MGA MASUNURING TAGA-AKAY

13 Hunyo 2024 

Paggunita kay San Antonio de Padua, pari at pantas ng Simbahan 

Huwebes ng Ika-10 Linggo sa Karaniwang Panahon (II) 

1 Hari 18, 41-46/Salmo 64/Mateo 5, 20-26 

This faithful photographic reproduction of the painting (c. 18th century) Saint Anthony by Joaquim Manuel da Rocha (1727-1786) from the Museu de Lisboa is in the Public Domain ("No Copyright") ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

"Sinasabi Ko sa inyo: kung ang pagsunod ninyo sa kalooban ng Diyos ay tulad lamang ng pagsunod ng mga eskriba at mga Pariseo, hindi kayo makapapasok sa kaharian ng Diyos" (Mateo 5, 20). Ang pagninilay ng Simbahan sa araw na ito na inilaan para sa pagdiriwang ng Paggunita kay San Antonio de Padua, pari at pantas ng Simbahan, ay nakatuon at nakasentro sa mga salitang ito na binigkas ng Poong Jesus Nazareno sa simula ng Ebanghelyo para sa araw na ito. Dapat maging taos-puso ang ating pag-ibig para sa Diyos na pinatutunayan ng taos-puso nating pagtanggap at pagsunod sa Kaniyang kalooban. Katulad ng iba pang mga Santo at Santa sa kasamahan ng mga banal sa langit, ang mga salitang ito ng Poong Jesus Nazareno ay laging isinabuhay ni San Antonio de Padua nang buong katapatan sa bawat sandali ng kaniyang buhay dito sa lupa. 

Tampok sa salaysay sa Unang Pagbasa para sa araw na ito ang muling pagpatak ng ulan sa Israel matapos ang tagumpay ng Panginoong Diyos laban kay Baal sa Bundok ng Carmelo. Dahil ipinasiya ng buong bayan ng Israel sa pangunguna ng hari nitong si Acab at ng kaniyang asawang si Jezebel na suwayin, talikuran, at itakwil ang Diyos at sambahin ang diyus-diyusang si Baal, sa loob ng mahabang panahon, hindi umulan o nagkahamog sa Israel. Subalit, matapos ang tagumpay ng Panginoon laban kay Baal, ang buong bayan ng Israel ay nagbalik-loob sa Panginoon. Ito ang dahilan kung bakit ipinasiya ng Panginoong Diyos na umulan at magkahamog muli sa Israel. 

Inilahad sa Salmong Tugunan para sa araw na ito ang ilan sa mga dahilan kung bakit ang Diyos lamang ang dapat paurihan, pasalamatan, ibigin, at sambahin ng lahat sa daigdig. Walang ibang diyos maliban sa Panginoon. Ang tunay na Diyos ay walang iba kundi ang Panginoong Diyos. Binubuo ng Tatlong Persona - Ama, Anak, at Espiritu Santo - ang tunay at nag-iisang Diyos na ating minamahal, pinararangalan, pinupuri, pinasasalamatan, pinaglilingkuran, pinananaligan, sinasampalatayan, at sinasamba nang buong katapatan bilang Simbahan. 

Ang kakaibang talino at ang kakaibang galing at husay sa pagsasalita sa mga tao ay ilan lamang sa mga biyayang ipinagkaloob ng Panginoong Diyos kay San Antonio de Padua. Subalit, bagamat ipinagkaloob sa kaniya ng Panginoong Diyos ang biyaya ng kakaibang talino at ang biyaya ng kakaibang galing at husay sa pagsasalita sa mga tao, ipinasiya ni San Antonio de Padua na hindi gamitin ang mga biyayang iyon para sa sarili niyang kapakanan. Bagkus, ipinasiya ni San Antonio de Padua na gamitin ang mga biyayang ito na kaloob sa kaniya ng Diyos upang ang lahat ng mga makikinig sa kaniya noong namumuhay siya sa mundo patungo sa Diyos na buong kababaang-loob at pinaglingkuran sa bawat sandali ng kaniyang buhay sa mundo. Ito ang laging ipinasiya ni San Antonio de Padua sa bawat sandali ng kaniyang buhay sa mundo. Akayin ang lahat ng mga makikinig sa kaniya patungo sa Panginoong Diyos para sa lalong ikadarakila ng Kaniyang Kabanal-Banalang Pangalan. 

Gaya ni San Antonio de Padua, akayin natin ang ating kapwa patungo sa Diyos. Ang daan patungo sa Diyos ay dapat nating ituro at ipakita sa kanila. Sa pamamagitan ng pagiging mga salamin at daluyan ng mga biyaya ng Diyos, magagawa natin ito. 

BUNGA NG KANIYANG PAG-IBIG

9 Hunyo 2024 

Ika-10 Linggo sa Karaniwang Panahon [B] 

Genesis 3, 9-15/Salmo 129/2 Corinto 4, 13-5, 1/Marcos 3, 20-35 

This faithful photographic reproduction of the painting (c. 16th/17th century) Christ Speaking to the Faithful, by Fernão Gomes (1548-1612), as well as the actual work of art itself from the Leiloeira São Domingos, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

"Sa piling ng Poong D'yos may pag-ibig at pagtubos" (Salmo 139, 7). Buong linaw na inilarawan sa mga salitang ito na binigkas ng tampok na mang-aawit sa Salmong Tugunan ang temang nais talakayin at pagnilayan ng Simbahan sa Linggong ito. Ang ating mga pansin ay itinutuon ng Simbahan sa biyaya ng pagliligtas ng Panginoong Diyos na bunga ng Kaniyang dakilang pag-ibig para sa ating lahat. Dahil sa dakilang pag-ibig ng Diyos, tayong lahat ay ipinasiya Niyang iligtas sa pamamagitan ng Mahal na Poong Jesus Nazareno, ang Kaniyang Bugtong na Anak. 

Ipinapaalala sa atin ng mga Pagbasa para sa Linggong ito ang dahilan kung bakit lagi tayong nagkakatipon-tipon bilang Simbahan linggo-linggo. Kahit napapaloob tayo sa Karaniwang Panahon, lagi pa rin tayong nagkakatipon-tipon bilang Simbahan upang mag-alay ng taos-pusong papuri, pasasalamat, at pagsamba sa Banal na Santatlo. Hindi lamang tayo nagkakatipon-tipon bilang Simbahan sa mga espesyal na panahon lamang gaya na lamang ng Adbiyento, Pasko ng Pagsilang, Kuwaresma, mga Mahal na Araw, Pasko ng Muling Pagkabuhay, at Kapistahan ng mga Santong Pintakasi ng iba't ibang mga pamayanan. Bagkus, bilang mga bumubuo sa tunay at nag-iisang Simbahang itinatag ng Poong Jesus Nazareno, linggo-linggo tayo nagkakatipon-tipon upang handugan Siya ng taos-pusong papuri, pasasalamat, at pagsamba. Dahil dito, mayroon tayong obligasyon bilang mga Katoliko na magsimba tuwing Linggo. Kahit isang beses lamang sa loob ng sanlinggo, dapat natin itong ilaan para sa Poong Jesus Nazareno sa pamamagitan ng pagsisimba. Ito nga ang dahilan kung bakit ang Linggo ay tinatawag na araw ng Panginoon. 

Dakilang pag-ibig ang dahilan kung bakit ipinangako ng Panginoong Diyos na ililigtas Niya ang sangkatauhan sa Unang Pagbasa. Bilang tugon sa pagkalugmok ng tao sa kasalanan, ipinasiya ng Panginoong Diyos na tubusin at palayain mula sa kasalanan ang sangkatauhan. Hindi Niya ipinasiyang pabayaan na lamang ang sangkatauhan na tuluyang mapahamak sapagkat ipinasiya nilang talikuran at suwayin Siya, kahit na ito mismo ang magiging dahilan ng kanilang pagkalugmok sa kasalanan. Ang pangakong binitiwan ng Diyos sa tampok na salaysay sa Unang Pagbasa para sa Linggong ito ay sumasalamin sa Kaniyang pasiyang ibigin pa rin ang sangkatauhan. 

Hindi ikinubli ni Apostol San Pablo ang mga hirap, sakit, at pagdurusang hinarap at tiniis niya sa bawat sandali ng kaniyang misyon bilang apostol at saksi ng Mahal na Poong Jesus Nazareno. Nakasentro sa ilan sa mga hirap, sakit, pagdurusa, pagsubok, at pag-uusig na kaniyang hinarap at tiniis sa bawat sandali ng kaniyang tungkulin at misyon bilang isang apostol at saksi ng Poong Jesus Nazareno ang kaniyang pangaral sa Ikalawang Pagbasa. Buong kababaang-loob na inihayag ni Apostol San Pablo na napakahirap ang kaniyang ginagawa bilang apostol at saksi ni Kristo. Subalit, dahil sa kaniyang tapat at dalisay na pananalig at pananampalataya sa Panginoon, nanatili pa rin siyang tapat sa kaniyang misyon. Isa lamang ang dahilan nito - naakit siya sa pag-ibig ng Diyos na tunay ngang dakila na inihayag sa kaniya ni Jesus Nazareno. 

Mayroong dalawang bahagi ang tampok na salaysay sa Ebanghelyo. Sa unang bahagi ng salaysay sa Ebanghelyo, ang Mahal na Poong Jesus Nazareno ay nagsalita nang patalinghaga tungkol sa Kaniyang misyon. Hindi Siya dumating sa mundong ito bilang kampon ng demonyo. Bagkus, ang Poong Jesus Nazareno ay dumating bilang ipinangakong sugo ng Diyos. Dumating sa daigdig na ito ang Bugtong na Anak ng Diyos na si Jesus Nazareno upang tuparin ang kalooban ng Ama. Sa ikalawang bahagi naman ng salaysay sa Ebanghelyo, ang Nuestro Padre Jesus Nazareno ay nagsalita tungkol sa pagiging bahagi ng Kaniyang pamilya. Kung nais nating maging bahagi ng pamilya ng Panginoong Jesus Nazareno, sundin rin natin ang kalooban ng Diyos. 

Niloob ng Diyos na iligtas at palayain tayo mula sa kasalanan sa pamamagitan ng ipinangakong Mesiyas at Manunubos na si Jesus Nazareno, ang Kaniyang Bugtong na Anak. Kusang-loob Niya itong ipinasiyang gawin dahil tunay nga Niya tayong iniibig at kinahahabagan. Sa pamamagitan nito, pinagkakalooban Niya tayo ng pagkakataong makapiling Siya magpakailanman. Ito ang dahilan kung bakit mayroong Simbahan. 

Kusang-loob na ibinigay ng Poong Jesus Nazareno ang Kaniyang sarili upang tayong lahat ay mailigtas. Ihandog rin natin ang ating mga sarili sa Kaniya nang taos-puso. Ang ating taimtim na debosyon, pamamamanata, panananalig at pananampalataya sa Kaniya na nagligtas sa atin nang kusang-loob ay lagi nating isabuhay. 

MALINIS ANG PUSO

8 Hunyo 2024 

Paggunita sa Kalinis-Linisang Puso ng Birheng Maria 

Isaias 61, 9-11/1 Samuel 2/Lucas 2, 41-51 

This faithful photographic reproduction of the painting (c. 18th century) Maria mit flammendem Herz, as well as the actual work of art itself from Dr. Fischer Kunstauktionen, is in the Public Domain ("No Copyright") in its country of origin as well as in other countries and areas where the copyright term is the author's life plus 70 years or fewer, including the United States, due to its age. 

Ang Ebanghelyo para sa araw na ito na inilaan ng Simbahan para sa pagdiriwang ng Paggunita sa Kalinis-Linisang Puso ng Birheng Maria ay tungkol sa Paghahanap sa Batang Jesus Nazareno. Nang matagpuan ng Mahal na Inang si Mariang Birhen at ni San Jose sa Templo ang Batang Nuestro Padre Jesus Nazareno sa ikatlong araw ng kanilang paghahanap sa Kaniya, binigkas ng Mahal na Inang si Mariang Birhen ang mga salitang ito sa salaysay ng kaganapang ito na inilahad sa tampok na salaysay sa Ebanghelyo: "Anak, bakit naman ang ginawa Mo sa amin? Balisang-balisa na kami ng Iyong ama sa paghahanap sa Iyo" (Lucas 2, 48). Mga salita ng isang inang labis na nag-aalala para sa kaniyang anak ang binigkas ng Mahal na Inang si Mariang Birhen. 

Hinanap ng Mahal na Inang si Mariang Birhen at ni San Jose ang Batang Panginoong Jesus Nazareno sa loob ng tatlong araw. Buong linaw na isinalungguhit ng Mahal na Inang si Mariang Birhen ang kaniyang pag-aalala para sa kaniyang Anak na si Jesus Nazareno sa mga salitang kaniyang binigkas sa Ebanghelyo. Subalit, sa konteksto ng pagdiriwang ng Simbahan para sa araw na ito, ang mga salitang ito ay itinatampok at binibigyan ng pansin ng Simbahan dahil ang temang nais pagnilayan ng Simbahan sa araw na ito ay naka-ugat sa mga salitang ito na binigkas ng Mahal na Ina. 

Nakasentro sa paghahanap at paghahangad sa Mahal na Poong Jesus Nazareno ang pagdiriwang ng Simbahan sa araw na ito. Katunayan, ito ang tema ng pagdiriwang ng Simbahan sa araw na ito. Sa pamamagitan ng pagninilay sa temang ito, itinuturo sa atin ng Simbahan kung ano ang dapat nating gawin upang ang ating mga puso at loobin ay maging malinis at dalisay gaya ng Kalinis-Linisang Puso ng Birheng Maria. Hanapin at hangarin ang Mahal na Poong Jesus Nazareno. 

Sa Unang Pagbasa, isang napakahalagang mensahe mula sa Panginoong Diyos ang inilahad ni Propeta Isaias. Buong linaw na inihayag ng Panginoong Diyos sa nasabing mensahe kung ano ang dapat hangarin ng Kaniyang bayan. Ang dapat hangarin at panabikan ng Kaniyang bayan ay ang katuparan ng Kaniyang pangako. Ihahayag ng Diyos sa pamamagitan ng pagtupad sa Kaniyang pangako ang Kaniyang dalisay at tapat na dakilang pag-ibig para sa Kaniyang bayan. Mga salitang nagbibigay-papuri at pasasalamat sa Panginoon ay inilahad sa Salmong Tugunan. Ilan lamang sa mga kahanga-hangang bagay na ginawa ng Panginoong Diyos na hindi mabilang ay buong galak na inilarawan at pinatotohanan sa Salmong Tugunan. 

Tayong lahat ay tinatanong sa araw na ito - sino o ano ang hinahanap natin? Sino o ano ang hinahangad, kinasasabikan, at pinananabikan natin? Inaanyayahan tayo ng Simbahan na pagnilayan nang buong kataimtiman ang tanong na ito habang atin ring pinagninilayan ang kadalisayan, kalinisan, at katapatan ng Mahal na Inang si Mariang Birhen sa kaniyang pag-ibig, pananalig, at pagsamba sa Panginoon na sinasagisag ng kaniyang Kalinis-Linisang Puso. 

Nais rin ba nating maging dalisay at busilak ang ating mga puso katulad ng Kalinis-Linisang Puso ng Birheng Maria, ang ating Mahal na Ina? Hangarin ang Diyos. Laging hanapin, hangarin, at kasabikan ang Diyos. Pakinggan, tanggapin, at sundin natin sa bawat sandali ng ating buhay ang Kaniyang kalooban. Sa pamamagitan nito, ang taos-pusong pag-ibig, pananalig, at pagsamba sa Diyos ay ating maipapahayag. 

IBINIGAY NIYA ANG LAHAT

7 Hunyo 2024 

Dakilang Kapistahan ng Kamahal-Mahalang Puso ni Jesus Nazareno [B] 

Oseas 11, 1.3-4. 8k-9/Isaias 12/Efeso 3, 8-12. 14-19/Juan 19, 31-37 

This faithful photographic reproduction of the painting L'Apparition du Sacré-Coeur à sainte Marguerite-Marie from the Église Saint-Charles-Borromée (Charlesbourg) which was made available by Wilfredo Rafael Rodriguez Hernandez is made available under the Creative Commons CC0 1.0 Universal Public Domain Dedication.

Ang Ebanghelyo para sa araw na ito na inilaan ng Simbahan para sa pagdiriwang ng Dakilang Kapistahan ng Kamahal-Mahalang Puso ni Jesus Nazareno ay tungkol sa mga naganap matapos malagutan ng hininga mula sa Banal na Krus ang Panginoong Jesus Nazareno. Dumaloy ang dugo at tubig mula sa tagiliran ng Nuestro Padre Jesus Nazareno matapos itong inulos ng isa sa mga kawal roon gamit ang isang sibat (Juan 19, 34). Layunin ng Simbahan sa pamamagitan ng taimtim na pagninilay sa sandaling ito na itinampok sa salaysay sa Mabuting Balita para sa Dakilang Kapistahang buong ringal na ipinagdiriwang ng Simbahan sa araw na ito ang dakilang pag-ibig ng Diyos para sa lahat na sinasagisag ng Kamahal-Mahalang Puso ng Poong Jesus Nazareno. 

Dugo at tubig. Isa lamang ang ibig sabihin nito. Ang pag-ibig ng Panginoong Diyos ay tunay. Tunay Niya tayong iniibig. Ibinuhos Niya ang lahat para sa atin bilang patunay ng Kaniyang dakilang pag-ibig para sa atin. Dahil sa Kaniyang dakilang pag-ibig, ang Bugtong na Anak Niyang si Jesus Nazareno ay kusang-loob Niyang ipinagkaloob sa atin bilang ipinangakong Mesiyas at Tagapagligtas. Hindi Niya ipinagkait sa atin ang Mahal na Poong Jesus Nazareno dahil tunay Niya tayong iniibig at kinahahabagan. Sa pamamagitan ng Kaniyang pasiyang ipagkaloob ang Poong Jesus Nazareno sa lahat bilang ipinangakong Mesiyas at Manunubos, tayong lahat ay Kaniyang iniligtas. 

Nakasentro rin sa dakilang pag-ibig ng Panginoong Diyos para sa lahat ang iba pang mga Pagbasa para sa Dakilang Kapistahang ipinagdiriwang ng Simbahan sa araw na ito. Inilahad ni Propeta Oseas ang pahayag ng Panginoong Diyos tungkol sa Kaniyang pag-ibig para sa Kaniyang bayan sa Unang Pagbasa. Buong linaw na inilarawan ng Diyos sa pahayag na ito na inilahad ni Propeta Oseas sa Unang Pagbasa na nananatili ang Kaniyang dakilang pag-ibig. Ang Panginoon ay laging tapat sa Kaniyang bayan, kahit na ilang ulit Siyang tinalikuran ng Kaniyang bayan. Isa lamang ang dahilan kung bakit ito ang pasiya ng Diyos - ang Kaniyang dakilang pag-ibig na hindi magmamaliw o maglalaho kailanman. Sa Ikalawang Pagbasa, inilarawan ni Apostol San Pablo ang layunin ng kaniyang pagmimisyon bilang isa sa mga apostol at saksi ng Panginoong Jesus Nazareno - makilala Siya ng lahat bilang Panginoon at Diyos na mapagmahal. 

Inilarawan sa Salmong Tugunan ang ilan sa mga kahanga-hangang gawa ng Diyos na nagpapatunay ng Kaniyang dakilang pag-ibig. Sa taludtod na inihayag sa Pagbubunyi sa Mabuting Balita habang inaawit ang "Aleluya," inilarawan nang buong linaw ang pinakadakilang gawa ng Diyos na nagpapahayag ng Kaniyang dakilang pag-ibig. Si Kristo Hesus, ang Nazareno, ay kusang-loob Niyang ipinagkaloob sa sangkatauhan bilang ipinangakong Mesiyas at Manunubos. 

Tunay nga tayong minamahal ng Diyos. Hindi mabibilang ninuman ang lahat ng mga kahanga-hangang gawa ng Diyos na nagpapatunay ng Kaniyang dakilang pag-ibig para sa lahat. Ang Kamahal-Mahalang Puso ni Jesus Nazareno ay ang sagisag nito. Dahil sa dakilang pag-ibig ng Diyos na isinasagisag ng Kamahal-Mahalang Puso, ang sangkatauhan ay ipinasiya Niyang iligtas sa pamamagitan ng Kabanal-Banalang Krus at Muling Pagkabuhay ng Dakilang Saserdoteng si Jesus Nazareno. 

SAKRAMENTO NG PAG-IBIG, HABAG, AT KABUTIHANG DAKILA

2 Hunyo 2024 

Dakilang Kapistahan ng Kabanal-Banalang Katawan at Dugo ng Panginoon [B] 

Exodo 24, 3-8/Salmo 115/Hebreo 9, 11-15/Marcos 14, 12-16. 22-26 

This faithful photographic reproduction of the painting (c. Before 1705) The Communion of the Apostles by Luca Giordano (–1705), as well as the actual work of art itself from the Museum of Fine Arts Boston, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1705. It is also in the Public Domain in the United States because it was published (or registered with the U.S. Copyright Office) before January 1, 1929.

 

"Kunin ninyo; ito ang Aking Katawan . . . Ito ang Aking Dugo ng tipan, ang dugong mabubuhos dahil sa marami" (Marcos 14, 22-24). Sa pamamagitan ng mga salitang ito na binigkas ng Nuestro Padre Jesus Nazareno sa mga alagad habang ibinabahagi ang tinapay at ang saro ng alak sa kanila sa tampok na salaysay ng Huling Hapunan na inilahad sa Ebanghelyo, itinatag Niya ang Sakramento ng Banal na Eukaristiya. Sa tuwing ipinagdiriwang ang Sakramento ng Banal na Eukaristiya, laging dumarating sa literal na pamamaraan ang Mahal na Poong Jesus Nazareno sa anyo ng tinapay at alak upang ihandog ang Kaniyang sarili at ibigay ang Kaniyang Katawan at Dugong Banal bilang pagkain at inuming nagbibigay-buhay at nagliligtas. 

Ang Linggong ito ay inilaan ng Simbahan upang ituon ang ating mga pansin sa tunay na presensya ng Poong Jesus Nazareno sa Banal na Eukaristiya. Hindi lamang mga simbolo at sagisag ng Mahal na Poong Jesus Nazareno ang tinapay at alak sa tuwing idinadaos ang pagdiriwang ng Banal na Misa. Bagkus, Siya talaga iyon. Lagi Siyang dumarating sa tuwing ipinagdiriwang ang Banal na Misa upang ibahagi sa atin ang buo Niyang sarili sa atin. Kusang-loob na ibinibigay sa atin ng Mahal na Poong Jesus Nazareno ang sarili Niyang Katawan at Dugo bilang espirituwal na pagkain at inumin sapagkat tunay Niya tayong iniibig at kinahahabagan. Dahil dito, ang Banal na Misa ay ang sakramento ng dakilang pag-ibig ng Poong Jesus Nazareno. 

Nakasentro sa pagiging Dakilang Saserdote ng Mahal na Poong Jesus Nazareno ang pangaral ng manunulat ng Sulat sa mga Hebreo na itinampok at binigyan ng pansin sa Ikalawang Pagbasa para sa Linggong ito. Bilang Dakilang Saserdote, ang Poong Jesus Nazareno ay kusang-loob na nag-alay ng sarili para sa ikapagpapatawad ng mga kasalanan at kaligtasan ng sangkatauhan. Minsan Niya itong ginawa sa Banal na Krus sa bundok ng Kalbaryo. Sa bawat pagdiriwang ng Banal na Misa, lagi Siyang dumarating sa anyo ng tinapay at alak upang ialay muli ang buo Niyang sarili para sa ikapagpapatawad ng mga kasalanan at ikaliligtas ng sangkatauhan. Ipinapahayag ng Panginoong Jesus Nazareno sa pamamagitan nito ang Kaniyang dakilang pag-ibig na hindi magmamaliw kailanman. 

Sa Unang Pagbasa, ang Panginoong Diyos ay nakipagtipan sa bayang Israel. Dugo ng mga hayop ang ginamit bilang tanda ng pakikipagtipan ng Diyos sa mga Israelita. Sa Bagong Tipan, ang Panginoong Diyos ay nakipagtipan sa buong sangkatauhan. Ang tanda ng walang hanggang tipang ito ay walang iba kundi ang Kabanal-Banalang Katawan at Dugo ng Dakilang Saserdoteng si Jesus Nazareno. Dakilang pag-ibig ang dahilan kung bakit ipinasiya ng Diyos na bumuo ng isang tipang walang hanggan sa pamamagitan mismo ng Dakilang Saserdoteng si Jesus Nazareno. 

Isinalungguhit sa mga unang taludtod ng Salmong Tugunan ang walang maliw na kabutihan at pag-ibig ng Diyos. Hindi mapapantayan o mahihigitan kahit kailan ang dakilang pag-ibig, habag, at kabutihan ng Panginoon. Gaya ng nasasaad sa nasabing taludtod: "Sa Diyos ko't Panginoon, ano'ng aking ihahandog / sa lahat ng kabutihan na sa akin ay kaloob?" (Salmo 115, 12). Ang pag-ibig, habag, at kabutihan ng Diyos ay walang kapantay at walang katulad. Tunay nga itong dakila. 

Dahil sa Kaniyang dakilang pag-ibig, itinatag ng Mahal na Poong Jesus Nazareno ang Sakramento ng Banal na Eukaristiya. Sa tuwing ipinagdiriwang ang Banal na Misa, si Jesus Nazareno ay laging dumarating upang ibigay sa atin ang Kaniyang Kabanal-banalang Katawan at Dugo bilang pagkain at inuming nagbibigay-buhay at nagliligtas. 

TAGAPAGPALAGANAP NG KANIYANG PAG-IBIG

31 Mayo 2024 

Kapistahan ng Pagdalaw ng Mahal na Birheng Maria 

Sofonias 3, 14-18 (o kaya: Roma 12, 9-16b)/Isaias 12/Lucas 1, 39-56 

This faithful photographic reproduction of the painting (c. 1617) Mary visits her cousin Elizabeth, as well as the actual work of art itself from St. Paul's Church, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Ang pagdiriwang ng Simbahan sa araw na ito ay nakasentro sa kaganapang tampok sa salaysay sa Ebanghelyo para sa araw na ito. Matapos ibigay ang kaniyang "Oo" sa misyong ibinigay sa kaniya ng Panginoong Diyos na ibinalita sa kaniya ng Arkanghel na si San Gabriel, ang Mahal na Inang si Mariang Birhen ay nagpasiyang tumungo sa bahay ng kaniyang kamag-anak na si Elisabet na nagdadalantao rin gaya niya. Nang dumating ang Mahal na Inang si Mariang Birhen sa bahay nina Zacarias at Elisabet na kaniyang kamag-anak na nagdadalantao rin katulad niya, ang sanggol na dinadala ni Elisabet sa kaniyang sinapupunan na si San Juan Bautista ay gumalaw sa tuwa. 

Sa tampok na salaysay ng kaganapang ito na inilahad sa Ebanghelyo, buong linaw na isinalungguhit ang dahilan kung bakit gumalaw sa tuwa sa sinapupunan ni Elisabet ang sanggol na si San Juan Bautista sa mga sandaling yaon. Ang dahilan nito ay ang Banal na Sanggol na si Jesus Nazareno na dala-dala ng Mahal na Inang si Maria sa kaniyang sinapupunan. Dahil sa Banal na Sanggol na si Jesus Nazareno, napuspos ng tuwa ang sanggol na si San Juan Bautista. 

Hindi mag-isang dumating sa bahay nina Zacarias at Elisabet ang Mahal na Inang si Mariang Birhen. Bagkus, dala ni Maria sa kaniyang sinapupunan ang Mahal na Poong Jesus Nazareno, ang ipinangakong Mesiyas at Manunubos. Dahil dito, kinikilala rin natin bilang Simbahan ang Mahal na Birheng Maria bilang Kaban ng Bagong Tipan. Sa pamamagitan ng pagdadala sa Banal na Sanggol na si Jesus Nazareno sa kaniyang sinapupunan sa loob ng siyam na buwan, ang Bagong Tipan ay kaniyang tinaglay at dinala saanman siya nagtungo. 

Buong linaw na inihayag ng Panginoong Diyos sa pamamagitan ni Propeta Sofonias sa Unang Pagbasa para sa Kapistahang ipinagdiriwang ng Simbahan sa araw na ito, ang Kapistahan ng Pagdalaw ng Mahal na Birheng Maria, na makakapiling Niya ang Kaniyang bayan. Sa pamamagitan ng pangakong ito na Kaniyang inihayag sa tanan nang buong linaw sa pamamagitan ni Propeta Sofonias, buong linaw na inihayag ng Diyos ang Kaniyang dakilang pag-ibig na walang maliw para sa Kaniyang bayan. Sa pag-ibig na ito nakasentro ang mga salitang inilahad sa Salmong Tugunan. Dahil sa tapat at dakila Niyang pag-ibig na walang maliw, ipinasiya ng Panginoong Diyos na makapiling ang Kaniyang bayan. 

Isa lamang ang nais ituro ni Apostol San Pablo sa alternatibong Unang Pagbasa para sa araw na ito. Maging mga salamin ng dakilang pag-ibig ng Diyos. Ibahagi natin sa lahat ang dakilang pag-ibig ng Diyos. Ang pag-ibig ng Diyos ay dapat ipalaganap. 

Katulad ng Mahal na Inang si Mariang Birhen, ipalaganap natin ang dakilang pag-ibig ng Diyos na Kaniyang inihayag sa pamamagitan ng Poong Jesus Nazareno. Ito ang ating misyon bilang Simbahan. 

ISA LAMANG ANG DIYOS

26 Mayo 2024 

Dakilang Kapistahan ng Tatlong Persona sa Isang Diyos [B] 

Deuteronomio 4, 32-34. 39-40/Salmo 32/Roma 8, 14-17/Mateo 28, 16-20 

This faithful photographic reproduction of the painting (c. Between 1600 and 1633) Santísima Trinidad by the Circle of Antonio García Reinoso (1623–1677), as well as the actual work of art itself in the Museum of Fine Arts of Córdoba, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1929.

"Dahil dito, dapat ninyong malaman na sa langit at sa lupa'y walang ibang diyos liban sa Panginoon" (Deuteronomio 4, 39). Sa mga salitang ito na binigkas ni Moises nang buong lakas at linaw sa mga Israelita sa Unang Pagbasa nakasentro ang maringal na pagdiriwang ng Simbahan sa Linggong ito. Ang Linggong ito ay inilaan ng Simbahan upang ipagdiwang nang buong ringal ang Dakilang Kapistahan ng Tatlong Persona sa Isang Diyos na kilala rin natin sa tawag na Banal na Santatlo. Ito ang pagkakilanlan ng tunay at nag-iisang Diyos na ating pinupuri, pinasasalamatan, at sinasamba nang taos-puso bilang mga bumubuo sa tunay na Simbahang itinatag ng Nuestro Padre Jesus Nazareno, ang Pangalawang Persona ng Banal na Santatlo. 

Tampok sa Ebanghelyo para sa Dakilang Kapistahang ipinagdiriwang ng Simbahan sa Linggong ito ang pagsugo ng Muling Nabuhay na Panginoong Jesus Nazareno sa mga apostol noong magpakita Siya sa kanila sa Galilea. Matapos mabuhay na mag-uli sa ikatlong araw, gaya ng paulit-ulit Niyang ipinangako, ang Muling Nabuhay na Poong Jesus Nazareno ay nagpakita sa mga apostol sa Galilea. Nang magpakita Siya roon sa kanila, isinugo ng Muling Nabuhay na Nuestro Padre Jesus Nazareno ang Kaniyang mga apostol upang gawing Kaniya ring mga alagad ang lahat ng mga bansa dito sa daigdig sa pamamagitan ng pagbinyag sa kanila Ngalan ng Ama at ng Anak at ng Espiritu Santo (Mateo 28, 19). Buong linaw na inihayag ng Muling Nabuhay na Jesus Nazareno sa pamamagitan ng mga salitang ito na iisa lamang ang Diyos. Subalit, may Tatlong Persona na bumubuo sa tunay at nag-iisang Diyos. Ang tunay at nag-iisang Diyos ay binubuo ng Ama, Anak, at Espiritu Santo. 

Inihayag ni Apostol San Pablo nang buong linaw sa kaniyang pangaral na itinampok at inilahad sa Ikalawang Pagbasa para sa Dakilang Kapistahang ipinagdiriwang nang buong ringal sa Linggong ito ang loobin at hangarin ng Banal na Santatlo para sa atin. Nais ng Diyos na ibilang tayo sa Kaniyang pamilya. Kaya naman, tayong lahat ay laging pinapatnubayan at ginagabayan ng Espiritu Santo upang ang bawat isa sa atin ay tulungang makilala ang Amang nasa langit bilang ating Ama, gaya ng itinuro ng Poong Jesus Nazareno, ang Anak, sa panalanging Kaniyang itinuro. Bukod pa roon, tayong lahat tinutulungan ng Espiritu Santo na kilalanin bilang atin ring Kapatid ang Anak na si Jesus Nazareno. Ito ang katotohanang binibigyan ng pansin ng tampok na mang-aawit sa Salmong Tugunan: "Mapalad ang ibinukod na bansang hinirang ng Diyos" (Salmo 32, 12b). Tayong lahat ay hinirang at itinalaga ng tunay na Diyos na binubuo ng Banal na Santatlo upang maging Kaniya. 

Hindi tatlo ang Diyos. Isa lamang ang tunay na Diyos. Subalit, ang tunay na Diyos ay binubuo ng Tatlong Persona. Ang Tatlong Personang bumubuo sa tunay na Diyos na isa lamang ay walang iba kundi ang Ama, Anak, at Espiritu Santo. Ang bawat isa sa atin ay tunay at lubusang iniibig at kinahahabagan ng Ama, Anak, at Espiritu Santo.