BANAL NA DAKO

11 Disyembre 2023 

Kapistahan ng Pagtatalaga ng Dambana ng Katedral ng Maynila 

1 Hari 8, 22-23. 27-30/Salmo 83/Juan 2, 13-22 

"Huwag kang lumapit. Hubarin mo ang iyong sandalyas sapagkat banal na dako ang kinatatayuan mo. Ako ang Diyos ng iyong mga magulang - nina Abraham, Isaac, at Jacob" (Exodo 3, 5-6). Ang mga salitang ito ay binigkas ng Panginoong Diyos noong una Siyang magpakita kay Moises sa pamamagitan ng isang punongkahoy na hindi nasusunog bagamat ito ay nagliliyab sa Bundok ng Horeb. Sa pamamagitan ng mga salitang ito, inihayag ng Diyos kung bakit ang pinuntahan ni Moises ay isang banal na lugar. Naging banal ang lugar na iyon dahil sa presensya ng Diyos. 

Ang pagdiriwang ng Simbahan sa araw na ito ay nakatuon sa presensya ng Diyos na nagpapabanal sa isang lugar. Ito ang dahilan kung bakit may mga gusaling Simbahan katulad na lamang ng Katedral ng Maynila na nagsisilbi bilang bahay-dalanginan para sa lahat. Banal ang mga gusaling Simbahang itinayo dahil sa presensya ng Diyos. Oo, mga gusali ito. Subalit, naiiba ang mga ito sa ibang mga gusaling itinayo dahil ang Diyos ng mga Hukbo ay nananahan sa Simbahan. Dahil dito, banal ang Simbahan. 

Marahil magtataka ang marami dahil minsang sinabi ni Apostol San Pablo sa isa sa kaniyang mga pangaral sa mga taga-Corinto na tayo ang Templo ng Espiritu Santo (1 Corinto 6, 19)? Kung tayo ang Templo ng Espiritu Santo, bakit gayon na lamang ang ating pagpapahalaga sa mga gusaling Simbahan gaya na lamang ng makasaysayang Katedral ng Maynila? Hindi ba taliwas ito sa mga salitang ito ni Apostol San Pablo ang ginawa nating pagpapahalaga sa mga gusaling Simbahang ito na itinayo upang magsilbing mga bahay-dalanginan para sa lahat? 

Oo, tayo ang Simbahan. Katunayan, ito ang isinasagisag ng mga gusaling Simbahang itinayo at itinalaga bilang mga bahay-dalanginan para sa lahat. Ang mga gusaling Simbahang ito ay nagpapaalala sa atin na ipinasiya ng Panginoon na tayong lahat ay makapiling at makasama Niya sa bawat sandali ng ating buhay sa mundong ito. Ito ang katotohanang inihayag nang malakas ng haring si Solomon sa Unang Pagbasa: "Kung ang langit, ang kataas-taasang langit, ay di sapat na maging tahanan Ninyo, ito pa kayang hamak na templo na aking itinayo!" (1 Hari 8, 27). Bukod pa roon, bago niya binigkas ang mga salitang ito sa kaniyang panalangin sa Panginoong Diyos, si Haring Solomon na rin mismo ang nagsabing wagas ang pag-ibig ng Diyos sa mga alipin Niyang tapat na naglilingkod sa Kaniya (1 Hari 8, 23). Dahil sa Kaniyang tapat at wagas na pag-ibig, kusang-loob Niyang ipinasiyang makapiling tayo. 

Kaya naman, tampok sa Ebanghelyo para sa araw na ito ang pagpapalayas ng Poong Jesus Nazareno sa mga nagtitinda ng mga baka't kalapati at ang mga nagpapalit ng salapi mula sa Templo. Ikinagalit ng Mahal na Poong Jesus Nazareno ang kawalan ng paggalang at pagpapahalaga sa presensya ng Diyos. Sa paningin ng Mahal na Poon, isinantabi na ng mga tao ang Diyos. Hindi na mahalaga para sa mga tao roon ang presensya ng Diyos. Tila sinasabi nilang wala silang pakialam sa Diyos. Napakalinaw na nasaktan ang Diyos sa pamamagitan ng Nuestro Padre Jesus Nazareno. Matapos gawin ng Diyos ang lahat upang makapiling ang tao, ito ang isinukli nila sa Kaniya? 

Taliwas ang ginawa ng mga tao sa Ebanghelyo sa mga salitang inihayag ng mang-aawit sa Salmong Tugunan para sa araw na ito: "Ang templo Mo'y aking mahal, D'yos na Makapangyarihan" (Salmo 83, 2). Hindi nagpakita ng pag-ibig at pagpapahalaga sa presensya ng Diyos na nagpapabanal sa Templo ang mga tao sa Ebanghelyo. Dahil dito, labis na nagalit ang Mahal na Poong Jesus Nazareno. Sa galit Niyang ito, buong linaw Niyang inihayag na labis Siyang nasaktan sa kanilang ginawa. 

Iniibig ba natin ang Diyos? Tayong lahat ay tunay Niyang iniibig. Ano ang isusukli natin sa Kaniya? Kung tapat at wagas na pag-ibig ang nais rin nating isukli sa Panginoong Diyos, pahahalagahan at igagalang natin ang Kaniyang presensyang nagpapabanal sa tanan. Ang ating mga tungkulin bilang Kaniyang Templo ay ating tutuparin. Mamuhay bilang mga salamin at daluyan ng Kaniyang pag-ibig, kagandahang-loob, habag, at awa na tunay ngang kahanga-hanga at dakila. 

PAGHANDAAN ANG PAGDATING NG TUNAY NA NAGMAMAHAL

10 Disyembre 2023 

Ikalawang Linggo sa Panahon ng Pagdating ng Panginoon [B] 

Isaias 40, 1-5. 9-11/Salmo 84/2 Pedro 3, 8-14/Marcos 1, 1-8 

This faithful photographic reproduction of the painting (c. Before 1925) The Preaching of John the Baptist by David Teniers the Younger (1610–1690), as well as the work of art itself from Christie's New York Auction, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This work of art is also in the Public Domain in the United States because it was published (or registered with the U.S. Copyright Office) before January 1, 1928.

Ang mga Pagbasa para sa Ikalawang Linggo ng Panahon ng Pagdating ng Panginoon na mas kilala ng nakararami bilang panahon ng Adbiyento ay nakasentro sa tema ng paghahanda. Katunayan, ito ang panawagan ng Simbahan para sa bawat isa sa atin hindi lamang tuwing panahon ng Adbiyento kundi sa bawat sandali ng ating buhay dito sa lupa. Pansamantala lamang ang ating buhay dito sa mundo. Dahil dito, dapat maging handa rin tayo para sa pagdating ng Panginoon na hindi alam ninuman dito sa lupa. Bakit Siya darating? Upang iligtas ang lahat ng mga nagpasiyang manatiling tapat sa Kaniya hanggang sa huli at dalhin sa langit. 

Oo, pinaghahandaan rin natin ang pagdiriwang ng Dakilang Kapistahan ng Pasko ng Pagsilang ng Panginoon, ang Nuestro Padre Jesus Nazareno, pagsapit ng panahong ito taun-taon. Subalit, hindi lamang ito ang ating pinaghahandaan. Bagkus, pagsapit ng panahong ito na tinatawag na Adbiyento, pinaghahandaan rin natin ang Kaniyang muling pagdating sa wakas ng panahon na hindi natin alam kung kailan magaganap. Kaya naman, ang mga Pagbasa para sa kabuuan ng panahong ito ay nakasentro sa tema ng pagdating. Gaya ng mga Israelita bago dumating si Kristo sa mundong ito upang iligtas ang sangkatauhan, pinaaalalahanan tayo na muling darating si Kristo sa wakas ng panahon bilang Hari at Hukom. Ang Banal na Sanggol na isinilang ng Mahal na Inang si Mariang Birhen sa sabsaban noong gabi ng unang Pasko na tumubos sa sangkatauhan sa pamamagitan ng Kaniyang Banal na Krus at Muling Pagkabuhay ay darating muli sa wakas ng panahon bilang dakilang Hari at Hukom ng lahat. Bilang mga tapat na tagasunod at deboto ng Nuestro Padre Jesus Nazareno, ito ang dapat nating paghandaan sa lahat ng oras sapagkat hindi natin alam ang eksaktong oras at petsa nito. Katulad ng una Niyang pagdating, kaligtasan ang Kaniyang hatid. 

Nakasentro sa paghahanda para sa pagdating ng Panginoon ang mga Pagbasa para sa Linggong ito. Ang panawagang ito ay inihayag sa Unang Pagbasa at Ebanghelyo. Katunayan, ang panawagan ni San Juan Bautista sa mga Israelita sa Ebanghelyo ay mula sa bahagi ng propesiya ni Propeta Isaias sa Unang Pagbasa na nakasentro sa gampaning ibinigay sa kaniya ng Diyos sa kasaysayan ng Kaniyang pagkakaloob ng biyaya ng kaligtasan sa buong sangkatauhan. Si San Juan Bautista mismo ay ang tinig na tinutukoy ni Propeta Isaias sa Unang Pagbasa. Bilang tinig na ito, si San Juan Bautista ay nanawagan sa lahat ng mga tao na tuwirin at ipaghanda ng daraanan ang ipinangakong Mesiyas at Manunubos na walang iba kundi si Jesus Nazareno. 

Hindi lamang para sa mga Israelita noon ang panawagang ito ni San Juan Bautista sa tampok na salaysay sa Ebanghelyo. Bagkus, ito ay para sa lahat. Sa kasalukuyang panahon, patuloy na umaalingawngaw ang panawagang ito ni San Juan Bautista na inilahad sa Ebanghelyo. Lagi nating dapat paghandaan ang pagdating ng Panginoon sa ating buhay. Inilarawan sa Salmong Tugunan at sa Ikalawang Pagbasa kung bakit dapat natin ito gawin. Ang mga salita ng mang-aawit sa Salmong Tugunan ay isang hiling at daing sa Panginoong Diyos na ihayag ang Kaniyang pag-ibig, habag, at awa na nagdudulot ng kaligtasan sa lahat. Nakasentro rin sa pag-ibig, habag, at awa ng Diyos ang pangaral ni Apostol San Pedro, ang unang Santo Papa ng tunay at nag-iisang Simbahang itinatag ni Kristo, sa Ikalawang Pagbasa. Kahit nakakatakot isipin ang wakas ng panahon, dapat mapuno tayo ng galak at pag-asa sapagkat ito ay ang simula ng isang panibagong mundo. Maraming pagbabago ang idudulot ng Mahal na Poong Jesus Nazareno sa Kaniyang ikalawa't muling pagdating bilang dakilang Hari at Hukom sa wakas ng panahon. 

Bakit ito ang pasiya ng Diyos? Inihayag na rin ng mang-aawit sa Salmong Tugunan ang tanging dahilan. Gaya ng sabi ng mang-aawit sa Salmong Tugunan: "Pag-ibig Mo'y ipakita, iligtas kami't tanglawan" (Salmo 84, 8). Dahil sa pag-ibig, kagandahang-loob, habag, at awa ng Panginoong Diyos, ipinasiya Niyang gawin ang mga inilarawan ng mang-aawit sa Salmong Tugunan, ni Propeta Isaias sa Unang Pagbasa, ni Apostol San Pedro sa Ikalawang Pagbasa, at ni San Juan Bautista sa Ebanghelyo. Kahit na hindi tayo karapat-dapat sa pagpapalang ito ng Panginoong Diyos dahil sa ating mga kasalanan laban sa Kaniya na hindi na mabilang dahil rin sa dami nito, ipinasiya pa rin itong gawin ng Diyos alang-alang sa atin. Ang Diyos ay naging mabuti sa atin dahil tunay Niya tayong iniibig, kinahahabagan, at kinaawaan. 

Paano tayo dapat tumugon? Paghandaan natin ang Kaniyang pagdating. Patunayan natin ang ating pag-ibig, pag-asa, pananalig, at pagsamba sa Diyos. Ihanda natin ang ating mga sarili para sa pagdating ng Poong Jesus Nazareno. Pagkakataon natin ito upang mapatunayan ang ating tapat na pag-ibig, pag-asa, pananalig, at pagsamba sa butihing Panginoon. Pagdating ng Poong Jesus Nazareno, ano ang Kaniyang makikita sa ating mga puso, isipan, at loobin? 

May darating. Darating ang tunay na nagmamahal sa atin na walang iba kundi ang tunay at walang hanggang Diyos at Hari, ang Panginoong Jesus Nazareno. Bagamat hindi naman Niya kailangang gawin ito, ipinasiya pa rin Niya itong gawin dahil tunay Niya tayong minamahal, kinahahabagan, at kinaawaan. Kung ang bawat isa sa atin ay iniibig ng Mahal na Poong Jesus Nazareno kahit na hindi tayo karapat-dapat, Siya rin ba ay ating iniibig? Tayong lahat ay binibigyan Niya ng pagkakataong patunayan ito. Ang mga pagkakataong ito na ibinibigay Niya sa atin ay hindi dapat sayangin.

DAHILAN NG PASASALAMAT

8 Disyembre 2023 

Dakilang Kapistahan ng Kalinis-Linisang Paglilihi sa Mahal na Birheng Maria 

Genesis 3, 9-15. 20/Salmo 97/Efeso 1, 3-6. 11-12/Lucas 1, 26-38

This faithful photographic reproduction of the painting (c. Between 1600 and 1699) The Immaculate Conception of the Virgin by Bartolomé Esteban Murillo (1617–1682), as well as the actual work of art itself from the National Gallery in London via Art UK, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. The work is in the Public Domain in the United States because it was published (or registered with the U.S. Copyright Office) before January 1, 1928. 

Ang araw na ito ay napakahalaga para sa buong Simbahan sa Pilipinas sapagkat ipinagdiriwang natin nang buong galak bilang isang sambayanan sa araw na ito ang Dakilang Kapistahan ng Pangunahing Pintakasi ng Bansang Pilipinas na walang iba kundi ang Mahal na Inang si Mariang Birhen, ang Inmaculada Concepcion. Hindi para lamang sa mga Simbahan na kung saan ang Mahal na Inang si Maria sa ilalim ng titulong Virgen de la Inmaculada Concepcion ay itinalaga bilang pintakasi kundi para sa buong Republika ng Pilipinas. Ang pagdiriwang sa araw na ito ay para sa lahat sa buong bansang kilala sa opisyal nitong pangalan na Republika ng Pilipinas. 

Sa araw na ito na inilaan para sa maringal na pagdiriwang ng Dakilang Kapistahan ng Kalinis-linisang Paglilihi sa Mahal na Birheng Maria, tayong lahat ay buong galak at ligayang nagpapasalamat sa Diyos sa biyaya ng Kaniyang kagandahang-loob, pag-ibig, habag, at awa para sa ating lahat na siyang dahilan kung bakit ito nangyari. Kung tutuusin, hindi naman nakasentro sa Mahal na Inang si Mariang Birhen ang maringal na pagdiriwang sa araw na ito. Bagkus, nakasentro ito sa Diyos. Sa sandaling ito, ang Diyos ay kumilos. Bago pa man isilang ng kaniyang inang si Santa Ana, ang Mahal na Birheng Maria na Ina ng Simbahan ay iniligtas ng Diyos mula sa bahid ng kasalanan upang magkaroon ng isang nararapat na pananahanan ang ipinangakong Mesiyas na walang iba kundi ang Nuestro Padre Jesus Nazareno. Hindi ito sariling gawa ni Maria mismo kundi isa itong kahanga-hangang gawa ng Panginoong Diyos. 

Isang pahiwatig nito ay ang pagsugo ng Diyos kay Arkanghel San Gabriel sa Nazaret sa salaysay sa Ebanghelyo. Sinong mag-aakalang isang dalagang namumuhay nang payak sa Nazaret ang inatasan ng Diyos upang maging ina ng ipinangakong Mesiyas at Manunubos? Wala. Tiyak na inaaasahan ng nakararami na magmumula sa isang mayaman at marangyang pamilya si Kristo. Ang Panginoong Diyos lamang ang bukod tanging nakakaalam nito dahil Siya mismo ang nagplano at gumawa nito. Kung hindi nahayag ito, mananatiling lihim ang bahaging ito ng plano ng Panginoong Diyos na butihin. Dahil rin sa kalooban ng Diyos, nahayag rin sa atin ang plano Niyang ito.

Bagamat nalugmok ang tao sa kasalanan matapos suwayin nina Adan at Eba ang utos ng Diyos na huwag kainin ang ipinagbabawal na bunga, niloob pa rin ng Diyos na iligtas ang sangkatauhan. Inihayag ng Diyos sa Unang Pagbasa kung paano Niya ito gagawin. Ang biyaya ng pagliligtas ng Diyos ay darating sa mundo sa pamamagitan ng isang babae. Subalit, sinong mag-aakalang ang babae sa pahayag ng Panginoong Diyos sa Unang Pagbasa para sa araw na ito ay isang dalagang namumuhay nang payak sa bayang tinatawag na Nazaret? Wala. Tanging ang Diyos lamang dahil Siya mismo ang bumuo ng planong ito at tumupad nito sa panahong Kaniyang itinakda. 

Hindi naman kinailangang gawin ng Diyos ang planong ito. Kung ninais lamang Niya, maaari na lamang Siya magpakasarap sa langit at pabayaang tuluyang mapahamak ang sangkatauhan dahil sa pagkalugmok sa kasalanan. Subalit, ipinasiya Niya tayong iligtas. Ang dahilan ay inilarawan sa Salmong Tugunan para sa araw na ito. Dahil sa dakilang habag at awa ng Diyos, ipinasiya Niyang gawin ito (Salmo 97, 1). Bagamat labis Siyang nasaktan dahil sa pagtalikod at pagsuway ng sangkatauhan, nanaig pa rin ang dakilang pag-ibig, kagandahang-loob, habag, at awa ng Diyos. 

Nakasentro rin sa dakilang pag-ibig, kagandahang-loob, habag, at awa ng Diyos para sa atin ang pangaral ni Apostol San Pablo sa Ikalawang Pagbasa. Dahil sa Kaniyang dakilang pag-ibig, kagandahang-loob, habag, at awa, niloob ng Panginoong Diyos na maging bahagi tayo ng Kaniyang pamilya. Ipinasiya Niyang angkinin at ituring bilang Kaniyang mga anak ang bawat isa sa atin (Efeso 1, 4-5). Ang katibayan nito ay ang pagtubos Niya sa atin sa pamamagitan ni Kristo, ang Poong Jesus Nazareno. 

May Inmaculada Concepcion dahil sa dakilang pag-ibig, kagandahang-loob, habag, at awa ng Diyos. Ipinapaalala ng Kalinis-linisang Paglilihi sa Mahal na Birheng Maria sa bawat isa sa atin na tayo ay tunay ngang kinahahabagan, kinaawaan, at iniibig ng Diyos. Dahil sa dakilang pag-ibig, kagandahang-loob, habag, at awa ng Diyos, tayong lahat ay ipinasiya Niyang iligtas. Kaya naman, marapat lamang na pasalamatan natin Siya nang buong galak at tuwa. 

ALPHA AT OMEGA (SIMULA AT WAKAS)

3 Disyembre 2023 

Unang Linggo sa Panahon ng Pagdating ng Panginoon [B] 

Isaias 63, 16b-17. 19b; 64, 2b-7/Salmo 79/1 Corinto 1, 3-9/Marcos 13, 33-37 

This faithful photographic reproduction of the painting (c. 1557) The Last Judgment by Hubert Goltzius (1526–1583), as well as the actual work of art itself from the Limburgs Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Ang Linggong ito ay ang unang araw ng isang panibagong taon at siklo sa Kalendaryo ng Simbahan. Sa sekular na kalendaryo, ang isang panibagong taon ay nagsisimula pagsapit ng unang araw ng Enero. Katunayan, pagsapit ng bisperas ng Bagong Taon, inaabangan ng maraming tao na sumapit ang ika-12 ng hatinggabi ng unang araw ng Enero. Hindi nga sila natutulog sapagkat nais nilang salubungan ang bagong taon. Sa tuwing sasapit naman ang Unang Linggo sa Panahon ng Pagdating ng Panginoon na mas kilala ng maraming Katoliko bilang panahon ng Adbiyento, isang bagong taon at siklo sa Kalendaryo ng Simbahan ay nagsisimula. 

Iyon nga lamang, marahil mapapataas ng kilay ang karamihan sa Linggong ito. Kung sinisimulan ng Simbahan ang isang panibagong taon at siklo sa Linggong ito, ang Unang Linggo ng Adbiyento, bakit nakasentro sa mga magaganap sa katapusan ng panahon ang mga salitang binigkas ng Mahal na Poong Jesus Nazareno sa Banal na Ebanghelyo? Bakit ipinasiya ng Simbahan na talakayin at pagnilayan ang pagdating ng Poong Jesus Nazareno bilang Hari at Hukom sa wakas ng panahon sa Linggong ito kung kailan sinisimulan ng Simbahan ang isang panibagong taon at siklo? Bukod pa roon, ilang araw at sanlinggo na rin lamang ang natitira bago ipagdiwang nang buong ligaya ang Kapaskuhan na kilala rin sa opisyal na pangalan nito na walang iba kundi ang Dakilang Kapistahan ng Pasko ng Pagsilang ng Panginoon, ang Nuestro Padre Jesus Nazareno. Kakaiba ang pasiyang ito ng Simbahan. 

Lingid sa kaalaman ng nakararami, ang salitang "Adbiyento" ay nangangahulugang "Pagdating." Hindi lamang ang unang pagdating ng Poong Jesus Nazareno noong gabi ng unang Pasko ang nais talakayin at pagnilayan sa panahong ito. Bagkus, nais ring talakayin at pagnilayan ng Simbahan ang ikalawa't muling pagdating ng Panginoong Jesus Nazareno bilang Dakilang Hari at Hukom sa wakas ng panahon. Katunayan, ang Mahal na Poong Jesus Nazareno na rin mismo ang nagsabing muli Siyang babalik sa wakas ng panahon, gaya ng nasasaad sa Ebanghelyo. Subalit, sabi rin ng Señor na ang Ama lamang ang tanging nakababatid kung kailan ito magaganap (Marcos 13, 32). Dahil dito, sabi ng Mahal na Poong Jesus Nazareno sa Ebanghelyo nang paulit-ulit: "Maging handa kayo!" (Marcos 13, 37). 

Bakit natin dapat paghandaan ang pagdating ng Nuestro Padre Jesus Nazareno? Siya na rin mismo ang nagsabi kung bakit ito ang dapat nating gawin bilang Kaniyang mga tapat na deboto at tagasunod: "Ngayon, binabago Ko ang lahat ng bagay" (Pahayag 21, 5). Pagdating ng Poong Jesus Nazareno, babaguhin Niya ang lahat. Oo, hindi natin maipagkakailang maraming magagandang bagay sa mundo, subalit, mas maganda ang magiging kapalit dahil ang magbabago nito ay walang iba kundi ang Panginoong Jesus Nazareno. Kung paanong binago ng Poong Jesus Nazareno ang mundo noong una Siyang dumating, muli Niyang babaguhin ito sa muli Niyang pagdating. Kapag isinagawa na Niya ito, mawawala na nang tuluyan ang lahat ng luha, hapis, sakit, dalamhati, at kamatayan (Pahayag 21, 4). 

Katulad ni Propeta Isaias sa Unang Pagbasa, ng mang-aawit sa Salmong Tugunan, at ni Apostol San Pablo sa Ikalawang Pagbasa, na nagpahayag ng kanilang pag-asa sa Panginoong Diyos, dapat rin tayong manalig at umasa sa Panginoon. Hindi Niya tayo bibiguin. Isang patunay ng ating tapat na pananalig, pagsamba, paglilingkod, at pag-asa sa Panginoon ay ang mabusising paghahanda para sa Kaniyang pagdating. Isang misteryo para sa atin ang takdang araw at oras ng pagdating ng Panginoon na tangi nating tapat nating inaaasahan, pinananaligan, at sinasamba. Dahil dito, hindi natin dapat sayangin ang mga pagkakataong ibinibigay sa atin ng Panginoon upang ating mapaghandaan ang Kaniyang pagdating. Bilang tao, hindi natin alam kung kailan nga ba ito magaganap, subalit mainam na rin na ngayon pa lamang ay paghandaan na natin iyon. Tandaan, hindi matatagpuan ang walang hanggan sa mundong ito. Huwag rin nating kakalimutan pansamantala rin ang ating buhay sa mundong ito.

Sa pagwawakas ng isang bagay, mayroong isang bagay na magsisimula. Ito ang nais ipaalala sa atin ng Simbahan sa Unang Linggo ng Adbiyento. Pagdating ng Mahal na Poong Jesus Nazareno, magkakaroon ng isang panibagong simula. Bilang Kaniyang mga tapat na deboto at tagasunod, dapat natin itong paghandaan nang may tuwa, galak, pananalig at pag-asa sa Kaniya.  

MAHIWAGANG ORAS

1 Disyembre 2023 

Biyernes ng Ika-34 o Huling Linggo sa Karaniwang Panahon (I) 

Daniel 7, 2-14/Daniel 3/Lucas 21, 29-33 

SCREENSHOT: Quiapo Church - One of the Hourly Masses during the celebration of the Traslacion 2019 (Facebook and YouTube) 

Ang mga Pagbasa para sa huling Biyernes sa Kalendaryo ng Simbahan ay nakatuon sa paksa ng katapusan. Habang napapalapit ang Simbahan sa wakas ng isang taon at sa simula ng isang panibagong taon, muli tayong pinaalalahanan ng Simbahan na hindi matatagpuan sa mundong ito ang walang hanggan. Mayroong hangganan o wakas ang lahat ng bagay dito sa mundong ito. Kaya naman, habang patuloy tayong namumuhay at naglalakbay nang pansamantala sa mundong ito, dapat nating paghandaan ang kabilang buhay kung saan matatagpuan natin ang walang hanggan. 

Sa Unang Pagbasa, inilarawan ng Propetang si Daniel ang kaniyang mga nakita sa isang pangitain. Puno ng kadakilaan ang kaniyang mga nakita sa nasabing pangitain. Nakita niya ang aniya'y "isang nabubuhay magpakailanman" (Daniel 7, 9). Inihayag sa Salmong Tugunan ang pagkakilanlan ng mahiwagang nabubuhay magpakailanman - ang Diyos ng mga Hukbo. Tanging ang Panginoong Diyos lamang ang mabubuhay magpakailanman. Walang hanggan ang paghahari ng Diyos. Sa piling ng Panginoon lamang matatagpuan ang walang hanggan. Magwakas man ang mundong ito, mananatili pa rin ang Diyos. Sa Ebanghelyo, isinentro ng Poong Jesus Nazareno ang Kaniyang pangaral sa katotohanang ito. Darating muli ang Mahal na Poong Jesus Nazareno, ang tunay at walang hanggang Diyos, bilang dakilang Hari at Hukom. Ito ang lagi nating dapat tandaan at paghandaan bilang Kaniyang Simbahan.

Darating muli ang tunay at walang hanggang dakilang Hari, Pari, at Hukom na walang iba kundi ang Nuestro Padre Jesus Nazareno sa wakas ng panahon. Walang sinuman sa atin ang nakababatid kung kailan. Subalit, lagi tayong pinaalalahanan na mangyayari ito pagdating ng panahon. Ang tanong para sa atin sa araw na ito, ang katotohanang ito ay lagi ba nating itatapat at iingatan sa ating mga puso at isipan upang puspusan natin ito mapaghahandaan? Kapag dumating ang Nuestro Padre Jesus Nazareno, ano kaya ang Kaniyang mahahanap sa ating mga puso? 

ISANG PAANYAYA MULA KAY KRISTONG HARI

26 Nobyembre 2023 

Dakilang Kapistahan ng Pagkahari ng Panginoong Hesukristo, ang Nazareno, sa Sanlibutan (A) 

Ezekiel 34, 11-12. 15-17/Salmo 22/1 Tesalonica 15, 20-26.28/Mateo 25, 31-46 

This faithful photographic reproduction of the painting (Unknown date) Crucifixion of Christ by 

Piero di Cosimo (1462–1522), as well as the actual work of art itself from the Museum of Fine Arts, Budapest, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or older due to its age. This work is in the Public Domain in the United States because it was published (or registered with the U.S. Copyright Office) before January 1, 1928.

Marami ang mga naging hari o pinuno sa mundong ito. Ang kasaysayan ng mundong ito ang magpapatunay ng katotohanang ito. Mayroong mga naging mabuting hari o pinuno at mayroon ring mga hindi naging mabuti bilang hari o pinuno. Subalit, batid rin nating walang sinumang hari o pinuno ay nanatili sa posisyon magpakailanman. Oo, maraming naghari o namuno sa loob ng mahabang panahon, subalit wala ni isa sa kanila ang nanatili bilang hari o pinuno magpakailanman. Ang magpapatunay ng katotohanang ito ay ang kasaysayan na rin mismo. 

Sa huling Linggo ng Kalendaryo ng Simbahan, pinaalalahanan tayo ng Simbahan na isa lamang ang mananatiling Hari magpakailanman. Naghari Siya noon pa mang una. Patuloy pa rin Siyang naghahari sa kasalukuyan. Sa wakas ng panahon, mananatili pa rin Siya bilang Hari. Mananatili pa rin Siyang Hari, ilang mga taon, dekada, o siglo ang lumipas. Walang hanggan ang Kaniyang paghahari. Ang tunay at walang hanggang dakilang Haring ito ay walang iba kundi ang Panginoong Hesukristo, ang Nazareno. Kaya naman, ang huling Linggo ng Liturhikal na Kalendaryo ay inilaan ng Simbahan upang kilalanin, parangalan, at papurihan ang Poong Jesus Nazareno na Siyang tunay at walang hanggang dakilang Hari. 

Nakasentro sa mga katangian ng pagkahari ng Mahal na Poong Jesus Nazareno ang mga Pagbasa para sa Linggong ito. Sa Unang Pagbasa, ipinakilala Siya bilang Hari at Hukom. Sa Ikalawang Pagbasa, isinalungguhit ni Apostol San Pablo ang katotohanan kung bakit si Kristo ay naging Hari magpakailanman. Niloob ng Diyos na maghari si Jesus Nazareno magpakailanman. Ito ang tanging dahilan kung bakit ibinigay ng Ama sa Panginoong Jesus Nazareno ang kapangyarihan bilang tunay at walang hanggang dakilang Hari at Hukom. Sa Ebanghelyo, inilarawan ng Nuestro Padre Jesus Nazareno ang Kaniyang gagawin bilang Hari at Hukom sa wakas ng panahon. Ang mga tupa na sumasagisag sa mga banal, matutuwid, at mabuti ay Kaniyang pagkakalooban ng buhay na walang hanggan sa Kaniyang piling sa Kaniyang maluwalhating kaharian sa langit habang ang mga kambing naman na sumasagisag sa mga masasamang ayaw makinig sa Kaniyang tinig na nag-aanyaya sa kanila na pagsisihan at talikdan ang kanilang mga kasalanan at tahakin ang landas ng kabanalan ay papupuntahin Niya sa walang hanggang kaparusahan sa naglalagablab na apoy ng impiyerno. Tunay ngang mapalad ang mga tupang makakasama si Jesus Nazareno sapagkat tutuparin Niya roon ang mga salitang isinalungguhit sa Salmong Tugunan: "Pastol ko'y Panginoong D'yos, hindi ako magdarahop" (Salmo 22, 1). Ang mag-aalaga sa mga nagpasiyang mamuhay nang banal at kalugud-lugod sa paningin ng Diyos hanggang sa huli ay ang Poong Jesus Nazareno, ang tunay at ang walang hanggang dakilang Hari at Hukom. 

Bilang mga deboto ng Poong Jesus Nazareno, kinikilala, tinatawag, at pinararangalan natin Siya bilang ating Panginoon at Hari. Subalit, ang ating mga pagpaparangal sa Poong Jesus Nazareno bilang Panginoon at Hari ay atin bang isinasabuhay? Tandaan, hindi sapat na kilalanin, tawagin, at parangalan natin bilang ating Panginoon at Hari ang Poong Jesus Nazareno sa pamamagitan ng ating mga salita lamang. Kailangan rin natin itong isabuhay. Dapat natin itong ipakita sa ating mga gawa. Tanggapin ang Kaniyang paanyayang maging banal at kalugud-lugod sa Kaniyang paningin. Ang mga utos at loobin ng tunay na Panginoon at Haring si Jesus Nazareno ay dapat sundin at tuparin nang taos-puso at nang may kababaang-loob at pananalig sa Kaniya. 

Ipinapaalala sa atin ng Simbahan sa araw na ito na isa lamang ang tunay at walang hanggang dakilang Hari at Hukom - si Jesus Nazareno. Siya lamang at wala nang iba. Bilang Hari at Hukom, nais ng Poong Jesus Nazareno na makasama tayong lahat sa maluwalhati Niyang kaharian sa langit magpakailanman. Lagi Niyang ipinaparating sa atin ang Kaniyang paanyayang makasama Siya sa Kaniyang maluwalhating kaharian sa langit habang tayong lahat ay patuloy na namumuhay at naglalakbay dito sa lupa nang pansamantala lamang. Ano ang ating tugon sa paanyaya ni Kristong Hari na si Jesus Nazareno? Tatanggapin o babalewalain? 

TUNAY NA PARANGAL AT PAPURI SA DIYOS

24 Nobyembre 2023 

Paggunita kay san Andres Dung Lac, pari at martir, at mga Kasama, mga martir 

1 Macabeo 4, 36-37. 52-59/1 Mga Cronica 29/Lucas 19, 45-48 

SCREENSHOT: #QuiapoChurch 6:00 PM #OnlineMass • 15 November 2023 - Wednesday of the 32nd Week in Ordinary Time (Facebook and YouTube)

Ang temang nais talakayin at pagnilayan ng Simbahan sa araw na ito ng Biyernes na inilaan para sa taimtim na debosyon at pamamanata kay Kristo, ang Mahal na Poong Jesus Nazareno, ay mababasa sa Salmong Tugunan. Nasusulat sa Salmong Tugunan para sa araw na ito: "D'yos, aming papupurihan ang 'Yong dakilang Pangalan" (1 Mga Cronica 29, 13b). Sa pamamagitan ng pagtalakay at pagninilay sa mga salitang ito, muli tayong tinuturuan at pinaalalahanan ng Inang Simbahan na dapat maging tunay, tapat, at taos-puso ang ating pag-aalay ng parangal, papuri, at pagsamba sa Diyos sapagkat ito ang nararapat para sa Kaniya.  

Magkasalungat ang mga inilarawan sa Unang Pagbasa at Ebanghelyo. Tunay at taos-pusong parangal, papuri, at pagsamba sa Panginoong Diyos ang inialay ng mga tao sa Unang Pagbasa. Ang mga Hudyo sa Unang Pagbasa para sa araw na ito ay nag-alay ng papuri, parangal, at pagsamba sa Panginoong Diyos na Siyang dahilan kung bakit sila nagtagumpay laban kay Lisias. Taos-puso itong ginawa ng mga Hudyo na pinangunahan ni Judas Macabeo nang buong galak at tuwa. Subalit, taliwas nito ang inilarawan sa Ebanghelyo. Ito ang dahilan kung bakit labis na nagalit ang Poong Jesus Nazareno sa Ebanghelyo para sa araw na ito. Hindi nakasentro sa Diyos ang mga tao kundi sa salapi. Dahil sa salapi, kinalimutan na nila ang Panginoong Diyos at hindi na ginalang at pinahalagahan ang Kaniyang presensya. Sa halip na isipin ang Diyos, inisip ang salapi. Pinalitan ng mga tao ang Diyos sa sarili Niyang tahanan. Dahil dito, labis na nagalit ang Nuestro Padre Jesus Nazareno. 

Tayong lahat ay pinaalalahanan sa araw na ito na dapat maging tunay ang ating pag-aalay ng papuri, parangal, at pagsamba sa Diyos. Ito ang nararapat lamang nating gawin bilang mga Kristiyano. Ang Panginoong Diyos ay hindi natin dapat ipagpalit sa sinuman o anuman kailanman. Dapat Siya lamang ang maging Diyos at Hari ng ating buhay. Kaya naman, ialay natin ang buo nating sarili sa Kaniya. 

PAGKAKATAONG PURIHIN AT PARANGALAN ANG MAHAL NA POONG JESUS NAZARENO

19 Nobyembre 2023 

Ika-33 Linggo sa Karaniwang Panahon (A) 

Kawikaan 31, 10-13. 19-20. 30-31/Salmo 127/1 Tesalonica 5, 1-6/Mateo 25, 14-30 (o kaya: 25, 14-15. 19-21) 

This faithful photographic reproduction of the painting (c. 17th century) Parable of the Talents by Willem de Poorter (1608–1649/1668), as well as the actual work of art itself from the National Gallery Prague, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Ang mga Pagbasa para sa Linggong ito ay nakasentro sa layunin ng mga biyayang ipinagkaloob sa atin ng Panginoong Diyos. Ipinapaliwanag sa atin ng mga Pagbasa para sa Linggong ito kung bakit lagi tayong pinagkakalooban ng mga biyaya ng Diyos. Bagamat walang sinuman sa atin ay karapat-dapat sa mga biyayang kaloob ng Diyos dahil sa ating mga kasalanan bilang tao, niloob pa rin Niya tayong biyayaan. Ang ating mga abilidad at kakayanan bilang tao ay ilan lamang sa mga biyayang ipinagkaloob sa atin ng Panginoong Diyos. 

Inihayag sa wakas ng Unang Pagbasa kung ano ang dapat gawin ng lahat. Ang lahat ng mga papuri at parangal ay dapat ialay ng lahat sa Panginoong Diyos. Maaari itong gawin sa iba't ibang paraan. Nakatuon sa aral na ito ang talinghagang isinalaysay ng Mahal na Poong Jesus Nazareno sa Ebanghelyo. Isinalaysay ni Jesus Nazareno ang talinghaga tungkol sa mga aliping pinagkatiwalaan ng salapi sa Ebanghelyo para sa Linggong ito upang ituro sa lahat ang katotohanan tungkol sa mga talento, abilidad, at kakayanan ng bawat tao. Ang lahat ng iyon ay ipinagkaloob sa atin ng Diyos. Kaya, dapat nating gamitin ito sa kabutihan. Sa pamamagitan nito, naisasabuhay natin ang mga salitang malakas na binigkas mang-aawit sa Salmong Tugunan: "Mapalad ang sumusunod na taong may takot sa D'yos" (Salmo 127, 1a). Bukod pa roon, ginagawa rin natin ang bilin ni Apostol San Pablo sa wakas ng kaniyang pangaral sa Ikalawang Pagbasa. Ang bilin ni Apostol San Pablo para sa lahat ng mga Kristiyano sa wakas ng kaniyang pangaral sa Ikalawang Pagbasa ay dapat lagi tayong maging handa para sa muling pagdating ng Poong Jesus Nazareno sa wakas ng panahon na tanging Diyos Ama lamang ang nakakaalam kung kailan (1 Tesalonica 5, 6). 

Oo, batid ng Panginoong Diyos na hindi tayo karapat-dapat sa Kaniyang mga biyaya dahil sa ating mga kasalanan laban sa Kaniya bilang tao. Subalit, dahil sa Kaniyang pag-ibig, kagandahang-loob, habag, at awa para sa atin, niloob pa rin ng Panginoong Diyos na biyayaan tayo upang maihanda natin ang ating mga sarili para sa buhay na walang hanggan sa Kaniyang piling sa langit magpakailanman. 

Habang patuloy tayong namumuhay at naglalakbay sa mundong ito, tayong lahat ay laging binibigyan ng pagkakataong mag-alay ng papuri at parangal sa Nuestro Padre Jesus Nazareno. Magagawa natin ito sa pamamagitan ng mga biyayang ipinagkaloob sa atin ng Diyos. Huwag nating sayangin ang mga biyayang ito. 

ISA LAMANG ANG TUNAY NA HARI

17 Nobyembre 2023 

Biyernes ng Ika-32 Linggo sa Karaniwang Panahon (I) 

Karunungan 13, 1-9/Salmo 18/Lucas 17, 26-37 

SCREENSHOT: #QuiapoChurch Official 5AM #OnlineMass #QuiapoDay • 11 Nov. 2023 • #SaintLeoTheGreat (YouTube and Facebook)

Ang mga Pagbasa para sa araw na ito ng Biyernes, ang araw na inilaan ng Simbahan para sa taimtim na debosyon at pamamanata sa Mahal na Poong Jesus Nazareno, ay nakasentro sa Kaniyang pagkakilanlan bilang tunay na Hari. Walang ibang hari kundi Siya lamang. Siya lamang ang tunay at walang hanggang Hari. Ito ang katotohanang dapat malaman ng tanan. 

Sa Unang Pagbasa, malakas na inihayag ng manunulat ng Aklat ng Karunungan na dapat makilala ng lahat sa mundong ito ang tunay na Hari na walang iba kundi ang Panginoong Diyos. Tanging Siya lamang ang maghahari magpakailanman. Kung ang mga hari sa mundong ito ay pansamantalang maghahari, ang paghahari ng Diyos ay walang hanggan. Dahil diyan, inihayag nang malakas sa simula ng Unang Pagbasa: "Napakahangal ang mga taong hindi nakakikilala sa Diyos" (Karunungan 13, 1). Ito rin ang katotohanang pinagtuunan ng pansin ng mang-aawit sa Salmong Tugunan: "Ang langit ay nagdiriwang sa Panginoong marangal" (Salmo 18, 2a). Ito ang dapat nating tandaan sa araw-araw. Ang Diyos lamang ay ang tunay at walang hanggang Hari. Sa Ebanghelyo, isinalungguhit ng Poong Jesus Nazareno ang Kaniyang pagdating bilang dakilang Hari at Hukom sa wakas ng panahon. Darating muli ang Mahal na Poong Jesus Nazareno bilang Hari at Hukom sa wakas ng panahon, isang oras at panahong hindi kayang malaman ninuman kundi ang Ama. 

Muli tayong pinaalalahanan sa araw na ito. Ang Nuestro Padre Jesus Nazareno ay ang tunay at walang hanggang dakilang Hari. Siya lamang at wala nang iba. Ito ang katotohanang hindi natin dapat limutin kailanman. 

PINANANABIKAN BA NATIN SIYA?

12 Nobyembre 2023 

Ika-32 Linggo sa Karaniwang Panahon (A) 

Karunungan 6, 12-16/Salmo 62/1 Tesalonia 4, 13-18 (o kaya: 4, 13-14)/Mateo 25, 1-13 

This faithful photographic reproduction of the painting (c. 1616) Parable of the Wise and Foolish Virgins by Hieronymous Francken II (1578–1623), as well as the original work of art itself from the Hermitage Museum via the Web Gallery of Art, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Ang mga Pagbasa para sa Linggong ito ay nakasentro sa tema ng pananabik para sa Panginoon. Tayong lahat ay tinatanong ng Simbahan sa Linggong ito kung nananabik nga ba tayo para sa Panginoon. Sino o ano ang ating kinasasabikan? Ang Diyos nga ba o ibang bagay o ibang tao? Kanino o saan nga ba nating ilalaan at iaalay ang ating taos-pusong pananabik? Sa Panginoon ba o sa iba? Ito ang tanong para sa atin.

Inilahad sa Salmong Tugunan ang temang nais talakayin at pagnilayan ng Simbahan sa Linggong ito. Taos-pusong inihayag ng mang-aawit sa Salmong Tugunan: "Aking kinasasabikan, Panginoon, Ikaw lamang" (Salmo 62, 2b). Ang taos-pusong pananalig ng tampok na mang-aawit ng Salmo sa Diyos ay isinalamin ng mga salitang ito na buong lakas at pananalig niyang inihayag. Sa Panginoon lamang Siya nananalig at umaasa. Dahil dito, inihayag niyang nananabik lamang siya sa Panginoon. Isa lamang ang dahilan - hindi siya binigo ng Panginoong Diyos kailanman.

Sa Unang Pagbasa, inilarawan ang dahilan kung bakit ang Karunungan ng Diyos ay dapat panabikan. Ang Karunungang inilarawan sa Unang Pagbasa ay isang biyayang kaloob ng Diyos. Kapag tinanggap natin ang kaloob na ito ng Diyos, tayong lahat ay magkakaroon ng patnubay at gabay tungkol sa pamumuhay ayon sa Kaniyang mga utos at loobin. Tutulungan tayo ng Karunungan na mamuhay nang banal at kalugud-lugod sa paningin ng Diyos. Sa Ikalawang Pagbasa, inilarawan ni Apostol San Pablo ang biyayang ipagkakaloob ng Panginoon sa mga nananabik sa Kaniya nang taos-puso. Buhay na walang hanggan ang Kaniyang ipagkakaloob sa lahat ng mga tapat at taos-pusong nananabik sa Kaniya. Ang mga nananabik sa butihing Panginoong Diyos nang tapat at taos-puso ay yaong mga namumuhay nang banal at kalugud-lugod sa Kaniyang paningin. Sa Ebanghelyo, isinalaysay ng Nuestro Padre Jesus Nazareno ang talinghaga tungkol sa sampung dalaga. Ang talinghagang ito ay isinalaysay ng Poong Jesus Nazareno upang ituro ang tunay at taos-pusong pananabik sa Diyos. 

Habang tayong lahat ay namumuhay sa mundong ito nang pansamantala, tayong lahat ay inaanyayahang mamuhay nang banal at kalugud-lugod sa paningin ng Diyos. Pinaalalahanan rin tayo na lagi tayong kinasasabikan ng Diyos. Ang tanong, tayo rin ba ay nananabik sa Diyos. Kung ang Diyos ay nananabik para sa atin, Siya rin ba ang kinasasabikan natin?  

BILISAN ANG PAGKILOS

10 Nobyembre 2023 

Biyernes ng Ika-31 Linggo sa Karaniwang Panahon (I) 

Roma 15, 14-21/Salmo 97/Lucas 16, 1-8 

SCREENSHOT: #QuiapoChurch Official • 4AM #OnlineMass | 03 November 2023 - Friday, 30th Week in Ordinary Time (Facebook and YouTube) 

Marahil kakaiba ang aral na itinuturo ng Poong Jesus Nazareno sa Ebanghelyo para sa araw na ito ng Biyernes. Sa unang tingin, parang pinuri ng Poong Jesus Nazareno ang isinagawang pandaraya ng katiwala sa talinghagang Kaniyang isinalaysay sa Ebanghelyo. Tila kinukunsinti ng Poong Jesus Nazareno ang panloloko at pandaraya dahil sa ginawa Niyang ito. Iyon nga lamang, ang mismong panloloko at pandaya na ginawa ng katiwala sa talinghagang Kaniyang isinalaysay sa Ebanghelyo ay talaga nga bang pinupuri ng Poong Jesus Nazareno? Nakasentro nga ba sa gawaing ito na tunay nga namang nakakasuka ang mga papuri ng Poong Jesus Nazareno? 

Hindi nakasentro sa mismong gawain ng panloloko at pandaya ang papuri ng Mahal na Poong Jesus Nazareno sa wakas ng Ebanghelyo. Bagkus, nakasentro ito sa pag-iisip at pagkilos agad ng katiwala ito matapos ibalita sa kaniya ng mismo niyang amo mula sa kaniyang posisyon. Kahit hindi tama, gumawa siya ng paraan upang makuha ang loob ng ilan sa mga may utang sa dati niyang panginoon. Ang dati niyang amo ay kaniyang dinaya sa pamamagitan ng pagbabawas sa utang ng ilan sa mga may utang sa kaniya. Oo, madaya iyon, subalit epektibo para sa katiwalang ito na tinanggal ng dati niyang panginoon o amo dahil sa kaniyang pang-aabuso sa posisyon. 

Ang aral na itinuturo sa atin ng Poong Jesus Nazareno ay huwag magdalawang-isip tungkol sa pakikipagkasundo sa Diyos at kapwa. Dapat tayong kumilos ayon sa mga utos at loobin ng Diyos. Mamuhay tayo nang banal at kalugud-lugod sa paningin ng Diyos. Piliin nating maging mabuti at banal. Isabuhay natin ang lahat ng mga utos at loobin ng Diyos nang sa gayon ay maging daluyan tayo ng Kaniyang pag-ibig, awa, habag, at kagandahang-loob sa kapwa.

Sa Unang Pagbasa, si Apostol San Pablo ay nagpatotoo tungkol sa kaniyang papel at misyon bilang apostol at misyonero ni Kristo sa mga Hentil. Inilarawan niya kung ano ang dapat niyang gawin bilang apostol at misyonero ni Kristo sa mga Hentil. Bilang isang apostol at misyonero, kinailangan niyang kumilos agad upang makilala agad ng tanan ang Poong Jesus Nazareno. Sa Salmong Tugunan, inilarawan ang mabilis na pagkilos ng Panginoon alang-alang sa atin. Ipinagkaloob Niya sa lahat ang biyaya ng Kaniyang pagliligtas. Nang sumapit ang panahong Kaniyang itinakda, agad Niya itong ginawa sa pamamagitan ng Mahal na Poong Jesus Nazareno. 

Kung paanong kumilos agad ang Poong Jesus Nazareno alang-alang sa atin, dapat rin tayong kumilos agad. Dapat tayong kumilos agad upang maipakilala natin sa lahat ang Poong Jesus Nazareno. Huwag nating sayangin ang pagkakataong ito na bigay Niya sa atin. Bilisin natin ang pagkilos, katulad ng mabilis na pagkilos ng Poon. 

MGA ITINALAGANG TAHANAN NG DIYOS

9 Nobyembre 2023 

Kapistahan ng Pagtatalaga sa Palasyong Simbahan sa Laterano, Roma 

Ezekiel 47, 1-2. 8-9. 12/Salmo 45/1 Corinto 3, 9k-11. 16-17/Juan 2, 13-22 

This faithful photographic reproduction of the painting (c. 1585) "Expulsión de los mercaderes del Templo" (The Traders Cast out of the Temple) by Francesco Bassano the Younger  (1549–1592), as well as the actual work of art from the Museo del Prado collection, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. 

"Huwag ninyong gawing palengke ang bahay ng Aking Ama!" (Juan 2, 16). Ang mga salitang ito ay binigkas ng Poong Jesus Nazareno habang pinalalayas Niya mula sa Templo ang mga nagtitinda ng mga baka, mga tupa, at mga kalapati, at ang mga namamalit ng salapi. Subalit, hindi lamang para sa kanila ang mga salitang ito kundi para sa lahat. Katunayan, hindi rin lamang tungkol sa mga gusaling itinalaga bilang mga bahay-dalanginan ang mga salitang ito na binigkas ng Poong Jesus Nazareno. 

Ano ang nais ipahayag ng Mahal na Poong Jesus Nazareno sa pamamagitan ng mga salitang ito na Kaniyang binigkas sa Ebanghelyo para sa araw na ito? Tayong lahat ay mga tahanan ng Panginoong Diyos. Itinalaga Niya tayo upang maging Kaniyang mga pananahanan. Katulad ng sabi ni Apostol San Pablo sa Ikalawang Pagbasa, tayong lahat ay mga templo ng Diyos (1 Corinto 3, 16-17). Sa Unang Pagbasa, ang Templo ay inilarawan bilang isang daluyan. Ginamit rin ang larawan ng batis o daluyan sa Salmo upang ilarawan ang bayan ng Diyos. 

Tayong lahat ay mga templo ng Panginoong Diyos. Bagamat tayong lahat ay mga makasalananan, itinalaga Niya tayong lahat upang maging Kaniyang mga tahanan. Katunayan, noon pa man, ito na ang plano ng Diyos para sa atin. Nais ng Diyos na gawin tayong mga daluyan ng Kaniyang pag-ibig, kagandahang-loob, habag, at awa para sa lahat. Ito ang tanging dahilan kung bakit itinalaga tayo ng Panginoong Diyos bilang Kaniyang mga templo. Dahil sa katotohanang ito, sagrado tayo noon pa man. 

Noon pa mang una, tayong lahat ay mga banal. Oo, tayong lahat ay mayroong bahid at dungis ng kasalanan. Subalit, hindi ito nangangahulugang dapat na lamang nating ipagpatuloy ang ating makasalanang pamumuhay. Bagkus, dapat nating imulat ang mga mata, puso, at isipan natin sa katotohanan tungkol sa ating pagkakilanlan. Noon pa mang una, itinalaga na tayo ng Diyos upang maging Kaniyang mga templo. Kapag tayong lahat ay namulat sa katotohanang ito, gamitin natin ang pagkakataong bigay sa atin ng Diyos upang makapagsisi at makapagtalikod sa kasalanan at magbalik-loob at maging banal at kalugud-lugod sa Kaniyang paningin. 

Ipinapaalala sa atin ng Simbahan sa araw na ito na dapat tahakin natin ang landas ng kabanalan sapagkat ito ang nais ng Diyos para sa atin. Tayong lahat ay itinalaga Niya upang maging Kaniyang mga templo. Kaya naman, dapat nating ibigay sa Kaniya ang nararapat. Mamuhay tayo nang banal at kalugud-lugod sa paningin ng Panginoong Diyos bilang Kaniyang mga templo at tahanan.