ANG KAPANGYARIHAN NG NAZARENONG MULING NABUHAY

4 Abril 2024

Huwebes sa Walong Araw na Pagdiriwang sa Pasko ng Muling Pagkabuhay

Mga Gawa 3, 11-26/Salmo 8/Lucas 24, 35-48 

This faithful photographic reproduction of the painting (Between c. 1625 and c. 1626) The Appearance of Christ to his Disciples by Anthony van Dyck (1599–1641), as well as the actual work of art itself from the Hermitage Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Naksentro muli sa kapangyarihan ng Muling Nabuhay na Poong Jesus Nazareno ang mga Pagbasa para sa araw na ito. Habang buong galak nating ipinagdiriwang ang rurok at sentro ng ating pananampalataya bilang Kaniyang Simbahan, ipinapaalala sa atin ng Simbahan na hindi dapat nating sarilinin ang galak na ito. Bagkus, dapat natin itong ibahagi at ipalaganap sa lahat. Ipinapakilala natin si Kristong Muling Nabuhay sa lahat sa pamamagitan nito. 

Buong linaw na isinalungguhit ni Apostol San Pedro sa kaniyang pangaral sa mga tao na inilahad sa tampok na salaysay sa Unang Pagbasa na hindi gumaling ang lalaking ipinanganak na lumpo dahil sa kaniya. Ang nagpagaling sa lalaking ipinanganak na lumpo ay walang iba kundi ang Muling Nabuhay na Poong Jesus Nazareno. Si Apostol San Pedro ay isa lamang instrumento ng Muling Nabuhay na Poong Jesus Nazareno, ang ipinangakong Mesiyas at Manunubos. Tinupad lamang ni Apostol San Pedro ang kaniyang tungkulin bilang isang instrumento ng Muling Nabuhay na Nuestro Padre Jesus Nazareno. Kumilos ang Muling Nabuhay na Nuestro Padre Jesus Nazareno sa pamamagitan ni Apostol San Pedro. 

Ang kapangyarihan ng Muling Nabuhay na Panginoong Jesus Nazareno na nagpakita sa mga apostol sa Ebanghelyo ay nagdulot ng kagalingan sa lalaking ipinanganak na lumpo sa Unang Pagbasa. Hindi ito isang bagong gawain. Bagkus, noon pa man, bago pa man Siya dumating sa mundo bilang ipinangakong Mesiyas at Manunubos, paulit-ulit Niya itong ginawa. Marami Siyang mga ginawang kahanga-hangang bagay. Sa mga kahanga-hangang gawaing ito nakatuon at nakasentro ang patotoo ng tampok na mang-aawit sa Salmong Tugunan. Hindi Siya tumitigil sa paggawa nito. 

Tayong lahat ay inaanyayahan ng Muling Nabuhay na Panginoong Jesus Nazareno na maging Kaniyang mga instrumento at salamin. Sa pamamagitan natin, ipapamalas sa lahat ng Muling Nabuhay na Nuestro Padre Jesus Nazareno ang Kaniyang tunay na kapangyarihan bilang Diyos na maawain, mahabagin, at mapagmahal. 

IPALAGANAP ANG MGA BIYAYANG KANIYANG KALOOB

3 Abril 2024

Miyerkules sa Walong Araw na Pagdriwiang ng Pasko ng Muling Pagkabuhay 

Mga Gawa 3, 1-10/Salmo 104/Lucas 24, 13-35 

This faithful photographic reproduction of the painting (c. 19th century) French: Les pèlerins d'Emmaüs by Joseph-Auguste Rousselin from the Ministry of Culture in France, is in the Public Domain ("No Copyright") in its country of origin as well as in other countries and areas where the copyright term is the author's life plus 70 years or fewer due to its age. 

"Dapat na ang Diyos, itong Panginoon, ay pasalamatan, ang Kaniyang ginawa sa lahat ng bansa'y dapat ipaalam" (Salmo 104, 1). Sa mga salitang ito mula sa isa sa mga taludtod sa Salmong Tugunan para sa araw na ito nakasentro ang pagninilay ng Simbahan. Habang patuloy nating ipinagdiriwang nang buong galak ang sentro at rurok ng ating pananampalataya, ang Muling Pagkabuhay ng Poong Jesus Nazareno, ipinapaalala sa atin ng Simbahan kung ano ang dapat nating gawin. Mayroon tayong tungkulin at misyon bilang mga bumubuo sa tunay na Simbahang itinatag ni Kristo. 

Sa Unang Pagbasa, itinampok ang pagpapagaling sa isang lalaking ipinanganak na lumpo. Inihayag ni Apostol San Pedro sa lalaking ito na ipinanganak na lumpo na nakakalakad rin siya sa wakas dahil sa Muling Nabuhay na Poong Jesus Nazareno. Buong lakas na inihayag ni Apostol San Pedro sa lalaking ipinanganak na lumpo nang pagalingin ito, "Sa Ngalan ni Hesukristong taga-Nazaret, lumakad ka" (Mga Gawa 3, 6). Ang mga salitang ito ni Apostol San Pedro ay isang uri ng pagpapakilala sa Poong Jesus Nazareno. Hindi si Apostol San Pedro ang nagpagaling sa lalaking ito. Bagkus, ang Muling Nabuhay na Panginoong Jesus Nazareno ang nagdulot ng kagalingan sa kaniya. Isa lamang instrumento si Apostol San Pedro. 

Itinampok naman sa Ebanghelyo ang salaysay ng pagpapakita ng Muling Nabuhay na Panginoong Jesus Nazareno sa dalawang alagad sa daan patungong Emaus. Pinawi ng Muling Nabuhay na Poong Jesus Nazareno ang kalungkutang dinibdib at dinala ng dalawang alagad na ito sa kanilang mga puso. Ang lungkot na kanilang dinibdib sa kanilang mga puso ay naging galak sapagkat ang Mahal na Poong Jesus Nazareno ay tunay ngang nabuhay na mag-uli. Matapos magpakita sa kanila si Jesus Nazareno, bumalik sa Herusalem ang dalawang alagad na ito upang ibahagi sa iba pang mga alagad ang galak na kanilang tinanggap mula sa Muling Nabuhay na Nuestro Padre Jesus Nazareno, ang ipinangakong Mesiyas at Manunubos.

Bilang mga bumubuo sa tunay na Simbahang itinatag ni Kristo, katulad nina Apostol San Pedro at San Juan sa Unang Pagbasa at ng dalawang alagad na bumalik mula sa Emaus sa Ebanghelyo, ipalaganap at ibahagi natin ang mga biyayang nagmumula sa Muling Nabuhay na Poong Jesus Nazareno. Sa pamamagitan nito, ipinapakilala natin ang Muling Nabuhay na Poong Jesus Nazareno sa lahat. Ito ang magpapatunay na tinatanggap natin nang buong puso ang tunay na galak at pag-asa na nanggagaling lamang sa Kaniya bilang mga bumubuo sa Kaniyang Simbahan. 

DAHILAN NG PAG-AWIT NG "ALELUYA!"

2 Abril 2024 

Martes sa Walong Araw na Pagdiriwang ng Pasko ng Muling Pagkabuhay 

Mga Gawa 2, 36-41/Salmo 32/Juan 20, 11-18 

This faithful photographic reproduction of the painting (c. 18th century) Christ Appearing to Mary Magdalene by Unknown Author, as well as the actual work of art itself from Düsseldorfer Auktionshaus, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, due to its age. This is also in the Public Domain in the United States because it was published (or registered with the U.S. Copyright Office) before January 1, 1929.  

"Dapat malaman ng buong Israel na itong si Hesus na ipinako ninyo sa Krus - Siya ang ginawa ng Diyos na Panginoon at Kristo!" (Mga Gawa 2, 36). Sa mga salitang ito na binigkas ni Apostol San Pedro, ang unang Santo Papa ng Simbahan, sa kaniyang pangaral sa mga tao sa salaysay sa Unang Pagbasa nakasentro ang pagdiriwang ng Simbahan sa araw na ito. Ang araw na ito ng Martes ay napapaloob pa rin sa Oktaba o Walong Araw na Pagdiriwang ng Pasko ng Muling Pagkabuhay. Nakatuon ang ating mga pansin sa tunay na galak at pag-asang dulot ng Muling Nabuhay na Panginoong Jesus Nazareno, ang ipinangakong Mesiyas at Manunubos na kaloob ng Diyos. 

Itinutuon ng Simbahan ang ating pansin sa katangian ng Muling Nabuhay na si Kristo bilang kaloob ng Diyos. Ang Muling Nabuhay na Nuestro Padre Jesus Nazareno ay ang pinakadakilang biyayang ipinagkaloob ng Diyos sa tanan. Dumating sa mundo si Jesus Nazareno upang iligtas tayo mula sa kasalanan at kamatayan. Pinatunayan ito ng Kaniyang Muling Pagkabuhay. Tayong lahat ay iniligtas Niya sa pamamagitan ng Kaniyang Krus na Banal at Muling Pagkabuhay. 

Binanggit ng Muling Nabuhay na Poong Jesus Nazareno ang Kaniyang pagiging sugo ng Diyos nang magpakita Siya kay Santa Maria Magdalena sa Ebanghelyo. Dumating ang Muling Nabuhay na Poong Jesus Nazareno sa mundong ito upang ipagkaloob sa tanan ang biyaya ng pagliligtas ng Diyos sa pamamagitan ng Kaniyang Krus at Muling Pagkabuhay, ang Kaniyang Misteryo Paskwal. Sabi ng Panginoong Muling Nabuhay kay Santa Maria Magdalena nang makilala Siya nito, "Huwag mo Akong hawakan, sapagkat hindi pa Ako nakakapunta sa Ama" (Juan 20, 17). Isinalunguhit nang buong linaw ng Poong Jesus Nazareno ang Kaniyang pagiging kaloob ng Ama. Nagmula si Jesus Nazareno sa langit. Babalik Siya sa langit matapos ang Kaniyang misyon bilang ipinangakong Mesiyas at Manunubos. Sa Kaniyang maluwalhating kaharian sa langit, makakapiling Niya muli ang Amang nagsugo sa Kaniya at ang Espiritu Santo. 

Nakatuon sa pag-ibig, habag, at awa ng Diyos ang Salmong Tugunan. Buong lakas at pananalig na inihayag ng mang-aawit sa Salmong Tugunan: "Awa't pag-ibig ng Diyos sa sangkalupaa'y lubos" (Salmo 32, 5b). Ito ang natatanging dahilan kung bakit ang Mahal na Poong Jesus Nazareno ay ipinagkaloob ng Ama. Dumating sa mundong ito ang Mahal na Poong Jesus Nazareno dahil sa dakilang pag-ibig, habag, at awa ng Diyos. Inihayag ito ng Krus na Banal at Muling Pagkabuhay ng Mahal na Poon. 

Pinatunayan ng Krus na Banal at Muling Pagkabuhay ng Poong Jesus Nazareno na tunay tayong kinahahabagan, kinaawaan, at minamahal ng Diyos. Dahil sa pag-ibig, habag, at awa ng Diyos, ipinagkaloob Niya sa atin ang Poong Jesus Nazareno bilang ipinangakong Mesiyas at Manunubos. Ang tagumpay ng pag-ibig, habag, at awa ng Diyos na nagdudulot ng kaligtasan sa lahat ay nahayag ni Kristong Muling Nabuhay. 

Umaawit tayo ng "Aleluya" nang buong galak sa Pasko ng Muling Pagkabuhay bilang pasasalamat sa Diyos na tunay na nahahabag at nagmamahal sa atin. Ang Muling Nabuhay na Poong Jesus Nazareno ay ang pinakadakilang patunay nito. Tayong lahat ay Kaniyang iniligtas sa pamamagitan ng Kaniyang Krus at Muling Pagkabuhay dahil tunay Niya tayong kinaawaan, kinahahabagan, at minamahal.

NABUHAY NGA SIYANG MAG-ULI

1 Abril 2024 

Lunes sa Walong Araw na Pagdiriwang ng Pasko ng Muling Pagkabuhay

Mga Gawa 2, 14. 22-33/Salmo 15/Mateo 28, 8-15

This faithful photographic reproduction of the painting (c. 1847) Christ and the two Marys by William Holman Hunt (1827–1910), as well as the actual work of art itself from the Art Gallery of South Australia, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1910. This is also in the Public Domain in the United States because it was published (or registered with the U.S. Copyright Office) before January 1, 1929.

Bihira lamang tumapat sa unang araw ng Abril ang Lunes sa Oktaba o Walong Araw na Pagdiriwang ng Pasko ng Muling Pagkabuhay. Sa sekular na kalendaryo, kilala sa tawag na April Fools' Day ang unang araw ng Abril. Ang araw na ito ay inilaan upang mambiro ng mga tao sa pamamagitan ng pagbabahagi ng mga maling impormasyon o kaya ng mga pekeng balita. Layunin nito ay biglain at gulatin ang ibang tao upang pagtawanan sila kapag nauto at naloko sila. Palabiro ito ginagawa ng marami. 

Dalawang kaganapan ang itinampok sa salaysay sa Ebanghelyo para sa araw na ito, ang Lunes sa Walong Araw na Pagdiriwang ng Pasko ng Muling Pagkabuhay. Tampok sa unang bahagi ng salaysay sa Ebanghelyo ang pagpapakita ng Muling Nabuhay na Poong Jesus Nazareno sa dalawang Mariang tumungo sa Kaniyang Banal na Libingan na walang iba kundi sina Santa Maria Magdalena at sa isa pang Maria. Sa ikalawang bahagi ng salaysay sa Ebanghelyo, ang mga kawal na nagbabantay sa libingan at ang mga punong saserdote ay nakipagsabwatan. Nagkasundo silang sabihin sa madla na hindi totoong nabuhay na mag-uli ang Panginoong Jesus Nazareno. Bagkus, ninakaw lamang ng mga apostol ang Kaniyang bangkay. 

Subalit, taliwas sa paliwanag at balitang ikinakalat ng mga kaaway ni Jesus Nazareno ang ipinahayag ni Apostol San Pedro nang buong kagitingan sa Unang Pagbasa. Hindi ninakaw ang bangkay ng Mahal na Poong Jesus Nazareno. Bagkus, nabuhay na mag-uli ang Mahal na Poong Jesus Nazareno. Ito ang patunay na si Jesus Nazareno ay ang ipinangakong Mesiyas at Manunubos na ipinagkaloob ng Diyos para sa kaligtasan ng buong sangkatauhan. Ang Mabuting Balitang ito ng kaligtasang kaloob ng Diyos sa pamamagitan ng Nuestro Padre Jesus Nazareno na namatay at muling nabuhay ay walang tigil na ipinapalaganap at pinatotohanan ng Simbahan nang buong sigasig sa kasalukuyang panahon. 

Tunay ngang nabuhay na mag-uli ang Poong Jesus Nazareno. Hindi ito pekeng balita o isang biro na layuning pagtawanan ang ibang tao matapos silang utuin at lokohin sa isang palabirong pamamaraan. Bagkus, ito ang totoo. Oo, namatay nga sa Krus na Banal at inilibing sa Banal na Libingan ang Poong Jesus Nazareno. Subalit, hindi Siya nanatiling patay sa loob ng libingan kundi nabuhay na mag-uli taglay ang buo Niyang kaluwalhatian bilang Diyos na totoo sa ikatlong araw, gaya ng Kaniyang inihayag at ipinangako nang paulit-ulit.

Gaya ng mga apostol at ng mga unang bumuo sa Simbahan na pinangunahan ng unang Santo Papa ng Simbahan na si Apostol San Pedro sa Unang Pagbasa, huwag tayong matakot maging mga saksi ng Muling Nabuhay na Poong Jesus Nazareno. Sa halip na matakot, dapat maging masigasig tayo sa pagpapalaganap at pagbabahagi ng tunay na galak at pag-asang dulot ng Muling Nabuhay na Poong Jesus Nazareno bilang Kaniyang mga saksi. Hindi tayo dapat matakot dahil lagi Niya tayong iingatan, sasamahan, at tatangkilikin, gaya ng nasasaad sa Salmong Tugunan: "D'yos ko, ang aking dalangi'y ako'y Iyong tangkilikin." Ang pagsasanggalang at pamamatnubay ng Muling Nabuhay na Panginoong Jesus Nazareno ay magdudulot ng tunay na galak at kapanatagan ng loob (Salmo 15, 7. 9). 

Hindi ito pekeng balita o hindi nakakatawang biro. Tunay ngang nabuhay na mag-uli ang Poong Jesus Nazareno! Buong galak natin itong patotohanan sa lahat. Ibahagi rin natin sa kapwa ang tunay na galak at pag-asang Kaniyang kaloob. Aleluya! 

GALAK AT PAG-ASANG DULOT NG MULING PAGKABUHAY

31 Marso 2024 

Araw ng Pasko ng Muling Pagkabuhay 

Mga Gawa 10, 34a. 37-43/Salmo 117/Colosas 3, 1-4 (o kaya: 1 Corinto 5, 6b-8)/Juan 20, 1-9 

This faithful photographic reproduction of the painting (c. 1566) La Resurrección by Luis de Morales (1509–1586), as well as the actual work of art itself from the Museo del Prado, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Muling nabuhay ang Panginoon! Aleluya! Isa pong Mapagpala at Maligayang Pasko ng Muling Pagkabuhay ng Panginoon sa lahat! 

Para sa Simbahan, ang araw na ito ay ang pinakamahalagang araw ng taon. Higit na mahalaga ito sa iba pang mga araw ng taon. Ang araw na ito ay inilaan ng Simbahan upang ipagdiwang ang pinakadakilang kapistahan sa buong taon na walang iba kundi ang Pasko ng Muling Pagkabuhay ng Panginoon, ang Nuestro Padre Jesus Nazareno. Dahil sa Muling Pagkabuhay ng Panginoong Jesus Nazareno, mayroong kabuluhan at saysay ang ating pananampalataya bilang Kaniyang Simbahan. Ito ang dahilan kung bakit lagi tayo nagkakatipon-tipon linggo-linggo bilang Simbahan. 

Sabi ni Apostol San Pablo sa isa sa kaniyang mga pangaral na kung si Kristo ay hindi nabuhay na mag-uli, "walang kabuluhan ang aming pangangaral at walang katuturan ang inyong pananampalataya" (1 Corinto 15, 14). Ito ang dahilan kung bakit ang mga pangaral ni Apostol San Pedro at San Pablo ay nakasentro sa Muling Nabuhay na si Jesus Nazareno sa Unang Pagbasa at Ikalawang Pagbasa. Nagpatotoo sa harapan ng isang Romanong kapitang si Cornelio si Apostol San Pedro tungkol sa Banal na Krus at Muling Pagkabuhay ng ipinangakong Mesiyas at Manunubos na bigay ng Diyos na walang iba kundi si Jesus Nazareno sa Unang Pagbasa. Sa Ikalawang Pagbasa, ang bagong buhay na kaloob ng Muling Nabuhay na Poong Jesus Nazareno ay tinalakay ni Apostol San Pablo. Katunayan, nakasentro rin sa temang ito ang kaniyang pangaral na itinampok sa alternatibong Ikalawang Pagbasa kung saan ang Muling Nabuhay na Poong Jesus Nazareno ay ipinakilala niya bilang Korderong Pampaskuwa (1 Corinto 5, 7). Isa lamang ang dahilan kung bakit ginawa ito ng mga apostol at ang iba pang mga banal na tao katulad na lamang ng unang Santo Papa ng Simbahan na si Apostol San Pedro at si Apostol San Pablo - nabuhay na mag-uli si Kristo. 

Inilarawan sa Ebanghelyo kung ano ang nakita nina Apostol San Pedro at San Juan, ang alagad na minamahal, nang makarating sila sa libingan ng Mahal na Poong Jesus Nazareno. Nakita nilang hiwalay sa mga kayong lino at nakatiklop sa isang tabi ang panyong ginamit bilang pambalot sa ulo (Juan 20, 7). Ang dahilan kung bakit ito ang kanilang nakita nang makarating sila sa libingan ay inilahad sa wakas ng tampok na salaysay - ang Poong Jesus Nazareno ay nabuhay na mag-uli (Juan 20, 9). Dahil dito, mayroong saysay at kabuluhan ang ating pananampalataya bilang Simbahan. 

Buong lakas na inihayag sa Salmong Tugunan: "Araw ngayon ng Maykapal, magalak tayo't magdiwang" (Salmo 117, 24). Isa lamang ang dahilan kung bakit tayong lahat ay nagdiriwang nang buong galak sa araw na ito. Muling nabuhay ang ipinangakong Mesiyas at Manunubos na walang iba kundi ang Poong Jesus Nazareno. Winakasan ng Muling Pagkabuhay ng Mahal na Poong Jesus Nazareno ang maikling panahon ng pagpatak ng mga luha, dalamhati, at hapis. Pinapalitan Niya ito ng galak at pag-asa dulot ng Kaniyang maluwalhating tagumpay. 

Kasama ng Mahal na Inang si Mariang Birhen, buong galak nating handugan ng mga awit ng papuri at pagsamba si Jesus Nazareno, ang Panginoong Muling Nabuhay. 

MALUWALHATING TAGUMPAY

30 Marso 2024 

Sabado de Gloria: 

Ang Magdamagang Pagdiriwang sa Pasko ng Muling Pagkabuhay [B] 

Genesis 1, 1-2, 2 (o kaya: 1, 1. 26-31a)/Salmo 103 (o kaya: Salmo 32)/Genesis 22, 1-18 (o kaya: 22, 1-2. 9a. 10-13. 15-18)/Salmo 15/Exodo 14, 15-15, 1/Exodo 15/Isaias 54, 5-14/Salmo 29/ Isaias 55, 1-11/Isaias 12/Baruc 3, 9-15. 32-4, 4/Salmo 18/Ezekiel 36, 16-17a. 18-28/Salmo 41 (o kaya: Salmo 50)/Roma 6, 3-11/Salmo 117/Marcos 16, 1-7 

This faithful photographic reproduction of the painting (c. 17th century) Zmartwychwstanie by Anonymous, as well as the actual work of art itself from the Royal Castle in Warsaw, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Hindi mahihigitan o mapapantayan ng kahit anong gabi sa buong taon ang halaga ng gabi ng Magdamagang Pagdiriwang sa Pasko ng Muling Pagkabuhay. Ang gabing ito ay ang pinakabanal at ang pinakamahalagang gabi sa buong taon para sa Simbahan. Isang pahiwatig nito ay ang haba ng nasabing pagdiriwang na nakasalalay rin sa dami ng mga Pagbasang babasahin. Mayroong pitong Pagbasa mula sa Lumang Tipan at pito ring Salmo kasunod ng bawat Pagbasa na susundan ng Pagbasa ng Sulat (ang Sulat ni Apostol San Pablo sa mga taga-Roma) at ang Ikawalo at Huling Salmo na walang iba kundi ang Aleluya matapos awitin ang "Gloria" o "Papuri sa Diyos." 

Mahaba man ang pagdiriwang sa gabi ng Sabado de Gloria, subalit isa lamang ang dahilan nito. Ang Mahal na Poong Jesus Nazareno ay nabuhay na mag-uli. Hindi Siya nanatili sa loob ng libingan. Pagsapit ng ikatlong araw, muli Siyang nabuhay, gaya ng Kaniyang ipinangako. Bumangon nang matagumpay at lumabas mula sa libingan ang ipinangakong Mesiyas at Tagapagligtas na si Jesus Nazareno. Kinumpleto ng Poong Jesus Nazareno ang Kaniyang misyon bilang ipinangakong Mesiyas at Manunubos sa pamamagitan nito. Nagkaroon ng saysay at kabuluhan ang Kaniyang Krus. Ang mga luha, dalamhati, lungkot, at hapis dulot ng Kaniyang pagpapakasakit ay napawi nang tuluyan sa pamamagitan ng Kaniyang Muling Pagkabuhay. 

Sa lahat ng mga kahanga-hangang gawa ng Panginoong Diyos, ang pinakadakila sa lahat ng ito ay ang Muling Pagkabuhay ng Panginoong Jesus Nazareno. Itinampok at inilahad sa Unang Pagbasa, Ikalawang Pagbasa, at Ikatlong Pagbasa ang ilan sa mga kahanga-hangang bagay na ginawa ng Diyos. Ang salaysay ng paglikha ng Diyos sa mundo ay itinampok sa Unang Pagbasa. Tampok sa Ikalawang Pagbasa ang Kaniyang pagkakaloob ng isang lalaking tupa upang maging kapalit ni Isaac na papatayin sana ni Abraham na Kaniyang sinubok upang ihandog sa Kaniya. Sa Ikatlong Pagbasa, ang Dagat ng mga Tambo ay hinati ng Panginoon upang makatawid ang mga Israelita sa tuyong lupa. Kahanga-hangang tunay ang mga gawang ito. Subalit, hindi mahihigitan o mapapantayan ng mga ito ang Muling Pagkabuhay ng Panginoong Jesus Nazareno, ang pinakadakilang himalang ginawa ng Diyos.  

Ipinaliwanag ni Apostol San Pablo sa kaniyang pangaral na inilahad at itinampok sa Sulat na inihayag bago awitin ang Salmong Aleluya kung bakit walang makahihigit o makakapantay sa Muling Pagkabuhay ng Nuestro Padre Jesus Nazareno. Sabi niyang hindi na mamamatay muli ang Muling Nabuhay na Poong Jesus Nazareno (Roma 6, 9). Ang Muling Pagkabuhay ng Nuestro Padre Jesus Nazareno ay ang pinakadakilang patunay ng Kaniyang pagiging Diyos. Pinatunayan ng Poong Jesus Nazareno na kahit kailan ay walang makakatalo sa Kaniya. Kahit ano pang gawin laban sa Kaniya, hindi nila Siya kayang talunin. Walang makakatalo kay Jesus Nazareno. 

Kaya naman, ang sabi ng binatang lalaking nakasuot ng mahabang puting damit sa mga babaeng dumalaw sa libingan ng Nuestro Padre Jesus Nazareno sa Ebanghelyo para sa banal na gabing ito: "Huwag kayong matakot! Hinahanap ninyo si Hesus, ang taga-Nazaret na ipinako sa krus. Wala na Siya rito - Siya'y muling nabuhay!" (Marcos 16, 6). Napakalinaw ang galak ng binatang lalaking ito nang kaniyang bigkasin sa mga babaeng dumalaw sa libingan ng Mahal na Poong Jesus Nazareno ang mga salitang ito. Buong galak na inihatid ng binatang lalaking ito ang balita ng tagumpay ng Poong Jesus Nazareno na pinagtitibay ng Kaniyang Muling Pagkabuhay. Sa pamamagitan nito, ang galak na dulot ng Muling Nabuhay na Poong Jesus Nazareno ay ibinabahagi at ipinalaganap ng binatang lalaking ito. 

Ang Krus na Banal at Muling Pagkabuhay ni Jesus Nazareno ay magkaugnay. Hindi maaaring paghiwalayin ang dalawang ito. Mayroong malalim na ugnayan ang Krus na Banal at Muling Pagkabuhay ng Panginoong Jesus Nazareno. Binubuo ng dalawang ito, ang Krus na Banal at Muling Pagkabuhay, ang Misteryo Paskwal ng Poong Jesus Nazareno. Sa pamamagitan nito, ang sangkatauhan ay iniligtas ng Diyos. Isa itong patunay na tapat ang Diyos sa Kaniyang pangako. Nakasentro sa walang maliw na katapatan ng Panginoon ang Ikaapat, Ikalima, Ikaanim, at Ikapitong Pagbasa mula sa Lumang Tipan. Pinatunayan ng Misteryo Paskwal ng Panginoong Jesus Nazareno na hindi nakakalimot ng pangako ang Diyos. Tunay nga Siyang tapat sa mga pangakong Siya mismo ang nagbitiw. Ang dakilang tagumpay na ito ng Diyos na tunay ngang tapat ay pinatunayan ng Misteryo Paskwal ng Mahal na Poong Jesus Nazareno. 

Pinapawi ng Muling Nabuhay na Poong Jesus Nazareno ang mga luha, hapis, sakit, at dalamhati dulot ng unang bahagi ng Kaniyang Misteryo Paskwal na walang iba kundi ang Kaniyang Pasyong Mahal. Oo, namatay Siya sa Krus na Banal at inilibing. Ngunit, hindi Siya nanatili roon dahil muli Siyang nabuhay sa ikatlong araw, gaya ng paulit-ulit Niyang ipinangako. Ito ang Misteryo Paskwal ng Mahal na Poong Jesus Nazareno. Sa pamamagitan ng Kaniyang Misteryo Paskwal, ipinamalas ni Jesus Nazareno ang tunay Niyang kapangyarihan bilang Diyos. Ang kapangyarihan ng Panginoon na hindi nakakalimot ng pangako. Bagkus, lagi Niya itong tinutupad dahil sa Kaniyang walang maliw na pag-ibig at katapatan para sa atin. 

Dahil nagtagumpay ang makapangyarihang pag-ibig at katapatan ng Diyos na hindi magmamaliw kailanman sa pamamagitan ng Krus na Banal at Muling Pagkabuhay ng Poong Jesus Nazareno, tayong lahat na bumubuo sa tunay na Simbahang Kaniyang itinatag, kasama ng Mahal na Inang si Mariang Birhen, buong galak nating awitin ang "Aleluya" bilang pagpahayag ng ating galak na Kaniyang kaloob sa atin. Ang dulot ng tagumpay na ito ng Muling Nabuhay na Poong Jesus Nazareno ay galak at pag-asa. 

Nabuhay na mag-uli ang Panginoong Jesus Nazareno! Aleluya! Maligayang Pasko ng Muling Pagkabuhay ng Panginoong Jesus Nazareno! Viva Poong Jesus Nazareno! 

This faithful photographic reproduction of the painting (c. Between circa 1510 and circa 1518) Cristo presenta a la Virgen a los redimidos del Limbo by Fernando Yáñez de la Almedina and workshop (1459–), as well as the actual work of art itself from the Museo del Prado, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

ANG KAPANGYARIHAN NG DAKILANG PAG-IBIG NG DIYOS

29 Marso 2024 

Biyernes Santo sa Pagpapakasakit ng Panginoon 

Isaias 52, 13-53, 12/Salmo 30/Hebreo 4, 14-16. 5, 7-9/Juan 18, 1-19, 42

This faithful photographic reproduction of the painting (c. Between 1630 and 1651) Calvary by Jan van den Hoecke (1611–1651), as well as the actual work of art itself from the Wannenes auction of 21 March 2018, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age.

"Marami ang nagtila nang [ang lingkod ng Panginoon ay kanilang] makita, dahil sa pagkakabugbog sa Kaniya'y halos di makilala kung Siya'y tao" (Isaias 52, 14). Sa mga salitang ito na nagmula sa unang bahagi ng Unang Pagbasa nakasentro ang taimtim na pagninilay ng Simbahan sa ikalawang araw ng Banal na Tatlong Araw na walang iba kundi ang Biyernes Santo. Ang Biyernes Santo ay ang natatanging araw sa buong taon kung kailan hindi ipinagdiriwang ang pagdiriwang ng Banal na Misa. Inilaan ang Biyernes Santo para sa taimtim na pagninilay sa dakilang pag-ibig ng Diyos para sa atin habang ginugunita natin ang isang nakakalungkot na kaganapan. 

Bagamat hindi ipinagdiriwang ang Banal na Misa tuwing sasapit ang Biyernes Santo taun-taon, mayroong liturhikal na pagdiriwang na idinadaos ang Simbahan sa araw na ito. Nakasentro sa Banal na Krus ng Panginoong Jesus Nazareno ang liturhikal na pagdiriwang ng Simbahan pagsapit ng Biyernes Santo. Sa pamamagitan ng Banal na Krus ng Mahal na Poong Jesus Nazareno, iniligtas tayo ng Diyos. Ito ang ipinasiyang gawin ng Diyos sa pamamagitan ng ipinangakong Mesiyas at Manunubos na walang iba kundi ang Kaniyang Bugtong na Anak na si Jesus Nazareno dahil tayong lahat ay tunay nga Niyang minamahal at pinapahalagahan nang lubos. Kaya naman, gayon na lamang ang ating pagpapahalaga sa Banal na Krus ng Poong Jesus Nazareno bilang mga bumubuo sa tunay na Simbahang Kaniyang itinatag. Ang Krus na Banal ay ang pinadakilang sagisag at tanda ng dakilang pag-ibig ng Diyos. 

Dalawang buong kabanata mula sa Ebanghelyo ni San Juan ang itinatampok sa Banal na Ebanghelyo para sa Biyernes Santo. Ang pagpapakasakit at pagkamatay ng Poong Jesus Nazareno, ang ipinangakong Mesiyas at Manunubos na ipinagkaloob ng Diyos para sa ikaliligtas ng buong sangkatauhan, ay itinampok sa dalawang kabanatang ito mula sa Ebanghelyo ni San Juan. Sa dalawang buong kabanatang ito na inilaan para sa salaysay ng Pasyong Mahal ng Poong Jesus Nazareno, buong linaw na inilarawan kung paanong ginamit ng Poong Jesus Nazareno ang Kaniyang kapangyarihan bilang Bugtong na Anak ng Diyos sa mga sandaling yaon. Kahit na lingid ito sa kaalaman at isipan ng Kaniyang mga kaaway, ipinamalas ng Poong Jesus Nazareno, ang Mesiyas at Manunubos na ipinagkaloob ng Diyos, ang Kaniyang kapangyarihan. 

Paano nga ba ipinakita ng Poong Jesus Nazareno ang Kaniyang kapangyarihan bilang tunay na Diyos sa mga huling sandali ng Kaniyang buhay gayong nagdusa Siya nang labis sa mga sandaling yaon? Hindi ba nagpakasakit at nagdusa Siya nang labis-labis hanggang kamatayan noong unang Biyernes Santo? Katunayan, kung nagpakita Siya ng kahit katiting lamang ng Kaniyang kapangyarihan bilang Diyos na totoo, wala sana Siya sa Krus dahil maililigtas Niya mula sa pagdurusa, pagpapakasakit, at kamatayan ang Kaniyang sarili. 

Oo, sa unang tingin, hindi nagpakita ng kapangyarihan ang Poong Jesus Nazareno sa mga sandaling nagbata Siya ng maraming mapait na hirap, sakit, pagpapakasakit, at pagdurusa hanggang sa sandaling nalagutan Siya ng hininga habang nakabayubay sa Krus. Subalit, ito ang misteryo sa likod ng Krus na Banal ni Jesus Nazareno. Ang Krus na Banal ng Mahal na Poong Jesus Nazareno ay hindi sagisag ng kahinaan kundi ng tunay na kapangyarihan. Lingid sa paningin at isipan ng nakararami, ang Panginoong Jesus Nazareno ay nagpamalas ng Kaniyang tunay na kapangyarihan bilang Diyos sa bawat sandali ng Kaniyang pagpapakasakit at pagkamatay. Ipinakita ng Nazarenong si Kristo Hesus sa bawat sandali ng Kaniyang Pasyong Mahal ang kapangyarihan ng dakilang pag-ibig ng Diyos. Dakilang pag-ibig na nagliligtas. 

Kahit napakahina Siya sa pangin ng lahat ng mga nasa Kalbaryo noong araw na iyon, lalung-lalo na sa paningin ng Kaniyang mga kaaway, ipinakita ng Panginoong Jesus Nazareno, ang ipinangakong Mesiyas at Manunubos, sa isang kakaibang paraan ang tunay Niyang kapangyarihan bilang Diyos na totoo. Ipinamalas ni Jesus Nazareno sa mga sandaling yaon na handa Siyang maging mahina alang-alang sa atin. Upang ang buong sangkatauhan ay mailigtas Niya, ipinasiya ng ipinangakong Mesiyas na walang iba kundi ang Nuestro Padre Jesus Nazareno na maging mahina. 

Ang pagiging "mahina" ng Panginoong Jesus Nazareno sa bawat sandali ng Kaniyang mapait na pagpapakasakit ay ang dahilan kung bakit ipinakilala Siya ng manunulat ng Sulat sa mga Hebreo bilang Dakilang Saserdote sa kaniyang pangaral na itinampok at inilahad sa Ikalawang Pagbasa. Bagamat ang Nuestro Padre Jesus Nazareno ay Diyos na totoo, buong kababaang-loob Niyang ipinasiyang magpakita ng "kahinaan" alang-alang sa atin. Nagpakita Siya ng kahinaan sa pamamagitan ng Kaniyang pag-aalay ng buong sarili sa Krus na Banal upang iligtas ang sangkatauhan. Sa pamamagitan nito, tinupad ng Diyos ang Kaniyang pangako na inilahad sa propesiya ni Propeta Isaias na Kaniyang hinirang at itinalaga upang ilahad ang Kaniyang mga pahayag sa Kaniyang bayan sa Unang Pagbasa. Patunay lamang ito ng nasasaad sa isa sa mga taludtod sa Salmong Tugunan: "Tagapagligtas kong tapat at totoo" (Salmo 31, 6). Hindi kathang-isip o isang konsepto lamang ang katapatan ng Diyos. Tunay nga Siyang tapat. 

Dahil sa dakilang pag-ibig ng Diyos, ang Poong Jesus Nazareno ay naging "mahina" alang-alang sa atin. Sa pamamagitan nito, tayong lahat ay Kaniyang iniligtas mula sa kasalanan at kamatayan. Ito ang kapangyarihan ng dakilang pag-ibig ng Diyos. Ang Banal na Krus ng Mahal na Poong Jesus Nazareno ay isang sagisag ng kapangyarihan ng Diyos na tapat sa Kaniyang pag-ibig para sa atin. 

This faithful photographic reproduction of the painting (c. Between 1620 and 1643) Crucifixion by Hans Jordaens III (circa 1595–1643), as well as the actual work of art itself from the Bonhams London auction of 25 October 2017 lot 215, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1929.

WALANG SINAYANG NA KAPANGYARIHAN

28 Marso 2024 

Huwebes Santo sa Paghahapunan ng Panginoon 

Exodo 12, 1-8. 11-14/Salmo 115/1 Corinto 11, 23-26/Juan 13, 1-15 

This faithful photographic reproduction of the painting (c. 1620) La Última Cena by Luis Tristán (1586–1624), as well as the actual work of art itself from the Museo del Prado, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

"Alam ni Hesus na ibinigay na sa Kaniya ng Ama ang buong kapangyarihan; alam din Niyang Siya'y mula sa Diyos at babalik sa Diyos" (Juan 13, 3). Nakasentro ang mga Pagbasa para sa pagdiriwang ng Simbahan sa Takipsilim ng Huwebes Santo sa mga salitang ito mula sa tampok na salaysay sa Ebanghelyo. Katunayan, ang mga salitang ito mula sa tampok na salaysay sa Ebanghelyo ay maaaring ituring na isang maikling buod at paliwanag ng ginugunita ng Simbahan sa Banal na Tatlong Araw. Sa loob ng tatlong araw na ito, gugunitain, sasariwain, at ipagdiriwang ng Simbahan sa buong daigdig ang dakilang pag-ibig ng Diyos para sa sangkatauhan na inihayag Niya sa lahat sa pamamagitan ng Misteryo Paskwal ng Mahal na Poong Jesus Nazareno, ang Kaniyang Bugtong na Anak na Kaniyang isinugo sa mundong ito bilang ipinangakong Mesiyas at Manunubos na magdudulot ng kaligtasan sa lahat. 

Itinatampok ng Simbahan sa unang araw ng Banal na Tatlong Araw na Pagdiriwang ng Pagpapakasakit at Pagkabuhay ang Huling Hapunan. Noong bisperas ng Kaniyang kusang-loob na paghahandog ng sarili sa Krus na Banal sa bundok ng Kalbaryo, ang Panginoong Jesus Nazareno ay nagdiwang ng Paskuwa kasama ang Kaniyang mga alagad. Dumulog Siya sa hapag ng silid na inilarawan Niya sa mga apostol na kilala rin sa tawag na senakulo upang ipagdiwang at pagsaluhan ang Hapunang Pampaskuwa kasama nila. Sa mga sandaling yaon, puspos ng takot, hapis, lungkot, at dalamhati ang Panginoong Jesus Nazareno dahil sa nalalapit Niyang Pasyon. 

Sa Unang Pagbasa, inilahad ang kasaysayan ng Hapunang Pampaskuwa. Inilaan ang pagdiriwang ng Paskuwa sa paggunita sa paglaya ng mga Israelita mula sa Ehipto. Dahil sa pag-ibig, habag, at awa ng Panginoong Diyos, ang mga Israelita sa Ehipto ay ipinasiya Niyang palayain mula sa pagkaalipin. Winakasan ng Panginoong Diyos ang napakahabang panahon ng pamumuhay ng mga Israelita sa Ehipto bilang mga alipin. Binago ng Diyos ang kanilang kalagayan. Mula sa pagiging mga alipin sa Ehipto, ang mga Israelita noon ay tuluyang lumaya. 

Bilang mga Hudyo, ipinagdiwang rin ng Panginoong Jesus Nazareno at ng mga alagad ang Hapunang Pampaskuwa. Subalit, sa Hapunang Pampaskuwang ipinagdiwang at pinagsaluhan noong gabing yaon, ang Huling Hapunan, ipinakita ng Mahal na Poong Jesus Nazareno ang Kaniyang kapangyarihan bilang tunay na Diyos sa pamamagitan ng dalawang bagay na Kaniyang ginawa. Ang dalawang bagay na ito ay itinampok sa Ikalawang Pagbasa at Ebanghelyo. Una, gaya ng inilarawan ni Apostol San Pablo sa kaniyang pangaral na inilahad sa Ikalawang Pagbasa, ang Sakramento ng Banal na Eukaristiya na siyang pinakamataas na uri ng panalangin ay itinatag ng Nazareno. Sa tuwing ipinagdiriwang ang Banal na Eukaristiya, ang Poong Jesus Nazareno ay laging dumarating sa anyo ng tinapay at alak upang ang Kaniyang sarili ay muling ihandog, gaya ng Kaniyang ginawa sa bundok ng Kalbaryo na atin ring ginugunita bilang isang Simbahan sa tuwing ipinagdiriwang ang Sakramentong ito. Ikalawa, ang mga paa ng mga apostol ay Kaniyang hinugasan, gaya ng inilarawan sa Ebanghelyo. Kababaang-loob ang ipinakita ni Jesus Nazareno sa pamamagitan ng gawang ito upang ituro ang halaga nito sa kanila habang tinutularan nila Siya. 

Marahil may mga magtataka kung paano ginamit ng Mahal na Poong Jesus Nazareno ang Kaniyang kapangyarihan bilang Bugtong na Anak ng Diyos at Ikalawang Persona ng Banal na Santatlo sa Kaniyang mga ginawa sa Huling Hapunan. Hindi ba parang sinayang lamang ng Mahal na Poong Jesus Nazareno ang Kaniyang kapangyarihan bilang tunay na Diyos? Nasaan ang Kaniyang kapangyarihan sa mga gawang iyon? 

Lingid sa kaalaman ng nakararami, ang Mahal na Poong Jesus Nazareno ay nagpakita ng Kaniyang kapangyarihan sa pamamagitan ng mga gawang iyon. Ipinakita Niya sa pamamagitan ng mga gawang ito ang kapangyarihan ng Kaniyang dakilang pag-ibig. Dahil sa Kaniyang dakilang pag-ibig, ipinasiya ng Mahal na Poong Jesus Nazareno na iligtas tayong lahat mula sa kasalanan at kamatayan sa pamamagitan ng Kaniyang kababaang-loob na inihahayag ng Kaniyang Misteryo Paskwal, ang Krus na Banal at Muling Pagkabuhay. 

Kaya naman, bilang mga binubuo sa tunay na Simbahang itinatag ng Mahal na Poon, sa tuwing tinatanggap natin ang Katawan at Dugo ni Kristo sa bawat pagdiriwang ng Banal na Misa, dapat tayong maging bukas sa pagbabagong Kaniyang hatid sa ating lahat na tunay nga Niyang iniibig, kinahahabagan, at kinaawaan nang lubusan. Dapat tayong maging mga daluyan ng pag-ibig, kagandahang-loob, habag, at awa ng Poong Jesus Nazareno. Ito ang bagong buhay na inaalok sa atin ni Jesus Nazareno sa bawat pagdiriwang ng Banal na Misa kung saan tinatanggap natin ang Kaniyang Kabanal-banalang Katawan at Dugo sa Pakikinabang o Komunyon. Gaya ng sabi sa Salmong Tugunan: "Sa kalis ng pagbabasbas, si Kristo ang tinatanggap" (1 Corinto 10, 16). Sa pamamagitan ng Banal na Eukaristiya, binabago ng Nuestro Padre Jesus Nazareno ang bawat isa sa atin na tumatanggap sa Kaniyang Katawan at Dugo. Ibinibigay rin ng Nazareno sa atin sa pamamagitan nito ang ating misyon bilang mga Kristiyano na maging Kaniyang mga salamin sa kapwa. 

Dahil sa Kaniyang dakilang pag-ibig para sa atin, ginamit ng Poong Jesus Nazareno ang Kaniyang kapangyarihan bilang Diyos upang ipahayag sa atin ang Kaniyang pag-ibig na dakila para sa atin. Ang Kaniyang kababaang-loob na inihahayag ng Kaniyang Misteryo Paskwal ay ang patunay nito. Lagi Niya ito ipinapaalala sa bawat isa sa atin sa bawat pagdiriwang ng Banal na Misa kung saan lagi Siya dumarating sa anyo ng tinapay at alak upang ibigay sa atin ang ating misyon na ipalaganap ang Kaniyang pag-ibig, habag, kagandahang-loob, at awa sa tuwing ibinibigay Niya ang Kaniyang Katawan at Dugo. 

This faithful photographic reproduction of the painting (c. 1580s) Christ Washing the Feet of the Disciples by Paolo Veronese (1528–1588), as well as the actual work of art itself from the National Gallery Prague via the Web Gallery of Art, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

MINAMAHAL AT PINAHAHALAGAHAN NIYA TAYO

PAGNINILAY SA PITONG HULING WIKA NG MAHAL NA POONG JESUS NAZARENO 

IKAPITO AT HULING WIKA (Lucas 23, 46): 

"Ama, sa mga Kamay Mo'y ipinagtatagubilin Ko ang Aking Espiritu." 

This faithful photographic reproduction of the painting (c. 17th century) Christ on the cross with Mary, Mary Magdalene and John the Evangelist by anonymous, Manner of Peter Paul Rubens (1577–1640), as well as the actual work of art itself from the Bonnefanten Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Hango mula sa Salmo 31 ang Ikapito at Huling Wika ng Poong Jesus Nazareno mula sa Krus bago Siya tuluyang nalagutan ng hininga. Bukod sa pagpapakita ng Kaniyang tapat na pananalig sa Amang nasa langit hanggang sa huli, muling inihayag ng Poong Jesus Nazareno sa Kaniyang Ikapito at Huling Wika mula sa Krus bago Siya tuluyang malagutan ng hininga kung sino Siya. Muli Siyang nagsalita tungkol sa tunay Niyang pagkakilanlan at tungkulin. Ang Poong Jesus Nazareno ay ang Bugtong na Anak ng Diyos at Pangalawang Persona ng Banal na Santatlo na dumating sa mundo mula sa langit upang maging pinakadakilang biyayang kaloob ng Diyos sa sangkatauhan. 

Inilaan ng Mahal na Poong Jesus Nazareno ang Kaniyang natitirang hininga bago Siya tuluyang mamatay sa Krus upang magsalita tungkol sa dakilang pag-ibig ng Diyos para sa sangkatauhan. Sa halip na gamitin ito upang ilabas ang Kaniyang galit at poot laban sa Kaniyang mga kaaway at sumpain sila upang makaganti laban sa kanila, ang Mahal na Poong Jesus Nazareno ay nagpasiyang ilaan ang natitira Niyang boses at hininga upang magsalita tungkol sa Kaniyang pag-ibig para sa sangkatauhan. Dahil sa Kaniyang dakilang pag-ibig, ipinasiya Niyang harapin, tanggapin, yakapin, at batain ang matitinding hirap, sakit, pagdurusa, hapis, at kamatayan upang iligtas tayo. 

Taglay naman ni Jesus Nazareno ang kapangyarihang iligtas ang Kaniyang sarili mula sa mapait na hirap, sakit, pagdurusa, hapis, at kamatayan sa Krus. Sabi nga Niya kay Apostol San Pedro bago Siya dakpin sa Halamanan ng Hetsemani: "Hindi mo ba alam na makahihingi Ako sa Aking Ama nang higit pa sa 12 batalyon ng mga anghel at padadalhan Niya Ako agad?" (Mateo 26, 53). Bilang Bugtong na Anak ng Diyos, may kapangyarihan si Jesus Nazareno upang iligtas ang Kaniyang sarili mula sa Kaniyang mapait na pagdurusa, pagpapakasakit, at pagkamatay sa Krus. Hindi lamang Niya ito ipinasiyang gamitin para doon. 

Bakit namang ipinasiya ng Poong Jesus Nazareno na huwag gamitin ang Kaniyang kapangyarihan bilang Diyos upang iligtas ang Kaniyang sarili? Pagkakataon Niya sana iyan upang paniwalaan Siya ng lahat. Sayang naman. Magiging madali ang lahat para sa Poong Jesus Nazareno kung ipinasiya Niyang gawin iyon. Maililigtas Niya mula sa tiyak na pagdurusa, pagpapakasakit, at kamatayan ang Kaniyang sarili at lalo pang dadami ang mga maniniwala sa Kaniya. Hindi ba mas madali iyon? 

Oo, 'di hamak namang mas madali para sa Panginoong Jesus Nazareno na gamitin ang Kaniyang kapangyarihan bilang Diyos upang iligtas ang Kaniyang sarili. Sa totoo lamang, hindi naman Niya kailangang iligtas ang sangkatauhan. Mas mabuti para sa Kaniya na manatili na lamang Siya sa langit at pabayaang mapahamak na lamang nang ganoon ang sangkatauhan dahil masasayang lamang ang Kaniyang oras kapag ipinasiya Niya silang iligtas. Paulit-ulit naman sila magkakasala. Tapos, hindi pa nila pahahalagahan ang Kaniyang ginawa para sa kanila. Bakit hindi na lamang ginamit ni Jesus Nazareno ang Kaniyang kapangyarihan upang iligtas ang Kaniyang sarili? 

Sa halip na gamitin ang Kaniyang kapangyarihan bilang Diyos upang iligtas mula sa kamatayan ang Kaniyang sarili, ipinasiya ng Nuestro Padre Jesus Nazareno na iligtas tayo mula sa kasalanan dahil tunay Niya tayong iniibig. Totoo, walang sinumang tao ang makapagsasabing karapat-dapat siya sa pag-ibig na ito. Ngunit, sa kabila nito, ipinasiya ng Nuestro Padre Jesus Nazareno na ibigin tayo at pahalagahan tayo. Ang pasiyang ito ng Nuestro Padre Jesus Nazareno ay isinasalamin ng Krus na Banal. 

Dahil sa Kaniyang dakilang pag-ibig para sa atin, hindi ginamit ni Jesus Nazareno para sa sarili Niyang kapakanan ang Kaniyang kapangyarihan bilang tunay na Diyos. Hindi ginamit ni Jesus Nazareno ang Kaniyang kapangyarihan bilang Ikalawang Persona ng Banal na Santatlo upang iligtas ang Kaniyang sarili mula sa kamatayan at takasan ang Kaniyang misyon bilang ipinangakong Mesiyas at Manunubos. Bagkus, hinarap, tinanggap, at niyakap Niya ang Krus na Banal alang-alang sa atin. 

Ang Krus na Banal ng Nuestro Padre Jesus Nazareno ay ang pinakadakilang patunay na tayong lahat ay tunay Niyang pinahahalagahan at minamahal. Dahil sa Kaniyang pag-ibig na dakila para sa atin, ang Kaniyang tunay na misyon at pagkakilanlan bilang Bugtong na Anak ng Diyos at Ikalawang Persona ng Banal na Santatlo na dumating sa mundong ito bilang ipinangakong Mesiyas at Manunubos ay hindi Niya tinalikuran, tinakasan, itinakwil, at ipinagkaila. Bagkus, buong kababaang-loob at kagitingan Niya itong hinarap, tinanggap, niyakap, at tinupad, kahit na ang ibig sabihin nito ay dapat magtiis at magbata Siya ng maraming hirap, sakit, pagdurusa, hapis, at kamatayan upang tayong lahat ay iligtas. 

SIYA NGA

PAGNINILAY SA PITONG HULING WIKA NG MAHAL NA POONG JESUS NAZARENO 

IKAANIM NA WIKA (Juan 19, 30): 

"Naganap na!"

This faithful photographic reproduction of the painting (c. 1664-1665) Cristo de la Sangre by Mateo Cerezo (1637 - 1666), as well as the actual work of art itself from the Museo de Burgos - Sección de Bellas Artes, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Ang Ikaanim na Wika ng Mahal na Poong Jesus Nazareno mula sa Krus ay isang uri ng pagpapakilala ng sarili. Ipinakilala ng Mahal na Poong Jesus Nazareno ang Kaniyang sarili sa lahat sa pamamagitan ng Kaniyang Ikaanim na Wika mula sa Krus. Sa kabila ng mga hirap, sakit, pagdurusa, dalamhati, hapis, lungkot, at kadiliman sa sandaling yaon, buong lakas na inihayag ng Mahal na Poong Jesus Nazareno na natupad ang lahat ng mga pangakong binitiwan ng Diyos na inihayag ng mga propetang Kaniyang hinirang sa Lumang Tipan sa pamamagitan ng Kaniyang Ikaanim na Wika. 

Kahit nauubusan na ng dugo dahil sa mga sugat dulot ng paghampas sa Kaniya sa haliging bato, ng koronang tinik, ng mabigat na Krus, at pati na rin ang mga pakong ginamit sa pagpako sa Kaniya sa Krus, ipinagmalaki pa rin ng Mahal na Poong Jesus Nazareno ang Kaniyang tunay na pagkakilanlan at misyon. Hindi Niya ikinahiya kung sino nga ba Siya. Bagkus, ipinagmalaki ng Mahal na Poong Jesus Nazareno nang may lakas ng loob at pananalig sa Amang nasa langit ang Kaniyang tunay na misyon at pagkakilanlan bilang ipinangakong Mesiyas at Manunubos. 

Duguan man ang Kaniyang buong Katawan, mula ulo hanggang talampakan, sa mga sandaling yaon, hindi ipinagkaila, inilihim, o itinago ng Nuestro Padre Jesus Nazareno ang tunay Niyang misyon at pagkakilanlan. Kahit mukha Siyang talo sa paningin ng mundo, ipinagmalaki pa rin ng Nuestro Padre Jesus Nazareno ang Kaniyang misyon, tungkulin, at pagkakilanlan. Hanggang sa huli, pinandigan pa rin ng Mahal na Poong Jesus Nazareno ang Kaniyang pasiyang magpakatotoo. Nandigan pa rin Siya para sa katotohanan tungkol sa Kaniyang misyon at pagkakilanlan bilang Mesiyas na kaloob ng Diyos para sa ikaliligtas ng sangkatauhan. Ito ang dahilan kung bakit malakas na binigkas ng Mahal na Poong Jesus Nazareno ang mga salitang itinampok sa Kaniyang Ikaanim na Wika, kahit na "halos di makilala kung Siya'y tao" (Isaias 52, 14). 

Hindi layunin ng Poong Jesus Nazareno na panatilihin ang natitira Niyang dignidad sa pamamagitan ng pagbigkas ng Kaniyang Ikaanim na Wika habang nakabayubay Siya sa Krus dahil hindi naman ito nawala mula sa Kaniya. Sa paningin ng mundo, katawa-tawa si Jesus Nazareno dahil mukha Siyang talunan. Bakit naman Niya bibigkasin ang mga salitang ito na itinatampok sa Kaniyang Ikaanim na Wika mula sa Krus na Banal kahit na mukha Siyang talo? May balak ba Siyang magpatawa? Iyon ang pananaw ng sanlibutan. Subalit, lingid sa paningin at isipan ng sanlibutan na kalooban ito ng Diyos noon pa mang una. Bagamat karumal-dumal at nakakahiya ngang tunay ang paraan kung paano namatay ang Mahal na Poong Jesus Nazareno, hindi man ito halata sa paningin at pananaw ng sanlibutan, nakamit ng Poon ang tagumpay. 

Sa totoo lamang, maaari namang ipagkaila ng Poong Jesus Nazareno ang Kaniyang tunay na pagkakilanlan at misyon. Maaari na lamang Niyang talikuran at takasan ang Kaniyang tunay na misyon at pagkakilanlan bilang ipinangakong Mesiyas na isinugo ng Diyos para sa ikaliligtas ng sangkatauhan. Ang Poong Jesus Nazareno ay inilaglag, ipinagkaila, itinakwil, at tinalikuran ng Kaniyang mga tagasunod. 'Di hamak namang mas madali para sa Poong Jesus Nazareno na iligtas na lamang ang Kaniyang sarili sa halip na panindigan ang Kaniyang tunay na misyon at pagkakilanlan. Walang sinuman ang karapat-dapat sa biyayang Kaniyang kaloob. 

Bakit namang ipinasiya ng Poong Jesus Nazareno na ipaalam sa lahat ang Kaniyang tunay na pagkakilanlan at misyon sa Kaniyang Ikaanim na Wika mula sa Krus? Isa lamang ang dahilan nito - pag-ibig. Dahil sa Kaniyang dakilang pag-ibig para sa atin, ipinasiya pa rin ng Poong Jesus Nazareno na iligtas tayo mula sa kasalanan. Bagamat nagkaroon Siya ng pagkakataong iligtas ang Kaniyang sarili mula sa kapahamakan at kamatayan sa pamamagitan ng pagtakas, hindi Niya ito ginawa. Ipinasiya pa rin ng Poong Jesus Nazareno na harapin, tanggapin, at tuparin ang Kaniyang misyon dahil mahal na mahal Niya tayo. Alang-alang sa atin, nagpakatotoo Siya. 

Pinandigan tayo ng Poong Jesus Nazareno hanggang sa huli. Ito ang aral at mensahe ng Kaniyang Ikaanim na Wika mula sa Krus na Banal. Bagamat hindi tayo karapat-dapat dahil sa ating mga kasalanang hindi na mabilang sa dami nito, tayong lahat ay ipinasiya pa ring tubusin ng Poong Jesus Nazareno. Alang-alang sa atin, hindi Niya tinakasan, tinakbuhan, tinakasan, at ipinagkaila kung sino nga ba Siya talaga. Bagkus, ang Kaniyang tunay na misyon at pagkakilanlan bilang Mesiyas at Tagapagligtas ay Kaniyang hinarap, tinanggap, at tinupad. Isa lamang ang dahilan nito - ang Kaniyang dakilang pag-ibig na tunay ngang kahanga-hanga. 

Mapalad tayo sapagkat pinandigan tayo ng Mahal na Poong Jesus Nazareno. Dahil pinandigan tayo ng Mahal na Poong Jesus Nazareno hanggang sa huli, tayong lahat ay Kaniyang iniligtas. Ito ang pinakadakilang patunay ng Kaniyang dakilang pag-ibig, kagandahang-loob, habag, at awa para sa atin. 

DUMATING DAHIL TUNAY NIYA TAYONG INIIBIG

PAGNINILAY SA PITONG HULING WIKA NG MAHAL NA POONG JESUS NAZARENO

IKALIMANG WIKA (Juan 19, 28): 

"Nauuhaw Ako!" 

This faithful photographic reproduction of the painting (c. 1610s) Crucifixion by Louis de Caullery (circa 1580–1621), as well as the actual work of art itself from the National Museum in Warsaw, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

Hindi lamang inilarawan ng Mahal na Poong Jesus Nazareno ang Kaniyang pisikal na pagkauhaw dulot ng patuloy na pagdaloy ng Kaniyang Dugo sa Kaniyang Ikalimang Wika mula sa Krus. Dahil sa patuloy na pagdaloy ng Kaniyang Banal na Dugo dulot ng mga sugat na Kaniyang tinamo mula noong hinagupit Siya sa haliging bato, mula sa isang koronang tinik, mula sa Krus na hindi biro ang bigat, at mula rin sa mga pakong ginamit upang ipako Siya sa Krus na Kaniyang pinasan, nauhaw ang Mahal na Poong Jesus Nazareno. Labis ang Kaniyang pagkauhaw sa mga sandaling yaon, kung pisikal ang pagkauhaw na tinutukoy. Alam naman ng lahat iyon. 

Bukod sa pisikal na pagkauhaw, may isang malalim na kahulugan ang Ikalimang Wika ng Mahal na Poong Jesus Nazareno mula sa Krus na Banal. Nagbigay ng konteksto si San Juan noong nagsulat siya tungkol sa bahaging ito ng kaniyang salaysay ng mga huling sandali sa buhay ng Mahal na Poong Jesus Nazareno bago Siya namatay nang tuluyan sa Krus na mababasa natin sa ika-19 na kabanata ng kaniyang Ebanghelyo. Ito ang konteksto ng Ikalimang Wika ng Poong Jesus Nazareno na mababasa natin sa bahaging iyon ng mahabang salaysay ng Kaniyang pagpapakasakit at pagkamatay sa Krus sa Ebanghelyo ni San Juan: "Alam ni Hesus na naganap na ang lahat ng bagay; at bilang katuparan ng Kasulatan ay sinabi Niya, 'Nauuhaw Ako!'" (19, 28). Bagamat naghihingalo sa Krus, hindi ipinagkaila ng Poong Jesus Nazareno kung sino Siya. 

Ano naman ang ugnayan ng pagkauhaw ng Nuestro Padre Jesus Nazareno sa mga nasasaad sa Banal na Kasulatan tungkol sa Mesiyas? Nasusulat sa isa sa mga talata sa isa sa mga aklat sa Lumang Tipan: "Sa halip na pagkain, nang Ako'y magutom, ang dulot sa Aki'y mabagsik na lason. Suka at di tubig ang ipinainom" (Salmo 69, 21). Sa pamamagitan ng Ikalimang Wika mula sa Krus na Banal, inihayag ng Nuestro Padre Jesus Nazareno na Siya mismo ang tinutukoy ng nagpahayag ng mga salitang iyon sa isa sa mga aklat sa Lumang Tipan. Bagamat dumating sa mundong ito bilang isang biyaya mula sa Diyos, hindi Siya tinanggap ng nakararami. 

Napakalinaw namang batid ng Mahal na Poong Jesus Nazareno ang mga nasusulat tungkol sa Kaniya sa Lumang Tipan. Bagamat dumating Siya sa daigdig na ito bilang ipinangakong Mesiyas at Manunubos, hindi Siya tinanggap. Ang mga ginawa laban sa Kaniya noong unang Biyernes Santo ay isang patunay nito. Dahil alam naman Niyang hindi Siya tatanggapin sa Kaniyang pagdating sa mundong ito, maaari na lamang Siya manatili sa langit. Ligtas pa Siya doon. Tanggap pa Siya doon. Sasambahin pa Siya doon ng mga anghel. Maaaring gamitin ang mga salitang ito mula sa Lumang Tipan upang hindi Niya ituloy ang Kaniyang pagdating sa mundo bilang Mesiyas. Sa totoo lamang, nakakapagtaka kung bakit ipinasiya pa rin Niyang dumating sa mundong ito bilang ipinangakong Mesiyas at Manunubos na kaloob ng Diyos, kahit noon pa man ay alam Niyang hindi Siya tatanggapin. 

Kabutihan ang ipinakita ng Poong Jesus Nazareno. Subalit, kasamaan ang iginanti at ibinayad sa Kaniya. Inihayag ng Poong Jesus Nazareno sa Kaniyang Ikalimang Wika mula sa Krus alam Niyang mangyayari iyon. Habang nakabayubay sa Krus na Banal, ang Poong Jesus Nazareno ay nagpahayag ng kalungkutan dahil hindi Siya tinanggap ng marami, kahit na dumating Siya bilang ipinangakong Manunubos. Nalungkot nang labis ang Poong Jesus Nazareno dahil pilit na isinasara ng marami ang kanilang mga puso sa Kaniya. Hindi Siya pinahalagahan. 

Sa halip na manatili sa langit at hayaang mapahamak ang sangkatauhan, ipinasiya pa rin ng Panginoong Jesus Nazareno na dumating sa mundong ito bilang ipinangakong Mesiyas at Manunubos dahil tunay Niya tayong iniibig. Kahit alam Niyang hindi Siya tatanggapin at pahahalagahan, ipinasiya pa rin Niyang dumating upang iligtas tayo dahil tunay Niya tayong minamahal. Ganoon tayo kamahal ni Jesus Nazareno. 

Ipinahayag ng Poong Jesus Nazareno sa Kaniyang Ikalimang Wika mula sa Krus ang dahilan kung bakit Niya ipinasiyang dumating sa mundo bilang ipinangakong Mesiyas at Manunubos. Mahal na mahal Niya tayo. Dahil sa Kaniyang dakilang pag-ibig, ang lahat ng mga hirap, sakit, pagdurusa, lungkot, pait, hapis, at pati na rin ang pisikal na pagkauhaw ay Kaniyang hinarap, tiniis, at binata. 

PAG-IBIG NGA NAMAN

PAGNINILAY SA PITONG HULING WIKA NG MAHAL NA POONG JESUS NAZARENO 

IKAAPAT NA WIKA (Mateo 27, 46; Marcos 15, 34) 

"Diyos Ko, Diyos Ko, bakit Mo Ako pinabayaan?" 

This faithful photographic reproduction of the painting (c. 1600) Crucified Christ by Orazio Borgianni (1574–1616), as well as the actual work of art itself from the Museo de Cádiz, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Ang Ikaapat na Wika ng Poong Jesus Nazareno mula sa Krus ay hango mula sa mga unang salita ng Salmo 22. Kung babasahin natin nang maigi ang kabuuan ng Salmo 22, matutuklasan nating hindi ito isang mahaba-habang listahan ng mga hinanakit at reklamo laban sa Diyos. Bagkus, ang mga salita sa Salmo 22 ay isang panalangin sa Diyos at isa ring patotoo ng Kaniyang kabutihan. Dahil sa kabutihan ng Panginoon, sa kahuli-hulihan, ang tampok na mang-aawit sa Salmong ito na isang dakilang lingkod ng Panginoon ay nagtagumpay. Kung hindi dahil sa kabutihan ng Panginoong Diyos, hindi niya mararating at makakamit ang tagumpay. 

Subalit, tiyak na lingid sa kaalaman ng nakararami na isa rin itong propesiya ng mga huling sandali sa buhay ng ipinangakong Mesiyas at Manunubos na kaloob ng Diyos. Inihayag sa Salmong ito na maraming hirap, pagdurusa, sakit, pait, at kamatayan ang babatain ng ipinangakong Mesiyas at Manunubos. Bagamat isang dakilang biyayang kaloob ng Diyos ang ipinangakong Mesiyas at Manunubos, hindi Siya tatanggapin ng lahat. Nakakagulat isiping hindi tatanggapin ng marami ang pinakadakilang biyayang nagmula sa Diyos na walang iba kundi ang ipinangakong Mesiyas at Manunubos. Ang pinakadakilang biyayang ito na kaloob ng Diyos ay ipinakilala sa Bagong Tipan - ang Mahal na Poong Jesus Nazareno. 

Inihayag ni Apostol San Pablo na dumating ang Mahal na Poong Jesus Nazareno sa mundong ito bilang ipinangakong Mesiyas at Manunubos nang may kababaang-loob dahil ito ang niloob ng Diyos. Bilang ipinangakong Mesiyas at Tagapagligtas, hinarap, tiniis, at binata ng Mahal na Poong Jesus Nazareno ang mapait na hirap, pagdurusa, sakit, at kamatayan sa Krus na Banal, gaya ng niloob ng Amang nasa langit (Filipos 2, 6-11). Nakasentro rin sa aspetong ito ng misyon ng Mahal na Poong Jesus Nazareno bilang ipinangakong Mesiyas na bigay ng Diyos ang pangaral sa Sulat sa mga Hebreo kung saan ipinakilala Siya bilang Dakilang Saserdote (Hebreo 5, 5-9). Dahil sa pag-aalay ng sarili ng Mahal na Poong Jesus Nazareno sa Krus na Banal, kinikilala Siya ng lahat bilang Dakilang Saserdote. 

Nakakapagtaka kung bakit nanaisin ng Diyos na magbata ng maraming mapapait na hirap, sakit, pagdurusa, hapis, at kamatayan sa Krus ang Kaniyang Bugtong na Anak sa Krus na Banal. Parang hindi mahal ng Diyos ang Kaniyang Bugtong na Anak na si Jesus Nazareno. Tila napakadali para sa Diyos na pahintulutan ang pagpapakasakit at pagkamatay ng Kaniyang Bugtong na Anak na si Jesus Nazareno sa Krus. Basta na lamang Siya pumayag na mangyari iyon sa Kaniyang Anak. Hindi ba dapat inilayo at iniligtas ng Diyos ang Kaniyang Bugtong na Anak? 

Hindi naging madali para sa Diyos na gawin ito. Ang Amang nasa langit ay lubusang nasaktan habang Kaniyang pinagmamasdan mula sa Kaniyang trono sa langit ang pagpapakasakit at pagkamatay ng Kaniyang Bugtong na Anak na si Jesus Nazareno, ang ipinangakong Mesiyas at Manunubos. Subalit, dahil sa dakilang pag-ibig para sa sangkatauhan, pinahintulutan ng Amang nasa langit na mangyari ito sa Panginoong Jesus Nazareno na Kaniyang Bugtong na Anak alang-alang sa kanilang kaligtasan at kalayaan mula sa kasalanan. Katunayan, niloob rin ito ng Poong Jesus Nazareno, ang Bugtong na Anak ng Diyos na Siya ring Ikalawang Persona ng Banal na Santatlo, at maging ng Espiritu Santo. 

Dahil sa dakilang pag-ibig ng Diyos, ang Mahal na Poong Jesus Nazareno ay kusang-loob na nag-alay ng Kaniyang sarili sa Krus na Banal upang tayong lahat ay Kaniyang maligtas. Hindi Siya tumakas mula sa mga hirap, pagdurusa, sakit, at kamatayan sa Krus na Banal. Bagkus, hinarap at tinanggap Niya dahil nais Niya tayong iligtas. 

"ANG INA KO AY INYO RING INA"

PAGNINILAY SA PITONG HULING WIKA NG MAHAL NA POONG JESUS NAZARENO 

IKATLONG WIKA (Juan 19, 26-27):

"Ginang, narito ang iyong Anak . . . Narito ang iyong Ina." 

This faithful photographic reproduction of the painting (c. 1643) Christ on the Cross with the Magdalen, the Virgin Mary and Saint John the Evangelist by Eustache Le Sueur (1616–1655), as well as the actual work of art itself from the National Gallery in London via Art UK, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1655. This is also in the Public Domain in the United States because it was published (or registered with the U.S. Copyright Office) before January 1, 1929. 

"At si Jacob ang ama ni Jose na asawa ni Maria. Si Maria naman ang ina ni Hesus na tinatawag na Kristo" (Mateo 1, 17). Buong linaw na inilarawan ng mga salitang ito na mula sa bersyon ng Ebanghelyo ni San Mateo ng talaan ng angkang kinabilangan ng Poong Jesus Nazareno ang Kaniyang ugnayan sa Mahal na Birheng Maria. Sa tuwing binabanggit ang pangalan ng Mahal na Inang si Mariang Birhen, lagi itong nakaugnay sa Kabanal-Banalang Pangalan ng Mahal na Poong Jesus Nazareno. Isa lamang ang ibig sabihin noon. Hindi magkahiwalay ang Panginoong Jesus Nazareno at ang Mahal na Birheng Maria. Kung nasaan si Jesus Nazareno, naroon rin si Maria. 

Kung babasahin natin ang bahagi ng salaysay ng Pagpapakasakit ng Mahal na Poong Jesus Nazareno sa Ebanghelyo ni San Juan na kung saan matatagpuan at mababasa natin ang bahagi kung saan binigkas Niya ang Ikatlong Wikang ito, ipinakilala sa atin ang Mahal na Birheng Maria bilang Kaniyang Ina (Juan 19, 25). Mas nakakatawag ng pansin ang hindi pagbanggit ni San Juan ng pangalan ng Mahal na Birheng Maria. Sa halip na gamitin ang pangalan ng Mahal na Inang si Mariang Birhen upang ipakilala siya, ipinasiya ni San Juan na ipakilala siya bilang Ina ng Poong Jesus Nazareno. Kung tutuusin, pati sa salaysay ng unang himala ng Poong Jesus Nazareno sa Cana, hindi rin ginamit ni San Juan ang pangalan ng Mahal na Inang si Mariang Birhen. Bagkus, ipinakilala rin si Maria bilang "Ina ni Hesus" sa salaysay ng nasabing kaganapan (Juan 2, 1). Sa pamamagitan nito, isinalungguhit ang malalim na relasyon at ugnayan bilang mag-ina ng Mahal na Inang si Mariang Birhen at ng Mahal na Poong Jesus Nazareno.

Nang Kaniyang bigkasin ang Kaniyang Ikatlong Wika mula sa Krus, ipinagkatiwala ng Mahal na Poong Jesus Nazareno ang Mahal na Inang si Mariang Birhen kay Apostol San Juan, ang alagad na Kaniyang minamahal. Subalit, hindi lamang ipinagkatiwala ng Poong Jesus Nazareno ang Mahal na Birheng Maria sa pangangalaga ni Apostol San Juan sa sandaling iyon. Bagkus, sa sandaling yaon, ang buong Simbahan ay itinuring at ibinilang na rin ng Panginoong Jesus Nazareno bilang Kaniyang pamilya. 

Bagamat nakabayubay sa Krus, ipinagkaloob sa atin ng Panginoong Jesus Nazareno ang isang napakagandang biyaya. Tayong lahat ay naging parte ng Kaniyang pamilya sa sandaling iyon. Ipinakilala sa atin ng Mahal na Poon ang Kaniyang Inang si Maria upang maging Ina rin natin. Sa simula pa, iyon ang naging layunin ng Nuestro Padre Jesus Nazareno. Maging bahagi tayo ng minamahal Niyang pamilya. Niloob ng Mahal na Poong Jesus Nazareno na tayong lahat ay maging bahagi ng tunay na Simbahang Kaniyang itinatag at maging mga anak rin ng Mahal na Birheng Maria gaya Niya. 

Isinasalamin ng gawang ito ng Poong Jesus Nazareno ang Kaniyang pag-ibig para sa atin. Batid Niyang mga makasalanan tayo. Dahil dito, tayong lahat ay hindi karapat-dapat sa Kaniyang dakilang pag-ibig. Subalit, sa kabila ng ating mga kahinaan bilang mga makasalanan, ipinasiya pa rin Niya tayong mahalin. Katunayan, ito ang dahilan kung bakit pumayag Siyang maging alay para sa ikapagpapatawad ng mga kasalanan sa Banal na Krus. Niloob Niyang maging handog para sa ating kaligtasan dahil tunay Niya tayong minamahal. Ang pagkakaloob Niya sa Mahal na Inang si Maria sa atin upang maging Ina rin natin ay isa pang dagdag na biyaya mula sa Kaniya. 

Sa pamamagitan ng pagkakaloob sa Mahal na Inang si Mariang Birhen sa atin upang maging atin ring Ina, inihayag sa atin ng Mahal na Poong Jesus Nazareno ang dakila Niyang pag-ibig para sa ating lahat. Dahil sa Kaniyang dakilang pag-ibig, tayong lahat ay ipinasiya Niyang iligtas upang maging bahagi rin tayo ng Kaniyang pamilya.