DAANG KAILANGANG TUWIRIN

06 Disyembre 2026 

Ikalawang Linggo sa Panahon ng Pagdating ng Panginoon [B] 

Isaias 40, 1-5. 9-11/Salmo 84/2 Pedro 3, 8-14/Marcos 1, 1-8 

Larawan: Nicolas Poussin (1594–1665), Saint John Baptizing in the River Jordan (c. 1630). Getty Center. Public Domain.

"Pag-ibig Mo'y ipakita, iligtas kami sa dusa" (Salmo 84, 8). Ang pagiging mapagmahal ng Diyos ay buong linaw na isinalungguhit ng mang-aawit sa Salmong Tugunan. Dahil tunay nga Siyang mapagmahal, ipinasiya ng Diyos na ipadala sa mundo ang Kaniyang Bugtong na Anak na walang iba kundi ang Panginoong Jesus Nazareno upang maging ipinangakong Mesiyas at Manunubos ng sangkatauhan. Ipinagkaloob ng Diyos sa atin ang biyaya ng Kaniyang pagliligtas sa pamamagitan ng Kaniyang Bugtong na Anak na dumating sa mundo bilang Tagapagligtas noong ang takdang panahon ay sumapit. Sa katotohanang ito nakasentro ang pagninilay ng Simbahan para sa Linggong ito. 

Inaanyayahan ng Simbahan ang bawat isa sa atin sa Linggong ito na pagnilayan ang dahilan kung bakit ang Diyos ay nagpasiyang dumating bilang ipinangakong Mesiyas at Manunubos nang sumapit ang takdang panahon sa pamamagitan ng Poong Jesus Nazareno na Kaniyang Bugtong na Anak. Ang dahilan kung bakit nangyari ito noong sumapit ang takdang panahon ay walang iba kundi ang dakilang pag-ibig ng Diyos. Sa pamamagitan ng pagligtas sa atin, nahayag ang Kaniyang dakilang pag-ibig. 

Ang bunga ng dakilang pag-ibig ng Diyos ay ang biyaya ng Kaniyang pagliligtas. Hindi nagdalawang-isip ang Diyos na ipagkaloob ito sa atin. Bagkus, ipinagkaloob Niya ang biyayang ito sa atin nang kusang-loob. Ito ang Kaniyang niloob noon pa man. Lubos Siyang nasaktan nang malugmok ang tao sa kasalanan. Dahil diyan, gumawa Siya ng paraan upang iligtas ang sangkatauhan. 

Sa Ebanghelyo, nangaral si San Juan Bautista sa mga taong tumutungo sa Ilog Jordan upang makinig sa kaniyang mga pangaral at magpabinyag tungkol sa halaga ng taos-pusong pagbabalik-loob sa Diyos. Ang pangaral ni Apostol San Pablo na itinampok at inilahad sa Ikalawang Pagbasa ay nakatuon rin sa aral na ito. Ipinaliwanag naman sa Unang Pagbasa ang dahilan kung bakit ang mga tapat na lingkod ng Diyos ay laging nangangaral tungkol sa halaga ng taos-pusong pagsisisi at pagtalikod sa kasalanan. Kalooban ng Diyos na malaman ng lahat ang Kaniyang pagiging mapang-aliw. Laging handa ang Diyos na magbigay ng tunay na aliw, ligaya, galak, at tuwa.

Kung paanong ipinagkaloob ng Nazarenong si Kristo Hesus ang biyayang ito noong una Siyang dumating sa lupa, ipagkakaloob Niya muli ang biyayang ito sa muli Niyang pagdating bilang Hari at Hukom sa wakas ng panahon. Ang biyayang ito ay para sa lahat ng tao. Subalit, nasa tao ang pasiya kung ang biyayang ito ay taos-puso nilang tatanggapin. Mapapatunayan lamang nila ito sa pamamagitan ng kanilang mga salita at gawa. Pinatutunayan ng kanilang mga salita at gawa kung ang daraanan ni Kristo Hesus na Panginoon, Hari, at Manunubos ay tunay nga nilang tinutuwid. 

Lagi nating dapat tuwirin ang daraanan ng Poong Jesus Nazareno. Nararapat lamang na gawin ito bilang tugon sa Kaniya na hindi nagdalawang-isip na ibigin, kahabagan, biyayaan, at kaawaan tayo. Ang Kaniyang pasiyang iligtas tayo ay ang patunay nito.

PASIYA NG TATAHAK SA DAANG DAPAT TUWIRIN

04 Disyembre 2026 

Biyernes sa Unang Linggo sa Panahon ng Pagdating ng Panginoon 

Isaias 29, 17-24/Salmo 26/Mateo 9, 27-31 

Larawan: Jesus heals two blind men by Julius Schnorr, 19th century. Public Domain.

"Anak ni David, mahabag Kayo sa amin!" (Mateo 9, 27). Sa mga salitang ito na buong pananalig na binigkas ng dalawang lalaking bulag sa Mahal na Poong Jesus Nazareno sa Mabuting Balita nakasentro ang pagninilay ng Simbahan para sa araw na ito. Isa lamang ang hiniling ng dalawang lalaking bulag na ito - makakita. Lubusan nga silang nanalig sa kapangyarihan ng dakilang pag-ibig, kagandahang-loob, habag, at awa ng ipinangakong Mesiyas at Tagapagligtas na ipinagkaloob ng Diyos sa sangkatauhan na walang iba kundi ang Mahal na Poong Jesus Nazareno. Bilang tugon, ipinagkaloob ng Mahal na Poong Jesus Nazareno ang kanilang hiling - nakakita sila. 

Nakasentro sa pag-ibig, kagandahang-loob, habag, at awa ng Panginoong Diyos ang mga Pagbasa. Buong linaw na iilarawan sa Unang Pagbasa kung ano ang magaganap sa Kaniyang pagdating. Makakakita ang mga bulag, makakarinig ang mga pipi, at ang biyaya ng pagliligtas na Kaniyang kaloob ay lalaganap. Ito ang dahilan kung bakit ang Panginoong Diyos ay ipinakilala sa Salmong Tugunan bilang tanglaw at kaligtasan ng lahat. Sa pagdating ng Poong Jesus Nazareno, natupad ang mga salitang ito. 

Dahil sa dakilang pag-ibig, kagandahang-loob, habag, at awa ng Diyos, dumating Siya sa mundo sa pamamagitan ng Panginoong Jesus Nazareno upang maging tanglaw at kaligtasan ng lahat. Hindi pilit ang Kaniyang pasiyang gawin ito. Kusang-loob Niyang ginawa ito. Bilang tugon, lagi nating tuwirin ang daraanan na Kaniyang tatahakin sa pamamagitan ng pamumuhay nang banal at kalugud-lugod sa Kaniyang paningin. 

TUWIRIN ANG DAAN NG NAGDUDULOT NG KALIGTASAN

29 Nobyembre 2026 

Unang Linggo sa Panahon ng Pagdating ng Panginoon [B] 

Isaias 63, 16b-17. 19b; 64, 2b-7/Salmo 79/1 Corinto 1, 3-9/Marcos 13, 33-37 

Larawan: Circle of Francis Hayman (1818–1897), Christus ist willkommen (c. 19th century). Public Domain.

Ang Liturhikal na Taon ay nagsisimula sa pamamagitan ng panahon ng Adbiyento. Sa tuwing sasapit ang panahong ito, ang ating mga pansin ay itinutuon ng Simbahan sa halaga ng paghahanda ng sarili habang hinihintay at pinananabikan natin nang buong galak ang pagdating ng Panginoon, ang Nuestro Padre Jesus Nazareno. Darating Siya sa panahong hindi natin inaaasahan. Kaya naman, nararapat lamang na paghandaan natin nang mabuti ang Kaniyang pagdating dahil Siya mismo ay ang tunay na Hari. Walang hihigit o makakapantay sa Kaniya kung ang pinag-uusapan ay ang halaga. 

Nakasentro sa mga biyayang dulot ng Poong Jesus Nazareno sa Kaniyang pagdating ang mga Pagbasa. Sa Unang Pagbasa, inilahad ang panalangin ng bayang Israel. Wala silang ibang hiniling sa Diyos sa nasabing panalangin kundi ang kanilang kaligtasan at kalayaan. Buong kababaang-loob silang sumamo sa Panginoong Diyos na iligtas sila dahil Siya ang kanilang pag-asa. Ito rin ang taos-pusong dalangin, samo, at hiling ng tampok na mang-aawit sa Salmong Tugunan. Ang pagtawag ng Panginoong Diyos sa lahat ng mga Kristiyano ay ang sentro ng pangaral ni Apostol San Pablo na itinampok at inilahad sa Ikalawang Pagbasa. Walang sawa Niyang tinatawag ang lahat ng mga Kristiyano na maging banal at kalugud-lugod sa Kaniyang paningin nang sa gayon ay maging marapat silang makipag-isa sa Poong Jesus Nazareno. Nararapat lamang na gawin ito sa bawat sandali ng ating paglalakbay sa mundo na pansamantala lamang bilang paghahanda ng sarili para sa pagdating ng Poong Jesus Nazareno. Katunayan, ito ang utos at bilin ng Poong Jesus Nazareno sa mga alagad sa Ebanghelyo. Habang naglalakbay tayo sa mundong ito nang pansamantala, dapat nating paghandaan ang pagdating ng Poong Jesus Nazareno sa pamamagitan ng pagiging banal at kalugud-lugod sa Kaniyang paningin. Ito ang magpapatunay na tinutuwid natin ang Kaniyang daan. Kailangan nating gawin ito dahil to ang nararapat na ihandog sa Kaniya. Bilang tugon sa Kaniyang pasiyang iligtas tayo, buksan natin ang ating mga puso at sarili sa Kaniya na puspos ng dakilang pag-ibig, kagandahang-loob, habag, at awa.

Kaligtasan ang biyayang dulot ng Poong Jesus Nazareno sa Kaniyang pagdating. Ang dahilan kung bakit ito ang biyayang Kaniyang dulot ay walang iba kundi ang Kaniyang awa, habag, kagandahang-loob, at pag-ibig na dakila. Dahil dito, kinakailangan nating ilaan ang bawat sandali ng ating paglalakbay sa mundo na pansamantala lamang sa pagtutuwid ng Kaniyang daraanan. Buksan natin ang ating mga puso at kaluluwa sa biyayang ito na Kaniyang dulot. Lagi nating tahakin ang landas ng kabanalan. Ihayag natin ang pasiyang ito sa pamamagitan ng ating mga salita at gawa. 

ILAAN SA PAGHAHANDOG NG TAOS-PUSONG PAGDAKILA SA DIYOS ANG BAWAT SANDALI NG ATING PAGLALAKBAY SA MUNDO

27 Nobyembre 2026 

Paggunita sa Mahal na Birheng Maria ng Medalya Milagrosa 

Biyernes ng Ika-34 o Huling Linggo sa Karaniwang Panahon (II) 

Pahayag 20, 1-4. 11-21, 2/Salmo 83/Lucas 21, 29-33 

Habang papalapit ang wakas ng Liturhikal na Taon, inaanyayahan tayo ng Simbahan na pagnilayan ang katotohanan tungkol sa buhay sa mundo. Ang buhay sa mundo ay pansamantala lamang. Darating din ang panahon kung kailan ang mga gusali sa iba't ibang bahagi ng mundo ay tuluyan na ngang guguho. Mawawala ang lahat sa mundo. Walang makapagsasabing mananatili siya sa mundo magpakailanman. 

Ipinapaalala sa atin ng mga Pagbasa kung ano ang kinakailangan nating gawin bilang mga bumubuo sa tunay na Simbahang itinatag ng Poong Jesus Nazareno habang ang bawat isa sa atin ay patuloy na naglalakbay sa mundong ito nang pansamantala. Ang pangaral ng Poong Jesus Nazareno sa Ebanghelyo ay nakasentro sa mga magaganap sa wakas ng panahon. Sa Unang Pagbasa, ang maluwalhating tagumpay ng Diyos na Kataas-taasan laban sa demonyo ay nakita ni Apostol San Juan sa isang pangitain. 

Ano ang aral mula sa mga Pagbasa? Habang patuloy na naglalakbay sa mundo nang pansamantala, ang landas ng kabanalan ay dapat tahakin. Mamuhay tayo ayon sa mga utos at loobin ng Diyos. Ito ang nararapat na gawin. Lagi natin Siya dinarakila nang taos-puso sa pamamagitan nito. 

Dahil pansamantala lamang ang ating paglalakbay sa mundo, ilaan natin ang bawat sandali nito sa paghahandog ng taos-pusong pagdakila sa Diyos sa pamamagitan ng ating mga salita at gawa. Gaano man kahirap gawin ito dahil sa mga hirap, pagsubok, tukso, sakit, at pag-uusig sa mundo, dapat pa rin nating piliin ang Diyos. Ang Mahal na Birheng Maria ng Medalya Milagrosa ay lagi rin nating kasama upang tulungan at gabayan tayo sa paggamit ng mga biyayang ipinagkaloob sa atin ng Diyos bilang mga lingkod na Kaniyang hinirang. Hinirang at itinalaga tayo ng Panginoong Diyos upang maging mga daluyan at patunay ng Kaniyang kahanga-hangang kadakilaan.

DAKILAIN NAWA SIYA NG LAHAT NG TAO

25 Nobyembre 2026 

Miyerkules ng Ika-34 o Huling Linggo sa Karaniwang Panahon (II) 

Pulang Miyerkules (Red Wednesday)

Pahayag 15, 1-4/Salmo 97/Lucas 21, 12-19 

Larawan: Jean-Leon Gerome (1824-1904), The Christian Martyrs' Last Prayer (c. Between 1963 and 1883). Walters Art Museum. Public Domain. 

Hindi kaila sa Simbahan ang pag-uusig. Mula noon hanggang ngayon, ang Simbahan ay nakakaranas ng pag-uusig. Dahil sa kaniyang katapatan sa Poong Jesus Nazareno, inuusig ang Simbahan. Kahit sa kasalukuyang panahon, inuusig pa rin ang Simbahan. Subalit, dahil pinili ng Simbahan na mahalin, paglingkuran, dakilain, sampalatayanan, panaligan, at sambahin ang tunay na Hari na walang iba kundi ang Mahal na Poong Jesus Nazareno, handa siyang harapin, tiisin, at batain ang mga pag-uusig na ito. 

Inilaan ng Simbahan sa Republika ng Pilipinas para sa pag-aalay ng mga taimtim na panalangin para sa mga Kristiyanong inuusig sa kasalukuyang panahon ang araw ng Miyerkules kasunod ng Dakilang Kapistahan ng Pagkahari ng Panginoong Hesukristo sa Sanlibutan. Kailangan ng ating mga kapatid ng mga panalangin upang lumakas at tumibay ang kanilang mga puso at loobin. Mahirap isabuhay ang pananampalataya, lalo na sa mga lugar kung saan hindi laganap ang Kristiyanismo. Dahil dito, kailangan ng ating mga kapatid sa mga nasabing pook ang ating mga panalangin. 

Bukod sa pag-aalay ng mga taimtim na panalangin para sa mga Kristiyianong inuusig sa iba't ibang bahagi ng daigdig sa kasalukuyang panahon, nananalangin rin tayo sa Diyos na nawa'y huminto na ang karahasan at pagmamalupit sa mga kapatid nating minamahal sa mga nasabing bahagi ng daigdig. Makilala nawa ang Diyos ng lahat ng tao. Harinawa, mamulat ang lahat sa kagandahan ng kahanga-hangang kadakilaan ng tunay na Hari na walang iba kundi ang Panginoon nang sa gayon ay makapag-alay rin sila ng taos-pusong pagdakila sa Kaniya.

Nakasentro sa paghahandog ng nararapat sa Diyos ang mga Pagbasa. Ang Diyos ay hinandugan ng taos-pusong pagdakila sa Unang Pagbasa. Pinatotohanan ng mang-aawit na tampok sa Salmong Tugunan ang Kaniyang kahanga-hangang kadakilaan na sinasagisag ng Kaniyang mga kahanga-hangang gawa. Sa Ebanghelyo, nangaral ang Poong Jesus Nazareno tungkol sa paghahandog ng taos-pusong pagdakila sa Kaniya, kahit napakahirap itong gawin dala ng mga matitinding pagsubok at pag-uusig. Hindi man madaling gawin ito, ito ang nararapat gawin bilang tugon sa Kaniya na walang tigil na nagpamalas ng Kaniyang dakilang pag-ibig, habag, at awa. 

Dakilain nawa ng lahat ng tao sa daigdig ang Diyos. Mamulat nawa ang lahat ng tao sa katotohanang Siya lamang ang dakila. Buksan nawa ng lahat ng tao ang kanilang mga puso, isipan, at kaluluwa sa Kaniyang walang maliw na pag-ibig, kagandahang-loob, biyaya, habag, at awa na tunay ngang kahanga-hanga at dakila. 

SA TUNAY NA HARI DAPAT IHANDOG ANG TAOS-PUSONG PAGDAKILA

22 Nobyembre 2026 

Dakilang Kapistahan ng Pagkahari ng Panginoong Hesukristo sa Sanlibutan (A) 

Ezekiel 34, 11-12. 15-17/Salmo 22/1 Corinto 15, 20-26. 28/Mateo 25, 31-46 

Larawan: Giovanni Battista Cima da Conegliano (1459–1517), Christ Enthroned (c. 1505). Pushkin Museum of Fine Arts. Public Domain.

Noong ika-11 araw ng Disyembre ng taong 1925, ang insikal ng Santo Papa noon na walang iba kundi si Papa Pio XI na pinamagatang "Quas Primas" (TAG: "Sa Simula") ay inilabas. Sa pamamagitan ng nasabing insiklikal, pormal na itinatag ni Papa Pio XI ang Dakilang Kapistahan ng Pagkahari ng Panginoong Hesukristo sa Sanlibutan. Mula sa simula hanggang sa wakas ng nasabing insiklikal, isinalungguhit ni Papa Pio XI nang buong linaw na hindi isang teorya o konsepto lamang ang pagkahari ng Panginoong Hesukristo, ang Nazareno. Bagkus, isa itong katotohanang dapat nating tandaan. 

Inilaan ng Simbahan ang huling Linggo ng Liturhikal na Kalendaryo para sa maringal na pagdiriwang ng Dakilang Kapistahan ng Pagkahari ng Panginoong Hesukristo, ang Señor Nazareno, sa Sanlibutan. Sa pamamagitan ng Dakilang Kapistahang ito, tayong lahat ay pinaalalahanan ng Simbahan na ang Mahal na Poong Jesus Nazareno ay ang tunay na Hari. Wala Siyang dapat maging kaagaw o karibal sa ating mga puso. Bilang mga bumubuo sa tunay na Simbahang itinatag Niya, Siya lamang ang dapat maging hari ng ating mga puso at kaluluwa. Kailangan nating magpasakop sa Kaniya. 

Ang mga katangian ng tunay na Hari na walang iba kundi si Jesus Nazareno ay buong linaw na inilarawan sa mga Pagbasa. Tinutulungan tayo ng mga Pagbasa na unawain kung anong uri ng Hari si Jesus Nazareno. Sa Unang Pagbasa, inihayag ng Diyos na Siya mismo ang magpapastol at mag-aaruga sa Kaniyang kawan. Puno Siya ng pag-ibig, habag, at awa para sa Kaniyang kawan. Nakatuon sa Kaniyang pasiyang maging pastol at tagapag-alaga ng Kaniyang kawan na nagpapatunay ng Kaniyang pag-ibig, habag, at awa ang mga salita sa papuring awiting itinampok at inilahad sa Salmong Tugunan. Inihayag ni Apostol San Pablo sa Ikalawang Pagbasa na niloob ng Diyos na maghari sa lahat si Jesus Nazareno na Kaniyang Bugtong na Anak. Hindi rin ikinubli ni Jesus Nazareno ang katotohanan tungkol sa Kaniyang pagiging hari sa mga apostol, gaya ng Kaniyang ginawa sa Ebanghelyo. Kung tutuusin, sa pangaral na tampok sa Ebanghelyo, inilarawan ni Jesus Nazareno kung ano ang dapat gawin ng lahat ng tao upang makasama Siya sa Kaniyang kaharian sa langit magpakailanman. Habang ang daigdig ay pansamantala nating nilalakbay, dapat nating ipakilala si Jesus Nazareno bilang ating Panginoon at Hari sa pamamagitan ng ating mga salita at gawa. Dapat nating isabuhay ang ating pasiyang dakilain Siya, ang tunay na Hari, nang taos-puso.

Hindi isang teorya o konsepto lamang ang pagkahari ng Poong Jesus Nazareno. Isa itong katotohanang kinakailangan nating tandaan bilang mga bumubuo sa tunay na Simbahang Kaniyang itinatag. Kaya naman, dapat lagi nating handugan Siya ng taos-pusong pagdakila sa pamamagitan ng bawat sandali ng ating paglalakbay sa mundo na pansamantala lamang. 

Walang ibang dapat maghari sa ating mga puso at kaluluwa kundi si Kristong Hari. Sa bawat sandali ng ating paglalakbay sa daigdig na pansamantala lamang, kailangan nating tiyaking dinarakila natin Siya nang taos-puso sa pamamagitan ng ating mga salita at gawa. Nararapat lamang itong gawin dahil si Kristong Hari ay ang tunay na Hari. Ito ang katotohanan. 

VIVA CRISTO REY! 

MABUHAY ANG KRISTONG HARI!

NARARAPAT LAMANG DAKILAIN SIYA

20 Nobyembre 2026 

Biyernes ng Ika-33 Linggo sa Karaniwang Panahon (II) 

Pahayag 10, 8-11/Salmo 118/Lucas 19, 45-48 

Larawan: Antoine-Jean-Baptiste Thomas (1791–1833), Christ driving the money-changers from the Temple (c. 1820). Saint-Roch, Paris via Palissy. Public Domain.

Ang ating mga pansin ay itinutuon ng Simbahan sa halaga ng paghahandog ng taos-pusong pagdakila sa Panginoong Diyos sa pamamagitan ng ating mga salita at gawa sa bawat sandali ng ating pansamantalang paglalakbay sa mundong ito. Lagi nating dapat tandaang pansamantala lamang ang ating pananatili at paglalakbay sa mundo. Oo, mayroong mga taong biniyayaan ng Diyos ng mahabang buhay, subalit hindi ito nangangahulugang mananatili sila sa mundong ito magpakailanman. Walang taong ipinanganak sa mundong ito na mananatili sa nasabing planeta magpakailanman. 

Sa Unang Pagbasa, inutusan si Apostol San Juan na magpahayag sa mga tao mula sa iba't ibang lahi, lipi, wika, bayan, at bansa. Kahit na si Apostol San Juan ay natapon sa Patmos dahil hindi siya mapatay ng mga tauhan ng Emperador, inutusan pa rin ang nasabing apostol na magpahayag tungkol sa kaniyang mga nakita sa mga tao, pati na rin sa mga hari at iba pang mga pinuno, tungkol sa kaniyang mga nakita't narinig. Ang halaga ng pakikinig at pagtupad sa utos ng Diyos ay buong linaw na isinalungguhit ng mang-aawit sa Salmong Tugunan. Tampok sa Ebanghelyo ang salaysay ni San Lucas tungkol sa paglilinis ng Poong Jesus Nazareno sa Templo. Ang presensya ng Diyos ay dapat pahalagahan. Subalit, hindi inihandog sa Diyos ang nararapat noong araw na yaon. Kaya naman, labis na nagalit ang Poong Jesus Nazareno. 

Ibigay natin sa Panginoong Diyos ang nararapat. Lagi natin Siyang handugan ng taos-pusong pagdakila sa pamamagitan ng ating mga salita at gawa.