SA KAHULI-HULIHAN

1 Marso 2024 

Biyernes sa Ikalawang Linggo ng 40 Araw na Paghahanda 

Genesis 37, 3-4. 12-13a. 17b-28/Salmo 104/Mateo 21, 33-43. 45-46 

This faithful photographic reproduction of the painting (c. 1595) Christ Crowned with Thorns by Leonardo Corona (1561–1605), as well as the actual work of art itself from the San Giovanni in Bragora Collection, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This work is in the public domain in the United States because it was published (or registered with the U.S. Copyright Office) before January 1, 1929.

Tiyak na lingid sa kaalaman ng nakararami na hindi lamang noong panahon ng mga propetang gaya na lamang nina Propeta Elias, Jeremias, at Isaias inihayag ng Diyos ang Kaniyang planong tubusin ang sangkatauhan sa pamamagitan ng ipinangakong Mesiyas at Manunubos. Katunayan, bago pa man hinirang ng Diyos si Moises at ang iba pang mga propetang sumunod sa kaniya katulad na lamang nina Propeta Elias, Jeremias, at Isaias upang maging Kaniyang mga tagapagsalita sa mga Israelita, ang dakilang planong ito ng Diyos ay inihayag ng Diyos nang paulit-ulit. Hindi lamang Niya ito ginawa sa Halamanan ng Eden matapos ang sangkatauhan ay malugmok sa kasalanan dahil sa pagsuway nina Adan at Eba sa Kaniyang utos. Pagkatapos noon, sa isang hindi pangkaraniwang paraan, inilarawan ng Diyos ang planong ito. 

Itinampok sa Unang Pagbasa si Jose na anak ni Jacob na kilala rin sa tawag na Israel at Raquel. Sa tampok na salaysay sa Unang Pagbasa, inilarawan kung paanong si Jose ay naging alipin. Binenta siya sa pagkaalipin ng kaniyang mga kapatid na hindi siya tinanggap at minahal bilang kapatid dahil labis nila siyang kinainggitan. Sa totoo lamang, mas malala pa nga ang una nilang plano dahil binalak nilang patayin si Jose na kanilang kapatid, ka-dugo, kapamilya. Pinigilan lamang sila ni Ruben. Kaya naman, binenta nila si Jose bilang alipin sa halaga ng 30 pirasong pilak. 

Maituturing itong isang propesiya mula sa Diyos. Tila isang pasilip ang karanasang ito ni Jose ng mangyayari pagdating ng panahon. Inilarawan sa pamamagitan nito kung ano ang mangyayari sa ipinangakong Mesiyas at Manunubos sa Kaniyang pagdating sa mundo. Darating Siya sa mundo bilang isang biyaya mula sa Diyos, subalit, hindi tatanggapin ng nakararami ang biyayang ito na siyang pinakadakila sa lahat. 

Sa Ebanghelyo, isinalaysay ng Poong Jesus Nazareno ang talinghaga tungkol sa mga kasama sa ubasan upang ilarawan kung ano ang mangyayari sa Kaniya. Hindi Siya tatanggapin ng lahat. Kapopootan Siya ng lahat, lalung-lalo na ng mga Pariseo, mga matatanda ng bayan, at ang iba pang mga bumubuo sa Sanedrin. Dahil sa matinding poot laban sa Panginoong Jesus Nazareno, ipapapatay nila Siya. Ito nga ang nangyari noong unang Biyernes Santo. Ang Mahal na Poong Jesus Nazareno ay ipinapatay ng lahat ng Kaniyang mga kaaway sa pamamagitan ng pagpapako sa Kaniya sa Krus na Banal sa bundok ng Kalbaryo. 

Dahil sa tono at tema ng Unang Pagbasa at Ebanghelyo, tila parang wala sa lugar ang mga salitang binigkas ng mang-aawit sa Salmong Tugunan. Inihayag ng mang-aawit sa Salmong Tugunan: "Gunitain nating malugod ang dakilang gawa ng D'yos" (Salmo 104, 5a). Paano naman naging mga dakilang gawa ng Panginoong Diyos ang mga isinalaysay sa Unang Pagbasa at ang inilarawan sa talinghaga ni Jesus Nazareno sa Ebanghelyo? Si Jose ay naging isang tagapamahala sa Ehipto at naligtas ang Ehipto mula sa taggutom. Ang mga kapatid ni Jose ay nagtungo roon upang makabili ng pagkain para sa kanilang pamilya na noon ay nasa Canaan. Kalaunan, pinatawad ni Jose ang kaniyang mga kapatid at lumipat sila sa Ehipto kasama ang kanilang amang si Jacob upang makaligtas sila mula sa taggutom na laganap sa buong lupain noon. Ang Poong Jesus Nazareno naman, matapos ang Kaniyang pagkamatay sa Krus, ay hindi nanatiling isang bangkay na nakalibing sa loob ng Banal na Libingan. Bagkus, muli Siyang nabuhay sa ikatlong araw. Sa pamamagitan nito, nahayag ang Kaniyang kadakilaan bilang Diyos, Tagapagligtas, at Hari na naging matagumpay sa Kaniyang planong pagtubos sa sangkatauhan. 

Hindi halata sa unang tingin ang kadakilaan ng Panginoong Diyos, lalung-lalo sa mga sandali ng kagipitan, pagdurusa, hirap, sakit, tukso, hapis, at kadiliman. Katunayan, napakalabo ito para sa atin sa unang tingin. Dahil dito, hindi natin ito maunawaan. Sa totoo lamang, tiyak na ito ang dahilan kung bakit takot tayo sa plano ng Panginoong Diyos. Para na rin nating gustong tanungin ang Diyos kung paano ito mangyayari sa kabila ng lahat ng mga kawalan ng katarungan, kadiliman, at kasamaan. Bakit ito ang plano, nais, at loobin ng Diyos? Wala na bang ibang paraan na mas madaling unawain at tanggapin, na malayo mula sa kawalan ng katarungan, kadiliman, at kasamaan? 

Oo, batid ng Diyos ang kalagayan ng mundo. Alam Niya kung paanong ilang ulit na lumalaganap ang kasamaan, tukso, kadiliman, hirap, sakit, kawalan ng katarungan, at iba pang pag-uusig sa buhay. Subalit, kailanman, hindi sinabi ng Panginoong Diyos na magiging madali ang Kaniyang plano, naisin, at kalooban. Tingnan natin nang mabuti ang bawat sagradong imahen at larawan ng Mahal na Poong Jesus Nazareno. Hindi natin kailangang magsitungo sa Simbahan ng Quiapo upang masilayan natin ang imahen ng Poong Jesus Nazareno, lalung-lalo na't maraming replika ang imahen ng Poong Jesus Nazareno sa iba't ibang mga Simbahan. Isinasalarawan ng mga imahen o larawang ito ang plano ng Diyos. Naging madali ba iyon para sa Mahal na Poong Jesus Nazareno? 'Di ba hindi? Hindi sinabi ng Poong Jesus Nazareno kailanman na magiging madali at maginhawa ang buhay ng sinumang susunod sa Kaniya. Iyon nga lamang, may pakiusap at hiling Siya sa atin - manalig at magtiwala sa Kaniya dahil Siya mismo ang magtatagumpay nang maluwalhati sa huli. 

Kahit kailan, hindi sinabi ng Poong Jesus Nazareno na madaling sundin ang mga utos, atas, naisin, plano, at kalooban ng Diyos. Bagkus, sinabi Niyang mayroong saysay ang lahat ng ito dahil Siya mismo ang mananaig sa huli. Ang pakiusap at hiling lamang ng Nuestro Padre Jesus Nazareno sa atin ay manalig at magtiwala sa Kaniya nang may taos-pusong katapatan at pagsamba sa Kaniya bilang Diyos, Hari, at Manunubos. 

HINDI MAGTATAGAL

PITONG LINGGO NG PAGNINILAY SA PITONG HAPIS AT TUWA NI SAN JOSE 

(Ikaapat na Linggo) 

Ikaapat na Hapis: Ang Propesiya ni Simeon (Lucas 2, 34) 

Ikaapat na Tuwa: Ang dulot ng kaligtasang kaloob ni Jesus Nazareno (Lucas 2, 38)

This faithful photographic reproduction of the painting (c. Between 1535 and 1545) The Presentation of Christ and the Purification of the Virgin Mary in the Temple by an Anonymous follower of Juan de Borgoña (1480 - 1536) – Painter (Spanish), as well as the actual work of art itself from the Fundación Banco Santande Collection, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1929.

Hindi lamang napuno ng hapis at sakit ang Mahal na Inang si Mariang Birhen nang kaniyang marinig ang mga salitang binigkas ni Simeon sa Templo tungkol sa misyon ng Banal na Sanggol na si Jesus Nazareno bilang ipinangakong Mesiyas na kaloob ng Diyos pagdating ng takdang panahon. Napuno rin ng hapis at sakit si San Jose nang marinig ang mga salitang ito ni Simeon. Kahit na ito ang pangunahing dahilan kung bakit ang Bugtong na Anak ng Diyos na si Jesus Nazareno ay dumating sa mundong ito, labis pa rin itong ikinahapis ni San Jose dahil sa sakit dulot nito sa kaniyang puso. 

Katulad ng Mahal na Inang si Mariang Birhen, si San Jose ay labis na nasaktan nang marinig niya ang mga saitang binigkas ni Simeon tungkol sa Mahal na Poong Jesus Nazareno. Bagamat hinirang at itinalaga siya ng Diyos bilang ama-amahan ng Señor, hindi pa rin niya maiwasang masaktan sapagkat tunay niyang inibig ang Señor bilang anak niyang minamahal. Nang malaman ni San Jose na wala siyang magagawa upang ilayo at iligtas ang Poong Jesus Nazareno mula sa matitinding pagdurusa, hirap, at sakit dulot ng Kaniyang pagpapakasakit at pagkamatay sa Krus na Banal sa Kalbaryo, labis siyang nasaktan. Oo, kalooban ito ng Diyos, subalit masakit pa rin ito. 

Ang hapis at sakit ni San Jose ay patunay na mahirap tuparin at sundin ang kalooban ng Diyos. Kahit na inilahad ni Simeon ang kalooban ng Diyos sa pamamagitan ng mga salitang kaniyang binigkas sa mga sandaling iyon, hindi ito nangangahulugang hindi makakaramdam ng hapis at sakit ang mga magiging bahagi nito gaya ni San Jose. Oo, kalooban ng Diyos na magpakasakit at mamatay si Jesus Nazareno. Subalit, kahit na ito ay niloob ng Diyos, si San Jose ay labis na nasaktan at napuno ng hapis. Nais man ni San Jose na gawin na lamang ito ng Diyos sa ibang paraan, wala siyang magagawa dahil ito ang kalooban ng Diyos. Masakit para kay San Jose ito sapagkat ang Poong Jesus Nazareno ay tunay niyang minahal bilang kaniyang anak. Subalit, pagdating ng panahon, walang magagawa si San Jose upang ilayo, ipagtanggol, at iligtas si Jesus Nazareno mula sa mga matitinding hirap, sakit, at pagdurusang kaakibat ng Kaniyang misyon bilang ipinangakong Mesiyas at Manunubos. 

Subalit, ang hapis at sakit na ito ay napawi nang marinig ang pag-aalay ng papuri at pasasalamat ni Ana sa Diyos dahil sa biyaya ng Poong Jesus Nazareno. Nang marinig ito, ang hapis at sakit ni San Jose ay naging tuwa sapagkat naging malinaw para sa kaniya kung bakit kinailangan itong gawin ng Panginoong Jesus Nazareno pagdating ng araw. Ang buong sangkatauhan ay maliligtas sa pamamagitan ng Mahal na Poong Jesus Nazareno na mag-aalay ng sarili sa Krus para sa lahat. Bukod pa roon, ito ay isa ring paalala para kay San Jose na hindi magwawakas sa kamatayan ang lahat para sa Mahal na Poong Jesus Nazareno. Matapos ang pagbabata ng maraming hirap, sakit, at kamatayan, makakamit ng Poong Jesus Nazareno ang tagumpay at kaluwalhatian dahil muli Siyang mabubuhay sa ikatlong araw. 

Walang sinabi ang Diyos na magiging madali ang lahat para sa lahat ng mga tapat na nakikinig at sumusunod sa Kaniyang kalooban. Subalit, may pangako ang Diyos para sa lahat ng mga mananatiling tapat sa Kaniya hanggang sa huli. Matatamasa nila ang biyayang walang hanggan bunga ng maluwalhating tagumpay ng Mahal na Poong Jesus Nazareno na tumubos sa lahat sa pamamagitan ng Kaniyang Krus na Kabanal-banalan at Muling Pagkabuhay. 

KUSANG-LOOB NIYANG IPINAGKALOOB

25 Pebrero 2024 

Ikalawang Linggo ng 40 Araw na Paghahanda para sa Pasko ng Pagkabuhay [B] 

Genesis 22, 1-2. 9a. 10-13.15-18/Salmo 115/Roma 8, 31b-34/Marcos 9, 2-10 

This faithful photographic reproduction of the painting (c. 1500) Transfiguration of Christ by 

Meister des Universitäts-Altars, as well as the work of art itself from the Museumslandschaft Hessen Kassel, which is part of a collection of reproductions compiled by The Yorck Project, is in the Public Domain worldwide. Zenodot Verlagsgesellschaft mbH holds the compilation copyright and it is licensed under a GNU Free Documentation License.

Tuwing sasapit ang Ikalawang Linggo ng Kuwaresma o ang 40 Araw na Paghahanda para sa Pasko ng Pagkabuhay, ang salaysay ng Pagbabagong-Anyo ng Poong Jesus Nazareno ay itinatampok sa Ebanghelyo. Sa pamamagitan nito, ipinapaalala sa atin kung ano ang ating pinaghahandaan sa banal na panahong ito. Inilaan ng Simbahan ang panahong ito ng Kuwaresma upang paghandaan natin ang ating mga sarili para sa pinakadakila at pinakamahalagang araw ng taon sa Kalendaryo ng Simbahan na walang iba kundi ang Pasko ng Muling Pagkabuhay ng Poong Jesus Nazareno. 

Ipinasilip ng Poong Jesus Nazareno sa tatlong apostol na Kaniyang isinama sa tuktok ng bundok na sina Apostol San Pedro, Santo Santiago, at San Juan ang tagumpay at kaluwalhatiang Kaniyang kakamtan sa pamamagitan ng Kaniyang Banal na Krus at Muling Pagkabuhay sa pamamagitan ng Kaniyang Pagbabagong-Anyo na itinampok sa salaysay ng Ebanghelyo para sa Linggong ito. Muli Niyang ipinaalala sa kanila ang pangunahing dahilan ng Kaniyang unang pagparito sa mundo. Dumating sa daigdig ang Poong Jesus Nazareno bilang ipinangakong Mesiyas at Manunubos na bigay ng Diyos upang iligtas ang sangkatauhan sa pamamagitan ng maluwalhati at Kabanal-banalan Niyang Krus at Muling Pagkabuhay. 

Ang mga Pagbasa para sa Linggong ito ay tungkol sa kusang-loob na pagbibigay ng sarili. Sa Unang Pagbasa, hindi ipinagkait ni Abraham sa Diyos ang kaniyang kaisa-isang anak na si Isaac upang patunayan ang kaniyang tapat na pananalig sa Kaniya. Nang makita ng Panginoong Diyos mula sa langit na papatayin na ni Abraham ang kaniyang anak na minamahal na si Isaac upang ihandog siya sa Diyos, ipinadala Niya mula sa langit ang isa Niyang anghel upang pigilin si Abraham. Pinatunayan niyang tapat siya sa kaniyang pananalig sa Panginoon. Kinalugdan naman ito ng Panginoon. 

Sa Ikalawang Pagbasa, inihayag ni Apostol San Pablo na ipinasiya ng Diyos na iligtas tayo mula sa kasalanan sa pamamagitan ng Kaniyang Bugtong na Anak na walang iba kundi ang Mahal na Poong Jesus Nazareno, kahit hindi tayo karapat-dapat. Hindi naman kinailangan ng Diyos na ipagkaloob sa atin ang Nuestro Padre Jesus Nazareno upang ipagkaloob sa atin ang biyaya ng Kaniyang pagliligtas sa pamamagitan Niya. Maaari na lamang Siya magpakasarap sa Kaniyang kaharian sa langit habang tayong lahat ay pinababayaan Niyang mapahamak. Subalit, ipinasiya pa rin Niyang ibigay sa atin ang Poong Jesus Nazareno bilang ipinangakong Mesiyas at Manunubos dahil sa Kaniyang tunay at tapat na pag-ibig, kagandahang-loob, habag, at awa. 

Kaya naman, sa salaysay ng Pagbabagong-Anyo ng Poong Nazareno sa Ebanghelyo, ang Amang nasa langit ay muling nagsalita tungkol sa Kaniyang Bugtong na Anak. Sa pamamagitan nito, ipinaalala Niya sa mga apostol kung bakit dumating sa mundo si Jesus Nazareno. Dumating Siya sapagkat niloob ng Ama na ipagkaloob sa lahat ang biyaya ng Kaniyang pagliligtas sa pamamagitan ng Kaniyang Bugtong na Anak. Hindi man Niya kinailangang gawin iyon, subalit, ipinasiya pa rin Niya itong gawin 'pagkat tunay Siyang tapat sa Kaniyang pag-ibig, kagandahang-loob, habag, at awa.

Malakas na inihayag ng tampok na mang-aawit sa Salmong Tugunan: "Sa piling ng Poong mahal, ako'y laging mamumuhay" (Salmo 114, 9). Inilarawan ng mang-aawit na itinampok sa Salmong Tugunan para sa Linggong ito ang biyayang inilaan para sa lahat ng mga magpapasiyang maging tapat sa Diyos hanggang sa huli. Sa wakas ng kanilang pansamantalang pamumuhay at paglalakbay sa daigdig, makakapiling nila sa wakas ang Panginoong Diyos sa Kaniyang kaharian sa langit. 

Hindi ipinagkait ng Diyos ang Kaniyang Bugtong na Anak na si Jesus Nazareno dahil niloob Niya tayong iligtas. Kaya naman, ihandog rin nawa natin sa Diyos ang tunay at taos-puso nating katapatan, pag-ibig, pananalig, at pagsamba sa Kaniya. 

IBIG NG DIYOS

23 Pebrero 2024 

Biyernes ng Unang Linggo ng 40 Araw na Paghahanda 

Ezekiel 18, 21-28/Salmo 129/Mateo 5, 20-26

This faithful photographic reproduction of the painting (c. Between 1640 and 1650) Flagellation of Christ by Matthias Stom (fl. 1615–1649) which is made available by the Netherlands Institute of Art History under digital ID 300507, as well as the actual work of art itself from art dealer Robilant & Voena, London/Milan/New York/Paris, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. 

"Hindi Ko ikinasisiya ang kamatayan ng masama . . . Ang ibig Ko nga, siya'y magsisi at magbagong-buhay" (Ezekiel 18, 23). Sa mga salitang ito na binigkas ng Panginoong Diyos sa pamamagitan ni Propeta Ezekiel sa Unang Pagbasa nakatuon ang taimtim na pagninilay ng Simbahan sa araw na ito. Nakatuon ang ating mga pansin sa dahilan kung bakit ipinasiya ng Diyos na iligtas tayo mula sa kasalanan sa pamamagitan ng ipinangakong Mesiyas at Manunubos na walang iba kundi si Jesus Nazareno. Ito rin ang temang pinagtutuunan ng pansin sa Salmong Tugunan kung saan binigyan ng pansin ng tampok na mang-aawit ang habag at awa ng Diyos. 

Tiyak na ilang ulit na nating pinagnilayan ang aral na itinatampok sa mga Pagbasa para sa araw na ito. Subalit, muling pinagtutuunan ng pansin at pinagninilayan nang buong kataimtiman ang aral na ito sa araw na ito nang sa gayon ay magkaroon tayo ng pagkakataong sariwain muli ang ating pagkilala sa Panginoon. Makakatulong sa ating taimtim na paghahanda ng sarili sa panahong ito ng Kuwaresma ang gawaing ito na laging ginagawa ng Simbahan, lalung-lalo na tuwing sasapit ang panahong ito. 

Ang aral na muling pinagtutuunan ng pansin ng Simbahan sa araw na ito ay ang hindi mapagkakailang habag at awa ng Diyos. Hindi isang konsepto ang habag at awa ng Diyos. Bagkus, ito ay tunay at totoo. Dahil sa habag at awa ng Diyos na tunay at totoo, ipinasiya Niya tayong iligtas sa pamamagitan ng ipinangakong Manunubos na walang iba kundi ang Nuestro Padre Jesus Nazareno. Nakasentro sa aral na ito ang mga Pagbasa para sa araw na ito. Ipinakilala ng Panginoong Diyos ang Kaniyang sarili bilang Diyos na mahabagin at maawain sa Unang Pagbasa. Sa Salmong Tugunan, nagbigay ng patotoo ang tampok na mang-aawit tungkol sa walang maliw na habag at awa ng Diyos. Ang Mahal na Poong Jesus Nazareno ay nagturo naman tungkol sa pakikipagkasundo sa Kaniyang pangaral sa mga tao sa Ebanghelyo. Sa pamamagitan ng mga salitang ito sa mga Pagbasa, muling ipinapaalala sa atin ng Simbahan na ang habag at awa ng Diyos ay tunay at totoo.

Dahil sa habag at awa ng Diyos na tunay at totoo, tayong lahat ay ipinasiya Niyang iligtas sa pamamagitan ng Mahal na Poong Jesus Nazareno. Sa pamamagitan nito, binigyan Niya tayo ng pagkakataong makipagkasundo sa Kaniya. Kahit na hindi tayo karapat-dapat sa biyayang ito, ipinasiya pa rin ng Panginoong Diyos na ipagkaloob sa atin ang biyayang ito. Ang bawat imahen ng Poong Jesus Nazareno na nagpasan ng Krus ay mga sagisag at paalala ng katotohanang ito. 

Pinagkalooban tayo ng pagkakataon ng Diyos na makipagkasundo sa Kaniya. Huwag nawa nating sayangin ang pagkakataong ito habang ipinagpapatuloy ng bawat isa sa atin ang ating pansamantalang paglalakbay dito sa mundo. Makipagkasundo tayo sa Diyos. Taos-puso nating pagsisihan at talikdan ang ating mga kasalanan at magbalik-loob sa Kaniya. Makipagkasundo rin tayo sa kapwa nang sa gayon ay magkaroon rin sila ng kalakbay at kasama sa landas ng kabanalan patungo sa Diyos. 

BIKARYO NI KRISTO

22 Pebrero 2024 

Kapistahan ng Luklukan ni Apostol San Pablo 

1 Pedro 5, 1-4/Salmo 22/Mateo 16, 13-19 

This faithful photographic reproduction of the painting (c. 1820) Jesus Returning the Keys to St. Peter by Jean Auguste Dominique Ingres (1780–1867), as well as the actual work of art itself from the Musée Ingres Bourdelle in Montauban, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. 

"Pastol ko'y Panginoong D'yos, hindi ako magdarahop" (Salmo 22, 1). Sa mga salitang ito mula sa Salmong Tugunan nakasentro ang Pistang pagdiriwang ng Simbahan para sa araw na ito. Inilaan ng Simbahan ang araw na ito para sa espesyal na Pistang ito, kahit na tumapat sa isa sa mga araw ng panahon ng Kuwaresma ang araw na ito sa taong kasalukuyan. Ang Kapistahang ipinagdiriwang ng Simbahan sa araw na ito ay walang iba kundi ang Kapistahan ng Luklukan ni Apostol San Pedro. 

Tiyak na mayroong mga pamilyar sa Ingles ng pangalan ng Kapistahang ito. Sa Ingles, ang pangalan ng Kapistahang ipinagdiriwang sa araw na ito ay Chair of Saint Peter. Kung ihahalintulad ito sa pangalan ng Kapistahang ito sa Tagalog, 'di hamak na mas detalyado ang Tagalog na salin ng pangalan ng Pistang ito. "Chair" kasi ang salitang ginamit sa Ingles habang "Luklukan" ang ginamit sa Tagalog na salin ng pangalan ng pagdiriwang na ito. Kapag inisip natin "Chair," iisipin natin ang iba't ibang uri ng upuan habang isang spesipikong upuan ang "Luklukan." 

Ang mga katedra ng mga obispo na nakikita natin sa mga Katedral ng iba't ibang mga diyosesis katulad na lamang ng Katedral ng Maynila ay ilang mga halimbawa ng mga luklukan. Sa rito ng pagtatalaga ng obispo ng isang diyosesis, iniluluklok ang obispo sa kaniyang katedra na sumasagisag sa kaniyang kapangyarihan at tungkulin bilang obispo ng nasabing diyosesis. 

Hindi nakasentro sa literal na luklukan ang Kapistahang ipinagdiriwang ng Simbahan sa araw na ito. Bagkus, nakasentro ito sa kapangyarihan at tungkuling sinasagisag ng isang luklukan. Sa kaso ng Kapistahang ipinagdiriwang sa araw na ito, ang binibigyan ng pansin ay ang kapangyarihan at tungkulin ng Santo Papa. Isa lamang ang dahilan kung bakit. Ang unang Santo Papa ng Simbahan ay si Apostol San Pedro. Tampok sa Ebanghelyo ang salaysay kung paanong naging unang Santo Papa ng Simbahan ang dating mangingisdang anak ni Jonas si Apostol San Pedro.

Subalit, ang pag-agaw sa kawan ng Mahal na Poong Jesus Nazareno dito sa mundo ay hindi tungkulin ng Santo Papa. Bagkus, inatasan sila upang ang kawan ng Poong Jesus Nazareno dito sa mundo ay kanilang pangasiwaang mabuti. Ipinahiwatig ito sa pangaral ni Apostol San Pedro sa Unang Pagbasa nang kaniyang bigkasin sa wakas nito na mayroong Pangulong Pastol ang Simbahan (1 Pedro 5, 4). Kaya naman, ang lahat ng mga Santo Papa, kabilang na rito si Apostol San Pedro, ay kilala bilang mga bikaryo at kinatawan ni Kristo dito sa lupa. 

Ipinapaalala sa atin ng Simbahan sa araw na ito na mayroong isang Pastol na tunay na umiibig at kumakalinga sa atin. Ang nag-iisang Pastol na ito ay walang iba kundi ang Panginoong Jesus Nazareno. Pinatutunayan ito ni Apostol San Pedro at ng mga sumunod sa kaniya bilang Santo Papa ng Kaniyang Simbahan. Bilang mga bikaryo at kinatawan ng Mahal na Poong Jesus Nazareno, ipinapaalala ng mga Santo Papa na hindi pinababayaan ng Panginoon ang Kaniyang kawan. 

DUGONG NAGLILIGTAS

PITONG LINGGO NG PAGNINILAY SA PITONG HAPIS AT TUWA NI SAN JOSE 

(Ikatlong Linggo) 

Ikatlong Hapis: Ang Pagtutuli kay Jesus Nazareno (Lucas 2, 21) 

Ikatlong Tuwa: Ang Kabanal-Banalang Ngalan ni Jesus Nazareno (Mateo 1, 25) 

This faithful photographic reproduction of the painting (c. 1590s) Circumcision of Christ by Cigoli, as well as the actual work of art itself from the Hermitage Museum, is the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 70 years or fewer due to its age. 

Tiyak na magtataka ang nakararami kung bakit ang pagtutuli kay Jesus Nazareno ay nagdulot ng hapis at sakit sa puso ni San Jose. Alam naman nating ito ay bahagi ng buhay ng maraming tao. Kapag tinuli ang isang tao, kadalasan mga sanggol subalit mayroon ring mga tinutuli kahit na hindi na sila mga bata, isang normal na bahagi ng proseso ng pagtutuli sa isang tao ang sakit na nararamdaman dahil sa pagdaloy ng dugo. Ito ang dahilan kung bakit tiyak na mayroong mga magtataka kung bakit si San Jose ay nakaramdam ng hapis at sakit dahil sa pagtutuli kay Jesus Nazareno. 

Alam naman ni San Jose na normal lamang na makakaramdam ng hapdi at sakit ang tinutuli. Batid rin niya na kinakailangan itong gawin dahil nasasaad ito sa Kautusan ni Moises (Levitico 12, 3). Subalit, kahit batid niyang kinakailangan itong gawin at kahit batid rin niyang normal lamang na makakaramdam ng sakit ang mga tinutuli dahil sa proseso nito, nagdulot pa rin ito ng hapis at sakit sa puso ni San Jose. Dahil dito, tiyak na tatanungin ng ilan kung bakit ito ang kaniyang ikinahapis. 

Hindi ang mismong proseso ng pagtutuli sa Poong Jesus Nazareno ang ikinahapis ni San Jose. Bagkus, ang ikinahapis ni San Jose sa sandaling iyon ay ang katotohanan ng misyon ng Poong Jesus Nazareno bilang ipinangakong Mesiyas at Manunubos. Bilang ipinangakong Mesiyas at Manunubos ng sangkatauhan, ibububo ng Mahal na Poong Jesus Nazareno ang Kaniyang Kabanal-banalang Dugo habang nakapako sa Banal na Krus sa bundok ng Kalbaryo. Ang katotohanang ito ay ang ikinahapis ni San Jose. Sa pamamagitan ng dugong dumaloy mula sa Mahal na Poong Jesus Nazareno dulot ng rito at proseso ng pagtutuli sa Kaniya, si San Jose ay nagkaroon ng isang pasilip sa dakilang paghahaing magaganap sa bundok ng Kalbaryo 33 taon mula sa sandaling yaon. Kahit misyon Niya ito, masakit pa rin ito para kay San Jose. 

Subalit, ang hapis at sakit sa puso ni San Jose sa sandaling ito ay napawi nang ibigay ang pangalan ng Banal na Sanggol na Mesiyas - "Hesus." Ang kahulugan ng Banal na Pangalan ng Banal na Sanggol - "Hesus" - ay "Ang Diyos ay nagliligtas." Katunayan, inilalarawan ng kahulugan ng Banal na Pangalan ang dahilan kung bakit dumating sa mundong ito ang Mahal na Poong Jesus Nazareno. Dumating sa daigdig na ito ang Nuestro Padre Jesus Nazareno upang iligtas ang sangkatauhan. Napawi ang sakit at hapis sa puso ni San Jose sa sandaling pinangalanang "Hesus" ang Banal na Sanggol dahil inilarawan ng Banal na Pangalang ito ang Kaniyang misyon. 

Kahit napakasakit, ipinasiya pa rin ng Mahal na Poong Jesus Nazareno na iligtas ang buong sangkatauhan sa pamamagitan ng Kaniyang Krus at Muling Pagkabuhay. Sa pamamagitan ng gawang ito, ang ating mga hapis at sakit ay Kaniyang pinalitan ng tuwa at galak. Gaya ni San Jose, maging bukas nawa tayo sa biyayang ito na kaloob sa atin ng Mahal na Poong Jesus Nazareno. 

WALANG MALIW NA KATAPATAN

18 Pebrero 2024 

Unang Linggo ng 40 Araw na Paghahanda para sa Pasko ng Pagkabuhay [B] 

Genesis 9, 8-15/Salmo 24/1 Pedro 3, 18-22/Marcos 1, 12-15 

This faithful photographic reproduction of the painting (c. 1854) The Temptation of Christ by Ary Scheffer (1795–1858), as well as the original work of art itself from the Walker Art Gallery, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1858. This work is in the Public Domain in the United States of America because it was published (or registered with the U.S. Copyright Office) before January 1, 1929. 

Minsan lamang sa isang taong itinatampok sa Ebanghelyo ang salaysay ng pagtukso kay Kristo sa ilang. Ang Unang Linggo ng 40 Araw na Paghahanda para sa Pasko ng Pagkabuhay na tiyak na mas kilala ng nakararami sa atin sa tawag na Kuwaresma ay ang bukod tanging araw ng bawat taon kung kailan itinatampok sa Ebanghelyo ang salaysay ng kaganapang ito sa buhay ng Mahal na Poong Jesus Nazareno. Matapos binyagan ng Kaniyang kamag-anak na si San Juan Bautista sa Ilog Jordan kung saan ipinakilala Siya ng Amang nasa langit at ng Espiritu Santo, ang Mahal na Poong Jesus Nazareno ay nagtungo sa ilang upang manalangin at mag-ayuno sa loob ng 40 araw upang paghandaan ang Kaniyang sarili para sa Kaniyang ministeryo. Doon sa ilang, habang nananalangin at nag-ayuno sa loob ng 40 araw, tinukso Siya ng demonyo. 

Kapag Taon B sa Kalendaryo ng Simbahan, gaya ng kasalukuyang taon, ang bersyong itinatampok sa Ebanghelyo ay ang bersyon ni San Marcos. Si San Marcos ay isa sa tatlong sinotikong Ebanghelista o Manunulat ng Mabuting Balita. Ang dalawa pang mga Ebanghelista o Manunulat ng Mabuting Balita na bumubuo sa mga sinotikong Ebangelyo ay sina San Mateo at San Lucas. Tinatawag sina San Mateo, San Marcos, at San Lucas na mga sinotikong Ebangelista o Manunulat ng Mabuting Balita dahil halos walang pinagkaiba ang kanilang mga salaysay. Matatagpuan rin sa Ebanghelyo ni San Lucas ang karamihan sa mga isinalaysay sa Ebanghelyo ni San Marcos at pati rin sa Ebanghelyo ni San Mateo. 

Subalit, ang salaysay ng pagtukso sa Mahal na Poong Jesus Nazareno sa Ebanghelyo ni San Marcos na itinatampok sa Linggong ito ay naiiba sa iba pang mga salaysay ng kaganapang ito. Ito ang pinakamaikling salaysay ng mahalagang kaganapang ito sa buhay ng Mahal na Poong Jesus Nazareno. Dalawang talata lamang ang haba nito sa Ebanghelyo ni San Marcos. Hindi inilarawan ni San Marcos sa kaniyang salaysay ang mga tukso ng demonyo kay Jesus Nazareno. Katunayan, hindi rin niya binanggit kung ilang ulit tinukso si Jesus Nazareno. 

Napakalinaw na hindi mahalaga para kay San Marcos kung ilang ulit nga ba tinukso ang Poong Jesus Nazareno, gaya ng inilarawan sa kaniyang salaysay ng kaganapang ito na itinampok sa Ebanghelyo para sa Linggong ito. Ang pinakamahalaga para kay San Marcos, napagtagumpayan ng Poong Jesus Nazareno ang lahat ng mga tukso ng demonyo. Ilang ulit mang tinukso ang Poong Jesus Nazareno, hindi Siya nagpatalo. Bagkus, nilabanan Niya ang lahat ng mga ito at nagtagumpay. 

Isa lamang ang puntong isinasalungguhit sa maikling salaysay ni San Marcos tungkol sa pagtukso sa Poong Jesus Nazareno sa ilang na itinampok sa Ebanghelyo para sa Linggong ito, ang Unang Linggo ng Kuwaresma. Ang Panginoon ay tapat. Mula noon hanggang ngayon, ang Diyos ay tapat. Hindi titigil sa pagiging tapat ang Diyos. Kung tutuusin, hindi magmamaliw ang katapatan ng Diyos. Gaya ng inilarawan sa Unang Pagbasa at Ikalawang Pagbasa, mananatiling tapat ang Diyos magpakailanman. Ang katapatan ng Diyos ay hindi magmamaliw kailanman. Naging tapat ang Panginoong Diyos kay Noe, gaya ng inilarawan sa Unang Pagbasa. Ipinangako Niyang hindi Niya lilipulin sa pamamagitan ng baha ang lahat ng mga may buhay (Genesis 9, 15). Ang pangaral ni Apostol San Pablo sa Ikalawang Pagbasa ay nakasentro rin sa katapatan ng Diyos na walang maliw. Sa pamamagitan ng binyag, ang Diyos ay nagdudulot ng kaligtasan sa lahat. 

Dahil ang Diyos ay tunay na matapat, dapat rin tayong maging tapat. Ang mga salita ng mang-aawit sa Salmong Tugunan para sa araw na ito ay isabuhay nawa natin: "Poon, Iyong minamahal ang tapat sa Iyong tipan" (Salmo 24, 10).