ANG TUNGKULIN NG BAWAT KRISTIYANO

21 Disyembre 2022 

Misa de Gallo/Simbang Gabi: Ikaanim na Araw 

Awit 2, 8-14 (o kaya: Sofonias 3, 14-18a)/Salmo 32/Lucas 1, 39-45 

Heimsuchung Mariae (c. 1696) by Luca Giordano (1634-1705) from the Kunsthistorisches Museum Collection is in the Public Domain ("No Known Copyright") in its place of origin and other countries and areas where the copyright term is the author's life plus 100 years or fewer due to its age. 

Ang mga Pagbasa para sa araw na ito ay nakasentro sa pagpapahayag ng tapat na pananalig at pananampalataya sa Diyos. Bilang mga Kristiyano, mayroon tayong dapat gawin. Mayroong ipinapagawa sa atin ang Panginoong Diyos. Iba't iba man ang mga bokasyon ng isa't isa, mayroong iisang katangian at layunin ang mga ito. Bukod sa pagiging bigay sa atin ng Panginoong Diyos ang mga misyon at bokasyong ito, ang layunin ito ay pangkalahatan. Ang pangkalahatang layunin ng ating mga misyon at bokasyon sa buhay natin sa mundong ito ay ipalaganap ang biyaya ng Diyos. 

Sa Unang Pagbasa, inilarawan sa pamamagitan ng matalinghagang paglalarawan ng magkabiyak ng puso ang pag-ibig ng Panginoong Diyos para sa Kanyang bayan. Ang bayan ng Diyos ay nagagalak dahil sa Kanya na tunay at wagas na umiibig. Ang pag-ibig ng Diyos ay nagdudulot ng galak sa lahat ng mga tapat sa Kanya. Katunayan, ang tema ring ito ay siya ring pinagtuunan ng pansin sa alternatibong Unang Pagbasa. Sa Panginoong Diyos lamang nagmumula ang tunay na galak at ibinabahagi Niya ito sa lahat ng mga tapat na nagmamahal, sumasamba, nananalig, at sumasampalataya sa Kanya. Sa Ebanghelyo, ang sanggol na si San Juan Bautista, bagamat dinadala pa siya ng kanyang inang si Elisabet, ay gumalaw sa tuwa nang marinig nilang mag-ina ang pagbati ng Mahal na Inang si Mariang Birhen na nagdadala sa ipinangakong Mesiyas at Manunubos na si Jesus Nazareno. Sa pamamagitan ng Mahal na Inang si Mariang Birhen, dumating sa tahanan nina Elisabet at Zacarias ang pinagmulan ng lahat ng pagpapala na nagdudulot ng tunay na kagalakan sa lahat ng mga tapat sa Kanya: ang Mahal na Poong Jesus Nazareno. 

Inilarawan ng salaysay ng Pagdalaw ng Mahal na Inang si Mariang Birhen sa kanyang kamag-anak na si Elisabet sa Ebanghelyo para sa araw na ito ang pangkalahatang bokasyon at tungkulin ng lahat ng mga Kristiyano: ipalaganap ang tunay na galak at pag-asang kaloob ng Panginoon. Ito ang ating misyon bilang mga Kristiyano. Ito ang halimbawang ipinakita ng Kaban ng Bagong Tipan na walang iba kundi ang ating Ina na walang iba kundi ang Mahal na Birheng Maria. Dinala ng Mahal na Ina sa kanyang sinapupunan sa loob ng siyam na buwan ang ipinangakong Tagapagligtas na si Kristo, ang Poong Jesus Nazareno. Hindi niya sinarili lamang ang pinakadakilang biyayang ito mula sa Diyos. Subalit, ibinahagi niya ito sa kamag-anak niyang si Elisabet na dala-dala sa kanyang sinapupunan ang sanggol na si Juan Bautista sa mga oras na iyon. 

Dinala ng Mahal na Inang si Mariang Birhen ang Panginoong Jesus Nazareno. Subalit, ano ang dala ng ilang mga tao sa kasalukuyan? Mga masasamang bagay katulad na lamang ng pekeng balita, panlilinlang, at paninirang-puri. Katunayan, marami sa mga pekeng balita, panlilinlang, at paninirang-puring ipinapalaganap ng ilang mga tao sa kasalukuyang panahon ay galing sa mga masisikat na tao katulad na lamang ng mga taong nakaluklok sa kapangyarihan sa lipunan. May hawak nga silang kapangyarihan, subalit ang tangi nilang inaatupag ay pagpapabango ng kanilang mga pangalan. Sa halip na gamitin ang kapangyarihan para sa ikabubuti ng pamayanan, ginagamit ito upang mang-uto at manloko ng mga inosente. Tapos, marami ang magpapadala sa garapalang panlilinlang ng mga ito gamit ang kanilang kapangyarihan. Magbubulag-bulagan at magbibingi-bingihan sa kawalan ng hustisiya sa lipunan. Bakit nga ba ito nangyayari sa lipunan? Anong nangyari sa pang-unawa ng marami sa lipunan? 

Mayroong tungkulin at misyong ibinibigay sa atin ang Panginoong Diyos. Subalit, ang tungkulin at misyong ito ay tatanggapin at tutuparin ba natin? Ito ang tanong para sa ating lahat ng Simbahan sa araw na ito, ang ikaanim na araw ng ating tradisyunal na Pagsisiyam o Nobenaryo bilang paghahanda para sa Dakilang Kapistahan ng Pasko ng Pagsilang ng Panginoong Jesus Nazareno. Ano ang ating desisyon? Ang misyong ibinibigay sa atin ng Poong Jesus Nazareno ay atin bang tatanggapin at tutuparin? 

Nais ba nating kalugdan tayo ng Mahal na Poong Jesus Nazareno? Ipalaganap natin ang Kanyang pag-ibig at biyaya sa lahat. Huwag nating ipagkait mula sa kapwa-tao, lalung-lalo na sa mga kapus-palad, ang Kanyang pag-ibig at biyaya na sagisag ng galak at pag-asang Kanyang ipinagkakaloob sa lahat ng tao. Huwag tayong maging mga tagapagpalaganap ng pekeng balita, panlilinlang, at paninirang-puri. Matutuwa sa atin si Jesus Nazareno kapag ito ang ating ginawa sapagkat ito ang tungkuling bigay Niya sa atin. Ang pagtupad sa tungkuling bigay Niya sa atin ay magpapatunay tunay at wagas ang ating debosyon at pamamanata sa Kanya. 

ANG UNANG DEBOTO NG MAHAL NA POONG JESUS NAZARENO

20 Disyembre 2022 

Misa de Gallo/Simbang Gabi: Ikalimang Araw

Isaias 7, 10-14/Salmo 23/Lucas 1, 26-38 

Annunciation (circa 1590) by Annibale Carracci (1560-1609), formerly attributed to Ludovico Carracci (1555-1619), from a Private Collection, is in the Public Domain ("No Known Copyright") in its country of origin and other areas where the copyright term is the author's life plus 100 years or less due to its age.

Bukod sa pagiging Ina ng Diyos, ang Mahal na Inang si Mariang Birhen ay kinikilala rin ng Simbahan bilang unang apostol ng Panginoong Hesukristo. Sa pamamagitan ng tawag na ito sa kanya, ang unang alagad ni Kristo, isinalungguhit ng Simbahan ang pagiging tapat at masunurin ng Mahal na Birheng Maria sa kalooban ng Diyos. Gaano mang kahirap unawain at tumalima sa kalooban ng Diyos, ipinasiya pa rin ni Maria na isuko at ihandog ang buo niyang sarili sa Kanyang kalooban. Ang kalooban ng Poong Diyos ay buong kababaang-loob at pananalig na tinanggap at sinundan ng Kalinis-linisang Inang si Maria bilang pag-aalay ng sarili sa Kanya. Kaya naman, itinatampok siya, ang Ina ng Diyos na siya ring Kaban ng Bagong Tipan, ng Simbahan bilang isang halimbawang marapat lamang tularan ng lahat ng mga Kristiyano. 

Dahil buong kababaang-loob na inihandog ng Mahal na Inang si Mariang Birhen ang buo niyang sarili sa Diyos sa pamamagitan ng pagtanggap at pagsunod sa Kanyang kalooban, nararapat lamang siyang kilalanin bilang unang deboto ng Mahal na Poong Jesus Nazareno. Katulad ng katangiang pinagtutuunan ng pansin sa tawag sa kanya na unang alagad ni Hesus, isinasalungguhit rin ng pagkilala sa Mahal na Birhen bilang unang deboto ng Mahal na Poong Jesus Nazareno ang kanyang pananalig sa Diyos na inihayag niya sa pamamagitan ng pagsunod sa Kanyang kalooban. 

Nakasentro sa pagiging unang deboto ng Poong Jesus Nazareno ng Mahal na Birhen ang mga Pagbasa sa Misa para sa araw na ito, ang ikalimang araw ng tradisyunal na Pagsisiyam o Nobenaryo na isinasagawa natin taun-taon bilang paghahanda ng mga sarili natin para sa maringal na pagdiriwang tuwing ika-25 ng Disyembre na walang iba kundi ang Dakilang Kapistahan ng Pasko ng Pagsilang ng Panginoon. Kusa niyang tinanggap at sinunod ang kalooban ng Diyos, kahit mahirap itong gawin.

Sa Unang Pagbasa, inihayag ng Panginoong Diyos sa pamamagitan ni Propeta Isaias kung paano Niya ililigtas ang lahat ng tao. Sa pamamagitan ng Banal na Sanggol na isisilang ng isang dalaga pagdating ng panahong itinakda, darating sa mundong ito ang pagpapala ng pagliligtas ng Panginoong Diyos na sumasalamin sa Kanyang awa't pag-ibig para sa lahat (Isaias 7, 14). Sa Ebanghelyo, ipinakilala kung sino ang babaeng tinukoy ng Diyos sa propesiya sa Unang Pagbasa: ang Mahal na Inang si Mariang Birhen. Tinanggap ng Mahal na Inang si Mariang Birhen ang papel at misyon na ito na niloob ng Panginoon na kanyang gampanan at tupdin. Sa pamamagitan nito, ang debosyon ng Mahal na Inang si Mariang Birhen sa Poong Jesus Nazareno na kanyang minamahal na Anak ay nahayag. 

Tinuturuan tayo ng Mahal na Inang si Mariang Birhen, ang unang deboto ng Mahal na Poong Jesus Nazareno, kung paano tayo magiging mga tunay na deboto ng kanyang Anak tulad niya. Ang tunay na deboto ng Mahal na Poong Jesus Nazareno ay laging handang makinig, tumanggap, sumunod, at tumalima sa Kanya at sa Kanyang mga loobin nang may pananalig at kababaang-loob. Ito ang magpapatunay na ang ating debosyon sa Panginoong Jesus Nazareno ay tapat at autentiko. 

ANG TANGING MAAASAHAN AT MAPAGKAKATIWALAAN

19 Disyembre 2022 

Misa de Gallo/Simbang Gabi: Ikaapat na Araw 

Mga Hukom 13, 2-7. 24-25a/Salmo 70/Lucas 1, 5-25 

The Birth of John the Baptist Announced to Zacharias (circa 1635) by Massimo Stanzione (1586-1656) from the Museo del Prado Collection is in the Public Domain ("No Known Copyright") in its country of origin and other areas where the copyright term is the author's life plus 100 years or less due to its age.

Itinuturo sa atin ng Simbahan sa ikaapat na araw ng ating tradisyunal na Pagsisiyam o Nobenaryo bilang paghahanda ng sarili para sa Dakilang Kapistahan ng Pasko ng Pagsilang ng Panginoong Jesus Nazareno na ipagdiriwang sa ika-25 ng Disyembre sa tunay na maaasahan at mapagkakatiwalaan. Isa lamang ang tunay at tangi nating maaasahan at mapagkakatiwalaan sa lahat ng oras: ang Diyos. Ang Diyos lamang ang tunay at tanging maaasahan at mapagkakatiwalaan sa lahat ng oras. Ang Diyos lamang ang hindi papapalpak at sasablay. Hindi tayo bibiguin at sisiphayuin ng Diyos. 

Sa Unang Pagbasa, isinalaysay ang isang pagkakataon sa Lumang Tipan kung kailan ipinamalas ng Diyos ang Kanyang kahanga-hangang kapangyarihan. Ang Panginoong Diyos ay gumawa ng isang kahanga-hangang himala para sa asawa ng isang lalaking kabilang sa lipi ni Dan na nagngangalang Manoa. Niloob ng Panginoon na maglihi at magsilang ng isang sanggol na lalaking nagngangalang Samson ang asawa ni Manoa, bagamat isa siyang baog. Kung hindi dahil sa Diyos, si Samson ay hindi isisilang ng asawa ni Manoa. Ang pangako ng Panginoon sa asawa ni Manoa na ibinalita sa kanya ng isang anghel na nagpakita sa kanya ay Kanyang tinupad. Patunay lamang ito na tanging ang Diyos lamang ang maaasahan at mapagkakatiwalaan. 

Tila inulit ng Panginoong Diyos ang kahanga-hangang gawang ito sa Bagong Tipan sa pamamagitan ng paglihi at pagsilang ni San Juan Bautista. Sa Ebanghelyo para sa araw na ito, isinalaysay ang pagbabalita ng Arkanghel San Gabriel sa ama ni San Juan Bautista na si Zacarias tungkol sa magiging anak nila ni Elisabet na kanyang kabiyak ng puso. Sa kabila ng kanilang katandaan at ang pagiging baog ni Elisabet, niloob ng Diyos na maglihi at magsilang si Elisabet ng isang sanggol na lalaki na walang iba kundi si San Juan Bautista. Bagamat nagduda si Zacarias at humingi ng isang tanda upang mapatunayan ito, hindi binawi ng Diyos ang pangakong ito na ibinalita ni San Gabriel Arkanghel sa kanya. Ipinaglihi at isinilang ni Elisabet ang sanggol na lalaking magiging tagapaghanda ng daraanan ng ipinangakong Mesiyas at Tagapagligtas na si Jesus Nazareno - si San Juan Bautista. 

Ang mga kahanga-hangang gawang itinampok at isinalaysay sa mga Pagbasa para sa araw na ito ay hindi posible sa paningin at pananaw ng tao. Subalit, nangyari ang lahat ng ito dahil sa Diyos. Niloob ng Diyos na mangyari ang lahat ng mga ito. Sa pamamagitan nito, pinatunayan ng Diyos na Siya lamang ang tanging maaasahan at mapagkakatiwalaan. Ang imposible sa paningin ng tao ay pinangyari ng Panginoong Diyos. Sa Diyos, ang lahat ay posible at maaaring mangyari. 

Hindi tayo bibiguhin at sisiphayuin ng Panginoong Diyos. Siya lamang ang tanging maaasahan at mapagkakatiwalaan sa lahat ng oras. Ang pinakadakilang patunay nito ay walang iba kundi ang Mahal na Poong Jesus Nazareno. 

ANG KANYANG WALANG MALIW NA KATAPATAN

18 Disyembre 2022 

Ikaapat na Linggo sa Panahon ng Pagdating ng Panginoon (A) 

Misa de Gallo/Simbang Gabi: Ikatlong Araw 

Isaias 7, 10-14/Salmo 23/Roma 1, 1-7/Mateo 1, 18-24

 

Sueño de San José by Vicent López Portaña (1772-1850) from the Museo del Prado Collection is in the Public Domain ("No Known Copyright") in its country of origin and in other areas where the copyright term is the author's life plus 100 years or fewer due to its age. 

Itinutuon ng Simbahan sa Linggong ito ang ating pansin sa larawan ng Diyos bilang ating palagiang kapiling at kasama. Ang Diyos ay lagi nating kapiling at kasama. Ang pagdating ng Panginoon na lagi nating kapiling at kasama sa lahat ng oras ay ating hinihintay at pinaghahandaan nang may galak at pag-asa. Bagamat lagi naman natin Siyang kapiling at kasama sa lahat ng oras at sandali ng ating buhay dito sa mundo, darating Siya upang patunayan sa atin ang Kanyang pagiging malapit sa atin. 

Nakasentro sa mga kaganapan bago ang unang pagdating ng ipinangakong Mesiyas at Tagapagligtas na walang iba kundi si Jesus Nazareno bilang Banal na Sanggol na isinilang ng Mahal na Inang si Mariang Birhen sa isang sabsaban ang mga Pagbasa para sa Misa ng Ikaapat at Huling Linggo sa Panahon ng Pagdating ng Panginoon na mas kilala natin sa tawag na Adbiyento na tumapat rin sa ikatlong araw ng Simbang Gabi, ang ating tradisyunal na Pagsisiyam o Nobenaryo bilang paghahanda ng mga sarili natin para sa Dakilang Kapistahan ng Pasko ng Pagsilang ng Panginoon sa ika-25 ng Disyembre, ngayong taon.

Sa Unang Pagbasa, inihayag ng Panginoong Diyos sa pamamagitan ni Propeta Isaias kung paano Niya tutuparin ang pangako ng kaligtasan. Ang ipinangakong Manunubos na tatawaging Emmanuel ay ipanganganak ng isang dalaga (Isaias 7, 14). Darating ang biyaya ng pagliligtas ng Diyos na magkakaloob ng galak at pag-asa sa tanan sa pamamagitan ng Banal na Sanggol na kikilalanin bilang Emmanuel. Sa salaysay sa Ebanghelyo, ipinakilala kung sino ang Banal na Sanggol at ang dalaga sa pahayag na inilahad sa Unang Pagbasa. Ang Mahal na Inang si Mariang Birhen ay ang dalagang tinukoy ng Diyos sa Kanyang pahayag na inilahad ni Isaias sa Unang Pagbasa. Ang Banal na Sanggol naman ay walang iba kundi ang Mahal na Poong Jesus Nazareno. 

Mismong si Apostol San Pablo ang nagsabi sa Ikalawang Pagbasa na noon pa man ay inihayag na ng Diyos ang pangakong ito (Roma 1, 2). Sa pamamagitan nito, nahayag ang pagiging tapat ng Diyos. Hindi nakakalimot ang Diyos sa Kanyang pangako. Hindi nakalimutan ng Diyos ang pangakong Kanyang inihayag noon pa mang una. Ito ang tanging dahilan kung bakit ang Pangalawang Persona ng Banal na Santatlo na Siya ring Bugtong na Anak ng Diyos na walang iba kundi ang Poong Jesus Nazareno ay dumating sa mundong ito bilang Banal na Sanggol na ipinanganak ng Mahal na Inang si Mariang Birhen at darating muli sa wakas ng panahon bilang Dakilang Hukom. Si Jesus Nazareno ay dumating at darating muli upang patunayang tapat Siya sa mga pangakong Kanyang binitiwan. Ang pagiging tapat ng Panginoon sa mga pangakong binitiwan sa ay nagdudulot ng tunay na galak at pag-asa sa tanan.

Katunayan, sa tampok na salaysay ng mga kaganapan sa Ebanghelyo, ang Diyos ay nagdulot ng tunay na galak at pag-asa na tanging sa Kanya lamang nagmumula kay San Jose. Ang lungkot at sakit na dinidibdib at dinadala ni San Jose sa kanyang puso dahil sa kumakalat na balita tungkol sa pagdadalantao ng Mahal na Inang si Mariang Birhen na kanyang iniirog at sinisintang lubos ay pinawi ng Diyos sa pamamagitan ng mga salitang inihayag sa kanya ng anghel na nagpakita sa kanyang panaginip. Ang pangako ng Diyos na tutuparin Niya sa pamamagitan ni Mariang Birhen at ng Poong Jesus Nazareno ay ibinalita ng anghel kay San Jose sa panaginip. Naakit sa pagiging tapat ng Diyos si San Jose. Ito ang dahilan kung bakit tinanggap niya nang tahimik ang kalooban ng Panginoon para sa kanya. Ang puso ni San Jose na puno ng sakit at lungkot ay pinuno ng Diyos ng tunay na galak at pag-asang nagmumula sa Kanya. 

Ang Diyos ay lagi nating kapiling at kasama. Siya, na lagi nating kapiling at kasama sa bawat sandali, ay tapat sa Kanyang pangako. Ang patunay ng katapatan ng Diyos na hindi magmamaliw ay walang iba kundi ang Mahal na Poong Jesus Nazareno. Sa pamamagitan nito, ibinubuhos ng Panginoon sa atin ang tunay na galak at pag-asang nagmumula lamang sa Kanya. 

ANG HILING NG TUNAY NA HARI

17 Disyembre 2022 

Misa de Gallo/Simbang Gabi: Ikalawang Araw 

Genesis 49, 2. 8-10/Salmo 71/Mateo 1, 1-17 

Screenshot: "LIVE: Simbang Gabi - December 19, 2021 (4:30 am)" TV Maria Facebook Live.

Tiyak na kabisado na ng marami sa atin ang isa sa mga pinakamasikat na tugon na ginagamit para sa Panalangin ng Bayan sa tuwing ipinagdiriwang ang Sakramento ng Banal na Eukaristiya: "Panginoon, dinggin Mo ang aming panalangin." Katunayan, ang mga salitang ito na kadalasang ginagamit bilang tugon sa Panalangin ng Bayan sa pagdiriwang ng Banal na Eukaristiya ay maaari nating ituring na buod ng mga dahilan kung bakit marami ang mga nagpupuyat sa gabi ng ika-15 hanggang sa ika-23 ng Disyembre o kaya gumigising ng napakaaga sa madaling araw ng ika-16 hanggang sa ika-24 ng Disyembre para sa Simbang Gabi. Marami sa atin ay mayroong mga nais hilingin sa Panginoong Diyos. 

Wala namang masama sa paghingi sa Diyos. Katunayan, sabi nga ni Jesus Nazareno sa isa sa Kanyang mga pangaral tungkol sa pananalangin sa Diyos: "Humingi kayo at kayo'y bibigyan; humanap kayo, at kayo'y makasusumpong; kumatok kayo at ang pinto'y bubuksan para sa inyo" (Mateo 7, 7; Lucas 11, 9). Hinihikayat at hinihimok tayo na idulog natin sa Panginoon ang ating mga pangangailangan at kahilingan nang may taos-pusong kababaang-loob at pananalig sa Kanya. Huwag tayong mahiyang lumapit sa Panginoong Diyos upang idulog sa Kanya ang ating mga kahilingan. Ang ating mga kahilingan ay ipagkakaloob sa atin ng Panginoong Diyos kung ang mga hinihiling natin ay para sa ating ikabubuti.

Hinihikayat tayong idulog sa Diyos ang ating mga kahilingan. Subalit, isang malaking problema para sa atin kung ang Panginoon ay ituturing nating tagatupad o tagabigay lamang ng ating mga kahilingan. Tila, parang tayo na mismo ang nagiging amo ng Diyos. Parang dinidikta na natin sa Diyos kung ano ang dapat Niyang ibigay. Parang tayo lamang ang nasa sentro. Para na tayong mga diyos-diyosan kapag ginawa natin iyan. Hindi isang genie ang Diyos na basta-basta na lamang magbibigay ng anumang ating hingin sa Kanya agad-agad. 

Katunayan, kapag iyan ang ating ginawa, tila hindi na natin napapansin na mayroon rin palang hinihiling sa atin ang Panginoon. Sa sobrang pagtuon ng ating mga pansin sa mga pansariling kahilingan at naisin, nalilimutan nating mayroon rin palang hiling ang Diyos para sa atin. Diniringgin ng Panginoong Diyos ang ating mga kahilingan at panalangin kung ang mga ito ay makakabuti para sa atin. Subalit, pinapakinggan at diniringgin ba natin ang pakiusap, hiling, at samo ng Diyos para sa atin? 

Nakatuon sa hiling ng Panginoong Diyos ang mga Pagbasa para sa araw na ito, ang ikalawang araw ng ating Pagsisiyam o Nobenaryo bilang Paghahanda ng ating mga sarili para sa Dakilang Kapistahan ng Pasko ng Pagsilang ng Panginoon. Sa Unang Pagbasa, isang napakahalagang pahayag ang ibinigkas ni Jacob sa kanyang mga anak tungkol sa mga susunod na henerasyon ng kanilang mga angkan, lahi, at lipi. Mula sa angkan ni Juda, magmumula ang tunay na Hari (Genesis 49, 10). Ipinakilala naman sa Ebanghelyo para sa araw na ito kung sino ang tunay na Hari. Ang tunay na Hari ay walang iba kundi ang Poong Jesus Nazareno. Ang talaan ng angkang pinagmulan at kinabibilangan ng Panginoong Jesus Nazareno ay inilahad sa Ebanghelyo. Bagamat si Jesus Nazareno ay ang pinakadakila sa lahat at ang tunay na Hari, ipinasiya Niyang magpabilang sa angkang sumamba sa Kanya bilang Panginoon at Diyos. Bakit ito ang ginawa ng Mahal na Poong Jesus Nazareno? Dahil sa Kanyang pag-ibig at awa. 

Mayroong hiling at pakiusap para sa atin ang Mahal na Poong Jesus Nazareno. Araw-araw Siyang kumakatok sa pintuan ng ating mga puso upang ang Kanyang hiling para sa atin ay Kanyang iparating. Ang Kanyang samo para sa atin ay maging hari Siya ng buhay natin. Nais Niyang matupad sa pamamagitan natin ang Kanyang kalooban. Si Jesus Nazareno, ang ating Panginoon at Diyos, ay nakikiusap sa atin araw-araw na tanggapin, sundin, at magpasakop tayo sa Kanya. 

Diniringgin ng Panginoong Diyos ang ating mga hiling sa Kanya, kung ang mga ito ay para sa ating ikabubuti. Ang hiling ng Panginoon na ating Hari at Manunubos ay atin rin bang pakikinggan at diringgin? 

ANG KALIGTASANG IPINANGAKO

16 Disyembre 2022 

Misa de Gallo/Simbang Gabi: Unang Araw

Isaias 56, 1-3a. 6-8/Salmo 66/Juan 5, 33-36 

Screenshot: Simbang Gabi - December 17, 2021 (8:00 pm), Manila Cathedral Facebook and YouTube Live Stream 

Itinutuon ng Simbahan ang ating mga pansin sa biyaya ng kaligtasang ipinagkaloob ng Diyos sa lahat ng tao sa Unang Araw ng tradisyunal na Pagsisiyam o Nobenaryo bilang Paghahanda para sa maringal na pagdiriwang tuwing ika-25 ng Disyembre na walang iba kundi ang Dakilang Kapistahan ng Pasko ng Pagsilang ng Panginoong Jesus Nazareno. Sa pamamagitan nito, ipinapaalala sa atin ng Simbahan ang dahilan kung bakit ang Pasko ay ipinagdiriwang natin taun-taon. Dumating sa mundong ito ang Panginoong Jesus Nazareno upang ipagkaloob sa atin ang biyaya ng kaligtasan. Sa pamamagitan ng Tagapagligtas na si Kristo, ang Mahal na Poong Jesus Nazareno, tinupad ng Diyos ang Kanyang dakilang pangako na iligtas ang lahat ng tao. 

Sa Unang Pagbasa para sa araw na ito, inihayag ng Panginoon na malapit na Niyang tuparin at isagawa ang Kanyang pangako. Masasaksihan na rin ng lahat ang biyaya ng pagliligtas ng Panginoong Diyos (Isaias 56, 1). Sa Banal na Ebanghelyo, inihayag kung paanong tinupad ng Diyos ang pangakong ito. Ipinagkaloob ng Diyos si Kristo, ang Mahal na Poong Jesus Nazareno, bilang ipinangakong Manunubos. Sabi pa nga ni Jesus Nazareno sa Ebanghelyo para sa araw na ito na ang lahat ng Kanyang mga gawa, na ipinagawa sa Kanya ng Amang nasa langit, ay nagpapatunay na Siya ang ipinangakong Mesiyas at Manunubos (Juan 5, 36). Sa pamamagitan Niya, ililigtas ng Diyos ang tanan bilang pagtupad sa pangakong Kanyang binitiwan noong una. 

Dumating ang Poong Jesus Nazareno upang iligtas ang lahat ng tao. Sa pamamagitan nito, isinakatuparan ng Diyos ang Kanyang pangakong iligtas ang Kanyang bayan. Sa pamamagitan nito, nahayag ang pag-ibig, habag, at awa ng Diyos para sa tanan. Ito ang aral at paalala sa atin ng Simbahan sa unang araw ng tradisyunal na Pagsisiyam o Nobenaryo bilang Paghahanda para sa Dakilang Kapistahan ng Pasko ng Pagsilang taun-taon. Sa simula ng tradisyunal nating kaugalian na isinasagawa natin taun-taon upang ang ating mga sarili ay ating mapaghandaan para sa pagdiriwang ng Dakilang Kapistahan ng Pasko ng Pagsilang ng Panginoong Jesus Nazareno, pinaalalahanan at iminumulat tayo ng Simbahan sa tunay na dahilan ng lahat ng ito: ang kaligtasang bigay ng Diyos sa lahat sa pamamagitan mismo ni Jesus Nazareno. Ito ang sentro ng Simbang Gabi. Ito ang dahilan kung bakit mayroong Pasko. Ito ang dahilan kung bakit masaya tayong maghahanda ng ating mga sarili sa loob ng siyam na araw o gabi. Ito lamang ang dahilan at wala nang iba. 

Mayroong pagpapalang darating. Ito ay walang iba kundi ang kaligtasang ipinangako ng Diyos. Sa panahong itinakda, dumating ang pagpapalang ito sa pamamagitan ng Poong Jesus Nazareno. Ang Mahal na Poong Jesus Nazareno ay ang paalalang hindi kinalimutan ng Diyos ang Kanyang pangakong iligtas ang tanan. Ito ang pangunahing dahilan at pakay ng Mahal na Poong Jesus Nazareno. Dumating Siya sa mundong ito hindi upang libutin lamang ito. Bagkus, dumating Siya upang ang plano ng Diyos na iligtas ang tanan ay Kanyang maisakatuparan. Ito ang patunay na Siya nga talaga ang Tagapagligtas at Mesiyas na ipinangakong ipagkakaloob ng Diyos sa lahat. 

Ang Simbahan ay mayroong isang mahalagang paalala para sa atin sa unang araw ng tradisyunal na siyam na araw o gabi ng Pagsisiyam o Nobenaryo para sa maringal na pagdiriwang ng Kapaskuhan na taun-taon nating isinasagawa bilang mga Pilipinong Katoliko. Ang ating pinaghahandaan ay walang iba kundi ang pagsasakatuparan ng dakilang plano ng Diyos na iligtas ang lahat. Ito ang pinadakilang regalo. Dumating ito sa takdang panahon sa pamamagitan ni Kristo, ang Mahal na Poong Jesus Nazareno. 

TAGAPAGHATID NG GALAK

12 Disyembre 2022 

Paggunita sa Mahal na Birhen ng Guadalupe 

Zacarias 2, 14-17/Judith 13/Lucas 1, 39-47 (o kaya: 1, 26-38) 

Screenshot: "LIVE: Thanksgiving Mass for the Visit of the Image of Our Lady of Guadalupe at the Manila Cathedral" (18 January 2022), YouTube

Ang mga Pagbasa sa Misa para sa araw na ito na inilaan para sa Paggunita sa Mahal na Birhen ng Guadalupe ay nakatuon sa paksa ng pagpapalaganap ng pagpapala. Sa pamamagitan ng pagpapalaganap at paghahatid ng pagpapala ng Panginoong Diyos, tayong lahat ay nagiging mga tagapaghatid ng tunay at walang maliw na kagalakang mula sa Kanya. Ito ang misyon ng Simbahan. Ito ang dapat nating gawin bilang mga Kristiyanong nananalig at sumasampalataya sa Poong Diyos. Sa pamamagitan nito, ipinapahayag natin ang ating tapat na pananalig, pag-ibig, at pananampalataya sa Diyos na Maykapal. 

Sa Unang Pagbasa, inilahad ni Propeta Zacarias ang pangakong binitiwan ng Diyos na maghahatid ng galak sa Kanyang bayan. Darating ang Diyos upang makapiling ang Kanyang bayan. Makikipamayan ang Diyos sa Kanyang bayan. Sa pamamagitan ng pangakong ito na tinupad Niya sa panahong Kanyang itinalaga, ang Diyos ay nagdulot ng galak sa Kanyang bayan. Sa tampok na salaysay sa Banal na Ebanghelyo para sa araw na ito, inilarawan kung paanong tinupad ng Panginoong Diyos ang pangakong ito. Tinupad ng Diyos ang Kanyang pangako sa pamamagitan ng Banal na Sanggol na dala-dala ng Mahal na Birheng Maria sa kanyang sinapupunan na walang iba kundi si Jesus Nazareno, ang ating Panginoon at ipinangakong Tagapagligtas. 

Kaya nga, kung susuriin natin nang mabuti ang pagbati ni Elisabet sa Mahal na Inang si Mariang Birhen na inilahad sa Ebanghelyo para sa araw na ito, mayroon tayong mapapansin na detalye. Sabi ni Elisabet kay Maria sa Ebanghelyo: "Pinagpala ka sa lahat ng mga babae . . ." (Lucas 1, 42). Ang mga salitang ito na binigkas ni Elisabet sa ating Mahal na Inang si Maria sa Ebanghelyo ay mayroong pagkakahalintulad sa mga binigkas ni Uzias kay Judith na ginamit bilang isa sa mga taludtod sa Salmo para sa Paggunita sa Mahal na Birhen ng Guadalupe na ipinagdiriwang ng Simbahan sa araw na ito: "Higit kang pinagpala kaysa lahat ng babae sa lupa" (Judith 13, 18). Katulad ni Judith na naghatid ng galak sa lahat ng mga Israelita sa pamamagitan ng kanyang matagumpay na pagpaslang kay Holofernes, ang Mahal na Inang si Mariang Birhen ay naging isa ring tagapaghatid ng galak na nagmumula sa Diyos dahil dinala niya sa kanyang sinapupunan ang bukal ng galak na walang iba kundi ang Mahal na Poong Jesus Nazareno, ang Diyos na nagkatawang-tao. 

Tayong lahat ay hinirang at iniatasan ng Kamahal-mahalang Poong Jesus Nazareno na ipalaganap ang galak na nagmumula sa Kanya, tulad ng Mahal na Inang si Maria, ang Birhen ng Guadalupe. Ito ang magpapatunay na tayo'y mga tunay na deboto ng Panginoong Jesus Nazareno na tunay ngang nagmamahal, sumasamba, nananalig, at sumasampalataya sa Kanya nang buong puso't kaluluwa. Ang misyong ibinigay ng Mahal na Poong Jesus Nazareno sa atin ay atin bang tatanggapin at tutuparin nang buong kababaang-loob at pagtalima sa Kanya?