DAKILAIN ANG SALITANG NAGKATAWANG-TAO

25 Disyembre 2025 

Dakilang Kapistahan ng Pasko ng Pagsilang ng Panginoon 

[Pagmimisa sa Araw] 

Isaias 52, 7-10/Salmo 97/Hebreo 1, 1-6/Juan 1, 1-18 (o kaya: 1, 1-5. 9-14) 

Larawan: Anonymous (German), Christi Geburt mit Anbetung der Hirten und Engel (c. 17th century). Hampel Auctions. Public Domain.

Tuwing sasapit ang taunang maringal na pagdiriwang ng Kapaskuhan na buong galak at ligayang idinadaos tuwing sasapit ang ika-25 araw ng Disyembre, ang ating mga pansin ay itinutuon sa dakilang misteryo ng pagkakatawang-tao ng Mahal na Poong Jesus Nazareno. Sa pamamagitan ng Mahal na Poong Jesus Nazareno, ang Diyos ay dumating sa daigdig upang iligtas ang sangkatauhan. Kahit na hindi naman Niya ito kailangang gawin, ipinasiya pa rin ng Diyos na gawin ito. 

Buong linaw na inihayag sa Unang Pagbasa na idudulot ng Diyos ang dakilang biyaya ng Kaniyang pagliligtas. Ang biyaya ng kaligtasan ay magmumula lamang sa Kataas-taasang Diyos ng mga Hukbo. Ipinaliwanag ng manunulat sa Sulat sa mga Hebreo sa kaniyang pangaral na inilahad at itinampok sa Ikalawang Pagbasa na naisakatuparan ang mga pahayag tungkol sa pagdulot ng Diyos ng biyaya ng Kaniyang pagliligtas sa Lumang Tipan, gaya na lamang ng pahayag sa Unang Pagbasa, sa pamamagitan ng ipinangakong Mesiyas at Tagapagligtas na walang iba kundi ang Bugtong na Anak ng Diyos na si Jesus Nazareno. Tinupad ni Jesus Nazareno ang mga pahayag tungkol sa pagligtas ng Diyos sa tanan na ibinahagi sa Lumang Tipan. Sa Ebanghelyo, ipinakilala si Jesus Nazareno bilang Salita ng Diyos na nagkatawang-tao. Nang dumating Siya sa mundo, natupad ang mga salita ng mang-aawit sa Salmong Tugunan. Naipamalas ni Jesus Nazareno ang kahanga-hangang tagumpay ng Diyos (Salmo 96, 3k). Dahil may habag, awa, kagandahang-loob, at pag-ibig ang Diyos, niloob Niyang mangyari ito. 

Ang Salita ng Diyos na nagkatawang-tao noong gabi ng unang Pasko na walang iba kundi ang Poong Jesus Nazareno ay dapat nating dakilain. Ipinamalas Niya sa atin sa pamamagitan ng Kaniyang pagdating sa lupa bilang Banal na Sanggol na isinilang ng Mahal na Birheng Maria sa isang hamak na sabsaban sa lungsod ng Betlehem noong gabi ng unang Pasko ang Kaniyang kabutihan. Mayroong Pasko dahil sa Kaniya. 

ANG KADAKILAAN NG DIYOS NA NAGLILIGTAS

25 Disyembre 2025 

Dakilang Kapistahan ng Pasko ng Pagsilang ng Panginoon 

[Pagmimisa sa Bukang-Liwayway] 

Isaias 62, 11-12/Salmo 96/Tito 3, 4-7/Lucas 2, 15-20 

Larawan: Francesco Frigimelica il vecchio (1570–1649), Nativity (c. 17th century). Santo Stefano (Belluno). Public Domain.

Nakasentro sa tanging dahilan kung bakit ang Banal na Sanggol na si Jesus Nazareno ay isinilang ng Mahal na Birheng Maria sa isang sabsaban sa Betlehem noong gabi ng unang Pasko ang mga Pagbasa para sa solemneng pagdiriwang ng Banal na Misa sa Bukang-Liwayway ng Pasko ng Pagsilang ng Panginoon. Bagamat ang mga Pagbasa para sa mga Misa na idinadaos sa nasabing oras ng nasabing Dakilang Kapistahan ay napakaikli kung ang mga Pagbasang ito ay ikukumpara sa haba ng mga Pagbasa para sa mga Misa na idinadaos sa ibang mga oras ng nasabing Dakilang Kapistahan, hindi ito nangangahulugang walang maitutulong ang mga nasabing Pagbasa para sa mga pagdiriwang ng Banal na Misa na isinasagawa sa nasabing oras ng nasabing Dakilang Kapistahan sa pagpapalalim ng ating taimtim na pagninilay sa dakilang misteryo na itinatampok sa tuwing ang nasabing Dakilang Kapistahan ay sasapit. Alang-alang sa ating lahat, ang Diyos ay nagakatawang-tao sa pamamagitan ni Jesus Nazareno. 

Buong linaw na ipinahayag sa mga Pagbasa na isinilang ang Poong Jesus Nazareno sa isang hamak na sabsaban sa Betlehem noong gabi ng unang Pasko upang iligtas ang sangkatauhan. Ang ating mga pansin ay itinutuon ng mga Pagbasa sa Kaniyang misyon at tungkulin bilang ipinangakong Mesiyas at Manunubos. Sa pamamagitan ng pagdating ng Poong Jesus Nazareno bilang ipinangakong Mesiyas at Manunubos na nagmula sa langit, ang kadakilaan ng Diyos ay nahayag sa lahat. 

Ang pangako ng Diyos ay inilahad ni Propeta Isaias sa Unang Pagbasa. Buong linaw na ipinahayag ng Diyos sa  pamamagitan ni Propeta Isaias na ipagkakaloob Niya sa Kaniyang bayan na walang iba kundi ang Israel ang biyaya ng Kaniyang pagliligtas sa panahong itinakda Niya. Ipinaliwanag ni Apostol San Pablo sa Ikalawang Pagbasa ang dahilan kung bakit ipinasiya ng Diyos na gawin ito. Dahil sa Kaniyang habag para sa sangkatauhan, ipinasiya ng Diyos na ipagkaloob sa Kaniyang bayan. Noong gabi ng unang Pasko, ang biyayang ito ay dumating sa pamamagitan ng Banal na Sanggol na walang iba kundi ang Panginoong Jesus Nazareno. Sa Ebanghelyo, ang mga pastol ay tumungo sa Betlehem upang dakilain at sambahin ang Banal na Sanggol. 

Inihayag ng Diyos ang Kaniyang kadakilaan sa pamamagitan ng Banal na Sanggol na si Jesus Nazareno. Sa pamamagitan ng Banal na Sanggol na si Jesus Nazareno, ang dakilang biyaya ng pagliligtas ng Diyos ay dumating sa lupa. Ginawa Niya ito dahil sa Kaniyang pag-ibig, kagandahang-loob, habag, at awa para sa ating lahat. Dahil diyan, bilang tugon, buong galak natin Siyang dakilain at sambahin. 

HATID NG ATING DINARAKILA: PAG-IBIG, TUWA, PAG-ASA

25 Disyembre 2025 

Dakilang Kapistahan ng Pasko ng Pagsilang ng Panginoon 

[Pagmimisa sa Hatinggabi] 

Isaias 9, 1-6/Salmo 95/Tito 2, 11-14/Lucas 2, 1-14 

Larawan: Juan de Flandes (1450–1519), La Natividad (c. 1508-1519). Samuel H. Kress Collection of the National Gallery of Art. Public Domain.  

"Sa ati'y sumilang ngayon, Manunubos, Kristong Poon" (Lucas 2, 11). Ito ang balitang inihatid ng anghel ng Panginoon na nagpakita sa mga pastol na nagbabantay ng mga tupa sa parang noong gabi ng unang Pasko. Nakatuon sa mga salitang ito na binigkas nang buong linaw ng anghel ng Panginoon sa mga pastol sa parang noong gabi ng unang Pasko ang maringal na pagdiriwang ng Kapaskuhan. Ang Diyos ay pumarito sa lupa upang ang sangkatauhang nalugmok sa kasalanan ay iligtas sa pamamagitan ng Banal na Sanggol na isinilang ng Mahal na Birheng Maria na si Jesus Nazareno. Dahil kusang-loob na ipinasiya ng Diyos na tubusin ang sangkatauhan sa pamamagitan ng Mesiyas at Manunubos na ipinangako na si Jesus Nazareno, mayroong Pasko. 

Habang ipinagdiriwang natin nang buong galak at tuwa bilang isang sambayanan ang maringal na pagdiriwang ng Kapaskuhan, inaanyayahan tayo ng Simbahan na buong kataimtimang pagnilayan ang misteryo ng pagkakatawang-tao ni Jesus Nazareno. Sa pamamagitan ng pagsilang ni Jesus Nazareno, ang pinakadakilang biyaya ng Diyos ay dumating sa daigdig. Ito ang biyaya ng Kaniyang pagliligtas. Ang bunga ng dakilang biyayang ito ay pag-ibig, tuwa, at pag-asa. 

Buong linaw na inihayag sa Unang Pagbasa na isang sanggol na lalaki ang isisilang sa takdang panahon. Ang nasabing sanggol ay isisilang para sa lahat ng tao. Inihayag ni Apostol San Pablo sa Ikalawang Pagbasa na nahayag sa lahat ang kagandahang-loob ng Kataas-taasang Diyos ng mga Hukbo sa pamamagitan ng sanggol na ito na buong linaw na ipinakilala sa pahayag ni Propeta Isaias na itinampok at inilahad sa Unang Pagbasa. Katunayan, ipinakilala ni Apostol San Pablo sa kaniyang pangaral na ito na inilahad sa Ikalawang Pagbasa kung sino nga ba ang sanggol na lalaki sa propesiya sa Unang Pagbasa - ang Poong Jesus Nazareno. 

Ang salaysay ng pagsilang ng Poong Jesus Nazareno noong gabi ng unang Pasko ay itinampok at inilahad sa Ebanghelyo. Sa pamamagitan nito, buong linaw na nahayag sa lahat ng tao ang kadakilaan ng Diyos na sumasalamin sa Kaniyang kagandahang-loob. Dahil sa Kaniyang kagandahang-loob, idinulot ng Diyos ang tunay na pag-ibig, tuwa, at pag-asa sa pamamagitan ng pagkakaloob ng biyaya ng Kaniyang pagliligtas na dumating sa daigdig noong sumapit ang takdang panahon, ang banal at dakilang gabi ng unang Pasko, sa pamamagitan ng Banal na Sanggol na walang iba kundi ang Poong Jesus Nazareno na isinilang ng Mahal na Birheng Maria. 

Isang paanyaya para sa ating lahat ay inilahad sa Salmong Tugunan. Buong galak at tuwang inaanyayahan ng mang-aawit sa Salmong Tugunan na dakilain ang Diyos na puspos ng kabutihan. Pinatotohanan pa nga ng mang-aawit sa Salmong Tugunan sa kaniyang paanyaya para sa lahat ang kabutihan ng Diyos na isinasalamin nang buong linaw ng Kaniyang mga gawa na tunay ngang kahanga-hanga at dakila. 

Noong gabi ng unang Pasko, idinulot sa atin ng Diyos ang tunay na pag-ibig, ligaya, tuwa, galak, at pag-asa. Ginawa Niya ito sa pamamagitan ng pagkakaloob sa atin ng pinakadakilang biyaya na walang iba kundi ang biyaya ng Kaniyang pagliligtas. Ito ay dumating sa daigdig sa pamamagitan ng Banal na Sanggol na walang iba kundi ang Mahal na Poong Jesus Nazareno. Sa pamamagitan nito, ang Kaniyang kadakilaan na sumasalamin sa Kaniyang kagandahang-loob ay Kaniyang naipamalas. 

NAGKATAWANG-TAO ANG ATING DINARAKILA NANG TAOS-PUSO DAHIL SA KANIYANG DAKILANG PAG-IBIG

24 Disyembre 2025 

Dakilang Kapistahan ng Pasko ng Pagsilang ng Panginoon 

[Pagmimisa sa Bisperas] 

Isaias 62, 1-5/Salmo 88/Mga Gawa 13, 16-17. 22-25/Mateo 1, 1-25 (o kaya: 1, 18-25) 

Larawan: Louis Cretey (–1713), The Nativity (c. Between 17th century and 18th century). Detroit Institute of Arts. Public Domain.

Ang dakilang misteryo ng pagkakatawang-tao ng Panginoong Jesus Nazareno ay ang sentro ng pagdiriwang ng Dakilang Kapistahan ng Pasko ng Pagsilang. Noong gabi ng unang Pasko, sa isang hamak na sabsaban sa lungsod ni Haring David na walang iba kundi ang lungsod ng Betlehem, ang ipinangakong Mesiyas at Manunubos na walang iba kundi ang Panginoong Jesus Nazareno ay isinilang ng Mahal na Birheng Maria. Sa pamamagitan ng Banal na Sanggol na ipinanganak ng Mahal na Birheng Maria noong gabi ng unang Pasko na walang iba kundi ang Panginoong Jesus Nazareno, nahayag nang buong linaw ang dakilang pag-ibig ng Diyos. Tinupad ng Diyos ang pangakong binitiwan Niya sa pamamagitan ng mga propeta sa Lumang Tipan bilang patunay na dakila ngang lubos ang Kaniyang pag-ibig sa pamamagitan nito. 

Sa Unang Pagbasa, si Propeta Isaias ay nagsalita nang buong linaw tungkol sa pag-ibig ng Diyos para sa bayang Kaniyang hinirang na walang iba kundi ang Israel. Hindi pababayaan ng Diyos ang Kaniyang bayan na manatiling alipin ng kadiliman. Bagkus, ang biyaya ng kaligtasan ay ipagkakaloob ng Diyos sa Kaniyang bayan. Mahahayag sa tanan sa pamamagitan ng pagligtas ng Diyos sa bayang Israel na Kaniyang hinirang upang maging Kaniya dahil sa Kaniyang pag-ibig ang Kaniyang kadakilaan.

Nakasentro sa pagsasakatuparan ng pangako ng Diyos na inilahad sa Unang Pagbasa ang pangaral ni Apostol San Pablo sa Ikalawang Pagbasa. Ipinamalas ng Diyos nang buong linaw sa tanan ang Kaniyang kadakilaan sa pamamagitan ng Mahal na Poong Jesus Nazareno. Ang Mahal na Poong Jesus Nazareno ay pumarito sa daigdig bilang ipinangakong Mesiyas at Manunubos upang isakatuparan ang inilarawan ng dakilang propetang si Isaias sa Unang Pagbasa. 

Tampok sa Ebanghelyo ang talaan ng angkang kinabilangan ng ipinangakong Mesiyas at Manunubos na walang iba kundi ang Poong Jesus Nazareno at ang pagsilang Niya noong gabi ng unang Pasko. Sa kabila ng Kaniyang kadakilaan bilang tunay na Diyos, kusang-loob na ipinasiya ng Poong Jesus Nazareno na mapabilang sa angkan ng mga makasalanan. Halimbawa ng mga kasalanang nagawa ng Kaniyang mga ninuno ay pakikipagsiping sa iba, gaya na lamang ng ginawa ni Abraham kay Agar dahil sa pag-uudyok ng kaniyang kabiyak na si Sara at ng ginawa ni Haring David kay Bat-seba na kabiyak ng puso ni Urias. Dahil sa Kaniyang pag-ibig na tunay ngang dakila, ipinasiya ng Poong Jesus Nazareno na mapabilang sa angkang ito upang ang lahat ng tao sa daigdig ay iligtas mula sa kasalanan, kasamaan, at kadiliman. 

Gaya ng ipinahayag nang buong linaw ng mang-aawit sa Salmong Tugunan: "Pag-ibig Mong walang maliw ay lagi kong sasambitin" (Salmo 88, 2a). Ito ang tanging dahilan kung bakit may Pasko. May Pasko dahil lubos tayong iniibig ng ating dinarakila nang taos-puso na walang iba kundi ang Kataas-taasang Diyos. Buong linaw na nahayag sa pamamagitan ng Banal na Sanggol na si Jesus Nazareno ang misteryong ito. 

Dahil sa dakilang pag-ibig ng Diyos para sa tanan, ang Pasko ay ating ipinagdiriwang nang buong galak. Pinatunayan ng Banal na Sanggol na isinilang ng Mahal na Inang si Mariang Birhen sa isang hamak na sabsaban noong gabi ng unang Pasko na walang iba kundi ang Poong Jesus Nazareno na tunay ngang dakila ang pag-ibig ng Diyos. 

DAKILAIN ANG TUNAY NA MAPAGMAHAL

24 Disyembre 2025 

Ikasiyam at Huling Araw ng Simbang Gabi 

2 Samuel 7, 1-5. 8b-12. 14a. 16/Salmo 88/Lucas 1, 67-79 

Larawan: Rosso Fiorentino (1494–1540), Saint John the Baptist as a Boy (c. 1521). Uffizi Gallery via Apollo Magazine. Public Domain. 

Nakatuon sa pag-ibig ng Diyos ang mga Pagbasa. Ito ang tanging dahilan kung bakit ang Diyos ay gumawa ng maraming mga kahanga-hangang bagay. Ang lahat ng mga kahanga-hangang gawa ng Diyos ay sumasalamin sa Kaniyang pag-ibig na dakila. Sa pamamagitan ng Kaniyang mga kahanga-hangang gawa na hindi na mabilang dahil sa dami ng mga ito, ipinapamalas ng Diyos sa tanan ang Kaniyang dakilang pag-ibig. Dahil dito, nararapat lamang na dakilain natin Siya bilang pahayag ng ating pasiyang manalig, sumampalataya, umasa, mahalin, at sambahin Siya. 

Sa Unang Pagbasa, inihayag ng Panginoong Diyos kay Propeta Natan ang Kaniyang pangako para kay Haring David. Ipinangako ng Panginoong Diyos na mananatili ang trono, angkan, at lahi ni Haring David. Magiging kahalili ni Haring David sa sandali ng kaniyang pagpanaw sa daigdig ang isa sa kaniyang mga anak. Tinupad nga ng Diyos ang Kaniyang pangakong ito kay Haring David na Kaniyang hirang. Nang sumapit ang oras at sandali ng kaniyang pagpanaw sa daigdig, ang humalili kay Haring David ay walang iba kundi ang kaniyang anak kay Bat-seba na si Solomon. Kalaunan, nagmula rin sa angkan ni Haring David ang tunay na Hari na walang iba kundi ang Poong Jesus Nazareno, ang ipinangakong Mesiyas at Manunubos. 

Pinatunayan ng Diyos sa pamamagitan ng Kaniyang pagtupad sa Kaniyang pangako kay Haring David ang Kaniyang tapat na pag-ibig para sa Kaniyang lingkod. Hindi Niya nilimot ang Kaniyang pangako kay Haring David kailanman. Ang Kaniyang lingkod na hinirang na si Haring David ay Kaniyang minahal sa kabila ng kaniyang mga kahinaan at kasalanan laban sa Kaniya. 

Itinuon ng mang-aawit na tampok sa Salmong Tugunan ang kaniyang awit ng papuri sa pag-ibig ng Diyos. Sa pamamagitan nito, ang Diyos ay kaniyang dinakila. Hindi siya nahiyang dakilain ang Diyos na puno ng dakilang pag-ibig. Ang Diyos na kailanman ay hindi nagsasawang ipakita ang Kaniyang dakilang pag-ibig sa pamamagitan ng mga kahanga-hangang gawa na hindi na mabilang ay buong sigasig na pinatotohanan ng mang-aawit na tampok sa Salmong Tugunan. Dinakila ng mang-aawit na tampok ang Diyos nang buong puso sa pamamagitan ng pagpapatotoo tungkol sa Kaniyang walang maliw na pag-ibig. 

Ang ama ni San Juan Bautista na walang iba kundi si Zacarias ay nagpatotoo tungkol sa dakilang pag-ibig ng Diyos sa kaniyang awit ng papuri na itinampok at inilahad sa Ebanghelyo. Sa pamamagitan ng pagpapatotoo tungkol sa dakilang pag-ibig ng Diyos na isinasalamin ng Kaniyang mga kahanga-hangang gawa na hindi na mabilang, ang Diyos ay dinakila ni Zacarias nang taos-puso. Ito ang tugon ni Zacarias sa pag-ibig na ipinakita ng Diyos sa pamamagitan ng Kaniyang mga kahanga-hangang gawa. 

Hindi lamang pagpapamalas ng kapangyarihan ang mga kahanga-hangang bagay na ginawa ng Diyos. Bagkus, ang mga kahanga-hangang gawa ng Diyos ay patunay ng Kaniyang dakilang pag-ibig. Ito ang dahilan kung bakit hindi Siya nakakalimot sa mga pangakong binitiwan kailanman. Dahil dito, marapat lamang na ilaan ang bawat oras at sandali ng ating pansamantalang paglalakbay sa daigdig sa pagdakila sa Kaniya. 

ANG UGNAYAN NG KABUTIHAN NG DIYOS AT NG KANIYANG KADAKILAAN

23 Disyembre 2025 

Ikawalong Araw ng Simbang Gabi 

Malakias 3, 1-4. 23-24/Salmo 24/Lucas 1, 57-66 

Larawan: Giuliano Bugiardini (1475–), The Birth of John the Baptist (c. 16th century). Galleria Estense via Bridgeman Art Library. Public Domain.

Nakasentro sa ugnayan ng kadakilaan at kabutihan ng Diyos ang mga Pagbasa. Ang kabutihan ng Diyos at ang Kaniyang kadakilaan ay hindi mga katangian o konseptong hiwalay sa isa't isa. Magkaugnay at magkaakibat ang dalawang ito. Ipinapamalas ng Diyos ang Kaniyang kadakilaan sa pamamagitan ng Kaniyang kabutihan. Palagi itong ginagawa ng Diyos noon pa man una. Buong linaw na ipinapakita ng Diyos sa lahat ang ugnayan ng Kaniyang kabutihan at kadakilaan. 

Sa Unang Pagbasa, buong linaw na inihayag ng Diyos sa pamamagitan ng Kaniyang hirang na propetang si Malakias na darating Siya sa takdang panahon. Ngunit, bago dumating ang Panginoon sa panahong Kaniyang itinakda, isusugo Niya si Elias upang ihanda ang lahat para sa pagsasakatuparan ng pahayag na ito ng Panginoon. Buong linaw namang inilarawan sa Salmong Tugunan ang dahilan kung bakit ang Diyos ay nagpasiyang dumating. Darating Siya sa pamamagitan ng ipinangakong Mesiyas at Manunubos upang ang biyaya ng kaligtasan ay idulot sa lahat. Sa Ebanghelyo, ang tagapagpauna ng Mahal na Poong Jesus Nazareno, ang Mesiyas at Tagapagligtas, na walang iba kundi si San Juan Bautista na Kaniyang kamag-anak ay isinilang. Nahayag ang kadakilaan ng Diyos sa pamamagitan nito. Ipinamalas ng Diyos sa mag-asawang Zacarias at Elisabet ang Kaniyang kabutihan sa pamamagitan ni San Juan Bautista. 

Pinatutunayan ng Diyos ang Kaniyang kadakilaan sa pamamagitan ng pagpapamalas ng Kaniyang kabutihan. Bilang tugon, dapat lagi natin Siyang dakilain. Huwag tayong tumigil sa pagdakila sa Kaniya sapagkat hindi Siya nagsasawang ipamalas sa atin ang Kaniyang kahanga-hangang kabutihan. 

PAGDAKILA SA NAGDUDULOT NG GALAK

22 Disyembre 2025 

Ikapitong Araw ng Simbang Gabi 

1 Samuel 1, 24-28/1 Samuel 2/Lucas 1, 46-56 

Larawan: Cristoforo Gherardi (1508–1556), Visitation of Mary to Saint Elizabeth (c. 1541). Musée des Augustins. Public Domain. 

Buong linaw na ipinapaalala sa atin ng mga Pagbasa kung saan ang tunay na galak ay nagmumula. Nagmumula lamang sa Diyos ang tunay na galak. Ang biyayang ito ay kusang-loob Niyang idinudulot sa atin. Sa pamamagitan ng Kaniyang mga kahanga-hangang gawa na nagpapahayag ng Kaniyang kadakilaan, idinudulot Niya sa atin ang tunay na galak. Tunay ngang napakabuti ang ating dinarakila nang taos-puso. 

Sa Unang Pagbasa, buong galak na dinala ni Ana ang kaniyang anak na si Samuel sa Templo upang ihandog siya sa Panginoong Diyos. Para kay Ana, isang biyaya mula sa Panginoong Diyos ang kaniyang anak na si Samuel. Matapos manalangin nang buong kataimtiman habang pumapatak sa lupa ang mga luha mula sa kaniyang mga mata, ipinagkaloob ng Panginoong Diyos si Samuel kay Ana bilang kaniyang anak. Ang mga luha at mga panalangin ni Ana ay hindi nauwi sa wala. Biniyayaan ng Diyos si Ana ng anak. Dinulutan ng Diyos si Ana ng tunay na galak sa pamamagitan ng kaniyang anak na walang iba kundi si Samuel. Ito ang tanging dahilan kung bakit ang Diyos ay buong galak niyang dinakila sa kaniyang panalangin na inilahad sa Salmong Tugunan. 

Itinampok at inilahad sa Ebanghelyo ang papuring awit ng Mahal na Birheng Maria na kilala natin sa tawag na "Magnificat." Mula sa simula hanggang sa wakas ng nasabing papuring awitin, ang Diyos ay buong galak na dinakila ng Mahal na Birheng Maria na hinirang at itinalaga upang maging ina ng ipinangakong Mesiyas at Tagapagligtas na walang iba kundi ang Mahal na Poong Jesus Nazareno. Buong galak na nagpatotoo tungkol sa kadakilaan ng Diyos na tunay nga namang kahanga-hanga ang Mahal na Birheng Maria sa bawat titik ng papuring awiting ito. Sa pamamagitan ng Kaniyang mga kahanga-hangang gawa na nagpapahayag ng Kaniyang kadakilaan, idinulot ng Diyos sa tanan ang tunay na galak. 

Ang tunay na galak ay nagmumula lamang sa lagi nating dinarakila nang taos-puso sa bawat oras at sandali ng ating pansamantalang paglalakbay sa lupa na walang iba kundi ang Diyos. Huwag nating itigil ang taos-pusong pagdakila sa Kaniya. Mayroon tayong kasama sa taos-pusong pagdakila sa Diyos - ang Mahal na Birheng Maria na Reyna at Ina nating lahat. 

SA PAMAMAGITAN NG KANIYANG WALANG MALIW NA KATAPATAN, IPINAHAYAG NIYA ANG KANIYANG KADAKILAAN

21 Disyembre 2025 

Ikaapat na Linggo sa Panahon ng Pagdating ng Panginoon 

Ikaanim na Araw ng Simbang Gabi 

Isaias 7, 10-14/Salmo 23/Roma 1, 1-7/Mateo 1, 18-24 

Larawan: Simone Cantarini (1612–1648), The dream of St Joseph (c. first half of 17th century). Public Domain.

Nakasentro sa ugnayan ng katapatan ng Diyos at ang Kaniyang kadakilaan. Tiyak na hindi lingid sa kaalaman ng karamihan ang katotohanan tungkol sa ugnayang ito. Ang katapatan ng Diyos at ang Kaniyang kadakilaan ay magkaugnay. Hindi naman malayo at magkaiba ang dalawang ito sa isa't isa. Sa pamamagitan ng Kaniyang katapatang walang maliw, ang Kaniyang kahanga-hangang kadakilaan ay ipinapamalas Niya sa tanan nang buong linaw. 

Sa Unang Pagbasa, buong linaw na inihayag ng Diyos kung paano Niya tutubusin ang lahat ng tao mula sa kasalanan. Ang planong ito ng Diyos na tunay ngang dakila at kahanga-hanga ay isasakatuparan Niya sa panahong mismong Siya ang nagtakda sa pamamagitan ng ipinangakong Mesiyas at Tagapagligtas. Sa Ebanghelyo, ibinalita ng isang anghel ng Panginoon na nagpakita kay San Jose sa kaniyang panaginip habang buong ligalig at balisa niyang pinag-isipan at pinagplanuhan ang kaniyang planong makipaghiwalay sa Mahal na Birheng Maria na sumapit ang takdang panahon. Hindi anak ng ibang lalaki ang Sanggol sa sinapupunan ng Mahal na Birheng Maria. Ang dinadala ng Mahal na Birheng Maria sa kaniyang sinapupunan ay walang iba kundi si Jesus Nazareno, ang Bugtong na Anak ng Diyos na darating sa daigdig pagsapit ng takdang panahon bilang ipinangakong Mesiyas at Manunubos. 

Dahil sa katapatang ito ng Diyos na tunay ngang walang maliw, buong linaw Siyang ipinakilala ng mang-aawit sa Salmong Tugunan bilang dakilang Hari ng lahat (Salmo 23, 7k at 10b). Bukod pa roon, ipinahayag nang buong linaw ni Apostol San Pablo sa kaniyang pangaral sa Ikalawang Pagbasa na si Jesus Nazareno ang tumupad sa mga pangakong binitiwan ng Diyos sa Lumang Tipan. Sa pamamagitan nito, nahayag sa tanan ang katapatan ng Diyos. Naipahayag rin naman ng Diyos sa pamamagitan nito ang Kaniyang kadakilaan. 

Hindi nakakalimot ang Diyos sa mga pangakong binitiwan. Lagi Niyang tinutupad ang mga ito. Patunay lamang ito ng Kaniyang walang maliw na katapatan. Ang Kaniyang walang maliw na katapatan ay patunay ng Kaniyang kahanga-hangang kadakilaan. Bilang tugon, ilaan natin ang bawat oras, minuto, at sandali ng ating pansamantalang paglalakbay sa daigdig na ito sa taos-pusong pagdakila sa Kaniya sa pamamagitan ng ating mga salita at gawa. 

TAOS-PUSONG PAGDAKILA SA TUNAY NA HARI

20 Disyembre 2025 

Ikalimang Araw ng Simbang Gabi 

Isaias 7, 10-14/Salmo 23/Lucas 1, 26-38 

Larawan: Maarten Pepyn (1575–1643), Annunciation (c. Between 1600 and 1643). Hampel Auctions. Public Domain.

Nakatuon sa halaga ng taos-pusong pagdakila sa Diyos ang mga Pagbasa. Hindi Niya ipinagkait sa atin ang Kaniyang kabutihan kailanman. Lagi Niya itong ipinapamalas sa atin sa pamamagitan ng Kaniyang mga kahanga-hangang gawa. Kaya naman, bilang mga bumubuo ng Kaniyang sambayanang naglalakbay sa lupa, nararapat lamang na dakilain natin ang Diyos nang may taos-pusong pananalig at katapatan. Ang bawat oras, minuto, at sandali ng ating pansamantalang paglalakbay sa lupang ibabaw ay lagi nating dapat ilaan upang dakilain ang Diyos. 

Sa Unang Pagbasa, buong linaw na ipinahayag ng Diyos kung paano Niya ipapamalas ang Kaniyang kabutihan. Ang kabutihan ng Diyos ay mahahayag sa pamamagitan ng ipinangakong Mesiyas at Manunubos na isisilang ng isang dalaga. Ipinakilala Siya ng mang-aawit na tampok sa Salmong Tugunan bilang Dakilang Hari ng lahat (Salmo 23, 7k at 10b). Sa salaysay na tampok sa Ebanghelyo, ang Arkanghel na si San Gabriel ay nagpakita sa Mahal na Birheng Maria upang iparating sa kaniya ang magandang balita tungkol sa paghirang sa kaniya ng Diyos bilang ina ng ipinangakong Mesiyas na walang iba kundi ang Mahal na Poong Jesus Nazareno. Isasakatuparan ng Diyos ang Kaniyang pahayag sa Unang Pagbasa sa pamamagitan ng Poong Jesus Nazareno na dumating sa daigdig bilang Banal na Sanggol na isinilang ng Mahal na Birheng Maria. 

Gaya ng Mahal na Birheng Maria, lagi nating dakilain ang Diyos. Tanggapin at sundin natin nang taos-puso ang Kaniyang kalooban. Sa pamamagitan nito, magiging taos-puso ang ating pagdakila sa Diyos. Ang mga tumatalima sa Diyos nang taos-puso ay dumarakila sa Kaniya nang taos-puso. 

DAKILAIN ANG BUKAL NG PAGPAPALA

19 Disyembre 2025 

Ikaapat na Araw ng Simbang Gabi 

Mga Hukom 13, 2-7. 24-25a/Salmo 70/Lucas 1, 5-25 

Larawan: Massimo Stanzione (1585–1656), The Birth of John the Baptist announced to Zacharias (c. 1635). Museo del Prado. Public Domain. 

Ang pagiging mapagpala ng Diyos ay binibigyan ng pansin sa mga Pagbasa. Sa Diyos lamang nagmumula ang tunay na pagpapala. Lagi Niya tayong pinagpapala, kahit na hindi na mabilang ang ating mga nagawang kasalanan laban sa Kaniya dahil sa dami ng mga ito. Patunay lamang ito ng Kaniyang kabutihan. Kaya naman, bilang tugon sa Kaniyang pasiyang lagi tayong pagpalain, dapat lagi rin natin Siyang dakilain, purihin, ipagbunyi, at sambahin nang taos-puso bilang Kaniyang sambayanang taos-pusong umaaasa, nananalig, at sumasampalataya sa Kaniya. 

Sa Unang Pagbasa, ibinahagi ng anghel ng Panginoon sa asawa ni Manoa ang balita tungkol sa pagkahirang sa kanila ng Diyos upang maging mga magulang ni Samson, ang Hukom na itinalaga ng Diyos upang simulan ang proseso ng pagligtas sa bayang Israel mula sa mga Filisteo. Ipinakita ng Diyos kay Manoa at sa kaniyang asawa na hindi magkaanak sa loob ng mahabang panahon ang Kaniyang dakilang kabutihan sa pamamagitan ng pagkakaloob kay Samson sa kanila bilang anak. Sa Ebanghelyo, ang balita ng pagkahirang ng Diyos sa magkabiyak ng pusong sina Zacarias at Elisabet upang maging mga magulang ng tagapagpauna ng ipinangakong Mesiyas na si Jesus Nazareno na walang iba kundi ang Kaniyang kamag-anak na si San Juan Bautista ay ibinahagi nang buong galak ni Arkanghel San Gabriel kay Zacarias. Kahit na ang mag-asawang sina Zacarias at Elisabet ay napakatanda na noong mga araw na yaon, ang Diyos ay kusang-loob na nagpasiyang ipakita kina Zacarias at Elisabet ang Kaniyang kabutihan sa pamamagitan ng pagkaloob Niya kay San Juan Bautista sa kanila upang maging kanilang anak. 

Sa pamamagitan ng Kaniyang pagiging mapagpala, ipinapakita ng Diyos sa lahat ng nilalang ang Kaniyang kabutihan. Isinasalamin ng Kaniyang pagpapala ang Kaniyang kabutihan. Kaya naman, bilang tugon, nararapat lamang na lagi natin Siyang dakilain. 

ANG DAKILANG KATAPATAN NG DIYOS

18 Disyembre 2025 

Ikatlong Araw ng Simbang Gabi 

Jeremias 23, 5-8/Salmo 71/Mateo 1, 18-24 

Larawan: Stefano Maria Legnani (1660–1715), The dream of St. Joseph (c. 1708). Museo Civico, Novara. Public Domain. 

Nakasentro sa pagiging tapat ng Diyos ang mga Pagbasa. Hindi nakakalimot sa mga pangako ang Diyos. Laging inaalala ng Diyos ang mga pangakong Kaniyang binitiwan sa Kaniyang mga lingkod. Ang mga nasabing pangako ay lagi Niyang tinutupad. Kung atin itong papansinin nang maigi, pinagpaplanuhan at pinaghahandaan rin Niya nang mabuti ang pagsasakatuparan ng Kaniyang mga pangako. Mayroong mga panahong itinakda ang Diyos para sa pagsasakatuparan ng Kaniyang mga pangakong binitiwan. Buong linaw Niyang inihayag sa pamamagitan nito ang Kaniyang katapatan. 

Sa Unang Pagbasa, ang Diyos ay nagbitiw ng isang dakilang pangako. Magmumula sa lahi ni Haring David ang ipinangakong Mesiyas at Manunubos. Sa Ebanghelyo, isang anghel ng Panginoon ay nagpakita sa panaginip ni San Jose upang ibalita sa kaniya na niloob mismo ng Diyos na magdalantao ang Mahal na Birheng Maria. Ang Sanggol na dinadala ng Mahal na Birheng Maria sa kaniyang sinapupunan ay ang ipinangakong Mesiyas at Manunubos na walang iba kundi ang Mahal na Poong Jesus Nazareno. 

May paanyaya para sa lahat ang mang-aawit na tampok sa Salmong Tugunan. Ang Diyos ay dapat nating purihin, dakilain, at sambahin. Hinding-hindi Siya nakakalimot. Lagi Niyang tinutupad ang Kaniyang mga pangako. 

Tunay ngang walang maliw at walang kapantay ang dakilang katapatan ng Diyos. Sa pamamagitan ng Kaniyang walang maliw na katapatan, ipinapamalas ng Diyos ang Kaniyang kadakilaan. 

KABABAANG-LOOB NA NAGHAHAYAG NG KADAKILAAN

17 Disyembre 2025 

Ikalawang Araw ng Simbang Gabi 

Genesis 49, 2. 9-10/Salmo 71/Mateo 1, 1-17 

Larawan: The Christ Child (c. 1480). National Museum in Warsaw via Pinterest. CC0. 

Tampok sa Ebanghelyo ang talaan ng angkang kinabilangan ng ipinangakong Mesiyas at Manunubos na walang iba kundi ang Mahal na Poong Jesus Nazareno. Layunin ng Manunulat ng Mabuting Balitang si Apostol San Mateo sa pamamagitan ng kaniyang pasiyang itampok at ilahad ang talaang ito na tunay ngang napakahaba sa simula ng kaniyang salaysay ng Mabuting Balita ay isalungguhit nang buong linaw ang pagiging dakila ng Diyos. Sa pamamagitan ng Kaniyang pasiyang ibilang ang Mahal na Poong Jesus Nazareno sa isang angkan at lahing puno ng mga makasalanan, nahayag nang buong linaw ang kadakilaan ng Diyos. 

Ang pasiya ng Diyos na ibilang ang Kaniyang sarili sa lahi at angkang binubuo ng mga taong Kaniyang nilikha, hinirang, at itinalaga bilang Kaniyang mga tapat na lingkod sa kabila ng kanilang mga kahinaan, pagkukulang, at kasalanan nang buong kababaang-loob sa pamamagitan ng ipinangakong Mesiyas at Manunubos na walang iba kundi si Jesus Nazareno ay tunay nga namang kahanga-hanga. Sa pamamagitan ng Kaniyang kababaang-loob na inihayag Niya sa pamamagitan ni Jesus Nazareno, ipinamalas ng Diyos ang Kaniyang kahanga-hangang kadakilaan. Kahit na ang Diyos mismo ay ang pinakadakila sa lahat, ipinasiya pa rin Niyang maging mababang-loob. 

Sa pamamagitan ng Kaniyang kababaang-loob na naghayag ng Kaniyang kadakilaan, natupad ang pahayag ni Jacob sa kaniyang mga anak sa Unang Pagbasa. Nahayag sa pamamagitan ng Poong Jesus Nazareno ang pahayag ni Jacob sa kaniyang mga anak tungkol sa tunay na Hari sa Unang Pagbasa. Katunayan, ang kadakilaan ng Diyos ay buong linaw na pinatotohanan ng mang-aawit na tampok sa Salmong Tugunan. Ang Diyos ay tunay ngang dakila. Pinatunayan ito ng Poong Jesus Nazareno. 

Ipinamalas ng Diyos sa lahat ang Kaniyang kadakilaan sa pamamagitan ng Kaniyang kababaang-loob. Bagamat Siya ang pinakadakila sa lahat, ipinasiya pa rin ng Diyos na maging mababang-loob. 

DAPAT DAKILAIN ANG DIYOS NG MGA HUKBO NA NAGPASIYANG MAGING TAPAT

16 Disyembre 2025 

Unang Araw ng Simbang Gabi 

Isaias 56, 1-3a. 6-8/Salmo 66/Juan 5, 33-36 

Larawan: Matteo Rosselli (1578-1650), Jesus and John the Baptist meet in their youth (c. 17th century). Unidentified location via Hampel Auctions. Public Domain.

"Nawa'y magpuri sa Iyo ang lahat ng mga tao" (Salmo 66, 4). Sa mga salitang ito ng tampok na mang-aawit sa Salmong Tugunan nakatuon ang taimtim na pagninilay ng Simbahan sa unang araw ng taunang tradisyunal na Pagsisiyam bilang paghahanda para sa Dakilang Kapistahan ng Pasko ng Pagsilang ng Panginoon. Kasama natin ang Mahal na Birheng Maria, ang babaeng hinirang at itinalaga ng Diyos sa lahat ng mga babae sa daigdig na ito upang maging ina ng ipinangakong Mesiyas at Manunubos na walang iba kundi ang Mahal na Poong Jesus Nazareno, sa loob ng siyam na araw na ito na inilaan para sa puspusang paghahanda ng sarili, paghihintay, at paglalakbay. 

Sa Unang Pagbasa, buong linaw na ipinahayag ng Panginoong Diyos na darating Siya upang iligtas ang Kaniyang bayan. Darating Siya sa lalong madaling panahon upang isakatuparan ang Kaniyang plano. Mahahayag sa lahat sa pamamagitan ng Kaniyang pagligtas sa Kaniyang bayan ang Kaniyang kadakilaan. Sa Ebanghelyo, ipinahayag ng Mahal na Poong Jesus Nazareno na isinugo Siya ng Ama. Ang Kaniyang mga gawa na tunay ngang kahanga-hanga at dakila ay patunay nito. Isinugo Siya ng Amang nasa langit upang tuparin ang pangakong inihayag sa Unang Pagbasa. Patunay lamang ito na hindi nakakalimot ang Diyos sa Kaniyang mga pangako. Tunay nga itong kahanga-hanga at dakila. Ang Diyos ay tunay ngang matapat. 

Bilang tugon sa katapatan ng Diyos ng mga Hukbo na nahayag sa pamamagitan ng ipinangakong Mesiyas at Manunubos na walang iba kundi ang Mahal na Poong Jesus Nazareno, atin Siyang purihin, dakilain, at sambahin nang taos-puso. Isabuhay natin sa bawat oras at sandali ng ating pansamantalang paglalakbay sa daigdig na ito ang taos-pusong pasiyang ito na maipapahayag ng bawat isa sa atin sa pamamagitan ng ating mga salita at gawa. Pinaghahandaan natin nang puspusan ang ating mga sarili para sa pagtamasa ng biyaya ng buhay na walang hanggan sa Kaniyang kaharian sa langit sa pamamagitan nito. 

BUONG GALAK NATIN SIYANG DAKILAIN

14 Disyembre 2025 

Ikatlong Linggo sa Panahon ng Pagdating ng Panginoon (A) 

Isaias 35, 1-6a. 10/Salmo 145/Santiago 5, 7-10/Mateo 11, 2-11 

Larawan: Victor Meirelles (1832–1903), Saint John the Baptist in prison (c. 1852). Museu Nacional de Belas Artes. Public Domain.

Ang Diyos ay ipinapakilala sa mga Pagbasa bilang bukal ng tunay na galak. Sa Kaniya lamang nagmumula ang tunay na galak. Tunay na galak ang dulot Niya sa atin. Kahit hindi tayo karapat-dapat sa biyayang ito dahil mga makasalanan tayo, ipinapasiya pa rin Niyang idulot sa atin ang biyayang ito. Bukal sa Kaniyang kalooban ang Kaniyang pasiyang dulutan tayo ng tunay na galak. Hindi ito sapilitan. 

Isang pangako mula sa Diyos ang inilahad sa Unang Pagbasa. Ang nasabing pangako ay nagdulot ng tunay na galak at tuwa sa bayang hinirang at itinalaga ng Diyos upang maging Kaniya. Buong linaw na inihayag sa pangakong ito na darating ang Panginoon upang iligtas ang Kaniyang bayan. Nakasentro rin sa pangakong ito ang mga salita ng tampok na mang-aawit sa Salmong Tugunan. Maging ang pangaral ni Apostol Santo Santiago na itinampok at inilahad sa Ikalawang Pagbasa ay nakatuon rin sa nasabing pangako. Sa Ebanghelyo, itinampok ang katuparan ng nasabing pangako ng Diyos na walang iba kundi ang Nuestro Padre Jesus Nazareno. Noong una Siyang dumating sa lupa, nagdulot Siya ng kaligtasan. Muli Niya itong gagawin sa muli Niyang pagdating bilang Hari at Hukom sa wakas ng panahon. 

Taglay ang tunay na galak at tuwang Kaniyang dulot sa atin, lagi nating dakilain ang Kabanal-Banalang Ngalan ng Mahal na Poong Jesus Nazareno, ang tunay na Hari, sa pamamagitan ng ating mga salita at gawa. Dapat natin Siyang ipagmalaki at ipakilala sa lahat. Nararapat lamang dakilain Siya ng lahat ng nilalang.  

NILALAPITAN TAYO SA KABILA NG KANIYANG KADAKILAAN

12 Disyembre 2025 

Paggunita sa Mahal na Birhen ng Guadalupe 

Zacarias 2, 14-17 (o kaya: Pahayag 11, 19a; 12, 1-6a. 10ab)/Judith 13/ Lucas 1, 39-47 (o kaya: 1, 26-38) 

Ang mga Pagbasa para sa Paggunita sa Mahal na Birhen ng Guadalupe ay nakatuon sa pasiya ng Diyos na lapitan tayo. Hindi napilitan ang Diyos na lapitan tayo. Kusang-loob Niyang ipinasiyang lapitan tayo. Sa larawan ng Mahal na Birhen ng Guadalupe, buong linaw na inilarawan ang pagdadalantao ng Mahal na Birheng Maria. Alam natin kung sino ang dinala ng Mahal na Birheng Maria - ang Bugtong na Anak ng Diyos at Pangalawang Persona ng Banal na Santatlo na walang iba kundi si Jesus Nazareno. 

Sa Unang Pagbasa, inihayag ng Panginoong Diyos ang Kaniyang pasiyang makapiling ang Kaniyang bayan. Para sa Panginoong Diyos, hindi isang hadlang o dahilan upang hindi makapiling ang Kaniyang bayan ang Kaniyang kadakilaan. Sa kabila ng Kaniyang kadakilaan, ipinasiya pa rin Niyang makapiling ang Kaniyang bayan. Isinakatuparan ng Diyos ang pangakong ito na ipinahayag Niya nang buong linaw sa Unang Pagbasa sa pamamagitan ng Banal na Sanggol na nanahan sa sinapupunan ng Mahal na Birheng Maria sa loob ng siyam na buwan na walang iba kundi ang Poong Jesus Nazareno. Sa tampok na salaysay sa Ebanghelyo, buong linaw na inihayag ni Elisabet na tunay nga namang mapalad ang Mahal na Birheng Maria dahil sa Sanggol na si Jesus Nazareno. Bilang tugon sa pahayag ni Elisabet, dinakila ng Mahal na Birheng Maria nang buong galak at tuwa ang Diyos na nagdakila sa kaniya. 

Ipinapaalala sa atin ng Simbahan sa pagdiriwang ng Paggunita sa Mahal na Birhen ng Guadalupe na nilalapitan tayo ng Diyos sa kabila ng Kaniyang kadakilaan. Kahit kailan, hindi naging hadlang o dahilan ang Kaniyang kadakilaan upang lapitan Niya tayo. Sa pamamagitan ng Banal na Sanggol na dinala ng Mahal na Birheng Maria sa kaniyang sinapupunan sa loob ng siyam na buwan na walang iba kundi ang Mahal na Poong Jesus Nazareno, tayong lahat ay nilapitan ng Diyos. Bilang tugon, samahan natin ang Mahal na Birheng Maria at ang lahat ng mga banal sa pagdakila sa Diyos. 

PAHALAGAHAN, DAKILAIN, AT MAHALIN

10 Disyembre 2025 

Kapistahan ng Pagtatalaga ng Dambana ng Katedral ng Maynila 

1 Hari 8, 22-23. 27-30/Salmo 83/Juan 2, 13-22 

"Ang templo Mo'y aking mahal, D'yos na Makapangyarihan" (Salmo 83, 2). Nakatuon sa mga salitang ito ang taimtim na pagninilay ng Simbahan sa araw na ito na inilaan para magpuri at magpasalamat sa Diyos na nagpabanal sa bawat gusaling itinayo at itinalaga bilang mga bahay-dalanginan o mga Simbahan katulad ng makasaysayang Katedral ng Maynila sa Intramuros na itinalaga sa araw na ito. Sa mga salitang ito na binigkas ng tampok na mang-aawit sa Salmong Tugunan, isinalungguhit nang buong linaw ang dahilan kung bakit ang mga bahay-dalanginan ay banal - ang presensya ng Diyos. Pinababanal ng presensya ng Diyos ang mga bahay-dalanginan.

Sa Unang Pagbasa, si Haring Solomon ay naghandog ng tapat at taos-pusong papuri, pasasalamat, at pagsamba sa Panginoong Diyos matapos ang Templo sa Herusalem ay maitayo. Buong galak na dinakila ni Haring Solomon ang Diyos na kusang-loob na nagpasiyang manahan sa Templo sa pamamagitan ng mga salitang ito. Katunayan, buong linaw niyang isinalungguhit sa kaniyang panalangin sa Diyos na tanging Siya mismo ang nagpapabanal sa Templo. Dahil sa presensya ng Diyos, banal ang Templo. Ito ang dahilan kung bakit ang templo ay nilinis ng Nuestro Padre Jesus Nazareno sa tampok na salaysay sa Ebanghelyo. Ang presensya ng Diyos ay hindi pinahalagahan. Kahit na ipinasiya ng Diyos na manahan sa Templo upang lalo Siyang mapalapit sa lahat ng mga bumubuo ng Kaniyang bayang hinirang, binalewala ito ng mga tao. Ang ginawa ng mga tao noong araw na iyon ay salamin ng kanilang mga puso at isipan. Walang halaga ang Diyos para sa kanila. 

Dapat nating pahalagahan, dakilain, at mahalin ang Diyos nang buong katapatan sa bawat sandali ng ating buhay. Lagi natin Siyang purihin, sambahin, at dakilain. Hindi lamang ito naipapahayag sa pamamagitan ng mga salita lamang kundi pati na rin sa pamamagitan ng ating mga gawa. Ito ang hanap ng Diyos sa atin. 

DINAKILA NG KANIYANG DINAKILA

08 Disyembre 2025 

Dakilang Kapistahan ng Kalinis-Linisang Paglilihi sa Mahal na Birheng Maria 

Genesis 3, 9-15. 20/Salmo 97/Efeso 1, 3-6. 11-12/Lucas 1, 26-38 

Larawan: Giuseppe Cesari (1568–1640), Inmaculada Concepción (c. Between c. 1583 and c. 1640). Royal Academy of Fine Arts of San Fernando via CER.es. Public Domain. 

Kapag ang ikawalong araw ng Disyembre ay hindi tumapat sa araw ng Linggo, inilaan ang nasabing petsa para sa pagdiriwang ng Dakilang Kapistahan ng Kalinis-linisang Paglilihi sa Mahal na Birheng Maria. Nakatuon ang nasabing pagdiriwang sa pagligtas ng Diyos sa Mahal na Birheng Maria na Kaniyang hinirang at itinalaga upang maging ina ng ipinangakong Mesiyas at Manunubos na walang iba kundi ang Mahal na Poong Jesus Nazareno bago siya isilang ng kaniyang inang si Santa Ana. Ginawa ito ng Diyos upang simulan ang Kaniyang planong iligtas ang sangkatauhan. 

Nakasentro sa mga gawa ng Diyos na nagpapatunay ng Kaniyang kahanga-hangang kadakilaan ang mga Pagbasa. Sa Unang Pagbasa, ipinaliwanag ng Diyos nang buong linaw kung paano Niya ililigtas ang sangkatauhan. Bagamat ang pagkalugmok ng tao ay bunga ng kasalanang nagawa nina Adan at Eba, hindi ito naging hadlang at dahilan para sa Diyos upang hayaan na lamang Niyang mapahamak nang tuluyan ang tao. Sa halip na pabayaan ang buong sangkatauhan na tuluyang malugmok at mapahamak, ipinasiya pa rin ng Diyos na tubusin sila. Isinentro ni Apostol San Pablo ang kaniyang pangaral na itinampok at inilahad sa Ikalawang Pagbasa sa katuparan ng pangakong binitiwan ng Diyos sa Unang Pagbasa. Natupad ito sa pamamagitan ng Poong Jesus Nazareno, ang ipinangakong Mesiyas na Manunubos na kusang-loob na ipinagkaloob sa atin ng Diyos dahil sa Kaniyang dakilang pag-ibig para sa atin. Sa Ebanghelyo, ang Diyos ay dinakila ng Mahal na Birheng Maria na Kaniyang dinakila nang ang Kaniyang abang aliping ito ay iniligtas Niya mula sa dungis ng kasalanan sa pamamagitan ng taos-pusong pagtanggap sa pananagutang Kaniyang bigay. 

Gaya ng inihayag ng mang-aawit na tampok sa Salmong Tugunan: "Umawit sa Diyos ng awa, ang gawain N'ya'y dakila" (Salmo 97, 1a). Ang lahat ng mga gawa ng Diyos ay tunay ngang dakila. Katunayan, Siya ang pinakadakila sa lahat. Dahil dito, nararapat lamang na lagi natin Siyang dakilain, gaya ng ginawa ng Mahal na Birheng Maria na Kaniya ring dinakila. 

Ang Diyos ay laging dinakila ng Mahal na Birheng Maria na Kaniya ring dinakila. Hindi kinalimutan ng Mahal na Birheng Maria na dakilain ang Diyos kailanman. Lagi niyang inilaan ang bawat sandali ng kaniyang pansamantalang paglalakbay sa daigdig na ito sa pagdakila sa Diyos. Sa pamamagitan ng kaniyang mga salita at gawa, ang Diyos ay lagi niyang dinakila. 

PINAGHAHANDAAN NG MGA DUMARAKILA SA KANIYA ANG KANIYANG PAGDATING

07 Disyembre 2025 

Ikalawang Linggo sa Panahon ng Pagdating ng Panginoon (A) 

Isaias 11, 1-10/Salmo 71/Roma15, 4-9/Mateo 3, 1-12 

Larawan: Federico Zuccari (–1609), John the Baptist (c. 1566). Villa Farnese. Public Domain. 

Ang mga Pagbasa para sa Linggong ito ay nakasentro sa dahilan ng ating maigting na paghahanda. Darating ang pinakadakila sa lahat na walang iba kundi ang Panginoong Jesus Nazareno. Kaya naman, nararapat lamang na maghanda tayo nang maigi nang sa gayon ay maging marapat ang bawat isa sa atin na salubugin ang pinakadakila sa lahat sa Kaniyang maringal na pagdating. Sa pamamagitan nito, dinarakila natin ang Kaniyang Kabanal-Banalang Ngalan. Gaya ng buong linaw na inihayag ng panauhing tampok sa salaysay sa Ebanghelyo na walang iba kundi ang tagapagpauna ng Señor na si San Juan Bautista sa kaniyang mga tagasunod nang mabalitaan ang pagtaas ng bilang ng mga nagsisitungo sa Señor upang pakinggan at sundan Siya: "Dapat Siyang maging dakila at ako nama'y mababa" (Juan 3, 30). 

Ipinaliwanag sa Unang Pagbasa, Salmong Tugunan, at Ikalawang Pagbasa kung bakit ang pagdating ng Poong Jesus Nazareno ay napakahalaga. Buong linaw na inihayag sa Unang Pagbasa na darating ang Poong Jesus Nazareno upang idulot ang tunay na katarungan sa mga dukha. Sa Salmong Tugunan, inihayag na kasaganaan ang kaloob ng Poong Jesus Nazareno. Nakatuon ang pangaral ni Apostol San Pablo sa Ikalawang Pagbasa sa pagdulot ng Poong Jesus Nazareno ng biyaya ng Kaniyang pagliligtas. 

Sa Ebanghelyo, ang mga tao ay nagsitungo sa Ilog Jordan upang pakinggan ang mga pangaral ni San Juan Bautista. Nangaral nang walang humpay si San Juan Bautista sa mga nagsitungo sa Ilog Jordan upang makinig at magpabinyag sa kaniya tungkol sa halaga ng taimtim na pagsisisi at pagbabalik-loob sa Diyos upang ihanda sila para sa katuparan ng pangako ng Diyos sa Lumang Tipan na walang iba kundi ang pagdating ng ipinangakong Mesiyas at Manunubos. 

Dinarakila si Jesus Nazareno ng lahat ng mga naghahanda ng sarili para sa Kaniyang maringal na pagdating. Sa pamamagitan ng kanilang paghahanda ng sarili nang may taos-pusong kaigtingan at katapatan, ipinapahayag nila nang buong linaw na silang lahat ay nananalig, umaaasa, sumasampalataya, umiibig, at sumasamba sa Kaniya. 

TUNAY NGANG MAAWAIN AT MAHABAGIN ANG ATING DINARAKILA

05 Disyembre 2025 

Biyernes sa Unang Linggo sa Panahon ng Pagdating ng Panginoon 

Isaias 29, 17-24/Salmo 26/Mateo 9, 27-31 

Larawan: Konstantin Makovsky (1839–1915), Healing the Blind Men (c. 1860). The Museum of the Russian Academy of Arts. Public Domain.

"Anak ni David, mahabag po kayo sa amin!" (Mateo 9, 27). Ito ang samo ng dalawang bulag na lalaki sa Poong Jesus Nazareno sa tampok na salaysay sa Ebanghelyo. Hindi sila nag-atubiling magmakaawa sa Poong Jesus Nazareno. Batid ng dalawang bulag na lalaking ito na hawak ng Poong Jesus Nazareno ang kanilang kapalaran. Dahil ang Poong Jesus Nazareno ay ang Dakilang Manggagamot, Siya mismo ang magpapasiya kung ang dalawang bulag na lalaking ito ay Kaniyang pagagalingin o hindi. Kaya, ang dalawang bulag na lalaking ito ay umasang kaaawaan at kahahabagan sila ng Poong Jesus Nazareno, ang Dakilang Manggagamot. Isinasalamin ito ng mga salitang buong lakas nilang isinigaw sa salaysay na tampok sa Ebanghelyo. Bagamat pasigaw nilang winika ang mga salitang ito, makikita ang dalisay na kababaang-loob. 

Pinaaalalahanan tayo ng mga Pagbasa para sa araw na ito na tunay ngang maawain at mahabagin ang ating pinaghahandaan at pinananabikan. Taglay ang tapat, dalisay, busilak, at taos-pusong pananalig at pananampalataya sa ating mga puso at loobin, nananabik at naghahanda tayo para sa pagdating ng pinakadakila sa lahat na walang iba kundi ang Poong Jesus Nazareno. Darating Siya dahil sa Kaniyang pag-ibig, awa, habag, at kagandahang-loob. Nagawa na Niya ito noong una Siyang dumating bilang Mesiyas at Manunubos. Muli Niya itong gagawin sa Kaniyang ikalawang pagdating. 

Sa Unang Pagbasa, inihayag nang buong linaw na maraming mga kahanga-hangang bagay ang magaganap sa pagdating ng Panginoon. Sa Salmong Tugunan, ipinakilala ng mang-aawit na itinampok ang Panginoong Diyos bilang tanglaw at kaligtasan. Sa pamamagitan ng Kaniyang pasiyang maging tanglaw at kaligtasan ng lahat, ang pag-ibig, awa, habag, at kagandahang-loob ng Diyos na tunay ngang dakila ay nahayag sa lahat. Sa Ebanghelyo, ang tugon ng Nuestro Padre Jesus Nazareno ay pagbigyan ang hiling ng dalawang lalaking bulag. Sa pamamagitan ng Kaniyang pasiyang pagaligin ang dalawang lalaking bulag bilang tugon sa kanilang kahilingan, pinatunayan Niyang tunay nga Siyang maawain at mahabagin. 

Dinarakila natin ang Mahal na Poong Jesus Nazareno na puspos ng pag-ibig, habag, at awa para sa ating lahat. Hindi Niya ipinagkakait ito sa atin. Kusang-loob Niya itong ipinagkakaloob sa atin. Walang sandaling hindi Siya nagsasawang gawin ito. Bilang tugon sa Kaniyang walang sawang pagpapakita ng Kaniyang pag-ibig, habag, at awa sa atin, lagi nating dapat paigtingin ang ating paghahanda ng ating mga sarili para sa Kaniyang pagdating. 

SA PAMAMAGITAN NG PAGHIHINTAY AT PAGHAHANDA NG SARILI, DINARAKILA NATIN SIYA

30 Nobyembre 2025 

Unang Linggo sa Panahon ng Pagdating ng Panginoon (A) 

Isaias 2, 1-5/Salmo 121/Roma 13, 11-14a/Mateo 24, 37-44 

Larawan: Denys Calvaert (circa 1540–1619), The Last Judgment (c. Turn of the 16th/17th century). National Museum in Kraków. Public Domain.

Lingid sa kaalaman ng marami sa mga Katolikong Pilipino, lalung-lalo na sa Pilipinas, na mayroon palang dalawang salin ng Sanctus (na binibigkas ng kongregasyon o kaya inaawit ng koro bago ang Konsegrasyon). Ang nasabing salin ng nasabing bahagi ng Prepasyo ay ang "Banal Ka, Poong Maykapal." Katunayan, lingid rin sa kaalaman ng marami sa mga Katolikong Pilipino na ito ay ang pangunahing salin ng Sanctus. Isa lamang alternatibong bersyon ng salin ng Sanctus ang saling nakasanayan natin na walang iba kundi ang salin na "Santo, Santo, Santo." 

Sa pangunahing salin ng Sanctus sa Aklat ng Pagmimisa sa Roma (ang aklat ng mga rito at panalangin para sa pagdiriwang ng Banal na Eukaristiya sa Tagalog) na walang iba kundi ang saling nagsisimula sa mga salitang "Banal Ka, Poong Maykapal," ang pagdakila sa Bugtong na Anak ng Diyos na Siya rin mismong Ikalawang Persona ng Banal na Santatlo na walang iba kundi ang Mahal na Poong Jesus Nazareno ay buong linaw na isinalungguhit. Bilang tanda ng taos-pusong pasiyang manalig at umasa sa Kaniya, ang Mahal na Poong Jesus Nazareno ay dinarakila at sinasamba nang taos-puso hanggang sa huli. Tinatanggap nila Siya bilang tunay na Hari at Mananakop. 

Laging sinisimulan ng Inang Simbahan sa pamamagitan ng Panahon ng Pagdating ng Panginoon na tiyak na mas kilala ng marami bilang panahon ng Adbiyento ang isang bagong liturhikal na taon. Sa simula ng isang bagong liturhikal na taon, itinutuon ang ating pansin sa dapat dakilain. Ipinapaalala sa atin ng Simbahan na nararapat lamang dakilain ang ipinangakong Mesiyas at Manunubos na walang iba kundi ang Bugtong na Anak ng Diyos at Ikalawang Persona ng Banal na Santatlo na si Jesus Nazareno. 

Nakasentro sa pagdating ng Poong Jesus Nazareno ang mga Pagbasa. Inihayag nang buong linaw ni Propeta Isaias na darating ang ipinangakong Mesiyas at Tagapagligtas upang maghatid ng kaligtasan, galak, at liwanag. Buong linaw ring isinalungguhit ni Apostol San Pablo sa kaniyang pangaral sa Ikalawang Pagbasa na darating muli ang ipinangakong Mesiyas at Tagapagligtas sa wakas ng panahon upang tayong lahat na taos-pusong nananalig at umaaasa sa Kaniya ay iligtas. Dagdag pa ni Apostol San Pablo sa Ikalawang Pagbasa, malapit na Siyang dumating. Hindi man natin alam kung kailan ang eksaktong petsa, araw, at oras, alam nating malapit na Siyang dumating. Sa Ebanghelyo, buong linaw na ibinilin ng Poong Jesus Nazareno ang mga apostol na laging magtanod at laging maghanda para sa Kaniyang pagdating. Ang bilin na ito ay hindi lamang para sa mga apostol. Para rin ito sa ating lahat na bahagi ng Simbahang walang ibang nagtayo at nagtatag kundi Siya lamang na nagmula sa langit. 

Ang paanyaya ng mang-aawit sa Salmong Tugunan ay para sa lahat ng mga darakila sa Poong Jesus Nazareno. Ito ang biyayang matatamasa ng lahat ng mga darakila sa Kaniya nang taos-puso hanggang sa huli dahil sila mismo ang tumutupad sa utos at bilin ng Poong Jesus Nazareno na hintayin at paghandaan ang Kaniyang pagdating. 

Kung tunay nga nating dinarakila ang Mahal na Poong Jesus Nazareno, tutuparin at susundin natin ang Kaniyang mga utos. Maghihintay tayo para sa Kaniyang maringal na pagdating. Ilalaan natin ang bawat sandali ng ating buhay sa paghahanda para sa pagdating ng Mahal na Poong Jesus Nazareno. Sa pamamagitan ng pagsasabuhay ng ating taos-pusong pasiyang manalig at umasa sa Kaniya, ginagawa natin ito.