ANG MGA SUMUSUNOD SA KANIYA NANG TAOS-PUSO AY DUMARAKILA SA KANIYA NANG TAOS-PUSO

11 Pebrero 2026 

Paggunita sa Mahal na Birheng Maria ng Lourdes 

Isaias 66, 10-14k/Judith 13/Juan 2, 1-11 

Larawan: Virgilio Tojetti (1851–1901). Apparition of Virgin Mary to Bernadette Soubirous in the Grotto at Massabielle near Lourdes (c. 1877). Dorotheum. Public Domain. 

"Gawin ninyo ang anumang sabihin Niya sa inyo" (Juan 2, 5). Ang mga salitang ito ay binigkas ng Mahal na Birheng Maria sa mga naglilingkod sa kasalan sa Cana matapos iparating sa Mahal na Poong Jesus Nazareno ang problemang kanilang hinaharap. Sa nasabing kasalan, isinagawa ng Mahal na Poong Jesus Nazareno ang Kaniyang unang himala. Nangyari ito sapagkat ang tunay na Reyna na walang iba kundi ang Mahal na Birheng Maria ay nagpaabot ng isang kahilingan sa tunay na Hari na walang iba kundi ang Mahal na Poong Jesus Nazareno na kaniyang minamahal na Anak. 

Ang mga salitang binigkas ng Mahal na Birheng Maria sa mga naglilingkod sa kasalan sa Cana na itinampok at inilahad sa Ebanghelyo ay patuloy na umaalingawngaw sa kasalukuyang panahon. Hindi lamang para sa mga masisipag na lingkod sa kasalang naganap sa Cana ang mga salitang ito. Bagkus, para rin sa atin ang mga salitang ito. Itinuturo sa atin ng Mahal na Birheng Maria sa pamamagitan ng mga salitang ito na buong linaw niyang binigkas sa Ebanghelyo kung paanong magiging tapat, busilak, at dalisay ang pagdakila sa Mahal na Poong Jesus Nazareno. 

Sa Unang Pagbasa, inihayag ng Panginoong Diyos na magdudulot Siya ng tunay na galak sa lahat. Nakasentro ang Salmong Tugunan sa galak na idinulot ng Diyos nang kusang-loob sa Kaniyang bayan sa pamamagitan ng dakilang babaeng pumaslang sa pinuno ng mga hukbong Asirio na si Holofernes. Itinampok at inilahad sa Ebanghelyo ang unang himala ng Poong Jesus Nazareno. Dahil sa himalang isinagawa ng Poong Jesus Nazareno, nagkaroon ng galak at tuwa ang ikinasal at maging ang lahat ng mga dumalo sa nasabing kasalan. 

Bilang tugon sa pasiyang ito ng Poong Jesus Nazareno na dulutan tayo ng tunay na galak at tuwa dahil sa Kaniyang dakilang pag-ibig, kagandahang-loob, habag, at awa para sa atin, dapat natin Siyang dakilain. Tinuturuan tayo ng Mahal na Birheng Maria kung paano natin Siya dapat dakilain nang taos-puso. Makinig at sumunod sa Poong Jesus Nazareno nang taos-puso. 

DINARAKILA SIYA NG LAHAT NG MGA NAGPAPASIYANG IPAKITA SIYA

8 Pebrero 2026 

Ikalimang Linggo sa Karaniwang Panahon (A)

Isaias 58, 7-10/Salmo 111/1 Corinto 2, 1-5/Mateo 5, 13-16 

Buong linaw na inihayag ng Poong Jesus Nazareno sa Ebanghelyo na asin at ilaw ng sanlibutan ang Kaniyang mga tagasunod. Tiyak na marami ang magtataka kung bakit ang mga salitang ito ay binigkas Niya sa Kaniyang pangaral sa Ebanghelyo. Hindi ba ipinakilala ng Poong Jesus Nazareno bilang liwanag ng sanlibutan (Juan 8, 12)? Isa pa, hindi ba dapat nakasentro lamang sa Poong Jesus Nazareno ang buhay ng lahat ng mga mananampalatayang bumubuo sa tunay at nag-iisang Simbahang itinatag Niya? Kung tutuusin, tanging Siya lamang ang dahilan kung bakit may kahulugan ang buhay natin. Ano ba ang tanging dahilan kung bakit Niya nasabi ang pahayag na ito? 

Sa pahayag ng Panginoong Jesus Nazareno na itinampok at inilahad sa Ebanghelyo, buong linaw Niyang inilarawan ang ating misyon bilang mga Kristiyano. Ang lahat ng mga Kristiyano ay bumubuo sa tunay at nag-iisang Simbahang Kaniyang itinatag sa ibabaw ng bato na walang iba kundi ang unang Santo Papa na si Apostol San Pedro. Niloob ng Mahal na Poong Jesus Nazareno na hirangin, atasan, at italaga silang lahat upang maging asin at ilaw ng sanlibutan. Iyon nga lamang, kahit na ito ang misyong Kaniyang bigay sa kanila, hindi ito nangangahulugang isinusuko na Niya nang tuluyan ang titulo Niya bilang tunay na liwanag ng mundo. Nananatili pa rin bilang tunay na liwanag ng mundo ang Nuestro Padre Jesus Nazareno.

Kung hindi naman isinusuko at inililipat ng Poong Jesus Nazareno ang Kaniyang titulo bilang tunay na liwanag ng mundo at ang Kaniyang puwesto bilang sentro ng buhay ng bawat isa sa atin, para saan pa nga ba ang misyong ibinigay sa atin? Bakit ba Niya tayo hinirang at itinalaga bilang asin at ilaw ng mundo? Ano nga ba talaga ang ibig sabihin ng Poong Jesus Nazareno noong Kaniyang inihayag sa Kaniyang pangaral na itinampok at inilahad sa Ebanghelyo na tayong lahat ay ang asin at ilaw ng mundo? 

Makakatulong ang mga salitang binigkas ng Mahal na Poong Jesus Nazareno sa mga apostol matapos Niyang hugasan ang kanilang mga paa noong bisperas ng Kaniyang pagpapakasakit at pagkamatay sa Krus na Banal sa pagsasaliksik ng mensaheng nais Niyang iparating sa Kaniyang pangaral tungkol sa misyon ng Kaniyang Simbahan na itinampok at inilahad sa Ebanghelyo. Sabi ng Mahal na Poong Jesus Nazareno nang buong linaw: "Kung Akong Panginoon ninyo at Guro ay naghugas ng inyong mga paa, dapat din kayong maghugasan ng paa. Binigyan Ko kayo ng halimbawa at ito'y dapat ninyong tularan" (Juan 13, 13-15). Ito ang ibig Niyang sabihin noong inihayag Niya sa pangaral na itinampok at inilahad sa Ebanghelyo na ang Simbahang itinatag Niya ay ang asin at ilaw ng mundo. Ang ipinangakong Mesiyas at Manunubos na walang iba kundi ang Mahal na Poong Jesus Nazareno ay ang tunay na liwanag ng mundo. Siya rin lamang ang nagbibigay ng kahulugan at kulay sa buhay ng bawat isa sa atin na bumubuo sa Kaniyang Simbahan. Bilang mga bumubuo sa Kaniyang Simbahan, dapat gawin rin natin ang ginawa ng Mahal na Poong Jesus Nazareno para sa ating kapwa-tao. Sa pamamagitan nito, ipinapakita natin Siya sa ating kapwa-tao. Kapag ito ang ipinasiya nating gawin, pinatutunayan nating tunay ngang bukal sa ating mga puso at loobin ang debosyon at pamamanata natin sa Mahal na Poong Jesus Nazareno. 

Nakatuon sa pagbabahagi ng tunay na liwanag na nagmula sa langit ang mga salita sa Unang Pagbasa. Buong linaw na inihayag ng Diyos sa pamamagitan ng Kaniyang propetang hinirang na si Propeta Isaias na ipinapalaganap ng bayang Kaniyang hirang ang tunay na liwanag na nagmumula lamang sa Kaniya sa pamamagitan ng tapat at taos-pusong pamumuhay ayon sa Kaniyang mga utos at loobin. Isinalungguhit nang buong linaw ng mang-aawit na tampok sa Salmong Tugunan ang kahanga-hangang kapangyarihan ng tunay na liwanag nagmumula lamang sa Panginoong Diyos. Hindi mababalot ng dilim ang mga tatanggap sa tunay na liwanag nang taos-puso. Buong linaw na ipinaliwanag ni Apostol San Pablo kung paanong napawi nang tuluyan ang kadiliman. Ang tunay na liwanag na si Jesus Nazareno ay nagdulot ng kaligtasan sa tanan sa pamamagitan ng Kaniyang Kabanal-Banalang Krus at Muling Pagkabuhay. Inihayag Niya sa lahat sa pamamagitan ng Kaniyang Misteryo Paskwal ang Kaniyang dakilang pag-ibig, kagandahang-loob, biyaya, habag, at awa. 

Ang tunay na deboto ni Jesus Nazareno ay hindi pasikat. Hindi sila pabida. Hindi sila mang-aagaw-eksena. Hindi sila maramot. Bagkus, ipinapakita nila si Jesus Nazareno sa lahat. Buong kababaang-loob nila Siyang ipinapakita sa lahat sa pamamagitan ng kanilang mga salita at gawa. Sa pamamagitan nito, ang tunay na liwanag na walang iba kundi si Jesus Nazareno ay kanilang dinarakila nang taos-puso. 

KAILANGANG MAGING PALAGIAN ANG TAOS-PUSONG PAGDAKILA SA POONG JESUS NAZARENO

6 Pebrero 2026 

Paggunita kina San Pedro Bautista, San Pablo Miki, at mga kasama, mga martir 

Sirak 47, 2-13 (gr. 2-11)/Salmo 17/Marcos 6, 14-29 

Larawan: Gérard Douffet (1594–1660/1661), The Beheading of Saint John the Baptist (c. Between 1614 and 1660). Cambi auction in Milan of 13 December 2019 lot 70. Public Domain.

Itinampok at inilahad sa Salmong Tugunan ang isang paanyaya. Ang mang-aawit na tampok sa Salmong Tugunan ay nagpaabot ng isang paanyaya para sa lahat. Hindi ito para sa mga piling tao, lalung-lalo na para sa mga nasa itaas ng lipunan. Bagkus, ang kaniyang paanyaya na sentro ng kaniyang papuring awitin ay para sa lahat. Walang mga ekslusibo. Ito ay para sa lahat. Anuman ang estadong kanilang kinabibilangan sa lipunan, kasama pa rin sila sa mga inaanyayahan. Buong lugod niyang inaanyayahan ang lahat upang dakilain ang Diyos nang taos-puso. 

Nakatuon sa pasiya ni Haring David na dakilain ang Diyos nang taos-puso sa bawat yugto at sandali ng kaniyang buhay sa lupa ang pangaral sa Unang Pagbasa. Ito ang kaniyang tugon sa Diyos na laging nagpahayag ng dakilang pag-ibig, kagandahang-loob, habag, at awa sa kaniya sa pamamagitan ng mga kahanga-hangang gawa. Ang dakilang pag-ibig, kagandahang-loob, habag, at awa ng Diyos na ipinamalas Niya sa pamamagitan ng Kaniyang mga kahanga-hangang gawa ay hindi binaon sa limot ni Haring David kailanman. Sa Ebanghelyo, inilarawan ang taliwas nito. Walang puwang o halaga para kay Herodes Antipas ang biyaya ng Diyos. Katunayan, ipinabilanggo pa nga ni Herodes Antipas si San Juan Bautista dahil walang takot niyang ipinahayag na isang malaking kasalanan sa paningin ng Diyos ang pagsasama nina Herodes Antipas at Herodias. Hindi nagtagal at iniutos ni Herodes Antipas sa kaniyang mga tauhan na pugutan ng ulo ang propetang kaniyang ipinabilanggo na si San Juan Bautista bilang tugon sa hiling ng anak ng babae ni Herodias na kinakasama niya na nagsayaw para sa kaniya sa isang piging para sa kaniyang kaarawan. 

Gaano man kahirap itong gawin, dapat nating piliin ang Diyos. Dapat lagi natin Siyang dakilain nang taos-puso sa pamamagitan ng ating mga salita at gawa. Mahahayag sa pamamagitan ng taos-pusong pagdakila sa Kaniya ang pagiging taos-puso, dalisay, at busilak ng ating debosyon at pamamanata sa Poong Jesus Nazareno. 

ANG TUNAY NA HARING DINARAKILA NATIN NANG TAOS-PUSO AY ANG TUNAY NA LIWANAG

2 Pebrero 2026 

Kapistahan ng Pagdadala kay Jesus Nazareno na Panginoon sa Templo 

Malakias 2, 1-4/Salmo 23/Hebreo 2, 14-18/Lucas 2, 22-40 (o kaya: 2, 22-32) 

Larawan: "Presentation of Jesus at the Temple" (c. 17th century). 17th century European school. Palácio do Correio Velho. Public Domain. 

Nakatuon ang Kapistahan ng Pagdadala kay Jesus Nazareno na Panginoon sa Templo sa Kaniyang pagkakilanlan bilang tunay na liwanag. Ang tunay na liwanag ay higit na dakila kung ihahalintulad ito sa liwanag na dulot ng daigdig. Subalit, hindi lamang ito isang kakaibang liwanag. Bagkus, si Jesus Nazareno mismo ay ang tunay na liwanag. Kusang-loob na ipinasiya ni Jesus Nazareno na ipagkaloob ang Kaniyang sarili sa atin bilang tunay na liwanag na papawi sa kadilimang bumabalot sa atin. 

Sa Unang Pagbasa, inihayag ng Panginoong Diyos na darating ang takdang panahon kung kailan bigla Siyang darating sa Kaniyang templo (Malakias 3, 1). Nakasentro sa pagiging tunay na Hari ng Panginoong Diyos ang papuring awitin ng mang-aawit na tampok sa Salmong Tugunan. Ang katuparan ng pangakong binitiwan ng Panginoong Diyos sa pamamagitan ni Malakias na Kaniyang hirang na propeta sa Unang Pagbasa ay buong linaw na inilarawan sa pangaral ng manunulat ng Sulat sa mga Hebreo na itinampok at inilahad sa Ikalawang Pagbasa. Tinupad ng Diyos ang pangakong paulit-ulit Niyang binitiwan sa Lumang Tipan nang sumapit ang panahong itinakda Niya sa pamamagitan ng Kaniyang Bugtong na Anak na walang iba kundi ang Nuestro Padre Jesus Nazareno. Buong linaw na ipinamalas ng Diyos sa tanan ang Kaniyang pag-ibig, kagandahang-loob, habag, at awa na tunay ngang dakila sa pamamagitan ng gawang ito na tunay ngang kahanga-hanga. Sa Ebanghelyo, ipinahayag nang buong linaw ni Simeon na ang Banal na Sanggol na kalong niya sa mga sandaling yaon na walang iba kundi ang Nuestro Padre Jesus Nazareno ay ang tunay na liwanag. Nahayag sa lahat nang buong linaw sa pamamagitan Niya ang pag-ibig, kagandahang-loob, habag, at awa ng Diyos na tunay ngang dakila at kahanga-hanga.

Dahil sa Kaniyang pag-ibig, kagandahang-loob, habag, at awa na tunay ngang dakila at kahanga-hanga, ipinasiya ng tunay na Hari na walang iba kundi ang Poong Jesus Nazareno na ipagkaloob sa atin ang Kaniyang sarili bilang tunay na liwanag. Hindi na tayo mga alipin ng kadiliman dahil sa Kaniya. Siya na mismo ang pumawi sa dilim na bumabalot sa tanan. Kaya naman, bilang tugon, lagi natin dapat Siyang patuluyin sa ating buhay bilang ating Hari. Ang mga nagpapatuloy at tumatanggap sa Kaniya nang may taos-pusong kababaang-loob ay dumarakila sa Kaniya nang taos-puso. Ito ang nararapat gawin bilang mga deboto ng tunay na Hari na walang iba kundi ang Poong Jesus Nazareno.

DINARAKILA SIYA NANG TAOS-PUSO NG MGA MABABANG-LOOB

1 Pebrero 2026 

Ikaapat na Linggo sa Karaniwang Panahon (A) 

Sofonias 2, 3; 3, 12-13/Salmo 145/1 Corinto 1, 26-31/Mateo 5, 1-12a 

SCREENSHOT: #QuiapoChurch 3PM LIVE ONLINE MASS • 18 JANUARY 2026 • Feast of the STO. NIÑO (Quiapo Church YouTube channel) 

Ang pangaral ng Nuestro Padre Jesus Nazareno tungkol sa mga tunay na mapalad sa paningin ng Diyos ay itinampok at inilahad sa Ebanghelyo. Bagamat nahahati sila sa walong pangkat, isa lamang ang katangiang kanilang ipinahahayag. Kababaang-loob na taos-puso ang kanilang inihahayag. Ito ang dahilan kung bakit kinalulugdan sila ng Diyos. Tunay ngang nalulugod nang lubos ang Diyos na Kataas-taasan sa mga taong inilarawan ng Nuestro Padre Jesus Nazareno sa Kaniyang pangaral sa Ebanghelyo sa Linggong ito. Sa pamamagitan ng kanilang kababaang-loob, dinarakila nila nang may taos-pusong kababaang-loob ang Kataas-taasang Diyos. 

Inilarawan sa Unang Pagbasa, Salmong Tugunan, at Ikalawang Pagbasa kung gaano kalaki ang tuwa ng Diyos sa tuwing ang mga mababang-loob ay Kaniyang nasisilayan mula sa Kaniyang maringal na trono sa Kaniyang maluwalhating kaharian sa langit. Lubusang natutuwa sa mga mababang-loob ang Diyos dahil taos-puso ang kanilang pagdakila sa Kaniya. Kaya nga, buong linaw na hinimok ang mga mababang-loob na hanapin at lapitan ang Diyos sa Unang Pagbasa. Buong linaw na inihayag sa Salmong Tugunan ang pasiya ng Diyos na maging hari ng mga mababang-loob. Dahil dito, may maaasahan ang mga may kababaang-loob sa bawat sandali. Ang tunay na Hari na walang iba kundi ang Kataas-taasang Diyos ay kanilang maaasahan sa bawat oras at sandali ng kanilang pansamantalang paglalakbay sa daigdig. Nakatuon ang pangaral ni Apostol San Pablo sa Ikalawang Pagbasa sa pasiya ng Diyos na maging malapit sa lahat ng mga mababang-loob. Sa pamamagitan ng pagpili, paghirang, at pagtalaga sa kanila, buong linaw Niyang inihayag na nalulugod Siya sa kanila. 

Nalulugod nang lubos sa mga mababang-loob ang Diyos. Bukal sa kanilang mga puso at loobin ang kanilang pagdakila sa Kaniya. Ang Diyos ay palagi nilang dinarakila nang taos-puso sa pamamagitan ng mga salita at gawa. Ito ang dapat nating gawin bilang mga deboto ng Mahal na Poong Jesus Nazareno. 

BUMABA UPANG TAYONG LAHAT AY GAWING DAKILA KATULAD NIYA

30 Enero 2026 

Biyernes ng Ikatlong Linggo sa Karaniwang Panahon (II) 

2 Samuel 11, 1-4a. 5-10a. 13-17/Salmo 50/Marcos 4, 26-34 

SCREENSHOT: 07 January 2026 (Miyerkules) | PABIHIS sa MAHAL na POONG JESUS NAZARENO (Quiapo Church YouTube channel) 

Ang mga kasalanan ni Haring David ay inilahad sa Unang Pagbasa. Hindi lamang siya nakiapid. Iniutos rin niyang ipapatay ang kabiyak ng puso ng babaeng si Bat-seba na si Urias na kaniyang tapat na kawal. Sa kaniyang sulat sa pinuno ng mga hukbo na si Joab, iniutos niyang umurong ang mga kawal sa gitna ng matinding labanan nang sa gayon ay mamatay si Urias. Nakatuon naman sa habag at awa ng Diyos ang awit na itinampok at inilahad sa Salmong Tugunan. Subalit, sa salaysay sa Ebanghelyo, ang Poong Jesus Nazareno ay nangaral tungkol sa kaharian ng Diyos sa pamamagitan ng mga talinghaga. Katunayan, ang mga talinghagang Kaniyang isinaysay sa mga tao sa tampok na salaysay sa Ebanghelyo ay tungkol sa paglago ng isang binhi at ng isang butil ng mustasa. 

Marahil mapapatanong ang ilan sa atin tungkol sa ugnayan ng mga ito sa isa't isa. Sa unang tingin, parang wala namang kinalaman ang mga talinghagang isinalaysay ng Poong Jesus Nazareno sa mga tao sa Ebanghelyo. Ano ang ugnayan ng mga binhing itinanim sa lupa sa kasalanan ni Haring David sa Unang Pagbasa? Tila wala sa lugar ang aral na itinuro ng Poong Jesus Nazareno sa Ebanghelyo sa temang isinalungguhit sa Unang Pagbasa at sa Salmong Tugunan. Nagmumukhang pinili na lamang ito dahil wala nang natitirang oras at kailangan nang ipalathala. 

Inilarawan ng Mahal na Poong Jesus Nazareno nang buong linaw sa pamamagitan ng mga talinghagang Kaniyang isinaysay sa mga tao sa Ebanghelyo ang bukod-tanging dahilan kung bakit Siya naparito. Naparito ang Mahal na Poong Jesus Nazareno nang kusang-loob upang tayong lahat ay dakilain, katulad ng mga binhing itinanim sa lupa sa Ebanghelyo. Ang mga ito ay hindi nanatiling mga binhi. Bagkus, nang sumapit ang takdang panahon, naging mga malalaking puno ang mga binhing ito. 

Upang magawa ito, kinailangan ng Mahal na Poong Jesus Nazareno na bumaba mula sa langit. Iniwan Niya nang pansamantala ang Kaniyang maluwalhating kaharian sa langit taglay ang taos-pusong kababaang-loob upang tayong lahat ay gawing dakila. Hindi Niya pinabayaang mapahamak tayong lahat nang tuluyan dahil tayong lahat ay nalugmok sa kasalanan. Bagkus, ipinasiya Niya tayong iligtas upang tayong lahat ay gawing dakila katulad Niya. Patunay lamang ito ng Kaniyang pag-ibig, habag, at awa. 

Dahil sa Kaniyang dakilang pag-ibig, kagandahang-loob, habag, at awa para sa tanan, bumaba mula sa langit ang Mahal na Poong Jesus Nazareno upang ang bawat isa sa atin ay gawing dakila sa pamamagitan ng pagligtas sa atin. Ito ang bunga ng Banal na Krus at Muling Pagkabuhay ng Mahal na Poong Jesus Nazareno. Tayong lahat ay may pagkakataong maging banal at dakila dahil ito ang nais Niyang gawin sa atin. Nais ng Mahal na Poong Jesus Nazareno na gawin tayong banal at dakila katulad Niya. 

Kung ang ating debosyon at pamamanata sa Panginoong Hesukristo, ang Nazareno, ay tunay ngang bukal sa ating mga puso at kalooban, bubuksan natin ang ating mga puso at sarili sa biyaya ng pagbabagong Kaniyang dulot. Pahihintulutan natin Siyang baguhin tayo upang tayong lahat ay Kaniyang gawing banal at dakila katulad Niya na Siya na may ibig isagawa ito. Ito ang magpapatunay na tunay ngang bukal sa puso at loobin ang ating debosyon sa Kaniya. Ang mga tunay na deboto ng Mahal na Poong Jesus Nazareno ay laging nagbubukas ng puso at sarili sa Kaniya at sa Kaniyang mga utos at loobin. Tapat silang nakikinig at sumusunod sa Kaniya. Sa pamamagitan nito, dinarakila nila Siya nang taos-puso. 

HINDI IPINAGKAIT NG ATING DINARAKILA ANG KANIYANG SARILI

25 Enero 2026 

Ikatlong Linggo sa Karaniwang Panahon (A) 

Isaias 8, 23b-9, 3/Salmo 26/1 Corinto 1, 10-13. 17/Mateo 4, 12-23 (o kaya: 4, 12-17) 

Screenshot: 29 DISYEMBRE 2025 (LUNES) | PABIHIS sa MAHAL na POONG JESUS NAZARENO (Quiapo Church YouTube Channel).  

Ang mga Pagbasa para sa Linggong ito ay nakatuon sa pag-ibig, kagandahang-loob, habag, at awa ng Diyos. Ipinamalas Niya ito sa lahat sa pamamagitan ng Poong Jesus Nazareno. Dumating ang Poong Jesus Nazareno sa daigdig upang ipamalas ang pag-ibig, kagandahang-loob, habag, at awa ng Diyos na tunay ngang kahanga-hanga at dakila sa pamamagitan ng Kaniyang Krus na Banal at Muling Pagkabuhay. Kahit na walang makakapantay o makahihigit sa Kaniya dahil Siya mismo ay ang pinakadakila sa lahat, ipinasiya pa rin ng Poong Jesus Nazareno na bumaba mula sa langit upang maging ipinangakong Mesiyas at Manunubos ng lahat. 

Sa Unang Pagbasa, ipinakilala bilang tunay na liwanag na magliligtas sa lahat ng mga namumuhay bilang mga alipin ng kadiliman ang ipinangakong Mesiyas. Dahil sa pag-ibig, kagandahang-loob, habag, at awa ng Diyos, darating Siya sa mundo sa takdang panahon upang idulot sa lahat ng tao ang biyaya ng tunay na liwanag at kaligtasang tanging sa Kaniya lamang nagmumula sa pamamagitan ng ipinangakong Mesiyas at Manunubos na walang iba kundi ang Mahal na Poong Jesus Nazareno. Nakasentro sa dakilang biyayang ito ng Diyos ang mga salita ng mang-aawit sa Salmong Tugunan. Buong linaw namang isinalungguhit ni Apostol San Pablo sa Ikalawang Pagbasa na hindi dapat ipagpalit ang Mahal na Poong Jesus Nazareno. Wala Siyang dapat maging kaagaw. Kailangan Siyang dakilain nang taos-puso. 

Tampok sa salaysay sa Ebanghelyo ang simula ng ministeryo ni Jesus Nazareno. Sa simula ng Kaniyang pampublikong ministeryo, buong linaw Niyang isinalungguhit ang halaga ng taos-pusong pagsisisi sa kasalanan at pagbabalik-loob sa Diyos. Dalisay na puso at loobin ang hanap ng Diyos sa atin. Ito ang dapat nating ihandog sa Kaniya na kusang-loob na nagpasiyang si Jesus Nazareno ay isugo sa lupa upang idulot sa ating lahat ang tunay na liwanag at kaligtasan.

Dinarakila natin ang kusang-loob na nagkaloob ng buo Niyang sarili para sa ikaliligtas ng tanan. Hindi Siya natakot bumaba mula sa langit upang tayong lahat ay tubusin sa pamamagitan ng Kaniyang Krus na Banal at Muling Pagkabuhay. Bagkus, bumaba sa lupa upang iligtas tayong lahat mula sa mga puwersa ng kadiliman at kasalanan ang Mahal na Poong Jesus Nazareno na dinarakila natin nang taos-puso. Patunay lamang ito ng Kaniyang dakilang pag-ibig, kagandahang-loob, habag, at awa. 

Kung paanong hindi ipinagkait ng Mahal na Poong Jesus Nazareno ang Kaniyang sarili sa atin dahil sa Kaniyang dakilang pag-ibig, kagandahang-loob, habag, at awa, huwag nating ipagkait sa Kaniya ang ating mga abang sarili. Pagsisihan natin at talikdan ang makasalanang pamumuhay at magbalik-loob tayo sa Kaniya. Hayaan nating dalisayin at pabanalin Niya ang ating mga puso at loobin. Ito ang magpapatunay na ang ating debosyon at pamamanata sa Kaniya ay taos-puso. 

ANG DINARAKILA NANG TAOS-PUSO AY DAPAT IPAKILALA

23 Enero 2026 

Biyernes ng Ikalawang Linggo sa Karaniwang Panahon (II) 

1 Samuel 24, 3-21/Salmo 56/Marcos 3, 13-19 

Larawan: Bartolomé Esteban Murillo (1617–1682), Saint Francis embracing Christ on the Cross (c. 1668-1669). Museo de Bellas Artes de Sevilla. Public Domain.

Ang paghirang ng Poong Jesus Nazareno sa 12 apostol ay itinampok at inilahad sa salaysay sa Ebanghelyo. Bilang Kaniyang mga apostol, ibabahagi sa kanila ng Poong Jesus Nazareno ang lahat ng mga aral na kanila namang ibabahagi sa lahat ng tao sa lupa pagdating ng takdang panahon. Huhubugin sila ng Poong Jesus Nazareno bilang paghahanda para sa pagtupad ng misyong ibibigay Niya sa kanila. Kapag natapos na Niyang tuparin ang Kaniyang misyon bilang ipinangakong Mesiyas at Manunubos na kusang-loob na isinugo ng Diyos sa lupa upang iligtas ang sangkatauhang namuhay bilang mga alipin ng kasalanan sa pamamagitan ng Kabanal-Banalan Niyang Krus at Muling Pagkabuhay, sila naman ang magmimisyon. Matapos tanggapin nang buong galak ang Espiritu Santo sa Pentekostes, sisimulan nila ang pagsaksi sa Panginoon. 

Inilarawan sa Unang Pagbasa at Salmong Tugunan kung ano ang misyong ibibigay sa mga apostol pagdating ng araw. Sa Unang Pagbasa, si Haring David ay nagpakita ng habag at awa sa nagbanta sa kaniyang buhay na walang iba kundi si Haring Saul na nakaluklok sa trono bilang hari sa mga sandaling yaon. Pinatunayan ni Haring David sa pamamagitan na wala siyang balak agawin ang trono mula kay Haring Saul. Hindi uhaw sa kapangyarihan si Haring David. Bagkus, habang si Saul ay hari pa ng Israel, buong katapatan siyang paglilingkuran ni David na hahalili sa kaniya bilang hari. Ang pagiging mahabagin at maawain ng Diyos ay buong linaw na isinalungguhit ng mang-aawit na tampok sa Salmong Tugunan. Tunay nga Siyang maawain at mahabagin sa tanan. Kusang-loob na idudulot ng Diyos ang Kaniyang habag at awa na tunay ngang dakila sa mga hihingi nito nang may taos-pusong kababaang-loob. 

Hinirang ng Mahal na Poong Jesus Nazareno ang mga apostol upang ipalaganap sa tanan ang Kaniyang habag at awa na tunay nga namang dakila at kahanga-hanga sa pamamagitan ng pagsaksi sa Kaniya sa bawat panig at sulok ng daigdig. Patuloy na isinasakatuparan ng Simbahan ang misyong ito na ibinigay sa mga apostol. 

Dinarakila nang taos-puso ang Poong Jesus Nazareno ng lahat ng mga nagbabahagi ng Kaniyang pag-ibig, kagandahang-loob, biyaya, habag, at awa. Sa pamamagitan ng pagbabahagi at pagpapalaganap ng Kaniyang dakilang pag-ibig, kagandahang-loob, biyaya, habag, at awa, ang Poong Jesus Nazareno ay ipinapakita at ipinapakilala nila sa tanan. Ito ang gawain ng tunay na deboto ng Poong Jesus Nazareno. 

NAGPAKITA NG KABABAANG-LOOB SA KABILA NG KANIYANG KADAKILAAN

18 Enero 2026 

Kapistahan ng Panginoong Jesus Nazareno, ang Banal na Sanggol (A) 

Isaias 9, 1-6/Salmo 97/Efeso 1, 3-6. 15-18/Mateo 18, 1-5. 10 

Larawan: Francisco Camilo (–1673), The Infant Jesus as Victor over Sin and Death (c. Between 1640 and 1670). Museo de Arte de Ponce. Public Domain.

"Ang sinumang nagpapakababa na gaya ng batang ito ay siyang pinakadakila sa mga pinaghaharian ng Diyos" (Mateo 18, 4). Binigkas ni Jesus Nazareno ang mga salitang ito sa Ebanghelyo bilang tugon sa tanong ng mga apostol tungkol sa pinakadakila sa kaharian ng Diyos sa langit. Isinalungguhit Niya nang buong linaw sa mga salitang ito na binigkas Niya sa mga apostol sa Ebanghelyo ang halaga ng pagiging mababang-loob. Tunay ngang nalulugod ang Diyos sa mga may kababaang-loob. 

Inilaan para sa taunang pagdiriwang ng Kapistahan ng Panginoong Jesus Nazareno, ang Banal na Sanggol, na mas kilala sa tawag na Santo Niño, ang ikatlong Linggo ng buwan ng Enero. Tanging sa Simbahan sa Pilipinas lamang ito ipinagdiriwang. Buong linaw na inilarawan ng mga imahen ng Santo Niño ang kababaang-loob ng Ikalawang Persona ng Banal na Santatlo. Noong sumapit ang takdang panahon, kusang-loob na nagdesisyong bumaba mula sa Kaniyang kaharian sa langit ang Bugtong na Anak ng Diyos na Siya ring Ikalawang Persona ng Banal na Santatlo at naging isang hamak na sanggol na lalaki na isinilang ng Birheng Maria sa isang sabsaban sa Betlehem noong gabi ng unang Pasko. Kahit na Siya mismo ay ang pinakadakila sa lahat, ipinasiya ng Mesiyas at Manunubos na nagmula sa langit na magpakumbaba. Hindi kayabangan kundi kababaang-loob ang ipinakita ng Panginoong Jesus Nazareno. 

Kaya naman, nasabi ng Poong Jesus Nazareno ang mga salitang Kaniyang binigkas sa mga apostol bilang tugon sa kanilang tanong tungkol sa pinakadakila sa kaharian ng langit sa Ebanghelyo dahil una Niya itong ginawa. Ipinaalala Niya sa kanila kung saan Siya nagmula. Nagmula Siya sa langit. Subalit, sa kabila ng kadakilaang taglay Niya bilang tunay na Diyos at Hari, buong kababaang-loob Niyang ipinasiyang bumaba sa daigdig at pagdaanan ang bawat yugto ng buhay ng bawat tao alang-alang sa bawat isa sa atin. Patunay ito ng Kaniyang pag-ibig, kagandahang-loob, habag, at awa.

Dahil sa kababaang-loob ng Nuestro Padre Jesus Nazareno, ang propesiyang inilahad sa Unang Pagbasa mula sa ikasiyam na kabanata ng aklat ng propetang si Isaias ay natupad. Nang matupad ang nasabing propesiya na inilahad sa Unang Pagbasa, ang ipinahayag ng mang-aawit na tampok sa Salmong Tugunan ay tinupad rin Niya. Ang bunga nito ay inilarawan sa pangaral ni Apostol San Pablo sa Ikalawang Pagbasa. Sa pamamagitan ng kababaang-loob ng Nuestro Padre Jesus Nazareno, itinalaga tayong lahat bilang mga anak ng Diyos (Efeso 1, 4-5). Ipinasiya ng Diyos na ibilang tayo sa Kaniyang pamilya. Tayong lahat ay naging bahagi ng Kaniyang pamilya. 

Bumaba mula sa langit ang Poong Jesus Nazareno upang tayong lahat ay iligtas sa pamamagitan ng Kaniyang Banal na Krus at Muling Pagkabuhay. Subalit, bago Niya harapin ang Krus at Muling Pagkabuhay, dumaan muna Siya sa pagiging isang bata. Dinaanan Niya ang yugto ng kabataan dahil ito ay bahagi ng Kaniyang misyon bilang ipinangakong Mesiyas at Manunubos. Ito ang isinasagisag ng mga imahen at larawan ng Santo Niño. 

INIIBIG SIYA NG MGA DUMARAKILA SA KANIYA

16 Enero 2026 

Biyernes ng Unang Linggo sa Karaniwang Panahon (II) 

1 Samuel 8, 4-7. 10-22a/Salmo 88/Marcos 2, 1-12 

Larawan: Alexandre Bida, Jesus heals the man with palsy (2 January 1875). Public Domain.

"Pag-ibig Mong walang maliw ay lagi kong sasambitin" (Salmo 88, 2a). Buong linaw na inilarawan sa mga salitang binigkas ng mang-aawit sa Salmong Tugunan ang pag-ibig ng Diyos para sa tanan. Ang dakilang pag-ibig ng Diyos ay pinagninilayan nang buong kataimtiman ng Simbahan sa araw na ito. Kahit na sinasariwa ng Simbahan araw-araw ang dakilang pag-ibig ng Diyos na nahayag sa lahat sa pamamagitan ng Mahal na Poong Jesus Nazareno na Kaniyang Bugtong na Anak na laging dumarating sa ating piling sa anyo ng tinapay at alak sa Sakramento ng Banal na Eukaristiya, ang dakilang pag-ibig na ito ng Diyos ay nararapat lamang pagnilayan. Sa gayon, hinding-hindi natin malilimot ang katotohanang ito tungkol sa Diyos. 

Sa Unang Pagbasa, iniutos ng Diyos ang Kaniyang propetang si Samuel na bigyan ng isang hari ang bayang Israel. Bagamat batid ng Diyos na inaayawan Siya ng bayang Kaniyang hirang, ipinakita pa rin Niya sa kanila ang Kaniyang pag-ibig. Tinanggap at ginalang ng Diyos ang kanilang hangarin at pasiyang magkaroon ng hari. Hindi Niya nilipol ang Kaniyang bayan dahil sa pasiya nilang ito. Pinagbigyan Niya sila, kahit na lubusan Siyang nasaktan. Sa Ebanghelyo, ipinakita ng Bugtong na Anak ng Diyos na dumating sa daigdig na ito bilang ipinangakong Mesiyas at Tagapagligtas noong ang takdang panahon ay sumapit na walang iba kundi ang Panginoong Jesus Nazareno ang Kaniyang pag-ibig na tunay ngang dakila at kahanga-hanga. Ipinagkaloob Niya sa paralitikong dinala sa Kaniya ang biyaya ng kagalingang pisikal at espirituwal. 

Tunay nga tayong iniibig ng Poong Jesus Nazareno. Hindi Siya titigil sa pagpapamalas ng Kaniyang dakilang pag-ibig sa atin. Bilang tugon, dakilain natin nang taos-puso sa bawat sandali ng ating buhay ang Poong Jesus Nazareno. Pagsisihan at talikdan ang makasalanang pamumuhay. Ang landas ng kabanalan ay ating tahakin. Kapag ito ang ating ginagawa, ipinapahayag nating iniibig rin natin Siya nang taos-puso. Dinarakila si Jesus Nazareno ng mga umiibig sa Kaniya nang taos-puso.