PAGSILANG NI SAN JUAN BAUTISTA: PAGPAPAMALAS NG KAGILIWAN NG DIYOS

23 Disyembre 2015
Ikawalong Araw ng Simbang Gabi/Misa de Gallo (ABK) 
Malakias 3, 1-4. 23-24/Salmo 24/Lucas 1, 57-66

Isang propesiya patungkol sa pagdating ng Mesiyas ang ating napakinggan sa Unang Pagbasa. Sa Unang Pagbasa, ipinahayag ni propeta Malakias na magpapakita si propeta Elias bago dumating ang Panginoon. Bago sumapit ang araw kung kailan magpapakita ng Panginoon, darating si propeta Elias. Magpapakita si propeta Elias upang ihanda ang lahat ng tao para sa araw ng Panginoon. Natupad ang propesiyang ito sa pamamagitan ni San Juan Bautista. Si San Juan Bautista ang huling propetang isinugo ng Panginoong Diyos bago dumating ang araw kung kailan nagpakita si Hesukristo. 

Sa Ebanghelyo, napakinggan natin ang salaysay ng pagsilang ni Juan Bautista. Nagdulot ng matinding kagalakan para kina Zacarias at Elisabet (Santa Isabel) ang pagsilang ni San Juan Bautista. Ayon pa nga sa Ebanghelyo, nakigalak ang mga kapitbahay at mga kamag-anak nina Zacarias at Elisabet sa pagsilang ng kanilang anak. Pagkatapos ng mahaba-habang panahon, nagkaroon na sila ng anak. Bagamat baog na si Elisabet, pinagpala siya ng Diyos at pinagkalooban ng anak. Sa kabila ng katandaan nina Zacarias at Elisabet, nagkaroon sila ng anak dahil sa awa at pagpapala ng Diyos sa kanila. 

Pipi si Zacarias noong kapanahunang yaon. Nakakapagsalita siya noong isinilang si San Juan Bautista. Natapos ang sumpa kay Zacarias. Makakapagsalita na siya. Isang himala ang naganap sa pagsasalita ni Zacarias. Nagwakas ang pagiging pipi at bingi ni Zacarias sa pagsilang ni San Juan Bautista. Sa pamamagitan ng pagsilang ni San Juan Bautista, ipinapakita ng Diyos ang kagiliwan sa lahat ng tao, kabilang na sina Zacarias at Elisabet. 

May misyon na iniatang ng Diyos kay San Juan Bautista - ihanda ang daraanan ng Panginoon. Kaya siya tinatawag na "Elias na darating." (Mateo 17, 10-13) Hindi man siya ang literal na Elias, natupad ang propesiyang ito sa pamamagitan ni San Juan Bautista. Katulad ng sinabi ng Arkanghel na si San Gabriel kay Zacarias, tataglayin ni San Juan Bautista ang kapangyarihan at espiritu ni Elias (Lucas 1, 17).  Si San Juan Bautista ang katuparan ng propesiya patungkol sa pagpapakita ni Elias bago magpakita ang Mesiyas. 

Subalit, bakit kinailangan pang magpadala ng sugo ang Diyos? Bakit kinailangang isugo ng Panginoon si San Juan Bautista upang ihanda ang Kanyang daraanan? Bakit hindi na lang Siya magpakita agad? Ano ba ang kahalagahan ng papel ni Juan Bautista? Bakit napakahalaga ang papel ni San Juan Bautista sa plano ng Diyos para sa kaligtasan ng sangkatauhan?

Nasa kahulugan ng pangalan ni Juan Bautista ang dahilan kaya siya isinugo. Ang kahulugan ng pangalang "Juan" ay "Magiliw ang Diyos." Katulad ng pagpapakita ng Kanyang kagiliwan kina Zacarias at Elisabet, ipinapakita din ng Diyos ang Kanyang kagiliwan sa lahat ng tao. Ang pagsugo kay San Juan Bautista ay pagpapakita ng kagiliwan ng Diyos. Sa pagsusugo kay Juan Bautista, binibigyan tayo ng pagkakataon ng Diyos upang ihanda ang ating mga sarili para sa Kanyang pagdating sa ating buhay. Nais ng Diyos na maging handa tayo upang salubungin Siya sa Kanyang pagdating sa ating buhay. 

Ang tanong ng mga kamag-anak at kapitbahay nina Zacarias at Elisabet, "'Magiging ano nga kaya ang batang ito?' Sapagkat maliwanag na sumasakanya ang Panginoon." (Lucas 1, 66) Namangha ang mga kamag-anak at kapitbahay nina Zacarias at Elisabet. Namalas nila ang kagiliwan ng Diyos sa pamamagitan ng sanggol na si San Juan Bautista. Hindi ordinaryong sanggol ang nasa kanilang piling. May mahalagang papel ang sanggol na ito. Hindi man siya ang Mesiyas, may mahalagang papel ang sanggol na ito sa plano ng Diyos. Kaya, katulad ng sinabi ni San Lucas Ebanghelista, "Sumasakanya ang Panginoon." Kinagiliwan ng Diyos si San Juan Bautista, magmula noong siya'y isinilang. 

Sa pagsilang ni San Juan Bautista, nais ipahayag ng Diyos sa atin na Siya'y magiliw. Ipinapamalas ng Diyos ang Kanyang kagiliwan sa lahat ng mga may takot sa Kanya at ang mga kalugud-lugod sa Kanya. Nais ipamalas sa ating lahat ng Panginoon ang Kanyang kagiliwan sa ating lahat, sa kabila ng katotohanang tayo'y mga makasalanan. Tayong lahat ay mga makasalanan, totoo iyon. Iyan ang katotohanan - mga makasalanan tayong lahat. Subalit, kahit mga makasalanan tayo, hindi ito magiging hadlang para sa Diyos upang ipamalas at ipadama sa ating lahat ang Kanyang awa at kagiliwan. 

PURIHIN NANG BUONG KAGALAKAN ANG MAAWAING DIYOS KASAMA SI MARIA

22 Disyembre 2015 
Ikapitong Araw ng Simbang Gabi/Misa de Gallo (ABK) 
1 Samuel 1, 24-28/1 Samuel 2/Lucas 1, 46-56 

Tatlong dekada nang naghintay ang buong Pilipinas para magtagumpay sa Miss Universe. Ang tagumpay ni Pia Alonzo Wurtzbach, kahit medyo nagkaroon ng kontrobersya, ay nagdulot ng malaking tuwa sa ating lahat bilang mga Pilipino. Matagal na tayong naghintay - mga tatlong dekada - upang magtagumpay ang pambato ng Pilipinas sa mga ganung contest, lalung-lalo na kapag international. Kalat pa nga sa social media ang pagkapanalo ng ating pambato sa Miss Universe 2015. Sa pakiwari ko, hindi sapat ang salitang "tuwa" o "saya" upang ilarawan ang naramdaman nating mga Pilipino sa tagumpay ni Binibining Pia Alonzo Wurtzbach sa Miss Universe 2015 - gusto ko sanang gamitin ang salitang "kagalakan." Bakit? Ibang-iba ang saya na nararamdaman natin sa tagumpay na ito. Hindi ordinaryo ang saya na nararamdaman natin ngayon, siguro. 

Ang Ebanghelyo ngayon ay tungkol sa kagalakan. Inilarawan ni San Lucas sa Ebanghelyo ang kagalakan ng Mahal na Birheng Maria. Paanong inilarawan ni San Lucas ang kagalakan ni Maria? Sa pamamagitan ng isang awit - ang "Magnificat" (Ang puso ko'y nagpupuri). Napakinggan natin sa Ebanghelyo ang Awit ni Maria. Umawit nang buong pagpupuri at kagalakan si Maria sa Diyos. Bakit ginawa iyon ni Maria? Sapagkat ipinamalas ng Diyos ang Kanyang awa at habag kay Maria. Isang ordinaryong dalaga, sa katauhan ni Maria, bagamat nagmula sa kababaan, ay binigyan ng isang di-pangkaraniwang misyon sa buhay. Ang misyong ibinigay ng Diyos kay Maria ay ang pagiging ina ni Kristo. 

Inilarawan ng Mahal na Ina sa pamamagitan ng kanyang awit ang habag at ang kabutihang-loob ng Diyos. Inilalarawan din ng Mahal na Ina sa kanyang awit na malapit ang Diyos sa lahat ng mababang-loob at ang mga aba. Ang Diyos ay mahabagin sa lahat ng mga mababang-loob at ang mga aba. Kinalulugdan ng Diyos ang lahat ng mga taong mapagpakumbaba, at ang mga maralita. Ang Panginoong Hesus ang nagsabi, "Ang sinumang nagpapakataas ay ibababa, at ang nagpapakababa ay itataas." (Lucas 18, 14) 

Napakinggan din natin sa Unang Pagbasa na nagpasalamat ang ina ni Samuel na si Ana sa pagsilang ng kanyang anak. Bago pa isilang si Samuel, buong pusong nanalangin si Ana kasama ang saserdoteng si Eli upang pagkalooban siya ng anak. Dininig ng Diyos ang panalangin ni Ana, at dininggin Niya ito. Si Ana'y pinagkalooban ng Diyos ng isang anak sa katauhan ni Samuel. Kaya, buong kagalakan at pagpupuri siyang nagpasalamat sa Diyos para sa biyaya ng kanyang anak na si Samuel. Hindi lamang iyan. Inihandog ni Ana ang kanyang anak na si Samuel sa Panginoong Diyos bilang pasasalamat sa biyayang tinanggap. 

Tugmang-tugma rin ang ating Salmo ngayon. "Diyos kong Tagapagligtas, pinupuri Kitang wagas." Maraming dahilan kung bakit ang Diyos ay dapat purihin. Diniringgin Niya ang mga mababang-loob at ang mga dukha. Malapit Siya sa mga maralita, pisikal man o esprituwal ang pagiging maralita ng sinuman. Kinikilala natin ang Diyos bilang isang mahabagin at maawaing diyos. Ibang-iba ang Panginoong Diyos. Walang makakapantay sa awa at kabutihang-loob ng Panginoon. Siya ang Diyos na magandang-loob, mahabagin, at maawain.

Napakalinaw ng tema at mensahe ng Awit ni Maria - ang Diyos ay maawain at mahabagin. Walang kupas ang awa at habag ng Panginoong Diyos. Napakatatag at napakadakila ang Awa at Habag ng Diyos. Ang Diyos ay ang Diyos ng Awa at Habag. Magmula pa noong nilikha ang daigdig na ito, ipinamalas ng Diyos ang Kanyang Awa at Habag, lalung-lalo na sa mga tao. Ang kasalanan nina Eba't Adan sa Halamanan ng Eden ay hindi naging dahilan upang itigil ng Diyos sa pagpapakita at pagpapadama ng Awa at Habag sa lahat. At ang pinakadakilang gawa ng Diyos upang ipakita at ipadama sa sangkatauhan ang Kanyang Dakilang Awa at Habag ay ang pagpapadala Niya sa Kanyang Bugtong na Anak, ang Panginoong Hesukristo, sa sanlibutan. 

Malapit na malapit na ang Pasko. Kaunti na lang ang hihintayin natin. Ilang araw na lamang at Pasko na. Sa mga huling panahon ng Adbiyento at pagsapit ng Kapaskuhan, samahan natin ang Mahal na Inang si Maria upang purihin nang may buong kagalakan ang Panginoong Diyos. Purihin natin ang Diyos nang may buong kagalakan dahil sa Kanyang Dakilang Awa at Habag sa ating lahat, mga abang makasalanan. Bagamat mga makasalanan tayo, pinili ng Diyos na ipakita at ipadama sa atin ang Kanyang Awa at Habag. Ang pinakadakilang gawa ng Diyos upang ipakita at ipadama ang Kanyang Banal at Dakilang Awa at Habag ay ang pagsusugo Niya sa Mesiyas, ang ating Panginoong Hesukristo. Maraming ginawa ang Diyos upang ipakita at ipadama sa atin ang Kanyang Awa at Habag, ngunit walang makahihigit pa sa pagsusugo Niya sa ating Tagapagligtas na si Hesus. 

MARIA: PINAGPALA DAHIL SA KANYANG PANANALIG SA KALOOBAN NG DIYOS

21 Disyembre 2015 
Ikaanim na Araw ng Simbang Gabi/Misa de Gallo (ABK) 
Awit 2, 8-14 (o kaya: Sofonias 3, 14-18a)/Salmo 32/Lucas 1, 39-45 

Muli na naman nating mapapakinggan ang salaysay ng Pagdalaw ng Mahal na Birheng Maria sa kanyang kamag-anak na si Santa Isabel (Elisabet). Kung atin pong mapapansin at matatandaan, napakinggan natin ang salaysay ng Pagdalaw ng Mahal na Birhen kay Santa Isabel (Elisabet) na kanyang kamag-anak kahapon. Subalit, pagtuunan natin ng pansin ngayon si Maria, sapagkat ayon sa kanyang kamag-anak na si Elisabet, nanalig si Maria sa kalooban ng Diyos para sa Kanya. 

Dala ni Maria ang pagpapalang ipinagkaloob sa kanya ng Diyos. Ang dinadalang sanggol sa kanyang sinapupunan ang pagpapalang ipinagkaloob ng Diyos kay Maria. Pinagpala si Maria sapagkat siya ang hinirang upang maging ina ng Mesiyas na si Hesukristo. Si Maria ay pinili ng Diyos upang bigyan ng buhay si Hesus dito sa sanlibutang ito. Paano nangyari ang lahat ng ito? Sa pamamagitan ng kanyang pananalig sa Diyos. Nanalig at tumalima si Maria sa kalooban ng Diyos para sa kanya. Bagamat hindi niya maunawaan nang lubos, buong pananalig na tumalima si Maria sa kagustuhan ng Diyos. 

Nang marinig ni Santa Isabel (Elisabet) ang bati ng Mahal na Ina, siya'y nagalak sa tinig ng kanyang bati. Ang sanggol na si San Juan Bautista ay gumalaw sa tuwa sa tiyan ni Elisabet. Noong marinig ni Elisabet ang tinig ng Mahal na Birhen, naramdaman niya ang paggalaw ng sanggol na si San Juan Bautista sa kanyang sinapupunan. Ano ang kahalagahan nito? Dumating sa kanilang piling ang pagpapala ng Diyos. Ang pagpapala ng Diyos ay dumating sa kanila sa pamamagitan ni Maria at ng sanggol sa kanyang sinapupunan na si Hesus. 

Ang tugon ni Elisabet sa pagbati ni Maria, "Pinagpala ka sa lahat ng mga babae, at pinagpala rin ang sanggol na dinadala mo sa iyong sinapupunan." (Lucas 1, 42) Ang pananalig ni Maria sa kalooban ng Diyos ang dahilan kaya siya pinagpala ng Diyos. Nanalig siya sa kalooban ng Diyos. Maraming hindi naunawaan si Maria patungkol sa kalooban ng Diyos. Subalit, hindi nagpadala si Maria sa kakulangan ng kanyang pang-unawa. Hindi pinagdudahan ni Maria ang Diyos. Bagkus, buong pananalig niyang tinanggap at sumunod sa kalooban ng Diyos. 

Bago pa ipinaglihi ang Mahal na Birheng Maria sa sinapupunan ni Santa Ana, siya'y iniligtas ng Diyos mula sa dungis ng kasalanang mana. Kaya, isinilang si Maria na hindi dinungisan ng kasalanan kahit kailan. Bilang bata, tinuruan din si Maria patungkol sa Mesiyas. Tinuruan si Maria patungkol sa pangako ng Diyos - ang pagdating ng Mesiyas bilang Tagapagligtas ng bayan ng Diyos. Kabilang siguro si Maria sa mga naghihintay o nananabik para sa pagdating ng Mesiyas, ang pinangakong Tagapagligtas na isusugo ng Diyos. Subalit, hindi niya inaasahan na siya ang pinili ng Diyos upang maging ina ng Mesiyas. 

Noong nagpakita si San Gabriel Arkanghel sa Mahal na Birheng Maria, nagulat ang Mahal na Birhen nang marinig ang bati ng anghel ng Panginoon. Ibinalita ng Arkanghel Gabriel ang kalooban ng Diyos para sa Mahal na Ina. Pinili si Maria upang maging ina ng Mesiyas at Tagapagligtas na si Hesus. Namangha si Maria sapagkat wala siyang inaasahang ganung responsibilidad. Kaya nagtanong siya kung paanong mangyayari iyon, sapagkat dalaga pa siya at nakatakdang ikasal sa isang karpintero na si San Jose. Ipinaliwanag sa kanya ng anghel na ang Espiritu Santo ay bababa sa kanya at liliman ng kapangyarihan ng Kataas-taasang Diyos. 

Kakamangha at napakalalim ng mga sinabi ng Arkanghel Gabriel sa Mahal na Ina. Naintindihan ba niya ang lahat? Naunawaan niya ang lahat? Siguro, may konti siyang kaalaman. Subalit, hindi niya naiintindihan nang lubos ang plano ng Diyos. Napakalalim at napakahirap na sundin ang kalooban ng Diyos. Isang mahirap na desisyon ang kinailangang gawin ng Mahal na Birhen. Maaari sanang sabihin ng Mahal na Ina kay San Gabriel Arkanghel na maghanap na lang ng ibang babae ang Diyos. Subalit, nanalig siya sa kalooban ng Diyos. Kaya, buong pagtalima niyang tinanggap at sinunod ang kalooban ng Diyos. 

Nang tinanggap ni Maria ang pagpapala ng Diyos, tumungo siya sa bahay ng kanyang kamag-anak na si Elisabet. Kahit gaano mang kalayo iyon, pinilit pa rin ni Maria na tumuloy sa bahay ng kanyang kamag-anak. Parehas silang nagdadalantao, subalit bakit pinili ni Maria na tumungo sa bahay ng kanyang kamag-anak? Bakit hindi na lang sila nagkita pagkatapos isilang ang kani-kanilang mga anak? Nais ibahagi ni Maria ang biyayang tinanggap niya mula sa Diyos sa kanyang kamag-anak na si Elisabet. Nais niyang ibahagi ang kagalakan dulot ng pagpapala ng Diyos. Kagalakan ang hatid ni Maria at ng Sanggol na Hesus sa kanyang sinapupunan sa kani-kanilang mga kamag-anak na sina Elisabet at ang sanggol na si Juan Bautista sa kanyang sinapupunan.

Pinagpala ng Diyos ang mga tumatalima sa Kanya ng buong pananalig. Katulad ng Mahal na Birheng Maria, buong pagtitiwala natin sundin ang kalooban ng Diyos. Bagamat mahirap at hindi sukat akalain ang kalooban ng Diyos, sumunod tayo sa kalooban ng Diyos. Kahit hindi lubusan nating maunawaan o maintindihan ang kalooban ng Diyos, sundan pa rin natin ang kalooban ng Diyos. Tularan natin si Maria, ang ating Mahal na Ina, sa pananalig at pagtalima sa kalooban ng Diyos. Tunay tayong makikilala bilang bayan ng Diyos kung tayo ay tumatalima nang buong pananalig sa kalooban ng Diyos. Sapagkat ipinagkakaloob ng Diyos ang Kanyang mga pagpapala sa lahat ng mga nananalig at tumatalima sa Kanya. 

ANG PAGLILIGTAS NG DIYOS

20 Disyembre 2015 
Ikaapat na Linggo ng Adbiyento (K) 
Ikalimang Araw ng Simbang Gabi/Misa de Gallo 
Mikas 5, 1-4a/Salmo 79/Hebreo 10, 5-10/Lucas 1, 39-45 

Ang tema ng mga Pagbasa ngayong Ikaapat na Linggo ng Adbiyento at Ikalimang Araw ng Simbang Gabi o Misa de Gallo ay ang pagliligtas ng Diyos sa Kanyang bayan. Sa Lumang Tipan, ipinahayag ng Diyos na isusugo Niya ang Mesiyas upang iligtas ang Kanyang bayan. Ang magiging Tagapagligtas ng bayang Israel ay ang Mesiyas na isusugo ng Diyos. Natupad ang plano ng Diyos sa Bagong Tipan noong isinilang at nagpakita ang Panginoong Hesukristo sa mundong ito. 

Mapapakinggan natin sa Unang Pagbasa na hinulaan ni propeta Mikas ang pagsilang ng Mesiyas. Siya'y magmumula sa Betlehem, isang bayan sa Juda. Ang Mesiyas ay iluluwal mula sa sinapupunan ng isang babae, isang dalaga. Kung atin pong mapapansin, nilikha ng Diyos ang babae mula sa tadyang ng lalaki sa ikalawang kabanata ng aklat ng Genesis (2, 21-22). Subalit, iba na ang mangyayari. Isang dalaga ang maglilihi at magluluwal sa Mesiyas. Siyam na buwan mananahan ang Mesiyas sa sinapupunan ng babaeng iyon. Natupad ang propesiyang ito patungkol sa pagsilang ng Mesiyas sa Bagong Tipan sa pamamagitan ng Panginoong Hesus at ng Mahal na Birheng Maria. 

Isinalarawan ng manunulat ng Ikalawang Pagbasa mula sa sulat sa mga Hebreo kung paanong dumating si Hesus sa sanlibutan. Dumating si Hesus upang tuparin ang kalooban ng Ama. At ginawa nga ni Hesus ang lahat ng pinapagawa sa Kanya. Nanaog ang Panginoong Hesus sa sanlibutan, at sumunod sa kalooban ng Diyos. Kalooban ng Diyos na maligtas ang sangkatauhan. Naparito si Kristo sa sanlibutan upang iligtas ito, hindi upang ipahamak (Juan 3, 16-17). Inihain ni Kristo ang Kanyang buhay upang iligtas tayong lahat mula sa ating mga kasalanan at palayain mula sa kaalipinan dulat ng kasamaan at kasalanan. Tayo'y pinalaya at iniligtas sa pamamagitan ng pag-aalay ni Kristo ng Kanyang buhay.

Sa Ebanghelyo, narinig natin ang salaysay ng pagdalaw ng Mahal na Ina sa kanyang kamag-anak na si Santa Isabel (Elisabet). Nabalitaan ng Mahal na Birhen na nagdadalantao rin ang kanyang kamag-anak, sa kabila ng kanyang katandaan. Kaisa ni Maria si Elisabet sa kanyang pagdadalantao. Parehas silang nagdadalantao - dinadala ni Maria si Hesus sa kanyang sinapupunan, habang dinadala naman ni Elisabet si San Juan Bautista sa kanyang sinapupunan. 

Kahit hindi pa lumabas sa sinapupunan, nakita ni San Juan Bautista ang katuparan ng pagliligtas ng Diyos. Noong narinig ni Elisabet (Santa Isabel) ang pagbati sa kanya ni Maria, ang sanggol na si San Juan Bautista ay gumalaw sa laki ng tuwa, kahit nasa loob pa siya ng tiyan ni Santa Isabel (Elisabet). Gumalaw ang sanggol na si San Juan Bautista sa loob ng tiyan ng kanyang inang si Elisabet dahil kahit hindi pa siya lumabas, nakilala na Niya kung sino ang pinangakong Tagapagligtas. Nakilala ng sanggol na si San Juan Bautista na hindi pa ipinapanganak ang Tagapagligtas isusugo ng Diyos para sa kaligtasan ng lahat. 

Nangako ang Panginoong Diyos sa Lumang Tipan na magpapadala Siya ng isang dakilang sugo - isang Tagapagligtas, ang Mesiyas. Ipapadala ng Diyos ang Mesiyas sa sanlibutan upang tayo'y iligtas at palayain mula sa kasalanan at kamatayan. Tinupad ng Diyos ang Kanyang pangako at pinadala nga Niya ang Mesiyas sa Kanyang bayan. Si Hesus ang katuparan ng plano at pangako ng Diyos para sa kaligtasan ng Kanyang bayan. Si Hesus ay hinirang ng Ama upang tuparin ang pangako ng kaligtasan para sa Kanyang bayan. Nagplano ang Diyos para sa kaligtasan ng Kanyang bayan. Nangako rin ang Diyos na ililigtas Niya ang Kanyang bayan. Natupad na ang Kanyang plano ng pagliligtas sa Kanyang bayan. Natupad ang Kanyang pangako sa Kanyang bayan na sila'y ililigtas. 

Tunay na dakila ang pagliligtas ng Diyos sa Kanyang bayan. Ang pagliligtas ng Diyos ay natupad sa pamamagitan ng Kanyang Banal at Dakilang Awa at Habag sa Kanyang bayan. Isinugo ng Diyos ang Mesiyas sa katauhan ng Kanyang Bugtong na Anak, ang Panginoong Hesukristo, upang maging Tagapagligtas ng Kanyang bayan. Nagmula ang Mesiyas na si Hesus sa sinapupunan ng isang dalaga, isang babae, ang Mahal na Birheng Maria. Nakilala din Siya bilang Tagapagligtas ng sangkatauhan ng isang kapwa-sanggol na nasa sinapupunan ng kanyang sariling ina - si San Juan Bautista. 

Nakilala ni San Juan Bautista, na nasa tiyan ng kanyang inang si Santa Isabel (Elisabet) ang Panginoong Hesus na nasa tiyan ng Kanyang ina, ang Mahal na Birheng Maria. Nakilala din ni Elisabet (Santa Isabel) ang Bagong Kaban ng Tipan, ang Mahal na Birheng Maria na nagdala sa Panginoong Hesukristo sa kanyang sinapupunan sa loob din ng siyam na taon. Noong narinig ni Elisabet (Santa Isabel) ang pagbati ng kanyang kamag-anak na si Maria, narinig din ng sanggol na si San Juan Bautista na nasa sinapupunan ng kanyang inang si Santa Isabel (Elisabet) ang tinig ng pagliligtas ng Diyos. 

Dumating ang pagliligtas ng Diyos sa pamamagitan ng isang sanggol na lalaki at ng isang dalagang babae. Iniluwal ng Mahal na Birheng Maria, ang dalagang babae, ang Bugtong na Anak ng Diyos na si Hesukristo, ang sanggol na lalaki. Sa pamamagitan nito, tinupad Niya ang Kanyang mga sinabi patungkol sa Kanyang pangako ng kaligtasan na ipinahayag ng mga propeta sa Lumang Tipan. Ipinahayag ng Diyos sa Kanyang bayan na maglilihi at manganganak ng isang sanggol na lalaki ang isang dalaga. Natupad iyon sa pamamagitan ng Sanggol na si Hesus at ng Mahal na Birheng Maria. 

MANALIG SA AWA NG PANGINOON

19 Disyembre 2015 
Ikaapat na Araw ng Simbang Gabi/Misa de Gallo (ABK) 
Mga Hukom 13, 2-7. 24-25a/Salmo 70/Lucas 1, 5-25

Sinimulan ni San Lucas ang kanyang Ebanghelyo sa pamamagitan ng mga pagpapakita ni San Gabriel Arkanghel kina Zacarias at Maria. Mahalaga ang papel ng Arkanghel na si San Gabriel sa plano ng pagliligtas ng Diyos sa sangkatauhan. Siya ang tagapaghatid ng Mabuting Balita ng Panginoon. Hinatid niya ang Mabuting Balita ng Panginoon kina Zacarias at Maria. Ang balitang hatid ng Arkanghel Gabriel kina Zacarias at Maria ay ang kanilang mga papel sa kaligtasang pinlano ng Diyos para sa sangkatauhan. 

Unang nagpakita si San Gabriel Arkanghel kay Zacarias. Ibinalita niya kay Zacarias ang kanyang papel sa plano ng kaligtasan ng Diyos sa sangkatauhan. Sina Zacarias at ang kanyang asawang si Elisabet (Santa Isabel) ay pinili ng Diyos upang maging mga magulang ng Tagapaghanda ng daraanan ng Panginoon. Ang kanilang magiging anak ay si San Juan Bautista. Si San Juan Bautista ang mauuna sa Mesiyas upang ipaghanda ang Kanyang daraanan. 

Ayon sa kaugalian ng mga Hudyo, kapag may isang babaeng na walang anak sa kanyang pagtanda, isa na siyang baog. Walang magtataguyod para sa kanyang kabuhayan kapag ang kanyang asawa ay pumanaw. Walang anak na mag-aalaga sa kanya. Walang siyang mga anak na maghahanap-buhay para sa kanilang pamilya, kahit isa man lang.  Siguro, wala nang mag-aalaga sa kanya, lalung-lalo na kung biyuda siya. Araw-araw siyang nag-iisa, at malungkot. Mag-isa na lamang siya, at kadalasan, nabubuhay siya na puno ng kahirapan. Mahirap ang maging biyuda at balo noong kapanahunang yaon. 

Baog na si Elisabet. Malapit na rin siyang maging biyuda, kung si Zacarias ang unang mamatay sa kanilang dalawa. Sa katandaan siguro nina Zacarias at Elisabet, masasabi nating malapit nang magwawakas ang kanilang buhay dito sa mundo. Araw-araw silang nanalangin sa Diyos na ipagkaloob sila ng anak, subalit, sa mahaba-habang panahon, hindi sila nagkaroon ng anak, kahit isa man lang. Kung mamamatay si Zacarias, wala nang mag-aalaga o magtataguyod para kay Elisabet. Mag-isa na lamang siyang mamumuhay na punung-puno ng kahirapan at kalungkutan kung mauuna sa kanya si Zacarias. 

Kahit na baog si Elisabet, ipinahayag ng Arkanghel Gabriel kay Zacarias na magdadalantao ang kanyang asawa. Matagal nang hinintay ng mag-asawang sina Zacarias at Elisabet ang araw na iyon. Subalit, bakit kung kailan pa sila tumanda? Bakit pa nagdalantao si Elisabet noong sobrang matanda na siya? Bakit hindi siya nagdalantao noong bata-bata pa sila? Bakit ngayong lang pinagbigyan ng Diyos ang kanilang kahilingan? Bakit ang tagal?

Plano ito ng Diyos. Lahat ng ito ay pinlano ng Diyos. Ipinlano Niya ang paraan kung paanong ililigtas Niya ang Kanyang bayan. Siya ang nagplano kung paanong ililigtas Niya ang buong sangkatauhan. Isusugo Niya ang Mesiyas sa katauhan ni Hesus upang maging Tagapagligtas ng sangkatauhan. Subalit, bago pa lumitaw ang Mesiyas, may maghahanda ng Kanyang daraanan. Lilitaw ang Tagapaghanda ng daraanan ng Panginoon. Siya ay walang iba kundi si San Juan Bautista. Bago magpakita si Hesus, magpapakita muna si Juan Bautista. 

Subalit, ang nakakalungkot, pinagdudahan ni Zacarias ang plano ng Diyos. Hindi siya naniwala. Humingi siya ng palatandaan mula sa anghel para maniwala siya. Nagtanong si Zacarias dahil nagduda siya sa awa ng Diyos. Sa halip na manalig at magpasalamat sa Diyos, nagtaka at nagduda si Zacarias. Tinaasan niya siguro ang kanyang kilay sa anghel. Hindi siya makapaniwala sa mga sinasabi sa kanya ng anghel. Kaya, humingi siya ng tanda bago pa siya maniwala sa sinabi ng Arkanghel na si San Gabriel sa kanya. 

Dahil pinagdudahan ni Zacarias ang plano ng maawaing Diyos, sinumpaan siya ng Diyos. Pinarusahan siya ng Diyos dahil sa kakulangan ng pananalig at pagtitiwala sa awa ng Diyos. Mananatiling pipi at bingi si Zacarias hanggang sa araw ng pagsilang ni San Juan Bautista. Ito'y kaparusahan mula sa Diyos. Pinarusahan ng Diyos si Zacarias dahil hindi siya nanalig sa Kanya. Bagamat masakit para sa Diyos na parusahan si Zacarias na matagal nang naghintay upang magkaanak, kinailangan Niyang parusahan si Zacarias dahil sa kakulangan ng pananalig sa Kanyang Banal at Dakilang Awa sa sangkatauhan. 

Araw-araw, ipinapakita at ipinapadama ng Panginoon sa ating lahat ang Kanyang Banal at Dakilang Awa. Huwag nating pagdudahan ang Kanyang Awa sa ating lahat. Ang lahat ng mga mabubuting bagay ang nangyayari dahil sa awa ng Diyos. Hindi ba, bilang mga Pilipino, madalas nating sinasabi kapag ang lahat ay nasa mabuting bagay ang mga salitang katulad ng, "May awa ang Diyos," "Sa awa ng Diyos" ? Huwag nating pagdudahan ang Awa ng Diyos. Bagkus, manalig tayo sa awa ng Panginoon nang buong puso at kaluluwa. 

HESUS: ANAK NI MARIA, ANAK NI JOSE

18 Disyembre 2015
Ikatlong Araw ng Simbang Gabi/Misa de Gallo (ABK) 
Jeremias 23, 5-8/Salmo 71/Mateo 1, 18-24 

Binibigyang diin ng Ebanghelyo ngayong Ikatlong Araw ng Simbang Gabi o Misa de Gallo ang salaysay ng pagtanggap ni San Jose sa Mahal na Birheng Maria at sa Panginoong Hesus. Tinanggap ni Jose sina Maria at Hesus sa kanyang buhay bilang kanyang pamilya. May plano ang Diyos para kay Jose - tumayo bilang ama ni Hesus dito sa sanlibutan. Pinili ng Diyos na lumaki bilang anak ng isang lalaki at isang babae. Pinili ng Diyos na magkaroon ng isang pamilya. 

Walang balak si Maria na mabuntis sa maagang edad. Si Maria'y isang dalaga na namumuhay ng payak sa Nazaret. Namumuhay siya kasama ng kanyang mga magulang na sina Santa Ana at San Joaquin noong kapanahunang yaon. Ayon pa nga sa Ebanghelyo, ikakasal si Maria kay Jose nang siya'y magdalantao. Hindi pinlano ni Maria na magdalantao sa murang edad. Kung kailan hindi pa nagaganap ang kasal, saka pa nabuntis si Maria. Isang mabigat na eskandalo ito sa kapanahunang yaon. Aakusahan si Maria ng pakikiapid sapagkat siya'y natagpuang buntis sa labas ng kasal. 

Si Jose naman ay isang karpintero sa Nazaret. Galing siya sa Betlehem, subalit nakatira siya sa Nazaret noong kapanahunang yaon. Masipag siya sa kanyang hanapbuhay bilang karpintero. Naghahanap-buhay si Jose para sa kanyang kasalukuyang pamilya, at sa kanyang magiging pamilya. Ikakasal na si Jose kay Maria, kaya puspusan na siguro ang kanyang paghahanap-buhay upang maayos ang pagsisimula ng kanilang buhay mag-asawa. 

Noong nabalitaan ni San Jose na nabuntis ang Mahal na Ina sa labas ng kasal, nagkaroon na siya ng pagdududa. Bakit nabuntis si Maria sa labas ng kasal? Malapit na silang ikasal, bakit ngayon pa siya nabuntis? Bakit hindi hinintay ni Maria si Jose? Bakit dinaya o niloko ni Maria si Jose? Bakit nakipagtalik si Maria sa ibang lalaki? Punung-puno ng pagmamahalan ang relasyon nina Jose at Maria. Bakit nagkaganon si Maria? Bakit siya nakipag-relasyon sa ibang lalaki? Bakit siya nakipag-relasyon sa iba, kahit alam niyang ikakasal siya? 

Ang pagiging buntis sa labas ng kasal ay mabigat na eskandalo noong kapanahunang yaon. Ito'y isang palatandaan na nakiapid ang isang babae sa ibang lalaki. Nagtalik sila sa labas ng kasal. Dahil sa bigat ng kasalanang ito noong kapanahunang yaon, mabigat ang kaparusahan nito. Ihahatak ang mga nakiapid patungo sa isang pampublikong lugar, katulad ng isang plaza. Pagkatapos, ibabato ang mga nakiapid hanggang sa sila'y namatay.  

Isang kumplikadong sitwasyon ito para kina Maria at Jose. Ayon pa nga sa Ebanghelyo, matuwid na tao si Jose. Hindi makakagawa ng ganitong bagay si Jose sapagkat siya'y isang matuwid na Hudyo. Masunurin si Jose sa batas ng mga Hudyo. Buong puso niyang sinusunod ang batas ng mga Hudyo. Ayaw niyang suwayin ang batas ng mga Hudyo. Alam din ni Jose na wala siyang kinalaman sa pagbubuntis ni Maria bago siya ikinasal. Isang napakakumplikado, napakagulo, at nakakalitong sitwasyon. Ano nga ba ang nangyari? Ano ba ang totoo? Sino ang nagsasabi ng katotohanan? Ano ba ang talagang nangyari?

Bakit nga ba nangyari ito? Si San Mateo ang nagpaliwanag sa pagpapatuloy ng salaysay. Ang Anghel ng Panginoon ay nagpakita kay Jose sa panaginip. Ipinaliwanag ng anghel ang dahilan ng pagdadalantao ni Maria sa labas ng kasal. Hindi nakiapid si Maria sa ibang lalaki. Hinding-hindi niloko ni Maria si Jose. Walang ibang ka-relasyon si Maria. Bagkus, kalooban ng Diyos ang naganap. Nabuntis si Maria dahil kagustuhan ito ng Diyos. Bakit? Sapagkat hindi pangkaraniwan ang sanggol na dinadala niya sa kanyang sinapupunan. Ang dinadala ni Maria sa kanyang sinapupunan ay ang Anak ng Diyos at ang Mesiyas - si Hesus. Ang pagdadalantao ni Maria ay kalooban ng Diyos, hindi bunga ng pakikipag-relasyon sa ibang lalaki. 

Sinugo ng Diyos si Hesus upang maging Tagapagligtas at Mesiyas ng sanlibutan. Hinirang ng Diyos si Maria upang maging ina ni Hesus. Mananahan si Hesus sa sinapupunan ni Maria sa loob ng siyam na buwan. Sa gayon, makikita natin na si Maria ang Kaban ng Bagong Tipan. Dinala ni Maria sa kanyang tiyan si Hesus, ang Bagong Tipan. Hinirang din ng Diyos si Jose upang maging ama-amahan ni Hesus dito sa mundo. Ang Banal na Pamilya nina Hesus, Maria, at Jose ay binuo ng Diyos para sa Kanyang dakilang plano ng pagliligtas sa sanlibutan. 

Lumaki si Hesus sa isang pamilya katulad natin. Ipinapakita ni Hesus na kahit Siya ang Diyos, kaisa Niya tayo. Naging tao ang Diyos Anak upang ipakita at ipadama sa atin ang Kanyang awa at habag sa sangkatauhan. Bumaba Siya mula sa langit at nanahan sa tiyan ng isang birhen sa loob ng siyam na buwan. Lumaki ang Panginoong Hesus sa isang pamilya na binuo ng isang babae at isang lalaking magkabiyak sa katauhan ng Mahal na Birheng Maria, ang maluwalhating laging birhen, at ni San Jose na tumayo bilang Kanyang ama-amahan sa daigdig. 

HESUS: NAPABILANG SA ANGKAN NG MGA MAKASALANAN DAHIL SA AWA NG DIYOS

17 Disyembre 2015
Ikalawang Araw ng Simbang Gabi/Misa de Gallo (ABK) 
Genesis 49, 2. 8-10/Salmo 71/Mateo 1, 1-17 

(Photo courtesy: http://manilacathedral.ph/)

Ang Ebanghelyo ngayon ay tungkol sa lahi ng Panginoong Hesukristo. Nagmula ang Panginoong Hesus mula sa angkan ng mga kasalanan. Mga makasalanan ang mga ninuno ni Hesus. Katulad nina Jacob, Juda, David, at Solomon. Ninakaw ni Jacob ang karapatan at basbas ng kanyang amang si Isaac na nakalaan para sa kanyang kambal na si Esau. Si Juda at ang kanyang mga kapatid ang nagbenta sa kanilang nakababatang kapatid na si Jose. Pinagpaslang ni Haring David ang asawa ni Batseba na si Urias, at nakiapid. Si Haring Solomon naman ay nag-asawa ng maraming mga babaeng dayuhan, kahit na labag ito sa Panginoong Diyos. Tinalikuran ni Solomon ang Diyos na Siyang nagbigay ng karunungan sa kanya noong siya'y bagong hari pa lamang. 

Bakit nga ba pinayagan ng Diyos na maging kabilang sa lahi ng mga makasalanan ang Panginoong Hesukristo? Hindi ba pwedeng isugo na lang si Hesus nang dire-diretsyo? Hindi ba't maaaring bumaba si Hesus mula sa langit sa Kanyang dakila at maningning na Anyo? Kung gugustuhin ni Hesus, maaari sanang bumaba si Hesus mula sa langit, punung-puno ng kadakilaan at kaluwalhatian. Hindi na mapapabilang si Hesus sa lahi ng mga makasalanan kung gayon ang nangyari. Bakit pinayagan ng Diyos na mapabilang si Hesus sa lahi ng mga makasalanan? 

Una, ipinapakita ng Diyos ang Kanyang awa sa mga makasalanan. Si Hesus ay naging kabilang ng lahi ng mga makasalanan upang ipakita sa lahat ang Kanyang Banal na Awa sa mga makasalanan. Nais Niyang ipadama ang Kanyang Awa sa mga makasalanan. Kahit gaanong kasama ang kasalanan ng bawat tao, hindi iyan mapapantayan ang Awa ng Diyos. Ang Awa ng Panginoon ay higit na dakila kaysa sa dinami-daming mga makasalanan. Walang kasalanan, kahit gaano pa mang kasama, ang mas makapangyarihan at mananaig laban sa Awa ng Diyos. 

Pangalawa, ipinapakita ng Diyos ang Kanyang awa sa mga nagdurusa. Binanggit dito sa talaan ang panahon ng pagkakatapon ng mga Israelita sa Babilonia. Panahon iyon nina Propeta Daniel, Haring Nabucodonosor, atbp. Nagdusa ang mga Israelita noong nagkawatak-watak sila dahil sa pagkakatapon ng mga Israelita sa Babilonia. Nananalangin ang buong bayang Israel sa Babilonia upang palayain sila mula sa kaalipinan sa Babilonia. 

Hindi lamang iyan ang pagkakataon kung kailan nagdusa ang mga Israelita, noong kapanahunan ni Moises. Bagamat hindi ito nabanggit sa talaan ng angkan ni Kristo, makikita natin sa salaysay ng pagpapalaya ng Diyos sa Kanyang bayan mula sa kaalipinan sa Ehipto. Ilang taon nang naranasan ng mga Israelita ang kalupitan ng mga Ehipsiyo. Napakahaba ang panahon ng kanilang paghihirap sa Ehipto. Nanalangin ang buong bayan ng Israel noong kapanahunang yaon na sila'y palayain mula sa kaalipinan sa Ehipto. At nagkatotoo nga. Dahil sa awa ng Diyos, sinugo Niya si Moises upang maging Kanyang tagapagsalita sa Faraon at tagapagpalaya ng mga Israelita. 

Sina Adan at Eba, ang unang mga ninuno ng sangkatauhan, ang unang makasalanan. Perpektong-perpekto sana sila, subalit nagkasala sila laban sa Diyos noong kinain nila ang bunga mula sa puno ng karunungan tungkol sa kabutihan at kasamaan, ang puno sa gitna ng halamanan ng Eden. Pumasok ang kasalanan sa daigdig sa pamamagitan ng kasalanan nina Adan at Eba. Nagpadaig sina Adan at Eba sa tukso, sa halip na sundin ang utos ng Diyos. 

Maawain ang Diyos sa mga taong marupok. Salamat sa Diyos sa Kanyang Dakilang Awa sa ating lahat, mga taong marupok! Kung hindi maawain ang Diyos, matagal tayong namuhay bilang mga alipin ng kasamaan at kasalanan. Kung walang Awa ng Diyos, hindi sana pumarito si Hesus upang tayo'y tubusin at palayain mula sa ating mga kasalanan. Ang plano ng kaligtasan ng Diyos para sa sangkatauhan dahil sa Kanyang Dakilang Awa ay natupad sa pamamagitan ni Kristo Hesus. Naparito si Kristo upang tuparin ang kaligtasang ipinangako ng maawaing Diyos sa Kanyang bayan.

Naging tao si Hesus upang ipakita at ipadama sa buong sansinukob ang Banal at Dakilang Awa ng Diyos. Bagamat perpekto, pinili ni Hesus na mapabilang sa angkan ng mga makasalanan dahil sa Awa ng Diyos. Hindi nagkasala kahit kailan si Hesus, noong Siya'y naparito sa mundo. Pinasan Niya ang ating mga kasalanan at inihandog sa Ama alang-alang sa ating lahat, mga mahihinang makasalanan.