MAGANDANG BALITA

16 Disyembre 2017 

Simbang Gabi/Misa de Gallo - Unang Araw

Isaias 56, 1-3a. 6-8/Salmo 66/Juan 5, 33-36

Sa mga Pagbasa ngayong unang araw ng Simbang Gabi, ang tradisyunal na pagsisiyam o pagnonobena para sa Kapaskuhan, isinalungguhit ang hatid ng Salita ng Diyos. May magandang balitang hatid ang Salita ng Diyos. Ang Magandang Balitang inihahatid sa atin ng Salita ng Diyos ay nakaugnay sa misteryo ng Kanyang dakilang awa't pag-ibig na walang hanggan. Panay itong isinasalungguhit sa Banal na Bibliya, simula sa Lumang Tipan hanggang sa Bagong Tipan. 

Ang mga propeta sa Lumang Tipan ay hinirang ng Diyos upang iparating sa Kanyang bayan ang Kanyang Salita. Isang halimbawa nito'y si propeta Isaias, na ating napakinggan sa Unang Pagbasa. Nagsalita ang Diyos sa pamamagitan ni propeta Isaias sa Kanyang bayan. Mayroon Siyang magandang balita para sa Kanyang bayan. Inihayag ng Panginoon na hindi na magluluwat at magaganap ang ipinangako Niyang pagliligtas sa Kanyang bayan. Malapit nang sasapit ang oras ng pagliligtas ng Diyos. Ang mga salitang ito'y nagdulot ng matinding kagalakan sapagkat ito'y tunay ngang Magandang Balita. Tutubusin ng Panginoong Diyos ang Kanyang bayang hinirang at iniibig nang lubos. Kahit na ilang ulit nilang sinuway ang Panginoon, inihayag pa rin Niya sa kanila ang Kanyang awa't pag-ibig. 

Natupad ang mga winika ng Diyos sa Unang Pagbasa sa pamamagitan ng pagkakatawang-tao ng Panginoong Hesukristo. Sa Ebanghelyo, inihayag ni Hesus na ang mga gawang ipinagagawa sa Kanya ng Ama ang nagpapatotoo sa Kanya. Ang mga gawa ni Hesus ang nagpapatotoo na Siya nga ang Mesiyas at Manunubos ng sangkatauhan. Ang mga gawa ni Hesus ang nagpapatotoo na Siya nga ang Diyos na nagkatawang-tao alang-alang sa kaligtasan ng sangkatauhan. Sa pamamagitan ng Kanyang pagkakatawang-tao, inihatid ng Salitang nagkatawang-tao na si Hesus ang Mabuting Balita na ang Diyos ay tunay na maawain at mapagmahal sa lahat ng tao, kahit na paulit-ulit Siyang sinusuway nila. 

Mapalad tayong lahat sapagkat mayroon tayong Diyos na nagmamahal sa atin. Sa kabila ng ating pagiging masuwayin sa Kanya, hindi pa rin Siyang nauubusan ng pag-ibig para sa ating lahat. Bagkus, patuloy Niyang iniibig nang lubos ang sangkatauhan sa kabila ng kanilang mga pagkakasala laban sa Kanya. Ito ang dahilan kung bakit si Hesukristo ay pumanaog sa lupa at nagkatawang-tao upang tayong lahat ay iligtas. Sa pamamagitan ng pagparito ni Kristo Hesus bilang Mesiyas at Tagapagligtas, inihayag ang walang hanggang awa't pag-ibig ng Diyos para sa lahat ng tao. Sa kabila ng ating mga pagkakasala, patuloy tayong minamahal ng Diyos. Iyao ang Mabuting Balita, ang Magandang Balitang inihahatid sa atin ng Salita ng Diyos na nagkatawang-tao na si Hesukristo. 

Tulad ng nais bigyang-diin ng mang-aawit sa Salmo ngayon, nararapat lamang na ang Diyos ay lagi nating purihin at sambahin. Mapalad tayo sapagkat kahit patuloy tayong nagkakasala laban sa Kanya, patuloy pa rin tayong iniibig ng Panginoon. Ito ang dahilan kung bakit sinugo Niya ang Panginoong Hesus upang maging ating Mesiyas at Tagapagligtas. Kaya naman, nararapat lamang na ibigay natin sa Diyos ang ating palagiang pagpuri at pagsamba sa Kanya. 

IBAHAGI ANG KAGALAKANG KALOOB NG DIYOS

12 Disyembre 2017 

Paggunita sa Mahal na Birhen ng Guadalupe 

Zacarias 2, 14-17/Judith 13/Lucas 1, 39-47

Kung titingnan natin nang mabuti ang larawan o imahen ng Mahal na Birhen ng Guadalupe, mapapansin natin ang itim na pamigkis na suot ng Mahal na Ina. Sa tradisyon ng mga Azteka, isang grupo ng mga katutubo sa Mexico na namuhay mula 1300 hanggang 1521, tanging mga babaeng nagdadalantao lamang ang nagsusuot ng itim na pamigkis. Ang itim na pamigkis ay tanda ng kanilang pagdadalantao. Ang itim na pamigkis ay isang napakahalagang bahagi ng imahen o larawan sapagkat dinadala ng Mahal na Birhen sa kanyang sinapupunan ang Mesiyas at Tagapagligtas ng tanan na si Hesukristo noong nagpakita siya kay San Juan Diego. Ang Mahal na Birheng Maria ay nagpakita kay San Juan Diego bilang tagapagdala ng Verbong nagkatawang-tao na si Kristo Hesus. Nagpakita ang Mahal na Birhen kay San Juan Diego bilang Kaban ng Bagong Tipan. 

Isinalaysay sa Ebanghelyo ngayon kung paanong ang Mahal na Birheng Maria ay buong kagalakang naglakbay nang malayo para dalawin ang kanyang kamag-anak na si Elisabet. Sa kabila ng kanyang pagdadalantao, ipinasiya ni Maria na maglakbay nang malayo para dalawin ang kanyang kamag-anak na si Elisabet na nagdadalantao rin noong kapanahunang yaon. Nais ibahagi ni Maria kay Elisabet ang kanyang kagalakan. Si Maria'y napupuspos ng kagalakan sa mga sandaling iyon dahil sa kahanga-hangang bagay na ginawa ng Diyos para sa kanya. Hangad ni Maria na maranasan rin ni Elisabet ang kagalakang nararamdaman niya sa kanyang puso't kaluluwa. At ang kagalakang iyon ay nagmula sa Diyos. 

Kung paanong ibinahagi ng Mahal na Birheng Maria kay Elisabet ang kagalakang tinanggap niya mula sa Diyos sa pamamagitan ng paglalakbay nang malayo para lang dalawin ang kanyang kamag-anak, tulad ng nasasaad sa Ebanghelyo ngayon, ibinahagi ng Mahal na Birheng Maria sa bansa ng Mexico ang kagalakan ng Panginoon sa pamamagitan ng kanyang mga aparisyon kay San Juan Diego. Ang pagbabahagi ng kagalakang kaloob ng Diyos ay ginawa ng Mahal na Birheng Maria habang tinataglay niya sa kanyang sinapupunan ang bukal ng tunay na kagalakan na si Hesus, ang Anak ng Diyos na nagkatawang-tao. 

Sa Diyos nagmula ang kagalakan ng Mahal na Birhen. Ang Diyos ang tanging nagdudulot ng tunay na kagalakang walang hanggan. Kagalakan ang Kanyang ipinagkakaloob sa lahat ng tao. Ang Kanyang mga salita't gawa ay nagdudulot ng kagalakan sa lahat. Ang Kanyang winika sa Unang Pagbasa mula sa aklat ni propeta Zacarias ay nagdulot ng kagalakan sa Kanyang bayan. Kaya nga, angkop na angkop ang Salmong Tugunan sa pagdiriwang ngayong araw na ito, "Pinupuri Kang lubusan ng lahat sa ating bayan." (15, 9d) Ititunuro sa atin ng Salmo ngayon na ang Diyos ay nararapat na purihin sapagkat ang Kanyang mga kahanga-hangang gawa ay nagdudulot ng kagalakan sa lahat. 

Ang Diyos ang bukal ng lahat ng kagalakan. Ang kagalakang ito'y tunay at walang hanggan. Ang kagalakang ito'y hindi mapapantayan ng kagalakang kaloob ng sanlibutan. Ipinagkakaloob ng Diyos ang kagalakang ito sa lahat. Hindi lamang ito para sa isang partikular o spesipikong grupo. Ang kagalakang ito'y para sa lahat ng tao na tunay Niyang iniibig at inaaruga nang lubos. 

Tulad ng Mahal na Birheng Maria, ibahagi natin sa ating kapwa ang kagalakang kaloob ng Diyos. Ang kagalakan nating tinanggap mula sa Diyos ay hindi dapat nating isarili. Ang kagalakang ipinagkaloob sa atin ng Diyos ay dapat nating ibahagi sa ating kapwa sapagkat ito ay para sa lahat. Katulad ng Mahal na Inang si Maria, tayong lahat ay hinirang ng Diyos upang ipalaganap ang kagalakang Kanyang kaloob sa pamamagitan ng pagbabahagi nito sa ating kapwa. Hinirang tayo ng Diyos upang maging Kanyang instrumento sa pagpapalaganap ng Kanyang mga pagpapala sa lahat. May misyong tayo mula sa Panginoon - ang kagalakan at iba pang mga pagpapalang ating tinanggap mula sa Kanya ay dapat nating ibahagi sa iba. Sa gayon, lalong mabibigyan ng kaluwalhatian ang Diyos dahil sa Kanyang mga kahanga-hangang gawa na puspos ng kadakilaan. 

PAG-IBIG ANG DAHILAN

10 Disyembre 2017 

Ikalawang Linggo sa Panahon ng Pagdating ng Panginoon (B) 

Isaias 40, 1-5. 9-11/Salmo 84/2 Pedro 3, 8-14/Marcos 1, 1-8

Si San Juan Bautista ang karakter na laging ipinapakilala ng mga Pagbasa sa Banal na Misa tuwing sasapit ang Ikalawang Linggo ng Adbiyento. Anuman ang Taon sa Kalendaryo ng Simbahan, mapa-Taon A, Taon B, o Taon K, si San Juan Bautista ay laging itinatampok sa mga Pagbasa sa Misa tuwing Ikalawang Linggo ng Adbiyento. Siya ang tinutukoy ni propeta Isaias sa Unang Pagbasa noong kanyang inihayag sa kanyang propesiya na mayroong isang tinig na sumisigaw mula sa ilang. Ang tinig na ito'y may panawagan para sa lahat ng mga nakakarinig nito - ipaghanda ng isang patag at matuwid na daraanan sa ilang ang Panginoon. Ang talatang ito'y ginamit ni San Marcos Ebanghelista sa pasimula ng Ebanghelyo ngayon bilang pagpapakilala kay San Juan Bautista. Isinaad din ni San Marcos sa Ebanghelyo ang panawagan ni San Juan Bautista sa kanyang tagapakinig. Nanawagan siya sa lahat na pagsisiha't talikdan ang kanilang mga kasalanan at magpabinyag bilang paghahanda ng sarili para sa pagdating ng Mesiyas. 

Tiyak na nalalaman nating lahat kung ano ang papel ni San Juan Bautista sa buhay ni Kristo. Siya ang tagapaghanda ng daraanan ng Panginoon. Siya ang unang lilitaw bago ang Mesiyas. Siya ang nagsilbing hudyat sa bayan ng Diyos na nalalapit na ang pagdating ng Mesiyas. Siya ang magbibinyag kay Hesus, ang Mesiyas na hinihintay ng bayang Israel. Subalit, bakit nga ba sinugo ng Diyos si San Juan Bautista para ihatid ang Kanyang mensahe na dapat magsisi't magbalik-loob ang lahat ng tao upang sila'y kahabagan at patawarin Niya? 

Nagsalita si Apostol San Pedro sa Ikalawang Pagbasa ukol sa habag at pag-ibig ng Diyos. Wika ni Apostol San Pedro na ang bawat tao'y binibigyan ng Diyos ng pagkakataong magsisi't magbalik-loob sa Kanya sapagkat ayaw Niyang mapahamak sila. Hindi hinahangad ng Diyos na mapahamak ang lahat ng tao. Labis Siyang nasasaktan kapag nakikita Niya ang tao na nagpapaalipin at napapahamak dahil sa kanilang pagkakasala. Nais ng Diyos na makapiling ang tao. Nais ng Diyos na maligtas ang tao. Hinahangad ng Diyos ang kaligtasan ng sangkatauhan. Kaya naman, ang bawat tao'y binibigyan ng Diyos ng pagkakataong makapagsisi sa kanilang mga kasalanan at manumbalik sa Kanya. 

Ito ang mensaheng nais iparating ni San Juan Bautista sa kanyang mga tagapakinig. Ito ang dahilan kung bakit isinugo ng Diyos si San Juan Bautista upang iparating ang Kanyang panawagan na magsisi't tumalikod sa kasalanan. Ayaw ng Diyos na mapahamak ang sangkatauhan. Nais ng Diyos na maligtas ang lahat ng tao sapagkat sila'y lubos Niyang iniibig. Ang pagsugo ng Diyos kay San Juan Bautista sa ilang upang ihatid sa lahat ng makakarinig nito ang Kanyang panawagan sa pagsisisi't pagbabalik-loob ang nagpapatunay na ang Kanyang habag at pag-ibig na hinding-hindi mapapantayan ninuman at walang hanggan.

Ang Diyos ay tunay ngang maawain at mapagmahal. Maaari Niyang hayaan na mapahamak ang sangkatauhan dahil sa pagkakasala. Subalit, mayroon Siyang pakialam para sa atin dahil tayong lahat ay tunay Niyang kinahahabagan at iniibig nang lubos. Hindi Niya hinahangad ang ating kapahamakan. Hinahangad Niya ang ating kaligtasan. Hinahangad Niyang maging sentro ng ating puso, ng ating buhay. Hinahangad ng Diyos na makapiling natin Siya, maranasan ang Kanyang mga pagpapala. Hinahangad Niyang makihati tayo sa Kanyang kagalakan. Ito ang tanging dahilan kung bakit Niya binibigyan ng pagkakataong makapagsisi't makapagbalik-loob sa Kanya ang bawat tao. Ito rin ang dahilan kung bakit Niya isinugo si San Juan Bautista sa ilang upang ihatid sa tanan ang Kanyang panawagan na magsisi't magbalik-loob sa Kanya ang lahat ng tao. 

KALINIS-LINISANG PAGLILIHI SA MAHAL NA BIRHENG MARIA: DAKILANG GAWAIN NG DIYOS

8 Disyembre 2017 

Dakilang Kapistahan ng Kalinis-linisang Paglilihi sa Mahal na Birheng Maria 

Genesis 3, 9-15. 20/Salmo 97/Efeso 1, 3-6. 11-12/Lucas 1, 26-38

Larawan mula sa Official Facebook Page ng Katedral ng Maynila:
https://www.facebook.com/manilacathedralbasilica

Umawit sa Diyos ng awa, ang gawain N'ya'y dakila (Salmo 97, 1a). Ito ang Salmo ngayong Dakilang Kapistahan ng Kalinis-linisang Paglilihi sa Mahal na Birheng Maria. Inihayag ng mang-aawit ng Salmo ang dahilan kung bakit ang Diyos ay nararapat na purihin, sambahin, at awitan nang buong puso't kaluluwa. Ang Diyos na Siyang bukal ng awa't grasya ay nagpasiyang tubusin ang Kanyang bayan sa pamamagitan ng Kanyang Bugtong na Anak na si Kristo Hesus. Sa pamamagitan nito'y nahayag ang kadakilaan ng Diyos na nagmamahal sa Kanyang bayan. 

Ang Kalinis-linisang Paglilihi sa Mahal na Birheng Maria ay isa sa mga kahanga-hangang gawa ng Diyos. Namalas ang kadakilaan ng Diyos sa pamamagitan ng gawaing ito. Bago pa man iluwal mula sa sinapupunan ng kanyang inang si Santa Ana, naranasan ng Mahal na Ina ang pag-ibig ng Diyos. Iniligtas siya ng Diyos mula sa bahid ng kasalanang mana. Dahil sa pagliligtas sa kanya ng Diyos bago pa man isilang, ang Mahal na Birhen ay isinilang sa daigdig na ito na walang kapintasan.

Kaya naman sa Ebanghelyo ngayon, si Maria'y binati ni San Gabriel Arkanghel nang ganito, "Ikaw ay kalugud-lugod sa Diyos... Sumasaiyo ang Panginoon!" (1, 28) Si Maria'y naging kalugud-lugod sa paningin ng Diyos sapagkat siya'y walang kapintasan sa Kanyang paningin. Wala siyang bahid ng kasalanan; siya'y napuspos ng grasya ng Diyos. Ang Mahal na Birheng Maria ay napuno ng grasya dahil sa dakilang bagay na ginawa ng Diyos para sa kanya. Siya'y iniligtas ng Diyos mula sa mga pwersa ng kasalanan bago pa man ipanganak sa daigdig na ito. 

Nasasaad rin sa Ebanghelyo ang papel na ibinigay ng Diyos sa Mahal na Birheng Maria. Dahil walang kapintasan ang Mahal na Birheng Maria sa paningin ng Diyos, siya'y hinirang Niya para sa isang napakahalagang papel. Si Maria ay hinirang upang maging ina ng Mesiyas at Tagapagligtas ng santinakpan na si Hesus. Sa pamamagitan nito'y natupad ang mga winika ng Diyos sa ahas sa Unang Pagbasa, "Kayo ng babae'y laging mag-aaway, Binhi mo't binhi niya'y laging mag-aaway. Ito ang dudurog ng ulo mong iyan, at ang sakong niya'y ikaw ang tutuklaw." (3, 15) Ang sanggol na dinala ni Maria sa loob ng siyam na buwan sa kanyang sinapupunan ay hindi isang karaniwang sanggol. Ang sanggol na ito ang dudurog sa ulo ng ahas. 

Sa pamamagitan ng pagsuway ni Eba sa mga utos ng Diyos, ang mga pwersa ng kasalanan at kadiliman ay pumasok sa daigdig. Subalit, sa pamamagitan ng pagtalima ni Maria sa kalooban ng Diyos, ang dudurog sa ulo ng ahas ay pumasok sa daigdig upang tubusin ang sangkatauhang Kanyang iniirog at kinakalinga nang lubos. Sa pamamagitan ng pagdurog ng binhi ni Maria na si Hesus sa ulo ng ahas, ipinagkaloob ng Diyos sa sangkatauhan ang biyaya ng Kanyang kaligtasan. Namalas rin sa pamamagitan ng gawaing ito kung paanong kinalinga ng Diyos ang sangkatauhang labis Niyang sinisinta. 

Wika ni Apostol San Pablo sa Ikalawang Pagbasa, "Purihin natin Siya (ang Diyos) dahil sa Kanyang kahanga-hangang pagkalinga sa atin sa pamamagitan ng Kanyang minamahal na Anak!" (1, 6) Inihayag ng Diyos ang Kanyang pagkalinga sa atin sa pamamagitan ng pagkaloob Niya sa Pangalawang Persona ng Banal na Santatlo, ang Panginoong Hesukristo na Kanyang Bugtong na Anak, upang maging ating Mesiyas at Tagapagligtas. Ang Panginoong Hesus, ang sanggol na ipinaglihi at iniluwal ng Kalinis-linisang Birheng Inang si Maria, ang dumurog sa ulo ng ahas upang tayong lahat ay maligtas. Sa pamamagitan nito'y nahayag ang kadakilaan ng Diyos at ang Kanyang pagkalinga sa atin. Kaya, nararapat lamang na Siya'y lagi nating purihin, sambahin, pasalamatan, at awitan nang buong puso't kaluluwa. 

Isang dakila't kahanga-hangang gawa ng Diyos ang Kalinis-linisang Paglilihi sa Mahal na Birheng Maria. Ang Mahal na Birheng Maria'y hindi nabahiran ng kasalanan sapagkat tinanggap niya ang biyaya ng pagliligtas ng Diyos bago pa man ipanganak sa daigdig. Sa pamamagitan ng gawaing ito'y nahayag ang kahanga-hangang kadakilaan ng Diyos. Dahil sa dakilang gawaing ito, sinimulan ng Diyos ang Kanyang plano ng pagliligtas sa sangkatauhan. Sa pamamagitan ng Kanyang pagtubos sa sangkatauhan, inihayag ng Diyos ang Kanyang walang hanggang pag-ibig at pagkalinga sa ating lahat na kahanga-hanga. 

BUKAL NG PAGPAPALA

3 Disyembre 2017

Unang Linggo sa Panahon ng Pagdating ng Panginoon (B)

Isaias 63, 16b-17. 19b; 64, 2b-7/Salmo 79/1 Corinto 1, 3-9/Marcos 13, 33-37

Muling sinisimulan ang isang panibagong taon sa Kalendaryo ng Simbahan sa pamamagitan ng Panahon ng Pagdating ng Panginoon na mas kilala bilang panahon ng Adbiyento. Binibigyang-diin sa panahong ito ang kahalagahan ng paghahanda ng sarili habang hinihintay natin ang pagdating ng Panginoon. Hindi lamang nating pinaghahandaan ang sarili para sa Pasko ng Pagsilang; pinaghahandaan rin natin ang ating sarili para sa ikalawang pagdating ng ating Panginoon sa katapusan ng panahon. Walang sinuman ang nakakaalam kung kailan magaganap ang lahat ng iyon kundi ang Diyos Ama lamang.

Ang panawagan ng Simbahan sa bawat isa ngayong panahon ng Adbiyento ay hango mula sa mga salita ng Panginoong Hesus sa Banal na Ebanghelyo para sa araw na ito. Wika ni Hesus sa Ebanghelyo ngayon, "Maging handa kayo!" (13, 37) Ang mga salitang ito ni Hesus ay hindi lamang para sa Kanyang mga disipulo. Ang mga salitang ito ay para sa lahat ng mga nananalig at sumasampalataya sa Kanya nang buong katapatan. Nais iparating ng Simbahan ang mensaheng ito mula kay Kristo sa Mabuting Balita para sa buong kapanahunan ng Adbiyento.

Hatid ng Panginoon sa Kanyang pagdating ang pagpapala't pag-asa. Inihayag sa Unang Pagbasa mula sa aklat ni propeta Isaias na ang Panginoong Diyos ang tanging pag-asa't Amang aaasahan (63, 16b). Sa Diyos lamang umaaasa ang Kanyang sambayanan. Tanging ang Diyos lamang ang kanilang pag-asa. Ang Diyos, na Siyang bukal ng tanang kabutihan, ang tanging inaasahan ng Kanyang sambayanan.

Ibinunyag ni Apostol San Pablo sa Ikalawang Pagbasa mula sa kanyang unang sulat sa mga taga-Corinto kung paanong ipinagkaloob ng Diyos sa sangkatauhan ang Kanyang mga pagpapala. Sa pamamagitan ni Kristo Hesus, ibinuhos ng Diyos ang Kanyang mga pagpapala sa sangkatauhan. Ito ang pakay ng Panginoong Hesus sa sanlibutan. Ihatid at ipalaganap ang mga pagpapala ng Diyos sa lahat ng tao. Ang Diyos, na Siyang bukal ng lahat ng pagpapala't kabutihan, ay pumanaog sa lupa at nagkatawang-tao upang ihatid sa sangkatauhan ang Kanyang mga pagpapala sa pamamagitan ng Panginoong Hesukristo.

Si Hesus ay pumarito upang ihatid sa sangkatauhan ang pagpapala't pag-asang kaloob ng Diyos. Siya, ang Diyos na nagkatawang-tao, ay pumarito hindi upang maghasik ng lagim. Hindi Siya pumarito upang magdulot ng takot o sindak. Bagkus, naparito Siya upang ipalaganap ang Kanyang pagpapala. Siya ang Panginoong bukal ng tanang kabutihan. Siya'y nagdudulot ng grasya, pag-asa, at pagpapala para sa lahat.

Huwag nawa nating kalimutan ang tunay na dahilan kung bakit tayo'y naghahanda at naghihintay nang buong kagalakan ngayong panahon ng Adbiyento. Ang pagdating ni Kristo na naghahatid ng pag-asa at iba pang mga pagpapala ang ating pinaghahandaan at pinananabikan ngayong banal na panahon ng Adbiyento, ang panahon ng pananabik at paghahanda.

HESUS: PASTOL AT HARING MAAWAIN AT MAPAGKALINGA SA KANYANG KAWAN

26 Nobyembre 2017

Dakilang Kapistahan ng Pagkahari ng Panginoong Hesukristo sa Sanlibutan (A) 

Ezekiel 34, 11-12. 15-17/Salmo 22/1 Corinto 15, 20-26. 28/Mateo 25, 31-46

Ngayong Dakilang Kapistahan ni Kristong Hari, inaanyayahan tayo ng Simbahan na pagnilayan kung anong uri ng hari si Kristo. Paano nga ba naiiba si Kristo bilang hari sa iba pang mga hari o pinuno dito sa mundo? Ito ang nais talakayin ng mga Pagbasa para sa maringal na pitang ito na ipinagdiriwang ng Santa Iglesia sa huling araw ng linggo sa Kalendaryo Liturhiko. 

Sa Unang Pagbasa mula sa aklat ni propeta Ezekiel, ang Panginoong Diyos ay nagpakilala bilang isang mapagkalingang pastol at hari. Inihayag ng Diyos na Siya na mismo ang maghahanap at mag-aalaga sa Kanyang mga tupa. Bukod sa pagiging hari at hukom, ang Panginoon ay isang maamo at mapagkalingang pastol. Hindi Niya nais na mapahamak ang Kanyang kawan. Hangad Niya na makahimlay ang Kanyang mga tupa sa Kanyang piling magpakailanman. Sa Kanyang piling, mararanasan nila ang Kanyang habag at malasakit na walang katapusan. 

Sa Ikalawang Pagbasa, isinalaysay ni Apostol San Pablo kung paanong ipinamalas ng Diyos sa sangkatauhan ang Kanyang habag at malasakit sa pamamagitan ni Kristo Hesus. Wika ni Apostol San Pablo, "Kung paanong dumating ang kamatayan sa pamamagitan ng isang tao, gayon din naman, dumating din ang muling pagkabuhay ng isang tao." (15, 21) Ang Diyos ay nagkatawang-tao sa pamamagitan ng Panginoong Hesukristo upang ipagkaloob sa sangkatauhan ang biyaya ng muling pagkabuhay, bagong buhay, buhay na walang hanggan. Sa pamamagitan nito, pumasok sa daigdig ang habag at malasakit ng Diyos.

Ang punto ni Apostol San Pablo sa Ikalawang Pagbasa ang siya ring punto ng Panginoong Hesus sa ika-10 kabanata ng Ebanghelyo ni San Juan noong Kanyang winika, "Naparito Ako upang ang mga tupa'y magkaroon ng buhay; isang buhay na ganap at kasiya-siya." (10, 10) Iyan ang buod ng misyon ni Hesus. Si Hesus ay naparito upang bigyan ng isang buhay na ganap at kasiya-siya ang Kanyang mga tupa sa pamamagitan ng Kanyang krus at Muling Pagkabuhay. Sa pamamagitan nito, ipinamalas at ipinadama ng Panginoong Hesukristo ang Kanyang awa't habag para sa Kanyang kawan na labis Niyang iniibig at pinapahalagahan. 

Sino ang mga kabilang sa kawan ni Kristong Hari?  Sabi ni Kristo sa ika-10 kabanta ng Ebanghelyo ni San Juan, "Nakikinig sa Aking tinig ang Aking mga tupa." (10, 27) Ang mga nakikinig kay Hesus ay kabilang sa Kanyang kawan. At dahil nakikinig sila kay Hesus, isinasabuhay at sinusunod nila ang Kanyang kalooban. Ang halimbawa ni Hesus ay kanilang tinutularan. Ipinapalaganap nila sa iba't ibang dako ng daigdig ang awa't malasakit ni Kristo sa pamamagitan ng kanilang mga salita't pagkilos. Sa pamamagitan ng kanilang mga salita't gawa, tumatalima sila sa mga utos ng Mabuting Pastol na si Kristong Hari. At lumalaganap sa iba't ibang dako ang awa't habag ng tunay na Hari na si Kristo Hesus. 

Isinalaysay ng Panginoong Hesus sa Ebanghelyo ngayon ang talinghaga tungkol sa mga tupa't mga kambing. Sa talinghagang ito, inilarawan ni Hesus ang mga kaganapan sa katapusan ng panahon. Ang mga tupa'y makikinabang sa pangako ni Hesus habang ang mga kambing naman ay mapapahamak sa walang hanggang apoy ng impyerno. Ginantimpalaan ng dakilang hari't hukom na si Kristo Hesus ang mga tupa dahil sa kanilang pagsunod at pagtalima sa Kanyang kalooban. Makakapiling ng mga tupa ang Panginoon sapagkat ipinalaganap nila ang Kanyang awa't habag. Kung paano Niyang ibinahagi sa kanila ang Kanyang awa't habag, gayon din naman, ibinahagi nila sa kapwa, lalung-lalo na sa mga kapus-palad, ang Kanyang awa't habag sa pamamagitan ng mga salita't gawa. Noong ito'y ginawa para sa kapwa, lalo na para sa mga kapus-palad, ginawa rin ito para sa Panginoong Hesukristo, ang Haring walang hanggan. 

Kung nais nating mapabilang sa kawan ni Kristong Hari, kung nais nating mapabilang sa mga tupa sa talinghaga ng Panginoon sa Ebanghelyo, tumalima tayo sa Kanyang mga utos. Tularan natin ang Kanyang halimbawa. Ibahagi natin ang Kanyang awa't habag sa kapwa, lalo na sa mga kapus-palad. Sa gayon, maririnig natin ang mga salitang ito mula kay Kristo sa katapusan ng ating buhay, sa katapusan ng panahon, "Halikayo, mga pinagpala ng Aking Ama! Pumasok na kayo at manirahan sa kahariang inihanda para sa inyo mula pa nang likhain ang sanlibutan." (25, 34) Mararanasan natin ang gantimpala ng buhay na walang hanggan sa piling Niya sa kalangitan. Makikinabang tayo sa Kanyang pangako ng walang hanggang paghimlay sa Kanyang kaharian, ang tunay na Paraiso. 

Si Hesus ang tunay na Pastol at Hari. Siya'y puspos ng habag at malasakit para sa Kanyang kawan. Ang Kanyang kawan ay lagi Niyang kinakalinga at pinahihimlay sa piling Niya magpakailanman. Ang Kanyang Awa't Pagkalinga ay walang hanggan. Salamat sa Diyos sa pagkakaloob Niya kay Hesus upang maging ating Pastol at Haring maawain at mapagkalinga. 

VIVA CRISTO REY! 

GAMITIN PARA SA TAMA ANG MGA PAGPAPALANG KALOOB NG DIYOS

19 Nobyembre 2017
Ika-33 Linggo sa Karaniwang Panahon (A) 
Kawikaan 31, 10-13. 19-20. 30-31/Salmo 127/1 Tesalonica 5, 1-6/Mateo 25, 14-30 (o kaya: 25, 14-15. 19-21) 

"...ang pagdating ng Araw ng Panginoon ay tulad sa pagdating ng magnanakaw." (1 Tesalonica 5, 2). Isinalungguhit ni Apostol San Pablo sa Ikalawang Pagbasa na walang sinumang taong namumuhay dito sa lupa ang makababatid kung kailan ang Araw ng Panginoon. Sabi nga ng Panginoong Hesus na ang Ama lamang ang tanging nakakaalam kung kailan sasapit ang takdang panahon (Mateo 24, 36). Tulad ng pagdating ng isang magnanakaw, ang Araw ng Panginoon ay sasapit sa panahong hindi nating inaasahan. Walang nakakaalam kung kailan. Tanging Diyos Ama lamang ang nakakaalam. 

Binigyang-diin ngayong Linggo sa Unang Pagbasa at sa Ebanghelyo ang kahalagahan ng pagiging mabuting lingkod ng Panginoon bilang paghanda para sa pagsapit ng takdang panahon. Habang pinanabikan natin ang pagdating ng Panginoon sa katapusan ng panahon, kinakailangan nating maging mga mabuti't matapat na lingkod. Kailangan nating maging mga mabuti't matapat na lingkod, tumatalima sa Kanyang kalooban, sa pamamagitan ng ating mga salita't pagkilos. Ang maybahay sa Unang Pagbasa, ginamit ang kanyang mga talento upang paglingkuran ang kanyang pamilya't komunidad, lalung-lalo na ang mga kapus-palad. Ang dalawang alipin ng manlalakbay sa talinghaga ni Hesus sa Ebanghelyo, ginamit ang kanilang mga talento upang magkaroon ng tubo ang salaping ibinigay ng kanilang amo sa kanila. Kung paanong ginamit nila ang kanilang mga talentong ipinagkaloob sa kanila ng Diyos para sa kabutihan, gayon din naman, dapat nating gamitin ang mga talentong bigay ng Diyos sa atin para sa kabutihan. 

Tayong lahat ay biniyayaan ng Diyos ng mga talento upang gamitin para sa kabutihan. Hindi ito dapat balewalain at ilihim, tulad ng tamad at masamang alipin sa talinghaga ni Kristo na napakinggan sa Ebanghelyo ngayon. Nasasayang lamang ang biyaya ng Panginoon. Hindi rin ito dapat gamitin para sa masama. Kapag ginamit natin ang mga talentong iyan sa masama, inaabuso natin ang pagpapalang iyon. At iyan ay kinasusuklaman ng Diyos sapagkat ang biyayang Kanyang ipinagkakaloob ay dapat ginagamit para sa kabutihan, hindi para pairalin ang kasamaan. Pang-aabuso iyan ng Kanyang mga biyaya. Hindi naman iyan ang layunin ng Diyos noong ipinagkaloob Niya sa atin ang Kanyang mga biyaya. Bagkus, ang mga biyayang ipinagkaloob sa atin ng Diyos ay dapat nating gamitin para sa kabutihan. Ang mga biyayang ating tinanggap ay banal sapagkat ang mga ito'y nagmula sa bukal ng lahat ng kabanalan, ang Panginoong Diyos na makapangyarihan. Nararapat lamang ipalaganap ang Kanyang kabutiha't kabanalan sa lahat ng dako, tulad ng Kanyang ninanais. 

Habang tayo'y nabubuhay sa daigdig na ito bilang mga manlalakbay at mga lingkod ng Diyos, gamitin natin nang mabuti ang mga pagpapalang ipinagkaloob sa atin ng Diyos. Ipinagkalooban tayo ng Diyos ng Kanyang mga biyaya sa ating lahat upang matupad natin ang Kanyang kalooban. Sa pamamagitan ng paggamit sa mga pagpapalang kaloob ng Diyos sa atin para sa kabutihan, nagpapatotoo tayo sa Kanya na Siyang bukal ng lahat ng kabanalan. Sa pamamagitan ng paggamit ng mga talentong binigay sa atin ng Panginoon, lalo natin Siyang niluluwalhati't dinadakila. Sapagkat ang tanging hinahangad ng mga naglilingkod sa Panginoon nang buong katapatan ay gamitin ang mga pagpapalang kaloob ng Diyos para sa higit na ikaluluwalhati ng Kanyang Pangalan.