REGALONG NAGMULA SA MAY KAARAWAN

25 Disyembre 2023 

Dakilang Kapistahan ng Pasko ng Pagsilang ng Panginoong Jesus Nazareno 

[Pagmimisa sa Hatinggabi] 

Isaias 9, 1-6/Salmo 95/Tito 2, 11-14/Lucas 2, 1-14 

This faithful photographic reproduction of the painting (c. 1751) Adoration of the Angels

by Charles-André van Loo (1705–1765), as well as the actual work of art itself from Brest’s Museum of Fine Arts, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This work is in the Public Domain in the United States because it was published (or registered with the U.S. Copyright Office) before January 1, 1928. 

Noong gabi ng unang Pasko, ang mga salitang ito sa Ebanghelyo ay binigkas ng isang anghel ng Panginoong Diyos noong nagpakita siya sa mga pastol na nagbabantay ng kanilang mga tupa sa parang: "Huwag kayong matakot! Ako'y may dalang mabuting balita para sa inyo na magdudulot ng malaking kagalakan sa lahat ng tao. Sapagkat isinilang ngayon sa bayan ni David ang inyong Tagapagligtas" (Lucas 2, 10-11). Sa pamamagitan ng mga salitang ito, inilarawan ng anghel ang mga biyayang kaloob ng Banal na Sanggol na isinilang ng Mahal na Birheng Maria. Isang dakilang biyaya mula sa Diyos ang Banal na Sanggol na isinilang ng Mahal na Birheng Maria noong gabi ng unang Pasko. Katunayan, ang Banal na Sanggol na ito ay ang pinakadakilang biyaya mula sa Diyos. Ang Banal na Sanggol na ito ay walang iba kundi si Kristo. 

Pagsapit ng ika-25 ng Disyembre taun-taon, ipinagdiriwang natin nang buong galak at tuwa bilang Simbahan ang Dakilang Kapistahan ng Pasko ng Pagsilang ng Poong Jesus Nazareno. Inaalala natin sa araw na ito ng masayang pagdiriwang kung gaano tayo iniibig ng Diyos. Dahil sa pag-ibig ng Diyos na tunay ngang dakila, kusang-loob Niyang ipinagkaloob sa atin ang pinakadakilang aguinaldo na dumating sa mundong ito sa pamamagitan ng Banal na Sanggol na isinilang ng Mahal na Birheng Maria na walang iba kundi ang ipinangakong Mesiyas at Manunubos na si Jesus Nazareno, ang Kaniyang Bugtong na Anak at ang Pangalawang Persona ng Banal na Santatlo. Hindi mahihigitan o mapapantayan ang aguinaldong ito kailanman. 

Kapag ipinagdiriwang ng isang tao ang kaniyang kaarawan, lagi siyang binibigyan ng mga regalo ng kaniyang mga pamilya, kaibigan, at iba pang mga kakilala. Subalit, ang Banal na Sanggol na si Jesus Nazareno ay naiiba. Bagamat ang ika-25 ng Disyembre ay inilaan ng Simbahan upang buong galak at tuwa nating gunitain at ipagdiwang ang pagsilang ng Nuestro Padre Jesus Nazareno sa sabsaban, Siya pa yaong namimigay ng mga regalo sa atin. Ipinagkaloob nga Niya sa atin ang pinakadakilang regalo noong gabi ng unang Pasko, ang gabi ng una Niyang pagdating sa mundo bilang Banal na Sanggol na isinilang ng Mahal na Inang si Mariang Birhen, na walang iba kundi ang dakilang biyaya ng Kaniyang pagliligtas. Nakakapanliit at nakakagulat. Dahil sa pag-ibig Niyang ito, bagamat Siya yaong may kaarawan, niloob pa rin ng Mahal na Poong Jesus Nazareno na regaluhan tayo. Ang regalong ibinigay sa atin ay walang katulad at hinding-hindi ito mapapantayan at mahihigitan kailanman. 

Ang mga Pagbasa para sa Hatinggabi ng Dakilang Kapistahan ng Pasko ng Pagsilang ng Panginoong Jesus Nazareno ay nakatuon sa pinakadakilang aguinaldong ibinigay. Hindi mahihigitan o mapapantayan man lamang ang aguinaldong ito kailanman dahil ipinagkaloob ito ng Panginoong Diyos. Nagmula sa langit ang aguinaldong ito. Dahil sa dakilang pag-ibig ng Diyos, ang biyayang ito ay Kaniyang ipinagkaloob sa atin. Sa Unang Pagbasa, inilarawan kung ano ang pinakadakilang aguinaldong ito. Ang biyaya o regalo ng Diyos para sa lahat ay isang sanggol na lalaki (Isaias 9, 6). Ipinakilala ng mga salita sa Salmong Tugunan na hango naman mula sa mga salitang ng anghel sa Ebanghelyo ang sanggol na lalaking ipagkakaloob ng Diyos sa lahat - si Kristo (Lucas 2, 11). Sa Ikalawang Pagbasa, inihayag ni Apostol San Pablo ang natatanging dahilan kung bakit ipinasiya itong gawin ng Diyos - ang Kaniyang kagandahang-loob (Tito 2, 11). Dahil sa kagandahang-loob ng Diyos para sa atin, ipinasiya Niyang ipagkaloob si Jesus Nazareno, ang Banal na Sanggol na isinilang ng Mahal na Birheng Maria, sa atin bilang pinakadakilang aguinaldo. 

Sa Hatinggabi ng Dakilang Kapistahan ng Pasko ng Pagsilang ng Panginoon, tayong lahat ay inaanyayahan ng tampok na mang-aawit sa Salmong Tugunan na magpuri at magpasalamat sa Banal na Sanggol na si Jesus Nazareno na nagpasiyang ibigay ang buo Niyang sarili sa atin bilang pinakadakilang aguinaldo. Gaya ng sabi sa isa sa mga taludtod sa Salmong Tugunan, ang pasiyang ito ng Mahal na Poong Jesus Nazareno ay isa sa Kaniyang mga dakilang gawa (Salmo 95, 3). Tayong lahat ay inaanyayahang umawit ng mga papuri at pasasalamat nang buong galak kasama ng mga anghel sa Ebanghelyo (Lucas 2, 14). Isa lamang ang kanilang hinahandugan ng mga awit - ang pinakadakilang biyayang kaloob ng Diyos sa sangkatauhan.

Mayroong regalo para sa atin. Ang regalong ito ay mula sa may kaarawan. Kahit na sarili Niyang kaarawan ang ipinagdiriwang, ipinasiya pa rin Niyang regaluhan tayo. Ito ay ang pinakadakilang regalong ipinagkaloob sa kasaysayan. Hindi mapapantayan o mahihigitan ang kadakilaan ng regalong ito. Ang regalong ito ay walang iba kundi ang Poong Jesus Nazareno. Ipinasiya ng Mahal na Poong Jesus Nazareno na ipagkaloob sa atin ang buo Niyang sarili bilang pinakadakilang regalong ating tinanggap dahil sa Kaniyang pag-ibig, kagandahang-loob, habag, at awa. Isa lamang itong patunay na tayong lahat ay tunay Niyang iniibig, kinaawaan, at kinahahabagan. Dahil sa Kaniyang dakilang pag-ibig, kagandahang-loob, habag, at awa para sa atin, hindi ipinagkait sa atin ng Nuestro Padre Jesus Nazareno ang buo Niyang sarili. 

Tayong lahat ay inaanyayahang samahan ang Mahal na Birheng Maria, si San Jose, at ang lahat ng mga anghel at banal sa langit sa paghahandog ng mga awit ng papuri at pasasalamat sa Banal na Sanggol na si Jesus Nazareno. Ibinigay Niya ang buo Niyang sarili sa atin bilang pinakadakilang aguinaldo. Sama-sama natin Siyang handugan ng mga awit ng papuri, pasasalamat, at pagsamba sa Kaniya. Handugan rin natin Siya ng taos-pusong katapatan at pananalig. 

Isa pong Mapagpala at Maligayang Pasko ng Pagsilang ng Panginoon sa lahat! 

BAKIT MAY PASKO?

24 Disyembre 2023 

Dakilang Kapistahan ng Pasko ng Pagsilang ng Panginoong Jesus Nazareno 

[Pagmimisa sa Bisperas] 

Isaias 62, 1-5/Salmo 88/Mga Gawa 13, 16-17. 22-25/Mateo 1, 1-25 (o kaya: 1, 18-25) 

This faithful photographic reproduction of the painting (c. 1650s) Nativity (Natividade) by Josefa de Óbidos (1630–1684), as well as the actual work of art itself, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1684. This work of art is also in the Public Domain in the United States because it was published (or registered with the U.S. Copyright Office) before January 1, 1928. 

"Pag-ibig Mong walang maliw ay lagi kong sasambitin" (Salmo 88, 2a). Nakasentro sa mga salitang ito ang mga Pagbasa para sa Bisperas ng Pasko ng Pagsilang. Sa mga salitang ito, matutuklasan natin ang dahilan kung bakit natin ipinagdiriwang bilang isang Simbahan ang Dakilang Kapistahan ng Pasko ng Pagsilang ng Panginoon, ang Nuestro Padre Jesus Nazareno, sa pagsapit ng ika-25 ng Disyembre taun-taon. Ang dahilan ng pagdiriwang ng Kapaskuhan ay pag-ibig. Dahil sa isang sabsaban noong gabi ng unang Pasko, dumating sa mundo ang tunay na umiibig sa tanan, katulad ng Kaniyang ipinangako noon pa mang una. 

Mga salitang nagpapalakas, nagpapagaan, at nagpapanatag ng mga puso at loobin ang mga salitang inilahad sa Unang Pagbasa. Inilarawan sa Unang Pagbasa para sa Bisperas ng Pasko ng Pagsilang ng Poong Jesus Nazareno ang pag-ibig ng Diyos para sa bayang Israel. Ang pag-ibig ng Diyos para sa Kaniyang bayang hinirang ay tunay at wagas. Pinahahalagahan, kinalulugdan, at minamahal ng Diyos ang bayang Kaniyang hinirang nang lubusan. 

Ang pangaral ni Apostol San Pablo sa Ikalawang Pagbasa para sa Bisperas ng Pasko ng Pagsilang ng Poong Jesus Nazareno ay nakasentro sa pinakadakilang aguinaldong kaloob mismo ng Diyos sa sangkatauhan. Ipinagkaloob ng Diyos ang aguinaldong ito sa sangkatauhan noong gabi ng unang Pasko. Walang katulad ang aguinaldong ito. Hindi mapapantayan o mahihigitan ang aguinaldong ito. Noong gabi ng unang Pasko, ipinagkaloob ng Diyos sa lahat ang pinakadakilang aguinaldo na walang iba kundi ang biyaya ng Kaniyang pagliligtas na dumating sa pamamagitan ni Jesus Nazareno. Sa pamamagitan nito, nahayag ang Kaniyang pag-ibig. 

Sa Ebanghelyo, inilahad ang angkang kinabilangan ng Poong Jesus Nazareno at ang mga kaganapang kaugnay ng Kaniyang pagsilang. Dumating sa mundong ito noong gabi ng unang Pasko ang Poong Jesus Nazareno dahil sa Kaniyang pag-ibig para sa lahat. Kahit hindi naman Niya kinailangang gawin iyon, ipinasiya pa rin ng Diyos na ipagkaloob sa sangkatauhan ang biyaya ng Kaniyang pagliligtas noong gabi ng unang Pasko sa pamamagitan ng Banal na Sanggol na isinilang ng Mahal na Birheng Maria na walang iba kundi ang Poong Jesus Nazareno. Ang dakilang pag-ibig ng Diyos sa tanan ay nahayag sa tanan sa pamamagitan ng pinakadakilang aguinaldong si Kristo, ang Banal na Sanggol na isinilang ng Mahal na Inang si Mariang Birhen. 

Kung hindi dahil sa pag-ibig ng Diyos, walang Pasko. Walang Pasko kung ang Diyos ay nagpasiyang patigasin ang Kaniyang puso at maging manhid at malamig. Subalit, dahil ipinasiya ng Diyos na ibigin tayo, ipinasiya Niyang lumapit sa atin upang iligtas tayo mula sa kasalanan at kamatayan sa pamamagitan ng pinakadakilang aguinaldo na walang iba kundi ang Banal na Sanggol na isinilang ng Mahal na Inang si Mariang Birhen na si Jesus Nazareno, ang Kaniyang Bugtong na Anak. 

Dahil sa pag-ibig ng Diyos na nahayag sa pamamagitan ng pinakadakilang aguinaldo na walang iba kundi ang Banal na Sanggol na isinilang ng Mahal na Inang si Mariang Birhen na si Jesus Nazareno, ipinagdiriwang natin nang buong saya taun-taon tuwing sasapit ang ika-25 ng Disyembre ang Kapaskuhan. Mayroong Pasko dahil ang Diyos ay nagpasiyang mahalin tayo at lumapit sa atin. 

PAANYAYA NG TUNAY NA UMIIBIG

24 Disyembre 2023 

Ikaapat na Linggo sa Panahon ng Pagdating ng Panginoon [B] 

Ikasiyam at Huling Araw ng Simbang Gabi 

2 Samuel 7, 1-5. 8b-12. 14a. 16/Salmo 88/Roma 16, 25-27/Lucas 1, 26-38 

This faithful photographic reproduction of the painting of the Annunciation to Mary (German: Verkündigung Mariae) by Johann Matthias Kager (1575–1634), as well as the actual work of art itself from the Kunsthistorisches Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1634. This work is in the Public Domain in the United States because it was published (or registered with the U.S. Copyright Office) before January 1, 1928.

Lagi nating itinutuon ang ating pansin, tinatalakay, at pinagninilayan ang tinatawag na "Fiat" o ang "Oo" ng Mahal na Birheng Maria sa kalooban ng Diyos para sa kaniya kapag tinatalakay at pinagninilayan ang salaysay ng pagdalaw ng Arkanghel na si San Gabriel sa Mahal na Birheng Maria upang ibalita sa kaniya na hinirang siya ng Diyos para sa isang napakahalagang misyon. Ang misyong ibinigay sa kaniya ng Diyos ay walang iba kundi ang pagiging Ina ng Mahal na Poong Jesus Nazareno, ang Mesiyas at Manunubos na ipinangakong ipagkakaloob ng Diyos sa Kaniyang bayan. 

Muling itinatampok sa Ebanghelyo para sa Linggong ito, ang Ikaapat at Huling Linggo sa Panahon ng Pagdating ng Panginoon o Adbiyento at Ikasiyam at Huling Araw ng tradisyunal na Simbang Gabi, ang salaysay ng pagpapakita ng Arkanghel na si San Gabriel sa Mahal na Birheng Maria upang ibalita sa kaniya na hinirang siya ng Diyos upang maging Ina ng Bugtong na Anak ng Diyos na si Jesus Nazareno. Subalit, hindi lamang nakatuon ang Simbahan sa "Oo" na ibinigay ng Mahal na Birheng Maria sa Diyos sa huling Linggo bago sumapit ang Dakilang Kapistahan ng Pasko ng Pagsilang ng Panginoong Jesus Nazareno. Bagkus, nakatuon ito sa tunay na dakilan kung bakit ipinasiya ng Diyos na gawin ito. Isa lamang ang dahilan kung bakit Niya ginawa ito. Ang dahilan kung bakit ginawa ito ng Diyos ay ang Kaniyang pag-ibig. Wala nang iba pang dahilan kundi ang Kaniyang pag-ibig na dakila. 

Inihayag ng mang-aawit sa Salmong Tugunan para sa Linggong ito: "Pag-ibig Mong walang maliw ay lagi kong sasambitin" (Salmo 88, 2a). Nakasentro ang mga Pagbasa para sa Linggong ito sa mga salitang ito. Sa pamamagitan nito, muli nating itinutuon ang ating mga pansin sa misteryo ng dakilang pag-ibig ng Diyos. Walang Pasko kung hindi mapagmahal ang Panginoon. Hindi ipagkakaloob ng Diyos sa atin ang dakilang biyaya ng Kaniyang pagliligtas sa pamamagitan ni Kristo, ang Poong Jesus Nazareno, kung ipinasiya Niyang patigasin ang Kaniyang Puso at maging manhid sa atin. 

Sa Unang Pagbasa, ang Diyos ay nagbitiw ng isang pangako kay Haring David. Isa sa mga anak ni Haring David ay magiging hari. Papalitan siya ng isa sa kaniyang mga anak bilang hari sa kaniyang pagpanaw. Kapag naging hari ang anak na ito ni Haring David, hindi siya pababayaan ng Panginoong Diyos. Lagi Niyang papatnubayan at gagabayan ang anak na ito ni Haring David na papalit sa kaniya bilang hari (2 Samuel 7, 12a. 14. 16). Tinupad nga ng Diyos ang pangakong ito noong si Haring David ay pinalitan ng isa sa kaniyang mga anak na si Haring Solomon. Pagpanaw ng dakilang haring si David, ang isa sa kaniyang mga anak na si Solomon ay naging hari. Mula sa oras ng simula ng paghahari ni Solomon, lagi siyang sinamahan ng Panginoong Diyos upang patnubayan, tulungan, at gabayan. Patunay ito na ang Panginoong Diyos ay tunay na tapat sa Kaniyang pangako. 

Oo, tinupad ng Diyos ang Kaniyang pangako kay Haring David sa pamamagitan ng hindi pagpapabaya kay Haring Solomon, bagamat tinalikuran Siya ni Haring Solomon sa mga nalalabing sandali ng kaniyang buhay sa mundo. Subalit, mayroong higit na dakila kay Haring Solomon na magmumula rin sa angkan ni Haring David. Tunay nga namang higit na dakila ang Haring ito kaysa kina Haring David, Haring Solomon, at sa lahat ng mga naging hari o pinuno dito sa mundong ito. Ang Haring ito ay walang iba kundi si Kristo, ang Nuestro Padre Jesus Nazareno. Gaya ng inihayag ni Apostol San Pablo sa wakas ng kaniyang pangaral sa Ikalawang Pagbasa, Siya lamang ang dapat bigyan ng papuri at pagsamba magpakailanman (Roma 16, 27). 

Dahil sa dakilang pag-ibig ng Diyos, ipinagkaloob Niya sa atin ang biyaya ng Kaniyang pagliligtas sa pamamagitan ng Poong Jesus Nazareno. Sa pag-ibig na ito namulat ang Mahal na Inang si Mariang Birhen. Bagamat hindi niya lubusang maintindihan kung bakit siya mismo ang hinirang ng Diyos at kung paano ito mangyayari, ibinigay pa rin ang kaniyang "Oo" bilang tugon sa paanyayang ito ng Diyos na tanggapin ang isang napakabigat na misyon at tungkulin bilang Ina ni Kristo. 

Hindi tumitigil ang Diyos sa pagbibigay ng mga pagkakataon at paanyaya sa lahat na tanggapin at tuparin ang Kaniyang kalooban. Sa pamamagitan nito, inaanyayahan ng Diyos ang lahat na palalimin ang ating ugnayan at relasyon sa Kaniya. Ito ay isa ring pagkakataon para sa atin na ipahayag ang ating taos-pusong pagsamba, pananalig, at pag-ibig para sa Kaniya. Ano ang ating tugon sa paanyayang ito ng Diyos? 

SAGISAG NG KANIYANG KATAPATAN

23 Disyembre 2023 

Ikawalong Araw ng Simbang Gabi 

Malakias 3, 1-4. 23-24/Salmo 24/Lucas 1, 57-66

This faithful photographic reproduction of the painting (c. From 1750 to 1753) The Nativity of St. John the Baptist (Português: Natividade de São João Batista) by Corrado Giaquinto (1703–1766), as well as the actual work of art itself from the Museu Nacional de Belas Artes, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Tiyak na maraming ulit na nating narinig, tinalakay, at pinagnilayan bilang Simbahan ang katapatan ng Diyos. Ang Diyos ay tunay ngang matapat sa Kaniyang pangako. Sa pamamagitan ng Kaniyang katapatan, inihahayag ng Diyos na tunay nga natin Siyang maaasahan. Kung mayroong mga pagkakataong hindi maaasahan ang mga tao, ang Diyos ay laging maaasahan sa lahat ng oras at pagkakataon. Hindi Siya nakakalimot kailanman. Lagi Niyang tinutupad ang mga pangakong Kaniyang binibitiwan sa mga oras at panahong Kaniyang itinakda. Isinasalamin at sinasagisag ng laging pagtupad ng Diyos sa Kaniyang mga pangako sa panahong itinakda Niya ang katapatan Niyang walang maliw. Dahil dito, tunay ngang maaasahan ang Diyos. 

Ang katotohanang ito ay muling binibigyan ng pansin at pinagninilayan ng Simbahan habang unti-unting nalalapit ang pagsapit ng araw ng Dakilang Kapistahan ng Pasko ng Pagsilang ng Panginoon, ang Nuestro Padre Jesus Nazareno. Noong unang Pasko, tinupad ng Diyos ang Kaniyang pangako. Dumating Siya upang iligtas ang Kaniyang bayan sa pamamagitan ng Banal na Sanggol na si Jesus Nazareno. Kaya naman, sa paksang ito nakasentro ang mga Pagbasa upang tulungan tayo sa pagpapatuloy ng ating taimtim na paghihintay at paghahanda ng ating mga sarili para sa pagsapit ng nasabing Dakilang Kapistahan. Sa Unang Pagbasa, malakas na inihayag ng Diyos sa pamamagitan ng Kaniyang propetang hinirang na si Malakias na darating Siya upang iligtas, linisin, at dalisayin ang Kaniyang bayan. Bukod pa roon, sinabi ng Panginoong Diyos sa huling bahagi ng Unang Pagbasa na bago Siya dumating, mayroong isa pang sugo na darating, si Propeta Elias, upang tulungan ang lahat na ihanda ang kanilang mga sarili para sa Kaniyang pagdating (Malakias 3, 23-24). Nakasentro sa pangako ng Panginoong Diyos ang mga salita sa Salmong Tugunan na hango sa mga salitang binigkas ng Poong Jesus Nazareno: "Itaas n'yo ang paningin, kaligtasa'y dumarating" (Lucas 21, 28). Katunayan, isinalungguhit ng mang-aawit sa Salmong Tugunan ang walang maliw na katapatan ng Diyos nang bigkasin ang mga salitang ito: "Mabuti ang Poon at makatarungan" (Salmo 24, 8). Ito ang sinasagisag ng mga kahanga-hangang gawa ng Diyos. Hindi Siya nakakalimot sa Kaniyang pangako kailanman. Tampok ang salaysay ng pagsilang ng tagapaghanda ng daraanan ng ipinangakong Mesiyas at Tagapagligtas na si San Juan Bautista sa Ebanghelyo. Sa pamamagitan ng pagsilang ni Juan Bautista, muling inihayag ng Panginoon na tapat Siya sa pangakong Kaniyang binitiwan. Ang pangakong ito ay hindi lamang para kina Zacarias at Elisabet kundi na rin para sa Kaniyang bayan at sa buong sangkatauhan. Mayroong mahalagang papel, misyon, at tungkuling ibinigay ang Diyos kay San Juan Bautista. 

Ipinapaalala sa atin sa araw na ito na tunay ngang matapat ang Diyos. Kahit ilang ulit na natin itong naririnig, tinatalakay, at pinagninilayan, mahalagang pagnilayan muli ang katotohanang ito tungkol sa Panginoong Diyos. Hindi natin dapat kalimutan ang katapatan ng Panginoon. Katunayan, lagi itong ipinapaalala sa atin mismo ng Diyos sa pamamagitan ng Kaniyang mga biyaya. Ang mga biyaya ng Diyos ay mga salamin, tanda, sagisag, at paalala ng Kaniyang walang maliw na katapatan. 

Mahirap magtiwala sa mga tao ngayon. Hindi natin malaman kung ang isang tao ay tunay ngang maaasahan at mapagkakatiwalaan. Iyon nga lamang, kapag napakasikat ang isang tao, agad na ibibigay ng nakararami ang kanilang tiwala. Kahit yaong mga sikat na pinuno, pinagkakatiwalaan agad ng marami sa lipunan. Alam naman ng lahat na hindi tama yaong mga pasiya at gawain ng maraming mga pinuno, subalit hindi ito dahilan para sa marami sa lipunan na magtiwala sa mga pinunong ito. Katunayan, pinagtatanggol pa nga nila ang mga pinunong ito, kahit mali ang kanilang ginagawa. Bakit nga ba ipinipilit ng marami sa lipunan na pagkatiwalaan ang mga hindi naman dapat pagkatiwalaan? Hindi nga nila tinutupad ang kanilang mga pangako. Nawawala sila na parang bula kapag kailangang tuparin ang kanilang mga pangako na maging mga mabuting lingkod. 

Hindi na nating kailangang maghanap ng isang mapagkakatiwalaan at maaasahan sa lahat ng oras dahil lagi Siyang kasama natin. Isa lamang ang mapagkakatiwalaan at maaasahan nating lahat - ang Panginoong Diyos. Lagi Siyang tapat sa Kaniyang mga pangako. Ang Kaniyang mga pangako ay lagi Niyang tinutupad sa panahong tanging Siya mismo ang nagtakda. Kaya naman, marapat lamang natin Siyang pagkatiwalaan at asahan sa lahat ng oras at sandali sa ating buhay. 

Lagi nating tatandaang hindi lamang patunay ng kapangyarihan ng Diyos ang mga biyayang Kaniyang ipinagkakaloob sa atin. Bagkus, ang mga ito ay mga sagisag at mga salamin ng Kaniyang katapatang walang maliw. Hindi magmamaliw kailanman ang katapatan ng Panginoong Diyos. 

HINDI KAYANG PAGKASIYAHIN

22 Disyembre 2023 

Ikapitong Araw ng Simbang Gabi 

1 Samuel 1, 24-28/1 Samuel 2/Lucas 1, 46-56 

This image from Good News Productions and College Press Publishing was made available through FreeBibleimages with their permission is available through a Creative Commons Attribution-NonCommercial-NoDerivatives 4.0 International License (CC BY-NC-ND 4.0).

Walang sinumang tao sa mundong ito ang may kakayahang ilista ang lahat ng mga dahilan para purihin ang Panginoong Diyos. Hindi natin mabilang ang mga dahilang ito gamit ng ating mga daliri o kaya ng mga listahan dahil sa dami nito. Kahit gumawa pa tayo ng mga listahan, kulang pa ang isa o dalawa. Ang lahat ng mga dahilan kung bakit ang Diyos ay marapat lamang na purihin ay hindi kayang pagkasiyahin sa isang listahan o kaya ng mga libro. Ganyan ang kadakilaan ng Diyos. 

Inilarawan sa Unang Pagbasa, Salmong Tugunan, at Ebanghelyo para sa araw na ito ang ilan sa mga dahilan kung bakit pinupuri ng mga tampok na karakter ang Diyos. Sa Unang Pagbasa, bumalik sa Templo ang ina ni Samuel na si Ana upang mag-alay ng papuri at pasasalamat sa Diyos dahil biniyayaan siya ng isang anak. Buong tuwang bumalik sa Templo si Ana dahil ang kaniyang mga taimtim na panalangin ay dininggin ng Diyos. Ang kaniyang anak na si Samuel ay ang tugon sa kaniyang mga taimtim na dalangin sa Diyos. Nakasentro rin sa mga kahanga-hangang gawa ng Diyos ang mga salita sa Salmong Tugunan na hango sa panalangin ng pasasalamat ni Ana sa Diyos. Gaya ni Ana sa Unang Pagbasa at Salmong Tugunan, ang awit ng papuri ni Maria na kilala sa tawag na "Magnificat" ay nakatuon sa ilan lamang sa mga gawa ng Diyos na tunay ngang kahanga-hanga. 

Ang mga inilarawan sa Unang Pagbasa, Salmo, at Ebanghelyo ay ilan lamang sa mga dahilan kung bakit dapat papurihan ang Diyos. Sa totoo lamang, hindi natin kayang pagkasiyahin sa isang listahan lamang o kaya sa isang libro lamang ang mga dahilan kung bakit marapat lamang purihin, pasalamatan, at sambahin ang Diyos. Hindi nga natin itong kayang bilangin gamit ang ating mga daliri o kaya naman gawan ng mga listahan o mga libro tungkol sa paksang ito. Kulang ang mga iyon. 

Kailangan ba nating ilista ang lahat ng mga dahilan kung bakit ang Diyos ay marapat lamang purihin, pasalamatan, sambahin, at dakilain? Sa totoo lamang, hindi. Hindi natin kailangang bumuo ng isang mahabang listahan o magsulat ng maraming mga aklat dahil mapapagod lamang tayo at hindi ito makukumpleto. Oo, makakatulong ito sa pagtupad natin ng ating misyon bilang Simbahan na ipakilala ang Diyos sa lahat ng mga tao. Pero, hindi ito nangangahulugang pagurin natin ang ating mga sarili upang bumuo ng isang napakahabang listahan o libro na hindi naman matatapos. Tandaan, hindi ito katulad ng mga listahan ng mga bagay kailangang bilhin. 

Marapat lamang na purihin, dakilain, pasalamatan, at sambahin ang Diyos. Ang lahat ng mga Kaniyang mga kahanga-hangang gawa mula noon hanggang ngayon at pati rin ang lahat ng mga kahanga-hangang bagay na Kaniyang gagawin sa mga susunod pang panahon ay ilan lamang sa mga dahilan kung bakit. Hindi natin ito mabibilang dahil sa dami nito. 

Oo, maraming kahanga-hangang bagay na ginawa ang Panginoong Diyos. Subalit, huwag na nating subukang bilangin ang lahat ng mga ito nang paisa-isa. Hindi natin kayang pagkasiyahan sa isang mahaba-habang listahan o kaya sa maraming mga libro. Kapag sinubukan natin itong gawin, masasayang lamang ang ating mga oras. Ang dapat nating gawin bilang mga Kristiyano ay samahan ang ating Mahal na Inang si Mariang Birhen at ang lahat ng mga anghel at banal sa taos-pusong pag-aalay ng papuri, pagdakila, pasasalamat, pananalig, at pagsamba sa tunay at nag-iisang Diyos na naghayag ng Kaniyang dakilang pag-ibig sa atin sa pamamagitan ng Panginoong Jesus Nazareno, ang Kaniyang Bugtong na Anak na ipinagkaloob Niya sa atin bilang ipinangakong Mesiyas at Tagapagligtas. Tanging Siya mismo ay ang pinakadakilang biyayang ipinagkaloob ng Diyos sa atin.  

TAGAPAGBAHAGI NG GALAK NA KALOOB NG DIYOS

21 Disyembre 2023 

Ikaanim na Araw ng Simbang Gabi 

Awit 2, 8-14 (o kaya: Sofonias 3, 14-18a)/Salmo 32/Lucas 1, 39-45 

This faithful photographic reproduction of the painting (c. 17th century) A Visitação by Mattia Preti (1613–1699) and Gregorio Preti (1603–1672), as well as the actual work of art itself from Hampel Auctions, is the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Ang Mahal na Inang si Mariang Birhen ay tunay ngang naiiba. Sa halip na manatili na lamang sa kaniyang bahay matapos tanggapin ang misyon at tungkuling ibinigay sa kaniya ng Diyos nang buong kababaang-loob, pananalig, at pag-asa sa Kaniya, agad siyang naglakbay nang napakalayo mula sa kaniyang bahay sa Nazaret patungo sa bahay ng kaniyang kamag-anak na si Elisabet na matatagpuan sa lugar na kilala sa tawag na Ein Karem. Bagamat nagdadalantao siya sa mga oras na iyon, ipinasiya pa rin ng Mahal na Inang si Mariang Birhen na dalawin ang kaniyang kamag-anak na si Elisabet na nagdadalantao rin sa mga oras na iyon, kahit na ito'y nangangahulugang maglalakbay siya nang napakalayo upang maisagawa iyon. 

Kung tutuusin, hindi naman kinailangan itong gawin ng Mahal na Birheng Maria. Sa pagitan ng Mahal na Inang si Mariang Birhen at ni Elisabet, ang Mahal na Inang si Mariang Birhen mismo ay ang dapat dalawin. Dinadala ng Birheng Maria sa kaniyang sinapupunan ang ipinangakong Mesiyas at Manunubos na si Jesus Nazareno habang dinadala naman ni Elisabet sa kaniyang sinapupunan ang tagapaghanda ng daraanan ng Mahal na Poong Jesus Nazareno na si San Juan Bautista. Isang hamak na lingkod lamang si San Juan Bautista habang si Jesus Nazareno ay ang tunay na Diyos at Hari. Hindi ba't si Maria mismo ang dapat dalawin? Bakit dinalaw ni Maria si Elisabet? 

Oo, ang Sanggol na dinadala ng Birheng Maria sa kaniyang sinapupunan ay higit na dakila kaysa sa sanggol na dinadala ni Elisabet sa kaniyang sinapupunan. Subalit, sa kabila nito, ipinasiya pa rin ng Birheng Maria na dalawin ang kaniyang kamag-anak na si Elisabet upang ihatid sa kamag-anak niyang ito ang galak na kaloob ng Diyos. Ang galak na ipinagkaloob ng Diyos sa pamamagitan ng Poong Jesus Nazareno na dala-dala niya sa kaniyang sinapupunan ay hindi sinarili ng Birheng Maria. Bagkus, ipinasiya ng Birheng Maria na ibahagi ito sa kamag-anak niyang si Elisabet. Dahil sa pasiyang ito ng Mahal na Inang si Mariang Birhen, gumalaw sa tuwa ang sanggol na si San Juan Bautista sa sinapupunan ni Elisabet (Lucas 1, 44). Ang Mahal na Inang si Mariang Birhen ay nagpasiyang ibahagi ang galak na nagmumula sa pinakdakilang biyaya ng Diyos na si Jesus Nazareno, kahit na nagdadalantao. 

Isinalungguhit sa Unang Pagbasa na tanging sa Diyos lamang nagmumula ang tunay na galak. Ang tunay na galak ay matatagpuan lamang sa tunay na umiibig sa lahat na walang iba kundi ang Diyos. Tunay ngang dakila ang pag-ibig ng Diyos. Nagsisilbing mga sagisag at salamin ng dakilang pag-ibig ng Panginoong Diyos ang lahat ng mga biyayang Kaniyang kaloob sa lahat. 

Bagamat nagdadalantao sa mga sandaling iyon, ipinasiya pa rin ng Mahal na Inang si Mariang Birhen na ibahagi kay Elisabet ang galak na ipinagkaloob sa kaniya ng Diyos sa pamamagitan ng Banal na Sanggol sa kaniyang sinapupunan na walang iba kundi ang Panginoong Jesus Nazareno. Tinularan ng Mahal na Inang si Mariang Birhen ang halimbawa ng mga propetang hinirang ng Diyos sa Lumang Tipan, katulad na lamang ni Propeta Sofonias sa alternatibong Unang Pagbasa. Kahit na sa kaniya iginawad at ipinagkaloob ang karangalan at pananagutan bilang Ina ng Diyos na nagkatawang-tao na si Jesus Nazareno, hindi ito naging dahilan para kay Maria na magmataas at lumaki ang kaniyang ulo. Sa halip na magmataas, ipinasiya pa rin niyang ibahagi sa kaniyang kamag-anak na si Elisabet ang galak na kaloob ng Diyos. 

Naglakbay nang napakalayo ang Mahal na Inang si Mariang Birhen upang ibahagi sa kaniyang kamag-anak na si Elisabet ang galak na kaloob ng Diyos. Inihayag niya sa pamamagitan nito na lagi siyang handang ibahagi ang galak na kaloob ng Diyos sa lahat. Handa rin ba tayong gawin ang lahat upang maibahagi ang galak na kaloob ng Diyos katulad ng Mahal na Inang si Mariang Birhen? 

GININTUANG SANDALI

20 Disyembre 2023 

Ikalimang Araw ng Simbang Gabi 

Isaias 7, 10-14/Salmo 23/Lucas 1, 26-38 

This faithful photographic reproduction of the painting (c. 1560) Anunciación del Ángel a María which is attributed to Baltasar del Águila (1540–1599), as well as the actual work of art itself from Museum of Fine Arts of Córdoba, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This said work of art is also in the Public Domain in the United States because it was published (or registered with the U.S. Copyright Office) before January 1, 1928. 

Kapag pumapasok sa ating mga isipan ang mga salitang "ginto" o "ginintuan," iisipin nating isang mahalagang bagay ang pinag-uusapan. Ito ay bihira lamang makakita ng ginto ang bawat tao. Dahil dito, ang ginto ay isang kemikal na elementong labis na pinahahalagahan ng bawat tao. Hindi ito isang pangkaraniwang bagay lamang. Ang sinumang nagtataglay o nagmamay-ari ng ginto ay agad na itinuturing na mayaman dahil kakaunti lamang ang mga taong nagtataglay ng kemikal na ito. Sinasagisag ng elementong kemikal na tinatawag na ginto ang isang kakaibang uri ng kayamanan. 

Habang papalapit na nang papalapit ang pagsapit ng Dakilang Kapistahan ng Pasko ng Pagsilang ng Panginoon, ang Nuestro Padre Jesus Nazareno, itinutuon ng Inang Simbahan ang ating mga pansin sa isang ginintuang sandali sa kasaysayan ng ating kaligtasan. Sa kasaysayan ng pagtubos ng Diyos sa buong sangkatauhan, mayroong isang sandaling namumukod-tangi sa lahat. Ang sandaling ito ay napakahalaga dahil ang dakilang plano ng Diyos ay nakasalalay sa magiging kahihinatnan nito. Bagamat tinubos ng Diyos ang babaeng itinatampok sa araw na ito na walang iba kundi ang Mahal na Inang si Mariang Birhen bago siya isilang sa mundo, gaya ng inilarawan sa dogma ng Inmaculada Concepcion, mayroon pa rin siyang kalayaan upang magpasiya para sa kaniyang sarili. Kahit na ipinagkaloob sa kaniya ng Diyos ang pinakadakilang biyaya ng Kaniyang pagliligtas bago siya isilang sa mundo, si Maria pa rin mismo ang gagawa ng mga sarili niyang pasiya. 

Ang misyong inilaan ng Diyos para sa Mahal na Inang si Mariang Birhen ay inilarawan sa Unang Pagbasa. Katunayan, hindi ito ang unang pagkakataon sa Matandang Tipan kung saan inilarawan ng Diyos ang misyon ng Mahal na Birheng Maria bago pa man Niya ito ibigay sa Mahal na Birheng Maria. Una itong inihayag ng Diyos matapos ang pagsuway nina Adan at Eba sa Kaniyang utos na huwag kainin ang ipinagbabawal na bunga na nagbibigay ng kaalaman ukol sa kabutihan at kasamaan mula sa puno sa gitna ng Halamanan ng Eden. Bago isilang sa mundong ito, inihayag na ng Diyos ang magiging misyon ni Maria. Subalit, si Maria pa rin mismo ang magpapasiya kung ang tungkulin at misyong ito na ibinigay sa kaniya ng Diyos ay tatanggapin at tutuparin. 

Bagamat hindi lubusang maintindihan ng Birheng Maria kung bakit siya mismo ang itinalaga ng Diyos sa lahat ng mga babae sa mundo para sa napakabigat na tungkulin at misyong ito, ipinasiya pa rin niyang tanggapin at tuparin nang buong kababaang-loob at pananalig ang pananagutang ito. Sa Diyos niyang ipinasiyang ialay ang taos-puso niyang pananalig, pag-ibig, at pag-asa. Inihayag ito ni Maria sa pamamagitan ng kaniyang taos-pusong pagtanggap at pagtupad sa misyong ito na bigay sa kaniya ng Diyos. Pinahalagahan niya ang ginintuang pagkakataong ibinigay sa kaniya ng Diyos upang maipahayag ang taos-puso niyang pag-ibig, pag-asa, pananalig, at pagsamba sa Kaniya na Siyang tunay at walang hanggang dakilang Hari, gaya ng inilarawan ng mang-aawit sa Salmong Tugunan para sa araw na ito (Salmo 23, 7k at 10ab). 

Sabi ng Mahal na Birheng Maria sa Ebanghelyo: "Ako'y alipin ng Panginoon. Mangyari nawa sa akin ang iyong sinabi" (Lucas 1, 38). Sa pamamagitan nito, binigyan niya ng pahintulot ang tunay at walang hanggang dakilang Diyos at Hari na walang iba kundi ang Mahal na Poong Jesus Nazareno, ang ipinangakong Mesiyas at Manunubos, na dumating upang iligtas ang sangkatauhan. Sa pamamagitan nito, pinahintulutan ni Maria na gamitin siya ng Diyos bilang Kaniyang instrumento. Sa pamamagitan rin ng kaniyang pasiyang ito na sumasalamin sa kaniyang kababaang-loob, pag-asa, pag-ibig, pananalig, at pagsamba sa Diyos, ipinasiya ng Mahal na Ina na bigyan ng higit na luwalhati at pagdakila ang Kabanal-Banalang Ngalan ng Diyos. 

Ipinasiya ng Mahal na Birheng Maria na pahalagahan ang bihirang pagkakataong ito na ibinigay sa kaniya ng Diyos upang lalo pa niyang mabigyan ng higit na luwalhati ang Kabanal-Banalang Ngalan ng Panginoon. Dahil sa ginintuang sandaling ito, ang buhay ng Mahal na Inang si Mariang Birhen ay nagbago. Sa pamamagitan ng bukod-tanging tungkulin at misyong ibinigay Niya kay Maria, binago ng Diyos ang buhay ni Maria na naging bukas sa biyayang ito na Kaniyang kaloob. 

Nais ng Panginoong Diyos na baguhin ang ating buhay, katulad ng Kaniyang ginawa para sa Mahal na Birheng Maria. Upang maisagawa ng Diyos ang Kaniyang naising ito para sa atin, kailangan nating buksan ang ating mga sarili sa Kaniya, katulad ng ginawa ng Mahal na Birheng Maria. Ipinasiya ng Mahal na Birheng Maria na maging bukas sa pagbabagong ito na dulot ng Diyos dahil pinahalagahan niya ito nang labis. Ang biyayang ito ng Diyos ay atin rin bang pinahahalagahan?