MAGSALITA NANG DIRETSYO

23 Hunyo 2022 

Dakilang Kapistahan ng Pagsilang ni San Juan Bautista 

Isaias 49, 1-6/Salmo 138/Mga Gawa 13, 22-26/Lucas 1, 57-66. 80 

Bernardo Strozzi, Saint John the Baptist (c. 1620-1625), Public Domain

Mayroong dahilan kung bakit isinilang ang lahat ng tao sa mundo. Ito ang paksang nais pagtuunan ng pansin ng Simbahan sa pagdiriwang ng Dakilang Kapistahan ng Pagsilang ni San Juan Bautista. Ang lahat ng tao sa mundo ay mayroong misyon na kailangang tuklasin at tuparin. Iyan ang dahilan kung bakit isinilang ang lahat ng tao dito sa mundo. Mayroon silang misyon o tungkulin. Isang patunay nito ay si San Juan Bautista. Ang kanyang misyon ay mayroong ugnayan sa planong binuo ng Panginoon upang iligtas ang sangkatauhan. Hindi isinilang ang bawat tao sa mundong ito upang gumala lamang sa mundong ito na parang mga turista. 

Ang pangalang ibinigay sa Tagapagbinyag na mauuna sa daan ng Mesiyas ay isa nang pahiwatig ng misyong ibinigay sa kanya ng Diyos. Sabi ng kanyang inang si Elisabet na kinumpirma naman ng kanyang amang si Zacarias sa pamamagitan ng kanyang sulat na Juan ang kanyang pangalan (Lucas 1, 60. 63). Ito ang pangalang ibinigay sa kanya ng Arkanghel San Gabriel noong nagpakita siya kay Zacarias sa loob ng templo (Lucas 1, 13). Ang ibig sabihin ng pangalang "Juan" ay "Ang Diyos ay mapagpala." Isa itong malinaw na pahiwatig ng misyon ni San Juan Bautista. Hinirang siya ng Diyos upang maging pagpapala sa lahat ng tao. Sa pamamagitan ng biyayang si San Juan Bautista, nahayag ang kabutihan ng Diyos sa lahat ng tao. 

Gaya ng nasasaad sa Unang Pagbasa para sa Dakilang Kapistahang ipinagdiriwang sa araw na ito: "Bago pa ako ipanganak ay hinirang na ng Panginoon. Pinili Niya ako para maging lingkod Niya" (Isaias 49, 5). Isang halimbawa si San Juan Bautista. Gaya ng ipinapahiwatig ng kahulugan ng kanyang pangalan, hinirang si San Juan Bautista upang maging isang tanda ng pagpapala ng Diyos. Sabi sa Ikalawang Pagbasa, bago dumating at lumitaw ang ipinangakong Mesiyas at Manunubos na si Hesus, si San Juan Bautista ay nangaral tungkol sa pagbabalik-loob sa Diyos at pagbibinyag upang ihanda ang lahat para sa Kanyang pagdating (Mga Gawa 13, 24-25). 

Subalit, matatanto nating hindi gumamit ng mga matatamis na salita ang pagpapala ng Diyos na nagngangalang Juan Bautista. Bilang biyayang ipinagkaloob ng Diyos sa tanan, diretsyahan siyang nagsalita sa mga tao tungkol sa katotohanan. Katunayan, marami sa mga katagang ginamit ni San Juan Bautista sa kanyang mga pangaral sa Ilog Jordan ay nakakasakit ng damdamin. Minsan, ang mga nagtungo sa Ilog Jordan upang makinig sa kanyang mga pangaral at magpabinyag ay tinawag niya nang may lakas ng loob na "lahi ng mga ulupong" (Mateo 3, 7; Lucas 3,7). Isa iyang patunay na hindi nagpaligoy-ligoy si San Juan Bautista sa kanyang misyon. Sa pamamagitan ng pagiging prangka, nagsalita si San Juan Bautista tungkol sa kabutihan ng Panginoong Diyos sa mga Israelita. Ang kabutihan at awa ng Panginoong Diyos ay ang dahilan kung bakit nagsugo Siya sa mga propeta. Ito rin ang dahilan kung bakit isinugo rin ang ipinangakong Mesiyas at Tagapagligtas nang dumating ang takdang panahon. 

Bagamat may ilang mga pagkakaiba sa mga misyong ibinigay sa atin ng Panginoon, isa lamang ang ating layunin. Ang ating layunin ay sumaksi tungkol sa katotohanang nagmumula sa Panginoon. Hindi tayo dapat magpaligoy-ligoy o mag-isip ng paraan upang pabanguhin ang ating mga sarili sa mata ng mga tao. Bagkus, dapat tayong maging prangka. Dapat diretsyahan tayong magpatotoo tungkol sa katotohanang si Kristo. Gaya ni San Juan Bautista, huwag tayong matakot magsalita nang diretsyo tungkol sa katotohanang kaloob ni Kristo. 

Ipinapaalala ng Dakilang Kapistahang ipinagdiriwang ng Simbahan sa araw na ito na hindi tayo dapat matakot magsalita tungkol sa katotohanang kaloob ni Hesus. Hindi tayo dapat magpaligoy-ligoy o daanan na lamang sa mga matatamis na salita upang walang damdaming masasaktan. Katulad ni San Juan Bautista, dapat tayong maging prangka o diretsyo sa ating pagsaksi at pagpapalaganap ng katotohanang mula kay Kristo Hesus. Wala na tayong magagawa kung may mga damdaming masasaktan dahil sa katotohanang kaloob mismo ni Kristo. 

SA SAKRAMENTO NG EUKARISTIYA, NAHAHAYAG ANG KATARUNGAN AT PAGIGING MATUWID NG PANGINOON

19 Hunyo 2022 

Dakilang Kapistahan ng Kabanal-Banalang Katawan at Dugo ng Panginoon (K) 

Genesis 14, 18-20/Salmo 109/11 Corinto 11, 23-26/Lucas 9, 11b-17 

Pedro Orrente, Feeding of Five Thousand (c. 1613), Public Domain

"Paalisin na po Ninyo ang mga tao nang makaparoon sila sa mga nayon sa kabukiran sa paligid upang humanap ng makakain at matutuluyan. Nasa ilang lugar na po tayo" (Lucas 9, 12). Ang mga salitang ito ay binigkas ng mga apostol sa Panginoong Hesus noong magdidilim na. Batid ng mga apostol kung nasaan sila sa mga oras na iyon. Sa ilang na lugar na iyon, mayroong limang libong tao na nagmula sa iba't ibang lugar upang makita si Hesus. Magtatakipsilim na, ang nasabing ilang na lugar ay puno pa rin ng mga taong nais makita't marinig si Hesus. Kaya, nakiusap ang mga apostol kay Hesus na pauwiin na Niya ang mga tao dahil nasa isang ilang na pook sila. Dahil dito, wala silang mahahanap na makakainan at matutuluyan sa nasabing lugar. 

Subalit, sa halip na sumang-ayon, sinabihan ni Hesus ang mga apostol na bigyan ng makakain ang mga tao (Lucas 9, 13). Sila mismo ang magbibigay ng pagkain sa mga taong nagkatipon sa ilang na pook na iyon sa mga sandaling iyon. May malalim na kahulugan ang mga salitang ito ni Hesus. Sa unang tingin o basa, hindi halata kung ano ang ibig sabihin ni Hesus. Tiyak na sasagot tayo katulad ng mga apostol noong ipinaalam nila kay Hesus na tanging limang tinapay at dalawang isda ang mayroon sa nasabing pook sa mga oras na iyon (Lucas 9, 13). Napakakaunti niyan para sa limang libong taong naroon sa lugar na iyon. 

Makakatulong ang Kapistahang ipinagdiriwang ng Simbahan sa Linggong ito upang lalo pa nating maunawaan kung bakit nasabi ni Hesus ang mga salitang iyon sa mga apostol. Sinabihan ni Hesus ang mga apostol na sila mismo ang dapat magbigay ng pagkain sa mga tao dahil Siya mismo ang tinapay ng buhay. Ang ibig sabihin ng mga salitang ito ni Hesus ay ituro Siya sa mga tao. Ang tanging makakapawi sa iba't ibang uri ng kagutuman at kauuhawan ng tao ay walang iba kundi si Hesus lamang. Ito ang temang nais bigyan ng pansin ng Simbahan sa pagdiriwang ng Dakilang Kapistahan ng Kabanal-banalang Katawan at Dugo ng Panginoon. Sa Sakramento ng Banal na Eukaristiya, laging dumarating si Kristo upang ibigay ang Kanyang Katawan at Dugo bilang tunay na pagkain at inuming nagbibigay ng buhay na walang hanggan. 

Kahit na nasa ilang na pook, hindi pinauwi ni Hesus ang mga tao. Isa itong patunay na batid Niya kung ano ang matuwid. Hindi lamang kawalan ng habag at malasakit ang pagpapaalis sa mga tao mula sa ilang na pook na iyon. Bagkus, hindi rin iyan matuwid at makatarungan. Si Hesus, ang tunay na matuwid, mahabagin, at makatarungan, ay hindi pumayag na paalisin na lamang ang mga tao nang hindi nila alam kung saan sila maaring bumili ng pagkain at inumin. Ayaw Niyang madisgrasya ang mga tao. Ito ang ginagawa Niya sa Banal na Eukaristiya. Ipinagkakaloob Niya ang Kanyang Katawan at Dugo upang maging ating espirituwal na pagkain at inumin. Kapag kinain at ininom natin ang Kanyang Katawan at Dugo sa Misa, ipagkakaloob Niya ang kaligtasan sa bawat isa sa atin. Sa pamamagitan ng Kanyang pagdating sa Banal na Misa araw-araw upang ibigay ang Kanyang Katawan at Dugo bilang tunay na pagkain at inuming walang hanggan, inihahatid Niya sa atin ang biyaya ng Kanyang pagliligtas. Iyan si Hesus, ang matuwid, makatarungan, mahabagin, at mapagmahal na Panginoon. 

Ang pagpapala ng Panginoong Diyos ay inihatid ng misteryosong hari at saserdoteng si Melquisedec kay Abraham sa Unang Pagbasa. Isinalaysay sa Ikalawang Pagbasa kung paanong naitatag ang Sakramento ng Banal na Eukaristiya. Itinatag mismo ng Panginoong Hesus sa Huling Hapunan ang Sakramento ng Banal na Eukaristiya. Sa tuwing ipinagdiriwang ang Sakramento ng Banal na Eukaristiya, laging dumarating si Hesus upang ibigay muli ang Kanyang Katawan at Dugo bilang pagkain at inuming nagkakaloob ng kaligtasang walang hanggan. Kapag tatanggapin natin nang buong puso at kaluluwa ang pagkain at inuming ito, tinatanggap rin natin ang pagpapala ng walang hanggang kaligtasan. 

Batid ni Hesus na mapapahamak tayo kung hindi natin tatanggapin ang biyaya ng pagliligtas ng Diyos. Kaya naman, lagi Siyang dumarating sa Misa araw-araw upang ibigay ang Kanyang Kabanal-banalang Katawan at Dugo bilang pagkain at inuming naghahatid ng kaligtasan. 

MANAHIMIK NA LAMANG?

13 Hunyo 2022 

Paggunita kay San Antonio de Padua, pari at pantas ng Simbahan 

Lunes ng Ika-11 Linggo sa Karaniwang Panahon (II) 

1 Hari 21, 1-16/Salmo 5/Mateo 5, 38-42 

Antonio de Pereda, Saint Anthony of Padua and the Christ Child (1655), Public Domain

Madalas gamitin ng mga bumabatikos sa Simbahan bilang katwiran ang mga salitang binigkas ng Panginoon sa Ebanghelyo bilang katwiran na dapat tumahimik na lamang ang Simbahan sa mga usaping pulitikal o may kinalaman sa lipunan. Sabi ni Hesus sa Ebanghelyo na hindi dapat labanan ang masamang tao at dapat iharap ang kabilang pisngi kapag sinampal o ginagawan ng masama (Mateo 5, 39). Walang pakialaman dapat. Dapat magsalita lamang tungkol sa pagdarasal at sa mga esprituwal na bagay o usapin ang mga pari, madre, relihiyoso, at iba pang mga taong-Simbahan. 

Noong sinabi ni Hesus na hindi dapat labanan ang masasamang tao, sinabi ba Niyang dapat na tayong maging tahimik sa harap ng katiwalian at kasamaan na nagaganap sa lipunan? Hindi, hindi, at isang malaking HINDI. Walang sinabing ganyan si Hesus. Iyan ay isang baluktot na interpretasyon ng mga salitang ito ng Panginoon. Kung iyon ang ibig sabihin ni Hesus, hindi sana hinirang ang mga propeta sa Lumang Tipan at hindi rin Siya darating sa mundong ito upang iligtas ang sangkatauhan. Hahayaan na lamang Niya mapahamak ang sangkatauhan dahil sa kasamaan at kasalanan. 

Isang kasuklam-suklam na kaganapan ang isinalaysay sa Unang Pagbasa. Iyan ba ang nais ng Diyos? Hinangad ba ng Panginoong Diyos na ipapatay si Nabat ni Reyna Jezebel na kumikilos sa ngalan ni Haring Acab? Ang Panginoong Diyos ay natuwa ba nang masaksihan Niya mula sa langit ang kasuklam-suklam na gawang ito? Hindi. Sa Kanyang paningin, kasuklam-suklam ang gawaing ito. Ito ang dahilan kung bakit Siya humirang ng mga taong tulad ni Elias upang maging Kanyang propeta. Katunayan, si Elias ang propetang hinirang ng Panginoong Diyos noong naghari si Acab. Malakas na sinabi ni Propeta Elias kay Acab: "Malagim na parusa ang babagsak sa iyo!" (1 Hari 21, 21). Patunay lamang ito na hindi kinukunsinti ng Diyos ang kasamaan. 

Bakit sinabi ni Hesus sa Ebanghelyo na huwag labanan ang masama? Namutawi mula sa mga labi ni Hesus ang mga salitang ito dahil nais Niyang imulat ang lahat sa kahibingan ng kasamaan. Hindi sinabi ng Panginoong Hesus na manatiling tahimik sa harap ng kawalan ng hustisya. Ang ibig sabihin ni Hesus, ipakita kung paanong ang lahat ng mga masasamang gawain sa lipunan ay pawang kahibingan na hindi dapat umiral kailanman. Sa pamamagitan nito, itinuturo ng Panginoong Hesus na ang mga tao ay dapat kumilos upang makonsensya ang lahat ng mga gumagawa ng masama sa lipunan. Itinuturo ni Hesus na dapat maging mulat ang lahat sa kasamaang pilit na pinapairal ng mga masasama at kung paano sila gumagawa ng kahibangan. 

Ginugunita sa araw na ito si San Antonio de Padua. Lingid sa kaalaman ng marami, bukod sa pagiging pintakasi ng mga nawawalang bagay, kilala rin siya sa titulong Martilyo ng mga Erehe (Hammer of Heretics). Sa tulong ng Panginoon, nangaral siya tungkol sa katotohanan ng pananampalataya. Ipinaliwanag niya sa lahat ng tao ang pananampalatayang Katoliko at ipinagtanggol ang Simbahan mula sa kahibangang dulot ng maling impormasyon at kasinungalingang ng mga 'di-Katoliko noong mga araw na iyon. Ang mga maling impormasyon na ito ay naghahatid ng gulo sa isip. 

Kung mananatili tayong tahimik sa gitna ng kasamaan at katiwalian sa lipunan, ang ating pananampalataya bilang mga Katoliko ay walang saysay. Lalo lamang nating pinapairal ang kasamaan. Hindi iyan ang kalooban ni Kristo. 

DIYOS NG KATOTOHANAN

12 Hunyo 2022 

Dakilang Kapistahan ng Tatlong Persona sa Isang Diyos (K) 

Kawikaan 8, 22-31/Salmo 8/Roma 5, 1-5/Juan 16, 12-15 

Francisco Caro, The Holy Trinity (h. 1630), Public Domain

Nakakalungkot isipin na patuloy na lumalaganap ang kasinungalingan sa paglipas ng panahon. Habang patuloy na lumilipas ang panahon, lalo lamang lumalaganap ang iba't ibang uri ng kasinungalingan. Sa pamamagitan nito, patuloy na inaabuso ng ilan ang kabutihang hatid ng makabagong teknolohiya. Ang makabagong teknolohiya ay mabuti at maganda naman talaga. Subalit, mayroong mga nagpapasiyang gamitin ito sa pagpapalaganap ng kasinungalingan. Dahil diyan, marami ang nauto at nalinlang. Tunay ngang kawawa ang mga nabudol at nabiktima ng kasinungalingang patuloy na umiiral sa kasalukuyang panahon dahil sa pang-aabuso sa makabagong teknolohiya. 

Sa halip na maghatid ng tunay na pagkakaisa, ang pagkakawatak-watak, hidwaan, at pang-aabuso sa mga inaapi ay lalo lamang lumaganap. Ang mga nagpapalaganap ng kasinungalingan naman ay nakikinabang rito, lalo't higit mga kasabwat sila ng mga magnanakaw, sinungaling, at mamamatay-tao. Napakalinaw na tanging pansariling interes lamang ang lagi nilang iniisip. Wala silang pakialam sa ikabubuti ng ibang tao, lalung-lalo na ng mga mahihirap. Ang tingin nila sa posisyon ay pag-aari. Inuuto nila ang ibang tao upang maisip nilang paglilingkuran nila ang komunidad. Subalit, hindi naman iyon ang tunay nilang layunin. Nagkakaisa sila hindi upang maglingkod kundi upang samantalahin ang kapangyarihan at kayamanan. 

Ang matindi pa rito ay ang kasinungaling pinaiiral nila na kalooban ng Panginoon na mailuklok sila sa kapangyarihan. Talagang dinamay pa nila ang Diyos sa kanilang mga kasinungalingan. Gagamitin nila ang Diyos upang utuin ang mga tao, lalung-lalo na't batid nilang ang mga tao ay relihiyoso. Sasamantalahin ang pagiging madasalin at relihiyoso ng mga tao para lamang sa sariling interes. 

May hatid na magandang balita para sa atin ang Linggong ito. Hindi iyan ang Diyos na ating sinasamba. Ang tunay at nag-iisang Diyos na binubuo ng Tatlong Persona ay hindi Diyos ng kasinungalingan kundi Diyos ng katotohanan. Napakalinaw naman ito sa pahayag ng Panginoong Hesukristo sa mga apostol sa Ebanghelyo: "Pagdating ng Espiritu ng katotohanan, tutulungan Niya kayo upang maunawaan ninyo ang buong katotohanan" (Juan 16, 13). Napakalinaw naman ang sinabi ni Hesus. Ang Diyos ay bukal ng katotohanan. Darating ang Espiritu Santo bilang Patnubay ng mga apostol upang ipaalala sa kanila ang katotohanan. Ang kaloob ng Banal na Santatlo sa lahat ng tao ay katotohanan, hindi kasinungalingan. 

Inihayag sa Unang Pagbasa na nilikha ng Diyos ang lahat ng bagay. Sabi naman sa pangaral ni Apostol San Pablo sa Ikalawang Pagbasa na naghatid ng kaligtasan, pag-asa, at pag-ibig ang Diyos. Patunay lamang na puro kabutihan ang kaloob sa atin ng Banal na Santatlo. Kung puro kabutihan ang mga kaloob ng Banal na Santatlo, bakit naman kasinungalingan ang ipagkakaloob ng Ama, Anak, at Espiritu Santo? 

Tandaan, ang Panginoong Diyos na ating sinasamba, ang Banal na Santatlo, ay Diyos ng katotohanan. 

WALANG HANGGAN

9 Hunyo 2022 

Kapistahan ng Panginoong Hesukristo, Walang Hanggan at Dakilang Pari 

Jeremias 31, 31-34 (o kaya: Hebreo 10, 11-18)/Salmo 110/Marcos 14, 22-25 

Justus van Gent, The Institution of the Eucharist (c. 1473-1475), Public Domain

Walang Hanggan at Dakilang Pari. Ito ang titulo ng Panginoong Hesus na nais bigyan ng pansin ng Simbahan sa Kapistahang ipinagdiriwang sa araw na ito. Ang Pistang ipinagdiriwang ng Simbahan sa araw na ito ay inilaan upang ituon ang ating pansin sa katotohanang walang permanente sa mundong ito. Isa lamang ang walang hanggan - ang Panginoon. Ang Panginoong Hesukristo ay tunay na Hari at Pari na mananatili magpakailanman. Darating ang araw na tuluyang guguho ang mundong ito, ang mga gusaling itinayo ay babagsak. Patunay ito na may hangganan ang lahat ng bagay dito sa mundo. 

Gaya ng sabi sa Salmong Tugunan para sa araw na ito: "Ika'y paring walang hanggan katulad ni Melquisedec" (Salmo 110, 4b). Si Hesus ay ang Dakilang Pari na mananatili magpakailanman. Sabi sa Sulat sa mga Hebreo na ang Panginoong Hesus "ay minsan lamang naghandog dahil sa mga kasalanan, at iyo'y sapat na. Pagkatapos, lumuklok Siya sa kanan ng Diyos" (10, 12). Ano ang inihandog ni Kristo Hesus bilang kabayaran para sa mga kasalanan ng sangkatauhan? Inihandog Niya ang Kanyang Katawan at Dugo, tulad ng nasasaad sa salaysay ng pagtatag sa Banal na Eukaristiya sa Huling Hapunan na itinampok sa Ebanghelyo para sa Kapistahang ito. Sa pamamagitan nito, isang tipan ang ginawa ng Panginoong Hesus na mananatili magpakailanman. 

Inihayag ng Panginoon sa aklat ni Propeta Jeremias na muli Siyang gagawa ng isang panibagong tipan sa pagitan Niya at ng Kanyang bayan sa kabila ng kanilang paulit-ulit na pagkakasala laban sa Kanya (31, 31). Ang Walang Hanggan at Dakilang Pari na si Hesus ay gumawa ng isang panibagong tipan nang Kanyang itatag ang Banal na Eukaristiya sa salaysay ng Huling Hapunan na itinampok sa Ebanghelyo. Iyan ang dahilan kung bakit si Hesus ay ang Walang Hanggan at Dakilang Pari. Gumawa Siya ng tipan na pang-magpakailanman. Ang minsanang pag-aalay ng buo Niyang sarili sa krus ay naghatid ng kaligtasan. Ito rin ang dahilan kung bakit si Hesus ay patuloy na dumarating sa Sakramento ng Eukaristiya upang ipagkaloob ang Kanyang Kabanal-banalang Katawan at Dugo sa atin bilang pagkain at inuming nagliligtas. 

Ang mga pari ng Simbahan ay sagisag lamang ng Walang Hanggan at Dakilang Pari na walang iba kundi si Kristo Hesus. Bilang mga larawan ng Panginoong Hesukristo, patuloy silang sumasaksi sa katotohanan na walang iba kundi Siya na naghandog ng buo Niyang sarili upang iligtas ang sangkatauhan. Lagi rin nilang ipinapaalala sa ating lahat na mayroong hangganan ang lahat ng bagay dito sa mundo tulad na lamang ng katiwalian at kasamaan dahil iyon naman ang katotohanan. Sa pamamagitan nito, itinuturo nila kung saan matatagpuan ang tunay na walang hanggan - kay Hesus. 

ANG ATING INA

6 Hunyo 2022 

Paggunita sa Mahal na Birheng Mariang Ina ng Simbahan 

Genesis 3, 9-15. 20 (o kaya: Mga Gawa 1, 12-14)/Salmo 86/Juan 19, 25-34 

Sandro Botticelli, The Descent of the Holy Ghost (c. 1495-1505), Public Domain

"Narito ang iyong ina!" (Juan 19, 27). Ang mga salitang ito ay binigkas ni Hesus mula sa krus kay Apostol San Juan na kumakatawan sa buong Simbahan sa mga sandaling yaon. Ang Simbahan ay pinagkalooban ng isang napakahalagang regalo: isang Ina sa katauhan ni Maria. Hindi lamang inihabilin ng Panginoong Hesus ang Mahal na Ina sa pangangalaga ni Apostol San Juan. Bagkus, ang Simbahan ay Kanya ring inihabilin sa maka-inang pagkalinga ni Maria. Sa pamamagitan ng Kanyang pagbigay kay Mariang Birhen sa Simbahan, ibinilang ni Hesus ang Simbahan sa Kanyang pamilya. 

Bilang ating Ina, hindi pabaya si Maria. Laging sinasamahan at kinakalinga ng Mahal na Birheng Maria ang lahat ng mga bumubuo sa Simbahan. Si Maria ang babaeng inilarawan ng Panginoong Diyos sa Kanyang pahayag tungkol sa Kanyang pagtubos sa sangkatauhan sa aklat ng Genesis (3, 15). Subalit, sa kabila nito, ibinigay pa rin ni Hesus si Maria sa atin upang maging ating Ina, kahit na hindi tayo karapat-dapat na mabigyan ng ganitong karangalan, pag-aruga, at pagsanggalang. Ibinigay si Maria sa atin para sa ating ikabubuti. Bilang ating Ina, ang Mahal na Birheng Maria ay laging kasama natin upang kalingain, tulungan, at ipagsanggalang. Ang kanyang ginawa sa unang kabanata ng Mga Gawa ng mga Apostol ay isang halimbawa nito. Sa silid na pinagtitipunan ng mga apostol, nandoon siya kasama nila (Mga Gawa 1, 14). 

Mayroon tayong Ina - ang Mahal na Birheng Maria. Ibinigay siya ng Panginoon sa atin upang maging ating kasama sa lahat ng oras. Hindi niya tayo pababayaan. Lagi niya tayong sasamahan, kakalingain, at ipagtatanggol. 

ANG PAGBABAGONG HATID NG ESPIRITU SANTO

5 Hunyo 2022 

Linggo ng Pentekostes (K) 

Mga Gawa 2, 1-11/Salmo 103/1 Corinto 12, 3b-7. 12-13 (o kaya: Roma 8, 8-17)/Juan 20, 19-23 (o kaya: 14, 14, 15-16. 23b-26) 

Hans Multscher, Pentecost (1437), Public Domain

Tiyak na pamilyar para sa marami ang kuwento ni Himura Kenshin. Bago siya nakilala bilang tagapagtanggol ng mga inaapi na hindi gumagamit ng espada upang pumatay, nakilala siya bilang isang mamamaslang. Si Kenshin ay kinatakutan ng marami dahil sa kanyang bilis at husay sa paggamit ng espada upang paslangin ang kanyang mga makakabalan. Subalit, hindi siya namuhay bilang mamamaslang habambuhay. Ang landas ng pagbabagong-buhay ay sinimulan niyang tahakin mula noong nakilala niya ang kanyang unang asawang si Yukishiro Tomoe. Isinalaysay ng pelikulang Rurouni Kenshin: The Beginning at ng Rurouni Kenshin OVA: Trust and Betrayal ang bahaging iyon ng kanyang buhay. 

Ang Linggo ng Pentekostes ay kilala bilang Kaarawan ng Simbahan. Sa Linggong ito, inaaalala natin ang pagpanaog ng Espiritu Santo sa mga apostol. Sinimulan agad ng mga apostol ang kanilang misyon bilang mga saksi ng Panginoong Hesus na Muling Nabuhay matapos ang pagpanaog ng Banal na Espiritu sa kanila. Ang misyong ito ay patuloy na tinutupad ng Simbahan sa kasalukuyan. Patuloy na sumasaksi kay Kristo Hesus na Muling Nabuhay ang Simbahan. 

Pagbabago ang tema ng Linggo ng Pentekostes. Ang mga apostol ay nakaranas ng matinding pagbabago sa kanilang buhay dahil sa Espiritu Santo. Niloob ng Diyos na baguhin ng Espiritu Santo ang buhay ng mga apostol. Ang mga apostol naman ay naging bukas sa biyaya ng pagbabagong kaloob ng Diyos. Tinanggap nila ang Espiritu Santo. Dahil sa Espiritu Santo, nagbago ang kanilang buhay. Ang kanilang takot ay tuluyang napawi at napuno sila ng kagitingan upang harapin ang mga pagsubok na kaakibat ng kanilang misyon bilang mga saksi ni Kristong Muling Nabuhay. 

Isinalungguhit ng salaysay ng simula ng misyon ng Simbahan sa Unang Pagbasa ang pagbabagong dulot ng Espiritu Santo sa mga apostol. Ang mga apostol ay binago ng Espiritu Santo. Mula sa pagiging mga duwag na nagtatago mula sa mga autoridad, lumabas sila mula sa silid na kanilang pinagtitipunan at pinagtataguan upang buong sigasig na magpatotoo tungkol sa Panginoong Hesukristo. Sabi sa Salmo para sa maringal na Kapistahang ipinagdiriwang sa Linggong ito, "Espiritu Mo'y suguin, Poon, tana'y 'Yong baguhin" (Salmo 103, 30). Binago ng Espiritu Santo ang mga apostol. Dahil sa Espiritu Santo, naging mga magigiting na saksi ng Panginoong Hesukristo ang mga apostol. 

Sabi ni Apostol San Pablo sa Ikalawang Pagbasa na kung ang mga Kristiyano ay hindi pinapatnubayan ng Espiritu Santo, walang makapagsasabing si Hesus ay Panginoon (1 Corinto 12, 3b). Tanging ang Espiritu Santo lamang ang makakatulong sa lahat ng mga Kristiyano na ipahayag nang may lakas ng loob na si Hesus ay Panginoon at Diyos. Ito ang naranasan ng mga apostol sa Unang Pagbasa. Nagkaroon sila ng lakas ng loob upang ipahayag na si Hesus ay Panginoon at Mesiyas. Walang takot nilang ipinangaral ang Mabuting Balita tungkol kay Kristo. Dahil sa tulong ng Espiritu Santo, walang takot nilang tinupad ang misyong ibinigay sa kanila ng Muling Nabuhay na si Hesus sa Ebanghelyo. Sabi Niya sa Ebanghelyo: "Kung paanong sinugo Ako ng Ama, gayon din naman, sinusugo Ko kayo" (Juan 20, 21). Isinugo ni Hesus ang mga apostol upang magpatotoo tungkol sa Kanya sa iba't ibang panig ng daigdig. 

Dagdag pa ni Apostol San Pablo, dahil sa Espiritu Santo, ang bawat Kristiyano ay may karapatang tawagin ang Diyos bilang ating Ama (Roma 8, 15). Binabago ng Espiritu Santo ang lahat ng tao. Tanging ang Espiritu Santo lamang ang makakatulong sa bawat tao na baguhin ang kanilang buhay. Mula sa pagiging makasalanan, maaaring maging mga anak ng Diyos ang bawat tao dahil sa Espiritu Santo. Tutulungan rin ng Espiritu Santo ang mga anak ng Diyos na sumunod at ibigin nang buong puso bilang kapatid ang Panginoong Muling Nabuhay na si Hesus, ang Kanyang Bugtong na Anak na nagsabing "Kung iniibig ninyo Ako, tutuparin ninyo ang Aking mga utos" (Juan 14, 15). Iyan ang pagbabagong dulot ng Espiritu Santo. Ang bawat isa sa atin ay nagiging mga saksi ni Kristo at nagiging bahagi na rin ng pamilya ng Diyos. 

Katulad ng mga apostol noong Pentekostes, maging bukas nawa tayo sa biyaya ng pagbabagong hatid ng Espiritu Santo. Hayaan nating tulungan tayo ng Espiritu Santo na baguhin ang ating buhay upang mamuhay tayo bilang mga anak ng Diyos.