KASAMA SA MGA MADIDILIM NA SANDALI SA BUHAY

PAGNINILAY SA PITONG HULING WIKA NG MAHAL NA POONG JESUS NAZARENO 

IKAAPAT NA WIKA (Mateo 27, 46; Marcos 15, 34): 

"Diyos Ko, Diyos Ko, bakit Mo Ako pinabayaan?" 

This faithful photographic reproduction of the painting (c. 1600) Crucified Christ by Orazio Borgianni  (1574–1616), as well as the actual work of art itself from Museo de Cádiz, is in the Public Domain ("No Copyright") in its country of origin and in other countries and areas, including the United States, where the copyright term is the author's life plus 100 years or fewer due to its age. 

Nang mapagtanto ni Lelouch vi Britannia ang katotohanang buhay ang kanyang mga magulang na sina Charles vi Britannia at Marianne vi Britannia upang isakatuparan ang kanilang planong lumikha ng isang panibagong mundo sa yugto bago ang huling yugto sa ikalawa't huling kabanata ng seryeng Code Geass: Lelouch of the Rebellion, inihayag ni Lelouch ang kanyang galit, pagtakwil, at pagtutol sa kanilang plano, lalo't higit ay sinubukan pa nga nilang bigyan ng katuwiran ang ginawa nilang pag-iwan at pagpapabaya sa kanilang dalawa ng kapatid niyang si Nunnally noong mga bata pa sila. Habang inihahayag ni Lelouch ang kanyang nais na magkaroon ng isang mundo kung saan may pagkakataong ang bawat tao lumikha ng isang magandang bukas, si Lelouch ay hindi nagdalawang-isip na ihayag nang malakas sa mga magulang niya tungkol sa kanyang galit para sa kanila dahil hindi sila nag-atubiling pabayaan nilang dalawa sina Lelouch at Nunnally noong mga bata pa sila. 

Hindi biro ang pakiramdam ng pinabayaan. Ang pakiramdam ng pinabayaan ay mag-isa ka lamang na humaharap sa mga pagsubok sa buhay na walang karamay. Oo, mayroon tayong mga kani-kanilang mga problema o pagsubok na hinaharap sa ating buhay dito sa mundo na pansamantala lamang, subalit bilang tao, naghahangad tayo ng mga karamay at kasama upang maibsan nang kahit kaunti man lamang ang mga sakit at hapdi dulot ng mga tiisin at pagsubok sa buhay. 

Ilan lamang sa mga problema o pagsubok na ito sa kasalukuyang panahon na tiyak na hindi pa umaalis sa isipan ng bawat tao ay ang pandemiyang COVID-19. Tiyak na batid ng mga nagkaroon ng COVID-19 ang pakiramdam ng tila pinabayaan na sila ng lahat dahil wala silang karamay o kasama. Oo, mayroon namang mga makabagong teknolohiya katulad na lamang ng mga telepono upang magamit ng marami nang sa gayon ay makausap nila ang kanilang mga magulang mula sa malayo, subalit iba pa rin ang pakiramdam ng pakikipaghalubilo sa ibang tao. Iyon nga lamang, ang mga nagkaroon ng sakit na ito ay hindi maaaring makaalis mula sa kanilang mga bahay o kaya kuwarto kung saan man sila hangga't hindi sila gumagaling. 

Sa paglipas ng bawat araw na hindi pa gumagaling ang isang tao mula sa sakit na ito, tila mapapatanong na lamang ang mga tinamaan ng nasabing sakit kung hanggang kailan pa ba nila ito titiisin o kaya naman kung gagaling pa nga ba sila. Kung tutuusin, hindi malayo sa posibilidad ang pagsisimula ng kanilang pagtatanong sa Panginoong Diyos kung bakit nangyari ito sa kanila at kung bakit hindi nila maramdaman sa mga oras at sandaling iyon ang Kanyang presensya. Mayroon nga ring ilang nagsisimulang manumbat sa Diyos habang tumatagal ang panahong kinakailangan nilang mapag-isa dahil sa nasabing sakit. Bakit ito nangyari sa kanila? Nasaan ang Diyos? 

Tiyak na tagos sa puso at isipan ng maraming taong nagbibitbit at humaharap sa maraming mga pagsubok at pasanin sa buhay, katulad na lamang ng COVID-19 at iba pang mga sakit katulad noon, ang Ikaapat na Wikang binigkas ng Panginoong Jesus Nazareno mula sa Banal na Krus sa bundok ng Kalbaryo. Ito ay ang pinakamarubdob o pinakamadamdaming wikang binigkas ng Panginoong Jesus Nazareno. Malapit ito sa karanasan ng maraming tao araw-araw. Sa wikang ito, pinatunayan ng Poong Jesus Nazareno na naging tunay Siyang tao. Bagamat Siya'y Diyos, kusang-loob na ipinasiya Niyang maging tao at maranasan ang lahat ng kanilang mga naranasan sa buhay dito sa lupa. Nang bigkasin ni Jesus Nazareno ang wikang ito mula sa Banal na Krus, naranasan Niya ang pakiramdam ng pagkakaroon ng walang karamay sa mga hirap, sakit, dalamhati, lumbay, at hapis sa buhay. 

Ang Ikaapat na Wikang binigkas ng Panginoong Jesus Nazareno ay ang mga unang salita ng Salmo 22. Sa unang tingin o basa, mukha itong panunumbat sa Diyos dahil tila hindi na maramdaman ang Kanyang pagdamay at presensya sa mga sandali ng mga madidilim at matitinding pagsubok sa buhay dito sa mundong ito. Kung kailan kinailangan ang Diyos, saka pa Siya hindi magpapakita o magpaparamdam. Subalit, hindi ito isang panunumbat sa Diyos. Bagkus, isa itong taos-pusong panalangin at pakiusap sa Panginoong Diyos na tulungan ang Kanyang mga lingkod sapagkat Siya lamang ang tunay at tanging makakatulong sa Kanyang mga tapat na lingkod na hindi nagsasawang manalig, sumunod, at tumalima sa Kanya na pagtagumpayan ang iba't ibang mga pagsubok sa buhay dito sa mundong ito. 

Dinanas ng Mahal na Poong Jesus Nazareno sa mga huling sandali ng Kanyang buhay sa Krus ang pinakamadilim at pinakamasakit na karanasan ng lahat ng tao dito sa mundong ito. Hindi lamang ang pinakamasakit na uri ng kamatayan na walang iba kundi ang pagkamatay sa krus kundi pati na rin ang pinakamasakit na karanasan ng pagiging mapag-isa sa mga sandali ng matitinding kadiliman at pagsubok sa buhay. Niloob ng Poong Nazareno itong mangyari sa Kanya upang ituro sa atin kung sino lamang ang tanging makakatulong sa atin na magtagumpay - ang Diyos. Hindi Niya tayo iiwanan at pababayaan. Lagi tayong tutulungan, sasamahan, at dadamayan ng butihing Diyos na tunay tayong iniibig at kinahahabagan. 

BIYAYANG IPINAGKALOOB DAHIL SA PAG-IBIG

PAGNINILAY SA PITONG HULING WIKA NG MAHAL NA POONG JESUS NAZARENO 

IKATLONG WIKA (Juan 19, 26-27): 

"Babae, narito ang iyong Anak . . . Narito ang iyong Ina!" 

This faithful photographic reproduction of the painting (c. 1679) Calvary (Portuguese: Calvário) by Josefa de Óbidos  (1630–1684), as well as the actual work of art itself from the Santa Casa da Misericórdia, Peniche, Portugal, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Habang pinagninilayan ang Ikatlong Wikang binigkas ng Panginoong Jesus Nazareno mula sa Krus, itinutuon ng Simbahan ang ating mga pansin sa kahulugan ng tatlong pangalan. Ang tatlong pangalang isinasaliksik sa wikang ito ay ang mga pangalan ng tatlong taong inilalarawan sa sandaling binigkas ng Panginoong Jesus Nazareno ang wikang ito mula sa Krus: Hesus, Maria, at Juan. 

Una, ang Pangalang "Hesus." Ang ibig sabihin ng Pangalang "Hesus" ay "Ang Diyos ay nagliligtas." Habang nakabayubay sa Banal na Krus at naghihingalo, ang wikang ito ay binigkas ng Mahal na Poong Jesus Nazareno sa Mahal na Inang si Maria at ang isa sa Kanyang mga apostol na si Apostol San Juan. Sa sandaling ito kung kailan ang wikang ito ay Kanyang binigkas habang inililigtas Niya ang sangkatauhan sa pamamagitan ng pagbubo ng Kanyang Kabanal-banalang Dugo mula sa Krus na Banal, ang Poong Jesus Nazareno ay nagbigay ng isang napakagandang biyaya para sa sangkatauhang tunay Niyang iniibig. 

Ikalawa, ang pangalang "Maria." Maraming kahulugan ang pangalang "Maria." Ilan sa mga kahulugan ng pangalang ito ay "Nagmula sa dagat," "Mapait," "Mapaghimagsik," at "Iniibig." Subalit, sa konteksto ng wikang ito na binigkas ni Kristo mula sa Krus na Banal sa bundok ng Kalbaryo, nararapat lamang ituon ang ating pansin sa kahulugan ng nasabing pangalan bilang "Iniibig" o "Minamahal." Ibinigay ng Diyos ang Mahal na Inang si Mariang Birhen sa kanyang mga magulang na sina San Joaquin at Santa Ana dahil sa Kanyang pag-ibig, hindi lamang para sa mag-asawang ito, kundi para na rin sa sangkatauhan. Katunayan, ito rin ang dahilan kung bakit iniligtas na ng Diyos ang Mahal na Inang si Mariang Birhen mula sa kasalanan bago siya isilang sa mundong ito upang maging marapat siyang dalhin ang ipinangakong Mesiyas at Manunubos na walang iba kundi ang Mahal na Poong Jesus Nazareno. Pag-ibig rin ang dahilan kung bakit hinirang ng Diyos si Maria para sa nasabing misyon at tungkulin. Ang misyon at tungkuling ito na bigay ng Diyos ay buong pananalig at kababaang-loob na tinanggap ni Maria dahil rin sa kanyang pag-ibig para sa Diyos. 

"Juan" ang ikatlo at huling pangalang binibigyan ng pansin ng Simbahan sa pagninilay sa Ikatlong Wika ng Panginoong Jesus Nazareno mula sa Krus na Banal. Madalas na pinagninilayan tuwing sasapit ang panahon ng Adbiyento at maging sa Dakilang Kapistahan ng Pagsilang ni San Juan Bautista tuwing ika-24 ng Hunyo ang kahulugan ng pangalang "Juan." Bihira lamang ito bigyan ng pansin at taimtim na pagnilayan sa labas ng mga nasabing araw. Subalit, sa konteksto ng wikang ito na binigkas ng ating Mahal na Poong Jesus Nazareno mula sa Kabanal-Banalang Krus, nararapat lamang itong bigyan ng pansin at pagnilayan. Ang ibig sabihin ng pangalang "Juan" ay "Ang Diyos ay mapagpala." Mula sa Krus, isang pagpapalang natatangi ay ipinagkaloob sa tanan ng pinakadakilang pagpapalang si Jesus Nazareno, ang ating Mahal na Poon. Bukod sa biyaya ng kaligtasan, ang Mahal na Poong Jesus Nazareno ay nagbigay ng dagdag na pagpapala para sa Simbahan - ang Mahal na Inang si Mariang Birhen. 

Napakalinaw kung paanong isinasalungguhit ng kahulugan ng tatlong pangalang ito ang aral at mensahe ng Ikatlong Wikang ito ng Mahal na Poong Jesus Nazareno mula sa Krus. Mula sa Krus na Banal, bumuhos ang lahat ng mga pagpapalang bigay ng Diyos sa sangkatauhan dahil sa pag-ibig Niyang tapat at walang hanggan. Bukod sa biyaya ng pagliligtas ng Diyos, ang biyaya ng isang Ina para sa Simbahan ay kusang-loob na ipinagkaloob ng Mahal na Poong Jesus Nazareno na nakapako sa Krus. Kahit hirap na hirap na Siya noon at naghihingalo, nagbigay pa rin Siya ng isa pang biyaya upang patunayan ang Kanyang pag-ibig para sa atin - ang Mahal na Birheng Maria. 

Maraming ulit na itinampok sa ilang mga masisikat na serye at pelikulang gawa sa Korea o kaya naman sa ilang mga serye at pelikulang anime katulad na lamang ng Hello World ang ilang mga bagay na ginagawa sa ngalan ng pag-ibig. Halimbawa, sa pelikulang anime na Hello World, lalo na sa ikalawang bahagi ng nasabing pelikulang anime, inilarawan ang mga ginawa ni Naomi Katagaki para lamang mailigtas si Ruri Ichigyo. Subalit, gaano man nakakakilig, nakakaaliw, nakakaakit, at kaganda ang mga kuwentong isinasalaysay sa mga nasabing pelikula o serye, anime man ito o hindi, wala sa mga iyon ang pinakadakilang bagay na ginawa sa ngalan ng pag-ibig. Ang pinakadakilang bagay na ginawa sa ngalan ng pag-ibig ay ginawa mismo ng butihing Diyos sa pamamagitan ni Jesus Nazareno. Katunayan, bukod sa biyaya ng pagliligtas ng Diyos, ipinagkaloob sa atin ng Nuestro Padre Jesus Nazareno na nakapako sa Krus ang biyaya ng pagiging bahagi ng Kanyang pamilya na pinatutunayan ng ating Inang Minamahal na si Mariang Birhen. 

Ang Mahal na Inang si Mariang Birhen ay pinili, hinirang, at inatasan ng Diyos upang maging Ina ng ipinangakong Mesiyas at Tagapagligtas na si Jesus Nazareno dahil sa Kanyang pag-ibig para sa tanan. Dahil rin sa dakilang pag-ibig na ito ng Panginoon, ipinagkaloob rin siya sa atin na bumubuo sa tunay at nag-iisang Simbahang itinatag ng Nuestro Padre Jesus Nazareno na kinatawan ni Apostol San Juan sa sandaling ang wikang ito ay Kanyang binigkas mula sa Krus na Banal sa bundok ng Kalbaryo. Tunay tayong minamahal ng Panginoon, kaya ibinilang Niya tayo sa Kanyang pamilya. Ang patunay nito ay walang iba kundi ang Mahal na Inang si Mariang Birhen. 

WALANG KAPALAN NG MUKHA

PAGNINILAY SA PITONG HULING WIKA NG MAHAL NA POONG JESUS NAZARENO  

IKALAWANG WIKA (Lucas 23, 43): 

"Sinasabi Ko sa iyo: Ngayon di'y isasama Kita sa Paraiso." 

This faithful photographic reproduction of the painting by Titian (1490-1576), Christ and the Good Thief (c. 1566), as well as the actual work of art itself from Pinacoteca Nazionale di Bologna, is in the Public Domain ("No Copyright") in its country of origin and in other countries and areas, including the United States, where the copyright term is the author's life plus 100 years or fewer due to its age. 

Isa sa mga eksenang tiyak na hindi makakalimutan ng marami mula sa isa sa mga masisikat na manga sa kasalukuyan na binibigyan ng adapsyon sa seryeng anime na pinamagatang Tokyo Revengers ay ang eksena kung saang ibinalita ni Ryuguji Ken (Draken) sa dati niyang kaibigang naging karibal dahil lumipat siya sa ibang grupo na si Hanemiya Kazutora na pinatawad na siya ni Sano Manjiro (Mikey). Naganap ito sa huling bahagi ng yugtong tumalakay sa mga kaganapang kaugnay ng tinatawag na "Bloody Halloween" (Tagalog: Madugong Undas) kung saan ang grupo ni Mikey na kilala sa tawag na Toman at ang grupong kinabibilangan ni Kazutora na tinatawag na Vanhalla na kung saan marami ang umuwing basag ang katawan at halos patay na noong matapos ang bakbakang iyon at mayroong isang nasawi sa bakbakang iyon na walang iba si Keisuke Baji na kaibigan nila Mikey at pati rin si Kazutora. Sa kabila ng lahat ng mga kasalanang nagawa ni Kazutora laban kay Mikey, tulad na lamang ng ginawa niyang pagpatay sa nakatatandang kapatid ni Mikey na si Shinichiro noong bata pa sila, pinatawad pa rin siya ni Mikey. Kahit naging mga magkaaway na mortal ang dalawang ito sa loob ng mahabang panahon, pinatawad ni Mikey si Kazutora. Oo, tunay ngang kasuklam-suklam ang mga nagawa ni Kazutora laban kay Mikey na maaaring maging dahilan kung bakit hindi siya karapat-dapat. Subalit, sa kabila noon, pinatawad pa rin niya ito sapagkat ito ang hinangad ni Baji. 

Ang Ikalawang Wika ng Mahal na Poong Jesus Nazareno mula sa Krus ay Kanyang binigkas sa isang taong hindi karapat-dapat sa pag-ibig, habag, at kagandahang-loob ng Diyos. Binigkas ito ng Mahal na Poong Jesus Nazareno sa isa sa dalawang salaring ipinakong kasama Niya sa bundok ng Kalbaryo na kilala sa tradisyon bilang si Dimas. Habang naghihingalo rin sa krus kasama ng Poong Jesus Nazareno na nakapako sa gitna ng bundok, ipinasiya ni Dimas na magpakita ng kababaang-loob at taos-pusong mag-hingi ng habag at awa mula sa Diyos. Ito ay dahil naaakit Siya sa maamong Kordero ng Diyos na ipinako sa gitna nilang dalawa ni Hestas na si Jesus Nazareno. 

Hindi kinapalan ni Dimas ang kanyang mukha sa harap ni Kristo. Iba siya sa isa pang salaring ipinakong kasama ng Mahal na Poon na kilala sa tradisyon bilang si Hestas na kahit sa mga huling sandali ng kanyang buhay sa mundo ay nagpakita pa rin ng kakapalan ng mukha. Bagamat isa rin siyang makasalanan katulad ni Dimas, pinili pa rin ni Hestas na patigasin ang kanyang puso at pairalin ang kanyang kakapalan ng mukha. Nasa harap na nga niya ang habag at awa ng Diyos na nagkatawang-tao sa pamamagitan ni Kristo, ang Nuestro Padre Jesus Nazareno. Tapos, pinili pa rin niyang ipakita kung gaano kakapal o kagaspang ang kanyang mukha. Sinayang lamang niya ang pagkakataong maligtas at makapiling si Jesus Nazareno. 

Mabuti pa si Dimas. Kinikilala ang kanyang pagiging makasalanan. Inamin pa nga niya ito sa mga huling sandali ng kanyang buhay. Batid niyang walang patutunguhan ang pagpapairal ng kakapalan ng mukha sa harap ng Panginoong Jesus Nazareno. Kaya, sa halip na kapalan ang kanyang mukha, humingi siya ng habag at awa. Ang tugon ni Jesus Nazareno sa kababaang-loob at pagsusumamo ng salaring nagtika na si Dimas ay walang iba kundi ang buhay na walang hanggan sa Kanyang piling sa langit, ang tunay at walang hanggang Paraiso. Ipinasiya ni Dimas na gamitin at ilaan ang mga huling sandali ng kanyang buhay sa lupa sa pagsisisi at pagbabalik-loob sa Diyos. Ginantimpalaan at pinagpala siya ng Diyos bilang tugon sa kanyang pasiyang ito. 

Walang lugar para sa mga makakapal ang mukha sa kaharian ng Panginoong Diyos sa langit. Kung paiiralin natin ang katigasan ng puso at ang pagiging magaspang at makapal ang mukha sa harap ng Panginoon, wala tayong patutunguhan. Para na rin nating sinasabi sa Diyos na hindi natin tinatanggap ang biyaya ng Kanyang pag-asa, pag-ibig, habag, kagandahang-loob, at pagliligtas kapag ating pinairal ang pagiging garapal at makapal ang mukha. 

Sa pamamagitan ng wikang ito, tinuturan tayo ng Panginoong Jesus Nazareno kung paano tayo makakapasok sa langit. Huwag pairalin ang pagiging garapal at makapal ang mukha. Bagkus, dapat tayong mamuhay nang kababaang-loob at pananalig sa Diyos. Ang mga namumuhay nang may kababaang-loob at pananalig sa Maykapal ay laging nagpapasiyang tanggapin at gamitin ang bawat pagkakataong kaloob Niya sa tanan upang pagsisihan at talikuran ang kasalanan at maging banal. 

DUMATING UPANG MAGLIGTAS

PAGNINILAY SA PITONG HULING WIKA NG MAHAL NA POONG JESUS NAZARENO 

UNANG WIKA (Lucas 23, 34): 

"Ama, patawarin Mo sila sapagkat hindi nila nalalaman ang kanilang ginagawa." 

This faithful photographic reproduction of the painting (c. Between 1601 and 1650) The Raising of the Cross by Frans Francken the Younger  (1581–1642), as well as the actual work of art itself from the Westmalle Abbey in Belgium, is in the Public Domain ("No Copyright") in its country of origin as well as other countries and areas, including the United States, where the copyright term is the author's life plus 100 years or fewer due to its age. 

Magandang ituon natin ang ating pansin sa kahulugan ng Kabanal-banalang Ngalan ng Panginoong Jesus Nazareno habang pinagninilayan natin ang Kanyang unang wika habang nakabayubay sa Banal na Krus sa bundok ng Kalbaryo. Kung tutuusin, ang kahulugan ng Banal na Ngalan ng Panginoong Jesus Nazareno ay isang pahiwatig ng dahilan kung bakit ito ang una Niyang binigkas habang nakapako sa Krus. Ang ibig sabihin ng Pangalang "Hesus" ay "Ang Diyos ay nagliligtas." 

Tila isang paalala ng tunay na dahilan kung bakit ipinasiya ng Poong Jesus Nazareno na dumating sa mundong ito sa takdang panahon ang Kanyang unang wika mula sa Krus. Sa pamamagitan ng wikang ito, ipinapaalala ng Panginoong Jesus Nazareno na hindi Siya dumating sa mundong ito upang hatulan at ipahamak ang makasalanang sangkatauhan. Bagamat karapat-dapat lamang hatulan, parusahan, at mapahamak ang sangkatauhan dahil likas sa tanan ang pagkakasala laban sa Diyos, hindi iyon ang pakay Niya sa mundong ito. Bagkus, ang Kanyang pakay o misyon sa mundong ito ay ipagkaloob sa lahat ang biyaya ng pagliligtas ng Diyos. Ito si Kristo, ang Panginoong Jesus Nazareno. Bagamat Siya ang Dakilang Hari at Hukom, binigyan tayo ni Kristo ng oportunidad o pagkakataong maging banal sa pamamagitan ng pagligtas sa atin. 

Bago pumasok ang Poong Jesus Nazareno sa Herusalem upang harapin ang Kanyang misyon bilang ipinangakong Mesiyas at Tagapagligtas, na sinasagisag ng Banal na Krus na Kanyang pinasan at siya ring Krus na pinagpakuan sa Kanya sa bundok na tinatawag na Golgota o Kalbaryo, nangaral Siya tungkol sa iba't ibang mga paksang nakaugat sa kaharian ng langit. Isa sa mga paksang pinagtuunan Niya ng pansin ay ang habag at awa ng Diyos. Minsan Niyang itinuro sa mga tao na dapat silang maging mahabagin katulad ng Amang nasa langit (Lucas 6, 36). Ito ang dahilan kung bakit isa sa Kanyang mga sinabi sa mga tao sa isa sa Kanyang mga pangaral ay ibigin ang kaaway at ipanalangin ang mga tagausig (Mateo 5, 43-48; Lucas 6, 27-36). Bukod pa rito, minsang sinabi ng Poong Jesus Nazareno na naparito Siya sa mundong ito hindi upang hanapin ang mga banal kundi ang mga makasalanan nang mabigyan Niya sila ng pagkakataong pagsisihan ang kasalanan at magbalik-loob sa Diyos (Mateo 9, 13; Marcos 2, 17; Lucas 5, 32). Maituturing natin ang ilan sa mga sandaling ito bilang isang pasilip sa gagawin ng Poong Jesus Nazareno sa Banal na Krus. Katunayan, ito mismo ang una Niyang ginawa habang nakabayubay sa Krus. Si Kristo ay taimtim na nag-alay ng panalangin sa Amang nasa langit para sa ikapagpapatawad ng mga kasalanan ng Kanyang mga kaaway at tagausig laban sa Kanya. 

Sa totoo lamang, hindi natin masisisi ang Poong Jesus Nazareno kung ang Kanyang mga kaaway at tagausig ay Kanyang isinumpa sa halip na patawarin. Mahirap kaya itong gawin bilang tao, sa totoo lamang. Batid rin ng Poong Jesus Nazareno kung gaano kahirap bigkasin ang mga salitang ito habang nakabayubay sa Krus. Ito rin ang dahilan kung bakit nanalangin Siya sa Ama para sa kanila. Labis Siyang nasasaktan at nagdurusa dahil sa mga ginawa ng Kanyang mga kaaway. Hindi makatarungan at hindi rin makatao ang ginagawa laban sa Diyos na nagkatawang-tao na walang iba kundi si Jesus Nazareno. Ang Diyos ay nagkatawang-tao sa pamamagitan ng Poong Jesus Nazareno, tapos ito ang kanilang ganti sa Kanya? Sa totoo lamang, maaari na lamang Niyang ulitin ang Kanyang ginawa noong panahon ni Noe. 

Kahit may karapatan ang Panginoong Jesus Nazareno na lipulin ang Kanyang mga tagausig at kaaway, tulad na lamang ng Kanyang ginawang paghahatid ng matinding baha noong panahon ni Noe, hindi Niya ito ginawa. Bagkus, ipinasiya pa rin Niyang gawin ang pinakamahirap na bagay. Oo, nahirapan si Jesus Nazareno gawin ito dahil labis Siyang pinahirapan, inusig, at unti-unting pinapatay ng Kanyang mga kaaway sa pamamagitan ng pagpako sa Kanya sa Banal na Krus na Kanyang pinasan mula sa Herusalem patungong Kalbaryo. Subalit, sa kabila nito, ipinasiya pa rin Niyang mag-alay ng panalangin para sa kapatawaran ng Kanyang mga kaaway at tagausig. 

Ito ang patunay na si Jesus Nazareno ay naiiba. Hindi Siya katulad ng mga karakter katulad ni Light Yagami ng Death Note. Ang balak ng nasabing karakter at iba pang mga karakter sa anime at manga gaya niya ay lipulin ang lahat ng mga sumusuway sa kanyang mga utos bilang binansagang diyos o bathala ng bagong mundo. Iba si Jesus Nazareno sa mga karakter na ito na nag-ambisyong maging mga bathala. Sa halip na lipulin sa isang iglap ang lahat ng mga makasalanan, ipinasiya pa rin Niyang pagkalooban sila ng pagkakataong magsisi sa kasalanan at magbalik-loob sa Diyos bago Niya igawad ang Huling Paghuhukom sa tanan sa wakas ng panahon. 

Habang namumuhay tayo sa mundong ito, pahalagahan at gamitin natin ang bawat pagkakataong ibinibigay sa atin ng Poong Jesus Nazareno na maging banal. Ito ang dahilan kung bakit dumating sa mundong ito ang Mahal na Poong Jesus Nazareno bilang Mesiyas at Tagapagligtas. Bagamat Siya ang Dakilang Hukom at Hari, ipinasiya Niya tayong iligtas sa kasalanan upang magkaroon tayo ng pagkakataong pagsisihan at talikdan ang kasalanan at maging banal katulad Niya. 

TALAGA LANG, HA?

5 Abril 2023 

Mga Mahal na Araw: Miyerkules Santo 

Isaias 50, 4-9a/Salmo 68/Mateo 26, 14-25

This faithful photographic reproduction of the painting (c. 1655-1675) El beso de Judas (English: The Kiss of Judas) by Luca Giordano, as well as the actual work of art itself from Museo del Prado, is in the Public Domain ("No Copyright") in its country of origin as well as in other areas where the copyright term is the author's life plus 70 years or fewer, including the United States, due to its age.

Bagamat inilahad sa unang bahagi ng salaysay sa Ebanghelyo para sa Martes Santo ang pahayag ng Mahal na Poong Jesus Nazareno tungkol sa pagkakanulo sa Kanya ni Hudas Iskariote, muling itinatampok at pinagninilayan ng Simbahan ang sandaling ito na naganap sa mga huling sandali sa buhay ng Mahal na Poong Jesus Nazareno. Ang kaibahan nga lamang, 'di hamak na higit na detalyado ang salaysay ng pagtalikod at pagkanulo ni Hudas Iskariote sa Ebanghelyo para sa araw na ito kung ihahalintulad ito sa salaysay sa Ebanghelyo noong Martes Santo. 

Ang Miyerkules Santo ay tinatawag ring "Spy Wednesday" sa wikang Ingles. Kung isasalin natin ito sa Tagalog, ang magiging literal na kahulugan nito ay "Miyerkules ng Paniniktik" o kaya "Miyerkules ng Pag-Eespiya." Subalit, kung magiging prangka tayo, lalung-lalo na kung may mga nanonood ng mga pelikula tungkol sa pagiging isang espiya o mga eksena ng pag-eespiya o paniniktik, masasabi nating palpak at sablay si Hudas Iskariote bilang espiya dahil kahit nakipagpulong at nakipagkasundo siya sa mga kaaway ng Mahal na Poong Jesus Nazareno, ang Sanedrin, nalaman ito agad ni Jesus Nazareno. Kaya nga, sa ikalawang bahagi ng salaysay sa Banal na Ebanghelyo, habang kasalo Niya ang mga apostol sa hapag sa senakulong pinagtipunan nila nang gabing yaon, ang katotohanang ito ay Kanyang ibinunyag sa kanila.

Muling itinuturo sa atin ng Simbahan sa araw na ito na kahit ano pa'ng pagtatakip at paglilihim ang gawin natin, wala tayong maililihim sa Diyos. Isang patunay nito ay walang iba kundi si Hudas Iskariote na nagkanulo sa Nuestro Padre Jesus Nazareno. Bagamat naging palihim ang kanyang pakikipagpulong sa Sanedrin upang makabuo sila ng isang kasunduan, hindi ito nakatakas mula sa Poong Jesus Nazareno. Hindi naisahan ni Hudas Iskariote ang Poong Jesus Nazareno. Ang Poong Jesus Nazareno ay hinding-hindi maiisahan ninuman kailanman. 

Sa Unang Pagbasa, inilarawan ang sasapitin ng ipinangakong Mesiyas at Manunubos pagdating Niya sa mundong ito. Maraming hirap, sakit, at pagdurusang babatain ng ipinangakong Mesiyas at Manunubos. Batid ng Panginoong Jesus Nazareno ang mga nasasaad sa mga propesiya sa Lumang Tipan katulad na lamang nito. Kaya naman, alam Niya na bahagi ito ng plano ng Ama. Bagamat napakasakit para sa Kanya na malamang ipagkakanulo Siya ng isa sa mga naging malapit Niyang kaibigan, alam ni Jesus Nazareno na mangyayari iyon sapagkat bahagi iyon ng Kanyang sasapitin. Dahil dito, bagamat palihim na nakipagpulong si Hudas Iskariote sa Sanedrin, hindi naging lingid sa kaalaman ni Kristo, ang Poong Jesus Nazareno, ang pagpupulong iyon. 

Gaano mang kagaling at kahusay ang isang tao na maglihim sa kapwa, wala siyang maililihim sa Diyos kailanman. Hindi maiisahan ang Diyos. Nababatid ng Diyos ang laman ng ating mga puso at kalooban. Katunayan, nakikita pa nga Niya kung ano ang ating mga ginagawa, mabuti man o masama. Huwag rin nating ipilit gawin ito, dahil kapag ginawa natin ito, mapapahiya, mabibigo, at mapapahamak lamang tayo. Lagi nating tandaang hindi tanga ang Diyos. Kaya naman, magpakatotoo tayo sa Diyos at buong kababaang-loob na humingi ng tulong mula sa Kanya upang makapamuhay tayo nang banal at kalugud-lugod sa Kanyang paningin. Gawin nating taos-pusong panalangin ang mga salita sa Salmo para sa araw na ito: "Poon, ako'y Iyong dinggin sa panahong 'Yong ibigin" (Salmo 68, 14k a at b). 

Huwag nating subukang lokohin at linlangin ang Panginoong Diyos. Batid Niya kung ano ang laman ng ating mga puso at isipan. Nakikita Niya kung ano ang ating mga ginagawa at naririnig rin Niya kung ano ang ating mga sinasabi. Sa halip na ipilit subukang lokohin at linlangin ang Panginoong Diyos, buong kababaang-loob tayong magpakatotoo sa Kanya at humingi ng tulong mula sa Kanya upang maging banal at kalugud-lugod sa Kanyang paningin sapagkat iyon ang Kanyang naisin para sa atin. 

TAGAPAGLIGTAS NG MGA MAKASALANANG MARURUPOK ANG LOOB

4 Abril 2023 

Mga Mahal na Araw: Martes Santo 

Isaias 49, 1-6/Salmo 70/Juan 13, 21-33. 36-38 

This faithful reproduction of the painting (c. 1625) La negación de San Pedro (English: The Denial of Saint Peter) by Nicolas Tournier (1590–1639), as well as the work of art itself from the Museo del Prado Collection through the Web Gallery of Art, is in the Public Domain ("No Copyright") in its country of origin as well as other countries and areas, including the United States, where the copyright term is the author's life plus 100 years or fewer due to its age. 

Itinutuon ng mga Pagbasa para sa araw na ito, Martes Santo, ang ating mga pansin sa ating mga kahinaan at karupukan bilang mga makasalanan. Sa pamamagitan nito, muli tayong pinaaalalahanan ng Simbahan tungkol sa tunay at natatanging dahilan kung bakit si Kristo, ang Nuestro Padre Jesus Nazareno, ay dumating sa mundong ito pagsapit ng panahong itinakda ng Ama bilang ipinangakong Mesiyas at Manunubos na ipinagkaloob ng Diyos sa sangkatauhan. Kung tutuusin, inilaan ang mga Mahal na Araw para sa taimtim na pagninilay at paggunita sa misteryo at katotohanang ito na lubos ngang pinahahalagahan ng Simbahan. 

Dalawang kaganapang nakaugat sa Pasyong Mahal ng Panginoong Jesus Nazareno ay Kanyang inihayag sa Ebanghelyo. Sa unang bahagi ng Ebanghelyo, inihayag ng Mahal na Poong Jesus Nazareno na si Hudas Iskariote ang magkakanulo sa Kanya sa pamamagitan ng pagbigay sa kanya ng tinapay. Sa ikalawang bahagi ng Ebanghelyo, inihayag ng Mahal na Poong Jesus Nazareno na tatlong ulit Siyang ipagkakaila ng isa sa mga pinakamahalagang tao sa kasaysayan ng Simbahan na walang iba kundi ang unang Santo Papa ng Simbahan na si Apostol San Pedro. Bagamat inatasan siya ni Jesus Nazareno sa lahat ng mga apostol upang maging unang Santo Papa, hindi siya naging ligtas mula sa kanyang mga kahinaan bilang tao. 

Oo, nakakalungkot, subalit ito ang katotohanan. Bilang tao, mayroon tayong mga kahinaan. Marurupok at mahihina tayo. Likas iyan sa ating pagkakilanlan bilang mga taong namumuhay at naglalakbay dito sa mundong ito. Walang sinumang tao dito sa mundong ito ang buong lakas at katiyakang makapagsasabing perpekto siya. Hindi perpekto ang bawat taong namumuhay sa mundo. Isa lamang ang naging perpekto noong dumating sa mundong ito bilang tao - si Kristo. Oo, si Kristo ay tunay na Diyos, subalit naging tao rin Siyang tunay na naging bahagi ng isang pamilya na binuo ng anluwageng si San Jose na tumayo bilang kanyang ama-amahan at ang Mahal na Inang si Mariang Birhen. 

Bagamat muli tayong pinaalalahanan ng Simbahan sa araw na ito tungkol sa ating mga kahinaan at karupukan bilang tao, isang katotohanang hindi maipagkakaila ng sinuman at tunay ngang nakakalungkot, mayroong magandang paalala na nagbibigay ng pag-asa ang Simbahan sa araw na ito. Ang ating mga kahinaan at karupukan ay ang dahilan kung bakit dumating si Kristo, ang Nuestro Padre Jesus Nazareno, bilang ipinangakong Mesiyas at Tagapagligtas. Ang katotohanan at misteryong ito ay ang paksa o temang pinagtutuunan ng pansin sa Unang Pagbasa at Salmong Tugunan. Sa Unang Pagbasa, inihayag na maliligtas ang lahat sa mundong ito sa pamamagitan ng tanglaw mula sa Israel. Sa Salmong Tugunan, inihayag kung kanino nagmula ang liwanag na iyon - sa Panginoong Diyos. Natupad ang pahayag na ito sa Bagong Tipan nang dumating si Kristo, ang Poong Jesus Nazareno, upang tayo'y iligtas.

Mapalad tayo sapagkat ipinasiya ng Diyos na iligtas tayo mula sa kasalanan. Kahit na hindi tayo karapat-dapat na maligtas dahil sa ating mga kasalanan na patunay ng ating karupukan at kahinaan, ipinagkaloob pa rin ng Diyos ang Poong Jesus Nazareno bilang ipinangakong Mesiyas at Manunubos. 

TAPAT AT DALISAY NA PAG-IBIG

3 Abril 2023

Mga Mahal na Araw: Lunes Santo 

Isaias 42, 1-7/Salmo 26/Juan 12, 1-11 

This faithful photographic reproduction of the painting by Luca Giordano (1634-1705), The Entombment of Christ, as well as the actual work of art itself from the Museum of Fine Arts in Boston, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1705. This work is also in the Public Domain in the United States because it was because it was published (or registered with the U.S. Copyright Office) before January 1, 1928.

"Pabayaan ninyong ilaan niya (ni Maria) ito para sa paglilibing sa Akin" (Juan 12, 7). Ito ang mga salitang binigkas ng Poong Jesus Nazareno sa Ebanghelyo para sa araw na ito, Lunes Santo, bilang pagtanggol sa ginawang pagpapahid ng mamahaling langis ni Santa Maria ng Betania na kapatid ni San Lazaro sa Kanya. Sa pamamagitan nito, ang tanging dahilan kung bakit pinahiran ni Maria na kapatid ni Lazaro ang mga paa ng Mahal na Poong Jesus Nazareno ay nahayag. Katunayan, ang Nazareno mismo ang nagpahiwatig sa tunay at natatanging dahilan kung bakit ginawa ito ni Maria para sa Kanya. Batid ng Poong Jesus Nazareno na malinis at dalisay ang dahilan nito. 

Bukod pa roon, nasusulat sa salaysay sa Ebanghelyo na nagalit si Hudas Iskariote sa ginawa ni Maria na kapatid ni Lazaro, hindi dahil mayroon siyang malasakit para sa mga dukha, kundi dahil isa siyang magnanakaw (Juan 12, 6). Ang katotohanang ito ay alam ng Mahal na Poong Jesus Nazareno. Ipinahiwatig Niya ito sa Kanyang sagot kay Hudas Iskariote na nagreklamo noong binuhusan ng mamahaling pabango ang mga paa ng Panginoon. Hindi man ito batid ng iba pang mga apostol, subalit, hindi Niya ito nailihim o naitago mula sa Mahal na Poon. Kahit ano pa'ng gawin o sabihin ni Hudas, wala siyang takas sa Mahal na Poon.

Ang mga Pagbasa para sa araw na ito ay tungkol sa dalisay at tapat na pag-ibig para sa Diyos. Nararapat lamang na maging tunay ngang dalisay at tapat ang ating pag-ibig sa Diyos dahil sa Kanyang mga ginawa. Katunayan, ang Kanyang kagandahang-loob, pag-ibig, at habag para sa atin ay lubhang banal, dalisay, at tapat. Ang pag-ibig, habag, at kagandahang-loob ito ng Panginoong Diyos na tunay nga namang banal, dalisay, at tapat ay inilarawan sa Unang Pagbasa para sa araw na ito. Ito ang dahilan kung bakit ipinagkaloob Niya sa atin ang Kanyang Bugtong na Anak, ang Panginoong Jesus Nazareno, bilang ipinangakong Mesiyas at Manunubos ng sangkatauhan, gaya ng nasasaad sa propesiya ni Propeta Isaias sa Unang Pagbasa. Sa Ebanghelyo, si Maria na kapatid ni Lazaro ay itinampok ni Kristo bilang huwaran o halimbawa ng pagiging tunay at dalisay ang pag-ibig para sa Diyos. 

Tapat at dalisay na pag-ibig ang hinahanap sa atin ng Poong Jesus Nazareno. Ito ba ay ating ibibigay sa Kanya?