ANG TUNAY NA UMIIBIG AT SUMASAMPALATAYA KAY KRISTO

26 Mayo 2019 

Ikaanim na Linggo ng Pasko ng Muling Pagkabuhay (K) 

Mga Gawa 15, 1-2. 22-29/Salmo 66/Pahayag 21, 10-14. 22-23/Juan 14, 23-29 

CTTO: LightWorkers Media

Sa Ebanghelyo, inilahad ng Panginoong Hesus na Muling Nabuhay sa mga apostol ang mga katangian ng mga tunay na umiibig sa Kanya. Sabi ng Panginoong Hesus na ang mga tunay na umiibig sa Kanya'y tutupad sa Kanyang mga utos. Ang mga tunay na umiibig kay Hesus ay magsusumikap mamuhay ayon sa Kanyang mga utos. Ang mga tagubilin ng Panginoon ay sisikapin nilang isabuhay at isapuso. Sisikapin nilang maging kalugud-lugod sa Kanyang paningin. Sisikapin nilang mamuhay nang may kabanalan. 

Iyan ang pinagtuunan ng pansin ng liham na pinadala ng Konsiliyo sa Herusalem sa mga Hentil sa Unang Pagbasa. Sabi sa liham na iyon na ang pinakamahalaga ay ang katapatan sa Diyos. Ipakita ang kanilang katapatan sa Diyos sa pamamagitan ng kanilang mga salita't gawa. Ang mga masasamang gawain tulad ng pakikiapid at pagkain ng anumang inihandog sa mga diyus-diyusan, may dugo, o ng hayop na binigti (15, 29). Ito'y matapos nilang pagpasiyahan na huwag nang pilitin ang mga Hentil na magpatuli ayon sa batas ni Moises. Hindi na kailangang magpatuli ang mga Hentil na bagong binyag sa Simbahan. Bagkus, ang kailangan lamang nilang gawin bilang mga bagong binyagang Kristiyano ay sumunod sa mga utos at aral ni Kristo na ipinangaral ng mga apostol. Layuan at itakwil ang kasalanan. Isapuso at isabuhay ang Salita ng Panginoon. Kapag ginawa nila iyon, mapapatunayan nilang tunay silang umiibig at sumasampalataya sa Kanya. Iyan ang tunay na Kristiyano. Ang tunay na Kristiyano ay umiibig at sumasampalataya sa Panginoon nang buong katapatan. Ang kanilang mga salita't gawa ang magpapatunay nito. 

Sa Ikalawang Pagbasa, inilahad ni San Juan ang gantimpala ng Panginoon sa mga tunay na umiibig at sumasampalataya sa Kanya. Nakita niya sa isang pangitain ang pagbaba ng Herusalem, ang Banal na Lungsod, mula sa kalangitan. Ano ang nais ipahiwatig ni San Juan? Nais niyang ipahiwatig na ang Diyos ay mananahan sa piling ng mga tunay na umiibig at sumasampalataya sa Kanya. Iyan ang magiging gantimapala nila mula sa Diyos. Makakapiling nila ang Diyos magpakailanman. Ang buhay na walang hanggan sa piling ng Diyos sa langit ang magiging gantimpala nila. Iyan ang ipinapahiwatig ng pangitain ni San Juan - ang pagbaba ng Bagong Herusalem mula sa langit. Ang Diyos ay mamumuhay sa piling ng mga tunay na umiibig at sumasampalataya sa Kanya. 

Ang Mahal na Birheng Maria ay nagpakita ng kanyang pag-ibig at pananampalataya sa Panginoon. Ipinakita niya ito sa pamamagitan ng kanyang pagtalima sa Salita ng Diyos. Isinantabi niya ang kanyang mga sariling interes at naisin para lamang matupad ang kalooban ng Diyos sa pamamagitan niya. Ang kalooban ng Diyos ay buong kababaang-loob na tinanggap at tinupad ni Maria. Ang Salita ng Diyos ay isinapuso at isinabuhay niya hanggang sa huling sandali ng kanyang buhay sa lupa. Kaya, siya'y ibinigay sa atin bilang halimbawang dapat tularan. Siya'y ating Ina na dapat nating tularan. Nararapat lamang na tularan ang kanyang halimbawa. At ang halimbawang ipinakita ng Mahal na Inang si Maria ay ang kanyang tunay na pag-ibig at pananampalataya sa Diyos. 

Katulad ng Mahal na Inang si Maria, patunayan natin na si Kristo ay tunay nating iniibig at sinasampalatayanan nang buong puso. Patunayan natin ang ating pag-ibig at pananampalataya sa Kanya sa pamamagitan ng ating mga salita at gawa. Ang mga utos at aral ng Panginoon ay tuparin at sundin natin. Itapat natin sa ating mga puso't isipan ang Kanyang Salita. Iyan ang mga katangian ng mga tunay na umiibig at sumasampalataya kay Kristong Muling Nabuhay. At ang mga tunay na umiibig at sumasampalataya sa Panginoong Muling Nabuhay ay mamumuhay kapiling Niya magpakailanman sa Kanyang kaharian sa langit. 

MAGMAHAL KAHIT MAHIRAP

19 Mayo 2019 

Ikalimang Linggo sa Karaniwang Panahon (K) 

Mga Gawa 14, 21b-27/Salmo 144/Pahayag 21, 1-5a/Juan 13, 31-33a. 34-35 

Nagsimula ang Ebanghelyo sa pamamagitan ng pag-alis ni Hudas Iskariote mula sa senakulo. Umalis si Hudas Iskariote mula sa Huling Hapunan upang isagawa ang kanyang planong pagkanulo kay Hesus. Subalit, kahit nalalaman ni Hesus kung ano ang balak ni Hudas Iskariote, nakuha pa Niyang mangaral tungkol sa pagmamahal. Inutusan ng Panginoong Hesus ang mga apostol sa senakulo na magmahal tulad ng ginawa Niyang pagmamahal sa kanila. Kapansin-pansin ito, lalung-lalo na't ang pag-alis ni Hudas Iskariote mula sa silid kung saan si Hesus ay nakipagsalu-salo sa mga apostol bago Siya dakipin ang bumungad sa salaysay. Nakakapanlaki ng mata. 

Agad na iniutos ng Panginoong Hesukristo ang mga apostol na umibig matapos umalis mula sa silid si Hudas Iskariote upang ituro sa kanila na ang pagmamahal ay hindi madali. Mahirap magmahal, lalo na't kapag ang kaharap ng bawat isa ay yaong kinasusuklaman at kinapopootan. Mas madaling magpakita ng pagmamahal sa mga taong minamahal kaysa sa mga taong kinasusuklaman. Alam ni Hesus ang katotohanang ito tungkol sa bawat tao. Alam ni Hesus na hindi madaling ibigin ang mga nagkanulo at mga kinapopootan. Alam ni Hesus na mas madali para sa bawat tao na ibigin ang mga tunay na nagmamahal sa kanila. 

Kung batid ni Kristo na mahirap para sa bawat tao na magmahal, bakit ipinasiya pa rin Niyang iutos ito sa mga apostoles? Bakit Niya inutusan ang mga apostoles na magpakita ng pagmamahal katulad Niya? Siya mismo ang sumagot sa tanong na ito sa wakas ng Ebanghelyo. Sinabi Niyang iyan ang patunay na sila'y Kanyang mga apostol (13, 35). Mapapatunayan ng mga apostol na tunay nga silang nasa panig ni Hesus kapag sila'y nagmahal katulad Niya, gaano mang kahirap gawin ito. Kahit nga si Hesus, nagpakita ng pagmamahal kahit alam Niyang mahirap itong gawin. Isang halimbawa nito ay ang Kanyang ginawang pagpapakita ng pagmamahal sa alagad na nagkanulo sa Kanya na si Hudas Iskariote. Kahit batid Niya ang planong pagtraydor at pagbenta ni Hudas, minahal pa rin Niya ang alagad Niyang ito. 

Iyan ang nais iparating nina Apostol San Pablo at San Bernabe noong pinalakas nila ang loob ng kanilang mga alagad sa Listra, Iconio, at Antioquia sa Unang Pagbasa. Pinatatag nina Apostol San Pablo at San Bernabe ang loob ng mga hinikayat nilang maging mga Kristiyano sa mga nasabing bayan upang manatili silang tapat sa Diyos hanggang wakas. Mapapatunayan nilang sila'y tapat sa Panginoon sa pamamagitan ng pagtupad sa Kanyang utos - magmahal katulad Niya. At sa Ikalawang Pagbasa, inihayag na ang Diyos ay mananahan sa piling ng mga tao. Papawiin Niya ang mga luha mula sa mga mata ng bawat tao. Ang lahat ng bagay ay Kanyang babaguhin. Sa pamamagitan nito'y inihayag ng Diyos ang Kanyang pag-ibig. Kung tutuusin, hindi naman kailangan ng Diyos na gawin iyon. Maaari na lamang Niyang pabayaan na lamang Niyang mabulok ang lahat ng bagay at manatili sa Kanyang maluwalhating kaharian sa langit. Subalit, ipinasiya Niyang mahalin ang tao, kahit mahirap itong gawin dahil sa paulit-ulit na pagkakasala ng tao laban sa Kanya. Ang pangakong ito ng Diyos ay nagpapahayag ng Kanyang pag-ibig para sa bawat tao. 

Si Hesus ay nagpasiyang magpakita ng pagmamahal sa lahat kahit mahirap itong gawin. Ginawa Niya ito para sa lahat, lalung-lalo na para sa mga katulad ni Hudas Iskariote. At ang utos Niyang magmahal katulad ng ginawa Niyang pagmamahal ay hindi lamang para sa mga apostol kundi para sa bawat isa. Kapag sinunod natin ang utos na ito ng Panginoong Hesus, mapapatunayan nating tayo'y tunay ngang nasa panig Niya. Kahit mahirap, magmahal tayo katulad ni Hesus. 

HUWAG NATING MALIITIN ANG KANYANG TULONG

13 Mayo 2019 

Paggunita sa Mahal na Birhen ng Fatima 

Lunes sa Ikaapat na Linggo ng Pasko ng Pagkabuhay

Mga Gawa 11, 1-18/Salmo 41/Juan 10, 1-10 

Tampok sa salaysay sa Unang Pagbasa ang dalawang reaksyon ng mga apostol at ng iba pang mga sinaunang Kristiyano sa Judea sa balita ng pagtanggap ng mga Hentil sa Salita ng Diyos. Noong una nila itong nabalitaan, si Apostol San Pedro ay pinuna nila dahil sa kanyang pakikipaghalibuilo sa mga Hentil. Para sa kanila, ang mga Hentil ay hindi kabilang sa mga pinili't hinirang ng Diyos. Kaya gayon na lamang ang kanilang pagpupuna kay Apostol San Pedro. Subalit, nang marinig nila ang kuwento ni Apostol San Pedro tungkol sa kanyang nasaksihan sa sambahayan ni Cornelio sa Jope, silang lahat ay nagpuri sa Diyos. Pinuri nila ang Diyos sapagkat ipinakita Niya ang Kanyang habag sa mga Hentil. 

Iyan din ang inihayag ng Panginoong Hesus na Muling Nabuhay sa dulo ng salaysay sa Ebanghelyo. Inihayag Niyang Siya'y naparito upang bigyan ng isang buhay na ganap at kasiya-siya ang Kanyang kawan. Iyan ang habag ng Diyos. Ang mga kaloob ng Diyos sa atin ay tunay ngang mabuti. Walang masamang ibinibigay sa atin ang Panginoon. Siya ang nagbigay sa atin ng buhay. Siya ang nagbibigay ng pag-asa at kagalakan sa bawat isa. Ang mga kaloob ng Panginoon sa atin ang nagpapaalala sa atin na tayong lahat ay tunay Niyang iniibig at kinakalinga. 

Si Maria, ang Mahal na Birhen ng Fatima, ay ibinigay ng Panginoong Hesukristo sa ating lahat upang maging ating Mahal na Ina. Bilang ating Mahal na Ina, lagi niya tayong isinasama sa kanyang mga panalangin. Hindi niya tayo nakakalimutan sa kanyang mga panalangin. Lagi niyang ipinapanalangin ang ating kapakanan. Sa pamamagitan ng kanyang mga panalangin para sa ating lahat, ipinapakita ng Mahal na Birheng Maria ang kanyang pagmamahal at pagkalinga. 

Nang magpakita ang Mahal na Birheng Maria kila Sor Lucia at sa kanyang mga pinsang sina San Francisco at Santa Jacinta Marto sa bayan ng Fatima noong 1917, marami siyang ipinarating na mensahe sa kanila. Marami siyang ipinakiusap sa kanila. Subalit, ang kanyang pangunahing pakiusap sa Fatima, dasalin ang Santo Rosaryo araw-araw. Sa tuwing dinadasal natin ang Santo Rosaryo, tayong lahat ay sinasamahan ng Mahal na Ina sa pananalangin at pagninilay sa buhay ni Kristo. Hindi tayo nag-iisa sa pagdarasal ng Santo Rosaryo; ang Mahal na Birheng Maria ay kasama natin sa pagninilay at pananalangin. Tayong lahat ay tinutulungan ni Maria sa ating pagdulog at pananalangin kay Kristo para sa lahat ng ating mga kahilingan sa buhay at lalung-lalo na para sa kapayapaan sa buong daigdig. Tayong lahat ay sinasamahan ni Maria na dumulog at manalangin sa Diyos. Ang kaloob ng Diyos ay makakamit ng sinumang dumudulog at nananalangin sa Kanya sa tulong ng Mahal na Birheng Maria.

Kasama natin si Maria, ang Mahal na Birhen ng Fatima, sa ating pagdulog at pananalangin sa Diyos. Huwag nating maliitin ang kanyang pagtulong sa atin. Huwag nating kalimutan na tayong lahat ay kanyang mga anak na tunay niyang minamahal at kinakalinga. 

ANG MABUTING BALITA NG MABUTING PASTOL

12 Mayo 2019 

Ikaapat na Linggo ng Pasko ng Muling Pagkabuhay (K)

Linggo ng Mabuting Pastol 

Mga Gawa 13, 14. 43-52/Salmo 99/Pahayag 7, 9. 14b-17/Juan 10, 27-30 

Sa Ebanghelyo, inihayag ng Panginoong Hesus na Siya ang Mabuting Pastol. Siya ang nagbibigay ng buhay na walang hanggan sa Kanyang mga tupa. Ang Kanyang mga tupa ay hindi mapapahamak o maaagaw mula sa Kanya sapagkat ang Kanyang tinig ay kanilang nakikilala. Wala silang ibang pananaligan at susundan nang buong puso kundi ang Mabuting Pastol na si Hesus. Kapag ang tinig ng Muling Nabuhay na si Hesus ay kanilang narinig, pumapanatag ang kanilang loob dahil naniniwala silang hindi sila mapapahamak kapag Siya'y kapiling nila. 

Tampok sa pangitain ni San Juan na kanyang inilahad sa Ikalawang Pagbasa mula sa aklat ng Pahayag ang larawang ito ng Panginoong Hesus na Muling Nabuhay bilang Mabuting Pastol. Ang Korderong nakita ni San Juan sa kanyang pangitain, ang Korderong nasa gitna ng trono, ang papastol sa lahat ng tao (7, 17). Aarugain Niya ang lahat ng tao mula sa iba't ibang lipi, wika, bayan, at bansa. Ang lahat ng mga nagtipon at nagbigay-puri sa Kordero, na nakita rin ni San Juan sa kanyang pangitain, ay makakaranas ng pagkalinga mula sa nag-iisang Mabuting Pastol na si Kristong Muling Nabuhay. At ang pagkalinga ni Kristo bilang Mabuting Pastol ay tunay, wagas, at hindi mapapantayan. 

Iyan ang Mabuting Balita. Tunay at totoo ang pag-ibig at pagkalinga ng Mabuting Pastol na si Kristo. Ipinakita ni Kristo ang Kanyang pag-ibig at pagkalinga sa ating lahat na bumubuo sa Kanyang kawan dito sa lupa sa pamamagitan ng Kanyang krus at Muling Pagkabuhay. Tayong lahat ay binigyan Niya ng bagong buhay, pag-asa, at kalayaan sa pamamagitan ng Kanyang krus at Muling Pagkabuhay. Iyan ang buong siglang ipinangaral ng mga apostol at ng mga sinaunang Kristiyano katulad ni Apostol San Pablo at ng kanyang kasamang si San Bernabe sa Unang Pagbasa. Ang Mabuting Balita tungkol kay Kristo Hesus ay kanilang ipinangaral at ipinalaganap sa iba't ibang panig ng daigdig nang buong sigla at galak, kahit ang kapalit nito'y ang kanilang buhay dito sa lupa. 

Patuloy na ipinapangaral ng Simbahan sa kasalukuyan ang Mabuting Balita tungkol kay Hesus, ang Mabuting Pastol. Ang Mabuting Balita na ating pinapahalagahan at sinasampalatayanan nang buong puso bilang mga Kristiyano. Ang Simbahan ay hindi titigil o magsasawa sa pagbibigay ng halaga sa Mabuting Balitang ito, kahit ilang ulit itong napakinggan ng bawat Kristiyano sa paglipas ng panahon. Paulit-ulit na itinuturo ng Mabuting Balita kung paanong ipinamalas ng Mabuting Pastol na si Kristo Hesus sa pamamagitan ng Kanyang krus at Muling Pagkabuhay ang Kanyang pag-ibig at pagkalinga sa Kanyang kawan. Iyan ang ating sinasampalatayanan nang buong puso bilang mga Kristiyano. Iyan ang dahilan kung bakit ang bawat isa sa atin ay may pananampalataya sa Kanya bilang isang Simbahan. Ang Mabuting Pastol na si Hesus ay tunay na umiibig at kumakalinga sa atin. Pinatunayan Niya ito sa pamamagitan ng Kanyang krus at Muling Pagkabuhay. 

Mayroon tayong Mabuting Pastol na tunay na umiibig at kumakalinga sa ating lahat. Siya'y walang iba kundi ang Panginoong Hesus na Muling Nabuhay. Makinig at sumunod sa Kanya na tunay na umaaruga at nagmamahal sa atin. Pakinggan natin ang Kanyang tinig. Wala Siyang masamang balak laban sa atin. Siya'y hindi katulad ng ibang mga pastol na walang malasakit para sa Kanyang mga tupa. Ang bawat isa sa atin ay hindi Niya ipapahamak kailanman. Bagkus, tayong lahat ay makakaranas ng tunay na pag-aruga at pagmamahal mula sa Kanya. Ating ibigay sa Kanya ang buong puso nating pagmamahal, pananalig, at pagsamba sa Kanya. Siya, ang ating Panginoon at Diyos, ang tunay na umaaruga at nagmamahal sa bawat isa sa atin. Kapag ating pinakinggan at sinundan ang Kanyang tinig, ang ating mga puso't loobin ay mapapanatag dahil matitiyak natin na tayong lahat ay Kanyang iibigin at kakalingain. At ang Kanyang pag-ibig at pagkalinga ay tunay. 

MGA SAKSING PUSPOS NG GALAK AT PAG-IBIG

5 Mayo 2019 

Ikatlong Linggo ng Pasko ng Muling Pagkabuhay (K) 

Mga Gawa 5, 27b-32. 40b-41/Salmo 29/Pahayag 5, 11-14/Juan 21, 1-19 (o kaya: 21, 1-14) 

Galak at pag-ibig ang hatid ng Panginoong Hesus na Muling Pagkabuhay. Ito ang paksang binibigyan ng pansin sa mga Pagbasa. Katunayan, ang paksang ito'y paulit-ulit na tinatalakay at pinagninilayan ng Simbahan sa buong kapanahunan ng Pasko ng Muling Pagkabuhay na isang panahong inilalaan upang magdiwang nang buong kagalakan. At ang dahilan ng masaya nating pagdiriwang sa panahong ito ay walang iba kundi ang Muling Pagkabuhay ng Panginoong Hesukristo. 

May dalawang bahagi ang Ebanghelyo. Sa unang bahagi ng Ebanghelyo, nagpakita ang Panginoong Hesus na Muling Nabuhay sa mga apostol sa Lawa ng Galilea. Sa tulong ni Hesus, nakahuli ng maraming isda ang mga apostol. Iyon ang nagpamulat sa kanilang mga mata na ang nagturo sa kanila kung saan ihahagis ang lambat upang magkaroon ng huli ay walang iba kundi ang Panginoong Muling Nabuhay. Si Kristo lamang ang nakakagawa niyon. Ginawa Niya iyon dati noong una nila Siyang nakilala. Tinulungan ni Kristo ang mga apostol, lalung-lalo na sina Apostol San Pedro, San Andres, Santo Santiago, at San Juan, na makahuli ng maraming isda bago sila tawagin upang maging Kanyang mga alagad. At nang muling mabuhay, inulit Niya ito upang Siya'y makilala ng mga apostol. At nang makilala Siya ng mga apostol, si Apostol San Juan ang unang nakakilala sa Kanya sa grupong iyon, silang lahat ay napuspos ng galak. Iyan ang dahilan kung bakit si Apostol San Pedro ay tumalon mula sa bangka at lumangoy pabalik sa pampang kung saan si Hesus ay natagpuan nilang naghahanda ng almusal. Iyan ang unang kaloob ng Panginoong Hesukristong Muling Nabuhay sa mga apostol - galak. 

Sa ikalawang bahagi ng Ebanghelyo, tatlong ulit na tinanong ng Panginoong Hesus na Muling Nabuhay si Apostol San Pedro kung Siya ba'y iniibig niya matapos mag-almusal. Labis na nasaktan si Apostol San Pedro dahil sa tatlong ulit na pagtatanong ng Kristo kung Siya ba'y tunay niyang iniibig. Subalit, kahit labis siyang nasaktan, naramdaman pa rin ni Apostol San Pedro ang pag-ibig hatid ni Kristong Muling Nabuhay. Ang pag-ibig na humihilom at muling bumubuo sa mga labis na nasaktan. Sa pamamagitan nito, ipinakita't ipinadama ng Kristong Muling Nabuhay ang Kanyang pag-ibig. Si Apostol San Pedro ay tatlong ulit na tinanong ni Hesus tungkol sa kanyang pag-ibig para sa Kanya at tatlong ulit ring inutusang pakainin ang Kanyang mga tupa upang maranasan ang Kanyang paghihilom. Ganyan magmahal ang Panginoong Hesus na Muling Nabuhay. Ang lahat ng mga nasaktan ay binibigyan Niya ng pagkakataong maghilom at maging buo muli. Siya ang naghihilom at bumubuo muli sa mga labis na nasaktan. 

Kaya, ang mga apostol ay sumaksi sa Panginoong Muling Nabuhay taglay ang galak at pag-ibig na Kanyang kaloob. Buong sigla nilang ipinangaral ang Mabuting Balita tungkol sa Panginoong Hesukristo sa iba't ibang bahagi ng daigdig. Sa kabila ng lahat ng mga banta laban sa kanila, hindi sila tumigil sa pagpapatotoo tungkol kay Hesus. Tulad na lamang ng nasasaad sa Unang Pagbasa. Kahit na mahigpit silang ipinagbawal ng Sanedrin na mangaral tungkol sa Panginoong Hesus, ipinagpatuloy pa rin nila ang pangangaral tungkol sa Kanya. Katunayan, napahiya pa nga ang Sanedrin sa sagot ng mga apostol. Dahil napahiya ang buong Sanedrin, ipinasiya nilang palayain na lamang ang mga apostol. At ang mga apostol ay napuspos ng galak sa kanilang pag-alis dahil sa pagtulong ng Diyos. Tinulungan sila ng Diyos na harapin ang mga may masasamang balak laban sa kanila. Tinulungan Niya silang sagutin ang mga may masasamang balak laban sa kanila tulad ng Sanedrin. Dahil diyan, naipagpatuloy nila ang kanilang pagpapatotoo sa Panginoong Hesukristong Muling Nabuhay sa iba't ibang panig ng daigdig hanggang sa huli. 

Ito rin ang pinagtuunan ng pansin sa Ikalawang Pagbasa. Kahit na siya'y namuhay bilang isang taong desterado sa isla ng Patmos, hindi tumigil si San Juan sa pagpapatotoo tungkol sa Panginoong Hesus na Muling Nabuhay. Patuloy niya itong ginawa sa pamamagitan ng pagsusulat. At sa isla ng Patmos, nakatanggap siya ng mga pangitain mula sa Panginoon na isinulat niya sa aklat ng Pahayag. Sa tampok na pangitain sa Ikalawang Pagbasa, nakita ni San Juan kung paanong ang mga anghel at ang iba pang mga nilalang ay nagbigay papuri sa Korderong pinatay. Ang Korderong iyon ay walang iba kundi si Hesus, ang Muling Nabuhay na Panginoon. Siya, ang Panginoong naghahatid ng pag-ibig at galak, ay namatay ngunit muling nabuhay sa ikatlong araw. Sa pamamagitan ng Kanyang kamatayan sa krus at Muling Pagkabuhay, inihayag Niya ang Kanyang pag-ibig sa lahat. Kaya, ang lahat ay nagagalak sapagkat nakamit na Niya ang tagumpay sa pamamagitan ng Kanyang krus at Muling Pagkabuhay ni Hesus. At sa pagkamit ng tagumpay, galak at pag-ibig ang inihatid ng Panginoong Hesukristo sa lahat. 

Ang mga apostol ay sumaksi kay Hesus, ang Kristong Muling Nabuhay, taglay ang hatid Niyang galak at pag-ibig sa kanilang mga puso. Iyan ang dahilan kung bakit patuloy silang nangaral tungkol sa pag-ibig at habag ng Diyos sa pamamagitan ni Kristo Hesus sa iba't ibang bahagi ng daigdig. Sa kabila ng lahat ng mga pag-uusig na kanilang hinarap at dinanas, nanatili silang tapat sa kanilang misyon bilang mga saksi ni Kristo. Hindi naging hadlang ang dami ng mga banta ng mga nakaluklok sa kapangyarihan ng pamahalaan noon. Hindi rin sila tumigil sa pagsaksi kay Hesus dahil sa iba pang mga pagsubok sa buhay. Bagkus, patuloy silang ipinangaral at pinatotohanan ang Mabuting Balita tungkol kay Kristo Hesus na Muling Nabuhay hanggang sa kanilang huling hininga. Sa kasalukuyang panahon, ang Simbahan ang nagpapatuloy ng misyong ibinigay ni Hesus sa mga apostol. Hindi tumigil ang Simbahan sa pagtupad sa misyong ito kailanman. 

Hinahamon tayong lahat na tularan ang mga apostol. Tulad ng mga apostol, maging mga saksi tayo ng Panginoong Hesus na Muling Nabuhay. Tayong lahat ay tinatawag ng Panginoong Hesus upang maging Kanyang mga saksing puspos ng galak at pag-ibig na dulot Niya. Ipalaganap natin ang kaloob Niyang galak at pag-ibig na ating tinanggap sa bawat isa sa pamamagitan ng pagsaksi sa Kanya. 

GAMITIN ANG KAMAY

1 Mayo 2019 

Paggunita kay San Jose, manggagawa 

Genesis 1, 26-2, 3 (o kaya: Colosas 3, 14-15. 17. 23-24)/Salmo 89/Mateo 13, 54-58 

Tulad ng ibang mga bahagi ng katawan, ang mga kamay ay ginagamit para sa iba't ibang tungkulin. Ginagamit ang mga kamay sa pagkuha at pagbuhat ng iba't ibang bagay, lalo na ang mga mabibigat. Ginagamit rin ang mga kamay sa pagluluto, paglilinis, at paglalaba. Sino ba naman ang sumubok na maglinis o magluto gamit ang paa? Ang mga kamay ay may sariling tungkulin, katulad ng ibang bahagi ng katawan. May mga bagay na kung saan mas ginagamit ang kamay kaysa sa ibang mga bahagi ng katawan. Kung tutuusin, sa karamihan ng mga bagay o tungkuling ginagawa natin, mas ginagamit natin ang ating mga kamay.

Ginugunita sa araw na ito si San Jose bilang isang manggagawa. Inaaalala sa araw na ito kung paanong ginamit ni San Jose ang kanyang mga kamay para sa kanyang pamilya. Si San Jose ay nagtrabaho nang buong kasipagan bilang isang karpintero upang gumanda at guminhawa ang buhay ng kanyang pamilya. Naghanap-buhay siya para sa Mahal na Birheng Maria at sa Panginoong Hesukristo. Iyan ang isa sa mga bagay na itinanong ng mga nasa sinagoga sa Nazaret sa Ebanghelyo. Si Hesus ay kilala nila bilang anak ng isang simpleng karpinterong si San Jose at ng Mahal na Birheng Maria. Hindi sila makapaniwalang puno ng karunungan ang anak ng isang simpleng karpintero. Labis silang nagulat nang marinig nila ang Panginoong Hesus na nagtuturo sa sinagoga sa kanilang bayan ng Nazaret. 

May hindi napagtanto ang mga kababayan ni Kristo tungkol sa Kanya. Hindi nila alam na si Kristo ang lumikha sa sanlibutan. Hindi nila alam na si Kristo ay Diyos buhat pa noong una. Bago pa man magsimula ang panahon, si Kristo ay naroon na kasama ang Ama at ang Espiritu Santo. Siya ang Pangalawang Persona ng Banal na Santatlo. Naroon na Siya noong nilikha ang tao, tulad ng pinagtuunan ng pansin sa Unang Pagbasa. Si Kristo ay hindi lamang isang payak na taong namuhay sa bayan ng Nazaret; Siya rin ang Diyos. Siya ang Diyos na bumaba mula sa langit at naging tao katulad natin, maliban sa kasalanan, upang tayo'y iligtas sa pamamagitan ng Kanyang krus at Muling Pagkabuhay. Ang pagligtas ng Diyos sa sangkatauhan sa pamamagitan ng krus at Muling Pagkabuhay ni Hesus ang pinakadakila Niyang gawa. Tunay ngang kahanga-hanga ang pagtubos sa atin ng Diyos. 

Habang naghahanap-buhay bilang isang anluwage, laging inaaalala ni San Jose ang lahat ng mga gawa ng Diyos. Hindi niya nakalimutan kahit kailan ang lahat ng mga kahanga-hangang bagay na ginawa ng Diyos. Hindi rin niya inalis mula sa kanyang puso't isipan na ang Diyos ang pinakadakila sa lahat ng mga manggagawa. Bagkus, lagi niyang ipinapaalala ang kanyang sarili na hinding-hindi niya mapapantayan o mahihigitan ang mga gawa ng Diyos. Buong kasipagan siyang maghahanap-buhay bilang isang karpintero para kina Maria at Hesus, subalit hindi siya makikipag-kompetensya laban sa Diyos. Bagkus, laging niyang pupurihin ang Panginoong Diyos at susundin ang anumang loobin Niya. 

Katulad ni San Jose Manggagawa, maghanap-buhay tayo nang buong kasipagan. Gamitin natin ang ating mga kamay upang gumawa ng mabuti para sa kapwa at para sa ating pamilya. Subalit, tulad rin ni San Jose Manggagawa, huwag nating iisiping mahihigitan o mapapantayan ng ating mga gawa ang mga gawa ng Diyos. Lagi nating tandaan na ang mga gawa ng Diyos ay higit na dakila kaysa sa anumang gawin natin. Hinding-hindi mapapantayan o mahihigitan ang Kanyang mga gawa. Huwag tayong mag-ambisyong makipag-kompetensya sa Diyos. Bagkus, ibigay ang nararapat sa Diyos. Purihin, sambahin, at ibigin natin Siya nang buong puso, nang buong kaluluwa, at nang buong isipan. 

Gamitin natin ang ating mga kamay sa paggawa ng mabuti para sa kapwa, pamilya, at sarili, tulad ni San Jose. Gamitin rin natin ang ating mga kamay sa pagbibigay ng papuri, pagsamba, at pasasalamat sa Diyos, tulad ni San Jose. 

MGA SUGAT NG PANGINOONG HESUS NA MULING NABUHAY: PAALALA NG KANYANG MABATHALANG AWA

28 Abril 2019 

Ikalawang Linggo ng Pasko ng Muling Pagkabuhay (K)

Linggo ng Banal na Awa 

Mga Gawa 5, 12-16/Salmo 117/Pahayag 1, 9-11a. 12-13. 17-19/Juan 20, 19-31 

Ang mga sugat ng Panginoong Hesus na Muling Nabuhay ang sentro ng atensyon sa tampok na salaysay sa Ebanghelyo. Sa Kanyang unang pagpapakita sa mga alagad, ipinakita ni Hesus ang mga bahagi ng Kanyang Katawan na nasugatan noong Siya'y mamatay. Si Hesus ay nagtamo ng mga sugat sa Kanyang mga kamay at paa dahil sa mga pako samantalang ang sugat sa Kanyang tagiliran ay galing sa sibat ng isang kawal. Siya'y inulos ng nasabing kawal sa Kanyang tagiliran upang tiyaking Siya'y patay na sa mga sandaling iyon. At nang magpakita sa mga apostol matapos Siyang mabuhay na mag-uli, ipinakita ni Hesus ang mga sugat sa bahaging iyon. Ginawa uli ito ni Hesus para kay Apostol Santo Tomas sa ikalawang bahagi ng Ebanghelyo. Sa pamamagitan ng pagpapakita ng mga sugat na ito, pinatunayan ni Hesus na tunay nga Siyang nabuhay na mag-uli. 

Kaya naman sinabi ni Apostol Santo Tomas na hindi siya maniniwala sa balitang nabuhay na mag-uli ang Panginoong Hesukristo hangga't nakita niya ang mga sugat sa Kanyang tagiliran at sa Kanyang mga kamay at paa. Ang mga sugat lamang ang tanging makakapagpatunay na si Kristo mismo ang kanilang nakita. Iyan ang patunay na Siya'y tunay ngang nabuhay na mag-uli. Iyan ang patunay na hindi multo ang kanilang nakita kundi ang Panginoong Hesukristo na umibig at bumuo sa kanila. Ang mga sugat ang magpapatunay na ang mga balita tungkol sa Muling Pagkabuhay ng Panginoon ay tunay at hindi kathang-isip lamang. At natupad ang hiling ni Apostol Santo Tomas noong magpakita muli si Kristo. Muling nagpakita si Kristo sa mga apostol para kay Apostol Santo Tomas. 

Hindi lamang sa mga pagkakataong iyon pinatunayan ni Kristo na Siya'y muling nabuhay. Patuloy Niya itong pinapatunayan, kahit Siya'y nasa langit. Halimbawa na lamang ang pinagtuunan ng pansin sa Unang Pagbasa. Patuloy na kumilos si Hesus sa pamamagitan ng mga apostol. Sa pamamagitan ng Kanyang mga instrumento, ang mga apostol, si Hesus ay gumawa ng maraming mga kahanga-hangang bagay. Gumaling ang maraming maysakit na lumapit sa mga alagad sa pamamagitan ng kapangyarihan ng Panginoong Hesukristong Muling Nabuhay. 

Sa Ikalawang Pagbasa, inihayag ni Hesus sa pangitain ni Apostol San Juan na nasa bayan ng Patmos na Siya'y namatay ngunit muling nabuhay at mananatiling buhay magpakailanman (1, 18). Tunay ngang nabuhay na mag-uli ang Panginoon. Hindi ito pekeng balita, hindi ito kasinungalingan. Iyan ang totoo, iyan ay tunay na balita. At iyan ang Magandang Balita na ating sinasampalatayanan bilang mga Kristiyano. Patuloy na ipinapangaral at ipinapalaganap ng Simbahan ang Mabuting Balitang ito hanggang sa kasalukuyang panahon upang ang lahat ay manalig at sumampalataya kay Kristong Muling Nabuhay. 

Iyan ang nais iparating ng mga Pagbasa, lalung-lalo na ng Ebanghelyo. Muling nabuhay ang Panginoong Hesukristo. Ang Panginoong Hesus na puspos ng awa at pag-ibig ay tunay ngang nabuhay na mag-uli at patuloy na nabubuhay. Ang mga sugat na Kanyang tinamo sa Kanyang pagpapakasakit ang katibayan na tunay ang Kanyang Muling Pagkabuhay. Ang nakita ng mga apostoles sa silid ay hindi isang multo kundi ang Panginoong Muling Nabuhay na Siyang bukal ng awa at pag-ibig. At ang Kanyang awa at pag-ibig ay tunay na dakila at walang kapantay. 

Nagpakita rin ang Panginoong Hesukristo kay Santa Maria Faustina Kowalska, ang apostol ng Banal na Awa, upang ihayag sa kanya ang misteryo ng Kanyang awa. Ang lahat ng mga sinabi ni Hesus tungkol sa Kanyang Banal na Awa ay isinulat ni Santa Faustina sa kanyang talaarawan upang sumampalataya ang lahat ng makakabasa nito sa Banal na Awa. Ang Panginoong Hesus na Muling Nabuhay ay nagpakita kay Santa Faustina, tulad ng Kanyang pagpapakita sa mga apostol matapos mabuhay na mag-uli, upang ang lahat ay manalig at sumampalataya sa Kanyang Mabathalang Awa. Ang Mabathalang Awa ay ipinamalas ni Hesus sa pamamagitan ng Kanyang krus at Muling Pagkabuhay. 

Tumingin tayo sa mga sugat ng Panginoong Hesus na Muling Nabuhay. Ang mga sugat na nagpapaalala sa atin ng Kanyang Mabathalang Awa. Dahil sa Kanyang Banal na Awa, nakamit Niya ang kaligtasan para sa ating lahat sa pamamagitan ng Kanyang krus at Muling Pagkabuhay.