KALIGTASANG BUNGA NG KANIYANG DAKILANG PAG-IBIG

6 Enero 2024 

Ika-6 ng Enero sa Panahon ng Pasko ng Pagsilang  

Ikapitong Araw ng Pagsisiyam sa Karangalan ng Nuestro Padre Jesus Nazareno 

1 Juan 5, 5-13/Salmo 147/Lucas 3, 23-28 (o kaya: 3,23. 31-34. 36. 38; o kaya: Marcos 1, 7-11) 

SCREENSHOT: #QuiapoChurch Official • PABIHIS SA POONG HESUS NAZARENO • December 27, 2023 (Wednesday) (Facebook and YouTube) 

Kapag ang Ikaanim na Araw ng Enero ay hindi tumapat sa araw ng Linggo, patuloy na tinatalakay at pinagninilayan ng Simbahan ang tunay na pagkakilanlan ng Banal na Sanggol na ipinanganak ng Mahal na Birheng Maria sa isang sabsaban sa Betlehem noong gabi ng unang Pasko. Layunin ng Simbahan na tulungan tayo sa pagpapalalim at paglago ng ating pagkilala sa Mahal na Poong Jesus Nazareno nang sa gayon ay maging tunay at tapat tayo sa ating pagpupuri, pamamanata, pagdedebosyon, pag-ibig, pananalig, at pagsamba sa Kaniya. Tinutulungan tayong maging mga tunay na deboto ng Poong Jesus Nazareno. 

Muling nakasentro sa misyon ng Poong Jesus Nazareno bilang ipinangakong Mesiyas at Manunubos ang mga Pagbasa. Sa Unang Pagbasa, nagbigay ng isang detalyadong buod si Apostol San Juan tungkol sa tagumpay ng Diyos. Ang Diyos ay nagkamit ng tagumpay sa pamamagitan ng Kaniyang Bugtong na Anak at Pangalawang Persona ng Banal na Santatlo na si Jesus Nazareno. Sa Ebanghelyo, inilahad ang bersyon ni San Lucas ng talaan ng angkang kinabilangan ng Mahal na Poong Jesus Nazareno. Isa lamang ang layunin ng paglalahad ng talaang ito. Layunin ng talaang ito na ilarawan kung gaano tayo iniibig ng Diyos. Dahil sa pag-ibig ng Diyos, ipinasiya Niyang maging bahagi ng isang angkan sa pamamagitan ng Nuestro Padre Jesus Nazareno. Ginawa Niya ito upang iligtas ang sangkatauhan. Ito ang tanging dahilan kung bakit isinilang sa isang sabsaban sa Betlehem noong gabi ng unang Pasko ang Banal na Sanggol na walang iba kundi ang ipinangakong Mesiyas at Manunubos na si Jesus Nazareno. 

Inilarawan sa Salmong Tugunan ang dapat gawin ng lahat bilang tugon sa pag-ibig ng Diyos. Ang nararapat na tugon sa pasiya ng Diyos na ipakita sa lahat ang Kaniyang pag-ibig ay mag-alay ng papuri, parangal, paggalang, at pagsamba sa Kaniya na may taos-pusong katapatan at pananalig sa Kaniya. Bagamat hindi tayo karapat-dapat na mahalin ng Panginoong Diyos dahil sa ating mga kasalanan na 'di mabilang, ipinasiya ng Diyos na ipakita sa lahat ang Kaniyang pagmamahal. Si Jesus Nazareno mismo ay ang pinakadakilang tanda ng dakilang pag-ibig na ito ng Diyos. Dumating ang Poong Jesus Nazareno upang iligtas tayo mula sa kasalanan at kamatayan dahil sa walang hanggang pag-ibig ng Diyos na tunay ngang dakila. 

Bilang mga deboto ng Mahal na Poong Jesus Nazareno, nararapat lamang na ihandog natin sa Kaniya ang tapat at dalisay nating pag-ibig, pamamanata, pagdedebosyon, parangal, paggalang, pananalig, at pagsamba sa Kaniya. Dahil sa dakilang pag-ibig ng Mahal na Poong Jesus Nazareno, tayong lahat ay Kaniyang iniligtas. Ang biyayang ito ay dapat nating pahalagahan sapagkat ito ay bunga ng pag-ibig Niyang dakila para sa lahat. Magagawa natin ito sa pamamagitan ng pagiging mga tapat na salamin at tagapagpalaganap ng Kaniyang biyaya, pag-ibig, habag, kagandahang-loob, at awa. 

NAGLIGTAS DAHIL TUNAY SIYANG UMIBIG

5 Enero 2024

Ika-5 ng Enero sa Panahon ng Pasko ng Pagsilang 

Ikaanim na Araw ng Pagsisiyam sa Karangalan ng Nuestro Padre Jesus Nazareno 

1 Juan 3, 11-21/Salmo 99/Juan 1, 43-51 

SCREENSHOT: #QuiapoChurch Official • Panunuluyan (Facebook and YouTube) 

Kapag hindi tumapat ang Ikalimang Araw ng Enero sa araw ng Linggo, ang Simbahan ay patuloy na tumatalakay at nagninilay-nilay sa tunay na pagkakilanlan ng Poong Jesus Nazareno, ang Banal na Sanggol na ipinanganak ng Mahal na Birheng Maria sa isang hamak na sabsaban sa Betlehem noong gabi ng unang Pasko. Ano nga ba'ng mayroon sa Banal na Sanggol na ito na si Jesus Nazareno na ipinanganak sa isang sabsaban na kulungan ng mga hayop sa Betlehem? Sa pamamagitan ng taimtim na pagninilay sa tanong na ito habang itinutuon ng Simbahan ang ating mga pansin sa tunay na pagkakilanlan ng Poong Jesus Nazareno, tinutulungan tayo ng Simbahan na lalo pang palalimin at palaguin ang ating pagkilala sa Poong Jesus Nazareno nang sa gayon ay lalo pang lumalim at lumago ang ating ugnayan sa Kaniya. 

"May nagmumula bang mabuti sa Nazaret?" (Juan 1, 46). Ito ang tanong ni Natanael na kilala rin ng marami bilang si Apostol San Bartolome kay Apostol San Felipe bago siya ipakilala sa Poong Jesus Nazareno sa Ebanghelyo. Natuklasan rin ni Natanael na hindi pangkaraniwan ang Nazarenong ipinakilala sa kaniya. Ang Nazarenong si Hesus ay ang Bugtong na Anak ng Diyos at ang ipinangakong Mesiyas at Hari ng tanan. Isa lamang ang Kaniyang pakay - iligtas ang sangkatauhan. Gaya ng sabi ni Apostol San Juan, dumating si Kristo sa mundo upang iligtas tayo (1 Juan 3, 16). Nahayag ang dakilang pag-ibig ng Diyos para sa tanan sa pamamagitan ng pasiyang ito ng Nuestro Padre Jesus Nazareno. Dahil sa Kaniyang pag-ibig para sa atin, ipinasiya Niya tayong iligtas mula sa kasalanan at kamatayan sa pamamagitan ng paghahain ng Kaniyang buong sarili para sa atin.

Ang mga salita sa Salmong Tugunan ay paanyaya para sa ating lahat na mag-alay ng taos-pusong papuri, pasasalamat, parangal, paggalang, at pagsamba sa Panginoong Diyos dahil sa mga 'di mabilang na kahanga-hangang bagay na Kaniyang ginawa para sa lahat. Katunayan, ang Salmong Tugunan ay isang maikli at detalyadong buod ng mga kahanga-hangang gawa ng Panginoon. Isinasalamin ng mga kahanga-hangang gawang ito ng Diyos ang Kaniyang dakilang tagumpay bilang Tagapagligtas (Salmo 97, 1k). Sa pamamagitan ng tagumpay na ito, ang Panginoong Diyos ay nagpakilala bilang Tagapagligtas ng tanan. Nang sumapit ang takdang panahon, dumating ang Poong Jesus Nazareno bilang pinakadakilang patunay ng katotohanang ito. 

Iniligtas tayo ng Poong Jesus Nazareno dahil tunay Niya tayong iniibig. Pahalagahan nawa natin ang pag-ibig na ito na ipinakita sa atin ng Panginoong Jesus Nazareno sa pamamagitan ng palagiang pagsisikap na mamuhay nang banal at kalugud-lugod sa Kaniyang paningin. Hindi natin dapat sayangin ang pagkakataong bunga ng dakilang tagumpay ng Mahal na Poong Jesus Nazareno na inihayag Niya sa Kaniyang pag-aalay ng buo Niyang sarili para sa atin. Bagkus, dapat natin itong pahalagahan bilang konkretong patunay ng ating tapat na debosyon sa Nuestro Padre Jesus Nazareno. Magagawa natin ito bilang mga tapat na deboto ng Mahal na Poong Jesus Nazareno sa pamamagitan ng tapat na pakikinig at pagsunod sa Kaniyang mga utos at loobin hanggang sa huling sandali ng ating pansamantalang buhay sa mundo. 

BUONG SARILI ANG KANIYANG BINUKSAN AT INIALAY

4 Enero 2024

Ika-4 ng Enero sa Panahon ng Pasko ng Pagsilang

Ikalimang Araw ng Pagsisiyam sa Karangalan ng Nuestro Padre Jesus Nazareno 

1 Juan 3, 7-10/Salmo 97/Juan 1, 35-42 

SCREENSHOT: #QuiapoChurch Official • 6AM #OnlineMass • 26 DEC. 2023 • Feast of #SaintStephen, First Martyr (Facebook and YouTube) 

Kapag ang Ikaapat na Araw ng Enero ay hindi tumapat sa araw ng Linggo, patuloy na itinutuon ng Simbahan ang ating mga pansin sa tunay na pagkakilanlan ng Banal na Sanggol na isinilang sa isang sabsaban sa Betlehem noong gabi ng unang Pasko. Ang mga katangian ng ipinangakong Mesiyas at Manunubos na si Jesus Nazareno ay lalo pang pinagtutuunan ng pansin ng Simbahan. Sa pamamagitan nito, inaanyayahan tayo ng Simbahan na lalo pa nating palaguin ang ating pagkilala sa Mahal na Poong Jesus Nazareno upang lalo pa natin Siyang tanggapin, mahalin, purihin, at sambahin nang may taos-pusong katapatan at pananalig sa Kaniya. 

Nakasetro ang mga Pagbasa sa pagiging bukas ng Poong Jesus Nazareno. Hindi Niya isinasara ang Kaniyang sarili sa atin. Bagkus, binubuksan Niya ang buo Niyang sarili sa atin. Isang pahiwatig nito ay ang Kaniyang pasiyang dumating sa mundong ito. Sa totoo lamang, hindi naman Niya kinailangang gawin iyon. Kahit na hindi naman Niya kailangang gawin iyon, ipinasiya pa rin Niya itong gawin dahil sa Kaniyang pag-ibig. Dahil sa Kaniyang pag-ibig para sa atin, ipinasiya Niyang buksan ang mga pintuan ng langit para sa atin sa pamamagitan ng pagdulot ng kaligtasan sa atin. Tayong lahat ay mayroon na'ng pagkakataong makapasok sa langit sapagkat ipinasiya ng Poong Jesus Nazareno na buksan at ialay ang buo Niyang sarili sa atin. 

Sa Ebanghelyo, pinaunlakan ng Poong Jesus Nazareno ang kahilingan ng dalawa sa mga tagasunod ni San Juan Bautista na malaman kung saan Siya nakatira. Iyon nga lamang, higit pa sa pagpapakita ng sarili Niyang bahay sa dalawang ito ang ginawa ng Panginoong Jesus Nazareno. Hindi Niya ipininid at itinago ang buo Niyang sarili sa dalawang alagad na ito, kahit na maaari nating sabihing noong sandali lamang Niya unang nakita ang dalawang alagad na ito. Bagkus, pinahintulutan ng Nuestro Padre Jesus Nazareno ang dalawang tagasunod na ito ng Kaniyang kamag-anak na maging bahagi ng Kaniyang buhay. Kung paanong binukas ng Nuestro Padre Jesus Nazareno ang Kaniyang buong sarili sa dalawang alagad na ito ni San Juan Bautista, binuksan rin ng Nuestro Padre Jesus Nazareno ang buo Niyang sarili sa atin at maging ang mga pintuan ng langit para sa atin. 

Inilarawan ni Apostol San Juan sa Unang Pagbasa kung ano ang dapat nating gawin bilang tugon sa pagbukas ng Poong Jesus Nazareno ng Kaniyang sarili sa atin. Dapat nating talikuran at iwasan ang kasalanan at mamuhay nang banal at kalugud-lugod sa paningin ng Diyos. Hindi natin dapat sayangin ang pagkakataong bigay sa atin ng Poong Jesus Nazareno upang maging banal. Sa pamamagitan ng pagbukas at pag-alay ng Kaniyang buong sarili sa atin, iniligtas tayo ng Poong Jesus Nazareno mula sa kasalanan at kamatayan. Binigyan tayo ng Poong Jesus Nazareno ng pagkakataong mamuhay nang banal at kalugud-lugod sa Kaniyang paningin sa pamamagitan rin ng gawang ito na tunay ngang dakila. Kaya naman, buksan rin natin ang ating mga sarili upang makapasok rin sa ating buhay ang Poong Jesus Nazareno. 

Ang mga kahanga-hangang gawa ng Diyos na naghahayag ng Kaniyang tagumpay ay muling pinatotohanan ng tampok na mang-aawit sa Salmong Tugunan. Sa Salmong Tugunan, ang Panginoong Diyos ay muling ipinakilala bilang Tagapagligtas. Binigyan rin ng maikling buod ang lahat ng mga kahanga-hangang gawa ng Panginoong Diyos sa Salmong Tugunan. Ito ay isang malinaw na pahiwatig ng pasiya ng mang-aawit na itinatampok sa Salmong Tugunan. Kusang-loob rin niyang buksan at inialay ang buo niyang sarili sa Diyos bilang Kaniyang instrumento. 

Hindi ipinagkait, itinago, at ikinubli ng Mahal na Poong Jesus Nazareno mula sa lahat ang buo Niyang sarili. Bagkus, binuksan at inialay Niya ito nang buong-buo dahil sa Kaniyang pag-ibig para sa atin. Kaya naman, ang nararapat na tugon sa ginawang ito ng Nuestro Padre Jesus Nazareno ay ang taos-pusong pagbukas at pag-alay ng mga buo nating sarili sa Kaniya. Sa pamamagitan nito, binubuksan natin ang ating mga sarili sa Kaniya at Kaniyang kalooban. Ito ang tugong magpapahayag ng taos-pusong pag-ibig, pananalig, katapatan, pagpaparangal, at pagsamba sa Kaniya. 

IBIG NIYA TAYONG ILIGTAS

3 Enero 2024

Ika-3 ng Enero sa Panahon ng Pasko ng Pagsilang 

Paggunita sa Kabanal-Banalang Ngalan ng Ating Panginoong Jesus Nazareno 

Ikaapat na Araw ng Pagsisiyam sa Karangalan ng Nuestro Padre Jesus Nazareno 

1 Juan 2, 29-3, 6/Salmo 97/Juan 1, 29-34 

SCREENSHOT: #QuiapoChurch Official • 5AM #MassAtDawn • 25 December 2023 • THE NATIVITY OF THE LORD #Christmas (Facebook and YouTube)

Kapag ang ikatlong araw ng Enero ay hindi tumapat sa araw ng Linggo, ang ikatlong araw ng Enero ay inilaan ng Simbahan para sa pagdiriwang ng Paggunita sa Kabanal-Banalang Ngalan ng Panginoon, ang Nuestro Padre Jesus Nazareno. Sa araw na ito, inaanyayahan tayo ng Simbahan na pagnilayan ang dahilan kung bakit ang Poong Jesus Nazareno ay nagpasiyang dumating sa mundong ito. Habang pinararangalan at sinasamba natin nang buong kataimtiman ang Kaniyang Kabanal-Banalang Ngalan, marapat lamang na pagnilayan natin ang dahilan kung bakit Siya naparito sa mundo. 

Ang ibig sabihin ng Pangalang "Hesus" ay "Ang Diyos ay nagliligtas." Ito rin ang ibig pagtuunan ng pansin ng isang sagisag ni Kristo na tinatawag na Christogram na IHS na nangangahulugang "Iesus, Hominem Salvator." Sa Tagalog, "Hesus, Manunubos ng Sangkatauhan." Napakalinaw na isinasalungguhit ng Kabanal-Banalang Ngalan ang misyon ng Nuestro Padre Jesus Nazareno bilang ipinangakong Mesiyas. Pagsapit ng takdang panahon, ang Mahal na Poong Jesus Nazareno ay dumating sa mundong ito upang iligtas ang sangkatauhan. Niloob ng Diyos na dumating Siya sa mundo bilang ipinangakong Mesiyas at Manunubos. Katunayan, Siya mismo ay ang pinakadakilang biyayang ipinagkaloob ng Diyos sa sangkatauhan. 

Isa lamang ang naging pakay ng Poong Jesus Nazareno noong una Siyang dumating sa mundo bilang ipinangakong Mesiyas at Tagapagligtas. Dumating sa mundong ito ang Poong Jesus Nazareno upang iligtas ang sangkatauhan, gaya ng isinasalungguhit ng kahulugan ng Kaniyang Kabanal-Banalang Ngalan. Kaya naman, ang Panginoong Jesus Nazareno ay ipinakilala ng kamag-anak Niyang si San Juan Bautista sa lahat ng mga nakikinig sa kaniya bilang Kordero ng Diyos (Juan 1, 29). Bukod sa pagpapakilala kay Jesus Nazareno bilang Kordero ng Diyos, inilarawan rin ni San Juan Bautista kung paano siya nakakatiyak na si Jesus Nazareno nga talaga ay ang Kordero ng Diyos at ang ipinangakong Mesiyas. Sabi ni San Juan Bautista na tinulungan siya ng Diyos na makilala kung sino ang tunay na Mesiyas at Manunubos - at si Jesus Nazareno iyon (Juan 1, 31-34). Ang biyaya ng pagliligtas ng Diyos ay dumating sa pamamagitan ng ipinangakong Mesiyas at Manunubos na walang iba kundi ang Nuestro Padre Jesus Nazareno, ang Kaniyang Bugtong na Anak.

Sa Salmong Tugunan, ang mang-aawit ay nagpatotoo tungkol sa dakilang biyaya ng pagliligtas ng Diyos. Nahayag sa pamamagitan ng pagliligtas ng Diyos ang Kaniyang tagumpay. Ang mga salitang binigkas ng mang-aawit sa Salmo ay tinupad ng Diyos noong sumapit ang takdang panahon sa pamamagitan ng ipinangakong Mesiyas at Manunubos na si Jesus Nazareno. 

Nakasentro sa pananatili sa Poong Jesus Nazareno ang pangaral ni Apostol San Juan sa Ikalawang Pagbasa. Isinalungguhit ni Apostol San Juan ang halaga ng pananatiling tapat kay Kristo sa pangaral na ito. Para kay Apostol San Juan, ito ang pinakadalisay na paraan ng pagbibigay ng papuri, parangal, paggalang, at pagsamba sa Mahal na Poong Jesus Nazareno. Katunayan, ito ang magiging patunay na tunay at taos-puso ang ating pag-aalay ng papuri, pasasalamat, parangal, at paggalang sa Kaniya. Hindi sapat na sabihing "Ako'y deboto ng Mahal na Poong Jesus Nazareno." Bagkus, dapat isabuhay rin natin araw-araw ang ating debosyon at pamamanata sa Nuestro Padre Jesus Nazareno. Dapat tayong mamuhay ayon sa Kaniyang mga utos at loobin. Ang kalooban ng Panginoong Diyos para sa atin ay dapat nating tanggapin at tuparin. Sa pamamagitan nito, mapapatunayan nating tunay at autentiko ang ating debosyon sa Mahal na Poong Jesus Nazareno. 

Dumating sa mundong ito ang Mahal na Poong Jesus Nazareno sapagkat ibig Niya tayong iligtas. Ang kahulugan ng Kaniyang Pangalan ay isang pahiwatig nito. Bilang mga deboto ng Poong Jesus Nazareno, dapat nating purihin, parangalan, igalang, at sambahin ang Kaniyang Kabanal-Banalang Ngalan. Sa pamamagitan ng pamumuhay ayon sa Kaniyang mga utos at loobin nang buong pananalig at katapatan hanggang wakas, maiaalay natin sa Mahal na Poong Jesus Nazareno ang ating tapat at taos-pusong papuri, parangal, paggalang, at pagsamba.

KILALANIN ANG TUNAY NA UMIIBIG

2 Enero 2024 

Paggunita sa Dakilang San Basilio at San Gregorio Nasianseno, mga Obispo at pantas ng Simbahan 

Ikatlong Araw ng Pagsisiyam sa Karangalan ng Nuestro Padre Jesus Nazareno 

1 Juan 2, 22-28/Salmo 97/Juan 1, 19-28 

SCREENSHOT: #QuiapoChurch Official • PABIHIS sa Poong Hesus Nazareno • Dec 14, 2023 (Thursday) (Facebook and YouTube) 

Kapag hindi tumapat sa araw ng Linggo ang ikalawang araw ng Enero, nakasentro sa tunay na pagkilala sa Poong Jesus Nazareno ang mga Pagbasa. Ipinapahayag natin sa pamamagitan ng ating tunay na pagkilala sa Mahal na Poong Jesus Nazareno ang ating taos-pusong pag-ibig, pananalig, at pagsamba sa Kaniya. Ang mga nananalig, umiibig, at sumasamba sa Kaniya nang taos-puso at nang buong katapatan ay yaong mga kumikilala sa Kaniya bilang tunay na Panginoon, Diyos, Manunubos, at Hari. Sa pamamagitan nito, magkakaroon ng paglago ang ating pamamanata, debosyon, at ugnayan sa Nuestro Padre Jesus Nazareno.

Sa Unang Pagbasa, inilarawan ni Apostol San Juan kung sino ang mga tunay at taos-pusong nananalig, umiibig, at sumasamba sa Diyos. Ang mga kumikilala kay Kristo, ang Mahal na Poong Jesus Nazareno, ay nananalig, umiibig, at sumasamba sa Diyos nang may taos-pusong katapatan hanggang sa huli. Ipinapahayag ng mga kumikilala kay Jesus Nazareno bilang ipinangakong Mesiyas at Manunubos na ipinagkaloob ng Diyos sa lahat ang kanilang pagtanggap sa Diyos na bukal ng lahat ng mga biyaya. Sa pamamagitan nito, binubuksan nila ang kanilang mga sarili sa Kaniya. Pinatotohanan ng mang-aawit sa Salmong Tugunan ang tagumpay ng pagliligtas ng Diyos. Ang mga salita ng mang-aawit sa Salmong Tugunan ay mga salitang nagpapakilala sa Diyos bilang ipinangakong Manunubos. Inilarawan ng tampok na mang-aawit sa Salmong Tugunan ang dahilan kung bakit dapat nating kilalanin at tanggapin ang Diyos nang buong katapatan at nang taos-puso,. Sa Ebanghelyo, buong lakas na inihayag ni San Juan Bautista sa mga tao ang katotohanan tungkol sa kaniyang pagkakilanlan. Kahit mayroon naman siyang pagkakataong angkinin mula sa tunay na Mesiyas na walang iba kundi ang Panginoong Jesus Nazareno na kaniyang kamag-anak ang Kaniyang pagkakilanlan, hindi ito ginawa ni San Juan Bautista. Bagkus, buong kababaang-loob na nagpakatotoo si San Juan Bautista sa mga tao at inaming hindi siya ang Mesiyas kundi ang tagapaghanda lamang ng Kaniyang daraanan. Sa pamamagitan nito, buong linaw na ipinahayag ni San Juan Bautista ang kaniyang taos-pusong pagtanggap at pagkilala sa Poong Jesus Nazareno bilang ipinangakong Mesiyas at Manunubos. 

Itinuturo sa atin ng Simbahan sa araw na ito kung ano ang dapat nating gawin bilang mga deboto at namamanata sa Panginoong nagpakasakit para sa atin sa ilalim ng Kaniyang titulong Nuestro Padre Jesus Nazareno. Dapat nating kilalanin at tanggapin nang buong katapatan at nang taos-puso ang Mahal na Poong Jesus Nazareno. Ang ating taimtim na debosyon at pamamanata sa Panginoong Jesus Nazareno ay dapat maging daan pagtungo sa taos-pusong pagkilala at pagtanggap sa Kaniya. 

Hindi dapat tumigil sa pagpunta sa Simbahan ng Quiapo araw-araw, lalung-lalo na tuwing araw ng Biyernes, upang manalangin, magsimba, at maglakad nang paluhod ang taimtim na debosyon at pamamanata sa Mahal na Poong Jesus Nazareno. Dapat lumago ito at maging daan patungo sa pagkilala at pagtanggap sa Kaniya nang taos-puso. Ito ay dahil binubuksan ng mga tunay na kumikilala at tumatanggap sa Poong Jesus Nazareno ang kanilang mga sarili sa Kaniya na Siyang tunay na umiibig sa atin nang buong katapatan. 

Ang mga tunay na kumikilala at tumatanggap sa Mahal na Poong Jesus Nazareno ay kumikilala at tumatanggap sa tunay na umiibig. Kinikilala at pinapahalaga nila nang buong puso at nang buong katapatan ang dakilang pag-ibig ng Diyos. Dahil dito, ang misyong ibinigay sa kanila ng Diyos ay taos-puso nilang tinutupad at sinusunod. 

SAGISAG NG KANIYANG TAPAT NA PAG-IBIG PARA SA ATIN

1 Enero 2024 

Dakilang Kapistahan ni Maria, Ina ng Diyos 

Ikawalong Araw ng Pagdiriwang ng Pasko ng Pagsilang 

Pandaigdigang Araw ng Pananalangin para sa Kapayapaan 

Ikalawang Araw ng Pagsisiyam sa Karangalan ng Nuestro Padre Jesus Nazareno 

Bilang 6, 22-27/Salmo 66/Galacia 4, 4-7/Lucas 2, 16-21 

This faithful photographic reproduction of the painting (c. 16th century) The Adoration of the Shepherds by Bernardo Castello (1557–1629), as well as the actual work of art itself from the National Galleries Scotland via Art UK, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1629. This work of art is also in the Public Domain in the United States because it was published (or registered with the U.S. Copyright Office) before January 1, 1928. 

Tuwing sasapit ang Bagong Taon sa sekular na kalendaryo, madalas na itinatampok at binibigyan ng pansin ang mga pamahiin at pampasuwerte. Mayroong mga dapat gawin ang isang tao upang maging masuwerte sa darating na taon gaya na lamang ng pagsusuot ng damit na mayroong partikular na disenyo - pula o kaya naman may mga polka dots - at pagbili ng mga bilog na prutas. Kamalasan ang sasapitin ng mga hindi susunod sa mga ito. Dahil dito, ipinapasiya ng marami na gawin ito. Ang mga pampasuwerte ay mga susi at daan sa magandang buhay para sa marami. Ito ang dahilan kung bakit labis nilang pinahahalagahan ang mga pampasuwerte. 

Ang unang araw ng Bagong Taon sa sekular na kalendaryo ay inilaan ng Simbahan para sa pagdiriwang ng Dakilang Kapistahan ni Maria, Ina ng Diyos. Sa pagdiriwang ng Dakilang Kapistahang ito, ang ating mga pansin ay itinutuon ng Santa Iglesia sa dapat nating pahalagahan. Hindi natin dapat pahalagahan ang mga pampasuwerte at mga pamahiin. Bagkus, ang dapat nating pahalagahan ay ang biyaya ng Diyos. 

Sa biyaya ng Panginoong Diyos nakasentro ang mga Pagbasa para sa araw na ito na inilaan ng Simbahan para sa Dakilang Kapistahan ni Maria, Ina ng Diyos. Ipinapaalala ng Simbahan sa atin sa araw na ito kung bakit ang biyaya ng Diyos ay dapat nating pahalagahan. Ang biyaya ng Panginoong Diyos ay hindi lamang sagisag, larawan, at tanda ng Kaniyang kapangyarihan bilang tunay na Diyos. Bagkus, sinasagisag rin ng mga biyayang nagmumula sa Diyos ang Kaniyang tapat at dakilang pag-ibig para sa atin na hindi magmamaliw kailanman. 

Nakasentro sa biyaya ng Diyos ang mga salita sa rito ng pagbabasbas sa mga tao na inilahad sa Unang Pagbasa. Katunayan, ang mga salitang ito sa rito ng pagbabasbas sa mga tao ay nagmula mismo sa Diyos. Iniutos ng Panginoong Diyos kay Moises na gamitin ng mga saserdote na pinangungunahan ni Aaron ang mga salitang ito sa tuwing babasbasan nila ang mga tao. Sa pamamagitan ng mga salitang ito, ang Diyos ay nagpakilala ng Kaniyang sarili bilang bukal ng biyaya. Ang mga salitang binigkas ng mang-aawit sa Salmong Tugunan ay mga salitang nagpapatotoo sa kaluwalhatian ng biyaya ng Diyos na sumasalamin sa dakila Niyang habag at pag-ibig para sa atin. Sa pinakadakilang biyayang ipinagkaloob ng Diyos sa sangkatauhan na walang iba kundi ang Nuestro Padre Jesus Nazareno nakasentro ang pangaral ni Apostol San Pablo sa Ikalawang Pagbasa. Buong linaw na inilarawan ni Apostol San Pablo ang natatanging dahilan kung bakit ang pinakadakilang biyayang ipinagkaloob ng Diyos ay walang iba kundi ang ipinangakong Mesiyas at Manunubos na si Jesus Nazareno. Ang Mahal na Poong Jesus Nazareno ay dumating sa mundong ito upang iligtas ang sangkatauhan mula sa mga puwersa ng kasalanan at kamatayan. Dumating sa daigdig na ito ang biyaya ng pagliligtas ng Diyos sa pamamagitan ng Poong Jesus Nazareno, ang Banal na Sanggol na isinilang ng Mahal na Birheng Maria sa isang sabsaban noong gabi ng unang Pasko. Sa Ebanghelyo, ang mga pastol ay nagsintungo sa Betlehem upang ang Banal na Sanggol na si Jesus Nazareno ay kanilang madalaw at handugan ng papuri, parangal, paggalang, at pagsamba. Inihayag ng mga pastol sa Banal na Sanggol ang kanilang taos-pusong pagpapahalaga sa Kaniya na kaloob ng Diyos sa lahat. 

Dumating ang Poong Jesus Nazareno upang ipahayag sa atin ang Kaniyang pag-ibig at habag na nagdudulot ng kaligtasan. Subalit, bakit nga ba nating tinatanggihan ang biyayang ito ng Mahal na Poong Jesus Nazareno? Ang biyayang ito ay tinatanggihan natin sa tuwing ipinapasiya nating umasa sa mga pamahiin at pampasuwerte. Hindi pinapansin at hindi pinahahalagahan ng nakararami ang pagusyo ng Mahal na Poong Jesus Nazareno sa pamamagitan ng pagpapahalaga sa mga pampasuwerte. Bakit ba mas madali para sa nakararami na pahalagahan ang mga pampasuwerte at pamahiin kaysa pahalagahan ang biyaya ng Poong Jesus Nazareno? 

Kahit hindi tayo karapat-dapat dahil sa ating mga kasalanan, inibig at ipinasiya pa rin ng Poong Jesus Nazareno na ipagkaloob sa atin ang Kaniyang biyaya. Hindi natin ito dapat balewalain. Bagkus, dapat natin itong pahalagahan. Ito ay dahil sinasagisag ng biyaya ng Poong Jesus Nazareno ang Kaniyang tapat na pag-ibig para sa atin na hindi magmamaliw kailanman. 

Ipinapaalala sa atin ng Simbahan sa araw na ito kung ano ang dapat pahalagahan ng bawat isa sa atin bilang Simbahan. Hindi natin dapat pahalagahan ang mga pamahiin at pampasuwerte. Bagkus, ang dapat nating pahalagahan ay ang biyaya ng Diyos. Sa pamamagitan ng pagpapahalaga natin sa biyaya ng Panginoong Diyos, ipinapahayag natin ang ating pagpapahalaga sa tapat Niyang pag-ibig para sa atin. Ang biyaya ng Diyos ay hindi lamang sagisag ng Kaniyang kapangyarihan. Tanda rin ito ng Kaniyang tapat na pag-ibig para sa atin. 

Mapagpalang Bagong Taon sa lahat!

PAG-IBIG PARA SA POONG JESUS NAZARENO

31 Disyembre 2023 

Kapistahan ng Banal na Mag-Anak Hesus, Maria, at Jose [B] 

Unang Araw ng Pagsisiyam sa Karangalan ng Nuestro Padre Jesus Nazareno 

Genesis 15, 1-6; 21, 1-3 (o kaya: Sirak 3, 3-7. 14-17 - gr. 2-6. 12-14)/Salmo 104 (o kaya: Salmo 127)/Hebreo 11, 8. 11-12. 17-19 (o kaya: Colosas 3, 12-21)/Lucas 2, 22-40 (o kaya: 2, 22. 39-40) 

This faithful photographic reproduction of the painting (c. 1516) Presentation of Christ in the Temple by Fra Bartolomeo (1472–1517), as well as the original work of art itself from the Kunsthistorisches Museum in Vienna, Austria, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age.

"Hesus, iniibig Kita." Ito ang mga salitang binigkas ng yumaong dating Santo Papa na si Papa Benito XVI. Sa mga huling sandali ng kaniyang buhay dito sa mundo bago siya pumanaw, inihayag ni Papa Benito XVI ang kaniyang tapat na pag-ibig para sa Poong Jesus Nazareno. Ang mga salitang ito ay isang pahiwatig na hindi nagsawa kailanman ang yumaong si Papa Benito XVI sa pagpapahayag ng kaniyang tapat na pag-ibig sa Mahal na Poong Jesus Nazareno. Laging nakasentro sa Poong Jesus Nazareno ang kaniyang puso at isipan. Isa itong pahiwatig na hindi siya nagsawa sa pagsasalita sa lahat tungkol sa Mahal na Poong Jesus Nazareno. Nakasentro kay Kristo ang buong buhay ni Papa Benito XVI hanggang sa kaniyang huling hininga. 

Kapag hindi tumapat sa araw ng Linggo ang Pasko ng Pagsilang at Bagong Taon, ang araw ng Linggo sa Oktaba o Walong Araw na Pagdiriwang ng Pasko ng Pagsilang ay inilaan ng Inang Simbahan para sa pagdiriwang ng Kapistahan ng Banal na Mag-Anak Hesus, Maria, at Jose. Sa araw na ito, tayong lahat ay pinaalalahanan ng Simbahan na naging bahagi ng isang pamilya ang Nuestro Padre Jesus Nazareno. Hindi dumating sa isang iglap lamang ang Panginoong Jesus Nazareno, kahit mayroon naman Siyang kapangyarihang gawin iyon. Ipinasiya ng Mahal na Poong Jesus Nazareno na maging bahagi ng isang pamilya na walang iba kundi ang Banal na Pamilya ng Nazaret. Ang pasiyang ito ay salamin ng Kaniyang pag-ibig para sa atin. Naging katulad natin ang ipinangakong Mesiyas at Manunubos na si Jesus Nazareno sa lahat ng bagay bilang tao, maliban na lamang sa kasalanan (Hebreo 4, 15). Sa pamamagitan nito, inihayag nang buong linaw ng Poong Jesus Nazareno ang Kaniyang intensyon at hangarin. Ang hangarin, layunin, at intensyon ni Jesus Nazareno ay mapalapit sa atin. 

Ang mga Pagbasa para sa Linggong ito ay nakasentro sa katapatan ng Diyos sa mga pangakong binitiwan. Pinatunayan ng lahat ng mga kahanga-hangang gawa ng Diyos na hindi Siya nakakalimot ng mga pangakong binitiwan. Dahil sa Kaniyang pag-ibig, tinutupad ng Diyos ang Kaniyang mga pangako. Kahit hindi naging tapat sa Kaniya sa lahat ng oras ang tao, ipinasiya pa rin Niyang maging tapat. Ito ang dahilan kung bakit bahagi ng Banal na Pamilya ng Nazaret ang Nuestro Padre Jesus Nazareno. Bagamat Siya ang Pangalawang Persona ng Banal na Santatlo, ipinasiya pa rin ng Senor na maging bahagi ng isang pamilya kasama si San Jose at ang Birheng Maria. 

Sa Unang Pagbasa, ipinangako ng Diyos si Abraham na noo'y tinawag na Abram na magkakaroon siya ng isang anak. Isang lahi ang magmumula sa kaniya. Tinupad ng Diyos ang pangakong ito kay Abraham sa pamamagitan ni Isaac. Nakasentro rin ang pangaral sa Ikalawang Pagbasa sa pananalig ni Abraham. Bagamat ang pangakong ito ay napakahirap unawain nang lubusan, ipinasiya pa rin ni Abraham na ialay ang kaniyang buong puso at sarili sa Diyos nang may tapat at taos-pusong pananalig. Sa Ebanghelyo, buong lakas at pananalig sa Diyos na inihayag ni Simeon noong kinalong niya ang Banal na Sanggol na si Jesus Nazareno na tinupad ng Diyos ang Kaniyang binitiwang pangako sa Lumang Tipan sa pamamagitan ng Banal na Sanggol na ito. 

Dahil hindi magmamaliw kailanman ang katapatan ng Diyos, inaanyayahan ng mang-aawit sa Salmong Tugunan ang lahat na purihin sa pag-awit ang Diyos nang buong galak. Napakalinaw na itinuturo ng mang-aawit sa Salmong Tugunan na tayo'y hindi bibiguin ng Panginoong Diyos kailanman. Ang Panginoong Diyos lamang ang tangi nating maaasahan at mapagkakatiwalaan. Kaya, marapat lamang na handugan natin Siya ng tapat na pag-ibig, pananalig, at pagsamba. 

Muli tayong pinaaalalahanan ng Simbahan sa Linggong ito na hindi magmamaliw ang katapatan ng Diyos. Kahit na hindi tayo naging tapat sa Kaniya nang paulit-ulit gawa ng ating pagiging mga makasalanan, ipinasiya pa rin Niyang maging tapat sa atin. Si Jesus Nazareno ay ang pinakadakilang larawan at sagisag nito. Dahil sa tapat na pag-ibig para sa atin, sa kabila ng Kaniyang pagiging tunay na Diyos, ipinasiya pa rin ng Poong Jesus Nazareno na maging bahagi ng Banal na Pamilya sa Nazaret. 

Tunay ngang walang maliw ang pag-ibig at katapatan ng Poong Jesus Nazareno para sa atin. Kaya naman, nararapat lamang na handugan rin natin ang Mahal na Poong Jesus Nazareno ng tapat at dalisay na pag-ibig, pananalig, at pagsamba sa Kaniya. Sa pamamagitan ng tapat na pananalig at pagsunod sa Kaniyang mga utos at loobin, inihahayag natin ang ating tapat na pag-ibig at pagsamba sa Kaniya.