ISANG NAPAKAHALAGANG PAALALA MULA SA MAHAL NA INA

1 Enero 2020 

Dakilang Kapistahan ni Maria, Ina ng Diyos 

Bilang 6, 22-27/Salmo 66/Galacia 4, 4-7/Lucas 2, 16-21 

Inilahad sa Salmo ang temang pinagtuunan ng pansin sa mga Pagbasa para sa napakaespesyal na araw na ito. Sabi sa Salmo, "Kami'y Iyong kaawaan, pagpalain, Poong mahal" (Salmo 66, 2a). Napakalinaw kung paanong binigyan ng pansin ang awa at mapagpala ng Diyos. Tunay ngang mapagpala at maawain ang Panginoong Diyos sa lahat. Hindi nagmamaliw ang awa at pagpapala ng Panginoon kailanman. 

Ang pagsisimula sa isang panibagong taon sa pamamagitan ng pagninilay tungkol sa awa at pagpapala ng Panginoon ay napakaganda. Napakahalaga para sa bawat isa na maging mulat sa pagiging maawain at mapagpala ng Panginoon sa lahat ng oras. Kaya naman, maituturing natin ang mga Pagbasa para sa solemnidad na ito bilang mga paaalala para sa ating lahat. Paulit-ulit tayong pinaalalahanan sa mga Pagbasa tungkol sa awa at pagpapala ng Diyos. Para bang ipinapaalala sa atin na lumipas man ang napakaramig taon, ang awa at pagpapala ng Diyos ay hinding-hindi magmamaliw kailanman. Isa itong napakagandang paalala sa atin sa simula ng isang panibagong taon. 

Sa Unang Pagbasa, inilahad ng Panginoon kay Moises ang mga dapat sabihin nina Aaron at ng kanyang mga anak sa pagbabasbas. Sa rito ng pagbabasbas sa mga tao, binigyan ng pansin ang awa at pagpapala ng Panginoong Diyos. Ang Diyos ay mapagpala at maawain. Awa at pagpapala ang ibinubuhos at ipinagkakaloob ng Diyos sa lahat. Sa Ikalawang Pagbasa, nagsalita si Apostol San Pablo tungkol kay Kristo Hesus. Ang Panginoong Hesukristo ay ipinagkaloob ng Ama sa lahat ng tao pagdating ng takdang panahon dahil sa Kanyang awa at pagpapala. Katunayan, ang Panginoong Hesukristo ay ang pinakadakilang pagpapalang ipinagkaloob sa lahat. Ang Sanggol na ipinaglihi't ipinanganak ng Mahal na Birheng Maria na si Hesus ay dumating sa daigdig upang ihayag ang awa at pagpapala ng Diyos. Sa pamamagitan ng Panginoong Hesukristo, ang Sanggol na ipinaglihi't iniluwal mula sa sinapupunan ng Mahal na Inang si Maria, ang Diyos ay nagkatawang-tao at dumating sa lupa ang Kanyang awa at pagpapala. 

Isinalaysay sa huling bahagi ng salaysay Ebanghelyo ang pagtutuli at pagbibigay ng pangalan sa Banal na Sanggol na isinilang ng Mahal na Birhen. Ang Banal na Sanggol ay pinangalanang "Hesus", ang pangalang ibinigay ng anghel (2, 21). Ang kahulugan ng pangalang "Hesus" ay "Ang Diyos ay tumutubos." Sa kahulugan pa lamang ay makikita ng bawat isa kung gaano kalinaw ang misyon ni Hesus. Ang misyon ni Hesus ay tubusin ang sangkatauhan. Kaya naman, si Kristo Hesus ang pinakadakilang pagpapalang ipinagkaloob ng Diyos. Sa pamamagitan ng Poong Hesus, tinubos ng Diyos ang sangkatauhan. 

Ang Mahal na Birhen ay hinirang ng Diyos upang maging ina ni Kristo. Siya ang nagdala sa pinakadakilang pagpapalang ipinagkaloob ng Diyos sa lahat ng tao sa kanyang sinapupunan sa loob ng siyam na buwan. At ang pagpapalang dinala ng Mahal na Ina sa kanyang sinapupunan ay ang Diyos na tumutubos sa lahat. At ang pagpapalang ito ay may Pangalan - Hesus. 

Tayong lahat ay pinaalalalahanan ng Mahal na Inang si Maria sa simula ng isang panibagong taon tungkol sa awa at pagpapala ng Diyos. Ang awa at pagpapala ng Diyos ay walang hanggan. Katunayan, mismong ang Mahal na Inang si Maria ay nagsisilbing paalala sa atin tungkol sa awa at pagpapala ng Diyos. Bakit? Siya ang hinirang ng Diyos upang maging Ina ng Panginoong Hesus. 

Huwag natin kalimutan ang pagiging maawain at mapagpala ng Diyos. Lagi nating tandaan na ang Diyos ay tunay na maawain at mapagpala. Ang Kanyang awa at pagpapala ay hindi magmamaliw kailanman. Huwag na huwag natin itong ibaon sa limot. Ang katotohanang ito'y dapat nating alalahanin sa lahat ng oras. 

PANGINOON ANG PINAGMULAN

31 Disyembre 2019 

Ikapitong Araw ng Pagdiriwang sa Pasko ng Pagsilang 

1 Juan 2, 18-21/Salmo 95/Juan 1, 1-18 

"Ang liwanag sa ating tahanan - Diyos ang pinagmumulan." Ang mga salitang ito ay mula sa awiting Pamasko ng ABS-CBN na pinamagatang "Family is Forever." Ang liwanag ng Diyos ang pinagtuunan ng pansin sa mga titik na ito. Tunay nga itong kapansin-pansin sapagkat ang nasabing awitin ay sekular at hindi pang-liturhiya. Subalit, sa kabila ng pagka-sekular ng nasabing awiting Pamasko, pinagtuunan ng pansin ang liwanag na kaloob ng Diyos sa lahat. May liwanag dahil sa Diyos. 

Tinalakay sa mga Pagbasa ang paksa ng liwanag ng Diyos. Ang Panginoong Diyos ay naghahatid ng tunay na liwanag. Ang liwanag na ito ang pumapawi sa dilim. Sa Ebanghelyo, nagsalita si San Juan tungkol sa pangangaral ni San Juan Bautista sa ilang. Sa kanyang mga pangaral sa ilang, nagpatotoo si San Juan Bautista tungkol sa ilaw. Ang ilaw na pinatotohanan ni San Juan Bautista ay walang iba kundi ang Panginoong Hesukristo, ang Salitang nagkatawang-tao. Si Hesus ang tagapawi ng kadiliman. Pinapawi ng tunay na liwanag na si Hesus ang dilim na bumabalot sa buong paligid. Sa Unang Pagbasa, inilarawan ni San Juan kung sino ang mga hindi tumanggap sa liwanag na hatid ni Kristo. Ang mga anti-Kristo na nasa panig ng kasinungalingan at kadiliman. Ang mga hatid ng anti-Kristo ay taliwas o salungat sa ipinagkakaloob ni Kristo. 

Kung ang mga anti-Kristo ay naghahatid ng kasinungalingan at kadiliman sa lahat, ang hatid ng Panginoong Hesus sa lahat ay liwanag at katotohanan. Ang liwanag na hatid ni Hesus ay sumisindak at pumapawi sa dilim. Mas makapangyarihan ang liwanag na hatid ni Kristo kaysa sa kadiliman at kasinungalingang hatid ng mga anti-Kristong tumututol sa Kanya. Ang balak ng mga nasa panig ng kadiliman ay maghatid ng kapahamakan at kamatayan. Subalit, ang balak ni Kristo ay maghatid ng liwanag at kaligtasan. Iyan ang ating Panginoon. 

Sa Panginoon nagmumula ang tunay na liwanag. Sumunod tayo sa liwanag hatid ng Panginoong Hesukristo. Hindi tayo maliligaw ng landas dahil Siya ang magiging gabay ng bawat isa. Ang liwanag ng Panginoong Hesus ang aakay sa atin tungo sa Kanya. Hindi Niya tayo hahayaang mapahamak. 

MAGING KALUGUD-LUGOD SA PANINGIN NG DIYOS

30 Disyembre 2019 

Ikaanim na Araw ng Pagdiriwang sa Pasko ng Pagsilang 

1 Juan 2, 12-17/Salmo 95/Lucas 2, 36-40 

Sa wakas ng Ebanghelyo, inilarawan ang buhay ng Panginoong Hesukristo bilang isang bata. Bata pa lamang si Hesus ay namuhay na Siya nang kalugud-lugod sa paningin ng Diyos. Ang Panginoong Hesukristo ang pinakaperpektong halimbawa ng pamumuhay nang kalugud-lugod sa paningin ng Diyos. Hindi Niya layunin at hangarin ang mamuhay ayon sa mga atas ng sanlibutan. Bagkus, Siya'y namuhay ayon sa mga utos at loobin ng Ama.

Mas pinili ni Hesus na maging kalugud-lugod sa paningin ng Diyos. Ang mga utos at tuntunin ng Ama ay Kanyang tinupad at isinabuhay. Bagamat Siya'y bata pa lamang sa mga sandaling yaon, nagbigay Siya ng halimbawang dapat tularan ng bawat isa. Ipinakita ng Batang Banal na si Hesus kung ano ang dapat maging pakay nating lahat - mamuhay para sa Diyos. 

Inilarawan ni Apostol San Juan sa kanyang pangaral sa Unang Pagbasa kung ano ang mapapala ng lahat ng mga mamumuhay nang kalugud-lugod sa paningin ng Diyos. Sabi ni Apostol San Juan sa wakas ng Ikalawang Pagbasa na mabubuhay magpakilanman ang bawat taong mamumuhay ayon sa kalooban ng Diyos (2, 17). Pansamantala lamang ang buhay natin dito sa daigdig. Ang bawat isa sa atin dito sa lupa ay mamamatay balang araw. Ang buhay na walang hanggan ay matatamo lamang sa piling ng Diyos sa langit. Kaya naman, kung nais nating matamasa ang biyaya ng buhay na walang hanggan, mamuhay tayo ayon sa kalooban ng Diyos. 

Nais ba nating mamuhay sa piling ng Diyos sa langit magpakailanman? Tularan ang halimbawang ipinakita ni Kristo mula sa Kanyang pagkabata. Sundin natin sa bawat sandali ng ating buhay dito sa lupa ang mga utos at loobin ng Diyos. 

TAGABUKLOD NG PAMILYA

29 Disyembre 2019 

Kapistahan ng Banal na Mag-Anak Hesus, Maria at Jose (A) 

Sirac 3, 3-7. 14-17a (gr. 2-6. 12-14)/Salmo 127/Colosas 3, 12-21/Mateo 2, 13-15. 19-23 

"Pinag-isa tayo ng Diyos at pag-ibig." Ang mga salitang ito ay galing sa koro ng awiting "Family is Forever." Bagamat isang sekular na awitin ang nasabing kanta, kapansin-pansin kung paanong binigyan ng pansin ang papel ng Panginoong Diyos sa bawat pamilya. Siya ang bumubuklod sa bawat pamilya. 

Iisa lamang ang temang tinalakay sa Unang Pagbasa at Ikalawang Pagbasa. Ang pamilya ay biyaya mula sa Diyos. Ang pamilya ay binuklod ng Diyos. Ang Diyos ang bumubuo sa bawat pamilya. Niloob ng Panginoon na ang bawat isa sa atin ay magmula sa isang pamilya. Tayong lahat ay biniyayaan ng Diyos ng isang pamilya. Niloob ng Diyos na sa simula pa lamang ng buhay natin dito sa mundo ay maging bahagi tayo ng isang pamilya. Tayong lahat ay nagmula sa isang pamilya. Iyan ang katotohanan tungkol sa ating buhay bilang tao. Tayong lahat ay dumating dito sa daigdig sa pamamagitan ng isang pamilya. 

Hindi tayo dumating sa daigdig sa isang iglap lamang. Hindi tayo dumating sa daigdig bilang mga avatar. Tayong lahat ay nagmula sa isang pamilya. Tayong lahat ay binigyan ng Diyos ng pamilya. Siya ang bumuo sa bawat pamilya sa daigdig. Kung hindi dahil sa pamilyang ibinigay ng Panginoon sa atin, ang bawat isa'y hindi nabubuhay at humihinga ngayon. Niloob ng Panginoon na ang buhay ng lahat ng tao dito sa daigdig ay magsimula sa isang pamilya. Iyan ang dahilan kung bakit ang bawat isa sa atin ay nabubuhay ngayon. May pamilya tayo dahil iyon ay niloob ng Panginong Diyos. Nabubuhay tayo ngayon dahil ang bawat isa sa atin ay nagmula sa mga pamilyang binuo ng Diyos para sa atin. 

Maski ang Diyos ay nagmula sa isang pamilya. Hindi Siya dumating sa lupa agad-agad. Hindi Siya dumating bilang isang avatar. Kung tutuusin, maaari naman Niya iyon gawin. Subalit, hindi Niya iyon ninais gawin. Bagkus, niloob Niyang dumating sa daigdig sa pamamagitan ng isang pamilya. Nagkaroon Siya ng pamilya noong dumating Siya sa lupa. Niloob ng Diyos na ang Mahal na Birheng Maria at si San Jose ay maging Kanyang mga magulang sa Kanyang pagdating sa daigdig. Ang tampok na salaysay sa Ebanghelyo ay tungkol sa isa sa mga naranasan ng Banal na Pamilya nina Hesus, Maria, at Jose. 

Sa Ebanghelyo, isinalaysay kung paanong ang Batang Diyos na si Kristo Hesus ay tinakas mula sa Betlehem. Ang Banal na Pamilya ay tumakas patungong Ehipto dahil nanganganib ang buhay ng Diyos na Sanggol na si Hesus. Kahit Sanggol pa lamang si Hesus sa mga sandaling yaon, naranasan Niya ang pagkalinga at pag-ibig ng Kanyang mga magulang. Agad na sinunod ni San Jose ang utos ng Diyos na ipinarating sa kanya ng isang anghel na nagpakita sa kanya sa panaginip dahil mahal niya si Kristo. Si Maria ay nagtiis ng maraming hirap at pagod sa kanyang paglalakbay. Subalit, tiniis niya ang lahat ng iyon dahil sa kanyang pag-ibig para sa kanyang Anak na si Hesus. Kung tutuusin, maaari na lamang tutulan at suwayin ang utos ng Diyos na ibinalita ng anghel kay San Jose sa panaginip. Maaari nilang gawin iyan, kung gugustuhin nina Maria at Jose. Subalit, pinili nilang sundin ang utos ng Diyos dahil nanaig ang kanilang pag-ibig at pagkalinga sa Panginoong Hesukristo, ang Banal na Sanggol. 

Tunay ngang isang biyaya mula sa Diyos ang pamilya. Tayong lahat ay binigyan ng pamilya upang makaranas tayo ng pag-ibig at pagkalinga. Niloob ng Panginoon na ang bawat isa'y magkaroon ng pamilya upang tayo'y magkaroon ng pagkakataong mamuhay sa daigdig. Kung wala tayong pamilya, wala tayo sa mundo ngayon. 

KANINO KA PAPANIG?

28 Disyembre 2019 

Kapistahan ng mga Banal na Sanggol na Walang Kamalayan, mga martir 

1 Juan 1, 5-2, 2/Salmo 123/Mateo 2, 13-18 

Dalawang uri ng hari ang itinatampok sa pagdiriwang sa araw na ito. Ang unang hari ay si Haring Herodes. Siya ang itinampok sa ikalawang bahagi ng Ebanghelyo. Siya ang may pakana ng pagpaslang sa mga inosenteng sanggol na lalaki o 'di kaya mga batang lalaking dalawang taong gulang pababa. Ayaw niyang bitawan ang kanyang kapangyarihan bilang hari. Nais niyang manatili sa kapangyarihan magpakailanman. Ayaw niyang may pumalit sa kanya. Ang sinumang may balak na pumalit sa kanya ay isang banta. Kaya, handa siyang gawin ang lahat ng bagay upang maalis o matanggal ang anumang "banta" sa kanyang pagkahari. 

Masasabi nating siya'y praning dahil sa kanyang ginawa. Nagpakita siya ng pagka-praning noong inutos niya ang kanyang mga kawal na patayin ang mga inosenteng sanggol na lalaki at ang mga batang lalaking dalawang taong gulang pababa sa Betlehem. Bakit siya na-praning? Nasilaw sa kapangyarihan. 

Ang pangalawang hari ay ang Panginoong Hesukristo. Ang Panginoong Hesus ay dumating sa daigdig bilang isang munting Sanggol na inihiga sa isang sabsaban noong gabi ng unang Pasko. Siya ang Banal na Sanggol sa Ebanghelyo. Siya ang bukod-tanging dahilan kung bakit napraning si Haring Herodes. Siya ang Banal na Sanggol na itinakas nina San Jose at ng Mahal na Birheng Maria sa Ehipto. Ito'y matapos ibalita ng isang anghel na nagpakita kay Jose sa isang panaginip na ang buhay ng Banal na Sanggol ay nanganganib. 

Inilarawan ni Apostol San Juan sa Unang Pagbasa kung ano ang pinagkaiba ni Kristo kay Haring Herodes. Sabi ni Apostol San Juan na si Hesus ay naghandog ng sarili para sa kaligtasan ng lahat ng tao. At sinabi rin ni Apostol San Juan na ang bawat isa ay nilinis ng Dugo ni Kristo. Ipinasiya ng Panginoong Hesukristo na ialay ang Kanyang sarili alang-alang sa sangkatauhan. Ipinasiya ni Hesus na maging handog para sa kaligtasan ng sangkatauhan. Niloob Niyang tubusin ang lahat ng tao sa pamamagitan ng pagdanak ng Kanyang Dugo. Iyan ang dahilan kung bakit dumating si Hesus sa daigdig bilang isang munting Sanggol noong gabi ng unang Pasko. Dumating Siya upang iligtas ang sangkatauhan. 

Kaya naman, ang tanong para sa bawat isa sa atin - sino ang hari natin? Sino sa dalawang hari ang papanigan natin? Ang haring nagpasiyang gumamit ng dahas para lamang manatili sa kapangyarihan o ang Haring nagpasiyang ialay ang buo Niyang sarili upang maligtas ang lahat ng Kanyang nasasakupan? 

SAKSI NG PAG-IBIG NG SALITA

27 Disyembre 2019 

Kapistahan ni Apostol San Juan, Manunulat ng Mabuting Balita 

1 Juan 1, 1-4/Salmo 96/Juan 20, 2-8 

Sinimulan ni Apostol San Juan ang kanyang unang sulat sa Unang Pagbasa sa pamamagitan ng paglalarawan kung ano ang kanyang gawain bilang saksi ni Kristo. Nasaksihan at naramdaman ni Apostol San Juan ang pag-ibig ng Salitang nagkatawang-tao na si Kristo Hesus. At ang pag-ibig na ito ang pinatotohanan ni Apostol San Juan sa kabuuan ng kanyang misyon bilang saksi ni Hesukristo. Siya'y hindi tumigil sa pagpapatotoo tungkol sa pag-ibig ng Panginoon kailanman. 

Isinalaysay ni Apostol San Juan sa Ebanghelyo ang dahilan kung bakit dumating sa daigdig ang Salitang nagkatawang-tao na si Hesus noong gabi ng unang Pasko. Si Hesus ay pumarito upang iligtas ang lahat ng tao sa pamamagitan ng Kanyang krus at Muling Pagkabuhay. Ang Sanggol na isinilang ng Mahal na Birheng Maria noong gabi ng unang Pasko ang ipinangakong Tagapagligtas. Si Kristo'y dumating bilang isang munting sanggol na inihiga sa sabsaban noong gabi ng unang Pasko upang iligtas ang sangkatauhan. Bakit Niya ipinasiya gawin iyon? Pag-ibig. 

Gaya ng sinabi ni Apostol San Juan: "Tayo'y umiibig sapagkat Siya ang unang umibig" (4, 17). Inilalarawan ng Sanggol na Hesus ang pag-ibig ng Diyos para sa bawat isa. Sa pamamagitan ng Sanggol na Hesus, ipinakita ng Diyos ang Kanyang pag-ibig para sa lahat ng tao. Dahil sa Kanyang pag-ibig, ipinasiya Niyang maging isang munting sanggol noong unang Pasko. Ipinasiya ng Panginoong Hesukristo na Siya'y isilang ng Mahal na Birheng Maria dahil sa Kanyang pag-ibig. 

Katulad ni Apostol San Juan, lagi nating nasasaksihan at nararamdaman ang pag-ibig ng Diyos para sa ating lahat. Kaya naman, hinahamon tayo na maging mga saksi ng pag-ibig ng Salita ng Diyos na nagkatawang-tao na si Hesus. Patotohanan natin at ipalaganap sa lahat ng dako ang pag-ibig ng Panginoong Hesus. 

TAPAT NA SAKSI

26 Disyembre 2019 

Kapistahan ni San Esteban, Unang Martir 

Mga Gawa 6, 8-10; 7, 54-59/Salmo 30/Mateo 10, 17-22 

Ang Ebanghelyo para sa Misa sa Araw ng Pasko ay tungkol sa Salita ng Diyos na nagkatawang-tao. Ang Diyos ay dumating sa daigdig bilang Manunubos ng lahat ng tao sa pamamagitan ng Panginoong Hesukristo, ang Salitang nagkatawang-tao. Sa pamamagitan ng Pangalawang Persona ng Banal na Santatlo, nakapiling ng bawat isa ang Diyos. Ang Diyos ay namuhay sa piling ng bawat isa. Sa araw kasunod ng Dakilang Kapistahan ng Pasko ng Pagsilang ng Panginoon, ginugunita ang isang martir. Ang taong ito ay nagpakamartir alang-alang sa Panginoong Hesukristo. Sa halip na itakwil at talikuran ang Salitang nagkatawang-tao na si Kristo, ipinasiya pa rin niyang magpatotoo sa Panginoon nang buong katapatan hanggang sa araw ng kanyang pagkamatay bilang martir. Siya'y walang iba kundi si San Esteban, ang unang martir ng Simbahan. 

Isinalaysay sa Unang Pagbasa ang buhay at pagkamatay ni San Esteban. Siya'y naging masigasig sa pangangaral at pagsaksi kay Kristo. Sa tampok na salaysay tungkol sa kanyang buhay, makikita kung paanong marami ang tumutol sa kanya, kabilang na rito ang mga bumubuo ng Sanedrin. Hindi siya tinanggap dahil sa aral at mensaheng kanyang ipinapangaral. Dahil dito, nakaranas siya ng pag-uusig mula sa mga autoridad at iba pang mga tao. Kinalauna'y siya'y binato hanggang sa siya'y malagutan ng hininga. Ang lahat ng iyan ay dahil sa kanyang pagsaksi kay Hesus. Siya'y namatay bilang martir dahil kay Hesus. 

Sa Ebanghelyo, binabalaan ng Panginoong Hesus ang mga alagad tungkol sa magiging misyon nila bilang Kanyang mga saksi. Binabalaan ni Hesus ang mga alagad na huwag nilang isiping magiging madali ang misyong na ibibigay Niya sa kanila. Maraming pag-uusig ang haharapin at dadanasin nila. Iyan ang naranasan ni San Esteban. Ang mga sinabi ni Hesukristo sa Ebanghelyo ay naranasan ni San Esteban. Siya'y inusig at pinatay dahil kay Hesus. 

May tanong para sa bawat isa na kailangan natin pag-isipan nang maigi. Handa ba tayong maging tapat na saksi ng Panginoon?