PAANO MAKAKAMIT ANG TUNAY NA KAGALAKAN?

11 Pebrero 2023 

Paggunita sa Mahal na Birheng Maria ng Lourdes 

Isaias 66, 10-14k/Judith 13/Juan 2, 1-11 

This photographic reproduction of the Painting of the Apparition of the Virgin Mary to Bernadette of Soubirous in the Grotto at Massabielle near Lourdes (1877) by Virgilio Tojetti (1851–1901) is in the Public Domain ("No Known Copyright") in its country of origin as well in other countries and areas where the copyright term is the author's life plus 100 years or fewer due to its age because the author died in 1901. This work is also in the Public Domain in the United States because it was published (or registered with the U.S. Copyright Office) before January 1, 1928. 

Itinuturo muli sa atin ng Simbahan sa araw na ito, ang araw na inilaan ng Simbahan para sa pagdiriwang ng Paggunita sa Mahal na Birheng Maria ng Lourdes, kung ano ang dapat nating gawin upang makamit ang tunay na galak. Tiyak na hinahangad ng bawat isa sa atin bilang tao na maging tunay na masaya. Bilang tao, ninanais nating makamit ang tunay na saya, tuwa, o galak. Handa tayong gawin ang lahat makamtan lamang ito. Sa araw na ito, muli tayong pinaaalalahanan at tinuturuan ng Simbahan kung paano natin ito magagawa. 

Habang muli tayong pinaalalahanan at tinuturan ng Simbahan kung ano ang dapat nating gawin upang tunay ngang maging masaya, ang mga ginawang pagpapakita o aparisyon ng Mahal na Inang si Mariang Birhen kay Santa Bernadette ng Soubirous sa Lourdes ay itinatampok at ginugunita. Sa pamamagitan ng mga aparisyong ito sa Lourdes, ang Mahal na Inang si Mariang Birhen ay naghatid ng galak, hindi lamang kay Santa Bernadette, kundi para sa lahat. Muli niyang itinuro sa pamamagitan ng mga pagpapakitang ito kung paano makakamit ang tunay na kaligayahan. 

Nakasentro sa paksang ito ang mga Pagbasa para sa araw na ito. Sa Unang Pagbasa, itinuro ni Propeta Isaias ang dahilan kung bakit ang lahat ay dapat magalak. Itinuro rin niya kung saan nagmumula ang tunay na kagalakan. Ang tunay na kagalakan ay sa Diyos lamang matatagpuan. Katunayan, ang tunay na kagalakan ay nagmumula lamang sa Kanya. Sa Ebanghelyo, itinuro ng Mahal na Inang si Mariang Birhen kung paanong makakamit ang tunay na galak. Gawin natin ang anumang iutos ng Poong Jesus Nazareno (Juan 2, 5). Bagamat sa konteksto ng salaysay sa Ebanghelyo, ang mga salitang ito ay binigkas ng Mahal na Birhen sa mga lingkod sa kasalan sa Cana upang ang problema tungkol sa alak ay kanilang maresolba, ang mga salitang ito ay para rin sa atin. Katunayan, ang mga salitang ito na binigkas ng Mahal na Birhen sa Ebanghelyo ay patuloy na umaalingawngaw sa kasalukuyang panahon. 

Katulad ng Mahal na Ina, ang tunay na kaligayahan ay ating makakamtan kung ang mga atas at utos ng Panginoong Jesus Nazareno ay ating susundin. Mayroong galak at ligaya sa pagsunod sa Mahal na Poong Jesus Nazareno. Katunayan, ang galak at tuwang ito ay ang tunay na galak at saya. Huwag na tayong tumingin o humanap sa iba. Itinuturo sa atin ng Mahal na Inang si Mariang Birhen at ng Simbahan kung saan natin matatagpuan ang tunay na kagalakan at kung paano nating makakamit iyon. Sundin si Jesus Nazareno. 

Mayroong galak sa pagsunod sa Nuestro Padre Jesus Nazareno. Ito ang mensahe at aral ng Mahal na Birhen sa Ebanghelyo na patuloy na ipinapalaganap at itinuturo ng Simbahan sa kasalukuyan. Ang mga salita ng Mahal na Ina sa Ebanghelyo ay patuloy na umaalingawngaw sa araw na ito. Kung nais nating makamit ang tunay na galak at ligaya, sumunod tayo kay Kristo, ang Nuestro Padre Jesus Nazareno. 

PAGKAKATAONG LAGING IPINAGKAKALOOB

10 Pebrero 2023 

Paggunita kay Santa Escolastica, dalaga

Genesis 3, 1-8/Salmo 31/Marcos 7, 31-37 

This faithful photographic reproduction of the fresco The Fall and Expulsion from Paradise by Michelangelo in the Sistine Chapel ceiling is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer due to its age. Therefore, this photographic reproduction is also in the public domain in the United States. 

Ang Unang Pagbasa para sa araw na ito ay kakaiba. Ang araw na ito ng Biyernes ay inilaan para sa taimtim na pagdedebosyon at pamamanata sa Nuestro Padre Jesus Nazareno. Subalit, ang Unang Pagbasa ay tungkol sa pagkakasala ng tao. Sinuway ng mga una nating magulang na sina Adan at Eba ang utos ng Panginoong Diyos na huwag kainin ang ipinagbabawal na bunga mula sa puno sa gitna ng Halamanan ng Eden, ang punong nagbibigay ng karunungan tungkol sa kabutihan at kasamaan. Ang pasiya nina Adan at Eba ay suwayin ang utos ng Panginoong Diyos at magpatukso sa demonyong nag-anyo sa kanyang sarili bilang ahas na manunukso. 

Taliwas sa dapat gawin ng lahat ng mga deboto ng Mahal na Poong Jesus Nazareno ang isinalaysay sa Unang Pagbasa para sa araw na ito. Ang mga tunay na deboto ng Mahal na Poong Jesus Nazareno ay dapat maging masunurin sa Kanya. Ang kanilang debosyon at katapatan sa Mahal na Poong Jesus Nazareno ay kanilang inihahayag sa pamamagitan ng taos-pusong pagsunod at pagtalima sa Kanya. 

Subalit, bilang tao, hindi tayo perpekto. Mayroon tayong mga kahinaan, pagkukulang, at kasalanan. Dahil sa ating mga karupukan at kahinaan, hindi tayo ligtas mula sa mga tukso at kasalanan. Ito ang katotohanan ng buhay sa mundong ito. Kaya naman, binibigyan tayo ng Salmong Tugunan at Mabuting Balita para sa araw na ito ng isang napakahalagang mensahe na tunay ngang naghahatid ng kapanatagan ng loob. Sabi sa Salmo: "Mapalad ang pinagbigyang mahango sa kasalanan" (Salmo 31, 1a). Ang Diyos ay laging naghahatid ng pagkakataon para sa bawat isa sa atin na talikuran ang makasalanang pamumuhay at tahakin ang landas ng kabanalan. Katulad ng bingi at piping binigyan ng pagkakataon ni Jesus Nazareno na makarinig at makapagsalita sa Ebanghelyo, lagi rin Niya tayong binibigyan ng pagkakataon na maging banal. Ito ang dahilan kung bakit ang Panginoong Jesus Nazareno ay dumating sa mundong ito sa takdang panahon upang tayo'y iligtas. Gaya ng sabi sa Awit o Himno sa Kanya na laging inaawit sa tuwing magwawakas ang bawat pagdiriwang ng Banal na Misa sa Quiapo, sinasagisag ng Kanyang Krus ang ating kaligtasan. Sa pamamagitan ng Banal na Krus na Kanyang pinasan patungo sa Kalbaryo at kinamatayan na sinundan ng Kanyang Muling Pagkabuhay, iniligtas ng Panginoong Jesus Nazareno ang lahat ng tao. Dahil dito, mayroon tayong pagkakataong maging banal. 

Muli tayong pinaalalahanan ng Simbahan sa araw na ito na tunay ngang mahabagin at mabuti ang Mahal na Poong Jesus Nazareno. Habang tayong lahat ay patuloy na namumuhay at naglalakbay sa mundo, lagi Niya tayong binibigyan ng pagkakataong pagsisihan at talikdan ang ating mga kasalanan at mamuhay nang banal at kalugud-lugod sa paningin ng Panginoon. Bagamat hindi tayo karapat-dapat, lagi Niya tayong binibigyan ng pagkakataong maging banal sa atin dahil sa Kanyang kabutihan, pag-ibig, at habag. Huwag nating sayangin ang pagkakataong ito na lagi Niyang ibinibigay sa atin habang patuloy tayong nabubuhay at naglalakbay sa mundong ito. 

HINDI TAGAPAGPALIT NG TUNAY NA LIWANAG

5 Pebrero 2023 

Ikalimang Linggo sa Karaniwang Panahon (A) 

Isaias 58, 7-10/Salmo 111/1 Corinto 2, 1-5/Mateo 5, 13-16 

This reproduction of the painting Christ on the Mount of Olives (1919) by Gyula Benczúr (1844–1920), as well as the work of art itself from the Hungarian National Gallery Collection via biblia.hu, is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or fewer because the author (painter) died in 1920. This work of art is also in the Public Domain in the United States because it was published (or registered with the U.S. Copyright Office) before January 1, 1928. 

Marahil may ilang malilito sa isa sa mga sinabi ng ating Panginoong Jesus Nazareno sa Ebanghelyo para sa Linggong ito. Isa sa mga sinabi ng Mahal na Poon sa Kanyang pangaral sa Ebanghelyo: "Kayo'y ilaw sa sanlibutan" (Mateo 5, 14). Ang mga salitang ito ay una Niyang binigkas sa mga apostol at patuloy pa rin itong umaalingawngaw hanggang sa kasalukuyang panahon sa pamamagitan ng Kanyang Simbahan. Subalit, nasabi rin ng Panginoong Jesus Nazareno sa isa sa Kanyang mga pangaral tungkol sa Kanyang pagkakilanlan bilang ipinangakong Mesiyas at Tagapagligtas na Siya mismo ang ilaw ng sanlibutan (Juan 8, 12). Kaya naman, tiyak na may mga mapapatanong tungkol sa kung sino nga ba ang tunay na ilaw ng sanlibutan. Tayo ba o si Kristo? Sa unang tingin, mukha kasing magkasalungat ang dalawang pahayag na ito ni Kristo. 

Sa totoo lamang, ang dalawang pahayag na ito ng Panginoong Jesus Nazareno ay mukha namang magkasalungat sa unang tingin. Hindi natin malaman kung sino ba talaga ang tunay na liwanag kung babasehan natin ang dalawang pahayag na ito ng Panginoong Jesus Nazareno nang hindi muna nating sinasaliksik at pinagninilayan nang mabuti ang dalawang pahayag na ito na Kanyang binigkas. Kaya naman, may ilang mapapatanong kung ano nga ba talaga ang nais ituro ng ating Panginoong Jesus Nazareno tungkol sa ilaw ng sanlibutan. Subalit, kung babasahin, sasaliksikin, at pagninilayan natin nang mabuti at masinsinan ang dalawang pahayag na ito na binigkas ng Poong Jesus Nazareno, makikita natin na mayroon palang ugnayan ang dalawang ito. Inilalarawan ng Poong Jesus Nazareno sa dalawang pahayag na ito ang ugnayan natin sa Kanya bilang Kanyang mga tagasunod. Ang tunay na liwanag ay walang iba kundi ang ating Poong Jesus Nazareno habang tayo naman ang salamin o repleksyon ng liwanag na ito. 

Hindi malinaw sa unang tingin na inilalarawan pala ng ating Poong Jesus Nazareno ang ating ugnayan sa Kanya bilang repleksyon ng tunay na liwanag na walang iba kundi Siya sa dalawang pahayag na ito. Subalit, mauunawaan natin ang ugnayan ng dalawang pahayag na ito kung ang mga ito ay babasahin, sasaliksikin, at pagninilayan nang mabuti gamit ang mga mata at pag-iisip ng mga taong mayroong taimtim na ugnayan sa Kanya bilang mga deboto, mananampalataya, at kaanib ng tunay at nag-iisang Simbahang Siya mismo ang nagtatag. Inilarawan ng pahayag ng ating Poong Jesus Nazareno sa Ebanghelyo ang ating ugnayan sa Kanya, ang tunay na liwanag na galing sa langit. Niloob Niyang atasan tayo upang maging Kanyang mga salamin. Ang bawat isa sa atin ay hinirang Niya upang maging tagapagpalaganap at salamin ng Kanyang liwanag. Sa pamamagitan nito, tayo rin ay nagiging liwanag para sa mundo. 

Isang malaking tulong ang mga salitang binigkas ng butihing Panginoong Diyos sa pamamagitan ng Kanyang Propetang si Isaias sa Unang Pagbasa at maging ang mga salita sa Salmong Tugunan para sa araw na ito. Sa Unang Pagbasa, inihayag mismo ng Panginoong Diyos na matutulad sa bukang-liwayway ang Kanyang bayan kung gagawa sila ng mabuti para sa kapwa (Isaias 58, 8). Ito rin ang nais isalungguhit ng mga salita sa Salmong Tugunan para sa Linggong ito. Ang habag at malasakit para sa kapwa ay nagsisilbing salamin ng tunay na liwanag. Sa pamamagitan nito, nagiging liwanag rin ang bawat isa sa atin. 

Tinupad ni Apostol San Pablo sa Ikalawang Pagbasa ang kanyang tungkulin bilang salamin ng tunay na liwanag na si Kristo. Nangaral siya tungkol sa Mabuting Balitang inihayag sa pamamagitan ni Kristo, ang Mahal na Poong Jesus Nazareno. Ginawa ito ni Apostol San Pablo nang may katapatan, pananalig, at kababaang-loob bilang isang apostol at misyonero ni Kristo. Sa pamamagitan nito, si Apostol San Pablo ay naging tagapagpalaganap at salamin ng tunay na liwanag na walang iba kundi ang Mahal na Poong Jesus Nazareno. Hindi niya pinalitan ang Mahal na Poong Jesus Nazareno bilang tunay na liwanag. Bagkus, naging isang abang tagapagpalaganap at salamin lamang siya ng tunay na liwanag na kahit kailan ay hindi mapapalitan na walang iba kundi ang Mahal na Poong Jesus Nazareno. Sa pamamagitan nito, naging liwanag rin para sa mga Hentil si Apostol San Pablo.

Hinirang tayo ng ating Mahal na Poong Jesus Nazareno para maging liwanag. Subalit, tandaan natin, hinirang tayo hindi upang palitan Siya bilang tunay na liwanag. Huwag nating kakalimutan ito. Wala tayong kapasidad o kakayahang palitan ang Mahal na Poong Jesus Nazareno bilang tunay na liwanag. Bagkus, bilang mga liwanag para sa mundong ito, hinirang tayo upang maging salamin at tagapagpalaganap ng tunay na liwanag na walang iba kundi ang Mahal na Poong Jesus Nazareno. Hindi tayo mang-aagaw ng posisyon. Kung mayroon mang nagbabalak na agawin mula sa ating Poong Jesus Nazareno ang Kanyang posisyon bilang tunay na liwanag, mabibigo ka lamang dahil walang papalit sa Kanya kailanman. 

SA PILING LAMANG NG POONG JESUS NAZARENO

3 Pebrero 2023 

Biyernes ng Ikaapat na Linggo sa Karaniwang Panahon (Taon I) 

Hebreo 13, 1-8/Salmo 26/Marcos 6, 14-29 

Screenshot: 01.04.2023 (WEDNESDAY) 10AM #OnlineMass #Nazareno2023 - Weekday of #Christmas Season (Quiapo Church Facebook and YouTube Live Streaming)

Ang mga Pagbasa para sa araw na ito ng Biyernes, ang araw na inilaan para sa taimtim na debosyon at pamamanata sa Nuestro Padre Jesus Nazareno, ay nakatuon sa Kanyang pagiging walang hanggan. Tanging si Kristo lamang ang walang hanggan. Matatagpuan lamang sa Kanya ang tunay na walang hanggan. Ang mundong ito ay lilipas at magwawakas rin pagdating ng panahon. Subalit, si Kristo, ang Panginoong Jesus Nazareno, ay walang hanggan. Hindi magbabago ang katotohanang ito kahit kailan. Ang Nuestro Padre Jesus Nazareno ay ang simula at ang katapusan. 

Sa wakas ng Unang Pagbasa, inilarawan ang Mahal na Poong Jesus Nazareno bilang tunay na Diyos na walang hanggan. Mananatili si Jesus Nazareno magpakailanman. Gaya ng sabi ng manunulat ng Sulat sa mga Hebreo, ang Panginoong Jesus Nazareno "noong nakaraan ay Siya rin sa kasalukuyan at Siya rin magpakailanman" (13, 8). Isa lamang ang nais ilarawan ng manunulat ng Sulat sa mga Hebreo sa mga salitang ito. Hindi magbabago si Jesus Nazareno. Magbago man ang panahon, mananatili pa rin bilang tunay na Diyos at Panginoon ang Nuestro Padre Jesus Nazareno. Siya lamang ang mananatili bilang Diyos at Hari magpakailanman. Sa Salmong Tugunan, muling isinalungguhit at ipinaalala sa lahat ang pagiging tunay na Tagapagligtas ng butihing Panginoon. Sa Ebanghelyo, isinalaysay ang kamatayan ni San Juan Bautista sa mga kamay ni Haring Herodes Antipas bilang isang martir. Iniutos ni Haring Herodes na si Juan Bautista ay patayin ng kanyang mga tauhan sa pamamagitan ng pagpugot ng ulo niya sapagkat ito ang hiniling ni Salome na hiniling rin ni Herodias na nag-utos sa dalaga na gawin iyon at hilingin iyon. 

Kung tutuusin, maaari namang takasan at iligtas ni San Juan Bautista ang kanyang sarili mula sa kamatayan kung binawi lamang niya ang mga maaanghang na salitang binitiwan niya laban kay Haring Herodes Antipas at Herodias. Subalit, ipinasiya pa rin niyang harapin ang kanyang kamatayan bilang martir nang buong kababaang-loob at pananalig. Hindi niya binawi ang kanyang mga sinabi o humingi ng tawad mula kina Herodes at Herodias. Bagkus, nanindigan pa rin siya para sa Diyos hanggang wakas dahil batid naman niyang may hangganan ang mundong ito. Nasa piling ng Diyos sa langit ang tunay na magpakailanman. 

Ipinapaalala sa atin sa araw na ito na sa piling ng Nuestro Padre Jesus Nazareno sa langit lamang matatagpuan ang tunay na walang hanggan. Hindi ito matatagpuan sa mundong ito. Kung hahanapin natin ito sa mundo, nag-aaksaya lamang tayo ng oras, panahon, at lakas. Sa halip na hanapin ang walang hanggan sa mundong ito, lumapit tayo sa Mahal na Poong Jesus Nazareno at hilingin natin sa Kanya na tulungan tayo sa pagiging banal upang maihanda natin ang ating sarili para sa biyaya ng buhay na walang hanggan sa Kanyang piling sa langit. 

Tunay nga ba tayong mga deboto ng Mahal na Poong Jesus Nazareno? Ihanda natin ang ating mga sarili para sa tunay na buhay na walang hanggan sa Kanyang piling sa langit habang nabubuhay tayo dito sa lupa. Pagsikapan nating tahakin ang landas ng kabanalan katulad ng mga taong kabilang sa kasamahan ng mga banal sa langit. 

ANG HARING NAGLILIGTAS AY ANG TUNAY NA LIWANAG

2 Pebrero 2023 

Kapistahan ng Pagdadala kay Jesus Nazareno na Panginoon sa Templo 

Malakias 3, 1-4/Salmo 23/Hebreo 2, 14-18/Lucas 2, 22-40 (o kaya: 2, 22-32)

This reproduction of the painting De opdracht in de tempel (English: The Presentation in the Temple; 17th century) by Jacob Jordaens (1593-1678) from Rubenshuis is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or fewer due to its age. 

Nakasentro sa pagkakilanlan ng Mahal na Poong Jesus Nazareno bilang tunay na liwanag ang Kapistahang ipinagdiriwang ng Simbahan sa araw na ito. Binibigyan ng pansin at pinagninilayan ng Simbahan sa araw na ito nang buong kataimtiman ang titulo at pagkakilanlang ito ng Mahal na Poong Jesus Nazareno. Bukod sa pagiging Diyos na totoo at tunay na Haring walang hanggan, ang Panginoong Jesus Nazareno ay ang tunay na liwanag na nagniningning sa buong santinakpan at pumapawi sa kadiliman. Ang Diyos na tunay na Hari at Manunubos ay ang tunay na liwanag. Siya'y walang iba kundi si Kristo, ang Mahal na Poong Jesus Nazareno. 

Ang mga Pagbasa para sa araw na ito ay nakasentro sa pagkakilanlan o titulong ito ng ating Poong Jesus Nazareno. Sa Unang Pagbasa, inihayag ng Panginoong Diyos sa pamamagitan ni Propeta Malakias na darating Siya bilang Manunubos at Hukom na magdadalisay sa mga naglilingkod sa Kanya nang buong katapatan at pananalig. Ang Diyos ay darating sa pamamagitan ng ipinangakong Manunubos upang maghatid ng kalinisan at kadalisayan sa mga magpapasiyang maging tapat sa Kanya hanggang sa huli. Sa Ikalawang Pagbasa, inilarawan kung paano ito ginawa ng Panginoong Diyos. Tinupad ng Diyos ang pangakong ito sa pamamagitan ni Kristo, ang Tagapagligtas na ipinangako. Sa Ebanghelyo, isinalaysaysay ang pagdadala ng Birheng Maria at ni San Jose sa Banal na Sanggol na walang iba kundi ang Poong Jesus Nazareno sa Templo upang ihandog sa Diyos. Ang walang maliw na katapatan ng Diyos na tunay ngang dakila ay nahayag sa pamamagitan ng gawang ito. Ito ang pinatotohanan ni Simeon sa kanyang kantikulo na inilahad sa Ebanghelyo nang makita at mahawakan niya ang Banal na Sanggol na si Kristo Hesus, ang Mahal na Poong Nazareno. 

Katulad ng sabi sa Salmong Tugunan para sa Kapistahang ipinagdiriwang sa araw na ito: "D'yos na makapangyariha'y dakilang Hari magpakailanman" (Salmo 23, 10b). Sa pamamagitan ng mga salitang ito sa Salmong Tugunan, ipinapakilala ng Simbahan sa atin kung saan nagmumula ang tunay na liwanag. Ang tunay na liwanag na papawi sa dilim ay nagmumula sa Panginoon mismo. Katunayan, mismong ang Panginoon ang liwanag na ito. Dumating sa mundong ito ang tunay na liwanag na nagmula sa langit sa pamamagitan ng Mahal na Poong Jesus Nazareno. Bilang tunay na liwanag, tunay ngang naiiba ang Mahal na Poong Jesus Nazareno sapagkat tanging Siya mismo ang tunay na Haring walang hanggan na nagpasiyang maging liwanag na nagliligtas. Ang mga salitang ito ay naglalarawan sa tunay na Hari na tunay ring liwanag ng lahat. 

Mapalad tayo sapagkat ipinagkaloob sa atin ng Diyos ang tunay na liwanag na tunay ngang natatangi at naiiba. Ang Panginoong Jesus Nazareno ay hindi lamang Diyos na totoo, Haring totoo, at Tagapagligtas na totoo. Siya rin ay ang tunay na liwanag. Ito ang pasiya ng Panginoong Jesus Nazareno. Kahit na hindi naman Niya kinailangang gawin ito, ipinasiya pa rin Niya itong gawin alang-alang sa atin. Ang tunay na Hari na Siya ring ipinangakong Mesiyas at Tagapagligtas na bigay ng Diyos sa atin na walang iba kundi ang Poong Jesus Nazareno ay ang tunay na liwanag na nagliligtas. Ito ang dakilang gawa ng Diyos na tunay ngang kahanga-hanga. 

Inaanyayahan tayo ng Mahal na Poong Jesus Nazareno na lumakad sa ilalim ng tunay na liwanag na walang iba kundi Siya. Bilang mga tapat Niyang deboto, dapat nating tanggapin nang buong tuwa, pananalig, at kababaang-loob ang paanyayang ito. Sa pamamagitan ng pagtanggap sa paanyayang ito ng Mahal na Poong Jesus Nazareno, ang landas ng kabanalan ay sinisimulan nating tahakin. Ang landas na ito ang aakay sa bawat isa sa atin patungo sa Kanyang walang hanggang kaharian sa langit. Kung gagawin natin ito, maipapahayag nating tunay at tapat nga tayo sa ating taimtim na debosyon at pamamanata sa Mahal na Poong Jesus Nazareno. 

Tinatanong tayo ng Simbahan sa araw na ito kung tatanggapin ba natin nang buong pananalig, kababaang-loob, at tuwa ang paanyaya ng Nuestro Padre Jesus Nazareno na lumakad sa ilalim ng tunay na liwanag na na nagliligtas walang iba kundi Siya. Ano ang ating magiging pasiya? 

PAKIKIPAGTAGPO SA BUKAL NG BIYAYA

1 Pebrero 2023 

Ika-35 Anibersaryo ng Pagpasinaya at Pagtatalaga sa Simbahan ng Quiapo (Parokya ni San Juan Bautista) bilang Basilika Menor ng Itim na Nazareno 

Ezekiel 34, 11-16/Salmo 123/1 Corinto 12, 3b-7. 12-13/Mateo 18, 15-20 
[Ang mga Pagbasang ito ay mula sa pangkat ng mga Pagbasang maaaring pagpilian na matatagpuan sa Mga Pagdiriwang ng Misa para sa Iba't Ibang Pangangailangan: Para sa Simbahan]

Ang araw na ito ay napakaespesyal para sa pamayanan ng Simbahan ng Quiapo, ang tahanan ng Poong Jesus Nazareno, sapagkat sa araw na ito noong 1988, pormal na idineklara at itinalaga ang Simbahan ng Quiapo bilang isang Basilika Menor. Bagamat noon pa mang 11 Disyembre 1987 iginawad ng Santo Papa noon na si Papa San Juan Pablo II ang titulong Basilika Menor ng Itim na Nazareno sa Simbahan ng Quiapo, sa mismong araw na ito noong taong 1988, pormal na pinasinayaan ang pagiging isang ganap na Basilika Menor ng nasabing Simbahan sa pamamagitan ng pagtatalaga nito bilang isang ganap na Basilika Menor. Sa pamamagitan ng titulong ito, kinikilala ng Simbahan ang taimtim na debosyon sa Mahal na Poong Jesus Nazareno.

Isang biyaya para sa lahat ng mga bumubuo sa Simbahan ng Quiapo at maging ang mga deboto ng Nuestro Padre Jesus Nazareno saan man sila nagmula ang paggawad sa Simbahang ito ng titulong Basilika Menor. Subalit, ang karangalan at titulong ito ay hindi dapat maging sanhi ng payabangan o pagmamataas. Bagkus, ang karangalan at titulong ito ay dapat na ituring na isang biyaya mula sa Poong Jesus Nazareno. Kaya, dapat lalo pa natin Siyang ipakilala sa lahat at ipalaganap ang debosyon kay Kristo na nagpasan ng Krus alang-alang sa atin. Ang taimtim na debosyon at pamamanata kay Kristo na nagpasan ng Krus alang-alang sa atin ay dapat pumakaw sa bawat isa sa atin na maging mga salamin at tagapagpalaganap ng Kanyang habag, kagandahang-loob, at pag-ibig para sa atin. 

Sa mga Pagbasa para sa espesyal na pagdiriwang sa araw na ito, itinutuon ang ating pansin sa pagiging mahabagin ng Panginoong Diyos. Katunayan, ito ang sinasagisag ng imahen ng Mahal na Poong Jesus Nazareno. Dahil sa Kanyang pag-ibig, habag, at kagandahang-loob, ipinasiya ng Mahal na Poong Jesus Nazareno na harapin at tiisin ang Kanyang pagpapakasakit na sinasagisag ng Banal na Krus na Kanyang pinasan upang tayo ay iligtas. Ganyan ang ating Diyos. Tunay Siyang mahabagin. 

Nagpakilala ang ating Panginoong Diyos sa Unang Pagbasa bilang isang mahabaging pastol. Sa pamamagitan nito, inihayag ng Panginoong Diyos na tunay ang Kanyang habag para sa lahat. Dahil tunay nga Siyang mahabagin at nagmamagandang-loob, ipinasiya ng Panginoong Diyos na hanapin ang mga nawawalang tupa. Gaano mang kalala o kabigat ang kasalanang nagawa ng bawat tao, hahanapin pa rin sila ng Diyos at ibabalik sa Kanyang kawan. Sa Ikalawang Pagbasa, inihayag at itinuro ni Apostol San Pablo na tayong lahat ang bumubuo sa Katawan ni Kristo dito sa lupa. Kahit na hindi tayo karapat-dapat dahil sa dami ng ating mga sala laban sa Diyos na hindi na mabilang, niloob pa rin Niyang maging bahagi tayo ng tunay na Simbahang itinayo ni Jesus Nazareno. Niloob pa rin ng Panginoong Jesus Nazareno na maging mga bahagi tayo ng Kanyang Katawan dito sa lupa. Inihayag ng Panginoong Jesus Nazareno sa Ebanghelyo na nasa piling Siya ng mga taong nagkakatipon sa Banal Niyang Ngalan upang magpuri, magpasalamat, at sumamba sa Kanya. Sa tuwing nagaganap ito, ang dakilang pag-ibig, habag, at kagandahang-loob ng Panginong Jesus Nazareno ay lalo lamang Niya ipinapakita sa lahat ng mga debotong nagkakatipon sa Kanyang Ngalan. Ganyan ang Mahal na Poong Jesus Nazareno. Tunay nga Siyang mahabagin. 

Tuwing papasok tayo sa mga Simbahan katulad na lamang ng Simbahan ng Quiapo, ang Basilika Menor ng Nazareno, nakikipagtagpo tayo sa Mahal na Poon. Ibinubuhos Niya sa atin ang Kanyang biyaya, habag, pag-ibig, at kagandahang-loob. Subalit, hindi ito dapat manatili lamang sa loob ng Basilika ng Nazareno o kaya sa mga paligid sa distrito ng Quiapo lamang. Bagkus, ang pagpapala, pag-ibig, habag, at kagandahang-loob na ibinuhos sa atin ng Mahal na Poong Jesus Nazareno ay dapat nating ibahagi saan man tayo magtungo. 

Bilang mga deboto ng Mahal na Poong Jesus Nazareno, mayroon tayong misyon na dapat gampanan. Ang misyong ito ay ibinibigay sa atin ng Mahal na Poong Jesus Nazareno. Dapat tayong maging mga salamin at tagapagpalaganap ng Kanyang pag-ibig, habag, at kagandahang-loob. Sa pamamagitan nito, pinatutunayan nating tapat tayo sa ating debosyon at pamamanata sa Mahal na Poong Jesus Nazareno. 

MGA SALAMIN NG DIYOS NA MALAPIT SA MGA ABA

29 Enero 2022 

Ikaapat na Linggo sa Karaniwang Panahon (A) 

Sofonias 2, 3; 3, 12-13/Salmo 145/1 Corinto 1, 26-31/Mateo 5, 1-12a 

This image from Good News Productions International and College Press Publishing through Free Bible Images (https://www.freebibleimages.org/) is under an Attribution-NonCommercial-NoDerivatives 4.0 International (CC BY-NC-ND 4.0). 

Ang mga Pagbasa para sa Linggong ito ay tungkol sa pagiging malapit ng Panginoon sa mga mahihina. Bagamat ang Panginoon ay Diyos ng lahat, ang Kanyang Puso ay malapit sa mga itinuturing ng lipunan na mahina katulad na lamang ng mga aba. Ang Diyos ay hindi pumapabor sa mga pang-aapi at pang-aabusong ginagawa laban sa lahat ng mga taong itinuturing na mahina katulad na lamang ng mga aba. Katunayan, isang patunay nito ay ang Panginoong Jesus Nazareno na dumating sa mundong ito hindi bilang bahagi ng isang pamilyang maharlika, marangya, o elitista kundi bilang bahagi ng isang pamilya mula sa sektor ng mga maralita. 

Sabi sa Salmong Tugunan: "Mga aba ay mapalad, D'yos ang hari nilang lahat" (Mateo 5, 3). Bagamat ang mga salita sa Salmong Tugunan para sa Linggong ito ay hango sa isa sa mga pangaral ng Mahal na Poong Jesus Nazareno sa Ebanghelyo, ang unang pangaral tungkol sa mga taong itinuturing na mapapalad sa paningin ng Diyos, ang mga talata o taludtod ng Salmo ay nakasentro sa katangiang ito ng Diyos. Ito ang ating Diyos. Hindi Siya dumidistansya o lumalayo mula sa mga aba. Bagkus, kusang-loob Siyang lumalapit sa mga aba. Katunayan, naging bahagi Siya ng mga itinuturing ng lipunan na mahihina, katulad ng mga dukha, sa pamamagitan ni Kristo, ang Poong Jesus Nazareno. Ang Diyos ay malapit sa mga isinasatabi at binabalewala ng lipunan dahil itinuturing silang mahihina. 

Ipinakilala ni Propeta Sofonias ang Panginoong Diyos bilang bathalang malapit sa mga aba sa simula pa lamang ng kanyang pahayag sa Unang Pagbasa. Ang Diyos ay hindi katulad ng marami sa lipunan dito sa mundo. Kung ang marami sa lipunan dito sa mundong ito ay pilit na umiiwas sa mga taong itinuturing na mahina katulad na lamang ng mga aba, ang Diyos ay lumalapit sa kanila. Nais ng Panginoong Diyos na bigyan ang mga iniiwasan at isinasantabi ng lipunan katulad na lamang ng mga aba ng pagkakataong maranasan ang Kanyang pag-ibig, habag, at kagandahang-loob. Sa pangaral ni Apostol San Pablo sa Ikalawang Pagbasa, ang katangiang ito ng Diyos ay kanya ring tinalakay. Sabi ni Apostol San Pablo na pinili at hinirang ng Diyos ang mga taong itinuturing na "hamak, walang halaga, at walang kabuluhan sa sanlibutang ito upang pawalang-halaga ang mga itinuturing na dakila ng sanlibutan" (1 Corinto 1, 28). Nakasentro sa mismong paksang ito ang pangaral ng Poong Jesus Nazareno sa Ebanghelyo para sa Linggong ito. Sa mga pahayag ng Nuestro Padre Jesus Nazareno tungkol sa mga taong itinuturing na mapalad sa paningin ng Diyos, isinalungguhit rin Niya ang pagiging malapit ng Diyos sa mga isinasantabi at iniiwasan ng marami sa lipunan dito sa mundong ito sapagkat itinuturing silang mahihina tulad ng mga aba. 

Hindi iniiwasan ng Diyos ang mga itinuturing na mahihina katulad na lamang ng mga aba. Bagkus, kusang-loob Siyang lumalapit sa kanila. Katunayan, ginawa na Niya ito noong dumating Siya sa mundong ito bilang ipinangakong Mesiyas at Manunubos na si Jesus Nazareno. Dahil dito, batid Niya ang karanasan at kalagayan ng lahat ng mga itinuturing na mahihina sa lipunan. 

Mabuti pa ang Diyos, kusang-loob na lumalapit sa mga itinuturing na mahihina gaya ng mga aba. Nakakalungkot, hindi lamang iniiwasan ang mga itinuturing na mahihina katulad na lamang ng mga aba. Pilit pa silang isinasantabi at binubudol. Maraming tao ang magpapanggap na mabuti, lalung-lalo na ang mga nasa kapangyarihan. Sa unang tingin, mukha silang mabuti. Iyon nga lamang, mayroon pala silang binabalak laban sa mga itinuturing na mahihina. Aapihin sila. Sasamantalahin sila. Gagawin nila ang lahat para lamang manlinlang at apihin ang mga taong itinuturing na mahihina. Gagamitin nila ang kanilang kapangyarihan upang mang-api at mang-abuso ng mga itinuturing na mahina ng lipunan. Ang nakakalungkot, pinapanigan pa ng karamihan sa lipunan ang mga umaabuso at umaapi sa mga itinuturing na mahihina. Ang mga pinipilit na isantabi ay hindi papansinin. Ang masaklap, idadamay pa ng mga taong umaapi at umaabuso sa mga itinuturing na mahihina ang Diyos. 

Bilang mga deboto ng Mahal na Poong Jesus Nazareno, mayroon tayong tungkulin na maging mga salamin at tagapagpalaganap ng Kanyang kagandahang-loob, pag-ibig, at habag para sa lahat ng tao, lalung-lalo na sa mga itinuturing na mahihina gaya na lamang ng mga aba. Hindi tayo dapat pumanig sa mga nanlilinlang, umaabuso, at umaapi sa kanila, kahit na mga masisikat pa sila. Dapat nating tutulan at labanan ang panibagong uri ng katiwaliang ito. Kung magbubulag-bulagan at magbibingi-bingihan na lamang tayo sa pagpapalaganap ng kawalan ng hustisyang ito, walang saysay o silbi ang ating debosyon at pamamanata sa Mahal na Poong Jesus Nazareno dahil hindi Siya papabor sa ganitong uri ng katiwalian.