DAHIL SA KABUTIHAN NG DIYOS

7 Hulyo 2023 

Biyernes ng Ika-13 Linggo sa Karaniwang Panahon (I) 

Genesis 23, 1-4. 19; 24, 1-8. 62-67/Salmo 103/Mateo 9, 9-13 

This faithful photographic reproduction of the painting (c. 1620) Calling of St Matthew by Bernardo Strozzi (1581–1644), as well as the actual work of art itself from the Worcester Art Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This work is in the public domain in the United States because it was published (or registered with the U.S. Copyright Office) before January 1, 1928. 

Ang Banal na Ebanghelyo para sa araw na ito ng Biyernes na inilaan para sa taimtim na debosyon at pamamanata sa Panginoon, ang Nuestro Padre Jesus Nazareno, ay tungkol sa Kanyang pagtawag sa isa sa mga naging Kanyang mga apostol na walang iba kundi si Apostol San Mateo. Bagamat ang mga maniningil ng buwis o publikano katulad na lamang ni Apostol San Mateo ay kinamuhian ng maraming mga Israelita noong kapanahunang yaon dahil sa kanilang paningin ay tinalikuran, ipinagkanulo, at ibinenta nila ang bayang Israel kapalit ng salapi mula sa imperyo ng Roma, ipinasiya pa rin ng Panginoong Jesus Nazareno na tawagin at hirangin si Apostol San Mateo upang maging kabilang sa Kanyang mga alagad. Mula sa pagiging isang maniningil ng buwis o publikano, si Apostol San Mateo ay naging isang tapat na apostol ng Poong Jesus Nazareno na naging Kanya ring saksi hanggang sa kanyang kamatayan bilang martir. Dahil sa pagkakataong ibinigay sa kanya ng Mahal na Poong Jesus Nazareno, tunay ngang nagbago ang buhay ni Apostol San Mateo. 

Itinampok ang kaganapang isinalaysay sa Ebanghelyo para sa araw na ito sapagkat nais ng Simbahan na muling bigyan ng pansin at pagnilayan ang kabutihan ng Diyos. Ang kabutihan ng Diyos ay tunay at totoo. Hindi ito isang kathang-isip, palaisipan, o guni-guni. Oo, tiyak na maraming ulit na nating naririnig mula sa Simbahan na ang kabutihan ng Diyos ay tunay at totoo, subalit, hindi sapat ang mga paalalang ito na lagi nating naririnig mula sa Simbahan upang mailarawan at maunawaan natin bilang mga tao dito sa mundong ito ang misteryo at katotohanang ito. Ito ang katotohanan tungkol sa Diyos. Tunay ngang mabuti ang Panginoon. Ang katotohanang ito ay hindi dapat limutin ninuman kailanman. 

Kabutihan ng Diyos ang dahilan kung bakit naging matagumpay ang paghahanap ng isang asawa para kay Isaac sa Unang Pagbasa. Dahil sa Kanyang kabutihan, isang anghel mula sa langit ang Kanyang isinugo sa pinakamatandang katiwala ni Abraham upang tulungan siya sa paghahanap ng mapapangasawa ni Isaac. Ito rin mismo ang dahilan kung bakit tinawag ng Mahal na Poong Jesus Nazareno si Apostol San Mateo sa Ebanghelyo. Gaya ng sabi sa Salmong Tugunan para sa araw na ito: "Pasalamat tayo sa D'yos, kabutihan Niya'y lubos" (Salmo 105, 1a). Ito rin ang mensahe at aral na nais iparating ng Mahal na Poong Jesus Nazareno nang Kanyang sabihin sa wakas ng Ebanghelyo para sa araw na ito ng Biyernes: "Naparito Ako upang hanapin ang mga makasalanan, hindi ang mga banal" (Mateo 9, 13). Ang dakilang patunay nito ay ang Banal na Krus na Kanyang pinasan at pinagpakuan at ang muli Niyang Pagkabuhay. 

Pinapatunayan ng lahat ng mga kahanga-hangang bagay na ginawa ng Diyos mula noon hanggang sa kasalukuyan ang Kanyang walang hanggang kabutihan. Dahil sa kabutihan ng Panginoong Diyos, ipinasiya Niyang ipinakita sa atin ang Kanyang pag-ibig, kagandahang-loob, habag, at awa sa atin. Ang pinakadakilang patunay nito ay walang iba kundi ang Mahal na Poong Jesus Nazareno. 

KAKAIBANG PAMAMARAAN NG PAGPAPATOTOO TUNGKOL SA WALANG HANGGANG PAG-IBIG NG DIYOS

2 Hulyo 2023 

Ika-13 Linggo sa Karaniwang Panahon (A) 

2 Hari 4, 8-11. 14-16a/Salmo 88/Roma 6, 3-4. 8-11/Mateo 10, 37-42 

Screenshot: #QuiapoChurch 12:15 PM #OnlineMass • 24 June 2023 Solemnity of the Nativity of #SaintJohnTheBaptist (Quiapo Church Facebook Live and YouTube)

"Pag-ibig Mong walang maliw ay lagi kong sasambitin" (Salmo 88, 2a). Nakasentro sa mga salitang ito sa Salmong Tugunan para sa Linggong ito ang mga Pagbasa para sa liturhikal na pagdiriwang sa Linggong ito. Subalit, isang kakaibang uri ng pagsambit at pagpapatotoo tungkol sa walang hanggang pag-ibig ng Panginoong Diyos ang nais bigyan ng pansin at pagnilayan ng Simbahan sa Linggong ito. Ang mga Pagbasa para sa Banal na Misa sa Linggong ito ay makakatulong sa pagninilay tungkol sa nasabing uri ng pagpapatotoo tungkol sa pag-ibig ng Diyos na walang hanggan. 

Sa unang bahagi ng Ebanghelyo, inihayag ng Mahal na Poong Jesus Nazareno sa mga apostol na hindi maaaring maging Kanyang tagasunod yaong mga hindi umiibig sa Kanya nang higit sa kanilang mga magulang at mga anak, hindi nagpapasan ng mga sariling krus at sumusunod sa Kanya, at ang mga naniniwalang mas mahalaga ang buhay sa mundong ito kahit na pansamantala lamang ito. Isinalungguhit ng Poong Jesus Nazareno sa pamamagitan ng mga salitang ito ang kahalagahan ng paglimot at pagtalikod sa sarili. Para sa Panginoong Jesus Nazareno, ito ang unang hakbang na kailangang tahakin ng mga naghahangad na maging Kanyang mga tagasunod. Hindi Niya sinasabing walang saysay ang buhay sa mundong ito at mga pamilya. Bagkus, sinasabi Niya na hindi sa mga bagay sa mundong ito na pansamantala lamang at mawawala rin na parang bula lamang pagdating ng takdang panahon nakatuon ang pansin ng mga nagnanais maging Kanyang mga tagasunod at lingkod kundi sa mga bagay na nauukol sa langit. Matatamasa lamang natin ito kung handa tayong isuko at ihahandog ang ating buong sarili sa Panginoon. 

Nakasentro sa puntong isinalungguhit ni Kristo, ang Panginoong Jesus Nazareno, sa unang bahagi ng Ebanghelyo para sa Linggong ito ang pangaral ni Apostol San Pablo sa Ikalawang Pagbasa. Inilarawan ni Apostol San Pablo sa pangaral niyang ito kung bakit ang unang hakbang ng pagiging tagasunod at lingkod ng Nazarenong si Kristo Hesus na ating Panginoon at Manunubos ay ang paglimot sa sarili. Kapag ang mga bagay na nauukol sa ating mga sarili ay ating tinalikuran at nilimot, tinatanggap natin ang tunay nating pagkakilanlan at misyon na inilaan mismo ng Poong Jesus Nazareno para sa atin noon pa man. Hindi tayo para sa mundong ito kundi tayong lahat ay para kay Kristo, ang minamahal na Nuestro Padre Jesus Nazareno, na nagligtas sa ating lahat sa pamamagitan ng Krus na Banal at Muling Pagkabuhay. 

Kapag tinanggap natin ang bago nating pagkakilanlan at misyon bilang mga tapat na tagasunod at lingkod ng Panginoong Hesukristo, ang Nazareno, tayo'y magiging mga daluyan ng Kanyang biyaya, pag-ibig, kagandahang-loob, habag at awa sa lahat, gaya ni Propeta Eliseo sa Unang Pagbasa. Sa Unang Pagbasa, tinanggap ng isang mag-asawa si Propeta Eliseo. Dahil sa kanilang pagtanggap kay Propeta Eliseo, biniyayaan sila ng Diyos. Katunayan, inihayag mismo ni Propeta Eliseo sa wakas ng salaysay sa Unang Pagbasa ang biyayang ipagkakaloob ng Panginoong Diyos sa mag-asawang ito - magkakaroon sila ng anak (2 Hari 4, 16a). Ang puntong ito ay isinalungguhit ni Jesus Nazareno sa ikalawa't huling bahagi ng Ebanghelyo. Bilang mga tagasunod at lingkod ng Panginoon, magiging daluyan tayo ng Kanyang biyaya, habag, at awa. Sa pamamagitan nito, ipinapalaganap natin ang biyaya, habag, at awa ng Diyos. Dapat muna nating tanggapin ang tunay na pagkakilanlan at misyong bigay ng Diyos sa atin bago maisakatuparan ang Kanyang kaloobang ito para sa atin.  

Ang paglimot at pagtalikod sa sarili ay isa ngang kakaibang pamamaraan o uri ng pagpapatotoo tungkol sa walang hanggang biyaya, pag-ibig, habag, at awa ng Diyos. Subalit, ito ang dapat nating gawin upang makapagpatotoo tayo tungkol sa walang hanggang biyaya, pag-ibig, kagandahang-loob, habag, at awa ng Panginoon. Kapag ipinasiya nating talikuran at limutin ang ating mga sarili, tinatanggap natin nang buong puso ang bagong pagkakilanlan at misyong inilaan para sa atin ng Panginoong Jesus Nazareno. Sa pamamagitan nito, tayo ay nagiging Kanyang mga salamin at mga daluyan ng Kanyang dakilang pagmamahal, kagandahang-loob, awa, habag, at biyayang walang hanggan. 

Upang maging taos-puso at bukal sa ating kalooban ang ating pagpapatotoo tungkol sa walang hanggang pag-ibig, awa, habag, kagandahang-loob, at biyaya ng Diyos, kailangan nating talikdan at limutin ang ating mga sarili, lalung-lalo na ang ating mga makasalanang gawain at pamumuhay. Kapag ito ang ating ginawa, magiging mga daluyan ng Kanyang walang hanggang pag-ibig, kagandahang-loob, awa, habag, at biyaya ng Diyos ang bawat isa sa atin. Ito ang uri ng pagpapatotoong nais makita ng Panginoong Diyos mula sa atin. 

ANG PUMUPUKAW SA KANYA NA KUMILOS

30 Hunyo 2023 

Biyernes ng Ika-12 Linggo sa Karaniwang Panahon (I) 

Paggunita sa Mga Unang Martir ng Banal na Sambayanan ng Diyos sa Roma 

Genesis 17, 1. 9-10. 15-22/Salmo 127/Mateo 8, 1-4 

Screenshot: #QuiapoChurch OFFICIAL 10AM #OnlineMass • 23 June 2023 • Friday of the 11th Week in Ordinary Time (Quiapo Church Facebook Live and YouTube)

"Ibig Ko, gumaling ka" (Mateo 8, 3). Ang mga salitang ito ay binigkas ng Panginoon, ang Nuestro Padre Jesus Nazareno, sa ketonging buong kababaang-loob na lumapit sa Kanya upang manikluhod sa Kanya na pagalingin siya sa Ebanghelyo para sa araw na ito. Napakalinaw kung ano ang nais iparating ng Mahal na Poong Jesus Nazareno, hindi lamang sa ketonging Kaniyang pinagaling sa Banal na Ebanghelyo, kundi pati na rin sa lahat ng mga taong nakakasaksi sa nasabing himala at maging sa maraming makikinig ng salaysay na ito mula sa Simbahan. Ang Panginoong Jesus Nazareno ay puspos ng habag at awa para sa lahat. 

Habag at awa ang pumukaw sa Poong Jesus Nazareno na pagalingin ang ketonging lumapit at nanikluhod sa Kaniya nang buong kababaang-loob at pananalig sa Banal na Ebanghelyo. Sa halip na pagkaitan ng habag at awa ang nasabing ketongin upang mabilis Niyang mailayo ang Kanyang sarili, ipinasiya Niya itong ipakita. Hindi umiwas o tumakbo ang Poong Jesus Nazareno mula sa ketonging ito. Bagkus, ipinasiya ng Poong Jesus Nazareno na ipagkaloob sa ketonging ito ang Kanyang biyaya, habag, at kagandahang-loob na nagdudulot ng kagalingan. Kahit iniwasan ng marami noong panahong yaon ang ketonging ito at ang iba pang mga ketonging katulad niya, hindi inilayo ng Poong Jesus Nazareno ang Kanyang sarili mula sa ketongin at pati rin mula sa mga kapwa niyang ketongin. 

Ang habag at awa ng Diyos ay hindi isang panibagong konsepto. Hindi ito ipinakilala sa lahat sa kauna-unahang pagkakataon sa pamamagitan ni Kristo, ang Panginoong Jesus Nazareno. Noon pa man, naipahayag na ng Diyos sa pamamagitan ng Kanyang mga salita at mga kahanga-hangang gawa ang Kanyang habag at awa. Maraming ulit itong ginawa ng Diyos. Isa lamang sa napakaraming mga pagkakataong ipinasiya ng Diyos na ipakita ang Kanyang habag at awa sa lahat ng tao ay sa mismong salaysay ng kaganapang inilahad at itinampok sa Unang Pagbasa. Ipinasiya ng Panginoon na gumawa ng tipan sa pagitan Niya at ni Abram na mas kilala ngayon ng nakakarami bilang si Abraham sa Unang Pagbasa dahil sa Kanyang habag at awa. 

Subalit, sa lahat ng mga kahanga-hangang gawa ng Diyos para sa sangkatauhan, walang makahihigit o maakapantay sa Kanyang pinakadakilang gawa na walang iba kundi ang pagligtas sa sangkatauhan sa pamamagitan ng Poong Jesus Nazareno. Gaya ng inilalarawan ng bawat imahen o larawan ni Kristo sa ilalim ng Kaniyang titulo na itinatampok at pinagninilayan tuwing sasapit ang araw ng Biyernes, ang titulong Poong Jesus Nazareno, habag at awa ang pumukaw at umudyok sa Diyos na iligtas tayong lahat mula sa kasalanan at kamatayan. Ito ang dahilan kung bakit buong puso ang naging pasiya ng Poong Senor na si Jesus Nazareno na harapin ang Kaniyang Misteryo Paskwal na sinasagisag ng Banal na Krus na Kanyang pinasan. Ipinasiya itong gawin ng Mahal na Poong Jesus Nazareno para sa atin dahil sa Kanyang walang hangang habag at awa para sa atin. 

Bilang mga deboto at mananampalataya, ano ang dapat nating gawin? Tularan ang halimbawang ipinakita ng Mahal na Poong Jesus Nazareno. Sundin ang kalooban ng Diyos. Ibahagi sa kapwa ang habag at awa ng Diyos. Maging mga tagapagpalaganap at mga daluyan ng habag at awa ng Panginoong Diyos. Huwag natin itong ipagkait o ipagdamot sa kapwa. Tandaan, hindi ipinagkait o ipinagdamot sa atin ng Poong Jesus Nazareno ang Kanyang habag at awa sa atin. Kaya naman, walang karapatan ang sinuman sa atin na ipagkait sa ating kapwa ang habag at awa ng Mahal na Poon. Sa halip na ipagkait ang habag at awa ng Poon, dapat natin itong ipalaganap at ibahagi dahil ito ay para sa lahat. 

Dahil sa Kanyang habag at awa, ang Mahal na Poong Jesus Nazareno ay patuloy na gumagawa ng maraming mga kahanga-hangang bagay para sa ating ikabubuti. Sa pamamagitan nito, pinapatunayan ng Poong Jesus Nazareno na walang maliw ang Kanyang habag at awa para sa atin. Hindi Niya tayo sinusukuan habang tayong lahat ay patuloy na namumuhay at naglalakbay dito sa mundo. Para sa lahat ang Kanyang habag at awa. Bilang mga deboto at mananampalataya, dapat nating ipalaganap at ibahagi ang habag at awa ng Panginoong Jesus Nazareno sa kapwa, lalung-lalo na sa mga kapus-palad. 

WALANG MAKAKAPAGPABAGSAK SA TUNAY NA SIMBAHAN

29 Hunyo 2023 

Dakilang Kapistahan nina Apostol San Pedro at San Pablo 

[Pagmimisa sa Araw ng Dakilang Kapistahan] 

Mga Gawa 12, 1-11/Salmo 33/2 Timoteo 4, 6-8. 17-18/Mateo 16, 13-19 

This faithful photographic reproduction of the painting (c. 15th century) San Pedro y San Pablo by Master of San Ildefonso (fl. 1475–1500), as well as the actual work of art itself from the National Sculpture Museum, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Hindi mananaig laban sa Simbahan "kahit ang kapangyarihan ng kamatayan" (Mateo 16, 18). Sa mga salitang ito na binigkas ni Kristo, ang Nuestro Padre Jesus Nazareno, noong Kanyang hinirang at inatasan si Apostol San Pedro upang maging unang Santo Papa ng Kanyang Simbahan sa Banal na Ebanghelyo para sa araw na ito nakasentro ang maringal na pagdiriwang ng Simbahan sa araw na ito. Ang araw na ito ay inilaan upang magpasalamat sa Mahal na Poon para sa biyaya ng kabanalan, kagitingan, at katapatan ng dalawang dakilang Santo ng Simbahan na sina Apostol San Pedro at San Pablo na itinuturing ng Simbahan bilang mga haligi nito. 

Ang mga Pagbasa para sa araw na ito ay nakasentro sa hindi pagpapabaya ng Diyos sa tunay na Simbahan. Lagi Niyang sinasamahan at pinapatnubayan ang Simbahang itinatag ni Kristo sa ibabaw ng batong si Apostol San Pedro. Patunay lamang ang unang Santo Papa ng Simbahan na si Apostol San Pedro at ang dakilang apostol at misyonero sa mga Hentil na si Apostol San Pablo ng palagiang pagkupkop at pagkalinga ng Panginoong Diyos sa tunay na Simbahan ni Kristo. Sa pamamagitan ng dalawang dakilang apostol na ito at ang iba pang mga apostol at misyonero at pati na rin ang mga sumunod sa kanila sa mga sumunod na salinlahi, pinatunayan ng Poong Jesus Nazareno na hindi Niya pinabayaan kailanman ang Kanyang Simbahan. Pati sa kasalukuyang panahon, patuloy na sinasamahan, kinukupkop, at kinakalinga ni Jesus Nazareno ang Kanyang Simbahan. 

Nakasentro sa mga pagsubok na hinarap, tiniis, at dinanas ng dalawang apostol na walang iba kundi sina Apostol San Pedro at San Pablo ang mga salaysay sa Unang Pagbasa at Ikalawang Pagbasa para sa araw na ito. Sa Unang Pagbasa, isinalaysay kung paanong ipinadala ng Panginoong Diyos ang isa sa Kanyang mga anghel upang iligtas at itakas si Apostol San Pedro na noon ay nasa bilangguan mula sa kamatayan sa kamay ni Haring Herodes na nagpapugot sa ulo ni Apostol Santo Santiago Mayor. Gayon din ang nais ipahiwatig at ilarawan ni Apostol San Pablo sa kanyang patotoo kay San Timoteo sa Ikalawang Pagbasa para sa araw na ito na inilaan sa karangalan nilang dalawa ni Apostol San Pedro. Ang kaniyang buhay bilang isang apostol at misyonero ng Mahal na Poong Jesus Nazareno ay hindi naging madali para sa kanya dahil marami siyang hinarap, tiniis, at dinanas na pagsubok at pag-uusig sa buhay. Subalit, sa kabila nito, gaya ni Apostol San Pedro, ipinasiya ni Apostol San Pablo na manatiling matatag at matapat sa Panginoon hanggang sa huli. Pinatotohanan ng dalawang dakilang santong ito ng Simbahan na sina Apostol San Pedro at San Pablo sa pamamagitan ng pasiya nilang ito ang mga salita sa Salmong Tugunan para sa maringal na pagdiriwang sa araw na ito: "Ang D'yos ang Siyang nagligtas sa aking takot at sindak" (Salmo 33, 5). Isa lamang ang ibig sabihin nito: ang Diyos ay hindi pabaya. Lagi Niyang sinasamahan at kinakalinga ang Simbahan.

Ipinapaalala sa atin sa Dakilang Kapistahang ipinagdiriwang sa araw na ito na walang makakapagbagsak at makakapanaig laban sa tunay na Simbahan dahil sa biyaya ng Diyos. Lumipas man ang maraming panahon at salinlahi, nanatili pa ring matatag ang tunay na Simbahan. Patunay lamang nito na tapat ang Diyos sa Simbahan sa hirap at ginhawa. Hindi Niya pababayaan ang Simbahan kailanman. Ang dalawang dakilang santong kinikilala bilang mga haligi ng Simbahan na sina Apostol San Pedro at San Pablo at pati na rin ang kanilang mga kasama sa kasamahan ng mga banal sa langit ay ang mga patunay nito. 

Bilang mga deboto at mananampalatayang Katolikong bumubuo sa tunay at nag-iisang Simbahang itinatag ng Panginoong Jesus Nazareno, tunay nga tayong mapalad dahil hindi tayo pinababayaan ng Mahal na Poon. Lagi tayong sasamahan, iingatan, tutulungan, at ipagsasanggalang. Ang dalawang dakilang santo ng Simbahan na sina Apostol San Pedro at San Pablo at ang iba pang mga kasama nila sa kasamahan ng mga banal sa langit ay ang patunay nito.

MAHAL MO BA SI JESUS NAZARENO?

28 Hunyo 2023 

Dakilang Kapistahan nina Apostol San Pedro at San Pablo 

[Pagmimisa sa Bisperas] 

Mga Gawa 3, 1-10/Salmo 18/Galacia 1, 11-20/Juan 21, 15-19 

This faithful photographic reproduction of the painting (c. 1616) Christ's Charge to Peter by Peter Paul Rubens (1577–1640), as well as the actual work of art itself from The Wallace Collection in London, is in the Public Domain ("No Copyright") in its country of origin as well as in other countries and areas, including the United States of America, where the copyright term is the author's life plus 100 years or fewer due to its age.

Binigkas ng yumaong dating Santo Papa na si Papa Benito XVI ang mga salitang ito sa mga huling sandali ng kanyang buhay sa mundong ito: "Hesus, iniibig Kita." Pag-ibig na tunay ngang dalisay at tapat para kay Kristo, ang Panginoong Jesus Nazareno, ay ang ipinasiyang ipahayag ni Papa Benito XVI gamit ang kanyang natitirang lakas at hininga sa mga nalalabing sandali ng kanyang buhay at paglalakbay sa mundong ito na pansamantala lamang. Bago magwakas ang kanyang buhay at paglalakbay dito sa mundong ito, hindi nag-atubili si Papa Benito XVI na ipahayag ang kanyang tapat na pag-ibig, pagsamba, at pamamanata sa Mahal na Poong Jesus Nazareno. 

Nakatuon sa tema ng tapat at dalisay na pag-ibig para kay Kristo ang mga Pagbasa para sa Bisperas ng Dakilang Kapistahan nina Apostol San Pedro at San Pablo. Pag-ibig para sa Simbahan ay ang dahilan kung bakit inatasan ng Poong Jesus Nazareno si Apostol San Pedro upang maging unang Santo Papa nito at si Apostol San Pablo upang maging Kanyang apostol at misyonero sa mga Hentil. Ang kanilang tugon sa ginawang paghirang sa kanila ng Mahal na Poong Jesus Nazareno ay katulad rin ng tugon ng iba pang mga apostol at banal - pagsunod sa Kanyang kalooban. Kusang-loob at buong kababaang-loob nilang tinupad ang misyon at tungkuling ibinigay sa kanila ni Jesus Nazareno upang maipahayag nila sa pamamagitan nito ang tapat at dalisay nilang pag-ibig, pananalig, at pagsamba sa Kanya. 

Tampok sa Ebanghelyo para sa araw na ito ang tatlong ulit na pagpapahayag ng pag-ibig ni Apostol San Pedro sa Nuestro Padre Jesus Nazareno. Bukod sa tatlong ulit na pagtatanong ng Panginoong Jesus Nazareno kay Apostol San Pedro at ang tatlong ulit na pagpapahayag ng pag-ibig ni Apostol San Pedro, tatlong ulit ring inutusan ni Jesus Nazareno si Apostol San Pedro na pakainin ang Kanyang kawan sa mundo na walang iba kundi ang Simbahan. Sa Unang Pagbasa, tinupad ni Apostol San Pedro ang utos at habiling ito ng Poong Jesus Nazareno. Naging isang daluyan ng pag-ibig ng Mahal na Poong Jesus Nazareno sa pamamagitan ng paghatid niya ng mabuting biyayang ito sa isang lalaking isinilang na lumpo. Ang makapangyarihang pag-ibig ng Mahal na Poong Jesus Nazareno na nagdudulot ng kagalingan ay kanyang inihatid sa lalaking ito na isinilang na lumpo. Tunay ngang nahihigit ang biyayang ito kaysa sa ginto, pilak, o anumang pilak at kayamanan sa mundo. Ito rin ang ginawa ni Apostol San Pablo na kanyang inilarawan sa Ikalawang Pagbasa. Bagamat marami siyang mga inusig na Kristiyano noong una, hinirang siya ng Poong Jesus Nazareno upang ipangaral sa mga Hentil ang Mabuting Balita. Sa pamamagitan nito, ipinalaganap ni Apostol San Pablo ang biyaya ng pag-ibig at kagandahang-loob ng Panginoong Diyos na nagdudulot ng kaligtasan at bagong buhay. Iyon ang kaniyang tugon sa ginawang pagpapakita ng Diyos ng Kanyang pag-ibig at kagandahang-loob. 

Iniibig ba natin si Jesus Nazareno? Sundin natin ang Kanyang kalooban. Maaaring mayroong mga pagkakaiba sa mga spesipikong pamamaraan, subalit ang Kaniyang kalooban para sa atin ay iisa lamang. Ang Kaniyang kalooban para sa atin ay ihatid sa tanan ang Kanyang pag-ibig at kagandahang-loob. Kung paanong hindi ipinagkait sa atin ng Panginoong Jesus Nazareno ang biyayang ito, gayon din naman, huwag rin nating ipagkait o ipagdamot ito sa iba. Bagkus, dapat natin itong ipalaganap. Tayong lahat ay dapat maging mga daluyan ng awa, pag-ibig, at kagandahang-loob ng Poong Jesus Nazareno para sa ating kapwa. 

Kung magiging daluyan tayo ng pag-ibig, kagandahang-loob, habag, at awa ng Mahal na Poong Jesus Nazareno, ipinapahayag natin ang ating tapat at dalisay na pag-ibig para sa Kanya. 

WALANG MALIW NA TULONG AT SAKLOLO

27 Hunyo 2023 

Kapistahan ng Ina ng Laging Saklolo 

Isaias 7, 10-17/Salmo 71/Pahayag 12, 1-6. 10/Juan 19, 25-27 

Ina ng Laging Saklolo. Ang titulong ito ay ang pangunahing paksang pinagtutuunan ng pansin ng Simbahan sa araw na ito sapagkat ang mismong araw na ito ay inilaan para sa pagdiriwang ng Kapistahan ng Mahal na Inang si Mariang Birhen sa ilalim ng titulong ito. Sa pamamagitan ng titulong ito ng Mahal na Ina, ipinapaalala sa atin ng Simbahan na lagi tayong tinutulungan at sinasaklolohan ng Panginoong Diyos. Dahil dito, kinikilala ng Simbahan ang Mahal na Birheng Maria bilang Ina ng Laging Saklolo. Tayong lahat ay tinutulungan at sinasaklolohan ng Mahal na Inang si Maria dahil ito ang kalooban ng Diyos. 

Hindi tayo tinutulungan at sinasaklolohan ang Mahal na Inang si Mariang Birhen sa pamamagitan ng kanyang mga sariling kakayahan. Naisin man niya itong gawin para sa atin, batid ni Maria na wala siyang magagawa gamit ang sarili niyang kakayahan. Bagkus, ang titulo ni Maria bilang Ina ng Laging Saklolo ay nakaugat at nakaugnay sa tulong at saklolo ng Diyos. Ang titulong "Ina ng Laging Saklolo" ay isang napakalinaw na larawan ng pagiging instrumento ng Diyos ng Mahal na Inang si Mariang Birhen upang maipabot Niya sa atin ang Kanyang tulong at saklolo. 

Ang Mahal na Inang si Mariang Birhen ay kilala natin bilang Ina ng Laging Saklolo dahil nakaugnay at nakaugat ang kanyang pagtulong sa atin sa tulong ng Diyos. Isa siyang daluyan ng pagtulong ng Diyos. Sa pamamagitan niya, ibinubuhos sa atin ng Panginoong Diyos ang Kanyang pagtulong at pagsaklolo sa atin. Ito ang nais bigyan ng pansin sa mga Pagbasa para sa araw na ito na inilaan para sa pagdiriwang ng isang napakahalagang Kapistahan. Ang pahayag ng Panginoong Diyos na inilahad ng Kanyang hinirang na propeta na si Propeta Isaias sa Unang Pagbasa ay nakatuon sa biyaya ng Kanyang tulong, saklolo, at pagliligtas. Sa pamamagitan ng ipinangakong Mesiyas at Manunubos, ang Poong Jesus Nazareno, na isisilang ng isang dalaga na walang iba kundi ang Mahal na Birheng Maria, ililigtas ng Diyos ang sangkatauhan. Tinupad ng Diyos ang pangakong ito pagsapit ng panahong itinakda Niya. Nakasentro rin sa temang ang pangitaing nakita ni Apostol San Juan sa Ikalawang Pagbasa. Ang Mahal na Inang si Mariang Birhen ay daluyan ng pagtulong at pagsaklolo ng Diyos sapagkat siya ang nagsilang sa ipinangakong Mesiyas at Manunubos na walang iba kundi si Jesus Nazareno na maghahati sa lahat ng mga bansa (Pahayag 12, 5). Sa Ebanghelyo, ipinagkatiwala ng Mahal na Poong Jesus Nazareno ang Mahal na Inang si Mariang Birhen at si Apostol San Juan na kumakatawan sa Kanyang Simbahan sa mga sandaling yaon sa pangangalaga ng isa't isa. Tayong lahat ay binigyan ng isa pang dagdag na daluyan ng biyaya, habag, at saklolo ng Panginoong Diyos sa oras na yaon sa pamamagitan ng Mahal na Birheng Maria na ating Ina ng Laging Saklolo. 

Gaya ng nasasaad sa Rito ng Pagbabasbas sa Banal na Misa na pinangungunahan ng mga Obispo: "Ang tumutulong sa atin ay ang Panginoon na may gawa ng langit at lupa" (Salmo 124, 8). Ito ang nais ipaalala sa atin ng titulo ng Mahal na Birheng Maria bilang Ina ng Laging Saklolo. Ang Mahal na Birheng Maria bilang Ina ng Laging Saklolo ay nagpapaalala sa atin na mayroon tayong Diyos na laging handang tumulong at sumaklolo sa atin. Katunayan, hinirang at inatasan siya ng Panginoong Diyos upang tulungan at saklolohan rin tayo. Dahil dito, kinikilala rin natin si Maria bilang Mahal na Ina ng Laging Saklolo. 

Bilang mga Katolikong bumubuo sa tunay at nag-iisang Simbahan na itinatag mismo ni Kristo, ang Poong Jesus Nazareno, tunay nga tayong mapalad sapagkat mayroon tayong Diyos na laging handang tumulong at sumaklolo sa atin. Katunayan, Siya nga mismo ang humihirang at umaatas ng maraming banal na tao upang magsilbing mga paalala ng katotohanang ito. Isa na rito ay ang Birheng Maria, ang Mahal na Ina ng Laging Saklolo. Ang Mahal na Inang si Mariang Birhen ay kinikilala at pinararangalan natin bilang Ina ng Laging Saklolo dahil siya'y niloob ng Diyos na maging daluyan at instrumento ng Kanyang walang maliw na pagtulong at pagsaklolo sa atin. Dahil sa paghirang at pag-atas sa kanya ng Diyos, ang Mahal na Inang si Mariang Birhen ay ating pinararangalan at kinikilala bilang ating Mahal na Ina ng Laging Saklolo. 

ISANG NAPAKAHIRAP NA PASIYA

25 Hunyo 2023

Ika-12 Linggo sa Karaniwang Panahon (A) 

Jeremias 20, 10-13/Salmo 68/Roma 5, 12-15/Mateo 10, 26-33 

This faithful photographic reproduction of the painting (c. 19th century) Triumph of Faith - Christian Martyrs in the Time of Nero by Eugene Thirion, as well as the actual work of art itself, is in the Public Domain ("No Copyright") in its country of origin as well as in other countries and origins where the copyright term is the author's life plus 70 years or fewer due to its age. This is also in the Public Domain in the United States because it was published (or registered with the US Copyright Office) before 1928. 

Hindi biro ang maging tapat na lingkod ng Diyos. Ito ang katotohanang nais bigyan ng pansin, talakayin, at pagnilayan ng mga Pagbasa para sa Linggong ito. Ang pagiging mga tapat na tagasunod at lingkod ni Kristo, ang Nuestro Padre Jesus Nazareno, ay isang napakahirap na gampanin. Napakahirap tahakin ang landas na ito sapagkat ang Poong Jesus Nazareno ay hindi tinatanggap ng marami, pati sa kasalukuyan. Marami ang inuusig dahil ipinasiya nilang maging mga tapat na tagasunod at lingkod ni Jesus Nazareno na nananalig sa Kanya at tumutupad sa Kanyang mga atas at utos nang buong kababaang-loob. Tunay nga itong napakahirap gawin. 

Sa Unang Pagbasa, isinentro ni Propeta Jeremias ang kanyang pahayag sa paksa ng hindi pagtanggap at pag-uusig sa mga propetang hinirang ng Diyos katulad niya sa mga kamay ng nakakarami sa bayang Israel. Bagamat hinirang ng Diyos ang bayang Israel upang maging Kanyang bayan, marami sa mga taong naroroon ang nagpairal ng katigasan ng ulo at puso. Ito ang dahilan kung bakit nila inusig ang mga propetang gaya ni Jeremias noon. Sa halip na dinggin ang kanilang mga pahayag na galing sa Diyos, pinilit pa rin nilang iligpit ang mga katulad ni Propeta Jeremias. Ang temang ito ay tinalakay at pinagtuunan rin ng pansin sa pahayag ng Poong Jesus Nazareno sa Ebanghelyo. Inilarawan ng Nuestro Padre Jesus Nazareno sa Kanyang mga alagad sa tampok na salaysay sa Ebanghelyo para sa Linggong ito ang katotohanan tungkol sa pagiging Kanyang mga apostol, tagasunod, at saksi. Dahil sa kanilang ugnayan kay Jesus Nazareno, uusigin sila ng nakakarami. 

Tunay nga namang napakahirap maging mga apostol, tagasunod, at saksi ng Mahal na Poong Jesus Nazareno. Kahit sa kasalukuyan, napakahirap itong gawin sapagkat hindi pa rin tumitigil ang pag-uusig sa Simbahan. Subalit, paano nanatiling tapat ang mga lingkod na tinawag, pinili, at hinirang ng Diyos? Inilarawan sa Salmong Tugunan, sa Ikalawang Pagbasa, at maging sa Ebanghelyo kung paano sila nanatiling tapat sa Diyos. Nakasentro sa paksa ng pag-asa sa Diyos ang awit sa Salmong Tugunan. Ang kagandahang-loob ng Diyos na naghahatid ng kaligtasan ay ang paksang ipinasiyang bigyan ng pansin ni Apostol San Pedro sa kanyang pangaral sa Ikalawang Pagbasa. Pinalakas ni Jesus Nazareno ang loob ng mga apostol sa Ebanghelyo nang Kanyang ipaalala sa mga apostol kung sino lamang ang dapat katakutan na walang iba kundi ang Diyos. Higit na makapangyarihan ang Panginoong Diyos kaysa sa mga tao. Siya lamang ang makakapagpasiya kung sa langit o impyerno ipapadala ang bawat tao sa wakas ng ating buhay dito sa mundong ito (Ang mga kaluluwang nasa Purgatoryo ay garantisadong papasok sa langit sa katapusan ng paglilinis sa kanila roon). 

Ang tanong para sa atin sa Linggong ito ay laging tinatanong araw-araw. Nais nga ba nating makasama ang Diyos sa langit sa wakas ng ating pamumuhay at paglalakbay sa mundong ito? Ang ating mga gawa habang namumuhay at naglalakbay tayo sa mundong ito ang magiging basehan ng huling hatol ng Panginoong Diyos para sa atin kapag sumapit ang oras ng ating paglisan sa mundo. Lagi Niya tayong binibigyan ng pagkakataong maging banal at tapat sa Kanya upang makasama Siya sa langit sa wakas ng ating buhay sa mundong ito. Kapag namuhay tayo nang banal at tapat sa Diyos, ipinapahayag natin ang pagtanggap natin sa Kanyang biyayang nagliligtas. 

Napakahirap ngang maging mga tapat na apostol, tagasunod, at saksi ng Panginoon at Manunubos nating si Kristo, ang Nuestro Padre Jesus Nazareno. Subalit, gaano mang kahirap gawin ito dahil sa dami ng mga pag-uusig, tiisin, at pagsubok sa buhay, kung tunay natin Siyang iniibig at sinasamba, lagi nating sisikaping maging banal at tapat sa Kanya habang tayo'y nabubuhay sa mundong ito. Nais ng Mahal na Poong Jesus Nazareno na makasama Niya tayo sa maluwalhati Niyang kaharian sa langit sa wakas ng ating buhay sa mundong ito. Pagbigyan nawa natin ang Kanyang hiling. 

Lagi nawa nating piliing maging banal at tapat sa Diyos habang tayo'y nabubuhay at naglalakbay pa dito sa mundo. Ang Kanyang huling hatol sa wakas ng ating buhay sa mundong ito ay kinukumpirma lamang ng ating mga ginawa sa bawat sandali ng ating pansamantalang buhay sa mundong ito. Nais man Niya tayong iligtas mula sa walang hanggang kapahamakan sa impyerno at isama sa Kanyang kaharian sa langit kung saan matatamasa ang buhay na walang hanggan sa Kanyang piling, hindi Niya ito magagawa kung hindi natin ibibigay ang ating pahintulot na nahahayag ng ating pagsisikap na maging banal at tapat sa Kaniya. 

DAKILA ANG MGA BIYAYA NG DIYOS

24 Hunyo 2023 

Dakilang Kapistahan ng Pagsilang ni San Juan Bautista 

[Pagmimisa sa Araw ng Dakilang Kapistahan] 

Isaias 49, 1-6/Salmo 138/Mga Gawa 13, 22-26/Lucas 1, 57-66. 80 

This faithful photographic reproduction of the painting (c. 1600) Saint John the Baptist by Giovanni Baglione (1566–1643), as well as the actual work of art itself from a Private Collection, is in the Public Domain ("No Copyright") in its country of origin as well as in other countries and other areas where the copyright term is the author's life plus 100 years or fewer, including the United States, due to its age. 

Ang Pambungad na Antipona para sa Banal na Misa sa araw na ito na inilaan para sa pagdiriwang ng Dakilang Kapistahan ng Pagsilang ni San Juan Bautista ay isang buod ng kaniyang buhay at misyon sa mundong ito: "Ang Dakilang si San Juan Bautista, sugo ng Poong Maykapal, saksi sa kaliwanagan upang maging handang tunay para kay Kristo ang tanan" (Juan 1, 6-7; Lucas 1, 17). Sa mga salitang ito na maaari nating ituring na isang maikling buod ng kanyang buhay at misyon, inilarawan nang buong linaw ang tanging dahilan kung bakit itinuturing ng Simbahan na dakila si San Juan Bautista. Ito ay walang iba kundi ang kanyang buong kababaang-loob na pagtupad sa misyong ibinigay sa kanya ng Diyos bilang tagapaghanda ng daraanan ng Mesiyas at Tagapagligtas na ipinangako na walang iba kundi ang Panginoong Jesus Nazareno. 

Nakasentro sa pagiging dakila ng mga lingkod ng Diyos katulad ni San Juan Bautista ang mga Pagbasa para sa araw na ito na inilaan para sa maringal na pagdiriwang ng Dakilang Kapistahan ng Pagsilang ni San Juan Bautista. Gaya na lamang ng iba pang mga lingkod ng Panginoong Diyos sa kasaysayan, dakila si San Juan Bautista dahil buong kababaang-loob, katapatan, at pananalig niyang tinupad ang misyong ibinigay sa kanya ng Panginoong Diyos. Inilarawan sa mga Pagbasa para sa araw na ito na inilaan ng Simbahan para sa pagdiriwang ng Dakilang Kapistahan ng Pagsilang ni San Juan Bautista kung bakit napakaespesyal ang mga misyon ng mga hinirang ng Diyos upang maging Kaniyang mga lingkod. Sa Unang Pagbasa, buong lakas at linaw na inihayag na planadong-planado ng Diyos ang lahat. Bago pa isilang sa daigdig ang Kanyang mga lingkod, alam na Niya kung ano ang Kaniyang ipagagawa sa kanila na ganap Niyang hihirangin pagsapit ng panahong Siya rin ang magtatakda. Planadong-planado ng Diyos ang lahat. Sa katotohanang ito nakatuon ang Ikalawang Pagbasa at Ebanghelyo. Sa Ikalawang Pagbasa, binanggit ni Apostol San Pablo ang naging papel at misyon ni San Juan Bautista bilang tagapaghanda ng daraanan ng Mahal na Poong Jesus Nazareno, ang ipinangakong Mesiyas at Manunubos ng tanan. Sa Ebanghelyo, isinalaysay ang pagsilang at pagpapangalan sa anak ng magkabiyak ng pusong sina Zacarias at Elisabet na walang iba kundi "Juan," ang pangalang inihayag ng Arkanghel na si San Gabriel sa ama nitong si Zacarias bago ipinaglihi ang nasabing sanggol. Ang katotohanang ito ay siya ring pinagtuunan ng pansin sa Salmong Tugunan para sa araw na ito. Planadong-planado ang lahat para sa mga lingkod ng Diyos. Alam ng Diyos kung ano ang ipagagawa Niya sa kanila bago pa ito mangyari. 

Ipinapaalala sa atin sa araw na ito na planadong-planado ng Panginoong Diyos ang lahat ng bagay para sa Kaniyang mga lingkod na hinirang. Alam Niya kung ano ang misyong ibibigay Niya sa bawat isa sa atin bago pa man tayo isilang sa mundo. May papel, misyon, at tungkuling nakalaan na para sa atin. Ang mga ito ay inilaan para sa atin ng Diyos. Tayo mismo ang magtutuklas nito at magpapasiya kung tutuparin nga ba natin ito. Nasa mga kamay natin ang pasiya kung tutularan natin ang lahat ng mga dakilang lingkod ng Diyos gaya na lamang ni San Juan Bautista. 

Sa pamamagitan ng pagtupad natin sa misyong ibinibigay sa atin ng Diyos, tayong lahat ay nagiging mga biyaya ng Diyos. Gaya ni San Juan Bautista, naging biyaya siya mula sa Diyos sapagkat tinupad niya ang misyong ibinigay sa kanya ng Panginoong Diyos. Bagamat mayroong mga hindi tumanggap sa kanya gaya ng nagpabilanggo sa kanya na si Haring Herodes at ang asawa ng kapatid niyang si Felipe na kinakasama niya na si Herodias na nagnanais ipapatay siya, biyaya pa rin si San Juan Bautista. Sa pamamagitan ng kaniyang kusang-loob na pasiyang maging isang biyaya ng Diyos na inihayag ng kusang-loob at buong kababaang-loob na pagtupad sa kanyang misyon, binigyan niya ng higit na kaluwalhatian at pagdakila ang Diyos. 

Dakila ang mga biyaya ng Diyos. Ito ang kalooban ng Diyos noon pa mang una. Nais ng Diyos na maging dakila tayo sa pamamagitan ng pagiging Kanyang mga biyaya sa lahat. Ito ang dahilan kung bakit naglaan Siya ng mga misyon at tungkulin para sa ating lahat bago pa man isilang sa mundong ito. Bilang gantimpala para sa lahat ng mga magpapasiyang tuparin ang misyong Kanyang inilaan para sa kanila nang buong kababaang-loob, katapatan, at pananalig hanggang wakas, dadakilain rin Niya sila sapagkat lalo nila Siyang dinakila sa pamamagitan ng pagtupad sa misyong inilaan para sa kanila sa simula pa lamang. 

Mayroon tayong misyon bilang mga deboto ng Poong Jesus Nazareno. Ang misyong inilaan para sa atin sa simula pa lamang ay maging mga dakilang biyaya ng Diyos. Sa pamamagitan ng pagtupad nito, ang Panginoon ay lalo nating dinarakila, pinupuri, at niluluwalhati. Gagawin Niya tayong dakila bilang gantimpala para sa ating katapatan at pananalig sa Kanya na inihahayag ng kusang-loob na pagtupad natin sa misyong Kanyang inilaan para sa atin nang buong kababaang-loob sa wakas ng ating buhay sa daigdig na ito. 

HINIRANG BAGO PA ISILANG

23 Hunyo 2023 

Dakilang Kapistahan ng Pagsilang ni San Juan Bautista 

[Pagmimisa sa Bisperas]

Jeremias 1, 4-10/Salmo 70/1 Pedro 1, 8-12/Lucas 1, 5-17 

Screenshot: 06.23.2022 (Thursday) 12:15 p.m. #OnlineMass - Solemnity of the Nativity of Saint John the Baptist (Quiapo Church Facebook Live and YouTube) 

Tiyak na hanggang sa kasalukuyang panahon, kapag tinanong ang ilan o kaya naman sa nakakaraming mga Pilipinong Katoliko kung sino nga ba ang Pintakasi o Patron ng napakasikat na Simbahan ng Quiapo, mayroong mga sasagot na ang Panginoon sa ilalim ng Kanyang titulong Nuestro Padre Jesus Nazareno ay ang Patron ng nasabing Basilika Menor at Arkidiyosesanong Dambana. Hanggang sa kasalukuyan, tiyak na mayroon pa ring mga sasagot noon. Lingid sa kaalaman ng nakakarami na hindi ang Poong Jesus Nazareno ang Patron ng Simbahan. Bagkus, ang Patron o Pintakasi nito ay walang iba kundi si San Juan Bautista na tagapaghanda ng Kaniyang daraanan at kamag-anak. Kaya nga, ang nasabing Simbahan ay kilala rin bilang "Parokya ni San Juan Bautista." Ang Titular na Patron ay si San Juan Bautista. 

Subalit, alam naman nating pinupuntahan at dinarayo ng maraming mga deboto at mananampalataya ang Simbahan ng Quiapo para mamintuho kay Kristo sa ilalim ng Kanyang titulong Poong Jesus Nazareno. Tiyak na itinutuon nila ang kanilang mga pansin at pinagninilayan ang larawan ng Panginoong itim ang kulay ng balat na labis ngang nahihirapan sa pagpasan sa Banal na Krus patungo sa bundok ng Kalbaryo na tinatawag ring Golgota. Kinakausap at idinudulog nila kay Kristo, ang Panginoong Jesus Nazareno, na buong kababaang-loob at kusang-loob na nagpakasakit at nag-alay ng buhay sa Krus alang-alang sa sangkatauhan, ang kanilang mga panalangin. Hindi nila sinasamba ang imahen ng Poong Jesus Nazareno. Bagkus, ang imahen o larawang ito ni Kristo Hesus ay kanilang pinaparangalan at ginagamit sa pagninilay upang ipaalala sa kanila kung sino ang kausap nila sa tuwing mananalangin sila. 

Ang Titular na Patron o Pintakasi ng Simbahan ng Quiapo ay si San Juan Bautista na kamag-anak ng Panginoong Hesukristo na kilala rin natin sa Kanyang titulo bilang Poong Jesus Nazareno at tagapaghanda ng Kanyang daraanan. Subalit, ang tanging dahilan kung bakit nagsisitungo sa Simbahan ng Quiapo ang lahat ng mga deboto at mga mananampalatayang Katoliko ay walang iba kundi ang Panginoon sa ilalim ng titulong Nuestro Padre Jesus Nazareno na inilalarawan ng pagpasan Niya ng Banal na Krus. Mas iniuugnay pa nga ng maraming mananampalataya ang makasaysayang Simbahan ng Quiapo sa Nazarenong nagpakasakit kaysa sa Titular na Patron nito na walang iba kundi si San Juan Bautista. 

Ikatatampo ba ni San Juan Bautista na sinasadya ng maraming mananamapalataya ang kanyang kamag-anak na si Jesus Nazareno sa Simbahang siya mismo ang Titular na Patron? Malulungkot nga ba si San Juan Bautista sa katotohanang hindi alam ng marami na siya mismo ang Titular na Patron ng Simbahan ng Quiapo? Hindi. Kung tutuusin, ikatutuwa pa nga ni San Juan Bautista na dinarayo ng maraming mga deboto at mananampalataya ang maraming Simbahan, lalo na ang mga Simbahan kung saan siya mismo ang Titular na Patron katulad na lamang ng makasaysayang Simbahan ng Quiapo, upang manalangin sa Panginoon at Haring si Kristo na kilala rin bilang Poong Jesus Nazareno. Ipinahiwatig ito ng mga salitang binigkas mismo ni San Juan Bautista sa wakas ng kanyang misyon at tungkulin bilang tagapaghanda ng daraanan ng ipinangakong Mesiyas at Manunubos ng tanan na si Jesus Nazareno: "Kinakailangang Siya ay maging dakila at ako nama'y mababa" (Juan 3, 30). 

Nakasentro sa mga konsepto ng misyon at pananagutan ang mga Pagbasa para sa pagdiriwang ng Banal na Misa sa Bisperas ng Dakilang Kapistahan ng Pagsilang ni San Juan Bautista. Sa Unang Pagbasa, malakas na inihayag ng Panginoong Diyos sa binatang Kanyang hinirang at inatasan upang maging Kanyang propeta na si Propeta Jeremias ang pagkahirang Niya sa nasabing binata. Malakas na inihayag ng banal at mahabaging Panginoong Diyos kay Propeta Jeremias na hinirang na siya bago pa siya isilang sa mundo. Ito rin ang paksang nais pagtuunan ng pansin ng tampok na mang-aawit sa Salmong Tugunan para sa araw na ito. Ang Panginoong Diyos lamang ang tanging maaasahan ng lahat, lalung-lalo na ng Kanyang mga lingkod. Siya mismong humihirang at umaatas sa Kanyang mga lingkod na hinirang bago pa man sila isilang dito sa mundong ito ay tunay ngang maaasahan sa lahat ng oras at sandali. Ipinasiya rin ni Apostol San Pedro na hinirang at inatasan ng Mahal na Poong Jesus Nazareno upang maging unang Santo Papa ng Simbahan na isentro ang kanyang pangaral sa Ikalawang Pagbasa sa paksang ito. Ang misyon ng mga propeta sa Matandang Tipan at ang misyon ng Mahal na Poong Jesus Nazareno bilang ipinangakong Mesiyas at Manunubos ng sangkatauhan ay ipinasiya niyang pagtuunan ng pansin. Bago pa man isilang sa mundong ito ang mga propeta, hinirang at inatasan na sila ng Diyos para sa nasabing gampanin. Maging ang misyon at tungkulin ng Panginoong Jesus Nazareno ay nahayag bago Siya ipanganak sa mundo ng Mahal na Inang si Mariang Birhen. Sa Ebanghelyo, isinalaysay kung paanong ibinalita kay Zacarias ng isang anghel mula sa langit na walang iba kundi ang Arkanghel na si San Gabriel ang mabuting balita ng katuparan ng kanilang mga panalangin sa Diyos na biyayaan sila ng isang anak sa pamamagitan ng sanggol na si San Juan Bautista. Inihayag rin sa sandaling iyon ang magiging misyon ni San Juan Bautista. Ang misyong ito na kaloob ng Panginoon ay tutuparin ni San Juan Bautista pagdating ng takdang panahon. 

Kaya naman, hindi magtatampo si San Juan Bautista kung sakali mang nakalimutan ng nakakarami na siya mismo ang Titular na Patron ng mga masisikat na Simbahan gaya na lamang ng makasaysayang Simbahan ng Quiapo. Hindi siya malulungkot, manlulumo, at magtatampo dahil mas iniuugnay ng nakakaraming mga deboto ang Simbahan ng Quiapo sa kamag-anak niyang si Jesus Nazareno na buong kababaang-loob at kusang-loob na naghain ng Kanyang buhay para sa ating kaligtasan, gaya ng inilalarawan ng Kanyang banal na imahen na nakadambana sa nasabing Simbahan. Bagkus, matutuwa pa nga si San Juan Bautista na nagtutungo ang maraming mga deboto at mananampalataya sa isang Simbahang siya ang Titular na Patron sapagkat hindi naman niya misyon ang agawan ng papel si Kristo. Ang kanyang pananagutan at tungkulin ay inihayag bago isilang sa mundo. Hinirang ng Panginoong Diyos si San Juan Bautista bago isilang upang ihanda ang daraanan ng Poong Jesus Nazareno na tunay ngang dumating sa mundo upang iligtas ang sangkatauhan dahil sa pag-ibig. Wala nang iba pang hinangad si Juan Bautista kundi tuparin ito hanggang sa huli. 

Gaya ni San Juan Bautista, mayroon tayong misyon mula sa Diyos. Tayong lahat ay hinirang at inatasan ng Diyos para sa isang napakahalagang misyon at gampananin bago pa man tayo isilang sa mundong ito. Sa pamamagitan ng pagtupad sa misyon at gampananing ito na inilaan ng Panginoong Diyos para sa atin bago isilang dito sa mundo, lalo natin Siyang binibigyan at hinahandugan ng higit na papuri, pasasalamat, pagsamba, parangal, at luwalhati. 

Hinirang at inatasan ng Diyos para sa isang napakahalagang misyon at gampanin bago tayo isilang sa mundong ito. Ang Diyos ay naglaan ng misyon at gampanin para sa atin bago pa tayo isilang sa mundong ito hindi upang maging dahilan ng ating pagmamataas at pagmamayabang. Bagkus, hinirang at inatasan tayo ng Panginoong Diyos para sa nasabing misyon at gampanin upang lalo natin mabigyan ng higit na luwalhati ang Kanyang Kabanal-Banalang Ngalan. 

PAGHAHANDA PARA SA LANGIT

23 Hunyo 2023 

Biyernes ng Ika-11 Linggo sa Karaniwang Panahon (I) 

2 Corinto 11, 18. 21b-30/Salmo 33/Mateo 6, 19-23 

Screenshot: QUIAPO CHURCH OFFICIAL - 3PM #OnlineMass - 11 June 2023 - Solemnity of the Body and Blood of Christ (Quiapo Church Facebook Live and YouTube)

Ang mga Pagbasa para sa araw na ito ng Biyernes, araw na inilaan para sa taimtim na debosyon at pamamanata kay Kristo sa ilalim ng Kanyang titulong Nuestro Padre Jesus Nazareno, ay nakasentro sa biyaya ng buhay na walang hanggan sa langit. Sa pamamagitan nito, pinaalalahanan tayo ng Simbahan na hindi sa pamamagitan ng kamatayan magwawakas ang lahat ng bagay para sa atin. Tayong lahat na bumubuo sa Simbahan ay mayroong pagkakataong makapiling ang Poong Jesus Nazareno sa maluwalhati Niyang kaharian sa langit sa katapusan ng ating buhay dito sa mundong ito kung saan ang lahat ng bagay ay pansamantala lamang. Ito ay dahil lamang sa Banal na Krus at Muling Pagkabuhay ng Panginoong Jesus Nazareno. 

Sa Unang Pagbasa, inilarawan ni Apostol San Pablo ang mga hirap at pagsubok na kanyang pinagdaanan habang tinutupad niya ang kanyang misyon bilang apostol at misyonero. Katunayan, sa wakas ng kanyang pangaral sa Unang Pagbasa, buong lakas at linaw na ipinagmalaki ni Apostol San Pablo ang kanyang mga kahinaan (2 Corinto 11, 30). Bagamat si Apostol San Pablo ay hinirang at inatasan ng Panginoon upang maging tagapagpalaganap ng Mabuting Balita, hindi ito nangangahulugang nawala nang tuluyan ang kanyang mga kahinaan. Ang mga kahinaan ni Apostol San Pablo bilang tao ay nanatili pa rin. Subalit, sa kabila ng katotohanang ito, ipinasiya pa rin niyang maging tapat at masunurin sa Diyos. Mahirap pero nagawa pa rin niya ito. Dahil sa pasiyang ito, itinatampok at pinararangalan siya ng Simbahan sapagkat ang walang hanggang biyaya ng Panginoon ay kanyang natamasa sa Kanyang piling sa langit, katulad ng iba pang mga kasama niyang mga banal na tao roon. 

Nakasentro sa nasabing tema ang naging pangaral ng Panginoong Jesus Nazareno sa mga apostol sa Ebanghelyo para sa araw na ito. Bagamat binigkas ito ng Panginoong Jesus Nazareno ang mga salitang ito sa mga unang bahagi ng Kanyang ministeryo, ayon sa salaysay sa Ebanghelyo ni San Mateo, hindi Siya nag-aksaya ng panahon upang ilarawan sa Kanyang mga apostol ang katotohanan ng pagiging Kanyang mga tagasunod na magiging Kanya ring mga saksi sa lahat ng mga tao sa mundong ito pagdating ng panahon. Uusigin sila dahil sa kanilang ugnayan sa Panginoon. Subalit, hindi layunin ni Jesus Nazareno na panghinaan ang kanilang mga loob. Binigkas ni Jesus Nazareno ang mga salitang ito sa mga apostol upang palakasin ang mga puso't loobin nila. Sa gayon, handa na sila sa lahat ng uri ng pag-uusig. Kapag ang mga pag-uusig nila ay tiniis nila nang buong katapatan at pag-asa sa Panginoon hanggang sa wakas ng kanilang buhay at misyon sa lupa, matatamasa nila ang walang hanggang biyaya ng Panginoon sa Kanyang kaharian sa langit. 

Gaya ng sabi sa Salmong Tugunan para sa araw na ito, tutulungan ng Diyos ang lahat ng mga matuwid at banal (Salmo 33, 18b). Ang mga matuwid at banal ay nanatiling tapat sa Diyos hanggang sa huli. Sa kabila ng mga hirap at pagsubok sa buhay, at sa kabila rin ng kanilang mga kahinaan bilang tao, pipiliin pa rin nilang maging tapat sa Panginoon sa pamamagitan ng pamumuhay nang matuwid at banal. Tatahakin nila ang landas ng kabanalan, gaano man ito kahirap. Nalulugod ngang tunay ang Diyos sa kanilang pasiyang maging tapat sa Kanya na inihahayag ng kanilang pagiging mga banal at matuwid. Labis na ikinalulugod ng Panginoong Diyos ang kanilang kusang-loob at taos-pusong pagsisikap na maging banal at matuwid. 

Ipinapaalala sa atin na hindi matatagpuan dito sa mundong ito ang buhay na walang hanggan. Kapag ipinagpilitan nating hanapin ang buhay na walang hanggan dito sa mundong ito, inaaksaya lamang natin ang panahon. Ang buhay sa mundong ito ay pansamantala lamang. Matatagpuan at masusumpungan lamang natin sa piling ng Diyos sa Kanyang maluwalhating kaharian sa langit ang biyayang ito. Habang ang bawat isa sa atin nabubuhay at naglalakbay nang pansamantala dito sa mundong ito, lagi tayong binibiyayaan ng pagkakataong matamasa ang biyayang ito na mula sa Kanya. Sa pamamagitan lamang ng pagsusumikap na maging banal at matuwid nang taos-puso araw-araw, sa kabila ng ating mga kahinaan, ipagkakaloob ng Panginoon sa atin ang biyayang ito sa wakas ng ating buhay sa mundo. 

Habang namumuhay at naglalakbay pa tayo sa mundong ito, lagi tayong binibigyan ng pagkakataong matamasa ang walang hanggang biyaya ng Panginoong Diyos sa langit. Gamitin natin nang mabuti ang bawat pagkakataong ibinibigay sa atin upang maging banal at matuwid. Kapag lagi nating paghahandaan ang buhay sa piling ng Poong Jesus Nazareno sa langit sa pamamagitan ng palagiang pagsusumikap maging banal at matuwid nang taos-puso at tapat sa kabila ng ating mga kahinaan bilang tao, matatamasa natin ang walang hanggang buhay at biyayang kaloob Niya sa atin sa Kanyang maluwalhating kaharian sa langit. 

MAGKAUGNAY ANG ATING MISYON AT PAGKAKILANLAN

18 Hunyo 2023 

Ika-11 Linggo sa Karaniwang Panahon (A) 

Exodo 19, 2-6a/Salmo 99/Roma 5, 6-11/Mateo 9, 36-10, 8 

This faithful photographic reproduction of the painting Ordenación y Primera Misa de San Juan de Mata (English: Ordination of John of Matha) by Vicente Carducho, as well as the actual work of art itself from the Museo del Prado, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer, due to its age. 

May isang napakahalagang katotohanan tungkol sa ating pagkakilanlan bilang mga Katolikong bumubuo sa tunay at nag-iisang Simbahang itinatag mismo ni Kristo, ang Nuestro Padre Jesus Nazareno. Ang katotohanang ito ay ang paksa o temang nais pagtuunan ng pansin, talakayin, at pagnilayan ng mga Pagbasa para sa Linggong ito sapagkat tiyak na lingid sa kaalaman ng marami sa atin ang katotohanang ito. Lahat tayong mga Katolikong bumubuo sa tunay na Simbahang tatag mismo ni Kristo ay binibigyan ng isang napakagandang pagkakataon ng Simbahan sa Linggong ito upang imulat ang ating mga sarili sa katotohanang ito tungkol sa ating pagkakilanlan. Hindi lamang tumutukoy sa mga gusali ang salitang "Simbahan" kundi ito ay tumutukoy rin sa atin na bumubuo sa kawan ng Nuestro Padre Jesus Nazareno sa mundo. 

Sa Unang Pagbasa, inilahad ng Panginoong Diyos kay Moises na Kanyang inatasang ihatid at ilahad ang Kanyang mga salitang ito sa mga Israelita ang Kanyang biyaya para sa Kanyang bayan. Inihayag ng Panginoong Diyos na hinirang at inatasan Niya ang bayang Israel upang maging Kanya. Ang bayang Israel ay hinirang ng Panginoong Diyos upang maging bayan ng mga saserdoteng maglilingkod sa Kaniya (Exodo 19, 6a). Ang larawan ng Panginoong Diyos na humihirang at umaatas sa Kanyang mga lingkod ay muling isinalungguhit sa Salmong Tugunan. Ipinasiya ni Apostol San Pablo na talakayin rin ito sa Ikalawang Pagbasa. Tinalakay niya kung paanong ibinilang Niya tayo sa Kanyang pamilya bilang Kanyang mga anak sa pamamagitan ng Panginoong Jesus Nazareno. Sa Ebanghelyo, ang mga apostol ay hinirang at inatasan ni Kristo upang mangaral tungkol sa pagkahari ng Diyos. Maituturing itong isang pasulyap ng magiging misyon ng mga apostol na kanilang sisimulang gawin matapos umakyat sa Kanyang kaharian sa langit si Jesus Nazareno matapos tuparin ang Kanyang misyon bilang ipinangakong Mesiyas at Manunubos ng sangkatauhan.

Ito ang katotohanan tungkol sa ating pagkakilanlan bilang mga Katoliko. Tayong lahat ay hinirang, inatasan, at itinalaga ng Diyos upang maging Kanyang mga lingkod. Sa pamamagitan ng ating tapat na paglingkod sa Kanya, tayong lahat ay nagiging mga saksi at daluyan ng Kanyang pag-ibig, kagandahang-loob, biyaya, habag, at awa sa lahat. Kung paanong dumating ang biyaya ng kaligtasan sa pamamagitan ng Poong Jesus Nazareno, gayon din naman, mayroon tayong misyon at tungkulin bilang mga tagapaghatid at tagapagpalaganap ng awa, habag, pag-ibig, kagandahang-loob, at biyaya ng Diyos na una Niyang ipinakita sa ating lahat sa pamamagitan ni Kristo, ang Mahal na Poong Jesus Nazareno. 

Nakakalungkot nga lamang isipin na mas pinipili at ninanais ng nakararami, lalung-lalo na sa kasalukuyang panahon, na maging tagapaghatid at tagapagpalaganap ng iba't ibang uri ng kasinungalingan. Kusang-loob silang maninira, magsisinungaling, at magpapakalat ng pekeng balita upang mapabango ang sinusuportahan para lamang sa salapi. Mas malinaw ito sa mundo ng pulitika. Puro mga paninira, pekeng balita, at kasinungalingan ang kanilang ipinapalaganap. Higit na nakakalungkot tungkol dito, ginagawa rin ito ng ilang mga Katoliko. Alang-alang sa kanilang mga sinusuportahan, handa silang isantabi ang lahat ng mga itinuro ni Kristo na inilalahad ng Simbahan upang magkalat ng paninira, kasinungalingan, at pekeng balita. Kakalimutan nila ang Panginoon at ang Simbahan para lamang sa kanilang mga sinusuportahan, kahit na tiwali, magnanakaw, at mamamatay-tao ang kanilang mga sinusportahan. Hindi ito ang dapat nating gawin bilang mga pinili, hinirang, at itinalaga ng Panginoong Diyos upang maging Kanyang mga tapat na lingkod na nagpapalaganap ng Kanyang awa, biyaya, habag, pag-ibig, at kagandahang-loob. 

Tayong lahat ay hinirang at inatasan ng Panginoong Diyos upang maging Kanyang mga tapat na lingkod na nagpapalaganap ng Kanyang biyaya, awa, habag, pag-ibig, at kagandahang-loob. Ang misyon, tungkulin, at pananagutang ito ay hindi para sa Santo Papa, mga kardinal, mga obispo, mga pari, at mga madre lamang. Bagkus, ang pananagutan, misyon, at tungkuling ito ay para sa ating lahat dahil mayroon itong ugnayan sa ating pagkakilanlan bilang mga Katoliko. Kapag tinupad natin nang buong katapatan sa Diyos ang misyong ito, ipinagmamalaki natin ang ating pagkakilanlan bilang mga Katolikong bumubuo sa tunay na Simbahang tatag ni Kristo, ang Poong Jesus Nazareno. 

Hindi natin maihihiwalay ang ating misyon sa ating pagkakilanlan bilang mga taong pinili, hinirang, at inatasan ng Diyos upang maging Kanyang mga lingkod na bubuo sa Simbahan. Bagkus, ang dalawang ito ay may isang napakalalim at napaahalagang ugnayan na kahit kailan ay hindi mababali. Isang bahagi ng ating pagkakilanlan bilang mga pinagindapat ng Panginoon na bumuo sa tunay na Simbahan ang ating misyon bilang mga tagapagpalaganap ng Kanyang awa, habag, kagandahang-loob, pag-ibig, at biyayang walang maliw. Ang katotohanang ito ay hindi dapat limutin. 

Lagi nating tatandaan. Ang ating misyon bilang mga tagapagpalaganap ng biyaya, habag, awa, pag-ibig, at kagandahang-loob ng Diyos ay mayroong ugnayan sa ating pagkakilanlan bilang Kanyang mga hinirang at inatasan upang maging Kanyang mga tapat na lingkod na bumubuo sa Kanyang Simbahan. Kapag lagi nating tinupad ang misyong ito, binibigyan natin ng papuri, pasasalamat, at pagsamba ang Panginoong Diyos na humirang at nagtalaga sa atin upang maging Kanya. 

BIYAYA NG MALINIS NA PUSO

17 Hunyo 2023 

Paggunita sa Kalinis-Linisang Puso ng Birheng Maria 

Isaias 61, 9-11/1 Samuel 2/Lucas 2, 41-51

This faithful photographic reproduction of this devotional type image of the Immaculate Heart of the Virgin Mary from a 19th century Missal is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Matapos ipagdiwang ang Dakilang Kapistahan ng Kamahal-Mahalang Puso ni Hesus, ang Sabado kasunod ng nasabing Dakilang Kapistahan ay inilaan ng Simbahan upang gunitain ang Kalinis-Linisang Puso ng Mahal na Birheng Maria. Ang Puso ng Mahal na Inang si Mariang Birhen ay malinis, dalisay, at busilak dahil sa kanyang ugnayan sa Diyos. Kusang-loob at buong katapatang ipinasiya ng Mahal na Ina na pumasok sa isang malalim na ugnayan sa Diyos. Ipinasiya niyang isentro ang kanyang puso at loobin sa Diyos at sa Kanyang kalooban. Sa pamamagitan nito, inihayag ng Mahal na Birhen ang kanyang pahintulot sa Diyos na gawing dalisay, busilak, at malinis ang kaniyang puso. Hindi naging Kalinisan-Linisan ang Puso ng Mahal na Ina gamit ang sariling kapangyarihan. Bagkus, ito ay isang gawa ng Panginoon na kusang-loob na pinahintulutan ng Mahal na Ina. Ito ang natatanging dahilan kung bakit malalim ang ugnayan ng Kalinis-Linisang Puso ng Birheng Maria sa Kamahal-Mahalang Puso ni Jesus Nazareno na kanyang minamahal na Anak. 

Itinuturo sa atin ng mga Pagbasa para sa araw na ito kung paano tayo maaaring magkaroon ng isang malinis, dalisay, at busilak na puso katulad ng Puso ng ating Ina, ang Mahal na Birheng Maria. Kahit hindi tayo iniligtas mula sa bahid ng kasalanan bago isilang sa mundong ito, gaya ng Mahal na Inang si Mariang Birhen, maaari pa rin tayong magkaroon ng isang malinis, dalisay, at busilak na puso gaya niya. Tampok sa Ebanghelyo para sa araw na ito ang ginawa ng Mahal na Inang si Maria matapos hanapin ang Batang Panginoong Jesus Nazareno sa Templo. Hindi niya maunawaan nang lubusan ang paliwanag ng Batang Poong Jesus Nazareno tungkol sa Kanyang pag-iwan sa Herusalem matapos ang Pista ng Paskuwa. Subalit, iningatan ni Maria sa kanyang puso ang buong pangyayari, lalo na ang mga salitang binigkas ng Batang Jesus Nazareno. Inihayag niya sa pamamagitan nito ang kanyang pagtanggap sa mga loobin ng Diyos nang buong kababaang-loob, pananalig, at taos-puso. 

Kapag ginawa natin ang isinagawa ng Mahal na Inang si Mariang Birhen sa wakas ng tampok na salaysay sa Banal na Ebanghelyo para sa araw na ito, ipinapahayag natin ang ating taos-pusong pagtanggap sa kalooban ng Panginoon. Sa pamamagitan nito, inihahayag natin ang ating taos-pusong naising magkaroon ng isang bagong pusong ginawang dalisay, busilak, at malinis ng Panginoong Diyos. Magiging tapat at taos-puso tayo sa pag-aalay ng papuri, pasasalamat, at pagsamba sa butihing Panginoong Diyos, katulad ng lingkod ng Diyos na itinatampok sa propesiya ni Propeta Isaias sa Unang Pagbasa at ng mang-aawit sa Salmong Tugunan para sa araw na ito. Ang mga may pusong nilinis, dinalisay, at binusilak ng Panginoon lamang ang makakapag-alay ng tapat at taos-pusong papuri, pasasalamat, at pagsamba sa Kanya. 

Habang namumuhay at naglalakbay dito sa mundong ito, ang bawat isa sa atin ay mayroong pagkakataong magkaroon ng isang pusong tunay ngang malinis, dalisay, at busilak katulad ng Puso ng Mahal na Inang si Mariang Birhen. Pumasok tayo sa isang malalim na ugnayan sa Panginoon. Maging tapat at taos-puso tayo sa ating ugnayan sa Diyos. Isentro natin ang buo nating puso at sarili sa Kanya at sa Kanyang kalooban. Sa pamamagitan nito, inihahayag natin ang ating taos-pusong pagtanggap sa biyaya ng isang bagong pusong nilinis, dinalisay, at binusilak ng Diyos. 

SAGISAG NG WALANG HANGGAN AT DAKILANG PAG-IBIG, KAGANDAHANG-LOOB, AWA, HABAG, AT KABUTIHAN NG PANGINOONG DIYOS

16 Hunyo 2023 

Dakilang Kapistahan ng Kamahal-Mahalang Puso ni Jesus Nazareno (A) 

Deuteronomio 7, 6-11/Salmo 102/1 Juan 4, 7-16/Mateo 11, 25-30

This faithful photographic reproduction of the painting (c. 1767) Sacro cuore di Jesù (English: Sacred Heart of Jesus) by Pompeo Batoni (1708–1787), as well as the actual work of art itself in the northern side of the Chapel of Il Gesù in Rome, Italy, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Bakit nga ba laging ipinagdiriwang natin bilang Simbahan ang Dakilang Kapistahan ng Kamahal-Mahalang Puso ni Jesus Nazareno? Ano nga ba ang saysay o halaga ng maringal na pagdiriwang na ito sa ating buhay bilang mga Katolikong bumubuo sa tunay na Simbahang tatag mismo ni Kristo, ang Mahal na Poong Jesus Nazareno? Ito ang nais talakayin at pagtuunan ng pansin sa mga Pagbasa para sa araw na ito na inilaan ng Simbahan para sa maringal na pagdiriwang na ito na walang iba kundi ang Dakilang Kapistahan ng Kamahal-Mahalang Puso ng Poong Jesus Nazareno.  

Ang mga Pagbasa para sa araw na ito na inilaan ng Simbahan para sa maringal na pagdiriwang ng Dakilang Kapistahan ng Kamahal-Mahalang Puso ng Nuestro Padre Jesus Nazareno ay nakasentro sa misteryo ng awa, pag-ibig, kagandahang-loob, at habag ng Panginoong Diyos. Sa Unang Pagbasa, malakas na inihayag ni Moises sa mga Israelita na pinili at hinirang sila ng Diyos upang maging Kanyang bayan dahil tunay Niya silang iniibig. Dakilang pag-ibig, kagandahang-loob, habag, at awa ang dahilan kung bakit ipinasiya ng Diyos na piliin at hirangin ang Israel upang maging Kanyang bayan na Siya ring dahilan kung bakit ipinasiya Niyang magbitiw ng pangako sa kanilang mga ninuno (Deuteronomio 7, 8). Nakasentro rin sa pag-ibig ng Diyos na walang hanggan ang awit ng mang-aawit sa Salmong Tugunan para sa araw na ito. Bukod-tangi ang pag-ibig ng Diyos sapagkat ito ay walang hanggan at walang maliw, katulad ng inilarawan sa Salmong Tugunan (Salmo 102, 17). Sa Ikalawang Pagbasa, isinentro rin ni Apostol San Juan ang kanyang pangaral sa pag-ibig ng Panginoong Diyos. Mula sa simula hanggang sa wakas ng pangaral na ito, si Apostol San Juan ay hindi tumigil sa pagpapaalala sa lahat tungkol sa pag-ibig ng Diyos. Sa Ebanghelyo, nakasentro sa pag-ibig ng Diyos ang mga salitang binigkas ng Poong Nazareno. Ang tanging dahilan kung bakit niloob ng Panginoong Diyos na ihayag sa mga mababang-loob at mga aba ang Kanyang kalooban at kung bakit inaanyayahan Niya ang lahat ng mga napapagal at nabibigatan sa kanilang mga pasanin sa buhay na lumapit sa Kanya sa pamamagitan ng Kanyang Bugtong na Anak na nagkatawang-tao na Diyos rin katulad Niya na walang iba kundi ang Mahal na Poong Jesus Nazareno. Iyan ang pag-ibig ng Diyos na tunay ngang walang maliw at dakila. 

Ito ang nais ipaalala ng Kamahal-Mahalang Puso ng Poong Jesus Nazareno. Tunay ngang mahabagin at mapagmahal ang Diyos. Hindi isang kathang-isip, guni-guni, o kaya konsepto ang pag-ibig, kagandahang-loob, habag, at awa ng Diyos. Bagkus, ito ay tunay at totoo. Walang hanggan at dakila ngang tunay ang kagandahang-loob, pag-ibig, habag, at awa ng Diyos na Kaniyang inihayag sa atin sa pamamagitan ng Mahal na Puso ng Panginoong Jesus Nazareno. 

Kaya naman, sa maraming mga larawan ng Mahal na Puso ni Hesus, tila itinuturo sa atin ni Kristo ang Kanyang Pusong nakalantad. Mayroon pa ngang mga larawan o imahen kung saan hinahawak pa nga ng Panginoong Hesukristo ang Kanyang Mahal na Puso. Tila ipinapaalala sa atin ng Mahal na Poong Jesus Nazareno na patuloy pa ring umaalab ang apoy sa Kanyang Puso dahil sa Kanyang pag-ibig, kagandahang-loob, habag, at awa para sa atin. Ito ang dahilan kung bakit Niya ipinasiyang iligtas tayo mula sa kasalanan at kamatayan sa pamamagitan ng Banal na Krus at Muling Pagkabuhay, ang Misteryo Paskwal. Hanggang ngayon, hindi pa rin Siya tumitigil na mahalin, kalingain, kaawaan, at kahabagan tayo, bagamat hindi tayo karapat-dapat sa biyayang ito dahil sa dami ng ating mga kasalanan. Kahit masugatan nang paulit-ulit ang Kanyang Kamahal-Mahalang Puso dahil sa ating mga kasalanan, patuloy pa rin Niya tayong minamahal at kahahabagan. Habang patuloy tayong namumuhay sa daigdig na ito, patuloy Niya tayong pinagkakalooban ng maraming mga pagkakataon upang maging banal at kalugud-lugod sa Kanyang paningin. Tayong lahat ay hinding-hindi Niya susukuan sa kabila ng ating mga kasalanan. 

Tunay ngang dakila ang pag-ibig, kagandahang-loob, habag, at awa ng Diyos. Ito ang mensahe at paalala ng Dakilang Kapistahan ng Kamahal-Mahalang Puso ng Poong Jesus Nazareno sa ating lahat. Habang patuloy tayong namumuhay at naglalakbay dito sa mundong ito, hindi Niya tayo susukuan at mawawalan ng pag-asa para sa atin. Patuloy Niya tayong bibigyan ng pagkakataon upang maging banal at kalugud-lugod sa Kanyang paningin. Ito ang natatanging dahilan kung bakit mayroong Banal na Krus at Muling Pagkabuhay. Ang walang maliw at dakilang pag-ibig, awa, habag, kagandahang-loob, at kabutihan ng Diyos na inilalarawan sa ating lahat ng Kabanal-Banalan at Kamahal-Mahalang Puso ng Panginoong Jesus Nazareno.