ANG TUNAY NA LIWANAG NA NAGPAPALAYA SA ATIN

2 Pebrero 2021 

Kapistahan ng Pagdadala kay Hesus na Panginoon sa Templo 

Malakias 3, 1-4/Salmo 23/Hebreo 2, 14-18/Lucas 2, 22-40 (o kaya: 2, 22-32) 

Apatnapung araw makalipas ang Dakilang Kapistahan ng Pasko ng Pagsilang ng Panginoon, ipinagdiriwang ng Simbahan ang Kapistahan ng Pagdadala kay Hesus na Panginoon sa Templo na kilala rin bilang Pista ng Candelaria. Ang kapistahang ito na ipinagdiriwang ng Simbahan sa araw na ito ay nakasentro sa larawan ng Panginoong Hesukristo bilang tunay na liwanag ng sanlibutan. Kung tutuusin, ang pagbabasbas ng mga kandila sa simula ng Banal na Misa para sa pistang ipinagdiriwang ng Simbahan sa araw na ito ay isang pahiwatig nito. 

Sabi ng Panginoong Diyos sa Unang Pagbasa na Siya ay darating sa Kanyang templo (Malakias 3, 1). Kung tutuusin, inilarawan pa nga ng Panginoong Diyos ang Kanyang pagdating bilang biglaan. Ang Diyos ay biglang darating. Ano ang dahilan ng Kanyang pagdating? Sabi sa Unang Pagbasa na darating ang Diyos upang hatulan at dalisayin ang mga saserdote (Malakias 3, 3). Sa iba pang mga salin ng mga talatang ito, hindi lamang hahatulan at dadalisayin ng Panginoong Diyos ang mga saserdote kundi ang mga anak o angkan ni Levi. Ang layunin ng pagdating ng Panginoon ay dalisayin ang lahat. 

Paano naman dinalisay ng Panginoon ang lahat ng taong kabilang sa angkan o lahi ni Levi? Inilarawan ito sa Ikalawang Pagbasa. Sabi ng manunulat ng sulat sa mga Hebreo sa Ikalawang Pagbasa na pinalaya ni Kristo ang lahat ng mga naging alipin ng kasamaan at kamatayan sa pamamagitan ng Kanyang sariling kamatayan (2, 14-15). Ito ang tinukoy ni Simeon sa kanyang pahayag sa Mahal na Birheng Maria matapos niyang ipakilala ang Banal na Sanggol na si Hesus bilang tunay na liwanag sa kanyang kantikulo sa Ebanghelyo. Sabi ni Simeon sa Mahal na Inang si Maria sa bahaging iyon ng Ebanghelyo na isang balaraw ang tatarak kanyang puso dahil sa sasapitin ng kanyang Anak na si Hesus (Lucas 2, 35). Si Hesus, ang Anak ng Diyos at Anak ni Maria, ay mamamatay sa krus sa isang bundok na tinatawag Kalbaryo o Golgota upang linisin ang lahat ng tao sa daigdig mula sa bahid ng kasalanang umalipin sa kanila. 

Si Hesus, ang tunay na liwanag, ay dumating sa daigdig upang dalisayin ang lahat ng tao. Dumating Siya upang palayain tayo mula sa pagkaalipin sa ilalim ng kadiliman at kasalanan na pinamumunuan ng demonyong si Satanas. Dahil kay Hesus, hindi na tayo mga alipin ng kasamaan at kamatayan. Bagkus, tayo'y malaya na. Malaya na tayong makapamumuhay bilang mga anak ng Diyos. Ang bawat isa sa atin ay may kalayaang mamuhay bilang mga inampong anak ng Diyos dahil sa pagdanak ng dugo ng Kanyang Bugtong na Anak na si Hesus, ang tunay na liwanag.

Ang mga kandilang binasbasan sa simula ng Banal na Misa para sa pistang ipinagdiriwang ng Simbahan sa araw na ito ay nagsisilbing paalala at sagisag ng tunay na liwanag na si Hesus. Ang tunay na liwanag na nagmula sa langit na walang iba kundi ang Panginoong Hesus ay dumating sa daigdig upang tayo ay palayain mula sa pagkaalipin sa kadiliman. Hindi na tayo namumuhay bilang mga alipin ng kadiliman dahil pinalaya tayo ng tunay na liwanag na si Kristo. Si Kristo, ang tunay na liwanag na nagmula sa langit, ay nagtagumpay laban sa demonyong si Satanas, ang Prinsipe ng Kadiliman. Ginawa Niya ang kahanga-hangang bagay na ito sa pamamagitan ng Kanyang paghahain ng sarili sa krus at Muling Pagkabuhay. Sa pamamagitan nito, pinalaya tayo ni Kristo mula sa pagkaalipin sa ilalim ng kadiliman. 

ANG ATING MISYON: IPAKILALA ANG MAAWAING PANGINOON

31 Enero 2021 

Ikaapat na Linggo sa Karaniwang Panahon (B) 

Deuteronomio 18, 15-20/Salmo 94/1 Corinto 7, 32-35/Marcos 1, 21-28 

(Photo credits: Good News Productions International and College Press Publishing via FreeBibleimages.com)

Ang mga Pagbasa para sa Linggong ito ay tungkol sa misyon. Tintulungan tayo ng mga Pagbasa na unawain ang halaga ng pagmimisyon. Ang mga panauhing itinatampok sa mga Pagbasa ay may mga misyon. Isa lamang ang nagbigay sa kanila ng kanilang misyon. Isa lamang ang pinagmulan ng kanilang misyon. Ang pinagmulan ng kanilang misyon ay walang iba kundi ang Panginoon. Iyan ang dahilan kung bakit labis nilang pinapahalagahan ang kanilang mga misyon. Ang misyon ng mga panauhing itinatampok sa mga Pagbasa ay galing sa Diyos. 

Inilarawan ni Moises sa Unang Pagbasa ang misyon ng mga propeta. Ang mga propeta ay hinihirang ng Diyos upang magsalita sa Kanyang bayan. Ilalahad nila ang mensahe ng Diyos sa Kanyang bayan. Iyan ang dahilan kung bakit may mga propetang katulad na lamang nina Isaias, Jeremias, Nehemias, Malakias, Ezra, Ezekiel, at marami pang iba sa Lumang Tipan. Isa lamang ang dahilan kung bakit pinili at hinirang sila ng Diyos. Ang mga propeta ay hinirang ng Diyos upang maging Kanyang mga tagapagsalita sa Kanyang bayan. 

Hindi tinigil ang Diyos ang pagbibigay ng mga misyon sa mga tao nang matapos ang Lumang Tipan. Kahit sa mga taon nang maganap ang mga pangyayari sa Bagong Tipan, patuloy na nagbigay ng misyon ang Diyos. Marami pa rin Siyang pinili at hinirang upang tuparin ang misyong ibinibigay Niya sa kanila. Nandiyan si San Juan Bautista. Siya'y hinirang ng Diyos upang ihanda ang daraanan ng ipinangakong Mesiyas at Tagapagligtas na si Hesus, ang kanyang kamag-anak. Nandiyan din si Apostol San Pablo na naglakbay sa iba't ibang mga lugar bilang misyonero. Ang Ikalawang Pagbasa para sa Linggong ito ay isang bahagi ng kanyang unang sulat sa mga taga-Corinto. Ipinaliwanag ni Apostol San Pablo sa bahaging ito ng kanyang sulat ang layunin ng kanyang misyon bilang apostol at saksi ni Kristo. Sabi niya sa wakas ng kanyang mensahe na ginagawa niya ito upang tulungan silang mamuhay nang maayos at lubusang makapaglilingkod sa Panginoon (1 Corinto 7, 35). Iyan ang dahilan kung bakit si Apostol San Pablo ay naging isang misyonero. Hinirang ng Panginoon si Apostol San Pablo upang maging Kanyang apostol at misyonero nang sa gayon ay matulungan niya ang iba pang mga mananampalataya na mamuhay ayon sa kalooban ng Diyos. 

Si Hesus ay hindi naging iba. Maski si Hesus ay binigyan ng isang misyon. May dahilan kung bakit dumating si Hesus sa daigdig. May misyong ibinigay ng Ama kay Hesus. Si Hesus ay hindi nagkatawang-tao upang libutin ang mundong ito bilang isang turista. Si Hesus ay hindi dumating sa mundo upang magbakasyon mula sa langit. Bagkus, naparito si Hesus upang iligtas ang sangkatauhan. Ang pangaral ng Panginoon at ang Kanyang ginawang pagpapalayas ng masamang espiritu mula sa isang taong inaalihan nito sa Ebanghelyo ay pasulyap lamang ng Kanyang misyon. Ang misyon ni Hesus ay ihayag ang tagumpay ng awa at habag ng Diyos sa pamamagitan ng pagtubos sa sangkatauhan. Ginawa Niya ito sa pamamagitan ng Kanyang krus at Muling Pagkabuhay. Sa pamamagitan nito, ang Panginoong Hesus na ating Tagapagligtas ay nagtagumpay laban sa demonyong si Satanas. Kahit na ang Panginoong Hesus ay Diyos, nagkaroon rin Siya ng misyon. Ang Kanyang misyon ay iligtas ang sangkatauhan. Ang awa at habag ng Diyos ay nahayag sa pamamagitan ng misyong ito. 

Katulad ng Panginoong Hesukristo, ni Apostol San Pablo, ni Moises, at ng mga propeta sa Lumang Tipan, mayroong misyong ibinibigay sa atin ang Diyos. Ang misyong ibinibigay ng Diyos sa atin bilang mga Kristiyano ay ipakilala Siya sa lahat. Ang ating misyon ay ipakilala ang Diyos na puspos ng pag-ibig, awa, at habag para sa lahat. Iniatasan tayo ng Panginoon na maging Kanyang mga saksi. Hinirang tayo ng Diyos upang maging Kanyang mga misyonero. 

Tayong lahat ay inaanyayahan ng Diyos na tanggapin ang Kanyang pagpili at paghirang sa atin. Hinirang tayo ng Diyos para sa isang misyon. Ang bawat isa sa atin ay tinatanong sa Linggong ito kung tatanggapin natin ang misyong ito. Iyan ang dapat nating suriin at pag-isipang mabuti. Tayo ang magpapasiya kung ang misyong ito ay tatanggapin natin o hindi. 

MAAARING MAGING MISYONERO ANG BAWAT ISA

25 Enero 2021 

Kapistahan ng Pagbabagong-Buhay ni Apostol San Pablo 

Mga Gawa 22, 3-16 (o kaya: 9, 1-22)/Salmo 116/Marcos 16, 15-18 

Bilang mga Kristiyano, si Apostol San Pablo ay kinikilala at pinararangalan natin dahil sa kanyang kabanalan at katapatan sa Diyos. Kinikilala natin ang kanyang papel bilang isang apostol at misyonero. Katulad ng iba pang mga apostol, si Apostol San Pablo ay naglakbay sa napakaraming lugar sa kanyang misyon o ministeryo. Ang kanyang pagmimisyon ay hindi naging limitado sa iisang lugar lamang. Marami siyang pinuntahan. Sa bawat lugar na kanyang pinuntahan, siya'y laging nangaral tungkol sa Mabuting Balita. Saan man siya nagtungo sa kanyang pagmimisyon, lagi siyang nangaral sa mga tao tungkol sa Panginoong Hesukristo. Lagi niyang bukambibig si Kristo saan man siya nagpunta. 

Subalit, kung tayo ay pamilyar sa mga pangunahing elemento at detalye ng kuwento tungkol sa kanyang buhay, masasabi nating nakakagulat ang pagpili ng Panginoon sa kanya. Hindi akalain na pipiliin siya ng Panginoon matapos ang lahat ng mga ginawa niya sa mga unang Kristiyano. Ang nagtangkang usigin at ubusin ang lahat ng mga sinaunang Kristiyano ay pinili ng Panginoon upang maging Kanyang misyonero sa mga Hentil. Talagang nakapagtataka ito. Bakit ang nagtangkang usigin ang mga Kristiyano ang pinili pa ng Panginoon? 

Pinatotohanan mismo ni Apostol San Pablo ang kanyang mga ginawa laban sa mga sinaunang Kristiyano sa Unang Pagbasa. Subalit, hinirang siya ni Kristo upang gampanan ang isang napakahalagang misyon. Ang misyon na ibinigay ni Hesus sa mga apostol sa tampok na salaysay sa Ebanghelyo ay Kanya ring ibinigay kay Saulo na mas kilala bilang si Apostol San Pablo. Nakapagtataka naman ito. Bakit naman ipinasiya ng Panginoon na gawin ito? Sa dinadami-dami na maaaring pagpilian, iyon pang nagtangkang usigin ang mga sinaunang Kristiyano ang Kanyang pinili. 

Oo, buong sigasig na inusig ni Apostol San Pablo ang mga sinaunang Kristiyano bago siya nagbagong-buhay. Subalit, sa kabila ng kanyang mga ginawa laban sa mga sinaunang Kristiyano, pinili at hinirang pa rin siya ng Panginoong Hesus upang maging apostol at misyonero sa lahat ng mga bansa, lalung-lalo na sa mga Hentil. Ginawa ito ng Panginoon dahil sa Kanyang awa at habag. Dahil sa awa ni Hesus, si Apostol San Pablo ay naging isang apostol at misyonero. Isa itong patunay na may kapasidad ang bawat isa na maging misyonero. Ang awa at habag ng Diyos ay ang dahilan nito. 

Itinuturo sa atin ng Kapistahan ng Pagbabagong-Buhay ni Apostol San Pablo na ang bawat isa ay maaaring maging saksi at misyonero ng Panginoon. Kahit na sino ay maaaring piliin ng Panginoon upang maging Kanyang saksi. Kung ang dating tagausig ng mga sinaunang Kristiyano na si Saulo na mas kilala bilang si Apostol San Pablo ay pinili at hinirang ng Panginoon upang maging Kanyang misyonero, ano pa kaya tayo? Tayong lahat ay mga makasalanan. Subalit, sa kabila nito, tinatawag at pinipili tayo ng Panginoon upang maging Kanyang mga saksi at misyonero. Iyan ay dahil sa Kanyang awa. 

Kahit na tayo'y mga makasalanan, tinatawag pa rin tayo ng Panginoon upang maging Kanyang mga saksi at misyonero dahil sa Kanyang awa at habag. Ang tanong - tatanggapin ba natin ang paanyayang ito? 

ANG LAHAT (MALIBAN SA KAHARIAN NG DIYOS) AY MAY HANGGANAN

24 Enero 2021 

Ikatlong Linggo sa Karaniwang Panahon (B) 

Jonas 3, 1-5. 10/Salmo 24/1 Corinto 7, 29-31/Marcos 1, 14-20 

Sa kanyang pangaral sa Ikalawang Pagbasa, si Apostol San Pablo ay nagsalita tungkol sa takdang panahon. Ipinahiwatig niyang may mahalagang mangyayari pagsapit ng panahong ito. Katunayan, iyon ang ipinahiwatig ng linya sa huling bahagi ng kanyang pangaral sa Ikalawang Pagbasa. Sabi niya sa huling bahagi ng kanyang pangaral sa Ikalawang Pagbasa ay mapaparam ang lahat ng bagay (1 Corinto 7, 31). Kung gagamitin ang Ingles na salin ng kanyang sinabi, ang mga bagay na tinukoy ni Apostol San Pablo ay ang mga bagay sa kasalukuyan. 

Ano ang mangyayari sa takdang panahong tinutukoy ni Apostol San Pablo sa kanyang pangaral sa Ikalawang Pagbasa? Ano naman itong takdang panahong sasapit balang araw? Ito'y sinagot ni Hesus sa simula ng Kanyang pangaral sa Ebanghelyo. Katunayan, si Hesus ay nagsalita tungkol sa dalawang takdang panahon sa Ebanghelyo. Ang unang takdang panahon na tinukoy sa pangaral ni Hesus ay ang panahon ng katuparan, kung gagamitin natin ang Ingles na salin ng Ebanghelyo. Ano naman ang natupad? Ang pangako ng Panginoong Diyos. Ipinangako ng Diyos sa Lumang Tipan na ipapadala Niya ang Mesiyas. Ang pangakong ito ay natupad sa pamamagitan ng Panginoong Hesukristo. Hindi kinalimutan ng Diyos ang pangakong ito. Tinupad Niya ito sa takdang panahon sa pamamagitan ng Panginoong Hesus. Ang pangalawang takdang panahon na tinukoy ni Kristo sa Kanyang pangaral sa Ebanghelyo ay walang iba kundi ang pagdating ng paghahari ng Diyos. Darating ang panahon kung kailan ang Diyos ay maghahari sa lahat. Mapapasailalalim ang lahat sa paghahari ng Diyos. Sa huli, isa lamang ang mananatili, at iyon ay ang kaharian ng Diyos. Sabi nga sa isa sa mga pangaral ni Apostol San Pablo sa kanyang unang sulat sa mga taga-Corinto, "lubusang maghahari ang Diyos sa kalahat-lahatan" (15, 28). 

Natupad ang pangako ng Diyos sa pamamagitan ni Kristo. Si Kristo ay dumating bilang Tagapagligtas sa panahong itinakda ng Ama. Tinupad nga ng Diyos ang paulit-ulit Niyang ipinangako sa Lumang Tipan sa pamamagitan ni Kristo Hesus, ang Kanyang Bugtong na Anak. Hindi lamang ito nakatala sa Banal na Bibliya kundi pati na rin sa kasaysayan ng daigdig. Kinikilala ng kasaysayan ng mundo si Hesus; iyon nga lamang, hindi ito katulad ng pagkilala natin sa Kanya bilang mga Kristiyano. Dumating si Hesus, ang ipinangakong Mesiyas at Manunubos, upang tuparin ang pangako ng Diyos. Ang lahat ng ito ay nangyari sa panahong itinakda ng Diyos. 

Mahigit dalawang libong taon na ang nakararaan mula noong tinupad ng Diyos ang Kanyang pangako sa pamamagitan ng Panginoong Hesukristo. Pero, hindi lamang iyon ang takdang panahon na tinukoy ni Hesus sa Ebanghelyo. Huwag nating kakalimutan na dalawa ang takdang panahong inilarawan ng Panginoon sa Ebanghelyo. Natapos na ang unang takdang panahong inilarawan ni Hesus. Inaalala natin ito araw-araw sa tuwing ipinagdiriwang natin ang Banal na Misa at binabasa ang Banal na Bibliya. Subalit, habang ito ay inaalala natin, mayroon tayong kailangang gawin. Habang inaalala natin ang pagdating ng Panginoong Hesukristo bilang ipinangakong Mesiyas at Tagapagligtas noong unang takdang panahon, ang ikalawang takdang panahong tinukoy ni Hesus sa Ebanghelyo ay dapat nating paghandaan. Napakahalaga ng mangyayari sa nasabing panahon. Kaya naman, dapat nating ihanda ang ating mga sarili. 

Paano nating maihahanda ang ating mga sarili para sa pagsapit ng panahong ito na tunay ngang napakahalaga? Tularan ang mga taga-Nineve nang marinig nila ang mensahe ng Panginoon na ipinarating sa kanila ng propeta Jonas sa Unang Pagbasa. Nang ilahad ng propetang si Jonas ang mensahe ng Diyos sa kanila, agad silang nagkaisa bilang isang bayan sa pagsisisi at paghingi ng awa at habag mula sa Panginoong Diyos. Dahil dito, kinahabagan sila ng Diyos at hindi na natuloy ang paggunaw sa Nineve. Tularan din natin ang ginawa ng mga unang alagad ng Panginoong Hesus. Halos parehas ang kanilang ginawa sa ginawa ng mga taga-Nineve sa Unang Pagbasa, iyon nga lamang, iba nga lamang ang konteksto. Tinalikuran nila ang dati nilang pamumuhay bilang mga mamamalakaya o mangingisda nang sila'y tawagin ni Hesus. 

Bakit natin kailangang paghandaan ang pagdating ng paghahari ng Diyos sa pangalawang panahong itinakda? Bakit napakahalaga ang pagdating ng kaharian ng Diyos? Isa lamang ang dahilan. Ang kaharian ng Diyos ay walang hanggan. Gaya ng sabi ni Apostol San Pablo sa Ikalawang Pagbasa, ang lahat ng bagay sa mundong ito ay tuluyang maglalaho balang araw. Darating din ang araw kung kailan mawawala ang lahat ng bagay sa mundong ito. Ang lahat ng uri ng kasakiman, kawalan ng katarungan, pang-aapi, ay tuluyang maglalaho at mawawala. May hangganan ang lahat ng iyon. Isa lamang ang walang hanggan - iyon ay walang iba kundi ang paghahari ng Diyos. 

Ipinapaalala sa atin ngayong Linggo na may hangganan ang lahat ng bagay, maliban sa isa. Ang lahat ng uri ng kasamaan sa mundo katulad ng pang-aapi, katiwalian, kawalan ng katarungan, pagsasamantala, walang awang pagpatay sa mga inosente, at iba pang mga gawaing katulad nito ay may hangganan. Sa lahat ng mga kumukunsinti sa mga bagay na iyon, may araw din kayo. Darating din ang panahon na magwawakas ang lahat ng iyon. Darating ang panahon na hindi na ninyo magagawa ang mga ito o magpapairal nito. Hindi mananatili ang mga iyon magpakailanman. Isa lamang ang mananatili magpakailanman. Isa lamang ang walang katapusan. Ang kaharian ng Diyos. Sa walang hanggang kaharian ng Diyos, ang tunay na katarungan, kapayapaan, awa, at habag ay iiral at lalaganap. 

NAGING BATA UPANG MAGLIGTAS

17 Enero 2021 

Kapistahan ng Panginoong Hesus, ang Banal na Sanggol (B) 

Isaias 9, 1-6/Salmo 97/Efeso 1, 3-6. 15-18/Marcos 10, 13-16 

"Ano ang pangalan mo?" (Your name is?) Ito ang tanong nina Taki Tachibana at Mitsuha Miyamizu sa isa't isa sa katapusan ng pelikulang "Your Name" (Kimi No Na Wa). Ilang ulit na ipinalabas ang anime na pelikulang ito sa ABS-CBN. Ang pelikulang anime na ito, na dinub sa Tagalog, ay huling naipalabas sa nasabing istasyon noong Mahal na Araw ng nakaraang taon. Ang pelikulang ito ay tungkol kina Mitsuha at Taki at kung paano nila nakilala ang isa't isa, magmula noong sila'y nagpalit ng katawan nang paulit-ulit sa unang bahagi ng nasabing pelikula. Talaga namang napakaganda ng pelikulang ito. Sa sobrang ganda nito, tiyak na gugustuhin ninyong panoorin ulit ito, kahit ilang ulit ninyo itong napanood.

Isang napakamisteryosong Sanggol ang ipinakilala ni propeta Isaias sa kanyang propesiya sa Unang Pagbasa. Sabi ni propeta Isaias sa Unang Pagbasa na ang Sanggol na ito, isang Sanggol na lalaki, ay isinilang para sa atin (9, 6). Tayo ang dahilan kung bakit ang Sanggol na ito ay isinilang. Ang Sanggol na ito ay isang biyaya mula sa Diyos. 

Ano ang pangalan ng Sanggol na ito? Ano ang pangalan ng pagpapalang ito na ibinigay ng Diyos sa lahat? Ang pangalan ng biyayang ito na ibinigay ng Diyos sa lahat ay ibinunyag sa Ikalawang Pagbasa at Ebanghelyo. Ang pangalan ng biyayang ito, isang Sanggol na lalaki, ay "Hesus." Ang pagpapalang ito na nagngangalang Hesus ay nagsalita sa Ebanghelyo. Inihayag Niyang ang mga pinaghaharian ng Diyos ay yaong tumatanggap sa Kanyang kaharian katulad ng mga bata (Marcos 10, 15). Si Hesus na nagsabing para sa mga may puso at kaloobang katulad ng mga bata ang kaharian ng Diyos sa Ebanghelyo ay ang pagpapalang tinukoy sa propesiya ni propeta Isaias sa Unang Pagbasa. Si Hesus na nagbasbas sa mga bata sa Ebanghelyo ay ang biyayang ibinigay sa lahat ng Diyos. 

Sa pagdiriwang ng Kapistahan ng Panginoong Hesus, ang Banal na Sanggol, ang Santo Niño, magandang bigyan ng pansin at pagnilayan ang kahulugan ng Kanyang Ngalan. Ang pangalang "Hesus" ay nangangahulugang "Ang Diyos ay magliligtas." Malinaw na inilalarawan ng kahulugan ng Pangalan ni Hesus ang dahilan kung bakit Siya dumating sa daigdig. Ang Panginoong Hesukristo ay naparito sa mundo upang iligtas ang sangkatauhan. Sa pamamagitan ni Kristo Hesus, ang Diyos ay dumating sa daigdig upang tayo'y iligtas. 

Noong ang Diyos ay dumating sa daigdig sa pamamagitan ni Kristo, ang bawat yugto ng buhay ng tao ay pinagdaanan Niya. Niyakap, tinanggap, at inako Niya ang ating pagkatao. Siya'y naging isang tao tulad natin, maliban sa kasalanan, upang tayo'y iligtas. Nang Siya'y maging tao, naranasan ng Panginoon ang buhay bilang isang bata. Ang Panginoon ay naging isang sanggol, isang bata, katulad natin. Napagdaanan ng Diyos ang yugto ng kabataan. 

Bakit ipinasiya ng Diyos na pagdaanan ang kabataan? Bakit Niya ipinasiyang maging isang sanggol? Bakit Niya pinili maging isang bata? Sabi ni Apostol San Pablo sa kanyang pangaral sa Ikalawang Pagbasa na tayong lahat ay itinalaga ng Diyos upang maging Kanyang mga anak sa pamamagitan ng Poong Hesus dahil sa Kanyang pag-ibig (Efeso 1, 4-5). Iyan ang dahilan kung bakit dumating si Hesukristo sa mundong ito bilang isang sanggol. Pag-ibig ng Diyos. Dahil sa Kaniyang pag-ibig, niloob ng Diyos na maging isang bata sa pamamagitan ni Hesukristo upang tayong lahat ay iligtas. Sa pamamagitan nito, nahayag ang tanging hangarin at nais ng Diyos na tayo'y italaga bilang Kanyang mga anak. 

Ipinapaalala ng Kapistahan ng Santo Niño na ang Panginoong Hesukristo ay naging isang sanggol, isang bata, dahil sa Kanyang pag-ibig para sa atin. Dahil sa Kanyang pag-ibig para sa atin, ipinasiya Niya tayong iligtas. Ang biyaya ng pagliligtas ng Diyos ay dumating sa daigdig na ito sa pamamagitan ng Batang si Hesus, ang Banal na Sanggol na isinilang ng Mahal na Birheng Maria. 

ANG PAGPAPAKILALA SA HINIRANG

10 Enero 2021 

Kapistahan ng Pagbibinyag sa Panginoon (B) 

Isaias 55, 1-11 (o kaya: 42, 1-4. 6-7)/Isaias 12 (o kaya: Salmo 28)/1 Juan 5, 1-9 (o kaya: Mga Gawa 10, 34-38)/Marcos 1, 7-11

Isang napakahalagang pangyayari sa buhay ng Panginoong Hesukristo ay ang pagbibinyag sa Kanya sa Ilog Jordan. Nang si Hesus ay binyagan ni San Juan Bautista sa Ilog Jordan, ang Espiritu Santo ay bumaba mula sa langit sa anyo ng isang kalapati at nagsalita ang Amang nasa langit. Si Hesus ay ipinakilala ng Ama at Espiritu Santo. Dumating ang tinukoy ni San Juan Bautista na higit na makapangyarihan at dakila kaysa sa kanya (Marcos 1, 7). Siya ay ipinakilala sa lahat ng Ama at ng Espiritu Santo. Ang mismong Bugtong na Anak ng Diyos na si Hesus, ang ipinangakong Mesiyas, ay ang tinukoy ni San Juan Bautista. Ang kaganapang ito sa buhay ng Panginoong Hesukristo ay isinalaysay sa Banal na Ebanghelyo sa araw na ito. Katunayan, inilaan ng Simbahan ang Linggong ito upang ipagdiwang at alalahanin ang pangyayaring ito sa buhay ni Kristo. 

Ang bininyagan ni San Juan Bautista sa Ilog Jordan na si Hesus ay dumating sa daigdig para sa isang dahilan. Ang dahilan na ito ay inilarawan ni Apostol San Juan sa kanyang pangaral sa Ikalawang Pagbasa. Sabi ni Apostol San Juan na ibinubo ni Hesus ang Kanyang dugo noong Siya'y mamatay (1 Juan 5, 6). Siya'y pumarito sa mundo upang mamatay sa krus alang-alang sa lahat. Dumating si Hesus sa daigdig na ito upang maging hain para sa ikapagpapatawad ng mga kasalanan. Ginawa Niya sapagkat ito ang kalooban ng Diyos. Niloob ng Diyos na si Hesus ay mamatay sa krus bilang hain para sa ikapagpapatawad ng mga sala ng sangkatauhan. Kahit alam Niyang napakasakit ito, buong kababaang-loob na tinanggap, sinunod, at tinupad ni Kristo ang kaloobang ito ng Diyos. 

Niloob ng Diyos na ang Kanyang Bugtong na Anak ay dumating sa daigdig upang mamatay bilang handog alang-alang sa sangkatauhan dahil sa Kanyang pag-ibig, habag, at kagandahang-loob. Ang Kanyang habag, kagandahang-loob, at pag-ibig ay inilarawan sa Unang Pagbasa mula sa aklat ni propeta Isaias. Katunayan, ang mga salita sa Unang Pagbasa ay galing sa Panginoong Diyos mismo. Inihayag ng Diyos ang Kanyang pag-ibig, habag, at kagandahang-loob sa Unang Pagbasa. Kung paano Niya ito inihayag sa pamamagitan ng Kanyang lingkod na si Propeta Isaias, inihayag Niya ito sa pamamagitan ni Hesukristo sa Bagong Tipan. Ang Panginoong Hesus ay ang pinakadakilang larawan ng pag-ibig, habag, at kagandahang-loob ng Diyos. 

Sa Pagbibinyag sa Panginoong Hesukristo sa Ilog Jordan, mayroong ipinakilala ang Diyos sa lahat. Ipinakilala Niya ang magtutupad sa Kanyang kalooban na walang iba kundi ang Kaniyang Bugtong na Anak. Sa pamamagitan ng Kanyang Bugtong na Anak na si Hesus, tutuparin ng Diyos ang Kanyang kalooban. Ang kadakilaan ng Diyos ay mahahayag sa pamamagitan nito. 

May mahalagang nangyari noong si Kristo ay binyagan ni San Juan Bautista sa Ilog Jordan. Ipinakilala sa lahat ang ipinangakong Mesiyas at Tagapagligtas, ang Hinirang ng Diyos. Inihayag sa lahat kung paanong matutupad ang kalooban ng Diyos. Sa pamamagitan ni Kristo, ang kalooban ng Diyos ay matutupad. Ililigtas Niya ang lahat ng tao sa pamamagitan ng krus at Muling Pagkabuhay ni Hesus. 

POONG HESUS NAZARENO: TAGAPAWI NG TAKOT AT SINDAK

9 Enero 2021  

Kapistahan ng Traslacion ng Mahal na Poong Hesus Nazareno 

Mga Bilang 21, 4b-9/Salmo 77/Filipos 2, 6-11/Juan 3, 13-17 

(Traslacion 2021 Logo courtesy of Quiapo Church) 

Para sa Simbahan sa Pilipinas at para na rin sa maraming Pilipinong Katoliko sa buong mundo, ang ika-9 ng Enero ng bawat taon ay isang napakaespesyal na araw. Ang ika-9 ng Enero ay inilaan para sa taunang pagdiriwang ng Kapistahan ng Traslacion ng Mahal na Poong Hesus Nazareno. Dati, ang Pistang ito ay ipinagdiriwang lamang sa distrito ng Quiapo sa Lungsod ng Maynila kung saan matatagpuan ang Basilika Menor ng Poong Nazareno. Katunayan, may mga sariling Pagbasa at Panalangin para sa Misa sa karangalan ng Mahal na Poong Hesus Nazareno na ginagamit lamang dati sa Quiapo. Iba iyon sa mga Pagbasa at Panalanging ginagamit sa mga Misa sa Simbahan sa Maynila at maging sa iba't ibang lugar sa Pilipinas. Hindi lamang ginagamit ang mga nasabing Pagbasa at Panalangin kapag ipinagdiriwang ang Kapistahan ng Pagbibinyag sa Panginoon sa ika-9 ng Enero. Subalit, sa paglipas ng panahon, ang bilang ng mga deboto at namamanata sa Mahal na Poong Hesus Nazareno ay lalong dumadami. Tila hindi na ito ekslusibo sa distrito ng Quiapo. May mga Simbahan sa iba't ibang bahagi ng Pilipinas at maging sa iba't ibang bahagi ng mundo kung saan maraming mga Pilipinong Katoliko na nagdiriwang ng Kapistahang ito na talaga namang napakaespesyal. 

Sa mga nagdaang taon, sa distrito ng Quiapo na siyang sentro ng debosyon, isinasagawa ang maringal na prusisyon ng Traslacion. Ang prusisyon ng Mahal na Poong Nazareno ay ang pinaka-highlight ng Kapistahan. Maraming deboto ang nakikilahok sa maringal na prusisyon ng Mahal na Poong Nazareno. Ang prusisyon ay nagsisimula sa Luneta at umiikot sa distrito ng Quiapo matapos tumawid ng tulay. Dahil sa dami ng mga deboto na nakikilahok sa Luneta pa lamang, may mga kalye sa ilang mga lugar sa Maynila na isinasara dahil ito'y bahagi ng ruta ng prusisyon ng Mahal na Poong Nazareno. Iyan ay dahil sa dami ng mga debotong nakikilahok mula Luneta pa lamang. Hindi nga lang ito ginagawa ngayong taon dahil sa pandemiya. 

Maganda ang tema ng pagdiriwang ng Traslacion para sa taong ito. Ang tema para sa pagdiriwang ng Traslacion ng Mahal na Poong Nazareno ngayong taon ay "Huwag kayong matakot, si Hesus ito!" (Mateo 14, 27). Ito ang mga salita ni Kristo sa Kanyang mga apostoles noong nakita nilang Siyang naglalakad sa ibabaw ng tubig. Ang mga salitang ito ng Panginoong Hesus sa mga apostol ay ginamit bilang tema ng pagdiriwang ng Traslacion ngayong taon. Ang Poong Hesus Nazareno  ay ipinakilala ng tema ng pagdiriwang ng Traslacion ngayong taon bilang tagapawi ng lahat ng uri ng takot, sindak, at pangamba. Katunayan, ang Mahal na Poong Hesus Nazareno mismo ay nagpakilala ng Kanyang sarili bilang tagapawi ng lahat ng uri ng takot, sindak, at pangamba sapagkat ang mga salitang ito ay nagmula sa Kanya.

Tinalakay sa mga Pagbasa para sa araw na ito ang larawan ng Mahal na Poong Hesus Nazareno bilang tagapawi ng lahat ng uri ng takot, pangamba, at sindak. Sa Unang Pagbasa, iniligtas ng Panginoong Diyos ang mga Israelita mula sa kapahamakan at kamatayan. Inutusan ng Diyos si Moises na gumawa ng isang ahas na tanso upang ang lahat ng mga titingala sa nasabing ahas na tanso ay gumaling. Iyan ay matapos magpadala ang Panginoong Diyos ng mga ahas na makamandag sa mga Israelita upang sila'y parusahan. Dahil sa Kanyang awa at habag sa mga Israelita na nangagsisisi at nagbalik-loob sa Kanya, iniligtas Niya sila mula sa parusang Siya mismo ang naghatid sa kanila. Ang ahas na tanso na ginawa ni Moises ay ginamit ng Diyos bilang instrumento ng kaligtasan. Sa Ikalawang Pagbasa, si Apostol San Pablo ay nangaral tungkol sa kababaang-loob ni Kristo na naghatid ng kaligtasan. Iniligtas ng Diyos ang sangkatauhan sa pamamagitan ng kababaang-loob ni Hesus. Sa Ebanghelyo, inilarawan kung gaano kadakila ang pag-ibig ng Diyos para sa sangkatauhan. Ang pag-ibig ng Diyos ay ang dahilan kung bakit Niya ipinasiyang iligtas ang sangkatauhan sa pamamagitan ng Kanyang Bugtong na Anak na si Hesus. 

Ang kaloob ng Mahal na Poong Hesus Nazareno sa bawat isa sa atin ay hindi takot, sindak, at pangamba. Bagkus, ang Kanyang kaloob sa lahat ay galak at kaligtasan. Pinapawi Niya ang lahat ng ating takot, sindak, at pangamba sa pamamagitan ng Kanyang mga kaloob. 

Ipinapaalala sa atin ng tema ng pagdiriwang ng Traslacion ngayong taon na ang Mahal na Poong Hesus Nazareno ay ang tagapawi ng lahat ng takot, sindak, at pangamba. Kapag nakakaramdam tayo ng takot, sindak, at pangamba, lumapit tayo sa Mahal na Poong Nazareno. Siya ang papawi ng lahat ng mga ito.