PITONG HULING WIKA - IKATLONG WIKA

IKATLONG WIKA (Juan 19, 26-27):
"BABAE, NARITO ANG IYONG ANAK...
NARITO ANG IYONG INA!" 

Sa salaysay ng Pasyong Mahal ng Panginoon, ipinakita ng ating Mahal na Ina kung paanong maging matatag sa mga sandali ng kahirapan sa buhay. Itinuturo niya sa ating lahat kung paanong manalig sa Diyos sa kabila ng kahirapan ng buhay. Ito'y ipinakita sa atin ng Mahal na Birheng Maria noong siya'y nakiisa at sumunod kay Hesus sa mga nalalabing sandali ng Kanyang buhay sa krus. 

Iniwanan at tinalikuran si Hesus sa mga huling sandali ng Kanyang buhay. Ang mga alagad (maliban kay San Juan) ay tumalikod sa Kanya sa Halamanan dahil sa tindi ng kanilang takot sa mga autoridad. Natakot ang mga apostol dahil ayaw nilang mamatay. Kaya, iniwanan nila si Hesus sa Getsemane. Si Hudas Iskariote naman ay tumalikod kay Hesus sa pamamagitan ng pakikipagsabwatan sa mga kaaway ni Hesus. Binenta ni Hudas si Hesus sa mga nagbabanta laban sa Kanya kapalit ng tatlumpung piraso ng pilak. Si Apostol San Pedro ay tumalikod rin kay Hesus. Tatlong ulit niyang itinatwa si Hesus habang Siya'y nililitis ng Sanedrin. 

Si Hesus ay iniwanan ng lahat sa mga huling sandali ng Kanyang buhay. Iilan lamang ang mga nanatili sa Kanyang tabi sa mga sandaling iyon. Isa na rito ang Mahal na Inang si Maria. Nakiisa si Maria nang buong katapatan at katatagan sa pagdurusa ng Anak niyang iniibig na si Hesus. Si Maria ay nanatiling kasama ng Anak niyang iniibig. Hindi pinabayaan o tinalikuran ni Maria si Hesus. Nakiisa, dumamay si Maria sa pagdurusa ni Hesus. 

Nanatiling matatag ang Mahal na Birheng Maria sa mga huling sandali ng buhay ng Panginoong Hesus. Nakita ni Maria kung paanong sinaktan at pinahirapan ng mga kawal at iba pang mga kasapi ng autoridad si Hesus. Nakita ni Inang Maria kung paanong pinagtulungan ng mga autoridad ang Panginoong Hesus. Walang awa nilang pinagtulungan at sinaktan si Hesus. Nakita ni Maria kung paanong si Hesus ay nagpatuloy sa Kanyang daan sa Kalbaryo habang pasan-pasan ang krus. Nakita ni Maria kung paanong nagdusa si Hesus habang nakabayubay sa krus. 

Tiniis ng Mahal na Birheng Maria Maria ang lahat ng sakit dulot ng pagdurusa ni Hesus. Tiniis ni Maria ang lahat ng hapdi, ang lahat ng pighati, ang lahat ng kirot sa kanyang puso. Naramdaman rin ng Mahal na Inang si Maria ang bawat sakit na naramdaman ni Hesus habang nakapako sa krus. Nagdusa si Inang Maria kasama ang minamahal niyang Anak na si Kristo Hesus. 

Hindi natakot ang Mahal na Birheng Maria sa mga autoridad. Ang mga apostol ay tumakas mula sa mga autoridad noong dinakip si Hesus sa Getsemane. Iniwanan nila si Hesus dahil sa tindi ng kanilang takot sa mga autoridad. Ipinagkaila rin ni Apostol San Pedro si Hesus dahil sa takot. Silang lahat ay takot mamatay. Subalit, ang Mahal na Birheng Maria ay hindi natakot. Hindi natakot ng Mahal na Birheng Maria ang mga autoridad. Kahit alam ni Maria na maaari siyang dakipin ng mga autoridad dahil siya ang ina ni Hesus, hindi siya nagpadaig sa takot. Bagkus, ang Mahal na Birheng Maria ay sumunod kay Kristo Hesus nang buong katapangan at katapatan. Hindi pinabayaan ni Maria ang Anak niyang naghihingalo. 

Kaya, ipinagkatiwala ng Panginoong Hesus sa pangangalaga ni Apostol San Juan ang Mahal na Birheng Maria. Ipinagkatiwala ni Hesus kay San Juan Apostol, ang kumakatawan sa Simbahan sa mga sandaling iyon, ang Mahal na Birheng Maria. Ibinigay ni Hesus si Maria upang maging ina ng Simbahan. Ibinigay ni Hesus si Maria upang maging ina't huwaran ng bawat Kristiyano.  

Mayroong huwarang ibinigay ang Panginoong Hesus sa ating lahat - ang Mahal na Birheng Maria. Nagpakita ng katatagan ang Inang Maria sa mga huling sandali ng buhay ni Hesus. Hindi siya nagpatalo sa takot. Hindi niya hinayaang maghari ang takot sa kanyang puso. Hind niya ikinubli ang sarili dahil sa takot. Bagkus, buong kababaang-loob at katahimikan na naging matatag ang Mahal na Inang si Mariang Birhen habang nasasaksihan niya ang bawat sandali ng Pasyon ng kanyang Anak na si Hesus. Sumunod at nakiisa ang Mahal na Inang si Maria sa Pasyon ni Hesus nang buong katapatan, katatagan, katahimikan, at kababaang-loob. 

PITONG HULING WIKA - IKALAWANG WIKA

IKALAWANG WIKA (Lucas 23, 43):
"SINASABI KO SA IYO: 
NGAYON DI'Y ISASAMA KITA SA PARAISO." 

May ugnayan ang Una at Ikalawang Wika ng Panginoong Hesus mula sa krus. Iisa lamang ang tema ng unang dalawang salita ng Panginoon habang nakabayubay sa krus - kapatawaran. Ang Unang Salita ni Kristo mula sa krus ay isang panalangin sa Ama para sa Kanyang mga tagausig. Nanalangin nang buong kataimtiman ang Panginoong Hesus upang ang Kanyang mga tagausig ay mapatawad ng Diyos, sa kabila ng mga masasamang gawain nila laban sa Panginoon. Ang Ikalawang Wika naman ay tungkol sa pagpapatawad ni Hesus sa isang salarin na ipinako sa krus sa bundok ng Kalbaryo kasama Niya. Pinatawad ni Hesus ang nagtitikang salarin. Ipinangako rin ni Hesus sa kanya na siya'y isasama Niya sa Paraiso. 

Dimas ang pangalan ng salaring nagtika. Ayon sa tradisyon, ang krimeng kanyang ginawa ay pagnanakaw. Ano ba ang kanyang ninakaw? Hindi natin alam. Subalit, natitiyak natin na napakabigat ang kanyang ginawang krimen. Nagnakaw siya sa iba't ibang pamamaraan. Hindi lamang nagnakaw si Dimas ng iba't ibang bagay na nabibili ng salapi. Maaari siyang nakapatay ang tao. Ang pagpatay ay isa ring uri ng pagnanakaw sapagkat ang pagpatay ay pagnanakaw ng buhay. Ninanakaw ang karapatan ng isang tao upang mabuhay sa pamamagitan ng pagpatay. 

Subalit, sa kabila ng mga mabibigat na kasalanan na kanyang ginawa, ipinangako pa rin sa kanya ni Kristo ang Paraiso. Kahit na maraming ninakaw si Dimas mula sa iba't ibang tao, ginantimpalaan siya ni Kristo ng Paraiso. Paano nangyari iyon? Paano nakamit ng isang salarin, isang kriminal, ang biyaya ng Paraiso? Sa dinami ng mga maaaring gantimpalaan, bakit kriminal pa ang pinili ni Kristo? Isa na nga siyang kriminal, siya pa ang gagantimpalaan! Bakit ipinangako ni Kristo sa isang salarin na siya'y isasama Niya sa Paraiso? 

Habang siya'y nakapako sa krus, nagtika si Dimas. Pinagsisihan niya ang kanyang mga kasalanan. Inamin niya nang buong katapangan at kababaang-loob na dapat lamang siya parusahan. Inamin niyang makatarungan ang pagpaparusa sa kanya. Buong puso siyang sumamo sa Panginoon. Buong kataimtiman niyang hiniling sa Mahal na Poon na siya'y alalahanin kapag Siya'y naghari na. 

Isang makasalanang taos-pusong nagtitika ang nakita ni Hesus kay Dimas noong sandaling iyon. Noong tumingin si Hesus kay Dimas, hindi Niya nakita ang isang kriminal na walang puso. Hindi Niya nakita ang isang kriminal na walang takot sa Diyos. Bagkus, nakita ni Hesus ang isang makasalanang taos-pusong nagbabalik-loob sa Diyos sa mga nalalabing sandali ng kanyang buhay. Nakita ng Panginoong Hesus ang isang makasalanang humihingi ng Awa at kapatawaran mula sa Diyos sa mga huling sandali ng kanyang buhay dito sa daigdig. 

Batid ni Hesus na si Dimas ay tapat sa kanyang taos-pusong pangungumpisal sa Kanya habang nakabayubay sa krus. Batid ni Hesus na ninanais talaga ni Dimas maranasan ang dakilang Awa ng Diyos sa mga huling sandali ng kanyang buhay sa lupa. Kaya, ipinagkaloob ni Hesus ang hiling ni Dimas. Pinatawad ni Hesus si Dimas at ipinangako sa kanya ang Paraiso. Ipinangako ni Hesus na makakapiling Niya sa Paraiso ang nagtitikang magnanakaw na si Dimas. 

Ang pangako ng Paraiso ay ipinagkakaloob ni Kristo sa mga makasalanang taos-pusong nagtitika at nagbabalik-loob sa Kanya. Hindi Niya ipagkakait ang biyaya na makapiling Siya sa Paraiso. Kinakailangan lamang pagsisihan at talikdan ang mga nagawang kasalanan at manumbalik sa Diyos. Matatamasa ng bawat isa ang langit na gantimpala ng Panginoon kapag iyon ang ginawa. 

Mapalad tayo sapagkat ang Kumpisal ay isa sa mga Pitong Sakramento ng Santa Iglesya. Mapalad tayo sapagkat mayroong Kumpisal sa Simbahan. Sa Sakramento ng Kumpisal, mararanasan natin ang Awa ng Diyos na higit na makapangyarihan kaysa sa mga kasalanan natin. Binibigyan tayo ng pagkakataon ng Sakramento ng Kumpisal upang taos-puso nating pagsisihan ang ating mga kasalanan at bumalik sa Diyos. Muling magiging buo ang ating buhay, makakapagsimula tayo uli dahil sa tulong ng Mabathalang Awa ng Panginoon. 

Tularan natin ang halimbawa ni Dimas. Aminin natin nang buong katapangan at kababaang-loob ang ating mga kasalanan laban sa Diyos. Buong kababaang-loob tayong lumapit sa Panginoon at hingin ang Kanyang Awa. Manalangin tayo nang taimtim upang tayo'y Kanyang patawarin. Hinding-hindi ipagkakait ng Panginoon ang Kanyang Awa sa mga makasalanang taos-pusong nagtitika at nagbabalik-loob sa Kanya. Bagkus, ipagkakaloob at ibubuhos ng Panginoon ang grasya ng Kanyang Awa sa atin kapag taos-puso tayong magbabalik-loob sa Kanya. 

PITONG HULING WIKA - UNANG WIKA

UNANG WIKA (Lucas 23, 34): 

"AMA, PATAWARIN MO SILA SAPAGKAT HINDI NILA NALALAMAN ANG KANILANG GINAGAWA." 

Paano mo ba mapapatawad ang mga taong tumalikod sa iyo?
Paano mo ba mapapatawad ang isang traydor?
Paano mo ba mapapatawad ang isang mamamatay-tao?
Paano mo ba mapapatawad ang mga lumalait sa iyo? 

Hindi madaling magpatawad. Ang pagpapatawad ay isa sa mga pinakamahirap gawin. Kapag mayroon tayong kaaway o mayroong nagkasala laban sa atin, nais nating maghiganti. Nais nating maghiganti upang sa gayo'y magiging patas ang lahat. Mahirap magpatawad, madaling maghiganti. Pinapairal ang prinsipiyong, "Mata sa mata at ngipin sa ngipin." Paniwala natin na papayapa tayo kapag tayo ay naghiganti laban sa ating mga kaaway. 

Kapag nakikita natin ang ating mga kaaway, naiinis tayo. Umiinit ang ating ulo, kumukulo ang ating dugo. Para sa atin, ang mga kalaban natin ay mga panira ng araw. Sa tuwing nakikita natin sila, nasisira ang araw natin. Para sa atin, wala na silang ibang ginawa kundi sirain ang ating mga araw. Ayaw natin silang tingnan. Ayaw nating gumawa ng mabuti para sa kanila. Sila'y nais nating bigwasan. Nais nating gumawa ng masama laban sa kanila. Kapag sira ang kanilang araw o kaya nama'y hindi natin sila nakikita, gumaganda at gumiginhawa kahit papaano ang ating pakiramdam. Makakahinga na tayo nang maluwag. 

Mahirap magpatawad. 'Di hamak na mas madaling maghiganti. Mas madali para sa atin na gantihan ng masama ang masama. Mas madaling gumawa ng masama sa mga gumagawa ng masama laban sa atin. Subalit, kapag ang paghihiganti ang pinairal, ang kasamaan at karahasan ay lalaganap sa lipunan. Kapag pinairal ang kultura ng paghihiganti sa lipunan, hindi tayo makakapamuhay nang mamapaya. Hindi tatahimik at papayapa ang buhay natin kapag iyon ang nangyari. 

Habang nakabayubay sa krus, nanalangin si Hesus sa Ama para sa mga umuusig sa Kanya. Nanalangin si Hesus upang ang Kanyang mga kaaway ay patawarin ng Ama. Kahit na inusig, niyurakan, nilibak, dinuraan, at ginawan ng iba't ibang uri ng kasamaan, hinangad pa rin ni Hesus na patawarin ng Ama ang mga umuusig sa Kanya. Hinangad ng Panginoong Hesus na makamit ng Kanyang mga kaaway at tagausig ang biyaya ng kapatawaran mula sa Ama, gaano pa man sila kasama. 

Tinalikuran si Hesus ng madlang sumalubong sa Kanya noong pumasok Siya sa Herusalem. Tinalikuran Siya ng mga alagad na sumama at sumunod sa Kanya sa loob ng mahabang panahon. Ipinagkanulo Siya ni Hudas Iskariote. Siya'y tatlong ulit na ipinagkaila ni Apostol San Pedro. 'Di makatarungan ang paglilitis sa Kanya. Siya'y hinagupit, pinutungan ng isang koronang gawa mula sa halamang matinik. Nilibak at dinuraan hanggang sa naipako Siya sa krus. Subalit, sa kabila ng lahat ng iyon, si Hesus ay humingi ng kapatawaran mula sa Ama para sa kanila. 

Si Hesus ay humingi ng kapatawaran mula sa Ama habang Siya'y nakabayubay sa krus. Nilabanan Niya ang kasamaan nang hindi gumagamit ng dahas. Hindi Niya hinangad ng masama para sa Kanyang mga kaaway at tagausig. Bagkus, humingi si Hesus ng kapatawaran para sa mga umuusig sa Kanya. Kabutihan ang iginanti ng Panginoong Hesus sa mga umuusig sa Kanya. Sa pamamagitan ng paggawa ng mabuti para sa Kanyang mga tagausig, nagtagumpay si Hesus laban sa kultura ng paghihiganti at kasamaan nang hindi gumagamit ng karahasan. 

Ang pagpapatawad ay mahirap, subalit hindi ito imposible. Mahirap magpatawad, subalit kinakailangan nating gawin ito upang guminhawa ang ating buhay. Kapag tayo'y magpapatawad, magkakaroon ng kapayapaan sa ating buhay. Mapapawi sa puso't kalooban ng bawat isa ang galit at poot. Papayapa at gaganda ang buhay ng bawat isa kapag magpapatawaran at magkakasundo ang isa't isa. 

Manalangin tayo sa Panginoong Hesus upang tulungan tayo sa pagtularan natin sa Kanyang halimbawa. Manalangin tayo upang bigyan Niya tayo ng lakas ng loob at kapayapaan. Manalangin tayo kay Kristo upang matularan natin ang halimbawang Kanyang ipinakita sa krus. Manalangin tayo kay Kristong Panginoon upang tayo'y makakapagpatawad katulad Niya. 

Panginoong Hesus, tulungan Mo kaming magpatawad katulad Mo. Amen. 

KORDERO NG DIYOS

13 Abril 2017 
Huwebes Santo: Pagmimisa sa Pagtatakipsilim sa Paghahapunan ng Panginoon 
Exodo 12, 1-8. 11-14/Salmo 115/1 Corinto 11, 23-26/Juan 13, 1-15 

Dalawang kordero ang itinatampok sa mga Pagbasa sa Misa ng Huling Hapunan. Ang unang kordero ay ang kordero sa Lumang Tipan at ang pangalawang kordero naman ay ang kordero sa Bagong Tipan. Sa pamamagitan ng dalawang korderong ito, ipinamalas ang kapangyarihan at kadakilaan ng Awa at Pag-Ibig ng Diyos. At ang Awa at Pag-Ibig ng Diyos ang dahilan kung bakit iniligtas ng Diyos ang lahat ng tao. Idinulot ng Diyos sa bawat tao ang biyaya ng Kanyang pagliligtas sapagkat makapangyarihan at dakila ang Kanyang walang hanggang Awa at Pagmamahal.  

Isinalaysay sa Unang Pagbasa ng Misa ng Huling Hapunan ang isa sa maraming mga pagkakataong ipinamalas ng Diyos ang Kanyang Awa at Pagmamahal. Hindi na mabilang kung ilang ulit na ipinamalas at ipinadama ng Panginoong Diyos ang Kanyang Awa at Pag-Ibig. Sa Unang Pagbasa, isinalaysay kung paanong iniligtas ng Diyos ang bayang Israel mula sa kamatayan sa Ehipto. Iniutos ng Panginoong Diyos sa mga Israelita sa pamamagitan nina Moises at Aaron na pahiran ng dugo ng isang kordero o bisirong kambing ang mga pintuan ng kanilang mga tahanan. Lalampasan ng Panginoong Diyos ang mga tahanang may pahid ng dugo sapagkat ang dugo ng kordero o bisirong kambing ay tanda na Israelita ang nakatira sa mga bahay na iyon. Ililigtas ng Panginoon ang sambayanang Israel mula sa huling salot na Kanyang ipapadala sa Ehipto - ang kamatayan ng bawat panganay na anak. 

Ang bayang Israel ay iniligtas ng Diyos sa pamamagitan ng dugo ng kordero. Isang kordero ang pinatay para sa kaligtasan ng mga Israelita. Nilangpasan ng Diyos ang bawat tahanang may pahid na dugo sa pintuan nito. Walang Israelita na napinsala dahil sa dugo ng kordero na ipinahid sa pintuan ng mga tahanan nila. Ang dugo ng kordero ay naging paalala ng pagliligtas ng Panginoong Diyos. Sa pamamagitan ng dugo ng kordero, iniligtas at pinalaya ng Diyos ang bayang Israel sa gabi ng unang Paskuwa. Ang gabi ng unang Paskuwa ay isa sa maraming pagkakataon kung saan ipinamalas ng Diyos ang kadakilaan ng Kanyang Awa at Pag-Ibig. 

Muling itinampok ang isa na namang kordero sa Bagong Tipan. Ang korderong ito ay nagmula sa Diyos. Ipinagkaloob ng Diyos ang bagong korderong ito sa lahat ng tao. Sa pamamagitan ng bagong korderong ito, naganap ang pinakadakilang hain. Sa pamamagitan ng korderong ito, iniligtas at pinalaya ng Diyos ang lahat ng tao mula sa kasamaan at kamatayan. Ang korderong ito na kaloob ng Diyos at inihain para sa kaligtasan ng sangkatauhan ay nangangalang Hesus. 

Isa sa napakaraming mga titulo ng Panginoong Hesus ay ang titulo ng Kordero ng Diyos. Ibinigay Niya ang Kanyang buong sarili bilang pinakadakilang handog. Sa pamamagitan ng paghahandog ng Kanyang sarili, pinatawad at iniligtas ng Diyos ang lahat ng tao. Sa pamamagitan ng paghahandog ng sarili ni Hesus, inihayag at ipinamalas sa lahat ang kadakilaan ng Awa at Pag-Ibig ng Diyos sa sangkatauhan. Dahil sa Awa at Pag-Ibig ng Diyos, pinatawad, iniligtas, at pinalaya ng Diyos ang sangkatauhan mula sa kasalanan at kamatayan sa pamamagitan ng pagdurusa at kamatayan ni Hesus, ang Kanyang Misteryo Paskwal. 

Ang pagtatag ni Hesus ng Sakramento ng Banal na Eukaristiya sa Huling Hapunan ay isinalaysay sa Ikalawang Pagbasa. Sa Huling Hapunan, inihandog ni Hesus ang Kanyang sarili sa anyo ng tinapay at alak. Nang ibinahagi ni Hesus ang tinapay at alak, ang tinatanggap ng mga apostol ay hindi na pangkaraniwang tinapay at alak lamang. Bagkus, ang tinapay at alak na tinanggap ng mga apostol ay ang Katawan at Dugo ni Hesus. Hindi lamang isang simbolo o tanda ni Hesus ang tinanggap ng mga apostoles. Bagkus, ang tinatanggap ng mga alagad ay si Hesus na naghain ng Kanyang sarili sa Huling Hapunan sa anyo ng tinapay at alak. Ang utos ni Hesus sa mga alagad - alalahanin Siya sa tuwing sila'y magsasalu-salo. 

Iyan ang ginagawa natin sa tuwing ipinagdiriwang ang Banal na Misa. Ginugunita ang dakilang paghahain ni Hesus sa Kalbaryo. Si Hesus, na kapiling natin lagi sa Banal na Eukaristiya, ay lagi rin nating inaalala sa pagdiriwang ng Banal na Misa. Ginugunita natin sa bawat pagdiriwang ng Banal na Eukaristiya ang dakilang Awa at Pag-Ibig ng Diyos na ipinamalas sa lahat sa pamamagitan ng paghahandog ng sarili ni Hesus. Isinasalaysay at inaalala sa bawat pagdiriwang ng Banal na Misa ang Awa at Pag-Ibig ng Diyos na ipinamalas sa lahat sa pamamagitan ng dakilang paghahain ni Hesus, ang Kordero ng Diyos. 

Isinalaysay sa Ebanghelyo ang paghugas sa mga paa ng mga apostoles. Bagamat hindi alipin si Hesus, buong kababaang-loob Niyang hinugasan ang mga paa ng mga apostol. Bagamat si Hesus ay ang Panginoon at Guro ng mga alagad, buong kababaang-loob na pinaglingkuran ni Hesus ang mga apostoles. Sa pamamagitan nito, ipinakita ni Hesus kung bakit Siya naparito sa mundo. Pumarito si Hesus sa sanlibutan upang buong kababaang-loob na maglingkod at mag-alay ng Kanyang buhay para sa kaligtasan ng lahat, ayon sa kalooban ng Ama. 

Sa tuwing ipinagdiriwang natin ang pagdiriwang ng Banal na Misa, kapiling natin ang Panginoong Hesus sa anyo ng tinapay at alak. Sa bawat pagdiriwang ng Banal na Eukaristiya, ginugunita natin ang dakilang paghahandog ng sarili ni Hesus sa bundok ng Kalbaryo. Sa tuwing ipinagdiriwang ang Banal na Misa, inaalala natin ang dakilang Awa at Pag-Ibig ng Diyos na nagdulot ng kaligtasan sa lahat. 

Ang Panginoong Hesus ay ang Kordero ng Diyos. Bilang Kordero ng Diyos, buong kababaang-loob na inihain ng Panginoong Hesukristo ang buo Niyang sarili para sa kaligtasan ng lahat. Tayong lahat ay iniligtas ni Kristo Hesus sa pamamagitan ng Kanyang Katawan at Dugo. Sa pamamagitan ng paghahain ni Kristo, inihayag ang pagliligtas ng Diyos. Sa pamamagitan ng paghahandog ng Kordero ng Diyos na si Kristo Hesus nang buong kababaang-loob, inihayag sa lahat ang Awa at Pag-Ibig ng Diyos na nagdudulot ng kaligtasan sa lahat. 

ANG GANTI NG PANGINOON

12 Marso 2017 
Miyerkules Santo 
Isaias 50, 4-9a/Salmo 68/Mateo 26, 14-25 

Sa Ebanghelyo ngayong Miyerkules Santo, si Hudas Iskariote ay nakipagsabwatan sa mga kaaway ni Hesus. Nakipagkita si Hudas Iskariote sa mga kaaway ni Hesus upang pag-usapan kung paano nila dadakipin si Hesus. Ibebenta at ipagkakanulo ni Hudas Iskariote ang Panginoong Hesus kapalit ng tatlumpung piraso ng pilak. Nakipagpulong si Hudas Iskariote sa mga kaaway ni Hesus upang pag-usapan at pagplanuhan kung paanong madadakip si Hesus. Pumayag si Hudas Iskariote na ipagkakanulo niya si Hesus kapalit ng tatlumpung piraso ng pilak. Ang Mahal na Poong Hesus ay nilagyan ng gantimpala sa ulo - tatlumpung piraso ng pilak. 

Nang dumulog sa hapag, inihayag ni Hesus na Siya'y ipagkakanulo ng isa sa mga apostoles. Masakit para kay Hesus na malamang isa sa Kanyang mga alagad ang magkakanulo sa Kanya. Tinawag at hinirang ni Hesus ang mga apostol. Ang mga apostol Niyang ito'y malapit sa Kanyang Puso. Nagtagal ang samahan ni Hesus at ng mga alagad sa loob ng mahabang panahon. Tunay na minahal ng Panginoong Hesus ang bawat apostol. Noong malaman ni Hesus na ipagkakanulo Siya ng isa sa mga apostoles, matitiyak nating labis Siyang nasaktan. 

Alam ni Hesus na nakipagsabwatan sa Kanyang mga kaaway si Hudas Iskariote, kahit iyon ay ginawa nila nang palihim. Kahit palihim ang pagpupulong ni Hudas sa Kanyang mga kaaway, alam ng Panginoong Hesus kung ano ang pinag-usapan nina Hudas Iskariote at mga kaaway Niya. Alam ni Hesus kung ano ang kanilang balak. Alam ni Hesus na balak nilang dakipin Siya. Alam ni Hesus na pumayag si Hudas na ipagkanulo at ibenta Siya sa kanila kapalit ng gantimpalang tatlumpung piraso ng pilak. Kahit palihim iyon, alam ni Hesus na naganap iyon. 

Kahit alam ni Hesus na si Hudas ang magkakanulo sa Kanya, hindi Niya pinigilan si Hudas. Hindi pinigilan o hinadlangan ni Hesus si Hudas. Bagkus, si Hudas ay pinakawalan ni Hesus. Hinayaan ni Hesus na gawin ni Hudas kung ano ang dapat niyang gawin. Pinahintulutan ni Hesus na gawin ni Hudas ang kanyang binabalak laban sa Kanya. Sa halip na hadlangan o saktan si Hudas, pinakawalan ni Hesus si Hudas. Pinahintulutan ng Panginoong Hesus na umalis si Hudas Iskariote upang maisagawa niya ang binabalak niya at ng kanyang mga kaaway ni Hesus. 

Binigyang-diin sa propesiya ni propeta Isaias sa Unang Pagbasa kung paanong ang nagdurusang lingkod ay hindi tumutol sa kawalan ng katarungan. Nanatiling tahimik ang lingkod na ito noong Siya'y ininsultuhin, binugbog, at pinagdustaan. Hindi Siya tumutol sa mga masasamang balak ng Kanyang mga kaaway laban sa Kanya. Tinupad ang propesiyang ito sa pamamagitan ni Hesus. Alam ni Hesus na may mga nagbabanta laban sa Kanya. Subalit, walang ginawa si Hesus para itigil iyon. Bagkus, buong katahimikan at kababaang-loob Niyang tinanggap ang mga insulto, pandudusta, at pambubugbog ng Kanyang mga kaaway. 

Isinabuhay ni Hesus ang Kanyang mga itinuro. Ipinakita ni Hesus ang Kanyang pag-ibig para sa Kanyang mga kaaway. Hindi man ito naging madali, ginawa pa rin Niya iyon. Kahit pinagdustaan at kinamuhian Siya ng Kanyang mga kaaway, kahit na Siya'y pinagtulungan ng Kanyang mga kaaway na walang kalaban-laban, hindi Siya naghiganti. Hindi ginantihan ni Hesus ng masama ang Kanyang mga kaaway. Bagkus, pagmamahal ang pagganti ni Hesus sa Kanyang mga kaaway. 

Pag-ibig ang ganti ng Panginoong Hesus sa Kanyang mga kaaway na gumagawa ng masama laban sa Kanya. Sikapin nating tularan ang halimbawang ipinakita ni Hesus. Mahirap mang gawin ito, kailangan natin itong gawin. Itinuro ni Hesus sa atin na dapat nating mahalin ang ating mga kaaway. Sikapin nating tularan ang Kanyang halimbawa bilang pagtanggap at pagsunod sa Kanyang mga atas.  

KABIGUAN

11 Abril 2017 
Martes Santo 
Isaias 49, 1-6/Salmo 70/Juan 13, 21-33. 36-38 

Kabiguan ang tema ng mga Pagbasa ngayong Martes Santo. Sa Unang Pagbasa, ipinakita ng Diyos ang Kanyang tiwala sa bayang Israel, kahit Siya'y nabigo nila. Hinirang ng Panginoong Diyos ang bayang Israel para sa isang napakahalagang tungkulin. Sa pamamagitan ng bayang Israel, ililigtas ng Panginoong Diyos ang lahat ng tao. Hindi lamang mga Israelita ang ililigtas ng Diyos, kundi ang lahat ng tao. Tinupad ng Diyos ang pangakong ito sa pamamagitan ni Hesus na nag-alay ng Kanyang buhay sa krus para sa kaligtasan ng sangkatauhan. Sa Ebanghelyo, inihayag ni Hesus na mabibigo si Apostol San Pedro sa pagtatanggol sa Kanya. 

Sa lahat ng mga apostol, higit na pinagkakatiwalaan si Apostol San Pedro. Siya ang pinuno ng mga apostol. Inihayag ni Hesus na siya ang bato na kung saang itatatag Niya ang Kanyang Simbahan. Sa kanya ipinagkatiwala ni Hesus ang mga susi sa kaharian ng langit. Siya ang Unang Santo Papa ng Simbahan. Subalit, siya pa ang magdudulot ng kabiguan sa Panginoon. Tatlong ulit na ipinagkaila ni Apostol San Pedro ang Panginoong Hesus. Mabibigo si Apostol San Pedro. Hindi niya tinupad ang kanyang pangako kayHesus. Hindi niya sasamahan at dadamayan si Hesus hanggang kamatayan. Bagkus, bago tumilaok ang manok, tatlong ulit na itinatwa ni Apostol San Pedro si Hesus dahil sa tindi ng kanyang takot. 

Masakit para kay Hesus na malamang tatlong ulit Siyang ipagkakaila ng alagad na lubos Niyang pinagkakatiwalaan. Subalit, alam Niyang ito'y mangyayari at dapat itong mangyari upang matupad ang kalooban ng Ama. Alam ni Hesus na tatlong ulit Siyang ipagkakaila ni Apostol San Pedro. Batid ni Hesus ang mga karupukan ni Apostol San Pedro. Batid ni Hesus na si Apostol San Pedro ay nagmamayabang lamang. Ang pangakong binitiwan ni Apostol San Pedro kay Hesus sa senakulo ay napatunayang hungkag. Noong nililitis si Hesus sa bahay ni Kaipas, tatlong ulit na ipinagkaila ni Apostol San Pedro ang Panginoong Hesus. Napako ang pangakong binitiwan ni Apostol San Pedro sa Panginoong Hesukristo. Si Apostol San Pedro ay nagmataas lamang sa harapan ni Hesus sa Huling Hapunan. 

Bakit may tiwala pa rin si Hesus kay San Pedro Apostol? Hindi ba binigo Siya ni Apostol San Pedro? Hindi ba nangako si Apostol San Pedro kay Hesus sa senakulo na sasamahan niya ang Panginoon, kahit kamatayan ang kapalit noon? Hindi ba hungkag at napako ang kanyang pangako sa Panginoon? Hindi ba tatlong ulit na ipinagkaila ni Pedro si Hesus? Matapos magmataas sa Huling Hapunan, dapat lang na hindi na magtiwala si Hesus kay San Pedro Apostol. Subalit, bakit nanatili ang tiwala ng Panginoong Hesus kay Apostol San Pedro? 

Kahit Siya'y tinalikuran, iniwan, at tatlong ulit na ipinagkaila ni Apostol San Pedro, malaki pa rin ang tiwala ni Hesus sa kanya. Nagtiwala pa rin si Hesus kay Apostol San Pedro, kahit Siya'y binigo ng apostol. Ipinapakita ni Hesus na kahit talikuran at iwanan Siya, mananatili Siyang tapat at totoo. Hinding-hindi magdudulot ng kabiguan ang Diyos. Kung binibigo ng tao ang Diyos at ang kapwa, hinding-hindi binibigo ng Diyos ang Kanyang mga hinirang at iniibig. 

Lahat tayo'y nakakaranas ng kabiguan. Tayo'y nabibigo kapag ang mga mithiin at mga hangarin sa buhay ay hindi nakakamtan. Hindi lamang tayo ang nakakaranas ng kabiguan. May mga pagkakataon din kung saan tayo naman ang nagdudulot ng kabiguan. Binibigo natin ang Diyos at ang kapwa kapag nagkakasala tayo. Talaga namang may mga pagkakataon kung saan hindi natin maiiwasan ang kabiguan. 

Ang Diyos ay hindi nagdudulot ng kabiguan. Hindi tayo binibigo ng Diyos. Kung tayong mga tao ay nagdudulot ng kabiguan sa Diyos at kapwa, ang Diyos ay hindi nagdudulot ng kabiguan. Laging tapat at totoo ang Panginoon sa mga pangakong Kanyang binitiwan. Kapag tayo naman ay nabigo, maaari natin Siyang lapitan at kapitan. Nakahandang dumamay sa atin ang Diyos. Tutulungan rin tayo ng Diyos na makabangon at makapagsimula muli. 

TANGLAW NG TAGAPAGLIGTAS

10 Abril 2017 
Lunes Santo 
Isaias 42, 1-7/Salmo 26/Juan 12, 1-11 

Ipinakilala ng Diyos sa Unang Pagbasa ang dakilang lingkod na Kanyang pinili't kinalugdan. Puspos ng kababaang-loob at kahinahunan ang lingkod na ito. Hindi Siya mapagmataas o mayabang. Bagkus, Siya'y mapagpakumbaba at mahinahon. Ibinibigay Niya ang kanyang buong puso't sarili sa Diyos para sa ikaluluwalhati ng Kanyang Pangalan. Wala Siyang ibang hangarin kundi ang katuparan ng kalooban ng Diyos. Anuman ang utos o loobin ng Panginoon, tatanggapin at susundin Niya ito nang buong puso. Ang pahayag na ito'y natupad sa pamamagitan ng Mesiyas at Tagapagligtas na si Kristo Hesus, ang tunay na liwanag. 

Sa Ebanghelyo, binuhusan ng pabango ang mga paa ni Hesus. Mamahalin ang pabangong ibinuhos ni Mariang taga-Betania sa mga paa ni Hesus. Binatikos siya ng mga apostoles, lalung-lalo na ni Hudas Iskariote, at ng iba pang mga panahun sa bahay na iyon nang maamoy nila ang halimuyak ng pabango. Subalit, si Hesus ang nagtanggol kay Mariang taga-Betania. Batid ni Hesus kung ano ang nilalaman ng puso ni Santa Mariang taga-Betania. 

Bakit ipinagpasiya ni Maria na bumili ng mamahaling pabango para sa mga paa ni Hesus? Maaari naman siyang bumili ng murang pabango. Subalit, sa dinami-dami ng mga pabangong maaaring bilhin, lalung-lalo na ang mga mas mura, bakit yung pinakamahal pa ang binili ni Maria? Bakit niya ginastos ang lahat para lang maibili ang pinakamamahaling pabango para kay Hesus? Ano ang nakita ni Santa Mariang taga-Betania sa Panginoong Hesus? 

Kay Hesus nakita ni Mariang taga-Betania ang tanglaw ng Tagapagligtas. Nakilala ni Maria ang tunay na liwanag sa pamamagitan ni Hesus. Nakilala ni Maria na si Hesus ang ipinangakong Manunubos. Nakita ni Maria ang Diyos na pumanaog sa lupa at nagkatawang-tao upang iligtas ang bawat tao sa pamamagitan ni Hesus. Sa pamamagitan ni Kristo Hesus, nakita ni Santa Mariang taga-Betania ang dakilang Awa't Pagmamahal ng Diyos na nagdudulot ng kaligtasan sa lahat. 

Ang Diyos ang nagdudulot ng kaliwanagan at kaligtasan. Pumanaog Siya sa lupa at nagkatawang-tao upang magdulot ng liwanag at kaligtasan sa lahat. Ang liwanag at kaligtasang dulot ng Diyos ay ipinamalas sa pamamagitan ng Ikalawang Persona ng Banal na Santatlo, ang Panginoong Hesukristo. Sa pamamagitan ng Panginoon at Tagapagligtas ng tanan na si Kristo Hesus, namalas ng lahat ang kapangyarihan at kadakilaan ng kahanga-hangang Awa't Pag-Ibig ng Diyos sa sangkatauhan.