ANG DAHILAN NG KALINISAN NG KANYANG PUSO

12 Hunyo 2021 

Paggunita sa Kalinis-linisang Puso ng Birheng Maria

Isaias 61, 9-11/1 Samuel 2/Lucas 2, 41-51 

Matapos ipagdiwang ang Dakilang Kapistahan ng Mahal na Puso ni Hesus, nakatuon ang pansin ng Simbahan sa Kalinis-linisang Puso ni Maria. Ang araw kasunod ng Dakilang Kapistahan ng Kamahal-mahalang Puso ni Hesus, isang araw ng Sabado, ay inilaan ng Simbahan upang pagnilayan ang Kalinis-linisang Puso ng Birheng Maria. Sa araw na ito, inaanyayahan ng Simbahan ang bawat isa sa atin na pagnilayan ang dahilan kung bakit ang Puso ng Mahal na Ina ay dalisay, busilak, malinis. 

Isa lamang ang dahilan kung bakit malinis, dalisay, o busilak ang Puso ng Mahal na Ina. Ang pagiging dalisay at malinis ng Puso ng Mahal na Birhen ay isang gawa ng Diyos. Walang kakayahan ang Mahal na Inang si Maria upang gawing malinis at busilak ang kanyang Puso. Hindi niya kayang gawin iyon sa ganang sarili lamang niya. Bagkus, isa itong gawa ng Diyos. Dahil sa Panginoong Diyos, ang Puso ng Mahal na Ina ay naging tunay na malinis o dalisay. Hindi kayang gawin ni Maria sa sarili niyang puso ang paglilinis o pagdalisay tulad ng ginawa ng Diyos. Ang Puso ng Mahal na Birheng Maria ay nilinis, dinalisay, binusilak ng mismong Panginoong Diyos na tunay niyang iniibig at sinasamba. 

Kaya naman, sabi sa wakas ng salaysay sa Ebanghelyo na iningatan ng Mahal na Birheng Maria ang lahat ng bagay sa kanyang puso (Lucas 2, 51). Ang mga bagay na nauukol sa kanyang Anak na si Hesus, katulad na lamang ng tatlong araw na Siya'y nawala, ay iningatan ni Maria sa kanyang puso. Ang mga bagay tungkol sa kalooban ng Diyos ay iningatan ng Mahal na Ina sa kanyang puso. Hindi man niya maintindihan nang lubusan ang kalooban ng Diyos, iningatan pa rin niya ito sa kanyang puso. Tinanggap at sinunod pa rin niya ang mga nais ng Diyos. Ang pagiging bukas ng Mahal na Birheng Maria sa Diyos at pagtanggap sa Kanyang kalooban ay tanda ng kanyang pahintulot na linisin at dalisayin ng Panginoong Diyos ang kanyang puso. 

Ang pagliligtas ng Panginoong Diyos sa Kanyang bayang hinirang ay binanggit sa Unang Pagbasa (Isaias 61, 11). Ano naman ang koneksyon ng pagligtas ng Diyos sa pagdalisay Niya sa tao? Sa pamamagitan ng pagligtas ng Diyos, ang lahat ay Kanyang dinalisay at nilinis. Ang lahat ng mga iniligtas ng Panginoon ay nilinis Niya. Dinalisay ng Diyos ang lahat ng Kanyang mga iniligtas. Si Maria ay isang halimbawa. Dahil sa pagligtas ng Diyos sa kanya sa sandali ng paglihi sa kanya sa sinapupunan ni Santa Ana, naging malinis, dalisay, ang Puso ng ating Mahal na Birheng Maria. 

Gaya ng Mahal na Birheng Maria, maging bukas tayo sa kalooban ng Diyos at hayaan natin Siyang maghari sa ating buhay. Hayaan natin ang Diyos na linisin at dalisayin ang ating mga puso. Hayaan nating tuparin ng Diyos ang Kanyang kalooban. Tanggapin at sundin natin ang Kanyang kalooban. Kapag ginawa natin iyon, magiging tunay na busilak, dalisay, malinis ang ating mga puso. Sa gayon, buong puso tayong makakapagbigay ng papuri at pagsamba sa kaisa-isang Panginoong nagligtas at dumalisay sa atin. Kasama nating nagpupuri at umaawit sa Panginoon ang ating Mahal na Inang si Maria at ang lahat ng mga anghel at banal sa langit. 

KALIGTASANG BUNGA NG PAG-IBIG

11 Hunyo 2021 

Dakilang Kapistahan ng Kamahal-Mahalang Puso ni Hesus (B) 

Oseas 11, 1. 3-4. 8k-9/Isaias 12/Efeso 3, 8-12. 14-19/Juan 19, 31-37 

Isa sa mga masisikat na anime na ipinalabas noong 2000s ay walang iba kundi ang Death Note. Katulad ng maraming anime, hango ito sa isang manga. Ang kuwento ng Death Note ay nakasentro sa isang napakatalinong estudyante na pumapasok sa isang mataas na paaralan. Ang pangalan ng estudyanteng ito ay Light Yagami. Isang araw, nakahanap siya ng isang itim na kuwaderno sa labas ng paaralang pinapasukan niya. Nang basahin niya ang nakasulat sa itim na kuwadernong ito, ang Death Note, naisip niyang subukang gamitin ito upang matiyak niya kung totoo nga ba ito o hindi. Matapos niyang subukang gamitin ang itim na kuwadernong ito sa pamamagitan ng pagsusulat ng mga maliliit na kriminal, nalaman niyang totoo nga ang kapangyarihang ito. Nalaman din niyang nahulog ito mula sa mundo ng mga Shinigami (diyos ng kamatayan). Ang may-ari ng kuwadernong ito na naglaglag nito mula sa mundo ng mga Shinigami ay isang Shinigami na kilala bilang Ryuk. Ang dahilan raw kung bakit inilaglag ni Ryuk ang itim na kuwadernong ito sa mundo ng mga tao ay dahil nais niyang magkaroon ng libingan. 

Madali lamang gamitin ang Death Note. Kailangan lamang isulat sa nasabing kuwaderno ang pangalan ng isang tao. Mamamatay ang taong iyon sa loob ng apatnapung segundo matapos maisulat ang kanyang pangalan sa kuwadernong iyon. Pati nga ang sanhi ng kanyang pagkamatay ay maaari ring isulat. Kapag naisulat ang dahilan o sanhi ng pagkamatay ng isang tao, iyon ang mangyayari. Subalit, kapag naisulat ang pangalan ng isang tao ngunit ang sanhi o dahilan ng kanyang pagkamatay, ang magiging sanhi ng kanyang pagkamatay ay atake sa puso. Ang Death Note ay ginamit ni Light upang "lumikha" ng isang panibagong mundo kung saan umiiral lamang ang kabutihan. Sinikap niyang gawin ito sa pamamagitan ng pagsusulat ng mga pangalan ng mga kriminal sa Death Note upang sila'y mamatay. Dahil dito, si Light ay binansagang "Kira" ng karamihan, bagamat hindi nila alam kung ano ang kanyang itsura. Hindi lamang iyan. Nag-ambisyon pa si Light na maging diyos ng bagong mundo na kanyang "likha." Siya lamang ang masusunod. Siya ang katarungan. Siya ang diyos. Itatalaga niya ang kanyang sarili bilang diyos at pinuno ng mundong ito. 

Sa pagdiriwang ng Dakilang Kapistahan ng Kamahal-mahalang Puso ni Hesus, nakatuon ang pansin ng Simbahan sa misteryo ng dakilang pag-ibig ng Diyos para sa sangkatauhan. Kung binalak o ninais ng mga nag-ambisyong maging diyos, katulad na lamang ni Light Yagami ng Death Note, na lipulin ang lahat ng mga masasamang tao sa mundo, ang hangad ng Panginoong Diyos ay iligtas ang lahat ng tao dahil sa Kanyang dakilang pag-ibig. Sa halip na karahasan at lagim ang ipinalaganap ng Diyos, ang ipinapalaganap ng Diyos ay ang Kanyang tunay at dakilang pag-ibig. Ito ang sinasagisag ng Mahal na Puso ni Hesus. 

Ang Diyos mismo ang nagsabi sa Unang Pagbasa na hindi Siya naparito upang magwasak (Oseas 11, 9). Hindi paglipol ang dahilan ng pagparito ng Diyos sa pamamagitan ni Kristo. Bagkus, naparito Siya upang iligtas ang sangkatauhan dahil sa Kanyang dakilang pag-ibig para sa lahat. Kaya nga, sabi ng Diyos sa Unang Pagbasa na malasakit at awa ang nanaig sa Kanyang Puso (Oseas 11, 8k). Ito ang dahilan kung bakit nangyari ang kaganapang tampok sa salaysay sa Ebanghelyo na walang iba kundi ang pagpapakasakit at pagkamatay ni Hesus sa krus. Si Hesus ay namatay sa krus upang iligtas ang sangkatauhan dahil ang Kanyang pag-ibig para sa lahat ay tunay at dakila. 

Dahil sa pag-ibig na ito ng Panginoong Diyos na tunay ngang dakila at walang hanggan, hinirang Niya si Apostol San Pablo at ang iba pang mga apostol at ang mga humalili sa kanila upang ipalaganap ang Mabuting Balita ng kaligtasan. Sabi nga ni Apostol San Pablo sa simula ng Ikalawang Pagbasa na siya "ang pinakahamak sa mga hinirang ng Diyos" (Efeso 3, 8). Subalit, pinili pa rin siya ng Diyos upang ipangaral sa lahat ang Magandang Balita ng kaligtasan. Ang biyaya ng pagliligtas ng Diyos na bunga ng Kanyang pag-ibig para sa lahat. Isa si Apostol San Pablo sa mga pinili at hinirang ng Diyos upang ipangaral sa lahat ang Mabuting Balita ng kaligtasan. Sa pamamagitan nito, ipinapakilala nila ang Panginoon bilang Diyos na puspos ng pag-ibig at awa para sa lahat. 

Tunay at dakila ang pag-ibig ng Diyos. Ang biyaya ng kaligtasan ay bunga ng Kanyang pag-ibig para sa lahat. Ipinagkaloob Niya ang biyayang ito sa atin sa pamamagitan ng Panginoong Hesukristo. Ibinigay Niya sa atin si Hesus upang maging ating Tagapagligtas dahil sa Kanyang dakilang pag-ibig para sa atin. Ito ang tunay na ninais ng Panginoon. Ito ang tunay na lamang ng Kanyang Puso. Hindi Niya nais na mapahamak tayo. Nais Niya tayong iligtas dahil tunay ngang dakila ang Kanyang pag-ibig para sa atin. Ito ang ipinapaalala sa atin ng Mahal na Puso ni Hesus. 

TUNAY ANG KANYANG PRESENSYA

6 Hunyo 2021 

Dakilang Kapistahan ng Kabanal-banalang Katawan at Dugo ng Panginoon (B) 

Exodo 24, 3-8/Salmo 115/Hebreo 9, 11-15/Marcos 14, 12-16. 22-26 

Napakalinaw kung saan nakatuon ang pansin ng Simbahan sa pagdiriwang ng Dakilang Kapistahan ng Kabanal-banalang Katawan at Dugo ng Panginoong Hesukristo. Inilaan ng Simbahan ang araw na ito upang bigyan ng pansin ang tunay na presensya ng Panginoong Hesukristo sa Banal na Eukaristiya. Ang presensya ni Hesus sa Banal na Eukaristiya ay tunay. Ang Eukaristiya ay hindi lamang isang simbolo o sagisag ni Hesus. Bagkus, ang Banal na Eukaristiya ay ang mismong presensya ng ating Panginoon at Tagapagligtas na si Kristo. 

Mismong si Hesus ang nagsabi sa Ebanghelyo para sa araw na ito kung saang isinalaysay ang pagkakatatag sa Sakramento ng Banal na Eukaristiya sa Huling Hapunan na ang tinapay at alak ay ang Kanyang Katawan at Dugo (Marcos 14, 22-24). Ito ang basehan ng ating paniniwala bilang isang Simbahan sa tunay na presensya ng Panginoon sa Banal na Eukaristiya. Siya na mismo ang nagsabi na ang tinapay at alak sa pagdiriwang ng Banal na Eukaristiya ay ang Kanyang Katawan at Dugo. Hindi sinabi ni Kristo na ang tinapay at alak ay mga sagisag lamang. Bagkus, ang tinapay at alak sa Eukaristiya ay ang Kanyang Katawan at Dugo. Literal ang Kanyang presensya sa Eukaristiya. 

Ibinibigay ni Hesus ang Kanyang Katawan at Dugo sa Eukaristiya bilang ating espirituwal na pagkain at inumin. Si Hesus, na ipinakilala sa Ikalawang Pagbasa bilang Dakilang Saserdote, ay nagbibigay ng Kanyang Katawan at Dugo upang maging ating pagkain at inumin na ating pinagsasaluhan sa Banal na Misa. Isa lamang ang dahilan kung bakit ibinigay ni Hesus ang Kanyang sarili bilang tunay na pagkain at inumin sa pagdiriwang ng Banal na Misa. Iyon ay walang iba kundi ang Kanyang habag at pag-ibig para sa atin. Kung paanong paulit-ulit na pinili ng Panginoong Diyos na makipagtipan sa bayang Israel, tulad na lamang ng isinalaysay sa Unang Pagbasa kung saan ibinigay Niya ang Kanyang mga utos sa kanila sa pamamagitan ni Moises, dahil sa Kanyang habag at pag-ibig, ipinasiya ni Hesus na ibigay ang Kanyang Katawan at Dugo upang maging ating pagkain at inuming espirituwal sa Banal na Misa, sa kabila ng ating pagiging makasalanan, dahil sa Kanyang habag at pag-ibig. 

Ang presensya ni Hesus sa Banal na Eukaristiya ay tunay. Ibinibigay ni Hesus na tunay ngang nasa Eukaristiya ang Kanyang Kabanal-banalang Katawan at Dugo upang maging ating espirituwal na pagkain at inumin. Pinili Niyang gawin ito dahil sa Kanyang habag at pag-ibig. Lumipas man ang maraming panahon, hindi titigil si Hesus sa pagbibigay ng Kanyang sarili sa Banal na Eukaristiya. 

HINDI DAPAT SINASARILI

31 Mayo 2021 

Kapistahan ng Pagdalaw ng Mahal na Birheng Maria

Sofonias 3, 14-18 (o kaya: Roma 12, 9-16b)/Isaias 12/Lucas 1, 39-56 

"Sino ako upang dalawin ng ina ng aking Panginoon? Sapagkat pagkarinig ko ng iyong bati ay naggagalaw sa tuwa ang sanggol sa aking tiyan" (Lucas 1, 43-44). Ito ang mga salitang namutawi mula sa mga labi ni Elisabet nang dumating ang kanyang kamag-anak na walang iba kundi ang Mahal na Birheng Maria sa kanyang bahay upang dalawin siya sa salaysay sa Ebanghelyo. Inilarawan rin ng mga salitang ito ni Elisabet sa salaysay ng pagdalaw ng Mahal na Birhen sa Ebanghelyo ang dahilan kung bakit inilaan ng Simbahan ang araw na ito upang gunitain at ipagdiwang ang pagdalaw ng Mahal na Birheng Maria sa kanyang kamag-anak na si Elisabet. 

Ang pagdalaw ng Mahal na Ina sa kanyang kamag-anak na si Elisabet ay isang napakahalagang sandali o kaganapan sa kasaysayan ng pagligtas ng Diyos sa sangkatauhan sa pamamagitan ng Panginoong Hesukristo. Sa mga sandaling ito, si Hesus na dinadala ni Maria sa kanyang sinapupunan ay nakilala ni San Juan Bautista na nasa loob ng sinapupunan ng kanyang inang si Elisabet. Ang presensya ng ipinangakong Mesiyas na si Hesus ay nakilala na ni San Juan Bautista. Iyon ang dahilan kung bakit ang sanggol na si San Juan Bautista ay gumalaw sa tuwa sa loob ng sinapupunan ni Elisabet. Ang presensya ni Kristo Hesus ay naghahatid ng tuwa sa lahat. 

Naghahatid ng galak at tuwa sa lahat ang presensya ng Panginoon. Iyon ang dahilan kung bakit ang panawagan ni propeta Sofonias sa Lungsod ng Sion sa Unang Pagbasa ay magalak. Ang Panginoong Diyos ay naghahatid ng galak at tuwa sa Israel. Pinapawi Niya ang ating lungkot, hapis, luha, at dalamhati. Oo, bahagi ng buhay natin bilang mga taong naglalakbay sa daigdig na ito ang lungkot, hapis, pagluha, at dalamhati. Subalit, ipinapaalala sa atin ng Diyos na hindi magtatagal ang mga ito. Darating ang panahon kung kailan papawiin Niya ang lahat ng ito sa atin at pupuspusin Niya tayo ng galak at tuwa na kaloob Niya sa bawat isa sa atin. 

Katulad ng ating Mahal na Inang si Maria, hinahamon tayo na dalhin natin ang ating Panginoong Hesus. Maging tagapagdala tayo ni Kristo. Ibahagi natin Siya sa iba. Hindi natin dapat sinasarili si Kristo at ang Kanyang mga pagpapalang hatid Niya. Bagkus, dapat nating ibahagi at ipalaganap si Kristo at ang mga pagpapalang Kanyang kaloob sa iba. Iyan ang kailangan nating gawin bilang mga misyonero ng Panginoon. 

ANG DIYOS NA BUMUBUO NG MGA UGNAYAN

30 Mayo 2021 

Dakilang Kapistahan ng Tatlong Persona sa Isang Diyos (B) 

Deuteronomio 4, 32-34. 39-40/Salmo 32/Roma 8, 14-17/Mateo 28, 16-20 

Ang Linggong ito ay napakaespesyal para sa Simbahan sapagkat binibigyan ng pansin sa araw na ito ay ang pagkakakilanlan o identidad ng Diyos. Sa araw na ito, nakatuon ang pansin ng Simbahan sa pagpapakilala ng Diyos ng Kanyang sarili sa lahat. Ang Diyos ay iisa lamang. Subalit, ang kaisa-isang Diyos na ito na ating pinupuri at sinasamba bilang isang Simbahan ay binubuo ng Tatlong Persona na walang iba kundi ang Ama, Anak, at Espiritu Santo. Kaya nga, ang tawag natin sa tunay at kaisa-isang Diyos na binubuo ng Ama, Anak, at Espiritu Santo ay "Banal na Santatlo." 

Nakatuon ang pansin ng mga Pagbasa para sa pagdiriwang sa espesyal na araw na ito sa pagpapakilala ng Diyos ng Kanyang sarili sa lahat. Ang pagiging isa ng Diyos ay binigyan ng pansin ni Moises sa kanyang pahayag sa Unang Pagbasa. Sabi niya sa mga Israelita na dapat nilang malaman na walang ibang diyos kundi ang Panginoon (Deuteronomio 4, 39). Isa lamang ang Diyos. Wala nang ibang diyos maliban sa Kanya. Siya lamang ang dapat sambahin sa lahat. Sa Ebanghelyo, inihayag mismo ni Hesus sa mga apostol nang suguin Niya sila upang ipakilala Siya sa lahat ng bansa na mayroong Tatlong Persona sa iisang Diyos. Sabi Niya na dapat silang magbinyag "Sa Ngalan ng Ama at ng Anak at ng Espiritu Santo" (Mateo 28, 19). Hindi Niya sinabing "Sa mga Ngalan ng Ama . . ." kundi "Sa Ngalan ng Ama . . ." Isa itong mahalagang detalye tungkol sa identidad ng Diyos. Iisa lamang ang Diyos. Subalit, ang iisang Diyos na ating pinupuri at sinasamba sa lahat ay binubuo ng Tatlong Persona na walang iba kundi ang Ama, Anak, at Espiritu Santo. 

Mahalaga ang ginawang pagpapakilala ng Diyos ng Kanyang sarili. Ang Diyos ay nagpapakilala sa atin bilang isang Diyos na binubuo ng Tatlong Persona. Isa lamang ang Diyos. Ang iisang Diyos ay binubuo ng Tatlong Persona na walang iba kundi ang Ama, Anak, at Espiritu Santo. Ang Ama, Anak, at Espiritu Santo ay hindi nagkukumpetensya o naglalamangan. Walang palakasang nagaganap sa pagitan ng Tatlong Persona na bumubuo sa iisang Diyos. Bagkus, ipinapakita ng Diyos sa lahat ang Kanyang pagiging puspos ng pag-ibig sa pamamagitan ng Kanyang pagkakakilanlan bilang Banal na Santatlo. Napakalinaw na tunay at wagas ang pag-ibig ng Ama, Anak, at Espiritu Santo sa isa't isa. Kaya nga, ang ugnayan ng Banal na Santatlo sa isa't isa ay ginamit ng Diyos upang ipakilala sa tanan ang Kanyang sarili. 

Dahil sa pagpapakilala ng Diyos bilang Tatlong Persona na tunay na nagkakaisa at nag-iibigan, nais Niyang isama ang bawat isa sa atin sa Kanyang pamilya. Iyan ang dahilan kung bakit Siya nagpapakilala sa atin bilang Banal na Santatlo o Trinidad. Nais ng Diyos na mapabilang tayo sa Kanyang pamilya. Ito ang nais bigyang-diin ni Apostol San Pablo sa kanyang pangaral sa Ikalawang Pagbasa. Kalooban ng Diyos na ang bawat isa sa atin ay maging bahagi ng Kanyang pamilya. Niloob ng Diyos na patnubayan tayo ng Espiritu Santo. Niloob ng Diyos na ang bawat isa sa atin ay maging Kanyang mga anak katulad ni Kristo. Ang mga dakilang gawang ito ng Diyos ay patunay ng Kanyang pag-ibig para sa atin. Kung paanong iniibig ng Ama, Anak, at Espiritu Santo ang isa't isa, iniibig naman ng Diyos na binubuo ng Tatlong Personang ito ang sangkatauhan. 

Ipinapakilala ng Diyos ang Kanyang sarili bilang Diyos ng mga ugnayan. Ang tunay at kaisa-isang Diyos na ating pinupuri at sinasamba bilang Simbahan ay binubuo ng Ama, Anak, at Espiritu Santo. Ang ugnayan at pag-iibigan ng Ama, Anak, at Espiritu Santo sa isa't isa ay napakalinaw. Ang pagkakaisa at pag-ibig na ipinakita ng Banal na Santatlo sa isa't isa ay nais ibahagi ng Diyos sa atin dahil sa Kanyang naisin na mapabilang tayo sa Kanyang pamilya. 

ANG PAG-IBIG NI KRISTO PARA SA SIMBAHAN

24 Mayo 2021 

Paggunita sa Mahal na Birheng Mariang Ina ng Simbahan 

Genesis 3, 9-15. 20 (o kaya: Mga Gawa 1, 12-14)/Salmo 86/Juan 19, 25-34 

Isang tanda ng pagiging seryoso ng isang lalaki sa kanyang kasintahan ay ang pagpapakilala sa babae sa kanyang mga magulang. Kapag ipinakilala ng isang lalaki ang kanyang kasintahan sa kanyang mga magulang, napapatunayan niya ang kanyang pagiging seryoso at tapat sa kanyang relasyon sa babaeng naging kanyang kasintahan. Sineseryoso niya ang kanyang relasyon at pag-ibig para sa kanyang kasintahan. 

Sa araw na ito, ang Lunes kasunod ng Linggo ng Pentekostes, nakatuon ang pansin ng Simbahan sa isa sa mga titulo ng Mahal na Birheng Maria na walang iba kundi ang titulong "Ina ng Simbahan." Ang titulong ito ay ibinigay mismo ni Hesus sa Ebanghelyo. Isa sa mga huling sandali sa buhay ng Panginoon dito sa daigdig ang isinalaysay sa Ebanghelyo. Katunayan, ang naturang eksenang ito ay naganap noong nakapako na Siya sa krus. Habang nakabayubay sa krus, ipinagkatiwala ni Kristo ang Mahal na Inang si Maria at si Apostol San Juan sa pangangalaga ng bawat isa. Mula noong sandaling iyon, kinilala si Maria bilang Ina ng Simbahan. Sa sandaling ito, si Maria ay naging Ina ng Simbahan. 

Ang titulo ng Mahal na Birheng Maria bilang Ina ng Simbahan ay isang tanda ng pag-ibig ng Panginoong Hesukristo para sa Kanyang Simbahan. Pinatunayan Niyang tunay Niyang minamahal ang Kanyang Simbahan. Ito ang dahilan kung bakit Niya ibinigay si Maria upang maging Ina ng Simbahan. Ibinigay Niya ang Mahal na Birhen sa Simbahan upang maging kanyang Ina sapagkat tunay ang Kanyang pag-ibig para sa Simbahan. 

Batid ng Panginoong Hesukristo na ang Kanyang Simbahan ay binubuo pa rin ng mga makasalanan sa kabila ng Kanyang pagiging perpekto. Kahit na walang bahid ng kasalanan ang Simbahang Kanyang itinatag, mayroon pa ring mga makasalanan na bumubuo pa dito. Batid Niyang may mga pagkakataon kung saan hindi magiging tapat ang tao katulad na lamang ng isinalaysay sa Unang Pagbasa. Sinuway nina Adan at Eba sa Halamanan ng Eden. Pero, nagbitiw pa rin Siya ng isang pangako sa kanila sa kabila ng kanilang pagsuway o paglabag sa Kanyang utos. Ang pangakong iyon ay natupad sa pamamagitan ni Hesus na iniluwal mula sa sinapupunan ng Kanyang Inang si Maria. Tulad ng ginawa ng Diyos sa Unang Pagbasa, ibinigay rin ng Panginoong Hesukristo sa Simbahang itinatag Niya ang Kanyang Ina. Patunay ito ng pag-ibig ng Diyos para sa atin. 

Katulad ng kanyang ginawa para sa mga apostol sa silid habang hinihintay ang pagdating ng Espiritu Santo, patuloy na nananalangin at sumasama sa atin ang Mahal na Ina. Sa pamamagitan ng kanyang mga panalangin, tayong lahat ay tinutulungan ng Mahal na Inang si Maria. Sinasamahan rin niya ang bawat isa sa atin saanman tayo magtungo. Sa pamamagitan nito, nasasalamin ang pag-ibig ng Panginoong Hesukristo para sa Kanyang Simbahan. Ipinagkaloob Niya ang Mahal na Ina sa Kanyang Simbahan dahil sa Kanyang pag-ibig. 

ANG MISYON NG SIMBAHAN

23 Mayo 2021 

Linggo ng Pentekostes (B) 

Mga Gawa 2, 1-11/Salmo 103/1 Corinto 12, 3b-7. 12-13 (o kaya: Galacia 5, 16-25)/Juan 20, 19-23 (o kaya: Juan 15, 26-27; 16, 12-15) 

Limampung araw matapos ipagdiwang ang pinakadakilang kapistahan sa buong taon na walang iba kundi ang Pasko ng Muling Pagkabuhay, ipinagdiriwang ng Simbahan ang Linggo ng Pentekostes. Isang napakahalagang araw ang Linggo ng Pentekostes sa Kalendaryo ng Simbahan. Ang Linggo ng Pentekostes ay itinuturing na Kaarawan ng Simbahan. Sa araw na ito, sinimulan ng mga apostol ang kanilang misyon bilang mga saksi ni Kristo sa iba't ibang bahagi ng daigdig. Matapos pumanaog ang Espiritu Santo sa mga apostol, lumabas sila mula sa silid na kanilang pinagtitipunan ang mga apostol upang simulan ang misyon ng Ebanghelisasyon o pagpapalaganap ng Magandang Balita. Ang misyong ito ay tinanggap ng mga alagad mula kay Hesus bago Siya umakyat sa langit. Bago Siya umakyat sa langit, inutusan ng Panginoong Hesukristo ang mga apostol na hintayin muna sa Herusalem ang pangako ng Amang sinabi Niya sa kanila (Mga Gawa 1, 4). Ang pangakong iyon ay natupad noong araw ng Pentekostes. Sa araw na iyon, bumaba ang Espiritu Santo mula sa langit upang ipagkaloob sa kanila ang mga biyayang kaloob Niya. Ang mga biyayang ito na ipinagkaloob ng Espiritu Santo ang tutulong sa mga apostol habang tinutupad nila ang misyong ibinigay sa kanila ni Hesus. 

Sabi sa salaysay sa Unang Pagbasa na ang mga apostol ay nagtipun-tipon sa isang silid. Subalit, lumabas sila mula sa silid na ito matapos ang pagpanaog ng Espiritu Santo. Matapos bumaba sa kanila ang Espiritu Santo, sinimulan nilang magpatotoo tungkol kay Kristo. Walang takot silang nangaral sa mga tao noong araw na iyon ang Magandang Balita tungkol kay Kristo. Nagawa nila ang lahat ng iyon ay dahil sa mga biyayang ipinagkaloob ng Espiritu Santo na nagbago sa kanila. Binago sila ng mga biyayang ipinagkaloob sa kanila ng Espiritu Santong pumanaog sa kanila. Sabi ni Apostol San Pablo sa simula ng kanyang pangaral sa Ikalawang Pagbasa, walang makakapagsasabing Panginoon si Hesus kung wala sa kanya ang pamamatnubay ng Espiritu Santo (1 Corinto 12, 3b). Iyon ang dahilan kung bakit ang mga apostol ay nangaral tungkol kay Kristo Hesus nang buong kagitingan at sigla. Ang Espiritu Santo ang Siyang tumutulong at pumapatnubay sa kanila na gawin iyon nang buong tapang at sigla. 

Ipinagpapatuloy ng Simbahan sa kasalukuyan ang misyon ng mga apostol na sumaksi kay Kristo sa iba't ibang bahagi ng mundo. Ang misyon ng Simbahan ay hindi nagbabago. Kung ano ang naging misyon ng mga apostol, iyon din ang misyon ng Simbahan na patuloy Niyang tutuparin. Lumipas man ang maraming taon sa kasaysayan, hindi magbabago ang misyon ng Simbahan. Hindi hihinto ang Simbahan sa pagiging saksi ni Kristo sa iba't ibang bahagi ng daigdig. Ang dahilan nito ay ang pamamatnubay ng Espiritu Santo. Tinutulungan ng Espiritu Santo ang Simbahan na magpatotoo tungkol kay Kristo at ipagalanap sa iba't ibang bahagi ng daigdig ang Magandang Balita. 

Bilang isang Simbahan, mayroon tayong misyon bilang mga saksi ni Kristo. Ang misyong ito ay hindi ekslusibo para sa mga pari, mga madre, mga relihiyoso at relihiyosa. Hindi lamang mga pari, obispo, o kardinal ang maaaring tumupad sa tungkuling ito. Tandaan, ang Simbahan ay hindi lamang binubuo ng mga obispo, pari, madre, at mga relihiyoso't relihiyosa. Tayong lahat ang bumubuo sa nag-iisang Simbahang itinatag ni Kristo. Kaya naman, ang misyong ito na bigay ni Hesus sa mga apostol ay para rin sa atin. 

Ang mga salita ni Hesus sa Ebanghelyo ay para sa atin. Sabi Niya, "Tanggapin ninyo ang Espiritu Santo" (Juan 20, 22). Hindi lamang ito para sa mga apostol kundi sa buong Simbahan. Ang mga salita ni Hesus sa mga alagad nang Siya'y magpakita sa kanila matapos ang Kanyang Muling Pagkabuhay ay para rin sa atin sa kasalukuyang panahon. Si Hesus rin mismo ang nagsabi kung bakit dapat nating tanggapin ang Espiritu Santo. Sabi ni Hesus sa mga apostol na tutulungan sila ng Espiritu Santo na unawain ang buong katotohanan (Juan 16, 13). Bagamat nasabi Niya ito sa mga alagad, hindi Niya ito ginawang ekslusibo sa kanila. Hindi lamang ito para sa mga apostol at sa kanilang mga humalili sa kanila. Kung naging ekslusibo ito para sa mga apostol lamang, hindi sasabihin ni Apostol San Pablo na dapat nating gawing patnubay ang Espiritu Santo sa ating buhay (Galacia 5, 16). Hindi lamang ito ekslusibo para sa mga opisyal sa Simbahan. Bagkus, ito ay para sa lahat ng mga bumubuo ng Simbahan. 

Mayroong misyon ang lahat ng mga bumubuo ng Simbahan. Ang misyong ito ay sumaksi kay Kristo. Mula noong pumanaog sa kanila ang Espiritu Santo noong araw ng Pentekostes, hindi tumigil ang mga apostol sa pagmimisyon bilang mga tagapaghatid ng Mabuting Balita. Sa paglipas ng panahon, ang Simbahan ay hindi tumigil sa pagpapatotoo kay Kristo. Huwag rin tayong tumigil. Bilang mga bumubuo sa Simbahan, ipagpatuloy natin ang misyong ito. Hayaan natin ang Espiritu Santo na baguhin tayo at gawin tayong mga saksi ni Kristo Hesus sa makabagong panahon. Maging panalangin nawa natin ang mga salita sa Salmo para sa araw na ito: "Espiritu Mo'y suguin, Poon, tana'y 'Yong baguhin" (Salmo 103, 30). Kapag lagi nating bubuksan ang ating sarili sa mga pagpapalang bigay ng Espiritu Santo na nagdudulot ng pagbabago sa atin, matutupad natin nang buong kagitingan at sigla ang ating misyon bilang Simbahan. 

HINDI MAGIGING LUMA KAILANMAN

16 Mayo 2021 

Dakilang Kapistahan ng Pag-Akyat (B) 

Mga Gawa 1, 1-11/Salmo 47/Efeso 1, 17-23*/Marcos 16, 15-20 

*Alternatibong Ikalawang Pagbasa: Efeso 4, 1-13 (o kaya: 4, 1-7. 11-13) 

Isa sa mga masisikat na anime na ipinalabas noong dekada 90 ay walang iba kundi ang Neon Genesis Evangelion na kilala ng karamihan bilang Evangelion. Nakakatawag ng pansin ang kahulugan ng pangalan ng palabas na ito. Kung gagamitin natin ang literal na salin ng pangalan ng nasabing palabas, ang ibig sabihin nito ay "Magandang Balita para sa makabagong panahon." 

Ang pagdiriwang ng Dakilang Kapistahan ng Pag-Akyat sa Langit ni Hesus ay nakatuon sa misyon ng Simbahan. Mayroong misyon ang Simbahan na sumaksi kay Hesus. Ang pangunahing misyon ng Simbahan ay ipalaganap ang Mabuting Balita tungkol sa pagliligtas ng Diyos sa pamamagitan ni Kristo Hesus sa bawat sulok ng daigdig. Sa pamamagitan nito, ang Simbahan ay sumasaksi kay Kristo Hesus nang buong sigla at katapatan sa Kanya. 

Matagal nang sumasaksi kay Kristo ang Simbahan. Matagal nang ipinalaganap ng Simbahan sa iba't ibang bahagi ng daigdig ang Mabuting Balita. Katunayan, ang misyong ito ay minana ng Simbahan mula sa mga apostol. Tampok ito sa salaysay sa Unang Pagbasa at Ebanghelyo. Sabi sa salaysay ng Pag-Akyat sa Langit ng Panginoon na matatagpuan sa Unang Pagbasa at Ebanghelyo para sa araw na ito na inatasan Niya ang mga apostol na magtungo sa iba't ibang bahagi ng daigdig upang sumaksi sa Kanya. Bago Siya umakyat sa langit, ang mga apostol ay binigyan ng Panginoong Hesukristo ng isang misyon. Inatasan Niya silang ipalaganap ang Mabuting Balita sa iba't ibang bahagi ng daigdig. Sa pamamagitan ng paglaganap ng Banal na Ebanghelyo sa iba't ibang bahagi ng daigdig, ang mga apostol ay nagpapatotoo tungkol kay Kristo. Naipapakilala nila si Kristo sa bawat lugar na kanilang pinuntahan sa pamamagitan ng kanilang pagsaksi sa Kanya. 

Sa kanyang pangaral sa Ikalawang Pagbasa, nasabi ni Apostol San Pablo na ang Panginoong Hesus ay nakaluklok sa kanan ng Diyos (Efeso 1, 20). Ang Panginoong Hesus na namatay sa krus at muling nabuhay sa ikatlong araw ay nakaluklok sa kanan ng Diyos. Ang nakaluklok sa kanang bahagi ng Ama sa langit ay walang iba kundi ang ipinangakong Mesiyas at Manunubos na si Kristo Hesus na nagligtas sa atin. Tayong lahat ay iniligtas ni Hesus na nakaluklok sa kanan ng Diyos Ama sa pamamagitan ng Kanyang krus at Muling Pagkabuhay. 

Oo, ilang ulit na nating narinig ito. Sa unang tingin, tila paulit-ulit na lamang ang ginagawa na lamang ng Simbahan. Kung tutuusin, matagal na itong ginagawa ng Simbahan. Dahil diyan, maaaring sabihin ng iba na luma na at wala nang halaga ang ipinangangaral ng Simbahan. Para sa iba, dapat nang baguhin ng Simbahan ang Kanyang ipinangangaral sapagkat magmumukha Siyang sirang plaka kung hindi Niya babaguhin ang Kanyang itinuturo. 

Hindi magiging luma ang ipinapangaral ng Simbahan kailanman. Mananatili ang saysay at halaga ng ipinapangaral ng Simbahan. Lumipas man ang maraming taon, magbago man ang panahon, ang Simbahan ay hindi titigil o hihinto sa pagpapatotoo tungkol kay Kristo. Hindi titigil ang Simbahan sa pagpapalaganap ng Mabuting Balita tungkol sa pagligtas ng Diyos sa pamamagitan ni Kristo. Isa lamang ang dahilan kung bakit. Hindi ito magiging luma kailanman. Ang Mabuting Balita tungkol sa Panginoong Hesus ay hindi mawawalan ng saysay o kabuluhan kailanman. 

KAHILINGAN NI INANG MARIA: KAHILINGAN NG DIYOS

13 Mayo 2021 

Paggunita sa Mahal na Birhen ng Fatima 

Huwebes sa Ikaanim na Linggo ng Pasko ng Pagkabuhay

Mga Gawa 18, 1-8/Salmo 97/Juan 16, 16-20 

(Screenshot from: Vatican News YouTube Channel - Pope Francis in Fatima: Visit to the Chapel of Apparitions)

Sa kanyang huling pagpapakita sa Fatima, ipinakilala ng Mahal na Birhen ang kanyang sarili. Ipinakilala ni Maria ang kanyang sarili sa tatlong bata sa Fatima na sina Lucia at ang magkapatid na San Francisco Marto at Santa Jacinta Marto bilang Birhen ng Banal na Rosaryo. Ang kanyang kahilingan ay ang palagiang pagdarasal ng Santo Rosaryo. Sa pamamagitan ng pagdarasal ng Santo Rosaryo, magkakaroon ng pagkakataon ang bawat isa na pagnilayan ang mga mahahalagang sandali sa buhay ng Panginoong Hesus habang pinagdarasal ang kapakanan ng daigdig. 

Kung tutuusin, hindi naman kinailangang magpakita ang Mahal na Ina sa tatlong bata sa Fatima nang anim na ulit. Maaari na lamang niyang sulyapan mula sa langit ang pagkawasak ng daigdig. Maaari na lamang sulyapan ang bawat tao na walang malasakit para sa kapwa at nagpapairal ng karahasan. Katunayan, ang Unang Digmaang Pandaigdig (World War I) ay nagaganap noong panahong iyon. Maaari na lamang pagmasdan ng Mahal na Birhen ang iba't ibang uri ng gulo sa daigdig na kagagawan ng bawat tao. 

Subalit, bakit nagpakita ang Mahal na Ina sa Fatima? Ang dahilan ng anim na pagpapakita ng Mahal na Birheng Maria sa Fatima nang anim na ulit ay katulad ng dahilan ng pagtungo nina Apostol San Pablo at ang kanyang mga kasama sa bawat lugar sa kanilang misyon na isinalaysay sa Unang Pagbasa. Nagtungo sila sa iba't ibang lugar upang ipangaral ang Mabuting Balita ng kaligtasan. Ang habag at awa ng Diyos na nahayag sa pamamagitan ng Panginoong Hesukristo ay kanilang ipinangaral at pinatotohanan saanman sila nagtungo. Kahit na may mga bayang hindi tumanggap sa kanilang ipinangangaral, hindi sila tumigil sa pagtupad ng kanilang misyon bilang mga saksi ni Kristo. 

Patuloy na isinasagawa ng Simbahan sa kasalukuyang panahon ang misyon ng mga apostol. Ang misyong ibinigay ng Panginoong Hesus sa mga apostol ay ipinagpapatuloy pa rin ng Simbahan. Ito ay ang pagpapalaganap ng Mabuting Balita at pagsaksi kay Kristo sa iba't ibang bahagi ng daigdig. Kahit na may mga hindi tatanggap sa ipinangangaral ng Simbahan, ang Simbahan ay hindi titigil sa pagtupad sa misyong ito na ibinigay ni Kristo sa mga apostol. Ang misyong ito ay ipagpapatuloy pa rin ng Simbahan nang buong katapatan sa Panginoon. Isa lamang ang dahilan kung bakit patuloy itong isasagawa ng Simbahan. Kalooban ito ng Panginoon. Kalooban Niyang makilala Siya ng lahat ng tao sa mundo at tanggapin ang biyaya ng Kanyang pagliligtas na tinamo Niya sa pamamagitan ng krus at Muling Pagkabuhay. 

Katulad ng Panginoon, nais ng Mahal na Inang si Maria na maligtas ang lahat ng tao sa pamamagitan ng kanyang Anak na si Hesus. Iyon ang dahilan kung bakit nagpakita siya sa Fatima. Ito ang nais ng Diyos na ninais rin ni Maria. Ang pagpapakita ng Mahal na Birhen sa Fatima ay kalooban ng Diyos. Ang hiling ng Mahal na Birheng Maria sa Fatima ay hiling rin ng Diyos. Kung tutuparin natin ang hiling ng ating Inang si Maria, tinutupad natin ang hiling ng Diyos. 

May pangako ang Panginoong Hesukristo para sa mga tutupad sa kahilingan at kalooban ng Diyos. Ang pangakong ito ay inihayag sa Ebanghelyo. Sabi Niya sa Ebanghelyo na magiging kagalakan ang kalungkutan. Ito ang pangako ni Hesus para sa mga tatanggap at tutupad sa kahilingan at kalooban ng Diyos nang buong katapatan. Hindi magtatagal ang kalungkutan at kapighatian nila habang sila'y nabubuhay sa daigdig. Hindi sila makakaligtas mula sa mga pagsubok, dalamhati, at pighati sa daigdig na ito. Subalit, ang pangako ng Panginoon, hindi magtatagal ang mga sandaling ito, lalo na sa kabilang buhay. Darating ang panahon kung kailan papawiin niya ang lahat ng kalungkutan at hapis ng mga tutupad sa kalooban ng Diyos nang buong katapatan. 

PAGSAKSI NANG BUKAL SA KALOOBAN

9 Mayo 2021 

Ikaanim na Linggo ng Pasko ng Muling Pagkabuhay (B) 

Mga Gawa 10, 25-26. 34-35. 44-48/Salmo 97/1 Juan 4, 7-10/Juan 15, 9-17 

"Tulad natin, sila'y [sina Cornelio at ang kanyang mga kamag-anak at kaibigan] pinagkalooban din ng Espiritu Santo. Sino pa ang makahahadlang na binyagan sila sa tubig?" (Mga Gawa 10, 47) Ang mga salitang ito'y namutawi mula sa mga labi ni Apostol San Pedro nang masaksihan niya ang paglukob ng Espiritu Santo kina Cornelio at sa kanyang mga kapamilya at kaibigan na nagtipon sa kanyang bahay sa mga sandaling iyon. Si Apostol San Pedro ay pumunta sa bahay ni Cornelio na isang Hentil upang mangaral sa kanya tungkol sa Panginoon. Sa gitna ng kanyang pangaral tungkol kay Kristo, nasaksihan ni Apostol San Pedro ang pagbaba ng Espiritu Santo kay Cornelio at sa kanyang pamilya at pati na sa mga kaibigan ng senturyon na nasa bahay niya sa mga sandaling iyon. 

Kahit na sila'y mga Hentil, niloob ng Espiritu Santo na bumaba kina Cornelio at sa kanyang mga kapamilya at kaibigan. Niloob ng Banal na Espiritu na maging bukas sina Cornelio at ang buo niyang sambahayan at mga kaibigan sa Kanya. Niloob ng Panginoong Diyos na tanggapin nina Cornelio at ng kanyang pamilya at kaibigan ang pananampalatayang ipinangaral ni Apostol San Pedro at ng iba pang bumubuo sa Kanyang Simbahan. Sa kabila ng pagiging mga Hentil, sina Cornelio at ang kanyang pamilya at kaibigan ay naging bukas sa Ebanghelyong ipinangaral ni Apostol San Pedro. Kahit na mga Hentil sila, ang Mabuting Balita tungkol sa Panginoong Hesukristo ay kanilang tinanggap at sinampalatayanan. 

Ang Mabuting Balita tungkol sa pagligtas ng Diyos sa pamamagitan ni Kristo na ipinangaral ni Apostol San Pedro at ng iba pang mga apostol ay tinanggap at sinampalatayanan nina Cornelio at ng kanyang mga kaibigan at pamilya. Kahit na sila'y mga Hentil, tinanggap nina Cornelio at ng kanyang mga kaibigan at pamilya ang Panginoong Hesus at sumampalataya sa Kanya. Ang lahat ng ito'y hindi mangyayari kung hindi ito niloob ng Diyos. Nangyari ang lahat ng iyon dahil lamang sa kalooban ng Diyos. Niloob ng Diyos na si Apostol San Pedro ay magtungo sa bahay ni Cornelio upang mangaral tungkol sa Mabuting Balita. 

Bakit nga ba niloob ng Diyos na ipalaganap ng Simbahan sa iba't ibang bahagi ng daigdig ang Mabuting Balita? Pag-ibig. Ang pag-ibig ng Diyos na tinalakay sa Ikalawang Pagbasa at Ebanghelyo ang dahilan. Sabi ni Apostol San Juan sa kanyang pangaral sa Ikalawang Pagbasa na inihayag ng Diyos ang Kanyang pag-ibig "nang suguin Niya ang Kanyang bugtong na Anak upang magkaroon tayo ng buhay sa pamamagitan Niya" (4, 9). Sa Ebanghelyo, inutusan ni Hesus ang mga alagad na mag-ibigan (Juan 15, 17). Dapat tayong mag-ibigan dahil utos ito ng unang umibig sa atin na walang iba kundi ang Panginoon. 

Nais ng Diyos na mag-ibigan tayo. Sa pamamagitan nito, ang Kanyang pag-ibig ay iiral at lalaganap. Sa pamamagitan ng pagpapalaganap ng Kanyang pag-ibig, makikilala Siya ng lahat bilang Diyos na tunay na nagmamahal sa lahat. Kapag ipinalaganap natin ang pag-ibig ng Diyos, sumasaksi tayo sa Mabuting Balita tungkol sa pagligtas ng Diyos sa pamamagitan ng Panginoong Hesukristo na bunga ng Kanyang pag-ibig para sa atin. Subalit, tayo pa rin ang magpapasiya kung susundin natin ang utos na ito ng Panginoon sa atin. Kung ang ating mga puso at ang buo nating sarili ay bubuksan natin sa Panginoon, magiging bukal ang ating pagtupad sa utos Niyang ito. Sa pamamagitan ng pagtupad natin sa utos ng Panginoon nang bukal sa puso, sumasaksi tayo sa Kanyang dakilang pag-ibig na dahilan ng Kanyang pagligtas sa atin.