KATAPATAN SA BUKAL NG TUNAY NA PAG-ASA

6 Enero 2025 

Lunes kasunod ng Pagpapakita ng Panginoon 

Ikapitong Araw ng Pagsisiyam sa Karangalan ng Nuestro Padre Jesus Nazareno 

1 Juan 3, 22-4, 6/Salmo 2/Mateo 4, 12-17. 23-25 

SCREENSHOT: #QuiapoChurch 7PM #OnlineMass • 08 December 2024 • 2nd Sunday of #Advent #Peace (Facebook and YouTube)  

Ang pagiging tapat sa bukal ng tunay na pag-asa na walang iba kundi ang Mahal na Poong Jesus Nazareno ay ang pinagtutuunan ng pansin at pinagninilayan ng Inang Simbahan sa atin. Palagi tayong inaanyayahan ng Mahal na Poong Jesus Nazareno na maging Kaniyang mga tapat na tagasunod sa bawat sandali ng ating buhay dito sa daigdig na ito na pansamantala lamang. Sa pamamagitan nito, ang biyaya ng buhay na walang hanggan sa Kaniyang piling sa langit ay inaaalok Niya sa atin. 

Sa Unang Pagbasa, si Apostol San Juan ay nagsalita tungkol sa katapatan sa Diyos. Bilang mga Kristiyanong bumubuo sa tunay at nag-iisang Simbahang tatag mismo ni Kristo, dapat tayong maging tapat sa Diyos. Dahil tayong lahat ay Kaniyang iniligtas mula sa kasalanan sa pamamagitan ng Poong Jesus Nazareno, walang dahilan upang hindi tayo maging tapat sa Kaniya. Hindi na tayo mga alipin o mga bihag. Mayroon na tayong kalayaan at pag-asa ang bawat isa sa atin. Ang katapatan sa Diyos ay buong linaw na isinalungguhit ng mang-aawit sa Salmong Tugunan. Buong linaw at lakas na inihayag ng Poong Jesus Nazareno sa Ebanghelyo na dapat pagsisihan at talikdan ang makasalanang pamumuhay upang makapaglingkod ang lahat sa Diyos nang may dalisay at taos-pusong katapatan. 

Dalisay at taos-pusong katapatan ang hinahanap ng Poong Jesus Nazareno sa bawat isa sa atin. Ang mga tunay na deboto ng Poong Jesus Nazareno ay yaong mga hindi magsasawang maging tapat sa Kaniyang taos-pusong paglilingkod at pamamanata sa Kaniya na Siyang bukal ng tunay na pag-asa. 

SUNDIN ANG TALA NG PAG-ASA

5 Enero 2025  

Dakilang Kapistahan ng Pagpapakita ng Panginoon 

Ikaanim na Araw ng Pagsisiyam sa Karangalan ng Nuestro Padre Jesus Nazareno 

Isaias 60, 1-6/Salmo 71/Efeso 3, 2-3a. 5-6/Mateo 2,1-12 

Larawan: Francisco Herrera the Elder (1576–1656), Epiphany (c. 1653). Museu Nacional d'Art de Catalunya. Public Domain. 

Inilahad sa Ebanghelyo ang salaysay ng kaganapang pinagninilayan at ipinagdiriwang ng Simbahan sa Linggong ito. Dinalaw ng mga Pantas na nagmula pa sa Silangan ang Banal na Sanggol na si Jesus Nazareno. Naglakbay nang napakalayo ang mga Pantas upang dalawin at sambahin ang bagong silang na Sanggol na Siyang tunay na Hari na walang iba kundi si Jesus Nazareno. Sinundan nila ang tala mula sa langit na umakay sa kanila patungo sa Banal na Sanggol na si Jesus Nazareno. 

Ang layo ng nilakbay ng mga Pantas ay hindi biro. Napakalayo ng kanilang nilakbay patungo sa lugar kung saan ang Banal na Sanggol na si Jesus Nazareno ay kanilang natagpuan. Katunayan, buong ipinahiwatig ni San Mateo sa salaysay ng kaganapang ito na inilahad sa Ebanghelyo na hindi sila mga Israelita. Mga dayuhan sila. Dumaan sa palasyo ni Haring Herodes ang mga Pantas na ito sa unang bahagi ng Ebanghelyo. Kung sino pa yaong sakim sa kapangyarihan, siya pa yaong unang pinagtanungan ng mga dayong ito. Para kay Haring Herodes, walang ibang hari kundi siya. 

Bagamat mga dayuhan sila, ipinasiya pa rin ng mga Pantas na ito na maglakbay nang napakalayo upang dalawin at sambahin ang Banal na Sanggol na walang iba kundi si Jesus Nazareno. Pinahintulutan nilang akayin sila ng Kaniyang Tala. Naging bukas sa pag-akay ng Diyos ang mga Pantas na ito. Kahit gaano pa sila katalino, sinundan pa rin ng mga nasabing Pantas ang Tala ng Banal na Sanggol na si Jesus Nazareno nang may taos-pusong kababaang-loob at tuwa.

Niloob rin ng Banal na Sanggol na si Jesus Nazareno na dalawin Siya ng mga Pantas mula sa Silangan. Sa pamamagitan nito, natupad ang pahayag na inilahad sa Unang Pagbasa. Ito rin ang inihayag ng tampok na mang-aawit sa Salmong Tugunan. Pati na rin si Apostol San Pablo sa Ikalawang Pagbasa, inihayag niya nang buong linaw na ihahayag ng Diyos sa pamamagitan ni Jesus Nazareno na Siya lamang ang tunay na Hari. Ang lahat ay maglilingkod at sasamba sa Kaniya nang buong kababaang-loob. 

Hindi napilitan ang mga Pantas na sundin ang tala ng pag-asa. Kusang-loob nilang ipinasiyang gawin ito. Maging bukal sa ating kalooban ang ating pagsunod sa bukal ng tunay na pag-asa na walang iba kundi si Jesus Nazareno. 

PAANYAYA NG BUKAL NG TUNAY NA PAG-ASA

4 Enero 2025 

Ika-4 ng Enero sa Panahon ng Pasko ng Pagsilang

Ikalimang Araw ng Pagsisiyam sa Karangalan ng Nuestro Padre Jesus Nazareno 

1 Juan 3, 7-10/Salmo 97/Juan 1, 35-42 

Larawan: Giovanni di Paolo (–1482), Ecce Agnus Dei (c. 1455/60), Art Institute of Chicago, Public Domain. 

"Halikayo at tingnan ninyo" (Juan 1, 39). Ito ang paanyaya ng Poong Jesus Nazareno sa dalawang tagasunod ni San Juan Bautista na nagsimulang sumunod sa Kaniya. Matapos Siyang ipakilala muli ni San Juan Bautista bilang Kordero ng Diyos sa unang bahagi ng Ebanghelyo, inanyayahan ng Poong Jesus Nazareno ang dalawang dating alagad ni San Juan Bautista sa bahay na Kaniyang tinitirhan. Simula noon, ang Poong Jesus Nazareno ay kanilang sinundan. 

Ang mga Pagbasa para sa araw na ito ay nakatuon sa paanyayang ito ng bukal ng tunay na pag-asa na walang iba kundi ang Mahal na Poong Jesus Nazareno. Patuloy pa ring umaalingawngaw ang paanyayang ito ng Mahal na Poong Jesus Nazareno sa kasalukuyang panahon. Hindi lamang para sa dalawang dating tagasunod ni San Juan Bautista ang paanyayang ito ng Mahal na Poong Jesus Nazareno. Bagkus, para rin ito sa atin. Tayong lahat ay laging inaanyayahan ng Mahal na Poong Jesus Nazareno na maging bukas sa biyaya ng bagong buhay dulot Niya sa lahat. 

Sa Unang Pagbasa, ipinaalala ni Apostol San Juan ang lahat na hindi dapat bumalik sa dating pamumuhay ang lahat ng mga binago ng Poong Jesus Nazareno. Ipinaalala ni Apostol San Juan na ito ang dahilan kung bakit dumating bilang Kordero ng Diyos at ipinangakong Mesiyas at Manunubos ang Poong Jesus Nazareno. Dumating Siya sa lupa upang baguhin tayo. Ang bagong buhay na Kaniyang kaloob sa atin ay bunga ng tunay na pag-asang nagmumula lamang sa Kaniya. Kapag binuksan natin nang taos-puso ang buo nating sarili sa bagong buhay na dulot ng Poong Jesus Nazareno, hindi na tayo dapat bumalik pa sa kasalanan at kadiliman. 

Buong linaw na isinalungguhit ng mang-aawit na itinampok sa Salmong Tugunan ang pagiging Tagapagligtas ng Poong Jesus Nazareno. Kaligtasan ang dulot ng Mesiyas sa lahat. Ang mga salitang ito ng tampok na mang-aawit sa Salmong Tugunan tungkol sa pagliligtas ng Diyos ay tinupad ng Poong Jesus Nazareno sa Kaniyang pagdating. 

Lagi tayong inaanyayahan ng Poong Jesus Nazareno na sumunod sa Kaniya nang sa gayon ay baguhin Niya tayo. Ang bagong buhay na Kaniyang kaloob sa atin ay isang buhay na puno ng tunay na liwanag at pag-asang nagmumula lamang sa Kaniya. 

KORDERONG NAGDUDULOT NG TUNAY NA PAG-ASA

3 Enero 2025 

Paggunita sa Kabanal-Banalang Ngalan ng Ating Panginoong Jesus Nazareno 

Ikaapat na Araw ng Pagsisiyam sa Karangalan ng Nuestro Padre Jesus Nazareno 

1 Juan 2, 29-3, 6/Salmo 97/Juan 1, 29-34 

SCREENSHOT: #QuiapoChurch 3PM #OnlineMass • 08 December 2024 • 2nd Sunday of Advent (Facebook and YouTube)

Itinutuon ng Simbahan ang ating mga pansin sa titulo ng Panginoong Jesus Nazareno bilang Kordero ng Diyos sa araw na ito. Kusang-loob na ipinasiya ng Mahal na Poong Jesus Nazareno na dumating sa daigdig bilang Kordero ng Diyos. Buong kababang-loob na tinanggap ng Nuestro Padre Jesus Nazareno ang Kaniyang pananagutan. Sa halip na dumating sa daigdig taglay ang buo Niyang kaluwalhatian bilang Diyos, ang Poong Jesus Nazareno ay dumating bilang isang maamong kordero na ipinagkaloob ng Amang nasa langit. Alang-alang sa ating lahat, si Jesus Nazareno ay dumating sa daigdig bilang Kordero ng Diyos. 

Sa Ebanghelyo, ang Poong Jesus Nazareno ay ipinakilala ni San Juan Bautista sa lahat bilang Kordero ng Diyos na nag-aalis ng mga kasalanan ng sanlibutan (Juan 1, 29). Sa Unang Pagbasa, ipinaliwanag ni Apostol San Juan ang natatanging dahilan kung bakit kusang-loob na ipinasiya ng Poong Jesus Nazareno na iwanan ang Kaniyang walang hanggan at maluwalhating kaharian sa langit upang pumarito sa lupa bilang Kordero ng Diyos. Ipinasiya ng Poong Jesus Nazareno na dumating sa lupa bilang Kordero ng Diyos dahil nais Niya tayong iligtas mula sa kasalanan. Ito ang dahilan kung bakit ang ipinangakong Mesiyas at Manunubos na walang iba kundi ang Poong Jesus Nazareno ay ipinakilala ng tampok na mang-aawit sa Salmong Tugunan bilang Manunubos. Sa pamamagitan ng Poong Jesus Nazareno, iniligtas ng Diyos ang sangkatauhan. 

Dumating sa mundong ito ang Poong Jesus Nazareno bilang Kordero ng Diyos upang iligtas ang sangkatauhan. Sa pamamagitan nito, nagdulot Siya ng tunay na pag-asa sa lahat. May kulay at kabuluhan ang buhay ng lahat ng mga tapat sa Kaniya dahil sa tunay na pag-asang dulot ng Kordero ng Diyos. Hindi ligalig, takot, pangamba, sindak, at kapahamakan ang dulot Niya sa lahat kundi kaligtasan, liwanag, at pag-asa. 

Hindi napilitan si Jesus Nazareno na dumating sa lupa bilang Kordero ng Diyos. Ang pagdating ni Jesus Nazareno sa lupa bilang Kordero ng Diyos na bigay ng Amang nasa langit ay kusang-loob Niyang ipinasiyang gawin. 

PAGLILIGTAS NG BUKAL NG TUNAY NA PAG-ASA

2 Enero 2025 

Paggunita sa Dakilang San Basilio at San Gregorio Nasianseno, mga Obispo at Pantas ng Simbahan 

Ikatlong Araw ng Pagsisiyam sa Karangalan ng Nuestro Padre Jesus Nazareno 

1 Juan 2, 22-28/Salmo 97/Juan 1, 19-28 

SCREENSHOT: #QuiapoChurch 3PM Online Mass • 01 December 2024 • 1st Sunday of #Advent #Hope (Facebook and YouTube) 

Itinutuon ng Simbahan ang ating mga pansin sa tungkulin ng bukal ng tunay na pag-asa na walang iba kundi ang Mahal na Poong Jesus Nazareno bilang ipinangakong Mesiyas at Manunubos. Hindi sapilitan ang Kaniyang pagdating sa daigdig. Kusang-loob Niya itong ipinasiyang gawin alang-alang sa atin. Sa pamamagitan ng kahanga-hangang gawang ito, idinulot ng Mahal na Poong Jesus Nazareno sa lahat ang tunay na pag-asang sa Kaniya lamang nagmumula. 

Sa Ebanghelyo, inihayag ni San Juan Bautista nang buong linaw sa mga saserdote at mga Levita na hindi siya ang ipinangakong Mesiyas at Manunubos na hinihintay ng lahat sa loob ng mahabang panahon. Subalit, sa kabila nito, mayroong ugnayan ang kaniyang misyon at ang misyon ng ipinangakong Mesiyas at Manunubos. Si San Juan Bautista ay hinirang at itinalaga ng Diyos upang mauna sa ipinangakong Mesiyas na walang iba kundi ang Mahal na Poong Jesus Nazareno na kaniyang kamag-anak. Sa pamamagitan ng kaniyang tungkulin bilang tagapagpauna ng kaniyang kamag-anak na walang iba kundi ang Nuestro Padre Jesus Nazareno, ang lahat ng mga Israelita ay inihanda niya para sa pagdating ng bukal ng tunay na pag-asang nagliligtas.

Isinalungguhit nang buong linaw ng tampok na mang-aawit sa Salmong Tugunan ang kaligtasang dulot ng bukal ng tunay na pag-asa na walang iba kundi ang Poong Jesus Nazareno. Dumating ang Poong Jesus Nazareno upang iligtas ang sangkatauhan. Sa pamamagitan nito, ipinalaganap ng Poong Jesus Nazareno ang tunay na pag-asang sa Kaniya lamang nagmumula. 

Sa Unang Pagbasa, ang pakiusap ni Apostol San Juan para sa lahat ay inilahad. Hindi tayo dapat magpalinlang, magpaloko, at magpatalo sa mga anti-Kristo. Bagkus, ang bawat isa sa atin ay dapat manatiling tapat sa bukal ng tunay na pag-asa na walang iba kundi ang Mahal na Poong Jesus Nazareno. Gaano man kahirap gawin ito dahil sa dami ng mga pagsubok sa buhay, ito pa rin ang dapat nating gawin. Sa pamamagitan nito, pinatutunayan nating tunay nga tayong umaasa sa Mahal na Poon. 

Dumating ang ipinangakong Mesiyas at Manunubos na walang iba kundi ang bukal ng tunay na pag-asang si Jesus Nazareno upang iligtas tayo. Sa pamamagitan nito, si Jesus Nazareno ay nagdulot ng tunay na pag-asang sa Kaniya lamang nagmumula sa lahat. Bilang tugon, dapat nating buksan ang ating mga sarili kay Jesus Nazareno. Sa pamamagitan nito, pinatutunayan nating tunay nga tayong umaasa sa Kaniya.

UMASA SA MAPAGPALANG PANGINOON

1 Enero 2025 

Dakilang Kapistahan ni Maria, Ina ng Diyos 

Ikawalo at Huling Araw ng Pagdiriwang ng Pasko ng Pagsilang

Pandaigdigang Araw ng Pananalangin para sa Kapayapaan

Ikalawang Araw ng Pagsisiyam sa Karangalan ng Nuestro Padre Jesus Nazareno

Bilang 6, 22-27/Salmo 66/Galacia 4, 4-7/Lucas 2, 16-21 

Larawan: Bartolomé Esteban Murillo (1617–1682), Virgin and Child (c. 17th century), National Museum of Fine Arts of Cuba, Public Domain.

Ang isang panibagong taon sa sekular na kalendaryo ay nagsisimula sa unang araw ng buwan ng Enero. Sa Liturhikal na Kalendaryo, ang kalendaryo ng Santa Iglesia, ang unang araw ng buwan ng Enero ay isang napakahalagang petsa dahil ito ang petsang inilaan para sa isang mahalagang pagdiriwang na walang iba kundi ang maringal na pagdiriwang ng Dakilang Kapistahan ni Maria, Ina ng Diyos. Bilang mga bumubuo sa tunay na Simbahang itinatag mismo ng Verbong nagkatawang-tao na si Kristo, ang Mahal na Inang si Mariang Birhen ay kinikilala natin bilang Ina ng Diyos. Iyan ay dahil hinirang at itinalaga ng Diyos si Maria upang maging ina ng Ikalawang Persona ng Banal na Santatlo na walang iba kundi ang Bugtong na Anak ng Diyos na si Kristo. 

Kung sasaliksikin natin nang mabuti ang titulong Ina ng Diyos, matutuklasan nating hindi sa Mahal na Birheng Maria nakasentro ang titulong ito. Nakasentro ang titulong ito ng Mahal na Birheng Maria sa kaniyang Anak na si Jesus Nazareno, ang Bugtong na Anak ng Diyos at Pangalawang Persona ng Banal na Santatlo. Ang Anak niyang si Jesus Nazareno ay tunay na Diyos at tunay na tao. Bagamat tunay na Diyos, kusang-loob pa rin Niyang ipinasiyang maging isang tunay na tao alang-alang sa ating lahat. Dahil dito, isinilang si Jesus Nazareno ng Mahal na Birheng Maria sa isang hamak na sabsaban noong gabi ng unang Pasko. 

Layunin ng Dakilang Kapistahang ipinagdiriwang ng Simbahan nang buong ringal sa araw na ito ay ituro sa atin kung kanino tayo dapat umasa. Itinuturo rin ito ng Mahal na Inang si Mariang Birhen sa bawat isa sa atin. Sa kaniyang minamahal na Anak na walang iba kundi ang Mahal na Poong Jesus Nazareno tayo dapat umasa. Wala ni isa man sa lahat ng mga umasa sa Mahal na Poong Jesus Nazareno na nabigo dahil sa Kaniya. Hinding-hindi Niya tayo tatalikuran at pababayaan. Maaasahan natin Siya sa bawat sandali ng ating buhay. 

Sa Unang Pagbasa, ang pagiging mahabagin, maawain, at mapagpala ng Panginoong Diyos ay buong linaw Niyang isinalungguhit sa rito ng pagbabasbas na ibinigay Niya kay Moises upang ipagamit sa kapatid niyang si Aaron at sa kaniyang mga anak sa pagbebendisyon sa mga Israelita. Ito rin ang pinagtuunan ng pansin ng mang-aawit na itinampok sa Salmong Tugunan. Tunay ngang mapagpala, maawain, at mahabagin ang Diyos. Nakatuon naman sa pinakadakilang pagpapalang ipinagkaloob ng Diyos sa tanan ang pangaral ni Apostol San Pablo sa Ikalawang Pagbasa. Ang pinakadakilang biyayang ipinagkaloob ng Diyos sa sangkatauhan ay walang iba kundi ang Mahal na Poong Jesus Nazareno, ang ipinangakong Mesiyas at Manunubos. Inilahad naman sa Ebanghelyo ang salaysay ng pagdalaw ng mga pastol sa Banal na Sanggol na si Jesus Nazareno. Nakita ng mga pastol na ito na nagpasiyang tumungo sa Betlehem upang dalawin ang Banal na Sanggol na isinilang ng Mahal na Birheng Maria noong gabi ng unang Pasko ang pinakadakilang pagpapalang kaloob ng Diyos sa tanan. Nahayag sa pamamagitan ng Banal na Sanggol na si Jesus Nazareno, ang tunay na Haring walang hanggan at ang ipinangakong Mesiyas, ang kadakilaan ng habag at awa ng Diyos. 

Nais ng Diyos na umasa tayo sa Kaniya. Ito ang tanging dahilan kung bakit hindi Niya ipinagkakait sa ating lahat ang Kaniyang awa, habag, at pagpapala. Ang bawat isa sa atin ay inaanyayahan at hinihikayat ng Diyos na umasa sa Kaniya. Wala Siyang ibang hangad kundi ang ating ikabubuti. Dahil dito, laging ipinapakita ng Diyos sa atin ang Kaniyang pagiging maawain, mahabagin, at mapagpala. 

Bilang mga Kristiyanong bumubuo sa tunay at nag-iisang Simbahang itinatag mismo ng Salita ng Diyos na nagkatawang-tao na si Jesus Nazareno, dapat tayong umasa sa Kaniya. Lagi nating maaasahan sa bawat sandali ng ating pamumuhay at paglalakbay dito sa mundong ito na pansamantala lamang ang Mahal na Poon. Tayong lahat ay hindi Niya bibiguin, tatalikuran, iiwanan, at pababayaan kailanman. 

PILIIN ANG BUKAL NG TUNAY NA PAG-ASA

31 Disyembre 2024 

Ikapitong Araw ng Pagdiriwang sa Pasko ng Pagsilang 

Unang Araw ng Pagsisiyam sa Karangalan ng Nuestro Padre Jesus Nazareno

1 Juan 2, 18-21/Salmo 95/Juan 1, 1-18 

Larawan: Josefa de Óbidos (1630–1684), St. Francis and St. Clare of Assisi (c. 1647), Public Domain.

Ang mga Pagbasa para sa araw na ito na napapaloob sa Oktaba o Walong Araw na Pagdiriwang sa Pasko ng Pagsilang ay nakasentro sa dapat nating piliin. Bilang mga Kristiyanong bumubuo sa tunay na Simbahan, mayroon tayong dapat piliin sa lahat ng oras. Isa lamang ang dapat nating piliin at pagkatiwalaan. Sa Kaniya lamang natin dapat ipagkatiwala ang lahat ng bagay ng nauukol sa atin. 

Sa Unang Pagbasa, si Apostol San Juan ay nagbigay ng babala sa lahat laban sa mga anti-Kristo. Walang ibang hangarin ang mga anti-Kristo kundi ang ikapapahamak ng lahat ng mga bumubuo sa tunay na Simbahang itinatag mismo ni Kristo. Upang ang hangaring ito ay maisakatuparan, lilinlangin nila tayo. Gagamitin nila ang Poong Jesus Nazareno upang manlinlang at manamantala. 

Ipinakilala ni San Juan sa Ebanghelyo ang Poong Jesus Nazareno bilang ipinangakong Mesiyas at Manunubos. Ang Panginoong Jesus Nazareno ay ang tunay na Diyos na kusang-loob na nagpasiyang dumating sa daigdig upang tayong lahat ay tubusin at palayain mula sa mga puwersa ng kasalanan at kamatayan. Hindi Niya hangad ang ating kapahamakan. Bagkus, ang tanging hangarin ng Salitang nagkatawang-taong si Jesus Nazareno ay ang ating kaligtasan at kalayaan. 

Tayong lahat ay inaanyayahan ng mang-aawit na itinampok sa Salmong Tugunan na magalak at magdiwang. Ang Verbong nagkatawang-tao na walang iba kundi si Kristo, ang Poong Jesus Nazareno, ay ang dahilan kung bakit tayong lahat na bumubuo sa Kaniyang Simbahan ay dapat magalak at magdiwang. Siya ang ating pag-asa. 

Bilang mga Kristiyano, isa lamang ang dapat nating piliin at pagkatiwalaan sa bawat sandali ng ating buhay. Ang dapat nating piliin at pagkatiwalaan sa lahat ng oras ay walang iba kundi ang bukal ng tunay na pag-asa na si Jesus Nazareno, ang Salita ng Diyos na nagkatawang-tao alang-alang sa atin.