ANG PARAANG PINILI NG DIYOS

17 Disyembre 2019 

Simbang Gabi/Misa de Gallo - Ikalawang Araw 

Genesis 49, 2. 8-10/Salmo 71/Mateo 1, 1-17 

Sa Ebanghelyo, inilahad ang mga ninuno ng Panginoong Hesukristo. Mahaba man ito, iisa lamang ang nais ilarawan ni San Mateo sa paglalahad ng talaan ng angkan ni Hesus sa unang kabanata ng kanyang Ebanghelyo. Sa pamamagitan ni Hesus, ang Diyos ay naging tao katulad nating lahat, maliban sa kasalanan. Ang Diyos ay hindi nagpakita agad-agad, kahit ito ang pinakamadaling gawin. Bagkus, pinili ng Diyos na magmula sa isang pamilya. Kahit na mas madali para sa Panginoon na magpakita na lamang agad-agad, pinili Niyang maging bahagi ng isang angkan. 

Isa sa mga naging ninuno ni Kristo ay si Jacob. Si Jacob ang binigyan ng pansin sa salaysay ng Unang Pagbasa. Sa Unang Pagbasa, si Jacob ay nakitang nakikipag-usap sa kanyang mga anak tungkol sa magiging lahi nila. Subalit, ang lahi ni Juda ay mas pinagtuunan ng pansin sa tampok na salaysay. Kapansin-pansin rin kung paanong si Juda ay nasa mahabang listahan ng mga ninuno ni Kristo Hesus sa Ebanghelyo. Bagamat nagkaroon ng maraming anak si Jacob, sa angkan ni Juda nagmula ang ipinangakong Mesiyas at Manunubos na si Hesus. 

Nakakapagtaka kung bakit pinili ng Panginoon na mapabilang sa angkan ng mga sumasamba sa Kanya. Katunayan, ipinakilala Niya ang Kanyang sarili kay Moises bilang Diyos nina Abraham, Isaac, at Jacob (Exodo 3, 6). Hindi kaila na higit Siyang dakila kaysa sa lahat ng mga taong naging ninuno ni Kristo. Kung tutuusin, walang makakapantay sa Kanya kailanman. Pero, bakit pinili ng Diyos na mapabilang sa kanilang angkan sa pamamagitan ng Kanyang Bugtong na Anak na si Hesus? 

Pag-ibig. Pag-ibig ang dahilan kung bakit ipinasiya ng Panginoon na maging isang tao. Si Hesus ay naging isang tao katulad nating lahat, maliban sa kasalanan, dahil sa pag-ibig ng Maykapal. Sa pamamagitan ni Kristo Hesus, ipinakita ng Diyos ang Kanyang pag-ibig para sa lahat. Dahil sa Kanyang pag-ibig para sa lahat, niyakap ng Diyos ang ating pagkatao. Dahil sa pag-ibig ng Diyos, tayong lahat ay Kanyang itinuring na kapamilya. Iyan ang ating Diyos. 

Bagamat may iba pang paraan ang Diyos upang iligtas ang sangkatauhan, pinili pa rin Niyang maging isang tao katulad natin, maliban sa kasalanan. Nais ng Diyos na malaman natin na tayong lahat ay Kanyang mga kapamilya. Ipinapadama Niya sa atin sa pamamagitan ng kahanga-hangang gawang ito ang Kanyang pag-ibig at kalinga para sa ating lahat. 

MALAPIT NA

16 Disyembre 2019 

Simbang Gabi/Misa de Gallo - Unang Araw 

Isaias 56, 1-3a. 6-8/Salmo 66/Juan 5, 33-36 

(Courtesy: ABS-CBN News)

Simbang Gabi. Siyam na araw. Sa huling siyam na araw ng panahon ng Adbiyento, buong galak na naghahanda ang bawat Pilipinong Katoliko para sa pagdiriwang ng Pasko ng Pagsilang ng Panginoon sa pamamagitan ng Simbang Gabi. Habang hinahanda natin ang ating mga sarili sa loob ng siyam na araw, sinasamahan natin ang Mahal na Inang si Maria. Ang Mahal na Birheng Maria ay ang ating kasama sa loob ng siyam na araw ng paghahanda para sa pagsilang ni Hesus. Buong galak tayong naghahanda at naghihintay para sa pagsilang ng Panginoong Hesukristo kasama ang ating Inang si Maria. 

Malapit na talaga ang Pasko. Siyam na araw lamang ang natitira bago sumapit ang araw ng Kapaskuhan na matagal na nating pinaghandaan. Nalalapit na talaga ang pagdiriwang ng kaarawan ni Kristo. Malapit nang sumapit ang araw ng pagsilang ni Hesukristo. Kaya, ilaan natin ang siyam na araw ng Simbang Gabi sa paghahanda ng ating mga sarili para sa pagdiriwang ng kaarawan ng Panginoong Hesukristo. 

Sa Ebanghelyo, nagsalita si Hesus tungkol kay San Juan Bautista. Inilarawan Niya ang misyon ni San Juan Bautista. Si San Juan Bautista ay nagpatotoo tungkol sa liwanag na si Hesus. Siya ang unang lumitaw upang ipaalala sa lahat ng tao na nalalapit na ang pagdating ng ipinangakong Mesiyas. Ang ipinangaral ni San Juan Bautista sa ilang ay katulad ng inihayag ng Panginoong Diyos sa pamamagitan ni propeta Isaias sa Unang Pagbasa kung saan inihayag Niyang hindi na magluluwat o magtatagal pa ang Kanyang pagdating bilang Tagapagligtas (56, 2). Ito'y laging inihayag ni San Juan Bautista sa ilang. Malapit nang dumating ang Panginoon. Ang Mesiyas ay darating na kasunod niya. 

Ang Simbang Gabi ay hudyat na malapit na ang Pasko. Ang siyam na araw na ito'y nagsisilbing hudyat na malapit na nating ipagdiwang ang pagsilang ng Panginoong Hesus. Siyam na araw na lamang ang natitira bago sumapit ang Pasko. Sino nga ba ang hindi matutuwa sa balitang iyan? Wala. Tayong lahat ay natutuwa dahil ang pagdiriwang ng pagsilang ng Manunubos na si Hesus ay sasapit na sa ilang araw. 

Habang palapit na ang Pasko, hindi lang mga Noche Buena o mga regalo ang dapat nating pinaghahandaan. Bagkus, kailangan nating paghandaan nang mabuti ang ating mga sarili. Ilaan natin ang siyam na araw na ito sa paghahanda ng mga sarili natin para sa pagdiriwang ng pagsilang ng Panginoon. 

PANANABIK NANG MAY KAGALAKAN

15 Disyembre 2019 

Ikatlong Linggo sa Panahon ng Pagdating ng Panginoon (A) 

Isaias 35, 1-6a. 10/Salmo 145/Santiago 5, 7-10/Mateo 11, 2-11 

Sabi ni Apostol Santo Santiago sa Ikalawang Pagbasa: "Tibayan ninyo ang inyong loob, sapagkat nalalapit na ang pagdating ng Panginoon" (5, 8). Angkop na angkop ang mga katagang ito sa temang pinagtutuunan ng pansin ng Simbahan ngayong Ikatlong Linggo ng Adbiyento. Katunayan, matatagpuan natin sa mga mismong katagang ito ni Apostol Santiago sa Ikalawang Pagbasa ang dahilan kung bakit dapat tayong maging masaya. Malapit nang dumating ang Panginoon. Tutuparin na rin ng Panginoon ang Kanyang pangako. Malapit na talaga ito mangyari. 

Inilarawan sa Unang Pagbasa kung ano ang gagawin ng Panginoon sa Kanyang pagdating. Ililigtas Niya ang lahat ng mga pinanghihinaan ng loob mula sa kanilang mga kaaway at pagagalingin ang lahat ng mga may karamdaman at kapansanan. Sino ang hindi matutuwa at magagalak sa balitang ito? Sino ang hindi matutuwa kapag ginawa ng Panginoon ang mga ito? Marami ang matutuwa sa mga gawaing ito ng Panginoon. Ang Panginoon ay nagbibigay ng tuwa at galak sa lahat sa pamamagitan ng mga gawaing ito na nagpapakita ng Kanyang pag-ibig para sa lahat. Kaya naman, dapat tayong maging maligaya habang pinaghahandaan at hinihintay natin ang pagdating ng Panginoon. Hindi tayo dapat mapuspos ng takot o lungkot. Bagkus, dapat tayong mapuspos ng tuwa dahil malapit nang dumating ang Panginoon upang ipakita ang Kanyang pag-ibig at kagandahang-loob. 

Sa unang bahagi ng Ebanghelyo, inilarawan ni Hesus sa mga alagad ni San Juan Bautista ang Kanyang mga gawa. Ang Kanyang mga gawa ang nagpapatunay sa Kanyang identidad. Ipinakilala ng Panginoong Hesukristo ang Kanyang sarili sa pamamagitan ng Kanyang mga gawa. Sa ikalawang bahagi ng Ebanghelyo, ang misyon ni San Juan Bautista ay tinalakay ni Hesus. Si Hesus ay nagsalita ukol sa tungkulin ni San Juan Bautista bilang tagapaghanda ng daan ng Panginoon. Si San Juan Bautista ay nanatiling tapat sa misyong ibinigay sa kanya. Kahit ilang ulit na inakala ng mga tao na siya ang Mesiyas na pinananabikan ng lahat, hindi siya nagpadala sa maling akala ng mga tao tungkol sa kanya. Bagkus, patuloy niyang tinulungan ang mga tao na ihanda ang kanilang mga sarili para sa pagdating ng ipinangakong Mesiyas na walang iba kundi si Hesus. At ang hatid ni Hesus sa lahat ay kagalakan at kapayapaan. Hindi Siya naparito upang maghatid ng lungkot o lagim. Bagkus, naparito Siya upang maghatid ng kagalakan at kapayapaan. 

Ang Panginoong Hesus ay hindi naghahatid ng lagim at lungkot sa lahat. Bagkus, kagalakan, kapayapaan, at pag-asa ang Kanyang kaloob. Hindi tayo tatakutin ni Hesus. Tayong lahat ay bibigyan Niya ng pag-asa, kagalakan, at kapayapaan. Kaya naman, nararapat lamang na mapuspos ng kagalakan ang ating paghahanda at pananabik para sa Kanyang pagdating. Sa pagdating ng Panginoong Hesus, atin Siyang salubungin nang may tuwa't galak. 

Malapit nang magwakas ang panahon ng Adbiyento. Malapit nang magtapos ang panahong inilaan sa paghahanda para sa pagdating ni Kristo. Kaunti na lamang at sasapit na ang Kapaskuhan. Sa mga natitirang araw ng panahong ito, mapuspos nawa tayo ng galak. Malapit nang dumating ang ating Tagapagligtas. 

PANANALIG SA KALOOBAN NG DIYOS

12 Disyembre 2019 

Paggunita sa Mahal na Birhen ng Guadalupe 

Zacarias 2, 14-17/Judith 13/Lucas 1, 39-47 

Isang pangako ang binitiwan ng Panginoon sa pamamagitan ni propeta Zacarias sa pambungad ng Unang Pagbasa. Ipinangako ng Diyos sa bayan ng Sion na Siya'y magiging kapiling nila (2, 14). Ang pangakong ito na ang Panginoong Diyos mismo ang naghayag ay isang tunay na magandang balita. Tuwa at saya ang inihatid ng Diyos sa pamamagitan ng pagbitiw ng pangakong ito. Ang pagtupad ng Panginoon sa pangakong ito ay lubos na inaaasam-asam ng Kanyang mga pinangakuan nang buong tuwa't galak. Hinihintay nila ang katuparan ng pangakong ito. 

Hindi kinalimutan ng Diyos ang pangako Niyang ito. Ang pangakong ito ay tinupad ng Diyos pagdating ng takdang panahon. Nang sumapit ang takdang panahong yaon, ang Diyos ay nagkatawang-tao sa pamamagitan ng Panginoong Hesukristo, ang Kanyang Bugtong na Anak. Bago Siya lumitaw sa daigdig, Siya'y nanahan sa sinapupunan ng Mahal na Birheng Maria. Hinirang ng Diyos ang Mahal na Birheng Maria upang dalhin sa kanyang sinapupunan ang Panginoong Hesus. Dumating sa daigdig si Kristo sa pamamagitan ni Maria. Hindi Siya nagpakita agad-agad bilang isang ganap na tao na walang pamilya, kahit na maaari Niya iyon gawin. Bagkus, pinili Niyang magkatawang-tao katulad natin, maliban sa kasalanan. 

Sa Ebanghelyo, isinalaysay ang pagdalaw ng Mahal na Birheng Maria sa kanyang kamag-anak na si Elisabet. Parehas na nagdadalantao ang dalawang babaeng ito noong panahong yaon. Si Maria ang nagdala sa ipinangakong Mesiyas na si Hesus habang si Elisabet naman ang nagdala kay San Juan Bautista. Sa kalagitnaan ng tampok na salaysay, pinuri ni Elisabet si Maria dahil pinili niyang manalig sa Diyos. Ang Mahal na Birheng Maria ay nanalig na matutupad ang kalooban ng Diyos. Ang pangakong binitiwan ng Diyos nang paulit-ulit sa Lumang Tipan ay pinanaligan ni Maria. Katunayan, may papel pa nga si Maria sa planong ito ng Diyos para sa lahat. Tinanggap ni Maria ang papel o misyon na inalok sa kanya ng Diyos nang buong pusong pananalig at pagtalima. 

Ang ating Inang si Maria, ang Mahal na Birhen ng Guadalupe, ay nanalig na ang kalooban ng Panginoon ay matutupad. Kahit hindi niya naintindihan kung paano ito matutupad, pinili pa rin ni Maria na manalig sa Diyos. Nanalig ang Mahal na Ina na hindi nambibigo ang Diyos. Tutuparin Niya ang Kanyang kalooban. At ang plano ng Diyos ay magdudulot ng kabutihan para sa lahat. 

Tulad ng ating Mahal na Inang si Maria, manalig tayo sa Diyos. Manalig tayo na matutupad ang Kanyang plano. Tanggapin natin ang Kanyang kalooban. Tumalima lamang tayo sa Kanya. Higit na maganda at mabuti ang idudulot ng plano ng Diyos para sa lahat. 

ANG PRESENSYA NG DIYOS

10 Disyembre 2019 

Kapistahan ng Pagtatalaga ng Dambana ng Katedral ng Maynila 

(Ang mga piling Pagbasa ay mula sa pangkat ng mga Pagbasa para sa Taunang Paggunita sa Pagtatalaga ng Bahay Dalaginan) 

Ezekiel 43, 1-2. 4-7a/Salmo 83/Efeso 2, 19-22/Lucas 19, 1-10 

Ang gusali ng isang Simbahan o bahay-dalanginan ay sagrado. Sa banal na lugar na ito, ang Diyos ay nananahan. Bagamat ang Diyos ay kasama natin sa lahat ng oras at sa lahat ng lugar, hindi natin maipagkakaila na ang Kanyang presensya ay mas nararamdaman natin sa loob ng gusali ng Simbahan. Oo, kasama natin ang Diyos saan man tayo pumunta. Kasama natin ang Diyos kapag pumupunta ang bawat isa sa Divisoria o 'di kaya sa EDSA. Subalit, aminin natin, mas nahihirapan tayong makinig sa tinig ng Diyos at maramdaman ang Kanyang presensya sa mga lugar na iyon. Kapag tayo ay nasa loob ng isang Simbahan, panatag ang ating puso't kalooban dahil mas nararamdaman natin ang presensya ng Diyos. 

Sa Unang Pagbasa, inilahad ni propeta Ezekiel ang kanyang mga nakita sa isang pangitain. Sa pangitaing iyon, nakita ni propeta Ezekiel ang kaningningan ng Diyos na pumupuspos sa Templo. Sa Templo, nananahan ang Panginoong Diyos. Ang Kanyang presensya ang nagpapabanal sa lugar kung saan Siya nananahan. Kaya, ang isang bahay-dalanginan ay isang banal at sagradong lugar. Sa isang bahay-dalanginan, nananahan ang Diyos. Ang presensya ng Diyos ang nagpapabanal sa bahay-dalanginan. Iyan ang dahilan kung bakit mayroong mga bahay-dalanginan. 

Inihayag naman ni Apostol San Pablo sa Ikalawang Pagbasa na tayong lahat ay bahagi ng Templo ng Diyos. Tayo ang Simbahan. Ang bawat isa ang bumubuo sa Simbahang itinatag ni Kristo. Kaya naman, nararapat lamang na pahalagahan natin ang buhay ng bawat isa sapagkat bahagi rin sila ng Simbahan. Kung paano nating pinapahalagahan ang mga gusaling Simbahan dahil ang Panginoon ang Siyang nananahan doon, pahalagahan rin natin ang bawat isa. Gayon din ang dapat nating gawin sa ating mga sarili. Sabi ni Apostol San Pablo na ang bawat isa sa atin ay templo ng Diyos at pananahan ng Espiritu Santo (3, 16). Kaya naman, marapat lamang na ingatan at pahalagahan ang buhay ng lahat. 

Sa Ebanghelyo, habang nasa bahay ni Zaqueo, inihayag ng Panginoong Hesus na ang awa ng Diyos ay dumating sa nasabing lugar. Si Zaqueo ay tumalikod mula sa kanyang makasalanang pamumuhay dahil sa pagliligtas ng Diyos. Ang presensya ng Diyos ay naghatid ng kaligtasan kay Zaqueo. Ang buhay ni Zaqueo ay nagbago dahil sa awa ng Diyos na ipinadama sa kanya ni Hesus. Dahil siya'y pinakitaan ng habag at awa, si Zaqueo ay nagbagong-buhay. 

Ang Simbahan ay sagrado dahil ito ang tahanan ng Panginoon. Kaya naman, ang lahat ng mga gusaling Simbahan ay labis nating pinapahalagahan. Kung paano nating pinapahalagahan at iniingatan ang mga gusaling Simbahan, pahalagahan at ingatan rin natin ang ating mga sarili at ang ating kapwa. Ang bawat isa sa atin ay bumubuo sa Simbahan. Ang Diyos ay nananahan sa atin. 

ARAW NG PASASALAMAT SA DIYOS

9 Disyembre 2019 

Dakilang Kapistahan ng Kalinis-linisang Paglilihi sa Mahal na Birheng Maria 

Genesis 3, 9-15. 20/Salmo 97/Efeso 1, 3-6. 11-12/Lucas 1, 26-38 

Isang kahanga-hangang gawa ng Diyos na nagpapakita ng Kanyang awa ay ang Kalinis-linisang Paglilihi sa Mahal na Birheng Maria. Ipinakita ng Panginoong Diyos ang Kanyang awa para sa lahat ng tao sa pamamagitan ng pagsagip kay Maria mula sa bahid ng kasalanan bago pa man siya isilang sa daigdig. Sa sandali ng paglilihi sa kanya sa sinapupunan ng kanyang inang si Santa Ana, siya'y iniligtas ng Diyos. Niloob ng Diyos na si Maria ay iligtas Niya mula sa bahid ng kasalanan bago pa man Siya isilang sa daigdig dahil sa Kanyang awa. Niloob ng Diyos na si Maria ay ipaglihi at isilang na walang bahid ng kasalanan dahil siya'y pinili upang dalhin ang Mesiyas. Si Maria ay hinirang ng Diyos upang maging pananahan ng ipinangakong Mesiyas na si Hesus pagdating ng panahon. 

Pinagnilayan sa Unang Pagbasa at Ebanghelyo ang misteryo ng awa ng Diyos. Sa huling bahagi ng Unang Pagbasa, inihayag ng Diyos ang pangako Niyang pagligtas sa lahat ng tao. Inihayag ng Diyos ang tagumpay ni Kristo Hesus bago pa man ito maganap. Bagamat nagkasala ang tao sa pamamagitan nina Eba at Adan laban sa Diyos, hinangad pa rin Niyang maligtas ang sangkatauhan. Iyan ang dahilan kung bakit si Kristo ay dumating sa lupa. Sa pamamagitan ng Mahal na Birheng Maria na ipinaglihing walang sala, si Kristo ay dumating sa daigdig bilang Tagapagligtas. Sa Ebanghelyo, isinalaysay ang pagbabalita ng Arkanghel na si San Gabriel sa Mahal na Inang si Maria. Sa sandaling iyo'y inihayag ni Maria ang kanyang pagtanggap sa kalooban ng Diyos. Tumalima siya sa kalooban ng Diyos. 

Sabi nga ni Apostol San Pablo sa simula ng Ikalawang Pagbasa, "Magpasalamat tayo sa Diyos at Ama ng ating Panginoong Hesukristo!" (1, 3) Nararapat lamang magpasalamat sa Diyos sa lahat ng oras, lalung-lalo na sa espesyal araw na ito sa Kalendaryo ng Simbahan. Ang araw na ito ay araw ng pasasalamat sa Diyos sa biyaya ng Inmaculada Concepcion. Ang Kalinis-linisang Paglilihi sa Mahal na Ina ay isang tunay na biyaya mula sa Panginoon. Sa pamamagitan ng kahanga-hangang gawaing ito, inihanda ang magiging pananahan ni Hesus. Sa loob ng sinapupunan ni Maria, mananahan si Hesus sa loob ng siyam na buwan bago Siya iluwal. 

Ang espesyal na araw na ito ay isang araw ng pasasalamat. Habang buong galak tayong nagpipista sa araw na ito, huwag nating kakalimutan na magpasalamat sa Panginoong Diyos sa biyaya ng Kanyang awa. Iyon naman talaga ang tunay na diwa ng araw na ito. Pasalamatan natin ang Panginoon sa Kanyang pagsagip sa Mahal na Birheng Maria bago pa siya isilang sa daigdig na ito. Sa pamamagitan ng gawaing ito na tunay ngang kahanga-hanga, ipinakita Niya ang Kanyang awa para sa lahat. Iyan ang ating Diyos. 

Mapalad tayong lahat sapagkat ang Diyos ay tunay na maawain sa lahat. Tayong lahat ay Kanyang tinubos sa pamamagitan ng Panginoong Hesukristo na ipinaglihi at iniluwal mula sa sinapupunan ng Mahal na Birheng Maria Inmaculada. 

PAGHANDAAN NATIN NANG MABUTI ANG PAGDATING NG PANGINOON

8 Disyembre 2019 

Ikalawang Linggo sa Panahon ng Pagdating ng Panginoon (B) 

Isaias 11, 1-10/Salmo 71/Roma 15, 4-9/Mateo 3, 1-12 

Muling tinalakay sa mga Pagbasa para sa Ikalawang Linggo ng Adbiyento ang tema ng paghahanda. Kung tutuusin, iyon naman talaga ang temang binibigyan ng pansin ng Simbahan sa kabuuan ng panahon ng Adbiyento. Paghahanda. At iyan ang panawagan ng Simbahan sa bawat isa sa atin sa panahong ito ng Adbiyento na kilala rin bilang Panahon ng Pagdating ng Panginoon. 

Ang pagdating ng Panginoon ang ating pinaghahandaan sa panahong ito. Kaya naman, inilaan ng Simbahan ang panahong ito ng Adbiyento sa paghahanda ng sarili upang maging marapat ang bawat isa na sumalubong ni Kristo sa Kanyang pagdating. Hindi dapat tayong nakatunganga na lamang habang hinihintay natin ang pagdating ng Panginoon. Hindi puwedeng wala tayong gagawin habang tayo'y naghihintay. Bagkus, nararapat lamang na ihanda ang ating mga sarili dahil hindi pangkaraniwan ang darating. At Siya'y walang iba kundi ang Panginoon. 

Hindi natin maipagkakaila na may mga pagkakataon sa buhay natin kung saan ang pagdating ng isang bisita ay hindi nating pinaghandaan nang mabuti. Subalit, hindi dapat maging ganyan ang ating paghanda para sa pagdating ni Kristo. Kailangan nating maghanda nang mabuti para sa Kanyang pagdating. Lagi nating tatandaan sa ating paghahanda na hindi lang sinu-sino ang ating pinaghahandaan. Hindi tayo maaaring maghanda para sa Panginoon na hindi ibinibigay ang lahat. Bagkus, kailangan natin ibuhos ang lahat ng ating sipag at tiyaga sa ating paghahanda upang maging marapat tayong sumalubong sa Kanya sa Kanyang pagdating. 

Sabi sa Unang Pagbasa, isang hari ang lilitaw mula sa lahi ni Jesse na ama ni Haring David. At ang haring iyon ay walang iba kundi ang Panginoon. Bilang hari, ang Panginoon ay hindi mapapantayan o mahihigitan ng mga hari dito sa lupa. Ang kapangyarihan at kadakilaan ni Kristo ay walang kapantay. Sa Ikalawang Pagbasa, inihayag ni Apostol San Pablo na si Kristo ay naparito upang ihayag ang katapatan ng Diyos sa lahat. Inihayag Niya ito sa pamamagitan ng pagtubos Niya sa lahat. Sa Ebanghelyo, ipinakilala ni San Juan Bautista si Hesus sa lahat ng kanyang mga tagapakinig sa Ilog Jordan. Inihayag ni San Juan Bautista na si Hesus ay higit na dakila at makapangyarihan kaysa sa kanya. 

Iyan ay ilan lamang sa mga dahilan kung bakit kailangan nating paghandaan nang mabuti ang pagdating ng Panginoong Hesukristo. Inilarawan sa mga Pagbasa kung paanong si Hesus ay hindi lang kung sinu-sino. Bagkus, Siya ang pinakadakila at ang pinakamakapangyarihan. Kaya, nararapat lamang na ibigay natin ang ating sipag at tiyaga sa ating paghahanda para sa Kanyang pagdating. 

Paano ba tayo makakapaghanda nang mabuti para sa pagdating ni Hesus? Ang tanong na ito ay binigyan ng kasagutan ni San Juan Bautista sa unang bahagi ng Ebanghelyo. Sabi ni San Juan Bautista na dapat pagsisihan at talikdan ng bawat isa ang kanilang mga kasalanan. Iyan ang kailangan nating gawin. Tayong lahat ay dapat magsisi't magbalik-loob sa Diyos. Walang ibang hangad ang Panginoong Hesus kundi ang isang busilak na puso at loobin mula sa atin. Nais Niyang Siya'y ating handugan ng isang busilak na puso at loobin. Iyan ay tunay na kalugud-lugod sa Kanyang paningin. Iyan ang hanap Niya sa atin. 

Darating ang Panginoong Hesukristo. Darating Siya upang manahan sa piling ng bawat isa sa atin. Kaya, paghandaan natin ang ating mga sarili. Linisin natin ang ating mga puso't loobin upang ito'y maging tahanan Niya. Nais Niyang manahan at maghari sa ating mga puso. Paghandaan natin iyon nang mabuti.