KAHIT HINDI PERPEKTO

6 Pebrero 2022 

Ikalimang Linggo sa Karaniwang Panahon (K) 

Isaias 6, 1-2a. 3-8/Salmo 137/1 Corinto 15, 1-11 (o kaya: 15, 3-8. 11)/Lucas 5, 1-11

"Lumayo po Kayo sa akin, Panginoon, sapagkat ako'y makasalanan" (Lucas 5, 8). Ito ang mga salitang binigkas ni Apostol San Pedro sa Panginoong Hesus matapos ang mapaghimalang paghuli ng isda sa Lawa ng Genesaret. Nakahuli ng maraming isda sina Apostol San Pedro at ang kanyang mga kasama sa tulong ng Panginoon. Dahil dito, napagtanto ni Apostol San Pedro na hindi basta-basta si Hesus. Bagkus, isang biyaya mula sa Diyos si Hesus. Namulat si Apostol San Pedro sa biyaya ng habag ng Kataas-taasang Diyos na kanyang nakita kay Hesus. 

Ang mga salitang ito ni Apostol San Pedro sa Ebanghelyo ay ginagamit ng Simbahan sa Linggong ito bilang sentro ng pagninilay. Ang temang pinagninilayan sa Linggong ito ay ang paghirang sa atin ng Diyos sa kabila ng ating pagiging makasalanan. Kahit hindi tayo perpekto, mayroong misyong inilaan ang Panginoon para sa atin. Patuloy tayong tinatawag, pinipili, at hinihirang ng Panginoon upang gampanan ang misyong bigay Niya sa atin. Alam ng Diyos na hindi tayo perpekto. Subalit, ang ating pagiging makasalanan ay hindi hadlang para sa Panginoon na bigyan tayo ng misyon. 

Sa Unang Pagbasa, inihandog ni Propeta Isaias ang kanyang sarili sa Diyos kahit na hindi siya perpekto. Batid ni Propeta Isaias na marami siyang kasalanan. Batid niyang marami siyang karupukan bilang isang tao. Dahil dito, alam niyang hindi siya karapat-dapat na makinabang sa biyaya ng Diyos. Subalit, niloob pa rin ng Diyos na si Isaias ay maging Kanyang propeta para sa Kanyang bayan. Dahil pinagindapat siya ng Diyos na maging Kanyang propeta, buong kababaang-loob niya nasabi sa wakas ng Unang Pagbasa, "Narito po ako. Ako ang isugo N'yo" (Isaias 6, 8). 

Ipinapaalala ni Apostol San Pablo sa mga taga-Corinto sa huling bahagi ng kanyang pangaral sa Ikalawang Pagbasa na hindi siya karapat-dapat maging isang apostol at misyonero. Subalit, sa kabila nito, niloob ng Panginoon na magtungo siya sa bayan ng Corinto at sa iba pang mga lugar bilang Kanyang apostol at misyonero. Isa lamang ang dahilan nito - ang kagandahang-loob ng Panginoon. Ang habag at kagandahang-loob ng Panginoon ay ang dahilan kung bakit naging apostol at misyonero si Apostol San Pablo. Bilang apostol at misyonero, nangaral siya tungkol sa Mabuting Balita ng kaligtasang kaloob ng Diyos sa sangkatauhan sa pamamagitan ni Kristo. 

Oo, batid ng Panginoon na hindi tayo perpekto. Batid Niyang marami tayong mga pagkukulang at kasalanan. Batid Niya ang ating mga kahinaan bilang tao. Subalit, sa kabila nito, niloob Niyang bigyan ng isang misyon. Sa pamamagitan ng mga misyong ito na kaloob sa atin ng Diyos, lalo nating Siyang binibigyan ng kadakilaan. Binigyan tayo ng misyon ng Diyos upang lalo natin Siyang maparangalan. Ito ang dahilan kung bakit buong habag na sinabi ng Panginoong Hesus kay Apostol San Pedro sa wakas ng Ebanghelyo na magiging mamamalakaya na siya ng mga tao (Lucas 5, 10). 

Bilang tao, hindi tayo perpekto. Alam natin ang katotohanang ito. Alam rin ng Diyos ang katotohanang ito. Subalit, para sa Diyos, hindi ito isang hadlang para hindi tayo tawagin at piliin upang magmisyon bilang Kanyang mga saksi. 

LIWANAG NA NAGMUMULA SA LANGIT

2 Pebrero 2022 

Kapistahan ng Pagdadala kay Hesus na Panginoon sa Templo 

Malakias 3, 1-4/Salmo 23/Hebreo 2, 14-18/Lucas 2, 22-40 (o kaya: 2, 22-32) 

"Si Hesukristo ang Ilaw na sa lahat ay tatanglaw . . . " Napakalinaw kung ano ang nais ilarawan ng mga unang salita ng Pambungad na Antipona para sa Banal na Misa sa araw na ito. Sa araw na ito, ang Kapistahan ng Pagdadala kay Hesus na Panginoon sa Templo na tinatawag ring "Candelaria," nakatuon ang pansin ng Simbahan kay Hesus bilang tunay na liwanag. Si Hesus ay ang tunay na liwanag na nagmula sa langit. Sa pamamagitan ng pagdating ni Hesus, dumating ang tunay na liwanag sa mundo. Ang liwanag na tunay, na walang iba kundi si Kristo Hesus, ay umaakay sa atin tungo sa kaligtasang Kanyang kaloob sa lahat. 

Tinalakay sa mga Pagbasa para sa Kapistahang ipinagdiriwang ng Simbahan sa araw na ito ang pagdating ng tunay na liwanag. Inilarawan sa Salmo para sa araw na ito kung sino ang nagkaloob ng tunay na liwanag. Ang nagkaloob ng tunay na liwanag ay walang iba kundi ang Diyos. Ang tunay na liwanag ay Kanyang ipinagkaloob sa lahat sa pamamagitan ni Hesus. Sa Unang Pagbasa at Ikalawang Pagbasa, inilarawan kung bakit ipinagkaloob ng Diyos ang tunay na liwanag na walang iba kundi si Kristo. Ang Panginoong Hesus na Siyang tunay na liwanag na nagmula sa langit ay dumating sa lupa upang dalisayin at linisin ang sangkatauhan sa pamamagitan ng Kanyang Dugo. Ang misyong ito ng Panginoong Hesukristo bilang tunay na liwanag na dumating sa mundo ay inilarawan sa kantikulo ni Simeon sa Ebanghelyo. Dumating sa mundong ito si Hesus bilang tunay na liwanag na umaakay sa atin sa kaligtasang kaloob Niya. 

Gaya ng sabi ni Propeta Isaias sa simula ng kanyang propesiya tungkol sa pagdating ng ipinangakong Mesiyas at Manunubos: "Nakatanaw ng isang malaking liwanag ang bayang malaon nang nasa kadiliman" (9, 1). Mismong si Hesus na rin ang nagsabi na ang sinumang susunod sa Kanya "ay magkakaroon ng ilaw na nagbibigay-buhay at 'di na lalakad sa kadiliman" (Juan 8, 12). Iyan ang tunay na liwanag na si Hesus. Ang mga susunod sa Kanya ay hindi Niya aakayin tungo sa kapahamakan. Bagkus, sila'y Kanyang aakayin patungo sa kaligtasang dulot ng Kanyang liwanag. 

Ang tunay na liwanag ay walang iba kundi si Hesus na nagmula sa langit. Dumating sa mundong ito ang tunay na liwanag na si Hesus upang akayin tayo tungo sa isang napakaespesyal na biyaya - ang biyaya ng kaligtasang Kanyang kaloob sa lahat. Ang biyayang ito ay hindi lamang napakaespesyal kundi ito ang pinakadakilang biyaya. 

MAHIRAP TANGGAPIN ANG KANYANG KALOOBAN

30 Enero 2022 

Ikaapat na Linggo sa Karaniwang Panahon (K) 

Jeremias 1, 4-5. 17-19/Salmo 70/1 Corinto 12, 31-13, 13 (o kaya: 13, 4-13)/Lucas 4, 21-30 

From: Sweet Publishing / FreeBibleimages.org.

Hindi natin dapat isiping ang pagtanggap sa kalooban ng Diyos ay madali. May mga pagkakataon sa ating buhay kung saan mahihirapan tayong sumunod sa kalooban ng Diyos. Tinalakay sa mga Pagbasa para sa Linggong ito kung gaano kahirap sumunod sa kalooban ng Diyos. Sa pamamagitan nito, ipinapaalala sa atin ng Simbahan kung ano ang dapat nating asahan kapag tinanggap natin ang kalooban ng Diyos. Isa itong babala mula sa Simbahan para sa atin tungkol sa pagtanggap sa kalooban ng Diyos.

Sa Unang Pagbasa, inilahad ni Propeta Jeremias ang isa sa mga pinakamasikat na talata mula sa Lumang Tipan: "Bago ka ipinaglihi, kilala na kita. Bago ka ipanganak, itinalaga kita sa Akin upang maging propeta sa lahat ng bansa" (1, 5). Inilarawan sa mga salitang ito na ang Panginoong Diyos ay nakabuo na ng plano para kay Propeta Jeremias bago pa man siya isilang sa mundong ito. Gayon din ang Kanyang ginawa para sa bawat isa sa atin. Nakabuo na Siya ng hangarin para sa bawat isa. Mayroon na Siyang nais ipagawa sa atin bago pa man tayo isilang. 

Iyon nga lamang, may isang detalyeng madalas hindi binibigyan ng pansin ng marami kapag nababasa ang talatang ito. Hindi naman sinabi ng Panginoon na mapupuno ng bahaghari o liwanag ang bawat sandali ng ating buhay kapag ipinasiya nating sundin ang Kanyang kalooban. Walang sinabing ganyan ang Panginoong Diyos kay Propeta Jeremias. Katunayan, sabi Niya mismo kay Propeta Jeremias na sasalungatin siya ng mga Hari ng Juda, mga pinuno, mga saserdote, at ng buong bayan (1, 18-19). Isang patunay ito na hindi madaling sundin ang kalooban ng Diyos. 

Maski ang Diyos mismo ay nakaranas din ng hirap sa pagsunod sa planong Kanyang binuo. Sa Ebanghelyo, ang Diyos na nagkatawang-tao na si Hesus ay nakaranas rin ng hirap ng pagsunod sa kalooban ng Ama. Ang planong binuo Niya, ng Ama, at ng Espiritu Santo ay mahirap sundin. Bakit? Dahil sa Kanyang naranasan sa tampok na salaysay sa Ebanghelyo para sa Linggong ito. Si Hesus ay hindi tinanggap sa Nazaret, ang bayan kung saan Siya lumaki. Katunayan, muntik pa nga nilang mapatay si Hesus dahil ibubulid sana Siya sa bangin matapos pagtabuyan mula sa sinagoga (Lucas 4, 29). Kahit na nakaalis ang Panginoong Hesus, hindi natin mapagkakaila na talagang labis Siyang nasaktan dahil sa pangyayaring ito. 

Ang mga salita naman sa Ikalawang Pagbasa ay maituturing natin mahirap gawin, lalo na kung mayroong mga taong kinaiinisan natin. Si Apostol San Pablo ay nagsalita tungkol sa pag-ibig sa Ikalawang Pagbasa. Napakahirap gawin ito, lalo na kung may mga kinaiinisan tayo. Mas lalo itong mahirap gawin kung may mga kaaway tayo sa halip na mga kinaiinisan. Patunay lamang ito na hindi madaling tuparin at sundin ang kalooban ng Ama. Mahirap talagang maging masunurin sa Diyos. 

Kung nais nating tanggapin at sundin ang kalooban ng Panginoong Diyos, kailangan nating tandaan na mahirap maging masunurin sa Kanya sa lahat ng oras. May mga sandali sa ating buhay kung saan makakaranas tayo ng mga pagsubok at tukso. Ang pagsunod sa kalooban ng Diyos ay hindi nangangahulugang palagiang bahaghari o liwanag sa bawat sandali ng ating buhay bilang Kanyang mga tagasunod at lingkod. 

TINUTULUNGAN NIYA TAYONG MAGBAGONG-BUHAY

25 Enero 2022 

Kapistahan ng Pagbabagong-Buhay ni Apostol San Pablo

Mga Gawa 22, 3-16 (o kaya: 9, 1-22)/Salmo 116/Marcos 16, 15-18

Ang pagbabagong-buhay ay isang biyaya mula sa Panginoong Diyos. Isinasalamin ng biyayang ito ang hangarin ng Diyos na baguhin tayo. Nais ng Diyos na tulungan tayo sa proseso ng pagbabagong-buhay at pagbabalik-loob sa Kanya. Ang Diyos ay laging handang tulungan ang bawat isa sa atin na bumalik sa Kanya. Lagi Siyang ngumingiti kapag nakikita Niyang lumalapit tayo sa Kanya upang hingin sa Kanya ang Kanyang tulong sa pagbabagong-buhay at pagbabalik-loob sa Kanya. 

Isa sa mga pinagkalooban ng biyayang ito ay walang iba kundi si Apostol San Pablo na hinirang ng Diyos upang maging apostol sa mga Hentil. Inilaan ang ika-25 araw ng Enero sa pag-alala sa pagbabagong-buhay ni Apostol San Pablo. Ang yugtong ito ng buhay ni Apostol San Pablo ay inilahad sa Unang Pagbasa. Si Hesus ay nagpakita sa kanya sa daang patungong Damasco. Sa sandaling iyon, naranasan niya ang awa at habag ng Diyos. Sa kabila ng kanyang pag-uusig sa Simbahan, pinili pa rin siya upang maging misyonero at saksi ni Kristo sa mga Hentil. Isang bagong buhay ang inalok ng Panginoong Hesus sa kanya. Ang bagong buhay na ito ay inilarawan mismo ni Hesus sa mga apostol sa Ebanghelyo. Ang alok at tulong na ito ng Panginoong Hesukristo ay tinanggap ni Apostol San Pablo nang buong puso. 

Katulad ni Apostol San Pablo, inaaalok tayo ng Panginoon ng isang bagong buhay. Sa pamamagitan ng pagpapalang ito, inihahayag ng Panginoon na lagi Siyang handang tulungan tayong magbagong-buhay at magbalik-loob sa Kanya. Ang alok Niyang ito ay isang biyayang kusa Niyang ipinagkakaloob sa atin. Nasa atin ang pasiya kung ang biyayang ito ay buong puso nating tatanggapin tulad ni Apostol San Pablo. 

MISYON NG MGA HINIRANG

23 Enero 2022 

Ikatlong Linggo sa Karaniwang Panahon (K) 

Nehemias 8, 2-4a. 5-6. 8-10/Salmo 18/1 Corinto 12, 12-30 (o kaya: 12, 12-14. 27)/Lucas 1, 1-4; 4, 14-21 

Misyon ang paksang binibigyan ng pansin sa mga Pagbasa para sa Linggong ito. Sa pamamagitan nito, itinuturo sa atin ng Simbahan na ang bawat isa sa atin ay hinirang ng Diyos. Hinirang tayo ng Panginoon upang tuparin ang misyong ibinibigay Niya sa atin. Ang mga misyong ibinigay ng Panginoon ay hindi lamang para sa isa o dalawang tao lamang. Hindi rin ito para sa isang pangkat o lahi lamang. Bagkus, para sa bawat isa sa atin ang mga misyong ibinibigay ang Panginoong Diyos. Mayroon tayong kani-kaniyang misyon mula sa Panginoon. Walang sinuman sa atin ang makapagsasabing hindi siya binigyan ng misyon ng Diyos. 

Ang Ebanghelyo para sa Linggong ito ay nagsimula sa pamamagitan ng isang pagbati sa isang taong nagngangalang Teofilo. Sa pagbating ito, inilarawan ni San Lucas kung bakit ipinasiya niyang magsulat tungkol kay Hesus. Sabi ni San Lucas sa pagbating ito na ginagawa niya ito upang lubusang matiyak ni Teofilo ang katotohanan (1, 3). Ang pakay ni San Lucas ay napakalinaw - magpatotoo tungkol sa katotohanan na walang iba kundi si Hesus. Ang Diyos na nagkatawang-tao na si Hesus na Siya ring bukal ng katotohanan ang pinatotohanan ni San Lucas sa kanyang salaysay ng Ebanghelyo o Mabuting Balita. Iyon ang kanyang misyon. 

Sa ikalawang bahagi ng Ebanghelyo, inihayag ng Panginoong Hesus sa sinagoga na natupad ang talatang Kanyang binasa (Lucas 4, 21). Ang talatang binasa ni Hesus ay galing sa aklat ni Propeta Isaias. Inilalarawan sa mga salitang ito mula sa aklat ni Propeta Isaias ang misyon ng ipinangakong Mesiyas. Sa pamamagitan ng pahayag na ito matapos basahin ang mga talatang iyon ng aklat ni Propeta Isaias, inilarawan ni Hesus kung bakit Siya dumating sa daigdig. Mayroon Siyang misyon na dapat Niyang tuparin. Ang misyong iyon ay inilarawan sa aklat ni Propeta Isaias. Ang misyong ito ay bigay sa Kanya ng Amang nasa langit. 

Inilarawan ni Apostol San Pablo sa Ikalawang Pagbasa na ang bawat isa sa atin ay bumubuo sa Katawan ni Kristo. Dahil diyan, tayong lahat ay mayroong misyon. Ang ating misyon bilang mga bumubuo sa Katawan ni Kristo ay maging banal. Dahil banal si Kristo, kailangan nating maging banal katulad Niya. Kailangan nating ipalaganap sa lahat ng dako ang kabanalan ni Kristo. Kailangan nating magsilbi bilang mga salamin ni Kristo. Iyan ang ating misyon bilang mga bumubuo sa Katawan ni Kristo. Maging mga salamin ni Kristo. Isalamin ang Kanyang kabanalan. 

Oo, mahina tayo. Oo, mga makasalanan tayo. Subalit, sa kabila ng ating pagiging mga makasalanan, hinirang tayo ng Panginoon para sa isang mahalagang misyon. Tayong lahat ay pinagindapat Niyang tuparin ang misyong ito. Ang ating misyon ay ibahagi sa kapwa ang kabutihan at kabanalan ni Kristo. Ang ating misyon ay maging banal tulad ni Kristo. Sa pamamagitan nito, makikilala ng lahat si Kristo bilang bukal ng kabutihan at kabanalan. 

Hinirang tayo ni Kristo Hesus upang maging bahagi ng Kanyang Katawan. Katulad ng mga Israelita matapos basahin ni Ezra ang Kautusan sa Unang Pagbasa, buong puso at kababaang-loob nawa nating ibigay ang ating "Oo" at "Amen" sa misyong bigay ng Diyos sa atin. Buong kababaang-loob nawa nating tanggapin ang Kanyang paghirang sa bawat isa sa atin at tuparin ang misyong Kanyang bigay. 

NARIRITO, LAGING HANDA

16 Enero 2022 

Kapistahan ng Panginoong Hesus, ang Banal na Sanggol (K) 

Isaias 9, 1-6/Salmo 97/Efeso 1, 3-6. 15-18/Lucas 2, 41-52 

(Sipi mula sa isa sa mga Live Stream ng mga Misa sa Parokya ng Santo Niño, Pandacan, Maynila)

Ang Kapistahan ng Santo Niño ay isang mahalagang araw para sa buong Simbahan sa Pilipinas. Ipinagdiriwang ng Simbahan sa Pilipinas ang Kapistahang ito pagsapit ng ikatlong Linggo ng buwan ng Enero taun-taon. Iyan ay dahil kinikilala ng Roma ang halaga ng Mahal na Poong Santo Niño sa pananampalatayang Pilipino. Kaya naman, binigyan ng pahintulot ang Simbahan sa Pilipinas na ipagdiwang ang Kapistahang ito. tuwing sasapit ang ikatlong Linggo ng Enero taun-taon. 

Sa Kapistahan ng Santo Niño para sa taong ito, ang Ebanghelyo ay tungkol sa isang kakaibang sandaling naganap noong ang Panginoong Hesus ay isang bata pa lamang. Ang kaganapang isinalaysay sa Ebanghelyo para sa Kapistahan ng Banal na Sanggol na si Kristo Hesus sa taong ito ay ang paghahanap sa Kanya ng Mahal na Inang si Mariang Birhen at ni San Jose. Ang Batang Hesus ay nawala sa kanilang paningin sa loob ng tatlong araw. Ang Batang Hesus ay nahanap nila sa templo kasama ang mga guro sa ikatlong araw ng kanilang paghahanap. 

Nakakapagtaka kung bakit ang kaganapang ito na naganap noong bata pa si Kristo ang piniling pagtuunan ng pansin at pagnilayan sa Ebanghelyo para sa Kapistahan ng Santo Niño sa taong ito. Katunayan, tila mapapataas ng kilay ang bawat isa sa atin kung titingnan natin ang ugnayan nito sa iba pang mga Pagbasa. Sa Unang Pagbasa, inihayag na isang sanggol na lalaki ang ibinigay ng Panginoon. Sa Ikalawang Pagbasa, binigyan ng pansin ni Apostol San Pablo ang pagiging mapagpala ng Diyos. Dahil sa pagiging mapagpala ng Diyos, ipinagkaloob Niya ang Kanyang Bugtong na Anak na si Hesus upang tayo rin ay maging Kanyang mga anak. Sa pamamagitan ng gawang ito, tinupad ng Diyos ang Kanyang pangako sa Unang Pagbasa. Paano nangyaring nawala sa loob ng tatlong araw ang Batang Hesus? Bakit nagpaiwan sa Herusalem si Hesus noong bata pa lamang Siya? Bakit hinayaan ng Batang Hesus na mag-alala para sa Kanya ang Kanyang mga magulang sa loob ng tatlong araw? Ang Batang Hesus ba'y mayroong pagkapasaway? Bakita Niya ginawa ito? 

Tugon ni Hesus sa Mahal na Inang si Maria, "Bakit po ninyo Ako hinahanap? Hindi ba ninyo alam na Ako'y dapat nasa bahay ng Aking Ama?" (Lucas 2, 49). Napakalinaw kung ano ang ibig sabihin ng Batang si Kristo Hesus. Kahit na bata pa lamang Siya sa sandaling iyon, ipinakita ni Kristo ang Kanyang kaalaman tungkol sa nais ng Ama. Sa pamamagitan ng mga salitang ito, ipinakita rin ni Kristo Hesus ang Kanyang pagiging handa na tuparin ang kalooban ng Amang nasa langit. Isang pahiwatig nito ay ang Kanyang pagiging masunurin kay San Jose at sa Mahal na Birheng Maria na Kanyang mga magulang sa wakas ng salaysay sa Ebanghelyo (Lucas 2, 51). Kung paanong si Hesus ay naging isang masunuring anak sa Mahal na Birheng Maria at kay San Jose, naging masurin rin Niya sa kalooban ng Amang nasa langit. 

Itinuturo sa atin ng Mahal na Poong Santo Niño ang halaga ng pagiging masunurin sa kalooban ng Amang nasa langit. Mayroong plano ang Amang nasa langit para sa atin. Tayo mismo ang magpapasiya kung tutuparin ang Kanyang kalooban tulad ng ginawa ng Mahal na Poong Santo Niño. Tayo ag magpapasiya kung lagi ba tayong magiging handa na ibigay ang ating "Oo" sa Ama katulad ng Santo Niño. 

VIVA SANTO NIÑO!

PURIHIN ANG TUNAY NA NAGMAMAGANDANG-LOOB

9 Enero 2022 

Kapistahan ng Pagbibinyag sa Panginoong Jesus Nazareno (K) 

Isaias 40, 1-5. 9-11 (o kaya: 42, 1-4. 6-7)/Salmo 103 (o kaya: 28)/Tito 2, 11-14; 3, 4-7 (o kaya: Mga Gawa 10, 34-38)/Lucas 3, 15-16. 21-22 

Isa sa mga mahahalagang sandali sa buhay ng Panginoong Hesukristo dito sa lupa ay ang Pagbibinyag sa Kanya ng Kanyang kamag-anak na si San Juan Bautista sa Ilog Jordan. Ang Pagbibinyag kay Hesus ay ang hudyat ng simula ng Kanyang misyon. Sa sandaling ito, bumaba mula sa langit ang Espiritu Santo sa anyo ng isang kalapati at nagsalita ang Amang nasa langit upang ipakilala Siya bilang ipinangakong Mesiyas at Tagapagligtas. Sa pamamagitan ng ipinangakong Mesiyas na si Hesus, ang Diyos ay maghahatid ng kaligtasan sa sangkatauhan. 

Ang Una at Ikalawang Pagbasa ay tungkol sa pagligtas ng Diyos. Sa Unang Pagbasa, si Propeta Isaias ay nagsalita tungkol sa pagliligtas ng Diyos. Sa Ikalawang Pagbasa, inilarawan ni Apostol San Pablo kung ano ang ginawa ng Diyos pagdating ng takdang panahon upang isakatuparan ang Kanyang planong iligtas ang sangkatauhan. Nang dumating ang panahong Kanyang itinakda, dumating Siya sa pamamagitan ni Kristo Hesus. Sa pamamagitan ng Kanyang Bugtong na Anak na si Kristo Hesus, ang biyaya ng kaligtasang kaloob ng Diyos ay dumating sa mundong ito. 

Bakit ipinasiya ng Diyos na iligtas ang sangkatauhan? Si Apostol San Pablo na rin ang nagbigay ng paliwanag sa Ikalawang Pagbasa. Sabi niya roon na ipinasiya ng Diyos na dumating sa mundo sa pamamagitan ni Kristo upang iligtas ang sangkatauhan dahil sa Kanyang habag at kagandahang-loob. Sa pamamagitan ni Kristo, iniligtas ng Diyos ang sangkatauhan. Binuo ng Diyos ang planong ito dahil sa Kanyang kagandahang-loob at habag para sa atin. 

Iyon ang dahilan kung bakit nagsalita si San Juan Bautista sa mga taong nagsitungo sa Ilog Jordan tungkol sa pagdating ng ipinangakong Mesiyas at Tagapagligtas na si Hesus. Sa halip na linlangin ang mga tao, inamin niyang hindi siya ang Mesiyas kundi ang darating na kasunod niya. Iyon rin ang dahilan kung bakit ang Espiritu Santo ay bumaba mula sa langit sa anyo ng isang kalapati. Iyon rin ang dahilan kung bakit ang tinig ng Amang nasa langit ay narinig ng Kanyang Bugtong na Anak, kung susundin natin ang salaysay ni San Lucas tungkol sa kaganapang ginugunita ng Simbahan sa espesyal na Kapistahang ito.

Kaya naman, ang paanyaya sa atin ng Simbahan sa araw na ito ay ang mismong mga salita sa Salmo. Purihin ang Panginoong Diyos bilang pasasalamat sa planong Siya mismo ang bumuo alang-alang sa atin. Purihin natin ang Panginoong Diyos puno ng habag at kagandahang-loob para sa atin. Tunay nga Siyang nagmamagandang-loob. Tayong lahat ay tunay nga Niyang kinahahabagan. Ang ipinangakong Manunubos na walang iba kundi ang Poong Jesus Nazareno ay ang patunay nito. Dahil diyan, buong pananalig nating ialay ang ating papuri at pagsamba sa Kanya. 

VIVA POONG JESUS NAZARENO!