PANANAGUTAN BILANG SIMBAHAN

10 Setyembre 2023 

Ika-23 Linggo sa Karaniwang Panahon (A) 

Ezekiel 33, 7-9/Salmo 94/Roma 13, 8-10/Mateo 18, 15-20 

SCREENSHOT: #QuiapoChurch Official 5AM #OnlineMass - 30 August 2023 WEDNESDAY of the 21st Week in Ordinary Time (Facebook and YouTube) 

Ang mga Pagbasa para sa Linggong ito ay muling nakasentro sa ating misyon bilang mga Kristiyano. Bilang mga Kristiyanong bumubuo sa tunay at nag-iisang Simbahang itinatag ni Kristo, ang Mahal na Poong Jesus Nazareno, mayroon tayong misyong kailangang tuparin. Inilarawan ang ating misyon bilang Simbahan sa mga Pagbasa bilang isang pananagutan o responsibilidad na ibinigay ng Diyos. Kapag hindi natin tinupad ang misyong ibinigay sa atin ng Diyos, mananagot tayo sa Kaniya. Dahil dito, dapat nating gamitin natin nang mabuti ang bawat pagkakataong bigay sa atin ng Panginoong Diyos upang tuparin ito.

Sa Unang Pagbasa, malakas na inihayag ng Diyos kay Ezekiel na propetang Kaniyang hinirang na mananagot ang lingkod Niyang ito kapag hindi niya tinupad ang misyong ipinagagawa sa kaniya. Ipinaalala ng Diyos kay Propeta Ezekiel na ang misyon niya bilang propeta ay ang kaniyang pananagutan sa Diyos. Binalaan ng Diyos na kapag ang misyong ito ay hindi tinupad ni Propeta Ezekiel, sa Kaniya mismo mananagot ang propetang ito. Hindi lamang sa mga tao magkukulang si Propeta Ezekiel kundi pati na rin sa Diyos. Ang hindi pagtupad ni Propeta Ezekiel sa misyong ibinigay ng Diyos sa kaniya ay magiging isang napakalaking pagkukulang at kasalanan sa Diyos. 

Inilarawan ni Apostol San Pablo sa Ikalawang Pagbasa kung bakit ipinasiya ng Diyos na ibigay ang Kaniyang mga utos at bigyan rin ng misyon ang bawat isa sa atin na bumubuo sa tunay at nag-iisang Simbahang itinatag ng Panginoong Jesus Nazareno. Sabi ni Apostol San Pablo na "pag-ibig ang kabuuan ng kautusan" (Roma 13, 10). Ang dahilan kung bakit ibinigay sa atin ng Diyos ang Kaniyang mga utos at binigyan rin tayo ng misyon ay dahil sa Kaniyang pag-ibig. Nais rin ng Diyos na bigyan tayo ng pagkakataong ihayag ang ating pag-ibig sa Kaniya. Dahil dito, inihayag sa atin ng Diyos ang Kaniyang mga utos upang ating masunod at tayo'y binigyan rin Niya ng misyon upang ating matupad. 

Nakasentro sa misyon natin bilang Simbahan ang pangaral ng Poong Jesus Nazareno sa Ebanghelyo. Ang ating misyon ay maging mga tagapagpalaganap at salamin ng pag-ibig, kagandahang-loob, biyaya, habag, at awa ng Panginoong Diyos sa lahat. Sa bawat sandali ng ating pansamantalang buhay at paglalakbay dito sa mundong ito, ang pag-ibig, kagandahang-loob, biyaya, habag, at awa ng Diyos ay dapat ipalaganap. Ito ang misyon na ibinigay sa atin ng Nuestro Padre Jesus Nazareno. Gaano man ito kahirap tuparin at gawin, dapat pa rin natin itong tuparin at gawin sapagkat ito ang misyon at pananagutan natin bilang mga Kristiyano. Kapag ito ang ipinasiya nating gawin, inihahayag natin ang tapat nating pag-ibig, pananalig, at pagsamba sa unang umibig sa atin na walang iba kundi ang Panginoong Diyos. 

Gaya ng sabi sa Salmong Tugunan para sa Linggong ito: "Panginoo'y inyong dinggin, huwag n'yo S'yang salungatin" (Salmo 94, 8). Ito ang panawagan sa atin para sa Linggong ito. Kung tunay nating minamahal ang Diyos, tutuparin at susundin natin ang Kaniyang mga utos at loobin. Ang misyon at pananagutang Kaniyang ibinigay sa bawat isa sa atin na bumubuo sa Simbahan ay buong kababaang-loob, katapatan, at pananalig nating yayakapin at tatanggapin. 

Mayroon tayong pananagutan sa Diyos bilang Simbahan. Kung tunay nating iniibig, pinananaligan, at sinasamba ang Diyos, tutuparin natin ang ating pananagutan bilang Simbahan. Ito ang pagkakataong ibinigay ng Diyos upang ipahayag sa lahat ang ating tapat na pag-ibig, pananalig at pagsamba sa Kaniya. 

DAHILAN NG PAGSILANG

8 Setyembre 2023 

Kapistahan ng Pagsilang ng Mahal na Birheng Maria 

Mikas 5, 1-4a (o kaya: Roma 8, 28-30)/Salmo 12/Mateo 1, 1-16. 18-23 (o kaya: 1, 18-23) 

This faithful photographic reproduction of the painting The Birth of the Virgin by Giuseppe Bartolomeo Chiari (1654–1727), as well as the actual work of art itself from the National Trust Collection via Art UK, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer because the author died in 1727. 

Hindi lamang sa Pilipinas ginugunita at ipinagdiriwang nang buong galak at halaga ang araw ng pagsilang ng Mahal na Birheng Maria. Oo, kinikilala ang Pilipinas bilang isang Pueblo Amante De Maria ("Bayang Sumisinta kay Maria"), subalit hindi lamang sa Pilipinas idinadaos at ipinagdiriwang ang Kapistahang itinakda sa araw na ito. Ang Kapistahang ipinagdiriwang ng Simbahan sa araw na ito ay pandaigdigan dahil Ina rin ng buong Simbahan ang Mahal na Birheng Maria. Ito ang dahilan kung bakit sabi sa Pambungad na Antipona para sa Misa sa Kapistahang ito: "Halina't ipagdiwang ang maligayang pagsilang ni Mariang Birheng Mahal . . ." 

Tandaan, hindi sinabi sa Pambungad na Antipona para sa araw na ito "Halina, mga Pilipinong Katoliko! Ipagdiwang natin ang maligayang pagsilang ni Mariang Birheng Mahal . . ." Bagkus, ang sabi ay "Halina't ipagdiwang . . ."  Walang sinabing lahi o lipi o bansa sa Pambungad na Antipona. Patunay lamang ito na hindi lamang Ina si Maria ng mga Pilipinong Katoliko kundi ng pandaigdigang Simbahan. Anuman ang lahi, lipi, wika, bayan, o bansang kinabibilangan ninuman, inaanyayahan pa rin silang gunitain at ipagdiwang ang Kapistahan ng Pagsilang ng Mahal na Inang si Mariang Birhen. 

Bakit pa nga ba pinapahalagahan ng Simbahan ang araw na ito? Hindi pa ba sapat ang araw ng pagsilang ng Panginoong Hesukristo, ang Nazareno? Kung tutuusin, sa pananaw ng marami, hindi naman mahalaga ang araw ng pagsilang ng Mahal na Inang si Mariang Birhen. Hindi naman siya ang ipinangakong Mesiyas at Manunubos kundi ang kaniyang Anak na si Kristo Hesus. Hindi ba dapat ang pagsilang lamang ng Mahal na Poong Jesus Nazareno lamang ang dapat gunitain at ipagdiwang? Totoo namang mas mahalaga ang araw ng pagsilang ng Poong Jesus Nazareno sapagkat Siya mismo ang ipinangakong Mesiyas at Manunubos ng buong sangkatauhan. Pero, hindi ito nangangahulugang walang saysay ang araw ng pagsilang ng Mahal na Ina dahil siya mismo ang nagluwal sa Bugtong na Anak ng Diyos na si Jesus Nazareno, gaya ng nasasaad sa Pambungad na Antipona para sa araw na ito. 

Mayroong dahilan kung bakit ang Mahal na Inang si Mariang Birhen ay isinilang dito sa mundong ito. Isinilang ang Mahal na Birheng Maria sa mundong ito upang maging Ina ng ipinangakong Mesiyas at Manunubos na walang iba kundi si Jesus Nazareno, ang Bugtong na Anak ng Diyos. Kung tutuusin, ang mga Pagbasa para sa Pistang buong galak na ipinagdiriwang ng Simbahan sa araw na ito ay nakasentro sa biyaya ng kaligtasang ipinangakong ipagkakaloob ng Diyos sa pamamagitan ng Panginoong Jesus Nazareno. Sa Unang Pagbasa, inihayag ng Diyos sa pamamagitan ni Mikas na propetang Kaniyang hirang na isisilang sa Betlehem ang ipinangakong Mesiyas na walang iba kundi si Jesus Nazareno. Sa Ebanghelyo, inilahad ang mga kaganapang kaugnay ng pagsilang ng Nuestro Padre Jesus Nazareno. 

Gaya ng Mahal na Birheng Maria, mayroon ring dahilan kung bakit isinilang tayo sa mundong ito. Mayroong misyon at tungkuling ibinigay ang Diyos sa atin. Inihayag ni Apostol San Pablo sa alternatibong Unang Pagbasa na tayong lahat ay tinawag at itinalaga ng Diyos upang maging Kaniya. Kung tutuparin natin ito, isinasabuhay natin nang buong katapatan at pananalig ang mga salita sa Salmo para sa Kapistahang buong galak na ipinagdiriwang ng buong Simbahan sa araw na ito: "Ang lubos kong kasiyahan ay magalak sa Maykapal" (Isaias 61, 10). Dagdag pa sa isa sa mga taludtod sa Salmo: "Lubos akong nananalig sa pag-ibig Mong matapat" (Salmo 12, 6a). Ito ay taos-puso nating maipapahayag kapag ang mga misyon at papel na bigay sa atin ng Diyos ay ating tinupad, katulad ng Mahal na Birheng Maria. 

Isinilang ang Mahal na Birheng Maria sa mundong ito upang maging Ina ng Bugtong na Anak ng Diyos at ipinangakong Mesiyas at Manunubos na walang iba kundi ang Poong Jesus Nazareno. Mayroon ring dahilan kung bakit isinilang sa mundong ito ang bawat isa sa atin. Tayong lahat ay binigyan rin ng misyon, bokasyon, at tungkulin ng Diyos. Habang buong galak nating ginugunita at ipinagdiriwang bilang Simbahan ang kapanganakan ng Mahal na Inang si Mariang Birhen, hilingin natin sa Diyos na bigyan tayo ng lakas ng loob upang maisakatuparan natin ang bigay Niyang misyon, papel, at tungkulin na siyang dahilan kung bakit tayo isinilang sa mundo, gaya ng Mahal na Ina. 

KATAPATAN SA PANGINOON

3 Setyembre 2023 

Ika-22 Linggo sa Karaniwang Panahon (A) 

Jeremias 20, 7-9/Salmo 62/Roma 12, 1-2/Mateo 16, 21-27 

SCREENSHOT: Quiapo Church Facebook and YouTube 

Katapatan sa Panginoon ang tema ng mga Pagbasa para sa Linggong ito. Hindi biro ang pagiging tapat sa Panginoong Diyos. Ang pagiging tapat sa Panginoon ay hindi naihahayag at napapatunayan sa pamamagitan ng mga salita lamang. Bagkus, dapat rin itong ipakita sa pamamagitan ng mga gawa. Dahil sa katotohanang ito tungkol sa pagiging tapat sa Panginoon, napakahirap itong gawin, lalung-lalo na dahil sa mga matitindi at mabibigat na mga tukso, pagsubok, at pag-uusig sa buhay dito sa mundong ito. 

Ang Poong Jesus Nazareno mismo ang nagsabi sa Ebanghelyo para sa Linggong ito na napakahirap maging Kaniyang mga tagasunod. Katunayan, ang misyon ng Poong Jesus Nazareno bilang ipinangakong Mesiyas at Manunubos ay napakahirap rin para sa Kaniya, gaya ng Kaniyang inilarawan sa unang bahagi ng Ebanghelyo. Hindi basta-basta lamang magagawa ng Poong Jesus Nazareno ang Kaniyang kagustuhan upang mailigtas ang sangkatauhan. Bagkus, bilang Mesiyas at Manunubos, kinailangan ng Poong Jesus Nazareno na harapin at tiisin ang maraming hirap, sakit, pag-uusig, at kamatayan sa Krus na Banal bago ang Kaniyang matagumpay na pagbangon mula sa libingan sa ikatlong araw kung kailan ang Kaniyang Muling Pagkabuhay ay naganap. Gaya ng Poong Jesus Nazareno, maraming hirap, tiisin, sakit, pagdurusa, at pag-uusig sa buhay dito sa daigdig ang haharapin at titiisin natin bilang mga tapat na tagasunod Niyang sumasamba sa Kaniya nang buong pananalig at katapatan. 

Inilarawan ni Propeta Jeremias sa kaniyang pahayag at dalangin sa Panginoong Diyos sa Unang Pagbasa para sa Linggong ito sa katotohanan ng kaniyang mga karanasan bilang propeta. Bilang propeta ng Diyos, si Propeta Jeremias ay hindi tinanggap ng nakararami sa lipunan noon. Katunayan, laging nanganganib ang buhay ni Propeta Jeremias dahil binalak siyang ipapatay ng marami mula sa mayroong matataaas na antas at posisyon sa lipunan noon dahil ang katotohanang nagmumula sa Diyos ay walang takot niyang ipinapahayag at ipinangangaral sa lahat. 

Katulad ng Mahal na Poong Jesus Nazareno sa Ebanghelyo at ni Propeta Jeremias sa Unang Pagbasa, si Apostol San Pablo ay nakaranas rin ng maraming hirap, sakit, at tiisin sa bawat sandali ng kaniyang misyon bilang apostol at misyonero. Subalit, ang pakiusap ni Apostol San Pablo sa lahat ng mga Kristiyano sa Ikalawang Pagbasa ay manatiling tapat sa Diyos. Gaano mang kahirap gawin ito, kailangan pa rin natin itong gawin sapagkat sa pamamagitan nito ay naipapahayag natin ang tunay at taos-puso nating pananabik para sa Diyos, gaya ng inilalarawan sa Salmong Tugunan (Salmo 62, 2b). 

Ang pagiging tapat sa Panginoon ay napakahirap. Subalit, kung tunay nating iniibig, pinananaligan, sinasampalatayanan, at sinasamba ang Panginoon, magiging tapat tayo sa Kaniya. Sisikapin nating maging tapat sa Kaniya hanggang sa huling sandali ng ating buhay sa mundo. Gaano mang kahirap itong gawin, gagawin pa rin natin iyon. 

ANG HALAGA NG ORAS

1 Setyembre 2023 

Biyernes ng Ika-21 Linggo sa Karaniwang Panahon (I) 

1 Tesalonica 4, 1-8/Salmo 96/Mateo 25, 1-13 

SCREENSHOT: #QuiapoChurch Official 6PM #OnlineMass - 18 August 2023 (FRIDAY) #QuiapoDay #ArawNgQuiapo (Facebook and YouTube) 

Ang mga Pagbasa para sa araw na ito ng Biyernes na inilaan ng Simbahan para sa taimtim na debosyon at pamamanata sa Panginoong Hesukristo, ang Nazareno, ay nakasentro sa paghahanda para sa buhay na walang hanggan sa piling ng Mahal na Poon sa maluwalhati Niyang kaharian sa langit. Tanging sa piling ng Mahal na Poon sa langit lamang natin matatagpuan at masusumpungan ang biyaya ng buhay na walang hanggan. Walang magpakailanman dito sa mundong ito. Katunayan, dito sa mundong ito, ang lahat ng bagay ay may hangganan. Pansamantala lamang ang mga bagay na nakikita sa mundong ito. Maging ang mismong planetang ito ay mayroong hangganan, katapusan, o wakas. 

Isinalaysay ng Panginoong Jesus Nazareno sa Ebanghelyo ang talinghaga tungkol sa sampung dalaga upang ituro ang halaga ng oras. Habang namumuhay at naglalakbay tayo sa mundong ito, huwag nating kakalimutang limitado ang oras. Sa unang tingin, mukhang matagal-tagal na panahon ang lilipas bago tayo malagutan ng hininga. Ang bawat isa sa atin ay tila mayroong mahahabang buhay. Taliwas nito ang itinuro ng Poong Jesus Nazareno sa Ebanghelyo. Para sa Mahal na Poong Jesus Nazareno, hindi dapat pairalin ang ganyang pag-iisip sapagkat iyon rin mismo ang uri ng pag-iisip at lohika ng limang hangal na dalaga sa talinghagang Kaniyang isinalaysay sa Banal na Ebanghelyo. Dahil sa ganitong uri ng pag-iisip at lohika, ang limang dalagang hangal ay napahamak at hindi nakasama sa kasalan sa kahuli-hulihan. 

Bilang mga Kristiyano, bilang isang Simbahan, ano ba ang dapat maging lohika, pag-iisip, o mentalidad ng bawat isa sa atin? Paano nga ba tayo dapat mag-isip? Itinuro sa atin ng Panginoong Jesus Nazareno sa mismong talinghagang isinalaysay Niya sa Ebanghelyo kung paano tayo dapat mag-isip. Ang lohika, mentalidad, at pag-iisip na dapat nating tularan at pairalin ay ang mismong lohika, pag-iisip, at mentalidad ng limang matatalinong dalaga. Inilarawan ni Apostol San Pablo sa Unang Pagbasa kung paano ba natin ito matutularan. Sabi ni Apostol San Pablo sa kaniyang pangaral sa Unang Pagbasa na dapat tayong magpakabanal dahil ito ang ibig ng Diyos para sa atin. Nais ng Panginoong Diyos na lagi nating pagsikapang mamuhay nang banal at kalugud-lugod sa Kaniyang paningin habang pansamantala tayong namumuhay at naglalakbay sa daigdig na ito. Gaya ng nasasad sa isa sa mga taludtod sa Salmong Tugunan: "Ang matuwid ang gawain ay galak ay masusumpong" (Salmo 96, 12). Hindi mahahanap sa mundong ito ang biyayang ito. Bagkus, sa piling lamang ng Diyos sa walang hanggan at maluwalhati Niyang kaharian sa langit ito masusumpungan. 

Mahalaga ang bawat oras at pagkakataong ibinibigay sa atin ng Panginoong Diyos upang maihanda natin ang ating mga sarili para sa pagtamasa ng biyaya ng buhay na walang hanggan sa Kaniyang piling sa langit. Nais ng Nuestro Padre Jesus Nazareno na makapiling tayo sa langit upang matamasa natin ang biyaya ng buhay na walang hanggan na Kaniyang kaloob sa atin. Bilang mga tapat na deboto ng Mahal na Poong Jesus Nazareno, habang namumuhay at naglalakbay tayo sa mundong ito, lagi nating pagsikapang mamuhay nang banal at kalugud-lugod sa Kaniyang paningin upang ang bawat isa sa atin ay maging handang makapiling Siya sa langit. 

PANININDIGAN PARA SA DIYOS

29 Agosto 2023 

Paggunita sa Pagpapakasakit ni San Juan, ang Tagapagbinyag, martir 

Jeremias 1, 17-19/Salmo 70/Marcos 6, 17-29 

This faithful photographic reproduction of the painting (c. 1520) The Decollation of Saint John the Baptist by anonymous - Austrian (Tyrolean) School, as well as the actual work of art itself from the Fitzwilliam Museum via Art UK, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Isang napakahalagang kaganapan sa kasaysayan ng pagligtas ng Panginoong Diyos sa buong sangkatauhan sa pamamagitan ng ipinangakong Mesiyas at Manunubos na walang iba kundi ang Poong Jesus Nazareno ay ang pagkamatay ni San Juan Bautista na hinirang upang maging tagapaghanda ng Kaniyang daraanan. Bagamat mayroon ring kahabaan ang agwat sa pagitan ng panahong bininyagan niya si Kristo sa Ilog Jordan at ng mga huling sandali ng kaniyang buhay bilang isang bilanggo sa palasyo ni Herodes Antipas bago siya ipinapatay sa pamamagitan ng pagpugot sa kaniyang ulo, ang kaganapang ito ay mahalaga pa rin. Katunayan, may isang napakahalagang aral na maaari nating matutunan sa mula sa sandaling ito na napakalungkot habang taimtim natin itong pinagninilayan at ginugunita sa araw na ito. 

Sa Unang Pagbasa, ang Panginoong Diyos ay nagbigay ng isang babala sa propetang hinirang Niya na si Propeta Jeremias. Katunayan, ang babalang ito ng Panginoong Diyos kay Propeta Jeremias ay isang maikling buod ng katotohanan tungkol sa mga papel, tungkulin, at misyon ng Kaniyang mga lingkod na hinirang katulad na lamang ng mga propeta sa Lumang Tipan. Bagamat mula sa Panginoong Diyos ang kanilang mga pahayag, hindi sila tatanggapin ng marami. Sa halip na maging bukas sa mga pahayag na ito, mga masasamang balak, naisin, at hangarin ang igaganti nila sa mga sugo ng Diyos. Hindi delikado kundi nanganganib ang buhay ng mga propeta gaya ni Jeremias araw-araw. Kaliwa't kanan ang mga panganib at banta laban sa kanila. Isa lamang ang dahilan nito - hindi nila matanggap ang mga mensaheng galing sa Diyos na ipinapahayag sa kanila ng mga propetang gaya ni Jeremias. 

Hindi malayo ang naging karanasan ni San Juan Bautista sa mga naging karanasan ng mga propetang gaya ni Jeremias. Katunayan, ang kaganapang pinagninilayan at ginugunita ng Simbahan sa araw na ito na isinalaysayay sa Banal na Ebanghelyo ay ang wakas ng pagdurusa ni San Juan Bautista. Humantong ang lahat sa kaniyang pagkamatay sa kamay nina Haring Herodes Antipas at Herodias. Dahil sa sayaw ng dalagang anak ni Herodias, pinagbigyan ni Herodes Antipas ang kaniyang hiling na walang iba kundi ang ulo ni San Juan Bautista sa isang pinggan, bagamat labis niya itong ikinalungkot gawin. 

Mahirap ngang manindigan para sa Diyos. Hindi tatanggapin ng marami ang mga tapat na naglilingkod sa Diyos. Subalit, ang tapat na paninindigan para sa Panginoong Diyos sa kabila ng mga pag-uusig, pagsubok, at tukso sa buhay ay tanda ng tunay na kagitingan. Ito ang ipinamalas ni San Juan Bautista. Bagamat marami ang nagbanta laban sa kaniya, gaya ni Herodias, hindi nagpadaig si San Juan Bautista. Ang mga banta at pag-uusig laban sa kaniya ay hindi naging hadlang o dahilan para sa kanya na tumigil sa paninindigan para sa Diyos. Dahil sa taos-puso niyang pag-ibig para sa Panginoong Diyos, ipinasiya ni San Juan Bautista na manindigan at manatiling tapat sa Kaniya hanggang sa huli. Sa pamamagitan nito, buong katapatang isinabuhay ni Juan Bautista ang mga salita sa Salmong Tugunan para sa araw na ito: "Patuloy kong isasaysay ang dulot Mong kaligtasan" (Salmo 70, 15a). 

Bagamat napakahirap manindigan para sa Diyos nang buong katapatan hanggang sa huli dahil sa lahat ng mga tukso, pagsubok, at pag-uusig sa buhay, dapat pa rin natin itong gawin sapagkat ito ang ating misyon, tungkulin, at responsibilidad bilang mga Kristiyanong bumubuo sa tunay at nag-iisang Simbahan. Hindi tayo tatanggapin ng marami dahil sa ating paninindigan para sa ating Panginoong Diyos, subalit hindi ito ang dapat maging dahilan upang tuluyang bitawan ang ating pag-ibig, pananalig, at pananampalataya sa Kaniya. Sa halip na tuluyang bitawan at isuko ito, tularan natin si San Juan Bautista na hindi nagpatalo sa lahat ng mga tukso, pagsubok, at pag-uusig sa buhay at nanatiling tapat sa Panginoong Diyos hanggang kamatayan. Ang dakilang biyaya ng pagliligtas ng Diyos sa pamamagitan ni Kristo, ang Nuestro Padre Jesus Nazareno, ay ating pinatotohanan sa pamamagitan nito. 

Tayong lahat ay binibigyan ng pagkakataong isabuhay ang ating taimtim na debosyon at pamamanata sa Mahal na Poong Jesus Nazareno. Bilang mga deboto ng Mahal na Poong Jesus Nazareno, dapat tayong tumindig at manindigan para sa Kaniya nang buong katapatan at pananalig hanggang sa huli. Sa pamamagitan nito, ipinapakilala natin Siya bilang tunay na maawain at mapagmahal na Panginoon at Manunubos na iniibig, pinananaligan, sinasampalatayanan, at sinasamba nang taos-puso. 

HINDI TAYO ANG MAY-ARI

27 Agosto 2023 

Ika-21 Linggo sa Karaniwang Panahon (A) 

Isaias 22, 19-23/Salmo 137/Roma 11, 33-36/Mateo 16, 13-20 

This faithful photographic reproduction of the painting (c. 1481-82), Christ Handing the Keys to St. Peter by Pietro Perugino (1448–1523), as well as the actual work of art itself in the Cappella Sistina in the Vatican, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Maaari nating ilarawan ang paksa o temang nais pagtuunan ng pansin at pagnilayan ng Simbahan sa Linggong ito gamit ang mga salitang binigkas nang malakas at nang buong pananalig at tiwala ni Job matapos ang pagpanaw ng kaniyang mga anak at ang lahat ng kaniyang mga kayamanan ay maubos: "Ang Panginoon ang nagbibigay, Siya rin ang kukuha. Purihin ang Panginoon!" (Job 1, 21). Nakasentro sa mga salitang ito ang mga Pagbasa para sa Linggong ito. Ang mga Pagbasa para sa Linggong ito ay tungkol sa kapangyarihan ng Panginoong Diyos na magbigay at bumawi ng lahat. Isa lamang ang dahilan nito - Siya mismo ang may likha at may-ari ng lahat. 

Nakasentro ang pangaral ni Apostol San Pablo sa Ikalawang Pagbasa sa dahilan kung bakit ang Panginoong Diyos ay mayroong kapangyarihang magbigay at bumawi ng mga biyayang kaloob Niya. Sabi ni Apostol San Pablo sa huling bahagi ng kaniyang pangaral sa Ikalawang Pagbasa: "Sapagkat mula sa Kaniya at sa pamamagitan Niya at sa Kaniya ang lahat ng bagay" (Roma 11, 36). Katulad ng pahayag ni Job, ang mga salitang ito ni Apostol San Pablo ay isang mahalagang paalala para sa ating lahat. Hindi tayo ang may-ari ng mga bagay na nakikita natin sa mundong ito. Bagkus, ang tunay na may-ari ay walang iba kundi ang Diyos. Tayo'y mga katiwala lamang. Dahil dito, ipinagkakaloob sa atin ng Diyos ang Kaniyang mga biyaya. Siya ang may-ari ng lahat ng ito, hindi tayo. Katiwala lamang tayo ng mga biyayang ito. 

Inihayag ng Panginoong Diyos sa pamamagitan ni Propeta Isaias na Kaniyang hirang sa Unang Pagbasa na aalisin Niya si Sabna na katiwala ng palasyo ng hari ng Israel noon na si Haring Ezequias. Ang dahilan kung bakit ipinasiya ng Panginoong Diyos na gawin iyon ay ang pag-abuso ni Sabna ng kaniyang kapangyarihan bilang katiwala ng palasyo ng hari ng Israel na si Haring Ezequias. Iyon ang parusa sa kaniya ng Diyos. Bilang parusa, aalisin ng Diyos si Sabna mula sa kaniyang posisyon at itatalaga bilang kaniyang kapalit si Eliaquim na anak ni Helcias (Isaias 22, 20). Katiwala ng palasyo ng hari lamang si Sabna, ngunit dinaig pa niya ang mismong hari ng Israel kung kumilos at umasta. Nagagawa naman ng pagiging sakim. Ito ang dahilan kung bakit binawi ng Diyos mula kay Sabna, ang katiwala sa palasyo ng hari ng Israel na si Ezequias, ang lahat ng mga kayamanan at kapangyarihan kaakibat ng kaniyang posisyon. 

Sa Ebanghelyo, ipinagkatiwala ng Panginoong Jesus Nazareno kay Apostol San Pedro ang mga susi sa kaharian ng langit. Ito ay tanda ng kapangyarihang ibinigay ng Poong Jesus Nazareno kay Apostol San Pedro bilang unang Santo Papa ng Simbahang Siya mismo ang nagtatag. Sa pamamagitan nito, pinagkalooban ng Mahal na Poong Jesus Nazareno ang unang Santo Papa ng Simbahan na si Apostol San Pedro at ang mga hahalili sa kaniya bilang Santo Papa ng Simbahan ng kapangyarihan bilang Kaniyang kinatawan o bikaryo sa mundong ito. Ipagpapatuloy ng Simbahan sa pangunguna ng Bikaryo ni Kristo Hesus na walang iba kundi ang Santo Papa ang Kaniyang misyon na ipalaganap sa lahat ang Mabuting Balita tungkol sa pagliligtas ng Diyos sa tanan sa pamamagitan mismo ng Panginoong Hesukristo, ang Nazareno. 

Bakit tayo binibigyan ng Diyos ng mga pagkakataong maging mga katiwala ng mga kaloob Niyang biyaya? Ipinaliwanag sa Salmong Tugunan ang dahilan kung bakit ito ipinasiyang gawin ng Diyos. Sabi sa Salmo, "Pag-ibig Mo'y di kukupas, gawain Mo'y magaganap" (Salmo 137, 8bk). Dahil sa pag-ibig ng Diyos, niloob Niyang bigyan ng pagkakataon ang bawat isa sa atin na maging mga katiwala ng mga biyayang kaloob Niya sa atin. Ang buhay natin dito sa mundo na pansamanta lamang ay isang halimbawa nito. Kahit hindi tayo karapat-dapat sa dakilang biyayang ito, ipinasiya pa rin sa atin ng Diyos na ipagkaloob at ipahiram sa atin ang biyayang ito. Gamitin natin sa mabuti ang biyayang ito ng ating buhay sapagkat iyon ang ating papel, misyon, at tungkulin bilang mga katiwala ng Diyos. 

Ang lahat ng mga bagay na nakikita at hindi natin nakikita ay pag-aari ng Diyos. Siya mismo ang tunay na may-ari ng lahat ng ito. Tanging Siya lamang at wala nang iba. Huwag nating kakalimutan ang katotohanang ito sapagkat tayong lahat ay mga katiwala lamang ng Diyos. Pag-aari ng Diyos ang lahat ng ito. 

ANG NAIS NIYANG IPALAGANAP NATIN

25 Agosto 2023 

Biyernes ng Ika-20 Linggo sa Karaniwang Panahon (I) 

Ruth 1, 1. 3-6. 14b-16. 22/Salmo 145/Mateo 22, 34-40 

SCREENSHOT: #QuiapoChurchOfficial 11 AM #OnlineMass - 06 August 2023 - Feast of the #TransfigurationOfTheLord (Facebook and YouTube)

Pag-ibig ang temang nais pagtuunan ng pansin ng mga Pagbasa para sa araw na ito, ang araw na inilaan ng Simbahan para sa taimtim na debosyon at pamamanata sa Mahal na Poong Jesus Nazareno. Tiyak na maraming ulit na nating pinagnilayan ang temang ito bilang Simbahan. Iyon nga lamang, ito ang katotohanan sa likod ng Banal na Krus ng Mahal na Poong Jesus Nazareno. Bagamat ayon sa tradisyon ay tatlong ulit Siyang nasubasob sa daang patungong Kalbaryo dahil sa bigat ng Krus, hindi Siya sumuko at nagpatalo sa bigat nito. Sa halip na sumuko at magpatalo sa kabigatan ng Krus, alang-alang sa atin, ipinasiya pa rin ng Poong Jesus Nazareno na pasanin pa rin ito hanggang sa makarating Siya sa bundok ng Kalbaryo na kilala rin sa tawag na Golgota kung saan Siya ipinako sa mismong Krus na pinasan Niya mula sa pretoryo. 

Sa Unang Pagbasa, inilahad ang kuwento nina Noemi at Ruth. Noong ipinasiya ng iba pang mga manugang na umuwi sa sarili nilang bayan, tanging si Ruth lamang ang nagpasiyang sumama sa kaniya hanggang sa makabalik sila sa Betlehem. Ipinakita ni Ruth sa pamamagitan ng kanyang pasiyang ito ang kaniyang tapat na pag-ibig para kay Noemi na kaniyang biyenan. Sa pamamagitan rin nito, inihayag rin ni Ruth ang tapat niyang pag-ibig, pagtanggap, pagpanig, at pagsamba sa Panginoong Diyos. Sa Ebanghelyo, ang pinakamahalagang utos ay inihayag ng Panginoong Jesus Nazareno bilang tugon sa tanong ng mga Pariseo tungkol sa nasabing paksa. Ito ay walang iba kundi ibigin ang Diyos nang buong puso, kaluluwa, at pag-iisip at ibigin ang kapwa gaya ng sarili (Mateo 22, 38-39). Inihahayag sa pamamagitan ng pagtupad sa mga utos na ito ang tapat na papuri, pagmamahal, pagpanig, pananalig, at pagsamba sa Diyos. Ito ang tunay na pagpuri sa Diyos, gaya ng inilarawan sa Salmong Tugunan. 

Bakit nga ba natin laging pinagtutuunan ng pansin at pinagninilayan ang misteryo ng pag-ibig ng Diyos? Ano ang saysay nito at bakit lubos natin itong pinapahalagahan? Tila lahat na lamang ay bumabalik sa misteryo ng pag-ibig ng Panginoong Diyos. Isa lamang naman ang dahilan kung bakit. Kung hindi dahil sa pag-ibig ng Diyos, walang kaligtasan para sa atin. Hindi tayo maliligtas mula sa kasalanan at kamatayan kung hindi maibigin at mahabagin ang Diyos. Dahil lamang sa dakilang pag-ibig ng Diyos, dumating sa daigdig na ito ang Poong Senor, ang Nuestro Padre Jesus Nazareno, upang iligtas ang sangkatauhan sa pamamagitan ng Banal na Krus na pinasan Niya mula sa pretoryo patungong Kalbaryo at pinagpakuan sa Kaniya sa nasabing bundok at ang maluwalhati Niyang Muling Pagkabuhay. Niloob Niyang mangyari ang lahat ng iyon dahil sa Kaniyang dakilang pag-ibig.

Nakaugat ang lahat ng mga utos at loobin ng Panginoong Diyos sa Kaniyang dakilang pag-ibig. Ito ang dahilan kung bakit tayo ay lagi Niyang inaanyayahang maging mga tagapagpalaganap ng Kaniyang pag-ibig. Ano ang ating pasiya? 

MANHID AT WALANG PUSO?

20 Agosto 2023 

Ika-20 Linggo sa Karaniwang Panahon (A) 

Isaias 56, 1. 6-7/Salmo 66/Roma 11, 13-15. 29-32/Mateo 15, 21-28 

This faithful photographic reproduction of the painting (c. 1590s) Christ and Canaanite woman by Annibale Carracci (1560–1609), as well as the actual work of art itself from the Palazzo Comunale, Parma, is in the Public Domain ("No Copyright") in its country of origin as well as in other countries and areas, including the United States where the copyright term is the author's life plus 100 years or fewer because the author died in 1609. 

Tila isang kabalintunaan ang mga unang salitang binigkas ng Poong Jesus Nazareno bilang tugon sa hiling ng isang Cananeang babae na pagalingin ang kaniyang anak sa Ebanghelyo para sa Linggong ito. Ito ay dahil ang ipinangakong Mesiyas ay ipinakilala sa Unang Pagbasa at sa Salmong Tugunan bilang isang biyaya ng Panginoong Diyos para sa lahat ng tao. Ang biyaya ng kaligtasan ay ipagkakaloob ng Diyos sa lahat ng mga tao dito sa mundong ito, anuman ang lahi, lipi, wika, bayan, o bansang kanilang kinabibilangan, sa pamamagitan ng ipinangakong Mesiyas at Manunubos na walang iba kundi ang Poong Jesus Nazareno. Nakasentro rin sa katangiang ito ng Mesiyas na walang iba kundi ang Poong Jesus Nazareno ang pangaral ni Apostol San Pablo, ang apostol at misyonero sa mga Hentil, sa Ikalawang Pagbasa. Maitatanong natin, bakit gayon na lamang ang naging tugon ng Mahal na Poong Jesus Nazareno sa babaeng Cananeang nagmamakaawa sa Kaniya bago Niyang pinagbigyan ang kaniyang hiling o dalangin sa huling bahagi ng Ebanghelyo? 

Oo, ang Mahal na Poong Jesus Nazareno ay para sa lahat. Dumating Siya upang ang buong sangkatauhan ay iligtas. Ang biyaya ng kaligtasang kaloob ng Mahal na Poon sa pamamagitan ng Krus Niyang Kabanal-Banalan at Muling Pagkabuhay ay para sa lahat ng mga tao sa mundo. Subalit, tila hindi Niya pinansin o dinedma ang hiling o dalangin ng babaeng Cananea bago Niya pagbigyan ang hiling nito sa huling bahagi ng tampok na salaysay sa Ebanghelyo sapagkat nais Niyang ituro sa mga apostol ang kapangyarihan ng pananalig sa Kaniya. Dahil sa laki at kapangyarihan ng kaniyang pananalig, ang babaeng taga-Canaan ay hindi tumigil sa pagmamakaawa sa Poong Jesus Nazareno. Bagamat tila hindi siya pinansin ni Jesus Nazareno noong una, hindi tumigil sa pagmamakaawa ang babaeng taga-Canaan. 

Isa lamang ang nais ipaalala sa atin ng Poong Señor sa atin sa Linggong ito. Huwag tayong mawalan ng pananalig sa Kaniya. Ang ating pagmamakaawa, paninikluhod, at pananalangin para sa katuparan ng ating mga hiling, pangarap, at naisin sa buhay ay Kaniyang pinakikinggan. Oo, sa una, tila hindi Niya tayo pinapakinggan o kaya naman ay tinatakpan Niya ang Kaniyang pandinig. Subalit, kahit kailan, hindi tinatakpan ng Nuestro Padre Jesus Nazareno ang Kaniyang pandinig sa atin. Pinakikinggan Niya ang lahat ng ating mga hiling at dalangin. Batid ng Señor kung ano ang nilalaman ng ating mga puso at loobin. Nais lamang Niya malaman kung nananalig tayo sa Kaniya nang buong-buo at taos-puso bago Niya tugunan ang ating mga kahilingan at dalangin. 

Huwag nating isiping manhid at walang puso ang Poong Jesus Nazareno. Manalig tayo sa Kaniya. Ipagkakaloob Niya sa atin ang ating pangangailangan. 

LAYUNIN NG MGA BOKASYON

18 Agosto 2023 

Biyernes ng Ika-19 na Linggo sa Karaniwang Panahon [I] 

Josue 24, 1-13/Salmo 135/Mateo 19, 3-12 

SCREENSHOT: #QuiapoChurchOfficial Official 9AM #OnlineMass - 30 July 2023 17th Sunday in Ordinary Time (Facebook and YouTube) 

Ang mga Pagbasa para sa araw na ito ng Biyernes, ang araw na inilaan ng Simbahan para sa taimtim na debosyon at pamamanata sa Panginoon sa ilalim ng Kaniyang titulong Nuestro Padre Jesus Nazareno, ay nakasentro sa tema ng mga bokasyon ng bawat isa sa atin. Sa pamamagitan ng ating mga bokasyon at misyon sa buhay na ibinigay sa atin ng Panginoong Diyos, tayong lahat ay nagsisilbing mga salamin at daluyan ng Kaniyang pag-ibig, awa, habag, at kagandahang-loob. Ito ang dahilan at layunin ng ating mga misyon at bokasyon. Magsilbing mga salamin ng katapatan ng Panginoong Diyos. Kung paanong naging tapat ang Panginoong Diyos sa lahat, dapat rin tayong maging tapat sa ating pag-ibig sa Kaniya at sa kapwa. 

Nakasentro ang pahayag ni Josue sa mga Israelita sa Unang Pagbasa sa misteryo ng walang hanggang katapatan ng Panginoong Diyos. Walang sandaling tinalikuran at pinabayaan ng Diyos ang Kaniyang bayang hinirang na walang iba kundi ang bayang Israel. Sa kabila ng kanilang mga kahinaan na kanilang ipinamalas noong ipinasiya nilang sambahin ang rebulto ng bakang gawa sa ginto at ang kanilang kakulangan ng pananalig sa Kaniya na inihayag nila sa pamamagitan ng kanilang mga pagrereklamo sa Kaniya nang paulit-ulit, ang Diyos ay naging tapat pa rin sa kanila. Kahit na may mga pagkakataong hindi naging tapat sa Kaniya ang Kaniyang bayan, nanatili pa ring tapat ang Panginoong Diyos. Hindi Niya sinukuan ang Kaniyang bayan. Gaya ng sabi sa Salmong Tugunan, ang pag-ibig ng Panginoong Diyos "ay pangwalang-hanggan at mananatili" (Salmo 135, 1). 

Sa Ebanghelyo, ang Mahal na Poong Jesus Nazareno ay nagsalita tungkol sa dahilan kung bakit mayroong mga bokasyon ang bawat isa sa atin. Isa lamang ang layunin ng mga bokasyon - maging mga salamin ng walang hanggang katapatan, pag-ibig, awa, habag, at kagandahang-loob ng Panginoong Diyos. Dahil dito, malakas na inihayag ni Jesus Nazareno sa mga Pariseo sa unang bahagi ng Ebanghelyo para sa araw na ito na labag sa mga utos ng Diyos ang diborsyo. Layunin ng diborsyo ang ipawalang-bisa ang mga kasal. Gaya ng sabi ng Nuestro Padre Jesus Nazareno sa Ebanghelyo: "Ang pinagsama ng Diyos ay huwag paghiwalayin ng tao" (Mateo 19, 6). Ang mga salitang binigkas ng Poong Jesus Nazareno sa ikalawang bahagi ng Banal na Ebanghelyo ay tungkol naman sa bokasyon at misyon ng mga taong hindi nag-aasawa katulad na lamang ng mga pari at madre at maging ng mga nagtalaga ng sarili sa Diyos. 

Hindi lamang tungkol sa pagpapari o pagmamadre ang salitang "bokasyon." Tungkol rin ito sa buhay mag-asawa. Dapat mag-ibigan nang buong katapatan ang mga mag-asawa hanggang sa huli. Kapag ang isang tao ay nakipag-isang-dibdib, hindi na siya dapat maghanap ng iba. Ito ang dahilan kung bakit ang "Kasal" ay tinatawag rin ng Simbahan bilang "Pag-iisang-dibdib." Ang puso at kalooban ng mga magkabiyak ng puso ay nagiging isa. Dahil dito, hindi dapat maghanap ng iba ang mga mag-asawa. Bilang mga magkabiyak ng puso, dapat maging tapat sila sa isa't isa, gaya ng Diyos na nagpasiyang maging tapat sa sangkatauhan. Ito ang dahilan kung bakit sagrado rin ang bokasyon ng mga mag-asawa. 

Bilang mga tapat na deboto ng Mahal na Poong Jesus Nazareno, mayroon tayong mga bokasyon sa buhay. Ang mga bokasyon na ito ay ang mga misyong ibinigay Niya sa atin. Sa pamamagitan ng ating mga bokasyon sa buhay, ang Kaniyang tapat na pag-ibig, awa, habag, at kagandahang-loob para sa atin na siyang dahilan kung bakit Niya ipinasan ang Banal na Krus na pinagpakuan sa Kaniya sa bundok ng Kalbaryo ay ating isinasalamin. Kung tunay tayong tapat sa ating debosyon sa Mahal na Poong Jesus Nazareno, tutuparin natin nang buong katapatan ang ating mga bokasyon sa buhay. 

INSTRUMENTO NG DIYOS

16 Agosto 2023 

Paggunita kay San Roque, nagpapagaling 

Deuteronomio 34, 1-12/Salmo 65/Mateo 18, 15-20 

This faithful reproduction of the painting (c. Between 1600 and 1610) San Roque by Francesc Ribalta (1565–1628), as well as the actual work of art itself from Museu de Belles Arts de València in Valencia, Spain, is in the Public Domain ("No Copyright") in its area of origin as well as other countries and areas, including the United States, where the copyright term is the author's life plus 100 years or fewer due to its age. 

Kilala si San Roque bilang Pintakasi laban sa mga salot at peste. Ayon sa kaniyang talambuhay, isinilang siyang may tanda o sagisag ng Banal na Krus sa dibdib. Bukod pa riyan, noong magkaroon ng isang malaki at malubhang salot o peste sa kaniyang bayan, gumagaling ang lahat ng kaniyang mga nilalapitan o lumalapit sa kaniya. Hindi ito dahil sa sariling kapangyarihan ni San Roque mismo. Bagkus, ito ay dahil sa tanda o sagisag ng Banal na Krus. Tanda ito na hinirang siya ng Panginoong Diyos bilang isa Niyang instrumento para sa ikabubuti ng lahat. 

Ang pangaral ng Poong Jesus Nazareno sa Ebanghelyo para sa araw na ito ay tungkol sa pagiging mga instrumento ng Panginoong Diyos. Gaya ni San Roque, mayroon rin tayong pagkakataong maging mga instrumento ng Diyos. Katunayan, ito ang nais ng Diyos para sa atin. Nais ng Diyos na mahayag at maipalaganap sa pamamagitan ng bawat isa sa atin ang Kaniyang pag-ibig, awa, habag, at kagandahang-loob. Sabi nga ng Mahal na Poong Jesus Nazareno sa Ebanghelyo, dapat nating sikaping tulungang makapagbalik-loob sa Ama ang ating mga kapatid at kapuwang nagkasala laban sa Panginoong Diyos at sa atin (Mateo 18, 15). Dapat tayong maging mga salamin at instrumento ng Diyos. Ipaalam natin sa kanila sa pamamagitan ng ating pakikipag-usap sa kanila nang masinsinan na mahabagin at mapagmahal ang Diyos. 

Sa Unang Pagbasa, isinalaysay ang pagpanaw ni Moises sa lupain ng Moab at ang pagpalit sa kaniya ni Josue habang ipinagpapatuloy ng mga Israelita ang napakahaba nilang paglalakbay patungo sa Lupang Ipinangako. Si Moises ay hindi pinahintulutang makapasok sa Lupang Pangako sapagkat nilabag niya ang mga utos ng Diyos na kausapin lamang ang mga bato upang bumukal ang tubig para sa mga tao. Sa halip, hinampas ni Moises ang mga bato gamit ang kaniyang tungkod upang bumukal ang tubig (Mga Bilang 20, 6-13). Subalit, sa kabila ng kaniyang kaninaan noong sandaling yaon, ipinagluksa at inaalala pa rin ng lahat ng tao ang kaniyang pagsisikap sa bawat oras at sandali ng kaniyang buhay maging tapat at masunurin sa Panginoong Diyos bilang Kaniyang instrumento at propeta. 

Ito ang hangarin ng Panginoong Diyos para sa atin. Sa kabila ng ating mga kahinaan dahil sa ating pagiging mga makasalanan, hangad pa rin Niyang gamitin tayo bilang Kaniyang mga instrumento. Kalooban Niyang maging Kaniyang mga instrumento ang bawat isa sa atin. Dahil dito, lagi Niya tayong binibigyan ng pagkakataon upang ating matanggap ang Kaniyang paanyaya sa atin na maging Kaniyang mga instrumento sa pamamagitan ng ating pagsisikap araw-araw na mamuhay nang banal at kalugud-lugod sa Kaniyang paningin, gaya ng niloloob Niya para sa atin. 

Nais ng Diyos na gawin Niya tayong mga instrumento. Ano ang ating pasiya?