TAWAG SA BOKASYON

10 Pebrero 2019 

Ikalimang Linggo sa Karaniwang Panahon (K) 

Isaias 6, 1-2a. 3-8/Salmo 137/1 Corinto 15, 1-11 (o kaya: 15, 3-8. 11)/Lucas 5, 1-11

Pinagtutuunan ng pansin sa mga Pagbasa ang pagtawag ng Panginoon. Hindi na bago ang larawan ng pagtawag ng Panginoon. Kahit noong kapanahunan ng Lumang Tipan, ang Panginoon ay tumatawag ng mga indibidwal para sa isang napakahalagang bokasyon. Paano naging propeta ang mga katulad nina Isaias at Jeremias? Tinawag sila ng Panginoon. At nang tinawag sila ng Diyos, saka pa lamang nila natanggap ang bokasyong ibinigay sa kanila. At sa Bagong Tipan, ang Diyos na nagkatawang-tao na si Hesus ay tumawag ng labindalawang lalaki upang maging Kanyang mga alagad. Hanggang sa kasalukuyan, tinatawagan pa rin ng Panginoon ang bawat isa para sa bokasyong Kanyang inilaan. 

May nagsisimula sa pagtawag ng Panginoon. Ang pagtawag ng Panginoon ang hudyat ng simula ng bokasyon. Ang tawag ng Panginoon ay sumasalamin sa bokasyong inilaan Niya para sa bawat isa. Mayroon Siyang inilaan para sa bawat isa sa atin. Mayroon Siyang magandang hangarin para sa bawat isa sa atin. Iyan ang dahilan ng bokasyon. Ang bokasyong inilaan ng Diyos para sa bawat isa ay ang buhay na hangad Niya para sa atin. At ang tangi Niyang hinahangad o ninanais ay ang ating ikabubuti. Kaya, may mga bokasyong inilaan ang Panginoong Diyos para sa bawat isa. Alam Niya na ang bokasyong inilaan Niya para sa bawat isa ay makakabuti para sa bawat isa. Walang ibang hinahangad ang Panginoong Diyos kundi ang ating kabutihan. 

Isinalaysay ni propeta Isaias sa Unang Pagbasa kung paano siya tinawag ng Diyos upang maging Kanyang tagapagsalita sa Kanyang bayan. Sa pamamagitan ng mga propeta tulad ni Isaias, ipinapaabot ng Diyos ang Kanyang mensahe sa Kanyang bayan. Tinawag at hinirang ng Panginoong Diyos si Isaias sa pamamagitan ng isang katanungan. Ang Panginoong Diyos ay nagtanong, "Sino ang Aking ipapadala? Sino ang Aming susuguin?" At ang tugon ni Isaias, "Narito po ako. Ako ang isugo N'yo." (6, 3) Ang Diyos ay nagpakita kay Isaias sa isang pangitain. Sa pangitaing iyon, tinawag ng Panginoon si Isaias sa pamamagitan ng isang tanong. At tinugunan ni Isaias ang tawag ng Panginoon. At sa kanyang pagtugon, inihayag ni Isaias ang kanyang pagtanggap sa bokasyong ibinigay ng Panginoon. 

Nagsalita si Apostol San Pablo sa Ikalawang Pagbasa tungkol sa kanyang bokasyon bilang apostol. Bilang apostol, siya'y iniatasang magpatotoo tungkol sa pag-ibig at kagandahang-loob ng Diyos na inihayag sa pamamagitan ni Hesus. Si Hesus ay dumating sa daigdig bilang tao katulad natin, maliban sa kasalanan. Ang ating pagkatao ay buong kababaang-loob Niyang niyakap at tinanggap upang tayong lahat ay iligtas. Tayong lahat ay Kanyang iniligtas sa pamamagitan ng Kanyang krus at Muling Pagkabuhay. Iyan ang Mabuting Balita. Ang mga apostol ay iniatasang mangaral at magpatotoo tungkol sa Mabuting Balita. Ang misyon ng mga apostol ay ipinagpapatuloy ng Simbahan sa kasalukuyang panahon. 

Isinalaysay sa Ebanghelyo ang pagtawag ni Hesus sa mga una Niyang apostol. Mga mangingisda ang mga unang apostol ng Panginoong Hesus - sina Apostol San Pedro, San Andres (hindi binanggit ni San Lucas ang kanyang pangalan sa kanyang salaysay pero ang kanyang pangalan ay binanggit nina San Mateo at San Marcos sa kanilang salaysay), Santiago, at San Juan. Tinawag ng Panginoong Hesus ang apat na ito matapos makahuli ng napakaraming isda sa lawa. Tinawag ang apat na ito upang maging mga mamamalakaya ng mga tao. Iyan ang kanilang bokasyon bilang mga apostol ni Hesus. Sila'y magsisilbing saksi ng Panginoong Hesus sa iba't ibang bahagi ng daigdig (Mga Gawa 1, 8). 

Ang pagtawag ng Panginoon ay pagtawag sa bokasyon. May tawag ang bawat isa mula sa Panginoon. Tinatawag ng Panginoon ang bawat isa na maranasan ang buhay na Kanyang niloloob. Iyan ang layunin ng bokasyon - mamuhay ayon sa kalooban ng Diyos. Kaya nga, anuman ang ating bokasyon, iyan ay para sa ating ikabubuti sapagkat iyan ang kalooban ng Panginoon para sa atin. Kaya naman, tulad ni Isaias sa Unang Pagbasa, tulad ng Mahal na Birheng Maria, tulad ng mga apostol at ng lahat ng mga banal, tanggapin nawa natin ang bokasyong bigay ng Diyos. Tumalima nawa tayo sa Kanyang kalooban. Ibigay nawa natin ang ating "Oo" sa tawag ng Panginoon na may inihandang bokasyon para sa bawat isa sa atin. 

NANG DAHIL SA PAG-IBIG

3 Pebrero 2019 

Ikaapat na Linggo sa Karaniwang Panahon (B) 

Jeremias 1, 4-5. 17-19/Salmo 70/1 Corinto 12, 31-13, 13 (o kaya: 13, 4-13)/Lucas 4, 21-30 

Nangaral si Apostol San Pablo tungkol sa pag-ibig sa Ikalawang Pagbasa. Ang misyon ni San Pablo bilang apostol ay magpatotoo tungkol sa pag-ibig ng Diyos na ipinamalas Niya sa pamamagitan ni Kristo Hesus. Ang misyon na ito ay ibinigay ng Panginoong Hesus sa mga apostol bago ang Kanyang maluwalhating pag-akyat sa langit. Ang misyon na ito, na sinimulan ng mga apostol noong araw ng Pentekostes, ay ipinagpapatuloy ng Simbahan sa kasalukuyang panahon. 

Ang aral at mensahe ng Mabuting Balita ay nakaugat sa pag-ibig. Ang pag-ibig na nagmumula sa Diyos. Ang pag-ibig ng Diyos na naghatid ng kaligtasan sa lahat sa pamamagitan ng Panginoong Hesukristo. Ipinasiya ng Diyos na ipadala sa daigdig si Hesus, ang Kanyang Bugtong na Anak, upang tayong lahat ay tubusin. Ang pag-ibig ng Diyos para sa lahat ay napatunayan sa pamamagitan ng pagkakaloob kay Kristo. Iyan ang buod ng Magandang Balita na sinasampalatayanan ng Simbahan mula noon hanggang ngayon. At walang sawang ipinapalaganap, ipinapangaral, at pinatotohanan ng Simbahan ang Mabuting Balitang ito hanggang sa kasalukuyan. 

Subalit, hindi ito tinanggap ng lahat ng nakarinig nito. Mayroong mga hindi tumanggap sa aral at mensahe ng Mabuting Balitang ito. Ito ang ipinahihiwatig sa Unang Pagbasa at Ebanghelyo. Sa Unang Pagbasa, ang Diyos ay nagsalita kay propeta Jeremias tungkol sa magiging misyon niya bilang propeta. Ang misyong ibibigay sa kanya ng Panginoon ay hindi magiging madali. Sasalungatin siya ng lahat ng kanyang mga tagapakinig. Subalit, sa kabila nito, ipinangako ng Diyos kay Jeremias na siya'y magtatagumpay. Ang pangakong ito ng Panginoong Diyos ay nagdulot ng lakas ng loob kay Jeremias. At sa tampok na salaysay sa Ebanghelyo, ang mismong Pangalawang Persona ng Kabanal-banalang Santatlo na si Hesus ay hindi tinanggap ng Kanyang mga kababayan sa Nazaret. 

Hindi naging madali ang buhay ng mga lingkod na hinirang ng Diyos sa Lumang Tipan at sa Bagong Tipan. Ang mga propetang tulad ni Jeremias ay hindi tinanggap ng kanyang mga kababayan dahil sa hatid niyang mensahe mula sa Diyos. Bagamat galing sa Diyos ang kanyang inihatid sa kanila, hindi pa rin ito tinanggap. Ang mga apostol katulad ni Apostol San Pablo ay hindi rin tinanggap ng ilan sa mga bayang kanilang pinuntahan noong sila'y nabubuhay pa. May mga taong mula sa iba't ibang mga lugar na kanilang pinuntahan na hindi tumanggap sa kanila dahil sa kanilang pagsaksi kay Kristo. Dahil diyan, nakaranas sila ng pag-uusig. 

Kahit mismong si Hesus ay nakaranas ng pagtanggi. Naranasan ni Hesus na matanggihan ng kapwa. Alam ni Hesus ang pakiramdam ng mga tinanggihan o hindi tinanggap. Alam Niya ang sakit dulot ng hindi pagtanggap ng kapwa sa puso't damdamin ng bawat tao. Ang matindi pa dito, naranasan pa ito ni Hesus sa piling ng Kanyang mga kababayan sa Nazaret. Sa piling ng Kanyang mga kababata. Mula sa mga taong nakilala at nakasama pa Niya noong kabataan Niya. Napakasakit ito para sa Panginoong Hesus. Labis Siyang nasaktan sa 'di pagtanggap sa Kanya ng Kanyang mga kababayan. Labis rin Siyang nasaktan dahil hinangad nilang ibulid Siya sa bangin. Hindi pa makuntento sa pagpapalayas sa Kanya. 

Sa pamamagitan ni Hesus, ang Diyos ay naging mahina. At dahil sa kahinaang ito, madali Siyang tablan ng lahat ng uri ng sakit dito sa daigdig. Hindi lamang Siya tinablan ng mga pisikal na sakit kundi pati na rin ang mga emosyonal na sakit. Ang lahat ng mga pisikal at emosyonal na sakit ay tiniis ng Panginoon. Kahit na Siya'y Diyos, kahit na Siya ang bukal ng kabanalan at kapangyarihan, kahit hindi Siya nagkasala kailanman, pinahintulutan ng Panginoon na Siya'y tablan at tamaan ng iba't ibang uri ng sakit na kilala sa daigdig. 

Bakit nga ba ipinasiya ng Panginoon na gawin iyon? Dahil sa pag-ibig. Dahil sa pag-ibig, pinili Niya tayong damayan at samahan sa bawat sandali ng ating buhay. Dahil sa pag-ibig, pinahintulutan ng Mahal na Poon na maging tao katulad natin, liban sa kasalanan. Dahil sa pag-ibig, niloob Niyang maranasan ang mga naranasan natin sa buhay, lalung-lalo na ang mga karanasang nagdulot ng sakit sa ating mga puso't damdamin. Iyan ang pag-ibig ng Panginoon. Iyan ang Magandang Balita. 

LIWANAG NA GUMAGABAY

2 Pebrero 2019 

Kapistahan ng Pagdadala kay Hesus na Panginoon sa Templo 

Malakias 3, 1-4/Salmo 23/Hebreo 2, 14-18/Lucas 2, 22-40 (o kaya: 2, 22-32) 

Pinagtutuunan ng pansin ng Simbahan sa araw na ito, ang Pista ng Candelaria, ang larawan ng Panginoong Hesukristo bilang liwanag. Ito ang nagsisilbing paliwanag kung bakit ang pagdiriwang ng Banal na Misa para sa espesyal na araw na ito ay nagsisimula sa pamamagitan ng Prusisyon at Pagbabasbas ng mga Kandila. Ang mga kandilang binasbasan ang magsisilbing paaalala sa atin na ang tunay na liwanag ay walang iba kundi ang Panginoong Hesukristo. Siya ang liwanag na pumanaog sa daigdig bilang tao, tulad ng ipinangako sa Lumang Tipan. 

Sabi ng Panginoong Hesus sa Ebanghelyo ni San Juan, "Ako ang ilaw ng sanlibutan. Ang sumusunod sa Akin ay magkakaroon ng ilaw na nagbibigay-buhay, at di na lalakad sa kadiliman." (8, 12) Siya ang liwanag na nagmula sa langit. Siya ang Diyos na bukal ng liwanag. Sa pamamagitan Niya, dumating ang makalangit na liwanag sa sanlibutan. Ipinasiya ng Diyos na dumating sa daigdig upang ipalaganap sa daigdig ang Kanyang liwanag sa pamamagitan ni Kristo Hesus. At ang liwanag ni Kristo ay hinding-hindi mapapawi kailanman. 

Bago dumating sa daigdig ang Panginoong Hesus, inihayag sa Lumang Tipan ang pagdating ng liwanag. Isang halimbawa nito ay ang pahayag ng Panginoong Diyos na inilahad ni propeta Malakias sa Unang Pagbasa. Sa pahayag na ito, nagsalita ang Diyos tungkol sa Kanyang pagdating. Sa Kanyang pagdating, ang Kanyang liwanag ay Kanyang ipapalaganap. Hatid Niya sa lahat ang liwanag na nagmula sa Kanyang kaharian sa langit. Higit pa ito sa liwanag dulot ng sanlibutan. 

Ang Ikalawang Pagbasa ay nagwakas sa pamamagitan ng mga salitang ito, "Sapagkat Siya [si Hesus] ma'y tinukso at nagbata, kaya ngayo'y matutulungan Niya ang mga tinutukso." (2, 18) Paano tinutulungan ni Hesus ang mga tinutukso? Sa pamamagitan ng Kanyang liwanag. Ang Kanyang liwanag ang tumutulong sa atin na manatili sa tamang landas. Si Hesus, ang tunay na kaliwanagan, ang gumagabay sa atin. Ginagabayan tayo ni Hesus patungo sa Ama. Ang sinumang sumusunod sa liwanag ni Hesus ay makakarating sa langit. Matatamasa ng bawat isa ang pangako ng buhay na walang hanggan sa kalangitan kung tayo'y susunod kay Hesus. 

Isang napakatandang lalaki sa Ebanghelyo ang nakakilala sa Panginoong Hesus bilang liwanag. Siya ay si Simeon. Malapit na siyang mamatay. Subalit, bago siya namatay, binigyan siya ng isang karangalan ng Panginoon. Pinahintulutan siya ng Espiritu Santo na masilayan ang Banal na Sanggol, ang liwanag na nagmula sa langit, bago siya pumanaw. Matapos ang napakahabang panahon ng pananabik, sumapit ang araw na ipinangako sa kanya ng Diyos. Ang araw na masisilayan na niya ang tunay na liwanag na si Hesus, ang Banal na Sanggol na kalong-kalong ng Mahal na Birheng Maria. 

Si Hesus ang tunay na liwanag. Siya ang liwanag na 'di mapapawi kailanman. Kung nais nating matamasa ang pangako ng buhay na walang hanggan sa kalangitan, tanggapin at sundin natin Siya. Hayaan natin ang Kanyang liwanag na gumabay sa ating lahat patungo sa Kanyang kaharian sa langit. 

PAGBIBIGAY NG PALIWANAG

27 Enero 2019 

Ikatlong Linggo sa Karaniwang Panahon (K) 

Nehemias 8, 2-4a. 5-6. 8-10/Salmo 18/1 Corinto 12, 12-30 (o kaya: 12, 12-14. 27)/Lucas 1, 1-4; 4, 14-21 

Image from: Sweet Publishing / FreeBibleimages.org

Ang mga tampok na karakter sa mga Pagbasa ay nagbibigay ng paliwanag sa kanilang mga tagapakinig. Ano nga ba ang layunin ng mga paliwanag? Ang layunin ng mga paliwanag ay magbigay ng kalinawan tungkol sa iba't ibang mga paksa. Ang mga paliwanag o eksplanasyon ay nagbibigay ng tulong sa mga tao na unawain ang iba't ibang mga paksang itinuturo. May mga konsepto kasing napakahirap aralin at unawain. Kaya, ang mga paliwanag ay napakahalaga. Napakahalaga ito, lalo na para sa mga taong mausisa. May mga taong nais palawakin ang kanilang karunungan o pang-unawa tungkol sa iba't ibang mga bagay. 

Tampok sa Unang Pagbasa ang mga Levita. Ang batas ng Diyos ay kanilang binasa sa harapan ng mga tao. Habang binabasa nila ang Kautusan ng Panginoong Diyos, ang mga tao'y nakikinig. Pinakinggan nila nang mabuti ang ibinabasa sa kanila ng mga Levita. Matapos nilang basahin ang batas ng Panginoon, nagbigay sila ng paliwanag sa mga tao upang lalo nilang maintindihan ang mga iniuutos sa kanila. Nais ng mga tao na sundin ang mga utos ng Diyos. Kaya, ipinaliwanag ng mga Levita sa mga tao ang mga utos ng Panginoong Diyos na kanilang binasa. Malaking tulong para sa mga tao ang paliwanag ng mga Levita. 

Si Apostol San Pablo ay nagbigay ng paliwanag tungkol sa ugnayan ng bawat bahagi ng katawan ng tao sa Ikalawang Pagbasa. Ang katawan ng bawat tao ay binubuo ng iba't ibang bahagi. Hindi isang bahagi lamang ang bumubuo sa katawan ng bawat tao. Ang katawan ay hindi lang puro mata, kamay, o tainga. May iba't ibang bahagi ang katawan ng bawat tao. At ang mga bahaging ito ay may kani-kanyang papel na ginagampanan. Subalit, ang iba't ibang bahaging ito ang bumubuo sa iisang katawan na tinataglay ng bawat tao. Ang bawat tao ay nilikha ng Diyos sa ganitong pamamaraan. Ginamit ni Apostol San Pablo ang pamamaraang ito upang ilarawan sa mga taga-Corinto ang kahalagahan ng pamumuhay nang may pagkakaisa bilang isang sambayanang bumubuo sa Katawan ni Kristo. 

Isang paliwanag tungkol sa isang propesiya na nasaaad sa aklat ni propeta Isaias sa Ebanghelyo. Galing mismo sa Panginoong Hesus ang paliwanag na ito. Si Hesus, ang Dakilang Guro't Panginoon, ay nagbigay ng paliwanag sa mga nagkatipon sa sinagoga tungkol sa propesiya ni propeta Isaias. Ang propesiyang ito'y tungkol sa misteryosong Lingkod ng Diyos na lilitaw pagdating ng takdang panahon. Maikli lamang ang naging paliwanag ng Panginoong Hesukristo. Wika ni Hesus sa mga nasa sinagoga na natupad na ang propesiyang ito sa pamamagitan Niya (4, 21). Bagamat maikli, napakalinaw ang Kanyang paliwanag sa mga nasa sinagoga noong araw na iyon. Siya ang tinutukoy ni propeta Isaias sa kanyang pahayag tungkol sa ipinangakong Mesiyas na ipadadala ng Diyos sa Kanyang bayan. 

Ang kahalagahan ng mga paliwanag ay ipinakita ng mga karakter sa mga Pagbasa, lalung-lalo na ng Panginoong Hesus sa Ebanghelyo. Itinuturo sa atin ng mga panauhing itinampok sa mga Pagbasa na ang pagbibigay ng paliwanag ay isang napakagandang pamamaraan ng pagbibigay ng tulong sa kapwa, lalung-lalo na sa mga nais magpalawak ng kanilang karunungan at mga nais matuto ng iba't ibang bagay. Katunayan, isa sa mga Espirituwal na Gawa ng Awa ay ang pagtuturo sa mga kapos sa kaalaman. Isa itong pamamaraan ng pagtulong sa kapwa. Ang bawat tao'y tinutulungang makapulot ng mga aral na napakahalaga at para sa kanilang ikabubuti sa pamamagitan ng pagtuturo sa kanila. Isang pamamaraan na makakatulong sa pagtuturo sa kanila ay ang pagbibigay ng paliwanag. 

Kung paanong ang mga panauhin sa mga Pagbasa, lalung-lalo na si Hesus sa Ebanghelyo, ay nagbigay ng tulong sa kanilang mga tagapakinig sa pamamagitan ng pagtuturo, hinahamon tayong tulungan ang ating kapwa na kapos sa kaalaman na makapulot ng mga aral na napakahalaga at para sa kanilang ikabubuti. Hinahamon tayong ibahagi ang ating kaalaman tungkol sa ating pananampalataya. At sa pagbabahagi ng ating kaalaman sa kapwa tungkol sa ating pananampalataya kay Kristo, napakahalaga na magbigay tayo ng mga paliwanag upang lalo nilang maunawaan ang ating ipinapalaganap sa kanila. 

BIGAY NG DIYOS: ISANG BATA

20 Enero 2019 

Kapistahan ng Panginoong Hesus, ang Banal na Sanggol (K) 

Isaias 9, 1-6/Salmo 97/Efeso 1, 3-6. 15-18/Lucas 2, 41-52 

Ang Unang Pagbasa para sa Kapistahan ng Santo Niño, isang espesyal na araw sa kalendaryo ng Simbahan sa Pilipinas, ay ang mismong Unang Pagbasa para sa Misa sa Hatinggabi ng Pasko ng Pagsilang. Tampok rito ang pahayag ni propeta Isaias tungkol sa plano ng Panginoong Diyos na Kanyang tutuparin pagdating ng takdang panahon. Ibinunyag ni propeta Isaias sa pahayag na ito na isang sanggol na lalaki ang ipagkakaloob ng Diyos sa lahat pagsapit ng takdang panahon. At ang sanggol na lalaking tinutukoy ni propeta Isaias sa kanyang pahayag ay walang iba kundi si Hesus, ang ipinangakong Mesiyas at Manunubos. 

Si Hesus, ang hinanap-hanap ng Mahal na Birheng Maria at ni San Jose sa loob ng tatlong araw sa salaysay sa Ebanghelyo, ang ipinagkaloob ng Diyos sa lahat. Siya'y ipinadala ng Ama sa sanlibutan. Siya'y isinugo upang iligtas ang sangkatauhan. Ang kaluwalhatian ng kalangitan ay buong kababaang-loob Niyang iniwan. Bumaba Siya sa lupa at naging tao tulad natin, maliban sa kasalanan. Dumating Siya bilang isang munting sanggol na iniluwal mula sa sinapupunan ng Mahal na Birheng Maria. Ang pagkalinga ng Mahal na Birheng Maria at ni San Jose ay kanyang naranasan sa bawat taon ng Kanyang kabataan. Naranasan ni Hesus kung paanong mamuhay ang mga kabataan dito sa daigdig na ito. 

Bakit ipinasiya ni Hesus na dumating sa daigdig bilang isang sanggol? Bakit Niya ipinasiyang maging isang bata? Sinagot ni Apostol San Pablo ang mga tanong na ito sa Ikalawang Pagbasa. Sabi niya na ang bawat isa'y itinalaga ng Diyos upang maging Kanyang mga anak sa pamamagitan ng Panginoong Hesukristo dahil sa Kanyang pag-ibig (4-5). Iyan ang dahilan ng pagparito ni Hesukristo sa lupa. Iyan ang dahilan kung bakit ang Panginoong Hesus ay nagpasiyang dumating sa daigdig bilang isang sanggol. Dumating Siya bilang isang bata upang ipakita ang Kanyang pag-ibig para sa lahat. Dahil sa Kanyang pag-ibig para sa sangkatauhan, ipinasiya Niyang pagdaanan ang bawat yugto ng buhay ng tao, kabilang na rito ang yugto ng kabataan. Ito ang dahilan kung bakit ipinasiya ng Diyos na tubusin ang lahat ng tao sa pamamagitan ni Kristo Hesus. 

Iyan ang aral na ipinaparating sa bawat isa sa Kapistahan ng Santo Niño. Ang Santo Niño ang Tagapagligtas na ipinagkaloob ng Diyos sa bawat isa. Ang ipinangakong Tagapagligtas ng lahat ay dumating sa sanlibutan bilang isang bata. Siya ay si Hesus, ang Mahal na Poong Santo Niño. Kusa Niyang niyakap at tinanggap ang ating pagkatao nang may kababaang-loob. Inihayag Niya ang Kanyang pag-ibig para sa lahat sa pamamagitan ng Kanyang pagkakatawang-tao. Siya'y nagkatawang-tao upang ihayag ang Kanyang pag-ibig para sa lahat sa pamamagitan ng pagtubos sa lahat na naging mga alipin ng kasamaan at kadiliman. Sa pamamagitan ng Kanyang pagtubos sa ating lahat, tayong lahat ay inangkin ng Diyos bilang Kanyang mga anak. Ganyan tayo kamahal ng Panginoon. 

Laging ipinapaalala sa atin ng Mahal na Poong Santo Niño na tayong lahat ay minamahal ng Diyos. Dahil sa Kanyang pag-ibig para sa bawat isa sa atin, isang bata ang Kanyang ibinigay sa ating lahat. Ang batang iyon ay ang Batang Hesus. Sa pamamagitan ng Batang Hesus, ang Santo Niño, ibinigay ng Diyos ang Kanyang sarili sa ating lahat. Siya'y dumating upang tayong lahat ay iligtas. Ang pagtubos Niya sa ating lahat ang naghayag ng Kanyang pag-ibig at kagandahang-loob. 

Isang bata ang bigay ng Diyos sa ating lahat. Ang batang iyon ay walang iba kundi ang Kanyang sarili. Siya'y dumating bilang bata sa pamamagitan ni Hesukristo, ang Mahal na Poong Santo Niño. 

ANG SIMULA

13 Enero 2019 

Kapistahan ng Pagbibinyag sa Panginoon (K) 

Isaias 40, 1-5. 9-11 [o kaya: Isaias 42, 1-4. 6-7]/Salmo 103 [o kaya: Salmo 28]/Tito 2, 11-14; 3, 4-7 [o kaya: Mga Gawa 10, 34-38]/Lucas 3, 15-16. 21-22 

Isang napakahalagang kaganapan sa buhay ng Panginoong Hesukristo ang Kanyang pagbibinyag sa Ilog Jordan. Matapos Siyang binyagan ni San Juan Bautista, sinimulan Niya ang Kanyang pampublikong ministeryo. Ang Kanyang ministeryo ay binubuo ng Kanyang pangangaral tungkol sa kaharian ng Diyos at mga himala tulad ng pagpapagaling sa mga maysakit. Sa pamamagitan ng Kanyang ministeryo, nahayag ang kahanga-hangang kadakilaan ng Diyos.

Ang Pagbibinyag kay Hesus ang hudyat ng simula ng Kanyang ministeryo. Sa salaysay ng pagbibinyag sa Kanya sa Ebanghelyo, Siya'y ipinakilala ng Ama at ng Espiritu Santo na bumaba sa anyo ng kalapati. Si Hesus ay ipinakilala ng Ama bilang Kanyang Anak na minamahal at kinalulugdan Niya nang lubusan. Ipinakilala ng Diyos Ama ang Diyos Anak nang Siya'y umahon mula sa tubig ng Ilog Jordan. Sa pamamagitan ng pagpapakilala sa Pangalawang Persona ng Banal na Santatlo, inihayag ng Ama na dumating na ang takdang panahon. Sumapit na rin sa wakas ang panahong inaasam. Dumating na ang panahon kung kailan sisimulan Niyang tuparin ang pangakong Kanyang binitiwan sa Matandang Tipan. Ang pangakong binitiwan ng Diyos sa Kanyang bayan noong kapanahunan ng Matandang Tipan ay Kanyang tinupad sa pamamagitan ng Kanyang Bugtong na Anak na si Hesukristo. 

Tumutukoy kay Hesus ang pahayag ni propeta Isaias sa Unang Pagbasa. Siya ay darating upang iligtas ang Kanyang bayan. Ang Kanyang pagdating ay ipagsisigaw sa lahat. Ipapahayag at ipapalaganap ang balita tungkol sa Kanyang pagdating. Iyan ang mabuting balita na tinutukoy sa ikalawang bahagi ng pahayag na inilahad sa Unang Pagbasa. Darating ang Panginoon. Si Hesus ay dumating noong sumapit ang panahong itinakda. Nang Siya'y binyagan ni San Juan Bautista, ang Amang nasa langit ay nagsalita upang Siya'y ipakilala sa lahat. Siya ang magtutupad sa lahat ng nasasaad sa Lumang Tipan tungkol sa Mesiyas. 

Sa Ikalawang Pagbasa, si Apostol San Pablo ay nagsalita tungkol sa kagandahang-loob ng Diyos. Ang kagandahang-loob ng Diyos ang naghatid ng kaligtasan sa lahat ng tao. Ipinakita ng Diyos ang Kanyang kagandahang-loob para sa lahat ng tao sa pamamagitan ng pagligtas sa kanila. Sa pagdating ng Panginoong Hesus, nahayag ang kagandahang-loob ng Diyos. Inihayag ni Hesus ang kagandahang-loob ng Diyos sa pamamagitan ng Kanyang pangangaral tungkol sa kaharian ng langit. 

Dumating si Hesus upang ihayag ang kagandahang-loob ng Diyos. Sa Kanyang pagdating, inihatid Niya ang kagandahang-loob ng Diyos. Ang kagandahang-loob ng Diyos ay pumanaog sa sanlibutan sa pamamagitan ni Hesus. Sinugo Siya upang ipalaganap ang kagandahang-loob ng Diyos na nagdudulot ng kaligtasan. Dahil sa Kanyang kagandahang-loob para sa lahat, ipinasiya ng Diyos na dumating sa sanlibutan upang tubusin ang sangkatauhan sa pamamagitan ni Kristo Hesus. 

Binigyan si Hesus ng isang misyon. Ang misyong ibinigay sa Kanya ng Ama ay ipamalas ang Kanyang kagandahang-loob. Sa pamamagitan Niya, mahahayag ang kagandahang-loob ng Diyos na magdudulot ng kaligtasan sa lahat. Ito'y inihayag ng Ama pagkaahon ni Hesus mula sa tubig ng Ilog Jordan kung saan Siya'y nagsalita mula sa langit upang ipakilala ang Kanyang Bugtong na Anak na si Hesus. Sa pamamagitan nito, inihayag ng Ama ang simula ng misyon ng Anak. Unti-unti na ring magaganap sa pamamagitan ni Hesus ang katuparan ng pangakong binitiwan sa Lumang Tipan. Ito ang maghahayag sa kahanga-hangang kagandahang-loob ng Panginoon na nagdudulot ng kaligtasan sa lahat. 

DEDEDMAHIN O TATANGGAPIN?

6 Enero 2019 

Dakilang Kapistahan ng Pagpapakita ng Panginoon 

Isaias 60, 1-6/Salmo 71/Efeso 3, 2-3a. 5-6/Mateo 2, 1-12 

Ang mga Pagbasa para sa Dakilang Kapistahan ng Pagpapakita ng Panginoon ay tungkol sa mga kapansin-pansing gawain ng Diyos. Kapansin-pansin ang lahat ng mga gawain ng Diyos. Makikita ng lahat mula sa iba't ibang dako ang mga kahanga-hangang gawain ng Panginoong Diyos. Binibigyan Niya ng pagkakataon ang bawat isa na masaksihan ang Kanyang mga gawaing tunay ngang kamangha-mangha. Ang lahat ng Kanyang mga gawa ay para sa kapakinabangan ng lahat. 

Isang halimbawa nito ay ang inilahad sa Unang Pagbasa at Ikalawang Pagbasa. Ang Diyos ay nangako sa Kanyang bayan at tinupad ito noong dumating ang takdang panahon. Sa Unang Pagbasa, ipinangako ng Panginoon sa Kanyang bayan na sila'y lulukuban ng Kanyang kaliwanagan. Sa pamamagitan nito'y itatampok ng Diyos ang Kanyang bayan. Magniningning ang bayan ng Diyos dahil sa Kanya. At ang kadakilaan ng Diyos ay mahahayag sa pamamagitan nito. Ito rin ang pinagtutuunan ng pansin ni Apostol San Pablo sa Ikalawang Pagbasa. Katulad ng iba pang mga apostol, si Apostol San Pablo ay hinirang upang ipalaganap sa bawat sulok ng daigdig ang Mabuting Balita ng Panginoon. Ang Mabuting Balita na sumasalaysay sa kagandahang-loob ng Panginoon para sa lahat. 

Bakit nga ba ginawa iyon ng Panginoon? Sinagot ito ni Apostol San Pablo sa pambungad ng Ikalawang Pagbasa. Ginawa iyon ng Panginoon dahil sa Kanyang kagandahang-loob. Ang Diyos ay puspos ng kagandahang-loob para sa lahat. Ito ang dahilan kung bakit Niya hinirang ang mga propeta katulad ni propeta Isaias upang maging Kanyang mga tagapagsalita sa Kanyang bayan noong panahon ng Lumang Tipan. Ito rin ang dahilan kung bakit hinirang Niya ang mga apostol tulad ni Apostol San Pablo upang ipalaganap sa bawat panig ng daigdig ang Mabuting Balita noong panahon ng Bagong Tipan. Ito rin ang kaisa-isang dahilan kung bakit ang Panginoong Hesukristo ay bumaba mula sa langit at naging tao. Si Kristo ay naging isang munting sanggol na isinilang ng Mahal na Birheng Maria upang ipamalas at ipadama ang Kanyang kagandahang-loob. 

Subalit, hindi pipilitin ng Panginoon ang bawat isa na tanggapin ang Kanyang kagandahang-loob. Walang pilitan. Iginagalang Niya ang kalayaan ng bawat isa na makapagpasiya para sa kani-kanilang mga sarili. Nais man Niyang tanggapin ng bawat isa ang Kanyang kagandahang-loob, hindi Niya pipilitin ang bawat isa. Wala na Siyang magagawa kapag nadatnan Niyang may ilang ayaw tumanggap nito. Ang Diyos ay hindi namimilit. Ang desisyon ng bawat isa ay Kanyang iginagalang, kahit taliwas sa Kanyang kalooban ang karamihan sa mga desisyon ng bawat isa. 

Ang mga Pantas na dumalaw sa Sanggol na Hesus sa Ebanghelyo ay nagpasiyang tanggapin ang Kanyang kagandahang-loob. Katunayan, naglakbay pa sila mula sa Silangan upang hanapin ang Sanggol na Hesus. Napakalayo ng kanilang nilakbay para lang mahanap at makasamba sa Panginoong Hesus. Si Hesus, ang Sanggol na iniluwal mula sa sinapupunan ng Mahal na Birheng Maria, ang tunay at walang hanggang Hari. Si Hesus ang Diyos na puspos ng kagandahang-loob. Ang Kanyang kagandahang-loob ay Kanyang ipinakita sa pamamagitan ng Kanyang pagsilang sa daigdig. Siya ang tinanggap at hinanap ng mga Mago. Ang mga Mago ay kusang naglakbay ng napakalayo para lang hanapin Siya. At Siya'y kanilang sinamba at hinandugan ng mga alay nang Siya'y kanilang matagpuan sa piling ng Mahal na Ina at ni San Jose. Sa pamamagitan nito'y ipinakita ng mga Pantas ang kanilang pagtanggap sa Kanya na puno ng kagandahang-loob para sa lahat. 

Dedma o pagtanggap? Alin sa dalawa ang magiging reaksyon natin kapag ating nasaksihan ang mga gawa ng Diyos na nagpapakita ng Kanyang kagandahang-loob? Iyan ang mga tanong iniiwan ng Dakilang Pistang ito sa bawat isa sa atin upang pagnilayan nang buong kataimtiman.