PAGLINGKURAN ANG DIYOS AT KAPWA, KATULAD NI HESUS, MARIA AT JOSE

Mayo 1, 2015 

Paggunita kay San Jose, manggagawa 

Genesis 1, 26-2, 3 (o kaya: Colosas 3, 14-15. 17. 23-24)/Salmo 89/Mateo 13, 54-58

Buong buhay ni Hesus, Siya'y naglingkod. Pinaglingkuran Niya ang Diyos Ama at ang tao sa Kanyang ministeryo. Kahit hindi Siya tinanggap sa Kanyang bayan sa Nazaret, katulad ng natunghayan natin sa Ebanghelyo natin ngayong araw na ito, patuloy pa rin Siyang naglingkod. Patuloy na nangaral si Hesus tungkol sa kaharian ng Diyos at paggawa ng maraming kababalaghan bilang paglingkod sa mga tao, kahit nagkaroon Siya ng maraming kaaway, lalo na sa pamahalaan, dahil sa Kanyang misyon. 

Ang inggit ng mga Pariseo, Saduseo, at maraming pang iba kay Hesus noong kapanahunang yaon ay hindi naging hadlang sa paglilingkod ni Hesus sa mga tao. Kahit nagkaroon Siya ng maraming kaaway, hindi tinigilan ng Panginoong Hesus ang Kanyang paglilingkod sa Diyos at kapwa. Naglingkod si Hesus hanggang sa pinakahuling sandali ng Kanyang buhay. 

Pinaglingkuran din ng Mahal na Birheng Maria ang Diyos at kapwa buong buhay niya. Tumalima ang Mahal na Birhen sa kalooban ng Diyos na maging ina ng Panginoong Hesukristo. Bagamat napakalaking pananagutan ito para sa Mahal na Ina, tinanggap at sinunod niya ang kalooban ng Diyos para sa kanya. Noong nalaman ni Maria na buntis din ang kanyang kamag-anak na si Santa Isabel, kahit buntis si Maria, pinuntahan pa rin niya si Santa Isabel upang makasama at makapiling ang kanyang kamag-anak, lalo na't parehas silang nagdadalantao. 

Si San Jose rin ay naglingkod sa Diyos at kapwa. Pinaglingkuran niya ang Diyos sa pamamagitan ng pagtanggap kina Maria at Hesus. Tinanggap ni Jose ang dalawang responsibilidad na ibinigay sa kanya ng Diyos - maging kabiyak ni Maria at amain ni Hesus. Naglingkod din siya sa kanyang kapwa-tao. Bilang isang karpintero, siya'y gumawa ng mga upuan, hapag-kainan, at maraming iba pang mga muwebles. 

Tinatawag tayo ngayon ng Diyos ngayong Araw ng mga Manggagawa na paglingkuran natin Siya at ang ating kapwa-tao. Ang mga manggagawa ay naghahanap-buhay para sa kanilang pamilya. Sa kanilang paghahanap-buhay, pinaglilingkuran nila ang iba. Tinutugon nila ang pangangailangan ng iba, anuman ang kanilang hanap-buhay. 

Hindi lamang po ang mga manggagawa ang may responsibilidad sa atin. Inuutusan tayo ng Panginoong Hesus na paglingkuran din natin ang ating kapwa-tao. Sa pamamagitan ng paglilingkod sa ating kapwa, pinaglilingkuran din natin ang Diyos. Maging masigla nawa tayo sa ating paglingkod sa Diyos at kapwa, katulad ng Banal na Pamilya nina Hesus, Maria at Jose. 

O Diyos, tulungan Mo kaming paglingkuran Ka at ang aming kapwa-tao. Amen. 

San Jose Manggagawa, ipanalangin mo kami. 

HESUS: ANG MABUTING PASTOL NA MAY HABAG AT MALASAKIT SA KANYANG MGA TUPA

Abril 26, 2015 

Ikaapat na Linggo ng Pasko ng Muling Pagkabuhay (B) 

(Linggo ng Mabuting Pastol) 

Mga Gawa 4, 8-12/Salmo 117/1 Juan 3, 1-2/Juan 10, 11-18 

Noong nakaraang Enero, naganap ang makasaysayang pagdalaw ng Santo Papa Francisco sa Pilipinas. Ang tema ng kanyang pagbisita sa Pilipinas ay, "Habag at Malasakit." Sa bawat talumpati at homiliya ng Santo Papa sa Pilipinas, binigyang diin niya ang Dakilang Awa at Habag ng Diyos. Lagi din niyang binibigyang diin ang pagpapadama ng habag at malasakit sa ating kapwa-tao, lalung-lalo na sa mga kapus-palad, kung paanong ipinadama ng Panginoong Diyos ang Kanyang Dakilang Awa at Habag sa sangkatauhan. 

Idineklara din ng Santo Papa Francisco ang taong 2016 bilang Taon ng Hubileyo ng Awa. Magsisimula ito sa darating na Disyembre 8 ng taong ito, ang Dakilang Kapistahan ng Inmaculada Concepcion. Tatagal ang Banal na Taon ng Awa hanggang sa Dakilang Kapistahan ng Kristong Hari na gaganapin sa darating na Nobyembre 20 ng susunod na taon, 2016. Binibigyan tayo ng pagkakataon ng Simbahan sa pamamagitan ng Banal na Taon ng Awa na imulat ang ating mga mata sa Banal na Awa ng Diyos. Katulad ng sinabi ng ating Santo Papa, "Ang Diyos ay hindi nagsasawang magpatawad. Huwag rin tayong magsawa sa paghingi ng kapatawaran mula sa Diyos." 

Dalawang linggo na ang nakalipas magmula noong ipinagdiriwang ng Simbahan ang Kapistahan ng Dakilang Awa ng Diyos (Divine Mercy) noong Ikalawang Linggo ng Pasko ng Muling Pagkabuhay. Ngayong Ikaapat na Linggo ng Pasko ng Pagkabuhay, ipinagdiriwang ng Simbahan ang Linggo ng Mabuting Pastol. Subalit, ang Mabuting Pastol at ang Hari ng Awa ay iisa - ang Panginoong Hesukristo. Ang Panginoong Hesukristo ang Mabuting Pastol, at bilang Mabuting Pastol, ipinapadama Niya ang Kanyang habag at malasakit sa Kanyang mga tupa. 

Napakinggan natin sa ating Ebanghelyo ang diskurso ni Hesus tungkol sa Mabuting Pastol. Hindi pinapabayaan ni iniiwanan ng Mabuting Pastol ang Kanyang mga tupa. Bagkus, ipinagtatanggol ng Mabuting Pastol ang Kanyang mga tupa mula sa mga asong-gubat at iba pang uri ng panganib. Nakahanda ang Mabuting Pastol na ibuwis ang Kanyang buhay alang-alang sa Kanyang mga tupa. 

Ang Mabuting Pastol na tinutukoy ni Hesus ay walang iba kundi ang Kanyang sarili. Si Hesus ang Mabuting Pastol. Hindi Siya katulad ng mga pekeng pastol na iiwanan ang mga tupa sa panahon ng panganib. Bagkus, ipagtatanggol ni Hesus ang Kanyang mga tupa. Nakahanda rin si Hesus na ialay ang Kanyang buhay alang-alang sa mga tupa na Kanyang minamahal nang lubusan. Iyan ang tunay na pastol ng mga tupa - handang ipagtanggol ang mga tupa sa panganib at ibuwis ang kanyang buhay alang-alang sa kanilang kaligtasan. 

Sino ang kabilang sa kawan ng mga tupa ni Hesus? Tayong lahat ay kabilang sa kawan ng mga tupa ni Hesus. Tayo ang mga tupang minamahal ni Hesus. Dahil sa habag at malasakit ng Panginoong Hesus sa ating lahat, tayo ay Kanyang tinubos sa pamamagitan ng Kanyang kamatayan sa krus at ng Kanyang Muling Pagkabuhay. Mula sa pagkabihag, tayo ay bumalik sa kawan ni Hesus. Paano? Sa pamamagitan ng krus at Muling Pagkabuhay. 

Kapag nagkakasala tayo, napapalayo tayo sa ating Mabuting Pastol. Subalit, hinahanap tayo ng Mabuting Pastol. Madalas, kapag nagkakasala tayo, nagtatatakot tayo at nagtatago tayo mula sa Mabuting Pastol. Pero, hinahanap tayo ng ating Panginoong Hesus, ang Mabuting Pastol na may habag at malasakit sa Kanyang mga tupa. Huwag na tayong matakot. Sa halip, magpakita at magpahanap tayo sa Mabuting Pastol na patuloy na maghahanap at tatanggap sa atin, sa kabila ng ating mga pagkukulang at pagkakasala laban sa Kanya. 

Mayroon tayong Pastol na patuloy na maghahanap sa ating lahat sa kabila ng paulit-ulit nating pagtalikod at pagsuway sa Kanya - si Hesus. Si Hesus ang Mabuting Pastol na may habag at malasakit sa Kanyang mga tupa. Laging maawain at nagmamagandang-loob ang ating Panginoon. Ang ating Panginoon na Siyang Mabuting Pastol ay patuloy na maghahanap sa atin, sa kabila ng maraming pagkakataon na tinalikuran at sinuway natin Siya. Tayong lahat ay ipagtatanggol at ililigtas Niya, kahit ang kapalit nito ay ang buhay Niya. Ganyan tayo kamahal ng ating Mabuting Pastol, ang ating Panginoong Hesukristo. 

ANG KATUPARAN NG MGA KASULATAN AT ANG TAGUMPAY NI HESUS

Abril 19, 2015
Ikatlong Linggo ng Pasko ng Muling Pagkabuhay (B) 
Mga Gawa 3, 13-15. 17-19/Salmo 4/1 Juan 2, 1-5a/Lucas 24, 35-48 

Natunghayan natin ang pangangaral ni Apostol San Pedro sa Unang Pagbasa tungkol sa pagka-Mesiyas ng Panginoong Hesus. Matagal nang hinintay ng bayang Israel ang pagdating ng Mesiyas, katulad ng ipinangako ng Diyos. Subalit, noong dumating si Hesus, hindi nila nakilala na Siya nga ang Mesiyas na ipinangakong ipapadala ng Diyos. Bagkus, si Hesus ay kinilala ng lahat bilang Anak ni Maria at ni Jose. Kilala din nila si Hesus bilang isang karpinterong taga-Nazaret. 

Sa loob ng mahabang panahon, hinintay ng mga Israelita ang pagdating ng Mesiyas. Ilang ulit na inalipin ang bayang Israel ng kanilang mga kaaway. Hinintay nila ang Mesiyas upang ibalik ang karangalan ng Israel. Para sa kanila, palalayain sila ng Mesiyas mula sa kaalipinan at paiiralin ang kapayapaan sa buong Israel. Magiging marangal muli ang bayang Israel, katulad noong kapanahunan ni Haring David. 

Maraming sinabi ng Diyos sa pamamagitan ng mga propeta patungkol sa Mesiyas. Subalit, may mga pahayag na binalewala ng mga tao. Katulad ng kung paanong mamatay at muling mabubuhay ang Mesiyas. Ang Mesiyas ay papatayin ng mga taong naghihintay sa kanya sa loob ng napakahabang panahon. Natupad ang lahat ng iyon sa pamamagitan ni Kristo. 

Hindi nakilala si Kristo ng Kanyang mga kababayan noong Siya'y naparito sa mundo. Hindi nila nakilala ang Mesiyas. Bagkus, para sa kanila, si Hesus ay isang payak na karpinterong taga-Nazaret. Wala silang nakikitang espesyal si Hesus. Kilala din si Hesus bilang isang guro, tagapaggawa ng mga himala, at isang propeta. Pero, higit pa doon si Hesus. 

Noong dumating ang takdang panahon, si Hesus ay hinuli ng Kanyang mga kaaway. Hinatulan Siya ng kamatayan ng Sanedrin at pinadala ni Pilato. Kahit ipinasiya ni Poncio Pilato na palayain ang Panginoon, hindi Niya magawa. Bakit? Hiniling ng taong-bayan na palayain si Barrabas at ipako si Hesus sa krus, sapagkat sinulsulan sila ng mga Pariseo at mga matatanda ng bayan. 

Ang akala ng lahat na natapos ang lahat para kay Hesus noong Siya ay namatay sa krus. Subalit, hindi nila inaasahan na si Hesus ay muling mabubuhay. Pati ang mga alagad, nagulat sila nang mabalitaan nila mula kina Maria Magdalena na wala na ang bangkay ng Panginoong Hesus sa libingan. Natupad ang mga naitala sa mga aklat ng mga propeta at ang aklat ng mga Salmo patungkol sa pagpapakasakit, pagkamatay at Muling Pagkabuhay ni Kristo. Ipinahayag din mismo ni Hesus nang ilang ulit sa mga alagad habang kinakasa-kasama pa Niya sila na Siya'y magbabata ng hirap at kamatayan at muling mabubuhay sa ikatlong araw. 

Sa Ebanghelyo, natunghayan natin ang pagpapakita ng Panginoong Hesus sa mga alagad matapos na Siya'y muling mabuhay. Ipinakita Niya sa kanila ang Kanyang mga kamay at paa para maniwala ang mga alagad na hindi Siya isang multo. Natakot kasi ang mga alagad nang makita nila si Hesus. Pero, ipinakita ni Hesus ang Kanyang mga kamay at paa. Ang mga sugat sa mga Kamay at Paa ni Hesus ang nagpapakilala na Siya pa rin ang Panginoong Hesus na nagmamahal sa kanila, sa kabila ng kanilang mga kahinaan. 

Nilinaw din ni Hesus sa mga alagad na ang lahat ng mga nangyari ay ipinahayag ng mga propeta sa loob ng mahabang panahon. Naisasaad sa Banal na Skriptura ang lahat ng mga ipinahayag ng mga propeta patungkol sa Mesiyas. Ang lahat ng mga propesiya sa Lumang Tipan patungkol sa Mesiyas ay natupad ni Hesus. 

Tinupad ni Hesus ang lahat ng mga ipinahayag sa Lumang Tipan patungkol sa Kanya. Sa pamamagitan ng pagtupad sa lahat ng mga sinabi ng mga propeta sa Lumang Tipan, nakamit Niya ang tagumpay para sa ating lahat. Iniligtas tayong lahat ni Hesus dahil sa tagumpay na Kanyang kinamit sa pamamagitan ng Kanyang pagpapakasakit, pagkamatay at Muling Pagkabuhay. 

AWA AT KAPAYAPAANG HATID NG PANGINOONG MULING NABUHAY

Abril 12, 2015
Ikalawang Linggo ng Pasko ng Muling Pagkabuhay (B) 
(Linggo ng Dakilang Awa ng Diyos) 
Mga Gawa 4, 32-35/Salmo 117/1 Juan 5, 1-6/Juan 20, 19-31 

Kasabay ng Ikalawang Linggo ng Pasko ng Muling Pagkabuhay ay ipinagdiriwang din ng Simbahan ang Kapistahan ng Banal na Awa ng Diyos. Binibigyang diin ng Kapistahan ng Dakilang Awa ng Diyos ang awa ng Panginoon sa ating lahat. Ang debosyon sa Banal na Awa ng Diyos ay nagsimula sa Poland sa pamamagitan ni Santa Faustina. Nagpakita si Hesus kay Santa Faustina at pinili Niya si Santa Faustina upang ipalaganap sa buong daigdig ang mensahe tungkol sa Kanyang awa sa buong sangkatauhan. 

Ipinamalas ng Panginoong Hesukristo sa ating Ebanghelyo ngayon ang Kanyang awa sa mga alagad na tumalikod sa Kanya noong Siya'y dinakip at pinatay. Kung matatandaan natin sa salaysay ng Pasyong Mahal ng ating Panginoong Hesukristo, iniwanan ng mga alagad ang Panginoong Hesukristo noong Siya'y dinakip sa Halamanan ng Getsemani. Tatlong ulit ipinagkaila ni San Pedro Apostol na siya'y alagad o tagasunod ni Kristo. Ang kaisa-isang alagad na sumunod sa bawat yapak ng pagpapakasakit ng Panginoon ay si San Juan Apostol. 

Subalit, noong muling mabuhay ang ating Panginoon, hindi paghiganti ang mensaheng ipinaabot Niya sa Kanyang mga alagad. Hindi Siya naghiganti sa mga alagad na tumalikod sa Kanya sa pinakamadilim na bahagi ng Kanyang buhay. Bagkus, awa at kapayapaan ang hatid ng Panginoon sa mga alagad. Ibinahagi ng Panginoong Muling Nabuhay ang Kanyang awa at kapayapaan sa mga alagad na nagtago dahil sa matinding takot. 

Ang pangamba at takot ng mga alagad ay napawi dahil sa awa at kapayapaang ibinahagi ng Panginoong Muling Nabuhay. Nagtago ang mga alagad sa isang silid dahil sa matinding takot sa mga Hudyo at pangamba. Sila'y natatakot at nangangamba dahil sa mga autoridad at ang mga nasa pamahalaan. Baka dakipin din sila ng mga autoridad. Subalit, pinawi ni Kristong Muling Nabuhay ang kanilang takot at pangamba sa pamamagitan ng Kanyang awa at kapayapaang ibinahagi Niya sa mga alagad. 

Wala si Santo Tomas Apostol sa unang pagkakataong nagpakita si Hesus sa mga alagad. Hindi siya naniwala sa sinabi ng mga alagad sa kanya. Nais maramdaman ni Tomas ang awa at kapayapaang hatid ni Kristong Muling Nabuhay. Bago siya maniwala sa sinabi ng mga alagad, nais mahawakan ni Tomas ang mga kamay at ang tagiliran ng Panginoong Muling Nabuhay. 

Dahil sa awa at habag ni Hesus, nagpakita Siya uli sa mga alagad. Pinayagan Niyang mahawakan ni Tomas ang Kanyang mga kamay at ang Kanyang tagiliran. Nakita ni Tomas ang butas ng pako sa mga kamay at paa ni Hesus. Nakita din ni Tomas ang sugat sa tagiliran ni Hesus. Ang mga sugat sa Katawan ni Hesus ang patunay ng Kanyang awa. At dahil sa dakilang awa ng Panginoong Hesus, kapayapaan ang ipinagkakaloob Niya sa lahat. 

Hindi ipagkakait ng Panginoon ang awa at kapayapaan sa sinumang humihiling nito. Kagaya nga sa Ebanghelyo, kahit walang sinambit ang mga alagad tungkol sa kahilingan nila ng awa at kapayapaan, alam ng Panginoon na humihingi sila ng awa at kapayapaan mula sa Kanya. Dumulog tayo sa ating Panginoon. Humingi tayo ng awa at kapayapaan mula sa Kanya. Hinding-hindi Niya tayo dadamutan sa ating kahilingan para sa Kanyang awa at kapayapaan.

Tunay ngang maawain at mahabagin ang Panginoong Muling Nabuhay. Lumapit tayo sa Kanya. Huwag tayong mag-atubiling lumapit sa Panginoong Muling Nabuhay na puno ng awa at habag para sa ating lahat. 

TAGUMPAY NG PANGINOONG MULING NABUHAY; TAGUMPAY NATIN ITO!

Abril 5, 2015
Pagmimisa sa Araw ng Pasko ng Muling Pagkabuhay 
Mga Gawa 10, 34a. 37-43/Salmo 117/Colosas 3, 1-4 (o kaya: 1 Corinto 5, 6b-8)/Juan 20, 1-9 

Hindi nagtapos ang lahat sa kamatayan ng Panginoong Hesukristo. Sa ikatlong araw, ang Panginoong Hesus ay muling nabuhay, katulad ng Kanyang sinabi. Kahit na nakatakip ang libingan ng Panginoon at kahit binantayan pa ito ng mga kawal na ipinadala ni Pilato, hindi ito naging hadlang sa Muling Pagkabuhay ng Panginoong Hesukristo. Si Hesus ay muling nabuhay. Walang laman ang libingan. Wala na sa libingan ang bangkay ng Panginoon. Hindi na mahanap ang bangkay ni Hesus sapagkat Siya'y muling nabuhay. 

Ang akala ng mga kaaway ni Hesus at ng marami na tapos na ang lahat para kay Hesus noong Siya ay namatay. Pati ang Kanyang mga alagad, inakala nilang tapos na ang lahat sa pagkamatay ni Hesus. Nawala, naguho ang lahat, nang si Hesus ay namatay. Hindi lamang iyon, ginusto pa ng mga kaaway ni Hesus na panatilihing patay si Hesus. Kaya, humingi sila ng mga kawal mula kay Pilato para bantayan ang libingan ng Panginoon. Gusto nilang manatiling patay si Hesus. Hindi sapat para sa kanila na mamatay si Hesus. 

Subalit, hindi mapigilan ng mga kaaway ni Hesus ang Kanyang Muling Pagkabuhay. Kahit na binantayang maigi ng mga kawal ang libingan, hindi nila mapigilan ang Muling Pagkabuhay ni Hesus. Hindi kinaya ng kapangyarihan ng kamatayan ang kapangyarihan ni Hesus. Hindi kinaya ng libingang panatilihin si Hesus sa loob nito. Bagkus, napagtagumpayan ni Hesus ang kasamaan at kamatayan. Nagtagumpay ang Panginoon. 

Natunghayan natin sa Ebanghelyo na pumunta si Santa Maria Magdalena sa libingan ng Panginoon noong madilim-dilim pa. Natagpuan niyang walang laman ang libingan. Hindi niya matagpuan ang bangkay ng Panginoon. Ang akala niya ay may nagnakaw sa bangkay ng Panginoon. Kaya, pinuntahan niya sina San Pedro Apostol at ang alagad na minamahal ni Hesus at ibinalita ang kanyang nakita. 

Inakala nilang lahat na ninakaw ang bangkay ng Panginoon. Subalit, noong dumating sina San Pedro Apostol at ang minamahal na alagad, natagpuan ng dalawang alagad na ito na imposibleng ninakaw ang bangkay ng Panginoon. Bakit? Nakatiklop ang mga kayong lino at magkahiwalay pa iyon sa panyong ibinalot sa ulo. Walang pakialam ang mga magnanakaw sa mga kayong lino at ang panyong ibinalot sa ulo kung may nanakawin silang bangkay. 

Hindi pa nila naunawaan noon na kinailangan pang muling mabuhay si Hesus. Subalit, ang alagad na minamahal ni Hesus ay naniwala na si Hesus ay muling nabuhay. Katulad ng sinabi ni Hesus noong kasama pa Niya ang mga alagad, muling Siyang mabubuhay sa ikatlong araw. Nagkatotoo, natupad ang lahat ng mga sinabi ng Panginoon sa kanila. Muling nabuhay ang Panginoon. 

Ang Muling Pagkabuhay ng ating Panginoong Hesukristo ay ang pagbubuo at ang pagkukumpleto sa Kanyang tagumpay at kaluwalhatian. Nagtagumpay na si Hesus, habang nagdurusa pa Siya sa krus. Kinumpleto ng Muling Pagkabuhay ang Kanyang tagumpay. Kung hindi muling nabuhay si Kristo, hindi magiging kumpleto ang Kanyang tagumpay. Mawawalan ng saysay ang pag-aalay ni Kristo ng Kanyang sarili sa krus kung hindi Siya muling nabuhay. 

Kinamtan ni Hesus ang tagumpay hindi lamang para sa Kanyang sarili, kundi para sa ating lahat. Inaanyayahan tayong lahat ni Hesus na nagtagumpay laban sa kasamaan at kamatayan sa pamamagitan ng Kanyang Muling Pagkabuhay na makigalak sa Kanyang tagumpay. Sapagkat ang tagumpay na kinamtan ni Hesus ay hindi lamang para sa Kanyang sarili. Tayo ang dahilan kaya kinamtan ni Kristo ang tagumpay laban sa kasamaan at kamatayan. Hindi na tayo mga alipin. Pinalaya tayong lahat ni Kristong Muling Nabuhay. 

MALIGAYANG PASKO NG PAGKABUHAY SA ATING LAHAT! 

KAGALAKAN DULOT NG MULING PAGKABUHAY

Abril 5, 2015 
Pagmimisa sa Bukang-Liwayway ng Pasko ng Muling Pagkabuhay
Mga Gawa 10, 34a. 37-43/Salmo 117/Colosas 3, 1-4 (o kaya: 1 Corinto 5, 6b-8)/Juan 20, 1-9

Mababasa ba sa Banal na Bibliya ang pagpapakita ng Panginoong Hesukristong Muling Nabuhay sa Mahal na Birheng Maria? Hindi. Walang mababasa sa Banal na Bibliya patungkol sa pagpapakita ng Panginoong Muling Nabuhay sa Mahal na Ina. Tahimik ang Banal na Kasulatan tungkol sa pangyayaring ito. Walang kunkretong salaysay ang Banal na Bibliya tungkol sa pagpapakita ni Kristong Muling Nabuhay sa Mahal na Birheng Maria. 

Subalit, bakit nating ipinagdiriwang ang Salubong? Ang tunay na dahilan ng pagdiriwang ng Salubong ay upang magalak tayo sa Muling Pagkabuhay ng Panginoon, kasama ang Mahal na Ina. Kagalakan ang dulot ng Muling Pagkabuhay ni Kristo sa ating mga Kristiyano. Hindi mapapantayan ninuman ang kagalakang dulot ng Muling Pagkabuhay ni Kristo. Ang kagalakang hatid ng Panginoong Muling Nabuhay ay higit na dakila pa kaysa sa kagalakang dulot ng sanlibutan.

Isa na namang pagtawid ang natunghayan natin sa Salubong. Sa Salubong, ginugunita natin ang pagpapakita ng ating Panginoong Hesus sa Mahal na Birheng Maria pagkatapos na Siya'y muling mabuhay. Ang itim na belo ay sumasagisag sa hapis at lumbay ng Mahal na Inang Maria dahil sa pagpanaw ng kanyang Anak na si Hesus noong Biyernes Santo. Tinanggal ang itim na belo mula sa imahen ng Mahal na Ina. Sa pamamagitan noon, nagwakas na ang kalungkutan ng Mahal na Ina. Mula sa kalungkutan, tumawid ang Mahal na Birheng Maria tungo sa kagalakang hatid ng Muling Pagkabuhay ng Panginoon. 

Ang hapis ng Mahal na Birheng Maria ay naging kagalakan. Nagalak ang Mahal na Birheng Maria nang magpakita sa kanya si Hesus na muling nabuhay. Hindi mapapantayan ninuman ang kagalakang nadama ng Mahal na Birheng Maria noong si Hesus ay muling mabuhay. Ang hapis ng Mahal na Birheng Maria dulot ng pagpapakasakit at pagkamatay ni Hesus sa Kalbaryo ay hindi nagtagal. Dahil sa Muling Pagkabuhay ni Hesus, naranasan ng Mahal na Birheng Maria ang kagalakang dulot nito. 

"Reyna ng Langit, magalak ka! Aleluya!" Ito ang mensahe ng mga anghel sa Mahal na Birheng Maria patungkol sa Panginoong Muling Nabuhay. Hindi lamang para sa Mahal na Ina ang mensaheng ito ngayong Pasko ng Pagkabuhay. Tayong lahat ay inaanyayahan na makiisa at makigalak sa kagalakang dulot ng Muling Pagkabuhay. Ang araw ng Pasko ng Pagkabuhay ay araw ng kagalakan. Napagtagumpayan na ni Hesus ang kapangyarihan ng kadiliman. Si Hesus ay nagtagumpay laban sa kapangyarihan ng kasamaan at kamatayan. 

Tapos na ang paghahapis ng Mahal na Birheng Maria. Ang matinding hapis ng Mahal na Birheng Maria dulot ng pagdurusa at pagkamatay ni Hesus ay nawala na. Napawi na ang hapis ng Mahal na Birheng Maria. Pinawi ni Hesus ang hapis ni Maria sa pamamagitan ng Kanyang Muling Pagkabuhay.  Inaanyayahan tayong lahat na makiisa sa kagalakang dulot ng Panginoong Hesus sa Mahal na Birheng Maria sa pamamagitan ng Kanyang Muling Pagkabuhay. 

"Huwag ninyong hahayaang mawalan kayo ng pag-asa. Tayo ay isang sambayanan ng Muling Pagkabuhay at Aleluya ang ating awit." - Papa San Juan Pablo II 

PAGTAWID MULA SA KADILIMAN PATUNGO SA LIWANAG

Abril 4, 2015 
Sabado de Gloria
Magdamagang Pagdiriwang ng Pasko ng Muling Pagkabuhay (B)
Genesis 1, 1-2, 2 (o kaya: 1, 1. 26-31a)/Salmo 103 (o kaya: Salmo 32)/Genesis 22, 2-18 (o kaya: 22, 1-2. 9a. 10-13. 15-18)/Salmo 15/Exodo 14, 15-15, 1/Exodo 15/Isaias 54, 5-14/Salmo 29/Isaias 55, 1-11/Isaias 12/Baruc 3, 9-15. 32-4, 4/Salmo 18/Ezekiel 36, 16-17a. 18-28/Salmo 41 (o kaya: Salmo 50)/Roma 6, 3-11/Salmo 117/Marcos 16, 1-7 

Nagsimula ang Bihiliya ng Pasko ng Pagkabuhay sa kadiliman. Isinasagisag nito ang kadiliman sa libingan ni Hesus. Sinasagisag din ng kadiliman sa simula ng Bihiliya ang mundo kung wala ang Diyos. Kung wala ang Diyos, tayong lahat ay nabubuhay sa kadiliman. Sinasabi nga sa Unang Pagbasa, noong sinimulan ng Diyos ang paglikha sa sanlibutan, kadiliman ang bumabalot sa kalaliman. Ang kadiliman sa simula ng ating pagdiriwang ay sumasagisag din sa kadiliman sa loob ng libingan ni Hesus. 

Sa mga huling sandali ng buhay ni Hesus, iniwanan Siya ng Kanyang mga alagad. Walang dumamay kay Hesus sa mga madidilim na sandali ng Kanyang buhay. Bago Siya dinakip ng mga kawal sa Halamanan ng Getsemani, inutusan Niya ang mga alagad na manalangin at magtanod na kasama Niya. Subalit, ano ang ginawa ng mga alagad? Tinulugan nila si Hesus. Sa halip na manalangin at magbantay, natulog sila. Hindi nila dinamayan si Hesus sa Kanyang pananalangin at pagdurusa sa Halamanan. 

Mag-isa rin si Hesus noong Siya'y dinakip ng mga kawal. Noong dinakip ang Panginoong Hesukristo ng mga kawal sa Halamanan, nagsitakas ang mga alagad. Iniwanan nilang mag-isa ang Panginoon. Walang sumama kay Hesus noong Siya'y dinakip. Kahit nangako ang mga alagad, lalung-lalo na si San Pedro Apostol, na sasama sila kay Hesus, hindi nangyari iyon. Bagkus, hinarap ni Hesus ang Kanyang kamatayan na mag-isa. 

Inilibing si Hesus ni San Jose na taga-Arimatea sa isang libingang malapit sa kinamatayanan ni Hesus. Napakadilim sa loob ng libingan. Subalit, sa kadiliman ng libingan, nagpahinga ang Panginoon. Ang Panginoong Hesus ay nagpahinga pagkatapos ng napakabrutal at napakasakit na wakas sa Kanyang buhay. Kaya, nararapat lamang na simulan natin ang ating Bihiliya sa kadiliman. Dinadamayan natin si Hesus na inilibing sa kadiliman ng libingan at hinihintay din natin ang Kanyang paglabas mula sa libingan. 

Ginugunita natin sa gabing ito ang pagtawid ni Hesus mula sa kadiliman patungo sa liwanag. Mula sa pagdurusa, nakamit ni Hesus ang tagumpay at kaluwalhatian. Hindi naging madali para kay Hesus na makamit ang tagumpay. Kinailangan muna Niyang dumaan sa pagdurusa at kamatayan sa Kalbaryo bago makamit ang kaluwalhatian. Pagkatapos ng pagdurusa at kamatayan sa krus ng Kalbaryo, nakamit ni Hesus ang kaluwalhatian. 

Tumawid si Hesus mula sa kadiliman ng libingan patungo sa liwanag na dulot ng Kanyang Muling Pagkabuhay. Bumangon at lumabas si Hesus mula sa libingan na nagniningning sa kaluwalhatian. Hindi kinaya ng kapangyarihan ng kadiliman at kamatayan si Hesus. Lumabas Siya mula sa libingan na nagtagumpay. Napagtagumpayan na ni Hesus ang kadiliman dulot ng kapangyarihan ng kasamaan at kamatayan. 

Sa pagsisimula ng kapanahunan ng Pasko ng Muling Pagkabuhay, inaanyayahan tayo ni Hesus na tumawid mula sa kadiliman ng ating mga kasalanan patungo sa liwanag ng bagong buhay. Inaanyayahan tayo ni Hesus na magbagong-buhay, lalung-lalo na ngayong Pasko ng Pagkabuhay. Bagong buhay ang dulot ng Muling Pagkabuhay ng ating Panginoong Hesukristo. 

Katulad ng sinabi ni San Pablo Apostol sa Sulat, ituring natin ang ating mga sarili na patay sa ating mga sarili upang makapamuhay tayo kasama ni Kristo. Talikuran natin ang masasamang pamumuhay. Talikuran natin ang masasamang bisyo. Bitiwan natin ang masasamang bisyo at pamumuhay. Magbagong-buhay tayo. Lumabas tayo mula sa kadiliman ng ating mga libingan - libingan ng kasalanan, bisyo, at marami pang iba. 

Sa panahon ng Kuwaresma at Mahal na Araw, tayo ay naglakbay kasama ng ating Panginoong Hesukristo patungo sa Kanyang tagumpay at kaluwalhatian. Ngayong nagtatapos na ang ating paglalakbay, makiisa nawa tayong lahat sa tagumpay at kaluwalhatian na kinamit ng Panginoong Hesus sa pamamagitan ng Kanyang kamatayan at Muling Pagkabuhay. Kasama ni Hesus, lumabas nawa tayong lahat mula sa kadiliman ng mga libingan ng ating mga kasamaan at kamatayan. Makibahagi nawa tayong lahat sa tagumpay, kaluwalhatian, at ang bagong buhay dulot ng Muling Pagkabuhay ni Hesus. 

REFLECTIVE SONG: "Ito ang Bagong Araw"