GALAK SA KATUPARAN NG PANGAKO

24 Disyembre 2019 

Simbang Gabi/Misa de Gallo - Ikasiyam na Araw 

2 Samuel 7, 1-5. 8b-12. 14a. 16/Salmo 88/Lucas 1, 67-79 

Ang pangako ng Panginoong Diyos kay Haring David ay pinagtuunan ng pansin sa huling bahagi ng Unang Pagbasa. Ang pangakong ito ay unang inihayag ng Diyos kay Propeta Natan. Ang pangako ng Panginoon ay ipaparating naman ni Propeta Natan kay Haring David. Ano naman ang pangako ng Diyos kay Haring David? Isa sa kanyang mga anak ang papalit sa kanya sa kanyang pagkamatay (7, 12). 

Tinupad nga ng Panginoong Diyos ang Kanyang pangako kay Haring David. Ang humalili kay Haring David nang siya'y mamatay ay walang iba kundi ang kanyang anak na si Haring Solomon. Kinalaunan, ang ipinangakong Mesiyas ay nagmula sa kanyang angkan. Ang tunay na Hari na si Kristo ay napabilang sa angkan ni Haring David. Kahit na Siya'y higit na dakila at makapangyarihan kaysa kay Haring David, niloob pa rin ng Diyos maging bahagi ng Kanyang angkan. 

Sa Ebanghelyo, ang ama ni San Juan Bautista na si Zacarias ay umawit tungkol sa kabutihan at katapatan ng Panginoon. Mula sa simula hanggang sa wakas ng awit ng papuri, pinatotohanan ni Zacarias ang kabutihan at katapatan ng Panginoon sa lahat. Siya'y nanatiling tapat sa Kanyang ipinangako. Ang lahat ng Kanyang mga pangako ay Kanyang tinupad. Wala Siyang ipinapangako na hindi Niya tinupad. Ang Diyos ay hindi nakakalimot sa Kanyang mga ipinangako. Ang lahat ng ito ay inaaalala at tinutupad Niya. Iyan ang Panginoon. Ganyan Siya ka-tapat sa Kanyang mga pangako. Hindi Niya binibigo ang Kanyang mga pinangakuan. 

Ipinapakita ng Panginoon sa pamamagitan ng pagtupad sa Kanyang mga pangako ang Kanyang katapatan. Laging tapat ang Diyos. Walang kapantay ang Kanyang katapatan. Kung may mga pagkakataon sa buhay ng bawat isa kung saan tayo'y hindi naging tapat sa ating mga ipinangako, ang Diyos ay laging tapat sa Kanyang mga pangako. Walang sandali kung saan Siya'y nabigo sa pagtupad ng isa sa mga pangako Niya sa sangkatauhan. Lagi Siyang tapat. 

May dahilan tayo para mapuspos ng tuwa at galak. Ang Panginoon ay laging tapat sa Kanyang pangako. Tinutupad Niya ang mga ito upang ipakita sa ating lahat ang Kanyang katapatan. Magalak tayo dahil ang Diyos ay laging matapat. 

MAY MAUUNA SA KANYA

23 Disyembre 2019 

Simbang Gabi/Misa de Gallo - Ikawalong Araw 

Malakias 3, 1-4. 23-24/Salmo 24/Lucas 1, 57-66 

Sabi ng Panginoong Diyos sa pamamagitan ni propeta Malakias sa pambungad ng Unang Pagbasa: "Ipadadala Ko ang Aking sugo upang ihanda ang daraanan Ko." (3, 1) Napakalinaw sa mga salitang ito ang nais ipahiwatig ng Panginoon. Talagang darating Siya. Hindi nagbibiro ang Panginoong Diyos sa tuwing Siya'y nagsasalita tungkol sa Kanyang pagdating. Tutuparin ng Panginoon ang Kanyang pangakong pagdating. Matutuloy ang Kanyang pagdating bilang Tagapagligtas. Kaya nga, may mauuna sa Kanya upang ihanda ang Kanyang daraanan. 

Bago dumating ang Panginoon, may mauuna sa Kanya. Ang tungkulin ng mauuna sa daraanan ng Panginoon ay ihanda ang lahat ng tao para sa Kanyang pagdating. Ipapahayag niya sa lahat ang balita tungkol sa pagdating ng Panginoon. Ihahayag niya sa lahat na nalalapit na ang pagdating ng Panginoon. Siya ang magiging palatandaan para sa lahat na ang Panginoon ay malapit nang dumating bilang Tagapagligtas. Ang panahong inaaasam at pinananabikan ng lahat ay malapit nang maganap. Matutupad na rin ang ipinangako ng Panginoon. 

Ipinakilala sa Ebanghelyo kung sino ang mauuna sa Panginoon upang ihayag ang balita tungkol sa Kanyang pagdating. Siya'y walang iba kundi si San Juan Bautista, ang sanggol na isinilang ni Elisabet sa Ebanghelyo. Siya'y ipinagkaloob ng Diyos kina Zacarias at Elisabet. Sa kabila ng kanilang katandaan, nagkaroon sila ng anak dahil sa awa at kagandahang-loob ng Diyos. 

Katunayan, sa pangalan pa lamang ni San Juan Bautista, malalaman agad kung ano nga ba ang misyong ibinigay sa kanya ng Diyos. Ang kahulugan ng pangalang "Juan" ay "Ang Diyos ay mapagpala." Iyan ang misyon ni San Juan Bautista. Ipahayag niya sa lahat ng tao na ang Diyos ay mapagpala at mabuti. Magsasalita siya sa lahat ng tao tungkol sa awa at kabutihan ng Diyos. Ipapahayag niya sa lahat na malapit nang dumating ang pinakadakilang pagpapalang ipagkakaloob ng Diyos sa lahat - ang ipinangakong Mesiyas at Manunubos na si Hesus. Siya ang maghahanda sa lahat ng tao para sa pagdating ni Kristo. Paano tutulungan ni Juan Bautista ang bawat tao sa paghahanda? Sa pamamagitan ng pangangaral tungkol sa kabutihan at awa ng Diyos. Mananawagan siya sa lahat ng tao na pagsisihan at talikdan ang kanilang mga nagawang kasalanan at magbalik-loob sa Panginoon. Hindi siya titigil sa pagsasalita tungkol sa balitang maghahatid ng tuwa sa buong bayan ng Diyos. Ang balitang maghahatid ng tuwa sa lahat ng tao, ang balita tungkol sa nalalapit na pagdating ng Tagapagligtas, ang lagi niyang ipapangaral at ipapahayag. Iyan ang misyon ni San Juan Bautista. 

Napakahalaga sa kasaysayan ng pagtubos ng Panginoon sa sangkatauhan ang pagsilang ni San Juan Bautista. Ito ay dahil ang kaganapang ito ang maituturing na hudyat o tanda na malapit nang isilang si Kristo. Bago dumating at magpakita si Kristo Hesus, dumating at nagpakita si San Juan Bautista. Siya'y hinirang upang ihanda ang lahat para sa pagdating ni Kristo. 

Tulad ng ginawa ni San Juan Bautista upang ihanda ang lahat para sa pagdating ng ipinangakong Mesiyas at Tagapagligtas na si Hesus, ihanda natin ang ating mga sarili para sa pagdiriwang ng Kapaskuhan. Sulitin natin ang mga natitirang araw sa paghahanda ng ating mga sarili. Sa gayo'y tayong lahat ay magiging marapat na ipagdiwang ang Pasko ng Pagsilang ng Panginoong Hesukristo. 

PINILI NIYANG MAGING BIYAYA

22 Disyembre 2019 

Ikaapat na Linggo sa Panahon ng Pagdating ng Panginoon (A) 

Simbang Gabi/Misa de Gallo - Ikapitong Araw 

Isaias 7, 10-14/Salmo 23/Roma 1, 1-7/Mateo 1, 18-24 

Isang biyaya ang ibinigay ng Diyos noong dumating ang takdang panahon. Ito ang pinagtuunan ng pansin sa mga Pagbasa. Ipinangako ng Panginoon noon pa man na mayroon Siyang inilaaan na biyaya para sa lahat. Tunay ngang napakaespesyal ang biyayang ito na ipinagkaloob ng Diyos. Ang napakaespesyal na biyayang ito'y dumating sa daigdig nang dumating ang takdang panahon. Noong sumapit ang takdang panahon, tinupad ng Diyos ang pangako Niyang ito. 

Ang biyayang ito ay itinampok sa mga Pagbasa. Sa Unang Pagbasa, ibinunyag ng Panginoong Diyos ang palatandaang Siya mismo ang magbibigay. Isang sanggol na lalaki ang ipagkakaloob ng Panginoon sa lahat. At ang sanggol na lalaking ito'y ipaglilihi't ipanganganak ng isang dalaga (7, 14). Magmumula sa isang dalaga ang biyayang ipagkakaloob ng Diyos sa lahat. Isang dalaga ang pipiliin ng Diyos upang maging Kanyang instrumento sa pagkakaloob ng Kanyang biyaya para sa lahat ng tao. Sa pamamagitan ng isang dalaga, ipagkakaloob ng Diyos ang pangako Niyang biyaya para sa lahat. 

Sa Ebanghelyo, isinalaysay ang katuparan ng pangakong ito ng Diyos. Isinalaysay kung paanong tinupad ng Diyos ang Kanyang pangako sa pamamagitan ng Mahal na Birheng Maria. Ang Mahal na Birheng Maria ang dalagang pinili ng Diyos upang iluwal ang Banal na Sanggol na ipinangakong ipagkakaloob Niya sa lahat. Natupad ang propesiya sa aklat ni propeta Isaias tungkol sa pagsilang ng Manunubos sa pamamagitan ng paglihi ng Mahal na Birheng Maria sa Panginoong Hesukristo. Dinala ng Mahal na Birheng Maria sa kanyang sinapupunan sa loob ng siyam na buwan ang Sanggol na ipinagkaloob ng Diyos sa lahat - si Hesus. 

Kaya, sa wakas ng Ebanghelyo, nagbago ang pasiya ni San Jose. Hindi na niya tinuloy ang balak niyang hiwalayan si Maria nang palihim. Bagkus, tinanggap niya ang Mahal na Birheng Maria at si Kristo. Iyon ay dahil sa tulong ng isang anghel ng Panginoon na nagpakita sa kanya sa isang panaginip upang ipaliwanag ang lahat ng iyon sa kanya. Sa tulong ng anghel na nagpakita sa kanya sa isang panaginip, si San Jose ay namulat sa katotohanan tungkol sa kalooban ng Diyos para sa lahat. Buong katahimikan at kababaang-loob niya itong tinanggap at sinunod. 

Nagsalita si Apostol San Pablo tungkol sa pagkakatawang-tao ni Kristo. Napabilang si Kristo Hesus sa isang lipi, ang lipi ni Haring David (1, 3). Kahit na maaari Siyang dumating sa daigdig bilang isa nang ganap na tao nang hindi napapabilang sa isang angkan, pinili pa rin ng Panginoon na ibilang ang Kanyang sarili sa isang lipi. Pinili Niyang dumating sa lupa bilang isang Sanggol na ipinaglihi't iniluwal mula sa sinapupunan ng isang dalaga, ang Mahal na Inang si Maria, tulad ng ipinangako Niya sa Matandang Tipan. Pinili ng Panginoon na tuparin ang pangakong Kanyang binitiwan. Pinili Niyang maging biyaya para sa lahat. 

Habang tayo'y naghahanda para sa Kapaskuhan, huwag nating kakalimutan ang dahilan kung bakit ipinagdiriwang natin ang Solemnidad na ito na walang iba kundi ang Panginoong Hesukristo. Noong unang Pasko, pinili Niyang ibigay ang Kanyang sarili upang maging biyaya para sa lahat ng tao. 

ANG TUNAY NA KAGALAKAN AY NAGMUMULA KAY HESUS

21 Disyembre 2019 

Simbang Gabi/Misa de Gallo - Ikaanim na Araw 

Awit 2, 8-14 (o kaya: Sofonias 3, 14-18a)/Salmo 32/Lucas 1, 39-45 

"Sino ako upang dalawin ng ina ng aking Panginoon? Sapagkat pagkarinig ko ng iyong bati ay naggagalaw sa tuwa ang sanggol sa aking tiyan" (1, 43-44). Ang mga katagang ito ay namutawi mula sa mga labi ni Elisabet sa tampok na salaysay sa Ebanghelyo. Sa mga salitang ito, inilarawan ni Elisabet kung ano ang nangyari noong marinig niya ang tinig ng pagbati ng Mahal na Inang si Maria. Gumalaw sa tuwa ang sanggol na si San Juan Bautista na noo'y nasa sinapupunan ni Elisabet dahil nakilala niya ang Panginoong Hesukristo na dinadala ng Mahal na Birheng Maria sa kanyang sinapupunan. Bagamat hindi pa naipanganak sa mga sandaling yaon, nakilala na ni San Juan Bautista ang Panginoong Hesus. Iyan ang dahilan kung bakit gumalaw sa tuwa ang sanggol na si San Juan Bautista sa sinapupunan ni Elisabet nang dumating ang Mahal na Birheng Maria. Si Hesus na nasa loob ng sinapupunan ng Mahal na Ina ay nakilala ng kanyang kamag-anak na si San Juan Bautista na nasa loob ng sinapupunan ni Elisabet. 

Kung paanong ang minamahal ay nakilala sa pamamagitan ng kanyang tinig, tulad ng nasasaad sa Unang Pagbasa, ang Panginoong Hesus ay nakilala ni San Juan Bautista sa pamamagitan ng Mahal na Ina. At nang marinig ang pagbati ni Maria, ang sanggol na si San Juan Bautista na nasa loob ng sinapupunan ng kanyang inang si Elisabet ay napuspos ng tuwa. Si San Juan Bautista na noo'y nananahan sa sinapupunan ni Elisabet ay napuspos ng tuwa dahil sa presensya ni Kristo, ang Banal na Sanggol na dinadala ng Mahal na Birhen sa kanyang sinapupunan sa mga sandaling yaon. Si Kristo na dinadala ng Mahal na Birheng Maria sa kanyang sinapupunan ang dahilan ng pagsasaya ni San Juan Bautista na dinadala naman ni Elisabet sa kanyang sinapupunan. 

Ang Panginoong Hesukristo ay ipinapakilala sa araw na ito bilang tagapagbigay ng tuwa. Siya lamang ang nagbibigay ng tunay na tuwa at galak sa lahat. Tanging Siya lamang ang may kakayahang magpasaya sa bawat isa. At ang tuwa na Kanyang hatid sa lahat ay hindi tulad ng tuwang matatagpuan dito sa daigdig kung saan ito'y pansamantala lamang. Ang tuwa at galak na kaloob ni Hesus ay walang hanggan. 

Tayong lahat ay tinatanong - sino ang dahilan ng iyong pagsasaya? Sino nga ba ang dahilan ng ating pagsasaya? Marami ang nakakapagpasaya sa atin, lalung-lalo na ngayong papalapit na ang Kapaskuhan. Subalit, huwag nawa nating kalimutan si Hesus. Huwag nating kalimutan na si Hesus ay nagbibigay ng tuwa at galak sa lahat. Huwag nating kalimutan na si Hesus ang bukal ng kagalakan. Huwag nating kalimutan si Hesus. Kung tutuusin, ang tuwa at galak na Kanyang hatid sa atin ay higit pa sa tuwa at galak na bigay ng daigdig. 

Si Hesus, ang Anak ng Diyos at Anak ng Mahal na Birheng Maria, ay ang bukal ng tunay na kagalakan. Sa Kanya nagmumula ang ating tuwa at saya. At ang tuwa at galak na kaloob Niya sa atin ay walang hanggan. 

HUWAG MALIITIN ANG KANYANG PAPEL

20 Disyembre 2019 

Simbang Gabi/Misa de Gallo - Ikalimang Araw

Isaias 7, 10-14/Salmo 23/Lucas 1, 26-38 

Isang dalaga ang ipinapakilala sa atin ng mga Pagbasa para sa araw na ito. Siya'y binigyan ng isang napakalaking papel sa kasaysayan ng daigdig. Ang papel na ito ay hindi pangkaraniwan. Ang papel na ito'y napakaespesyal. Katunayan, ito'y higit pa sa iba pang mga karangalang iginagawad sa daigdig na ito. Higit pa ito sa mga titulong iginagawad sa mga espesyal na tao sa daigdig. Subalit, sa kabila ng mga karangalang kalakip ng papel na ito, hindi maipagkakaila na ito'y mahirap tuparin. 

Mula noong tinanggap ng dalagang ito ang nasabing papel o tungkulin, nag-iba ang kanyang buhay. Hindi na naging katulad ng dati ang kaniyang buhay mula noong tanggapin niya ang papel na iyon. Ang lahat ng bagay ay nag-iba para sa kanya. Oo, namuhay siya nang payak. Subalit, hindi natin maipagkakaila na hindi naging espesyal ang buhay ng dalagang ito. Hindi na ito simple o karaniwan. Bagkus, ang dami niyang pinagdaanan at tiniis. Kalakip iyon ng papel na kanyang ginampanan. 

Ang Mahal na Birheng Maria ang dalagang binibigyan ng pansin sa mga Pagbasa para sa araw na ito. Isinalaysay sa Ebanghelyo ang kanyang pagtanggap sa papel na ibinigay sa kanya ng Diyos. May mga plano na ang Mahal na Birhen sa kanyang buhay. Subalit, pinili niyang isantabi at kalimutan ang lahat ng iyon para lamang sa katuparan ng kalooban ng Panginoon. Pinili ni Maria na tumalima sa kalooban ng Panginoon. Pinili ng Mahal na Birhen na tanggapin ang papel na ibinigay sa kanya ng Diyos. Kahit may mga sarili siyang binabalak sa buhay, pinili pa rin ng Mahal na Ina ang kalooban ng Diyos para sa kanyang buhay. Kahit napakahirap ito kaysa sa mga sariling plano sa buhay, pinili pa rin ng Mahal na Inang si Maria na tumalima sa kalooban ng Diyos. At ano ang kalooban ng Diyos para kay Maria? Niloob ng Diyos na ang Mahal na Birheng Maria ay maging ina ng Panginoong Hesus, ang ipinangakong Mesiyas. Niloob ng Diyos na ang sinapupunan ng Mahal na Birheng Maria ay maging pananahan ng Panginoong Hesus sa loob ng siyam na buwan. Sa pamamagitan ng Mahal na Inang si Maria, natupad ang hula ni propeta Isaias sa Unang Pagbasa tungkol sa pagsilang ng Mesiyas. Ang ipinangakong Manunubos at Mesiyas, na walang iba kundi ang Panginoong Hesukristo, ay ipaglilihi ng isang dalaga. At ang dalagang naglihi't nagluwal kay Kristo ay walang iba kundi si Maria. 

Kaya naman, hindi dapat maliitin ang papel ng Mahal na Birheng Maria. Kung hindi dahil sa kanyang "Oo" sa kalooban ng Diyos, hindi tayo naligtas. Ang pagtalima ng Mahal na Birheng Maria ay nagsilbing daan tungo sa katuparan ng plano ng Diyos na tayo'y tubusin sa pamamagitan ni Hesus. Sa pamamagitan ni Maria, ang Diyos ay dumating sa daigdig bilang Tagapagligtas sa pamamagitan ni Hesus. 

Hindi biro ang papel na ginampanan ng Mahal na Birheng Maria sa kasaysayan ng pagtubos ng Diyos sa daigdig. Hindi ito naging madali para sa kanya. Kaya naman, ang papel na ginampanan ng Mahal na Birheng Maria ay hindi dapat maliitin. Hindi biro ang pagiging ina ni Kristo. Hindi biro ang lahat ng mga pinagdaanan ni Maria matapos niyang tanggapin ang papel na ito. 

Sa araw na ito, itinatampok ang Mahal na Birheng Maria. Pahalagahan nawa natin ang papel na kanyang ginampanan. Kahit napakahirap ito para sa kanya, pinili niyang itong gawin. Isinantabi niya ang kanyang kalooban upang ang kalooban ng Diyos ay matupad. 

ANG AWA NG DIYOS

19 Disyembre 2019 

Simbang Gabi/Misa de Gallo - Ikaapat na Araw 

Mga Hukom 13, 2-7. 24-25a/Salmo 70/Lucas 1, 5-25 

Pinagnilayan ng mga Pagbasa para sa araw na ito ang tema ng awa ng Diyos. Ang mga kaganapang isinalaysay sa mga Pagbasa ay ilang mga sandali sa kasaysayan kung saan ang Diyos ay nagpamalas ng Kanyang awa. Hindi nagsawa ang Diyos sa pagpapamalas ng Kanyang awa sa lahat. Lagi Siyang handang magpakita ng awa sa lahat, lalung-lalo na sa mga dumudulog sa Kanya nang buong kababaang-loob. Walang sandali kung saan ipinagkait ng Diyos ang Kanyang awa. 

Sa Unang Pagbasa, isinalaysay ang pagsilang kay Samson. Ang asawa ni Manoa ang pinili't hinirang ng Diyos upang maging ina ni Samson. Sa kabila ng kanyang katandaan, nanganak ang asawa ni Manoa dahil sa awa ng Diyos. Sa Ebanghelyo, isinalaysay ang pagpapakita ng isang anghel ng Panginoon kay Zacarias sa loob ng templo. Ibinalita ng anghel kay Zacarias na ang kanyang asawang si Elisabet ay maglilihi't manganganak ng isang sanggol na lalaki na nagngangalang Juan. Si San Juan Bautista ang sanggol na lalaki na ipinaglihi't iniluwal ni Elisabet sa kabila ng kanyang katandaan. Paano iyon nangyari? Dahil sa awa ng Diyos. Niloob ng Diyos na si Elisabet ay magdalantao sa kabila ng kanyang katandaan. Ipinakita ng Diyos ang Kanyang awa kay Elisabet sa pamamagitan ng pagkakaloob sa kanya ng isang anak. Ibinigay ng Panginoon si San Juan Bautista kina Elisabet at Zacarias upang maging kanilang anak. 

May awa ang Diyos. Ang Diyos ay puspos ng awa para sa lahat. Ang Kanyang awa ay hindi Niya ipagkakait sa sinumang humihingi nito. Ang asawa ni Manoa at si Elisabet ay ilan lamang sa mga taong pinakitaan Niya ng awa. Kahit na mukhang imposible sa tingin ng tao ang hiningi nila, natupad iyon dahil sa awa ng Diyos. Ang dalawang ito ay nagsisilbing patunay na ang Diyos ay tunay na maawain. 

Ang aral para sa bawat isa - manalig sa awa ng Panginoong Diyos. Huwag nating pagdudahan ang awa ng Panginoon. Tunay ang awa ng Panginoon para sa lahat. Dumulog lamang tayo sa Kanya nang may kababaang-loob. Ipagkakaloob Niya ito sa atin. Hindi ipagkakait ng Diyos ang Kanyang awa sa sinumang humingi nito nang may kababaang-loob. 

MULA SA LAHI NI HARING DAVID

18 Disyembre 2019 

Simbang Gabi/Misa de Gallo - Ikatlong Araw 

Jeremias 23, 5-8/Salmo 71/Mateo 1, 18-24 

Ang mga Pagbasa ay tungkol sa lahi ni Haring David. Sa Unang Pagbasa, inihayag ng Diyos na magmumula sa lahi ni David ang isang hari. Magmumula sa angkan ni Haring David ang haring ipagkakaloob ng Diyos sa Kanyang bayan. Isang hari ang ibibigay ng Diyos sa Kanyang bayan. Iyan ang pangako ng Panginoon sa Kanyang bayan. Magbibigay Siya ng isang hari. At ang haring iyon ay magmumula sa lipi o lahi ni Haring David. 

Ipinangako ng Diyos na ipagkakaloob Niya ang bayang Israel ng isang hari. Isang hari ang magiging regalo ng Diyos. At hindi Niya kinalimutan ang pangakong ito na Kanyang binitiwan sa bayang Israel. Lumipas man ang napakahabang panahon, ang biyayang ipinangako ng Diyos sa Kanyang bayan ay 'di Niya kinalimutan. Ang pangako Niya sa bayang Israel ay hindi Niya binaon sa limot. Laging nasa isipan ng Diyos ang pangakong ito. Tinupad Niya ito sa takdang panahon. 

Sa Ebanghelyo, itinampok ang ama-amahan ni Kristo sa lupa na si San Jose. Ang kanyang panaginip ang pinagtuunan ng pansin sa Ebanghelyo. Isang anghel ang nagpakita sa kanya sa nasabing panaginip. At ang anghel mismo ang nagbigay ng impormasyon tungkol sa liping kinabilangan ni San Jose. Ang mga unang salita ng anghel na nagpakita sa kanya sa panaginip, "Jose, Anak ni David..." (1, 20) Kahit hindi masyadong binibigyan ng pansin ang detalyeng ito, mahalaga ito dahil may ugnayan ito sa pahayag ng Panginoon sa Unang Pagbasa. Magmumula sa lipi o lahi ni Haring David ang isang hari na ibibigay ng Panginoong Diyos sa Kanyang bayan. Sa talatang ito, inilarawan ang katuparan nito. 

Kung tutuusin, hindi lamang iyan ang propesiyang tinupad. Inilahad rin sa tampok na salaysay sa Ebanghelyo ang isa pang propesiya tungkol kay Kristo. Iyon ay isa sa mga propesiya ni propeta Isaias tungkol sa Mesiyas. Ang propesiyang iyon ay tungkol sa pagsilang ng ipinangakong Mesiyas. Ipaglilihi't ipanganganak ng isang dalaga ang ipinangakong Mesiyas. Si Hesus, ang Anak ng Diyos Ama at Anak ni Maria, ang Mesiyas na hinihintay ng bayang Israel. Si San Jose na mula sa lahi o angkan ni Haring David ang tumayong ama-amahan ng Panginoong Hesukristo. 

Mula sa lahi ni Haring David, nagmula ang pinakadakilang biyaya ng Diyos sa lahat ng tao. Ang biyayang ito'y walang iba kundi ang Panginoong Hesus. Si Hesus ang pinakadakilang biyaya ng Diyos. Sa pamamagitan ni Hesus, nagkatawang-tao ang Diyos upang maging biyaya sa lahat. Ibinigay ng Diyos ang Kanyang sarili bilang biyaya para sa lahat. Ganyan tayo ka-mahal ng Diyos.