PAGPAPAHAYAG NG KAGILIWAN NG DIYOS

19 Disyembre 2017 

Simbang Gabi/Misa de Gallo - Ikaapat na Araw

Mga Hukom 13, 2-7. 24-25a/Salmo 70/Lucas 1, 5-25 

Ang mga Pagbasa ngayong Ikaapat na Simbang Gabi (Misa de Gallo) ay tungkol sa pagpapahayag ng kagandahang-loob ng Diyos sa lahat. Isinalaysay kung paanong ibinalita ng anghel sa dalawang karakter sa Unang Pagbasa at Ebanghelyo ang kagiliwan ng Diyos. Sa Unang Pagbasa, inihayag ng isang anghel ng Panginoon sa asawa ni Manoa na siya'y maglilihi't manganganak, kahit matagal nang namuhay ang mag-asawa na walang anak. Sa Ebanghelyo, inihayag ni San Gabriel Arkanghel kay Zacarias na ang kanyang kabiyak na si Elisabet ay maglilihi't manganganak ng isang sanggol na lalaki sa kabila ng kanyang katandaan. 

Isinalaysay sa Unang Pagbasa kung paanong ipinanganak si Samson. Hindi nagkaroon ng anak sa loob ng mahabang panahon sina Manoa at ang kanyang asawa. Ang asawa ni Manoa ay hindi kayang magkaanak dahil sa kanyang pagkabaog. Nais pa naman nilang magkaroon ng anak, subalit hindi nangyari iyon hanggang sa araw na nagpakita sa asawa ni Manoa ang isang anghel ng Panginoon. Inihayag ng anghel sa asawa ni Manoa na siya'y maglilihi at manganganak ng isang sanggol na lalaki. Samson ang pangalan ng sanggol na lalaking ipanganganak ng kabiyak ni Manoa. Siya ang itinalaga ng Diyos mula sa kanyang pagsilang upang iligtas ang bayang Israel mula sa mga Filisteo. Isa itong milagro sapagkat ang asawa ni Manoa ay walang kakayahang magdalantao. Subalit, dahil sa kagiliwan ng Diyos, ang mag-asawang ito'y nagkaroon ng anak sa kabila ng pagkabaog ng babae. 

Sa Ebanghelyo, isinalaysay naman kung paanong si San Juan Bautista ay ipinanganak. Magkaparehas kung tutuusin ang mga kasong isinalaysay sa Unang Pagbasa at Mabuting Balita para sa araw na ito. Tulad nina Manoa at ang kanyang kabiyak sa Unang Pagbasa, sina Zacarias at Elisabet ay hindi nagkaroon ng anak. Matagal na silang nanalangin nang taimtim sa Diyos na biyayaan sila ng isang anak, subalit walang nangyari sa loob ng mahabang panahong yaon. Matagal nang hindi nagkaroon ng anak ang magkabiyak na ito. At ayon pa sa Ebanghelyo, masyado na silang matanda noong kapanahunang yaon. Kaya, imposible na para sa kanila na magkaroon ng anak. Baog na si Elisabet, hindi na niya kayang magdalantao. Subalit, sa kabila ng kanilang katandaan, inihayag ni San Gabriel Arkanghel kay Zacarias na si Elisabet ay maglilihi at manganganak ng isang sanggol na lalaki na tatawaging Juan. Ang matandang magkabiyak na ito ay hinirang ng Diyos upang maging mga magulang ng tagapagpauna ng Mesiyas at tagapaghanda ng Kanyang daraanan na si Juan Bautista. Sa kabila ng kanilang katandaan, sina Zacarias at Elisabet ay biniyayaan ng anak dahil sa kagiliwan ng Diyos. 

Dalawang kaso ng pagkabaog ang isinalaysay sa Unang Pagbasa at Ebanghelyo ngayon. Subalit, dahil sa kagiliwan ng Diyos, ang dalawang magkabiyak ng pusong inakala ng karamihan na wala nang pag-asa para sa kanila na magkakaanak habang sila'y namumuhay dito sa lupa ay nagkaroon ng anak. Isa itong milagro, himala mula sa Diyos. Nakakagulat nga iyon sa mata ng mundo. Subalit, ito'y hindi nakakagulat sa paningin ng Diyos. Sapagkat sa paningin ng Diyos, isa itong pagpapamalas ng Kanyang kagiliwan at kabutihan sa lahat. Ang Kanyang kagiliwan at kabutihan sa lahat ang tanging dahilan kung bakit pinili Niyang yakapin ang ating pagkatao at mamuhay sa ating piling bilang taong katulad natin sa pamamagitan ng Mesiyas at Tagapagligtas na si Hesukristo. 

Kaya nga, tulad ng mang-aawit ng Salmo ngayon, lagi nating purihin at sambahin ang iisang Diyos na makapangyarihan. Hindi lamang ipinapamalas ng Diyos ang Kanyang kapangyarihan sa Kanyang mga kahanga-hangang gawa. Bagkus, ipinapamalas at inihahayag din ng Panginoon ang Kanyang kagiliwan at kabutihan sa pamamagitan ng Kanyang mga kahanga-hangang gawa na walang kapantay. 

IMULAT ANG SARILI SA PAG-IBIG NG DIYOS

18 Disyembre 2017 

Simbang Gabi/Misa de Gallo - Ikatlong Araw

Jeremias 23, 5-8/Salmo 71/Mateo 1, 18-24

🎶Kung ikaw ay isang panaginip, ayoko nang magising...🎶 

Siguradong batid ng karamihan sa atin, lalung-lalo na ang mga kabataan, ang kahulugan ng mga linyang ito. Ito'y dahil maiuugnay ang linyang ito sa buhay pag-ibig. Nauunawaan natin ito sapagkat may mga pagkakataon sa buhay natin na kung saan nagkakaroon tayo ng mga magandang panaginip habang tayo'y natutulog ng mahimbing. Alam natin kung ano ang pakiramdam ng inilalarawan sa awiting ito. Tiyak na naranasan nating minsan na panaginipan si crush, kung ano ang magiging itsura ng ating buhay na kasama nila. Hindi ba kay sarap ng buhay na kasama si crush, kayo ang magkarelasyon? Ang sarap sa pakiramdam. Kung panaginip lamang ang ganyang pamumuhay, nanaisin nating huwag nang gumising. Kung maaari, mamuhay na lamang tayo sa pangarap, panaginip ng isang buhay na kasama nila. Dahil sa totoo lang, masarap ang buhay na kasama ang ating crush, ang buhay kung saan karelasyon natin sila, hindi ba? 

Ibang uri ng panaginip ang isinasalaysay sa Ebanghelyo ngayon. Si San Jose ay hindi nanaginip tungkol sa isang masarap na pamumuhay na kasama ang kanyang crush o sa kasong ito, ang kanyang kasintahan - ang Mahal na Inang si Maria. Ang napanaginipan ni Jose ay isang anghel. Isang anghel ng Panginoon ang nagpakita sa panaginip ni Jose upang ipaliwanag sa kanya ang sitwasyon. Nasa gitna ng isang kumplikadong sitwasyon si Jose sa mga sandaling yaon. Bago pa man ang araw ng kasal, natagpuang nagdadalantao si Maria. Isa itong napakalaking iskandalo noong kapanahunang yaon. Napakakumplikado ang sitwasyon para kay Jose. Pinag-isipan niya nang maigi kung paano niyang itong malulusutan o masosolusyonan. Ang napag-isipan niyang solusyon sa problemang ito ay hiwalayan nang palihim si Maria. 

Subalit, hindi tinuloy ni San Jose ang kanyang plano sapagkat binigyang-linaw ng anghel na nagpakita sa kanyang panaginip ang sitwasyon. Ang pagdadalantao ng Mahal na Inang si Maria bago pa man maganap ang kanilang pag-iisang-dibdib ay hindi kaso ng kataksilan. Nabuntis si Maria sapagkat ito'y kalooban ng Diyos. Ang dinadala ni Maria sa kanyang sinapupunan ay hindi isang ordinaryong sanggol; ito ang Anak ng Diyos na nagpasiyang magkatawang-tao para sa kaligtasan ng sangkatauhan. Ang sanggol na dinadala ni Maria sa kanyang sinapupunan ay ang Haring tinutukoy ni propeta Jeremias sa kanyang propesiya sa Unang Pagbasa. Ang sanggol na dinadala ni Maria ang itinakdang Hari, Tagapagligtas, at Mesiyas. Ang sanggol na ito na nananahan sa sinapupunan ni Maria ay nagangalang "Hesus". 

Sa pamamagitan ng pagdadala ni Maria kay Hesus sa kanyang sinapupunan, natupad ang propesiya ni propeta Isaias na siya ring binanggit ni San Mateo sa Ebanghelyo. Inihayag ni propeta Isaias na ipaglilihi at ipanganganak ng isang dalaga ang isang sanggol na lalaki na tatawaging "Emmanuel", ang kahuluga'y "Sumasaatin ang Diyos". Ang Mahal na Birheng Maria ang dalagang naglihi at nagluwal sa sanggol na ito - ang Panginoong Hesus, ang Diyos na nagpasiyang mamuhay na kapiling tayo dahil sa Kanyang awa't pag-ibig para sa lahat. 

Ang mga mata at ang puso't isipan ni San Jose ay namulat sa katotohanan tungkol sa pag-ibig ng Diyos. Namulat siya sa katotohanang niloob ng Diyos na dalhin ng Mahal na Birheng Maria sa sinapupunan ang sanggol na si Kristo Hesus, ang itinakdang Hari't Manunubos ng tanan. Namulat siya sa katotohanang ito'y hindi isang iskandalosong gawain ng Mahal na Ina kundi isang kahanga-hangang gawa ng Diyos na ipinasiya Niyang gawin dahil sa Kanyang pag-ibig. Namulat siya sa katotohanang hindi mapapantayan ng sinumang tao dito sa daigdig ang dakilang pag-ibig ng Diyos na walang hanggan. At namulat siya sa katotohanan na dahil sa Kanyang pag-ibig, ipinasiya ng Diyos na tubusin ang sangkatauhan sa pamamagitan ng Panginoong Hesukristo, ang sanggol na nananahan sa sinapupunan ng Mahal na Inang si Maria. 

Tulad ni San Jose, imulat natin ang ating mga mata at ang ating mga puso't isipan sa misteryo ng pag-ibig ng Diyos. Imulat natin sa tunay na dahilan kung bakit ipinagdiriwang ang Pasko. Dahil sa Kanyang dakilang pag-ibig, ipinasiya ng Diyos na bumaba mula sa langit, yakapin ang ating pagkatao, at mamuhay na kapiling natin. Ang Diyos ay naging tao sa pamamagitan ni Hesukristo upang ihayag sa lahat ang Kanyang pag-ibig sa pamamagitan ng biyaya ng Kanyang pagliligtas. Ang dakilang gawaing ito ng Diyos na nagpamalas ng Kanyang pag-ibig ay hinding-hindi mapapantayan o mahihigitan ninuman kailanman. 

HESUS: ANG KALIWANAGANG NAGDUDULOT NG KAGALAKAN

17 Disyembre 2017

Ikatlong Linggo sa Panahon ng Pagdating ng Panginoon (B) 

Linggo ng Gaudete 

Simbang Gabi/Misa de Gallo - Ikalawang Araw

Isaias 61, 1-2a. 10-11/Lucas 1/1 Tesalonica 5, 16-24/Juan 1, 6-8. 19-28 

Ang salitang Gaudete ay nangangahulugang "magalak". Ngayong Ikatlong Linggo ng Adbiyento ay kilala rin bilang Linggo ng Gaudete o Linggo ng Kagalakan. Habang ipinagpapatuloy natin ang ating paghihintay at paghahanda ng sarili para sa Kapaskuhan ngayong kapanahunang ito ng Adbiyento, tayong lahat ay hinihimok ng Simbahan na magalak. Wika nga ni Apostol San Pablo sa simula ng Ikalawang Pagbasa, "Magalak kayong lagi." (5, 16) Subalit, ano nga ba ang dapat nating ikagalak? Hindi pa nga sumasapit ang araw ng Pasko. Napapaloob pa rin tayo sa panahon ng Adbiyento, isang panahong inilaan para sa pananabik at paghahanda ng sarili. Ano nga ba ang dapat nating ikagalak habang tayo'y nananabik at naghahanda ng sarili ngayong kapanahunang ito?

Nakasaad sa Ebanghelyo ngayon ang dahilan kung bakit dapat tayong magalak, kahit na tayo'y napapaloob pa rin sa isang kapanahunan ng paghihintay at paghahanda. Noong si San Juan Bautista ay tinanong ng mga eskriba't mga Pariseo kung bakit siya nagbibinyag kahit hindi siya ang Mesiyas, tumugon siya ng ganito, "Ako'y nagbibinyag sa tubig, ngunit nasa gitna ninyo ang isang hindi ninyo nakikilala. Siya ang susunod sa akin, subalit hindi ako karapat-dapat magkalag man lamang ng tali ng kanyang panyapak." (1, 26-27) Ang tinutukoy ni Juan Bautista ay walang iba kundi ang kanyang kamag-anak na si Hesus, ang tunay na Mesiyas at Manunubos na ipinagkaloob ng Diyos sa Kanyang bayan. Isinalaysay pa nga sa unang bahagi ng Ebanghelyo na si Juan Bautista ay nagpatotoo tungkol sa ilaw. Ang ilaw na pinatotohanan ni San Juan Bautista sa kanyang pangangaral at pagbibinyag sa Ilog Jordan ay walang iba kundi ang kamag-anak niyang si Hesus, ang Mesiyas, ang tinatawag niyang higit na dakila kaysa sa Kanya. Bilang liwanag na nagningning sa karimlan, si Hesus ay nagdudulot ng galak sa lahat ng mga nakakakita sa Kanya. 

Sa pamamagitan ng pagkakatawang-tao ng Panginoong Hesus, nagkaroon ng katuparan ang propesiya ni propeta Isaias sa Unang Pagbasa. Ang Panginoong Hesus ang ipinangakong Mesiyas na ipinagkaloob ng Diyos sa Kanyang bayan. Ang kahulugan ng salitang Mesiyas ay "Hinirang". Nakasaad sa bahaging ito ng aklat ni propeta Isaias kung ano ang magiging misyon ng Mesiyas. Natupad ang lahat ng mga inihayag ni propeta Isaias tungkol sa magiging misyon ng Mesiyas sa pamamagitan ng Panginoong Hesukristo. Bilang tunay na kaliwanagan, inihatid ni Kristo ang Mabuting Balita sa mga mahihirap, pinagaling ang mga sugatang puso, at pinalaya ang mga bihag at bilanggo. Ang lahat ng mga namuhay sa ilalim ng kadiliman ay nakaranas at napuspos ng kagalakan nang masilayan nila ang tunay na kaliwanagang si Hesus. Bilang liwanag, kagalakan ang hatid ni Hesus sa abang sangkatauhan na nalugmok sa kasalanan at kadiliman. 

Bilang kaliwanagang tunay, si Hesus ay nagdudulot ng kagalakan sa lahat. Ang Kanyang liwanag ang pumawi sa kadiliman. Siya ang liwanag na nagligtas sa ating lahat mula sa mga pwersa ng kadiliman at kasalanan. Siya ang liwanag na umaakay sa ating lahat pabalik sa Amang mapagmahal at maawain. Siya ang liwanag na nagpapamulat ng ating mga mata, mga puso't isipan sa katotohanang iniibig at kinakalinga pa rin tayong lahat ng Diyos sa kabila ng ating pagsuway sa Kanya, at dahil sa Kanyang pag-ibig at pagkalinga para sa ating lahat, lagi Siyang handang tanggapin at yakapin muli kung tayo ay magsisisi't magbabalik-loob sa Kanya. Iyan ang natatanging dahilan kung bakit ang ilaw na si Hesukristo ay pumanaog sa mundo - upang ihayag sa lahat ang misteryo ng walang hanggang awa't pag-ibig ng Diyos para sa lahat. Dahil sa Kanyang awa't pag-ibig na walang hanggan, Siya'y bumaba mula sa langit at nagkatawang-tao sa pamamagitan ng Kanyang Anak upang tubusin ang abang sangkatauhang labis Niyang iniibig at kinakalinga.

Si Hesus ang sanhi ng ating kagalakan. Siya ang liwanag na nagdudulot ng galak sa lahat. Inaanyayahan Niya tayong makibahagi sa kagalakang dulot Niya. 

MAGANDANG BALITA

16 Disyembre 2017 

Simbang Gabi/Misa de Gallo - Unang Araw

Isaias 56, 1-3a. 6-8/Salmo 66/Juan 5, 33-36

Sa mga Pagbasa ngayong unang araw ng Simbang Gabi, ang tradisyunal na pagsisiyam o pagnonobena para sa Kapaskuhan, isinalungguhit ang hatid ng Salita ng Diyos. May magandang balitang hatid ang Salita ng Diyos. Ang Magandang Balitang inihahatid sa atin ng Salita ng Diyos ay nakaugnay sa misteryo ng Kanyang dakilang awa't pag-ibig na walang hanggan. Panay itong isinasalungguhit sa Banal na Bibliya, simula sa Lumang Tipan hanggang sa Bagong Tipan. 

Ang mga propeta sa Lumang Tipan ay hinirang ng Diyos upang iparating sa Kanyang bayan ang Kanyang Salita. Isang halimbawa nito'y si propeta Isaias, na ating napakinggan sa Unang Pagbasa. Nagsalita ang Diyos sa pamamagitan ni propeta Isaias sa Kanyang bayan. Mayroon Siyang magandang balita para sa Kanyang bayan. Inihayag ng Panginoon na hindi na magluluwat at magaganap ang ipinangako Niyang pagliligtas sa Kanyang bayan. Malapit nang sasapit ang oras ng pagliligtas ng Diyos. Ang mga salitang ito'y nagdulot ng matinding kagalakan sapagkat ito'y tunay ngang Magandang Balita. Tutubusin ng Panginoong Diyos ang Kanyang bayang hinirang at iniibig nang lubos. Kahit na ilang ulit nilang sinuway ang Panginoon, inihayag pa rin Niya sa kanila ang Kanyang awa't pag-ibig. 

Natupad ang mga winika ng Diyos sa Unang Pagbasa sa pamamagitan ng pagkakatawang-tao ng Panginoong Hesukristo. Sa Ebanghelyo, inihayag ni Hesus na ang mga gawang ipinagagawa sa Kanya ng Ama ang nagpapatotoo sa Kanya. Ang mga gawa ni Hesus ang nagpapatotoo na Siya nga ang Mesiyas at Manunubos ng sangkatauhan. Ang mga gawa ni Hesus ang nagpapatotoo na Siya nga ang Diyos na nagkatawang-tao alang-alang sa kaligtasan ng sangkatauhan. Sa pamamagitan ng Kanyang pagkakatawang-tao, inihatid ng Salitang nagkatawang-tao na si Hesus ang Mabuting Balita na ang Diyos ay tunay na maawain at mapagmahal sa lahat ng tao, kahit na paulit-ulit Siyang sinusuway nila. 

Mapalad tayong lahat sapagkat mayroon tayong Diyos na nagmamahal sa atin. Sa kabila ng ating pagiging masuwayin sa Kanya, hindi pa rin Siyang nauubusan ng pag-ibig para sa ating lahat. Bagkus, patuloy Niyang iniibig nang lubos ang sangkatauhan sa kabila ng kanilang mga pagkakasala laban sa Kanya. Ito ang dahilan kung bakit si Hesukristo ay pumanaog sa lupa at nagkatawang-tao upang tayong lahat ay iligtas. Sa pamamagitan ng pagparito ni Kristo Hesus bilang Mesiyas at Tagapagligtas, inihayag ang walang hanggang awa't pag-ibig ng Diyos para sa lahat ng tao. Sa kabila ng ating mga pagkakasala, patuloy tayong minamahal ng Diyos. Iyao ang Mabuting Balita, ang Magandang Balitang inihahatid sa atin ng Salita ng Diyos na nagkatawang-tao na si Hesukristo. 

Tulad ng nais bigyang-diin ng mang-aawit sa Salmo ngayon, nararapat lamang na ang Diyos ay lagi nating purihin at sambahin. Mapalad tayo sapagkat kahit patuloy tayong nagkakasala laban sa Kanya, patuloy pa rin tayong iniibig ng Panginoon. Ito ang dahilan kung bakit sinugo Niya ang Panginoong Hesus upang maging ating Mesiyas at Tagapagligtas. Kaya naman, nararapat lamang na ibigay natin sa Diyos ang ating palagiang pagpuri at pagsamba sa Kanya. 

IBAHAGI ANG KAGALAKANG KALOOB NG DIYOS

12 Disyembre 2017 

Paggunita sa Mahal na Birhen ng Guadalupe 

Zacarias 2, 14-17/Judith 13/Lucas 1, 39-47

Kung titingnan natin nang mabuti ang larawan o imahen ng Mahal na Birhen ng Guadalupe, mapapansin natin ang itim na pamigkis na suot ng Mahal na Ina. Sa tradisyon ng mga Azteka, isang grupo ng mga katutubo sa Mexico na namuhay mula 1300 hanggang 1521, tanging mga babaeng nagdadalantao lamang ang nagsusuot ng itim na pamigkis. Ang itim na pamigkis ay tanda ng kanilang pagdadalantao. Ang itim na pamigkis ay isang napakahalagang bahagi ng imahen o larawan sapagkat dinadala ng Mahal na Birhen sa kanyang sinapupunan ang Mesiyas at Tagapagligtas ng tanan na si Hesukristo noong nagpakita siya kay San Juan Diego. Ang Mahal na Birheng Maria ay nagpakita kay San Juan Diego bilang tagapagdala ng Verbong nagkatawang-tao na si Kristo Hesus. Nagpakita ang Mahal na Birhen kay San Juan Diego bilang Kaban ng Bagong Tipan. 

Isinalaysay sa Ebanghelyo ngayon kung paanong ang Mahal na Birheng Maria ay buong kagalakang naglakbay nang malayo para dalawin ang kanyang kamag-anak na si Elisabet. Sa kabila ng kanyang pagdadalantao, ipinasiya ni Maria na maglakbay nang malayo para dalawin ang kanyang kamag-anak na si Elisabet na nagdadalantao rin noong kapanahunang yaon. Nais ibahagi ni Maria kay Elisabet ang kanyang kagalakan. Si Maria'y napupuspos ng kagalakan sa mga sandaling iyon dahil sa kahanga-hangang bagay na ginawa ng Diyos para sa kanya. Hangad ni Maria na maranasan rin ni Elisabet ang kagalakang nararamdaman niya sa kanyang puso't kaluluwa. At ang kagalakang iyon ay nagmula sa Diyos. 

Kung paanong ibinahagi ng Mahal na Birheng Maria kay Elisabet ang kagalakang tinanggap niya mula sa Diyos sa pamamagitan ng paglalakbay nang malayo para lang dalawin ang kanyang kamag-anak, tulad ng nasasaad sa Ebanghelyo ngayon, ibinahagi ng Mahal na Birheng Maria sa bansa ng Mexico ang kagalakan ng Panginoon sa pamamagitan ng kanyang mga aparisyon kay San Juan Diego. Ang pagbabahagi ng kagalakang kaloob ng Diyos ay ginawa ng Mahal na Birheng Maria habang tinataglay niya sa kanyang sinapupunan ang bukal ng tunay na kagalakan na si Hesus, ang Anak ng Diyos na nagkatawang-tao. 

Sa Diyos nagmula ang kagalakan ng Mahal na Birhen. Ang Diyos ang tanging nagdudulot ng tunay na kagalakang walang hanggan. Kagalakan ang Kanyang ipinagkakaloob sa lahat ng tao. Ang Kanyang mga salita't gawa ay nagdudulot ng kagalakan sa lahat. Ang Kanyang winika sa Unang Pagbasa mula sa aklat ni propeta Zacarias ay nagdulot ng kagalakan sa Kanyang bayan. Kaya nga, angkop na angkop ang Salmong Tugunan sa pagdiriwang ngayong araw na ito, "Pinupuri Kang lubusan ng lahat sa ating bayan." (15, 9d) Ititunuro sa atin ng Salmo ngayon na ang Diyos ay nararapat na purihin sapagkat ang Kanyang mga kahanga-hangang gawa ay nagdudulot ng kagalakan sa lahat. 

Ang Diyos ang bukal ng lahat ng kagalakan. Ang kagalakang ito'y tunay at walang hanggan. Ang kagalakang ito'y hindi mapapantayan ng kagalakang kaloob ng sanlibutan. Ipinagkakaloob ng Diyos ang kagalakang ito sa lahat. Hindi lamang ito para sa isang partikular o spesipikong grupo. Ang kagalakang ito'y para sa lahat ng tao na tunay Niyang iniibig at inaaruga nang lubos. 

Tulad ng Mahal na Birheng Maria, ibahagi natin sa ating kapwa ang kagalakang kaloob ng Diyos. Ang kagalakan nating tinanggap mula sa Diyos ay hindi dapat nating isarili. Ang kagalakang ipinagkaloob sa atin ng Diyos ay dapat nating ibahagi sa ating kapwa sapagkat ito ay para sa lahat. Katulad ng Mahal na Inang si Maria, tayong lahat ay hinirang ng Diyos upang ipalaganap ang kagalakang Kanyang kaloob sa pamamagitan ng pagbabahagi nito sa ating kapwa. Hinirang tayo ng Diyos upang maging Kanyang instrumento sa pagpapalaganap ng Kanyang mga pagpapala sa lahat. May misyong tayo mula sa Panginoon - ang kagalakan at iba pang mga pagpapalang ating tinanggap mula sa Kanya ay dapat nating ibahagi sa iba. Sa gayon, lalong mabibigyan ng kaluwalhatian ang Diyos dahil sa Kanyang mga kahanga-hangang gawa na puspos ng kadakilaan. 

PAG-IBIG ANG DAHILAN

10 Disyembre 2017 

Ikalawang Linggo sa Panahon ng Pagdating ng Panginoon (B) 

Isaias 40, 1-5. 9-11/Salmo 84/2 Pedro 3, 8-14/Marcos 1, 1-8

Si San Juan Bautista ang karakter na laging ipinapakilala ng mga Pagbasa sa Banal na Misa tuwing sasapit ang Ikalawang Linggo ng Adbiyento. Anuman ang Taon sa Kalendaryo ng Simbahan, mapa-Taon A, Taon B, o Taon K, si San Juan Bautista ay laging itinatampok sa mga Pagbasa sa Misa tuwing Ikalawang Linggo ng Adbiyento. Siya ang tinutukoy ni propeta Isaias sa Unang Pagbasa noong kanyang inihayag sa kanyang propesiya na mayroong isang tinig na sumisigaw mula sa ilang. Ang tinig na ito'y may panawagan para sa lahat ng mga nakakarinig nito - ipaghanda ng isang patag at matuwid na daraanan sa ilang ang Panginoon. Ang talatang ito'y ginamit ni San Marcos Ebanghelista sa pasimula ng Ebanghelyo ngayon bilang pagpapakilala kay San Juan Bautista. Isinaad din ni San Marcos sa Ebanghelyo ang panawagan ni San Juan Bautista sa kanyang tagapakinig. Nanawagan siya sa lahat na pagsisiha't talikdan ang kanilang mga kasalanan at magpabinyag bilang paghahanda ng sarili para sa pagdating ng Mesiyas. 

Tiyak na nalalaman nating lahat kung ano ang papel ni San Juan Bautista sa buhay ni Kristo. Siya ang tagapaghanda ng daraanan ng Panginoon. Siya ang unang lilitaw bago ang Mesiyas. Siya ang nagsilbing hudyat sa bayan ng Diyos na nalalapit na ang pagdating ng Mesiyas. Siya ang magbibinyag kay Hesus, ang Mesiyas na hinihintay ng bayang Israel. Subalit, bakit nga ba sinugo ng Diyos si San Juan Bautista para ihatid ang Kanyang mensahe na dapat magsisi't magbalik-loob ang lahat ng tao upang sila'y kahabagan at patawarin Niya? 

Nagsalita si Apostol San Pedro sa Ikalawang Pagbasa ukol sa habag at pag-ibig ng Diyos. Wika ni Apostol San Pedro na ang bawat tao'y binibigyan ng Diyos ng pagkakataong magsisi't magbalik-loob sa Kanya sapagkat ayaw Niyang mapahamak sila. Hindi hinahangad ng Diyos na mapahamak ang lahat ng tao. Labis Siyang nasasaktan kapag nakikita Niya ang tao na nagpapaalipin at napapahamak dahil sa kanilang pagkakasala. Nais ng Diyos na makapiling ang tao. Nais ng Diyos na maligtas ang tao. Hinahangad ng Diyos ang kaligtasan ng sangkatauhan. Kaya naman, ang bawat tao'y binibigyan ng Diyos ng pagkakataong makapagsisi sa kanilang mga kasalanan at manumbalik sa Kanya. 

Ito ang mensaheng nais iparating ni San Juan Bautista sa kanyang mga tagapakinig. Ito ang dahilan kung bakit isinugo ng Diyos si San Juan Bautista upang iparating ang Kanyang panawagan na magsisi't tumalikod sa kasalanan. Ayaw ng Diyos na mapahamak ang sangkatauhan. Nais ng Diyos na maligtas ang lahat ng tao sapagkat sila'y lubos Niyang iniibig. Ang pagsugo ng Diyos kay San Juan Bautista sa ilang upang ihatid sa lahat ng makakarinig nito ang Kanyang panawagan sa pagsisisi't pagbabalik-loob ang nagpapatunay na ang Kanyang habag at pag-ibig na hinding-hindi mapapantayan ninuman at walang hanggan.

Ang Diyos ay tunay ngang maawain at mapagmahal. Maaari Niyang hayaan na mapahamak ang sangkatauhan dahil sa pagkakasala. Subalit, mayroon Siyang pakialam para sa atin dahil tayong lahat ay tunay Niyang kinahahabagan at iniibig nang lubos. Hindi Niya hinahangad ang ating kapahamakan. Hinahangad Niya ang ating kaligtasan. Hinahangad Niyang maging sentro ng ating puso, ng ating buhay. Hinahangad ng Diyos na makapiling natin Siya, maranasan ang Kanyang mga pagpapala. Hinahangad Niyang makihati tayo sa Kanyang kagalakan. Ito ang tanging dahilan kung bakit Niya binibigyan ng pagkakataong makapagsisi't makapagbalik-loob sa Kanya ang bawat tao. Ito rin ang dahilan kung bakit Niya isinugo si San Juan Bautista sa ilang upang ihatid sa tanan ang Kanyang panawagan na magsisi't magbalik-loob sa Kanya ang lahat ng tao. 

KALINIS-LINISANG PAGLILIHI SA MAHAL NA BIRHENG MARIA: DAKILANG GAWAIN NG DIYOS

8 Disyembre 2017 

Dakilang Kapistahan ng Kalinis-linisang Paglilihi sa Mahal na Birheng Maria 

Genesis 3, 9-15. 20/Salmo 97/Efeso 1, 3-6. 11-12/Lucas 1, 26-38

Larawan mula sa Official Facebook Page ng Katedral ng Maynila:
https://www.facebook.com/manilacathedralbasilica

Umawit sa Diyos ng awa, ang gawain N'ya'y dakila (Salmo 97, 1a). Ito ang Salmo ngayong Dakilang Kapistahan ng Kalinis-linisang Paglilihi sa Mahal na Birheng Maria. Inihayag ng mang-aawit ng Salmo ang dahilan kung bakit ang Diyos ay nararapat na purihin, sambahin, at awitan nang buong puso't kaluluwa. Ang Diyos na Siyang bukal ng awa't grasya ay nagpasiyang tubusin ang Kanyang bayan sa pamamagitan ng Kanyang Bugtong na Anak na si Kristo Hesus. Sa pamamagitan nito'y nahayag ang kadakilaan ng Diyos na nagmamahal sa Kanyang bayan. 

Ang Kalinis-linisang Paglilihi sa Mahal na Birheng Maria ay isa sa mga kahanga-hangang gawa ng Diyos. Namalas ang kadakilaan ng Diyos sa pamamagitan ng gawaing ito. Bago pa man iluwal mula sa sinapupunan ng kanyang inang si Santa Ana, naranasan ng Mahal na Ina ang pag-ibig ng Diyos. Iniligtas siya ng Diyos mula sa bahid ng kasalanang mana. Dahil sa pagliligtas sa kanya ng Diyos bago pa man isilang, ang Mahal na Birhen ay isinilang sa daigdig na ito na walang kapintasan.

Kaya naman sa Ebanghelyo ngayon, si Maria'y binati ni San Gabriel Arkanghel nang ganito, "Ikaw ay kalugud-lugod sa Diyos... Sumasaiyo ang Panginoon!" (1, 28) Si Maria'y naging kalugud-lugod sa paningin ng Diyos sapagkat siya'y walang kapintasan sa Kanyang paningin. Wala siyang bahid ng kasalanan; siya'y napuspos ng grasya ng Diyos. Ang Mahal na Birheng Maria ay napuno ng grasya dahil sa dakilang bagay na ginawa ng Diyos para sa kanya. Siya'y iniligtas ng Diyos mula sa mga pwersa ng kasalanan bago pa man ipanganak sa daigdig na ito. 

Nasasaad rin sa Ebanghelyo ang papel na ibinigay ng Diyos sa Mahal na Birheng Maria. Dahil walang kapintasan ang Mahal na Birheng Maria sa paningin ng Diyos, siya'y hinirang Niya para sa isang napakahalagang papel. Si Maria ay hinirang upang maging ina ng Mesiyas at Tagapagligtas ng santinakpan na si Hesus. Sa pamamagitan nito'y natupad ang mga winika ng Diyos sa ahas sa Unang Pagbasa, "Kayo ng babae'y laging mag-aaway, Binhi mo't binhi niya'y laging mag-aaway. Ito ang dudurog ng ulo mong iyan, at ang sakong niya'y ikaw ang tutuklaw." (3, 15) Ang sanggol na dinala ni Maria sa loob ng siyam na buwan sa kanyang sinapupunan ay hindi isang karaniwang sanggol. Ang sanggol na ito ang dudurog sa ulo ng ahas. 

Sa pamamagitan ng pagsuway ni Eba sa mga utos ng Diyos, ang mga pwersa ng kasalanan at kadiliman ay pumasok sa daigdig. Subalit, sa pamamagitan ng pagtalima ni Maria sa kalooban ng Diyos, ang dudurog sa ulo ng ahas ay pumasok sa daigdig upang tubusin ang sangkatauhang Kanyang iniirog at kinakalinga nang lubos. Sa pamamagitan ng pagdurog ng binhi ni Maria na si Hesus sa ulo ng ahas, ipinagkaloob ng Diyos sa sangkatauhan ang biyaya ng Kanyang kaligtasan. Namalas rin sa pamamagitan ng gawaing ito kung paanong kinalinga ng Diyos ang sangkatauhang labis Niyang sinisinta. 

Wika ni Apostol San Pablo sa Ikalawang Pagbasa, "Purihin natin Siya (ang Diyos) dahil sa Kanyang kahanga-hangang pagkalinga sa atin sa pamamagitan ng Kanyang minamahal na Anak!" (1, 6) Inihayag ng Diyos ang Kanyang pagkalinga sa atin sa pamamagitan ng pagkaloob Niya sa Pangalawang Persona ng Banal na Santatlo, ang Panginoong Hesukristo na Kanyang Bugtong na Anak, upang maging ating Mesiyas at Tagapagligtas. Ang Panginoong Hesus, ang sanggol na ipinaglihi at iniluwal ng Kalinis-linisang Birheng Inang si Maria, ang dumurog sa ulo ng ahas upang tayong lahat ay maligtas. Sa pamamagitan nito'y nahayag ang kadakilaan ng Diyos at ang Kanyang pagkalinga sa atin. Kaya, nararapat lamang na Siya'y lagi nating purihin, sambahin, pasalamatan, at awitan nang buong puso't kaluluwa. 

Isang dakila't kahanga-hangang gawa ng Diyos ang Kalinis-linisang Paglilihi sa Mahal na Birheng Maria. Ang Mahal na Birheng Maria'y hindi nabahiran ng kasalanan sapagkat tinanggap niya ang biyaya ng pagliligtas ng Diyos bago pa man ipanganak sa daigdig. Sa pamamagitan ng gawaing ito'y nahayag ang kahanga-hangang kadakilaan ng Diyos. Dahil sa dakilang gawaing ito, sinimulan ng Diyos ang Kanyang plano ng pagliligtas sa sangkatauhan. Sa pamamagitan ng Kanyang pagtubos sa sangkatauhan, inihayag ng Diyos ang Kanyang walang hanggang pag-ibig at pagkalinga sa ating lahat na kahanga-hanga.