29 Disyembre 2016
Ikalimang Araw ng Pagdiriwang sa Pasko ng Pagsilang
1 Juan 2, 3-11/Salmo 95/Lucas 2, 22-35
Inihayag ni Simeon ang kanyang kagalakan sa katuparan ng pangakong binitawan ng Diyos sa kanya sa Ebanghelyo. Nakita ni Simeon ang katuparan ng pangako ng Diyos sa pamamagitan ng Sanggol na Hesus. Isang napakahalagang pangako ang binitiwan ng Diyos sa Kanyang bayan. Nangako ang Diyos na Siya'y magpapadala ng isang Manunubos para sa Kanyang bayan. Ang pangakong binitiwan ng Diyos sa Kanyang bayan ay natupad sa pamamagitan ng Banal na Sanggol na si Hesus.
Si Hesus ang Diyos na pumarito bilang Tagapagligtas ng lahat. Sa pamamagitan ni Hesus, inihayag sa lahat ang kaliwanagan at kaligtasang nagmumula sa Diyos. Ipinamalas ang pagliligtas ng Diyos, at ang liwanag na taglay nito. Ang Diyos ay pumarito sa pamamagitan ni Hesus upang iligtas ang sangkatauhan. Ipinamalas ang dakilang pag-ibig ng Diyos para sa sangkatauhan sa pamamagitan ni Kristo Hesus, ang Pangalawang Persona ng Banal na Santatlo.
Nagalak si Simeon. Nakita na niya ang katuparan ng pangako ng Diyos. Nakita ng kanyang mga mata ang dakilang pagmamahal ng Diyos para sa sangkatauhan na ipinahayag sa pamamagitan ng Banal na Sanggol. Bukod pa roon, ang pangakong inihayag ng Espiritu Santo sa kanya ay nagkaroon rin ng katuparan. Inihayag ng Espiritu Santo kay Simeon na hindi siya mamamatay hangga't hindi niya nakita ang Mesiyas na Tagapagligtas. Natupad ito noong nakita ni Simeon ang Sanggol na Hesus sa kandungan ng Inang Maria.
Si Simeon ay nagtiwala sa pangako ng Diyos. Nanalig siyang hindi lilimutin ng Diyos ang pangakong binitiwan. Buo ang kanyang pananalig sa Diyos na Siyang unang nagmahal sa lahat. Nanalig siya na ang Diyos ay laging tapat sa Kanyang pangako. Hindi Niya nakakalimutan ang pangakong binitiwan. Bagkus, ang Diyos ay tapat at lagi Niyang natatandaan ang Kanyang pangakong binitiwan. Tutuparin ng Diyos ang Kanyang pangako pagdating ng takdang panahon.
Dapat tayong magtiwala sa Panginoong Diyos. Hindi Siya nakakalimot. Wala ring balak lumimot ang Diyos. Lagi tayong naalala ng Diyos. Lagi Niyang natatandaan ang Kanyang mga pangako. Hindi Siya nakakalimot sa mga pangakong binitiwan. Walang makakatapat sa katapatan at pag-alala ng Diyos sa Kanyang mga pangako. Kung ang tao'y nakakalimot at nagpapako sa mga pangako, ang Panginoong Diyos ay nakakatanda at tumutupad sa mga pangakong binitiwan.
28 Disyembre 2016
Kapistahan ng mga Banal na Sanggol na Walang Kamalayan, Mga Martir (Niños Inocentes)
1 Juan 1, 5-2, 2/Salmo 123/Mateo 2, 13-18
Matatagpuan sa ikalawang kabanata ng Ebanghelyo ni San Mateo ang kwento ng mga sanggol na walang kamalayan. Isinalaysay ni San Mateo ang karumal-dumal na pagpaslang sa mga inosenteng sanggol na ito. Ipinapaslang ni Haring Herodes ang mga inosenteng sanggol na ito na walang kalaban-laban. Ang pagkabuway ni Haring Herodes ang dahilan kung bakit ipinagpatay niya ang mga sanggol na ito na walang kamalay-malay at walang kalaban-laban. Tunay ngang karumal-dumal ang pangyayaring ito. Ang mga sanggol na walang malay ay naging mga biktima ng mga di-makatarungang patayan sa ilalim ng pamumuno ni Haring Herodes.
Uhaw na uhaw si Haring Herodes para sa kanyang posisyon. Uhaw na uhaw para sa kapangyarihan. Ayaw niyang bitawan ang kanyang kayamanan. Ayaw bitawan ang kanyang kapangyarihan. Gusto niyang mapasakanya ang lahat. Gusto niyang siya lang ang hari. Gusto niyang siya lang ang pinuno. Gusto niyang siya lang ang makapangyarihan. Dahil sa pagkauhaw at pagnanasa ni Herodes para sa kanyang posisyon at ambisyon, hindi niya pinahalagahan ang buhay ng bawat tao, lalung-lalo na ang mga sanggol. Hindi pinahalagahan ang pinakamahalagang biyayang ipinagkaloob sa lahat ng tao. At ang pinakamahalagang biyayang ito ay nagmula sa Makapangyarihang Panginoong Diyos na Siyang lumikha ng lahat.
Ang buhay ng tao ay galing sa Diyos. Dahil diyan, ang buhay ay sagrado at hindi dapat ipagkait mula sa sinuman. Ang buhay ay dapat pahalagahan sapagkat ito'y isang biyaya mula sa Diyos. Mga katiwala lamang tayo ng Panginoong Diyos. Ang pagpatay ay labag sa Sampung Utos ng Diyos sapagkat ang karapatan ng isang tao upang mabuhay ay ipinagkakait mula sa kanya. Hindi pagmamay-ari ng tao ang buhay. Ang buhay ay nagmula sa Diyos. Ang Diyos ang pinagmulan ng buhay, at Siya lamang ang maaaring bumawi nito.
Ngayong Kapistahan ng Niños Inocentes, alalahanin natin na ang buhay ay isang biyaya mula sa Diyos. Pahalagahan natin ang buhay ng kapwa-tao. Igalang natin ang buhay ng isang tao mula sa sinapupunan hanggang sa kusang pagpanaw nito. Walang maaaring bumawi ng buhay mula sa kapwa-tao. Ang Panginoon lamang ang maaaring bumawi ng ating buhay, sapagkat Siya ang pinagmulan ng buhay.
Huwag kang papatay. (Exodo 20, 13; Deuteronomio 5, 17)
27 Disyembre 2016
Kapistahan ni Apostol San Juan, Manunulat ng Mabuting Balita
1 Juan 1, 1-4/Salmo 96/Juan 20, 2-8
Si Apostol San Juan ay isa sa mga apat na Manunulat ng Mabuting Balita. Siya rin ay kilala sa tradisyon bilang alagad na lubos na minamahal ng Panginoong Hesus. Tulad ng kanyang mga kapwa alagad at apostol, naranasan niya ang pagmamahal ni Hesus. At ang pagmamahal ni Hesus ay pinatotohanan nila sa lahat sa kanilang pagmimisyon. Ipinangaral at ipinalaganap ang Mabuting Balita ng dakilang pag-ibig ng Diyos na lumitaw at naipamalas sa pamamagitan ni Kristo Hesus.
Ito ang ipinahayag ni Apostol San Juan sa Unang Pagbasa. Siya'y hinirang upang ipalaganap sa lahat ang dakilang pagmamahal ng Diyos na naipamalas sa lahat sa pamamagitan ni Kristo. Iyan ang misyon ng bawat apostol ni Kristo. Hinirang sila ni Kristo upang ipalaganap ang Mabuting Balita tungkol sa dakilang pagmamahal ng Diyos para sa tao. Ang pinakadakilang pagpapahayag ng pag-ibig ng Diyos ay ang pagsusugo kay Kristo Hesus sa sanlibutan upang iligtas ang sangkatauhan.
Sa Ebanghelyo, nasaksihan ang dahilan kung bakit isinilang noong unang Pasko si Hesus. Isinilang si Hesus noong unang Pasko upang mamatay at muling mabuhay sa ikatlong araw. Si Hesus ay dumating at ipinanganak noong unang Pasko upang iligtas ang sangkatauhan. Siya ay dumating upang maging Tagapagligtas ng lahat ng tao. At bilang Tagapagligtas, inialay ni Hesus ang Kanyang buhay para sa tao. Sa pamamagitan ng Kanyang krus at Muling Pagkabuhay, tinubos ni Hesus ang lahat ng tao at inihayag sa lahat ang dakilang pag-ibig ng Diyos.
Tulad ng lahat ng mga apostol at mga banal sa langit, lalung-lalo na si Apostol San Juan, ang lahat ng mga Kristiyano ay tinatawag upang maging mga saksi ng pag-ibig ng Panginoon. Dakilang pag-ibig ang tunay na dahilan kung bakit ang Diyos ay nagkatawang-tao at iniluwal mula sa sinapupunan ng Mahal na Birheng Maria noong unang Pasko sa pamamagitan ni Hesus. Si Hesus ay dumating at isinilang sa sabsaban noong unang Pasko upang ihayag sa lahat ang dakilang pag-ibig ng Diyos sa pamamagitan ng Kanyang krus at Muling Pagkabuhay.
26 Disyembre 2016
Kapistahan ni San Esteban, Unang Martir
Mga Gawa 6, 8-10; 7, 54-59/Salmo 30/Mateo 10, 17-22
Ginugunita ng Simbahan ngayon ang Unang Martir ng Simbahan, si San Esteban. Sa lahat ng mga kabilang sa hanay ng mga banal o mga santo, si San Esteban ang unang naging martir. Siya ang unang nag-alay ng buhay alang-alang sa Mabuting Balita. Siya ang unang namatay para kay Kristo. Inalay ni San Esteban kay Kristo ang kanyang buhay, kahit ang kahulugan nito'y agad siyang uusigin at papatayin ng mga ayaw makinig o tumanggap sa Panginoon.
Ang buhay ni San Esteban ay isinalaysay sa Unang Pagbasa. Pinagpala ng Diyos si San Esteban, at dahil doon, siya'y nagkaroon ng kapangyarihang gumawa ng mga himala. Subalit, hindi ginamit ni San Esteban ang kanyang kapangyarihan upang magpasikat. Bagkus, ginamit niya ang kanyang kapangyarihang gumawa ng mga kababalaghan upang bigyan papuri ang Diyos. Ginamit niya ito upang ang Diyos ay makilala ng lahat. Ginamit niya ito upang ipalaganap ang Mabuting Balita.
Bagamat alam ni San Esteban na may mga nagbabanta laban sa kanya, hindi siya tumigil sa pagpapatotoo tungkol sa Panginoong Hesukristo. Hindi siya tumigil sa pagsasalita tungkol kay Kristo. Bagkus, lalo pa siyang nangaral tungkol kay Kristo sa lahat. Si San Esteban ay hindi natakot. Hinangad niyang ialay ang buhay niya para sa ikaluluwalhati ng Panginoon. Mas ninais ni San Esteban mamatay alang-alang sa Panginoong Hesus at sa Mabuting Balita.
Si Hesus ang nagsabi sa Ebanghelyo, "Kapopootan kayo ng lahat dahil sa Akin." (10, 22) Tulad ng ibang mga apostol, naranasan ni San Esteban na kapootan ng lahat ng tao. Kinapootan siya dahil sa kanyang pagsaksi at pananalig kay Kristo Hesus. Kinapootan siya ng lahat, lalo na ng mga pinuno ng Sanedrin. Subalit, si San Esteban ay hindi tumigil sa pagpapalaganap ng Mabuting Balita tungkol sa Panginoong Hesukristo. Bagkus, patuloy niyang ipinangaral at ipinalaganap ang Mabuting Balita ng kaligtasan hanggang sa kanyang huling hininga noong siya'y binato ng madla hanggang sa tuluyang mamatay.
Tinularan ni San Esteban ang halimbawang ipinakita ng Panginoong Hesukristo. Inalay ni Hesus ang Kanyang buhay para sa kaligtasan ng tao. Bagamat batid ni Hesus na hindi Siya tatanggapin ng karamihan sa Kanyang pagdating, dumating pa rin Siya sa sanlibutan. Pumanaog pa rin si Hesus sa lupa, kahit alam Niyang marami ang hindi tatanggap sa Kanya. Subalit, hindi ito naging hadlang sa plano ng Panginoong Hesus. Niloob ni Hesus na pumanaog sa lupa at maging sanggol katulad natin para sa ating kaligtasan.
25 Disyembre 2016
Dakilang Kapistahan ng Pasko ng Pagsilang ng Panginoon
[Pagmimisa sa Araw ng Dakilang Kapistahan]
Isaias 52, 7-10/Salmo 97/Hebreo 1, 1-6/Juan 1, 1-18 (o kaya: 1, 1-5. 9-14)
Kahit saa'y namamalas tagumpay ng Nagliligtas. (Salmo 97)
Ginugunita natin tuwing Pasko ang pagpapahayag at pagpapamalas ng pagliligtas ng Diyos. Ipinamalas ng Diyos ang Kanyang pagliligtas sa pamamagitan ng Banal na Sanggol na si Hesus. Ang Panginoong Hesus ay pumanaog sa sanlibutan upang ipamalas sa lahat ang pagliligtas ng Diyos. Siya ang Diyos na Tagapagligtas. Siya ay pumanaog sa lupa at naging tao upang iligtas ang sangkatauhan. Namalas ng lahat ang pagliligtas ng Diyos sa pamamagitan ng Panginoong Hesukristo.
Isang Magandang Balita ang ipinahayag sa Unang Pagbasa. Ipapamalas ng Diyos ang Kanyang pagliligtas sa lahat ng tao. Ito ang Magandang Balita ng kapayapaan. Masasaksihan ng lahat ng tao ang pagliligtas ng Diyos. Ililigtas ng Panginoon ang Kanyang bayan. Darating ang Panginoon bilang Tagapagligtas ng Kanyang bayan. Siya ang magiging Tagapagligtas ng Kanyang bayan. Masasaksihan ng bawat tao mula sa bawat lipi, wika, at bansa ang pagliligtas ng Diyos.
Muling inihayag ng manunulat ng Sulat sa mga Hebreo ang kaligtasan ng Diyos na ipinamalas sa lahat ng tao. Naipamalas ng Diyos ang Kanyang pagliligtas sa lahat sa pamamagitan ni Hesus. Ang Diyos ay naging tao at namuhay kapiling natin sa pamamagitan ni Kristo Hesus. Isinugo si Hesus bilang Tagapagligtas ng lahat ng tao. Nakamit ng sangkatauhan ang kaligtasan at kalayaang tunay sa pamamagitan ng ipinangakong Mesiyas at Tagapagligtas na si Hesus.
Sinimulan ni San Juan ang salaysay ng Banal na Ebanghelyo sa pamamagitan ng pagkakatawang-tao ng Salita. Ito ang misteryo ng Pasko. Ito ay tema ng Pasko. Ito ang paksang pinagninilayan tuwing sasapit ang Pasko. Ito ang nais ipahiwatig ng mga Pagbasa para sa apat na Misa para sa Pasko ng Pagsilang. Bagamat magkaiba ang pangkat ng mga Pagbasa na pinili para sa apat na Misa ng Pasko - ang Misa sa Bisperas, ang Misa sa Hatinggabi o sa Gabi, ang Misa sa Bukang-Liwayway, at ang Misa sa mismong Araw ng Dakilang Kapistahan - iisa lamang ang nais pagtuunan ng pansin. Ang Salita ng Diyos ay nagkatawang-tao at namuhay kapiling natin.
Ang Sanggol na Hesus na nakahiga sa sabsaban ay ang Salita ng Diyos na naging tao. Hatid ng Sanggol na Hesus sa sabsaban ang Mabuting Balita ng kapayapaan. Ipapalaganap Niya ang Mabuting Balita ng kaligtasan ng Diyos. Masasaksihan ng lahat sa pamamagitan Niya ang pagliligtas ng Diyos sa Kanyang bayan. Siya ang magliligtas sa Kanyang bayan. Siya ang Diyos na Nagliligtas. Sa pamamagitan ni Hesus, iniligtas ng Diyos ang sangkatauhan.
25 Disyembre 2016
Dakilang Kapistahan ng Pasko ng Pagsilang ng Panginoon:
Pagmimisa sa Bukang-Liwayway
Isaias 62, 11-12/Salmo 96/Tito 3, 4-7/Lucas 2, 15-20
Sa pagsilang ni Hesus, dumating ang biyaya ng kaligtasang kaloob ng Diyos. Ito ang tema ng Pasko. Nagkatawang-tao ang Diyos upang iligtas ang sangkatauhan. Niloob ng Diyos na magkatawang-tao para sa kaligtasan ng santinakpan. Naging tao ang Pangalawang Persona ng Banal na Santatlo na si Kristo Hesus. Si Kristo'y nagkatawang-tao at iniluwal mula sa sinapupunan ng Mahal na Birheng Ina. Sa pamamagitan ng Kanyang pagkakatawang-tao, inihayag ng Tagapagligtas na si Hesukristo ang dakilang pag-ibig ng Diyos na walang kapantay.
Nagbitiw ng pangako ang Diyos sa Kanyang bayan sa Unang Pagbasa. Inihayag ng Diyos sa pamamagitan ni propeta Isaias ang Kanyang pangako sa Kanyang bayan. Nangako ang Diyos na ililigtas Niya ang Kanyang bayan. Darating Siya upang ang Kanyang bayan ay tubusin. Siya ang magiging Tagapagligtas at Tagapagpalaya ng tanan. Sa pamamagitan nito, inihayag ng Diyos kung gaano kadakila ang Kanyang pagmamahal para sa buong sangkatauhan.
Ibinunyag ni Apostol San Pablo kung ano ang ipinakita ng Diyos sa lahat ng tao sa pamamagitan ng pagtupad ng Kanyang pangako sa Ikalawang Pagbasa na mula sa kanyang sulat kay Tito. Ipinakita ng Diyos ang Kanyang habag at pag-ibig para sa lahat ng tao sa pamamagitan ng pagkakaloob kay Hesus bilang Tagapagpalaya at Manunubos. Ang Panginoong Hesukristo ay ipinagkaloob sa sangkatauhan bilang Tagapagligtas upang ipamalas ang dakila at walang hanggang habag at pag-ibig ng Diyos sa santinakpan.
Sa Ebanghelyo, ang mga pastol ay tumungo sa sabsaban upang pagmasdan ang Mesiyas na Sanggol. Nakita nila ang katuparan ng pangako ng Diyos. Nakita nila ang habag at pag-ibig ng Diyos sa pamamagitan ng Salitang nagkatawang-tao na si Kristo Hesus. Nakita nilang matupad ang pangakong binitiwan ng Diyos. Sila'y naging mga saksi sa katuparan ng pangako ng Diyos. Nasaksihan nila ang habag at pag-ibig ng Diyos sa pamamagitan ng Sanggol na si Hesukristo.
Dumalaw ang mga pastol sa Salita ng Diyos na nagkatawang-tao na si Hesukristo. Nang masilayan ang Banal na Sanggol, sila'y napuspos ng tuwa't kagalakan. Kaya, nang umuwi ang mga pastol, sila'y nagpuri sa Diyos. Pinuri nila ang Diyos 'pagkat sila'y naging mga saksi ng pagtupad sa pangako ng Diyos. Bagamat hindi karapat-dapat, sapagkat sila'y mga hamak na pastol, sila'y pinili ng Diyos upang saksihan ang katuparan ng pangakong Kanyang binitiwan sa Kanyang bayang Israel.
Tulad ng mga Pastol, tayo ay tinatawag upang pagmasdan ang Banal na Sanggol na si Hesus. Pagmasdan natin ang katuparan ng pangako ng Diyos. Tinupad ng Diyos ang Kanyang pangakong binitiwan sa pamamagitan ng pagsugo Niya kay Kristo Hesus sa sanlibutan. Ipinagkaloob ng Diyos si Hesus bilang Tagapagligtas upang ipamalas ang Kanyang dakilang habag at pag-ibig na walang katapusan.
Masdan ang Sanggol na Mesiyas at Tagapagligtas sa sabsaban. Pagmasdan ang pag-ibig at habag ng Diyos sa pamamagitan ng Banal na Sanggol na si Hesus.
25 Disyembre 2016
Dakilang Kapistahan ng Pasko ng Pagsilang ng Panginoon
[Pagmimisa sa Hatinggabi]
Isaias 9, 1-6/Salmo 95/Tito 2, 11-14/Lucas 2, 1-14
Itinatampok sa pagdiriwang ng Pasko ang isang sanggol. Isang sanggol ang bida ng Pasko. Ang pagdiriwang ng Pasko ay tungkol sa isang sanggol. Ang sanggol na ito'y isinilang sa isang munting sabsaban sa bayan ng Betlehem na siyang bayan ni Haring David. Ang lahat ng mga anghel sa kalangitan ay nagsiawit nang buong galak bilang pagbibigay papuri sa Diyos dahil sa pagsilang ng sanggol na ito.
Ang papel na gagampanan ng sanggol na ito ay isinalarawan ni propeta Isaias sa Unang Pagbasa. Ang sanggol na ito'y isinilang para sa ating lahat. Napakahalaga ng papel na gagampanan ng sanggol na ito. Magiging hari at tagapamahala natin ang sanggol na ito. Paiiralin Niya ang kapayapaan at katarungan.
Sino ang sanggol na ito? Ano ang Kanyang Pangalan?
Si Propeta Isaias na mismo ang sumagot sa katanungang ito. Ang sanggol na ito ay ang Diyos. Ang Diyos na Sanggol ang kanyang tinutukoy sa kanyang pahayag. Ang Diyos ay naging sanggol para sa ating kapakinabangan. Naging sanggol ang Diyos upang iligtas ang buong sangkatauhan.
Muling ipinapahayag sa Salmo ang dahilan ng pagdiriwang ng Pasko. Si Kristong Tagapagligtas at Mananakop ay isinilang. Nararapat lamang na magdiwang nang buong kagalakan ngayong Kapaskuhan sapagkat ipinagkaloob sa lahat ng tao ang pinakdakilang biyaya o regalo para sa Pasko. Ipinagkaloob ng Diyos ang Kanyang sarili bilang Manunubos sa pamamagitan ni Kristo.
Nagsulat si Apostol San Pablo tungkol sa kagandahang-loob ng Diyos sa Ikalawang Pagbasa mula sa kanyang sulat kay Tito. Nagmamagandang-loob ang Diyos. Bago pa man nagsimula ang panahon, ang kagandahang-loob ng Diyos ay inihayag na. Hindi nagmamaliw ang kagandahang-loob ng Diyos. Patuloy Siyang magpapakita ng kagandahang-loob sa lahat. Ang pagkakaloob kay Hesukristo sa sanlibutan ang pinakadakilang pagpapahayag ng kagandahang-loob ng Diyos.
Isinalaysay ni San Lucas sa Ebanghelyo ang pagsilang ni Hesukristo. Sa kanyang salaysay, inilarawan ng Ebangelistang si San Lucas na isinilang si Hesus sa isang sabsaban. Walang matuluyan sina Jose at Maria. Napupuno na ng napakaraming tao ang mga bahay-panuluyan sa mga sandaling iyon. Hindi makahanap ng lugar sa mga bahay-panuluyan sina San Jose at Mahal na Birheng Maria. Kaya, inihiga sa isang sabsaban na kainan ng mga hayop ang Banal na Sanggol na si Hesus.
Muling inihayag ng anghel na nagpakita sa mga pastol na ang sanggol na Mesiyas at Tagapagligtas ay nakahiga sa sabsaban at nakabalot ng lampin. Naging higaan ng Banal na Sanggol ang sabsaban. Mula sa pagiging kainan ng mga hayop, ito'y naging higaan ni Kristo noong Siya'y isinilang. Matapos ibalita ng anghel sa mga pastol ang Mabuting Balita ng pagsilang ni Kristo, nagpakita ang isang hukbong umawit nang buong kagalakan bilang pagbibigay papuri sa Diyos. Umaawit sila ng papuri sa Diyos sa pagsilang ng Tagapagligtas at Mananakop na si Hesus.
Isinilang sa sabsaban ang isang sanggol noong unang Pasko. Ang Kanyang hatid at kaloob sa lahat ay kapayapaan. Sa pamamagitan Niya, ipinamalas sa lahat ng tao ang Awa at kagandahang-loob ng Diyos. Ang lahat ng mga anghel sa langit ay nag-aawitan at nagpupuri sa Diyos nang buong kagalakan sa Kanyang pagsilang. Ang Sanggol na ito ay ang Mesiyas at Tagapagligtas na si Hesus, ang ating Panginoon.
