GALAK NA NAGMUMULA SA TUNAY NA LIWANAG

19 Marso 2023 

Ikaapat na Linggo ng 40 Araw na Paghahanda para sa Pasko ng Pagkabuhay (A) 

"Linggo ng Laetare" 

1 Samuel 16, 1b. 6-7. 10-13a/Salmo 22/Efeso 5, 8-14/Juan 9, 1-41 (o kaya: 9, 1. 6-9. 13-17. 34-38) 

This photographic reproduction of the 17th century painting Healing of the man born blind (Italian: Guarigione del cieco nato) by Orazio de Ferrari, as well as the actual work of art itself from the Collezione D'Arte Della Banca Carige collection, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Kilala rin bilang "Linggo ng Laetare" o "Linggo ng Kagalakan" ang Ikaapat na Linggo ng 40 Araw na Paghahanda para sa Pasko ng Pagkabuhay o Kuwaresma. Nakatuon ang ating mga pansin sa larawan ng Panginoon bilang bukal ng tunay na galak. Kung tutuusin, ipinahiwatig ito ng alternatibong pangalan ng Simbahan para sa Linggong ito. Tila, isa itong paalala para sa ating lahat na tanging sa Panginoong Diyos lamang matatagpuan ang tunay na galak sapagkat Siya mismo ang nagkakaloob nito sa atin. 

Nakasentro sa paksang ito ang mga Pagbasa para sa araw na ito. Katunayan, ang mga Pagbasa para sa Linggong ito ay tungkol sa larawan ng ating Panginoong Diyos bilang tunay na liwanag. Ang Panginoong Diyos ay naghahatid ng tunay na galak sa atin sa pamamagitan ng Kanyang ningning bilang tunay na liwanag. Pinatotohanan ito ng mga panauhing itinatampok sa mga Pagbasa para sa Linggong ito. 

Sa Unang Pagbasa, isinalaysay ang pagpahid ng langis kay David bilang patunay na hinirang nga siya ng Panginoong Diyos upang maging susunod na hari ng Israel. Ang tunay na liwanag na walang iba kundi ang Diyos ay kumilos upang pagkalooban ng galak ang bayang Israel. Pinagkalooban Niya sila ng isang panibagong hari na walang iba kundi si David. Mula sa pagpapastol ng mga tupa, itinaas ng Diyos si David bilang kahalili ni Haring Saul sa trono. Sa pamamagitan nito, ang Diyos ay nagbigay ng isang maliwanag na kinabukasan para sa bayang Israel. Bukod pa roon, binigyan rin Niya si David ng isang maningning na kinabukasan. Itinaas ng Panginoon si David mula sa pagpapastol ng mga tupa sa parang. Sa pamamagitan ng pagtampok Niya kay David, ang lingkod Niyang ito ay Kanya ring binigyan ng galak sapagkat isa itong patunay na lagi Niyang kinakalinga, kinukupkop, at kinalulugdan ang mga aba Niyang lingkod. 

Isinentro ni Apostol San Pablo ang kanyang pangaral sa Ikalawang Pagbasa para sa Linggong ito sa biyaya ng bagong buhay na kaloob sa atin ng Diyos sa pamamagitan ni Kristo, ang Mahal na Poong Jesus Nazareno. Ang bagong buhay na ipinagkaloob sa atin ng Diyos sa pamamagitan ni Kristo, aniya, ay pamumuhay nang banal at malaya mula sa mga puwersa ng kadiliman at kasalanan dahil mamumuhay tayo sa ilalim ng tunay na liwanag na walang iba kundi ang Panginoong Jesus Nazareno (Efeso 5, 8). Pinagkakalooban ng galak ng ating Panginoong Jesus Nazareno ang bawat isa sa atin sa pamamagitan ng biyayang ito ng bagong buhay sa ilalim ng tunay na liwanag na walang iba kundi Siya mismo. Hindi na ito katulad ng dati nating buhay sa ilalim ng kadiliman at kasalanan sapagkat mamumuhay tayo nang banal at malaya sa ilalim ng butihing Poong Señor Jesus Nazareno, ang tunay na liwanag. Kagalakang tunay ang dulot ni Jesus Nazareno sa atin sa pamamagitan ng biyayang ito. 

Tunay na galak ang ipinagkaloob ng ating Nuestro Padre Jesus Nazareno sa lalaking ipinanganak na bulag sa Ebanghelyo. Ang lalaking bulag mula sa kanyang pagsilang sa mundong ito ay pinagkalooban ni Jesus Nazareno ng pagkakataong masilayan ang kagandahan ng mundong ito. Sa pamamagitan ng kahanga-hangang himalang ito, nagbigay ng galak at tuwa sa lalaking ito ang Nuestro Padre Jesus Nazareno. Kahit binatikos ng marami, kabilang na rito ang mga kaaway ng Poong Jesus Nazareno, ang lalaking ito, hindi nila naipagkait o naiagaw mula sa lalaking ito na isinilang na bulag ang galak at tuwang kaloob sa kanya ni Jesus Nazareno. 

Gaya ng sabi ng mang-aawit sa Salmong Tugunan para sa Linggong ito: "Pastol ko'y Panginoong Diyos, hindi ako magdarahop" (Salmo 22, 1). Sapat na ang Panginoong Diyos. Wala na tayong hahanapin pa. Sa Panginoon lamang nagmumula ang tunay na liwanag at ang tunay na galak. Ang Panginoong Diyos ay laging nandiyan. Bakit pa ba tayo maghahanap ng iba? Kung nais nating magkaroon ng liwanag at galak, lapitan natin nang buong kababaang-loob at pananalig ang Diyos. 

Ang tunay na galak ay nagmumula lamang sa tunay na liwanag. Ito ang paalala para sa atin sa Linggong ito. Ang Panginoon mismo ay ang tunay na galak at ang tunay na liwanag. Lagi Niya tayong nililiwanagan. Ang liwanag ng Panginoon ay nagdudulot ng galak at tuwa sa lahat.

PAGKAKATAONG IPINAGKAKALOOB NG TUNAY NA NAGMAMAHAL

17 Marso 2023 

Biyernes sa Ikatlong Linggo ng 40 Araw na Paghahanda para sa Pasko ng Pagkabuhay 

Oseas 14, 2-10/Salmo 80/Marcos 12, 28b-34 

Screenshot: 02 FEB. 2020 | 5AM #HolyMass (Quiapo Church Facebook Live) 

Nakasentro sa misteryo ng pag-ibig ng Panginoong Diyos ang mga Pagbasa para sa araw na ito ng Biyernes na inilaan para sa taimtim na debosyon at pamamanata sa Mahal na Poong Jesus Nazareno. Bukod pa roon, ang araw na ito ng Biyernes ay nasa loob pa rin ng 40 Araw na Paghahanda para sa Pasko ng Pagkabuhay na tiyak na mas kilala ng maraming Katoliko bilang panahon ng Kuwaresma. Sa panahong ito na kilala sa tawag na Kuwaresma, inaanyayahan tayo ng Simbahan na magpaakit muli sa pag-ibig ng Diyos na nahayag sa pamamagitan ng Misteryo Paskwal ng Mahal na Poong Jesus Nazareno nang sa gayo'y maging kusang-loob ang ating pasiyang magbagong-buhay at magbalik-loob sa Diyos na puno ng pag-ibig, habag, at awa para sa atin. 

Sa Unang Pagbasa, inilahad ni Propeta Oseas ang panawagan ng Panginoong Diyos para sa Kanyang bayan. Sa mismong pahayag ring ito, inihayag ng Panginong Diyos na lagi Siyang handang ipagkaloob ang Kanyang kapatawaran, habag, at awa kapag kusang-loob at taos-pusong nagpakumbaba, nagsisi sa kasalanan, at nagbalik-loob ang Kanyang bayan sa Kanya. Sa kabila ng mga kasalanang kanilang ginawa laban sa Diyos at kapwa, gaano mang kalala, kalubha, o karami ang mga ito, ipagkakaloob pa rin ng Panginoong Diyos ang Kanyang habag at awa sa mga taos-pusong nagbabalik-loob sa Kanya nang may kababaang-loob. 

Ang mga salita sa Salmong Tugunan para sa araw na ito ay isang napakagandang buod ng paanyaya ng Panginoon para sa atin. Hindi lamang ito para sa mga tao noong panahon ng Lumang Tipan. Bagkus, ito ay para sa lahat ng tao, anuman ang panahong kinabibilangan. Umaalingawngaw pa rin sa kasalukuyan ang mga salitang ito ng Panginoon sa Salmong Tugunan. Lumipas man ang napakahabang panahon mula noong isinulat ang mga salitang ito sa Salmo, hindi nawawalan ng kabuluhan o saysay ang mga salitang ito. Nananatili pa rin ang saysay nito sa kasalukuyan. Ang Diyos ay patuloy na nananawagan sa atin na taos-pusong pagsisihan ang ating mga kasalanan at magbalik-loob sa Kanya nang may kababaang-loob. 

Inihayag naman ni Jesus Nazareno sa Ebanghelyo ang pinakamahalagang utos. Ang pinakamahalagang utos ay walang iba kundi buong puso at kaluluwang mahalin ang Diyos at mahalin rin ang kapwa katulad ng pagmamahal sa sarili. Sa pamamagitan nito, itinuturo sa atin ng Panginoong Jesus Nazareno kung paano magiging tunay at tapat ang pag-ibig natin para sa Diyos. Mahalin natin ang Diyos nang higit sa lahat at mahalin rin natin ang kapwa. Sa pamamagitan ng utos na ito na kaloob ng Diyos sa atin, tayong lahat ay binibigyan Niya ng pagkakataong mahalin Siya nang may taos-pusong katapatan. Ginagawa Niya ito dahil tunay Niya tayong iniibig. 

Hindi naman kinailangan ng Diyos na pagkalooban tayo ng pagkakataong ibigin Siya dahil batid naman Niyang mga makasalanan tayo. Subalit, ipinasiya pa rin Niya itong gawin dahil sa Kanyang pag-ibig, kagandahang-loob, habag, at awa para sa atin. Ang patunay niyan ay walang iba kundi si Kristo, ang ating Nuestro Padre Jesus Nazareno, na nagpakasakit at namatay sa Banal na Krus na Kanyang pinasan mula sa pretoryo tungo sa Kalbaryo alang-alang sa atin. 

DINGGIN ANG TUNAY NA MAAASAHAN AT MAPAGKAKATIWALAAN

12 Marso 2023 

Ikatlong Linggo ng 40 Araw na Paghahanda para sa Pasko ng Pagkabuhay (A) 

Exodo 17, 3-7/Salmo 94/Roma 5, 1-2. 5-8/Juan 4, 5-42 (o kaya: 4, 5-15. 19b-26. 39a. 40-42) 

This faithful photographic reproduction of the painting Woman at the Well by Carl Heinrich Bloch, as well as the work of art itself from the Chapel at Frederiksborg Palace in Copenhagen, is in the Public Domain ("No Known Copyright") in its country of origin as well as in other countries and areas where the copyright term is the author's life plus 70 years or fewer due to its age. Thus, it is therefore considered to be in the Public Domain in the United States. 

Itinutuon ng Simbahan ang ating mga pansin sa pagiging mapagkalinga sa atin ng ating mahabagin, maibigin, maawain, at mabuting Nuestro Padre Jesus Nazareno sa Linggong ito, ang Ikatlong Linggo ng Kuwaresma o ang 40 Araw na Paghahanda para sa Pasko ng Pagkabuhay. Sa mga Pagbasa para sa nasabing Linggo sa taong ito, ang katangiang ito ng ating Mahal na Poon ay itinatampok at pinagninilayan. Bakit ito ang ginagawa ng Simbahan sa Linggong ito? Layunin ng Simbahan na ipanatag ang ating mga puso at loobin at palakasin ang ating pananalig kay Kristo, ang Nuestro Padre Jesus Nazareno, na hindi titigil sa pagkalinga sa atin. Siya ang bahala sa atin. 

Sa Unang Pagbasa, isinalaysay kung paanong binigyan ng Panginoong Diyos ng tubig ang mga Israelita. Ang Diyos ay nagpabukal ng tubig mula sa isang malaking bato sa Horeb. Si Moises ay inutusan ng Panginoong Diyos na hampasin ang nasabing bato upang bumukal ang tubig mula roon. Bagamat pinatunayan na nga ng Panginoon na tunay nga Niyang kinakalinga ang mga Israelita nang sila'y Kanyang palayain mula sa Ehipto, muli Niya itong pinatunayan sa kanila sa pamamagitan ng himalang ito. Ang pagiging mapagkalinga ng Panginoong Diyos ay tinalakay rin ni Apostol San Pablo sa Ikalawang Pagbasa. Inihayag ni Apostol San Pablo na ibinuhos sa atin ng Diyos nang kusang-loob ang Kanyang pag-ibig sa pamamagitan mismo ng Espiritu Santo (Roma 5, 5). Sa Ebanghelyo, ipinakilala ng Panginoong Jesus Nazareno ang Kanyang sarili sa babaeng Samaritana sa Balon ni Jacob bilang tubig ng buhay. 

Gaya ng sabi sa Salmong Tugunan para sa Linggong ito: "Panginoo'y inyong dinggin, huwag n'yo S'yang salungatin" (Salmo 94, 8). Ito ang paanyaya ng Simbahan sa atin sa Linggong ito. Dinggin natin ang Panginoong Diyos. Buksan natin ang ating mga pandinig at pakinggan ang Kanyang tinig. Magpaakit tayo sa Kanyang kahali-halinang tinig na mapagkakatiwalaan. Hindi Siya nambubudol at hindi rin Niya tayo lolokohin kahit kailan. Bagkus, tunay ngang maaasahan at mapagkakatiwalaan ang Diyos. Lagi Niya tayong kakalingain, gagabayan, at sasaklolohan. 

Muli tayong pinaaalalahanan ng Simbahan sa Linggong ito na ang Panginoong Diyos ay tunay ngang maaasahan at mapagkakatiwalaan sa lahat ng oras. Sa pamamagitan nito, itinuturo sa atin ng ating Inang Simbahan kung kaninong tinig nga ba talaga ang dapat pakinggan at dinggin. Iyon nga lamang, tayo pa rin mismo ang magdedesisyon kung kaninong tinig ang ating pakikinggan at diringgin. Kahit ituro pa sa atin ng Simbahan ang tinig na dapat nating pakinggan at dinggin, nasa ating mga kamay ang pasiya kung gagawin natin iyon. Tayo mismo ang magpapasiya. 

Ang tinig ng Poong Jesus Nazareno, ang tunay na maaasahan at mapagkakatiwalaan sa lahat ng oras na Siyang laging kumakalinga sa atin, ay atin bang pakikinggan at diringgin? Kung hindi, kaninong tinig ang ating pakikinggan at diringgin? Isa pa, kung hindi natin pakikinggan at diringgin ang tinig ng Mahal na Poong Jesus Nazareno, para saan pa nga ba ang ating debosyon sa Kanya? 

PAGTATAKWIL SA KINALUGDAN

10 Marso 2023 

Biyernes sa Ikalawang Linggo ng 40 Araw na Paghahanda para sa Pasko ng Pagkabuhay 

Genesis 37, 3-4. 12-13a. 17b-28/Salmo 104/Mateo 21, 33-43. 45-46

This faithful photographic reproduction of the painting of Joseph being sold into slavery (c. Before 1888) by Alexander Maximilian Seitz, as well as the actual work of art itself, is in the Public Domain ("No Known Copyright") in its country of origin as well in other countries and areas where the copyright term is the author's life plus 100 years or fewer due to its age. This faithful photographic reproduction of the said work of art and the work of art itself is also in the Public Domain in the United States because it was published (or registered with the U.S. Copyright Office) before January 1, 1928. 

Ang mga Pagbasa para sa araw na ito ay napapanahon sapagkat ang araw na ito ay isang araw ng Biyernes, ang araw na inilaan ng debosyon at pamamanata sa Mahal na Poong Jesus Nazareno. Ito ang araw na isinesentro ng Simbahan ang ating mga puso at isipan sa larawan o imahen ng ating Panginoon at Manunubos na si Kristo na kusang-loob na nagpasan ng Krus patungong Kalbaryo alang-alang sa atin. Bukod pa dito, ang araw na ito ng Biyernes ay napapaloob sa 40 Araw na Paghahanda para sa Pasko ng Pagkabuhay na tinatawag ring Kuwaresma. Sa banal na panahong ito na tinatawag na Kuwaresma, habang puspusan nating pinaghahandaan ang ating mga sarili bilang mga mananampalatayang Katoliko para sa Dakilang Kapistahan ng Pasko ng Muling Pagkabuhay ng Mahal na Poong Jesus Nazareno sa pamamagitan ng taos-pusong pagsisisi sa kasalanan at pagbabalik-loob sa Diyos, inaanyayahan tayo bilang mga bumubuo ng Simbahan na lalo pang isentro ang ating mga pansin at pagnilayan nang buong kataimtiman ang misteryo ng dakilang pag-ibig ng Diyos na nahayag sa pamamagitan ng Misteryo Paskwal ng Mahal na Poong Jesus Nazareno. 

Tinalakay sa mga Pagbasa para sa araw na ito ng Biyernes sa banal na panahon na ito na tinatawag na Kuwaresma ang pagtakwil sa mga kinalugdan. Sa paksang ito nakasentro ang pagninilay ng Simbahan sa araw na ito upang lalo pang lumalim ang ating pang-unawa at pagpahalaga sa misteryo ng Mahal na Pasyon ng Mahal na Poong Jesus Nazareno. Sa Unang Pagbasa, si Jose na anak ni Jacob ay binalak patayin ng kanyang mga nakakatandang kapatid dahil sa inggit. Katunayan, si Jose ay binalak talaga nilang patayin bago ihagis ang kanyang bangkay sa balon. Umawat lamang si Ruben at hindi nila itinuloy ang planong pagpatay kay Jose bago ihagis sa nasabing balon. Si Jose ay kanilang inihagis na lamang sa balon nang buhay at kalaunan ay ibinenta sa halagang 20 pirasong pilak sa mga Ismaelitang naglalakbay patungong Ehipto. Sa Ebanghelyo, inilarawan ng ating minamahal na Poong Jesus Nazareno sa pamamagitan ng isang talinghaga ang Kanyang sasapitin sa kamay ng Kanyang mga kaaway. Walang awa Siyang papatayin ng Kanyang mga kaaway. Natupad nga ito noong unang Biyernes Santo sa bundok ng Kalbaryo kung saan Siya ipinako sa Krus. 

Sa pamamagitan ng pagtatampok sa mga sinapit ni Jose sa Unang Pagbasa at ng talinghaga ng Panginoong Jesus Nazareno sa Ebanghelyo, muling itinutuon ang ating pansin sa katotohanan tungkol sa mga lingkod ng Diyos na kinalulugdan Niya nang lubos. Hindi sila tinanggap ng marami. Marami sa kanila ang nakaranas ng pag-uusig at pagtatakwil. Katunayan, mayroon ngang mga namatay bilang mga martir dahil kay Jesus Nazareno. Si Jesus Nazareno nga, namatay bilang martir sa Banal na Krus sa bundok ng Kalbaryo upang tayo ay maligtas mula sa kasalanan at kamatayan. Hindi naging ligtas ang mga dakilang lingkod ng Diyos mula sa pagtatakwil at pag-uusig. 

Mas madaling maging bahagi ng mga nagtatakwil sa mga kinalulugdan ng Diyos, sa totoo lamang. Ligtas ka mula sa mga pagtatakwil at pag-uusig kapag ito ang ating ipinasiyang gawin. Kapag sumabay lamang tayo sa agos, hindi ka mapapahamak o uusigin ng marami. Subalit, kapag ito ang ating ginawa, lalo lamang nadadagdagan ang kawalan ng katarungan. Maaari rin tayo maligtas mula sa pagtakwil at pag-uusig ng tao, subalit, hindi natin matatakasan ang katarungan ng Panginoong Diyos. 

Itinutuon ng Simbahan ang ating mga pansin, puso, at isipan sa katotohanan tungkol sa mga sinapit ng mga dakilang lingkod ng Diyos, pati na rin ang Bugtong na Anak ng Diyos na si Kristo, ang Poong Jesus Nazareno, bilang isang uri ng pagtatanong sa atin tungkol sa ating pasiya. Saan ba tayo nais mapabilang? Nais ba nating mapabilang sa mga tapat at taos-pusong naglilingkod sa Panginoong Diyos o sa mga nagtatakwil sa kanila? Tandaan, nakasalalay sa pasiya nating ito ang ating mga kaluluwa. Nasa atin ang pasiya kung tatanggapin ba natin ang biyaya ng kaligtasang kaloob ng Nuestro Padre Jesus Nazareno sa tanan o hindi. 

ANG HALAGA NG PAKIKINIG

5 Marso 2023 

Ikalawang Linggo ng 40 Araw na Paghahanda para sa Pasko ng Pagkabuhay (A) 

Genesis 12, 12-4a/Salmo 32/2 Timoteo 1, 8b-10/Mateo 17, 1-9 

This faithful photographic reproduction of the painting The Transfiguration of Jesus (c. Between 1500 and 1505) by Gerard David (c. 1450/1460-1523), as well as the actual work of art itself from the Church of Our Lady in Bruges, Belgium, is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or fewer due to its age. 

Dalawang ulit nating maririnig sa buong taon ang salaysay ng Pagbabagong-Anyo ng ating Panginoong Jesus Nazareno sa Ebanghelyo para sa pagdiriwang ng Banal na Misa. Ang unang araw sa buong taon kung kailan natin maririnig sa Ebanghelyo para sa pagdiriwang ng Banal na Misa ang salaysay ng importanteng kaganapang ito sa buhay ni Kristo ay sa Ikalawang Linggo ng 40 Araw na Paghahanda para sa Pasko ng Pagkabuhay na kilala rin ng marami sa tawag na Kuwaresma. Ang ikalawang araw ng taon kung kailan natin maririnig ang salaysay ng napakahalagang kaganapang ito sa Ebanghelyo para sa pagdiriwang ng Banal na Misa ay ang Ika-6 ng Agosto sapagkat iyon ang araw sa taon na inilaan ng Simbahan para sa maringal na pagdiriwang ng Kapistahan ng Pagliliwanag sa Bagong Anyo ng Panginoon. 

Bakit ang salaysay ng kaganapang ito ang naririnig o binabasa sa Ebanghelyo para sa pagdiriwang ng Banal na Misa ng Ikalawang Linggo ng Kuwaresma? Anong mayroon sa nasabing Linggo at ito ang isa sa dalawang araw ng bawat taon na napili ng ating Inang Simbahan upang pagtuunan ng pansin at pagnilayan nang buong kataimtiman ang mahalagang kaganapang ito sa buhay ng Panginoong Jesus Nazareno? Kung tutuusin, maaari ring tanungin ng marami sa atin kung bakit itinuturing ng Simbahan na isang napakahalagang sandali sa buhay ng Mahal na Poong Jesus Nazareno ang Kanyang Pagbabagong-Anyo sa Bundok ng Tabor, ang bundok na pinaniniwalaan ng maraming Kristiyano bilang bundok na kung saan naganap ang nasabing sandali? 

Isinalungguhit sa salaysay ng Pagbabagong-Anyo ni Jesus Nazareno sa Ebanghelyo ang dahilan kung bakit palagi itong pinagtutuunan ng pansin at pinagninilayan nang buong kataimtiman ng Simbahan tuwing sasapit ang Ikalawang Linggo ng 40 Araw na Paghahanda para sa Pasko ng Pagkabuhay. Bukod sa pagiging isang pasulyap sa tagumpay na kinamtan ng Panginoong Jesus Nazareno sa pamamagitan ng Kanyang Krus at Muling Pagkabuhay, itinuturo sa atin ng napakahalagang kaganapang ito ang halaga ng pakikinig. Sabi ng Amang nasa langit noong nagbagong-anyo ang Poong Jesus Nazareno sa bundok, "Pakinggan ninyo Siya!" (Mateo 17, 5). Katunayan, ang mga salitang ito ay ginamit rin bilang Awit-Pambungad sa Mabuting Balita para sa Linggong ito. Ang patunay ng halaga ng pakikinig ay si Jesus Nazareno mismo. 

Walang sandaling hindi pinakinggan ng Nuestro Padre Jesus Nazareno ang kalooban ng Ama. Lagi Siyang nakinig sa kalooban ng Ama bago Siya nagpasiya tungkol sa mga bagay-bagay. Habang tinupad Niya ang Kanyang misyon dito sa mundong ito, hindi kinaligtaan ng Poong Jesus Nazareno makipag-ugnayan sa Ama sa pamamagitan ng panalangin. Sa tuwing nanalangin Siya sa Ama, lagi Niya kinakausap at pinakikinggan ang Ama. Ito ang ipinahiwatig ng Amang nasa langit sa Ebanghelyo. Ang ating Poong Jesus Nazareno ay laging nakinig sa Ama bago magpasiya. Ito rin ang dapat nating gawin bilang mga Kristiyano. Bago magpasiya, dapat muna tayong makinig, lalo na sa tinig ng Diyos. 

Lagi nga nating sinasabi, "Huwag padalos-dalos." Dahan-dahan lang. Ito ang paalala sa atin ng Simbahan sa araw na ito. Buksan natin ang ating mga puso at pandinig sa Panginoon. Pakinggan natin ang kalooban ng Panginoong Diyos bago magpasiya. Ito ang lagi nating dapat gawin. Kumunsulta muna sa Diyos. Hingin natin ang gabay ng Diyos. Kapag napakinggan na natin sa katahimikan ang kalooban ng Diyos, doon pa lamang tayo magpapasiya. Bilang mga Kristiyano, nararapat lamang na lagi tayong humiling ng gabay ng Panginoon sapagkat maaasahan naman talaga Siya sa lahat ng bagay. May mga taong hindi maaasahan, subalit ang Panginoong Diyos, tunay ngang maaasahan sa lahat ng bagay. Kaya, marapat lamang pakinggan natin Siya bago tayo gumawa ng anumang pasiya sa buhay, lalo na kapag espirituwal ang pinag-uusapan. Katulad ng nasasaad sa Salmo para sa Linggong ito: "Poon, pag-asa Ka namin, pag-ibig Mo'y aming hiling" (Salmo 32, 22). Isinalungguhit sa mga salitang ito sa Salmong Tugunan para sa Linggong ito ang pagiging maaasahan ng Diyos. 

Sa Unang Pagbasa, si Abram na kilala natin ngayon bilang si Abraham ay nakinig sa pangako at kalooban ng Diyos para sa kanya bago siya nagpasiya. Sa huli, ipinasiya niyang sundin ang kalooban ng Diyos para sa kanya. Sa Ikalawang Pagbasa, muling tinalakay ni Apostol San Pablo ang pagtawag sa atin ng ating butihing Panginoong Diyos upang maging Kanya ngang tunay (2 Timoteo 1, 9). Sa pamamagitan ng mga katagang ito, muling isinalungguhit ni Apostol San Pablo ang halaga ng pakikinig. Sa bawat sandaling makikinig tayo, lalung-lalo na sa Diyos, may magandang plano tayo matutuklas. Ang pinakamagandang plano ay nanggagaling sa Panginoon. Matutuklas lamang natin ito kapag makikinig muna tayo sa Kanya. 

Ang mga tunay na deboto ng Mahal na Poong Jesus Nazareno ay marunong makinig sa kalooban ng Diyos. Dahil lagi silang nakikinig, lalung-lalo na sa Panginoong Diyos, marunong silang mangilatis at magpasiya. Hindi nila isinasara sa ating Panginoong Diyos ang kanilang mga pandinig. Bagkus, kusang-loob nila itong binubuksan. Kaya naman, lagi silang mulat sa katotohanang mas maganda 'di hamak ang kalooban ng Panginoong Diyos kaysa sa mga kalooban at plano ng tao. 

PAGKAKATAONG IPINAGKALOOB DAHIL SA HABAG AT AWA

3 Marso 2023 

Biyernes sa Unang Linggo ng 40 Araw na Paghahanda para sa Pasko ng Pagkabuhay

Ezekiel 18, 21-28/Salmo 129/Mateo 5, 20-26 

Screenshot: Enero 6 (2023) | Dalaw Nazareno at Banal na Oras
(FB Live of The National Shrine and Parish of the Divine Mercy, Sta. Rosa I, Marilao, Bulacan)

Isinasalamin ng mga salita sa Salmong Tugunan para sa araw na ito ang temang nais pagtuunan ng pansin at talakayin ng Simbahan. Ang mga salita sa Salmong Tugunan ay isang dalangin ng isang taos-pusong nagsisisi at nagbabalik-loob sa Diyos. Buong kababaang-loob at taos-pusong humihingi ng habag, kapatawaran, at awa mula sa Diyos ang mang-aawit na itinatampok sa Salmo. Katunayan, inilaan ng mang-aawit na ito ang kabuuan ng Salmo 50 (51) sa paghingi ng habag at awa mula sa Diyos. 

Ang temang nais pagtuunan ng pansin at pagnilayan ng Simbahan sa araw na ito ay walang iba kundi ang misteryo ng habag at awa ng Diyos. Sa pamamagitan nito, muli tayong pinaaalalahanan ng Simbahan tungkol sa pagiging mapagmahal, maawain, at mahabagin ng Diyos. Katunayan, napapanahon ang ginagawa ng Simbahan sa araw na ito dahil ang araw na ito ay isang araw ng Biyernes na inilaan para sa taimtim na debosyon at pamimintuho sa Nuestro Padre Jesus Nazareno at ang araw na ito ng Biyernes ay napapaloob sa 40 Araw na Paghahanda para sa Pasko ng Pagkabuhay na kilala rin sa tawag na Kuwaresma, ang panahong inilaan para sa taimtim na pagsisisi sa kasalanan at pagbabalik-loob sa Diyos. Para sa maraming mga Pilipinong Katoliko, pati na rin ang inyong abang lingkod, ang sagradong imahen ng ating Nuestro Padre Jesus Nazareno ay isang napakagandang sagisag o paalala ng dakilang habag, pag-ibig, at awa ng Diyos. 

Sa Unang Pagbasa, inihayag ang tunay na dahilan kung bakit ipinasiya ni Kristo, ang ating minamahal na Nuestro Padre Jesus Nazareno, ay dumating sa mundong ito sa panahong itinakda bilang ipinangakong Mesiyas at Tagapagligtas ng sangkatauhan. Bagamat hindi ito halata sa unang tingin, basa, o dinig, inilalarawan sa pahayag na ito kung gaano kalalim ang hangarin at kalooban ng Diyos na magsisi sa kasalanan at magbalik-loob sa Kanya ang mga makasalanan. Nais Niya silang pagkalooban ng pagkakataong mamuhay nang banal at kalugud-lugod sa Kanyang paningin habang namumuhay at naglalakbay pa sila dito sa mundong ito. Hindi ba ito ang dahilan kung bakit pumarito sa mundong ito si Kristong Panginoon at Tagapagligtas, ang kusang-loob na nag-alay ng Kanyang buhay sa mismong Krus na Kanyang pinasan mula sa pretoryo patungong Kalbaryo upang tayo'y iligtas, gaya ng inilalarawan ng banal na imahen ng Poong Nazareno? 

Kaya naman, ang pangaral ng Mahal na Poong Jesus Nazareno sa Ebanghelyo para sa araw na ito ng Biyernes ay tungkol sa pakikipagkasundo sa kapwa. Tinuturuan ng Panginoong Jesus Nazareno ang bawat isa sa atin kung paano nating matutupad at maisasabuhay ang mga salitang binigkas ng Panginoong Diyos sa pamamagitan ni Ezekiel na Kanyang hinirang na Propeta sa Unang Pagbasa. Makipag-ayos sa kapwa upang makapagsimula muli. Bigyan natin ng pagkakataon ang ating mga sarili at ang ating kapwa na magkaroon ng isang bagong simula. Ito ang hangarin ng Panginoong Jesus Nazareno para sa atin. Sa pamamagitan nito, tinatanggap at sinusundan nang taos-puso at may kababaang-loob ang kalooban ng Panginoong Diyos para sa atin na maging mga salamin ng Kanyang habag, pag-ibig, at awa. 

Dahil sa habag, pag-ibig, at awa ng Diyos, ang ating Mahal na Poong Jesus Nazareno ay dumating sa mundong ito bilang ipinangakong Mesiyas at Tagapagligtas upang sa pamamagitan ng Kanyang Krus na Banal at Muling Pagkabuhay ay magkaroon tayo ng pagkakataong maging banal at kalugud-lugod sa Kanyang paningin. Ito ang nais o kalooban ng Diyos para sa atin. Magagawa natin ito sa pamamagitan ng paggawa ng mabuti sa kapwa at pagsusumikap na umiwas sa kasalanan. Ang tanong: tutuparin ba natin ang hangaring ito ng Panginoon nang may kababaang-loob at taos-puso? 

BIYAYA PARA SA MGA TUNAY NA MATAPAT SA PANGINOON

26 Pebrero 2023 

Unang Linggo ng 40 Araw na Paghahanda para sa Pasko ng Pagkabuhay (A) 

Genesis 2, 7-9; 3, 1-7/Salmo 50/Roma 5, 12-19 (o kaya: 5, 12. 17-19)/Mateo 4, 1-11 

This faithful photographic reproduction of the painting The Temptation of Christ (c. Between 1579 and 1581) by Jacopo Tintoretto (1519-1584), as well as the work of art itself from the Scuola Grande di San Rocco, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or less due to its age. 

Minsan lamang sa isang taon nating maririnig sa Ebanghelyo para sa Banal na Misa ang salaysay ng pagtukso sa Poong Jesus Nazareno sa ilang. Ang nasabing araw ay walang iba kundi ang mismong araw na ito, ang Unang Linggo ng Apatnapung Araw na Paghahanda para sa Pasko ng Pagkabuhay na mas kilala ng karamihan sa atin sa tawag na Kuwaresma. Sa Banal na Bibliya, ang salaysay ng mahalagang kaganapang ito sa buhay ng Panginoong Jesus Nazareno ay ating mababasa sa tatlong sinotikong Ebanghelista na sina San Mateo, San Marcos, at San Lucas. Sa taong ito, Taon A, ang bersyon sa Ebanghelyo ni San Mateo ay itinatampok at pinagtutuunan ng pansin ng Simbahan sa pagdiriwang ng Banal na Eukaristiya para sa Linggong ito. 

Ang tagumpay ng Panginoong Jesus Nazareno laban kay Satanas sa ilang ay laging itinatampok at pinagninilayan ng Simbahan taun-taon pagsapit ng Unang Linggo ng Kuwaresma. Bagamat naganap ito bago Niya sinimulan ang Kanyang pampublikong ministeryo, ipinasulyap sa atin ng Panginoong Jesus Nazareno ang Kanyang magiging tagumpay sa pamamagitan ng Krus at Muling Pagkabuhay sa sandaling ito. Si Jesus Nazareno, bagamat nag-ayuno at nanalangin sa ilang sa loob ng apatnapung araw at gabi, ay nagtagumpay laban sa demonyo na tatlong beses na tumukso sa Kanya na suwayin ang kalooban ng Ama. Kahit na napakahina Siya noon, hindi nagpatalo ang Poong Jesus Nazareno. Tatlong ulit Siyang tinukso ng demonyong si Satanas, tatlong ulit rin Niya itong tinutulan, nilabanan, at pinagtagumpayan. Iyan ang Panginoong Jesus Nazareno. Nanatili Siyang masunurin sa kalooban ng Ama, kahit napakahina. 

Taliwas sa ginawa ng Panginoong Jesus Nazareno sa salaysay ng pagtukso sa Kanya sa ilang sa Banal na Ebanghelyo para sa Linggong ito ang ginawa ng mga una nating magulang na sina Adan at Eba sa salaysay sa Unang Pagbasa. Sa halip na tutulan at pagtagumpayan ang panunukso at pang-aakit ng demonyo na nagpakita sa kanila sa anyo ng ahas sa Halamanan ng Eden, hinayaan nilang magpaakit sa tukso. Bagamat napakalinaw ang utos ng Panginoong Diyos, ipinasiya nilang suwayin iyon sapagkat hinayaan nilang magpadaig sa tukso ng demonyo. Sa pamamagitan ng sala ng mga una nating magulang na sina Adan at Eba, pumasok ang kasalanan sa mundong ito.

Dahil sa pagsuway nina Adan at Eba, pumasok sa mundong ito. Subalit, sa kabila nito, ipinasiya pa rin ng Diyos na iligtas ang sangkatauhan. Ito ang paksang pinagtuunan ng pansin ni Apostol San Pablo sa kanyang pangaral sa Ikalawang Pagbasa para sa Linggong ito. Sa pamamagitan ni Kristo, ang ating Mahal na Poong Jesus Nazareno, ang biyaya ng pagliligtas ng Diyos ay dumating sa mundong ito. Dahil dito, mayroon tayong pagkakataong maging banal at kalugud-lugod sa paningin ng Panginoon. Ang pagtahak sa landas ng kabanalan, na napangyari ng Diyos sa pamamagitan ng Poong Jesus Nazareno, ay dapat naman nating gawin nang tapat at taos-puso. 

Sabi sa Salmong Tugunan para sa araw na ito: "Poon, Iyong kaawaan kaming sa 'Yo'y nagsisuway" (Salmo 50, 3a). Bilang mga tunay na matapat na lingkod ng Diyos na laging nagsusumikap mamuhay nang banal at kalugud-lugod sa Kanyang paningin, ang mga salitang ito mula sa Salmo ang dapat nating gawing panalangin araw-araw. Kapag ito ang ginawa nating pang-araw-araw na panalangin, ipinapahayag natin ang tapat at taos-puso nating hangaring mamuhay nang banal at kalugud-lugod sa Kanyang paningin. Ipinapakita natin sa pamamagitan nito ang ating kababaang-loob dahil humihingi tayo ng habag at awa mula sa Panginoon. Sa pamamagitan rin ng mga salitang ito, ipinapahayag nating umaasa lamang tayo sa Panginoong Diyos na tanging makakatulong sa atin na magtagumpay laban sa mga tukso sa buhay. Kung wala ang Panginoong Diyos, hindi tayo makakapagtagumpay laban sa mga tukso sa buhay dito sa mundo. Subalit, kung hahayaan nating tulungan tayo ng Panginoong Diyos, kayang-kaya nating labanan at pagtagumpayan ang mga tukso sa buhay. 

Kung hindi dahil sa biyaya ng pagliligtas ng Diyos na dumating sa mundong ito sa pamamagitan ng Nuestro Padre Jesus Nazareno, wala tayong pagkakataong maging banal at kalugud-lugod sa Kanyang paningin. Niloob ng Diyos na ipagkaloob sa atin ang biyayang ito. Subalit, nasa atin pa rin ang pasiya kung ang biyayang ito mula sa Diyos ay taos-puso nating tatanggapin o hindi. Tayo mismo ang magdedesisyon kung susundin ba natin ang kalooban ng Ama katulad ng Nuestro Padre Jesus Nazareno. 

Ipinapaalala sa atin ng Linggong ito na mayroong biyayang naghihintay para sa lahat ng mga tunay na matapat sa Panginoon. Ang mga magpapasiyang maging tunay na matapat at masunurin sa Panginoon ay pagkakalooban ng isang napakagandang biyaya. Katulad ni Jesus Nazareno na pinaglingkuran ng mga anghel matapos Niyang pagtagumpayan ang tatlong tukso ni Satanas sa ilang sa katapusan ng salaysay sa Ebanghelyo, pagpapalain ng Panginoon ang sinumang magiging tapat at masunurin sa Kanya nang taos-puso hanggang sa huli. Ang gantimpalang ito ay matatagpuan sa langit kung saan matatamasa natin ang biyaya ng buhay na walang hanggan kapiling ang ating Panginoon at Manunubos na si Jesus Nazareno magpakailanman. 

Walang hanggang pagpapala sa piling ng Panginoong Jesus Nazareno sa langit ang biyayang inilaan para sa mga tunay na matapat at masunurin sa Kanya. Subalit, tayo mismo ang magpapasiya kung nais ba nating makinabang at makibahagi sa biyayang ito ng Panginoong Jesus Nazareno. 

PAGTINDIG PARA SA PRINSIPIYONG MAKA-DIYOS

25 Pebrero 2023 

Sabado kasunod ng Miyerkules ng Abo 

Ika-37 Anibersaryo ng Himagsikan ng Lakas ng Bayan sa EDSA
(EDSA People Power Revolution - 1986) 

Isaias 58, 9b-14/Salmo 85/Lucas 5, 27-32 

Marahil marami ang magtatanong kung bakit ang Simbahan ay mayroong papel sa apat na araw ng makasaysayang himagsikan o rebolusyon sa EDSA noong 1986. Ang batikos ay masyadong nakikialam o nanghihimasok ang Simbahan sa pulitika. Para sa mga bumabatikos sa Simbahan, dapat manahimik at manalangin ang Simbahan at umiwas o lumayo sa mga pulitikal na usapin o isyu. Mayroong mga nagsasabing bias raw ang Simbahan 'pagkat mayroon raw pinapanigan ang lahat ng mga pari, madre, obispo, at iba pang mga opisyal at importanteng panauhin sa Simbahan. 

Sa totoo lamang, mayroon naman talagang pinapanigan ang Simbahan. Subalit, ang pinapanigan ng Simbahan ay hindi isang pulitikal na partido o kandidato. Bagkus, isa lamang ang pinapanigan ng Simbahan - ang Diyos. Ang prinsipiyong maka-Diyos ay ang pinapanigan at sinusunod ng Simbahan. Ito ang nasaksihan sa apat na araw ng makasaysayang rebolusyon o himagsikan sa EDSA, na kilala rin bilang People Power Revolution, noong 1986. Inihayag ng Simbahan sa makasaysayang apat na araw na ito ang kanyang pakikiisa sa pakikibaka laban sa katiwalian, pandaraya, kasakiman, walang awang pagpatay sa mga inosente, at panlilinlang o panloloko. Ang pakikibaka ng Simbahan ay hindi tungkol sa mga pulitikal na kandidato. Bagkus, tungkol ito sa katarungan at prinsipiyong maka-Diyos. 

Isang patunay nito ay ang imaheng itinatampok sa EDSA Shrine. Hindi imahen o rebulto ng pulitiko ang nakadambana sa EDSA Shrine. Bagkus, itinatampok sa EDSA Shrine ang imahen ng Mahal na Inang si Mariang Birhen, ang Reyna ng Kapayapaan, na nagsabuhay ng aral na isinalungguhit sa mga Pagbasa para sa Banal na Misa sa araw na ito. Sabi sa Salmong Tugunan: "Ituro Mo ang 'Yong loob nang matapat kong masunod" (Salmo 85, 11a). Laging isinentro ng Mahal na Inang si Mariang Birhen ang kanyang puso, isipan, at kaluluwa sa mga salitang ito noong namumuhay siya dito sa daigdig na ito. Wala siyang ibang hinangad kundi ang mapakinggan, maunawaan, at tumalima sa mga utos at loobin ng Panginoon. Sa Unang Pagbasa, malinaw na inilarawan ng Panginoong Diyos ang Kanyang hangarin at naisin. Tutol Siya sa bawat uri ng pang-aalipin at pang-aapi. Nais ng Panginoong Diyos na mabuhay ang lahat, pati na rin ang mga makasalanan, upang magkaroon sila ng pagkakataong maging banal at kalugud-lugod sa Kanyang paningin. Sa Mabuting Balita, ang publikanong si Levi na kilala rin ng marami bilang si Apostol San Mateo ay pinagkalooban ng Poong Jesus Nazareno ng pagkakataong maging banal. 

Nakiisa sa pagtindig at pakikibaka sa EDSA noong 1986 ang Simbahan bilang tanda o pagpahayag ng pagpanig sa prinsipiyong maka-Diyos. Ang prinsipiyong maka-Diyos ay ang pagpahalaga sa buhay ng tao, katotohanan, kapayapaan at katarungan. Ito mismo ang tanging dahilan ng pakikiisa ng Simbahan sa pagtindig at pakikibaka sa rebolusyon sa EDSA noong 1986. Sa pamamagitan nito, inihayag ng Simbahan na hindi dapat ipagkait sa mga tao ang pagbabago sa lipunan kung saan iiral ang kapayapaan, katarungan, katapatan, at pagpahalaga sa buhay ng bawat tao. 

Patuloy na nagkakaloob ang Diyos ng pagkakataon sa lahat ng tao na magbagong-buhay at magbalik-loob sa Kanya. Huwag natin itong ipagkait sa kapwa. Paano natin ito ipinagkakait? Sa pamamagitan ng pagpanig sa mga manlilinlang, magnanakaw, at mamamatay-tao sapagkat pinapalaganap lamang natin ang kasakiman at kawalan ng halaga sa buhay ng tao kapag ito ang ipinasiya nating gawin. Ang nararapat nating gawin ay magpahalaga ng buhay ng bawat tao at maging tagapaghatid ng biyaya ng Diyos at ng katotohanang nagmumula lamang sa Kanya. 

HINDI DAPAT GAWING PALABAS

24 Pebrero 2023 

Biyernes kasunod ng Miyerkules ng Abo 

Isaias 58, 1-9a/Salmo 50/Mateo 9, 14-15 

Screenshot: 02.10.2023 (Memorial of Saint Scholastica, Virgin) 7AM #OnlineMass
(Quiapo Church Facebook Live and YouTube) 

Itinutuon ng Simbahan ang ating mga pansin sa katotohanan ng taimtim na pagsisisi at pagbabalik-loob sa Diyos sa unang Biyernes ng Apatnapung Araw na Paghahanda para sa Pasko ng Pagkabuhay ng Panginoon, ang Nuestro Padre Jesus Nazareno, na tiyak na mas kilala ng marami sa atin sa tawag na Kuwaresma, ang Biyernes kasunod ng Miyerkules ng Abo. Kung tutuusin, ito ang panawagan sa atin ng Simbahan, hindi lamang tuwing sasapit ang panahon ng Kuwaresma, kundi sa buong taon. Habang namumuhay pa tayo dito sa mundong ito, dapat taimtim nating pagsisihan ang ating mga kasalanan at magbalik-loob tayo sa Panginoong Diyos. Bukod pa rito, mismong ang Panginoong Diyos ang tumatawag at nag-aanyaya sa ating magsisi at magbalik-loob sa Kanya nang tapat, taimtim, at taos-puso. Inihahatid at ipinapalaganap ito ng Simbahan, hindi lamang tuwing Kuwaresma, kundi sa buong taon. 

Bakit ito ang utos, hiling, at panawagan ng Panginoong Diyos sa atin? Isinasalamin ng utos, hiling, at panawagang ito ng Diyos ang Kanyang hangarin o naisin para sa atin. Nais ng Panginoon na mamuhay tayo nang banal at kalugud-lugod sa Kanyang paningin. Hindi Niya ninanais na manatili tayong mga makasalanan habambuhay at lalong hindi Niya nais na mapahamak tayo dahil sa ating mga kasalanan. Bagkus, ang tanging naisin ng Panginoong Diyos para sa atin ay makapiling natin Siya sa Kanyang maluwalhating kaharian sa langit kung saan ang walang hanggang kapahingahan, kaligayahan, at ang buhay na walang hanggan sa Kanyang piling ay ating matamasa. Ito ang tanging dahilan kung bakit lagi tayong binibigyan ng Panginoong Diyos ng pagkakataong mamuhay nang banal at kalugud-lugod sa Kanyang paningin habang namumuhay tayo sa mundong ito. 

Subalit, bagamat ang kalooban ng Diyos para sa atin mamuhay tayo nang banal at kalugud-lugod sa Kanyang paningin upang sa wakas ng ating paglalakbay sa mundo ay makapamuhay tayong kapiling Niya sa Kanyang maluwalhating kaharian sa langit magpakailanman, hindi Niya tayo pipilitin. Nais ng Panginoong Diyos na maging totoo tayo sa ating mga pasiya. Hindi natin Siya malilinlang. Batid Niya kung sino ang nagpapanggap o nagkukunwari lamang at kung sino ang mga tapat at totoo. Ito ang paksang tinalakay sa mga Pagbasa para sa araw na ito. Ang pahayag ng Panginoong Diyos sa Unang Pagbasa para sa araw na ito ay isang malakas na pahayag laban sa hungkag na pananalig, pagsamba, pamamanata, debosyon, pagsisisi, at pagbabalik-loob. Batid ng Diyos kung ano ang nasa puso ng bawat tao. Alam Niya kung sinu-sino yaong mga tapat sa kanilang pananalig at pananampalataya at kung sinu-sino yaong gumagawa ng mga palabas. Ito rin ang kahulugan ng mga salitang binigkas ng Poong Jesus Nazareno sa Mabuting Balita para sa Biyernes na ito. Ang lalaking ikakasal na walang iba kundi Siya mismo ay kapiling ng mga apostol. Kaya, puno sila ng tuwa. 

Gaya ng sabi sa Salmong Tugunan para sa araw na ito, ang hinahanap ng Diyos ay kababaang-loob at pusong tapat (Salmo 50, 19b). Hindi Siya naghahanap ng mga artista. Katunayan, alam Niya kung sino yaong mga tapat at sinsero at kung sino ang mga nagpapanggap at gumagawa ng mga palabas. Bagkus, ang hinahanap ng ating Panginoong Jesus Nazareno ay ang mga taos-puso at mga mapagpakumbaba. 

Muli tayong inaanyayahan ng Simbahan na suriin natin ang ating mga sarili. Bakit ba tayo mayroong debosyon sa Nuestro Padre Jesus Nazareno? Tapat at taos-puso nga ba ang ating debosyon at pamamanata sa Poong Nazareno? Isinasalamin ba ng ating debosyon at pamamanata sa Mahal na Poong Jesus Nazareno ang ating taos-pusong pag-ibig, pagsamba, pananalig, at pananampalataya sa Kanya? O ginagawa lamang natin ito dahil nais lamang nating magpasikat?  

Lagi nating tatandaan na hindi dapat ginagawang palabas ang pagsisisi sa kasalanan at pagbabalik-loob sa Diyos. Bagkus, kailangan natin itong gawin nang taos-puso at may kababaang-loob. Ito ang magpapatunay handa tayong tahakin ang landas na inihanda para sa atin ng ating Panginoong Jesus Nazareno, ang landas ng kabanalan na aakay sa atin patungo sa buhay na walang hanggan sa Kanyang piling sa langit. 

MAYROONG IPAGMAMALAKI; WALANG DAPAT IPAGYABANG

22 Pebrero 2023 

Miyerkules ng Abo 

Joel 2, 12-18/Salmo 50/2 Corinto 5, 20-6, 2/Mateo 6, 1-6. 16-18 

This faithful photographic reproduction of the painting Man of Sorrows (c. 1860) by William Dyce, as well as the work of art itself from the National Galleries of Scotland Collection, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1928. 

Mayroong mga nagsasabing ang Miyerkules ng Abo raw ay ang natatanging araw sa buong taon kung kailan makikilala kung sino ang Katoliko. Kapag mayroong tatak ng krus na abo sa noo ang isang tao, isa siyang Katoliko. Sa totoo lamang, bagamat hindi naman araw ng pangilin o araw na kung kailan dapat magsimba ang mga Katoliko, hindi natin maipagkakailang malaki-laki rin ang bilang ng mga mananampalatayang dumadagsa sa iba't ibang mga Simbahan pagsapit ng araw na ito na siyang unang araw ng banal na panahon ng Kuwaresma o Apatnapung Araw na Paghahanda para sa Pasko ng Pagkabuhay upang magsimba at makatanggap ng abo na ibubudbod sa ulo, na isang tradisyunal na gawain noon pa, o papahiran sa kanilang mga noo na tiyak na kinasanayan na ng marami, lalung-lalo na bago ang pandemiyang COVID-19.

Ang araw na ito ay ang simula ng Apatnapung Araw na Paghahanda para sa Pasko ng Pagkabuhay na mas kilala natin sa tawag na Kuwaresma. Sa simula ng panahong ito, nilalagyan tayo ng abo sa noo o kaya naman sa ulo. Subalit, dapat nga ba natin itong ipagmalaki? Kung oo, bakit natin itong dapat ipagmalaki? Kung hindi, bakit nga ba ito ginagawa ng Simbahan taun-taon? Ano nga ba ang kahulugan o saysay ng mga abo? 

Ipinapaalala sa atin ng Simbahan sa araw na ito na mayroon tayong dapat ipagmalaki bilang mga Katoliko. Subalit, hindi ito dapat maging sanhi o dahilan ng pagmamataas o kayabangan. Bagkus, ito ang dapat maging paalala para sa atin na magkaroon ng kababaang-loob. Ipinapaliwanag sa mga Pagbasa para sa araw na ito kung ano ang dapat nating ipagmalaki. Sa Unang Pagbasa, nanawagan ang Panginoon sa Kanyang bayan na magsisi at magbalik-loob sa Kanya nang taos-puso at taimtim. Ang mga salitang ito ng Panginoong Diyos sa Unang Pagbasa para sa araw na ito ay tunay nga namang napapanahon at umaalingawngaw pa nga sa araw na ito dahil halaw sa mga mismong salitang ito ang panawagan ng Simbahan sa panahon ng Kuwaresma. Sa Ikalawang Pagbasa, inihayag ni Apostol San Pablo na hindi ipinagpapaliban ng Diyos ang Kanyang pagliligtas. Dahil dito, ngayon na mismo ang panahong nararapat upang magbalik-loob sa Diyos. Hindi dapat ipagpaliban ang pagbabalik-loob sa Panginoong Diyos. Sa Ebanghelyo, inihayag ni Kristo, ang Panginoong Jesus Nazareno, na dapat tayong maging tapat sa ating pagsisisi, pagbabalik-loob, pamamanata, pananalangin, at pagkakawanggawa. Hindi ito dapat maging pakitang-tao. Katunayan, ang Diyos ay hindi naman naghahanap ng mga artista. Bagkus, ang hinahanap ng Diyos ay yaong mga tapat at kusang-loob na pagsisisi at pagbabalik-loob sa Kanya. Ito ang hudyat ng simula ng pagtahak ng bawat isa sa atin sa landas ng kabanalan. 

Bilang mga bumubuo sa tunay at nag-iisang Simbahang itinatag ni Kristo, ang Mahal na Poong Jesus Nazareno, dapat nating ipagmalaki ang ating Diyos na tunay ngang mahabagin at mapagmahal. Dahil sa Kanyang pag-ibig, kagandahang-loob, at habag, patuloy Niya tayong binibigyan ng pagkakataong magsisi at magbalik-loob sa Kanya. Sa kabila ng ating pagiging mga makasalanan, nais pa rin Niya tayong iligtas. Ito ang dahilan kung bakit ang Nuestro Padre Jesus Nazareno ay dumating sa mundong ito bilang ipinangakong Mesiyas at Manunubos. Sa pamamagitan Niya, binigyan tayo ng pagkakataon ng Diyos na magpaligtas, magbalik-loob sa Kanya nang taos-puso, at tahakin ang landas ng kabanalan, katulad ng Kanyang hangarin o kalooban para sa atin. Ang katotohanang ito ay dapat nating ipagmalaki. Mga makasalanan tayo. Subalit, mayroon tayong Diyos na tunay ngang mahabagin at mapagmahal. Dahil sa pag-ibig at habag ng Diyos, ipinasiya Niya tayong iligtas sa pamamagitan ng Poong Jesus Nazareno, ang Kanyang Bugtong na Anak, upang sa pamamagitan Niya'y ang bawat isa sa atin na bumubuo sa Kanyang Simbahan ay magkaroon ng pagkakataong taos-pusong magbalik-loob sa Kanya, magpaligtas, at maging banal.

Sabi sa Salmong Tugunan para sa araw na ito: "Poon, Iyong kaawaan kaming sa 'Yo'y nagsisuway" (Salmo 50, 3a). Bilang mga Kristiyano, buong kababaang-loob tayong humingi ng habag at awa mula sa Panginoong Diyos. Nawa'y maging tapat at taos-puso ang ating pagsisisi't pagtalikod sa kasalanan at pagbabalik-loob sa Panginoong Diyos upang masimulan natin agad ang ating pagtahak sa landas ng kabanalan, katulad ng mga banal na tao na nauna sa atin at ngayo'y kapiling na Niya sa Kanyang maluwalhating kaharian sa langit kung saan maghahari Siya magpakailanman. 

Wala tayong dahilan upang tayo'y magmataas o magyabang. Subalit, mayroon tayo dapat ipagmalaki. Ang dapat nating ipagmalaki bilang Simbahan ay walang iba kundi ang Diyos na tunay ngang maawain, mahabagin, at mapagmahal. Lagi Niya tayong binibigyan ng pagkakataong maging banal ang bawat isa sa atin. 

ANG TANGI NATING PAG-ASA

21 Pebrero 2023 

Kapistahan ng Banal na Mukha ni Jesus Nazareno 
(Martes bago ang Miyerkules ng Abo) 

Martes ng Ikapitong Linggo sa Karaniwang Panahon (Taon I) 

Sirak 2, 1-13 (gr. 1-11)/Salmo 36/Marcos 9, 30-37 

This faithful photographic reproduction of the painting The Veil of St. Veronica (Vera Icon) (c. 1450) by Wilhelm Kalteysen (1420-1496), as well as the work of art itself from the National Museum in Wroclaw, is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or less due to its age. 

Isang natatanging araw ang Martes bago ang Miyerkules ng Abo. Ang Martes bago ang Miyerkules ng Abo ay inilaan ng Simbahan para sa pagdiriwang ng Kapistahan ng Banal na Mukha ni Jesus Nazareno. Tila paalala ng Simbahan para sa atin tungkol sa sisimulan nating pagtuunan ng pansin at pagnilayan nang buong kataimtiman sa loob ng apatnapung araw bilang paghahanda ng ating mga sarili para sa maringal na pagdiriwang ng Dakilang Kapistahan ng Pasko ng Muling Pagkabuhay ng Panginoong Jesus Nazareno, ang pinakadakilang araw sa Kalendaryo ng Simbahan. Kaya nga, ang opisyal na tawag sa banal na panahong ito, na mas kilala natin bilang panahon ng Kuwaresma, ay ang 40 Araw na Paghahanda para sa Pasko ng Pagkabuhay. 

Napakalinaw kung ano ang pangunahing layunin ng Inang Simbahan sa natatanging araw na ito na inilaan para sa Kapistahan ng Banal na Mukha ng ating Panginoong Jesus Nazareno. Katunayan, sa pangalan pa lamang ng pagdiriwang para sa araw na ito, agad natin itong malalaman at mauunawaan. Itinutuon ng Simbahan ang ating mga pansin sa Banal na Mukha ng Panginoong Jesus Nazareno na naghain ng buhay para sa atin. Ito ang itinatampok ng bawat larawan ng Banal na Mukha ng Mahal na Señor, lalung-lalo na sa bawat larawan na itinatampok ang belo ng isang babaeng kilala sa tradisyon ng Simbahan bilang si Santa Veronica. Kusang-loob na ibinubo ng butihing Poong Jesus Nazareno ang Kanyang Kabanal-Banalang Dugo mula sa Krus upang tayong lahat ay maligtas mula sa kasalanan at kamatayan. Kusang-loob Niya ginawa ito dahil sa Kanyang pag-ibig, habag, at kagandahang-loob para sa atin. Muli tayong pinaalalahanan ng Simbahan tungkol sa katotohanang ito at ito rin ang siyang dakilang misteryong pagninilayan natin sa kabuuan ng panahon ng Kuwaresma. 

Ang Unang Pagbasa para sa araw na ito ay nakasentro sa mga hirap at pagdurusang haharapin at titiisin ng bawat lingkod ng Panginoong Diyos. Hindi pagtakas o silong mula sa mga hirap at pagdurusang haharapin at titiisin sa buhay ang paglilingkod sa Diyos. Lalo pa nga silang matutudla ng mga hirap, tukso, at pagdurusa sa buhay dahil sa kanilang katapatan sa Diyos. Maging ang mismong Poong Jesus Nazareno ay hindi naging ligtas mula sa mga ito noong dumating Siya sa daigdig na ito. Sa Banal na Ebanghelyo para sa araw na ito, muling nagsalita si Jesus Nazareno sa mga apostol tungkol sa Kanyang pagpapakasakit at pagkamatay sa Krus. 

Kung si Jesus Nazareno ay hindi naging ligtas mula sa mga tukso, hirap, at pagsubok sa buhay, tayo pa kaya na mga tao lamang? Subalit, tinuturuan tayo ng Poong Jesus Nazareno kung paano natin malalampasan at mapagtatagumpayan ang mga tukso, hirap, at pagdurusa sa buhay dito sa mundong ito. Maging mapagpakumbaba. Ito ay dahil sa pamamagitan ng kababaang-loob, pinapatunayan nating tanging ang Diyos lamang ang ating pag-asa. Sa Diyos lamang tayo umaasa sapagkat Siya lamang ang tanging maaasahan. Ang mga katagang binigkas ng Panginoong Jesus Nazareno sa ikalawang bahagi ng Ebanghelyo para sa natatanging araw na ito ay maaaring ituring bilang isang detalyadong paliwanag ng mga salita sa Salmong Tugunan kung saang malakas na inihayag ng mang-aawit na tanging ang Diyos lamang ang maaasahan. 

Walang sinuman dito sa mundo ang makakatakas o makaliligtas mula sa mga tukso, hirap, at pagsubok sa buhay. Subalit, katulad ng Mahal na Poong Jesus Nazareno na nagpakasakit at namatay sa Krus alang-alang sa atin, maaari nating ipagkatiwala ang ating mga sarili sa Diyos. Ang Diyos lamang ang tangi nating mapagkakatiwalaan at maaasahan. Katulad ni Kristo, ang ating Poong Jesus Nazareno, buong kababaang-loob nating sundin ang Kanyang kalooban na mamuhay nang banal at kalugud-lugod sa Kanyang paningin, sa kabila ng lahat ng mga hirap, tukso, at pagsubok sa buhay dito sa mundong ito. 

MAHIRAP PERO MAYROONG HALAGA

19 Pebrero 2023 

Ikapitong Linggo sa Karaniwang Panahon (A) 

Levitico 19, 1-2. 17-18/Salmo 102/1 Corinto 3, 16-23/Mateo 5, 38-48 

This faithful photographic reproduction of the painting Flagellazione di Cristo (c. 16th century) which is attributed to Simone Peterzano, from the Basilica di Santa Prassede in Rome, as well as the work of art itself, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Bilang tao, mahirap para sa atin na tuparin at sundin ang aral na nais muling ituro sa atin ng mga Pagbasa para sa Linggong ito. Walang taong namumuhay sa mundong ito ang makapagsasabi nang napakalakas na hindi siya nahirapan unawain, sundin, at tuparin ang aral na ito kailanman. Lahat tayo, bilang mga tao namumuhay dito sa mundong ito, ay nahirapang sundin ito. Ito ang katotohanan. Kapag mayroong lakas-loob na nagsabing hindi siya nahirapang sundin ang aral at utos na ito ng Panginoon na itinatampok sa Linggong ito, isa siyang sinungaling. 

Itinuro ng Panginoong Jesus Nazareno sa Ebanghelyo para sa Linggong ito na bilang mga Kristiyano, dapat nating ibigin ang ating mga kaaway at itaas ang mga umuusig sa atin sa ating mga panalangin sa Diyos (Mateo 5, 44-45). Hindi maaaring sabihing ninuman na walang kahirap-hirap na unawain at sundin ang turong ito ng Mahal na Poong Jesus Nazareno. Mahirap unawain at sundin ang utos na ito ng Poon. Ito ang katotohanan tungkol sa aral na ito ng Poong Jesus Nazareno sa Ebanghelyo para sa Linggong ito. Wala tayong maloloko at malilinlang. Mahalin ang kaaway at ipagdasal yaong mga umuusig sa atin? Kung susundin ang lohika ng mundo, ang turong ito ni Jesus Nazareno ay kahibangan at kalokohan. Ganyan kahirap unawain at sundin ito. 

Ang turong ito ni Kristo sa Ebanghelyo para sa Linggong ito ay naka-ugat sa pahayag ng Panginoong Diyos na inilahad ni Moises sa mga Israelita sa Unang Pagbasa. Ang utos ng Panginoong Diyos sa mga Israelita ay maging banal katulad Niya (Levitico 19, 2). Nakasentro sa aral na ito ng Panginoong Diyos na inilahad sa Unang Pagbasa at Ebanghelyo ang pangaral ni Apostol San Pablo sa Ikalawang Pagbasa. Sa kanyang pangaral tungkol sa paksang ito, iitinuro ni Apostol San Pablo ang dahilan kung bakit dapat nating tuparin at sundin ang utos na ito ng Panginoon. Sa pamamagitan nito, tinutupad natin ang ating mga tungkulin bilang mga templo ng Diyos. Tayong lahat ay itinalaga ng Diyos bilang Kanyang mga templo. Kaya naman, dapat namumuhay tayo bilang mga kapanig at kakampi ni Kristo, ang Nuestro Padre Jesus Nazareno. Ito ang kinakailangan nating gawin bilang mga templo ng Diyos. Maging daluyan ng Kanyang habag, pag-ibig, at biyaya para sa lahat. 

Hindi madaling maging banal. Napakahirap itong gawin bilang mga tao. Katunayan, wala namang sinabi ang Panginoong Jesus Nazareno na napakadaling maging banal kailanman. Maraming ulit pa nga Niyang inilarawan kung gaano kahirap maging banal at kalugud-lugod sa Diyos. Batid Niya kung gaano ito kahirap para sa atin bilang tao. Subalit, sa kabila nito, lagi pa rin Niyang itinuturo sa atin, maging sa kasalukuyan, na dapat tayong maging banal. Nais ng Panginoong Jesus Nazareno na tayo ay Kanyang makapiling sa Kanyang kaharian sa langit sa wakas ng ating buhay sa mundo. 

Nais ng Mahal na Poong Jesus Nazareno na matamasa natin ang biyaya ng buhay na walang hanggan sa Kanyang piling sa Kanyang kaharian sa langit sa wakas ng ating buhay sa mundong ito. Ito rin ba ang nais natin bilang mga deboto ng Nuestro Padre Jesus Nazareno? Kung tunay tayong mga deboto ng Mahal na Poong Jesus Nazareno, lagi tayong magsusumikap na maging banal katulad Niya upang matupad natin ang Kanyang naisin para sa atin na makapiling natin Siya sa Kanyang kaharian sa langit magpakailanman sa wakas ng ating buhay sa mundong ito.  

SUNDIN ANG MGA YAPAK AT ANG HALIMBAWA NI JESUS NAZARENO

17 Pebrero 2023 

Biyernes ng Ikaanim na Linggo sa Karaniwang Panahon (Taon I) 

Genesis 11, 1-9/Salmo 32/Marcos 8, 34-9, 1 

Screenshot: 02.05.2023 (5th Sunday in Ordinary Time) 11AM #OnlineMass
(Quiapo Church Facebook Live and YouTube) 

Ang mga Pagbasa sa Misa para sa araw na ito ng Biyernes, ang araw na inilaan para sa taimtim na debosyon at pamamanata sa Poong Jesus Nazareno, ay nakatuon sa paksa ng pagtulad sa Kanya. Bilang mga deboto ng Mahal na Poong Jesus Nazareno, tinatawag tayong maging banal katulad Niya. Lagi tayong tinatawag ng Poong Jesus Nazareno na sumunod sa Kanyang mga yapak at halimbawa bilang patunay ng pag-ibig, pagsamba, pamamanata, pananampalataya, pananalig, at debosyon sa Kanya. Kung tunay at tapat tayo sa ating pag-ibig, pagsamba, pamamanata, pananalig at debosyon sa Poong Jesus Nazareno, handa tayong gawin ito para sa Kanya. 

Sa Unang Pagbasa, inilarawan ang pagiging ambisyoso ng mga tao na nagtayo sa tore at lungsod ng Babel na maging kapantay ng Diyos. Ang Panginoon ay nais nilang pantayan at higitan. Walang lugar o puwang ang Panginoong Diyos sa kanilang mga isipan at puso. Balak nilang itanghal ang kanilang mga sarili bilang mga sarili nilang diyos-diyosan. Sa pamamagitan nito, nagpakita sila ng pagmamataas o yabang. Kaya naman, ginulo at nilito ng Panginoong Diyos ang kanilang mga wika upang hindi sila magkaunawaan. Sa pamamagitan nito, ipinaalala ng Panginoon sa kanila na hindi sila ang tunay na Diyos. 

Inilarawan naman ng Mahal na Poong Jesus Nazareno sa Ebanghelyo kung ano ang dapat gawin ng mga debotong tunay ngang nagmamahal, namamanata, nananalig, at sumasamba sa Kanya. Kailangan nating palaguin ang ating debosyon sa Mahal na Poon. Dapat tayong maging bukas sa Kanyang paghirang sa atin bilang Kanyang mga lingkod. Ang magpapatunay nito ay ang ating pagtupad sa utos at habilin ng Mahal na Poong Jesus Nazareno sa Ebanghelyo na limutin ang sarili, pasanin ang ating mga krus, at sumunod sa Kanya (Marcos 8, 34). Kapag ito ang ipinasiya nating gawin, ang Mahal na Poong Jesus Nazareno ay tunay nating iniibig, sinasamba, pinananaligan, sinasampalatayanan, at pinaglilingkuran. Ito ang katangian ng mga tunay na pinili't hinirang ng Diyos, gaya ng inilalarawan sa Salmong Tugunan para sa araw na ito. 

Mapapatunayan nating tunay, taimtim, at tapat ang ating debosyon at pamamanata sa Nuestro Padre Jesus Nazareno kung buong kababaang-loob nating susundin ang Kanyang mga utos at loobin. Sa pamamagitan nito, tinatanggap natin ang Kanyang paanyayang sundin ang Kanyang mga yapak sa landas ng kabanalan na aakay sa atin tungo sa Kanyang walang hanggang kaharian sa langit. Sa pamamagitan rin nito, ang ang ating mga krus sa buhay dito sa mundo ay tinatanggap, niyayakap, at pinapasan natin nang buong kababaang-loob, katulad ng Kanyang ginawa para sa atin noong unang Biyernes Santo. Ito ang magpapatunay nating tinatanggap natin nang kusang-loob ang Kanyang pagtawag at paghirang sa atin. Ito ang kailangan nating tuparin at gawin bilang mga deboto ng Nuestro Padre Jesus Nazareno. 

ANG DIYOS AY HINDI NAGHAHANAP NG MGA ARTISTA

12 Pebrero 2023 

Ikaanim na Linggo sa Karaniwang Panahon (A) 

Sirak 15, 16-21 (gr. 15-20)/Salmo 118/1 Corinto 2, 6-10/Mateo 5, 17-37 (o kaya: 5, 20-22a. 27-28. 33-34a. 37)

This photographic reproduction of the painting Christ Before Caiaphas (16th century) by Luca Cambiaso  (1527–1585) from the Hunterian Museum and Art Gallery Collection is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer because the author died in 1585. This is also in the Public Domain in the United States because it was published (or registered with the U.S. Copyright Office) before January 1, 1928. 

Ang taos-pusong pagsunod at pagtupad sa mga utos ng Panginoong Diyos ay ang paksang binibigyan ng pansin, tinatalakay, at at pinagninilayan ng mga Pagbasa para sa Linggong ito. Sa pamamagitan nito, muli tayong pinaalalahanan at tinuturuan ng Inang Simbahan kung paanong maging tunay na matapat at masunurin sa Diyos. Sa gayon, lalo lamang lalago ang ating pananalig at pananampalataya sa Kanya. Ito ang dapat nating gawin bilang mga Kristiyano. Ito ang magpapatunay pinapanigan nga ba talaga natin ang Panginoon. Katunayan, ito ang hinihiling sa atin ng Panginoon.

Sa Unang Pagbasa, isinalungguhit ang kahulugan, layunin, at buod ng mga utos ng ating butihing Panginoong Diyos: "Kailanma'y wala Siyang inutusang magpakasama, O pinahintulutang magkasala" (Sirak 15, 21). Ito ang dahilan kung bakit ang Diyos ay nagbigay ng mga utos sa atin. Nais ng Panginoong Diyos na tahakin ng mga tao sa mundong ito ang landas ng kabanalan. Hindi Niya kinalulugdan ang kasamaan at ang kasalanan. Bagkus, kinalulugdan ng Diyos ang kabutihan at ang kabanalan. Ang mga gumagawa ng mabuti at namumuhay nang banal ay tunay ngang kalugud-lugod sa paningin ng Panginoon. Ito ang nasa puso ng Kanyang mga utos. Maging banal ang lahat ng mga tao. 

Katulad ng Unang Pagbasa, tinalakay rin ang paksa ng tapat at taos-pusong pakikinig at pagtupad sa kalooban ng Panginoong Diyos sa Salmong Tugunan at sa Ikalawang Pagbasa para sa Linggong ito. Sabi sa Salmong Tugunan: "Mapalad ang sumusunod sa utos ng Poong Diyos" (Salmo 118, 1b). Ang mga tunay na mapalad ay yaong mga taong kalugud-lugod sa paningin ng Panginoon. Maaaring maging kalugud-lugod sa Diyos ang bawat tao sa mundong ito kapag tumalima sila sa Kanyang mga utos at loobin. Sa Ikalawang Pagbasa, muling ipinaalala ni Apostol San Pablo ang ginawa ng butihing Diyos alang-alang sa atin. Inihayag ng Panginoon ang Kanyang panukalang inilihim Niya sa atin noong una. Sa pamamagitan ni Kristo, ang Mahal na Poong Jesus Nazareno, ang panukalang ito ng Diyos ay nahayag. 

Mayroong dagdag na utos ang Panginoong Jesus Nazareno sa Ebanghelyo. Sabi Niya sa Kanyang pangaral sa Ebanghelyo na dapat maging tapat at taos-puso ang ating pakikinig at pagsunod sa kalooban ng Diyos. Ang Diyos ay hindi naghahanap ng mga artista. Hindi natin malilinlang ang Diyos. Batid ng Diyos kung ano nga ba talaga ang nasa puso natin at kung bukal sa ating puso ang ating pagtupad sa Kanyang mga utos. Ang tawag ng Panginoon para sa atin ay maging banal at kalugud-lugod sa Kanyang paningin. Hindi ito katulad ng pag-auditon para magkaroon ng mga papel na gagampanan sa mga pelikula o mga serye katulad na lamang ng Batang Quiapo. Iba iyan sa hinahanap ng Panginoon. Hindi mga artista kundi mga tapat at taos-pusong tagasunod ang hinahanap ng Mahal na Poong Jesus Nazareno (Mateo 5, 20). 

Walang silbi ang pagsisimba, pagsama sa mga prusisyon, pagdarasal ng Rosaryo at mga Nobena kung hindi naman tayo magiging taos-puso. Halimbawa, namamanata sa Poong Señor. Tutungo sila sa Simbahan ng Quiapo o saanmang Simbahan upang manalangin at magsimba nang buong kataimtiman. Nakapikit pa nga yung ilan habang ginagawa iyon. Subalit, sa oras na lumabas sila ng Simbahan, mayroong ilang wagas ang pagsuporta sa mga kilalang sinungaling, magnanakaw, at mamamatay-tao. Ibang-iba na sila. Tapos, kapag may mga pekeng balita na pabor sa mga kilalang sinungaling, magnanakaw, at mamamatay-tao, hindi nila kukuwestiyunin ang mga ito. Agad nilang paniniwalaan at ipapalaganap ang mga ito. Sila pa nga yaong mga galit kapag sinabihan silang pekeng balita ang mga pinaniniwalaan at ipinapalaganap nila. Magbubulag-bulagan at magbibingi-bingihan sa mga tunay na balita tungkol sa katiwalian at kawalan ng katarungan sa lipunan. Hindi iyan maikukubli o maililihim sa Mahal na Poong Jesus Nazareno. Batid iyan ng Mahal na Poong Jesus Nazareno at hindi iyan ang Kanyang hinahanap mula sa atin. 

Nais ng Nuestro Padre Jesus Nazareno na maging tapat at taos-puso tayo sa ating pagsunod sa Kanyang mga utos. Kung tunay tayong mga deboto ng Mahal na Poong Jesus Nazareno, tutuparin at susundin natin ang Kanyang mga utos nang tapat at taos-puso. Hindi natin ito gagawin dahil napipilitan lamang tayo gawin iyon. Bagkus, gagawin natin ito sapagkat tunay nating minamahal, sinasamba, pinananaligan, at sinasampalatayanan ang Mahal na Poong Jesus Nazareno. Gagawin natin ito bilang paghahayag ng ating pag-ibig, debosyon, at pananalig sa Mahal na Poon, at hindi bilang audition para sa mga artista.