DAHIL NAIS NIYA ITONG GAWIN

4 Oktubre 2024 

Paggunita kay San Francisco de Asis 

Job 38, 1. 12-21; 40, 3-5/Salmo 138/Lucas 10, 13-16 

The Creation of Adam by Michelangelo (1475-1564), c. 1511, Sistine Chapel, Public Domain. 

Nakasentro sa mga loobin ng Diyos ang mga Pagbasa para sa araw na ito. Ang Diyos lamang ang may kapangyarihang tuparin at isagawa ang anumang Kaniyang naisin, hangarin, at loobin sa oras at panahong nais Niyang gawin ang mga ito. Bilang mga tao, wala tayong ganitong uri ng kapangyarihan. May mga pagkakataon sa buhay kung kailan kailangan nating iurong ang ating mga plano dahil sa iba't ibang dahilan. Subalit, ang mga naisin ng Diyos ay Kaniyang nagagawa sa panahong Kaniyang nais. 

Inilarawan sa Unang Pagbasa para sa araw na ito ang ilan sa mga nilikha ng Diyos. Sa pamamagitan nito, ipinaalala ng PanginoongDiyos na mayroong mundo sapagkat ito ang Kaniyang naisin. Kahit hindi naman Niya kailangang likhain ang mundo, dahil nais Niya itong gawin, ginawa Niya ito. Sa tampok na salaysay sa Ebanghelyo, ipinasiya ni Jesus Nazareno na manawagan sa mga nasabing bayan sa tampok na salaysay na ito upang magsisi at magbalik-loob sa Diyos. Dahil sa Kaniyang habag at awa, kahit na hindi naman Niya ito kailangang gawin, ipinasiya pa rin ng Poong Jesus Nazareno na gawin iyon alang-alang sa ikaliligtas ng mga nasabing pamayanan. 

Ang mga Salmong Tugunan ay isang dalangin sa Panginoon. Nakikusap sa Diyos ang tampok na mang-aawit sa Salmong Tugunan na lagi siyang samahan at gabayan sa bawat sandali ng kaniyang buhay. Dumadalangin siya sa Panginoong Diyos na loobin nawa Niyang samahan ang lingkod Niyang ito.

Maraming mga kahanga-hangang bagay ang ginawa ng Panginoong Diyos. Ang lahat ng ito ay ipinasiya Niyang gawin dahil ito ang Kaniyang loobin.

HINDI PAGALINGAN

29 Setyembre 2024 

Ika-26 na Linggo sa Karaniwang Panahon [B] 

Bilang 11, 25-29/Salmo 18/Santiago 5, 1-6/Marcos 9, 38-43. 45. 47-48

Hendrik Goltzius  (1558–1617), Man of Sorrows with a Chalice (Christ as Redeemer), Princeton University Art Museum, Public Domain.

Ipinapaalala sa atin ng Simbahan sa tulong ng mga Pagbasa para sa Linggong ito ang halaga ng pagiging mga tagapagpalaganap ng biyaya, pag-ibig, kabutihan, habag, at awa ng Diyos. Bilang mga bumubuo sa tunay na Simbahang itinatag ni Kristo, ito ang dapat nating gawin sa bawat sandali ng ating buhay sa mundong ito. Niloob ng Diyos na ipahiram sa atin ang biyaya ng buhay dito sa mundong ito upang ipalaganap ang Kaniyang biyaya, pag-ibig, kabutihan, habag, at awa. 

Sa Unang Pagbasa, ipinagtanggol ni Moises sina Eldad at Medad mula kay Josue na nagbalak pigilin ang dalawang ito dahil wala sila noong binahaginan ng Panginoong Diyos ang pitumpung matanda ng Kaniyang espiritu na Siyang nagbigay sa kanila ng kapangyarihang mangaral at magsalita sa mga Israelita. Bilang tugon, inihayag nang buong linaw ni Moises na hangad niyang maging mga tagapagpalaganap ng biyaya, pag-ibig, kabutihan, habag, at awa ng Panginoong Diyos ang lahat ng mga Israelita. 

Nagbigay ng babala si Apostol Santo Santiago sa lahat ng mga naghahasik ng lagim, kadiliman, at kasamaan sa kaniyang pangaral sa Ikalawang Pagbasa. Isa lamang ang layunin ng babalang ito ni Apostol Santo Santiago na itinampok sa Ikalawang Pagbasa - pakiusapan ang lahat ng mga nagpapalaganap ng kasamaan na magsisi at tumalikod sa kasalanan at magbalik-loob sa Diyos. Pinakikiusapan ni Apostol Santo Santiago ang lahat ng mga nagpapalaganap ng kasamaan at kasalanan na buksan ang kanilang mga sarili sa Diyos at pahintulutan Siyang baguhin ang kanilang buhay. 

Gaya ni Moises sa Unang Pagbasa, hindi pinagbawalan ng Poong Jesus Nazareno ang mga nagpapalayas ng mga demonyo sa Kaniyang Ngalan kahit na hindi sila kasama sa mga apostol. Bilang tugon sa balitang ito mula kay Apostol San Juan, inihayag ng Poong Jesus Nazareno nang buong linaw na hindi naman sila mga kalaban, karibal, o kakompitensya sapagkat binuksan nila ang kanilang mga sarili sa Diyos. 

Bilang mga Kristiyano, mayroon tayong misyong ipalaganap ang kabutihan, biyaya, pag-ibig, habag, at awa ng Diyos sa lahat. Hindi ito kompetisyon o pagalingan. Isa lamang ang ating misyon. Wala tayong kakompitensya o karibal. Tulong-tulong tayo sa pagtupad ng misyong ibinigay sa atin ng Panginoong Diyos. 

PINABABANAL NIYA ANG LAHAT

28 Setyembre 2024 

Dakilang Kapistahan ng Pagtatalaga ng Dambana ng Simbahan ng Quiapo 

Ezekiel 47, 1-2. 8-9. 12/Salmo 45/1 Corinto 3, 9k-11. 16-17/Juan 4, 19-24 

Ang araw na ito ay napakahalaga para sa lahat ng mga bumubuo sa pamayanan ng Simbahan ng Quiapo. Bagamat ang araw na ito ay inilaan para sa paggunita sa Unang Pilipino Santo at Martir ng Simbahan na si San Lorenzo Ruiz, para sa lahat ng mga bumubuo sa pamayanan ng Simbahan ng Quiapo, ang araw na ito ay inilaan upang gunitain at ipagdiwang ang Pagtatalaga ng Dambana ng nasabing Simbahan. Dahil dito, ibang-iba sa mga panalangin at Pagbasa sa mga Misa sa ibang mga Simbahan sa iba't ibang bahagi ng Republika ng Pilipinas sa mga panalangin at Pagbasa sa mga Misa sa Simbahan ng Quiapo sa araw na ito. 

Ipinapaalala sa atin ng Inang Simbahan sa araw na ito na inilaan para sa pagdiriwang ng Dakilang Kapistahan ng Pagtatalaga ng Dambana ng Simbahan ng Quiapo na isa lamang ang nagpapabanal sa lahat ng bagay - ang Panginoong Diyos. Dahil dito, ang tawag sa mga Simbahan gaya na lamang ng makasaysayang Simbahan ng Quiapo ay mga bahay-dalanginan. Ang Simbahan ay tahanan ng Panginoon. Sa Simbahan, ang Diyos ay nananahan. Tumutungo tayo sa Simbahan, sa bahay ng Panginoong Diyos, upang manalangin sa Kaniya. Bagamat lagi naman tayong sinasamahan ng Mahal na Poon saanman tayo magtungo, mas ramdam natin ang Kaniyang presensya sa mga bahay-dalanginan gaya na lamang Simbahan ng Quiapo. 

Sa Unang Pagbasa, ang templo ng Diyos ay inilarawan bilang ilang isang daluyan ng mga biyayang kaloob Niya sa lahat. Sa larawan ng templo ng Panginoong Diyos, mga bahay-dalanginan, bilang isang daluyan ng Kaniyang mga biyaya nakatuon ang mga salitang buong linaw na binigkas ng tampok na mang-aawit sa Salmong Tugunan. Sa Ikalawang Pagbasa, inihayag ni Apostol San Pablo na banal ang ating mga katawan dahil ang mga ito ay itinalaga ng Diyos bilang Kaniyang mga templo. Sa Ebanghelyo, buong linaw na inihayag ng Panginoong Jesus Nazareno na ang Diyos ay sasambahin ng lahat sa espiritu at sa katotohanan. 

Dahil sa presensya ng Panginoong Diyos, ang mga bahay-dalanginan gaya na lamang ng Simbahan ng Quiapo ay mga sagradong pook. Pinababanal ng Panginoong Diyos ang lahat ng mga itinalaga Niyang bilang Kaniyang tahanan. Ang nagpapabanal sa lahat ay walang iba kundi ang Diyos na Siyang bukal ng lahat ng kabanalan. 

AYON SA PLANO NG DIYOS

27 Setyembre 2024 

Paggunita kay San Vicente de Paul, pari

Mangangaral 3, 1-11/Salmo 143/Lucas 9, 18-22

SCREENSHOT: #PABIHIS sa Mahal na Poong Jesus Nazareno | 12 September 2024 (Huwebes) (Facebook and YouTube) 

Ipinapaalala sa atin ng mga Pagbasa na nangyayari ang lahat ng bagay ayon sa plano at kalooban ng Diyos. Anuman ang naisin at loobin ng Diyos, ito ay mangyayari. Siya lamang ang may kapangyarihang gawin ang anumang Kaniyang naisin. Hindi natin ito masasabi tungkol sa ating mga sarili sapagkat hindi natin taglay ang ganoong uri ng kapangyarihan bilang mga tao. Tanging ang Diyos lamang ang mayroon nito. 

Sa Unang Pagbasa, inilahad ang isang napakahalagang paalala. Ang Diyos lamang at wala nang iba pa ang bukod tanging makapagtutupad ng Kaniyang mga naisin. Kapag niloob at pinahintulutan ng Diyos ang isang bagay, mangyayari iyon. Hindi ito kayang gawin natin bilang tao. Walang sinumang tao sa mundo ang nagtataglay ng ganitong uri ng kapangyarihan. Limitado tayo bilang tao. Mayroon tayong mga limitasyon sa buhay natin sa daigdig na ito. Ngunit, nagagawa ng Panginoong Diyos ang anumang Kaniyang naisin at loobin. 

Ang Ebanghelyo para sa araw na ito ay nakatuon sa misyon ni Jesus Nazareno bilang ipinangakong Mesiyas at Manunubos. Sa unang bahagi ng salaysay sa Ebanghelyo, buong lakas na inihayag ng unang Santo Papa ng Simbahan na si Apostol San Pedro na si Jesus Nazareno ay ang ipinangakong Mesiyas at Manunubos na ipinagkaloob ng Diyos. Inilarawan naman ni Jesus Nazareno sa mga apostol sa ikalawang bahagi ng tampok na salaysay sa Banal na Ebanghelyo na dapat Siyang magbata ng maraming hirap, pagdurusa, sakit, at kamatayan sa Krus na Banal para sa ikaliligtas ng buong sangkatauhan bilang ipinangakong Mesiyas at Manunubos. Subalit, ang Panginoong Jesus Nazareno ay hindi mananatiling patay sapagkat mabubuhay Siyang mag-uli sa ikatlong araw. Ito ang naging plano ng Diyos. Darating sa mundong ito ang Kaniyang Bugtong na Anak na walang iba kundi ang Panginoong Jesus Nazareno upang iligtas mula sa kasalanan ang sangkatauhang iniibig Niya nang lubusan sa pamamagitan ng Kaniyang Krus at Muling Pagkabuhay. 

Dahil sa dakilang pag-ibig ng Diyos, bumuo Siya ng plano upang iligtas tayo mula sa kasalanan. Niloob Niyang iligtas tayo. Ginawa Niya iyon. 

TAPAT AT TAOS-PUSONG PAGTANGGAP SA KANIYA

22 Setyembre 2024 

Ika-25 Linggo sa Karaniwang Panahon [B] 

Karunungan 2, 12. 17-20/Salmo 53/Santiago 3, 16-4, 3/Marcos 9, 30-37

This faithful photographic reproduction of the painting (c. Between 1625 and 1630) Christ in the Garden of Olives (fragment) by Gaspar de Crayer (1584–1669), as well as the actual work of art itself from the Rubenshuis which is available from the Netherlands Institute for Art History is in the Public Domain (PDM 1.0 - Public Domain Mark 1.0 Universal - "No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

Ang mga Pagbasa para sa Linggong ito ay nakasentro sa pagiging bukas sa Diyos. Sa pamamagitan ng pagbubukas ng ating mga sarili sa Panginoon, binibigyan natin Siya ng pahintulot na maghari sa ating buhay. Pinahihintulutan rin natin ang Panginoong Diyos na baguhin ang ating mga buhay. Ipinapahayag natin sa pamamagitan nito ang taos-puso nating hangaring isentro ang ating buhay sa Kaniya. 

Sa Unang Pagbasa, inilarawan ang mga naranasan ng mga lingkod ng Diyos gaya na lamang ng mga propetang Kaniyang hinirang at itinalaga sa Lumang Tipan. Hindi nila matanggap na mula sa Panginoon ang ipinangangaral ng Kaniyang mga lingkod gaya ng mga propeta. Sa halip na buksan ang kanilang mga puso at isipan sa Diyos, ang pintuan ng kanilang mga puso at loobin ay ipinasiya nilang isara. Ipininid pa nga nila ito. Kahit na tinutupad lamang ng mga lingkod ng Panginoong Diyos ang misyon at tungkuling bigay Niya sa kanila, hindi sila tinanggap ng marami. Walang tigil na pag-uusig ang kanilang tinanggap mula sa kanila. 

Ipinaliwanag naman sa Salmong Tugunan ang dahilan kung bakit ang mga tapat na lingkod ng Diyos ay hindi tumitigil sa paglilingkod sa Kaniya. Sa kabila ng mga hirap, sakit, at pagsubok sa buhay, ipinasiya pa rin nilang ialay ang kanilang buong sarili sa Kaniya. Kahit na napakahirap itong gawin dahil tila sila lamang ang gumagawa noon, ang Panginoong Diyos ay pinili pa rin nilang ibigin, paglingkuran, at sambahin nang buong katapatan. Ang mga salitang binigkas ng tampok na mang-aawit sa Salmong Tugunan ay ipinasiya nilang paniwalaan at isabuhay hanggang sa huli. Buong linaw na winika ng tampok na mang-aawit sa Salmong Tugunan para sa Linggong ito: "Ang D'yos ang S'yang tumutulong at sa aki'y nagtatanggol" (Salmo 53, 6b). Dahil dito, ang mga tapat na lingkod ng Diyos ay hindi tumigil sa paglilingkod sa Kaniya. 

Nakasentro sa tapat at taos-pusong pagtanggap at pagsunod sa kalooban ng Diyos ang pangaral ni Apostol Santo Santiago sa Ikalawang Pagbasa. Sabi ni Apostol Santo Santiago na mayroong malinis at dalisay na pamumuhay ang mga tumatanggap sa karunungang nagmumula sa Panginoon (Santiago 3,17). Ang lahat ng mga nagnanais maglingkod sa Panginoon ay dapat maging bukas sa Kaniya. Dapat nating buksan ang ating mga sarili sa mga biyayang kaloob Niya, lalung-lalo na sa biyaya ng bagong buhay bilang mga tapat na lingkod ng Panginoong Diyos. Kailangan nating bigyan ng pahintulot ang Panginoon upang baguhin tayo. Ito ang kailangan nating gawin nang sa gayon ay maging tapat at dalisay ang ating paglilingkod sa Kaniya. 

Mayroong dalawang bahagi ang Ebanghelyo. Sa unang bahagi ng Ebanghelyo, muling inihayag ng Poong Jesus Nazareno sa mga apostol kung ano ang kailangan Niyang gawin bilang ipinangakong Mesiyas at Manunubos. Kailangan Niyang magpakasakit at mamatay sa Krus Niyang Kabanal-banalan bago ang maluwalhati Niyang Muling Pagkabuhay sa ikatlong araw. Ang mga salitang Kaniyang binigkas sa mga apostol sa ikalawang bahagi ng Ebanghelyo ay nakasentro sa tapat at taos-pusong pagtanggap sa Kaniya. Nais ni Jesus Nazareno na maging tapat at taos-puso ang pagtanggap sa Kaniya ng tanan. Kaya naman, inihayag ng Mahal na Poong Jesus Nazareno na dapat maging mga lingkod ang mga nagnanais maging dakila. Isinasalungguhit ng Mahal na Poong Jesus Nazareno sa mga salitang ito na hindi naman pagalingan ang pagiging banal at kalugud-lugod sa paningin ng Diyos. Bagkus, ang pagiging banal at kalugud-lugod sa paningin ng Panginoong Diyos ay tungkol sa pagiging tapat, dalisay, at taos-puso sa pagbukas at paghahandog ng sarili sa Kaniya bilang Panginoon at Hari. 

Hinahanap ng Diyos ang mga tapat at taos-pusong magbubukas at maghahandog ng buo nilang sarili sa Kaniya. Ito ba ang ating gagawin? 

PAGHAHANAP SA TUNAY NA GALAK AT KALIGAYAHAN

20 Setyembre 2024

Paggunita kina San Andres Kim Taegon, pari at martir, San Pablo Chong Hasang, at mga kasama, mga martir 

1 Corinto 15, 12-20/Salmo 16/Lucas 8, 1-3 

Ipinakilala sa maikling salaysay sa Ebanghelyo para sa araw na ito ang mga babaeng nagpasiyang maglingkod sa Poong Jesus Nazareno. Kusang-loob na ipinasiya ng mga babaeng ito na ialay ang kanilang mga sarili sa taos-pusong paglilingkod sa Mahal na Poong Jesus Nazareno. Sa piling ng Poong Jesus Nazareno, ang tunay na kaligayahan ay kanilang nasumpungan. Bilang pasasalamat sa Mahal na Poong Jesus Nazareno, kusang-loob nilang inihandog ang kanilang mga sarili sa Kaniya. 

Ang pangaral ni Apostol San Pablo na itinampok at inilahad sa Unang Pagbasa para sa araw na ito ay nakatuon sa pinakadakilang biyayang ipinagkaloob ng Panginoong Diyos sa tanan. Katunayan, ang pinakadakilang biyayang ito ay ang pinakadakilang himalang ginawa ng Diyos. Ito ay walang iba kundi ang Muling Pagkabuhay ng Mahal na Poong Jesus Nazareno. Si Jesus Nazareno ay hindi nanatiling patay. Bagkus, muli Siyang nabuhay sa ikatlong araw. Matapos mamatay sa Krus na Banal, nabuhay na mag-uli ang Panginoong Jesus Nazareno. Hindi nagtapos sa kamatayan ang misyon ng Nuestro Padre Jesus Nazareno. Matapos mamatay sa Krus, muli Siyang nabuhay. Dahil ipinasiya ng Diyos na ipagkaloob sa atin ang pinakadakilang biyayang ito, ang bawat isa sa atin ay puspos ng tunay na galak at ligaya. 

Sa Salmong Tugunan, ang Panginoong Diyos ay ipinakilala bilang dahilan ng galak ng Kaniyang mga lingkod. Bilang mga bumubuo sa tunay na Simbahang tatag ni Kristo, maaari natin itong ituring na isang napakahalagang paalala para sa ating lahat. Ang tunay na galak at kaligayahan ay hindi natin matatagpuan. Bagkus, sa Diyos lamang natin ito matatagpuan at masusumpungan. Ito ang tanging dahilan kung bakit ang lahat ng mga lingkod ng Diyos ay puspos ng galak, sa kabila ng mga hirap, sakit, at pagsubok sa buhay dito sa mundo. 

Bagamat marami tayong hinaharap na hirap, sakit, at pagsubok sa buhay sa mundo, matatagpuan at masusumpungan pa rin natin ang tunay na galak at kaligayahan. Sa piling ng Diyos lamang natin ito matatagpuan at masusumpungan. Ang lahat ng mga banal ay napuspos ng tunay na galak at kaligayahan, kahit na namumuhay pa sila sa mundong ito. Ito ay dahil naging bukas sila sa tunay na galak at kaligayahang kaloob sa kanila ng Diyos. Sa kabila ng mga hirap, sakit, at pagsubok sa buhay, napuspos pa rin sila ng tunay na galak at kaligayahan sapagkat naging bukas sila sa Diyos. 

Hinahanap ba natin ang tunay na galak at kaligayahan? Sa Diyos lamang natin ito matatagpuan at masusumpungan. Isa lamang ang kailangan nating gawin - buksan ang ating mga puso at loobin sa Kaniya. 

MGA PUSONG PUSPOS NG GALAK

8 Setyembre 2024 

Ika-23 Linggo sa Karaniwang Panahon [B] 

Isaias 35, 4-7a/Salmo 145/Santiago 4, 1-5/Marcos 7, 31-37 

This faithful photographic reproduction of the painting (c. 1635) Jesus Healing a Deaf-mute by Bartholomeus Breenbergh (1598–1657), as well as the actual work of art itself from the Louvre Museum, is in the Public Domain in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

"Kalul'wa ko, 'yong purihin ang Panginoong butihin" (Salmo 145, 1). Nakatuon sa mga salitang ito na binigkas ng tampok na mang-aawit sa Salmong Tugunan ang taimtim na pagninilay ng Inang Simbahan sa Linggong ito. Isa lamang ang layunin ng mang-aawit na itinampok sa Salmong Tugunan sa pamamagitan ng mga salitang ito - ang lahat ay anyayahang magpuri at magpasalamat sa Diyos nang buong galak. 

Sa Unang Pagbasa, inihayag ng Panginoong Diyos sa pamamagitan ni Propeta Isaias ang isang balitang magdudulot ng ligaya, galak, at tuwa sa tanan. Ang mga bulag ay makakakita, ang mga bingi ay makakarinig, ang mga pilay ay makalulundag, at buong galak na aawit ang mga pipi (Isaias 35, 5-6). Mangyayari ito dahil ito ay kalooban ng Diyos. Kaya naman, ang mga salitang ito ng Panginoong Diyos na inilahad ni Isaias na propetang Kaniyang hirang ay isang pangako mula sa Kaniya. Ang dahilan kung bakit ipinasiya ng Panginoon na bitiwan ang nasabing pangako ay walang iba kundi ang habag at awa Niyang kahanga-hangang tunay. 

Tampok sa Ebanghelyo ang salaysay ng pagpapagaling ng Poong Jesus Nazareno sa isang lalaking bingi at utal. Sa pamamagitan ng kahanga-hangang himalang ito, ang Poong Jesus Nazareno ay nagpakita ng habag at awa sa lalaking ito. Niloob ng Mahal na Poong Jesus Nazareno na biyayaan ang lalaking ito ng pagkakataong makarinig at makapagsalita. Layunin ng Mahal na Poong Jesus Nazareno na magpakilala sa lahat bilang Panginoong puspos ng habag at awa para sa lahat. Pinatunayan nga Niya ito sa pamamagitan ng himalang ito na tunay ngang kahanga-hanga. 

Ipinapaalala sa atin ni Apostol Santo Santiago sa Ikalawang Pagbasa kung ano nga ba ang dapat nating gawin bilang mga Kristiyano. Bilang mga Kristiyanong nananalig at sumusunod sa Mahal na Poong Jesus Nazareno, ang ating tungkulin ay ibahagi sa lahat ang Kaniyang habag at awa. Wala tayong dapat itinatangi sapagkat ipinagkakait natin ang habag at awa ni Jesus Nazareno kapag ito ang ating ipinasiyang gawin. Ang dapat nating gawin ay ibahagi sa lahat ang habag at awa ng Poong Jesus Nazareno. Kapag ipinasiya natin itong gawin, pinatutunayan nating sa Kaniya nagmumula ang galak at pag-asa sa ating mga puso. 

Ang tunay na dalisay at taos-pusong papuri sa Diyos ay nagmumula lamang sa mga magbubukas ng kanilang mga puso sa galak at pag-asang Kaniyang kaloob. Maging bukas nawa tayo sa galak at pag-asang bigay sa atin ng Panginoong Jesus Nazareno upang maging tunay ngang dalisay at taos-pusong ang ating pag-aalay ng papuri at pasasalamat sa Kaniya. 

KALIGTASAN AT KALAYAAN

14 Setyembre 2024 

Kapistahan ng Pagtatampok sa Krus na Banal 

Mga Bilang 21, 4b-9/Salmo 77/Filipos 2, 6-11/Juan 3, 13-17

This faithful photographic reproduction of the painting (c. 1640) Christ on the Cross by Jan Boeckhorst (–1668), as well as the actual work of art itself from a Private collection via Web Gallery of Art, is in the Public Domain (PDM 1.0 - Public Domain Mark 1.0 Universal - "No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Sabi sa Antipona sa Pagpasok para sa Banal na Misa sa araw na ito: "Krus ng ating kaligtasan dapat nating ikarangal, sagisag ng kalayaan at ng Muling Pagkabuhay ni Hesus na ating mahal" (Galacia 6, 14). Nakatuon sa mga salitang ito ang taimtim na pagninilay ng Simbahan sa araw na ito. Bilang mga bumubuo sa tunay na Simbahang itinatag ng ipinangakong Mesiyas na si Jesus Nazareno, pinahahalagahan natin nang lubusan ang Kaniyang Kabanal-Banalang Krus. Kaligtasan at kalayaan ay ibinigay sa ating lahat ng Panginoong Jesus Nazareno sa pamamagitan ng Kaniyang Kabanal-Banalang Krus at Muling Pagkabuhay. 

Tampok sa Unang Pagbasa para sa araw na ito ang salaysay ng pasiya ng Diyos na pagkalooban ng buhay at kaligtasan ang mga Israelita sa ilang sa pamamagitan ng ahas na tanso. Inutusan ng Panginoong Diyos si Moises na gumawa ng isang ahas na tanso upang magkaroon ng buhay at kagalingan ang mga Israelitang tumingin dito, kahit na tinuklaw sila ng mga makamandag na ahas. Ang mga Israelitang iniligtas at pinalaya Niya mula sa pagkaalipin sa Ehipto ay nagreklamo at binaon sa limot ang Kaniyang mga ginawa para sa kanila. Dahil dito, ang Diyos ay nagpadala ng mga makamandag na ahas upang patayin sila bilang parusa. Subalit, hindi nagtagal at ang Diyos ay nagpasiyang iligtas ang mga Israelitang nagmakaawa sa Kaniya. Hindi Niya ipinagkait sa mga Israelita sa ilang ang Kaniyang habag at awa, sa kabila ng kanilang pagkalimot sa Kaniyang mga kahanga-hangang gawa. 

Ang mga salita sa Salmong Tugunan ay isang napakahalagang paalala para sa ating lahat na bumubuo sa tunay na Simbahang itinatag ni Kristo: "Hindi nila malilimot ang dakilang gawa ng D'yos" (Salmo 77, 7k). Hindi natin dapat limutin ang lahat ng mga gawa ng Panginoon na tunay ngang dakila. Ang pinakadakilang gawa ng Diyos ay ang pagligtas sa atin sa pamamagitan ng Krus at Muling Pagkabuhay ng Mahal na Poong Jesus Nazareno, ang ipinangakong Mesiyas at Manunubos. Ito ang tanging dahilan kung bakit lubos nating pinahahalagahan ang Kaniyang Banal na Krus. 

Sa misteryo ng Kabanal-Banalang Krus ng Mahal na Poong Jesus Nazareno nakatuon ang pangaral ni Apostol San Pablo sa Ikalawang Pagbasa. Inilarawan ni Apostol San Pablo kung paanong ang kababaang-loob ng Poong Jesus Nazareno ay nagdulot ng kaligtasan sa lahat. Ang Poong Jesus Nazareno ay nagpasiyang maging mababang-loob alang-alang sa atin. Dahil sa kababaang-loob ni Jesus Nazareno na inihayag ng Banal na Krus, tayong lahat ay nagkaroon ng kaligtasan at kalayaan. 

Inilarawan sa Ebanghelyo ang dahilan kung bakit ipinasiya ng Diyos na ipagkaloob sa atin ang Poong Jesus Nazareno bilang ipinangakong Mesiyas at Manunubos. Sabi sa tampok na pahayag sa Ebanghelyo na dakilang pag-ibig ang dahilan kung bakit ang Poong Jesus Nazareno ay ipinagkaloob ng Diyos bilang Mesiyas at Manunubos. Kahit na hindi naman Niya ito kinailangang gawin, ipinasiya pa rin Niya itong gawin dahil sa dakila Niyang pag-ibig para sa atin. 

Tunay ngang dakila ang pag-ibig ng Diyos. Kahit na hindi tayo karapat-dapat dahil sa dami ng ating mga kasalanan, ipinasiya pa rin Niya tayong pagkalooban ng kaligtasan at kalayaan dahil sa Kaniyang dakilang pag-ibig para sa atin. Ang Kabanal-Banalang Krus ng Poong Jesus Nazareno ay ang pinakadakilang patunay nito. 

DALISAY NA PAG-IBIG AT KATAPATAN

13 Setyembre 2024 

Paggunita kay San Juan Crisostomo, obispo at pantas ng Simbahan 

1 Corinto 9, 16-19. 22b-27/Salmo 83/Lucas 6, 39-42 

SCREENSHOT: #PABIHIS sa Mahal na Poong Jesus Nazareno | #QuiapoChurch - 05Agosto 2024 (Lunes) (Facebook and YouTube)

Nakasentro sa halaga ng dalisay na pag-ibig at katapatan ang mga Pagbasa para sa araw na ito. Layunin ng Simbahan na paalalahanan ang bawat isa sa atin tungkol sa dapat maging bunga ng taos-pusong debosyon at pamamanata sa Mahal na Poong Jesus Nazareno sa pamamagitan ng taimtim na pagninilay sa halaga ng dalisay na pag-ibig at katapatan sa Kaniya. Ang tunay na debosyon at pamamanata sa Mahal na Señor ay dapat maging daan tungo sa pagkakaroon ng dalisay na katapatan at pag-ibig para sa Kaniya.  

Sa Unang Pagbasa, inilarawan ni Apostol San Pablo na handa siyang gawin ang lahat upang si Kristo ay maipakilala sa lahat, kahit na nangangahulugang kailangan niyang mamuhay bilang isang alipin. Sa Salmong Tugunan, buong linaw at lakas ng loob na inihayag ng tampok na mang-aawit nito na lubos niyang pinahahalagahan at iniibig ang templo ng Diyos dahil sa presensya ng Diyos na nananahan dito. Sa Ebanghelyo, nangaral ang Poong Jesus Nazareno tungkol sa dalisay na pag-ibig at katapatan. Ang pag-ibig at katapatan sa Panginoong Diyos ay hindi dapat gawing palabas. Bagkus, dapat itong isabuhay bilang patunay ng pagiging taos-puso at dalisay nito. 

Hindi naghahanap ng Nuestro Padre Jesus Nazareno ng mga mahuhusay na alagad ng sining. Bagkus, ang hinahanap ng Nuestro Padre Jesus Nazareno ay mga pusong puspos ng dalisay na pag-ibig at katapatan sa Kaniya. 

ISANG PATUNAY

15 Setyembre 2024 

Ika-24 na Linggo sa Karaniwang Panahon [B] 

Isaias 50, 5-9a/Salmo 114/Santiago 2, 14-18/Marcos 8, 27-35 

This faithful photographic reproduction of the painting La Flagelación de Cristo by Anton Raphael Mengs (1728–1779), as well as the work of art itself from the Royal Palace of Madrid, is in the Public Domain (PDM 1.0 - Public Domain Mark 1.0 - Universal - "No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

"Mga kapatid, ano ang mapapala ng isang tao kung sabihin man niyang siya'y may pananampalataya, ngunit hindi naman niya [ito] pinatutunayan sa gawa? Maililigtas ba siya ng gayong pananampalataya?" (Santiago 2, 14). Sa mga salitang ito ni Apostol Santo Santiago na itinampok at inilahad sa Ikalawang Pagbasa nakatuon ang taimtim na pagninilay ng Simbahan sa Linggong ito. Isinasalungguhit sa mga salitang ito ang ugnayan ng pananamapalataya at gawa. Bilang mga bumubuo sa Simbahan tatag ni Kristo mismo, dapat nating isabuhay ang ating pananampalataya. 

Inilahad sa unang dalawang taludtod ng Salmong Tugunan ang isang maikling buod ng kasaysayan ng pagligtas at pagpapalaya ng Panginoon sa mga Israelita mula sa pagkaalipin sa Ehipto. Ang kahanga-hangang gawang ito ng Diyos ay nagpatunay ng Kaniyang pag-ibig, habag, at awa para sa Kaniyang bayan. Hindi lamang inihayag sa mga ang Kaniyang pag-ibig, habag, at awa sa pamamagitan ng Kaniyang mga salita sa Kaniyang lingkod na si Moises. Pinatunayan pa Niya ito. 

Ang Unang Pagbasa at Ebanghelyo ay tungkol sa misyon ng ipinangakong Mesiyas at Manunubos na walang iba kundi ang Panginoong Hesukristo, ang Nazareno. Inihayag sa Unang Pagbasa na si Jesus Nazareno ay magbabata ng maraming hirap, sakit, at pagdurusa bilang Mesiyas at Manunubos na bigay ng Diyos. Sa Ebanghelyo, matapos ihayag ng unang Santo Papa ng Simbahan na walang iba kundi si Apostol San Pedro na si Jesus Nazareno ay ang ipinangakong Mesiyas at Manunubos na kaloob ng Diyos para sa ikaliligtas ng sangkatauhan, inilarawan naman ng Poong Jesus Nazareno ang kailangan Niyang gawin bilang ipinangakong Mesiyas at Manunubos. Ang pag-ibig, habag, at awa ng Diyos ay patutunayan ng Mahal na Poong Jesus Nazareno sa buong sangkatauhan lahat sa pamamagitan ng Kaniyang Misteryo Paskwal. 

Pati ang Diyos, pinatutunayan ang Kaniyang mga salita. Ang mga kahanga-hangang himala ng Diyos na ginawa Niya noon, sa kasalukuyan, at maging sa kinabukasan ay mga patunay ng Kaniyang dakilang pag-ibig, habag, at awa para sa lahat. Katunayan, ang Krus at Muling Pagkabuhay ng Mahal na Poong Jesus Nazareno, ang Kaniyang Bugtong na Anak na ipinagkaloob Niya sa tanan bilang ipinangakong Mesiyas, ay ang pinakadakilang patunay ng Kaniyang dakilang pag-ibig, habag, at awa para sa lahat. Hindi lamang Niya inihayag ang Kaniyang mga salita sa pamamagitan ng mga salita lamang. Bagkus, pinatunayan Niya ito sa pamamagitan ng Kaniyang mga gawa. 

Kaya naman, ang sabi ng Poong Jesus Nazareno sa huling bahagi ng Ebanghelyo na ang mga naghahangad na maging Kaniyang mga tagasunod ay dapat kalimutan ang sarili, pasanin ang kani-kanilang mga krus, at sumunod sa Kaniya (Marcos 8, 34). Sa pamamagitan nito, mapapatunayan ang taos-pusong pananalig at pananampalataya ng bawat isa. Ito ang dapat nating gawin bilang Simbahan. 

Hindi lamang sa pamamagitan ng mga salita nahahayag ang ating pananampalataya bilang Simbahan. Bagkus, ito ay dapat nating isabuhay araw-araw. Kung paanong inihayag ng Panginoong Diyos ang Kaniyang pag-ibig, habag, at awa sa pamamagitan ng Kaniyang mga salita at gawa, dapat rin nating ihayag ang ating taos-pusong pag-ibig, pananalig, katapatan, debosyon, pamamanata, pananampalataya, at pagsamba sa Kaniya na Siyang umiibig sa atin nang buong katapatan. 

NAGAGALAK SA DIYOS ANG KANIYANG MGA TAPAT NA LINGKOD

6 Setyembre 2024 

Biyernes ng Ika-22 Linggo sa Karaniwang Panahon (II) 

1 Corinto 4, 1-5/Salmo 36/Lucas 5, 33-39 

SCREENSHOT: QUIAPO CHURCH 6AM #OnlineMass • 25 August 2024 • 21st Sunday in Ordinary Time (Facebook and YouTube)

Isinasalungguhit ng mga Pagbasa para sa araw na ito ang katotohanan tungkol sa galak ng mga naglilingkod sa Diyos nang buong katapatan. Ang Diyos lamang ay ang bukod tanging dahilan kung bakit nagagalak ang lahat ng mga naglilingkod sa Kaniya nang buong katapatan. Sa kabila ng mga hirap, pagsubok at pagdurusa sa buhay sa mundong ito, ang mga tapat na lingkod ng Diyos ay nagagalak dahil Siya lamang ang dahilan ng kanilang galak. Ang kanilang galak ay ang pinagmulan nito na walang iba kundi ang Panginoong Diyos. 

Galak para sa lahat ng mga Kristiyano ang hatid ng mga salita ni Apostol San Pablo sa Unang Pagbasa. Inihayag ni Apostol San Pablo ang dahilan kung bakit ang lahat ng mga tapat na lingkod ng Diyos ay dapat magalak. Ang Panginoon na nakakakilala sa atin ay darating muli. Sa Salmong Tugunan, inilarawan kung ano ang ipagkakaloob ng Panginoon sa lahat - kaligtasan. Ang lahat ng mga matutuwid at banal ay Kaniyang ililigtas (Salmo 36, 39a). Isa itong balitang naghahatid ng galak sa lahat. Sa Banal na Ebanghelyo, inihayag ng Mahal na Poong Jesus Nazareno sa mga eskriba at Pariseo na nagagalak at nagdiriwang ang lahat kapag sila'y nasa piling ng lalaking ikakasal na walang iba kundi Siya mismo. May galak sa piling ng Poong Jesus Nazareno. 

Ang tapat na debosyon at pamamanata sa Nuestro Padre Jesus Nazareno ay maging daan nawa patungo sa pagkamit ng tunay na kaligayahan sa Kaniyang piling. Ito ay makakamit natin kapag isinabuhay natin ang ating tapat at taos-pusong debosyon at pamamanata sa Poong Jesus Nazareno. 

SALAMIN NG PUSO

1 Setyembre 2024 

Ika-22 Linggo sa Karaniwang Panahon [B] 

Deuteronomio 4, 1-2. 6-8/Salmo 14/Santiago 1, 17-18. 21b-22. 27/Marcos 7, 1-8. 14-15. 22-23 

This faithful photographic reproduction of the painting (c. 1523) Christ before Caiaphas (from The Passion altarpiece) by Hans Holbein the Younger (1497/1498–1543), as well as the actual work of art itself from the Kunstmuseum Basel, is in the Public Domain (PDM 1.0 - Public Domain Mark 1.0 Universal - "No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Winika ng Poong Jesus Nazareno sa Ebanghelyo: "Hindi ang pumapasok sa bibig ng tao ang nakapagpaparumi sa kaniya sa mata ng Diyos kundi ang mga nagmumula sa kaniya" (Marcos 7, 15). Sa mga salitang ito na binigkas ng Poong Jesus Nazareno sa Ebanghelyo nakatuon ang pagninilay ng Simbahan. Buong linaw na isinasalungguhit ng Mahal na Poong Jesus Nazareno sa mga salitang ito ang ugnayan ng puso sa mga salita't gawa ng mga tao. Ang mga salitang binibigkas ng bawat tao at ang kanilang mga kilos ay sumasalamin sa tunay na laman ng kanilang mga puso at isipan. 

Buong linaw na inihayag ni Moises sa mga Israelita sa tampok na salaysay sa Unang Pagbasa na dapat nilang sundin ang mga utos ng Panginoong Diyos. Hindi nila dapat dagdagan o bawasan ang mga utos ng Panginoong Diyos (Deuteronomio 4, 2). Iyon nga lamang, ang bilin na ito ay hindi sinunod ng mga Pariseo at eskriba sa tampok na salaysay sa Ebanghelyo. Kaya, tinawag silang mapagpaimbabaw ng Mahal na Poong Jesus Nazareno sa Ebanghelyo. Sinuway nila ang bilin ni Moises sa mga Israelita sa Unang Pagbasa. Huwag dagdagan o bawasan ang mga utos ng Diyos. Pinahihirapan lamang nila ang mga tao dahil dinadagdagan nila ang mga utos ng Diyos. 

Para sa Poong Jesus Nazareno, napakalinaw na walang balak ang mga Pariseo at ang mga eskriba na tulungan ang mga tao na sundin ang mga utos ng Diyos. Sa halip na tulungan sila, pinahirapan pa nila lalo. Ang mga tao ay ipinipilit nilang gawin ang mga bagay na hindi naman kailangang gawin. 

Hindi tutol ang Mahal na Poong Jesus Nazareno sa paghuhugas ng mga kamay. Ang tinututulan ng Poong Jesus Nazareno ay ang pagiging mga pasakit sa kapwa. Labis na tinututulan at kinasusuklaman ng Panginoong Jesus Nazareno ang pang-aapi at panlalamang sa kapwa, lalung-lalo na yaong mga tinuturing na maliliit. 

Isinalungguhit sa Salmong Tugunan ang halaga ng pagiging masunurin sa mga utos ng Diyos. Sa Ikalawang Pagbasa, nakiusap si Apostol Santo Santiago sa lahat ng mga Kristiyano na sundin ang mga utos ng Diyos. Ito ang dapat nating gawin bilang mga tapat na lingkod at tagasunod ni Jesus Nazareno. Mamuhay nang banal at kalugud-lugod sa paningin ng Panginoong Diyos. 

Tayong lahat ay pinaalalahanan sa Linggong ito na dapat maghari sa ating buhay ang Diyos. Ang mga utos at tuntunin ng Mahal na Poong Jesus Nazareno ay dapat nating sundin nang buong katapatan at pananalig. 

PAGHAHANDA PARA SA BUHAY NA WALANG HANGGAN

30 Agosto 2024 

Biyernes ng Ika-21 Linggo sa Karaniwang Panahon (II) 

1 Corinto 1, 17-25/Salmo 32/Mateo 25, 1-13 

Ang Ebanghelyo para sa araw na ito ay tungkol sa talinghaga ng sampung dalaga. Sa pamamagitan ng talinghagang ito, ipinapaalala sa atin ng Poong Jesus Nazareno na lagi tayong binibigyan ng pagkakataong paghandaan ang Kaniyang pagdating. Sabi sa Kredo na muli Siyang babalik bilang Hukom ng mga nangabubuhay at nangamatay na tao. Kaya naman, habang patuloy tayong namumuhay at naglalakbay sa mundong ito nang pansamantala, dapat nating paghandaan ang ating mga sarili para sa buhay na walang hanggan sa piling ng Mahal na Poong Jesus Nazareno sa Kaniyang kaharian sa langit. Kailangang nating tahakin ang landas ng kabanalan. Dapat natin gawin ito bilang mga Kristiyano. 

Sa Unang Pagbasa, nagsalita si Apostol San Pablo tungkol sa kaniyang misyon bilang apostol at misyonero. Ang misyong ito ay ipinagpapatuloy ng Simbahan sa panahong kasalukuyan. Bilang apostol at misyonero, ipinapakilala ni Apostol San Pablo si Jesus Nazareno sa lahat. Ipinapakilala niya sa lahat si Jesus Nazareno bilang pinakadakilang biyaya ng Diyos sa tanan na nagpapatunay ng Kaniyang pag-ibig, habag, at awa. Ang pag-ibig, habag, at awa ng Diyos ay buong pananalig na pinatotohanan ng tampok na mang-aawit sa Salmong Tugunan. Sa pamamagitan ni Jesus Nazareno, ang pag-ibig, habag, at awa ng Diyos ay nahayag. 

Dahil sa pag-ibig, habag, at awa ng Diyos, tayong lahat ay lagi Niyang binibigyan ng pagkakataong paghandaan ang ating sarili para sa pagtamasa ng buhay na walang hanggan sa piling ng Poong Jesus Nazareno sa langit. Ipinagkaloob Niya sa atin ang Mahal na Poong Jesus Nazareno bilang Mesiyas at Tagapagligtas dahil sa Kaniyang awa, habag, at pag-ibig. Ang dakila Niyang awa, habag, at pag-ibig rin ay ang dahilan kung bakit lagi Niya tayong binibigyan ng pagkakataong paghandaan ang ating mga sarili para sa buhay na walang hanggan sa Kaniyang piling sa langit. 

Tayo mismo ang magpapasiya kung paano tayo tutugon sa paanyayang ito ng Diyos na paghandaan ang buhay na walang hanggan kapiling Siya sa maluwalhati Niyang kaharian sa langit. Isa lamang ang dapat nating gawin upang maihanda natin ang ating mga sarili para sa buhay na walang hanggan sa piling ng Panginoong Diyos sa langit - tahakin ang landas ng kabanalan.

KAGITINGAN NG MGA TAOS-PUSONG NANANALIG AT NAGLILINGKOD SA DIYOS

29 Agosto 2024 

Paggunita sa Pagpapakasakit ni San Juan, ang Tagapagbinyag, martir 

Jeremias 1, 17-19/Salmo 70/Marcos 6, 17-29 

This faithful photographic reproduction of the painting (c. Between 1600 and 1650) The Beheading of Saint John the Baptist by François Perrier (1594–1649), as well as the actual work of art itself from the National Trust for Places of Historic Interest or Natural Beauty, is in the Public Domain (PDM 1.0 - Public Domain Mark 1.0 Universal - "No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1649. This is also in the Public Domain in the United States because it was published (or registered with the U.S. Copyright Office) before January 1, 1929.  

"Hindi ka nila matatalo sapagkat Ako ang mag-iingat sa iyo. Akong Panginoon ang nagsasabi nito" (Jeremias 1,19). Sa mga salitang ito na binigkas ng Panginoong Diyos sa wakas ng Unang Pagbasa nakatuon ang pagninilay ng Simbahan para sa araw na ito. Inilaan ng Simbahan ang araw na ito sa paggunita sa kagitingan at katapatan ng tagapaghanda ng daraanan ng Poong Jesus Nazareno na si San Juan Bautista bilang martir. Ang salaysay ng kaniyang pagkamatay bilang martir ay tampok sa salaysay sa Ebanghelyo para sa araw na ito. 

Sa salaysay ng pagkamatay ni San Juan Bautista bilang isang martir na inilahad at itinampok sa Ebanghelyo para sa araw na ito, napakalinaw na hindi natakot si Juan Bautista na harapin ang kaniyang kamatayan bilang isang martir ng Panginoon. Hindi natakot sa kapangyarihan nina Herodes Antipas at Herodias si San Juan Bautista. Sa halip na matakot kina Herodes Antipas at Herodias, ipinasiya ni San Juan Bautista na manalig sa Diyos na kaniyang pinaglingkuran nang buong katapatan. Gaya ng sabi sa unang taludtod ng Salmo para sa araw na ito: "Sa iyo lang, Panginoon, lubos akong nananalig" (Salmo 70, 1). Ang pananalig ni San Juan Bautista sa Panginoong Diyos ay ang dahilan kung bakit buong kagitingan niyang hinarap at tinanggap ang kaniyang kamatayan bilang isang martir ng Panginoong Diyos. Dahil sa kaniyang pananalig na tunay ngang taos-puso, ipinasiya ni San Juan Bautista na ialay ang kaniyang buong sarili sa Diyos na walang takot niyang pinaglingkuran. 

Mayroon ngang kabalintunaan sa tampok na salaysay sa Ebanghelyo. Ang natakot ay ang may hawak ng kapangyarihan. Dalawang beses na natakot si Herodes Antipas dahil kay San Juan Bautista. Natakot siyang patayin si San Juan Bautista dahil alam niyang propeta ang turing sa kaniya ng nakararami. Bukod pa roon, natakot rin siyang bawiin ang kaniyang pangako na kaniyang binitiwan sa anak na babae ni Herodias na sumayaw para sa kaniya sa piging na inihanda para sa kaniyang kaarawan. Subalit, sa halip na matakot kay Herodes Antipas at Herodias, ipinasiya ni San Juan Bautista na panaligan ang Mahal na Poon nang buong katapatan at kagitingan hanggang sa huli, kahit na ang kapalit nito ay ang kaniyang buhay. 

Wala tayong katatakutan sa mundo kung tunay tayong nananalig at naglilingkod sa Diyos, gaya ni San Juan Bautista. Ang taos-puso nating pananalig sa Panginoon ang tutulong sa atin na magtagumpay laban sa mga kinatatakutan natin sa buhay. Laging sinasamahan ng Panginoon ang mga nananalig at naglilingkod sa Kaniya nang taos-puso. Dahil dito, may katatagan ng loob ang mga nananalig at naglilingkod sa Kaniya nang taos-puso hanggang sa huli. 

HINDI NIYA BABAGUHIN ANG KANIYANG MGA TURO

25 Agosto 2024 

Ika-21 Linggo sa Karaniwang Panahon [B] 

Josue 24, 1-2a. 15-17.18b/Salmo 33/Efeso 5, 21-32/Juan 6, 60-69 

This faithful photographic reproduction of the painting (c. Between 1629 and 1631) The Veneration of the Eucharist by Jacob Jordaens (1593–1678) from the National Gallery of Ireland is licensed under the Creative Commons Attribution 4.0 International (CC BY 4.0) license.

"Ibig din ba ninyong umalis?" (Juan 6, 67). Ito ang tanong ng Poong Jesus Nazareno sa mga apostol matapos Siyang iwan ng Kaniyang mga tagapakinig sa huling bahagi ng salaysay sa Ebanghelyo. Alam Niya kung bakit marami sa Kaniyang mga tagapakinig ay nagpasiyang magsialisan. Alam ni Kristo na labis na nahirapan ang karamihan sa Kaniyang mga tagapakinig na unawain at tanggapin ang mga sinasabi Niya sa kanila tungkol sa Kaniyang sarili. 

Bagamat nahirapan nang labis ang karamihan sa Kaniyang mga tagapakinig sa pag-unawa, pag-intindi, at pagtanggap sa aral at katotohanang ito, hindi binago ng Mahal na Poong Jesus Nazareno ang Kaniyang mga sinabi tungkol sa Kaniyang sarili. Hindi pinalitan at binawi ng Mahal na Poong Jesus Nazareno ang Kaniyang mga inihayag sa lahat tungkol sa Kaniyang sarili upang hindi mabawasan ang bilang ng Kaniyang mga tagapakinig. Kahit na nabawasan ang bilang ng Kaniyang mga tagasunod, ang Poong Jesus Nazareno ay hindi tumalikod sa Kaniyang mga pangaral. Ang mga salitang ito ay Kaniyang pinanindigan, kahit na nabawasan ang mga sumusunod sa Kaniya. 

Hindi lamang para sa mga apostol ang tanong ni Jesus Nazareno sa huling bahagi ng tampok na salaysay sa Ebanghelyo. Ang tanong na ito ay para rin sa atin. Tatalikuran at iiwanan ba natin ang Poong Jesus Nazareno? Mananatili pa rin ba tayong tapat sa Kaniya, kahit na napakahirap intindihin, unawain, tanggapin, at sundin ang Kaniyang mga aral at turo, lalung-lalo na yaong mga aral at turo tungkol sa Kaniyang sarili? 

Sa Unang Pagbasa, inihayag ni Josue sa mga Israelita na paglilingkuran at susundin lamang niya ang Panginoong Diyos. Ito rin ang ipinangakong gawin ng mga Israelita nang buong katapatan. Sa Salmong Tugunan, inihayag ng tampok na mang-aawit kung ano ang nararapat gawin bilang mga Kristiyano. Nakatuon rin sa paksang ito ang pangaral ni Apostol San Pablo sa Ikalawang Pagbasa. Pakikinig at pagsunod sa Mahal na Poong Jesus Nazareno nang buong katapatan. 

Nasa ating mga kamay ang pasiya kung tatanggapin at susundin natin ang mga aral at turo ng Poong Jesus Nazareno nang may taos-pusong katapatan at pananalig sa Kaniya. Subalit, anuman ang ating ipasiya, hindi Niya babaguhin ang Kaniyang mga pahayag, turo, at aral, lalung-lalo na yaong mga pahayag tungkol sa Kaniyang sarili bilang Tinapay ng Buhay, ang pinakadakilang biyayang kaloob ng Diyos sa tanan. 

BAGONG BUHAY PARA SA MGA INIIBIG NG DIYOS

23 Agosto 2024 

Paggunita kay Santa Rosa de Lima, dalaga 

Ezekiel 37, 1-14/Salmo 106/Mateo 22, 34-40 

This faithful photographic reproduction of the painting (Between circa 1671 and circa 1672) Saint Rose of Lima (1586-1618), as well as the actual work of art itself from the National Trust, is in the Public Domain (PDM 1.0 - "No Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1929.

"Panginoo'y papurihan sa pag-ibig N'ya kailanman" (Salmo 106, 1). Nakatuon sa mga salitang ito mula sa Salmong Tugunan ang pagninilay ng Simbahan sa araw na ito. Sa totoo lamang, hindi na mabilang kung ilang ulit na nating tinalakay at pinagnilayan ang paksa o temang pinagninilayan ng Simbahan nang buong kataimtiman sa araw na ito. Iyon nga lamang, tiyak na ilang ulit rin natin ito nakakalimutan. Kaya naman, maaari itong ituring na isang mahalagang paalala para sa bawat isa. Ang Panginoong Diyos ay puspos ng pag-ibig para sa ating lahat. 

Sa Unang Pagbasa, ipinangako ng Panginoong Diyos sa Kaniyang bayan na Siya ang magbubukas ng libingan at ibabangon mula sa kadiliman nito upang pagkalooban sila ng buhay. Buong linaw na isinalungguhit ng Panginoong Diyos ang Kaniyang dakilang pag-ibig sa pahayag na ito. Hindi Niya pababayaan ang Kaniyang bayan. Sa Banal na Ebanghelyo, inihayag ng Poong Jesus Nazareno ang pinakamahalagang utos bilang tugon sa tanong ng isang dalubhasa sa Kautusan tungkol sa paksang iyon. Ang pag-ibig para sa Diyos at tao ay isinalungguhit ng pinakamahalagang utos na ito. 

Ang Panginoong Diyos ay puspos ng pag-ibig para sa ating lahat. Bagamat hindi tayo karapat-dapat dahil sa dami ng ating mga kasalanan laban sa Kaniya, ipinasiya pa rin Niya tayong mahalin. Kaya naman, bilang mga iniibig ng Diyos, tanggapin natin nang buong kababaang-loob ang biyaya ng bagong buhay na Kaniyang kaloob sa atin. Isa itong bagong buhay bilang mga tagapagpalaganap ng dakila Niyang pag-ibig para sa lahat. Tatanggapin natin ang biyayang ito na Kaniyang kaloob nang may taos-pusong pasasalamat, kababaang-loob, at pananalig kung tunay rin nating iniibig ang Diyos. 

MAGING MGA BIYAYA

18 Agosto 2024 

Ika-20 Linggo sa Karaniwang Panahon [B] 

Kawikaan 9, 1-6/Salmo 33/Efeso 5, 15-20/Juan 6, 51-58

This faithful photographic reproduction of the painting (c. 1800s) Last Communion of Saint Mary Magdalene by Domingos Sequeira (1768–1837), as well as the actual work of art itself from a Private Collection, is in the Public Domain (PDM 1.0 - "No Copyright") in its country of origin as well as in other countries and areas, including the United States, due to its age. 

"Mga kapatid, ingatan ninyo kung paano kayo namumuhay" (Efeso 5, 15). Nakatuon sa mga salitang ito mula sa simula ng pangaral ni Apostol San Pablo sa Ikalawang Pagbasa ang pagninilay ng Simbahan sa Linggong ito. Ipinagpapatuloy ng Simbahan ang pagninilay sa misteryo ng tunay na presensya ni Kristo sa Banal na Eukaristiya sa Linggong ito. Ang Mahal na Poong Jesus Nazareno ay laging dumarating sa anyo ng tinapay at alak bilang tunay na pagkain at inuming espirituwal. Dahil sa Kaniyang habag at awa, lagi Niyang ibinibigay sa atin ang Katawan at Dugo Niyang Kabanal-banalan bilang ating espirituwal na pagkain at inumin sa bawat pagdiriwang ng Banal na Misa. 

Tampok sa Ebanghelyo ang pagpapatuloy ng pagpapakilala ng Poong Jesus Nazareno sa Kaniyang mga tagapakinig bilang Tinapay ng Buhay na nagmula sa langit. Patuloy Niyang isinasalungguhit sa Kaniyang mga tagapakinig na Siya lamang at wala nang iba pa ang makakapawi ng lahat ng uri ng kagutuman at kauuhawan. Ibinigay Siya ng Amang nasa langit sa tanan bilang tunay na pagkain at inuming espirituwal. Pag-ibig, kagandahang-loob, habag, at awa ng Diyos ang dahilan kung bakit ipinagkaloob sa lahat bilang tunay na pagkain at inuming espirituwal ang Poong Jesus Nazareno. 

Ang habag at awa ng Diyos ay inilarawan ng mga salita sa Unang Pagbasa. Kahit na hindi tayo karapat-dapat sa habag at awa ng Diyos, kusang-loob Niya itong ibinibigay sa atin. Lagi Niyang ipinapakita sa atin ang Kaniyang habag at awa. Inaanyayahan ng Diyos ang bawat isa sa atin na tanggapin at ibahagi sa kapwa-tao ang lahat ng mga biyayang Kaniyang ipinagkakaloob sa atin. 

Itinuturo sa atin ng mang-aawit na itinampok sa Salmong Tugunan na dapat asamin at kamtin natin ang Panginoong Diyos na Siyang bukal ng lahat ng mga biyaya. Sabi nga sa Salmo: "Magsumikap tayong kamtin ang Panginoong butihin" (Salmo 33, 9a). Wala tayong iba pang dapat asamin, kamtin, at panaligan kundi ang Panginoon. Siya lamang ang tunay na maaasahan sa lahat ng oras. Ang Panginoon lamang ang may kapangyarihang pawiin ang lahat ng uri ng kagutuman at kauuhawan. 

Bilang mga Kristiyano, ang Tinapay ng Buhay na walang iba kundi si Jesus Nazareno ay dapat nating asamin, kamtin, tanggapin, sambahin, panaligan, at sundin sa bawat sandali ng ating buhay. Sa palagiang pagtanggap sa Kaniyang Katawan at Dugo sa tuwing ipinagdiriwang ang Banal na Misa, ipalaganap natin ang Kaniyang pag-ibig, habag, at awa sa lahat. Maging biyaya rin tayo sa iba. 

ANG LAHAT AY BIYAYA

16 Agosto 2024

Paggunita kay San Roque, nagpapagaling 

Ezekiel 16, 1-15. 60. 63 (o kaya: 16, 59-63)/Isaias 12/Mateo 19, 3-12

This faithful photographic reproduction of the painting (c. 1631) Saint Roch by Jusepe de Ribera (1591–1652), as well as the actual work of art itself from the Museo del Prado, is in the Public Domain (PDM 1.0 - "No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Sa habag at awa ng Diyos nakatuon ang pansin ng pahayag ng mismong Panginoong Diyos sa Unang Pagbasa at ng mga taludtod sa Salmong Tugunan na hango mula sa ika-12 kabanata ng aklat ni Propeta Isaias. Inihayag ng Panginoon sa Unang Pagbasa na hindi Niya ipagkakait sa bayang Kaniyang hinirang itinalaga upang maging Kaniya ang Kaniyang habag at awa. Bagamat paulit-ulit na lamang ang Kaniyang bayan sa pagkakasala laban sa Kaniya, ipinasiya pa rin ng Diyos na ipakita pa rin ang Kaniyang habag at awa sa kanila. Sinasagisag ito ng Kaniyang pasiyang makipagtipan sa kanila, kahit na hindi sila karapat-dapat dahil sa dami ng kanilang mga kasalanan. Nakatuon rin ang mga salita sa Salmong Tugunan sa habag at awa ng Diyos. 

Ang Ebanghelyo ay nakasentro sa kasagraduhan ng kasal. Buong linaw na inihayag ng Nuestro Padre Jesus Nazareno sa Ebanghelyo na labag sa mga utos ng Diyos ang diborsyo. Hindi naaayon sa mga utos at loobin ng Diyos ang diborsyo. Taliwas ito sa kalooban ng Diyos sa simula pa lamang - isang lalaki at isang babae ay magiging isa bilang mga magkabiyak. Kaya nga, ang opisyal na tawag sa Sakramento ng Kasal ay Pag-Iisang-Dibdib. Nagkakaisa ang isang lalaki at isang babae sa Sakramentong ito. 

Marahil maitatanong ng marami - ano naman ang kinalaman at ugnayan ng pahayag ni Jesus Nazareno tungkol sa kasagraduhan ng Sakramento ng Pag-Iisang-Dibdib sa Ebanghelyo sa mga inilarawan sa Unang Pagbasa at Salmong Tugunan? Ang lahat ay biyaya ng Diyos. Gaya ng tipang ipinasiya buuin ng Panginoong Diyos sa pagitan Niya at ng Kaniyang bayan sa Unang Pagbasa, ang Sakramento ng Kasal ay biyaya mula sa Diyos. Ang kabiyak ng puso ay ipinagkaloob ng Diyos sa isa't isa. Kaya naman, dapat pahalagahan ng mga magkabiyak ng puso ang isa't isa. 

Isang halimbawa ng mga nagpahalaga sa mga biyaya ng Diyos si San Roque. Kilala si San Roque bilang pintakasi ng mga maysakit. Subalit, hindi niya pinagaling ang mga maysakit gamit ang kaniyang sariling kapangyarihan at kakayahan. Hindi nagmula sa kaniyang sarili ang kapangyarihan magdulot ng kagalingan sa mga maysakit. Bagkus, nagmula ito sa Diyos. Ang kapangyarihang ito ay ipinagkaloob sa kaniya ng Diyos at hindi niya ito binalewala o inabuso. Bagkus, ginamit ito ni San Roque nang nararapat bilang patunay na tunay nga niyang pinahalagahan ang biyayang ito. 

Kahit hindi tayo karapat-dapat dahil sa dami ng ating mga kasalanan, ipinasiya pa rin ng Diyos na biyayaan tayo. Ipinagkakaloob pa rin sa atin ng Diyos ang Kaniyang mga biyaya dahil sa Kaniyang pag-ibig, kagandahang-loob, habag, at awa. Dapat nating pahalagahan ang mga biyayang ito na Kaniyang kaloob sa atin. 

SANDALING MALUWALHATI AT MALIGAYA

15 Agosto 2024 

Dakilang Kapistahan ng Pag-Aakyat sa Langit sa Mahal na Birheng Maria 

Pahayag 11, 19a; 12, 1-6a.10ab/Salmo 44/1 Corinto 15, 20-27/Lucas 1, 39-56 

This faithful photographic reproduction of the painting (c. 1735) Assumption of Mary by Giovanni Battista Piazzetta (1683–1754), as well as the actual work of art itself from the National Museum in Warsaw, is in the Public Domain (PDM 1.0 - "No Copyright") in its country of origin as ell as in other countries and areas where the copyright term is the author's life plus 100 years or fewer, including the United States, due to its age. 

"Mga Anghel ay masaya nang iakyat si Maria sa langit na maligaya." Ang mga salitang ito na ipinahayag o inawit bilang Pagbubunyi sa Mabuting Balita para sa araw na ito habang inaawit o ipinapahayag ang "Aleluya" bago ipahayag ang tampok na salaysay sa Banal na Ebanghelyo ay pinagtutuunan ng pansin at pinagninilayan ng Simbahan nang buong kataimtiman sa araw na ito. Inilaan ng Inang Simbahan ang araw na ito para sa isang napakaespesyal na pagdiriwang. Bilang Simbahan, ipinagdiriwang natin ang Pag-Aakyat sa Langit sa Mahal na Birheng Maria nang buong galak. 

Isang maluwalhati at maligayang sandali sa buhay ng Mahal na Birheng Maria dito sa mundo ang Pag-Aakyat sa kaniya sa Langit. Sa wakas ng kaniyang buhay sa daigdig, hindi pinahintulutan ng Diyos na maagnas ang katawan ng Mahal na Birheng Maria. Bagkus, ipinasiya Niyang iakyat ang katawan at kaluluwa ng Mahal na Birheng Maria sa langit. Hindi umakyat ang Mahal na Birheng Maria sa langit gamit ang sarili niyang kapangyarihan dahil wala naman siyang kapangyarihan gawin iyon. Ang Diyos mismo ang nag-akyat sa kaniya sa langit. 

Nang dumating ang wakas ng buhay ng Mahal na Birheng Maria sa lupa, ang Diyos ay nagpasiyang biyayaan ng isang maluwalhati at maligayang sandali ang Mahal na Birheng Maria. Iniakyat ng Diyos ang katawan at kaluluwa ng Mahal na Birheng Maria sa langit. Gaya ng inilarawan sa Pagbubunyi sa Mabuting Balita, ang mga anghel sa langit ay napuspos ng galak sa sandaling iniakyat ng Diyos sa langit ang katawan at kaluluwa ng Mahal na Birheng Maria. 

Ang mga Pagbasa para sa araw na ito ay nakasentro sa mga kahanga-hangang gawa ng Diyos na nagdudulot ng tuwa sa lahat. Sa Unang Pagbasa, inilahad ni Apostol San Juan ang kaniyang nakita sa isang pangitain tungkol sa kaluwalhatian ng Diyos. Hindi mananaig ang demonyo laban sa Panginoon kailanman. Laging magtatagumpay ang kaluwalhatian ng Panginoong Diyos na tunay ngang kahanga-hanga. Sa Ikalawang Pagbasa, ipinasiya ni Apostol San Pablo na isentro ang kaniyang pangaral sa dakilang tagumpay ng Muling Nabuhay na si Kristo Hesus laban sa kamatayan. Hindi nanatili sa libingan ang Mahal na Poong Jesus Nazareno. Bagkus, nabuhay Siyang mag-uli. Sa Ebanghelyo, dinalaw ng Mahal na Birheng Maria si Elisabet. Matapos batiin ang isa't isa, hinandugan ng Mahal na Inang si Mariang Birhen ang Diyos ng isang awit-papuri. Buong linaw siyang nagpatotoo tungkol sa mga kahanga-hangang gawa ng Diyos na hindi mapapantayan o mahihigitan sa bawat taludtod ng awit-papuri na ito. 

Biniyayaan ng Diyos ang Mahal na Inang si Mariang Birhen ng isang maluwalhati at maligayang sandali bilang hudyat ng wakas ng kaniyang buhay sa lupa. Ang katawan at kaluluwa ng Mahal na Inang si Mariang Birhen ay Kaniyang iniakyat sa Kaniyang walang hanggan at maluwalhating kaharian sa langit. Tunay ngang napakaganda at kahanga-hanga ang huling sandali ng buhay ng Mahal na Birheng Maria sa lupa.