ANG LANGIT AY TOTOO

2 Hunyo 2019 

Dakilang Kapistahan ng Pag-Akyat (K) 

Mga Gawa 1, 1-11/Salmo 46/Efeso 1, 17-23 (o kaya: Hebreo 9, 24-28; 10, 19-23)/Lucas 24, 46-53 

Ang langit ay totoo. Hindi ito isang kathang-isip lamang. Iyan ang nais pagtuunan ng pansin ng Dakilang Kapistahan ng Pag-Akyat sa Langit ng Panginoon. Matapos tuparin ang Kanyang misyon bilang Mesiyas, ang Panginoong Hesus ay umakyat sa langit taglay ang Kanyang kapangyarihan at kaluwalhatian bilang Diyos. Matapos mamatay sa krus at mabuhay na mag-uli sa ikatlong araw, nilisan ni Hesus ang daigdig at bumalik sa langit. Tulad ng Kanyang sinabi sa ika-16 na kabanata ng Ebanghelyo ni San Juan, Siya'y nagmula sa Ama at babalik rin sa Kanya. At iyon ang pinagtuunan ng pansin sa Kanyang maluwalhating Pag-Akyat sa Langit na isinalaysay sa Unang Pagbasa at Ebanghelyo. Katunayan, iisa lamang ang nagsulat ng mga tampok na salaysay sa Unang Pagbasa at Ebanghelyo sa pagdiriwang ng solemnidad na ito sa Taon K. At iyon ay walang iba kundi si San Lucas.

Isang kapansin-pansin na detalye sa dalawang salaysay ni San Lucas ng Pag-Akyat ni Hesus sa Langit na itinampok sa Unang Pagbasa at Ebanghelyo ay ang kanyang pagbibigay ng pansin sa misyon ng mga apostol. Ang mga apostol ay iniatasan ni Hesus na maging Kanyang mga saksi sa bawat sulok ng daigdig. Silang lahat ay magpapatotoo tungkol kay Kristo Hesus saanman sila pumunta. Ipapangaral nila sa lahat na totoong may langit. Si Hesus na nagmula sa Amang nasa langit at bumalik sa Kanya matapos ang Kanyang pagkamatay sa krus at Muling Pagkabuhay ang patunay na totoo ang langit. Sa langit, nananahan ang Diyos na puspos ng pag-ibig at kagandahang-loob para sa ating lahat. Ang pinakadakilang larawan nito ay ang Kanyang pagtubos sa sangkatauhan sa pamamagitan ni Kristo Hesus. Tunay ngang may langit; hindi ito isang kathang-isip lamang.

Binanggit ni Apostol San Pablo sa kanyang pangangaral sa Ikalawang Pagbasa na si Kristo ay nakaluklok sa kanan ng Diyos sa langit (1, 20). Ang bumaba mula sa langit at naging tao katulad natin, maliban sa kasalanan, upang iligtas sa sangkatauhan sa pamamagitan ng Kanyang krus at Muling Pagkabuhay ay umakyat sa langit at nakaluklok sa kanan ng Ama. Sa pamamagitan nito, pinatotohanan niya na ang langit ay tunay. Gayon din ang ginawa ng manunulat ng Sulat sa mga Hebreo sa Ikalawang Pagbasa. Sabi niya sa pambungad na si Kristo ay pumasok sa langit at namamagitan para sa atin sa Ama. Dagdag pa niya sa bahaging iyon, ang langit ay hindi isang konseptong likha ng tao kundi ang tunay na pananahan ng Diyos (9, 24). Tunay nga ang langit. Sa langit, nananahan ang Diyos. Sa langit, matatagpuan ang buhay na walang hanggan. Sa langit, mararanasan natin nang lubusan ang pag-ibig ng Diyos. Ang langit ang tunay na Paraiso kung saan makakapiling natin ang Diyos magpakailanman. Tunay ang langit. Tunay ang Panginoong Diyos na ating sinasamba at iniibig. Tunay ang pag-ibig at kagandahang-loob ng Diyos. 

Ang misyong ibinigay ni Hesus sa mga apostol ay ipinagpapatuloy ng Simbahan hanggang sa kasalukuyang panahon. Ang Simbahan ay patuloy na nangangaral at sumasaksi sa Panginoong Hesus. Patuloy na ipinapakilala ng Simbahan si Kristo sa iba't ibang panig ng daigdig. Patuloy na ipinapalaganap ng Simbahan ang Mabuting Balita na ating sinasampalatayanan bilang mga Kristiyano. Ang Mabuting Balita tungkol sa pag-ibig at kagandahang-loob ng Diyos sa pamamagitan ng Panginoong Hesukristo. Iyan ang ating sinasampalatayanan bilang mga tagasunod ni Kristo. 

Tunay ngang may langit. Tunay ngang may buhay na walang hanggan sa piling ng Diyos sa kalangitan. Tunay nga ang Diyos na ating iniibig, sinasampalatayanan, at sinasamba. Hindi ito kathang-isip. Ang lahat ng iyan ay pawang katotohanan. Iyan ang ating pananampalataya. Iyan ang ating maipagmamapuri bilang mga kapanig ng ating Panginoon at Manunubos na si Hesukristo. 

DALHIN SI HESUS

31 Mayo 2019 

Kapistahan ng Pagdalaw ng Mahal na Birheng Maria 

Sofonias 3, 14-18 (o kaya: Roma 12, 9-16b)/Isaias 12/Lucas 1, 39-56 

Hindi man ito napapansin ng karamihan, ang bawat isa'y may dinadala sa tuwing sila'y naglalakbay, lalung-lalo na kapag mayroon silang dinadalaw. Ito ang nais pagtuunan ng pansin ng mga Pagbasa para sa Kapistahan ng Pagdalaw ng Mahal na Birheng Maria. Hindi lamang mga materyal na bagay ang dinadala natin; pati na rin ang mga damdamin katulad ng kaligayahan o kalungkutan ay ating tinataglay at dinadala sa mga dadalawin natin. 

Sa Ebanghelyo, isinalaysay ang pagdalaw ng Mahal na Birheng Maria sa kanyang kamag-anak na si Santa Elisabet. Sa kanyang pagdalaw kay Elisabet, si Maria ay naghatid ng tuwa sa kamag-anak niyang ito na nagdadalantao katulad niya. Kahit ang sanggol na si San Juan Bautista na nasa loob ng sinapupunan ni Elisabet ay gumalaw sa tuwa nang batiin ni Maria si Elisabet. Bakit? Dahil dala niya sa kanyang sinapupunan noon ang Banal na Sanggol na si Kristo Hesus. Si Hesus na nagdala ng tuwa't galak sa lahat, lalung-lalo na kay Maria, sa pamamagitan ng Kanyang Muling Pagkabuhay. 

Nakakalungkot isipin na may mga nagdadala ng lagim at kasinungalingan, lalung-lalo na sa kasalukuyang panahon. Walang ibang ginawa kundi magkalat ng pekeng impormasyon at magbanta. Walang awa at malasakit sa kapwa. Walang pakialam sa mga inosenteng madadamay sa kanyang binabalak matupad lamang ang mga ito. Pababanguhin ang sariling pangalan sa pamamagitan ng paninindak at pagkalat ng kasinungalingan. Sariling kapakinabangan lamang ang kanilang iniisip at iniintindi. Balewala sa kanila ang kapakinabangan ng kapwa. Handa silang gawin ang lahat upang matupad ang ambisyon. Kahit nga ang mga marahas na gawain ay kanilang gagawin para sa ambisyon. At hihimukin pa nila ang lahat ng mga sumusuporta sa kanila na magkalat ng kasinungalingan para bumango ang kanilang pangalan at reputasyon sa madla. Sisirain ang lahat ng mga tumututol sa kanila. Kahit ang pagbabanta laban sa mga bumabatikos sa kanila ay kanilang gagawin. Hindi iyan ang gawain ng mga tunay na nasa panig ni Kristo. 

Kung tunay tayong nasa panig ng Panginoong Hesukristo, hindi tayo magdadala ng lagim at takot. Hindi tayo magpapalaganap ng kasinungalingan o paninira. Bagkus, tanging Siya mismo ang ating ihahatid at ipapalaganap sa lahat. Siya, ang bukal ng pag-ibig, katotohanan, at kapayapaan, ay ating dadalhin. Katulad ng Mahal na Birheng Maria, taglayin natin ang Panginoong Hesus sa ating mga puso at ihatid sa ating kapwa. Sapat na para sa atin ang ihatid si Hesus sa lahat. 

ANG TUNAY NA UMIIBIG AT SUMASAMPALATAYA KAY KRISTO

26 Mayo 2019 

Ikaanim na Linggo ng Pasko ng Muling Pagkabuhay (K) 

Mga Gawa 15, 1-2. 22-29/Salmo 66/Pahayag 21, 10-14. 22-23/Juan 14, 23-29 

CTTO: LightWorkers Media

Sa Ebanghelyo, inilahad ng Panginoong Hesus na Muling Nabuhay sa mga apostol ang mga katangian ng mga tunay na umiibig sa Kanya. Sabi ng Panginoong Hesus na ang mga tunay na umiibig sa Kanya'y tutupad sa Kanyang mga utos. Ang mga tunay na umiibig kay Hesus ay magsusumikap mamuhay ayon sa Kanyang mga utos. Ang mga tagubilin ng Panginoon ay sisikapin nilang isabuhay at isapuso. Sisikapin nilang maging kalugud-lugod sa Kanyang paningin. Sisikapin nilang mamuhay nang may kabanalan. 

Iyan ang pinagtuunan ng pansin ng liham na pinadala ng Konsiliyo sa Herusalem sa mga Hentil sa Unang Pagbasa. Sabi sa liham na iyon na ang pinakamahalaga ay ang katapatan sa Diyos. Ipakita ang kanilang katapatan sa Diyos sa pamamagitan ng kanilang mga salita't gawa. Ang mga masasamang gawain tulad ng pakikiapid at pagkain ng anumang inihandog sa mga diyus-diyusan, may dugo, o ng hayop na binigti (15, 29). Ito'y matapos nilang pagpasiyahan na huwag nang pilitin ang mga Hentil na magpatuli ayon sa batas ni Moises. Hindi na kailangang magpatuli ang mga Hentil na bagong binyag sa Simbahan. Bagkus, ang kailangan lamang nilang gawin bilang mga bagong binyagang Kristiyano ay sumunod sa mga utos at aral ni Kristo na ipinangaral ng mga apostol. Layuan at itakwil ang kasalanan. Isapuso at isabuhay ang Salita ng Panginoon. Kapag ginawa nila iyon, mapapatunayan nilang tunay silang umiibig at sumasampalataya sa Kanya. Iyan ang tunay na Kristiyano. Ang tunay na Kristiyano ay umiibig at sumasampalataya sa Panginoon nang buong katapatan. Ang kanilang mga salita't gawa ang magpapatunay nito. 

Sa Ikalawang Pagbasa, inilahad ni San Juan ang gantimpala ng Panginoon sa mga tunay na umiibig at sumasampalataya sa Kanya. Nakita niya sa isang pangitain ang pagbaba ng Herusalem, ang Banal na Lungsod, mula sa kalangitan. Ano ang nais ipahiwatig ni San Juan? Nais niyang ipahiwatig na ang Diyos ay mananahan sa piling ng mga tunay na umiibig at sumasampalataya sa Kanya. Iyan ang magiging gantimapala nila mula sa Diyos. Makakapiling nila ang Diyos magpakailanman. Ang buhay na walang hanggan sa piling ng Diyos sa langit ang magiging gantimpala nila. Iyan ang ipinapahiwatig ng pangitain ni San Juan - ang pagbaba ng Bagong Herusalem mula sa langit. Ang Diyos ay mamumuhay sa piling ng mga tunay na umiibig at sumasampalataya sa Kanya. 

Ang Mahal na Birheng Maria ay nagpakita ng kanyang pag-ibig at pananampalataya sa Panginoon. Ipinakita niya ito sa pamamagitan ng kanyang pagtalima sa Salita ng Diyos. Isinantabi niya ang kanyang mga sariling interes at naisin para lamang matupad ang kalooban ng Diyos sa pamamagitan niya. Ang kalooban ng Diyos ay buong kababaang-loob na tinanggap at tinupad ni Maria. Ang Salita ng Diyos ay isinapuso at isinabuhay niya hanggang sa huling sandali ng kanyang buhay sa lupa. Kaya, siya'y ibinigay sa atin bilang halimbawang dapat tularan. Siya'y ating Ina na dapat nating tularan. Nararapat lamang na tularan ang kanyang halimbawa. At ang halimbawang ipinakita ng Mahal na Inang si Maria ay ang kanyang tunay na pag-ibig at pananampalataya sa Diyos. 

Katulad ng Mahal na Inang si Maria, patunayan natin na si Kristo ay tunay nating iniibig at sinasampalatayanan nang buong puso. Patunayan natin ang ating pag-ibig at pananampalataya sa Kanya sa pamamagitan ng ating mga salita at gawa. Ang mga utos at aral ng Panginoon ay tuparin at sundin natin. Itapat natin sa ating mga puso't isipan ang Kanyang Salita. Iyan ang mga katangian ng mga tunay na umiibig at sumasampalataya kay Kristong Muling Nabuhay. At ang mga tunay na umiibig at sumasampalataya sa Panginoong Muling Nabuhay ay mamumuhay kapiling Niya magpakailanman sa Kanyang kaharian sa langit. 

MAGMAHAL KAHIT MAHIRAP

19 Mayo 2019 

Ikalimang Linggo sa Karaniwang Panahon (K) 

Mga Gawa 14, 21b-27/Salmo 144/Pahayag 21, 1-5a/Juan 13, 31-33a. 34-35 

Nagsimula ang Ebanghelyo sa pamamagitan ng pag-alis ni Hudas Iskariote mula sa senakulo. Umalis si Hudas Iskariote mula sa Huling Hapunan upang isagawa ang kanyang planong pagkanulo kay Hesus. Subalit, kahit nalalaman ni Hesus kung ano ang balak ni Hudas Iskariote, nakuha pa Niyang mangaral tungkol sa pagmamahal. Inutusan ng Panginoong Hesus ang mga apostol sa senakulo na magmahal tulad ng ginawa Niyang pagmamahal sa kanila. Kapansin-pansin ito, lalung-lalo na't ang pag-alis ni Hudas Iskariote mula sa silid kung saan si Hesus ay nakipagsalu-salo sa mga apostol bago Siya dakipin ang bumungad sa salaysay. Nakakapanlaki ng mata. 

Agad na iniutos ng Panginoong Hesukristo ang mga apostol na umibig matapos umalis mula sa silid si Hudas Iskariote upang ituro sa kanila na ang pagmamahal ay hindi madali. Mahirap magmahal, lalo na't kapag ang kaharap ng bawat isa ay yaong kinasusuklaman at kinapopootan. Mas madaling magpakita ng pagmamahal sa mga taong minamahal kaysa sa mga taong kinasusuklaman. Alam ni Hesus ang katotohanang ito tungkol sa bawat tao. Alam ni Hesus na hindi madaling ibigin ang mga nagkanulo at mga kinapopootan. Alam ni Hesus na mas madali para sa bawat tao na ibigin ang mga tunay na nagmamahal sa kanila. 

Kung batid ni Kristo na mahirap para sa bawat tao na magmahal, bakit ipinasiya pa rin Niyang iutos ito sa mga apostoles? Bakit Niya inutusan ang mga apostoles na magpakita ng pagmamahal katulad Niya? Siya mismo ang sumagot sa tanong na ito sa wakas ng Ebanghelyo. Sinabi Niyang iyan ang patunay na sila'y Kanyang mga apostol (13, 35). Mapapatunayan ng mga apostol na tunay nga silang nasa panig ni Hesus kapag sila'y nagmahal katulad Niya, gaano mang kahirap gawin ito. Kahit nga si Hesus, nagpakita ng pagmamahal kahit alam Niyang mahirap itong gawin. Isang halimbawa nito ay ang Kanyang ginawang pagpapakita ng pagmamahal sa alagad na nagkanulo sa Kanya na si Hudas Iskariote. Kahit batid Niya ang planong pagtraydor at pagbenta ni Hudas, minahal pa rin Niya ang alagad Niyang ito. 

Iyan ang nais iparating nina Apostol San Pablo at San Bernabe noong pinalakas nila ang loob ng kanilang mga alagad sa Listra, Iconio, at Antioquia sa Unang Pagbasa. Pinatatag nina Apostol San Pablo at San Bernabe ang loob ng mga hinikayat nilang maging mga Kristiyano sa mga nasabing bayan upang manatili silang tapat sa Diyos hanggang wakas. Mapapatunayan nilang sila'y tapat sa Panginoon sa pamamagitan ng pagtupad sa Kanyang utos - magmahal katulad Niya. At sa Ikalawang Pagbasa, inihayag na ang Diyos ay mananahan sa piling ng mga tao. Papawiin Niya ang mga luha mula sa mga mata ng bawat tao. Ang lahat ng bagay ay Kanyang babaguhin. Sa pamamagitan nito'y inihayag ng Diyos ang Kanyang pag-ibig. Kung tutuusin, hindi naman kailangan ng Diyos na gawin iyon. Maaari na lamang Niyang pabayaan na lamang Niyang mabulok ang lahat ng bagay at manatili sa Kanyang maluwalhating kaharian sa langit. Subalit, ipinasiya Niyang mahalin ang tao, kahit mahirap itong gawin dahil sa paulit-ulit na pagkakasala ng tao laban sa Kanya. Ang pangakong ito ng Diyos ay nagpapahayag ng Kanyang pag-ibig para sa bawat tao. 

Si Hesus ay nagpasiyang magpakita ng pagmamahal sa lahat kahit mahirap itong gawin. Ginawa Niya ito para sa lahat, lalung-lalo na para sa mga katulad ni Hudas Iskariote. At ang utos Niyang magmahal katulad ng ginawa Niyang pagmamahal ay hindi lamang para sa mga apostol kundi para sa bawat isa. Kapag sinunod natin ang utos na ito ng Panginoong Hesus, mapapatunayan nating tayo'y tunay ngang nasa panig Niya. Kahit mahirap, magmahal tayo katulad ni Hesus. 

HUWAG NATING MALIITIN ANG KANYANG TULONG

13 Mayo 2019 

Paggunita sa Mahal na Birhen ng Fatima 

Lunes sa Ikaapat na Linggo ng Pasko ng Pagkabuhay

Mga Gawa 11, 1-18/Salmo 41/Juan 10, 1-10 

Tampok sa salaysay sa Unang Pagbasa ang dalawang reaksyon ng mga apostol at ng iba pang mga sinaunang Kristiyano sa Judea sa balita ng pagtanggap ng mga Hentil sa Salita ng Diyos. Noong una nila itong nabalitaan, si Apostol San Pedro ay pinuna nila dahil sa kanyang pakikipaghalibuilo sa mga Hentil. Para sa kanila, ang mga Hentil ay hindi kabilang sa mga pinili't hinirang ng Diyos. Kaya gayon na lamang ang kanilang pagpupuna kay Apostol San Pedro. Subalit, nang marinig nila ang kuwento ni Apostol San Pedro tungkol sa kanyang nasaksihan sa sambahayan ni Cornelio sa Jope, silang lahat ay nagpuri sa Diyos. Pinuri nila ang Diyos sapagkat ipinakita Niya ang Kanyang habag sa mga Hentil. 

Iyan din ang inihayag ng Panginoong Hesus na Muling Nabuhay sa dulo ng salaysay sa Ebanghelyo. Inihayag Niyang Siya'y naparito upang bigyan ng isang buhay na ganap at kasiya-siya ang Kanyang kawan. Iyan ang habag ng Diyos. Ang mga kaloob ng Diyos sa atin ay tunay ngang mabuti. Walang masamang ibinibigay sa atin ang Panginoon. Siya ang nagbigay sa atin ng buhay. Siya ang nagbibigay ng pag-asa at kagalakan sa bawat isa. Ang mga kaloob ng Panginoon sa atin ang nagpapaalala sa atin na tayong lahat ay tunay Niyang iniibig at kinakalinga. 

Si Maria, ang Mahal na Birhen ng Fatima, ay ibinigay ng Panginoong Hesukristo sa ating lahat upang maging ating Mahal na Ina. Bilang ating Mahal na Ina, lagi niya tayong isinasama sa kanyang mga panalangin. Hindi niya tayo nakakalimutan sa kanyang mga panalangin. Lagi niyang ipinapanalangin ang ating kapakanan. Sa pamamagitan ng kanyang mga panalangin para sa ating lahat, ipinapakita ng Mahal na Birheng Maria ang kanyang pagmamahal at pagkalinga. 

Nang magpakita ang Mahal na Birheng Maria kila Sor Lucia at sa kanyang mga pinsang sina San Francisco at Santa Jacinta Marto sa bayan ng Fatima noong 1917, marami siyang ipinarating na mensahe sa kanila. Marami siyang ipinakiusap sa kanila. Subalit, ang kanyang pangunahing pakiusap sa Fatima, dasalin ang Santo Rosaryo araw-araw. Sa tuwing dinadasal natin ang Santo Rosaryo, tayong lahat ay sinasamahan ng Mahal na Ina sa pananalangin at pagninilay sa buhay ni Kristo. Hindi tayo nag-iisa sa pagdarasal ng Santo Rosaryo; ang Mahal na Birheng Maria ay kasama natin sa pagninilay at pananalangin. Tayong lahat ay tinutulungan ni Maria sa ating pagdulog at pananalangin kay Kristo para sa lahat ng ating mga kahilingan sa buhay at lalung-lalo na para sa kapayapaan sa buong daigdig. Tayong lahat ay sinasamahan ni Maria na dumulog at manalangin sa Diyos. Ang kaloob ng Diyos ay makakamit ng sinumang dumudulog at nananalangin sa Kanya sa tulong ng Mahal na Birheng Maria.

Kasama natin si Maria, ang Mahal na Birhen ng Fatima, sa ating pagdulog at pananalangin sa Diyos. Huwag nating maliitin ang kanyang pagtulong sa atin. Huwag nating kalimutan na tayong lahat ay kanyang mga anak na tunay niyang minamahal at kinakalinga. 

ANG MABUTING BALITA NG MABUTING PASTOL

12 Mayo 2019 

Ikaapat na Linggo ng Pasko ng Muling Pagkabuhay (K)

Linggo ng Mabuting Pastol 

Mga Gawa 13, 14. 43-52/Salmo 99/Pahayag 7, 9. 14b-17/Juan 10, 27-30 

Sa Ebanghelyo, inihayag ng Panginoong Hesus na Siya ang Mabuting Pastol. Siya ang nagbibigay ng buhay na walang hanggan sa Kanyang mga tupa. Ang Kanyang mga tupa ay hindi mapapahamak o maaagaw mula sa Kanya sapagkat ang Kanyang tinig ay kanilang nakikilala. Wala silang ibang pananaligan at susundan nang buong puso kundi ang Mabuting Pastol na si Hesus. Kapag ang tinig ng Muling Nabuhay na si Hesus ay kanilang narinig, pumapanatag ang kanilang loob dahil naniniwala silang hindi sila mapapahamak kapag Siya'y kapiling nila. 

Tampok sa pangitain ni San Juan na kanyang inilahad sa Ikalawang Pagbasa mula sa aklat ng Pahayag ang larawang ito ng Panginoong Hesus na Muling Nabuhay bilang Mabuting Pastol. Ang Korderong nakita ni San Juan sa kanyang pangitain, ang Korderong nasa gitna ng trono, ang papastol sa lahat ng tao (7, 17). Aarugain Niya ang lahat ng tao mula sa iba't ibang lipi, wika, bayan, at bansa. Ang lahat ng mga nagtipon at nagbigay-puri sa Kordero, na nakita rin ni San Juan sa kanyang pangitain, ay makakaranas ng pagkalinga mula sa nag-iisang Mabuting Pastol na si Kristong Muling Nabuhay. At ang pagkalinga ni Kristo bilang Mabuting Pastol ay tunay, wagas, at hindi mapapantayan. 

Iyan ang Mabuting Balita. Tunay at totoo ang pag-ibig at pagkalinga ng Mabuting Pastol na si Kristo. Ipinakita ni Kristo ang Kanyang pag-ibig at pagkalinga sa ating lahat na bumubuo sa Kanyang kawan dito sa lupa sa pamamagitan ng Kanyang krus at Muling Pagkabuhay. Tayong lahat ay binigyan Niya ng bagong buhay, pag-asa, at kalayaan sa pamamagitan ng Kanyang krus at Muling Pagkabuhay. Iyan ang buong siglang ipinangaral ng mga apostol at ng mga sinaunang Kristiyano katulad ni Apostol San Pablo at ng kanyang kasamang si San Bernabe sa Unang Pagbasa. Ang Mabuting Balita tungkol kay Kristo Hesus ay kanilang ipinangaral at ipinalaganap sa iba't ibang panig ng daigdig nang buong sigla at galak, kahit ang kapalit nito'y ang kanilang buhay dito sa lupa. 

Patuloy na ipinapangaral ng Simbahan sa kasalukuyan ang Mabuting Balita tungkol kay Hesus, ang Mabuting Pastol. Ang Mabuting Balita na ating pinapahalagahan at sinasampalatayanan nang buong puso bilang mga Kristiyano. Ang Simbahan ay hindi titigil o magsasawa sa pagbibigay ng halaga sa Mabuting Balitang ito, kahit ilang ulit itong napakinggan ng bawat Kristiyano sa paglipas ng panahon. Paulit-ulit na itinuturo ng Mabuting Balita kung paanong ipinamalas ng Mabuting Pastol na si Kristo Hesus sa pamamagitan ng Kanyang krus at Muling Pagkabuhay ang Kanyang pag-ibig at pagkalinga sa Kanyang kawan. Iyan ang ating sinasampalatayanan nang buong puso bilang mga Kristiyano. Iyan ang dahilan kung bakit ang bawat isa sa atin ay may pananampalataya sa Kanya bilang isang Simbahan. Ang Mabuting Pastol na si Hesus ay tunay na umiibig at kumakalinga sa atin. Pinatunayan Niya ito sa pamamagitan ng Kanyang krus at Muling Pagkabuhay. 

Mayroon tayong Mabuting Pastol na tunay na umiibig at kumakalinga sa ating lahat. Siya'y walang iba kundi ang Panginoong Hesus na Muling Nabuhay. Makinig at sumunod sa Kanya na tunay na umaaruga at nagmamahal sa atin. Pakinggan natin ang Kanyang tinig. Wala Siyang masamang balak laban sa atin. Siya'y hindi katulad ng ibang mga pastol na walang malasakit para sa Kanyang mga tupa. Ang bawat isa sa atin ay hindi Niya ipapahamak kailanman. Bagkus, tayong lahat ay makakaranas ng tunay na pag-aruga at pagmamahal mula sa Kanya. Ating ibigay sa Kanya ang buong puso nating pagmamahal, pananalig, at pagsamba sa Kanya. Siya, ang ating Panginoon at Diyos, ang tunay na umaaruga at nagmamahal sa bawat isa sa atin. Kapag ating pinakinggan at sinundan ang Kanyang tinig, ang ating mga puso't loobin ay mapapanatag dahil matitiyak natin na tayong lahat ay Kanyang iibigin at kakalingain. At ang Kanyang pag-ibig at pagkalinga ay tunay. 

MGA SAKSING PUSPOS NG GALAK AT PAG-IBIG

5 Mayo 2019 

Ikatlong Linggo ng Pasko ng Muling Pagkabuhay (K) 

Mga Gawa 5, 27b-32. 40b-41/Salmo 29/Pahayag 5, 11-14/Juan 21, 1-19 (o kaya: 21, 1-14) 

Galak at pag-ibig ang hatid ng Panginoong Hesus na Muling Pagkabuhay. Ito ang paksang binibigyan ng pansin sa mga Pagbasa. Katunayan, ang paksang ito'y paulit-ulit na tinatalakay at pinagninilayan ng Simbahan sa buong kapanahunan ng Pasko ng Muling Pagkabuhay na isang panahong inilalaan upang magdiwang nang buong kagalakan. At ang dahilan ng masaya nating pagdiriwang sa panahong ito ay walang iba kundi ang Muling Pagkabuhay ng Panginoong Hesukristo. 

May dalawang bahagi ang Ebanghelyo. Sa unang bahagi ng Ebanghelyo, nagpakita ang Panginoong Hesus na Muling Nabuhay sa mga apostol sa Lawa ng Galilea. Sa tulong ni Hesus, nakahuli ng maraming isda ang mga apostol. Iyon ang nagpamulat sa kanilang mga mata na ang nagturo sa kanila kung saan ihahagis ang lambat upang magkaroon ng huli ay walang iba kundi ang Panginoong Muling Nabuhay. Si Kristo lamang ang nakakagawa niyon. Ginawa Niya iyon dati noong una nila Siyang nakilala. Tinulungan ni Kristo ang mga apostol, lalung-lalo na sina Apostol San Pedro, San Andres, Santo Santiago, at San Juan, na makahuli ng maraming isda bago sila tawagin upang maging Kanyang mga alagad. At nang muling mabuhay, inulit Niya ito upang Siya'y makilala ng mga apostol. At nang makilala Siya ng mga apostol, si Apostol San Juan ang unang nakakilala sa Kanya sa grupong iyon, silang lahat ay napuspos ng galak. Iyan ang dahilan kung bakit si Apostol San Pedro ay tumalon mula sa bangka at lumangoy pabalik sa pampang kung saan si Hesus ay natagpuan nilang naghahanda ng almusal. Iyan ang unang kaloob ng Panginoong Hesukristong Muling Nabuhay sa mga apostol - galak. 

Sa ikalawang bahagi ng Ebanghelyo, tatlong ulit na tinanong ng Panginoong Hesus na Muling Nabuhay si Apostol San Pedro kung Siya ba'y iniibig niya matapos mag-almusal. Labis na nasaktan si Apostol San Pedro dahil sa tatlong ulit na pagtatanong ng Kristo kung Siya ba'y tunay niyang iniibig. Subalit, kahit labis siyang nasaktan, naramdaman pa rin ni Apostol San Pedro ang pag-ibig hatid ni Kristong Muling Nabuhay. Ang pag-ibig na humihilom at muling bumubuo sa mga labis na nasaktan. Sa pamamagitan nito, ipinakita't ipinadama ng Kristong Muling Nabuhay ang Kanyang pag-ibig. Si Apostol San Pedro ay tatlong ulit na tinanong ni Hesus tungkol sa kanyang pag-ibig para sa Kanya at tatlong ulit ring inutusang pakainin ang Kanyang mga tupa upang maranasan ang Kanyang paghihilom. Ganyan magmahal ang Panginoong Hesus na Muling Nabuhay. Ang lahat ng mga nasaktan ay binibigyan Niya ng pagkakataong maghilom at maging buo muli. Siya ang naghihilom at bumubuo muli sa mga labis na nasaktan. 

Kaya, ang mga apostol ay sumaksi sa Panginoong Muling Nabuhay taglay ang galak at pag-ibig na Kanyang kaloob. Buong sigla nilang ipinangaral ang Mabuting Balita tungkol sa Panginoong Hesukristo sa iba't ibang bahagi ng daigdig. Sa kabila ng lahat ng mga banta laban sa kanila, hindi sila tumigil sa pagpapatotoo tungkol kay Hesus. Tulad na lamang ng nasasaad sa Unang Pagbasa. Kahit na mahigpit silang ipinagbawal ng Sanedrin na mangaral tungkol sa Panginoong Hesus, ipinagpatuloy pa rin nila ang pangangaral tungkol sa Kanya. Katunayan, napahiya pa nga ang Sanedrin sa sagot ng mga apostol. Dahil napahiya ang buong Sanedrin, ipinasiya nilang palayain na lamang ang mga apostol. At ang mga apostol ay napuspos ng galak sa kanilang pag-alis dahil sa pagtulong ng Diyos. Tinulungan sila ng Diyos na harapin ang mga may masasamang balak laban sa kanila. Tinulungan Niya silang sagutin ang mga may masasamang balak laban sa kanila tulad ng Sanedrin. Dahil diyan, naipagpatuloy nila ang kanilang pagpapatotoo sa Panginoong Hesukristong Muling Nabuhay sa iba't ibang panig ng daigdig hanggang sa huli. 

Ito rin ang pinagtuunan ng pansin sa Ikalawang Pagbasa. Kahit na siya'y namuhay bilang isang taong desterado sa isla ng Patmos, hindi tumigil si San Juan sa pagpapatotoo tungkol sa Panginoong Hesus na Muling Nabuhay. Patuloy niya itong ginawa sa pamamagitan ng pagsusulat. At sa isla ng Patmos, nakatanggap siya ng mga pangitain mula sa Panginoon na isinulat niya sa aklat ng Pahayag. Sa tampok na pangitain sa Ikalawang Pagbasa, nakita ni San Juan kung paanong ang mga anghel at ang iba pang mga nilalang ay nagbigay papuri sa Korderong pinatay. Ang Korderong iyon ay walang iba kundi si Hesus, ang Muling Nabuhay na Panginoon. Siya, ang Panginoong naghahatid ng pag-ibig at galak, ay namatay ngunit muling nabuhay sa ikatlong araw. Sa pamamagitan ng Kanyang kamatayan sa krus at Muling Pagkabuhay, inihayag Niya ang Kanyang pag-ibig sa lahat. Kaya, ang lahat ay nagagalak sapagkat nakamit na Niya ang tagumpay sa pamamagitan ng Kanyang krus at Muling Pagkabuhay ni Hesus. At sa pagkamit ng tagumpay, galak at pag-ibig ang inihatid ng Panginoong Hesukristo sa lahat. 

Ang mga apostol ay sumaksi kay Hesus, ang Kristong Muling Nabuhay, taglay ang hatid Niyang galak at pag-ibig sa kanilang mga puso. Iyan ang dahilan kung bakit patuloy silang nangaral tungkol sa pag-ibig at habag ng Diyos sa pamamagitan ni Kristo Hesus sa iba't ibang bahagi ng daigdig. Sa kabila ng lahat ng mga pag-uusig na kanilang hinarap at dinanas, nanatili silang tapat sa kanilang misyon bilang mga saksi ni Kristo. Hindi naging hadlang ang dami ng mga banta ng mga nakaluklok sa kapangyarihan ng pamahalaan noon. Hindi rin sila tumigil sa pagsaksi kay Hesus dahil sa iba pang mga pagsubok sa buhay. Bagkus, patuloy silang ipinangaral at pinatotohanan ang Mabuting Balita tungkol kay Kristo Hesus na Muling Nabuhay hanggang sa kanilang huling hininga. Sa kasalukuyang panahon, ang Simbahan ang nagpapatuloy ng misyong ibinigay ni Hesus sa mga apostol. Hindi tumigil ang Simbahan sa pagtupad sa misyong ito kailanman. 

Hinahamon tayong lahat na tularan ang mga apostol. Tulad ng mga apostol, maging mga saksi tayo ng Panginoong Hesus na Muling Nabuhay. Tayong lahat ay tinatawag ng Panginoong Hesus upang maging Kanyang mga saksing puspos ng galak at pag-ibig na dulot Niya. Ipalaganap natin ang kaloob Niyang galak at pag-ibig na ating tinanggap sa bawat isa sa pamamagitan ng pagsaksi sa Kanya.