga apostol mula sa silid na kanilang pinagtitipunan upang simulan ang misyong ibinigay sa kanila ng Panginoong Hesukristo. Puspos ng Espiritu Santo, sinimulan ng mga apostol ang pagsaksi kay Kristo Hesus sa iba't ibang dako ng daigdig. Ang pagpanaog ng Espiritu Santo sa mga apostol ay isinalaysay sa Unang Pagbasa. 

Ang mga apostol ay sinugo ng Panginoong Hesus upang maging mga misyonerong sumasaksi sa Kanya. Sinabi ng Panginoong Hesus sa mga apostoles sa Ebanghelyo ngayon, "Kung paanong sinugo Ako ng Ama, gayon din naman, sinusugo Ko kayo." (20, 21) Si Hesus ay sinugo upang maging Panginoon at Tagapagligtas ng lahat. Sinugo si Kristo Hesus upang iligtas ang lahat ng tao sa pamamagitan ng krus at Muling Pagkabuhay. Ang mga apostol naman ay hinirang ni Hesus upang magpatotoo sa Mabuting Balita ng kaligtasang ipinagkaloob Niya sa sangkatauhan sa pamamagitan ng Kanyang kamatayan sa krus at Muling Pagkabuhay. 

Subalit, bago sinimulan ng mga apostol ang kanilang misyon ng pagpapalaganap ng Mabuting Balita, kinailangan nilang hintayin ang pagdating ng Patnubay, ang Espiritu Santo. Ipinangako sa kanila ng Panginoong Hesus bago Siya umakyat sa langit na papanaog sa kanila ang Espiritu Santo. Ang mga apostol ay bibinyagan sa pamamagitan ng Espiritu Santo. Ang mga apostoles ay tutulungan ng Espiritu Santo sa pagtupad ng kanilang misyon bilang mga saksi ni Kristo Hesus sa iba't ibang bansa. Kaya, matapos ang pag-akyat ni Hesus sa langit, bumalik ang mga apostol sa Herusalem upang hintayin ang pagdating ng Espiritu Santo. 

Noong sumapit ang araw ng Pentekostes, dumating ang Espiritu Santo. Nilukuban ang mga apostol ng Espiritu Santo. Tinanggap nila ang Espiritu Santo na lumukob sa kanila. Tinanggap ng mga apostol ang mga biyayang kaloob ng Espiritu Santo. Bininyagan sila ng Espiritu Santo noong araw na iyon bilang paghahanda para sa pagtupad sa misyong ibinigay sa kanila ni Kristo. 

Lumabas ang mga apostoles mula sa silid na pinagtitipunan nila nang matanggap nila ang Espiritu Santo. Puspos ng Espiritu Santo, nagpuri sa Diyos sa iba't ibang wika ang mga apostol. Sinimulan ng mga disipulo ang misyong ibinigay sa kanila ni Kristo Hesus. Ang mga apostol ay nangaral nang buong kasigasigan tungkol sa kaligtasang kaloob ng Diyos sa pamamagitan ng Panginoong Hesukristo. 

Inihayag ng buong katatagan ng loob ng mga apostoles sa kanilang ministeryo na si Hesus ay Panginoon. Pinanindigan ang mga apostoles hanggang kamatayan na Panginoon si Hesus. Paano nila ito naipapahayag nang buong katatagan ng loob? Si Apostol San Pablo ang sumagot sa katanungang ito sa Ikalawang Pagbasa. Sabi ni Apostol San Pablo sa Ikalawang Pagbasa na pinapatnubayan ng Espiritu Santo ang bawat taong nakapagpapahayag na si Hesus ay Panginoon. Naipapahayag ng mga apostol nang malakas sa kanilang ministeryo na Panginoon at Tagapagligtas si Kristo Hesus dahil pinapatnubayan sila ng Espiritu Santo. 

Ang Espiritu Santo ay patuloy na pumapatnubay sa lahat. Tayong lahat na bahagi ng sambayanang pinagbuklod ni Kristo Hesus ay laging ginagabayan ng Espiritu Santo. Hinding-hindi tayo pababayaan ng Espiritu Santo kahit kailan. Sa hirap at ginhawa, lagi tayong sinasamahan at ginagabayan ng Espiritu Santo. Tutulungan Niya tayong patatagin ang ating pananalig sa Diyos at panatilihin Siya sa sentro ng ating buhay bilang mga Kristiyano. Tutulungan rin tayo ng Espiritu Santo na sumaksi sa Panginoong Hesukristo sa pamamagitan ng salita at gawa.