ANG KANYANG NAISIN

2 Mayo 2021 

Ikalimang Linggo ng Pasko ng Muling Pagkabuhay (B) 

Mga Gawa 9, 26-31/Salmo 21/1 Juan 3, 18-24/Juan 15, 1-8 

Sabi ni Hesus sa mga alagad sa Ebanghelyo: "Ako ang puno ng ubas, kayo ang mga sanga. Ang nananatili sa Akin, at Ako sa kanya, ang siyang mamumunga nang sagana sapagkat wala kayong magagawa kung kayo'y hiwalay sa Akin" (Juan 15, 5). Sa pamamagitan ng mga salitang ito, inihayag ni Hesus na wala tayong magagawa kung wala Siya sa ating buhay. Walang silbi ang ating mga pagsisikap kung hindi tayo nakaugnay sa Kanya. Mauuwi na lamang sa wala ang ating mga pagsisikap na mamuhay nang banal kung wala tayong ugnayan kay Kristo. Ito ang halaga ng ugnayan kay Kristo bilang isang Simbahan. 

Hindi natin dapat kalimutan ang katotohanan na ang Panginoon ay ang bukal ng kabanalan. Sa Kanya nagmumula ang kabanalan. Katunayan, Siya mismo ang pinakabanal sa lahat. Wala nang hihigit pa sa kabanalan ng Diyos. Ang tangi nating magagawa ay maging banal katulad Niya. Sikaping mamuhay nang banal sa ating pang-araw-araw na pamumuhay. Katunayan, iyan ang ginawa ng mga banal na tao, mga santo at santa, ng Simbahan, noong sila'y namuhay pa sa mundo. Paano nila iyon ginawa? Hindi nila hiniwalay ang kanilang mga sarili sa Diyos. Lagi nilang sinikap na manatiling nakaugnay sa Diyos. 

Isang halimbawa nito ay si Apostol San Pablo sa Unang Pagbasa. Isinalaysay niya sa mga alagad sa Herusalem kung paano nagpakita sa kanya si Kristo sa daang patungong Damasco. Mula noong nagpakita sa kanya ang Panginoong Hesus sa daang patungong Damasco, nagbago si Apostol San Pablo. Mula sa pagiging isang taga-usig ng mga Kristiyano, siya'y naging isang tagasunod at apostol ni Kristo. Nangyari ang lahat ng iyon dahil niloob ito ng Panginoon. Ang kaloobang ito ng Panginoon ay buong kababaang-loob na tinanggap ni Apostol San Pablo. Sa halip na bumalik sa pagiging isang taga-usig ng mga Kristiyano, tinahak niya ang landas na inihanda ng Diyos para sa kanya bilang apostol at misyonero. Sa pamamagitan nito, inihayag ni Apostol San Pablo ang kanyang pasiya na maging kaugnay ng Diyos at ng Kanyang kalooban. Ipinasiya niyang huwag humiwalay sa Diyos. Pinili niyang manatiling nakaugnay sa Panginoon, kahit na ang ibig sabihin nito ay dadanas siya ng matinding pag-uusig. 

Gaya ni Apostol San Pablo at ng iba pang mga banal, si Apostol San Juan ay nagpasiyang mamuhay na nakaugnay sa Panginoon. Katunayan, ang kanyang pangaral sa Ikalawang Pagbasa ay tungkol sa buhay na nakaugnay sa Diyos. Itinuturo niya kung paano tayong makakapamuhay na nakaugnay sa Diyos at kung paanong hindi tayo mapapahiwalay sa Kanya. Sabi ni Apostol San Juan, dapat nating tuparin ang Kanyang mga utos at isagawa ang anumang kalugud-lugod sa Kanyang paningin. Kapag iyon ang ginawa natin, inihahayag natin ang ating naisin na mamuhay na nakaugnay sa Diyos. 

Oo, kailangan nating lumago sa pananampalataya. Kailangang nating lumago bilang mga mananampalatayang bumubuo sa Simbahan. Subalit, ang paglago sa pananampalataya ay hindi nangangahulugang ihiwalay ang sarili sa Diyos. Kung tutuusin, ang Panginoong Hesus na Muling Nabuhay ay hindi nagsalita nang ganyan kailanman. Wala Siyang sinabing ganoon kailanman. Kaya nga, ang sabi ng Panginoong Muling Nabuhay sa Ebanghelyo na ang mga hiwalay o hindi magkaugnay sa Kanya ay walang kayang gawin. Kapag ipinasiya nating mamuhay na nakahiwalay sa Panginoong Diyos na Siyang bukal ng kabanalan, lalo lamang hindi lalago ang ating pananampalataya. 

May kalayaan tayong magpasiya para sa ating mga sarili. Ang kalayaang ito ay kaloob ng Diyos sa atin. Hindi Niya tayo pipilitin. Hahayaan Niya tayong mamili para sa ating mga sarili. Kahit nais Niyang tuparin natin ang Kanyang kalooban o plano para sa atin, wala Siyang magagawa kung hindi tayo papayag. Huwag nating kakalimutan iyan. Hindi tayo pipilitin ng Diyos. 

Ang nais ng Diyos para sa atin ay mamuhay tayong nakaugnay sa Kanya. Nais ng Diyos na magkaroon tayo ng ugnayan sa Kanya upang lalong lumago ang pananampalataya natin sa Kanya bilang mga Kristiyanong bumubuo sa nag-iisang Simbahang itinatag ni Kristo sa lupa. Iyan ba ang ating kagustuhan? Ang kalooban ba ng Diyos para sa atin ay nais rin nating mangyari? 

ANAK NG ISANG MANGGAGAWA

1 Mayo 2021 

Paggunita kay San Jose, manggagawa 

Genesis 1, 26-2, 3 (o kaya: Colosas 3, 14-15. 17. 23-24)/Salmo 89/Mateo 13, 54-58 

"Hindi ba ito ang anak ng karpintero?" (Mateo 13, 55) Ito ang isa sa mga tanong ng mga kababayan ni Hesus sa Nazaret tungkol sa Kanyang pagkakilanlan o identidad sa Ebanghelyo. Namangha silang lahat nang marinig nilang mangaral ang Panginoong Hesukristo sa harapan nila. Hindi sila makapaniwala na ang nangangaral sa kanilang sinagoga ay si Hesus na anak ng karpinterong si San Jose at ng Mahal na Birheng Maria. Hindi sila makapaniwala na magmumula sa pamilya ng isang karpintero ang isang taong puno ng karunungan. Katunayan, lalo silang hindi makapaniwala na ang taong iyon ay ang Mesiyas. Nakakagulat talaga si Hesus para sa Kanyang mga kababayan sa Nazaret. 

Inilaan ng Simbahan ang unang araw ng Mayo upang muling parangalan ang ama-amahan ng Panginoong Hesukristo na walang iba kundi si San Jose. Ang pagdiriwang ng Simbahan sa unang araw ng Mayo taun-taon ay ang ikalawang kapistahan ng Simbahan sa karangalan ni San Jose. May kaibahan nga lamang ang pagdiriwang ng Simbahan sa unang araw ng Mayo at ang pagdiriwang ng unang kapistahan sa karangalan ni San Jose na ipinagdiriwang naman tuwing ika-19 ng Marso. Ang pinagtutuunan ng pansin sa pagdiriwang ng Simbahan sa karangalan ni San Jose tuwing unang araw ng buwan ng Mayo ay ang kanyang pagiging manggagawa habang ang pinagtutuunan naman ng pansin tuwing ika-19 ng Marso ay ang kanyang pagiging kabiyak ng puso ng Mahal na Birheng Maria at ama-amahan ng Panginoong Hesus. Subalit, magkaugnay pa rin ang dalawang katangiang ito ni San Jose. Si San Jose na kabiyak ng puso ng Mahal na Birhen at ama-amahan ni Kristo sa lupa ay isang manggagawa. 

Bagamat negatibo ang tunog ng tanong ng Kanyang kababayan nang marinig nila ang Kanyang pangaral sa sinagoga sa Ebanghelyo, magandang bigyan ng pansin ang mga salitang "anak ng karpintero." Si Hesus na ating Panginoon at Tagapagligtas ay anak na isang karpintero na walang iba kundi si San Jose. Ang Diyos na nagkatawang-tao sa pamamagitan ni Hesus ay naging anak ng isang karpinterong nagngangalang Jose. Ang hanap-buhay o trabaho ng ama-amahan ng Panginoon sa mundo na walang iba kundi si San Jose ay pagkakarpintero. Itinaguyod ni San Jose ang kanyang pamilya na binubuo nina Hesus at Maria sa pamamagitan ng kanyang hanap-buhay bilang isang karpintero. Kaya naman, si San Jose ay itinatampok at pinararangalan sa araw na ito, ang unang araw ng buwan ng Mayo, dahil sa kanyang paghahanap-buhay bilang isang anluwage o karpintero. Sa pamamagitan ng kanyang paghahanap-buhay, kumayod si San Jose para sa kanyang pamilya na binubuo ni Hesus at ng Mahal na Ina. Ito ang paraang ginamit ni San Jose upang ipakita ang kanyang pagmamahal para kina Hesus at Maria. 

Kung paanong inihayag ng Panginoong Diyos ang Kanyang pag-ibig para sa sangkatauhan sa salaysay ng Kanyang paglikha sa kanila sa Unang Pagbasa, inihayag ni San Jose ang kanyang pagmamahal para sa Mahal na Ina at kay Hesus sa pamamagitan ng kanyang hanap-buhay bilang isang karpintero. Sabi pa ni Apostol San Pablo sa kanyang pangaral sa mga taga-Colosas na isa sa mga talatang maaaring gamitin para sa Unang Pagbasa: "Anuman ang inyong ginagawa, gawin ninyo nang magaan sa kalooban na waring hindi sa tao kayo naglilingkod kundi sa Panginoon" (3, 23). Kung paanong kusang nilikha ng Diyos ang tao sa ikaanim na araw at kung paanong si San Jose ay naghanap-buhay nang kusang-loob para sa kanyang pamilya, hinahamon tayo na gawin natin nang kusang-loob ang ating mga pang-araw-araw na tungkulin, suliranin, at responbilidad. Kapag ang ating kasipagan sa ating paghahanap-buhay at sa iba pa nating mga suliranin sa buhay ay kusang-loob, mahahayag ang ating pag-ibig para sa Diyos, sa ating pamilya, at sa ating kapwa. 

Ang araw na ito ay itinalaga ng Simbahan upang parangalan si San Jose para sa kanyang paghahanap-buhay para sa kanyang pamilya. Sa pamamagitan ng paglaan sa araw na ito upang parangalan si San Jose na isang manggagawa, itinuturo ng Simbahan ang halaga ng trabaho o hanap-buhay para sa bawat tao. Mahalaga para sa bawat tao ang hanap-buhay sapagkat nahahayag niya ang kanyang pag-ibig para sa kanyang pamilya at kapwa. Sa pamamagitan nito, nahahayag rin ang kanyang pag-ibig para sa Diyos. Iyan ay dahil isa itong oportunidad o pagkakataon na ibinigay sa kanya ng Panginoong Diyos upang tuparin ang kanyang tungkulin sa pamilya at kapwa nang may pag-ibig.

ANG MABUTING PASTOL NA HANDANG GAWIN ANG LAHAT PARA SA KANYANG KAWAN

25 Abril 2021 

Ikaapat na Linggo ng Pasko ng Muling Pagkabuhay (B) 

Linggo ng Mabuting Pastol 

Mga Gawa 4, 8-12/Salmo 117/1 Juan 3, 1-2/Juan 10, 11-18 

Gaya ng pelikulang Your Name (Kimi No Na Wa), tinalakay rin sa pelikulang pinamagatang Weathering With You kung ano ang kayang gawin ng isang tao alang-alang sa pag-ibig. Kaya nga, isa sa mga awit na ginamit sa pelikulang iyon ay pinamagatang "Is There Still Anything That Love Can Do?" Mayroon pa bang kayang gawin ang pag-ibig? Maaari nating sabihing nasagot ang tanong na ito sa nasabing pelikula. Sa Weathering With You, tampok ang binatang si Hodaka at ang dalagang si Hina. Sa huling bahagi ng nasabing pelikula, ang binatang si Hodaka ay dumaan sa isang shrine gate at matapos gawin iyon ay nakarating siya sa mga alapaap upang hanapin doon si Hina. Ginawa niya iyon upang ibalik si Hina sa mundo. Ito ang dahilan kung bakit sinabi ni Hodaka kay Hina sa bahaging iyon ng pelikulang ito na hindi na mahalaga para sa kanya ang magandang panahon basta makasama niya si Hina. Ang dahilan kung bakit si Hina ay napunta sa mga alapaap ay dahil iyon ang kapalit ng pagiging isang weather maiden na may kapangyarihang ipatigil ang ulan at pagandahin ang panahon. Kinakailangan niyang isakripisyo ang kanyang buhay nang sa gayon ay bumalik sa normal ang lagay ng panahon. Subalit, para kay Hodaka, hindi na mahalaga ang pagkakaroon ng maaraw at magandang panahon. Sa halip na piliin ang magandang panahon, pinili niyang makasama si Hina. Kahit na hindi na magiging maaraw at lagi na lamang uulan, pinili pa rin niya si Hina. Alang-alang kay Hina, ginawa ni Hodaka ang lahat ng iyon. 

Itinatampok sa Ikaapat na Linggo ng Pasko ng Muling Pagkabuhay na kilala rin bilang Linggo ng Mabuting Pastol ang isang napakagandang larawan ni Kristo. Sa Linggong ito, ang Panginoong Hesus na Muling Nabuhay ay ipinapakilala sa atin bilang Mabuting Pastol. Ang Panginoong Hesus ay ang Mabuting Pastol na handang gawin ang lahat para sa Kanyang kawan. Ipinagkaloob ng Diyos ang biyaya ng isang Mabuting Pastol sa atin. Ang Mabuting Pastol na bigay sa atin ng Diyos ay walang iba kundi ang Panginoong Muling Nabuhay na si Hesus. 

Tinalakay sa mga Pagbasa ang pag-ibig ng Mabuting Pastol para sa Kanyang kawan. Sabi mismo ni Hesus sa Ebanghelyo na Siya ang Mabuting Pastol na nag-aalay ng Kanyang buhay alang-alang sa Kanyang mga tupa (Juan 10, 11). Sa pamamagitan ng mga salitang ito, inilarawan ni Hesus ang Kanyang pag-ibig para sa Kanyang kawan. Isa lamang ang dahilan kung ipinasiya ng Panginoon ang Kanyang buhay alang-alang sa Kanyang mga tupa - pag-ibig. Pag-ibig ang dahilan kung bakit ang Panginoong Hesukristo ay nagpasiyang isakripisyo ang buo Niyang sarili alang-alang sa Kanyang kawan. 

Ang paksa ng pangaral ni Apostol San Juan sa Ikalawang Pagbasa ay ang ating pagkakilanlan o ang ating identidad bilang mga anak ng Diyos. Tayong lahat ay itinuring ng Diyos bilang Kanyang mga anak. Sa pambungad pa lamang ng kanyang pangaral sa Ikalawang Pagbasa, nasabi ni Apostol San Juan na tayo'y tinatawag na mga anak ng Diyos dahil sa Kanyang pag-ibig para sa atin (3, 1). Niloob ng Diyos na tayong lahat ay ituring Niyang mga anak dahil sa Kanyang pag-ibig para sa atin. Katunayan, iyan rin ang dahilan kung bakit kabilang tayo sa kawan ng Mabuting Pastol na si Kristo. Pag-ibig. Ang pag-ibig ng Diyos. Ang lahat ng mga bumubuo sa kawan ng Mabuting Pastol na si Hesus ay mga anak ng Diyos. Ito ang kalooban ng Diyos na tunay na umiibig sa atin. Dahil sa pag-ibig ng Diyos para sa atin, binigyan Niya tayo ng isang Mabuting Pastol. Ang Mabuting Pastol na iyon ay walang iba kundi si Hesus.

Sa Unang Pagbasa, inilarawan ni Apostol San Pedro kung paanong si Hesus ay dinakila ng Diyos. Siya'y ipinapatay ng Kanyang mga kaaway ngunit nabuhay na mag-uli sa ikatlong araw. Sabi pa ni Apostol San Pedro na ito ang patunay na si Hesus ay ang batong itinakwil na naging batong panulukan (Mga Gawa 4, 10-11). Sa pamamagitan nito, nahayag ang pag-ibig ng Diyos para sa lahat. Kahit na hindi Siya tinanggap ng marami, kahit na pagtatakwil ang Kanyang tinanggap mula sa marami, hindi nawala nang tuluyan o nabawasan man lamang ang pag-ibig ng Diyos. Katunayan, ang tugon ng Diyos sa pagtakwil sa Kanya ay ang paghayag ng kadakilaan ng Kanyang pag-ibig. Sa pamamagitan ng Panginoong Hesukristo, ang Mabuting Pastol na Muling Nabuhay, nahayag ang kadakilaan ng pag-ibig ng Diyos para sa lahat. Pag-ibig na hindi nabawasan o nawala nang tuluyan dahil sa pagtakwil sa Kanya. Sa kabila ng pagtakwil sa Kanya, nanatili pa rin ang pag-ibig ng Diyos. Katunayan, ang pag-ibig ng Diyos ang nanaig sa huli. Ito ay pinatunayan Niya sa pamamagitan ng Muling Pagkabuhay ni Hesus, ang Mabuting Pastol na ipinagkaloob Niya sa atin. 

Biniyayaan tayo ng Diyos ng isang Mabuting Pastol. Ang Mabuting Pastol na ito ay walang iba kundi ang Panginoong Hesus na Muling Nabuhay. Bilang ating Mabuting Pastol, si Hesus ay handang gawin ang lahat para sa atin. Katunayan, iyon ang dahilan kung bakit ang Kanyang Misteryo Paskwal ay nangyari. Ang krus at Muling Pagkabuhay ng Panginoong Hesus ay patunay na handa Siyang gawin ang lahat alang-alang sa atin na bumbuo sa Kanyang kawan. Ang dahilan nito ay walang iba kundi ang Kanyang pag-ibig para sa atin. 

GALAK NG MANANAMPALATAYA

18 Abril 2021 

Ikatlong Linggo ng Pasko ng Muling Pagkabuhay (B) 

Mga Gawa 3, 13-15. 17-19/Salmo 4/1 Juan 2, 1-5a/Lucas 24, 35-48 

Hindi ipinagdiriwang ng Simbahan ang Pasko ng Muling Pagkabuhay sa loob ng isang araw lamang. Ang Simbahan ay hindi naglaan ng isang araw lamang para sa pagdiriwang ng Pasko ng Muling Pagkabuhay. Katunayan, hindi rin natapos ang Pasko ng Muling Pagkabuhay sa huling araw ng Oktaba o Walong Araw na Pagdiriwang para sa Kapistahang ito. Bagkus, 50 araw ang inilaan ng Simbahan upang ipagdiwang nang buong galak ang Muling Pagkabuhay ng Panginoon. Magtatapos ang 50 araw na ito ng pagdiriwang sa araw ng Pentekostes. 

Isinasalungguhit ng 50 araw na ito ang halaga ng Muling Pagkabuhay ni Hesus para sa ating mga Kristiyano. Ang Muling Pagkabuhay ni Hesus ay ang dahilan kung bakit tayo nananalig at sumasampalataya sa Kanya. Ito ang nagbibigay ng saysay sa pananampalataya natin bilang mga Kristiyano. Ito ang Ebanghelyo o Mabuting Balita. Ang ating pananampalataya bilang mga Katoliko ay nakasentro o nakaugat sa Mabuting Balitang ito. Katunayan, ito ang Mabuting Balita. Ang ating Panginoon at Tagapagligtas na si Kristo Hesus ay namatay sa krus at nabuhay na mag-uli sa ikatlong araw. 

Ang Mabuting Balitang ito ay ang pinagtuunan ng pansin sa mga Pagbasa para sa Ikatlong Linggo ng Pasko ng Muling Pagkabuhay. Sa Unang Pagbasa, ang unang Santo Papa ng Simbahan na si Apostol San Pedro ay nangaral tungkol kay Hesus. Ang Kristong si Hesus na ipinagkaloob ng Diyos ay nagpakasakit at namatay sa kamay ng Kanyang mga kaaway ngunit nabuhay na mag-uli sa ikatlong araw. Sa Ikalawang Pagbasa, ipinakilala si Kristo Hesus bilang handog para sa ikapagpapatawad ng mga kasalanan (1 Juan 2, 2). Katunayan, iyan ang dahilan kung bakit si Hesus ay namatay sa krus at nabuhay na mag-uli. Para sa lahat ng tao. Inihain Niya ang Kanyang sarili para sa sangkatauhan. Si Hesus ay naging handog para sa mga kasalanan ng sangkatauhan. Subalit, matapos ang Kanyang paghahain ng sarili sa krus, Siya'y muling nabuhay. Sa Ebanghelyo, isinalaysay ang pagpapakita ng Panginoong Hesus na Muling Nabuhay sa mga apostol. Matapos magpakita sa dalawang apostol sa daang patungong Emaus, si Hesus na Muling Nabuhay ay nagpakita sa iba pang mga apostol na nasa isang silid. Sa pamamagitan nito, pinatunayan ni Hesus na ang Kanyang Muling Pagkabuhay ay tunay at totoo. Iyan ang Mabuting Balita. Si Kristo Hesus na namatay sa krus ay nabuhay na mag-uli. 

Mayroong dahilan kung bakit tayong mga bumubuo sa tunay na Simbahang itinatag ni Kristo ay buong galak na nananalig at sumasampalataya sa Kanya. Ang tunay na Kristiyano ay nananalig at sumasampalataya kay Kristo nang may galak. Ang dahilan nito ay walang iba kundi si Kristong Muling Nabuhay. Siya'y nagpakasakit at namatay para sa ikapagpapatawad ng mga kasalanan. Subalit, hindi Siya nanatiling patay sapagkat muli Siyang nabuhay sa ikatlong araw. 

HINDI ISANG KASINUNGALINGAN

12 Abril 2021 

Ikalawang Linggo ng Pasko ng Muling Pagkabuhay (B) 

Linggo ng Mabathalang Awa 

Mga Gawa 4, 32-35/Salmo 117/1 Juan 5, 1-6/Juan 20, 19-31 

Isang masikat na anime na ipinalabas mula sa taong 2014 hanggang sa taong 2015 ay ang seryeng anime na pinamagatang Your Lie in April. Ang pamagat ng nasabing seryeng anime ay hango sa liham ni Kaori Miyazono kay Kousei Arima sa huling kabanata nito. Inamin ni Kaori sa liham na ito na nagsinungaling siya kay Kousei tungkol sa mga tunay niyang nararamdaman. Ang sabi ni Kaori na ang tunay niyang minahal ay walang iba kundi si Kousei mismo at hindi si Ryota Watari na isa sa kanyang mga kaibigan. Dagdag pa ni Kaori na sinabi niyang mahal niya si Ryota at pumayag siyang maging kanyang kasintahan sa totoong buhay upang mapalapit siya kay Kousei. 

Ang Ikalawang Linggo ng Pasko ng Muling Pagkabuhay ay inilaan ng Simbahan para sa pagdiriwang ng Kapistahan ng Mabathalang Awa. Alinsunod ito sa nais ng Panginoong Hesus na inilahad ni Santa Faustina sa kanyang talaarawan na ipagdiwang ang Kapistahan ng Kanyang Banal na Awa sa Linggong kasunod ng Linggo ng Pasko ng Muling Pagkabuhay. Isang napakagandang pagkakataon o oportunidad para sa ating lahat ang Linggong ito upang ituon ang ating pansin sa misteryo ng Kanyang Dakilang Awa na nakaugnay sa misteryo ng Kanyang Muling Pagkabuhay. Ang Muling Nabuhay na si Hesus ay nagpapakilala sa atin bilang Panginoon at Hari ng Awa. 

Lalong nagiging malinaw sa mga Pagbasa para sa Linggong ito ang dahilan kung bakit ang Panginoong Hesukristo ay nagpakita nang paulit-ulit sa madreng si Santa Faustina upang ibunyag sa kanya ang misteryo ng Kanyang Awa. Hindi isang kasinungalingan ang Kanyang Banal na Awa. Ang Awa ng Panginoon ay tunay at totoo. Katulad ng Kanyang Muling Pagkabuhay, ang Kanyang Banal na Awa ay isang katotohanan. Hindi ito isang kasinungalingan, kathang-isip, guni-guni, pekeng balita, o gawa-gawa lamang. Totoo ang Kanyang Banal na Awa. 

Sa Ebanghelyo, dalawang ulit na nagpakita sa mga apostol ang Panginoon. Sa pangalawang pagkakataon, ipinakita ng Panginoong Hesus na Muling Nabuhay kay Apostol Santo Tomas ang Kanyang mga kamay at paa na pinahawak rin Niya sa nasabing apostol. Sa pamamagitan nito, pinatunayan ng Panginoon na tunay nga Siyang nabuhay na mag-uli. Pinatunayan ni Hesus na ang Kanyang Muling Pagkabuhay ay totoo ngang nangyari. Hindi ito isang guni-guni. Hindi ito isang kasinungalingan. Hindi ito pekeng balita. Tunay ngang nabuhay na mag-uli si Kristo, ang Panginoon at Hari ng Awa. 

Tampok sa Unang Pagbasa ang mga gawain ng sinaunang Simbahan. Sabi sa Unang Pagbasa na ibinuhos ng Diyos ang Kanyang pagpapala sa mga apostol at sa iba pang mga bumubuo sa sinaunang Simbahan (Mga Gawa 4, 33). Isa lamang itong patunay na tunay at totoo ang ipinangangaral ng mga apostol at ng Simbahan. Si Hesus ay tunay ngang nabuhay na mag-uli. Ang Panginoon at Hari ng Awa na si Hesus ay muli ngang nabuhay sa ikatlong araw. 

Nangaral si Apostol San Juan sa Ikalawang Pagbasa tungkol kay Hesus bilang ipinangakong Mesiyas. Ipinakilala niya si Hesus bilang Mesiyas na ipinadala ng Diyos sa sanlibutan. Sabi niya sa pambungad ng kanyang pangaral, "Inaaring mga anak ng Diyos ang sumasampalatayang si Hesus ang Mesiyas" (1 Juan 5, 1). Isa lamang ang dahilan kung bakit nasabi ito ni Apostol San Juan sa simula pa lamang ng kanyang pangaral. Tunay ang Muling Pagkabuhay ng Panginoong Hesukristo. Ang Muling Pagkabuhay ni Hesus ay isa ring patunay na hindi isang kasinungalingan o gawa-gawa lamang ang Kanyang Awa. 

Hindi isang kasinungalingan ang misteryo ng Mabathalang Awa. Tunay at totoo ang misteryong ito tungkol sa Dakilang Awa ng Diyos. Ang Muling Pagkabuhay ni Hesus ang pruweba o ebidensya na tunay ang Kanyang Banal na Awa. Dahil dito, walang makapagsasabing kasinungalingan ang Banal na Awa. Matagal na itong pinatunayan ni Hesus sa pamamagitan ng Kanyang Muling Pagkabuhay. Kaya naman, masabi nawa natin nang taos-puso ang mga salitang nakasulat sa bawat larawan ng Mabathalang Awa: "Hesus, ako ay nananalig sa Iyo!"