MISTERYO NG KAGANDAHANG-LOOB NG DIYOS

2 Enero 2022

Dakilang Kapistahan ng Pagpapakita ng Panginoon 

Isaias 60, 1-6/Salmo 71/Efeso 3, 2-3a. 5-6/Mateo 2, 1-12

Ang Dakilang Kapistahan ng Pagpapakita ng Panginoon o Epipanya ay isa sa mga mahahalagang pagdiriwang sa Kalendaryo ng Simbahan. Ginugunita ng Simbahan sa selebrasyong ito ang pagdalaw ng tatlong pantas o mago mula sa silangan sa Banal na Sanggol na si Hesus. Bagamat ang mga pantas na ito ay hindi kabilang sa bayang hinirang, ang bayan ng Israel, sila'y pinalad na makasamba sa Kanya. Napakalayo ang kanilang nilakbay upang makasamba lamang sa Banal na Sanggol na si Hesus, ang ipinangakong Mesiyas at Manunubos, katulad ng nasasaad sa tampok na salaysay sa Ebanghelyo para sa espesyal na araw na ito.

Sa pagdiriwang ng Dakilang Kapistahan ng Pagpapakita ng Panginoon, magandang pagnilayan ang dahilan kung bakit nga ba nangyari ang kaganapang ito. Niloob nga ng Panginoon na mangyari ito. Bahagi ito ng Kanyang plano. Subalit, ano nga ba ang dahilan kung bakit pinahintulutan ito ng Diyos? Bakit nga ba Niyang pinahintulutang maglakbay nang napakalayo ang mga pantas na ito? Hindi naman kabilang sa bayang hinirang ang mga pantas na ito. Mga dayuhan lamang ang mga pantas. Bakit nga ba binigyan ng pagkakataon ang mga pantas na ito na makadalaw at makasamba sa ipinangakong Tagapagligtas na si Hesus, gayong hindi sila kabilang sa bayang Israel, gaya ng nasasaad sa Ebanghelyo? 

Ipinahiwatig sa Unang Pagbasa pa lamang na niloob ng Panginoon na mangyari ang kaganapang isinalaysay sa Ebanghelyo. Sabi sa wakas ng Unang Pagbasa: "Ihahayag ng mga tao ang magandang balita tungkol sa ginawa ng Diyos" (Isaias 60, 6). Sabi roon na magniningning ang liwanag ng Panginoong Diyos sa bayang Israel (Isaias 60, 1-2). Sa takdang panahon, tinupad ng Diyos ang pangakong ito sa pamamagitan ng Banal na Sanggol na si Hesus, ang Kanyang Bugtong na Anak. Sa pamamagitan ng maningning Niyang liwanag, aakitin ng Diyos ang lahat ng tao. Ang Sanggol na Hesus ay ang patunay na tinupad ng Diyos ang pahayag na ito.

Bakit ito ginawa ng Diyos? Dahil sa Kanyang kagandahang-loob. Ang kagandahang-loob na pinatotohanan ni Apostol San Pablo sa Ikalawang Pagbasa. Iyan ang dahilan kung bakit ang lahat ay maaaring makinabang sa mga pagpapala ng Diyos. Kung hindi niloob ng Diyos na dalawin ng mga pantas mula sa silangan ang nagkatawang-taong Mesiyas na si Kristo Hesus, hindi tayo aanyayahang makibahagi sa Kanyang mga biyaya. Ang pagdalaw ng mga pantas sa Sanggol na Hesus ay isang patunay na para sa lahat ang mga biyayang ibinubuhos ng Diyos. 

Hinihimok ng Simbahan ang bawat isa sa atin sa Kapistahang ito na mamangha sa misteryo ng kagandahang-loob ng Diyos. Sa pamamagitan ng Banal na Sanggol na walang iba kundi si Hesus, ang kagandahang-loob na ito ay nahayag. 

ANG MISTERYO NG PAGKAKATAWANG-TAO NG DIYOS

1 Enero 2022

Dakilang Kapistahan ni Maria, Ina ng Diyos 

Bilang 6, 22-27/Salmo 66/Galacia 4, 4-7/Lucas 2, 16-21 

Ang unang araw ng isang bagong taon sa sekular na kalendaryo ay ang ikawalo at huling araw ng Walong Araw na Pagdiriwang ng Pasko ng Pagsilang ng Panginoon sa Kalendaryo ng Simbahan. Sa ikawalo at huling araw ng Oktabang ito, ipinagdiriwang ng Simbahan ang Dakilang Kapistahan ni Maria, Ina ng Diyos. Sa espesyal na araw na ito, patuloy na pinagninilayan ng Simbahan ang misteryo ng pagkakatawang-tao ng Bugtong na Anak ng Diyos na si Kristo Hesus. Sa pamamagitan ng Kanyang Anak na walang iba kundi si Kristo Hesus, ang Diyos ay nagkatawang-tao upang tubusin ang sangkatauhan. Ang naging ina ng Diyos na nagkatawang-tao ay walang iba kundi ang Mahal na Birheng Maria. 

Bagamat ang titulong "Ina ng Diyos" (Theotokos) ay patungkol sa Mahal na Ina, ang titulong ito ay nakasentro sa misteryo ng pagkakatawang-tao ng Diyos Anak. Hindi maipagkakaila na nakatuon ang pansin ng titulong ito ng Mahal na Birheng Maria sa pagkakatawang-tao ng Diyos sa pamamagitan ng Kanyang Bugtong na Anak na si Hesus. Ang Sanggol na isinilang ng Mahal na Birhen ay hindi karaniwan. Ang Sanggol na ito ay ang Bugtong na Anak ng Diyos.

Sa Unang Pagbasa, ipinakilala ng Panginoon ang Kanyang sarili bilang mapagpala. Sa rito ng pagbebendisyon sa mga Israelita na Siya mismo ang bumuo, ang Panginoong Diyos ay nagpakilala bilang bukal ng pagpapala. Sa Matandang Tipan pa lamang, ang pagiging mapagpala ng Diyos ay isinasalungguhit. Sa pamamagitan ng Kanyang mga tapat na lingkod, pinagpapala ng Diyos ang Kanyang bayan. Sa Ikalawang Pagbasa, si Apostol San Pablo ay nagsalita tungkol sa pinakadakilang pagpapalang ipinagkaloob ng Diyos sa lahat ng tao - ang Panginoong Hesus. Sa Ebanghelyo, ang mga pastol na dumalaw sa Sanggol na Hesus noong gabi ng unang Pasko ay nagpatotoo tungkol sa kadakilaan ng Panginoong Diyos na nakita nila sa pamamagitan ng Banal na Sanggol gaya ng ibinalita sa kanila ng anghel. 

Hindi karaniwan ang Sanggol na isinilang ni Maria noong gabi ng unang Pasko. Ang isinilang ni Maria ay ang bukal ng lahat ng pagpapala. Ang isinilang ni Maria ay ang maawain at mapagpalang Diyos. Dahil sa Kanyang awa, ipinagkaloob ng Diyos ang Kanyang sarili sa sangkatauhan. Ito'y ginawa Niya sa pamamagitan ni Kristo Hesus, ang Kanyang Bugtong na Anak. Sa pamamagitan ni Hesus, ipinagkaloob ng Diyos ang pinakadakilang biyaya sa sangkatauhan. Siya ang dahilan kung bakit buong tuwang umawit ang mga anghel sa langit. Siya ang dahilan kung bakit ang mga pastol ay buong tuwang nagpuri sa Kanya. Ang Banal na Sanggol na si Hesus ay ang bukod tanging dahilan ng lahat ng iyon. 

Inaanyayahan tayo sa unang araw ng Bagong Taon na siya ring ikawalo at huling araw ng Oktaba ng Pasko ng Pagsilang ng Panginoong Hesukristo na pagnilayan ang misteryong ito. Ang misteryo ng pagkakatawang-tao ng Diyos sa pamamagitan ng Kanyang Bugtong na Anak na walang iba kundi si Hesus. Ang Diyos ay nagkatawang-tao sa pamamagitan ni Hesus upang maging pinakadakilang pagpapala para sa lahat sa buong mundo. Iyan ang dahilan kung bakit kinikilala ang Mahal na Birheng Maria bilang Ina ng Diyos. Niloob ng Diyos na mangyari ang misteryong ito.

HUWAG MAGBULAG-BULAGAN AT MAGBINGI-BINGIHAN

28 Disyembre 2021 

Kapistahan ng mga Banal na Sanggol na Walang Kamalayan, mga martir 

1 Juan 1, 5-2, 2/Salmo 123/Mateo 2, 13-18 

Isang nakakalungkot na kaganapan ang isinalaysay sa Ebanghelyo para sa araw na ito. Kung tutuusin, inaaalala ng Simbahan sa araw na ito ang nakakalungkot na eksenang tampok sa salaysay sa Ebanghelyo para sa araw na ito. Ang kaganapang ito ay nagdulot ng panaghoy at hapis. Ang utos ni Haring Herodes na paslangin ang mga sanggol na lalaking may gulang na dalawang taong pababa ay ang dahilan ng hapis at panaghoy sa paligid sa araw na yaon. 

Subalit, sa kasalukuyang panahon, tila nagbago na ang reaksyon ng marami sa lipunan sa mga patayan, lalung-lalo na kung ang ilan sa mga pinatay ay wala namang ginawang sala sa batas. Kung mayroon mang inosenteng namatay, mamaliitin na lamang iyon at hahanapan pa ng dahilan kung bakit nga ba sila pinatay. Maaari ring nilang sabihing ang nangyari ay isa lamang kaso ng collateral damage. Tila marami na sa lipunan ang nagiging manhid sa harap ng mga walang hustisyang pagpaslang sa mga inosente. Tila nagbubulag-bulagan at wala pa ngang pakialam sa nangyayari.

Ang masaklap pa dito, mayroon pa ngang mga pinuno sa pamahalaan na sumusuporta sa gawaing ito. Katunayan, hindi lamang nila kinukunsinti ang gawaing ito kundi hinihimok pa nila ang pagpapatuloy nito. Sa kabila nito, ang mga pinunong ito ay sinusuportahan pa rin ng marami sa lipunan. Pinapalakpakan pa nga sila ng marami. Pinili nilang magbulag-bulagan sa katotohanan. Tila, hindi na sila nakukunsensya. Bakit? 

Sabi ni Apostol San Juan sa Ikalawang Pagbasa na ang Diyos ay ilaw (1, 5). Dagdag pa niya, namumuhay sa kadiliman ang mga nagsisinungaling tungkol sa kanilang huwag o pekeng pagpanig sa Diyos (1, 6). Paano nagiging peke ang pagpanig sa Diyos? Kung magbubulag-bulagan at magbibingi-bingihan tayo sa katotohanan tungkol sa kawalan ng hustisya. Ang mga walang pakialam sa paglaganap ng kawalan ng katarungan. Tapos, sasabihin pa nilang ang Diyos ay kanilang pinapanigan. Isa iyang napakalaking kasinungalingan. 

Ipinapaalala sa atin sa araw na ito na ang mga tunay na nasa panig ng Panginoong Diyos ay hindi nagbubulag-bulagan at nagbibingi-bingihan sa harap ng kawalan ng katarungan, lalo na sa harap ng mga inosenteng inaabuso at pinapatay. Kung tunay tayong nasa panig ng Diyos, titindig tayo at gagamitin natin ang ating mga boses at gawain upang ipaglaban ang katotohanan at liwanag ng Diyos. 

TUNAY NGANG WALANG KATULAD

27 Disyembre 2021 

Kapistahan ni Apostol San Juan, Manunulat ng Mabuting Balita

1 Juan 1, 1-4/Salmo 96/Juan 20, 2-8 

Tiyak na mayroong mga magtataka kung bakit itinatampok sa Ebanghelyo ang salaysay ng libingang walang laman gayong ang Simbahan ay napapaloob sa kapanahunan ng Pasko ng Pagsilang ng Panginoong Hesukristo. Ang salaysay ng pagtuklas sa libingang walang laman ay 'di hamak na mas naaangkop sa panahon ng Pasko ng Muling Pagkabuhay ni Hesus. Ang mga kaganapang isinalaysay sa Ebanghelyo ay naganap noong muling nabuhay si Hesus. 'Di hamak na parang hindi napapanahon ang salaysay itinatampok sa Ebanghelyo para sa araw na ito sa Oktaba o Walong Araw na Pagdiriwang ng Pasko ng Pagsilang. Bakit nga ba ang itinatampok sa Ebanghelyo ngayon ay tungkol sa Muling Pagabuhay ni Hesus? 

Inilaan ang Simbahan ang araw na ito para sa Kapistahan ni Apostol San Juan, Manunulat ng Mabuting Balita. Isinulat ni Apostol San Juan ang mga salita sa Unang Pagbasa at ang salaysay sa Ebanghelyo para sa araw na ito. Subalit, hindi lamang iyan ang dahilan kung bakit itinampok sa Ebanghelyo ang mga nangyari noong araw na si Hesus ay nabuhay na mag-uli. Bagkus, ang dahilan ay isinulat mismo ni Apostol San Juan sa simula ng kanyang unang sulat na itinampok sa Unang Pagbasa. Ang mga ito ay naisulat upang malaman ng lahat ang katotohanan tungkol kay Kristo. Si Apostol San Juan, ang iba pang mga apostol, at maging ang mga humalili sa kanila ay nagpatotoo tungkol kay Kristo sa lahat. 

Si Hesus ay isinilang sa sabsaban noong gabi ng unang Pasko. Subalit, ang Sanggol na ito na isinilang sa sabsaban sa Betlehem noong gabi ng unang Pasko ay hindi pangkaraniwan. Ang Banal na Sanggol na nagngangalang Hesus na isinilang ng Mahal na Birheng Maria noong gabi ng unang Pasko ay ang Panginoon at Tagapagligtas na muling mabubuhay pagdating ng takdang panahon. Ang Banal na Sanggol na isinilang sa sabsaban noong unang Pasko, si Hesus, ay ang Panginoon na mabubuhay na mag-uli pagdating ng takdang panahon. Siya ang lilipol at magtatagumpay laban sa kasamaan at kamatayan. Si Hesus ang ipinangakong magpapalaya at magliligtas sa atin mula sa mga tanikala ni Satanas. Ang katotohanang ito tungkol sa Kanya ay laging pinatotohanan ni Apostol San Juan. 

Wala talagang katulad ang Sanggol na isinilang sa sabsaban. Ang Banal na Sanggol na ito, na walang iba kundi si Hesus, ay ang ipinangakong Mesiyas at Manunubos.

MAGKAKAPAMILYA

26 Disyembre 2021 

Kapistahan ng Banal na Mag-Anak Hesus Maria at Jose (K) 

1 Samuel 1, 20-22. 24-28/Salmo 83/1 Juan 3, 1-2. 21-24/Lucas 2, 41-52 

"Bakit po ninyo Ako hinahanap? Hindi ba ninyo alam na Ako'y dapat nasa bahay ng Aking Ama?" (Lucas 2, 49). Ito ang sagot ng Batang Hesus sa Mahal na Inang si Maria matapos nila Siyang hanapin. Hinanap ng Mahal na Birheng Maria at ni San Jose ang Batang Hesus sa loob ng tatlong araw. Natagpuan nila ang Batang Hesus sa ikatlong araw na nakikipag-usap sa mga guro sa templo sa ikatlong araw ng kanilang paghahanap. Sa pamamagitan ng mga salitang ito, ipinakita na ni Hesus na nababatid Niyang Diyos Siya. Kahit na bata pa lamang Siya sa mga sandaling iyon, alam na Niyang Siya ang Bugtong na Anak ng Diyos. 

Tiyak na mayroong mga magtataka kung bakit ang salaysay ng paghahanap ni San Jose at ng Mahal na Birheng Maria sa Batang Hesus ay piniling bigyan ng pansin ng Simbahan sa salaysay sa Ebanghelyo para sa Kapistahang ipinagdiriwang sa Linggong ito. Bakit nga ba ang Ebanghelyo ay tungkol sa pagkawala ni Hesus? Kung ang ginawa ng Batang Hesus sa Ebanghelyo ay ginawa ng ibang bata, ang mga batang iyon ay tatawaging mapilyo. Ano nga ba talaga ang nais ituro ng Ebanghelyo? 

Itinampok sa Ebanghelyo ang paghahanap sa Batang Hesus sa templo upang ituro sa atin na ang Panginoong Hesukristo ay naging bahagi ng isang pamilya. Kahit na Siya ang Diyos na nagkakaloob ng pamilya sa lahat, pinili pa rin Niyang maging bahagi ng isang pamilya nang dumating Siya sa mundo bilang ipinangakong Manunubos. Kahit na hinandog ni Ana ang kanyang anak na si Samuel sa Kanya sa Unang Pagbasa, naging bahagi pa rin Siya ng isang pamilya. Si Hesus ay nagkaroon ng isang pamilya sa kabila ng pagiging Diyos. 

Sa pamamagitan ng pagiging bahagi ng isang pamilya noong una Siyang dumating dito sa daigdig bilang ipinangakong Mesiyas at Tagapagligtas, ang kagandahang-loob ng Diyos ay ipinakita ni Hesus sa lahat. Ang kagandahang-loob ng Diyos, ayon sa Ikalawang Pagbasa, ay ang dahilan kung bakit ipinasiya Niyang ituring tayong Kanyang mga anak (1 Juan 3, 1). Sa pamamagitan ng pagiging Anak nina Maria at Jose, ipinakita ni Hesus ang hangarin ng Diyos na gawing bahagi ng Kanyang pamilya ang bawat isa sa atin. 

Ang pamilya ay isang biyaya ng Diyos sa atin. Binigyan tayo ng Diyos ng pamilya. Bukod pa rito, ibinibilang ng Diyos ang bawat isa sa atin sa Kanyang pamilya. Sa paningin ng Diyos, tayong lahat ay magkakapamilya. 

IBALIK SIYA SA SENTRO NG PASKO

25 Disyembre 2021 

Dakilang Kapistahan ng Pasko ng Pagsilang ng Panginoon 

[Pagmimisa sa Araw] 

Isaias 52, 7-10/Salmo 97/Hebreo 1, 1-6/Juan 1, 1-18 (o kaya: 1, 1-5. 9-14) 

Tiyak na napapansin ng karamihan sa atin sa paglipas ng mga taon ang pagiging sekular ng pagdiriwang ng Pasko. Sa halip na isentro sa Banal na Sanggol na si Hesus na nakahiga sa sabsaban ang pagdiriwang ng Pasko tuwing ika-25 ng Disyembre, nakasentro na kay Santa Claus ang nasabing pagdiriwang. Si Santa Claus na sumasaigsag sa komersyo ay ipinalit ng lipunang sekular bilang mukha ng Pasko. Hindi na tungkol kay Kristo ang Pasko kundi ang komersyo. Nakalimutan na ng marami ang tunay na dahilan ng Pasko. 

Ipinapaalala sa atin ng mga Pagbasa para sa Araw ng Pasko ng Pagsilang ang dahilan kung bakit nga ba natin ipinagdiriwang ang Dakilang Kapistahang ito bilang isang Simbahan. Isa lamang ang dahilan kung bakit ipinagdiriwang ng Simbahan ang Pasko. Si Hesus, ang Salita ng Diyos na nagkatawang-tao at nakipamayan sa atin, ay ang tunay at pangunahing dahilan kung bakit ipinagdiriwang ang Pasko. Si Hesus na ipinakilala sa Ebanghelyo bilang Verbo, ang Salita ng Diyos na kasama na ng Diyos at Diyos rin, ay ang dahilan ng Pasko. Kung hindi dahil sa Salita ng Diyos na nagkatawang-tao na si Hesus, walang Pasko. 

Ang Pasko ay hindi tungkol kay Santa Claus, isang piksyonal na karakter na nilikha upang maging sagisag ng komersyalismo tuwing Pasko. Katunayan, ang piksyonal na karakter na si Santa Claus ay binase mula sa isang Santo na si San Nicolas ng Mira na kilala sa kanyang pagiging matulungin sa kapwa. Ibinabahagi ni San Nicolas ang mga kayamanang minana niya mula sa kanyang mga magulang upang tulungan ang kapwa, lalo na ang mga maralita. Iyon nga lamang, ginamit siya bilang basehan ng isang sekular na karakter na tila naging kapalit ni Kristo bilang mukha ng Pasko. 

Oo, matulungin si San Nicolas. Ibinabahagi niya ang kayamanang kanyang minana mula sa kanyang mga magulang upang tulungan ang mga mahihirap. Subalit, natitiyak natin bilang mga Kristiyano na hindi niya binalak agawin mula sa Panginoong Hesukristo ang pagiging sentro ng pagdiriwang ng Pasko kahit kailan. Batid din ni San Nicolas na kahit ano pa'ng gawin niya, hinding-hindi niya mapapalitan si Hesus. Batid ni San Nicolas na si Hesus ay walang katulad at walang kapalit. 

Sa Unang Pagbasa at Ikalawang Pagbasa, inilarawan kung paanong hindi mapapalitan kahit kailan ang Panginoong Hesus. Sa Unang Pagbasa, inihayag na masasaksihan ng lahat kung paanong maghahatid ng kaligtasan ang Diyos. Sa Ikalawang Pagbasa, inilarawan kung ano ang ginawa ng Diyos upang ipagkaloob sa lahat ang biyaya ng Kanyang pagliligtas. Ang Diyos ay dumating sa sanlibutan sa pamamagitan ng Panginoong Hesukristo, ang Salitang nagkatawang-tao. Sa pamamagitan ng Panginoong Hesus, dumating ang Diyos sa mundo upang ipagkaloob sa lahat ang biyaya ng Kanyang pagliligtas. 

Hindi komersyo ang dahilan ng pagdiriwang ng Pasko ng Pagsilang. Bagkus, ito ay tungkol sa Banal na Sanggol na si Hesus na nakahiga sa sabsaban. Siya ang ipinangakong Mesiyas at Tagapagligtas. Dumating Siya sa mundo upang ihatid ang biyaya ng kaligtasan. 

Kaya naman, ibalik natin ang Banal na Sanggol na isinilang noong gabi ng unang Pasko sa sentro ng maringal na pistang ito. Ang Banal na Sanggol na isinilang ng Mahal na Birheng Maria noong gabi ng unang Pasko ay ang dahilan at sentro ng maringal na pagdiriwang na ito. Walang makakapalit sa Kanya kailanman.  

NANDITO SIYA PARA SA ATIN

25 Disyembre 2021 

Dakilang Kapistahan ng Pasko ng Pagsilang ng Panginoon 

[Pagmimisa sa Hatinggabi]

Isaias 9, 1-6/Salmo 96/Tito 2, 11-14/Lucas 2, 1-14 

Andito muli ang himala ng Pasko. 

Kabutihan ng tao ang ilaw ng mundo. 

Andito ang Diyos, dala Niya'y pag-asa. 

Andito tayo para sa isa't isa. 

Ang mga salitang ito ay mula sa koro ng awiting kinatha para sa Station ID ng ABS-CBN para sa pagdiriwang ng Pasko ng Pagsilang ng Panginoon sa taong 2021. Bagamat marami sa mga titik ng nasabing awitin ay tumutukoy sa mga sekular na bagay, mayroon pa ring isang espirituwal na aspeto ang awiting ito. Katunayan, kung sasaliksikin natin ang mga titik ng awiting ito, mapapansin natin na nakatuon ang mga ito sa halaga ng pagdamay sa kapwa. Kung tutuusin, iyan ay laging itinuturo ng Simbahan. Laging damayan ang kapwa. Laging magpakita ng malasakit sa kapwa. Laging maging kaisa ng kapwa. 

Sa Hatinggabi ng Pasko ng Pagsilang, nakatuon ang pansin sa pagdamay ng Panginoon sa atin. Sa pamamagitan ng Sanggol na Hesus, ang Diyos ay naging kaisa natin. Ang Diyos ay dumating sa mundo noong gabi ng unang Pasko bilang isang munting Sanggol na iniluwal mula sa sinapupunan ng Mahal na Birheng Maria upang damayan tayo. Nais ng Diyos na imulat tayo sa katotohanang hindi Niya tayo pababayaan. Nais ng Diyos na maramdaman natin na hindi tayo nag-iisa. Kasama natin Siya. Lagi Siyang nakikiisa sa atin. 

Sa Unang Pagbasa, inihayag ni Propeta Isaias na isang sanggol ang isisilang alang-alang sa atin. Isang sanggol na lalaki ang ibibigay ng Diyos sa atin. Isang munting sanggol ang regalo ng Diyos para sa atin. Ang aguinaldong ito ng Diyos ay dumating sa mundo noong gabi ng unang Pasko sa isang sabsaban sa Lungsod ng Betlehem, ang Lungsod ni Haring David. Sa Ebanghelyo, nagpakita sa mga pastol na nag-aalaga ng kanilang mga tupa sa parang ang isang anghel ng Panginoon upang ibalita sa kanila ang pagdating ng regalong ito ng Diyos. Dumating ang ipinangakong Manunubos na walang iba kundi si Kristo. Dumating Siya sa mundo bilang isang sanggol na nakahiga sa sabsaban. 

Sa Ikalawang Pagbasa, binigyan ng pansin ni Apostol San Pablo ang kagandahang-loob ng Diyos. Ang kagandahang-loob ng Diyos ay ang dahilan kung bakit ipinasiya Niyang maging kaisa natin. Ang kagandahang-loob ng Diyos ay ang dahilan kung bakit ipinasiya Niyang ipagkaloob si Hesus upang maging ating ipinangakong Mesiyas at Manunubos. Ang Diyos ay nagpasiyang maging kaisa natin, damayan tayo, samahan tayo, upang iligtas tayo mula sa mga tanikala ng kasamaan at kamatayan dahil sa Kanyang kagandahang-loob. 

Ang Diyos ay nagpasiyang maging kaisa natin. Ipinasiya Niyang samahan tayo. Hindi Niya tayo iiwanan o pababayaan. Iyan ang nais ipaalala sa atin ng Banal na Sanggol na si Kristo Hesus na nakahiga sa sabsaban. Isinilang ang Panginoong Hesukristo upang ipakita sa atin na hindi tayo pababayaan ng Diyos. Lagi Niya tayong sasamahan at dadamayan sa hirap at ginhawa. Mananatili Siyang kaisa natin magpakailanman. 

Nandito si Hesus upang bigyan tayo ng pag-asa. Sa pamamagitan ng Kanyang pagdamay at pakikiisa sa atin, binigyan tayo ng pag-asa ni Hesus. Iyan ang dahilan kung bakit si Hesus ay isinilang ng Mahal na Inang si Mariang Birhen noong gabi ng unang Pasko. 

MAPAGMAHAL NA TAGAPAGLIGTAS

24  Disyembre 2021 

Dakilang Kapistahan ng Pasko ng Pagsilang ng Panginoon 

[Pagmimisa sa Bisperas] 

Isaias 62, 1-5/Salmo 88/Mga Gawa 13, 16-17. 22-25/Mateo 1, 1-25 (o kaya: 1, 18-25) 

"Pag-ibig Mong walang maliw ay lagi kong sasambitin" (Salmo 88, 2a). Ang mga salitang ito sa Salmong Tugunan ay nagbibigay ng pahiwatig tungkol sa temang pinagninilayan sa mga Pagbasa para sa Misa sa Bisperas ng Pasko ng Pagsilang ng Panginoon. Ang walang hanggang pag-ibig ng Diyos ay nahayag sa sangkatauhan sa pamamagitan ng pagkakaloob Niya kay Hesus. Si Hesus ay ipinagkaloob ng Ama sa sangkatauhan bilang Tagapagligtas. Sa araw ng Pasko, ginugunita natin ang pagdating ng biyayang ito ng Diyos. Ang kaligtasang kaloob ng Diyos ay dumating sa sanlibutan sa pamamagitan ni Kristo Hesus noong gabi ng unang Pasko kung kailan Siya isinilang ng Mahal na Birheng Maria. Sa pamamagitan ng Banal na Sanggol na si Hesus, nahayag ang walang hanggang pag-ibig ng Diyos. 

Sa Unang Pagbasa, inihayag ng Diyos ang Kanyang nais na iligtas ang Kanyang bayan. Sa kabila ng paulit-ulit na pagtalikod at pagsuway ng Kanyang bayan, hindi hinangad ng Diyos na mapahamak ang Kanyang bayan kailanman. Bagkus, hinangad pa rin Niyang iligtas ang bayan Niyang ilang ulit na tumalikod sa Kanya Hindi kapahamakan kundi kaligtasan ang hangad ng Panginoong Diyos para sa Kanyang bayan. Sa Ikalawang Pagbasa at Ebanghelyo, inilarawan kung paanong naghatid ng kaligtasan ang Diyos. Ang biyaya ng pagliligtas ng Diyos ay dumating sa sanlibutan sa pamamagitan ni Hesus. 

Ang Dakilang Kapistahan ng Pasko ng Pagsilang ng Panginoon ay isang pista ng pag-ibig dahil ginugunita natin ang pagdating ng ipinangakong Mesiyas at Tagapagligtas na tunay ngang mapagmahal. Ang Diyos na nagliligtas sa atin ay tunay ngang mapagmahal. Mayroon tayong isang mapagmahal na Tagapagligtas - ang Panginoong Diyos. Dahil sa pag-ibig na ito, ipinasiya ng Diyos na dumating sa sanlibutan sa pamamagitan ng Sanggol na Hesus na Kanyang Bugtong na Anak. Sa pamamagitan ng Banal na Sanggol, inihayag ng Diyos na mananatili Siyang tapat sa Kanyang pag-ibig para sa atin magpakailanman. 

Kaya naman, ngayong Pasko, pasalamatan natin ang ating mapagmahal na Tagapagligtas na walang iba kundi si Kristo. Ipinasiya Niyang iligtas tayo dahil sa Kanyang pag-ibig para sa atin. Ibinigay Niya ang buo Niyang sarili noong gabi ng unang Pasko bilang aguinaldo. Si Hesus ay nagpasiyang maging isang Sanggol na iniluwal ni Maria dahil sa Kanyang pag-ibig para sa atin na tunay ngang walang maliw. 

LAGING SINASAMBIT

24 Disyembre 2021 

Simbang Gabi/Misa de Gallo - Ikasiyam na Araw 

2 Samuel 7, 1-5. 8b-12. 14a. 16/Salmo 88/Lucas 1, 67-79 

"Pag-ibig Mong walang maliw ay lagi kong sasambitin" (Salmo 88, 2a). Ang mga salitang ito sa Salmo para sa araw na ito ay isinagawa ni Zacarias sa Ebanghelyo. Matapos ang siyam na buwan ng pananatiling pipi at bingi, ginamit ni Zacarias ang kanyang tinig upang mag-alay ng papuri at pasasalamat sa Diyos. Nang matapos ang sumpa sa kanya, nagpuri siya sa Diyos gamit ang kanyang tinig. Hindi siya nag-aksaya ng panahon sa pagpupuri sa Diyos na tumupad sa Kanyang pangako. Nagpatotoo siya tungkol sa kabutihan ng Diyos gamit ang kanyang tinig na bumalik matapos ang sumpang tumagal ng siyam na buwan. 

Sa pinakahuling araw ng tradisyunal na Simbang Gabi na siya ring pinakahuling araw sa panahon ng Adbiyento, muling ipinapapaalala sa atin na ang katapatan ng Diyos ay tunay at hindi isang kathang-isip lamang. Oo, taun-taon nating naririnig ang Ebanghelyong ito sa tuwing sasapit ang pinakahuling araw ng panahon ng Adbiyento. Subalit, mahalaga para sa atin na huwag kalimutan ang pagiging matapat ng Diyos. Ang katotohanang ito ay hindi natin dapat limutin kailanman. Dahil diyan, sabi ng mang-aawit ng Salmo na ang walang katapusang pag-ibig ng Diyos ay lagi niyang sasambitin. 

Tinupad ng Diyos ang Kanyang pangako kay Haring David sa Unang Pagbasa. Agad siyang pinalitan ng kanyang anak na si Solomon noong mamamatay na siya. Kalaunan nagmula sa kanyang lipi ang tunay na Haring walang hanggan na si Kristo Hesus. Sa pamamagitan nito, nahayag ang pag-ibig at katapatan ng Panginoong Diyos sa Kanyang pangako. Ito ang agad na pinatotohanan ni Zacarias sa kanyang kantikulo sa Ebanghelyo. 

Hindi tumigil sa pagpapatotoo at pagbibigay ng papuri sa Diyos sina Zacarias at ang mang-aawit sa Salmo. Inaaanyayahan tayo sa araw na ito na sama-samang magbigay ng papuri at pasasalamat sa Diyos dahil sa Kanyang katapatan, kabutihan, at pag-ibig na walang maliw. 

SAGLIT NA LAMANG

23 Disyembre 2021 

Simbang Gabi/Misa de Gallo - Ikawalong Araw 

Malakias 3, 1-4. 23-24/Salmo 24/Lucas 1, 57-66 

"Itaas n'yo ang paningin, kaligtasa'y dumarating" (Lucas 21, 38). Ang mga salitang ito na binigkas ng Panginoong Hesus sa isa sa Kanyang mga pangaral sa Kanyang mga apostol tungkol sa wakas ng panahon ay ginamit bilang Tugon sa Salmong Tugunan para sa araw na ito. Naangkop ang mga salitang ito ni Hesus na ginamit bilang Tugon sa Salmo para sa araw na ito dahil malapit nang sumapit ang Pasko. Dalawang araw na lamang bago nating gunitain ang unang pagdating ng Panginoong Hesukristo bilang Sanggol na isinilang ng Mahal na Birheng Maria sa isang hamak na sabsaban sa bayan ng Betlehem. 

Darating ang Tagapagligtas. Ito ang temang pinagtuunan ng pansin ng Simbahan sa bawat araw ng panahon ng Adbiyento. Ang Diyos ay magkakaloob ng kaligtasan. Masasaksihan ng lahat ng tao sa mundo ang pagliligtas ng Diyos. Ang mga Pagbasa para sa araw na ito ay tunay ngang napapanahon  sapagkat ang paksang ito ang binibigyan ng pansin. Ililigtas ng Panginoon ang lahat. Ang Panginoon ay darating hindi upang maghatid ng kapahamakan kundi upang maghatid ng kaligtasan sa lahat. 

Sa wakas ng Ebanghelyo, itinanong ng mga dumalo sa pagtutuli at pagpapangalan sa anak nina Zacarias at Elisabet na walang iba kundi si San Juan Bautista kung ano ang magiging kinabukasan ng nasabing sanggol. Iyan ang kanilang tanong sa isa't isa dahil napakalinaw para sa kanila na "sumasakanya ang Panginoon" (Lucas 1, 66). Matapos nilang masaksihan ang muling pagsalita ni Zacarias, napagtanto nilang hindi pangkaraniwan ang sanggol na ito. May mahalagang mangyayari sa kanya. 

Nagsalita sa pamamagian ni Propeta Malakias ang Panginoong Diyos tungkol sa Kanyang pagdating sa Unang Pagbasa. Sa Kanyang pahayag, mayroon Siyang ibinigay na detalye na dapat bigyan ng pansin. Bago dumating ang Panginoon, darating si Propeta Elias (Malakias 3, 23). Ito ang magiging misyon ng anak nina Zacarias at Elisabet na walang iba kundi si San Juan Bautista pagsapit ng takdang panahon. Bago lumitaw ang ipinangakong Mesiyas, lilitaw muna si San Juan Bautista upang ihanda ang Kanyang daraanan. Siya ang magiging hudyat na talagang nalalapit na ang pagdating ng ipinangakong Mesiyas na si Hesus. 

Malapit na nating ipagdiwang ang Pasko ng Pagsilang ni Hesus. Tandaan natin, si Hesus ay dumating upang iligtas ang sangkatauhan. Si San Juan Bautista na Kanyang kamag-anak ay nauna sa Kanya upang ipaghanda Siya ng daraanan. Handa na ba tayong salubungin nang buong galak ang ipinangakong Manunubos na si Kristo? 

AWIT NG PUSO

22 Disyembre 2021 

Simbang Gabi/Misa de Gallo - Ikapitong Araw 

1 Samuel 1, 24-28/1 Samuel 2/Lucas 1, 46-56 

Ang The Anthem of the Heart ay isang anime na pelikula tungkol sa isang batang babaeng nangangalang Jun Naruse. Hindi nagsasalita si Jun dahil mayroong isang hindi magandang pangyayaring naganap noong bata pa lamang siya na isinisisi niya sa kanyang sarili. Noong bata pa siya, siya'y masiglahin at madaldal. Iyon nga lamang, nagbago ang lahat para kay Jun matapos maghiwalay ang kanyang mga magulang. Dahil dito, natatakot siyang magsalita sa iba. Isinusulat na lamang niya kung ano ang nais niyang sabihin at dinadaan na lamang din sa pagkanta ang pagpapahayag ng sarili.  

Isa sa mga awitin sa nasabing pelikulang anime, na ginamit din sa eksena kung saan siya'y dumating para sa dulang-musikal na inihanda ng kanyang klase, ay pinamagatang わたしのこえ (Romanji: Watashi No Koe/Tagalog: Ang Aking Tinig). Sa awiting ito, inihayag ni Jun ang kanyang saloobin. Inihayag ni Jun kung ano ang nais niyang sabihin. Maliwanag sa mga titik ng awitin na iniisip niyang may mga masaya dahil hindi siya nagsasalita. Ang mga titik na ito ay isang "pamamaalam" ni Jun sa kanyang tinig. Sabi pa nga niya sa awitin, ni hindi siya maka-iyak dahil dito. 

Mayroong mga awit ang ating mga puso. Kahit na hindi tayo magaling umawit sa totoong buhay, ang ating mga puso ay umaawit. Ang mga awit ng ating mga puso ay naghahayag ng ating mga tunay na saloobin. Marahil, hindi natin kayang ihayag ang mga ito dahil sa takot sa ibang tao. Subalit, kahit na anong pagtatakip o paglilihim na gawin natin, hindi natin iyan maililihim o matatakpan mula sa Diyos. Naririnig Niya ang mga inaawit ng ating mga puso. Ang inaaawit ng ating mga puso ay ang tunay nating mga saloobin.

Tampok sa Ebanghelyo para sa Ikapitong Araw ng tradisyunal na Simbang Gabi ang awit ng papuri na inihandog ng Mahal na Birheng Maria sa Diyos. Buong puso niyang ginamit ang kanyang tinig upang handugan ng papuri at pasasalamat ang Diyos sa pamamagitan ng kanyang kantikulo o awit-papuri. Inihahayag ng ating Mahal na Inang si Mariang Birhen sa bawat titik ng awit-panalanging ito, ang Magnificat, ang nilalaman ng kanyang puso. Ang puso ni Maria ay puno ng tuwa dahil sa mga kahanga-hangang gawa ng Diyos. 

Sa Unang Pagbasa, inihandog ni Ana sa Diyos ang kanyang anak na si Samuel nang buong puso. Sa pamamagitan ng kanyang paghandog kay Samuel na kanyang anak, nahayag ang laman ng puso ni Ana. Ang puso ni Ana ay puno ng papuri at pasasalamat sa Diyos dahil biniyayaan siya ng isang anak. Bilang pagtanaw ng utang na loob sa kabutihang ipinakita ng Diyos sa kanya, inihandog ni Ana ang kanyang anak na si Samuel. Maituturing na isang awit ng papuri at pasasalamat sa Diyos ang ginawang paghahandog ni Ana sa Diyos. 

Umaawit nang buong tuwa ang mga puso nina Ana at Maria. Mga awit ng pasasalamat at papuri sa Diyos ang laman ng puso nina Ana at ng Mahal na Inang si Mariang Birhen. Ang bawat isa sa atin ay tinatanong - ano ang inaawit ng ating mga puso? 

ANG TINIG NA NAGHAHATID NG TUWA

21 Disyembre 2021

Simbang Gabi/Misa de Gallo - Ikaanim na Araw

Awit 2, 8-14 (o kaya: Sofonias 3, 14-18a)/Salmo 32/Lucas 1, 39-45 

Isang mahalagang detalye sa salaysay ng Pagdalaw ng Mahal na Birheng Maria sa kanyang kamag-anak na si Elisabet na kilala rin bilang si Santa Isabel ang paglukso ng sanggol na si San Juan Bautista sa loob ng sinapupunan ng kanyang ina. Ang tinig ng pagbati ng Mahal na Birhen ay narinig ni Elisabet at ng kanyang anak na si San Juan Bautista na noo'y isa pa lamang sanggol sa loob ng sinapupunan ng kanyang ina. Ang tinig ng ating Mahal na Birhen ay nagdulot ng tuwa sa sanggol na si San Juan Bautista. Iyan ang dahilan kung bakit gumalaw sa tuwa sa loob ng sinapupunan ng kanyang inang si Elisabet ang sanggol na hinirang ng Diyos upang maging tagapaghanda ng daraanan ng Panginoon. 

Ang mga Pagbasa para sa Ikaanim na Araw ng Simbang Gabi ay nakatuon sa koneksyon ng tinig at tuwa. May ugnayan ang tinig at ang tuwa. May mga tinig na naghahatid ng uwa sa bawat isa sa atin. Mayroon pa ngang mga pagkakataon kung saan abot tainga ang ating mga ngiti sa tuwing naririnig natin ang tinig na nagpapasaya sa atin. Ang kaganapang tampok sa salaysay sa Ebanghelyo para sa araw na ito ay isang halimbawa nito. Bagamat isa pa lamang musmos sa sinapupunan ng kanyang ina sa mga sandaling iyon, labis na natuwa si San Juan Bautista pagkarinig niya sa tinig ng pagbati ng Mahal na Ina. Labis siyang natuwa dahil ang presensya ni Hesus ay kanyang naramdaman. 

Sa isa sa dalawang Pagbasang maaaring gamitin bilang Unang Pagbasa para sa araw na ito, isang bahagi ng aklat ng Awit ni Solomon, ginamit ang larawan ng pagmamahalan ng mga mag-asawa sa isa't isa upang ilarawan ang ugnayan ng tinig at tuwa. Ang mga mag-asawa o kaya naman ang mga nagkakaibigan ay labis na natutuwa sa tuwing maririnig nila ang tinig ng kanilang mga asawa o kinagigiliwan. Ang tuwang ito ay ipinakita ng sanggol na si San Juan Bautista nang maramdaman niyang nasa piling na niya si Kristo. 

Mayroong panawagan si propeta Sofonias sa isa sa dalawang Pagbasang maaaring gamitin bilang Unang Pagbasa para sa araw na ito. Ang kanyang panawagan para sa bayang Israel ay umawit nang malakas atlubusang magalak (Sofonias 3, 14). Ito rin ang paanyaya sa atin ng Simbahan sa araw na ito. Matuwa dahil tunay tayong minamahal ni Hesus. Matuwa dahil ang Kanyang pangako ay malapit na Niyang tuparin. 

Tayong lahat ay tinatanong ng Simbahan sa araw na ito - napupuno ba ng tuwa ang ating mga puso kapag naririnig natin ang tinig ng Panginoong Hesus? Ang tinig at presensya ni Kristo ay naghahatid ng tuwa sa lahat. Tulad ng sanggol na si San Juan Bautista na lumukso sa tuwa dahil sa tinig ni Maria na dala-dala si Hesus sa kanyang sinapupunan, mapuspos nawa ng tuwa ang ating mga puso at isipan. Kilalanin nawa natin ang tinig ng Panginoong Hesukristo bilang tinig at presensyang naghahatid ng tuwa. 

GININTUANG PANGAKO

20 Disyembre 2021 

Simbang Gabi/Misa de Gallo - Ikalimang Araw

Isaias 7, 10-14/Salmo 23/Lucas 1, 26-38 

Ang Banal na Misa para sa Ikalimang Araw ng Simbang Gabi o Misa de Gallo ay kilala rin bilang Missa Aurea o Ginintuang Misa. Ang dahilan kung bakit ganito ang tawag sa Misa para sa araw na ito ng tradisyunal na Pagsisiyam o Pagnonobena sa Karangalan ng ating Mahal na Inang si Maria bilang paghahanda para sa pagdiriwang ng Dakilang Kapistahan ng Pasko ng Pagsilang ng Panginoong Hesus ay dahil sa Ebanghelyo. Tampok sa salaysay sa Ebanghelyo para sa araw na ito ang Pagbabalita ng Arkanghel na si San Gabriel kay Maria tungkol sa pagkahirang sa kanya ng Diyos. Bagamat hindi lubusang maintindihan ang mga detalye tungkol sa pagkahirang ng Diyos sa kanya upang maging ina ni Kristo, tinanggap pa rin niya ito. Ibinigay pa rin niya ang kanyang "Oo" sa kalooban ng Diyos. 

Madalas na binibigyan ng pansin ang matamis na "Oo" ng ating Mahal na Inang si Maria sa kalooban ng Diyos. Katunayan, tinatawag pa nga itong ginintuang sandali. Totoo namang napakahalaga ng sandaling ito sa kasaysayan ng pagligtas ng Diyos sa sangkatauhan dahil sa pagtalima ng Mahal na Birheng Maria. Subalit, maganda ring pagnilayan ang sandaling ito bilang katuparan ng ginintuang pangako ng Diyos. Ang Panginoong Diyos ay nagbitiw ng isang ginintuang pangako para sa lahat. Natupad ang pangakong iyon sa pamamagitan ni Hesus at ng Kalinis-Linisang Birheng Maria. 

Sa Unang Pagbasa, ang Panginoong Diyos ay nabitiw ng isang ginintuang pangako. Isang dalaga'y maglilihi at manganganak ng isang sanggol na lalaki na tatawaging "Emmanuel" na nangangahulugang "Ang Diyos ay kasama natin" (Isaias 7, 14). Hindi kinalimutan ng Diyos ang pangakong ito kailanman. Ang pangakong ito ay ang dahilan kung bakit Niya iniligas mula sa bahid kasalanan ang Mahal na Birheng Maria bago pa man siya isilang sa mundong ito. Sa gayon, pinagindapat ng Diyos ang Mahal na Inang si Maria na tumalima sa Kanyang kalooban nang may kababaang-loob. Ang Mahal na Birheng Maria na ating Inang Kalinis-Linisan ay sumagot ng "Oo" sa kalooban ng Diyos. Hindi siya sumuway sa plano ng Diyos, bagamat mayroon naman siyang kalayaang gawin iyon. Ipinasiya ni Maria na tanggapin at tumalima sa kalooban ng Diyos. 

"Ginintuang Misa" ang tawag sa Banal na Misa para sa Ikalimang Araw ng Simbang Gabi dahil ginugunita natin ang katuparan ng ginintuang pangako ng Diyos. Ang pangakong ito ay sinimulang tuparin ng Diyos matapos ibigay ng Mahal na Inang si Mariang Birhen ang kanyang matamis na "Oo" sa Kanyang kalooban. Ang ginintuang sandaling ito na bahagi ng salaysay ng pagligtas ng Diyos sa sangkatauhan ay isang mahalagang bahagi ng ginintuang pangakong Kanyang binitiwan. Patunay lamang ito na hindi Niya lilimutin kailanman ang mga pangakong Kanyang binibitiwan. 

NAGAGALAK SA KANYANG PAGDATING

19 Disyembre 2021 

Ikaapat na Linggo sa Panahon ng Pagdating ng Panginoon (K) 

Simbang Gabi/Misa de Gallo - Ikaapat na Araw 

Mikas 5, 1-4a/Salmo 79/Hebreo 10, 5-10/Lucas 1, 39-45 

"Sino ako upang dalawin ng ina ng aking Panginoon? Sapagkat pagkarinig ko ng iyong bati ay naggagalaw ang sanggol sa aking tiyan" (Lucas 1, 43-44). Ito ang mga salita ni Elisabet nang makasalubong niya ang Mahal na Birheng Maria na kanyang kamag-anak. Alam ni Elisabet na dinadala ng kanyang kamag-anak na si Maria ang ipinangakong Manunubos sa kanyang sinapupunan. Napagtanto ni Elisabet na iyon ang dahilan kung bakit gumalaw sa tuwa sa kanyang sinapupunan ang sanggol na si San Juan Bautista. Ang sanggol na si San Juan Bautista ay labis na natuwa nang marinig niya ang pagbati ni Maria kay Elisabet nang dumating siya mula sa Nazaret patungo sa bahay ng kanyang kamag-anak. 

Ang dahilan kung bakit ang sanggol na si San Juan Bautista ay gumalaw sa tuwa sa loob ng sinapupunan ng kanyang inang si Elisabet sa Ebanghelyo ay inilarawan rin sa mga Pagbasa para sa Linggong ito. Sa Unang Pagbasa, inihayag ng Panginoong Diyos na magmumula sa bayan ng Betlehem ang isang haring isisilang ng babae (Mikas 5, 3). Sa Ikalawang Pagbasa, ipinakilala kung sino ang Sanggol na ito - si Hesus. Si Hesus na dumating sa mundong ito upang tupdin ang kalooban ng Ama. Ang ipinangakong Haring ipinagkaloob ng Diyos sa Kanyang bayan ay walang iba kundi si Hesus, ang Sanggol na dinala ng Mahal na Birheng Maria sa kanyang sinapupunan sa loob ng siyam na buwan.

Kaunting araw na lamang ang natitira bago sumapit ang Pasko ng Pagsilang ni Hesus. Ang tanong para sa atin sa araw na ito - nagagalak ba tayo sa Kanyang pagdating katulad ni San Juan Bautista? Pinananabikan ba talaga natin ang pagdating ng Panginoong Hesus? 

HINDI MAGTATAPOS ANG LAHAT SA KABIGUAN

18 Disyembre 2021 

Simbang Gabi/Misa de Gallo - Ikatlong Araw 

Jeremias 23, 5-8/Salmo 71/Mateo 1, 18-24 

Kabiguan ang naranasan ni San Jose sa unang bahagi ng Ebanghelyo. Nabalitaan niyang nagdadalantao ang Mahal na Birheng Maria nang hindi pa nag-aasawa. Labis na nasaktan si San Jose sa balitang ito sapagkat tunay niyang minahal ang Mahal na Birheng Maria. Balak pa nga niyang pakasalan ang Mahal na Inang si Maria. Nais niyang makasama habambuhay ang Mahal na Birheng Maria bilang magkabiyak ng puso. Subalit, tila gumuho ang lahat ng hangarin at pangarap ni San Jose dahil sa pagdadalantao ni Maria nang hindi pa sila kasal. 

Tiyak na may mga pagkakataon kung saan iniisip nating hindi nakaranas ng kabiguan ang lahat ng mga banal noong namumuhay pa sila dito sa daigdig. Ang totoo niyan, ang lahat ng mga banal ay hindi nakatakas o nakaligtas mula sa kabiguan noong namumuhay pa sila dito sa mundo. Isang halimbawa nito ay walang iba kundi si San Jose. Batid nila kung gaano kasakit ang kabiguan sa buhay dito sa mundo. 

Ang lahat ng mga banal ay nakaranas ng kabiguan noong namumuhay pa sila sa mundong ito, katulad natin. Subalit, hindi sila nawalan ng pag-asa sa Diyos. Ito ang aral na nais ituro sa atin sa mga Pagbasa, lalo na sa ikawalang bahagi ng Ebanghelyo para sa araw na ito. Ang bawat isa sa atin ay hindi dapat mawalan ng pag-asa sa Diyos. Hindi magtatapos ang lahat ng bagay sa kabiguan. Mayroong pag-asa dahil sa Diyos. Ang Diyos ay laging nagbibigay ng pag-asa sa atin. Sa kabila ng lahat ng mga hirap, pagsubok, at kabiguan sa buhay dito sa mundo, mayroon pa ring pag-asa dahil ipinagkakaloob ito sa atin ng Diyos. 

Sa Unang Pagbasa, ang Diyos ay nagbigay ng pag-asa sa Kanyang bayan sa pamamagitan ng pagbibitiw ng isang pangako. Ipinangako ng Diyos na Kaniyang pasisibulin "mula sa lahi ni David ang isang sangang matuwid, isang hari na buong karunungang maghahari" (Jeremias 23, 5). Sa Ebanghelyo, ang Diyos ay nagbigay ng pag-asa kay San Jose sa pamamagitan ng balita ng anghel na nagpakita sa kanyang panaginip. Mayroong papel na ibinigay ang Diyos kay San Jose. Si San Jose ay binigyan Niya ng pag-asang maging bahagi ng Kanyang plano. Hinilom ng Diyos ang sakit sa puso ni San Jose dulot ng kabiguan sa pamamagitan nito.

Ipinapaalala sa atin ng Simbahan sa araw na ito na hindi magtatapos ang lahat sa kabiguan. Habang patuloy tayong namumuhay dito sa mundo, mayroong pag-asa. Ang dahilan kung bakit mayroon pa ring pag-asa sa kabila ng mga kabiguan, pagsubok, sakit, at hirap dito sa mundo ay walang iba kundi ang Panginoon. Huwag tayong mawalan ng pag-asa sa Kanya sapagkat sa Kanya nagmumula ang ating pag-asa. Siya ang ating pag-asa. 

ISANG PAALALA BAGO SUMAPIT ANG PASKO

17 Disyembre 2021 

Simbang Gabi/Misa de Gallo - Ikalawang Araw 

Genesis 49, 2. 8-10/Salmo 71/Mateo 1, 1-17 

Simula sa araw na ito, ika-17 ng Disyembre, ang mga tampok na salaysay sa Ebanghelyo sa mga Misa ay tungkol sa mga kaganapang kaugnay ng salaysay ng Pagsilang ng Panginoong Hesus. Habang papalapit nang palapit ang pagdiriwang ng Pasko ng Pagsilang ni Hesus na ipagdiriwang sa ika-25 ng Disyembre, marapat lamang na pagnilayan ang mga kaganapang nangyari bago Siya ipanganak ng Mahal na Inang si Maria sa isang sabsaban sa bayan ng Betlehem. Pagninilayan ng Simbahan ang mga kaganapang ito mula ngayon hanggang sa pinakahuling araw ng panahon ng Adbiyento, ang ika-24 ng Disyembre.

Katunayan, maituturing na isang buod ng mga kaganapang nangyari bago isilang si Hesus ang isinalaysay sa Ebanghelyo para sa araw na ito. Ang talaan ng angkang kinabilangan ni Hesus ay inilahad sa Ebanghelyo para sa araw na ito. Ito rin ang binigyan ng pansin ni Jacob sa kanyang pahayag sa kanyang mga anak sa Unang Pagbasa. Magmmula sa lahi ni Juda ang tunay na Hari (Genesis 49, 10). Ang tunay na Hari na walang iba kundi si Kristo Hesus ay nagmula sa lipi ni Haring David at lahi ni Abraham. Sina Abraham, Isaac, Jacob, at Haring David ay ilan lamang sa mga naging ninuno ng Panginoong Hesus. 

Ano naman ang aral na nais ituro sa atin ng mga Pagbasa para sa araw na ito? Ang Diyos ay naging tao katulad natin, maliban sa kasalanan, sa pamamagitan ni Kristo Hesus. Tiyak na hindi na mabilang kung ilang ulit natin itong narinig. Subalit, mahalagang matutunan natin uli ang aral na ito, lalung-lalo na't papalapit na ang maringal na pagdiriwang ng Pasko ng Pagsilang. Ang dahilan kung bakit ipinagdiriwang ang Pasko ng Pagsilang ay walang iba kundi ang pasiya ng Diyos na dumating sa sanlibutan bilang Panginoon at Tagapagligtas ng tanan sa pamamagitan ng Kanyang Bugtong na Anak na si Kristo. 

Paulit-ulit na ipinapaalala sa atin ng Simbahan ang dahilan kung bakit ipinagdiriwang nang buong galak ang Dakilang Kapistahan ng Pasko ng Pagsilang ng Panginoon. Ang dahilan ay walang iba kundi si Kristo. Sa pamamagitan ni Kristo, dumating ang Diyos sa daigdig na ito upang iligtas ang sangkatauhan. Ito ang dapat nating tandaan habang papalapit nang palapit ang maringal na pagdiriwang ng Pasko ng Pagsilang ni Kristo. 

ANG PAGSILANG NG TAGAPAGLIGTAS

16 Disyembre 2021 

Simbang Gabi/Misa de Gallo - Unang Araw 

Isaias 56, 1-3a. 6-8/Salmo 66/Juan 5, 33-36 

[Larawan mula sa ABS-CBN News]

Napakahalaga para sa mga Katolikong Pilipino ang gabi ng ika-15 ng Disyembre at ang madaling-araw ng ika-16 ng Disyembre. Sa gabi ng ika-15 ng Disyembre at sa madaling-araw ng ika-16 ng Disyembre, sinisimulan ang napakagandang tradisyon at pagdiriwang ng Simbang Gabi. Lalo nating pinag-iigting ang ating paghahanda ng sarili para sa maringal na pagdiriwang ng Pasko ng Pagsilang ng ating Panginoong Hesukristo sa pamamagitan ng tradisyong ito na tinatawag nating Simbang Gabi. Sa loob ng tradisyunal na Nobenaryong ito bilang paghahanda para sa Dakilang Kapistahan ng Pasko ng Pagsilang ng Panginoon, kasama natin ang Mahal na Birheng Maria, ang ating Mahal na Ina, at si San Jose. 

Sa unang araw ng tradisyunal na Simbang Gabi, ipinapaalala sa atin ng mga Pagbasa ang dahilan kung bakit nating pinaghahandaan ang pagdating ni Kristo Hesus sa pamamagitan ng pagdaos ng Nobenaryong ito sa karangalan ng ating Mahal na Inang si Maria. Sabi ni Hesus sa Ebanghelyo na ang Kanyang mga gawa ang nagpapatotoo na Siya'y tunay ngang isinugo ng Ama. Ipinagawa sa Kanya ng Ama ang lahat ng Kanyang mga gawa sa Kanyang ministeryo (Juan 5, 36). Sa pamamagitan ng mga gawang ito, tinupad ng Panginoong Hesus ang pangakong binitiwan ng Diyos sa Kanyang bayang Israel sa Unang Pagbasa. Iyan ang pangunahing dahilan kung bakit idinadaos ang Simbang Gabi. Pinaghahandaan natin nang buong sigla ang pagsilang ni Hesus. 

Dumating si Hesus upang iligtas ang lahat. Iyan ang layunin ng Simbang Gabi. Ang bawat isa sa atin ay tinutulungan ng Simbang Gabi upang paghandaan natin ang ating mga sarili para sa Pasko ng Pagsilang ng ating Panginoon at Tagapagligtas na si Hesus.