ANG BUKAL NG TUNAY NA PAG-ASA

7 Mayo 2023 

Ikalimang Linggo ng Pasko ng Muling Pagkabuhay (A) 

Mga Gawa 6, 1-7/Salmo 32/1 Pedro 2, 4-9/Juan 14, 1-12 

Screenshot: #QuiapoChurch Official - #HolySaturday at the #EasterVigil in the Holy Night of #Easter (April 8, 2023), Quiapo Church YouTube Channel 

"Poon, pag-asa Ka namin, pag-ibig Mo'y aming hiling" (Salmo 32, 22). Nakasentro sa mga salitang ito sa Salmong Tugunan para sa Linggong ito ang taimtim na pagninilay ng Simbahan sa mismong Linggong ito. Habang patuloy na ipinagdiriwang ng Inang Simbahan nang buong galak ang Muling Pagkabuhay ng Poong Jesus Nazareno, ang ipinangakong Mesiyas at Manunubos, itinutuon ang ating mga pansin sa Kaniyang katangian bilang bukal ng tunay na pag-asa. Sa Panginoon lamang masusumpungan ang tunay na pag-asa. Dapat lamang tayo umasa sa Kanya.

Sa Unang Pagbasa at Ikalawang Pagbasa, tinalakay ang tema ng pagpapalaganap ng tunay na pag-asang nagmumula lamang kay Kristong Muling Nabuhay. Ito ang ating misyon bilang mga Kristiyanong bumubuo sa tunay at nag-iisang Simbahang itinatag ni Kristo. Dapat nating ihatid at ipalaganap sa ating kapwa ang tunay na pag-asang kaloob ng Panginoong Muling Nabuhay. Siya ang bukal ng tunay na pag-asa. Dahil una Niya itong ipinagkaloob sa atin, tungkulin naman natin bilang mga Kristiyanong bumubuo sa Kanyang Simbahan na ipalaganap ito sa kapwa, katulad na lamang ng ginawa ng Labindalawa at ng iba pang mga sinaunang Kristiyano sa Unang Pagbasa para sa Linggong ito. Nararapat lamang natin itong gawin sapagkat gaya ng sabi ni Apostol San Pedro, ang unang Santo Papa ng Simbahan, sa kanyang pangaral na inilahad sa Ikalawang Pagbasa para sa Linggong ito: "Datapwa't kayo ay isang lahing hinirang, mga saserdote ng Hari, isang bansang nakatalaga sa Diyos. Pinili kayo ng Diyos upang maging Kanya at maghayag ng [Kanyang] mga kahanga-hangang gawa" (1 Pedro 2, 9). Ito ang ating misyon bilang Simbahan. 

Ang mga salitang binigkas ng Muling Nabuhay nating Panginoon at Tagapagligtas na si Kristo, ang Nuestro Padre Jesus Nazareno, sa Ebanghelyo para sa Linggong ito ay naghahatid ng tunay na pag-asa sa atin. Pinatunayan ng Poong Jesus Nazareno sa pamamagitan ng Kanyang Krus na Banal at Muling Pagkabuhay ang mga katagang binigkas Niya sa mga apostol sa Banal na Ebanghelyo para sa Linggong ito: "Ako ang Daan, ang Katotohanan, at ang Buhay. Walang sinuman ang makapupunta sa Ama kundi sa pamamagitan Ko" (Juan 14, 6). Dahil sa Kanyang ginawa para sa atin, wala tayong dahilan upang mangamba, matakot, at mabalisa. Mayroon tayong aaasahan, lalapitan, at matatakbuhan: si Kristo, ang Poong Jesus Nazareno. Sabi nga ng Poong Jesus Nazareno sa simula ng Ebanghelyo: "Huwag kayong mabalisa" (Juan 14, 1). 

Mapalad tayo sapagkat mayroon tayong maaaring takbuhan, lapitan, at asahan sa lahat ng pagkakataon. Ang Panginoong Jesus Nazareno ay ating mapagkakatiwalaan at maaasahan sa bawat sandali ng ating buhay dito sa lupa. Habang namumuhay at naglalakbay tayo nang pansamantala dito sa mundong ito, haharap tayo sa iba't ibang mga pagsubok sa buhay. Kapag dumating ang mga oras at sandaling iyon na hindi natin matatakasan, huwag nawa nating kalimutan ang katotohanang mayroon tayong maaaring takbuhan at maaasahan. Siya'y walang iba kundi ang Mahal na Poong Jesus Nazareno, ang ipinangakong Mesiyas at Manunubos, na dumating dito sa lupa sa takdang panahon upang ipagkaloob sa atin ang tunay na pag-asang sa Kanya lamang nagmumula sa pamamagitan ng Kanyang Krus at Muling Pagkabuhay. 

Ipinapaalala sa atin sa Linggong ito kung saan nagmumula ang biyaya ng tunay na pag-asa. Sa Panginoong Jesus Nazareno lamang nagmumula ang biyayang ito. Bilang mga tumanggap sa biyayang ito, tungkulin nating ipalaganap at ihatid rin ito sa ating kapwa sa pamamagitan ng ating mga salita at gawa. 

ANG PINAKADAKILANG BIYAYA

5 Mayo 2023 

Biyernes sa Ikaapat na Linggo ng Pasko ng Muling Pagkabuhay 

Mga Gawa 11, 26-33/Salmo 2/Juan 14, 1-6 

Screenshot: #QuiapoChurch Official - #HolySaturday at the #EasterVigil in the Holy Night of #Easter (April 8, 2023), Quiapo Church YouTube Channel 

"Ako ang Daan, ang Katotohanan, at ang Buhay. Walang makapupunta sa Ama kundi sa pamamagitan Ko" (Juan 14, 6). Ito ang mga salitang binigkas ng Mahal na Poong Jesus Nazarenong Muling Nabuhay sa Ebanghelyo para sa araw na ito ng Biyernes na inilaan para sa taimtim na debosyon at pamamanata sa Kanya. Bagamat binigkas ng Muling Nabuhay na Poong Jesus Nazareno ang mga salitang ito bago Siya tuluyang dakpin at ipapatay ng Kaniyang mga kaaway sa pamamagitan ng pinakamasakit na uri ng kamatayan na walang iba kundi ang pagpako sa Kanya sa Krus na Banal, ang tema ng pamamaalam ay isinasalungguhit sa mga salitang ito na binigkas Niya sa Ebanghelyo. Ang Mahal na Poong Jesus Nazareno ay nagpapaalam sa mga apostol bago Siya dakilain sa pamamagitan ng Krus at Muling Pagkabuhay. Pagkatapos ng Krus na Banal at Muling Pagkabuhay, muli Siyang babalik sa Kanyang maluwalhati at walang hanggang kaharian sa langit kung saan luluklok Siya sa kanan ng Amang nasa langit. Subalit, hindi ito nangangahulugang tayong lahat ay tuluyan Niyang iiwan at pababayaan sapagkat ipinangako Niyang Siya'y palaging mananatiling kasama natin hanggang sa wakas ng panahon (Mateo 28, 20). 

Daan, Katotohanan, at Buhay. Ito si Kristo, ang Nuestro Padre Jesus Nazareno. Bilang ipinangakong Mesiyas at Manunubos ng sangkatauhan, ang Poong Jesus Nazareno ay ang daan, katotohanan, at buhay na ipinagkaloob sa atin ng Diyos. Siya ang daan patungo sa Amang nasa langit, ang katotohanang kaloob ng Diyos, at ang buhay ng lahat ng mga tapat na nananalig at sumasampalataya sa Kanya. Ito ang patunay na si Jesus Nazareno mismo ay ang pinakadakilang biyayang kaloob sa atin ng Ama. Kahit hindi karapat-dapat tayo sa biyayang ito na si Jesus Nazareno dahil sa ating pagiging makasalanan, niloob at minarapat pa rin ng Amang nasa langit na ipagkaloob sa tanan ang biyaya ng Kanyang pagliligtas na dumating sa mundong ito sa panahong Kanyang itinakda sa pamamagitan ng Poong Jesus Nazareno, ang Kanyang Bugtong na Anak at Pangalawang Persona ng Banal na Santatlo. 

Nakasentro sa pinakadakilang biyayang kaloob ng Diyos sa atin na walang iba kundi ang Muling Nabuhay na Nuestro Padre Jesus Nazareno, ang Daan, Katotohanan, at Buhay, ang pangaral ni Apostol San Pablo sa mga taga-Antioquia sa Unang Pagbasa para sa araw na ito. Malakas at buong kalinawang inihayag ni Apostol San Pablo sa kanyang pangaral sa mga taga-Antioquia sa Unang Pagbasa na ang Krus na Banal at Muling Pagkabuhay ng Poong Jesus Nazareno ay katuparan ng pangako ng Diyos na isang patunay ng Kanyang walang hanggan at dakilang katapatan. Bagamat hindi tayo tapat sa Kanya dahil sa ating mga kasalanan laban sa Kanya na talaga namang hindi na mabilang dahil sa sobrang dami ng mga ito, ipinasiya pa rin ng Panginoong Diyos na maging tapat sa atin. Ang patunay nito ay si Kristo Hesus mismo. Gaya ng sabi sa Salmong Tugunan para sa araw na ito: "Anak ng Diyos kailanman sa simula pa lamang sumilang" (Salmo 2, 7). Si Jesus Nazareno ay ang pinakadakilang biyaya. 

Ipinagkaloob sa atin ang Mahal na Poong Jesus Nazareno dahil sa dakilang pag-ibig, kagandahang-loob, habag, at awa ng Diyos para sa atin. Kung iaalay natin sa Kanya nang taos-puso ang ating katapatan, pananalig, pananampalataya, pagmamahal, at pagsamba sa Kanya, at papatunayan natin ito araw-araw sa pamamagitan ng ating mga salita at gawa, matatamasa natin ang biyaya ng kaligtasan at buhay na walang hanggan sa Kanyang piling sa langit magpakailanman. 

MGA SALAMIN NG MAPAGPALANG UNANG MANGGAGAWA

1 Mayo 2023 

Paggunita kay San Jose, manggagawa 

Genesis 1, 26-2, 3 (o kaya: Colosas 3, 14-15. 17. 23-24)/Salmo 89/Mateo 13, 54-58 

This faithful photographic reproduction of the painting (c. Between 1640 and 1660), Sagrada Familia en el taller de carpintero by Jerónimo Jacinto de Espinosa  (1600–1680), as well as the actual work of art itself in Museu de Belles Arts de València, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

"Hindi ba ito ang anak ng karpintero?" (Mateo 13, 55). Ito ang unang tanong binigkas ng mga taong nagtipon-tipon sa sinagogang pinuntahan ng Poong Jesus Nazareno sa Kanyang bayan sa Nazaret sa Ebanghelyo para sa araw na ito na inilaan ng Simbahan para sa paggunita sa isa sa mga pinakadakilang lalaking Santo sa kasamahan ng mga banal sa langit na walang iba kundi si San Jose, ang kabiyak ng puso ng Mahal na Inang si Mariang Birhen at Ama-Amahan ng Panginoong Jesus Nazareno. Subalit, sa araw na ito, pinagtutuunan ng pansin ang kanyang pagiging manggagawa. 

Sa Ebanghelyo para sa araw na ito, ang mga kababayan ng Poong Jesus Nazareno, mga taga-Nazaret o Nazarenong katulad Niya, ay hindi makapaniwala sa Kanya. Oo, katulad nila, taga-Nazaret rin ang Mahal na Poon. Subalit, hindi Siya pinaniwalaan at tinanggap roon. Doon Siya lumaki, sa piling ng Mahal na Inang si Mariang Birhen at ng dakilang patriarkang si San Jose na nagkayod at naghanap-buhay para sa Sagrada Familia (Banal na Pamilya) bilang isang anluwage o karpintero. Iyon nga lamang, kahit ang Panginoong Jesus Nazareno ay kababayan rin nila, hindi nila Siya tinanggap at pinaniwalaan dahil sa kakulangan ng kanilang pananalig at pananampalataya (Mateo 13, 58). Minaliit lamang nila si Jesus Nazareno. 

Tila ipinapahiwatig ng mga tanong binigkas ng mga tao sa Ebanghelyo, ang mga kababayan ni Kristo sa Nazaret, na mababa lamang ang kanilang tingin sa Kanya. Sa paningin at pananaw ng ibang mga Nazareno at Nazarena, hindi espesyal si Hesus na Anak nina Jose at Maria. Hindi Siya ang ipinangakong Mesiyas at Manunubos o kaya isang propeta man lamang. Katunayan, ipinapahiwatig rin sa Ebanghelyo na hindi nila layuning kumpirmahin ang pagkakilanlan ng Poong Jesus Nazareno ang tanong na binigkas nila. Bagkus, ipinahiwatig na tinanong nila ang nasabing tanong upang laitin si Kristo, ang Nuestro Padre Jesus Nazareno. 

Lingid sa kanilang kaalaman na ang nilalait at itinatakwil nila ay walang iba kundi ang bukal ng mga biyaya. Ang hanap-buhay o trabaho ay isang biyaya mula sa Kanya. Si San Jose na kilala ng mga taga-Nazaret bilang isang anluwage ay niloob ng Diyos na maghanap-buhay bilang isang anluwage. Anuman ang hanap-buhay ng sinumang tao dito sa mundong ito, maging ng mga naging kababayan ng Mahal na Poong Jesus Nazareno, tanging Siya mismo ang nagkaloob. Hindi nila akalaing mangangaral sa kanilang harapan ang dahilan kung bakit ang lahat ng tao ay biniyayaan ng iba't ibang hanap-buhay o trabaho na walang iba kundi ang Diyos na nagkatawang-tao para sa ikaliligtas ng sangkatauhan sa pamamagitan ng Mahal na Poong Jesus Nazareno. 

Katunayan, ang Diyos mismo ang unang manggagawa. Sa Unang Pagbasa, itinampok ang salaysay ng Kanyang paglikha sa tao sa ikaanim na araw. Anim na araw Niyang nilikha ang mundong ito. Nang malugmok ang tao sa kasalanan, agad na bumuo ng plano ang Diyos para sa ikaliligtas ng sangkatauhan. Tinupad Niya ito pagsapit ng takdang panahon sa pamamagitan ng ipinangakong Manunubos na walang iba kundi si Kristo, ang Panginoong Jesus Nazareno, na ayaw tanggapin at kilalanin ng Kanyang mga kababayan sa Nazaret sa Ebanghelyo.

Gaya ng ipinayo sa atin ni Apostol San Pablo sa alternatibong Unang Pagbasa para sa araw na ito, anuman ang gawin natin, ang ating mga responsibilidad at tungkulin sa hanap-buhay o trabaho, gawin natin ito nang may pagmamahal (Colosas 3, 23). Kung tutuusin, sa pamamagitan ng mga mismong salitang ito, inilarawan at ipinaliwanag rin ni Apostol San Pablo ang dahilan kung bakit ginawa ng Diyos ang iba't ibang mga kahanga-hangang bagay gaya na lamang ng Kanyang paglikha sa mundong ito at ang pagkaloob ng biyaya ng kaligtasan sa pamamagitan ng Krus at Muling Pagkabuhay ng Poong Jesus Nazareno. Kapag kusang-loob tayong gumawa ng mabuti sa hanap-buhay at pati na rin sa labas ng trabaho nang may pagmamahal, ang mga salita sa Salmo ay isinasabuhay at ginagawa nating isang taimtim na panalangin sa Kanya na laging nagpapakita ng Kanyang kabutihan, awa, habag, at pag-ibig na tunay ngang mula lamang sa Kanya: "Poon, kami'y pagpalain at Iyong pagtagumpayin!" (Salmo 89, 17k). Iyan ang ating Diyos. 

Dahil sa Kanyang biyaya, kabutihan, awa, habag, at pag-ibig, ipinasiya ng Diyos na gumawa ng maraming bagay para sa atin. Kusang-loob Niyang nilikha sa loob ng anim na araw ang langit at ang lupa. Ipinagkaloob Niya sa atin ang Mahal na Poong Jesus Nazareno upang maging ipinangakong Mesiyas at Manunubos ng tanan. Kaya naman, bilang mga bumubuo sa tunay at nag-iisang Simbahang itinatag ng Mahal na Poong Jesus Nazareno, marapat lamang na maging mga salamin tayo ng kabutihan, habag, pag-ibig, at awa ng Diyos na Siyang unang manggagawa sa bawat sandali ng buhay natin dito sa mundo, sa trabaho man o sa bahay. 

MABUTING PASTOL NA SIYA RING PINTUAN PATUNGO SA BUHAY NA GANAP AT KASIYA-SIYA

30 Abril 2023 

Ikaapat na Linggo ng Pasko ng Muling Pagkabuhay (A) 

Linggo ng Mabuting Pastol 

Mga Gawa 2, 14a. 36-41/Salmo 22/1 Pedro 2, 20b-25/Juan 10, 1-10 

This faithful photographic reproduction of the painting of the Good Shepherd by Bernhard Plockhorst  (1825–1907), as well as the actual work of art itself, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because of its age (This was originally published before 1923 in the UK and the US). 

Inilaan ng Simbahan ang Ikaapat na Linggo ng Pasko ng Muling Pagkabuhay para sa taimtim na pagninilay sa titulo ng Muling Nabuhay na Panginoong Jesus Nazareno bilang Mabuting Pastol. Kaya naman, ang Linggong ito ay tinatawag ring Linggo ng Mabuting Pastol. Si Kristo, ang ating butihing Poong nabuhay na mag-uli sa ikatlong araw gaya ng Kanyang ipinangako, ay ang Mabuting Pastol na ipinagkaloob sa atin ng Diyos dahil sa Kanyang kagandahang-loob, habag, pag-ibig, at awa para sa atin. Kahit hindi tayo karapat-dapat tanggapin at makinabang sa biyayang ito na tunay ngang napakahalaga at napakaganda dahil sa ating pagiging makasalanan, kusang-loob pa ring ipinasiya ng Diyos na ipagkaloob ang Poong Mesiyas at Manunubos na si Hesus upang maging ating Mabuting Pastol. 

Subalit, sa Ebanghelyo para sa pagdiriwang ng Banal na Misa sa Linggong ito, hindi inilahad ang mismong pahayag ng Muling Nabuhay na Panginoong Jesus Nazareno kung saan diretsyahan Niyang ipinakilala ang Kanyang sarili bilang Mabuting Pastol. Bagamat ang mga salitang binigkas ng Nuestro Padre Jesus Nazareno sa Ebanghelyo ay bahagi pa rin ng Kanyang pangaral tungkol sa Kanyang pagkakilanlan, misyon, at tungkulin bilang tunay at  kaisa-isang Mabuting Pastol na kaloob ng Amang nasa langit sa sangkatauhan, hindi mababasa o mapapakinggan ang mismong bahagi ng pangaral Niyang ito kung saan malakas Niyang inihayag sa mga tao na tanging Siya mismo ang Mabuting Pastol (Juan 10, 11). Ang maririnig lamang natin sa Banal na Ebanghelyo ay ang Kaniyang ginawang pagpapakilala ng sarili Niya bilang pintuang daraanan ng lahat ng mga tupang kabilang sa Kanyang kawan (Juan 10, 9). 

Kakaiba ito. Paano magiging Mabuting Pastol ang mismong pintuan ng mga tupa? Sa unang tingin, mukhang mahirap unawain kung paano magagampanan ng Mahal na Poong Jesus Nazareno nang sabay-sabay ang dalawang tungkuling ito. Ang pastol ng mga tupang kabilang sa kawan ng Diyos, ang Mabuting Pastol, ay Siya ring pintuang dinaraanan ng mga tupa?! Mahirap itong unawain sa unang tingin, lalung-lalo na para sa mga pinakamatalinong tao dito sa lupa. Kahit ang mga pinakamatalinong tao sa lupa, tiyak na mapapataas ang kanilang mga kilay at mapapakamot ng ulo sapagkat napakahirap naman talagang unawain at arukin ang mga salitang ito na malakas na binigkas ni Kristo. 

Ang Pintuan ay ang Mabuting Pastol? Talagang mahirap unawain ang paliwanag at lohikang ito ng Poong Jesus Nazareno, lalung-lalo na kapag ginamit natin ang lohika ng mundong ito. Kaya naman, ipinaliwanag ng Poong Jesus Nazareno kung paanong magkarugtong at magkaugnay ang dalawang tungkuling ito. Malakas na winika ng Panginoong Jesus Nazareno sa Kaniyang ginawang pagpapakilala ng sarili na inilahad sa tampok na salaysay sa Ebanghelyo: "Ang sinumang pumapasok sa pamamagitan Ko'y maliligtas. Papasok siya't lalabas ,at makatatagpo ng pastulan. . . Naparito Ako upang ang mga tupa'y magkaroon ng buhay - isang buhay na ganap at kasiya-siya" (Juan 10, 9-10). Ito ang dahilan kung bakit ang Pintuan at ang Mabuting Pastol ay iisa lamang. Ang Muling Nabuhay na Nuestro Padre Jesus Nazareno ay ang pinto at ang daan patungo sa walang hanggang buhay na ganap at kasiya-siya. Bilang tunay na Mabuting Pastol na Siya ring tunay na pintuang dinaraanan ng mga tupa, inaakay ng ating Muling Nabuhay na Panginoong Jesus Nazareno ang Kanyang kawan tungo sa biyaya ng buhay na walang hanggan. 

Nakasentro sa katotohanang ito tungkol sa pagkakilanlang ito ng Poong Señor ang mga pangaral ng unang Santo Papa ng Simbahan na walang iba kundi Apostol San Pedro sa Unang Pagbasa at Ikalawang Pagbasa para sa Linggong ito. Malakas niyang sinabi sa Unang Pagbasa na kusang-loob na ipinagkaloob ng Amang nasa langit ang Kanyang Bugtong na Anak at Pangalawang Persona ng Banal na Santatlo na walang iba kundi si Jesus Nazareno upang maging ipinangakong Mesiyas at Manunubos ng tanan (Mga Gawa 2, 36). Sa Ikalawang Pagbasa, isinentro ni Apostol San Pedro sa espesipikong titulo ng Mahal na Poong Señor Jesus Nazarenong Muling Nabuhay, na walang iba kundi ang titulong Mabuting Pastol, ang kanyang pangaral. Siya lamang ang dahilan kung bakit nagkaroon ng biyaya ng kaligtasan para sa atin. Ipinasiya ni Jesus Nazareno, ang Mabuting Pastol, na bigyan tayo ng kaligtasan at kalayaan. Ito'y ginawa Niya nang kusang-loob dahil sa Kaniyang tunay na dakilang kagandahang-loob, pag-ibig, habag, at awa para sa atin. 

Bilang mga Kristiyanong bumubuo sa tunay at nag-iisang Simbahang itinatag mismo ng Mabuting Pastol na si Kristo, ang Mahal na Poong Jesus Nazareno, ano nga ba'ng dapat nating gawin? Dapat tayong tumugon sa Kanyang tinig na tumatawag sa atin pabalik sa Kanya nang may pananalig at pananampalataya, gaya na lamang ng mga taong nagpasiyang maging bahagi ng Kanyang Simbahan pagkatapos ng pangaral ng unang Santo Papa ng Simbahan na si Apostol San Pedro na nakasentro sa dakilang biyaya ng kaligtasang kaloob ng Diyos sa pamamagitan ng ating Mabuting Pastol na si Jesus Nazareno, ang ipinangakong Mesiyas at Manunubos, sa Unang Pagbasa. Sa kusang-loob na pagtubos ng Diyos sa pamamagitan ng Panginoong Jesus Nazareno, ang Kanyang Bugtong na Anak, na inilarawan sa pangangaral ni Apostol San Pedro naakit ang mga tao sa Unang Pagbasa para sa Linggong ito. Kapag ipinasiya natin itong gawin at tularan, magiging bukal sa ating mga kalooban ang pagbigkas sa mga salitang inilahad sa Salmong Tugunan para sa Linggong ito: "Pastol ko'y Panginoong Diyos, hindi ako magdarahop" (Salmo 22, 1). Ito ay dahil bilang Kanyang kawan, ang lahat ng bagay ay dapat nating ipagkatiwala sa Kanya. Pinatunayan Niya ito noong ipinasiya Niya tayong iligtas sa pamamagitan ng Banal na Krus at ang maluwalhating Muling Pagkabuhay. Hindi tayo aakayin ng Mabuting Pastol na si Jesus Nazareno, ang ating Poong Mesiyas at Manunubos, tungo sa kapahamakan kundi sa kaligtasan at buhay na walang hanggan sa tunay na pastulan na walang iba kundi ang Kanyang piling sa langit magpakailanman. 

Mapalad tayo dahil ang pintuan at daan patungo sa kaligtasan at buhay na walang hanggan ay ang mismong Mabuting Pastol na walang iba kundi ang Muling Nabuhay na Nuestro Padre Jesus Nazareno. Tayong lahat ay hindi Niya aakayin at dadalhin sa kapahamakan. Bagkus, tayong lahat na bumubuo sa Kanyang kawan ay dadalhin at aakayin Niya patungo sa kaligtasan at buhay na walang hanggan. Dahil dito, marapat lamang na ihandog sa Kanya nang bukal sa ating mga loobin ang ating pananalig at pananampalataya sa Kanya. Ang ating pananalig at pananampalataya sa Kanya na tunay at tapat ay ating mapapatunayan sa pamamagitan ng pakikinig at pagsunod sa Kanyang tinig na tumatawag sa atin pabalik sa Kanya. 

NAIS NIYA TAYONG GAWING KANYANG MGA SAKSI

28 Abril 2023 

Biyernes sa Ikatlong Linggo ng Pasko ng Muling Pagkabuhay 

Mga Gawa 9, 1-20/Salmo 116/Juan 6, 52-59 

This faithful photographic reproduction of the painting (c. Between 1540 and 1545), Conversion of Saul by Andrea Schiavone (1510-1563), as well as the actual work of art itself from the Pinacoteca Querini Stampalia courtesy of the Web Gallery of Art, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Ang kaganapang isinalaysay sa Unang Pagbasa para sa araw na ito ay isang patunay na tunay ngang nabuhay na mag-uli ang Mahal na Poong Jesus Nazareno. Sa daan patungong Damasco, nakatagpo ni Saulo na taga-Tarso ang Poong Jesus Nazarenong Muling Nabuhay. Matapos ang karanasang ito kung saan nakatagpo at nakausap niya si Kristo Hesus na Muling Nabuhay nang harap-harapan sa daang patungo sa isang bayang tinatawag na Damasco, at matapos hindi makakita sa loob ng tatlong araw at gabi bago dumating si Ananias na sugo ng Panginoong Hesukristo, si Saulo na taga-Tarso ay nagbagong-buhay. Tuluyan na niyang tinalikuran ang pagiging isang taga-usig ng mga sinaunang Kristiyano at naging saksi ng Muling Nabuhay na Panginoong Jesus Nazareno. Iyan ang biyayang kaloob ng Muling Nabuhay na si Jesus Nazareno. 

Taimtim na tinatalakay at pinagninilayan ng Simbahan sa araw na ito ang biyaya ng isang bagong buhay na kaloob sa atin ng Mahal na Poong Jesus Nazarenong Muling Nabuhay. Habang namumuhay at naglalakbay tayo sa mundong ito, patuloy tayong binibigyan at inaalok ng Muling Nabuhay na Poong Jesus Nazareno na tanggapin at yakapin ang biyaya ng bagong buhay na Kanyang kaloob sa atin sa pamamagitan ng Kanyang Krus na Banal at Muling Pagkabuhay. Ito ang biyayang dulot Niya sa atin sa pamamagitan ng Misteryo Paskwal. Bagamat hindi tayo karapat-dapat, ipinasiya pa rin Niya itong kamtin para sa atin dahil sa Kanyang pag-ibig, grasya, kagandahang-loob, habag, at awa para sa atin. Nakamit Niya ito sa pamamagitan ng Banal na Krus at Muling Pagkabuhay. Iyan ang ating Poong Señor na si Jesus Nazareno. 

Katulad ng Kanyang ginawa para kay Saulo na taga-Tarso na mas kilala natin ngayon bilang si Apostol San Pablo sa Unang Pagbasa, ito ang patuloy Niyang ginagawa para sa atin, lalung-lalo na sa tuwing ipinagdiriwang ang Banal na Misa. Sa salaysay sa Banal na Ebanghelyo, inihayag ng Mahal na Poong Jesus Nazareno sa madla na Siya mismo ang tunay na pagkain at inuming mula sa langit na nagkakaloob ng buhay na walang hanggan (Juan 6, 54-55). Hindi tumitigil sa paggawa nito si Jesus Nazareno. Lagi pa rin Siya dumarating sa ating piling upang ibigay sa atin ang tunay na pagkain at inuming nagbibigay-buhay na walang iba kundi ang Kaniyang Kabanal-banalang Katawan at Dugo sa tuwing ipinagdiriwang ang Banal na Misa. Hindi nagsasawa sa paggawa nito araw-araw si Jesus Nazareno dahil nais Niya tayong baguhin at gawing banal. Kapag ginawa Niya tayong banal, magiging marapat tayong isakatuparan ang misyong Kanyang ibinibigay sa lahat ng mga Kristiyano na inilahad sa Salmo para sa araw na ito na halaw naman sa mga salitang binigkas Niya sa mga apostol matapos Siyang mabuhay na mag-uli nang maluwalhati sa ikatlong araw: "Humayo't dalhin sa tanan Mabuting Balitang aral" (Marcos 16, 15). Nais ng Muling Nabuhay na Poong Jesus Nazareno na gawin tayong mga autentiko Niyang saksi. 

Binibigyan tayo ng Muling Nabuhay na Panginoong Jesus Nazareno ng pagkakataong maging mga banal, tapat, at maaasahang mananampalatayang sumasaksi sa Kanya nang taos-puso. Ang pagkakataong ito na isa ring panibagong pagkakilanlan para sa atin na dulot ng Kanyang Krus at Muling Pagkabuhay ay atin bang tatanggapin? 

SAKSI SA KATOTOHANAN

23 Abril 2023 

Ikatlong Linggo ng Pasko ng Muling Pagkabuhay (A) 

Mga Gawa 2, 14. 22-33/Salmo 15/1 Pedro 1, 17-21/Lucas 24, 13-35 

This faithful photographic reproduction of the painting (c. Between 1560 and 1565), The Walk to Emmaus by Lelio Orsi  (1508–1587), as well as the actual work of art itself from the National Gallery, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1928. 

Hindi nagtatapos ang masayang pagdiriwang ng Pasko ng Muling Pagkabuhay. Ang masayang pagdiriwang ng Pasko ng Muling Pagkabuhay ay ipinagpapatuloy pa rin ng Inang Simbahan sa loob ng 50 araw na ito ng banal na panahong ito. Matapos man ang 50 araw na ito ng panahon ng Pasko ng Muling Pagkabuhay, walang makakapigil sa Simbahan sa masasayang pagdiriwang dahil sa Muling Nabuhay na Panginoong Jesus Nazareno. Ito ang katotohanang nagbibigay ng saysay at kabuluhan sa ating pananampalataya bilang Simbahan. Kaya tayo nagkabuklod at nagkakatipon-tipon linggo-linggo sapagkat ang Poong Jesus Nazareno ay tunay ngang nabuhay na mag-uli at hinding-hindi na mamamatay kailanman. 

Sa katotohanang ito nakasentro ang pangaral ng unang Santo Papa ng Simbahan na walang iba kundi si Apostol San Pedro sa Unang Pagbasa at Ikalawang Pagbasa. Ito ang dahilan kung bakit mayroong Simbahan. Kung hindi nabuhay na mag-uli si Kristo Hesus, ang ating Panginoon at Manunubos na ipinangako, walang Simbahan. Tayong lahat ay nakabuklod at nagtitipon-tipon bilang Simbahan linggo-linggo dahil lamang kay Kristong Muling Nabuhay. Dahil tunay ngang nabuhay na mag-uli ang Mahal na Poong Jesus Nazareno, mayroong saysay at kabuluhan ang ating pananampalataya bilang Simbahan. Gaya ng dalawang apostol na nakatagpo ang Mahal na Poong Jesus Nazarenong Muling Nabuhay at naglakbay kasama Niya sa Ebanghelyo, napuspos ng tunay na pag-asa, galak, at pananalig ang ating mga puso at isipan sa katotohanang ito na nagbibigay saysay sa ating pananampalataya bilang Simbahan. Ito ang buong galak nating patotohanan at ipapahayag bilang mga mananampalataya. 

Ang Muling Pagkabuhay ng Poong Jesus Nazareno ay ang Siya ring dahilan kung bakit buong pag-asa, galak, at pananalig nating masasambit nang taos-puso bilang mga tapat na mananampalatayang sumasaksi sa Kanya ang mga salita sa Salmong Tugunan para sa pagdiriwang ng Banal na Eukaristiya sa Linggong ito: "Ituro Mo ang landasin ng buhay kong hahantungin" (Salmo 15, 11a). Kung si Jesus Nazareno ay hindi nabuhay na mag-uli, walang saysay at kabuluhan ang mga salitang ito na isang dalangin ng pananalig at tiwala sa Kanya. Dahil dito, mapalad tayo sapagkat tunay ngang nabuhay na mag-uli ang Poong Jesus Nazareno at patuloy Siyang dumarating sa ating piling sa tuwing ipinagdiriwang ang Banal na Misa upang ibigay sa atin ang Kaniyang Kabanal-banalang Katawan at Dugo bilang tunay na pagkain at inuming espirituwal na nagbibigay ng buhay na walang hanggan upang patunayan sa atin na hindi ito guni-guni o pekeng balita. Bagkus, tunay nga Siyang nabuhay na mag-uli, gaya ng Kanyang ipinahayag bago Siya dumating sa Herusalem upang tuparin ito. 

Nais ng Mahal na Poong Jesus Nazarenong Muling Nabuhay na maging mga tapat na mananampalatayang sumasaksi sa Kanya ang bawat isa sa atin na bumubuo sa nag-iisang Simbahang Siya mismo ang nagtatag. Ang katotohanang ito ay ang mismong dahilan kung bakit tayo nananalig at sumasampalataya sa Kanya bilang Simbahan. Kaya, marapat lamang na maging mga saksi tayo ng Panginoong Jesus Nazareno sa pamamagitan ng ating mga gawa at salita, gaya ng dalawang apostol na nakatagpo Siya sa daang patungong Emaus sa Ebanghelyo. 

Muling nabuhay ang Poong Jesus Nazareno. Ito ang natatanging dahilan kung bakit lagi tayong nagtitipon-tipon linggo bilang Kanyang Simbahang tunay ngang umaasa, sumasamba, nananalig, umiibig, at sumasampalataya sa Kanya nang taos-puso.  

HINDI MABIBIGO ANG DIYOS KAILANMAN

21 Abril 2023 

Biyernes sa Ikalawang Linggo ng Pasko ng Muling Pagkabuhay 

Mga Gawa 5, 34-42/Salmo 26/Juan 6, 1-15 

This illustration is from a collection of illustrations from Sweet Publishing courtesy of FreeBibleimages (https://www.freebibleimages.org/) which are made available for free download under a Creative Commons Attribution-ShareAlike 3.0 Unported (CC BY-SA 3.0) license. 

Laging magtatagumpay ang Diyos sa pagtupad Niya sa anumang Kanyang loobin. Sa temang ito nakasentro ang pagninilay ng Simbahan sa araw na ito. Hindi nabigo ang Diyos sa tuwing Kanyang tutuparin at ipangyayari ang anumang Kanyang loobin at naisin kailanman. Kung mayroong mga pagkakataong nakakaranas ng kabiguan ang bawat tao sa kanilang mga plano, hindi iyon ang nararanasan sa Diyos. Tagumpay ang laging nakakamit ng Diyos sa tuwing natutupad at napangyayari Niya mismo ang Kanyang mga plano at kalooban. 

Ang katotohanang ito ay ang tanging dahilan kung bakit ang Pariseong ginagalang ng buong bayan na si Gamaliel ay nakiusap sa mga bumubuo sa Sanedrin na pabayaan na lamang ang mga apostol at huwag na silang pakialaman at usigin pa sa tampok na salaysay sa Unang Pagbasa para sa araw na ito. Binabalaan pa nga niya sila na kung kalooban nga ito ng Panginoong Diyos, maaaring lumitaw na Siya mismo ang buong higpit at lakas nilang tinututulan at nilalabanan (Mga Gawa 5, 39). Sa katotohanan ring ito nakasentro ang tampok na salaysay sa Ebanghelyo para sa araw na ito. Ang Panginoong Jesus Nazareno ay nagpakain ng limang libong katao sa Ebanghelyo. Sa unang bahagi pa lamang ng salaysay sa Ebanghelyo, inihayag na alam na ng Poong Jesus Nazareno kung ano ang Kanyang gagawin bilang tugon sa pangangailangan ng lahat ng mga taong nagkatipon roon (Juan 6, 6). Iyon ang nangyari. Alang-alang sa mga taong naroroon, pinarami ng Panginoong Jesus Nazareno ang limang tinapay at dalawang isda para sa mga tao. 

Kaya naman, inaanyayahan tayo ng Simbahan sa araw na ito na gawin nating taos-pusong panalangin ang mga salita sa Salmong Tugunan para sa araw na ito: "Ang tanging aking mithii'y Panginoo'y makapiling" (Salmo 26, 4ab). Sabi rin sa berso para sa Aleluya sa araw na ito na halaw sa mga salita ng Panginoong Jesus Nazareno sa ilang kung saan tatlong ulit Siyang tinukso ng demonyong si Satanas: "Ang tao ay nabubuhay sa Salita ng Maykapal na pagkaing Kanyang bigay" (Mateo 4, 4b). Tayong lahat ay pinaalalahanan sa araw na ito na hindi mabibigo ang Diyos kailanman. Ang Diyos ay laging magtatagumpay sa tuwing ang anumang Kanyang kalooban at naisin ay Kanyang tinutupad at ipinangyayari. Ito ang dapat nating hangarin at naisin bilang mga Kristiyano. Maging mga tunay na kapanig ng Panginoong Diyos. 

Hindi mabibigo ang Panginoong Diyos kailanman. Lagi Siya magtatagumpay sa lahat ng pagkakataon. Sa Kanya lamang tayo dapat manalig at umasa. 

TUNAY NGANG MAAWAIN AT MAHABAGIN ANG PANGINOON

16 Abril 2023 

Ikalawang Linggo ng Pasko ng Muling Pagkabuhay (A) 

Linggo ng Mabathalang Awa 

Mga Gawa 2, 42-47/Salmo 117/1 Pedro 1, 3-9/Juan 20, 19-31 

This faithful photographic reproduction of the painting of the Divine Mercy [c. 1930s; After Adolf Hyła (1897–1965)], as well as the work of art itself, is in the Public Domain because the copyright of this image has expired in the European Union since it was published more than 70 years ago without a public claim of authorship (anonymous or pseudonymous) and no subsequent claim of authorship was made 70 years following its publication. 

Ang Ikalawang Linggo ng Pasko ng Muling Pagkabuhay ay inilaan ng Simbahan para sa maringal na pagdiriwang ng Dakilang Kapistahan ng Mabathalang Awa. Inutos ng Muling Nabuhay na Poong Jesus Nazareno kay Santa Faustina sa isa sa Kanyang mga pagpapakita sa nasabing madre na ngayon ay kabilang na sa hanay ng mga banal sa langit na ilaan ang Ikalawang Linggo ng Pasko ng Muling Pagkabuhay para sa isang napakahalagang Dakilang Kapistahan: ang Linggo ng Mabathalang Awa. Ninanais ni Jesus Nazareno na nabuhay na mag-uli na makilala Siya ng tanan bilang Panginoong tunay na maawain, mahabagin, at mapagmahal. Kaya naman, ang Linggong ito ay ipinagdiriwang ng Simbahan nang buong galak bilang pagsunod sa utos, hangarin, at hiling ng Muling Nabuhay na Panginoong Jesus Nazareno patungkol sa misteryo ng dakila Niyang awa na isinalamin ng Kanyang Krus at Muling Pagkabuhay. 

Napapanahon at naaangkop ang mga Pagbasa para sa Linggong ito sa maringal na pagdiriwang ng Linggo ng Mabathalang Awa sapagkat ang mga ito ay nakasentro sa misteryo ng Dakilang Awa ng Panginoong Diyos. Sa pamamagitan nito, tayong lahat ay muling pinaaalalahanan ng Simbahan na tunay ngang mahabagin at maawain ang Diyos. Hindi kasintigas ng bato ang Puso ng Diyos. Bagkus, ang Kanyang Puso ay tunay ngang puspos ng pag-ibig, kagandahang-loob, habag, at awa para sa atin sa kabila ng ating mga kasalanan. Tandaan, hindi tayo maliligtas kung hindi lamang dahil sa habag at awa ng Diyos para sa atin. Kung ang Panginoon ay walang habag at awa, wala tayong kaligtasan at kalayaan. 

Sa Unang Pagbasa, inilarawan ang pagdami ng bilang ng mga taong kusang-loob na tumanggap sa pananampalatayang Kristiyano at magpabilang sa Simbahang itinatag mismo ni Kristo, ang Mahal na Poong Jesus Nazareno na Muling Nabuhay. Nangyari ang lahat ng ito dahil sa habag at awa ng Diyos. Ang bilang mga taong kusang-loob na nagpasiyang tanggapin ang pananampalatayang Kristiyano at maging kaanib at bahagi ng Simbahan ay hindi naganap dahil sa mga apostol. Bagkus, nangyari iyon dahil sa habag at awa ng Panginoong Diyos. Dahil sa habag at awa ng Panginoon, patuloy Siyang kumilos mula sa langit upang tulungan ang Kanyang Simbahan. Mga instrumento lamang ng Panginoon ang mga apostol. 

Isinentro ng unang Santo Papa ng Simbahan na si Apostol San Pedro ang kanyang pangaral at mensahe sa Ikalawang Pagbasa para sa Linggong ito sa habag at awa ng Diyos. Muli niyang ipinaalala sa lahat ng mga Kristiyano na inihahayag ng Diyos sa tanan ang Kanyang habag at awa para sa atin sa pamamagitan ng mga kahanga-hanga Niyang gawa. Ang pinakadakila Niyang gawa sa lahat ay walang iba kundi ang kusang-loob na pagligtas sa tanan sa pamamagitan ng ipinangakong Nazarenong Mesiyas at Manunubos na si Kristo Hesus. 

Tampok sa salaysay sa Ebanghelyo para sa Linggong ito ang ilan sa mga sandaling ipinasiya ng Mahal na Poong Jesus Nazareno na Muling Nabuhay na ipakita sa mga apostol ang Kanyang habag at awa sa pamamagitan ng Kanyang mga isinagawang pagpapakita sa kanila, lalung-lalo na kay Apostol Santo Tomas sa huling bahagi ng nasabing salaysay. Bagamat hindi sila karapat-dapat dahil buong takot nilang iniwan si Jesus Nazareno sa Hetsemani noong gabing ipinagkanulo Siya ni Hudas Iskariote, kusang-loob pa ring ipinasiya ng Panginoong Jesus Nazareno na Muling Nabuhay na magpakita ng habag at awa sa kanila. Kapayapaan ang Kanyang hatid sa kanila. 

Bilang tugon sa ginawang pagtupad ng Muling Nabuhay na Poong Jesus Nazareno sa kanyang tila malakas at mahigpit na kondisyon, inihayag ni Apostol Santo Tomas ang mga salitang ito: "Panginoon ko at Diyos ko!" (Juan 20, 28). Ang mga salitang ito ay sinambit niya bilang pasasalamat sa pagtulong sa kanya ng Mahal na Poong Jesus Nazareno. Dahil sa Poong Jesus Nazareno, nagbago ang kanyang pagdududa. Hindi duda ang naghari sa kanyang puso kundi pananalig at pagtitiwala sa Mahal na Poong Jesus Nazareno. Nangyari lamang ito dahil sa habag at awa ng Poong Señor. 

"Hesus, ako ay nananalig sa Iyo!" Ito ang mga salitang nakasulat sa ibaba ng bawat larawan ng Mabathalang Awa. Ang mga salitang ito ay iniutos ng Panginoong Jesus Nazareno na Muling Nabuhay kay Santa Faustina na isulat sa ibaba ng bawat imahen o larawan ng Mabathalang Awa. Tunay ngang naaangkop at napapanahon ang mga salitang ito sapagkat ipinapaalala ng mga salitang ito sa atin kung sino nga ba talaga ang dapat nating pagkatiwalaan at panaligan. Katulad ng mga apostol, lalung-lalo na rin si Apostol Santo Tomas, ang mga sinaunang Kristiyano at ang mga sumunod sa kanila bilang mga kaanib ng Simbahan, at ni Santa Faustina, manalig tayo sa Poong Jesus Nazareno na Muling Nabuhay, ang Panginoon at Hari ng Banal na Awa.

Gaya ng isinambit ng mang-aawit sa Salmong Tugunan para sa Linggong ito na inilaan para sa Dakilang Kapistahan ng Dakilang Awa ng Panginoon: "Butihing Poo'y purihin, pag-ibig N'ya'y walang maliw" (Salmo 117, 1). Ito ang dapat nating gawin nang buong pananalig sa tunay na Panginoon at Hari ng Awa na walang iba kundi si Jesus Nazareno na Muling Nabuhay. Maipahayag nawa natin sa bawat sandali ng ating buhay sa mundong ito ang taos-puso nating pananalig at pananampalataya sa Kanya na puspos ng habag at awa para sa atin.

Mapalad tayo dahil mayroon tayong Diyos na tunay ngang mahabagin at maawain sa lahat. Ipinahayag ito sa pamamagitan ng Krus na Banal at Muling Pagkabuhay ng Poong Jesus Nazareno. Kaya naman, marapat lamang na ialay natin sa Kanya nang bukal sa ating mga kalooban at isipan ang ating taos-pusong pananampalataya, pag-asa, pananalig, at pagsamba sa Kanya bilang Panginoon at Hari ng Banal na Awa. 

Poong Jesus Nazareno, Hari ng Awa, kami ay nananalig sa Iyo! 

This faithful photographic reproduction of the painting (c. Between 1610 and 1615), The Doubting Thomas which is attributed to Abraham Janssens I (1575–1632), as well as the work of art itself from the collection from Hampel Fine Arts Auctions in Munich, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

IPAGMALAKI NANG MAY GALAK

15 Abril 2023 

Sabado sa Walong Araw na Pagdiriwang ng Pasko ng Muling Pagkabuhay 

Mga Gawa 4, 13-21/Salmo 117/Marcos 16, 9-15 

This faithful photographic reproduction of the painting (c. Between 1475 and 1479) Resurrection of Christ by Giovanni Bellini (circa 1430 –1516), as well as the actual work of art itself from the Gemäldegalerie in Berlin courtesy of the Web Gallery of Art, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This work is also in the public domain in the United States because it was published (or registered with the U.S. Copyright Office) before January 1, 1928. 

Isinasalungguhit ng mga Pagbasa para sa araw na ito na nasa loob sa Walong Araw na Pagdiriwang o Oktaba ng Pasko ng Muling Pagkabuhay ang dahilan kung bakit ang Simbahan ay nagagalak at nagdiriwang habang itinutuon ang ating mga pansin sa Muling Nabuhay na Panginoong Jesus Nazareno. Muli ngang nabuhay na totoo si Jesus Nazareno. Ito ang pinakamahalagang katotohanan ng ating pananampalataya bilang mga Kristiyano. Kaya lamang naman tayo nabubuklod at tinitipon araw-araw o linggo-linggo bilang mga Kristiyanong bumubuo sa tunay at nag-iisang Simbahang si Kristo mismo ang nagtatag sapagkat tunay nga Siyang nabuhay na mag-uli. Ito ang dahilan kung bakit mayroong saysay ang ating pananampalataya bilang Simbahan. Walang saysay o kabuluhan ang lahat ng ito kung ang Panginoong Jesus Nazareno ay hindi nabuhay na mag-uli sa ikatlong araw, katulad ng Kanyang inihayag nang paulit-ulit sa mga apostol bago magtungo sa Herusalem. 

Dahil ang Poong Jesus Nazareno ay tunay ngang nabuhay na mag-uli, hindi natakot o nasindak sina Apostol San Pedro at Apostol San Juan sa mga babala ng Sanedrin sa kanila sa Unang Pagbasa. Malakas na inihayag ng dalawang apostol na ito: "Hindi maaaring di namin ipahayag ang aming nakita't narinig" (Mga Gawa 4, 20). Walang babala o banta laban sa kanilang buhay ang makakapigil sa kanila na ipalaganap sa lahat ng mga bansa sa mundo ang Mabuting Balita. Katulad ng kanilang mga kapwa apostol, handa silang ibuwis ang kanilang buhay alang-alang sa Mabuting Balita ng pagliligtas ng Diyos na inihayag Niya sa pamamagitan ng Muling Nabuhay na Poong Jesus Nazareno, ang ipinangakong Mesiyas at Manunubos. 

Katunayan, ito ang utos ng Panginoong Jesus Nazareno na Muling Nabuhay sa mga apostol sa wakas ng salaysay sa Ebanghelyo. Matapos ang mga isinagawa Niyang pagpapakita sa mga apostol at iba pang mga tagasunod katulad na lamang ni Santa Maria Magdalena sa unang bahagi ng salaysay sa Ebanghelyo, ang mga apostol ay inatasan ng Poong Jesus Nazareno na ipahayag at ipalaganap ang Mabuting Balita sa lahat ng mga bansa sa mundong ito. Inatasan ang mga apostol maging mga saksi o tagapagpatotoo ng pagtubos ng Diyos sa sangkatauhan sa pamamagitan ng Krus na Banal at Muling Pagkabuhay ni Kristo, ang Mahal na Poong Jesus Nazareno.

Ang misyon ng mga apostol ay ipinagpapatuloy ng Simbahan sa kasalukuyan. Hindi mapipigilan ang Simbahan sa pagsasakatuparan ng kanyang pangunahing misyon na ipalaganap sa lahat ng bansa sa daigdig ang Mabuting Balita ng pagliligtas ng Diyos sa sangkatauhan sa pamamagitan ng Kaniyang Bugtong na Anak at Pangalawang Persona ng Banal na Santatlo na si Kristo, ang Poong Jesus Nazareno. Nanatili pa ring tapat ang Simbahan sa misyong ito, sa kabila ng maraming ulit na pag-uusig ng mga lider sa pulitika. Sa paglipas ng panahon, maraming pulitikal na lider ang nagbalak na usigin at pabagsakin ang Simbahan. Iyon nga lamang, ang Simbahan ay nananatili pa ring matatag at patuloy na tumutupad sa misyong ibinigay ni Kristo sa mga apostol. 

Bilang mga Kristiyanong bumubuo sa Simbahan, tinatawag tayo upang maging mga saksi ng Muling Nabuhay nating Poong Jesus Nazareno. Hindi lamang ito para sa mga pari, mga obispo, mga kardinal, at ng Santo Papa lamang. Ang misyong ito ay para sa lahat ng mga Kristiyano. Marapat lamang ipahayag at ipagmalaki natin nang buong galak ang tanging dahilan kung bakit ang ating pananampalataya bilang Simbahan ay mayroong kabuluhan. Si Kristo, ang Poong Jesus Nazareno, ay ipinako sa Banal na Krus at muling nabuhay sa ikatlong araw. Hindi nanatiling patay sa loob ng libingan ang ating ipinangakong Mesiyas at Manunubos. Tunay nga Siyang nabuhay na mag-uli at hindi na Siya mamamatay kailanman. 

ANG PANGINOON IYON!

14 Abril 2023 

Biyernes sa Walong Araw na Pagdiriwang ng Pasko ng Muling Pagkabuhay 

Mga Gawa 4, 1-12/Salmo 117/Juan 21, 1-14 

This photo is from a collection of illustrations from Arabs for Christ courtesy of FreeBibleimages (https://www.freebibleimages.org/) and is made available under a Creative Commons Attribution-ShareAlike 3.0 Unported (CC BY-SA 3.0) license. 

Isa sa mga salitang binigkas ng isa sa mga alagad ng Mahal na Poong Jesus Nazareno na hindi malilimutan kailan pa man ay inilahad sa tampok na salaysay sa Ebanghelyo para sa araw na ito sa loob ng Oktaba o Walong Araw na Pagdiriwang ng Pasko ng Muling Pagkabuhay. Ang mga salitang iyon ay walang iba kundi ang mga salitang binigkas ng minamahal na alagad na si Apostol San Juan: "Ang Panginoon iyon!" (Juan 21, 7). Sa pamamagitan ng mga salitang ito, ipinakilala kung sino ang tumulong sa kanila na magkaroon ng maraming huli ng isda sa Lawa ng Tiberias. Isa lamang ang tumulong sa mga apostol na makahuli ng maraming isda sa Lawa ng Tiberias: ang Poong Jesus Nazareno na Muling Nabuhay. Muling pinatunayan ni Jesus Nazareno sa mga apostol na tunay nga Siyang nabuhay na mag-uli. Tinulungan Niya muli ang mga apostol na makahuli ng maraming isda, katulad ng Kanyang ginawa para sa kanila noong una Niya silang nakilala, tinawag, at hinirang (Lucas 5, 1-11). 

Patuloy na itinutuon ng Simbahan ang ating mga pansin sa misteryo ng dakilang tagumpay ng Diyos na nahayag sa pamamagitan ng kahanga-hangang Krus na Banal at ang maluwalhating Muling Pagkabuhay ng Mahal na Poong Jesus Nazareno. Ang dalawang ito ay hindi mapaghihiwalay. Malaki ang ugnayan ng dalawang ito. Kung walang Krus, walang Muling Pagkabuhay. Sa pamamagitan ng dalawang ito, inihayag ng Poong Jesus Nazareno sa sangkatauhan ang pag-ibig, habag, at kagandahang-loob ng Diyos na nagdudulot ng tagumpay at kaligtasan. 

Nakita ng mga apostol ang Muling Nabuhay na Poong Jesus Nazareno sa pampang, subalit hindi nila Siya nakilala. Ang Muling Nabuhay na Nuestro Padre Jesus Nazareno ay kanilang nakilala matapos ang mapaghimalang huli ng isda. Hindi sila nakahuli ng kahit isang isda noong sila lamang ang buong magdamag na dumidiskarte sa lawang yaon. Nang ipinasiya nilang sundin ang iniutos sa kanila ng Muling Nabuhay na Poong Jesus Nazareno, saka pa lamang sila nakahuli ng maraming isda. Ang minamahal na alagad na si Apostol San Juan ay ang unang alagad na nakakilala sa Panginoong Jesus Nazareno matapos ang milagrosong huli ng maraming isda sa Tiberias. 

Bukod sa pagiging mga salita na nagpapakilala sa Muling Nabuhay na Poong Jesus Nazareno, ang mga salitang ito na binigkas ni Apostol San Juan sa Ebanghelyo ay isang pahayag tungkol sa mga dakilang gawa ng Panginoong Diyos. Tila, binibigyan tayo ng paliwanag ni Apostol San Juan tungkol sa lahat ng mga kahanga-hangang gawa ng Diyos na nagaganap sa ating paligid. Maraming mga mabubuting bagay na hindi natin kayang ipaliwanag gamit ang agham o batas ng mundo. Ang tawag natin sa mga bagay na iyon ay mga kababalaghan, himala, o milagro. 

Dahil dito, buong giting at sigasig na inihayag nina Apostol San Pedro at San Juan sa harap ng Sanedrin sa Unang Pagbasa na si Jesus Nazareno mismo ang ipinangakong Mesiyas at Tagapagligtas na tunay ngang nabuhay na mag-uli matapos nila Siyang ipapatay sa pamamagitan ng pagpako sa Kanya sa kahoy ng Krus na Banal sa bundok na tinatawag na Golgota o Kalbaryo. Muli nilang ipinahayag na nakalakad ang lalaking lumpo mula pagkasilang dahil sa kapangyarihan ng Panginoong Jesus Nazareno. Ang himalang iyon ay isa lamang patunay na tunay nga namang nabuhay na mag-uli si Jesus Nazareno, katulad ng Kanyang ginawa para sa kanila sa Ebanghelyo. 

Tunay ngang nabuhay na mag-uli ang Panginoong Jesus Nazareno. Mula sa Kanyang maluwalhating kaharian sa langit, patuloy Siyang kumikilos alang-alang sa atin nang sa gayon ay makilala Siya ng lahat bilang tunay na Diyos na buhay. Buong lakas, galak, at pananalig nawa nating bigkasin ang mga salitang binigkas ni Apostol San Juan sa Ebanghelyo: "Ang Panginoon iyon!" Ang Panginoong Jesus Nazareno mismo ay ang tunay na Mesiyas at Manunubos na mapagmahal at mahabagin. 

PATUNAY NG KANYANG MULING PAGKABUHAY

13 Abril 2023 

Huwebes sa Walong Araw na Pagdiriwang ng Pasko ng Muling Pagkabuhay 

Mga Gawa 3, 11-26/Salmo 8/Lucas 24, 35-48 

This photo is from a collection of photos from Sweet Publishing courtesy of FreeBibleimages (https://www.freebibleimages.org/) which is available under a Creative Commons Attribution-ShareAlike 3.0 Unported (CC BY-SA 3.0) license.

Patuloy na sinasaliksik at pinagninilayan ng Simbahan sa araw na ito ang misteryo ng dakilang tagumpay ng Diyos na Kanyang inihayag sa pamamagitan ng Krus na Banal at ang Muling Pagkabuhay ng Nuestro Padre Jesus Nazareno. Sa pamamagitan nito, kusang-loob na ipinagkaloob ng Diyos sa tanan ang biyaya ng Kanyang pagliligtas. Ito mismo ay ang pinakamahalagang biyayang ipinagkaloob sa atin ng Diyos. Bagamat hindi tayo karapat-dapat sa biyayang ito sapagkat mga makasalanan tayo, kusang-loob na ipinasiya pa rin ng Diyos na ipagkaloob sa atin ang biyayang ito dahil tunay Niya tayong kinaaawaan, kinahahabagan, at minamahal. 

Ang salaysay sa Unang Pagbasa para sa araw na ito sa Walong Araw na Pagdiriwang na kilala rin bilang Oktaba ng Pasko ng Muling Pagkabuhay ay isang pagpapatuloy ng salaysay sa Unang Pagbasa noong nakaraang araw (Miyerkules). Matapos ihatid sa lalaking isinilang na lumpo ang biyaya ng kagalingang dulot ng Banal na Ngalan ng Muling Nabuhay na Panginoong Jesus Nazareno, ginamit ni Apostol San Pedro ang pagkakataong iyon upang mangaral at magpatotoo sa lahat ng mga naroroon sa mga oras na yaon tungkol sa Mahal na Poon. Malakas niyang inihayag sa lahat ng mga nakasaksi sa himalang yaon na gumaling ang lalaking ipinaganak na lumpo dahil kay Jesus Nazareno na Muling Nabuhay. Ang kahanga-hangang kababalaghang ito ay isa sa maraming mga patunay na tunay ngang nabuhay na mag-uli si Jesus Nazareno. 

Sa salaysay na itinampok sa Banal na Ebanghelyo para sa araw na ito, na isa ring pagpapatuloy ng salaysay sa Ebanghelyo noong nakaraang araw (Miyerkules), ang Mahal na Poong Jesus Nazareno mismo ang nagpatunay sa mga apostol na tunay nga Siyang nabuhay na mag-uli sa pamamagitan ng pagpapakita sa kanila sa silid na kanilang pinagtitipunan. Katunayan, kumain ang Poong Jesus Nazareno ng inihaw na isda sa harapan nila (Lucas 24, 41-42). Tunay ngang nabuhay na mag-uli si Kristo. Ito ang dahilan kung bakit mayroong Simbahan. Ang Mahal na Poong Jesus Nazareno ay tunay ngang nabuhay na mag-uli at hindi na mamamatay. Ipinasiya Niya itong gawin dahil tunay Niya tayong iniibig at kinahahabagan. 

Bilang mga Kristiyanong bumubuo sa Simbahan, tinatawag tayong ipagpatuloy ang isinagawa ng mga apostol katulad ni Apostol San Pedro sa Unang Pagbasa. Sumaksi at magpatotoo sa Mahal na Poong Jesus Nazareno na Muling Nabuhay. Pahintulutan natin ang Poong Jesus Nazareno na gamitin tayo bilang Kanyang instrumento upang mapatunayan Niya sa pamamagitan natin na tunay nga Siyang nabuhay na mag-uli. Tayong lahat ay Kanyang iniligtas sa pamamagitan ng Kanyang Krus na Banal at ang dakila Niyang Muling Pagkabuhay. 

DAPAT PARANGALAN AT PASALAMATAN

12 Abril 2023 

Miyerkules sa Walong Araw na Pagdiriwang ng Pasko ng Muling Pagkabuhay 

Mga Gawa 3, 1-10/Salmo 104/Lucas 24, 13-35 

This faithful photographic reproduction of the work of art (c. Between 1635 and 1650), Christ and Two Followers on the Road to Emmaus by Alonso Cano  (1601–1667), has been released by its author, Walters Art Museum, under a Creative Commons Attribution-Share Alike 3.0 Unported License (CC BY-SA 3.0) and the GNU Free Documentation License. This applies worldwide. Walters Art Museum grants anyone the right to use this work for any purpose, without condition, unless such conditions are required by law. 

Inilahad ng Salmong Tugunan para sa araw na ito ang temang nais pagtuunan ng pansin at pagnilayan ng Simbahan habang patuloy na pinagninilayan ang misteryo ng dakilang tagumpay ng Diyos na nahayag sa buong santinakpan sa pamamagitan ng maluwalhating Muling Pagkabuhay ng Nuestro Padre Jesus Nazareno. Tunay ngang nabuhay na mag-uli si Kristo. Hindi Siya nanatili sa loob ng libingan. Pinatay Siya sa pamamagitan ng pagpako sa Krus sa Kalbaryo. Subalit, nang sumapit ang ikatlong araw, nabuhay Siyang mag-uli, tulad ng Kanyang sinabi. Dahil sa Krus na Banal at Muling Pagkabuhay ng Mahal na Poong Jesus Nazareno, tayong lahat ay Kanyang iniligtas mula sa kasalanan at kamatayan. Nang isagawa Niya ito, pinatunayan rin ng Poong Jesus Nazareno ang Kanyang pagkakilanlan bilang tunay na Diyos at tunay na tao. Alang-alang sa atin, ipinasiya ng tunay na Diyos na maging taong totoo upang iligtas tayo mula sa pagkaalipin sa ilalim ng mga puwersa ng kasalanan at kamatayan sa pamamagitan ng Krus at Muling Pagkabuhay ng Mahal na Poong Jesus Nazareno. 

Ang Krus na Banal at ang Muling Pagkabuhay ng Panginoong Jesus Nazareno ay ang pinakadakilang gawa ng Diyos. Gaya ng nasasaad sa Salmo para sa araw na ito, ang lahat ng mga gawa ng Diyos ay nararapat lamang ipaalam at ibalita sa lahat (Salmo 104, 1). Sa lahat ng mga dakilang bagay na ginawa ng Diyos, ang pinakadakilang gawa ng Diyos ay walang iba kundi ang Krus na Banal at Muling Pagkabuhay ni Jesus Nazareno. Bakit? Sa pamamagitan ng Krus at Muling Pagkabuhay ni Kristo, iniligtas tayo ng Diyos mula sa kasalanan at kamatayan. Bagamat hindi tayo karapat-dapat sa biyaya ng pagliligtas ng Panginoong Diyos, ipinasiya pa rin Niyang ipagkaloob ang biyayang ito sa atin dahil sa Kanyang pag-ibig, habag, at kagandahang-loob. Noong isinagawa ito ng Diyos, pinatunayan rin Niyang Siya lamang ang tunay at nag-iisang Diyos na dapat sambahin. Tanging Siya lamang ang Diyos na nakagawa nito. 

Dahil sa pinakadakilang gawa ng Diyos, ang Krus at Muling Pagkabuhay ng Mahal na Poong Jesus Nazareno, inihayag ng mga apostol at ng mga sumunod sa kanila ang Mabuting Balita. Sa Unang Pagbasa, inihatid sa isang lalaking ipinanganak na lumpo ang Mabuting Balita sa pamamagitan ng pagpapagaling sa kanya. Nakalakad siya dahil inihatid at ipinakilala siya ni Apostol San Pedro kay Jesus Nazareno (Mga Gawa 3, 6). Gaya ng sabi ng unang Santo Papa ng Simbahan na si Apostol San Pedro, hindi siya ang dahilan kung bakit gumaling ang lalaking lumpo kundi ang Muling Nabuhay na Panginoong Jesus Nazareno (Mga Gawa 3, 12). Isa lamang siyang instrumento ni Kristong Muling Nabuhay. Sa wakas ng salaysay sa Ebanghelyo para sa araw na ito, inihayag ng dalawang apostol na naglakbay patungong Emaus ang Mabuting Balita tungkol sa Muling Pagkabuhay ni Jesus Nazareno na nagpakita sa kanila. Ang Poong Jesus Nazareno ay tunay ngang nabuhay na mag-uli. 

Bilang mga Kristiyanong bumubuo sa tunay at kaisa-isang Simbahang itinatag ng maawain, mahabagin, at mapagmahal nating Panginoong Jesus Nazareno, nararapat lamang natin Siyang parangalan at pasalamatan nang buong galak dahil Siya mismo ang may gawa ng pinakadakilang bagay. Nararapat rin lamang nating ipamalita sa tanan ang Mabuting Balitang ito. Ito ang dahilan kung bakit lagi tayong nagkakatipon bilang Simbahan. Ang bumuo at bumuklod sa atin bilang mga Kristiyanong bumubuo sa Simbahan ay walang iba kundi ang Muling Nabuhay na Poong Jesus Nazareno. Oo, namatay Siya sa Krus na Banal sa bundok ng Kalbaryo na kilala rin sa tawag na Golgota noong unang Biyernes Santo. Subalit, hindi Siya nanatiling patay sa loob ng libingan. Bagkus, nang sumapit ang ikatlong araw, muli Siyang nabuhay bilang pagtupad sa Kanyang ipinangako. Ito ang tanging dahilan kung bakit tayo nananalig at sumasampalataya sa Kanya. Dahil ang Mahal na Poong Jesus Nazareno ay tunay ngang nabuhay na mag-uli, mayroong saysay at kabuluhan ang ating pinaniniwalaan, pinananaligan, at sinasampalatayanan bilang Kanyang Simbahan. 

BIYAYANG IPINAGKALOOB DAHIL SA AWA, PAG-IBIG, AT HABAG

11 Abril 2023 

Martes sa Walong Araw na Pagdiriwang ng Pasko ng Muling Pagkabuhay 

Mga Gawa 2, 36-41/Salmo 32/Juan 20, 11-18 

This faithful photographic reproduction of the painting Noli Me Tangere by Giuseppe Cesari  (1568–1640), as well as the actual work of art itself courtesy of Sotheby's, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 70 years or fewer due to its age. 

Isang pagpapatunay ng Muling Pagkabuhay ng Panginoong Jesus Nazareno ang nais pagtuunan ng pansin at pagnilayan ng Simbahan sa araw. Habang buong galak pa rin nating ipinagdiriwang bilang Simbahan ang tagumpay ng Diyos laban sa kasamaan, kasalanan, at kamatayan sa pamamagitan ng Krus at Muling Pagkabuhay ng Poong Jesus Nazareno, inaaanyayahan tayong pagnilayan ang ilang mga sandaling kusang-loob Siyang nagbigay ng mga patunay nito sa mga taong malalapit sa Kanya, kasama rito ang ginawa Niyang pagpapakita sa Mahal na Inang si Mariang Birhen matapos ang Kanyang paglabas mula sa libingan, upang maniwala sila. 

Sa Ebanghelyo para sa araw na ito, itinampok ang pagpapakita ni Jesus Nazareno na nabuhay na mag-uli kay Santa Maria Magdalena. Umiiyak si Maria Magdalena dahil hindi niya matagpuan sa libingan ang bangkay ng Mahal na Poon. Hindi pa batid ni Maria Magdalena sa mga sandaling yaon na si Kristo ay nabuhay na mag-uli. Dahil dito, inakala niyang patay pa rin ang Poong Jesus Nazareno. Ang kanyang hangarin ay tunay ngang taos-puso at sinsero. Nais niyang makita ang bangkay ng Panginoong Jesus Nazareno upang maipahayag niya ang kanyang pag-ibig para sa Poon, kahit na patay na Siya. Tunay nga niyang hinangad na makita si Jesus Nazareno, patay man o buhay ang Panginoon. 

Batid ng Panginoong Jesus Nazareno ang hangarin ni Santa Maria Magdalena. Kaya naman, pinagbigyan Niya si Santa Maria Magdalena. Siya mismo ang nagpatunay sa katotohanang tunay nga Siyang nabuhay na mag-uli. Ang bangkay ng Mahal na Poon ay hindi ninakaw ninuman. Walang naganap na pagnanakaw. Si Jesus Nazareno ay tunay ngang nabuhay na mag-uli. Bagamat noong una, nagmukhang hardinero ang Panginoong Jesus Nazareno na Muling Nabuhay, Siya nga talaga iyon. Sa sandaling yaon, pinawi ng Panginoong Jesus Nazareno ang hapis, dalamhati, at lumbay ni Santa Maria Magdalena. Ang hapis, dalamhati, at lumbay na dala ni Magdalena sa kanyang loobin at puso ay pinalitan ng galak dahil kay Jesus Nazareno na nabuhay na mag-uli, gaya ng Kanyang ipinangako. 

Katulad ng Kanyang ginawa para kay Santa Maria Magdalena sa Ebanghelyo, tayo rin ay laging binibigyan ng Poong Jesus Nazareno na Muling Nabuhay ng pagkakataong maging mga banal na puspos ng galak na Kanyang kaloob. Binibigyan Niya tayo ng pagkakataong makita Siya magpakailanman sa Kanyang maluwalhating kaharian sa langit. Makakamit natin ito kung susundin natin ang itinuro ni Apostol San Pedro sa Unang Pagbasa na patuloy pa ring ipinapangaral ng Simbahan sa kasalukuyan. Bilang mga binyagan, dapat nating pagsisihan at talikdan ang ating mga kasalanan upang ating matanggap ang biyaya ng pagliligtas ng Diyos. Kung paano tayo nilinis mula sa dungis ng kasalanang mana noong bininyagan tayo, hayaan nating paulit-ulit tayong linisin at dalisayin ng Panginoon upang maging mga banal at kalugud-lugod tayo sa Kanyang paningin. Kapag ito ang ating ginawa, pinapatunayan natin ang ating taos-pusong pagtanggap sa pagkakataong ibinibigay sa atin ng Panginoong Diyos upang tanggapin ang ating bagong buhay at pagkakilanlan bilang mga kapanig ni Kristo. Ito ang biyayang laging ipinagkakaloob sa atin ng Panginoong Jesus Nazareno na Muling Nabuhay. Lagi Niya itong ginagawa dahil sa Kanyang awa, pag-ibig, at habag, gaya ng inilalarawan sa Salmo para sa araw na ito. 

Dahil sa awa, pag-ibig, at habag ng Diyos, ipinasiya Niyang kamtin ang tagumpay sa pamamagitan ng Panginoong Jesus Nazareno na Muling Nabuhay. Sa pamamagitan ng tagumpay na ito na inihayag ng Banal na Krus at Muling Pagkabuhay ng Poong Jesus Nazareno na Muling Nabuhay, tayong lahat ay binigyan Niya ng pagkakataong tanggapin nang buong galak at pananalig ang biyaya ng bagong buhay bilang mga Kristiyanong bahagi ng pamilya ng Diyos. Tinatanggap rin natin sa pamamagitan nito ang paaanyaya ng Diyos na makapiling Siya sa Kanyang maluwalhating kaharian sa langit magpakailanman kapag nagwakas ang ating buhay sa mundong ito.