TUNAY NA PAGTANGGAP SA POONG JESUS NAZARENO

6 Oktubre 2023 

Biyernes ng Ika-26 na Linggo sa Karaniwang Panahon (I) 

Baruc 1, 15-22/Salmo 78/Lucas 10, 13-16 

SCREENSHOT: #QuiapoChurch Official 6PM #OnlineMass | 24 Sept 2023 - 25th Sunday in Ordinary Time (Facebook and YouTube) 

Mga malalakas na salita ang binigkas ng Poong Jesus Nazareno sa Ebanghelyo para sa araw na ito ng Biyernes, ang araw na inilaan ng Simbahan para sa taimtim na debosyon at pagninilay sa Kaniyang pagpapakasakit at pagkamatay sa Krus na Banal, gaya ng inilalarawan ng sagradong imahen ng Poong Jesus Nazareno. Sabi ng Mahal na Poong Jesus Nazareno na mapapahamak ang mga bayang Kaniyang binanggit sa Ebanghelyo dahil hindi tunay ang kanilang pagtanggap sa Kaniya. Panlabas lamang ang kanilang pagtanggap sa Mahal na Poong Jesus Nazareno. Hindi naman tunay at tapat ang pagtanggap sa Kaniya ng mga tagaroon noong kapanahunang yaon. 

Nananatili pa rin ang saysay ng mga salitang Kaniyang binigkas sa Ebanghelyo para sa araw na ito sa kasalukuyang panahon. Hindi lamang Niya ito binigkas para sa mga bayan ng Corazin, Betsaida, Capernaum, at iba pa. Bagkus, ang mga salitang ito ay para sa lahat ng tao, anuman ang panahon. Isa lamang ang nais sabihin ng Poong Jesus Nazareno. Ang pagtanggap sa Kaniya ay dapat maging taos-puso, tunay, at tapat. Mapapahamak ang mga hindi tumatanggap sa Kaniya nang taos-puso, tunay, at tapat. 'Di natin madadaanan sa pagbabalat-kayo ang pagtanggap at pagsunod sa Mahal na Poong Jesus Nazareno. 

Paano nga ba magiging tunay at tapat ang pagtanggap sa Poong Jesus Nazareno? Isa lamang ang dapat nating gawin. Sa Unang Pagbasa, inilarawan ang mga pagkukulang at kasalanan ng bayang Israel laban sa Panginoong Diyos. Katunayan, ang pahayag na ito ay iniutos na ipahayag ng mga Israelita. Sa pamamagitan nito, inaamin ng mga Israelita ang kanilang mga pagkukulang at kasalanan laban sa Panginoong Diyos at taos-puso silang humihingi ng habag at awa mula sa Kaniya. Nakatuon rin sa awa ng Diyos ang Salmong Tugunan para sa araw na ito. Katunayan, isa itong dalangin kung saan humihingi ng habag at awa mula sa Diyos ang umaawit at nagdarasal. 

Isa lamang ang aral na nais ituro sa atin sa araw na ito. Ang tunay na pagtanggap sa Poong Jesus Nazareno ay pagtalikod sa makasalanang pamumuhay at pagtanggap sa biyaya ng bagong buhay na Kaniyang kaloob sa mga taos-pusong nagpasiyang tanggapin at sundin Siya. Kinakailangan nating pahintulutan natin Siyang baguhin ang ating mga buhay kung tunay natin Siyang tinatanggap. Hindi ito madadaanan sa mga salita lamang. Mayroon itong kaakibat na gawa - pagsisihan at talikdan ang lahat ng ating mga kasalanan at makasalanang pamumuhay at tanggapin ang biyaya ng bagong buhay na Kaniyang kaloob sa atin.

HINDI TAYO SINUSUKUAN NG DIYOS

1 Oktubre 2023 

Ika-26 na Linggo sa Karaniwang Panahon (A) 

Ezekiel 18, 25-28/Salmo 24/Filipos 2, 1-11 (o kaya: 2, 1-5)/Mateo 21, 28-32 

This image from Richard Gunther (www.richardgunther.org) via FreeBibleimages (FreeBibleimages.org) is made available under a Creative Commons Attribution-NonCommercial 4.0 International License (CC BY-NC 4.0). 

Tayong lahat ay hindi sinusukuan ng Diyos. Ito ang aral na nais pagtuunan ng pansin at pagnilayan sa mga Pagbasa para sa Linggong ito. Dahil dito, tayong lahat ay lagi Niyang binibigyan ng pagkakataong upang magsisi at magbalik-loob sa Kaniya upang matahak natin ang landas ng kabanalan, ang landas patungo sa Kaniya. Gaano mang karami at kabigat ang ating mga kasalanan laban sa Panginoong Diyos at kapwa, hindi Niya tayo susukuan. Habang patuloy tayong namumuhay at naglalakbay nang pansamantala sa mundong ito, lagi Niya tayong bibigyan ng pagkakataong maging banal at kalugud-lugod sa Kaniyang paningin nang sa gayon ay makapiling natin Siya sa maluwalhati Niyang kaharian sa langit magpakailanman. 

Malakas na inihayag ng Panginoong Diyos sa pamamagitan ng Propetang si Ezekiel sa Unang Pagbasa para sa Linggong ito na pagkakalooban ng buhay ang mga taos-pusong nangagsisisi at nagbalik-loob sa Kaniya. Gaano man karami o kasama ang kanilang mga kasalanan, kapag taos-puso nilang ipinasiyang pagsisihan at talikdan ang kanilang makasalanang pamumuhay, magbalik-loob sa Kanya, at mamuhay nang banal at kalugud-lugod sa paningin ng Diyos, pagkakalooban Niya sila ng buhay na walang hanggan. Sa Ikalawang Pagbasa, inilarawan kung paanong ang Mahal na Poong Jesus Nazareno ay namuhay nang banal at kalugud-lugod sa paningin ng Ama hanggang kamatayan sa Krus. Ang kababaang-loob ng Panginoong Jesus Nazareno na Siyang bukal ng lahat ng kabanalan ay nagdulot ng kaligtasan sa ating lahat. Sa pamamagitan ng kababaang-loob ng Nuestro Padre Jesus Nazareno na naghayag ng Kaniyang kabanalan at nagdulot ng kaligtasan sa lahat, inihayag ng Diyos sa lahat na hindi Niya tayo susukuan habang pansamantala tayong namumuhay at naglalakbay dito sa mundong ito. Lagi Niya tayong bibigyan ng pagkakataong maging banal at kalugud-lugod sa Kaniyang paningin upang Siya'y ating makasama sa maluwalhati Niyang kaharian sa langit magpakailanman. Sa Ebanghelyo, ang kagandahang-loob, pag-ibig, habag, at awa ng Diyos ay inilarawan ng Poong Jesus Nazareno nang buong linaw sa talinghagang Kaniyang isinalaysay sa mga saserdote at matatanda ng bayan na walang iba kundi ang Talinghaga tungkol sa Dalawang Anak. Noong una, pinili ng unang anak na huwag gawin ang ipinagawa ng kaniyang ama, ngunit nagbago ang kaniyang isip at ginawa niya iyon habang ipinasiya naman ng ikalawang anak noong una na gawin iyon ngunit hindi naman niya iyon ginawa sa huli. 

Sabi sa Salmong Tugunan para sa Linggong ito: "Poon, Iyong gunitain wagas Mong pag-ibig sa 'kin" (Salmo 24, 6a). Lagi itong ginagawa ng Diyos para sa atin. Hindi Niya tayo sinusukuan. Kahit hindi tayo karapat-dapat dahil sa dami at bigat ng ating mga kasalanan, hindi Niya tayo sinusukuan. Lagi Niya tayong binibigyan ng pagkakataong maging banal at kalugud-lugod sa Kaniyang paningin. Nais Niya tayong baguhin at pagindapating makasama Siya sa maluwalhati Niyang kaharian sa langit sa wakas ng ating buhay sa daigdig na ito. Iyon nga lamang, binigyan rin Niya tayo ng kalayaan upang makapagpasiya tayo para sa ating mga sarili. Hindi Niya tayo pipiliting gawin iyon kung hindi iyon ang ating nais. Igagalang Niya ang anumang ating ipasiya. Nais man Niya tayong isama sa Kaniyang maluwalhating kaharian sa langit, hindi tayo pipiliting sumama sa Kaniya. Tayo mismo ang magapapasiya para sa ating mga sarili. Subalit, hindi ito nangangahulugang susukuan tayo ng Diyos. Hindi madaling sumuko ang Diyos. Lagi Niya tayong bibigyan ng pagkakataong maging banal. 

Kung ang tao ay madaling sumuko, hindi basta-basta susuko ang Panginoon. Habang patuloy tayong namumuhay at naglalakbay dito sa mundong ito nang pansamantala, may pag-asa para sa bawat isa sa atin dahil hindi tayo susukuan ng Diyos. Lagi Niya tayong bibigyan ng pagkakataong pagsisihan at talikdan ang kasalanan, magbalik-loob sa Kaniya, at tahakin ang landas ng kabanalan. 

MGA KASAMANG NAGPUPURI, NAGLILINGKOD, AT SUMASAMBA SA DIYOS

29 Setyembre 2023 

Kapistahan nina Arkanghel San Miguel, San Gabriel, at San Rafael 

Daniel 7, 9-10. 13-14 (o kaya: Pahayag 12, 7-12a)/Salmo 137/Juan 1, 47-51 

This faithful photographic reproduction of the painting (c. 1516) Altarpiece of the three archangels by Marco d'Oggiono (1470–), as well as the actual work of art from the Pinacoteca di Brera via the Web Gallery of Art, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author (its painter) died in 1530. This work of art is also in the Public Domain in the United States because it was published (or registered with the U.S. Copyright Office) before January 1, 1928.

Ang araw na ito ay inilaan ng Simbahan upang magpasalamat sa Paginoong Diyos sa biyaya ng mga Arkanghel na sina San Miguel, San Gabriel, at San Rafael. Hindi natin sila sinasamba kundi pinararangalan at binibigyan ng galang. Katulad ng mga taong kabilang sa kasamahan ng mga banal, itinuturo tayo ng mga Arkanghel na sina San Miguel, San Gabriel, at San Rafael sa tunay na Diyos na dapat nating sambahin. Isa lamang ang tunay na Diyos na binubuo ng Tatlong Persona - ang Ama, ang Anak na si Jesus Nazareno, at ang Espiritu Santo. 

Sa mga Pagbasa para sa araw na ito, inilarawan ang tungkulin ng mga Arkanghel at ang iba pang pangkat ng mga anghel sa langit. Sa Unang Pagbasa, inilahad ni Propeta Daniel ang kaniyang mga nakita sa isang pangitain. Sa pangitaing yaon, nakita niya kung paanong ang Anak ng Tao na walang iba kundi ang ipinangakong Mesiyas ay pinaglingkuran ng lahat ng nilalang, kasama na rito ang mga Arkanghel at pati na ang iba pang mga pangkat ng mga anghel at hukbo sa kaharian ng Panginoong Diyos sa langit. Sa alternatibong Unang Pagbasa para sa araw na ito, inilarawan kung paanong nagtagumpay ang mga anghel ng Panginoon sa pangunguna ng Arkanghel na si San Miguel laban sa mga rebeldeng anghel na pinagunahan ni Lucifer na mas kilala natin bilang si Satanas na tumalikod at naghimagsik laban sa Diyos. Ang mga anghel na ito na pinagunahan ng Arkanghel na si San Miguel ay nagpasiyang manatiling tapat sa Panginoong Diyos hanggang sa huli sa halip na talikuran, suwayin, at maghimagsik laban sa Kaniya. Ang kaluwalhatian ng Diyos ay inilarawan ng Mahal na Poong Jesus Nazareno sa Banal na Ebanghelyo para sa Kapistahang ipinagdiriwang ng Simbahan sa araw na ito. Ang Anak ng Tao, na walang iba kundi Siya, ay paglilingkuran ng lahat, kabilang na ang mga anghel. 

Inilarawan sa Salmong Tugunan ang pagkakataong ibinibigay sa atin ng Diyos araw-araw habang nagpapatuloy ang ating buhay at paglalakbay nang pansamantala sa mundong ito. Sabi sa Salmong Tugunan para sa araw na ito: "Poon, Kita'y pupurihin sa harap ng mga anghel" (Salmo 137, 1k). Katunayan, ang mga salitang ito ay isang pangako para sa lahat ng mga magpapasiyang manatiling tapat sa Diyos. Tayong lahat ay maaaring maging kabilang at kasama sa mga nagpupuri at sumasamba sa Diyos magpakailanman sa Kaniyang maluwalhating kaharian sa langit kung pipiliin nating maging tapat sa Kaniya hanggang sa huli. Ang dapat lagi nating piliin ay ang kabutihan at kabanalan upang mapabilang rin tayo sa lahat mga nag-aalay ng taos-pusong papuri, pasasalamat, at pagsamba sa Panginoong Diyos sa langit sa wakas ng ating buhay sa mundong ito. 

Tayong lahat na naglalakbay sa mundong ito nang pansamantala lamang ay laging ginagabayan ng mga Arkanghel na sina San Miguel, San Gabriel, at San Rafael at ang lahat ng mga anghel at banal sa langit patungo sa dapat nating ibigay ang ating taos-pusong katapatan at pananalig. Susunod ba tayo sa kanila? 

PAALALA O SAGISAG NG ATING MISYON

28 Setyembre 2023 

Dakilang Kapistahan ng Pagtatalaga ng Dambana ng Simbahan ng Quiapo 

Ezekiel 47, 1-2. 8-9. 12/Salmo 45/1 Corinto 3, 9k-11. 16-17/Juan 4, 19-24 

Sa lahat ng mga Simbahan sa Pilipinas, ang ika-28 ng Setyembre ay inilaan para sa espesyal na pagdiriwang ng Paggunita sa Unang Pilipinong Santo at Martir na si San Lorenzo Ruiz. Ang Paggunitang ito na ipinagdiriwang taun-taon tuwing sasapit ang ika-28 ng Setyembre ay ipinagdiriwang sa lahat ng mga Simbahan sa bansa, lalung-lalo na sa mga Simbahang si San Lorenzo Ruiz ay ang Titular na Patron kung saan ito ay ipinagdiriwang bilang isang Dakilang Kapistahan, maliban lamang sa isa. Espesyal rin ang araw na ito para sa isang makasaysayan at masikat na Simbahan sa Pilipinas, na walang iba kundi ang Basilika Menor at Pambansang Dambana ng Mahal na Poong Jesus Nazareno at Parokya ni San Juan Bautista na mas kilala ng marami bilang Simbahan ng Quiapo. Ito ay dahil ang araw na ito ay ang araw na inilaan upang gunitain ang Pagtatalaga ng Dambana ng Simbahan ng Quiapo. 

Batid naman ng marami, pati na rin ang mga 'di Katoliko, na dinarayo ng maraming mga deboto at mananampalataya ang Simbahan ng Quiapo. Kahit na ang Titular na Patron ng Simbahan ng Quiapo ay si San Juan Bautista, ang Poong Jesus Nazareno ay ang dahilan kung bakit dinarayo ng maraming mga deboto at mananampalataya ang Simbahan ng Quiapo. Maulan man o maaraw, mayroon mang bagyo o wala, ang lahat ng mga deboto at mananampalataya ay tumutungo pa rin sa Simbahan ng Quiapo upang magpuri, magpasalamat, at sumamba sa Poong Jesus Nazareno. Hindi sila tumutungo sa Simbahan ng Quiapo upang sambahin ang imahen o rebulto ng Poong Jesus Nazareno. Bagkus, ang imahen ng Poong Jesus Nazareno ay pinararangalan at binibigyan ng galang ng mga deboto at mananampalataya sapagkat sinasagisag nito ang dakilang pag-ibig, kagandahang-loob, habag, at awa ng Diyos na inihayag Niya sa lahat sa pamamagitan ni Kristo, ang Nuestro Padre Jesus Nazareno. 

Dahil sa dakilang pag-ibig, kagandahang-loob, habag, at awa ng Diyos, ipinasiya Niya nang kusang-loob na iligtas ang sangkatauhan. Upang ganap Niyang mailigtas ang sangkatauhan, ipinagkaloob Niya ang Kaniyang Bugtong na Anak na si Kristo Hesus bilang ipinangakong Mesiyas at Manunubos. Alang-alang sa atin, ang Bugtong na Anak ng Diyos ay naghandog ng sariling buhay sa Banal na Krus. Ito ang sinasagisag o ipinapaalala sa atin ng banal na imahen ng Nuestro Padre Jesus Nazareno. 

Inilarawan ang Simbahan sa mga Pagbasa bilang isang batis. Mula sa batis, ang tubig ay dumadaloy at umaagos. Ang Simbahan ay naiiba sa lahat ng mga batis sapagkat mula sa mismong batis na ito ang tubig ng buhay na walang iba kundi ang dakilang biyaya ng Diyos. Sa lahat ng mga biyayang ipinagkaloob ng Diyos sa atin, isa lamang sa mga ito ang namumukod-tangi at naiiba sa lahat - ang biyaya ng kaligtasan sa pamamagitan mismo ni Jesus Nazareno na Siyang pinakadakilang biyayang ibinigay ng Diyos sa atin. 

Ang pangitain ni Propeta Ezekiel sa Unang Pagbasa para sa araw na ito ay nakatuon o nakasentro sa larawan ng Templo bilang daluyan ng mga biyaya ng Panginoon. Sa larawan ring ito nakasentro ang Salmong Tugunan para sa araw na ito. Mula sa batis na ito, dumadaloy ang biyaya ng Diyos. Ito'y nagdudulot ng tuwa sa lahat ng mga bumubuo sa bayan ng Diyos na bumubuo rin sa Kaniyang Templo (Salmo 45, 5). Ang pangaral ni Apostol San Pablo ay nakasentro rin sa larawang ito. Tayong lahat ay ang Simbahan o Templo ng Diyos. Dapat maging daluyan tayo ng Kaniyang biyaya, pag-ibig, kagandahang-loob, habag, at awa. Sa Ebanghelyo, inihayag ng Mahal na Poong Jesus Nazareno sa babaeng Samaritana na hindi mananatili sa loob ng mga bahay-dalanginan o mga gusaling itinayo para sa pagsamba sa Panginoon ang pagsamba sa Kaniya. Isa lamang ang ibig sabihin nito - ang Simbahang itinatag ni Kristo ay hindi mga gusaling gawa sa iba't ibang uri ng bato. Bagkus, ang Simbahang tatag ni Kristo ay binubuo ng mga tunay na nananalig at sumasamba sa Diyos. Ang mga Simbahang katulad na lamang ng makasaysayang Simbahan ng Quiapo ay mga paalala nito. 

Tayong lahat ang bumubuo sa tunay na Simbahan. Bilang mga bumubuo sa tunay at nag-iisang Simbahang tatag ng Nuestro Padre Jesus Nazareno, dapat nating ibahagi at ipalaganap ang Kaniyang biyaya, pag-ibig, kagandahang-loob, habag, at awa. Ang lahat ng mga bahay-dalanginan gaya ng Simbahan ng Quiapo ay paalala o sagisag ng katotohanang ito tungkol sa ating misyon. 

DAHIL SA KANIYANG KAGANDAHANG-LOOB

24 Setyembre 2023 

Ika-25 Linggo sa Karaniwang Panahon (A) 

Isaias 55, 6-9/Salmo 144/Filipos 1, 20k-24. 27a/Mateo 20, 1-16a 

This faithful photographic reproduction of the painting (c. 1573/1574) The Vineyard of the Lord by Lucas Cranach the Younger (1515–1586), as well as the actual work of art itself, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 70 years or fewer due to its age. 

Ang mga Pagbasa para sa Linggong ito ay muling nakasentro sa mga pagkakataong ibinibigay sa atin ng Diyos. Habang tayong lahat ay namumuhay at naglalakbay dito sa mundong ito nang pansamantala, lagi tayong binibigyan ng Panginoong Diyos ng pagkakataong tanggapin at tumalima sa Kaniyang kalooban. Sa pamamagitan nito, binibigyan tayo ng pagkakataong tahakin ang landas ng kabanalan. Isa lamang ang dahilan kung bakit lagi ito ginagawa ng Diyos para sa atin habang namumuhay at naglalakbay tayo dito sa mundo - ang Kaniyang kagandahang-loob. 

Inihayag ng Panginoong Diyos sa Unang Pagbasa para sa Linggong ito na hindi Siya katulad ng tao mag-isip. Ang Kaniyang lohika ay hindi katulad ng lohika ng tao. Tunay nga Siyang naiiba sa tao pagdating sa pag-iisip at lohika. Isinalamin ng talinghaga ni Jesus Nazareno sa Ebanghelyo ang mga salitang ito. Ang kagandahang-loob ng Diyos ay para sa lahat. Kahit ang mga hindi inakalang tatanggap ng biyaya ng Panginoon, biniyayaan rin Niya. Sa kasalukuyang panahon, patuloy pa rin Niya itong ginagawa. Katunayan, tayong lahat ay minarapat Niyang pagkalooban ng Kaniyang mga biyaya sa kabila ng ating mga kahinaan at kasalanan. Lagi Niya itong ginagawa para sa atin. Habang tayong lahat ay patuloy na namumuhay at naglalakbay sa mundong ito nang pansamantala, tayong lahat ay lagi Niyang binibigyan ng pagkakataong tanggapin at ipalaganap ang Kaniyang biyaya. Tayong lahat ay pinagindapat Niyang tanggapin ang biyayang ito. Ito ang dahilan kung bakit lagi tayong binibigyan ng Panginoong Diyos ng pagkakataong tanggapin at ipalaganap ang Kaniyang biyaya. Subalit, tayo mismo ang magpapasiya kung tatanggapin natin ang mga pagkakataong ito na ibinibigay ng Diyos sa atin. Mayroong paalala si Apostol San Pablo para sa lahat ng mga Kristiyano tungkol sa mga pagkakataong ibinibigay sa atin ng Panginoon upang tanggapin ang Kaniyang biyaya at ipalaganap ito sa kaniyang pangaral sa Ikalawang Pagbasa. Sabi ni Apostol San Pablo na dapat tayong mamuhay ayon sa Mabuting Balita sapagkat hindi na magiging katulad ng mga dati nating buhay ang ating mga buhay kapag ang biyaya ng Panginoong Diyos ay ating ipinasiyang tanggapin. Kapag tapat at taos-puso nating tinatanggap ang pagkakataong ibinibigay sa atin ng Panginoong Diyos na makinabang at ipalaganap ang Kaniyang biyaya, tinatanggap rin natin ang biyaya ng bagong buhay bilang Kaniyang mga tagasunod at anak na Kaniyang kaloob. 

Bagamat hindi tayo karapat-dapat dahil sa ating mga kahinaan at kasalanan bilang tao, ipinasiya pa rin ng Panginoong Diyos sa atin ang Kaniyang kagandahang-loob. Gaya ng sabi sa Salmong Tugunan para sa Linggong ito: "D'yos ay tapat at totoo sa dumadalanging tao" (Salmo 144, 18a). Dahil sa Kaniyang kagandahang-loob para sa atin, ipinasiya ng Panginoong Diyos na maging tapat sa atin. Ito ang tanging dahilan kung bakit lagi Niya tayong binibigyan ng pagkakataong tanggapin, pakinabangan, at ipalaganap sa kapwa ang Kaniyang biyaya. 

Dahil sa kagandahang-loob ng Diyos, lagi Niya tayong binibiyayaan. Tayong lahat ay lagi rin Niyang binibigyan ng pagkakataong tanggapin, pakinabangan, at ipalaganap ang Kaniyang biyaya habang namumuhay at naglalakbay tayo sa mundong ito. Kahit hindi tayo karapat-dapat sa kagandahang-loob, katapatan, at biyaya ng Diyos dahil tayong lahat ay mga makasalanan, ipinasiya pa rin Niya itong ibigay at ipakita sa atin. Bukod pa riyan, ibinigay pa rin sa atin ng Diyos ang kapangyarihang magpasiya para sa ating mga sarili. Niloob ng Diyos na tayo mismo ang magpasiya kung tatanggapin nga ba natin ang mga pagkakataong ibinibigay Niya sa atin. 

PAGPILI AT PAGTANGGAP SA TUNAY NA HARI

22 Setyembre 2023 

Biyernes ng Ika-24 na Linggo sa Karaniwang Panahon (I) 

1 Timoteo 6, 2k-12/Salmo 48/Lucas 8, 1-3 

SCREENSHOT: #QuiapoChurch Official 6PM #HealingMass | 07 Sept 2023 THURSDAY of the 22nd Week in Ordinary Time (Facebook and YouTube)

Mahaba ang Unang Pagbasa para sa araw na ito ng Biyernes na inilaan ng Simbahan para sa taimtim na debosyon at pamamanata sa Poong Jesus Nazareno. Subalit, isa lamang ang nais isalungguhit ng mahabang pangaral ni Apostol San Pablo kay San Timoteo sa Unang Pagbasa para sa araw na ito, at ito ay walang iba kundi ang pagpili at pagtanggap sa Panginoong Diyos bilang tunay na Hari. Nakasentro sa tema o aral na ito ang mga Pagbasa para sa araw na ito ng Biyernes. 

Sabi sa Salmong Tugunan para sa araw na ito na halaw sa isa sa mga Beatitudo na itinuro ng Poong Jesus Nazareno sa simula ng Kaniyang pampublikong ministeryo o pangangaral: "Mapalad ang mga aba, tanging D'yos ang Hari nila" (Mateo 5, 1). Ito ang dahilan kung bakit ang mga aba ay pinagpapala at dinadakila ng Diyos. Sa kabila ng mga hirap, tukso, at pagsubok sa buhay, ipinasiya pa rin nilang maging tapat sa Diyos. Ipinasiya pa rin nilang ibigay sa Panginoong Diyos ang kanilang taos-pusong katapatan at pananalig. Bilang mga Kristiyanong bumubuo sa tunay na Simbahan na tatag mismo ng Nuestro Padre Jesus Nazareno, ito ang dapat maging ating pasiya. 

Isinalungguhit ni Apostol San Pablo sa kaniyang mahabang pangaral at mensahe kay San Timoteo sa Unang Pagbasa kung paano natin maipapahayag ang ating pasiyang taos-pusong piliin, paglingkuran, at sambahin ang Panginoong Diyos bilang tunay at walang hanggang Hari nang buong kababaang-loob, pananalig, at pag-ibig para sa Kaniya. Umiwas sa kasalanan. Piliin ang kabanalan. Ang landas ng kabanalan ay dapat nating piliin araw-araw. Sa pamamagitan nito, naipapahayag natin ang ating pagpili, pananalig, pag-ibig, at pagsamba sa Panginoon na ating Diyos at Hari. Sa Ebanghelyo, ipinakilala ang mga babaeng nagpasiyang sumunod sa Mahal na Poong Jesus Nazareno. Buong kababaang-loob at taos-puso nilang ipinasiyang tanggapin at sundin ang Mahal na Poong Jesus Nazareno upang maipahayag at mapatunayan ang pananalig at pag-ibig nila para sa Kaniya. 

Bilang mga Kristiyanong bumubuo sa tunay at nag-iisang Simbahan, dapat nating piliin at tanggapin ang Poong Jesus Nazareno bilang ating Panginoon, Diyos, at Hari. Siya lamang at wala nang iba. Ang tanong, ito ba ang hangarin ng ating mga puso? 

KAHIT GAANO KAHIRAP ITONG GAWIN

17 Setyembre 2023 

Ika-24 na Linggo sa Karaniwang Panahon (A) 

Sirak 27, 33-28, 9/Salmo 102/Roma 14, 7-9/Mateo 18, 21-35 

This faithful photographic reproduction of the painting (c. 1629) Parable of the Unforgiving Servant, formerly called Croesus Receiving Tribute from a Lydian Peasant, by Claude Vignon (1593–1670), as well as the actual work of art from the Musée des Beaux-Arts de Tours, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Ang mga Pagbasa para sa Linggong ito ay tungkol sa gawaing maituturing natin na mahirap gawin bilang mga tao. Ito ay walang iba kundi ang pagpapatawad. Bagamat lagi nating sinisikap magpatawad, hindi natin maipagkakailang mahirap itong gawin bilang tao. Kahit ano pang gawin natin, aminin natin, ito ang katotohanan at realidad ng buhay dito sa mundong ito. Mahirap magpatawad. Hindi hamak na mas madaling daanan sa karahasan at gantihan ang lahat ng bagay kaysa sa pagpapatawad. 

Inihayag sa mga Pagbasa para sa Linggong ito ang dahilan kung bakit tayo dapat magpatawad. Sa Unang Pagbasa, inihayag ni Sirak na papatawarin rin ng Panginoong Diyos ang mga nagpapatawad ng kapwa (28, 2). Ang pagiging mahabagin ng Diyos ay ang pangunahing tema o larawang binibigyan ng pansin sa Salmong Tugunan para sa Linggong ito (Salmo 102, 8). Sa Ikalawang Pagbasa, inihayag ni Apostol San Pablo na tayong lahat na bumubuo sa tunay at nag-iisang Simbahan ay dapat mabuhay para sa Panginoon sapagkat tayong lahat ay Kaniya (Roma 14, 8). Isinalaysay naman ni Kristo, ang Poong Jesus Nazareno, sa Ebanghelyo ang talinghaga tungkol sa lingkod na hindi marunong magpatawad upang ituro ang halaga nito. 

Mahirap ngang magpatawad. Katunayan, walang sinabi ang Poong Jesus Nazareno na madali itong gawin. Batid Niya kung gaano kahirap para sa atin na magpatawad. Hindi natin kailangang magrekalmo sapagkat batid Niya ito. Subalit, sa kabila nito, itinuturo pa rin ng Mahal na Poong Jesus Nazareno na dapat tayong magpatawad. Ito ay dahil ang pagiging Kristiyano ay tungkol sa pagtupad sa kalooban ng Diyos nang buong kababaang-loob at pananalig sa Kaniya, gaano man kahirap itong gawin. 

Hindi naging madali para sa Panginoong Diyos na iligtas tayo mula sa kasalanan at kamatayan. Mas madali para sa Kaniya na manatili lamang sa langit at hayaan na lamang tayo mapahamak dahil sa kasalanan. Subalit, ipinasiya pa rin ng Diyos na iligtas tayo mula sa kasalanan at kamatayan sa pamamagitan ni Kristo, ang Nuestro Padre Jesus Nazareno. Kahit hindi Niya kailangang gawin iyon sapagkat napakahirap naman talaga gawin iyon, ipinasiya pa rin Niya itong gawin. Bagamat mas madaling magpakasarap sa maluwalhati Niyang kaharian sa langit, ipinasiya pa rin ng Diyos na gawin ang pinakamahirap na gawain - iligtas tayo mula sa kasalanan at kamatayan sa pamamagitan ng Nuestro Padre Jesus Nazareno. 

Bilang mga Kristiyanong bumubuo sa tunay na Simbahan, dapat nating ipalaganap ang pag-ibig, kagandahang-loob, biyaya, habag, at awa ng Diyos. Dapat tayong maging mga salamin nito. Ito ang kalooban ng Diyos para sa atin. Hindi ito madaling gawin, subalit, ito ang dapat nating gawin. Kung tunay at tapat ang ating pag-ibig, pananalig, at pagsamba sa Diyos, handa tayong gawin ito nang buong kababaang-loob at pananalig sa Kaniya, kahit napakahirap itong gawin. 

MASAKIT NA KATOTOHANAN

15 Setyembre 2023 

Paggunita sa Mahal na Birheng Maria na Nagdadalamhati 

Hebreo 5, 7-9/Salmo 30/Juan 19, 25-27 (o kaya: Lucas 2, 33-35) 

This faithful photographic reproduction of the painting (c. 16th century) Pieta by Willem Key (circa 1515/1516–1568), as well as the work of art itself from the Sothebys collection, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 70 years or fewer due to its age. 

Masakit ang magmahal. Nasasaktan ang lahat ng mga umiibig. Ito ang napakasakit na katotohanang nais talakayin at pagnilayan ng Simbahan sa araw na ito. Ang bawat isa sa atin ay iminumulat ng Simbahan sa katotohanan tungkol sa pag-ibig. Walang sinumang umibig ang hindi nasaktan kahit kailan. Hindi madaling magmahal. Kapag umibig o nagmahal ang isang tao, hindi ito nangangahulugang  ligtas na siya mula sa lahat ng mga hirap, sakit, tiisin, pagdurusa, dalamhati, luha, pighati, at hapis sapagkat hindi matatakasan ang mga ito habang namumuhay tayo sa mundong ito. 

Ang Mahal na Inang si Mariang Birhen ay muling ipinakilala ng Simbahan sa araw na ito bilang Inang Nagdadalamhati o Ina ng Hapis. Malayong-malayo ito sa ibang mga titulo ng Mahal na Inang si Mariang Birhen na 'di hamak na mas maringal ang tunog kaysa sa tunog ng nasabing titulo. Kung tutuusin, walang sinumang ina o babae sa daigdig na ito ang nangarap o naghangad na sa kaniya igawad ang titulong Ina ng Hapis o Inang Nagdadalamhati. Bilang mga tao, pinapangarap nating maging masaya sa buhay dito sa mundong ito, kahit pansamantala lamang ito. 

Nakasentro sa katotohanang ito tungkol sa pagmamahal ang mga Pagbasa para sa araw na ito. Inilarawan sa Unang Pagbasa kung gaano kasakit para sa Panginoong Jesus Nazareno ang Kaniyang ipinasiyang gawin dahil sa Kaniyang dakilang pag-ibig para sa atin. Dahil sa Kaniyang dakilang pag-ibig, kaisa ng Ama at ng Espiritu Santo, ipinasiya Niyang iligtas ang sangkatauhan. Buong kababaang-loob at pananalig na tinupad at sinunod ng Mahal na Poong Jesus Nazareno ang planong ito na Kaniyang binuo kaisa ng Ama at ng Espiritu Santo bago Siya dumating sa mundo hanggang sa huli (Hebreo 5, 7). Dahil sa Kaniyang dakilang pag-ibig para sa atin, ipinasiya Niyang maging masunurin sa kalooban ng Diyos nang buong kababaang-loob at pananalig, gaano man ito kasakit para sa Kaniya. Inilahad sa Ebanghelyo ang pinakamasakit na sandali sa buhay ng Mahal na Inang si Mariang Birhen. Sa bundok na tinatawag na Golgota o Kalbaryo, ang Mahal na Inang si Mariang Birhen ay napuno ng matinding dalamhati at hapis sapagkat kaniyang nasilayan ang minamahal niyang Anak na unti-unting binabawian ng buhay sa Banal na Krus. 

Gaya ng sabi ni Simeon sa kaniyang propesiya tungkol sa buhay ni Jesus Nazareno sa alternatibong Ebanghelyo: "Dahil diyan, ang puso mo'y para na ring tinarakan ng isang balaraw" (Lucas 2, 35). Bagamat ang mga salitang ito na binigkas niya sa Mahal na Inang si Mariang Birhen ay tungkol sa mga matitinding hirap, pagdurusa, sakit, at kamatayan ng Mahal na Poong Jesus Nazareno, mayroon ring aral para sa atin ang mga salitang ito ni Simeon sa alternatibong Ebanghelyo. Ang pag-ibig ay hindi isang landas o daan na maaari nating tahakin upang makatakas tayo mula sa mga hirap, sakit, pagdurusa, tukso, at pagsubok sa buhay. Ito ay pinatunayan ng Nuestro Padre Jesus Nazareno at ng Mahal na Inang si Mariang Birhen. 

Sa masakit na katotohanan ring ito nakasentro ang Salmong Tugunan. Ang hiling at dalangin ng mang-aawit sa Salmong Tugunan ay: "Poong D'yos na maibigin, ako ay Iyong sagipin" (Salmo 30, 17b). Ipinasiya ng Panginoong Diyos na tuparin ang hiling na ito ng Kaniyang bayan na inilahad ng mang-aawit sa Salmong Tugunan para sa araw na ito sa pamamagitan ng Nuestro Padre Jesus Nazareno. Kahit napakasakit para sa Diyos na ipagkaloob ang Kaniyang Bugtong na Anak na si Jesus Nazareno bilang handog upang tayong lahat ay masagip at maligtas, ipinasiya pa rin Niya itong gawin alang-alang sa atin dahil tunay Niya tayong iniibig at kinahahabagan. 

Walang sinumang umibig na hindi nasaktan. Ang lahat ng mga umiibig ay nakaranas ng hirap, luha, sakit, at dalamhati. Ito ang nagpapatunay na tunay at wagas ang ating pag-ibig. Pinatunayan ng Mahal na Poong Jesus Nazareno at ng Mahal na Inang si Mariang Birhen, ang Ina ng Hapis, ang katotohanang ito tungkol sa pag-ibig.  

HUWAG LIMUTIN ANG PINAKADAKILANG GAWA NG DIYOS

14 Setyembre 2023 

Kapistahan ng Pagtatampok sa Krus na Banal 

Mga Bilang 21, 4b-9/Salmo 77/Filipos 2, 6-11/Juan 3, 13-17 

This faithful photographic reproduction of the painting (c. 1570) El Descendimiento ("The Descent from the Cross") by Pedro de Campaña (1503–1580), as well as the actual work of art itself from the Museo del Prado collection, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Inilahad sa Salmong Tugunan ang temang nais pagtuunan ng pansin at pagnilayan nang buong kataimtiman ng Simbahan sa araw na ito na inilaan para sa maringal na pagdiriwang ng Kapistahan ng Pagtatampok sa Krus na Banal. Nasusulat sa Salmong Tugunan: "Hindi nila malilimot ang dakilang gawa ng D'yos" (Salmo 77, 7k). Subalit, mayroong pagkakaiba sa pagkakasalin ng salin ng mga salitang ito sa Ingles. Ang sabi sa opisyal na salin sa Ingles: "Do not forget the works of God" (Huwag limutin ang mga gawa ng Diyos). Maituturing na isang paalala para sa lahat ang salin ng mga katagang ito sa wikang Ingles. 

Bagamat mayroong pagkakaiba ang salin sa Ingles at ang salin sa Tagalog, iisa lamang ang nais ipaalala sa tanan. Tunay ngang kahanga-hanga at dakila ang mga gawa ng Diyos. Subalit, sa lahat ng mga kahanga-hangang gawa ng Diyos na tunay nga namang dakila, isa lamang ang namumukod-tangi sa lahat. Ang gawang ito ay walang iba kundi ang pagkakaloob ng Diyos ng biyaya ng kaligtasan sa sangkatauhan sa pamamagitan ni Kristo, ang Poong Jesus Nazareno. Isinasagisag ng Banal na Krus ang pinakadakilang gawang ito ng Panginoong Diyos. 

Sa Unang Pagbasa, ipinasiya ng Panginoong Diyos na ipakita ang Kaniyang pag-ibig, kagandahang-loob, biyaya, habag, at awa sa mga Israelita sa kabila ng kanilang mga pagrereklamo sa Kaniya. Kahit napakalinaw na kinalimutan nila ang lahat ng mga ginawa ng Diyos para sa kanila, ipinasiya ng Panginoong Diyos na ipakita pa rin ang dakila Niyang pag-ibig, kagandahang-loob, biyaya, habag, at awa sa kanila noong si Moises ay ipinasiya nilang lapitan at hilingin sa kaniya nang buong kababaang-loob na manalangin sa Diyos na iligtas sila. Pinarusahan sila ng Panginoon, subalit noong ipinasiya nilang magsisi at magbalik-loob sa Kaniya, ipinasiya Niya silang iligtas. Iyan ang pag-ibig, kagandahang-loob, biyaya, habag, at awa ng Diyos. Lagi pa rin Siyang handang magpatawad, gaano mang kalaki ang kasalanang ginawa ng bawat isa. Oo, walang sinuman sa atin ay hindi karapat-dapat sa biyayang ito ng Diyos, subalit, sa kabila nito, hindi Niya ipagkakait sa atin ang biyayang ito kapag buong kababaang-loob at taos-puso nating hihingin ito sa Kaniya. Ito ang dahilan kung bakit inutusan Niya si Moises na gumawa ng isang ahas na tanso upang gumaling ang lahat ng mga tinuklaw ng mga makamandag na ahas na tumingin sa ahas na tanso. 

Nakasentro sa pinakadakilang gawa ng Diyos na tunay ngang namumukod-tangi at kahanga-hanga sa lahat ang pangaral ni Apostol San Pablo sa Ikalawang Pagbasa. Sabi ni Apostol San Pablo na ipinasiya ng Mahal na Poong Jesus Nazareno na ialay ang buo Niyang sarili sa kalooban ng Diyos nang buong kababaang-loob hanggang sa huling sandali ng Kaniyang buhay sa Krus na Banal (Filipos 2, 8). Dahil sa kababaang-loob ng Poong Jesus Nazareno, naligtas ang sangkatauhan. Ang Krus na Banal ay ang tanda o sagisag ng pagsunod ng Poong Jesus Nazareno sa kalooban ng Ama nang buong kababaang-loob hanggang kamatayan. 

Ang dahilan kung bakit ipinasiya ng Diyos na gawin ang pinakadakilang gawang ito na tunay nga namang namumukod-tangi at kahanga-hanga ay inihayag sa Ebanghelyo. Katunayan, ang talatang ito ay isa sa mga pinakamasikat na talaga sa Bibliya. Dahil sa pag-ibig ng Diyos na tunay nga namang dakila, ipinasiya Niyang isugo sa mundong ito ang Kaniyang Bugtong na Anak na si Jesus Nazareno upang maging ipinangakong Manunubos ng sangkatauhan (Juan 3, 16-17). Ito ang isinasagisag ng Banal na Krus ng Poong Señor na si Jesus Nazareno na lagi nating pinararangalan bilang Simbahan. 

Dahil isinasagisag ng Banal na Krus ng Mahal na Poong Jesus Nazareno ang dakilang pag-ibig ng Diyos para sa sangkatauhan, labis natin itong pinahahalagahan bilang mga bumubuo sa tunay na Simbahang Siya mismo ang nagtatag. Ang Krus na Banal ay tunay ngang mahalaga sapagkat ito ang paalala ng dakilang pag-ibig ng Diyos na inihayag Niya sa tanan sa pamamagitan ng Poong Jesus Nazareno. 

Hindi natin dapat limutin ang pinakadakilang gawa ng Diyos na tunay nga namang namumukod-tangi at kahanga-hanga. Bagkus, bilang Simbahan, ang pinakadakilang gawang ito ng Diyos ay dapat nating alalahanin, pahalagahan, at ipalaganap sa lahat. Dapat lamang makilala ng lahat na ang Diyos ay tunay ngang maawain, mahabagin, at mapagmahal. Ang dakilang patunay nito ay ang Banal na Krus ng Nuestro Padre Jesus Nazareno.