TINUTULUNGAN NIYA TAYO

17 Abril 2020 

Biyernes sa Walong Araw na Pagdiriwang sa Pasko ng Muling Pagkabuhay 

Mga Gawa 4, 1-12/Salmo 117/Juan 21, 1-14 

Ang Panginoong Hesus na Muling Nabuhay ay nagpakita muli sa mga apostol sa tampok na salaysay sa Ebanghelyo. Ang Kanyang ginawa sa tampok na salaysay sa Ebanghelyo ay napakapamilyar. Tinulungan Niya ang Kanyang mga alagad sa pangingisda. Nakahuli ng maraming isda ang mga alagad sa tulong ng Panginoong Hesus na Muling Nabuhay. Inulit muli ng Muling Nabuhay na si Hesus ang Kanyang ginawa para sa mga alagad bago Niya hinarap ang Kanyang Misteryo Paskwal. 

Iisa lamang ang dahilan kung bakit inulit ni Kristo ang Kanyang ginawa noon para sa mga apostol. Nais patunayan ng Panginoong Muling Nabuhay sa Kanyang mga alagad na Siya nga talaga ang kanilang nakita at nakasama sa silid. Nais Niyang malaman ng mga apostol na tunay nga Siyang muling nabuhay. Nais patunayan ni Kristo ang Kanyang Muling Pagkabuhay sa mga apostol. Kaya naman, muling inulit ni Hesus ang Kanyang ginawa para sa mga alagad noon. Muli Niyang ginawa iyon upang maniwala ang mga apostol. 

Si Hesus na paulit-ulit na nagpakita sa mga apostol matapos na muling nabuhay ang pinatotohanan ni Apostol San Pedro sa harap ng Sanedrin Unang Pagbasa. Kahit na silang dalawa ni Apostol San Juan ay nasa harapan ng Sanedrin sa mga oras na iyon, si Apostol San Pedro na puspos ng Espiritu Santo ay nagsalita nang hayagan tungkol kay Hesus. Si Hesus, na namatay sa krus at muling nabuhay, ang tumulong sa kanya sa pamamagitan ng pagkakaloob ng Espiritu Santo. Gaya ng ipinangako ni Hesus bago Siya mamatay at muling nabuhay, ang Espiritu Santo ay dumating upang patatagin si Apostol San Pedro at ang iba pang mga apostol, lalo na sa mga sandali ng kagipitan. 

Paulit-ulit tayong tinutulungan ni Hesus upang lalo pang lumakas at tumibay ang ating pananalig sa Kanya. Hindi Siya titigil o magsasawa sa pagtulong sa atin. 

DAHILAN NG SIGLA

17 Abril 2020 

Huwebes sa Walong Araw na Pagdiriwang sa Pasko ng Muling Pagkabuhay 

Mga Gawa 3, 11-26/Salmo 8/Lucas 24, 35-48 

Isinalaysay sa Unang Pagbasa ang mga kaganapang sumunod sa pagpapagaling sa lalaking ipinanganak na lumpo. Matapos na pagalingin ang lalaking lumpo mula kapanganakan, si Apostol San Pedro ay nangaral sa mga tao tungkol kay Kristong Muling Nabuhay na patuloy na kumikilos sa pamamagitan ng mga apostol. Siya ay hindi tumitigil sa pagkilos mula sa kalangitan. Tinutulungan Niya ang Kanyang mga apostol sa kanilang ministeryo na maging Kanyang mga saksi sa bawat bahagi ng daigdig. Sa pamamagitan ng pagtulong sa mga apostoles, pinapatunayan Niya na tunay nga Siyang muling nabuhay. Ginagamit ng Panginoong Muling Nabuhay ang Kanyang mga alagad bilang Kanyang mga instrumento sa bawat sulok ng daigdig upang patunayan na totoo nga ang kanilang ipinapangaral. 

Sa Ebanghelyo, ang Panginoong Hesus na Muling Nabuhay ay nagpakita sa mga apostol sa Herusalem. Pinatunayan Niyang Siya'y tunay ngang muling nabuhay sa pamamagitan ng pagpapakita sa kanila. Hindi Siya naghatid ng galit o poot nang magpakita Siya sa kanila. Bagkus, si Hesus ay naghatid ng kapayapaan. Iyan ang Kanyang hatid. Hindi Siya naghiganti sa Kanyang mga apostoles, kahit mayroon naman Siyang karapatang gawin iyon. Bagkus, Siya'y naghatid ng kapayapaan. 

Ang Muling Nabuhay na si Hesus ang pinatotohanan ni Apostol San Pedro nang buong kagitingan sa Unang Pagbasa. Si Kristo Hesus, na namatay sa krus para sa ikapagpapatawad ng mga kasalanan ng sangkatauhan, ay tunay ngang nabuhay na mag-uli. Si Hesus na nagpakita sa kanila matapos Siyang muling mabuhay ay pinatotohanan niya nang buong sigasig sa mga tao. Patuloy na kumikilos si Hesus sa pamamagitan ng mga apostol upang tulungan sila sa misyong ibinigay Niya sa kanila. Iyan ang dahilan kung bakit masigasig ang mga apostoles sa pagtupad sa misyong ibinigay sa kanila ni Hesus. Tinutulungan Niya sila. 

Bilang mga tao, tayong lahat ay nakakaranas ng sigla. Ang tanong para sa atin sa araw na ito - sino o ano ang nagpapasigla sa iyo? 

PATULOY SIYANG NAGHAHATID NG GALAK AT KAPAYAPAAN

15 Abril 2020 

Miyerkules sa Walong Araw na Pagdiriwang ng Pasko ng Muling Pagkabuhay 

Mga Gawa 3, 1-10/Salmo 104/Lucas 24, 13-34 

Tinalakay sa mga Pagbasa ang mga kahanga-hangang gawa ng Panginoon. Sa pamamagitan ng mga gawaing ito, ipinamalas ng Panginoong Muling Nabuhay ang Kanyang kapangyarihang walang kapantay. Ang mga kahanga-hangang gawang ito ay nagsisilbing mga patunay na Siya'y tunay ngang buhay. 

Sa Unang Pagbasa, pinagaling ni Apostol San Pedro ang isang lalaking isinilang na lumpo sa Ngalan ni Kristong Muling Nabuhay. Ang lalaking ito na lumpo mula sa kanyang kapanganakan ay nakalakad dahil kay Kristong Muling Nabuhay. Ang unang Santo Papa ng Simbahan na si Apostol San Pedro ay ginamit lamang bilang instrumento ng Panginoong Hesus na Muling Nabuhay. Ang Panginoong Hesus na Muling Nabuhay ang nagpagaling sa lalaking isinilang na lumpo. 

Isinalaysay sa Ebanghelyo ang pagpapakita ng Panginoon sa dalawang apostol sa daang patungong Emaus. Ipinakilala Niya ang Kanyang sarili sa dalawang apostol na ito sa pamamagitan ng pagtuturo sa kanila tungkol sa mga propesiya tungkol sa Kanya sa Lumang Tipan at sa pamamagitan ng paghahati-hati ng tinapay. Subalit, ang Panginoong Hesukristo ay nakilala na lamang ng mga apostol matapos Niyang hatiin ang tinapay. Doon lamang nilang napagtanto na tunay ngang nabuhay na mag-uli si Kristo. Si Hesus na kanilang pinagluluksa ay muling nabuhay. 

Maraming mga kahanga-hangang bagay na ginagawa ang Panginoon. Hindi Siya titigil sa paggawa ng maraming mga kahanga-hangang bagay. Pinapatunayan ng Panginoon sa pamamagitan ng mga kahanga-gawang gawang ito na Siya'y tunay na buhay at patuloy na naghahatid ng galak sa lahat. Ang Panginoong nag-alay ng buo Niyang sarili sa krus alang-alang sa atin ay tunay ngang nabuhay na mag-uli. Ang Panginoong Hesus ay tunay ngang nabuhay na mag-uli at Siya'y nagpapatuloy sa paghahatid ng galak at kapayapaan sa ating lahat. 

AWA AT PAG-IBIG MULA SA PANGINOONG HESUS NA MULING NABUHAY

14 Abril 2020 

Martes sa Walong Araw na Pagdiriwang ng Pasko ng Muling Pagkabuhay

Mga Gawa 2, 36-41/Salmo 32/Juan 20, 11-18 

Sa Unang Pagbasa, nanawagan si Apostol San Pedro sa lahat ng mga Hudyo na tumalikod sa kasalanan at magpabinyag sa Ngalan ng Panginoong Hesukristo, ang Muling Nabuhay. Ang Panginoong Hesus na namatay sa krus at muling nabuhay sa ikatlong araw ay ibinigay ng Diyos upang maging Manunubos ng lahat ng tao. Ito'y pinatunayan ng Panginoong Hesus sa pamamagitan ng Kanyang pagkamatay sa krus at Muling Pagkabuhay. Siya'y ipinagkaloob ng Diyos sa sangkatauhan. Ang awa at pag-ibig ng Diyos ay nahayag sa lahat sa pamamagitan ng Panginoong Hesukristo. Ito ang pinatotohanan ni Apostol San Pedro at ng mga apostol nang buong sigla. Patuloy itong pinatotohanan ng Simbahan. 

Ipinakita ng Panginoong Hesus na Muling Nabuhay ang awa at pag-ibig na ito kay Santa Maria Magdalena sa Ebanghelyo. Nakita ng Muling Nabuhay na si Hesus si Maria Magdalena na umiiyak nang labis dahil inakala niyang ninakaw ang bangkay ng Panginoon. Ipinakita ni Hesus ang awa at pag-ibig na ito sa pamamagitan ng pagpawi sa mga luha ni Magdalena. Ang mga luha ni Magdalena ay napawi nang tuluyan at pinalitan ng galak dahil kay Kristo. Si Maria Magdalena ay napuspos ng galak nang makita si Kristong Muling Nabuhay na nagpakita ng awa at pag-ibig ng Diyos sa kanya. Iyan ang Muling Nabuhay na si Hesus. 

Patuloy na ipinapakita ng Panginoong Muling Nabuhay sa atin ang Kanyang pag-ibig at awa. Hindi Siya titigil o magsasawa sa pagpapakita nito kailanman. 

TUNAY SIYANG MULING NABUHAY

13 Abril 2020 

Lunes sa Walong Araw na Pagdiriwang ng Pasko ng Muling Pagkabuhay 
Mga Gawa 2, 14. 22-33/Salmo 15/Mateo 28, 8-15 

Ang mga Pagbasa para sa araw na ito ay sumasalamin sa kagalakan ng Simbahan sa panahong ito. Ang Simbahan ay patuloy na nagdiriwang nang buong kagalakan dahil sa Muling Pagkabuhay ng Panginoong Hesukristo. Ang Muling Pagkabuhay ng Panginoong Hesus ang kung bakit ang Simbahan ay nagdiriwang nang buong kagalakan. Ang Muling Pagkabuhay ng Panginoong Hesukristo ay naghahatid ng tuwa at galak sa lahat. Siya'y nagwagi laban sa kasalanan at kamatayan. Iyan ang ipinapaalala ng Kanyang Muling Pagkabuhay. 

Sa Unang Pagbasa, nagpatotoo si Apostol San Pedro at ang mga apostol tungkol kay Kristo. Sa patotoo ng mga apostol na pinangunahan ni Apostol San Pedro, ang unang Santo Papa ng Simbahan, inilarawan nila kung paanong ang Panginoon ay muling nabuhay matapos Siyang mamatay sa krus. Si Kristo ay hindi nanatili sa loob ng libingan matapos Siyang mamatay. Bagkus, Siya'y nabuhay na mag-uli sa ikatlong araw. Sa Ebanghelyo, isinalaysay ang pagpapakita ng Panginoong Hesus na Muling Nabuhay sa mga babaeng pumunta sa Kanyang libingan. At ang bilin ni Hesus sa kanila ay ibalita ito sa mga apostol na Siya'y nabuhay at papunta Siya sa Galilea kung saan Siya'y makikita nila (Mateo 28, 10). 

Ito ang dahilan ng ating pagdiriwang. Ito ang dahilan kung bakit ang Simbahan ay nagdiriwang nang buong galak sa panahong ito. Si Hesus na ating Panginoon at Manunubos ay namatay sa krus ngunit muling nabuhay sa ikatlong araw. Si Hesus ay tunay ngang nabuhay na mag-uli. Iyan ang totoo. 

HATID NIYA'Y KAGALAKAN

12 Abril 2020 

Linggo ng Pasko ng Muling Pagkabuhay 

Mga Gawa 10, 34a. 37-43/Salmo 117/Colosas 3, 1-4 (o kaya: 1 Corinto 5, 6b-8)/Juan 20, 1-9 

Higit na natatangi ang Pasko ng Muling Pagkabuhay sa lahat ng mga araw sa buong taon para sa Simbahan. Sa Kalendaryo ng Simbahan, ang Pasko ng Muling Pagkabuhay ay ang pinakamahalaga at pinakadakilang araw sa buong taon. Kung tutuusin, higit na mahalaga ito sa Pasko ng Pagsilang na ipinagdiriwang tuwing ika-25 ng Disyembre. Hindi masusukat ng anumang pagdiriwang o pista sa ibang mga araw ng taon ang kahalagahan at kadakilaan ng Pasko ng Muling Pagkabuhay. 

Maitatanong ng karamihan kung bakit ang Pasko ng Muling Pagkabuhay ay higit na importante o kahalaga kaysa sa ibang mga pista sa isang taon, kabilang na rito ang Pasko ng Pagsilang. Ang sagot ay matatagpuan sa mga Pagbasa para sa dakilang araw na ito. Katunayan, sa pangalan pa lamang ng araw na ito ay malalaman agad ng bawat isa ang dahilan. Sa araw na ito, ang Pasko ng Muling Pagkabuhay, buong kagalakang ipinagdiriwang ng Simbahan ang Muling Pagkabuhay ni Hesus. 

Tunay ngang muling nabuhay ang Panginoong Hesus. Hindi Siya nanatili sa loob ng libingan. Hindi Siya nanatiling patay. Bagkus, Siya'y muling nabuhay sa ikatlong araw, tulad ng Kanyang sinabi nang paulit-ulit. Ang Muling Pagkabuhay ni Hesus ay pinatotohanan sa mga Pagbasa para sa dakilang araw na ito. 

Inilarawan ni Apostol San Pedro, ang unang Santo Papa ng Simbahan, sa kanyang pangaral sa Unang Pagbasa kung paanong ang pagkamatay ni Kristo sa krus ay hindi hudyat ng katapusan ng lahat para sa Kanya. Hindi nagwakas ang lahat para kay Kristo noong Siya'y mamatay sa krus. Bagkus, ito'y naging daan para sa Kanya tungo sa Kanyang Muling Pagkabuhay. Ang Muling Pagkabuhay ni Kristo Hesus ay ang patunay na hindi sa kamatayan nagtapos ang lahat. Ang lahat ng mga sakit at pagdurusang Kanyang binata hanggang sa Kanyang pagkamatay sa krus ay hindi nauwi o nagtapos sa kabiguan at kamatayan. 

Katulad ng unang Santo Papa na si Apostol San Pedro sa Unang Pagbasa, si Apostol San Pablo ay nangaral tungkol kay Kristong Muling Nabuhay sa Ikalawang Pagbasa. Sa kanyang unang sulat sa mga taga-Corinto, ipinakilala Niya ang Muling Nabuhay na si Hesus bilang ating Korderong Pampaskuwa (5, 7). Matapos Niyang ibigay ang buo Niyang sarili bilang handog sa krus alang-alang sa sangkatauhan, si Hesus ay muling nabuhay sa ikatlong araw. Sabi rin ni Apostol San Pablo sa sulat sa mga taga-Colosas, ang Panginoong Hesus na Muling Nabuhay ay nakaluklok sa kanan ng Diyos sa langit (3, 1). Si Hesus na nakaluklok sa kanan ng Amang nasa langit ay ang Korderong inihain sa krus alang-alang sa ating lahat. Matapos ialay ang Kanyang sarili sa krus, Siya'y nabuhay na mag-uli. Ang Korderong nag-alay ng sarili sa krus alang-alang sa sangkatauhan ay tunay ngang nabuhay na mag-uli at ngayo'y nakaluklok sa kanan ng Ama. 

Sa Ebanghelyo, itinatampok ang libingang walang laman. Ang bangkay ni Hesus ay wala sa libingan. Iyan ang dahilan kung bakit tayo nagdiriwang. Wala nang laman ang libingan dahil ang nilibing ay nabuhay na mag-uli. Si Hesus na nakalibing noon matapos Siyang mamatay sa krus ay muling nabuhay. Sabi sa dulo ng salaysay sa Ebanghelyo na ang minamahal na alagad ng Panginoon na si Apostol San Juan ay naniwala nang makita niya ang kayong lino na nakahiwalay sa panyong binalot sa ulo, bagamat hindi pa nila naunawaan nang mabuti noon (Juan 20, 6-9). Iyan ang dahilan ng ating pagdiriwang ngayon. Si Hesus ay muling nabuhay. Katunayan, tiniklop pa nga yung mga kayong lino at ang panyong pambalot sa ulo. Ibig sabihin lang nito, hindi ninakaw ang bangkay ni Hesus. Muling nabuhay si Hesus. 

Ang hatid ng Muling Nabuhay na si Hesus sa bawat isa ay kagalakan. Pinapawi na Niya ang ating kalungkutan, dalamhati, at hapis. Ang dalamhati at hapis na dulot ng Kanyang pagpapakasakit at pagkamatay ay Kanyang pinapawi. Ang panahon ng hapis, pagdadalamhati, at pagluluksa ay hindi Niya pinatagal dahil sa Kanyang Muling Pagkabuhay. Sa pamamagitan ng Kanyang Muling Pagkabuhay, ang hapis, luha, at dalamhati ay pinalitan Niya ng kagalakan at pag-asa. 

Binigyan ng Panginoong Hesus na Muling Nabuhay ang bawat isa sa atin ng dahilan upang magdiwang at magalak - ang Kanyang Muling Pagkabuhay. Tunay nga Siyang nabuhay na mag-uli. Siya'y namatay ngunit muling nabuhay. Tunay ang Kanyang Muling Pagkabuhay., ito'y hindi gawa-gawa o kathang-isip lamang. Ito ang totoo. Ito ay tunay at lehitimo. Sa pamamagitan ng Kanyang Muling Pagkabuhay, ang Panginoong Hesukristo ay naghatid ng kagalakan sa lahat. 

MALIGAYANG PASKO NG MULING PAGKABUHAY SA ATING LAHAT! 

PAG-IBIG NIYA'Y NAGTAGUMPAY

11 Abril 2020 

Ang Magdamagang Pagdiriwang sa Pasko ng Muling Pagkabuhay (A) 

Genesis 1, 1-2, 2 (o kaya: 1, 1. 26-31a)/Salmo 103 (o kaya: Salmo 32)/Genesis 22, 1-18 (o kaya: 22, 1-2. 9a. 10-13. 15-18)/Salmo 15/Exodo 14, 15-15, 1/Exodo 15/Isaias 54, 5-14/Salmo 29/Isaias 55, 1-11/Isaias 12/Baruc 3, 9-15. 32-4, 4/Salmo 18/Ezekiel 36, 16-17a. 18-28/Salmo 41 (o kaya: Salmo 50)/Roma 6, 3-11/Salmo 117/Mateo 28, 1-10 

"Aleluya" ang awit ng Simbahan sa gabing ito. Matapos ang mahabang panahon ng pagtitika, paghahanda ng sarili, at pagdadalamhati, ang "Aleluya" ay inawit muli sapagkat ipinagdiriwang ng Simbahan nang buong galak sa gabing ito ang Muling Pagkabuhay ni Hesus. Tapos na ang panahon ng dalamhati. Si Hesus ay nagwagi laban sa kasalanan at kamatayan. Tunay nga Siyang nabuhay na mag-uli. 

Hindi nagtapos ang lahat para sa Panginoong Hesukristo sa Kanyang kamatayan sa krus. Hindi Siya nanatiling patay. Hindi Siya nanatili sa libingan. Bagkus, Siya ay nabuhay na mag-uli. Bumangon at lumabas mula sa libingan si Kristo sa ikatlong araw, tulad ng Kanyang ipinangako. Kaya naman, ang sabi ng anghel sa mga babaeng pumunta sa libingan ng Panginoong Hesus sa Ebanghelyo, "Wala na Siya rito, sapagkat Siya'y muling nabuhay tulad ng Kanyang sinabi" (Mateo 28, 6). Ang Panginoong Hesus ay hindi na patay. Oo, si Kristo ay namatay sa Kalbaryo noong unang Biyernes Santo. Subalit, hindi Siya nanatiling patay. Bagkus, Siya'y nabuhay muli sa ikatlong araw. Iyan ang dahilan kung bakit wala nang laman ang libingan ni Kristo. Tunay ngang nabuhay na mag-uli si Kristo. 

Sa pamamagitan ng Kanyang Muling Pagkabuhay, inihayag ang tagumpay ng pag-ibig ng Panginoon. Ang Kanyang dakilang pag-ibig ay nagtagumpay. Hindi nauwi sa wala ang mga sakit at pagdurusang dinanas Niya alang-alang sa bawat tao noong unang Biyernes Santo. Bagkus, ang lahat ng pagdurusang dinanas ng Panginoon dahil sa Kanyang pag-ibig ay naging hakbang tungo sa pagkamit ng tagumpay. Ang pag-ibig ng Diyos ay nagtagumpay sa pamamagitan ng pagkabuhay na mag-uli ni Kristo. Sa pamamagitan ng Muling Pagkabuhay ni Kristo, nahayag ang tagumpay ng pag-ibig ng Diyos. 

Nagbata ng maraming hirap, sakit, at pagdurusa si Hesus hanggang sa Kanyang kamatayan sa krus sa Kalbaryo dahil sa pag-ibig. Subalit, ang lahat ng pagtitiis ni Hesus ay hindi nagwakas sa kabiguan at pagkatalo. Hindi nagwakas ang lahat sa pagkamatay ni Hesus sa krus. Ang kamatayan ni Hesus sa Kalbaryo noong unang Biyernes Santo ay sinundan ng Kanyang Muling Pagkabuhay kung saan nahayag ang tagumpay ng Kanyang pag-ibig para sa sangkatauhan. 

Kasama ang ating Inang Mahal, ang Mahal na Birheng Maria, buong galak nating awitin ang "Aleluya!" Ipagdiwang natin nang buong galak ang tagumpay ng pag-ibig ng Diyos na ipinamalas ng Muling Pagkabuhay ni Kristo Hesus. Ang dalamhati at lumbay ng bawat isa ay pinawi na ng Panginoong Hesus na Muling Nabuhay. Ang hatid ng Panginoong Muling Nabuhay sa bawat isa sa atin ay kagalakan. 

MALIGAYANG PASKO NG MULING PAGKABUHAY!