KUMAPIT SA TUNAY NA NAGMAMAHAL

29 Abril 2018 

Ikalimang Linggo ng Pasko ng Muling Pagkabuhay (B) 

Mga Gawa 9, 26-31/Salmo 21/1 Juan 3, 8-14/Juan 15, 1-8 

"Kung wala ka nang maintindihan, kung wala ka nang makapitan, kapit ka sa akin. Kumapit ka sa akin. Hindi Kita bibitawan." Ang mga salitang ito ay hango sa isang napakasikat na awitin. Napakaganda ang mensaheng hatid ng awiting ito, punung-puno ng kabuluhan, nagbibigay ng pag-asa sa bawat isa. Subalit, ang tanong - sino ba ang dapat nating kapitan? Sino ba dapat ang ating pagkatiwalaan? 

Sa Ebanghelyo, winika ni Hesus sa mga apostol na mamumunga nang masagana ang mga mananatili sa Kanya. Ang Panginoong Hesus ang puno ng ubas at ang Kanyang mga alagad at tagasunod ang bumubuo sa mga sanga. Kung paanong ang mga sanga ay masaganang namumunga kapag ito'y nakakapit sa puno ng ubas, gayon din naman, ang bawat isa'y masaganang mamumunga kapag siya'y kumapit at nanatili kay Kristo at Siya naman sa kanya. Wala tayong magagawa, wala tayong halaga kapag hindi tayo kumakapit at nanatili kay Kristo. Tanging si Hesus lamang ang makakapagdulot sa atin ng kasaganaan ng bunga. Kapag tayo'y kumapit at nanatili sa Panginoong Hesukristo, ang ating pananampalataya, pananalig, at pag-ibig sa Kanya ay masaganang mamumunga. 

Ito ang katangiang inilarawan sa Unang Pagbasa. Ang mga apostol at mga unang tagasunod ni Kristo ay kumapit at nanatili bang buong pananalig sa Kanya. Dahil sa pagkapit ng sinaunang sambayanang Kristiyano sa Panginoon, lalo silang tumatag at lumaganap. Lalong dumami ang mga umanib at nagpabilang sa sambayanang Kristiyano. Ang lahat ng iyon ay naging posible dahil sila'y kumapit at nanatiling tapat kay Kristo Hesus. Gaano mang karami ang mga pagsubok na kinailangan nilang harapin, hindi sila bumitaw kay Kristo. At dahil diyan, lalong lumago ang Simbahan sa pananampalataya, pag-asa, at pag-ibig kay Kristo. Lalong dumami ang bilang ng mga umanib sa Simbahan. Lalong tumibay ang Simbahan; hindi ito natinag kahit kailan. At nananatili pa ring matibay ang Simbahang itinatag ng Panginoong Hesus sa batong si Apostol San Pedro magpahanggang ngayon. 

Paano nga ba kumapit sa Panginoon? Ito'y sinagot ni Apostol San Juan sa Ikalawang Pagbasa. Para kay Apostol San Juan, ang bawat isa'y kumakapit at nananatili sa Panginoon sa pamamagitan ng pagtalima sa Kanyang mga utos. Tayo'y inuutusan ng Diyos na manalig sa Kanya na nagligtas sa ating lahat sa pamamagitan ni Kristo Hesus at magmahalan tulad ng Kanyang pagmamahal sa atin. Kung tunay tayong kumakapit sa Panginoon, tutuparin natin ang Kanyang mga utos. Ang pagtalima sa mga utos ng Panginoon ang nagpapatunay na tunay tayong kumakapit, nananatili, at pumapanig sa Kanya. Ang pagkapit at pananatili sa Panginoon ay tanda ng ating pananalig, pagsamba, at pagmamahal sa Kanya.

Dapat lagi tayong kumapit sa Panginoon. Siya ang dapat nating panaligan, sambahin, at asahan nang buong puso't kaluluwa. Siya lamang ang mapagkakatiwalaan at maaasahan sa bawat oras. Siya ang tunay na nagmamahal sa ating lahat. Kaya naman, nararapat lamang na Siya'y ating mahalin nang higit sa lahat. Marapat lamang na ibigay natin sa Kanya ang buong puso nating pananalig at pagsamba sa Kanya. Nararapat lamang na kumapit tayo sa Kanya na tumubos sa ating lahat dahil sa Kanyang pag-ibig at kagandahang-loob. Nararapat lamang ibigay ang buo nating katapatan sa Kanya. 

Iisa lamang ang puno ng ubas na dapat nating kapitan - ang Panginoong Hesus. Kumapit tayo sa Kanya; manatili tayo sa Kanya. Hayaan nating lumago ang ating pananampalataya, pananalig, pagmamahal, at pagsamba sa Kanya. Kung tayo'y kakapit sa Kanya, kung tayo'y mananatili sa Kanya, ang ating pananampalataya, pananalig, pagmamahal, at pagsamba sa Kanya ay mamumunga nang masagana. Mayroong gantimpala ang Ama para sa ating lahat kung ipapakita natin ang ating katapatan at pananalig sa Panginoong Hesukristo sa pamamagitan ng ating pagkapit sa Kanya. Sa pamamagitan ng pagkapit kay Kristo Hesus, inihahayag natin ang ating pagmamahal, pananalig, at pagsamba sa Kanya. 

Kumapit kay Hesus, ang tunay na nagmamahal. Siya lamang ang nagbibigay ng saysay sa ating buhay. Kung hindi dahil sa Kanya, ang Panginoong maawain at mapagmahal, hindi magkakaroon ng kabuluhan ang ating buhay. At kung tayo'y kakapit sa Panginoon, ipagkakaloob sa atin ng Ama ang gantimpala ng kalangitan. Sapagkat ang pagkapit kay Hesus na ating Panginoon at Manunubos ay tanda ng ating katapatan, pagsamba, pananalig, at pagmamahal sa Kanya. 

TUNAY ANG PAGMAMAHAL AT PAGKALINGA NG MABUTING PASTOL

22 Abril 2018 

Ikaapat na Linggo ng Pasko ng Muling Pagkabuhay (B) 

"Linggo ng Mabuting Pastol" 

Mga Gawa 4, 8-12/Salmo 117/1 Juan 3, 1-2/Juan 10, 11-18 

Pinagninilayan tuwing sasapit Ikaapat na Linggo ng Pasko ng Muling Pagkabuhay ang isang titulo ng Panginoong Hesus na Muling Nabuhay. Ang titulong iyon ay ang titulo ng Mabuting Pastol. Ang Panginoong Hesus ay ipinapakilala ngayong Linggo bilang Mabuting Pastol. At bilang Mabuting Pastol, si Hesus ay mapagmahal at mapagkalinga sa Kanyang mga tupa. Tunay na minamahal at inaaruga ng Mabuting Pastol na si Hesus ang Kanyang mga tupa. Ang tunay na pagmamahal at pagkalinga ng Panginoong Hesukristo, ang Mabuting Pastol, sa Kanyang mga tupa ang paksang tinalakay sa mga Pagbasa para sa Linggong ito. 

Sina Apostol San Pedro at San Juan ay nagpatotoo tungkol sa pag-ibig ng Diyos na inihayag sa pamamagitan ni Kristo Hesus sa Una at Ikalawang Pagbasa. Binigyang-diin ni Apostol San Pedro sa kanyang testimoniya sa harapan ng mga pinuno't matatanda ng bayan sa Unang Pagbasa ang Misteryo Paskwal ni Kristo. Si Kristo'y pinatay sa kamay ng mga autoridad sa pamamagitan ng pagpapako sa krus, ngunit hindi nagtagal at Siya'y muling nabuhay sa ikatlong araw. Sa pamamagitan ng krus at Muling Pagkabuhay ni Kristo Hesus, nahayag ang dakilang pag-ibig ng Diyos. Nagwika naman si Apostol San Juan sa Ikalawang Pagbasa tungkol sa dakilang pag-ibig ng Diyos. Wika ni Apostol San Juan, ang dakilang pag-ibig ng Diyos ang dahilan kung bakit tayong lahat ay tinawag at tinuring Niyang mga anak Niya. 

Inilarawan ng Panginoong Hesus sa Ebanghelyo kung ano uri Siya ng pastol. Bilang Mabuting Pastol, si Hesus ay mapagmahal at mapag-aruga sa Kanyang kawan. At ang pagmamahal at pagkalinga ni Hesus sa Kanyang mga tupa ay tunay. Hindi ito katulad ng ibang mga pastol na bahag ang buntot na tumatakas na lamang sa harap ng matinding panganib. Wika ni Hesus, "Iniaalay ng mabuting pastol ang kanyang buhay para sa mga tupa." (10, 11) At iyon nga ang ginawa ni Hesus. Inialay ni Hesus ang Kanyang buhay sa krus sa Kalbaryo at nabuhay na mag-uli sa ikatlong araw para sa kaligtasan ng Kanyang kawan. Iyan ang pagmamahal ng Mabuting Pastol na si Kristo. Inialay Niya ang Kanyang buhay upang ang Kanyang mga tupa'y maligtas. Iyan ang inilarawan ng krus at Muling Pagkabuhay ni Kristo. Ang krus at Muling Pagkabuhay ni Kristo Hesus ang nagpapatunay na tunay ang pagmamahal at pag-aruga sa Kanyang kawan. Tunay ngang Siya ang Mabuting Pastol. 

Tayong lahat ay tunay ngang pinagpala sapagkat mayroon tayong pastol na tunay na nagmamahal at kumakalinga sa atin - si Hesus. Ang ating pastol ay ang Mabuting Pastol na si Hesus. Inihayag Niya kung gaano Niya tayo kamahal sa pamamagitan ng Kanyang Mahal na Pasyon at Muling Pagkabuhay. Ang Kanyang buhay ay kusa Niyang inialay para sa ating kaligtasan. Hindi Niya ipinahintulot na danasin natin ang matinding panganib na aakay sa atin patungo sa kapahamakan. Bagkus, tayong lahat ay Kanyang ipinagtanggol at iniligtas sa pamamagitan ng kusang paghahandog ng Kanyang sarili. Ipinakita Niyang tunay ang Kanyang pagmamahal at pag-aruga sa ating lahat na bumubuo sa Kanyang kawan. 

Mayroon tayong misyon bilang sambayanang binuklod ng Panginoong Muling Nabuhay na Siyang ating Mabuting Pastol. Misyon natin ang magpatotoo tungkol sa Kanyang dakilang pag-ibig na nagdulot ng ating kaligtasan. Ipakilala natin sa lahat ang Mabuting Pastol na si Hesus. Ipakilala Siya sa lahat bilang Mabuting Pastol na may tunay na pagmamahal at pag-aruga sa Kanyang kawan. Ipakilala natin Siyang naghayag ng Kanyang pagmamahal at pag-aruga sa atin sa pamamagitan ng pag-aalay ng Kanyang buhay sa krus at nabuhay na mag-uli sa ikatlong araw upang tayong lahat na bumubuo sa Kanyang kawan ay maligtas.

Ang pagmamahal at pag-aruga ng Mabuting Pastol na si Kristo Hesus ay tunay ngang walang kapantay. Hinding-hindi mahihigitan o mapapantayan ang Kanyang pag-ibig at pag-aruga sa atin. Ito ang inilarawan ng Kanyang pagkamatay sa krus at Muling Pagkabuhay sa ikatlong araw. 

MGA SAKSI NG PAG-IBIG NG DIYOS

15 Abril 2018 

Ikatlong Linggo ng Pasko ng Muling Pagkabuhay (B) 

Mga Gawa 3, 13-15. 17-19/Salmo 4/1 Juan 2, 1-5a/Lucas 24, 35-48

Sa Ebanghelyo, ipinaliwanag ng Panginoong Muling Nabuhay sa mga apostol ang lahat ng mga kaganapan noong mga araw na iyon. Si Hesus ay pinatay sa kamay ng Kanyang mga kaaway sa pamamagitan ng pagpapako sa krus ngunit nabuhay na mag-uli pagsapit ng ikatlong araw. Batid ni Hesus na nagulumihanan ang mga apostol dahil sa mga naganap noong panahong iyon. Batid ni Hesus na tinantanong ng mga apostol sa kanilang mga isipan kung bakit nangyari ang mga nangyari. Kaya, ipinaliwanag ni Kristo sa mga apostol kung bakit Niyang kinailangang harapin at danasin ang Kanyang pagpapakasakit at mamatay bago Niya makamit ang buo Niyang tagumpay at kaluwalhatian ng Muling Pagkabuhay. Sabi ng Panginoon na ang mga ito'y hinulaan ng mga propeta sa Lumang Tipan. Unang inihayag ng Panginoong Diyos sa Kanyang bayan sa pamamagitan ng mga propeta sa Matandang Tipan na magaganap ang mga bagay na ito. Sa pamamagitan ni Kristo Hesus, natupad ang lahat ng mga bagay na iyon. 

Matapos ipaliwanag sa mga apostol kung bakit nangyari ang lahat ng iyon, winika ng Panginoong Hesus na Muling Nabuhay na sila'y Kanyang sinusugo bilang mga saksi ng lahat ng mga pangyayari. Ang mga alagad ay hinirang at sinugo ni Hesus upang ipalaganap sa lahat ng dako ang Mabuting Balita ng kaligtasan. Sila'y magpapatotoo tungkol sa pagliligtas ng Diyos sa pamamagitan ni Kristo Hesus na kanilang nasaksihan. Ang mga naganap sa Herusalem ang paksa ng kanilang pangangaral at pagpapatotoo sa bawat sulok ng daigdig. Sila ay magiging mga misyonerong nangangaral at nagpapatotoo tungkol sa mga kaganapan sa lungsod ng Herusalem kung saan inihayag ang dakilang pag-ibig at kagandahang-loob ng Diyos para sa lahat ng tao sa pamamagitan ni Hesus. 

Ito ay ginawa ng mga apostol sa Una at Ikalawang Pagbasa. Sa Unang Pagbasa, nangaral si Apostol San Pedro ukol kay Kristong Muling Nabuhay sa mga tao. Ang mga tiniis at pinagdaanan ni Kristo ay inilarawan ng apostol. Nagsalita siya tungkol sa pagdurusa't kamatayan ni Kristo sa kamay ng Kanyang mga kaaway. Inihayag kung paano siyang pinatay ng Kanyang mga kaaway na walang kalaban-laban. Siya'y walang awang pinahirapan hanggang sa Kanyang karumal-dumal na pagkamatay sa krus. Subalit, inihayag ni Apostol San Pedro sa lahat na hindi nagtapos ang lahat para sa Panginoong Hesus sa Kanyang pagdurusa't kamatayan sa Golgota. Wika ni Apostol San Pedro na si Hesus ay muling nabuhay pagsapit ng ikatlong araw. Ang libingan ay hindi naging katapusan para kay Hesus. Si Hesus ay pinatay ngunit muling nabuhay sa ikatlong araw. Sa pamamagitan ng krus at Muling Pagkabuhay, nakamit ni Hesus ang tagumpay at kaluwalhatian. 

Ang pinatotohanan ni Apostol San Pedro sa Unang Pagbasa ay siya ring pinatotohanan ni Apostol San Juan sa Ikalawang Pagbasa. Iisa lamang ang paksa ng kanilang pagpapatotoo - ang dakilang pag-ibig ng Diyos na nagdulot ng kaligtasan sa lahat sa pamamagitan ng Kanyang Bugtong na Anak na si Kristo. Wika ni Apostol San Juan sa Ikalawang Pagbasa na si Kristo ay naging handog para sa ikapagpapatawad ng mga kasalanan. Inihandog ni Kristo ang Kanyang buhay sa krus upang magkaroon ng kapatawaran ang mga kasalanan ng bawat tao sa pamamagitan ng Kanyang kamatayan sa krus. Hinarap, tiniis, at pinagdaanan Niya ang pagdurusa't kamatayan sa krus bago makamit ang kaluwalhatian ng Kanyang Muling Pagkabuhay upang ang sala ng bawat tao ay mapatawad. Sa pamamagitan nito, nahayag ang dakilang pag-ibig ng Diyos sa sangkatauhan. 

May misyong ibinigay ang Panginoong Hesus na Muling Nabuhay sa mga apostol. Ang misyong ibinigay sa mga apostol ay ang pagiging saksi ng dakilang pag-ibig ng Diyos na nahayag sa pamamagitan ni Hesus. Ang dakilang pag-ibig ng Diyos ang nagdulot ng kaligtasan sa lahat ng tao sa pamamagitan ng krus at Muling Pagkabuhay ng Panginoong Hesukristo. Iyan ang Mabuting Balitang patuloy na ipinapangaral at pinatotohanan ng Simbahan magpahanggang ngayon. Iyan ang Ebanghelyo. Tunay ngang dakila't walang kapantay ang pag-ibig ng Diyos para sa lahat ng tao. Ito'y nahayag sa lahat sa pamamagitan ng Panginoong Hesus. Dahil sa dakilang pag-ibig ng Diyos, hinarap, tiniis, at pinagdaanan ni Hesus ang pagdurusa't kamatayan sa krus at muling nabuhay sa ikatlong araw upang tayong lahat ay maligtas at magkaroon ng kapatawaran ang ating mga kasalanan. 

Hinihikayat ang bawat isa sa atin, ang mga bumubuo sa sambayanang nagagalak sa Muling Pagkabuhay ni Kristo, na makibahagi sa misyong ibinigay sa mga apostol na ipinagpapatuloy ng Simbahan sa kasalukuyan. Hinihikayat tayong maging mga saksi ng dakilang pag-ibig ng Diyos sa sangkatauhan. Tayong lahat ay hinihikayat na ipalaganap sa lahat ng dako ang Mabuting Balita ng pagliligtas ng Diyos sa sangkatauhan sa pamamagitan ng Muling Nabuhay na Panginoong Hesukristo upang ang lahat ay makinig at sumampalataya sa Kanya. Ipakilala natin sa lahat ang Panginoon; Siya na nagpamalas kung gaanong kadakila ang Kaniyang pag-ibig para sa sangkatauhan sa pamamagitan ng paghahandog ng Kanyang sarili hanggang sa Kanyang kamatayan sa krus at Muling Pagkabuhay. 

MAGANDANG BALITA

9 Abril 2018 

Dakilang Kapistahan ng Pagpapahayag ng Magandang Balita tungkol sa Panginoon 

Isaias 7, 10-14; 8, 10/Salmo 39/Hebreo 10, 4-10/Lucas 1, 26-38 

Karaniwang ipinagdiriwang ang Pistang ito tuwing ika-25 ng Marso. Subalit, inilipat sa araw na ito ang pagdiriwang ng Dakilang Pistang ito sapagkat tumapat ang Linggo ng Palaspas sa ika-25 ng Marso ngayong taon. Subalit, iisa pa rin ang nais pagtuunan ng pansin ng Pistang ito. Ang misyon ng Panginoong Hesus na Muling Nabuhay ang nais pagtuunan ng pansin sa araw na ito. Ito ang paksang sinusuri sa mga Pagbasa para sa Dakilang Pistang ito. Bakit nga ba pumarito sa daigdig ang Panginoong Muling Nabuhay? Ano nga ba ang Kanyang misyon? 

Ang dahilan kung bakit ang Panginoong Hesus ay pumarito sa sanlibutan ay inilahad sa Ikalawang Pagbasa. Naparito ang Panginoong Hesus upang tuparin ang kalooban ng Ama. Niloob ng Diyos na tubusin ang sangkatauhan sa pamamagitan ng ipinangakong Mesiyas at Tagapagligtas na si Hesus. Si Hesus ay sinugo ng Ama upang maging Mesiyas at Manunubos ng lahat ng tao. Ang misyong ito ay buong kababaang-loob na tinanggap at ginampanan ni Kristo sa Kanyang pagpanaog sa sanlibutan. Bilang Mesiyas at Manunubos, iniligtas ni Hesus ang sangkatauhan sa pamamagitan ng Kanyang krus at Muling Pagkabuhay.

Iyan ang Magandang Balitang inihayag ng Diyos sa pamamagitan ni propeta Isaias sa Unang Pagbasa. Ang Magandang Balitang ito'y inihayag sa anyo ng isang propesiya. Ang sanggol na ipaglilihi't iluluwal mula sa sinapupunan ng isang dalaga ang ipinangakong Mesiyas at Manunubos. Bago pa mang maganap ang kahit isa sa mga kaganapang iyon, ito'y inihayag na ng Diyos sa Kanyang bayan. Isang sanggol na lalaki na iluluwal ng isang dalaga mula sa kanyang sinapupunan ay ibibigay ng Diyos. Sa pamamagitan ng sanggol na lalaking ito, mamamasdan ng lahat sa buong daigidig ang dakilang pagliligtas ng Panginoong Diyos. 

Sa Ebanghelyo, isinalaysay ang katuparan ng propesiyang inihayag ng Diyos sa pamamagitan ni propeta Isaias na inilahad sa Unang Pagbasa. Isang dalagang taga-Nazaret na nagngangalang Maria ay hinirang ng Diyos upang maging tagatupad ng propesiya. Ibinalita ng Arkanghel San Gabriel sa Mahal na Birheng Maria na siya ang hinirang ng Diyos upang maging Ina ng Mesiyas. Magmumula sa kanyang sinapupunan ang ipinangakong Mesiyas at Manunubos na si Hesukristo. Ipaglilihi't iluluwal ng Mahal na Birheng Maria mula sa kanyang sinapupunan ang Panginoong Hesukristo na Siyang magliligtas sa lahat ng tao sa pamamagitan ng Kanyang pagpapakasakit, pagkamatay, at Muling Pagkabuhay. 

Kagalakan ang hatid ng Magandang Balitang ito sa bawat isa. Ang sangkatauha'y iniligtas ng Diyos sa pamamagitan ng Kanyang Bugtong na Anak na si Kristo Hesus. Si Kristo ay nagpakasakit sa kamay ng Kanyang mga kaaway at namatay sa krus ngunit hindi nanatili sa loob ng libingan sapagkat Siya'y nabuhay na mag-uli sa ikatlong araw. Sa pamamagitan ng Kanyang krus at Muling Pagkabuhay, ang sangkatauhan ay iniligtas at pinalaya. Ito ang dahilan kung bakit ang Panginoong Hesus ay pumarito sa daigdig. Ang Panginoong Hesus ay pumarito sa daigdig upang tubusin ang sangkatauhan sa pamamagitan ng Kanyang Pasyon at Muling Pagkabuhay. Ang Mahal na Inang si Maria ay pinili't hinirang ng Diyos upang ipaglihi't iluwal mula sa kanyang sinapupunan ang sanggol na lalaking si Hesus na magliligtas sa lahat sa pamamagitan ng Kanyang krus at Muling Pagkabuhay.

Ang Panginoong Hesus at ang Mahal na Inang si Maria ay binigyan ng misyon. Buong kababaang-loob Nilang tinalima at tinupad ang misyong ibinigay sa Kanila ng Ama. Sa pamamagitan ng Kanilang pagtupad sa kalooban ng Ama, nahayag ang kadakilaan ng Diyos sa sangkatauhan. Si Maria, tinanggap ang papel ng pagiging ina ng ipinangakong Mesiyas at Manunubos na si Hesus. Si Hesus, tinanggap ang papel ng pagiging Mesiyas at Manunubos ng sangkatauhan; tinanggap at hinarap ang Kanyang kamatayan sa krus para sa kaligtasan ng sangkatauhan. At hindi Siya nanatili sa loob ng libingan sapagkat Siya'y muling nabuhay sa ikatlong araw. Sa pamamagitan ng Kanyang Muling Pagkabuhay, nagkaroon ng saysay ang Kanyang kamatayan sa krus; nakumpleto ang Kanyang misyon bilang Mesiyas at Manunubos. Ang kadakilaan ng Diyos na inihayag sa pamamagitan ng krus at Pagkabuhay ng Panginoong Hesukristo ang Mabuting Balitang sinasampalatayanan at pinatotohanan ng Simbahan magpahanggang ngayon. 

TUNAY ANG BANAL NA AWANG HATID NG PANGINOONG MULING NABUHAY

8 Abril 2018 

Ikalawang Linggo ng Pasko ng Muling Pagkabuhay (B) 

"Linggo ng Banal na Awa" 

Mga Gawa 4, 32-35/Salmo 117/1 Juan 5, 1-6/Juan 20, 19-31 

Ang Ikalawang Linggo ng Pasko ng Muling Pagkabuhay ay kilala rin bilang Linggo ng Banal na Awa. Inihabilin ng Panginoong Hesus sa isa sa Kanyang mga aparisyon kay Santa Faustina na ipagdiwang ang Kapistahan ng Banal na Awa sa unang Linggo matapos ang Pasko ng Muling Pagkabuhay. Ang Pagsisiyam sa karangalan ng Banal na Awa ay sinimulan noong Biyernes Santo. At siyam na araw makalipas ang Biyernes Santo, ipinagdiriwang ang Ikalawang Linggo ng Pasko ng Muling Pagkabuhay na siya ring Linggo ng Banal na Awa. Ang dakilang araw na ito'y inilaan sa taimtim na pagninilay at pagpapalalim ng ating pang-unawa tungkol sa misteryo ng Awa ng Diyos na ipinamalas sa lahat sa pamamagitan ni Kristo Hesus. Ang bawat isa'y binibigyan ng pagkakataong damhin ang Dakilang Awa ng Diyos na siyang sanhi ng ating kaligtasan sa pamamagitan ni Kristo sa pistang ito.

Binibigyang-diin sa araw na ito na tunay ang Banal na Awa. Hindi gawa-gawa, hindi guni-guni ang Banal na Awa. Ang Dakilang Awa ng Diyos ay hindi lamang isang hamak na konsepto na dapat pag-aralan kung ito ba'y totoo o hindi. Ang Banal na Awa ay isang misteryo tungkol sa katangian ng Diyos. At ang mga misteryong katulad nito ay dapat nating pagnilayan nang buong kataimtiman. Sapagkat sa pamamagitan ng mga misteryo, ang Diyos ay nagpapakilala ng Kanyang sarili. Sa misteryo ng Banal na Awa, ang Diyos ay nagpapakilala sa atin bilang Panginoon at Tagapagligtas na puspos ng awa para sa lahat. At ang Awa at Habag ng Diyos ang dahilan kung bakit ipinasiya Niyang tayo'y iligtas sa pamamagitan ni Kristo Hesus. 

Malaki ang koneksyon ng mga Pagbasa sa pagdiriwang para sa araw na ito. Tampok sa mga Pagbasa para sa araw na ito ang karanasan ng mga apostol ng Banal na Awa ng Panginoon. Naranasan ng mga apostol ang Banal na Awang hatid ng Panginoong Hesus na Muling Nabuhay. Ito naman ang kanilang pinatotohanan sa lahat ng tao mula sa iba't ibang lipi, wika, bayan, at bansa sa buong daigdig. Sa kanilang paglalakbay patungo sa iba't ibang lugar sa kanilang pagmimisyon, ang Awa ng Diyos na naihayag sa pamamagitan ng Panginoong Muling Nabuhay ang paksa ng kanilang pangangaral at pagpapatotoo.

Wika ni Apostol San Juan sa huling bahagi ng Ikalawang Pagbasa na naparito si Hesus sa sanlibutan. Ano ang dahilan ng pagparito ni Hesus? Si Hesus ay pumarito upang ibubo ang Kanyang Dugo sa Kanyang kamatayan para sa ating kaligtasan. Isa itong pagsasalarawan ng Banal na Awa. Si Hesus ay pumanaog sa sanlibutan upang tubusin ang sangkatauhan sa pamamagitan ng Kanyang krus at Muling Pagkabuhay. Sa pamamagitan ng Misteryo Paskwal ni Hesus, ang Kanyang krus at Muling Pagkabuhay, nahayag ang tagumpay ng Banal na Awa. Ang Banal na Awang ito ang paksa ng pagpapatotoo ng mga apostol sa mga tao sa Unang Pagbasa. Ang mga apostol ay nagsilbing mga saksi ng Banal na Awang inihatid sa kanila ni Kristong Muling Nabuhay, ang Panginoon at Hari ng Awa.

Sa Ebanghelyo, isinalaysay ang dalawang pagpapakita ng Panginoong Hesus na Muling Nabuhay sa mga apostol. Dalawang ulit Siyang nagpakita sa mga apostol upang ibahagi sa kanila ang Kanyang Banal na Awa. Hindi Siya nagpakita sa mga apostol upang iparamdam sa kanila ang Kanyang galit at paghihiganti. Bagkus, nagpakita Siya sa kanila upang iparamdam sa kanila ang Kanyang Banal na Awa. Ang Banal na Awang nagtagumpay sa pamamagitan ng Kanyang krus at Muling Pagkabuhay. Dahil sa Kanyang Awa, dalawang ulit Niya itong ginawa. Ginawa Niya ito sa unang pagkakataon noong gabi ng unang Linggo ng Pagkabuhay. Siya'y nagpakita muli walong araw ang nakalipas upang ibahagi ito kay Tomas na hindi kasama ng ibang mga apostol noong una Siyang nagpakita. 

Inihayag ni Tomas sa Ebanghelyo na hindi siya maniniwalang si Kristo ay nabuhay na mag-uli at nagpakita sa mga apostol hangga't nakita niya mismo ang mga sugat sa Kanyang mga katawan. Dahil sa Awa ng Panginoon, ipinagkaloob Niya ang kahilingan ni Tomas na puno ng pag-aalinlangan. Noong Siya'y nagpakita sa ikalawang pagkakataon, ipinakita ni Hesus ang mga sugat sa Kanyang mga kamay at paa, at sa Kanyang tagiliran. Wika ni Tomas nang makita ito, "Panginoon ko at Diyos ko!" (20, 28) Sa pamamagitan nito'y nahayag ni Tomas na tunay ngang nabuhay na mag-uli si Hesus. Nakita na rin niya sa wakas ang Muling Nabuhay na si Hesus, ang Panginoong mapagmahal at maawain. Nakita na rin niya ang Panginoong nagwagi laban sa kasalanan at kamatayan. 

Ang mga sugat sa katawan ni Kristo ay tanda ng Kanyang Banal na Awa. Siya'y labis na sinugatan sa mga huling sandali ng Kanyang buhay. Tiniis Niya ang lahat ng mga pagpapahirap at pagpapakasakit sa kamay ng Kanyang mga kaaway. Si Hesus ay sinugatan nang Siya'y bugbugin, hampasan sa haliging bato, pinutungan ng koronang tinik, pinagpasan ng isang mabigat na krus, at ipinako sa mismong krus na Kanyang pinasan. At nang mamatay, Siya'y sinugatan ng sundalong nag-ulos ng kaniyang sibat. At nang Siya'y mabuhay na mag-uli, ipinakita ni Hesus ang Kanyang mga sugat upang patunayan na tunay ngang Siya'y puspos ng habag at pag-ibig para sa lahat. Ipinakita ng Panginoong Hesus ang mga sugat sa Kanyang katawan sapagkat ang mga ito'y palatandaan ng tagumpay ng Kanyang Banal na Awa. Ang mga sugat sa Kanyang Katawan ay Kanyang ipinakita upang patunayan na Siya nga ang Panginoong puspos ng pag-ibig at awa na nagtagumpay. Inihahatid Niya sa lahat ang Mabuting Balita ng tagumpay ng Kanyang Awa na nagdudulot ng kagalakan. Sa pamamagitan ng krus at Muling Pagkabuhay ng Panginoong Hesukristo, nagtagumpay ang Banal na Awa. 

Hindi guni-guni ang misteryo ng Banal na Awa. Hindi ito gawa-gawa, hindi ito kathang-isip, hindi ito kalokohan, hindi ito pekeng balita. Tunay ang Banal na Awa. Tunay ang Banal na Awang hatid ng Panginoong Hesus na Muling Nabuhay. Ang mga sugat sa Kanyang katawan ang nagpapatunay na tunay ang Awang Kanyang hatid sa lahat. Dahil sa Kanyang Banal na Awa, tiniis ni Hesus ang lahat ng pagdurusa't pagpapakasakit hanggang sa mamatay upang makamit ang tagumpay sa Muling Pagkabuhay. Hinarap ni Hesus ang Kanyang Misteryo Paskwal para sa ating lahat. Ang krus at Muling Pagkabuhay ni Hesus ang sagisag ng tagumpay ng Banal na Awang sanhi ng ating kaligtasan. Ito ang ipinapaalala sa atin ng mga sugat sa katawan ng Panginoong Hesus. Dahil sa Kanyang Banal na Awa, tayong lahat ay Kanyang iniligtas sa pamamagitan ng Kanyang krus at Muling Pagkabuhay. 

MISYONG BIGAY

7 Abril 2018 

Sabado sa Walong Araw na Pagdiriwang sa Pasko ng Muling Pagkabuhay

Mga Gawa 4, 13-21/Salmo 117/Marcos 16, 9-15

Sa wakas ng salaysay sa Ebanghelyo, isinugo ng Panginoong Hesus na Muling Nabuhay ang mga apostol upang ipangaral sa lahat ang Mabuting Balita. Ang Mabuting Balitang kanilang ipapangaral ay tungkol sa pagliligtas ng Diyos sa pamamagitan ni Kristo Hesus. Ang mga apostol ang mangangaral at magpapatoo tungkol sa Panginoong Hesus. Sila ay magiging mga misyonero. Bilang mga misyonero, iba't ibang landasin ang tatahakin ng mga apostol patungo sa iba't ibang lupain upang ipangaral sa lahat ang Mabuting Balita tungkol sa ipinangakong Tagapagligtas na si Hesus. Sa pamamagitan ng krus at Muling Pagkabuhay ni Hesus, iniligtas ng Diyos ang sangkatauhan. At iyan ang Mabuting Balitang ipinapangaral, pinatotohanan, at sinasampalatayanan ng Simbahan nang buong puso't kaluluwa magpahanggang ngayon. Ang misyong ibinigay ni Hesus sa mga alagad ay ipinagpapatuloy ng Simbahan sa kasalukuyan. 

Maraming mga hirap at pasakit na kinailangan nilang harapin at danasin. Mahirap ang misyong ibinigay sa kanila ni Kristo. Isang halimbawa nito ay ang naganap sa Unang Pagbasa. Sina Apostol San Pedro at San Juan ay mahigpit na binabalaan ng mga autoridad na huwag nang mangaral tungkol kay Hesus. Subalit, hindi nila sinunod ang babalang ito. Inihayag ni Apostol San Pedro na dapat nilang ihayag ang kanilang narinig at nakita (4, 20). Sa kabila ng lahat ng mga pagsubok na dumaan sa kanilang pagmimisyon, hindi sila tumigil sa pangangaral at pagsaksi sa Panginoong Hesus na Muling Nabuhay. Ang misyong ito ng mga apostol ay ibinigay sa kanila ng Panginoon. Kinailangan nilang gampanan ito upang ang lahat ay makakilala kay Kristo at sumampalataya sa Kanya. 

Ang mga apostoles ay binigyan ng misyon ng Muling Nabuhay na si Hesus. Sila'y hinirang at sinugo ng Panginoong Muling Nabuhay upang Siya'y ipakilala sa lahat ng tao mula sa iba't ibang bayan at bansa sa daigdig. Ipapangaral nila sa lahat ang Mabuting Balita tungkol sa pagliligtas ng Diyos sa lahat sa pamamagitan ng Panginoong Hesus na Muling Nabuhay. Sa pamamagitan ng kanilang pangangaral at pagpapatotoo, makikilala ng lahat si Hesus, ang ipinangakong Mesiyas at Tagapagligtas na kaloob ng Diyos. Malalaman ng lahat na sa pamamagitan ng Kanyang krus at Muling Pagkabuhay, iniligtas ng Diyos na nagkatawang-tao na si Hesus ang sangkatauhan. At sa pamamagitan ng pakikinig at pangangaral ng mga apostol tungkol kay Kristo Hesus, ang lahat ay maniniwala at sasampalataya. 

MAHABAGIN AT MAPAGMAHAL NA MANUNUBOS

6 Abril 2018

Biyernes sa Walong Araw na Pagdiriwang ng Pasko ng Muling Pagkabuhay 

Mga Gawa 4, 1-12/Salmo 117/Juan 21, 1-14

Wika ng minamahal na alagad ni Kristo na si Apostol San Juan kay Apostol San Pedro sa Ebanghelyo, "Ang Panginoon iyon!" (21, 7) Sinabi niya ito nang makita niya ang dami ng mga isdang nahuli, tulad ng sinabi ng lalaking nasa pampang. Sa sandaling iyon naaalala ni Apostol San Juan na minsan itong nangyari. At iisa lamang ang kahulugan noon. Ang lalaking nasa pampang ay walang iba kundi ang Panginoong Hesus. Noong sinamahan sila ng Panginoong Hesus na mamalakaya bago Niya tinawag ang mga ito, nagkaroon sila ng maraming huli. Napagtanto ng alagad na minamahal ni Hesus na si Apostol San Juan na naulit lamang ang mga kaganapan noon sa Lawa ng Tiberias. Muling nagpakita sa kanila ang Panginoong Hesus na Muling Nabuhay. 

Ang mga salitang ito ay hindi lamang para kay Apostol San Pedro. Ang mga salitang ito ay para sa lahat. Patuloy na umaalingawngaw ang mga salitang ito ng alagad na minamahal ni Hesus na si Apostol San Juan. "Ang Panginoon iyon!" Sino nga ba ang Panginoon? Sino nga ba si Hesus? Para sa mga autoridad sa Unang Pagbasa, si Hesus ay isa lamang bulaang propeta. Nilapastangan Niya ang Diyos. Subalit, ipinakilala Siya ni Apostol San Pedro bilang batong itinakwil na naging batong panulukan. Ipinakilala Siya bilang Mesiyas at Manunubos na ipinagkaloob ng Diyos. Ang kapangyarihan ng Mesiyas na si Hesus ang nagdulot ng kagalingan sa lalaking ipinanganak na lumpo. 

Inaanyayahan ni San Juan ang bawat isa na palalimin ang pagkilala sa Panginoong Hesus na Muling Nabuhay. Ang mga salitang "Ang Panginoon iyon!" na namutawi mula sa kanyang mga labi ay isang paanyaya sa bawat isa sa atin na lalo pang palalimin ang ating pagkilala kay Hesus bilang Mesiyas at Manunubos. Si Hesus ay hindi nagpapakalayo sa atin. Hindi Niya nilalayo ang Kanyang Puso sa ating lahat. Bilang ating Mesiyas at Manunubos, si Hesus ay bumaba mula sa langit at naging tao upang yakapin at danasin ang Kanyang Pasyon at Muling Pagkabuhay para sa ating kaligtasan. Sa pamamagitan nito, ipinakita Niya na Siya'y isang mahabagin at mapagmahal na Tagapagligtas. Siya'y nagpakasakit, namatay, at nabuhay na mag-uli sa ikatlong araw upang tayong lahat ay maligtas at mapalaya dahil sa Kanyang dakilang pag-ibig at kagandahang-loob para sa ating lahat.

SIYA NGA

5 Abril 2018

Huwebes sa Walong Araw na Pagdiriwang ng Pasko ng Muling Pagkabuhay

Mga Gawa 3, 11-26/Salmo 8/Lucas 24, 35-48

Muling nangaral sa taumbayan si Apostol San Pedro sa Unang Pagbasa tungkol sa Panginoong Hesus na Muling Nabuhay. Matapos mapagaling ang lalaking ipinanganak na lumpo, nilinaw ni Apostol San Pedro sa taumbayan na hindi siya ang may kagagawan noon. Hindi nakatayo't nakalakad na rin sa wakas ang pulubing lumpo mula sa kanyang pagsilang dahil sa kanya. Nakalakad siya dahil sa Muling Nabuhay na si Hesus. Si Hesus na Nabuhay na mag-uli ang nagpagaling sa lumpo. Siya, ang Mesiyas at Manunubos na ipinagkaloob ng Diyos, ang nagdulot ng kagalingan sa lumpo. Siya'y pinatay ng Kanyang mga kaaway ngunit nabuhay na mag-uli sa ikatlong araw. Taliwas sa mga iniisip ng karamihan noong kapanahunang yaon, ang Nazarenong si Hesus na pinatay sa pamamagitan ng pagpapapako sa krus ay tunay ngang nabuhay na mag-uli. Ang Muling Nabuhay na si Hesus ang paksa ng pangangaral at pagpapatotoo ng mga apostol. 

Pinatotohanan ng mga apostoles ang kanilang nakita. Sa Ebanghelyo, isinalaysay ang pagpapakita ng Panginoong Hesus na Muling Nabuhay sa kanila. Akala nila noong una na multo ang kanilang nakikita. Subalit, tiniyak ng Panginoong Hesus sa mga apostol na Siya nga talaga ang kanilang nakikita. Ipinakita ni Hesus ang Kanyang mga kamay at paa. Kumain pa nga si Hesus sa harapan nila upang patunayan na Siya nga talaga ang kanilang nakikita. At sa katapusan ng Ebanghelyo, iniutos Niya sa mga apostol na dapat nilang patotohanan ang kanilang mga nakita. Ang mga apostol mismo ang magpapatotoo tungkol kay Kristo Hesus na Muling Nabuhay sa lahat ng dako. At iyon nga ang kanilang ginawa. 

Ang mga apostol ay hinirang upang mangaral at magbigay ng patotoo tungkol kay Hesus. Si Hesus ang Mesiyas na ipinagkaloob ng Diyos. Siya ang tinutukoy ng mga propeta ng Matandang Tipan sa kanilang mga propesiya tungkol sa Tagapagligtas na ipinangako. Siya ang Diyos na nagkatawang-tao upang tayo'y tubusin dahil sa Kanyang pag-ibig at kagandahang-loob. Siya'y pinatay ngunit muling nabuhay sa ikatlong araw. At Siya'y nagpakita sa mga apostol upang ang lahat ay manalig at sumampalataya sa Kanya sa pamamagitan ng kanilang pangangaral at pagpapatotoo. Si Hesus nga ang Panginoong nagtagumpay sa pamamagitan ng Kanyang krus at Muling Pagkabuhay. Ito ang pinatotohanan at sinasampalatayanan ng Simbahan magpahanggang ngayon. 

ANG PINAKADAKILANG GAWA

4 Abril 2018

Miyerkules sa Walong Araw na Pagdiriwang ng Pasko ng Muling Pagkabuhay

Mga Gawa 3, 1-10/Salmo 104/Lucas 24, 13-35

Isinalaysay sa Unang Pagbasa ang pagpapagaling sa isang lalaking ipinanganak na lumpo. Ang pulubing ipinanganak na lumpo ay pinagaling ni Apostol San Pedro sa pamamagitan ng kapangyarihan ng Kabanal-banalang Pangalan ni Kristong Muling Nabuhay. Sa pamamagitan ni Apostol San Pedro, nahayag ang kapangyarihan ng Panginoong Hesukristong Muling Nabuhay. Ang kapangyarihan ng Panginoong Muling Nabuhay na si Hesukristo ang nagdulot ng kagalingan sa naglilimos na pulubing ipinanganak na lumpo. Si Apostol San Pedro ay nagsilbing instrumento ni Kristo; siya'y nagsilbing daluyan ng kapangyarihan ng Panginoong Muling Nabuhay. Dahil sa kapangyarihan ng Panginoong Hesus na Muling Nabuhay na ibinahagi naman ni Apostol San Pedro, ang lalaking lumpo ay tumayo't lumakad. 

Sa Ebanghelyo, isinalaysay ang paglalakbay ng Muling Nabuhay na si Hesus kasama ang dalawa sa Kanyang mga apostol patungong Emaus. Habang sila'y naglalakbay sa daan, ibinahagi ng dalawang alagad kay Hesus ang lahat ng kanilang mga hinanakit tungkol sa Kanya. Hindi pa nalalaman ng dalawa na si Hesus pala ang kanilang kausap. Akala nilang isang dayong estranghero ang kanilang kausap at kasama. Nang pinaghati-hati ni Hesus ang tinapay sa hapag-kainan, doon lamang nakilala ng dalawa na Siya pala yung kasama nila sa daan. Hindi na patay si Hesus. Hindi Siya nanatili sa loob ng libingan. Tunay nga Siyang nabuhay na mag-uli. Ang lahat ay hindi nagwakas sa kamatayan ni Hesus. May dahilan kung bakit namatay ang Panginoong Hesus. Kinailangan Niyang pagdaanan ang pagdurusa't kamatayan sa krus bago Niya makamit ang kaluwalhatian sa Kanyang Muling Pagkabuhay. Ito'y unang inihayag ng mga propeta sa Lumang Tipan at ipinaliwanag sa kanila ni Hesus habang sila'y naglalakbay patungong Emaus. 

Maraming ginawang dakilang bagay ang Panginoong Hesukristo. Subalit, walang hihigit pa sa kadakilaan ng Kanyang Muling Pagkabuhay. Ang Muling Pagkabuhay ni Hesus ay ang pinakadakila sa lahat ng Kanyang mga ginawa. Sa pamamagitan ng Kanyang Muling Pagkabuhay, nakamit Niya ang kaluwalhatian at tagumpay. Ang lahat ng mga inihayag ukol sa Kanya sa Lumang Tipan ay nagkaroon ng katuparan. Siya ang Mesiyas at Tagapagligtas ng lahat. Iniligtas Niya ang lahat sa pamamagitan ng Kanyang krus at Muling Pagkabuhay. Ito ang ating sinasampalatayanan nang buong puso't kaluluwa bilang sambayanan ng Muling Pagkabuhay. Ang Kanyang krus at Muling Pagkabuhay ang nagpapatunay na Siya ang Diyos na tunay na mahabagin at mapagmahal sa lahat. 

TAGAPAWI NG MGA LUHA

3 Abril 2018

Martes sa Walong Araw na Pagdiriwang ng Pasko ng Muling Pagkabuhay

Mga Gawa 2, 36-41/Salmo 32/Juan 20, 11-18 

Sa Ebanghelyo, ang Panginoong Muling Nabuhay ay nagpakita kay Santa Maria Magdalena na umiiyak. Ang Panginoong Hesukristong Muling Nabuhay ay hindi agad nakilala ni Maria Magdalena. Inakala ni Maria Magdalena na ang kanyang nakatagpo ay isa lamang tagapag-alaga ng halamanan. Nakilala lamang ni Maria Magdalena ang Muling Nabuhay na si Hesus noong binati Niya ito sa pamamagitan ng kanyang pangalan. Labis siyang umiyak dahil sa pagkawala ng katawan ni Hesus sa libingan. Inakala niyang ninakaw ang bangkay ng Panginoon. Inakala niyang hindi na ginalang ang Panginoon, kahit na Siya'y patay na. Subalit, ang lahat ng mga luha ay tuluyang napawi mula sa mga mata ni Maria Magdalena noong nakilala niya ang Panginoong Hesus na Muling Nabuhay. Mula sa pagiging puno ng kalungkutan, siya'y napuno ng kagalakan. Ang kanyang pag-iyak ay naging isang malaking ngiti't tuwa. Ang lahat ng iyon ay dahil kay Kristong Muling Nabuhay. 

Ang Panginoong Hesus na Muling Nabuhay na pinatotohanan ni Apostol San Pedro sa  taumbayan sa Unang Pagbasa at ni Santa Maria Magdalena sa mga apostol sa huling bahagi ng Ebanghelyo ang tagapawi ng mga luha. Hindi kalungkutan ang Kanyang hatid sa lahat. Bagkus, ang Kanyang hatid sa lahat ay kagalakan. Pinapawi ni Kristo ang lahat ng ating kalungkutan. Pinapawi Niya ang mga luhang dumadaloy mula sa mga bata ng bawat isa. Ang dalamhati't kapighatian ay Kanyang pinapalitan ng tuwa't kagalakan. Ang kalungkutan at kapighatian ay naging kagalakan at kasaganaan sa pamamagitan Niya. Dahil si Kristo ang Panginoong nagtagumpay sa pamamagitan ng Kanyang krus at Muling Pagkabuhay. Ang tagumpay ng ating Panginoong Muling Nabuhay ay tunay ngang nagdudulot ng isang buhay na puno ng kagalakan at pag-asang mula sa Kanya sa bawat isa. 

Tapos na ang panahon ng pagdadalmhati't pagluluksa. Wala nang laman ang libingan. Si Hesus ay tunay ngang muling nabuhay. Sa pamamagitan ng Kanyang Muling Pagkabuhay, pinawi Niya ang lahat ng ating kalungkutan at kabiguan. Ang lahat ng mga luhang pumapatak mula sa ating mga mata ay Kanyang pinapawi. Tayong lahat ay inaaanyayahan Niyang maranasan at makibahagi sa kagalakang hatid Niya sa bawat isa. Kagalakang dulot ng Kanyang maluwalhating tagumpay na inihayag ng Kanyang krus at Muling Pagkabuhay. 

SIYA ANG LUMALAPIT AT BUMABATI

2 Abril 2018 

Lunes sa Walong Araw na Pagdiriwang ng Pasko ng Muling Pagkabuhay

Mga Gawa 2, 14. 22-33/Salmo 16/Mateo 28, 8-15

Sa Ebanghelyo, ang Panginoong Hesus na Muling Nabuhay ay nagpakita sa mga babaeng pumunta sa libingan. Habang sila'y patakbong bumalik sa kinaroroonan mga apostol, sinalubong sila ng Muling Nabuhay na si Hesus sa daan. Binati ni Hesus ang mga babaeng pumunta sa libingan at isinugo sa mga apostol upang ipamalita sa mga apostol na tunay ngang Siya'y muling nabuhay. Nagpatotoo si Apostol San Pedro sa Unang Pagbasa tungkol sa pagpapakita ng Panginoong Muling Nabuhay sa kanila. Pinatay ang Panginoong Hesus sa pamamagitan ng pagpapapako sa krus, ngunit muling nabuhay sa ikatlong araw. At nang mabuhay na mag-uli, si Hesus ay nagpakita sa kanila.

Ang nakakatawag ng pansin sa mga salaysay ng mga pagpapakita ng Panginoong Muling Nabuhay ay kung paano Niyang nilalapitan at binabati ang Kanyang mga tagasunod. Siya ang unang lumalapit at bumabati. Hindi Niya iniiwasan o nilalayuan ang Kanyang mga tagasunod na Kanyang nakakatagpo. Bagkus, kusa Niyang nilalapitan at binabati ang lahat ng Kanyang mga tagasunod na Kanyang pinagpapakitaan o di kaya nakakatagpo, tulad na lamang ng Kanyang ginawa sa mga kababaihang pumunta sa libingan na isinalaysay sa Ebanghelyo. 

Nais ituro ni Kristo na kahit na Siya'y muling nabuhay, kahit iba na ang Kanyang kalagayan ng pag-iral kaysa sa iba, hindi Niya nilalayo ang Kanyang sarili mula sa atin. Bagkus, nais pa rin Niyang maging malapit sa atin. Nais Niyang lalo tayong mapalapit sa Kanyang loob. Batid Niya na tayong lahat bilang tao ay marupok. Batid Niya na tayong lahat ay makasalanan. Nahihiya tayong lumapit sa Kanya sapagkat ang ating mga kasalanan ang siyang dahilan kung bakit Siya ipinako sa krus at namatay roon. Kaya naman, nais ipakita ni Kristong Muling Nabuhay na higit na dakila ang Kanyang kapangyarihan kaysa sa kapangyarihan ng kasalanan. At tayong lahat ay nilalapitan Niya upang ating maranasan ang Kanyang pag-ibig at kagandahang-loob na Siyang dahilan ng ating kaligtasan sa pamamagitan Niya. 

Kahit hindi tayo karapat-dapat dahil sa ating mga pagkakasala, nilalapitan at binabati pa rin tayo ni Hesus. Siya ang lumalapit at bumabati sa atin. Nais ng ating Panginoon na maranasan natin ang Kanyang pag-ibig at kagandahang-loob na ugat ng ating kaligtasan. Nais ng ating Panginoon na makinabang tayo sa Kaniyang dakilang pag-ibig at kagandahang-loob na lumilinis sa atin mula sa ating mga kasalanan upang makasalo natin Siya sa banal na piging na Kanyang inihanda.