POONG JESUS NAZARENO: ANG IPINANGAKONG TAGAPAGLIGTAS

3 Enero 2023 

Ika-3 ng Enero sa Panahon ng Pasko ng Pagsilang ng Panginoon 

Paggunita sa Kabanal-Banalang Ngalan ng Ating Panginoong Jesus Nazareno 

Ikaapat na Araw ng Pagsisiyam sa Karangalan ng Mahal na Poong Jesus Nazareno 

1 Juan 2, 29-3, 6/Salmo 97/Juan 1, 29-34 

Screenshot: 12.17.2022 (SATURDAY) 5:00 PM #AnticipatedMass - Quiapo Church Facebook and YouTube Live Stream

Kapag ang araw na ito ay hindi tumapat sa araw ng Linggo sapagkat tumapat sa araw ng Linggo ang mga araw ng pagdiriwang ng Kapaskuhan at Bagong Taon, ang Simbahan ay nagpapatuloy sa pagtalakay at taimtim na pagninilay sa pagkakilanlan ng Poong Jesus Nazareno bilang nagkatawang-taong Salita ng Diyos na dumating sa mundo bilang Banal na Sanggol na isinilang ng Mahal na Inang si Mariang Birhen sa isang hamak na sabsaban sa Betlehem, ang lungsod ni Haring David, noong gabi ng unang Pasko. Kasabay rin nito, inilaan rin ng Simbahan ang araw na ito sa pagtuon ng pansin, pagninilay, at paghahandog ng parangal, papuri, at pagsamba sa Kabanal-Banalang Ngalan ng Panginoong Jesus Nazareno. Ito rin ang ikaapat na araw ng taimtim na paghahanda para sa nalalapit na Pista ng Traslacion ng Mahal na Poong Jesus Nazareno sa pamamagitan ng Pagsisiyam sa Kanyang karangalan. 

Ang Kabanal-Banalang Ngalan ng Panginoong Jesus Nazareno ay mayroong sagisag na tinatawag na monogram o sa kasong ito ay Christogram. Ang mga monogram katulad na lamang ng mga Christogram ay mga simbolo na binubuo ng mga letra o titik. Sa wikang Latin, ang kahulugan ng sagisag na ito ng Pangalan ng Panginoong Jesus Nazareno ay "Iesus Hominem Salvator." Kung isasalin ito sa Tagalog, ang ibig sabihin nito ay "Hesus, Tagapagligtas ng Sangkatauhan." Sa sagisag ito ng Kabanal-Banalang Ngalan ng ating Panginoong Jesus Nazareno, malinaw na inilalarawan at ipinapaalala sa atin ang dahilan kung bakit Siya pumarito sa sanlibutan. Ipinapaalala rin sa atin ng sagisag na ito ang dahilan kung bakit ipinasiya Niyang tanggapin at yakapin ang Kanyang Krus, gaya ng inilalarawan ng imahen ng Poong Nazareno sa Quiapo man o sa ibang mga Simbahan sa Pilipinas at sa ibang mga bansa kung saang mayroong debosyon kay Kristo sa ilalim ng titulong Poong Jesus Nazareno. 

Nakasentro sa tunay na dahilan kung bakit ang Poong Jesus Nazareno ay naparito sa mundo ang pangaral ni Apostol San Juan sa Unang Pagbasa. Ang misyon ng Poong Jesus Nazareno bilang ipinangakong Mesiyas at Tagapagligtas ay binigyan ng pansin at tinalakay ni Apostol San Juan sa kanyang pangaral sa Unang Pagbasa. Ito ang tanging dahilan kung bakit ang Poong Jesus Nazareno ay dumating sa mundo. Ang Poong Jesus Nazareno ay nagpasiyang dumating sa mundong ito upang iligtas ang sangkatauhan sa pamamagitan ng Kanyang Krus at Muling Pagkabuhay. Bagamat hindi naman Niya kinailangang gawin iyon, ginawa pa rin Niya ito alang-alang sa atin. Dahil dito, ipinasiya ni Apostol San Juan na isalungguhit at itampok ang tungkulin at larawan ng Mahal na Poong Jesus Nazareno bilang Mesiyas at Tagapagligtas na siya ring dahilan kung bakit Niya ipinasiyang tanggapin, yakapin, at pasanin ang Krus. 

Sa Ebanghelyo, ang Panginoong Jesus Nazareno ay ipinakilala ni San Juan Bautista sa lahat ng mga nakikinig sa kanya bilang Kordero ng Diyos (Juan 1, 29). Inilarawan rin ng mga salitang ito ni San Juan Bautista sa Ebanghelyo ang misyon ng Panginoong Jesus Nazareno. Bilang Kordero ng Diyos na nag-aalis ng mga kasalanan ng mundo, ihahandog ng Panginoong Jesus Nazareno ang Kanyang sarili. Sa pamamagitan nito, masasaksihan ng lahat ang pagliligtas ng Diyos. Niloob ng Ama na si Jesus Nazareno ay magbibigay ng sarili bilang handog para sa ikaliligtas ng sangkatauhan. Sinunod at tinupad ng Poong Jesus Nazareno ang misyong bigay sa Kanya ng Ama nang buong kababaang-loob at pananalig. Ito ang inilalarawan ng bawat larawan o imahen ng Poong Jesus Nazareno. 

POONG JESUS NAZARENO: ANG TUNAY NA MASUNURIN SA KALOOBAN NG AMA

2 Enero 2023 

Paggunita sa Dakilang San Basilio at San Gregorio Nasianseno, mga Obispo at pantas ng Simbahan 

Ikatlong Araw ng Pagsisiyam sa Karangalan ng Mahal na Poong Jesus Nazareno 

1 Juan 2, 22-28/Salmo 97/Juan 1, 19-28 

Screenshot: 19 November 2022 | Pabihis sa Poong Jesus Nazareno (11:00 AM) - Quiapo Church Facebook and YouTube Live Stream

Kapag ang araw na ito ay hindi tumapat sa araw ng Linggo dahil tumapat ang mga araw ng Pasko at Bagong Taon sa araw ng Linggo, itinutuon ng Simbahan ang ating pansin sa misteryo ng pagkakilanlan ng Nuestro Padre Jesus Nazareno, ang Banal na Sanggol na isinilang ng Mahal na Inang si Mariang Birhen sa isang sabsaban noong gabi ng unang Pasko. Ang Nuestro Padre Jesus Nazareno ay ang Salita ng Diyos na nagkatawang-tao upang iligtas ang sangkatauhan. Ginawa Niya ito alang-alang sa bawat isa sa atin na tunay Niyang iniibig at sinisinta.  

Bukod sa pagiging araw sa loob ng panahon ng Pasko ng Pagsilang ng Panginoon, ang araw ring ito ay ang ikatlong araw ng Pagsisiyam sa karangalan ng Panginoong Jesus Nazareno bilang paghahanda para sa nalalapit na Kapistahan ng Traslacion. Sa ikatlong araw na ito ng paghahanda para sa Kapistahan ng Traslacion ng Mahal na Poong Jesus Nazareno sa pamamagitan ng Pagsisiyam o Pagnonobena sa Kanyang karangalan, itinutuon ng Simbahan ang ating pansin sa Kanyang pagiging tunay na masunurin sa kalooban ng Ama. Katunayan, ipinapahiwatig ito ng bawat imahen o larawan ng Poong Señor, mapa-orihinal man na matatagpuan sa Kanyang Basilika sa Quiapo o kaya naman sa mga replika sa mga Simbahan sanman sa Pilipinas at pati na rin sa ibang mga bansa dahil sa paglaganap ng debosyon sa Kanya. 

Sa Unang Pagbasa, ipinagpatuloy ni Apostol San Juan ang pagbibigay ng mga babala tungkol sa mga anti-Kristo sa kanyang pangaral. Patuloy niyang inilarawan ang mga katangian ng mga anti-Kristo. Inilarawan ni Apostol San Juan na si Jesus Nazareno ay hindi tinatanggap ng mga anti-Kristo bilang si Kristo. Ang Kamahal-mahalang Poong Jesus Nazareno ay pinagmumukhang sinungaling upang mapabango ang mga sarili nilang pangalan. Ginagawa nilang mga Kristo ang kanilang mga sarili. Ang bawat tao ay walang awa nilang nililinlang, binubudol, at niloloko nang sa gayon ay hindi nila makilala ang tunay na Kristo na walang iba kundi ang Panginoong Jesus Nazareno. Sa pamamagitan rin nito, ang kalooban ng Diyos ay kanilang tinututulan at itinatakwil. 

Taliwas ang mga sinisikap gawin ng mga anti-Kristo sa ginawa ni San Juan Bautista sa Ebanghelyo para sa araw na ito. Buong kababaang-loob niyang ang katotohanang hindi siya ang ipinangakong Mesiyas at Tagapagligtas. Bagkus, tagapaghanda lamang ng daraanan ng Panginoon si Juan Bautista. Bagamat nauna siya kay Jesus Nazareno upang ihanda ang Kanyang daraanan, masasabi nating ipinakita ni San Juan Bautista ang halimbawang ipapakita ni Jesus Nazareno. Tatanggapin at susundin nang buong kababaang-loob ang kalooban ng Ama. Ang ginawa ni Juan Bautista sa Ebanghelyo para sa araw na ito ay isang pasulyap ng pagtanggap at pagtalima ng tunay at kaisa-isang Kristo na si Jesus Nazareno sa kalooban ng Ama. 

Paano natin natitiyak na si Jesus Nazareno ay ang tunay na Kristo? Ito ay dahil buong kababaang-loob Niyang tinanggap at sinunod ang kalooban ng Amang nasa langit. Ang misyong ibinigay sa Kanya ng Ama, ang misyong binuo ng Banal na Santatlo, bilang ipinangakong Mesiyas at Tagapagligtas ng lahat ng tao, ay Kanyang tinanggap, sinunod, at tinupad nang buong kababaang-loob. Sa pamamagian nito, inihayag ng Mahal na Poong Jesus Nazareno ang Kanyang katapatan sa kalooban ng Amang nasa langit na nagsugo sa Kanya dahil sa Kanyang pag-ibig at kagandahang-loob. Upang tubusin ang sangkatauhang tunay Niyang inibig, nanatiling masunurin sa kalooban ng Amang nasa langit ang Poong Jesus Nazareno. Ang Kanyang katapatan ay hindi huwad o peke. Bagkus, tunay ang Kanyang katapatan sa Amang nagsugo sa Kanya dahil sa Kanyang pag-ibig at kagandahang-loob para sa sangkaauhan.

Itinuturo sa atin ng Simbahan sa araw na ito kung ano ang dapat nating gawin bilang mga deboto ng Poong Jesus Nazareno. Katulad ng Poong Jesus Nazareno, dapat rin tayong maging masunurin sa kalooban ng Ama. Hangarin rin nating mahayag ang kadakilaan ng Ama sa pamamagitan ng ating pagtanggap at pagsunod sa Kanyang loobin. Maging tapat rin tayo sa kalooban ng Ama hanggang sa huli. 

POONG JESUS NAZARENO: ANG PINAKADAKILANG PAGPAPALANG KALOOB NG DIYOS NA DUMATING SA MUNDONG ITO SA PAMAMAGITAN NG MAHAL NA BIRHENG MARIA

1 Enero 2023 

Dakilang Kapistahan ni Maria, Ina ng Diyos 

Ikawalong Araw ng Pagdiriwang ng Pasko ng Pagsilang 

Pandaigdigang Araw ng Panalangin para sa Kapayapaan 

Ikalawang Araw ng Pagsisiyam sa Karangalan ng Mahal na Poong Jesus Nazareno 

Bilang 6, 22-27/Salmo 66/Galacia 4, 4-7/Lucas 2, 16-21 

This faithful reproduction of the painting Birth of Christ (c. 18th century), as well as the work of art itself from Hampel Fine Art Auctions Munich, is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or less due to its age. 

Sa sekular na kalendaryo, ang araw na ito ay ang unang araw ng isang panibagong taon. Sa Kalendaryo ng Simbahan, ang araw na ito ay ang ikawalo at huling araw ng Walong Araw na Pagdiriwang ng Pasko ng Pagsilang ng Panginoon na siya ring araw na inilaan ng Simbahan para sa pagdiriwang ng Dakilang Kapistahan ni Maria, Ina ng Diyos. Subalit, para sa mga deboto ng Poong Jesus Nazareno, lalung-lalo na ang mga bumubuo sa pamayanan ng Simbahan ng Quiapo at pati na rin ang mga debotong madalas magsimba sa nasabing Simbahan saan man sila nagmula, ang araw na ito ay ang ikalawang araw ng Pagsisiyam o Nobenaryo sa Karangalan ng Nuestro Padre Jesus Nazareno bilang paghahanda para sa pagdiriwang ng Kapistahan ng Traslacion.

Ang ikalawang araw ng Pagsisiyam sa Karangalan ng Poong Señor Jesus Nazareno bilang paghahanda para sa nalalapit na Kapistahan ng Traslacion ay laging tumatapat sa pagdiriwang ng Dakilang Kapistahan ni Maria, Ina ng Diyos. Isa itong magandang pagkakataon para sa lahat ng mga deboto ng Nuestro Padre Jesus Nazareno na ipagpatuloy ang taimtim na pagninilay tungkol sa misteryo ng Kanyang pagsilang sa sabsaban noong gabi ng unang Pasko, lalung-lalo na't napapaloob pa rin sa panahon ng Pasko ng Pagsilang ng Panginoon ang araw na ito. Katunayan, ang araw na ito na inilaan ng Santa Iglesia para sa maringal na pagdiriwang ng Dakilang Kapistahan ni Maria, Ina ng Diyos ay ang ikawalo at huling araw ng Oktaba ng Pasko ng Pagsilang. 

Habang ang Simbahan ay nagpapatuloy ng pagninilay sa misteryo ng Pagsilang ng nagkatawang-taong Salita ng Diyos na walang iba kundi ang Banal na Sanggol na si Jesus Nazareno, itinutuon ng Simbahan ang ating pansin sa paksa o tema ng biyaya o pagpapala ng Diyos bilang salamin ng Kanyang habag para sa atin. Katunayan, ito ang dahilan kung bakit ang Mahal na Poong Jesus Nazareno ay dumating sa mundo bilang isang Sanggol na isinilang ng Mahal na Inang si Mariang Birhen noong gabi ng unang Pasko. Sa pamamagitan ng Kanyang pagsilang sa mundo, nahayag ang pag-ibig at habag ng Diyos na nagdudulot ng kaligtasan sa lahat. Tinalakay ang paksa o temang ito sa mga Pagbasa para sa pagdiriwang ng Simbahan sa araw na ito. 

Inilahad sa Unang Pagbasa ang mga salitang iniutos ng Panginoong Diyos na gamitin nina Aaron at sa kanyang mga anak sa tuwing babasbasan nila ang mga tao. Sa mga salitang ito na iniutos ng Diyos na bigkasin nina Aaron at ng kanyang mga anak sa rito ng pagbabasbas, isinalungguhit ang Kanyang pagiging mahabagin. Ang habag ng Diyos ay ang dahilan kung bakit patuloy Siyang nagkakaloob ng pagpapala sa tanan, bagamat likas sa tanang mga tao ang magkasala laban sa Kanya. Kahit paulit-ulit na magkasala laban sa Kanya ang tao, handa pa ring ipakita ng Panginoong Diyos ang Kanyang habag at kagandahang-loob na isinasalamin ng Kanyang biyaya. 

Nakasentro sa pinakadakilang biyayang ipinagkaloob ng Diyos sa sangkatauhan ang pangaral ni Apostol San Pablo sa Ikalawang Pagbasa at ang kaganapang itinatampok sa salaysay sa Ebanghelyo para sa Dakilang Kapistahang ito. Sa Ikalawang Pagbasa, inilarawan ni Apostol San Pablo kung paanong ipinagkaloob ng Diyos sa tanang mga tao sa mundo ang pinakadakilang pagpapala. Sabi niya na isinilang ng isang babae ang Bugtong na Anak ng Diyos noong sumapit ang panahong itinakda Niya (Galacia 4, 4). Sa Ebanghelyo, ipinakilala kung sino ang babaeng nagsilang sa Bugtong na Anak ng Diyos na dumating sa mundo sa panahong Kanyang itinakda. Ang babaeng ito ay walang iba kundi ang Mahal na Inang si Mariang Birhen. Hinirang ang Mahal na Inang si Mariang Birhen upang maging Ina ng nagkatawang-taong Salita ng Diyos na Siya ring Bugtong na Anak ng Diyos, Pangalawang Persona ng Banal na Santatlo, tunay at walang hanggang Hari, at Prinsipe ng Kapayapaan na walang iba kundi ang Banal na Sanggol - ang Mahal na Poong Jesus Nazareno. Sa pamamagitan nito, nahayag ang pag-ibig, habag, at kagandahang-loob ng Diyos. 

Bagamat tayong mga tao ay mga makasalanan, patuloy tayong kinahahabagan at pinagpapala ng Diyos. Ipinapakita pa rin sa atin ng Panginoong Diyos ang Kanyang kabutihan, habag, kagandahang-loob, at pag-ibig, sa kabila ng ating mga kasalanan laban sa Kanya. Ang pinakadakilang pagpapalang Kanyang ipinagkaloob sa atin ay walang iba kundi ang nagkatawang-taong Salita na Siyang Prinsipe ng Kapayapaan at tunay na Haring magpakailanman na si Jesus Nazareno na isinilang noong gabi ng unang Pasko ng Mahal na Inang si Mariang Birhen, ang Reyna ng Kapayapaan. Wala na'ng hihigit pa sa biyayang ito na ipinagkaloob ng Diyos. Isang Prinsipe na Hari rin ay ibinigay ng Diyos upang maging ipinangakong Mesiyas at Tagapagligtas. 

Mapalad tayo sapagkat mayroon tayong Diyos na patuloy tayong kinahahabagan at pinagpapala sa kabila ng ating mga kasalanan. Ang patunay nito ay walang iba kundi ang Nuestro Padre Jesus Nazareno, ang Prinsipe ng Kapayapaan na Siya ring tunay at dakilang Hari magpakailanman. Siya, ang Banal na Sanggol na isinilang ng Reyna ng Kapayapaan na walang iba kundi ang Mahal na Inang si Mariang Birhen noong gabi ng unang Pasko, ay dumating upang ihayag ang pag-ibig, habag, at kagandahang-loob ng Diyos na nagdudulot ng kaligtasan. 

POONG JESUS NAZARENO: ANG SALITA NG DIYOS NA NAGKATAWANG-TAO DAHIL SA PAG-IBIG

31 Disyembre 2022 

Ikapitong Araw ng Pagdiriwang sa Pasko ng Pagsilang 

Unang Araw ng Pagsisiyam sa Karangalan ng Mahal na Poong Jesus Nazareno 

1 Juan 2, 18-21/Salmo 95/Juan 1, 1-18 

Screenshot: Quiapo Church Live Mass (December 23, 2022 - 6:00 AM Mass)

Kapag ang araw na ito, ang ika-31 ng Disyembre na siya ring huling araw ng taon sa sekular na kalendaryo, ay hindi tumapat sa araw ng Linggo, ang ating mga pansin ay itinutuon sa katangian at misteryo ng Mahal na Poong Jesus Nazareno bilang Salita ng Diyos na nagkatawang-tao. Ang Banal na Sanggol na isinilang sa sabsaban noong gabi ng unang Pasko ay ang Salita ng Diyos na nagkatawang-tao. Noong gabing iyon, ang Salita ng Diyos na nagkatawang-tao ay dumating sa mundong ito bilang isang munting sanggol na lalaki na isinilang ng Mahal na Inang si Mariang Birhen. Subalit, hindi isang karaniwang sanggol na lalaki ang isinilang ng Mahal na Inang si Mariang Birhen dahil ang nasabing sanggol ay ang mismong Salita ng Diyos na nagkatawang-tao na dumating sa mundong ito upang iligtas ang sangkatauhan - ang Panginoong Jesus Nazareno. Dahil dito, ang Panginoong Jesus Nazareno ay ang pinakadakilang regalong ipinagkaloob ng Diyos sa lahat. 

Ang pagkakilanlan ng Poong Jesus Nazareno bilang Salita ng Diyos na nagkatawang-tao ay tinalakay at pinagnilayan sa Ebanghelyo. Ang mga salita sa Ebanghelyo para sa araw na ito ay ang mga unang salita ng Ebanghelyo ni San Juan. Pinagnilayan nang buong kataimtiman ng Manunulat ng Mabuting Balitang si Apostol San Juan sa mga unang bahagi ng kanyang salaysay tungkol sa Mabuting Balita ang pinakadakilang misteryong naganap noong gabi ng unang Pasko. Ang Salita ng Diyos na Diyos rin ay dumating sa mundong ito sa pamamagitan ng Nuestro Padre Jesus Nazareno. Sabi pa ni Apostol San Juan sa Ebanghelyo, ang Salita ng Diyos na nagkatawang-tao na si Jesus Nazareno ay dumating upang makapiling ang sangkatauhan (Juan 1, 14). 

Inilarawan rin ni Apostol San Juan sa huling bahagi ng kanyang pagninilay tungkol sa pagkakilanlan na ito ni Kristo, ang Nuestro Padre Jesus Nazareno, ang dahilan kung bakit Niya ito ginawa. Sabi ni Apostol San Juan na pag-ibig ang dahilan kung bakit tayo tumanggap ng abut-abot na kaloob mula sa Kanya (Juan 1, 16). Sa lahat ng mga biyayang ipinagkaloob sa atin, ang pinakadakilang biyayang ipinagkaloob Niya sa atin ay ang Kanyang sarili bilang ipinangakong Mesiyas at Manunubos. Inilarawan pa nga ni Apostol San Juan sa Ebanghelyo kung paanong hindi tinanggap ang nagkatawang-taong Salita ng Diyos o Verbo na si Jesus Nazareno noong una Siyang dumating sa mundo bilang ipinangakong Mesiyas at Tagapagligtas. Kung tutuusin, hindi naman kinailangan ng Poong Jesus Nazareno na gawin ito, lalo't higit alam Niyang maraming hindi tatanggap sa Kanya bilang ipinangakong Mesiyas at Tagapagligtas. Likas nga sa tao bilang mga makasalanan na hindi magpakita ng utang na loob kahit ginawaran sila ng mabuti. Batid naman ng Mahal na Poong Jesus Nazareno ang katotohanang ito tungkol sa atin bilang mga makasalanang tao. Subalit, sa kabila nito, ipinasiya pa rin ng Mahal na Poong Jesus Nazareno na ipakita sa atin ang Kanyang pag-ibig sa pamamagitan ng pagbigay sa atin ng pinakadakilang regalo - Siya mismo. 

Sa Unang Pagbasa, si Apostol San Juan ay nagbigay ng babala tungkol sa mga anti-Kristo. Inilarawan ni Apostol San Juan kung ano ang pakay ng mga anti-Kristo. Ang mga anti-Kristo ay tumututol at lumalaban sa katotohanan. Pawang kasinungalingan lamang ang kanilang pinapairal at ipinapalaganap saan man sila magtungo. Walang ibang hangad ang mga anti-Kristo kundi linlangin ang mga tao. Kaya nga, "anti-" ang tawag sa kanila. Tutol sila sa mga aral, utos, at gawain ni Kristo. Hindi sila pumapanig o kumakampi kay Kristo, ang Nuestro Padre Jesus Nazareno. Mga peke o huwad sila. 

Nakakalungkot nga lamang, maraming tao sa kasalukuyan ang nagpapaniwala sa mga panlilinlang at panloloko na ginagawa ng mga anti-Kristo. Ito ang gusto ng mga anti-Kristo, ang mahulog sa kanilang mga bitag ang marami. Ang kanilang taglay na talino ay ginagamit nila sa panlilinlang at pagmaninipula ng mga tao, lalung-lalo na yaong mga inosente at walang kalaban-laban. Minamanipula nila ang katotohanan upang sila ang magmukhang mabuti. Dahil dito, marami ang nagtatanggol sa kanila. Tinuturing pa nga silang Mesiyas o Tagapagligtas ng marami. Ang tunay na Diyos na walang iba kundi si Jesus Nazareno ay kanilang ipinagpalit sa mga huwad at pekeng sugo at pati na rin ang ilang mga taong may kapangyarihan sa lipunan. 

Panlilinlang at peke ang ipinapalaganap ng mga anti-Kristo. Subalit, ang pag-ibig ng tunay at walang hanggang Diyos na si Kristo, ang Nuestro Padre Jesus Nazareno, ay hindi peke. Bagkus, ang pag-ibig ng Salita ng Diyos na nagkatawang-tao na si Jesus Nazareno ay tunay at walang hanggan. Pinatunayan Niya ito noong ipinasiya Niyang dumating sa mundo sa kabila ng hindi pagtanggap sa Kanya ng marami upang iligtas ang sangkatauhan. Iyan ang tunay na Diyos. Iyan si Jesus Nazareno. 

Tayong lahat ay ipinaalala sa atin sa araw na ito, ang ika-31 ng Disyembre, ang huling araw ng taong ito sa sekular na kalendaryo na siya ring unang araw ng Pagsisiyam o Nobenaryo sa Karangalan ng Poong Jesus Nazareno, na isa lamang ang tunay at walang hanggang Diyos. Ang tunay at walang hanggang Diyos na buong puso nating pinananaligan, sinasampalatayanan, pinupuri, pinasasalamatan, at sinasamba bilang Simbahan ay tunay ngang mahabagin at mapagmahal. Pinatunayan Niya ito noong ipinasiya Niyang ipagkaloob ang pinakadakilang biyaya o regalo. Ang pinakadakilang regalong kaloob ng Diyos sa atin ay dumating noong gabi ng unang Pasko. Ito ay ang biyaya ng kaligtasan sa pamamagitan ng nagkatawang-taong Salita na walang iba kundi ang Poong Jesus Nazareno. Sa pamamagitan ng nagkatawang-taong Salita ng Diyos na si Jesus Nazareno, ang Diyos ay dumating sa mundong ito upang ihayag sa lahat ang Kanyang tunay at walang hanggang dakilang pag-ibig para sa atin. 

KABABAANG-LOOB ANG KANYANG IPINAKITA ALANG-ALANG SA ATIN

30 Disyembre 2022 

Kapistahan ng Banal na Mag-Anak Hesus, Maria, at Jose (A) 

Sirac 3, 3-7. 14-17a (gr. 2-6. 12-14)/Salmo 127/Colosas 3, 12-21/Mateo 2, 13-15. 19-23 

The Rest on the Flight into Egypt (c. 1597) by Giuseppe Cesari, also called Cavaliere d'Arpino (1568-1640), from the Collection of the Museum of Fines Arts Boston through the Web Gallery of Art, is in the Public Domain ("No Known Copyright") in its country of origin and in other countries and other areas where the copyright term is the author's life plus 100 years or less. 

Kapag ang mga araw ng Dakilang Kapistahan ng Pasko ng Pagsilang ng Panginoon at ang Dakilang Kapistahan ni Maria, Ina ng Diyos na siya ring araw ng Bagong Taon sa sekular na kalendaryo ay tumapat sa araw ng Linggo, ang espesyal na Kapistahang ipinagdiriwang ng Simbahan sa araw na ito, ang Kapistahan ng Banal na Mag-Anak Hesus, Maria, at Jose, ay inililipat sa Biyernes sa Walong Araw na Pagdiriwang o tinatawag na Oktaba ng Pasko ng Pagsilang ng Panginoong Hesukristo. Magandang bigyan ng pansin at pagnilayan ang katangiang ito ng Kapistahang ipinagdiriwang ng Simbahan sa araw na ito, lalung-lalo na't bihira lamang mangyaring tumapat sa isang araw ng Biyernes ang Kapistahang ipinagdiriwang sa araw na ito at dahil na ring inilaan ang araw ng Biyernes para sa pagdedebosyon at pamamanata sa Mahal na Poong Jesus Nazareno. 

Alam naman nating sinasagisag ng imahen o larawan ng Poong Jesus Nazareno ang kababaang-loob ng Panginoong Hesus. Dahil sa Kanyang kababaang-loob, ipinasiya ng Mahal na Poong Jesus Nazareno na iwanan ang Kanyang karangalan at kalagayan bilang tunay na Diyos at Haring walang hanggan upang iligtas ang sangkatauhan. Sa tuwing sasapit ang Kapistahang ipinagdiriwang ng Simbahan sa espesyal na araw na ito, itinutuon ng Simbahan ang ating pansin sa unang bahagi ng misyon ng Mahal na Poong Jesus Nazareno bilang ipinangakong Mesiyas at Tagapagligtas. Sa Kanyang unang pagdating sa mundong ito bilang ipinangakong Mesiyas at Tagapagligtas, hindi dinala o tinaglay ng Poong Jesus Nazareno ang Kanyang kapangyarihan, karangalan, o kadakilaan bilang Diyos at Hari. Bagamat Diyos Siya, ipinasiya Niyang dumating sa mundong ito katulad natin, maliban na lamang sa kasalanan. Ang Mahal na Poong Jesus Nazareno ay ipinanganak sa mundong ito sa isang hamak na sabsaban sa isang lungsod na tinatawag na Betlehem, ang lungsod ni Haring David, at naging bahagi ng pamilyang binuo ni San Jose at ng Mahal na Inang si Mariang Birhen. 

Tinalakay sa Unang Pagbasa at Ikalawang Pagbasa para sa araw na ito ang konsepto ng kababaang-loob ng mga anak. Bilang Bugtong na Anak ng Diyos na naging Anak rin ni San Jose at ng Mahal na Inang si Mariang Birhen, si Jesus Nazareno ay naging mapagpakumbaba. Katunayan, ang pasiya ng Panginoong Jesus Nazareno na maging anak ni San Jose at ng Mahal na Inang si Mariang Birhen ay isa ring tanda ng Kanyang kababaang-loob. Bagamat Diyos Siya, si Kristo ay naging masunurin kay San Jose at sa Mahal na Birheng Maria. 

Subalit, hindi porket na ang Poong Jesus Nazareno ay ang Bugtong na Anak ng Diyos ay nangangahulugang naging ligtas na Siya at ang pamilyang kinabahaginan Niya sa mundong ito mula sa mga pagsubok sa buhay. Maraming hinarap at pinagdaanang pagsubok sa buhay sa mundong ito ang Sagrada Familia. Isa sa mga sandaling ito ay itinampok sa salaysay sa Ebanghelyo. Kinailangang tumakas ang Sagrada Familia sa Ehipto upang mailigtas ang Banal na Sanggol na si Jesus Nazareno mula sa kamay ng nagbabalak na ipapatay Siya dahil sa kanyang pagiging sakim at gahaman - si Haring Herodes. Bagamat ang ipinagkaloob ng Diyos sa Mahal na Inang si Mariang Birhen at kay San Jose ay ang pinakaperpekto sa lahat na walang iba kundi si Jesus Nazareno, labis rin silang nahirapan sa kanilang mga tungkulin bilang Kanyang mga magulang dahil sa iba't ibang mga banta laban sa Kanya, kahit Sanggol pa lamang Siya noon. 

Hindi kinailangang maging bahagi ng isang pamilya dito sa mundong ito ang Mahal na Poong Jesus Nazareno. Sa totoo lang, maaari naman Siya dumating sa mundong ito taglay ang Kanyang kadakilaan bilang Diyos at Hari. Batid naman Niya ang mga panganib na Kanyang haharapin, dadanasin, at titiisin at maging ang mga panganib o banta na haharapin rin ng pamilyang kinabilangan Niya. Subalit, alang-alang sa atin, ang Poong Jesus Nazareno ay nagpasiya pa ring maging bahagi ng isang pamilya. Sa kabila ng mga panganib at banta laban sa Kanya, na nagsimula noong isa pa lamang Siyang Sanggol, ipinasiya pa rin ng Poong Nazareno na magpamalas ng kababaang-loob at maging Anak ni San Jose at ng Mahal na Inang si Mariang Birhen. 

Isa lamang ang dahilan kung bakit may Pasko. Ipinasiya ng Poong Jesus Nazareno na magpakita ng kababaang-loob. Ito ang dahilan kung bakit ang Poong Jesus Nazareno ay isinilang ng Mahal na Inang si Mariang Birhen sa isang hamak na sabsaban noong gabi ng unang Pasko. Alang-alang sa atin, ang Mahal na Poong Jesus Nazareno ay nagpakumbaba upang tayo ay iligtas. Katulad ng Mahal na Poong Jesus Nazareno, tayong lahat ay dapat mamuhay nang may kababaang-loob. Ipakita natin sa ating pamilya at sa ating kapwa ang ating kababaang-loob. Sa pamamagitan ng ating kababaang-loob, nahahayag ang ating debosyon at pamamanata sa Mahal na Poong Jesus Nazareno. 

LIWANAG NA NAGDUDULOT NG KALIGTASAN AT PAGBABAGO

29 Disyembre 2022 

Ikalimang Araw ng Pagdiriwang sa Pasko ng Pagsilang ng Panginoon 

1 Juan 2, 3-11/Salmo 95/Lucas 2, 22-35 

The Presentation at the Temple (1463) by Hans Memling (circa 1433-1494) from the National Gallery of Art Collection through the Web Gallery of Art is in the Public Domain ("No Known Copyright") in its country of origin as well as other countries and areas where the copyright term is the author's life plus 100 years or less due to its age. This is also in the Public Domain in the United States. 

Kapag hindi tumapat sa araw ng Linggo ang araw na ito, ika-29 ng Disyembre na siya ring Ikalimang Araw sa Walong Araw na Pagdiriwang na kilala rin bilang Oktaba ng Pasko ng Pagsilang ng Panginoong Jesus Nazareno, tinalakay sa mga Pagbasa para sa araw na ito ang pagiging tunay na liwanag ni Jesus Nazareno. Ito ang katangian at aspeto ng misyon ng Poong Jesus Nazareno na nais pagnilayan ng Simbahan sa araw na ito. Si Jesus Nazareno, ang ipinangakong Mesiyas at Manunubos, ay ang tunay na liwanag na nagmula sa langit. Bilang liwanag na nagmula sa langit, dumating Siya sa gabi ng unang Pasko bilang isang sanggol na isinilang sa isang hamak na sabsaban upang iligtas ang lahat ng tao mula sa mga pwersa ng kadiliman at kasamaan. 

Ang larawan ng Poong Jesus Nazareno bilang tunay na liwanag ay binigyan ng pansin sa mga Pagbasa para sa araw na ito. Sa Ebanghelyo, inihayag ni Simeon noong ang Banal na Sanggol na si Jesus Nazareno ay kanyang nakita at kinarga na nakita na niya kung paano ililigtas ng Diyos ang sangkatauhan. Ipinagkaloob ng Diyos ang Kanyang tunay na liwanag na papawi sa kadiliman at kasamaan. Sa pamamagitan ng liwanag na ito, ililigtas ng Diyos ang sangkatauhan. Ang liwanag na ito ay walang iba kundi si Jesus Nazareno, ang ipinangakong Mesiyas at Tagapagligtas. 

Dahil sa biyaya ng pagliligtas na nagmula sa tunay na liwanag na si Jesus Nazareno, itinuro ni Apostol San Juan sa Unang Pagbasa para sa araw na ito kung paanong ang lahat ng mga iniligtas at pinalaya ng Poong Jesus Nazareno mula sa mga puwersa ng kadiliman, kasalanan, at kamatayan ay dapat mamuhay. Hindi na dapat mamuhay pa bilang mga makasalanan ang lahat ng mga iniligtas ni Kristo. Bagkus, dapat lamang silang mamuhay sa liwanag ni Kristo, ang Poong Jesus Nazareno. Dapat yakapin at tanggapin ang bagong buhay bilang mga iniligtas, nililiwanagan, at pinalaya ng Mahal na Poong Jesus Nazareno. 

Bilang tunay na liwanag na nagmula sa langit, ang Nuestro Padre Jesus Nazareno ay dumating sa mundong ito upang maghatid ng kaligtasan. Sa pamamagitan nito, ang lahat ng tao sa mundong ito ay binigyan Niya ng pagkakataong baguhin ang kanilang mga sarili para sa Kanya. Hanggang ngayon, patuloy tayong binibigyan ng Mahal na Poong Jesus Nazareno ng pagkakataon baguhin ang ating mga sarili at mamuhay sa ilalim ng Kanyang liwanag. 

Nais ba nating lumalim at lumago ang ating debosyon sa Poong Jesus Nazareno? Sa pamamagitan ng pagtanggap sa pagkakataong ibinibigay Niya sa atin na baguhin ang ating mga sarili at mamuhay sa Kanyang liwanag, magagawa natin iyon. Kapag ito ay ipinasiya nating gawin, inihahayag at ipinagmamalaki nating tunay nga tayong mga debotong namamanata sa Mahal na Poong Jesus Nazareno. 

TITINDIG O MAGPAPAKAMANHID?

28 Disyembre 2022 

Kapistahan ng mga Banal na Sanggol na Walang Kamalayan, mga martir 

1 Juan 1, 5-2, 2/Salmo 123/Mateo 2, 13-18 

The Massacre of the Innocents by Jacopo Palma (Palma il Giovane - 1548/1550-1628) from Sotheby's is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because this was published (or registered with the U.S. Copyright Office) before January 1, 1927.

Kapag ang araw na ito, ika-28 ng Disyembre, ay hindi tumapat sa araw ng Linggo, ang araw na ito ay inilaan ng Simbahan upang gunitain ang isang kahindik-hindik na pangyayari o kaganapan sa unang bahagi ng kasaysayan ng pagligtas ng Panginoong Diyos sa sangkatauhan sa pamamagitan ng Mahal na Poong Jesus Nazareno. Noong gabi ng unang Pasko, dumating sa mundong ito ang biyaya ng kaligtasang kaloob sa lahat ng Diyos sa pamamagitan ng Banal na Sanggol na isinilang ng Mahal na Inang si Mariang Birhen sa isang sabsaban sa Betlehem na si Jesus Nazareno. Subalit, ang biyayang ito ng Diyos ay hindi tinanggap ng lahat ng tao. Isang patunay nito ay ang mga banal na sanggol na walang kamalay-malay na ipinapaslang ni Haring Herodes upang tiyaking walang makakapalit sa kanya sa trono. 

Ang kaganapang binibigyan ng pansin at ginugunita ng Simbahan sa araw na ito ay isinalaysay nang buo sa Ebanghelyo. Sa salaysay tungkol sa kaganapang ito na tunay ngang kahindik-hindik at kasuklam-suklam na inilahad sa Banal na Ebanghelyo para sa araw na ito, itinuro sa atin kung bakit ang kaganapang ito ay nangyari. Dahil sa kasakiman para sa kapangyarihang taglay, iniutos ni Haring Herodes na ang lahat ng mga sanggol na lalaki na may taong gulang na dalawang taon pababa sa lungsod ng Betlehem ay ipaslang (Mateo 2, 16). Ipinapatay ni Herodes ang mga sanggol na ito na walang awa dahil sa kanyang pagiging sakim at gahaman. Ito ang bukod tanging dahilan kung bakit pinairal niya ang kawalan ng katarungan at pang-aapi. 

Noong gabi ng unang Pasko, ang biyaya ng kaligtasang kaloob ng Diyos ay dumating sa mundong ito sa pamamagitan ng bagong silang na Banal na Sanggol na walang iba kundi ang Mahal na Poong Jesus Nazareno. Tulad ng sabi ni Apostol San Juan sa Unang Pagbasa, dumating sa mundong ang Panginoon at Tagapagligtas na si Kristo, ang Poong Jesus Nazareno, upang maging handog para sa ikapagpapatawad ng mga kasalanan (1 Juan 2, 2). Subalit, hindi lahat ay naging bukas sa biyayang ito ng Diyos. Mayroon pa ring mga taong nagpasiyang pairalin ang pang-aapi, pagmamalupit, at pang-aabuso na bunga ng pagiging gahaman at sakim katulad na lamang ni Haring Herodes. Mas pipiliin nilang isarado at ipinid ang sarili sa pagpapala ng Diyos nang sa gayon ay maipairal nila ang kawalan ng katarungan na bunga ng pagiging gahaman. 

Subalit, ang nakakalungkot, sa tuwing may mga pagkakataong umiiral ang pang-aapi, pang-aabuso, at kawalan ng katarungan sa lipunan, mayroong mga nagpapasiyang magpakamanhid, magbibingi-bingihan, at magbubulag-bulagan. May mga lilitaw o darating na bagong Herodes sa lipunan. Subalit, ano ang tiyak na gagawin ng ilan sa lipunan sa kasalukuyan? Mayroong ilang magbibingi-bingihan, magbubulag-bulagan, o magpapakamanhid. Nakakalungkot, pero iyon ang totoo. Hahayaan nilang maulit ang kaganapang nangyari sa Ebanghelyo para sa araw na ito. Pahihintulutan nilang umiral ang kawalan ng katarungang bunga ng pagiging sakim at gahaman. Ito ba ang katangian ng mga tunay na deboto ng Mahal na Poong Jesus Nazareno? Hindi. Ito ay dahil mawawalan ng kabuluhan ang debosyon at pamamanata sa Mahal na Poong Jesus Nazareno kung magiging manhid sila sa kawalan ng katarungan. 

Itinuturo sa atin ng Simbahan sa araw na ito kung ano ang dapat gawin ng mga tunay na deboto ng Mahal na Poong Jesus Nazareno. Ang mga tunay na deboto ng Poong Jesus Nazareno ay hindi magiging tahimik at manhid sa harap ng mga kawalan ng katarungan at pang-aapi sa lipunan. Titindig sila upang ang mga nagpapalaganap ng pang-aapi at kawalan ng katarungan ay tutulan at labanan. Sa pamamagitan nito, ang pag-ibig, habag, kabutihan, at kagandahang-loob ng Panginoong Diyos na siyang dahilan kung bakit Niya iniligtas ng sangkatauhan ay kanilang ipapalaganap. 

Tayong lahat ay tinatanong sa araw na ito. Ano ang gagawin natin sa harap ng pang-aapi at kawalan ng katarungan sa lipunan? Titindig ba tayo upang tutulan at labanan ito o kaya naman magpapakamanhid at tatahimik na lamang? 

TAPAT NA SAKSI NG POONG JESUS NAZARENO

27 Disyembre 2022 

Kapistahan ni Apostol San Juan, Manunulat ng Mabuting Balita

1 Juan 1, 1-4/Salmo 96/Juan 20, 2-8 

This file is a reproduction of the painting St. John and St. Peter at Christ's Tomb (c. 1640) by Giovanni Francesco Romanelli (Italy, Viterbo, circa 1610-1662) from the Los Angeles County Museum of Art Collection, which is in the Public Domain ("No Known Copyright") because it has been released by the Los Angeles County Museum of Art (www.lacma.org) with its "Public Domain High Resolution Image Available" mark. LACMA is unaware of any current copyright restrictions on Content so designated, either because (i) the term of copyright has expired, (ii) no evidence has been found that copyright restrictions apply, or (iii) because LACMA owns copyright but would like to share this Content with the public without exercising control as part of its mission to engage and educate its communities. LACMA does not warrant that the sharing of this Content will not infringe upon the rights of third parties holding rights to these works. For more information see the LACMA Image Library Terms and Conditions.

Kapag hindi tumapat ang araw na ito, ika-27 ng Disyembre, sa isang araw ng Linggo, ang araw na ito ay inilaan upang ipagdiwang nang may pagpupuri at pasasalamat sa Diyos para sa biyaya ng katapatan ni Apostol San Juan hanggang sa huli. Isa siya sa mga pinili at hinirang ng Panginoong Jesus Nazareno na maging isa sa mga susunod sa Kanya bilang Kanyang mga apostol at alagad. Bilang apostol ng Panginoong Jesus Nazareno, katulad ng kanyang mga kasama (maliban kay Hudas Iskariote), nanatiling tapat si Apostol San Juan sa Panginoon. Katulad ng mga kapwa niyang apostol at ng iba pang mga kabilang sa kasamahan ng mga banal sa langit, si Apostol San Juan ay pinararangalan at itinatampok ng Simbahan dahil nanatili siyang tapat kay Kristo. 

Sa Unang Pagbasa, si Apostol San Juan ay nagsalita tungkol sa kanyang paraan ng paghahayag ng kanyang katapatan sa Panginoong Jesus Nazareno. Katulad ng mga kapwa niyang apostol ng Mahal na Poong Jesus Nazareno, si Apostol San Juan ay laging nangangaral at nagpapatotoo tungkol sa pag-ibig ng Diyos na inihayag Niya sa tanan sa pamamagitan ng Kanyang Bugtong na Anak at Ikalawang Persona ng Banal na Santatlo na walang iba kundi ang Salita na nagbibigay-buhay na si Jesus Nazareno (1 Juan 1, 1-3). Sa pamamagitan nito, ipinapakilala niya sa lahat kung kanino niya ibinibigay ang kanyang katapatan na dapat ring paglingkuran ng lahat ng mga tao sa mundong ito nang buong katapatan hanggang sa huli - si Jesus Nazareno. 

Tampok sa salaysay sa Ebanghelyo ang nakita ni Apostol San Pedro at ng minamahal na alagad ng Poong Jesus Nazareno na si Apostol San Juan noong araw ng Pasko ng Muling Pagkabuhay. Bagamat napapaloob tayo sa panahon ng Pasko ng Pagsilang, inilarawan sa Ebanghelyo ang dahilan kung bakit ang Banal na Sanggol na walang iba kundi si Jesus Nazareno ay isinilang noong gabi ng unang Pasko. Si Jesus Nazareno ay dumating sa mundong ito bilang Banal na Sanggol na isinilang ng Mahal na Inang si Mariang Birhen noong gabi ng unang Pasko upang ang sangkatauhan ay iligtas sa pamamagitan ng Kanyang Krus at Muling Pagkabuhay. Nahayag sa pamamagitan ng gawaing ito ng Poong Jesus Nazareno ang pag-ibig ng Diyos. Ito ang katotohanang laging ipinangaral, pinatotohanan, at ibinahagi sa lahat ng Apostol at Manunulat ng Banal na Ebanghelyo na si San Juan hanggang sa huli nang buong katapatan. 

Ang halimbawang ipinakita ni Apostol San Juan hanggang wakas ay dapat tularan ng lahat ng mga deboto ng Mahal na Poong Jesus Nazareno. Kung tunay, tapat, at taos-puso tayo sa ating pagsamba, debosyon, at pamamanata sa Mahal na Poong Jesus Nazareno, magpapatotoo tayo sa kapwa tungkol sa Kanya sa pamamagitan ng ating mga kilos at salita. Ipapakilala natin Siya sa kapwa. Ibabahagi rin natin ang Kanyang biyaya sa ating kapwa, lalung-lalo na sa mga kapus-palad. Higit sa lahat, ang mga utos at tuntuning ibinibigay Niya sa atin ay ating susundin. 

TUNAY NA DEBOSYON

26 Disyembre 2022 

Kapistahan ni San Esteban, Unang Martir 

Mga Gawa 6, 8-10; 7, 54-59/Salmo 30/Mateo 10, 17-22 

St. Stephen the Martyr by Fabrizio Santafede (1560-1623/28) from the Collection of the Museum of Fine Arts, Budapest, is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or fewer due to its age.

Kapag hindi tumapat sa isang araw ng Linggo ang ika-26 ng Disyembre na siyang unang araw ng tinatawag na Walong Araw na Pagdiriwang o Oktaba ng Pasko ng Pagsilang ng Panginoong Jesus Nazareno, ang ipinangakong Mesiyas at Manunubos, inilaan ng Simbahan ang araw na ito upang gunitain, ipagdiwang, at pasalamatan ang Diyos sa biyaya ng katapatan, kagitingan, at tagumpay ng unang martir ng Simbahan na si San Esteban. Bilang unang martir ng Simbahan, pinili ni San Esteban na maging tapat sa kanyang pananampalataya hanggang sa huli. Pinili niyang mamatay bilang martir para kay Kristo at sa Simbahan kaysa iligtas ang sarili mula sa pag-uusig dahil sinusundan, iniibig, pinananaligan, at sinasampalatayanan si Kristo. 

Ang kuwento ng pagiging martir ni San Esteban ay isinalaysay sa Unang Pagbasa para sa araw na ito na inilaan ng Simbahan upang gunitain at ipagdiwang nang may taos-pusong pasasalamat at pagpupuri ang kanyang katapatan sa Panginoon. Hindi binitiwan at tinalikuran ni San Esteban ang kanyang pananampalataya. Bagkus, ang kanyang pananampalataya, pag-asa, pananalig, pag-ibig, at pagsamba sa tunay na Diyos na nagpakita ng kanyang pag-ibig sa pamamagitan ni Kristo, ang ating Mahal na Poong Jesus Nazareno, ay buong katapatan niyang ipinagmalaki at pinanindigan hanggang sa huli, kahit ang kapalit nito ay ang kanyang buhay sa mundo. 

Sa Ebanghelyo, inilarawan ng Mahal na Poong Jesus Nazareno ang mga pag-uusig na haharapin at titiisin ng mga nagpapasiyang maging tapat sa Kanya. Kung paanong ipinakita ng ating Poong Jesus Nazareno ang Kanyang katapatang walang maliw sa pamamagitan ng Kanyang pagdating sa mundo bilang ipinangakong Mesiyas, kahit batid Niyang hindi Siya tatanggapin ng marami, gayon din naman, ang mga tunay na tapat sa Poong Jesus Nazareno ay mananatiling tapat hanggang wakas, kahit na may mga magtatakwil at uusig sa kanila dahil sa pasiyang ito. Isang halimbawa nito ay walang iba kundi ang unang martir ng Simbahan na si San Esteban. 

Ipinasiya ni San Esteban na maging tapat sa Panginoong Jesus Nazareno, ang unang naging tapat sa atin, hanggang sa huling sandali ng kanyang buhay sa mundo. Ito rin ba ang ating magiging pasiya? 

Tinuturan tayo ng Simbahan sa araw na ito kung paano nga ba maging mga tunay na deboto ng Mahal na Poong Jesus Nazareno. Ang mga tunay na deboto ng Mahal na Poong Jesus Nazareno ay tapat sa Kanya hanggang sa huli. Si San Esteban ay isang halimbawang dapat tularan ng mga tunay na deboto ng Poong Jesus Nazareno dahil ipinasiya niyang manatiling tapat sa Kanya hanggang sa huli. 

MAY PASKO DAHIL SA BANAL NA SANGGOL NA ISINILANG SA SABSABAN

25 Disyembre 2022 

Dakilang Kapistahan ng Pasko ng Pagsilang ng Panginoong Jesus Nazareno 

[Pagmimisa sa Araw]

Isaias 52, 7-10/Salmo 97/Hebreo 1, 1-6/Juan 1, 1-18 (o kaya: 1, 1-5. 9-14) 

Natividade (c. 1650s) by Josefa de Obidos (1630-1684) is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or fewer due to its age and the death of its author in 1684. This is also in the Public Domain in the United States because it was published (or registered with the U.S. Copyright Office) before January 1, 1927. 

Ang mga Pagbasa para sa Banal na Misa sa Araw ng Dakilang Kapistahan ng Pasko ng Pagsilang ng Panginoong Jesus Nazareno ay nakatuon sa paksa ng kaligtasan. Sa tulong ng mga Pagbasa para sa Misang ito, muling itinuturo at ipinapaalala sa atin ng Simbahan ang tunay na dahilan kung bakit ang Pasko ay ating ipinagdiriwang nang buong galak. Hindi tungkol sa mga palamuti o mga regalong binabalot at inilalagay sa ilalim ng mga punong pamasko (Ingles: Christmas Tree). Bagkus, ang pagdiriwang ng Kapaskuhan ay tungkol sa pagkakaloob sa atin ng Diyos ng pinakadakilang regalo na walang iba kundi ang biyaya ng kaligtasan. Ang aguinaldong ito ng Diyos sa atin ay dumating sa mundong ito sa takdang panahon sa pamamagitan ng Nuestro Padre Jesus Nazareno, ang Banal na Sanggol na ipinanganak ng Mahal na Inang si Maria sa isang hamak na sabsaban. 

Sa Banal na Ebanghelyo para sa Araw ng Kapaskuhan, ang Poong Jesus Nazareno ay ipinakilala bilang Salita ng Diyos na nagkatawang-tao. Si Jesus Nazareno, ang Salita ng Diyos at ang mismong Diyos na namumuhay na noon pa mang una, bago pa man likhain ang mundong ito, ay nagkatawang-tao sa panahong itinakda ng Diyos. Nang dumating ang takdang panahon, ang Salita ng Diyos na isa rin sa Tatlong Personang bumubuo sa Banal na Santatlo, ang tunay at nag-iisang Diyos, ay nagkatawang-tao at ipanganak ng Mahal na Inang si Mariang Birhen sa isang hamak na sabsaban. Sa kabila ng Kanyang kapangyarihan, ipinasiya pa rin ng Diyos na magkatawang-tao at maging isang Sanggol noong gabi ng unang Pasko sa pamamagitan ng Panginoong Jesus Nazareno, ang ating Panginoon at Tagapagligtas.  

Inilarawan sa Unang Pagbasa at Ikalawang Pagbasa para sa Banal na Misa sa Araw ng Pasko ang dahilan kung bakit ang Mahal na Poong Jesus Nazareno ay dumating sa mundo bilang isang Sanggol noong gabi ng unang Pasko. Sa Unang Pagbasa, inilahad ang pangako ng pagliligtas ng Diyos. Sa Ikalawang Pagbasa, inilarawan kung paano tinupad ng Panginoon ang pangakong ito. Ang Diyos ay dumating sa mundong ito sa pamamagitan ng Panginoong Jesus Nazareno, ang Banal na Sanggol. Ang Banal na Sanggol na isinilang sa Belen ay ang Salita ng Diyos at ang Diyos na nagdudulot ng kaligtasan. Siya ang dahilan kung bakit ang mga anghel sa langit ay umawit nang buong galak at nagsitungo ang mga pastol sa Betlehem upang dalawin Siya noong gabi ng unang Pasko. 

Walang regalong makahihigit sa regalong ibinigay ng Diyos noong unang Pasko. Sa pamamagitan ng regalong kaloob ng Diyos, katulad ng sabi sa Salmo, nahayag ang Kanyang tagumpay (Salmo 97, 3k). Ang Diyos ay hindi nabigo sa Kanyang planong iligtas tayo sa pamamagitan ng Salitang nagkatawang-tao na walang iba kundi ang Mahal na Poong Jesus Nazareno. Ang kaligtasang kaloob ng Panginoong Diyos ay nagdudulot ng tagumpay, hindi lamang para sa Kanya kundi para sa lahat. Kaya, ang regalong dumating noong unang Pasko ay ang pinakadakila. 

Bakit may Pasko? Isa lamang ang dahilan kung bakit buong galak at ligaya nating ipinagdiriwang ang Pasko: ang ating Mahal na Poong Jesus Nazareno, ang Banal na Sanggol, ang Salita ng Diyos na nagkatawang-tao. 

MALIGAYANG PASKO PO! 

ANG PASIYA NG MGA PASTOL AY ATIN RIN BANG PASIYA?

25 Disyembre 2022 

Dakilang Kapistahan ng Pasko ng Pagsilang ng Panginoong Jesus Nazareno 

[Pagmimisa sa Bukang-Liwayway] 

Isaias 62, 11-12/Salmo 96/Tito 3, 4-7/Lucas 2, 15-20 

Scene from the Life of the Virgin (c. 1600) by Maerten de Vos (1532-1603) from the Tournai Cathedral Collection courtesy of the Web Gallery of Art is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or fewer due to its age. 

Ang Ebanghelyo para sa pagdiriwang ng Banal na Misa sa Bukang-Liwaway ng Pasko ng Pagsilang ng Panginoon, ang Nuestro Padre Jesus Nazareno, ay tungkol sa mga kaganapang sumunod agad sa mga kaganapang isinalaysay sa Ebanghelyo para sa Misa sa Hatinggabi ng Pasko ng Pagsilang ng Panginoong Jesus Nazareno. Tampok sa salaysay sa Ebanghelyo para sa Banal na Misang ito ang naging pasiya ng mga pastol matapos tanggapin mula sa mga anghel na dumalaw sa kanila noong gabing yaon ang Magandang Balita tungkol sa pagsilang ni Kristo sa sabsaban. Matapos ibalita sa kanila ng anghel ng Panginoon na si Kristo ay isinilang sa lungsod ni Haring David na tinatawag na Betlehem, at matapos pakinggan ang koro ng mga anghel sa langit na buong sayang umaawit ng papuri, pasasalamat, at pagsamba sa Diyos, sa Betlehem nagsitungo ang mga pastol upang dalawin ang Banal na Sanggol na Siyang tunay na Hari na walang iba kundi ang Mahal na Poong Jesus Nazareno. 

Kung tutuusin, maaari na lamang hindi pansinin ng mga pastol ang ibinalita sa kanila ng anghel ng Panginoon noong gabing iyon. Maaari rin nilang hindi pansinin ang mga anghel sa langit na buong sayang umaawit sa Diyos bilang isang koro. Maaari nilang dedmahin ang lahat ng ito at magpatuloy na lamang sila sa kanilang ginagawa noon sa parang: ang magbantay ng kanilang mga tupa. Subalit, ipinasiya nilang dalawin si Jesus Nazareno, ang Banal na Sanggol na isinilang sa isang hamak na sabsaban. Ang tunay na Hari na walang iba kundi ang Panginoong Jesus Nazareno na isinilang ng Reyna ng Langit na walang iba kundi ang Mahal na Inang si Mariang Birheng Kalinis-linisan ay ipinasiya nilang dalawin at bigyan ng papuri, parangal, at pagsamba. 

Bagamat mga pastol lamang sila, pinagkalooban pa rin sila ng pagkakataon ng Diyos na dalawin ang bagong silang na Tagapagligtas na si Kristo. Dito pa lamang, ang pag-ibig at habag ng Diyos na naghahatid ng kaligtasan sa pamamagitan ng Panginoong Jesus Nazareno ay kanilang naransan. Bago pa man sila nakarating sa sabsaban kung saan si Kristo ay isinilang ng Mahal na Inang si Mariang Birhen, naranasan na ng mga pastol ang habag ng Diyos. Sabi pa ni Apostol San Pablo sa Ikalawang Pagbasa, ang habag ng Diyos ay ang tanging dahilan kung bakit tayo iniligtas (Tito 3, 4). Kung hindi dahil sa habag ng Diyos, hindi maliligtas ang sangkatauhan. Kung hindi dahil sa habag ng Diyos, walang makikita ang mga pastol na nagtungo sa Betlehem noong gabi ng unang Pasko. Kung hindi dahil sa habag ng Diyos, walang anghel na magpapakita sa kanila at wala rin silang maririnig na awitan mula sa langit noong gabing iyon. Kaya lamang nangyari ang lahat ng iyan ay dahil sa habag ng Diyos. 

Nang dumating ang mga pastol sa sabsaban, nakita nila ang patunay ng pag-ibig at habag ng Diyos na Siyang dahilan kung bakit Niya tayo ipinasiyang iligtas mula sa mga tanikala ng kasalanan at kamatayan: ang Banal na Sanggol na walang iba kundi si Jesus Nazareno. Sa Banal na Sanggol na si Jesus Nazareno, nakita ng mga pastol ang katuparan ng kaligtasang ipinangako ng Diyos nang paulit-ulit noong panahon ng Lumang Tipan. Nakita ng mga mata ng mga pastol na ito sa mga sandaling yaon ang katuparan ng mga salitang binigkas ng Diyos sa pamamagitan ni Propeta Isaias sa Unang Pagbasa. Nakita nila kung paano ililigtas ng Diyos ang Kanyang bayan: sa pamamagitan mismo ng Mahal na Poong Jesus Nazareno. 

Ipinasiya ng mga pastol na tanggapin at dinggin ang paanyaya ng anghel na dalawin si Kristo. Tayo rin ba ay dadalaw kay Kristo na laging umaanyaya sa bawat isa sa atin na lumapit at sumunod sa Kanya? Magpapasakop ba tayo sa tunay na Hari kundi ang Mahal na Poong Jesus Nazareno? Ang kababaang-loob na ipinakita ng mga pastol ay tutularin rin ba natin sa bawat paanyaya ng Mahal na Poong Jesus Nazareno para sa atin na maging Kanyang mga tapat na tagasunod? 

IBAHAGI ANG TUNAY NA LIGAYANG KALOOB SA ATIN NG POONG JESUS NAZARENO

25 Disyembre 2022 

Dakilang Kapistahan ng Pasko ng Pagsilang ng Panginoong Jesus Nazareno 

[Pagmimisa sa Hatinggabi] 

Isaias 9, 1-6/Salmo 95/Tito 2, 11-14/Lucas 2, 11-14 

Nativity (1732) by Giovanni Battista Tiepolo (1696-1770) from the Collection of St. Mark's Basilica in Venice, Italy, through the Web Gallery of Art is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or less due to its age. 

Bagamat isa itong sekular na awitin, isinasalungguhit ng pamaskong awitin handog ng ABS-CBN para sa pagdiriwang ng Pasko sa taong ito na pinamagatang "Tayo ang Ligaya ng Isa't Isa" ang pagiging tagapaghatid ng ligaya sa isa't isa. Sa mga titik ng awiting pamaskong ito na handog ng ABS-CBN para sa pagdiriwang ng Kapaskuhan sa kasalukuyang taon, isinasalungguhit kung paanong ang pagpapakita ng malasakit, pag-ibig, at pagdamay sa isa't isa, lalung-lalo na sa mga kapus-palad, ay naghahatid o nagiging dahilan ng ligaya para sa isa't isa. Itinuturo sa atin ng pamaskong awiting ito mula sa ABS-CBN na mayroon tayong kapasidad o kakayahan upang maging mga regalo o tagapaghatid ng ligaya sa isa't isa, lalung-lalo na sa mga kapus-palad. 

Tuwing sasapit ang ika-25 ng Disyembre taun-taon, ipinagdiriwang natin nang buong galak ang Dakilang Kapistahan ng Pasko ng Pagsilang ng Panginoon. Tayong lahat ay laging pinapaalalahanan ng Inang Simbahan sa tuwing sasapit ang araw ng taunang pagdiriwang na ito, ang Dakilang Kapistahan ng Pasko ng Pagsilang ng Panginoong Jesus Nazareno, na ang tunay na dahilan kung bakit buong ligaya tayong nagdiriwang ng pistang ito ay walang iba kundi ang Panginoong Jesus Nazareno. Katunayan, ang katotohanang ito ay ipinahiwatig sa pangalan ng maringal na pagdiriwang na ito: ang Dakilang Kapistahan ng Pasko ng Pagsilang ng Panginoon. 

Ipinaliwanag sa mga Pagbasa para sa Hatinggabi ng Pasko ng Pagsilang ang dahilan kung bakit ang tunay na dahilan ng masayang pagdiriwang na ito ng Kapaskuhan ay walang iba kundi ang Mahal na Poong Jesus Nazareno. Sa Unang Pagbasa, inilahad ang propesiya tungkol sa pinakamahalagang aguinaldong ipagkakaloob ng Diyos sa lahat. Ang regalo ng Panginoon ay isang sanggol na lalaki (Isaias 9, 5). Ipinakilala sa Salmong Tugunan at sa Ebanghelyo kung sino ang sanggol na lalaking tinutukoy ng propesiya sa Unang Pagbasa. Ang propesiyang ito sa Unang Pagbasa ay natupad sa gabi ng unang Pasko. Ang Banal na Sanggol na si Kristo, ang Mahal na Poong Jesus Nazareno, ay ang sanggol na lalaking inilarawan ni Propeta Isaias sa Unang Pagbasa bilang regalo ng Diyos para sa sangkatauhan. Tulad ng sabi ni Apostol San Pablo sa pambungad ng kanyang mensahe at pangaral kay San Tito sa Ikalawang Pagbasa, si Jesus Nazareno, ang ipinangakong Mesiyas at Manunubos, ay ipinagkaloob sa atin ng mapagmahal, maawain, at mapagpalang Diyos dahil sa Kanyang kagandahang-loob (Tito 2, 11). Ito ang dahilan kung bakit ipinanganak sa isang sabsaban noong gabi ng unang Pasko ang Banal na Sanggol na si Kristo, ang Nuestro Padre Jesus Nazareno.

Sa pamamagitan ng ating Nuestro Padre Jesus Nazareno, ang Banal na Sanggol na isinilang ng Mahal na Inang si Mariang Birhen sa isang hamak na sabsaban sa bayan ng Betlehem noong gabi ng unang Pasko, ang Diyos ay naghatid ng ligaya sa lahat ng tao dito sa mundo. Sa pamamagitan nito, inihayag ang dahilan kung bakit buong ligaya tayo nagdiriwang tuwing sasapit ang ika-25 ng Disyembre. Kung hindi Niya ito ginawa noong gabi ng unang Pasko, hindi natin masasabi nang buong ligaya sa isa't isa: "Maligayang Pasko!" Ang Nuestro Padre Jesus Nazareno ay ang tanging dahilan kung bakit ang Kapaskuhan ay isang maligayang pagdiriwang. Si Jesus Nazareno ay ang unang naghatid at nagkaloob ng ligaya sa atin. 

Kaya naman, mayroong hamon at misyon na ibinibigay sa atin ng Simbahan bilang mga deboto ng Mahal na Poong Jesus Nazareno ay maging mga tagapagbahagi ng ligayang ipinagkaloob Niya sa lahat. Iniaatasan tayo ng Poong Jesus Nazareno, ang Banal na Sanggol, na maging mga tagapaghatid at tagapagbahagi ng Kanyang ligaya sa lahat. Hindi ekslusibo para sa iilan ang biyayang ito. Bagkus, ang biyayang ito ay para sa lahat. Dahil dito, ang bawat isa sa atin, mga deboto ng Mahal na Poong Jesus Nazareno na nakatanggap ng biyayang ito, ay dapat maging tagapagbahagi nito. Ito ang magpapatunay ng ating debosyon sa Mahal na Poong Jesus Nazareno. Ang mga tunay na deboto ng Mahal na Poong Jesus Nazareno ay hindi magsasarili ng ligayang ipinagkaloob. Bagkus, ibabahagi, ihahatid, at ipapalaganap ito. 

Ang Mahal na Poong Jesus Nazareno ay ang tunay at nag-iisang dahilan kung bakit buong ligaya nating ipinagdiriwang ang Kapaskuhan. Sa Kanya nagmumula ang tunay na ligaya. Siya rin mismo ang dahilan kung bakit hinahamon tayong maging ligaya ng isa't isa. Kung tunay at autentiko ang ating pamamanata, debosyon, at pagsamba sa Kanya, ang hamon at misyong ito na Kanyang ibinibigay sa atin ay buong kababaang-loob, pag-ibig, at ligaya nating tatanggapin at tutuparin. Bakit? Hindi naman mula sa sinuman atin ang ligayang ibabahagi natin. Bagkus, galing ito sa may kaarawan, ang Mahal na Poong Jesus Nazareno. 

BIYAYANG SUMASALAMIN SA PAG-IBIG NG DIYOS

24 Disyembre 2022 

Dakilang Kapistahan ng Pasko ng Pagsilang ng Panginoong Jesus Nazareno

[Pagmimisa sa Bisperas] 

Isaias 62, 1-5/Salmo 88/Mga Gawa 13, 16-17. 22-25/Mateo 1, 1-25 (o kaya: 1, 18-25) 

The Nativity (second half of the 16th century) by Willem Benson (1521-1574) from the Windsor Castle Collection and Web Gallery of Art is in the Public Domain ("No Known Copyright") and in other countries and areas where the copyright term is the author's life plus 100 years or fewer due to its age. 

Ang tema o paksang nais pagtuunan ng pansin at pagnilayan ng Simbahan sa Misa para sa Bisperas ng Dakilang Kapistahan ng Pasko ng Pagsilang ng Panginoong Jesus Nazareno ay inilahad at inihayag ng Salmong Tugunan para sa nasabing Misa. Ito ay walang iba kundi ang pag-ibig ng Panginoong Diyos. Katulad ng malakas na inihayag ng mang-aawit sa Salmong Tugunan para sa pagdiriwang ng Banal na Eukaristiya sa Bisperas ng Pasko ng Pagsilang ng Panginoon: "Pag-ibig Mong walang maliw ay lagi kong sasambitin" (Salmo 88, 2a). Katunayan, sa mga salitang ito ng mang-aawit sa Salmong ito, inilarawan ang tanging dahilan kung bakit ang Pasko ay buong galak na ipinagdiriwang tuwing sasapit ang ika-25 ng Disyembre taun-taon.

Bakit tayo nagdiriwang ng Pasko tuwing ika-25 ng Disyembre taun-taon? Isa lamang ang dahilan. Ang tanging dahilan ng pagdiriwang ng Pasko ay walang iba kundi ang pag-ibig ng Diyos. Dahil sa pag-ibig ng Diyos, mayroong pagdiriwang ng Pasko. Ito ay inihayag sa atin ng Banal na Sanggol na si Jesus Nazareno, ang ating Panginoon at Tagapagligtas na isinilang ng Mahal na Inang si Mariang Birhen sa sabsaban noong gabi ng unang Pasko. Ang Banal na Sanggol na ito, si Kristo, ay ang tanging tanda o larawan ng pangunahing dahilan ng pagdiriwang ng Kapaskuhan. Sa pamamagitan ni Kristo, ang Mahal na Poong Jesus Nazareno, nahayag ang pag-ibig ng Diyos. 

Sa Unang Pagbasa, ang Panginoong Diyos ay nagsalita sa pamamagitan ng Kanyang hinirang na propetang si Isaias tungkol sa isang napakahalagang biyayang Kanyang ipagkakaloob sa Kanyang bayan. Ang biyayang tinukoy ng Diyos sa Unang Pagbasa para sa Bisperas ng Pasko ng Pagsilang ni Kristo ay walang iba kundi ang biyaya ng kaligtasan (Isaias 62, 1). Ipinangako ng Diyos na ipagkakaloob Niya sa Kanyang bayan ang biyaya ng Kanyang pagliligtas. Tinupad ng Diyos ang pangakong ito pagsapit ng takdang panahon sa pamamagitan ng Mahal na Poong Jesus Nazareno, ang Kanyang Bugtong na Anak at Ikalawang Persona ng Banal na Santatlo na nagkatawang-tao. 

Mayroong dalawang bahagi ang Ebanghelyo. Sa unang bahagi ng Ebanghelyo, ang talaan ng angkang kinabibilangan ng Poong Jesus Nazareno ay inilahad. Sa ikalawang bahagi ng Ebanghelyo, isinalaysay ang pagpapakita ng isang anghel ng Panginoon sa panaginip ni San Jose upang ibalita sa kanya na isisilang ang Banal na Sanggol na si Jesus Nazareno, ang Bugtong na Anak ng Diyos na Siya ring Pangalawang Persona ng Banal na Santatlo, ng Mahal na Inang si Mariang Birhen. Ang Banal na Sanggol na ipinaglihi at isinilang ng Mahal na Inang si Mariang Birhen na si Jesus Nazareno ay ang larawan o tanda ng katapatan ng Diyos sa Kanyang pangako. Tinupad nga ng Diyos ang Kanyang pangako sa pamamagitan ng Mahal na Poong Jesus Nazareno. 

Noong gabi ng unang Pasko, dumating sa mundong ito ang pinakadakilang biyayang ipinagkaloob ng Diyos sa tanan. Ang biyayang ito ay isang salamin at katibayan ng pag-ibig ng Diyos para sa atin. Ito ay walang iba kundi ang ipinangakong Mesiyas at Tagapagligtas na walang iba kundi ang Nuestro Padre Jesus Nazareno. Kaya naman, ang Nuestro Padre Jesus Nazareno ay tinawag ni Apostol San Pablo bilang biyayang kaloob ng Diyos sa lahat (Mga Gawa 13, 23). Sa lahat ng mga biyayang ipinagkaloob sa atin ng Diyos, ang Mahal na Poong Jesus Nazareno ay ang pinakadakila sa lahat dahil tanging Siya mismo ay ang Pangalawang Persona ng Banal na Santatlo at ang Bugtong na Anak ng Diyos. Sa pamamagitan ng Mahal na Poong Jesus Nazareno, ang tunay na Diyos ay dumating sa mundo upang iligtas ang lahat. Ipinasiya Niya itong gawin dahil sa Kanyang dakilang pag-ibig para sa tanan. 

Isa lamang ang dahilan kung bakit ipinasiya ng Diyos na dumating sa mundong ito bilang Banal na Sanggol na isinilang ng Mahal na Inang si Mariang Birhen sa isang sabsaban sa Betlehem noong gabi ng unang Pasko sa pamamagitan ng Poong Jesus Nazareno. Noong gabi ng unang Pasko, ang Diyos ay dumating sa mundong ito sa pamamagitan ng Mahal na Poong Jesus Nazareno upang ipagkaloob ang biyaya ng Kanyang pagliligtas sa sangkatauhan. Ang biyayang ito ng Panginoon ay ang salamin at larawan ng Kanyang dakilang pag-ibig para sa lahat na ipinasiya Niyang iligtas. 

ANG DAPAT LAGING SAMBITIN

24 Disyembre 2022 

Misa de Gallo/Simbang Gabi: Ikasiyam at Huling Araw 

2 Samuel 7, 11-5. 8b-12. 14a. 16/Salmo 88/Lucas 1, 67-79 

Saint John the Baptist says goodbye to his parents (c. 1635/Between 1634 and 1635) by Massimo Stanzione (1586-1656) from the Museo del Prado Collection is in the Public Domain ("No Known Copyright") in its country of origin and other countries and areas where the Copyright Term is the author's life plus 100 years or fewer due to its age. 

Ang Ikasiyam at Huling Araw ng ating tradisyunal na Pagsisiyam o Nobenaryo bilang paghahanda para sa Dakilang Kapistahan ng Pasko ng Pagsilang ng Panginoong Jesus Nazareno ay inilaan sa pagtuon ng ating mga pansin at taimtim na pagninilay sa dapat laging sambitin. Tinatanong tayo sa araw na ito kung ano nga ba ang uri ng mga salitang madalas nating sambitin o  mamutawi mula sa ating mga labi. Ito ay dahil ang mga salitang madalas nating bigkasin ay isang pahiwatig tungkol sa laman ng ating mga puso at isipan. Kaya naman, tinuturuan tayo ng Simbahan sa araw na ito kung ano ba dapat ang madalas nating sambitin at bigkasin. 

Sa Unang Pagbasa, inilatag ni Haring David ang kanyang planong ipagtayo ng isang templo ang Panginoong Diyos. Bilang tugon sa hangarin at intensyon ni Haring David, ipinaalala ng Panginoong Diyos na Siya mismo ang magtatayo nito. Kasabay nito, ang Panginoong Diyos ay nagbitiw din ng isang pangako para kay Haring David na isa sa kanyang mga anak ang hahalili sa kanya bilang hari (2 Samuel 7, 12). Ang pangakong ito ay tinupad nga ng Diyos. Itinayo ang templo noong panahon ni Haring Solomon na humalili kay Haring David pagkamatay niya. Subalit, mula sa angkan ni Haring David, ang tunay at walang hanggang Dakilang Hari na walang iba kundi si Kristo, ang Mahal na Poong Jesus Nazareno, ay nagmula. 

Tampok naman sa Ebanghelyo para sa araw na ito ang awit-panalangin ni Zacarias na ama ni San Juan Bautista na kilala rin ng marami sa tawag na Benedictus. Mula sa umpisa hanggang sa wakas ng awit-panalanging ito, puro papuri, pasasalamat, at pagsamba sa Panginoong Diyos ang ibinigkas ni Zacarias. Katunayan, galing lamang si Zacarias mula sa pagiging pipi at bingi sa loob ng siyam na buwan bago isilang sa mundong ito si San Juan Bautist, katulad ng sabi ng Arkanghel na si San Gabriel sa loob ng templo. Ang mga unang salitang iminutawi ni Zacarias nang ibinalik muli sa kanya ng Diyos ang kanyang pandinig at pananalita matapos ang siyam na buwan na ito ay mga salita ng papuri, pasasalamat, at pagsamba sa Kanya. Ipinaliwanag rin ni Zacarias sa awit-panalanging ito ang ilan sa napakaraming dahilan kung bakit ito ang dapat gawin ng lahat ng mga taong tunay na nananalig, sumasampalataya, umiibig, at sumasamba sa Diyos. 

Katulad ng sabi sa Salmong Tugunan para sa araw na ito: "Pag-ibig Mong walang maliw ay lagi kong sasambitin" (Salmo 88, 2a). Ito ang ginawa ni Zacarias agad nang ibalik muli sa kanya ng Diyos ang kanyang pandinig at pananalita matapos ang siyam na buwan. Napakaraming dahilan kung bakit ang Panginoon ay dapat lamang purihin, sambahin, mahalin, panaligan, at sampalatayanan. Sa dami ng mga ito, maaari itong bigyan ng isang maikling buod: tunay ngang maawain at mapagmahal ang Diyos. Ang patunay ng habag, kabutihan, at pag-ibig ng Diyos ay walang iba kundi ang Poong Jesus Nazareno, ang ipinangakong Mesiyas at Tagapagligtas. 

Mga nagbibigay ng papuri, pasasalamat, pananalig, at pagsamba sa Panginoon ang unang binigkas ng ama ni Juan Bautista na si Zacarias matapos ang siyam na buwan ng pananatiling pipi at bingi. Marami sa mga tao ngayon, ang mga salitang madalas bigkasin at sambitin ay mga paninira, kasinungalingan, pekeng balita, at iba pa. May ilan pa nga, mga salita ng pagsamba sa mga may kapangyarihan sa lipunan, lalo na yaong mga tiwali, mapang-api, mapang-abuso, gahaman, at mapanlinlang. Kung sino pa yung mga nang-aapi, gahaman, at nagpapalaganap ng pekeng balita, sila pa yung ginagawang mabuti at diyos-diyosan. Ano ba 'yan? 

Ipinapaalala sa atin ng Simbahan kung ano ang dapat gawin ng mga tunay at tapat na deboto ng Nuestro Padre Jesus Nazareno. Tunay at tapat nga ba ang bawat isa sa atin sa ating debosyon at pamamanata sa Nuestro Padre Jesus Nazareno? Maging mga saksi tayo ng Mahal na Poong Jesus Nazareno. Dapat lagi tayong magpatotoo tungkol sa habag, pagmamahal, at kabutihan ng Mahal na Poong Jesus Nazareno sa pamamagitan ng ating mga salita at mga gawa.