ANG MGA DAKILANG GAWA NG POONG SEÑOR

13 Enero 2023 

Biyernes ng Unang Linggo sa Karaniwang Panahon (Taon I) 

Hebreo 4, 1-5. 11/Salmo 77/Marcos 2, 1-12 

Screenshot: 01.02.2023 (MONDAY) 5PM #OnlineMass
(Quiapo Church Facebook and YouTube Live Stream)

Ang mga Pagbasa para sa araw na ito ng Biyernes, ang araw na inilaan ng Simbahan para sa taimtim na debosyon at pamamanata sa Mahal na Poong Jesus Nazareno, ay nakasentro sa tema ng mga dakila't kahanga-hangang gawa ng Diyos. Kung tutuusin, ipinahiwatig na ng Salmong Tugunan para sa araw na ito ang tema o paksang ito. Muli tayong pinaalalahanan ng Simbahan sa pamamagitan ng pagninilay sa paksa o temang ito na ang kadakilaan ng Panginoong Diyos na nahahayag sa Kaniyang mga kahanga-hangang gawa ay hindi mapapantayan kailanman. Sa pamamagitan ng mga gawang ito ng Panginoong Diyos na tunay ngang kahanga-hanga't dakila, nahahayag rin ang Kanyang pag-ibig, kagandahang-loob, at habag. 

Sabi nga sa Salmong Tugunan para sa araw na ito: "Hindi nila malilimot ang dakilang gawa ng Diyos" (Salmo 77, 7k). Napakalinaw kung ano ang nais isalungguhit at ituro ng mga salitang ito. Ang lahat ng mga kahanga-hangang gawa ng Diyos ay tunay na dakila. Isinasalamin ng Diyos sa pamamagitan ng Kanyang mga gawa na tunay ngang kahanga-hanga ang Kanyang kadakilaan. 

Inilarawan sa Unang Pagbasa at Ebanghelyo ang ilan sa mga kahanga-hangang gawa ng Diyos na naghayag ng Kanyang kaluwalhatian. Sa Unang Pagbasa, ang paglikha ng Diyos sa sanlibutan ay binanggit sa pangaral tungkol sa pagkakataong ibinibigay Niya sa tanan na makapiling Siya sa Kanyang kaharian sa langit. Bagamat nabanggit rin sa pangaral na ito kung paanong nagalit ang Diyos sa pagkakasala ng sangkatauhan na naging dahilan rin para sa Kanya na pagbawalan silang makasama Siya sa langit, ang sangkatauhan ay patuloy Niya pa ring binibigyan ng pagkakataon na mamuhay nang banal at kalugud-lugod sa Kanyang paningin dahil sa Kanyang pag-ibig, habag, at kagandahang-loob sa pamamagitan ng Poong Jesus Nazareno. Sa Ebanghelyo, ang Mahal na Poong Jesus Nazareno ay gumawa ng isang himala. Pinagaling ni Kristo ang isang paralitiko sa Ebanghelyo. Ito ay isa lamang sa napakaraming mga kahanga-hangang bagay na ginawa ng Panginoon. Subalit, ang pinakadakila sa lahat ng mga gawang ito ay ang pagligtas sa atin ng ating minamahal na Poong Jesus Nazareno sa pamamagitan ng Kanyang Krus at Muling Pagkabuhay. 

Maraming ulit na inihayag at ipinamalas ng Panginoong Diyos ang Kanyang walang hanggang kadakilaan sa pamamagitan ng Kanyang mga kahanga-hangang gawa para sa atin. Subalit, sa lahat ng mga gawang ito, isa lamang ang natatangi at higit na dakila sa lahat - ang pagtubos sa atin sa pamamagitan ng ipinangakong Mesiyas at Tagapagligtas na walang iba kundi ang Mahal na Poong Jesus Nazareno. Dumating ang Nuestro Padre Jesus Nazareno sa mundong ito upang iligtas ang sangkatauhan sa pamamagitan ng Kanyang Krus at Muling Pagkabuhay. Dahil sa Panginoong Jesus Nazareno, ang ipinangakong Mesiyas at Tagapagligtas, mayroong pagkakataon ang bawat isa sa atin na makapasok sa maringal at maluwalhating kaharian ng Diyos sa langit kung saan makakapiling natin Siya magpakailanman. 

Bilang mga deboto ng Nuestro Padre Jesus Nazareno, hindi tayo dapat mamangha na lamang sa mga kahanga-hangang gawa ng Diyos na tunay ngang dakila. Ang ating pagkamangha sa mga kahanga-hangang gawa ng Poong Señor na tunay ngang dakila talaga ay dapat pumukaw sa atin na mamuhay nang banal at kalugud-lugod sa Kanyang paningin. Sa gayon, matatamasa natin ang kaganapan ng biyaya ng buhay na walang hanggan sa piling ng Mahal na Señor sa Kanyang maluwalhating kaharian, ang langit, sa katapusan ng ating paglalakbay dito sa lupa. Kapag ginawa natin ito, ipinapahayag natin na hindi natin kinakalimutan ang Mahal na Señor. 

MAPALAD ANG MGA TUNAY NA DEBOTO NG NUESTRO PADRE JESUS NAZARENO NA BUONG KATAIMTIMANG NAKIKINIG AT TUMUTUPAD SA SALITA NG DIYOS NANG MAY KABABAANG-LOOB AT PANANALIG

9 Enero 2023 

Kapistahan ng Pagbibinyag sa Panginoon, ang Nuestro Padre Jesus Nazareno (A) 

Isaias 42, 1-4. 6-7/Salmo 28/Mga Gawa 10, 34-38/Mateo 3, 13-17

This reproduction of the painting The Baptism of Christ (1510-1520) by Joachim Patinir (circa 1480-1524), as well as the painting itself from the Kunsthistorisches Museum Collection through the Web Gallery of Art, is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or less due to its age. 

Madalas ipagdiwang ng Simbahan ang Kapistahan ng Pagbibinyag sa Panginoon sa araw ng Linggo. Ang mga pagkakataong ito katulad nito kung kailan ang Kapistahang ito ay ipinagdiriwang sa isang araw ng Lunes ay bihira lamang mangyari. Nangyayari lamang ito kapag ang mga araw ng Dakilang Kapistahan ng Pasko ng Pagsilang ng Panginoon (Ika-25 ng Disyembre) at Dakilang Kapistahan ni Maria, Ina ng Diyos na kilala rin sa tawag na Araw ng Bagong Taon sa sekular na kalendaryo (Unang Araw ng Enero) ay tumapat sa araw ng Linggo at kapag ang Dakilang Kapistahan ng Epipanya na kilala rin bilang Pagpapakita ng Panginoon ay ipinagdiriwang sa Ika-7 ng Enero. 

Bibihira rin lamang ang mga pagkakataon kung kailan magkatapat at ipinagdiriwang ng Simbahan nang magkasabay ang Kapistahan ng Pagbibinyag sa Panginoon at ang Kapistahan ng Traslacion ng Nuestro Padre Jesus Nazareno. Nangyayari lamang ang mga ganitong pagkakataon kapag ang Kapistahan ng Pagbibinyag sa Panginoon ay tumapat sa Ika-9 ng Enero na siyang araw ng Kapistahan ng Traslacion ng Mahal na Poong Jesus Nazareno. Subalit, bagamat bihira lamang mangyari ito, iisa lamang ang nais pagtuunan ng pansin at pagnilayan ng dalawang pistang ito. Iyon ay walang iba kundi ang misyon ng ating Panginoong Jesus Nazareno bilang ipinangakong Mesiyas at Manunubos. Lalo lamang nagbibigyang-linaw ang pagninilay sa misteryong ito sa tuwing nangyayari ang mga bihirang pagkakataong ito kung kailan magkatapat at magkasabay ang mga maringal na selebrasyon ng Kapistahan ng Pagbibinyag sa Panginoon at ng Kapistahan ng Traslacion ng Mahal na Poong Jesus Nazareno. Kung tutuusin, malaki ang ugnayan ng dalawang selebrasyong ito dahil maaaring ituring na isang pasulyap ng pagpapakasakit at pagkamatay ng Panginoong Jesus Nazareno na sinasagisag ng Banal na Krus na Kanyang tinanggap, niyakap, at pinasan nang buong kababaang-loob at pananalig ang Pagbibinyag sa Kanya sa Ilog Jordan. 

Ang tema ng pagdiriwang ng Traslacion para sa taong ito ay napapanahon. Sa tema para sa Kapistahan ng Traslacion ng Nuestro Padre Jesus Nazareno na ipinagdiriwang ng Simbahan nang sabay sa Kapistahan ng Pagbibinyag sa Panginoon ngayong taon, isinalungguhit ang pagiging masunurin sa kalooban ng Diyos. Katunayan, binigkas ng Mahal na Poong Jesus Nazareno mismo ang mga salitang ginamit para sa tema ng selebrasyon ng Traslacion sa kasalukuyang taon. Ang temang pinili para sa nasabing kapistahan ay ang tugon ng Mahal na Poong Nazareno sa taong nagsabi sa Kanya na mapalad ang sinapupunang nagdala sa Kanya. Bilang tugon, ang mga salitang ito ay binigkas ng Mahal na Poong Jesus Nazareno: "Higit na mapalad ang mga nakikinig sa Salita ng Diyos at tumutupad nito" (Lucas 11, 28). Sa pamamagitan ng mga salitang ito, itinuro ng Poong Jesus Nazareno kung paano maging mapalad sa paningin ng Diyos katulad ng Mahal na Inang si Mariang Birhen, ang babaeng hinirang ng Ama sa lahat ng mga babae upang maging Ina ng ipinangakong Mesiyas at Tagapagligtas na walang iba kundi ang Poong Jesus Nazareno. 

Tinalakay at pinagnilayan sa mga Pagbasa para sa napakaespesyal na araw na ito, ang Kapistahan ng Pagbibinyag sa Panginoong Jesus Nazareno, ang Kanyang tapat na pagsunod sa kalooban ng Ama. Sa pamamagitan nito, muling itinuturo sa atin ng Simbahan kung paano maging mga tapat na Kristiyano. Sa pamamagitan ng Kanyang pagtalima at pagtupad sa kalooban ng Ama nang buong kababaang-loob, inihayag ng Mahal na Señor ang Kanyang taos-pusong katapatan sa Ama. Ito ang sinasagisag at ipinapaalala sa atin ng Kanyang pagpasan ng Krus. Ito rin ang kailangan nating gawin bilang mga deboto ng Poong Señor at ng Mahal na Ina. 

Sa Unang Pagbasa, inilarawan ang mga katangian ng ipinangakong Tagapagligtas na ipagkakaloob ng Panginoong Diyos sa Kanyang bayan. Ang pagiging mababang-loob, maamo, at masunurin ng Mesiyas, ang ipinangakong Manunubos na ipagkakaloob ng Diyos sa Kanyang bayan pagdating ng panahong itinakda Niya, ay ang pangunahing katangiang inilarawan sa pahayag na inilahad sa Unang Pagbasa. Ang pangaral ni Apostol San Pedro sa Ikalawang Pagbasa ay nakasentro sa pagkakilanlan ng dakilang lingkod na ito ng Diyos. Inihayag ni Apostol San Pedro na sa pamamagitan ng Mahal na Poong Jesus Nazareno, natupad ang mga inilarawan sa Unang Pagbasa. 

Isinalungguhit sa salaysay ng Pagbibinyag sa Poong Jesus Nazareno sa Ebanghelyo para sa araw na ito ang Kanyang pagiging masunurin sa kalooban ng Ama. Bagamat higit Siyang dakila kay San Juan Bautista, ipinasiya ng Nuestro Padre Jesus Nazareno na magpabinyag sa Kanya. Siya nga mismo ang nagsabi kay San Juan Bautista sa Ebanghelyo na dapat mangyari iyon bilang katuparan ng kalooban ng Diyos (Mateo 3, 15). Noong una, tumutol si San Juan Bautista; subalit, matapos bigkasin ng Poong Jesus Nazareno ang mga salitang iyon na pumanatag sa kanyang loob, pumayag na rin si San Juan Bautista na gawin ito nang buong kababaang-loob. Matapos binyagan ang Mahal na Poong Jesus Nazareno, ipinakilala Siya ng Espiritu Santong bumaba sa Kanya sa anyo ng kalapati at ng Amang nasa langit bilang ipinangakong Mesiyas. 

Katulad ng sabi sa Salmong Tugunan, "Basbas ng kapayapaa'y sa bayan ng Poong mahal" (Salmo 28, 11b). Sa pamamagitan ng Mahal na Poong Jesus Nazareno, ang sangkatauhan ay binasbasan ng Diyos sa pinakadakilang paraan. Ang pinakadakilang biyaya na walang iba kundi ang Poong Jesus Nazareno ay ipinagkaloob Niya sa lahat. Ang Panginoong Jesus Nazareno na bininyagan ni San Juan Bautista sa Ilog Jordan at nagpasan ng Krus patungong Kalbaryo ay ang pinakadakilang biyayang ibinigay ng Diyos sa atin. 

Paano maging mapalad sa paningin ng Mahal na Poong Jesus Nazareno? Tanggapin at sundin ang kalooban ng Ama nang buong kababaang-loob at pananalig sa Kanya. Buksan natin ang mga puso at isipan sa kalooban ng ating Panginoong Diyos. Buong kababaang-loob na pakinggan at tuparin ang kalooban ng Diyos. Sa pamamagitan nito, ipinapakita nating tunay at tapat tayo sa ating debosyon at pamamanata sa Mahal na Poong Jesus Nazareno, ang tunay na Diyos na ating pinupuri at sinasamba sa tuwing ipinagdiriwang ang Banal na Eukaristiya kung saang lagi Niyang kusang-loob na ibinibigay sa atin ang Kanyang Katawan at Dugo bilang pagkain at inumin. 

VIVA POONG JESUS NAZARENO!

Screenshot: Ang Opisyal na Logo at Tema Para sa Traslacion 2023 (Video), Social Communications Ministry (Minor Basilica of the Black Nazarene, Saint John the Baptist Parish, Quiapo, Manila), Quiapo Church Facebook Page

POONG JESUS NAZARENO: DUMATING PARA SA LAHAT NG MGA TAO

8 Enero 2023 

Dakilang Kapistahan ng Pagpapakita ng Panginoon 

Ikasiyam at Huling Araw ng Pagsisiyam sa Karangalan ng Mahal na Poong Jesus Nazareno

Isaias 60, 1-6/Salmo 71/Efeso 3, 2-3a. 5-6/Mateo 2, 1-12  

This reproduction of the painting The Adoration of the Magi by Luca Giordano, called Fa Presto, as well as the work of art itself from Sotheby's, is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or fewer due to its age. 

Bihira lamang ipagdiwang ang Dakilang Kapistahan ng Pagpapakita ng Panginoon sa ikalawang Linggo ng buwan ng Enero. Kadalasan, ang nasabing Dakilang Kapistahan ay madalas na ipinagdiriwang ng Simbahan pagsapit ng unang Linggo ng buwan ng Enero. Katunayan, mayroong mga lugar kung saan ipinagdiriwang sa tradisyunal na petsa nito, ang ika-6 ng Enero, ang nasabing Dakilang Kapistahan. Subalit, may isang importanteng dahilan kung bakit ang mga bihirang pagkakataong ito ay nangyayari. Kapag tumapat ang mga araw ng Pasko ng Pagsilang ng Panginoon at Bagong Taon sa araw ng Linggo, ang Dakilang Kapistahan ng Pagpapakita ng Panginoon na kilala rin sa tawag na "Epipanya" (Epifania) ay inililipat ng Simbahan sa ikalawang Linggo ng buwan ng Enero. 

Kasabay ng pagdiriwang ng Dakilang Kapistahan ng Pagpapakita ng Panginoon, ang araw ring ito ay ang ikasiyam at huling araw ng Pagsisiyam sa karangalan ng Mahal na Poong Jesus Nazareno bilang paghahanda para sa Kapistahan ng Traslacion. Sa tuwing ipinagdiriwang ang nasabing Kapistahan, ginugunita natin ang maringal na paglipat ng banal na imahen ng Poong Señor Jesus Nazareno mula sa Bagumbayan (Luneta) patungo sa Simbahan ng Quiapo. Sa mga araw bago sumapit ang araw ng maringal na pagdiriwang ng Kapistahan ng Traslacion ng Poong Jesus Nazareno, na napapaloob sa Panahon ng Pasko ng Pagsilang, binibigyan ng pansin at taimtim na pinagninilayan ng Simbahan ang tunay na pagkakilanlan ni Kristo bilang Salita ng Diyos na nagkatawang-tao at isinilang ng Mahal na Inang si Mariang Birhen noong gabi ng unang Pasko. Sa araw na ito, ang Dakilang Kapistahan ng Pagpapakita ng Panginoon na siya ring Bisperas ng pagdiriwang ng Kapistahan ng Traslacion ng ating minamahal na Nuestro Padre Jesus Nazareno, isinasalungguhit ang Kanyang misyon bilang Tagapagligtas ng sangkatauhan. Ang biyaya ng Kanyang pagliligtas ay para sa lahat ng tao sa mundong ito. 

Isinasalungguhit sa mga Pagbasa para sa Dakilang Kapistahang ipinagdiriwang nang buong ringal ng Simbahan sa Linggong ito ang katotohanan ng misyon ng Poong Jesus Nazareno bilang ipinangakong Mesiyas at Manunubos. Hindi Siya pumarito sa mundong ito para lamang sa isang angkan, lahi, o lipi. Bagkus, ang kaloob Niyang kaligtasan ay para sa lahat ng mga tao sa mundong ito. Ang biyayang ito na kaloob ng Panginoong Jesus Nazareno ay hindi ekslusibo kundi ito ay para sa lahat ng tao sa daigdig. Katunayan, ito ang ipinapaalala sa atin ng banal na imahen ng ating Nuestro Padre Jesus Nazareno. Inilalarawan si Kristo ng imaheng ito bilang itim, kayumanggi, o moreno katulad nating mga karaniwang Pilipino. Naiiba ang imaheng ito sa ibang larawan o imahen ng Panginoon na kung saang kulay puti ang Kanyang balat. 

Sa Unang Pagbasa, inihayag ni Propeta Isaias na ipapamalas ng Diyos sa lahat ng mga bansa sa daigdig ang Kanyang liwanag. Magniningning ang Kanyang liwanag sa bayang Israel at masasaksihan ng lahat ng mga bansa sa mundong ito ang kahanga-hangang gawang ito ng Panginoong Diyos. Sa pamamagitan nito, inihayag ni Propeta Isaias na hindi ikinukubli ng Panginoon sa lahat ang Kanyang mga pagpapala. Hindi ekslusibo ang Panginoon. Ang Panginoon ay hindi namimili ng mga taong aalukin na tanggapin ang Kanyang biyaya. Bagkus, inaanyayahan Niya ang lahat na tanggapin at pakinabangan ang mga biyayang Kanyang kaloob. Para sa lahat. 

Ang pagiging unibersal o pangkalahatan ng Panginoon ay isinalungguhit rin sa Salmo, sa pangaral ni Apostol San Pablo sa Ikalawang Pagbasa, at maging sa salaysay ng pagdalaw at pagsamba ng mga Pantas mula sa Silangan sa Banal na Sanggol na si Jesus Nazareno sa Banal na Ebanghelyo. Isinalungguhit nang buong diin ang pagiging unibersal o pangkalahatan ng Panginoong Diyos sa Salmong Tugunan. Iyan rin ang tema ng pangaral ni Apostol San Pablo sa Ikalawang Pagbasa tungkol sa mga biyaya ng Diyos. Sabi nga ni Apostol San Pablo na pati ang mga Hentil ay may bahagi rin sa lahat ng mga biyaya ng Diyos (Efeso 3, 6). Sa Ebanghelyo, ang mga Pantas o Mago mula sa Silangan ay binigyan ng pagkakataon ng Diyos na dalawin at sambahin ang Banal na Sanggol na walang iba kundi ang Panginoong Jesus Nazareno, ang tunay at dakilang Haring walang hanggan. Sa kabila ng kanilang pagiging dayuhan, niloob pa rin ng Diyos na makadalaw at makasamba sila kay Kristo. Ito ang dahilan kung bakit ginabayan ng tala sa langit ang mga Pantas na ito patungo kay Jesus Nazareno. 

Tingnan natin nang mabuti ang imahen ng Nuestro Padre Jesus Nazareno. Naiiba ang kulay ng sagradong imahen ng ating minamahal na Nuestro Padre Jesus Nazareno dahil si Kristo ay inilarawang may maitim, moreno, o kayumangging balat. Kakulay rin natin ang Panginoon, gaya ng inilalarawan sa nasabing sagradong imahen. Isa itong patunay na hindi ekslusibo sa isang angkan, lahi, o lipi lamang ang biyaya ng Diyos. Bagkus, ang biyaya ng Diyos ay para sa lahat. Ito ang aral at mensaheng ipinapaalala sa atin ng imahen ng Nuestro Padre Jesus Nazareno. 

Mapalad tayo sapagkat mayroon tayong Diyos na patuloy na nagbibigay sa atin ng pagkakataong tanggapin at makinabang sa Kanyang mga biyaya. Ang patunay nito ay walang iba kundi ang Mahal na Poong Jesus Nazareno. Dumating Siya sa mundong ito upang iligtas ang lahat ng tao sa mundong ito. Hindi Siya ekslusibo. Bagkus, ang ating minamahal na Nuestro Padre Jesus Nazareno ay para sa lahat. Ito ang aral na laging ipinapaalala sa atin ng imahen ng Poong Señor na ating ginagalang. Hindi natin sinasamba ang imahen ng Nazareno. Bagkus, ang imaheng ito ay ating ginagalang dahil ito ay sagisag ng pagiging pangkalahatan ng Diyos na tunay na mapagmahal. 

Screenshot: 28 Disyembre 2022 ● PABIHIS sa Nuestro Padre Jesus Nazareno (Quiapo Church Facebook and YouTube Live Stream) 

POONG JESUS NAZARENO: ANG TUNAY NA MAKAPANGYARIHAN SA LAHAT

7 Enero 2023 

Ika-7 ng Enero sa Panahon ng Pasko ng Pagsilang 

Ikawalong Araw ng Pagsisiyam sa Karangalan ng Mahal na Poong Jesus Nazareno 

1 Juan 5, 14-21/Salmo 149/Juan 2, 1-11

This faithful reproduction of the painting The Wedding at Cana by Denys Calvaert (circa 1540-1619) and the work of art itself is in the Public Domain ("No Known Copyright") in its country of origin and in other countries and areas where the copyright term is the author's life plus 100 years because the author died in 1619 and because of its age. This is also in the Public Domain in the United States because it was published (or registered with the U.S. Copyright Office) before January 1, 1927.

Kapag ang araw na ito ay hindi tumapat sa araw ng Linggo sapagkat tumapat sa araw ng Linggo ang mga araw ng Pasko ng Pagsilang ng Panginoon at Bagong Taon, ipinagpapatuloy ng Simbahan ang pagsaliksik at taimtim na pagninilay sa misteryo ng pagkakatawang-tao ng Salita ng Diyos na walang iba kundi ang Mahal na Poong Jesus Nazareno, ang Banal na Sanggol na isinilang ng Mahal na Inang si Maria sa sabsaban noong gabi ng unang Pasko. Ito ay dahil ang araw na ito ay napapaloob pa rin sa panahon ng Pasko ng Pagsilang ng Panginoong Jesus Nazareno. Ang panahong ito ay inilaan ng Simbahan sa pagninilay sa misteryong ito. Kasabay nito, patuloy na pinaghahandaan ng Simbahan ang lahat ng mga deboto ng Mahal na Poong Jesus Nazareno para sa nalalapit na maringal na pagdiriwang ng Kapistahan ng Traslacion sa pamamagitan ng Pagsisiyam sa karangalan ng Mahal na Poon. Ang araw na ito ay ang ikawalong araw ng nasabing Pagsisiyam o Nobenaryo. 

Sa araw na ito, itinatampok ng Simbahan ang isang napakahalagang katangian ng tunay na pagkakilanlan ng nagkatawang-taong Salita ng Diyos na isinilang ng Mahal na Inang si Mariang Birhen sa isang sabsaban noong gabi ng unang Pasko. Taglay ng Banal na Sanggol na isinilang ng Mahal na Inang si Mariang Birhen noong gabi ng unang Pasko, ang Mahal na Poong Jesus Nazareno, ang tunay na kapangyarihan sa lahat ng mga nilalang. Tanging Siya lamang ang tunay na may kapangyarihan. Ang kapangyarihang taglay ng Nuestro Padre Jesus Nazareno ay hindi mapapantayan o mahihigitan ninuman sapagkat Siya mismo ay ang Diyos na dumating sa mundong ito upang tayo ay iligtas sa pamamagitan ng Kanyang Krus at Muling Pagkabuhay. Ito ang dahilan kung bakit Siya isinilang sa sabsaban noong gabi ng unang Pasko. 

Isinalaysay sa Ebanghelyo para sa araw na ito ang unang himalang ginawa ni Kristo sa isang kasalan sa Cana. Matapos iparating sa kanyang Anak na si Kristo, ang Poong Jesus Nazareno, na malaki ang posibilidad na mapahiya ang bagong kasal sapagkat mauubusan na sila ng alak sa nasabing kasalan, ang mga naglilingkod sa nasabing kasalan ay sinabihan ng Mahal na Inang si Mariang Birhen na sundin ang anumang utos sa kanila ng kanyang Anak na si Jesus Nazareno (Juan 2, 5). Ang mga salitang ito na binigkas ng Mahal na Inang si Mariang Birhen sa tampok na salaysay sa Banal na Ebanghelyo para sa araw na ito ay patuloy pa ring umaalingawgaw sa kasalukuyang panahon. Sa pamamagitan ng mga salitang ito, itinuro ng Mahal na Inang si Mariang Birhen kung sino ang dapat sundin ng lahat - ang tunay na may kapangyarihan na walang iba kundi ang Mahal na Poong Jesus Nazareno. 

Katulad ng Mahal na Inang si Mariang Birhen sa Ebanghelyo para sa araw na ito sa loob ng panahon ng Pasko ng Pagsilang ng Panginoon, itinuro at ipinaalala sa atin ni Apostol San Juan sa kanyang pangaral sa Unang Pagbasa para sa araw na ito kung sino nga ba talaga ang nagtataglay ng tunay na kapangyarihan sa lahat. Ang tunay na makapangyarihan sa lahat ay walang iba kundi ang Mahal na Poong Jesus Nazareno. Gaya ng sabi ni Apostol San Juan, ang mga tunay na anak ng Diyos ay hindi aanhin ng demonyo sapagkat ang mga tunay na anak ng Diyos ay nasa ilalim ng Panginoong Jesus Nazareno (1 Juan 5, 18). Oo, makapangyarihan ang demonyo, subalit hinding-hindi niya mapapantayan o mahihigitan ang kapangyarihan ng Mahal na Poong Jesus Nazareno kailanman. Iyan ang ating minamahal na Nuestro Padre Jesus Nazareno. 

Ipinapaalala sa atin ng Simbahan sa araw na ito kung ano ang dapat nating gawin bilang mga tunay na deboto ng minamahal na Nuestro Padre Jesus Nazareno. Dapat maging masunurin tayo sa Kanya. Tanggapin at sundin natin ang Kanyang mga utos at loobin nang buong kababaang-loob. Magpasakop tayo sa Kanya. Sa pamamagitan nito, pinapahintulutan nating maghari ang Kanyang kalooban at nagpapahayag ng taos-puso nating pagpanig sa Kanya, ang tunay na makapangyarihan sa lahat. Tayo rin ay nagpapasailalim sa Kanyang kapangyarihan sa pamamagitan nito. Iyan ang kalooban ng ating minamahal na Nuestro Padre Jesus Nazareno para sa atin. 

Ang panawagan sa atin sa araw na ito ay magpasailalim sa kapangyarihan ng tunay na makapangyarihan sa lahat, ang Mahal na Poong Jesus Nazareno. Kung tunay nga tayong mga deboto ng Mahal na Poong Jesus Nazareno, buong kababaang-loob at pananalig tayong magpapasakop sa Kanya at pahihintulutan nating mangyari ang Kanyang kalooban. Iyan ang magpapatunay na tunay nga tayong matapat sa ating debosyon, pananalig, pananampalataya, pamamanata, at pagsamba sa Kanya. 

POONG JESUS NAZARENO: ANG KUSANG-LOOB NA NAGPASIYANG IBIGAY ANG BUO NIYANG SARILI BILANG REGALO

6 Enero 2023 

Ika-6 ng Enero sa Panahon ng Pasko ng Pagsilang 

Ikapitong Araw ng Pagsisiyam sa Karangalan ng Mahal na Poong Jesus Nazareno 

1 Juan 5, 5-13/Salmo 147/Lucas 3, 23-38 (o kaya: 3, 23. 31-34. 36. 38; o kaya: Marcos 1, 7-11) 

Screenshot: 28 Disyembre 2022 • PABIHIS sa Nuestro Padre Jesus Nazareno (Quiapo Church Facebook and YouTube Live Stream)

Kapag hindi tumapat sa araw ng Linggo ang araw na ito sapagkat tumapat sa araw ng Linggo ang mga araw ng Kapaskuhan at Bagong Taon, ipinagpapatuloy pa rin ng Simbahan ang taimtim na pagsaliksik at pagninilay sa misteryo ng pagkakatawang-tao at pagsilang ng Salita ng Diyos na walang iba kundi ang Poong Jesus Nazareno sa isang sabsaban sa Betlehem noong gabi ng unang Pasko. Sino nga ba talaga ang Banal na Sanggol na isinilang ng Mahal na Inang si Mariang Birhen noong gabi ng unang Pasko? Ano nga ba ang tunay Niyang pagkakilanlan? Ito ang mga tanong na pinagtuunan ng pansin ng Simbahan sa panahong ito ng Pasko ng Pagsilang. 

Bukod sa pagiging araw sa loob ng panahon ng Pasko ng Pagsilang ng Panginoon, ang araw ring ito ay ang ikapitong araw ng taimtim na paghahanda para sa nalalapit na Kapistahan ng Traslacion ng Mahal na Poong Jesus Nazareno sa pamamagitan ng pagdarasal ng Pagsisiyam o Pagnonobena sa karangalan ng Poong Señor. Marapat lamang na pagnilayan ang pagkakilanlan ng nagkatawang-taong Salita ng Diyos na si Jesus Nazareno at ang dahilan kung bakit Siya isinilang sa mundo noong gabi ng unang Pasko na siya ring dahilan kung bakit Niya ipinasiyang pasanin ang Krus. Ang Sanggol na isinilang sa sabsaban ay ang Nazarenong nagpasan ng Krus upang tayo'y maligtas. Ito ang misteryo ng Mahal na Poong Jesus Nazareno. 

Maraming tao ang nagsasabing ang Pilipinas raw ang bansang may pinakamahabang pagdiriwang ng Pasko sapagkat Setyembre pa lamang ay nagpapatugtog na ng mga awiting Pamasko sa iba't ibang mga pampublikong lugar, katulad na lamang ng mga liwasan at mga mall sa bansa. Sa Kalendaryo naman ng Simbahan, ang panahon ng Kapaskuhan ay nagwawakas sa araw ng Kapistahan ng Pagbibinyag sa Panginoon na siya ring Unang Linggo sa Karaniwang Panahon (maliban na lamang kung hindi ito tumapat sa araw ng Linggo). Subalit, mayroong isang natatanging lugar sa Pilipinas na kung saang tila maagang nagtatapos ang pagdiriwang ng Kapaskuhan: Quiapo. Bakit? Sapagkat may ilang nakakapansin na tila tapos na ang Pasko tuwing sasapit ang Bisperas ng Kapistahan ng Traslacion ng Nuestro Padre Jesus Nazareno. Maaari rin nating sabihing tila spoiler ang Quiapo, kung ihahalintulad ito sa mga pelikula o mga seryeng pinapanood sa telebisyon. Isipin lamang ninyo, parang kailan lamang, ang imahen ni Kristo bilang Banal na Sanggol na isinilang sa sabsaban noong gabi ng unang Pasko ay itinampok sa paggunita sa Kanyang Pagsilang pagsapit ng Dakilang Kapistahan ng Pasko ng Pagsilang ay ipinagdiriwang. Tapos, mga higit-kumulang ng dalawa't kalahating linggo pagkalipas ng nasabing Dakilang Pista, itinatampok ang imahen o larawan ng ating Panginoon na nagpapasan ng Krus patungong Kalbaryo sa pagdiriwang ng Kapistahan ng Traslacion ng Nuestro Padre Jesus Nazareno. Kung tutuusin, kasisimula pa lamang ng isang panibagong taon sa sekular na kalendaryo, na napapaloob pa rin ng panahon ng Pasko ng Pagsilang sa Kalendaryo ng Simbahan, itinatampok na ang banal na larawan o imahen ng nagpakasakit na Kristo. 

Subalit, isang napakagandang paalala para sa bawat mananampalatayang Katoliko ang nalalapit na pagdiriwang ng Kapistahan ng Traslacion ng Mahal na Poong Jesus Nazareno. Ipinapaalala ng nalalapit na pagdiriwang ng Kapistahan ng Traslacion ang tunay na dahilan ng Kanyang pagparito sa mundo. Noong gabi ng unang Pasko, sa isang hamak na sabsaban sa lungsod ng Betlehem, isinilang ng Mahal na Inang si Mariang Birhen ang Banal na Sanggol na walang iba kundi ang Poong Jesus Nazareno bilang katuparan ng pangako ng Diyos na maghahatid Siya ng kaligtasan sa lahat. Si Jesus Nazareno, ang nagkatawang-taong Salita ng Diyos, ay isinilang noong banal na gabi ng unang Pasko upang ipagkaloob sa atin ang biyaya ng Kanyang pagliligtas sa pamamagitan ng Kanyang Krus at Muling Pagkabuhay, ang Misteryo Paskwal. Iyan lamang ang dahilan ng Kanyang pagparito sa mundo. Ang paksang ito, ang tunay na dahilan ng Kanyang pagparito, ay tinalakay sa mga Pagbasa para sa araw na ito. 

Inilarawan ni Apostol San Juan sa kanyang pangaral sa Unang Pagbasa tungkol sa pagkamit ng buhay na walang hanggan sa pamamagitan ng Bugtong na Anak ng Diyos na si Kristo, ang Mahal na Poong Jesus Nazareno, kung paano Niya iniligtas ang sangkatauhan. Sa pamamagitan ng pagbubo ng Kanyang Dugo, iniligtas ng Mahal na Poong Jesus Nazareno ang sangkatauhan (1 Juan 5, 6). Sa Ebanghelyo, itinampok ang bersyon ni San Lucas ng talaan ng angkang kinabilangan ng Mahal na Poong Jesus Nazareno. Isang bagay lamang ang nais isalungguhit at ituro ng mga Pagbasa para sa araw na ito. Ipinasiya ng Mahal na Poong Jesus Nazareno na dumating sa mundong ito at pasanin ang Kanyang Krus alang-alang sa atin. Ito ang dahilan kung bakit Siya bumangon nang tatlong ulit matapos ang tatlong ulit na pagkasubasob dahil sa bigat ng Krus sa makipot at masikip na daan patungo sa bundok ng Kalbaryo. Hindi naman mandatoryo para sa Mahal na Poon na gawin iyon. Subalit, ginawa Niya ito alang-alang sa atin dahil ninais at niloob Niyang iligtas tayo. 

Upang tayo ay magkaroon ng kaligtasan at buhay na walang hanggan, kusang-loob na ipinasiya ng ating Mahal na Poong Jesus Nazareno na ibigay sa atin ang Kanyang sarili bilang pinakadakilang regalo. Ipinagkaloob Niya sa atin ang Kanyang sarili bilang ipinangakong Mesiyas at Manunubos. Kaya naman, dumating Siya sa mundo bilang Banal na Sanggol na isinilang ng Mahal na Inang si Mariang Birhen sa sabsaban sa gabi ng unang Pasko. Gayon din naman, noong sumapit ang takdang panahon, ang Krus ay Kanyang hinarap, tinanggap, niyakap, at pinasan. Isa lamang ang dahilan ng lahat ng ito: nais Niya tayong iligtas at pagkalooban ng buhay na walang hanggan. 

POONG JESUS NAZARENO: ANG TUNAY AT DAKILANG HARI MAGPAKAILANMAN

5 Enero 2023 

Ika-5 ng Enero sa Panahon ng Pasko ng Pagsilang 

Paggunita kay San Juan Neumann, Obispo 

Ikaanim na Araw ng Pagsisiyam sa Karangalan ng Mahal na Poong Jesus Nazareno 

1 Juan 3, 11-21/Salmo 99/Juan 1, 43-51 

Screenshot: 12.16.2022 (FRIDAY) 2PM #OnlineMass - Quiapo Church Facebook and YouTube Live Stream

Kapag ang araw na ito sa loob ng panahon ng Pasko ng Pagsilang ng Panginoon ay hindi tumapat sa araw ng Linggo dahil tumapat ang mga araw ng Pasko at Bagong Taon sa araw ng Linggo, ipinagpapatuloy ng Simbahan ang taimtim na pagsaliksik at pagninilay sa misteryo ng pagkakatawang-tao ng Salita ng Diyos na walang iba kundi ang Banal na Sanggol na si Jesus Nazareno na isinilang ng Mahal na Inang si Mariang Birhen noong gabi ng unang Pasko. Bukod pa rito, ang araw ring ito ay ang ikaanim na araw ng paghahanda para sa Kapistahan ng Traslacion ng Poong Jesus Nazareno sa pamamagitan ng Pagsisiyam o Pagnonobena sa Kanyang karangalan. 

Sa araw na ito sa loob ng panahon ng Pasko ng Pagsilang ng Panginoon na siya ring ikaanim na araw ng Pagsisiyam sa karangalan ng Mahal na Poong Jesus Nazareno bilang paghahanda ng sarili para sa Kanyang Kapistahan, itinutuon ng Simbahan ang ating pansin sa Kanyang pagiging hari. Tinalakay sa mga Pagbasa para sa araw na ito kung anong uri ng Hari ang Panginoong Jesus Nazareno. Ang mga hari o pinuno sa mundong ito ay hindi mananatili magpakailanman. Isa lamang ang mananatili bilang hari magpakailanman - si Kristo, ang Poong Jesus Nazareno. 

Inilarawan ng Mahal na Poong Jesus Nazareno sa Ebanghelyo kung sino nga ba Siya talaga. Ang misteryo ng Kanyang pagkahari ay malinaw Niyang inihayag sa mga una Niyang alagad. Bilang tunay at dakilang Hari magpakailanman, si Jesus Nazareno ay mayroong maringal na trono na kinaluluklukan. Habang nakaluklok sa Kanyang trono sa Kanyang maluwalhating kaharian sa langit, ang lahat ng mga anghel at hukbo sa langit ay naghahandog ng walang humpay na papuri at pagsamba sa Kanya. Ito ang tunay na pagkakilanlan ng Banal na Sanggol na isinilang sa sabsaban noong gabi ng unang Pasko. Kung tutuusin, ipinahiwatig ito ng mga anghel na nagsiawitan noong gabing iyon. Pagdating ng takdang panahon, ang hinandugan ng mga awit ng papuri, pagbubunyi, at pagsamba ng mga anghel sa langit ay magpapasan ng Krus alang-alang sa atin. Ang lahat ng pagbubunyi, papuri, at pagsamba sa Kanya sa langit ay iniwan at tinalikuran ng Mahal na Poong Jesus Nazareno nang pansamantala upang harapin, tanggapin, at yakapin ang Kanyang misyon bilang ipinangakong Mesiyas at Manunubos na sinasagisag ng Krus na Kanyang pinapasan. 

Bakit Niya ito ipinasiyang gawin? Inilarawan ni Apostol San Juan sa Unang Pagbasa ang tunay na dahilan nito. Ang Krus ay pinili Niyang harapin, tanggapin, yakapin, at pasanin sa kabila ng bigat nito dahil sa Kanyang pag-ibig. Sa pamamagitan ng buong kababaang-loob na pagtanggap at pagtupad sa Kanyang misyon bilang ipinangakong Mesiyas at Tagapagligtas, na sinasagisag ng Krus na Kanyang pinasan, kahit tatlong ulit Siyang nasubasob habang ginagawa ito patungong Kalbaryo dahil sa bigat nito, inihayag ni Jesus Nazareno ang Kanyang tunay at dakilang pag-ibig na walang maliw (1 Juan 3, 16). Iyan ang Mahal na Poong Jesus Nazareno. Ang tunay at dakilang Hari na mapagmahal magpakailanman. Kahit hindi naman mandatoryo para sa Kanya na gawin iyon, pinili pa rin Niya itong gawin dahil sa Kanyang pag-ibig. 

Dahil dito, ipinapaalala sa atin ni Apostol San Juan sa simula ng kanyang pangaral o pagtuturo sa Unang Pagbasa na dapat tayong mag-ibigan (3, 11). Sa pamamagitan nito, ipinapakita nating ang ating debosyon, pamamanata, pananalig, at pagsamba sa Mahal na Poong Jesus Nazareno na nakaluklok bilang tunay na Hari magpakailanman sa Kanyang trono sa langit ay tunay. Ipinapalaganap natin sa pamamagitan nito ang tunay na pag-ibig na nagmumula sa Kanya. Sa pamamagitan rin nito, pinapatunayan rin natin na tunay nating pinapanigan ang Mahal na Poong Jesus Nazareno. 

Umiibig sa kapwa ang mga tunay na deboto ng Poong Jesus Nazareno sapagkat Siya mismo ang unang umibig sa lahat. Sa pamamagitan ng pagpapakita ng pag-ibig sa kapwa, ipinapalaganap ng mga tunay na deboto ng Mahal na Poong Jesus Nazareno, ang tunay at dakilang Hari magpakailanman, ang tunay na pag-ibig na nagmumula lamang sa Kanya. Ang tunay at dakilang Hari magpakailanman na walang iba kundi si Jesus Nazareno ay nagpasiyang ibigin tayo. Kaya naman, dapat rin tayong umibig bilang pagpahayag at pagpatunay ng ating debosyon, pamamanata, pananalig, at pagsamba sa Kanya.  

POONG JESUS NAZARENO: ANG NAG-AANYAYA SA ATIN NA MAGBAGONG-BUHAY

4 Enero 2023 

Ika-4 ng Enero sa Panahon ng Pasko ng Pagsilang 

Paggunita kay Santa Isabel Ann Seton, Namamanata sa Diyos

Ikalimang Araw ng Pagsisiyam sa Karangalan ng Mahal na Poong Jesus Nazareno 

1 Juan 3, 7-10/Salmo 97/Juan 1, 35-42 

This reproduction of the painting (c. 17th century) San Giovanni che indica il Cristo a Sant'Andrea (English: Christ is being identified by Saint John the Baptist to Saint Andrew) from La chiesa dei Santi Michele e Gaetano and Becocci Editore, Firenze 2006, as well as the work of art itself by Ottavio Vannini (1585-c. 1643), are in the Public Domain ("No Known Copyright") in its country of origin and in other countries and areas where the copyright term is the author's life plus 100 years or less due to its age.

Kapag ang araw na ito ay hindi tumapat sa araw ng Linggo sapagkat ang mga araw ng Kapaskuhan at Bagong Taon ay tumapat sa araw ng Linggo, ipinagpapatuloy ng Simbahan ang pagsasaliksik at pagninilay sa pagkakilanlan ng Poong Jesus Nazareno bilang nagkatawang-taong Salita ng Diyos na isinilang ng Mahal na Birheng Maria sa isang hamak na sabsaban noong gabi ng unang Pasko. Bukod pa rito, ang araw na ito ay ang ikalimang araw ng paghahanda para sa Kapistahan ng Traslacion ng Mahal na Poong Jesus Nazareno sa pamamagitan ng pagdarasal ng Pagsisiyam na tinatawag ring Nobenaryo sa Kanyang karangalan. 

Tinalakay sa mga Pagbasa para sa araw na ito ang pagkakataong ibinibigay ng Mahal na Poong Jesus Nazareno sa bawat isa sa atin, lalo na sa lahat ng mga debotong buong katapatang namimintuho at namamanata sa Kanya, na baguhin ang ating mga sarili. Sa bawat sandali ng ating buhay dito sa mundo, lagi tayong inaaanyayahan ng Panginoong Jesus Nazareno na baguhin ang ating buhay at tahakin ang landas ng kabanalan. Ang Mahal na Poong Jesus Nazareno ay hindi magsasawa na gawin ito upang makapiling natin Siya sa langit magpakailanman sa katapusan ng ating buhay dito sa mundong ito. Nais ng Panginoong Jesus Nazareno na maligtas tayo mula sa kapahamakang walang hanggan sa impyerno at matamasa ang biyaya ng buhay na walang hanggan sa Kanyang piling sa Kanyang kaharian sa langit magpakailanman. Ito ang dahilan kung bakit Niya tinanggap at niyakap ang Kanyang Krus. 

Sa Unang Pagbasa, inilarawan ni Apostol San Juan ang pagbabagong dulot ni Kristo, ang Mahal na Poong Jesus Nazareno, sa lahat. Ang lahat ng mga tumatanggap sa biyaya ng pagbabagong kaloob ng Poong Jesus Nazareno ay hindi na mamumuhay sa kasalanan. Ang makasalanang pamumuhay ay kanilang tatalikuran at itatakwil bilang pagpahayag ng kanilang katapatan sa Kanya na dahilan ng kanilang pagbabago. Sa Ebanghelyo, matapos ituro ni San Juan Bautista, si Jesus Nazareno ay sinundan ng dalawang dating alagad ni San Juan Bautista. Ang paanyaya ng Mahal na Poong Jesus Nazareno sa kanila: "Halikayo at tingnan ninyo" (Juan 1, 39). Hindi lamang iyan. Sa ikalawang bahagi ng Ebanghelyo, binigyan ng Panginoong Jesus Nazareno ng isang panibagong pangalan ang kapatid ni Apostol San Andres na si Simon: Cefas na ang kahulugan ay Pedro (Juan 1, 45). Ito ang dahilan kung bakit hindi na siya kilala bilang Simon na mangingisda kundi si Apostol San Pedro. Si Kristo, ang Mahal na Poong Jesus Nazareno, mismo ang nagbigay ng pagkakataong ito kay Apostol San Pedro na baguhin ang kanyang buhay na tinanggap naman ng nasabing apostol. 

Patuloy na inaanyayahan ng Mahal na Poong Jesus Nazareno ang bawat isa sa atin na baguhin ang ating buhay at tahakin ang landas ng kabanalan. Naging posible ang lahat ng ito sapagkat ipinasiya Niyang harapin, tanggapin, at yakapin ang Kanyang Misteryo Paskwal nang buong kababaang-loob. Ito ang bukod tanging dahilan kung bakit Siya isinilang ng Mahal na Inang si Mariang Birhen sa isang hamak na sabsaban sa Betlehem noong gabi ng unang Pasko. Ito rin ang dahilan kung bakit pinili Niyang tanggapin, yakapin, at pasanin ang Kanyang Krus at bumangon mula sa pagkadapa o pagkasubasob sa daang patungong Kalbaryo. Ang Kanyang naisin ay magkaroon ng oportunidad ang bawat isa sa atin na maging banal. 

Inaanyayahan tayo ng Mahal na Poong Jesus Nazareno na magbagong-buhay. Ano ang ating tugon sa Kanyang paanyaya? Kung nais nating patunayan sa Kanya ang taos-puso nating debosyon at pamamanata sa Kanya, tanggapin natin ang Kanyang paanyaya na magbagong-buhay at maging banal. Ito ang gagawin ng mga tunay na deboto ng Mahal na Poong Jesus Nazareno.