LIWANAG AT TAGAPAGLIGTAS

2 Pebrero 2020 
Kapistahan ng Pagdadala kay Hesus na Panginoon sa Templo 
Malakias 3, 1-4/Salmo 23/Hebreo 2, 14-18/Lucas 2, 22-40 (o kaya: 2, 22-32) 

Dalawang salita ang ginamit ni Simeon sa kanyang awitin o kantikulo na inilahad sa tampok na salaysay sa Ebanghelyo tungkol sa Paghahandog sa Sanggol na Hesus sa Templo. Ginamit ni Simeon ang dalawang salitang ito upang ipakilala si Hesus. Ang dalawang salita ito ay Tagapagligtas at Liwanag. Napakalinaw kung paanong pinagtutuunan ng pansin ng Simbahan ang dalawang salitang ito na nagpapakilala kay Hesus sa pagdiriwang ng Kapistahan ng Candelaria. Katunayan, ang dalawang ito ang nais bigyan ng pansin sa mga Pagbasa para sa Kapistahan ng Candelaria.

Tagapagligtas. Iyan ang pangunahing tungkulin ng Panginoong Hesukristo. Siya'y pumarito bilang Tagapagligtas. Ang Panginoong Hesus ay ipinagkaloob ng Ama sa ating lahat nang sumapit ang takdang panahon upang maging ating Tagapagligtas. Napakalinaw kung paanong pinagtuunan ng pansin sa Ikalawang Pagbasa ang misyong ito ni Hesus. At ang misyon ni Kristo bilang Tagapagligtas ay ipinagkaloob sa Kanya ng Diyos Ama. Ang misyong ibinigay ng Ama sa Panginoong Hesus ay iligtas ang sangkatauhan. Kaligtasan at hindi kapahamakan.

Liwanag. Ang Banal na Sanggol na si Kristo ay ipinakilala rin ni Simeon sa kanyang kantikulo bilang liwanag. Katunayan, nang lumaki si Kristo Hesus, inihayag Niya sa isa sa Kanyang mga pangaral na Siya ang liwanag ng sanlibutan (Juan 8, 12). Ang Panginoong Hesukristo ang tunay na liwanag. Ang kandilang binasbasan sa simula ng Banal na Misa sa espesyal na araw na ito ay nagsisilbing paalala para sa ating lahat na si Hesus ang tunay na liwanag. Liwanag at hindi kadiliman. 

Sa Unang Pagbasa, ang Diyos ay nagsalita sa pamamagitan ni propeta Malakias tungkol sa Kanyang pagdating. Tinupad ng Panginoong Diyos ang pahayag na ito nang sumapit ang takdang panahon sa pamamagitan ni Kristo. Nang si Kristo ay dumating sa daigdig, dumating ang liwanag at kaligtasan. Ang liwanag na hatid ng Panginoong Hesus ay sumindak sa kadilimang hatid ng demonyo at kamatayan na bumalot sa buong lupain, tulad ng inihayag ni propeta Isaias sa kanyang propesiya (9, 1). Ang lahat ng taong inalipin at pinahamak ng demonyo at ng kadiliman ay tinubos ng Panginoong Hesus sa pamamagitan ng Kanyang kamatayan sa krus at Muling Pagkabuhay. Sa pagdating ni Kristo, dumating ang liwanag at kaligtasan. 

Ang bawat isa sa atin ay pinapaalalahanan ng Simbahan sa araw na ito kung sino nga ba ang Panginoong Hesukristo. Ang Panginoong Hesus ay ang Liwanag at Tagapagligtas. Liwanag at kaligtasan ang hatid Niya sa lahat. Ang ating liwanag ay walang iba kundi ang ating Manunubos na si Kristo Hesus. 

Kaya naman, magpasalamat tayo sa Diyos sa araw na ito. Niloob Niyang dumating ang liwanag at kaligtasan sa daigdig sa pamamagitan ng Panginoong Hesukristo. Tayong lahat ay malaya ngayon. Tayong lahat ay ligtas na ngayon. Tayong lahat ay patuloy na namumuhay sa liwanag. Bakit? Dahil sa kabutihan ng Diyos para sa atin na ipinakita Niya sa pamamagitan ng ating Liwanag at Tagapagligtas na si Hesus. 

SUSUNOD KA BA SA TUNAY NA LIWANAG?

26 Enero 2019 

Ikatlong Linggo sa Karaniwang Panahon (A) 

Isaias 8, 23b-9, 3/Salmo 26/1 Corinto 1, 10-13. 17/Mateo 4, 12-23 (o kaya: 4, 12-17) 

Susunod ka ba sa tunay na liwanag? Ito ang tanong para sa bawat isa sa atin. Ang tanong na ito ay binuo ng mga Pagbasa para sa araw na ito. Ipinapakilala sa atin ng mga Pagbasa para sa araw na ito ang tunay na liwanag. Matapos ipakilala sa atin ang tunay na liwanag, tayong lahat ay binibigyan ng isang tanong upang ating mapagnilayan nang mabuti. 

Ang tunay na liwanag ay walang iba kundi si Hesus. Napakalinaw kung paano Siya ipinakilala ng mga Pagbasa bilang tunay na liwanag. Siya ang tunay na liwanag na sumindak sa dilim tulad ng inihayag ni propeta Isaias sa Unang Pagbasa. Siya ang liwanag pumawi sa dilim. Ang bayang matagal nang nabalot ng dilim ay nagkaroon ng liwanag dahil sa Panginoong Hesukristo. Si Hesus na nangaral sa lahat ng tao tungkol sa pagbabalik-loob at tumawag sa apat na mamamalakaya upang maging Kanyang mga unang alagad sa Ebanghelyo ang tunay na liwanag. 

Inilarawan naman ni Apostol San Pablo sa Ikalawang Pagbasa ang mga katangian ng mga tunay na sumusunod sa liwanag na si Kristo. Ang mga totoong sumusunod sa tunay na liwanag na si Kristo ay hindi mga panatiko. Bakit? Ang mga panatiko ay patuloy na namumuhay sa dilim. Pinapairal nila ang pagkabaha-bahagi at ang panatisismo. Kaya nga silang tinatawag na panatiko. Hindi naman sila seryoso sa kanilang pagsunod sa Panginoon. Ipinapalabas lamang nila na sumusunod sila sa tunay na liwanag na si Kristo kahit hindi naman. Hindi naman nila tinatanggap ang mga utos at atas ng Panginoon. Para sa kanila, laro-laro lamang ito. Ang tingin nila dito ay isang gimik lamang na hindi kailangang seryosohin. 

Hindi isang gimik ang pagsunod sa Panginoon. May mga kalakip na sakripisyo ang pagsunod sa tunay na liwanag na si Kristo Hesus. Ang mga tunay na sumusunod kay Hesus ay handang magsakripisyo alang-alang sa Kanya. Ang mga sakripisyo na kanilang ginagawa alang-alang sa Panginoong Hesukristo ay bukal sa kanilang mga puso't loobin. Sila ang mga may tunay na debosyon at pananampalataya sa ipinangakong Mesiyas na si Hesus, ang tunay na liwanag. Sila ang mga tunay na sumasamba at umiibig sa Kanya. 

May tanong ang Panginoon para sa atin. Tayo ba ay susunod sa Kanya. ang tunay na liwanag? Tayo ba ay magiging mga tunay na tagasunod o mga panatiko? 

ANG KANYANG KALOOBAN PARA SA ATIN

25 Enero 2020 

Kapistahan ng Pagbabagong-Buhay ni Apostol San Pablo 

Mga Gawa 22, 3-16 (o kaya: 9, 1-22)/Salmo 116/Marcos 16, 15-18 

Akalain niyo iyon? Ito ang madalas tanungin ng mga tao kapag nangyari ang hindi inaasahan. Malabo kasing mangyari ang mga pangyayaring iyon. Para sa marami, suntok sa buwan na lamang ang mga iyon. Kapag nangyari ang hindi inaaasahan, nagugulat sila. Para bang hindi kapani-paniwala na nangyari iyon. 

Ito rin ay masasabi natin tungkol kay Apostol San Pablo. Bago siya maging isang apostol at misyonero, si Apostol San Pablo ay naging tagausig ng mga sinaunang Kristiyano. Naging masigasig siya sa pag-usig sa mga sinaunang Kristiyano. Wala siyang pinatawad bilang tagausig ng mga sinaunang Kristiyano. Naging pursigido noon si Apostol San Pablo sa pagpapabagsak sa Simbahan. 

Subalit, matapos makatagpo ang Panginoong Hesus na Muling Nabuhay sa daan patungong Damasco, si Apostol San Pablo ay nangaral tungkol sa Kanya. Malaki ang kanyang pinagbago. Mula sa pagiging tagausig ng mga sinaunang Kristiyano, si Apostol San Pablo ay naging isang saksi ni Kristo. Nagpatotoo siya tungkol kay Kristo nang buong sigasig. Katunayan, ang misyong ibinigay ng Panginoon sa mga apostol sa Ebanghelyo ang siya namang ginagawa ni Apostol San Pablo. Ang laki talaga ng kanyang pinagbago. 

Biruin niyo, isang masigasig na tagausig ng mga sinaunang mananampalataya ang magpapatotoo tungkol kay Hesus? Sinong mag-aakalang mangyayari iyon? Kung hindi natin nakakalimutan, determinado noon si Apostol San Pablo na pabagsakin ang Simbahang itinatag ng Panginoong Hesukristo. Paano nga ba nangyari iyon? Nakakagulat nga talaga. Paano? 

Paano nga ba talaga nangyari iyon? Ito ay dahil niloob ng Diyos. Niloob ng Diyos na ang isang masigasig na tagausig ng mga sinaunang Kristiyanong katulad ni Apostol San Pablo ay maging Kanyang apostol at misyonero. Kahit na determinado si Apostol San Pablo na usigin ang mga sinaunang Kristiyano noon, niloob pa rin ng Panginoon na si Apostol San Pablo ay maging Kanyang saksi sa lahat. Iyan ang pinagtutuunan ng pansin ng salaysay ng pagbabagong-buhay ni Apostol San Pablo sa Unang Pagbasa. Sa kabila ng kanyang nakaraan, niloob pa rin ng Panginoon na maging Kanyang saksi sa iba't ibang bahagi ng daigdig si Apostol San Pablo. At ang kalooban ng Panginoon para kay Apostol San Pablo ay nanaig sa huli. 

Katulad ni Apostol San Pablo, may kalooban ang Diyos para sa ating lahat. Nawa'y manaig ito sa huli. Pahintulutan nawa natin na manaig ang kalooban ng Diyos para sa bawat isa sa atin sa huli. 

SA PAMAMAGITAN NG SANTO NIÑO, ANG TAGUMPAY NG PAG-IBIG NG DIYOS AY NAHAYAG

19 Enero 2020 

Kapistahan ng Panginoong Hesus, ang Banal na Sanggol (A) 

Isaias 9, 1-6/Salmo 97/Efeso 1, 3-6. 15-18/Mateo 18, 1-5. 10 

"Kahit saa'y namamalas tagumpay ng Nagliligtas" (Salmo 97, 3k). Napakaganda ng itinuturo at pinagtutuunan ng pansin sa mga salitang ito sa Salmo para sa espesyal na araw na ito. Kaya naman, angkop na angkop ang mga salitang ito sa Salmo para sa pagdiriwang ng Pista ng Mahal na Poong Santo Niño. Sa mga salitang ito, ang pagtubos ng Diyos sa bawat tao ay pinagtuunan ng pansin. Ang Panginoong Diyos ay naging matagumpay sa Kanyang pagtubos sa sangkatauhan.

Tinalakay sa mga Pagbasa para sa Kapistahan ng Santo Niño ang tagumpay ng planong pagtubos ng Diyos sa sangkatauhan. Iyan ang ipinapaalala ng Santo Niño sa bawat isa. Ang Santo Niño ay nagsisilbing paalala ng matagumpay na pagtubos ng Diyos sa sangkatauhan. Ang Panginoon ay nagtagumpay sa Kanyang plano na iligtas ang sangkatauhan. Hindi nauwi sa kabiguan ang planong ito ng Diyos. Hindi binigo ng Diyos ang sangkatauhan. Bagkus, ang plano ng Panginoon na iligtas ang lahat ng tao ay naging matagumpay. 

Sa Unang Pagbasa, binigyan ng pansin kung ano ang ginawa ng Panginoon upang iligtas ang sangkatauhan. Inihayag sa Unang Pagbasa na may ipagkakaloob ang Diyos sa sangkatauhan. Isang sanggol na lalaki ang ipagkakaloob ng Diyos upang maisakatuparan ang Kanyang planong pagtubos sa sangkatauhan. Ang biyaya ng pagliligtas ng Diyos ay dumating sa daigdig sa pamamagitan ng isang sanggol na lalaki. At ang Sanggol na ito'y walang iba kundi ang Panginoong Hesus, ang Santo Niño. Sa pamamagitan ng Panginoong Hesukristo, ang Santo Niño, ang bawat tao ay tinubos ng Diyos. 

Ang Panginoong Hesus ay nangaral sa mga apostol tungkol sa pagkakaroon ng kababaang-loob sa Ebanghelyo. Ang pagiging mapagpakumbaba katulad ng isang bata. Iyon ang ginawa ni Hesus nang Siya'y dumating sa daigdig. Si Hesus ay hindi dumating agad-agad taglay ang buo Niyang kapangyarihan bilang Diyos. Bagkus, Siya'y dumating bilang isang Sanggol. Tinanggap Niya ang pagiging isang Sanggol nang buong kababaang-loob. Buong kababaang-loob na tinanggap ni Hesus ang pagiging Anak ng Mahal na Birheng Maria. Iyan si Hesus, ang Santo Niño. 

Bakit iyan ang piniling gawin ng Panginoon? Sabi ni Apostol San Pablo sa kanyang pangaral sa Ikalawang Pagbasa na pag-ibig ang dahilan. Dahil sa Kanyang pag-ibig, niloob ng Diyos na tayong lahat ay maging mga anak Niya sa pamamagitan ni Kristo. Iyan ang dahilan kung bakit iniligtas ng Diyos ang sangkatauhan. Pag-ibig ang dahilan. Pag-ibig ang dahilan kung bakit tayong lahat ay iniligtas ng Diyos. 

Patuloy na ipinapaalala sa atin ng Mahal na Poong Santo Niño ang tagumpay ng Diyos. Tagumpay bunga ng pag-ibig. Tagumpay ng pag-ibig ng Panginoon. Dahil sa Kanyang pag-ibig, tayong lahat ay Kanyang iniligtas. Sa pamamagitan ng pagtubos Niya sa atin, nagtagumpay ang Kanyang pag-ibig. 

BINIGYAN NG TAGAPAGLIGTAS DAHIL SA KANYANG KAGANDAHANG-LOOB

12 Enero 2020 

Kapistahan ng Pagbibinyag sa Panginoon (A) 

Isaias 42, 1-4. 6-7/Salmo 28/Mga Gawa 10, 34-38/Mateo 3, 13-17 

"Hayaan mo itong mangyari ngayon; sapagkat ito ang nararapat nating gawin upang matupad ang kalooban ng Diyos" (Mateo 3, 15). Ito ang mga salita ni Hesus kay San Juan Bautista bago Siya binyagan sa Ilog Jordan. Noong lumapit ang Panginoong Hesus upang magpabinyag, agad na tumutol si San Juan Bautista. Ito ay dahil hindi siya karapat-dapat magbinyag sa Panginoong Hesus. Batid ni San Juan Bautista na higit na dakila si Hesus kaysa sa kanya. Isa pa, si Hesus ay hindi gumawa ng kasalanan kailanman. Subalit, sa kabila ng lahat ng ito, niloob ng Ama na si Hesus ay binyagan ni San Juan Bautista. Matapos ang paliwanag ni Hesus, bininyagan Siya ni San Juan Bautista. 

Bakit nga ba niloob ng Ama na binyagan si Hesus? Tandaan, si Hesus ay Diyos rin katulad ng Ama. Ang Panginoong Hesukristo ay ang Diyos Anak, ang Pangalawang Persona ng Banal na Santatlo. Bakit naman nanaisin ng Diyos Ama na si Hesus ay magpabinyag kay San Juan Bautista? Bakit naging bahagi ng planong pagtubos sa sangkatauhan ang pagbibinyag sa Diyos na nagkatawang-tao na si Kristo? Hindi naman nagkasala si Kristo kailanman. 

Niloob ng Ama na ang Panginoong Hesukristo ay binyagan ni San Juan Bautista dahil sa Kanyang kagandahang-loob. Ang kagandahang-loob na ito ng Diyos ang ipinangaral at pinatotohanan ni Apostol San Pedro sa Ikalawang Pagbasa. Dahil sa kagandahang-loob ng Diyos, dumating si Kristo sa daigdig upang tubusin ang bawat tao. Si Kristo ang larawan ng kagandahang-loob ng Diyos para sa lahat. Sa pamamagitan ni Kristo Hesus, nahayag ang kagandahang-loob ng Diyos. 

Isinalamin ng Panginoong Diyos ang Kanyang kagandahang-loob sa pangakong binitiwan Niya sa Unang Pagbasa. Ipinakilala ng Diyos ang Kanyang lingkod na Kanyang isusugo sa Kanyang bayan pagdating ng takdang panahon. Ang Kanyang lingkod ay magiging mahinahon. Paiiralin Niya ang kapayapaan at katarungan. Ang pangakong ito'y natupad sa pamamagitan ni Hesus. Ang mga katangian ng lingkod na ipinakilala ng Diyos sa Unang Pagbasa ay nakita sa Panginoong Hesus. Ang misyong ibinigay ng Diyos sa lingkod na ito ay tinupad ni Hesus. Tinupad ng Diyos ang pangako Niyang ito sa pamamagitan ng Panginoong Hesus nang sumapit ang takdang panahon. 

Si Hesus ay ipinagkaloob sa atin ng Ama dahil sa Kanyang kagandahang-loob. Ang bawat isa sa atin ay biniyayaan ng Ama ng isang Tagapagligtas. Ang Tagapagligtas na ibinigay ng Ama sa lahat ay walang iba kundi si Hesus. Sa pamamagitan ni Hesus, tinubos ng Diyos ang sangkatauhan. 

Tayong lahat ay tunay na mapalad. Isang Manunubos ang ipinagkaloob ng Diyos sa bawat isa sa atin. Siya'y walang iba kundi si Hesus, ang Bugtong na Anak ng Ama na bininyagan ni San Juan Bautista sa Ilog Jordan. 

SIYA ANG UMAAKAY SA ATIN

5 Enero 2020 

Dakilang Kapistahan ng Pagpapakita ng Panginoon 

Isaias 60, 1-6/Salmo 71/Efeso 3, 2-3a. 5-6/Mateo 2, 1-12 

Ang mga Pagbasa para sa Dakilang Kapistahan ng Pagpapakita ng Panginoon ay tungkol sa liwanag na nagmumula sa langit. May dahilan kung bakit ginagamit ng Diyos ang liwanag na ito. Tinalakay sa mga Pagbasa ang tunay na dahilan kung bakit ginagamit Niya ang liwanag na ito. Ang Diyos ay hindi lamang nagpapamalas ng Kanyang kapangyarihan. Mas mas malalalim na dahilan higit pa rito. 

Sa Unang Pagbasa, binigyan ng pansin ni propeta Isaias sa kanyang pahayag ang liwanag na nagmumula sa Panginoon. Aaakitin ng Panginoong Diyos ang lahat ng mga hari mula sa iba't ibang mga bansa sa daigdig sa pamamagitan ng Kanyang kaningningan. Ang lugar na pinili ng Diyos upang sinagan ng Kanyang liwanag ay ang lungsod ng Herusalem. Sa Ebanghelyo, isinalaysay kung paanong ang tatlong Pantas ay naglakbay nang napakalayo, mula pa sa Silangan, upang hanapin ang bagong silang na Sanggol. Paano nila nahanap ang Banal na Sanggol? Ang talang nakita nila sa Silangan ang umakay sa kanila. Ang mismong Banal na Sanggol na si Hesus ang umakay sa kanila. Sa pamamagitan ng maningning na tala sa langit, inakay ni Kristo ang mga Pantas mula sa Silangan patungo sa Kanya. Ang tala sa langit ay ipinagkaloob ng Panginoong Hesus sa mga Pantas upang maging gabay nila sa kanilang paglalakbay. 

Bakit naman nanaisin ng Panginoon na may lalapit sa Kanya? Bakit naman Niya nanaisin ang presensya ng mga taong makasalanan? Kung tutuusin, hindi naman kailangan ng Panginoon ang presensya ng sinumang tao. Huwag nating kalimutan, Siya'y higit na dakila kaysa sa mga pantas na dumalaw sa Kanya. Higit rin Siyang dakila kaysa kay Haring Herodes na may masamang balak laban sa Kanya. Kaya, ang tanong, bakit Niya inakay ang mga Pantas patungo sa Kanya? Ano naman ang mayroon sa mga Pantas na ito na hindi naman taga-Israel? 

Inakay ng Panginoon ang tatlong Pantas patungo sa Kanya sa pamamagitan ng talang nagningning mula sa kalangitan dahil sa Kanyang kagandahang-loob. Ang kagandahang-loob na ito ng Panginoon para sa lahat ang pinatotohanan ni Apostol San Pablo sa Ikalawang Pagbasa. Ang kagandahang-loob ng Panginoong Diyos ay para sa lahat. Anuman ang lahi ng bawat tao, ipagkakaloob pa rin sa kanila ng Diyos ang Kanyang kagandahang-loob. Ang Diyos ay hindi maramot sa ating lahat. Hindi ipagkakait ng Diyos sa sinumang tao ang Kanyang kagandahang-loob. 

Sa kabila ng ating pagka-makasalanan, ang Diyos ay nagmamagandang-loob pa rin sa atin. Patuloy Niyang ipinagkakaloob ang Kanyang kagandahang-loob sa atin. Ang bawat isa sa atin ay patuloy Niyang binibigyan ng pag-asa sa pamamagitan ng pagkakaloob ng Kanyang kagandahang-loob. Ang ating pagka-makasalanan ay hindi hadlang para sa Diyos. Ilang ulit man tayong magkasala laban sa Kanya, ang Diyos ay magpapatuloy sa pagbibigay ng pag-asa sa bawat isa sa pamamagitan ng pagpapakita ng Kanyang kagandahang-loob. Habang humihinga pa tayo dito sa lupa, may pag-asa pa tayo dahil ang Diyos ay nagmamagandang-loob. 

Ang mga Pantas ay sumunod sa tala ng Panginoong Hesukristo. Pumayag sila na sila'y gabayan ng tala ng Panginoon. Ang kanilang pagsunod sa tala ni Kristo ay naging bukal sa kanilang mga puso at kalooban. Katulad ng mga Pantas, sumunod tayo kay Hesus. Payagan natin ang Panginoong Hesus na maging ating gabay sa bawat sandali ng ating paglalakbay. Maging bukal nawa sa ating mga puso at kalooban ang ating pagsunod kay Hesus.